வல்லமை

Category: Featured

Featured

  • சிறப்பு தரும் சித்திரைப் புத்தாண்டு

    ராஜராஜேஸ்வரி ஜெகமணி

    ar

    சித்திரை மாதத்தின் முதல் நாள் புத்தாண்டாக
    சிறப்புறக் கொண்டாடுகிறோம்..

    நாம் மட்டுமல்ல ..இயற்கை அன்னையும் பழுத்த பழைய இலைகளை உதிர்த்து மண்ணுக்கு உரமாக்கிவிட்டு பச்சைப்பசும் இலைத்தளிர் ஆடைகளை அணிந்து கண்களிக்கும் வண்ணம் காட்சிதருகிறாள்…

    மரம் முழுக்க இலைகளே தெரியாமல் சரக்கொன்றை மரம் தங்கநகைகளை தாராளமாக அணிந்த புதுமணப்பெண்ணாய் ஏராள புன்னகையொடு வரவேற்பதைக் கண்குளிரக்காணும்போதே சித்திரை பிறக்கப்போகிறது என கட்டியம் கூறும்..

    வாகை மரத்தின் பூக்கள் சித்திரையை சாமரம் வீசி வரவேற்கும்..

    அப்போதுதான் முட்டையிலிருந்து வெளிவந்து அனுபவம் கற்காத இளம் குஞ்சுப்பற்வைகள் கண்திறந்ததும் செந்நிறமலர்கள் மரம் முழுவதும் பூத்திருப்பதைப் பார்த்து காடே தீப்பற்றிவிட்டதோ என அலறி தாயின் சிறகிற்குள் தஞ்சமடைந்து மழலை மிழற்றுவதைக் கேட்டு இயற்கை அன்னை ஆனந்தமடைந்து தன் வண்ணமலர்களால் அர்ச்சித்து மண் மகளையும்
    நதி மகளையும் பூவாடை போர்த்துகிறாள்..

    வேப்பம்பூக்கள் கொத்துக்கொத்தாய் மலர்ந்து மணம்பரப்பி மகிழ்ச்சியூட்டும்..

    சித்திரை முதல்நாளில் வேப்பம்பூக்களையும் , வாழைப்பழத்தையும் ,கரும்பு சர்க்கரையும் , புளிப்புக்கு சிறிது மாங்காயும் கலந்து அறுசுவையாக முதல் உணவாக எடுத்துக்கொள்வது ஆண்டுமுழுவதும் பிணிகளை அறுத்து நோய் எதிர்ப்புச்சக்தியை தரும் என்பது நம்பிக்கை..

    முக்கனிகளும் கனிந்து வாசம் வீசும் திருநாள்..

    சித்திரையின் முதல் நாளில் நித்திரைநீங்கி எழுந்ததும் முதல்காட்சியாகக் காணும் கனிகாணல் நிகழ்ச்சி ஆண்டின் மங்களகரமான தொடக்கத்திற்கு அச்சாரமாக திகழ்கிறது..

    பெரியோர்களிடம் ஆசிபெற்று கைநீட்டம் என்று நாணயம் பெறுதல் செல்வ வளம் ஆண்டுதோறும் சிறப்பாக இருப்பதை குறிக்கிறது..

    unnamed (1)

    ஆலயங்களில் சிறப்புப்பூஜைகளும் , நாணயம் பெறுதலும் இறைவனின் அருளை பெற்றுத்தருகிறது..

    சித்திரைப்புத்தாண்டு அன்று சிறப்பு விருந்து உணவுகளும் பூஜை அறை அலங்காரங்களும் அன்று தொடங்கும் உறுதியான முதலடி ஆண்டு தோறும் தொடர்ந்து வருவதான தன்னம்பிக்கையைத்தருகிறது..!

    சித்திரை மாதத்தில் புத்தாண்டு தொடங்குவது என்பது வானநூலையும் பருவங்களின் சுழற்சியையும் அடிப்படையாகக் கொண்டது.

    இயற்கையை ஒட்டி, சித்திரை மாதத்தைத் தொடக்க மாதமாகக் கொண்டமைந்ததமிழ்புத்தாண்டு தினத்தன்று வீடுகளை மாவிலை தோரணங்களால் அலங்கரிப்பது வழக்கம்.

