Category: செய்திகள்

நம்பிக்கை வாசல் டிரஸ்ட் அமைப்பின் பத்தாம் ஆண்டு கொண்டாட்டமாக ஐம்பெரும் விழா சேலம் சண்முக மருத்துவமனை கலையரங்கில் 29.1.2023 ஞாயிறு அன்று நடைபெற்றது.

நம்பிக்கை வாசல் டிரஸ்ட் நிறுவனர் கவிஞர் ஏகலைவன் வரவேற்புரை ஆற்றினார்.

சேலம் சண்முகா மருத்துவமனை நிறுவனர் டாக்டர் பன்னீர்செல்வம் நிகழ்விற்குத் தலைமைத் தாங்க, விவசாயி திரு. பழனிச்சாமி, தாரை குழுமம் தலைவர் திரு.தாரை குமரவேல், இந்திய மாதர் சங்க செயலாளர் திருமதி குப்புரத்தினம் பிரபாகரன் ஆகியோர் முன்னிலை வகித்தனர்.

பத்திரிகையாளர், பதிப்பாளர், கலைமாமணி முனைவர் லேனா தமிழ்வாணன் மற்றும் திரைப்பட நடிகை, தன்னம்பிக்கை பேச்சாளர் சசிலயா ஆகியோர் சிறப்பு விருந்தினர்களாக பங்கேற்று, “பத்திரிகைகள் பாராட்டும் நம்பிக்கை வாசல் டிரஸ்ட்” எனும் புத்தகத்தை வெளியிட்டனர்.

நம்பிக்கை வாசல் டிரஸ்ட் சார்பில் அயோத்தியாபட்டணத்தில் அமைந்துள்ள நம்பிக்கை முதியோர் இல்லத்தினை தொடங்கி வைத்து சிறப்புரையாற்றிய கலைமாமணி முனைவர் லேனா தமிழ்வாணன் அவர்கள், “நம்பிக்கை வாசல் டிரஸ்ட் அமைப்பானது தன்னலம் பாராது பல நல்ல பணிகளை செய்து வருகிறது. இந்த அமைப்பை நடத்தி வருகிற கவிஞர் ஏகலைவன் தனியொரு மனிதராக ஊனமுற்றவராக இருந்தாலும், நம்பிக்கை நட்சத்திரமாக வலம் வருகிறார். கொரோனா காலகட்டத்திலும் பல்வேறு இன்னல்களுக்கு மத்தியி்ல் நம்பிக்கை வாசல் டிரஸ்டின் நற்பணிகள் தொடர்ந்து நடைபெற்று பல்வேறு பயனாளிகளுக்கு பயனளித்தது பெரிய சாதனை. உதவி தேவைப்படும் மனிதர்களைத் தேடிச் சென்று அவர்களுக்கு சரியான உதவியை செய்து வரும் நம்பிக்கை வாசல் டிரஸ்டின் சார்பாக நம்பிக்கை முதியோர் இல்லம் தொடங்கவிருப்பது இன்னும் பல பயனாளிகளுக்கு பேருதவியாக அமையும். இத்தகைய அமைப்பிற்கு தற்போது சொந்த நிலம் தேவைப்படுகின்ற ஒரு சூழலில், நல்ல உள்ளங்கள் முன்வந்து அந்த அமைப்பிற்கு இடம் கொடுத்து உதவி செய்தால், இந்த சமூகத்திற்கு செய்த நற்பணியாகவே அமையும். சின்னச் சின்ன உதவிகளைச் செய்துவிட்டு, பெரியளவில் விளம்பரப்படுத்துவோருக்கு மத்தியில், சரியான நபர்களுக்கு பேருதவிகளை செய்துவிட்டு எந்தவித விளம்பரமும் இன்றி செயல்பட்டு வரும் நம்பிக்கை வாசல் டிரஸ்ட் அமைப்பானது நம் எல்லோராலும் ஆதரிக்கப்பட வேண்டிய அமைப்பு” என்று பேசினார்.