    பூஜை அறையில் உள்ள படங்களை மங்களகரமான மஞ்சள் நிற மலர்களால் மலர்களாலும் ரூபாய் நாணயங்களினாலும், பழங்களினாலும் அலங்கரித்து வருடத்தின் முதல்நாள் இவற்றில் கண் விழித்தால் வீட்டில் மங்களம் பொங்கும் என்பது பாரம்பரியமான நம்பிக்கையாகும்.

    unnamed (2)

    வசந்த காலத்தை வரவேற்கும் விதமாக மஞ்சள் நிற பூக்கள் அதிகமாய் பூத்துக்குலுங்கும். பூக்களினால் பூஜை அறையை அலங்கரிக்கிறோம்..

    தாமரை மலரில் லட்சுமி தேவி வாசம் செய்கிறாள் என்பதால் நடுநாயகமாக லட்சுமி தேவியின் படத்தை வைத்து தாமரை மலர்களால் அலங்கரிக்கலாம்.

    கோடை காலத்தில் அதிகம் கிடைக்கும் மாங்கனி. பசும் மஞ்சள் நிறத்தில் பார்க்கவே கண்ணைப் பறிக்கும்.

    அதேபோல் ஆரஞ்சு, எலுமிச்சை, வெள்ளரிக் கனி,போன்றவைகளை தட்டில் வைத்து நடுவில் சிகரம் வைத்ததுபோல மாதுளம் பழங்களையோ, ஆப்பிள் பழங்களையோ அடுக்கலாம்.

    செல்வத்தின் திரு உருவான லட்சுமி தேவி வீட்டில் வாசம் செய்ய தாம்பாளத்தில் சில்லறை நாணயங்களைக் கொட்டி அதனைச் சுற்றி ரூபாய் நோட்டுக்களை அடுக்கலாம்

    பலவகை பழங்களை ஒரு தட்டில் வைத்து அலங்கரித்து மையப்பகுதியில் புதிய ரூபாய் நோட்டுக்களை வைத்து, அதன் மேல் தங்க, வெள்ளி நகைகளை வைத்து அலங்கரிப்பார்கள்.

    வருடப்பிறப்பிற்கு முதல்நாள் இரவே பூஜை அறையில் ஒரு கண்ணாடியை வைத்து அதன் முன்பாக இந்த பழத்தட்டினை வைத்து விடுவார்கள்.

    விடிந்த உடன் குழந்தைகளின் கண்களை மூடிக்கொண்டு பூஜை அறைக்கு அழைத்து செல்லும் அம்மா அந்த பழத்தட்டிலும், கண்ணாடியிலும் விழிக்கச் சொல்வார்கள்.

    இதுபோன்ற மங்கலப் பொருட்களைப் பார்த்தால் மகிழ்ச்சி அதிகரிக்கும் என்பது நம்பிக்கை.

    அன்றைய தினம் கனி காணுதலும், கை நீட்டம் நிகழ்ச்சியும் புது வருட தினத்தன்று உற்சாகத்தைத் தருவது ஆண்டு முழுதும் தொடரும்

    Share

  • ஈழநாட்டு சித்தர் சிவயோகசுவாமி – பகுதி 2:

    இரமேஷ் சிவநாதன்

    சிவயோகசுவாமி
    சிவயோகசுவாமி

    தன் குருநாதர் செல்லப்பசுவாமியைப்பற்றி யோகசுவாமி தன் அடியார்களிடம் விவரித்திருக்கிறார். “ பிறரை நாம் கவரவேண்டும் என்றால் அவர்களுக்குப் பெரும்பாலும் ஏதாவது பிடித்த ஒரு பொருளைக் கொடுத்து கவர்வோம். ஆனால் என் குருநாதன் என்னிடமுள்ள எல்லாவற்றையும் கழற்றியெறிந்து போட்டு என்னைக் காந்தம்போல் கவர்ந்திழுத்தான். என்னை சேவை செய்யவோ, முன்னே நிற்கவோ, எதிர்காலத்தைத் தெரிந்துகொள்ளவோ, சித்திகள் பெற்றிருக்கவோ, பிற யோகியர் அல்லது சாதுக்களிடம் பழகவோ அவர் விடவில்லை. அவர் என்னை சுற்றித்திரியக்கூட விடவில்லை” என்று கூறியிருக்கிறார்.

    செல்லப்பசுவாமி  யோகநாதரிடம் தான் குரு என்று ஒருநாளும் கூறியதில்லை. அப்படி யெல்லாம் அவரிடம் பேசியதும் கிடையாது. ஆனால் யோகநாதனை நாளும் பக்குவப்படுத்திக்கொண்டு வந்தார். யோகசுவாமியும் செல்லப்பரின் எண்ணங்களுக்கு ஒப்ப,  குணத்துக்கு, உணர்வுக்கு ஒப்ப,  திட்டங்களுக்கு, பேச்சுக்கு, நடையுடைக்கு ஏற்ப குருசொற்படி நடந்துகொண்டு, குரு வாயிலிருந்து அவ்வப்போது உதிரும் அமுதமொழிகளைக் கேட்டு பரவசப்பட்டுக்கொண்டிருந்தார்.

    யோகசுவாமியின் மனம், மொழி, மெய் ஆகியன எல்லாம் ஒருமுக சிந்தனையுடன் ஒழுக்கத்தோடிருக்க செல்லப்பர் பழக்கினார். சற்றேனும் ஆணவம், குணக்கேடுகள் இருந்தாலும் அவற்றை சீடனுக்குத் தெரியாமலேயே உணரா வண்ணம் உடனே செல்லப்பர் தகர்த்தெறிந்துவிடுவார். யோகசுவாமியின் பொறிபுலன்கள், மனம், சித்தம், புத்தி, அகங்காரம் ஆகிய அனத்தும் மெய்ப்பொருள் ஒன்றைத்தவிர வேறு எதிலும் சார்த்திருக்கக்கூடாது என்பதில் செல்லப்பர் மிக கவனமாக இருந்தார்.

    குருநாதரோடு இருக்கும்போதெல்லாம் ஓய்வு என்பதில்லை, ஒரு திட்டமுமில்லை, ஒரு வழக்கமுறையுமில்லை. செல்லப்பரோடு ஒருநாள் வாழ்ந்தாலும் அது யோகசுவாமிக்கு பல்லாண்டு அனுபவத்துக்கு நிகராக இருந்தது.

    irameshபொறிபுலன்களுக்கு அடிமையாகாமல் மனம் பக்குவப்படவும் சிந்தை திரியாமல் ஏகாக்கிரமாக இருக்கவும் செல்லப்பர் பல வழிகளைக் கையாண்டு யோகசுவாமிகளைப் பழக்கினார். நல்லூர் கோயில் தேரடியில்தான் இருவரும் இருந்தனர். சிலசமயங்களில் சொந்தமாக சமைத்து சாப்பிடுவதுண்டு. காய்கறி வாங்க யோகசுவாமியை ஏறக்குறைய இரண்டு மணிநேரம் நடந்தே கூட்டிச்செல்வார் செல்லப்பர். சந்தையில் தனக்கு மிகவும் பிடித்த கத்தரிக்காயை வாங்கிக்கொண்டு வந்து பானையில் போட்டு சோற்றொடு சமைப்பார்கள். சமையல் மணம் மூக்கைத் துளைத்து யோகசுவாமியின் வாயில் உமிழ் சுரந்தாலும் உடனே பானயை உடைத்துவிடுவார். அன்று அவ்வளவுதான். சாப்பாடு ஏதுமில்லை .இப்படி  மனத்தை பொறிபுலங்களுக்கு அடிமையாகாமல் அதிலிருந்து விலகி நிற்க, மனவடக்கப் பயிற்சி அடிக்கடி கொடுத்து யோகநாதனைப் பக்குவப்படுத்திக்கொண்டே வந்தார் செல்லப்பர்.

    ஒருமுறை  வடக்கே இருக்கும் கீரிமலைக்கு குருவும் சீடரும் நடந்தே சென்றனர். பலமணிநேரம் வெய்யிலில் நடந்து கீரிமலையை அடந்தனர். கடுமையான வெயில் என்பதால் போனதுமே கீரிமலைக் குளத்தில் குளித்துவிடவேண்டும் என்று நினைத்துக் கொண்டுவந்தார் யோகசுவாமி. கீரிமலையும் வந்துசேர்ந்தாயிற்று. செல்லப்பரும் யோகசுவாமியும் குளத்துக்கு அருகே சென்றனர். குளத்தில் போய்விழவேண்டும் என்று யோகசுவாமிக்கு ஆசை.

    உடனே செல்லப்பர் “ என்ன குளத்தைப் பார்க்கத்தானே வந்தோம். பார்த்தாயிற்று, வா போகலாம்” என்று சட்டென திரும்பி நடந்து சென்றுவிட்டார். குருசென்றுவிட்டால் பிறகு சீடருக்கு அங்கே என்ன வேலை?