சிறப்பு விருந்தினராக கலந்து கொண்ட திரைப்பட நடிகை தன்னம்பிக்கை பேச்சாளர் சசிலயா, “இந்த சமுதாயத்தில் மாற்றுத்திறனாளிகள் தான் இன்றைய சூழலில் நம்பிக்கையின் ஆதாரமாக திகழ்கிறார்கள். அத்தகையோரில் கவிஞர் ஏகலைவன் அவர்களின் நம்பிக்கை வாசல் டிரஸ்ட் அமைப்பானது நல்ல பல பணிகளை செய்து வருகிறது. தனியொரு மனிதராக வாழ்வில் வளர்ச்சி அடையும் போதும், சமுதாயத்திற்கு நல்ல பணிகளை செய்யும்போதும், எத்தனை விமர்சனங்கள் வந்தாலும், அந்த விமர்சனங்களை எல்லாம் கடந்து தொடர்ந்து நாம் செயல்பட வேண்டும். அதுவே வாழ்வில் வெற்றி தரும்” என்று பேசினார்.

விழாவில் சமூகப் பணியாற்றும் பல்வேறு சாதனையாளர்களுக்கும், தன்னார்வலர்களுக்கும் விருதுகள் வழங்கப்பட்டன.

அரசுப் பள்ளியின் பயிலும் ஏழை எளிய மாணவர்களுக்கு அவர்கள் தொடர்ந்து கல்வி பயில நிதி உதவி செய்யப்பட்டது.

விழாவில் பங்கேற்ற பலரும் நம்பிக்கை வாசல் டிரஸ்ட் நற்பணிகள் தொடர்ந்து நடைபெற நிதி வழங்கினர்.

நம்பிக்கை வாசல் டிரஸ்டின் கௌரவ தலைவர் ஏ.ஆர். முத்துராமன் அவர்கள் நன்றியுரை ஆற்றினார்.

கவிஞர் ச.கோபிநாத், கவிஞர் இரா. பூபதி ஆகியோர் விழாவினை தொகுத்து வழங்கிட, மதிய உணவோடு விழா இனிதே நடைபெற்றது.

தொடர்புக்கு

கவிஞர் ஏகலைவன்
தலைவர்
நம்பிக்கை வாசல் டிரஸ்ட், அயோத்தியா பட்டணம், சேலம்
கைபேசி 9842974697, 8682994697

தற்போது சென்னையில் நடைபெற்றுக் கொண்டிருக்கும் சர்வதேச புத்தகக் கண்காட்சியில் இலங்கையைச் சேர்ந்த தமிழ் எழுத்தாளரான எம்.ரிஷான் ஷெரீபின் இரண்டு மொழிபெயர்ப்பு நாவல்கள், இரண்டு மொழிபெயர்ப்பு சிறுகதைத் தொகுப்புகள், ஒரு மொழிபெயர்ப்புக் கட்டுரைத் தொகுப்பு என முக்கியமான ஐந்து புதிய மொழிபெயர்ப்பு நூல்கள் வெளியாகியிருக்கின்றன.

இலங்கையின் மலையகத்தில் வாழும் இந்தியத் தமிழர் வாழ்வியலைக் குறித்து முதன்முறையாக சிங்களத்தில் ஒரு நாவல் எழுதப்பட்டிருக்கிறது. ‘எதிர் வெளியீடு’ பதிப்பகம் மூலமாக வெளியிடப்பட்டுள்ள ‘சாமிமலை’ எனும் அந்த நாவலின் தமிழ்  மொழிபெயர்ப்பு நாவல் வெளியீட்டு நிகழ்வில், சிங்களத்தில் அந்த நாவலை எழுதிய சிங்கள எழுத்தாளர் சுஜித் ப்ரசங்க இலங்கையிலிருந்து வந்து கலந்து கொண்டுள்ளமை குறிப்பிடத்தக்கது. தமிழ் இலக்கிய வரலாற்றில் இவ்வாறான ஒரு நிகழ்வு நடைபெற்றிருப்பது இதுவே முதன்முறையாகும். அதே பதிப்பகம் மூலமாக சிங்கள எழுத்தாளர் சுஸந்த மூனமல்பேயின் சிறுகதைகளைத் தமிழில் மொழிபெயர்த்து, அது ‘ஐந்து விளக்குகளின் கதை’ எனும் தலைப்பில் ஒரு நூலாக வெளியிடப்பட்டுள்ளமையும் குறிப்பிடத்தக்கதாகும்.