    இப்படி புத்தி சுவாதீனம் அற்றவரைப்போலவே, பைத்தியக்காரன், விசரனைப்போலவே சுமார் நாற்பது ஆண்டுகள் தன் சுய ரூபத்தைக் காட்டாமலே தன் குருநாதன் செல்லப்பன் சென்றுவிட்டான் என்று யோகசுவாமி கூறியிருக்கிறார். ஆனால்  கூடவே இருந்த யோகசுவாமிக்கு மட்டுமே அவர் ஒரு மாபெரும் சித்தர் என்ற உண்மை தெரிந்திருந்தது. அவரை ராஜகுரு என்றே வர்ணித்திருக்கிறார்.

    1915ல் செல்லப்பசுவாமிகளின் மறைவுக்குப்பிறகு அவரின் அருள்வாக்குகளை ஞானமுத்துக்களாகக் கோர்த்து  வெளியே கொண்டுவந்தவர் யோகசுவாமிகள். குரு உபதேசித்த அதே மகாவாக்கியங்களை அடியார்களுக்கும் போதித்தார்.

    நற்சிந்தனைப் பாடல்கள் ஒன்றில் தன் சற்குரு செல்லப்பசுவாமியைப் பற்றி யோகசுவாமி குறிப்பிட்டிருப்பதாவது:

    ஒருகறியும் ஒருசோறும் ஆக்கியுண்ணும் ஆசான்

    ஒருபொல்லாப்பு மில்லையென்றான் உணர்.

     

    ஓதாமல் வேதம் உணர்ந்த குருநாதன்

    உண்மை முழுதுமென்றான் உணர்.

     

    நாமறியோம் என்ற நல்ல திருவாக்கை

    நாமறியச் சொன்னான் நய.

     

    முடிந்த முடிவென்று முன்னாளில் ஆசான்

    அடியவர்முன் சொன்னா னறி.

     

    தேரடியில் வீற்றிருப்பான் சிரிப்பான் சினந்திடுவான்

    ஆரறிவார் என்பா னவன்.

     

    ஒருநாள் அதிகாலை நான்கரை மணிக்கு முதன்முறையாக சந்திக்க வந்த ஒருவரை உட்காரவைத்து சுமார் ஒரு மணிநேரம் வழக்கமான தியானத்துக்குப்பின் அவர் உபதேசித்தது:

    “ ஒருவருக்கும் ஒரு குறையுமில்லை. உன்னைப் போலத்தான் நான். என்னைப் போலத்தான் நீ, நூதனமொன்றுமில்லை. எல்லாம் எப்பவோ முடிந்த காரியம். எண்ணாயிரம் வருஷங்களுக்கு முன்னே, டெல்லிமாநகரில், செப்புத் தகட்டிலே எழுதிவைத்திருக்கு. அதன்படி நடக்கும். எமக்கென்ன கவலை?  பிரபஞ்சம் முழுவதையும் படைத்தவன் அவன். காப்பவனும் அவன். அழிப்பவனும் அவன். எனக்கும் உனக்கும் வேலை சும்மா இருத்தல்தானே. இரவில் நீ நித்திரைக்குப் போனபின் நடப்பது ஒன்றும் உமக்குத் தெரியாது. உன் வீடு வாசல், பொருள் பண்டம், காசு பணம், ஆடு மாடு யாவுக்கும் காவல் யார்? ஆரோ ஒருவன் இவற்றைப் பாதுகாத்து வைத்திருக்கிறான்தானே? காலையில் எழுந்தவுடன் நீ ஏன் என் வீடு, என் மாடு, என் மனைவி, என் பிள்ளையென்று எல்லாவற்றையும் உனது தலைப்பொறுப்பென்று நினைத்துக் கூத்தாடுவான்? இரவில் காப்பாற்றியவன் பகலில் காப்பாற்ற மாட்டானா? “ என்று அவருக்குக் கூறினார்.

    அதிசயங்கள் பல சுவாமிகள் நடத்தியிருந்தாலும் தன் யோகசக்திகளை அவர் ஒரு போதும் வெளிப்படையாகக் காட்டிக்கொண்டதில்லை. ஒருமுறை இரண்டு பயணிகள் பஸ்ஸில் ஏறி வவுனியாவிலிருந்து யாழ்ப்பாணம் சென்றனர். அப்போது யோகசுவாமிகளும் வவுனியாவில் நின்று கொண்டிருந்ததைக் கண்டனர். ஆனால் சுவாமிகள் பஸ்ஸில் ஏறவில்லை. பின்னர் பஸ் யாழ்ப்பாணம் அடைந்தபோது யோகசுவாமிகள் திடீரென அங்கே நின்று கொண்டிருக்கக் கண்டனர். வாயடைத்துப் போயினர். தமக்குள் அவர்கள் ‘இவர் மகா சித்தர். பஸ் ஏறாமலே அவர் இங்கு வந்துவிட்டார்!” என்று பேசிக்கொண்டதை யோகசுவாமிகளுக்கும் கேட்டதாம்.