‘வம்சி’ பதிப்பகம் மூலமாகவும் மேலும் இரண்டு முக்கியமான  நூல்கள் ரிஷான் ஷெரீபின் மொழிபெயர்ப்பில் வெளியிடப்பட்டுள்ளன. இலங்கையில், போர் உக்கிரம் பெற்றிருந்த காலப்பகுதியில் வடக்கில் எவருமே பணி புரிய முன்வராத சமயத்தில், மிகவும் தைரியமான இளம்பெண்ணாக அங்கு மருத்துவ  சேவையாற்றியவர் மருத்துவர் போதினி சமரதுங்க. அங்கு தனது சேவைக்காலத்தில் பல முன்னாள் போராளிகளுக்கும், சிறுவர் போராளிகளுக்கும் உள மற்றும் உடல் நல சிகிச்சைகளை மேற்கொண்டு அவர்களைக் காப்பாற்றியிருக்கிறார். அந்த அனுபவங்களைத் தொகுத்து ஒரு நூலை எழுதியிருக்கிறார். நாம் அறிந்திருந்திராத உலகுக்குள் நம்மை அழைத்துச் செல்லக் கூடிய அந்த நூலில் இடம்பெற்றிருக்கும் உண்மைச் சம்பவங்கள் ‘இப்படியும் நடக்குமா?’ என்ற திகைப்பை ஏற்படுத்துபவை. அந்த நூல் ‘மருத்துவக் குறிப்புகள் அல்லாதவை’ எனும் தலைப்பில் வம்சி பதிப்பக வெளியீடாக தற்போது தமிழில் வெளிவந்திருக்கிறது. அத்தோடு, உலகின் தலைசிறந்த எழுத்தாளர்களின் தேர்ந்தெடுக்கப்பட்ட உலகச் சிறுகதைகளின் தொகுப்பான ‘அடிமைகள்’ தொகுப்பும் எம். ரிஷான் ஷெரீபின் மொழிபெயர்ப்பில் வம்சி பதிப்பக வெளியீடாக தற்போது வெளிவந்திருக்கிறது.

இவற்றோடு, முஸ்லிம்களின் படுக்கையறைக்குள் எட்டிப் பார்க்கும் நாவல் என சர்ச்சைக்குள்ளாகியிருந்த ‘மூன்றாவது மனைவி’ எனும் இஸ்லாமிய நாவலானது ஆசியப் பெண்ணான சீதா எனும் தமிழ்ப் பெயருடைய சிங்கள எழுத்தாளரால் ஆங்கிலத்தில் எழுதப்பட்டிருந்தமை அந்தக் கால கட்டத்தில் பலராலும், பலவிதமான விமர்சனங்களுக்கு உள்ளாகியிருந்தது.

இஸ்லாமியக் குடும்பங்களில் காணப்படும் ஆண்களின் பலதார மணம் இந்தக் கதையின் பிரதான கருவாக அமைந்திருக்கிறது. எழுத்தாளர் நேரில் சந்தித்த பெண்ணொருத்தியின் உண்மைக் கதையே இவ்வாறு ஒரு நாவலாக எழுதப்பட்டிருக்கிறது. இந்த நாவலானது தமது பெற்றோரின் கடன்களை அடைப்பதற்காக இளம் வயதிலேயே திருமணம் செய்து கொடுக்கப்படும் பாலகிகள் பற்றிய கதையையே கொண்டிருக்கிறது. அவ்வாறே அந்நிய மத, கலாசாரத்தைச் சேர்ந்த பெண்ணொருவரால் எழுதப்பட்டிருக்கும் இந்த இஸ்லாமிய நாவல் இலங்கையில் இவ்வாறு எழுதப்பட்ட முதலாவது நாவல் என்று கருதப்படுகிறது. இந்த நாவலும் தற்போது நடைபெற்றுக் கொண்டிருக்கும் சென்னை சர்வதேச புத்தகக் கண்காட்சியில் நன்னூல் பதிப்பக வெளியீடாக வெளிவந்திருக்கிறது.

பலரதும் கவனத்தை ஈர்த்திருக்கும் இந்த முக்கியமான மொழிபெயர்ப்பு  நூல்கள் அனைத்தையும் தற்போது எதிர் வெளியீடு, வம்சி, நன்னூல், புது உலகம் அரங்குகளில் பெற்றுக் கொள்ளலாம்.

தமிழின் புரவலராக விளங்கிய பொள்ளாச்சி அருட்செல்வர் நா. மகாலிங்கம் நூற்றாண்டுவிழா சென்னை கலைவாணர் அரங்கில் ஜனவரி 8, 2023 (ஞாயிற்றுக்கிழமை) காலை வேளையில் கோலாகலமாகச் சென்னை கலைவாணர் அரங்கில் நிகழவுள்ளது. அருட்செல்வர் நா. ம. ஐயா தமிழிசையின் மூல நூல்களில் ஒன்றாகிய பஞ்சமரபினை இருமுறை அச்சிட்ட ஞானதான வள்ளல். வணிகம் என்றால் கப்பலில் வெளிநாட்டுக்குச் சென்று செய்வது சிறப்பு. எல்லா நாட்டிலும் உழவு என்றாலும், ‘ஆ கெழு கொங்கர்’ உழவே தலைசிறந்தது என்று தொல்காப்பியத்தின் முதல் உரைகாரர் இளம்பூரண அடிகள் (Ref. 1) ‘வங்கத்து வணிகம், கொங்கத்து உழவு’ என வாழ்த்தினார். கொங்குச் சமணர் அடியார்க்கு நல்லாரைக் கொண்டு முத்தமிழ்க் காப்பியம் ஆய சிலப்பதிகாரத்துக்கு உரை எழுதுவித்தான் மோரூர்ப் பொப்பண காங்கேயன். அவன் அளித்த ‘சோற்றுச் செருக்கு அல்லவோ தமிழ் மூன்றுக்கு உரை சொல்வித்ததே’ என்றார் அடியார்க்கு நல்லார். அதே போன்ற கட்டளைக் கலித்துறைச் செய்யுளை நா. ம. ஐயா மீது, திருவருட்பா முழுதுமாக எழுதுவித்தோன் என உரைவேந்தர் ஔவை துரைசாமிப்பிள்ளை வாழ்த்தியுள்ளார். அருட்செல்வர் நூற்றாண்டுவிழாவில், தமிழக முதல்வர் மு. க. ஸ்டாலின் அவர்களிடம் காலிங்கராயன் விருது பெறுகிறேன். எந்த முயற்சியும் எடுக்காமலே, என் கட்டுரையை கலைஞர் மு. க. கே-டிவியில் வாசித்து, அதுபற்றி முரசொலியில், அருமை உடன்பிறப்புக்கு 2012-ல் கடிதம் எழுதினார் (Ref. 2). முதல்வர் தலைமையேற்று நடாத்தும் விழாவில், தமிழ்மக்களை ஆளும் பல மந்திரிமார் பங்கேற்றுச் சிறப்பிக்க உளர்.

வானி நதிக்கு இணையொப்பாக (parallel) 55 மைல் தூரத்தில் கால்வாய் வெட்டிய காலிங்கராயர்கள் எனக்குப் பெரியப்பா ஆவர். இன்றைய அரசியல்வாதிகள் அறிந்து செயல்படவேண்டிய செய்தியைக் காலிங்கராயன் வரலாறு 800 ஆண்டு முன்னரே தெரிவித்துள்ளது. காலின் மெக்கென்சி, இந்தியாவின் முதல் ஸர்வேயர் ஜெனரல், தொகுத்த காலிங்கராயன் கைபீதில் காண்க. பொங்கல் வாக்கில் விரிவாகச் சொல்வேன். இப்பொழுது பொள்ளாச்சியில் முசுவாக உள்ளேன். ஜனவரி 8 கலைவாணர் அரங்க விழாவுக்கு வாருங்கள். வாழ்த்தினைத் தாருங்கள். விழா அழைப்பிதழில் சில தாள்கள் இணைப்பில். நனிநன்றி.

Dr. நா. கணேசன்
https://nganesan.blogspot.com
Posts by naa_ganesan
https://archive.org/details/@dr_n_ganesan

Ref. 1: http://nganesan.blogspot.com/2009/11/ilampuranar.html
Ref. 2: https://nganesan.blogspot.com/2012/06/tamil-new-year-debate-murasoli.html