     “ பஸ் வண்டியிருக்கு. புகைவண்டியிருக்கு, நான் ஏன் ஆகாயத்தில் ஒருவருங் காணாமல் பறக்கவேணும்? “ என்று சொல்லி சுவாமிகள் பக்தர்களிடம் சொல்லி சிரித்தாராம்.

    இதேபோல் இன்னொரு சம்பவம் . சுவாமிகள் ஆண்டுதோறும் யாழ்ப்பாணத்திலிருந்து கதிர்காமம்வரை  யாத்திரைக்கு நடந்தே செல்வது வழக்கம். அப்படி அந்த ஆண்டும் யோகசுவாமிகள் சென்றிருப்பார் என்று நினைத்த ஓர் அன்பர் (யாழ்ப்பாணத்தில் அந்த நேரம் இருக்கும் சூழ்நிலை ஏற்பட்டது. அவர் அடிக்கடி யோகசுவாமியை சென்று தரிசிப்பது வழக்கம்.) சுவாமி இல்லாவிட்டால் என்ன? நாம் போய் அவர் குடிலை தரிசனம் செய்தாலே போதும் என்று நினத்து அங்கு சென்றிருக்கிறார். சென்றவர்க்கு ஆச்சரியம். சுவாமிகள் குடிசையில்தான் இருந்தார். “உடம்பு சுகமில்லை அதனால் யாத்திரை போகவில்லை” என்று அவர்களை வரவேற்று, அமர்த்தி, சற்றுநேரம் பேசிவிட்டு அனுப்பிவிட்டார்.

    ஓரிரு நாட்கள் கழித்து கதிர்காம யாத்திரைக்கு சென்றுவந்த அன்பர் ஒருவர் அங்கே படக்காட்சிகள் எடுத்திருந்தார். அதை இவரும் பார்த்தபோது ஆச்சரியத்திலும் ஆச்சரியம். யோகசுவாமிகள் கதிர்காமத்திலும் இருந்திருக்கிறார். அங்கே சமயச் சொற்பொழிவும் ஆற்றியது படச்சுருளில் பதிவாகி இருந்தது. இப்படி ஒரே நேரத்தில் இரண்டு இடங்களில் இருக்கும் அற்புத யோகசக்திகளைப் பெற்றிருந்தாலும் அவர் அதை பெரிதுபடுத்திக் கொள்ளவில்லை.

    வறுமை, துன்பம், கல்வி குடும்பப் பிரச்னைகள் என்று அன்போடும் பக்தியோடும் வந்த அன்பர்களுக்கு  உதவியும் ஆலோசனையும் வழங்கிட அவர் தவறவில்லை.

     ஒருமுறை தன் பெண்பிள்ளயின் திருமணத்தை நடத்திவைக்க பணமில்லாமல் ஒருவர்  சுவாமியிடம் வந்தார். ஒன்றும் பேசாமல் அழுதுகொண்டிருந்தார். அவரை “இடரினும் தளரினும்” என்ற தேவாரப் பதிகத்தை முழுதும் பாடச் சொன்னார் சுவாமிகள். அப்படியே அவரும் அப்பதிகத்தை மனமுருகப் பாடிமுடித்ததும், ஓர் கார் வந்து வாசலில் நின்றது. வந்தவர் தான் சுவாமியின் அருளால் மலாயா நாட்டுக்குப் போனதாகவும் அங்கே அவருக்கு ரயில்வேயில் நல்ல வேலை கிடைத்ததாகவும், சுவாமிக்கு நன்றி செலுத்தும் வகையில் தன் சேமிப்பிலிருந்து  முப்பது தங்கக் காசுகள் செய்து கொண்டுவந்திருப்பதாகவும் கூறி, ஒரு  தட்டில் அதை சுவாமியிடம் கொடுத்தார். சுவாமிகள் உடனே அதை தேவாரம் பாடியவரிடம் கொடுத்து, “ பார்த்தாயா உன் பாட்டு சிவபெருமான் காதில் விழுந்து உனக்கு பொற்காசுகள் அனுப்பியிருக்கிறார். சந்தோஷமாக பிள்ளை திருமணத்தை நடத்தி முடி,” என்று வாழ்த்தியனுப்பினார்.

     ஆத்ம தொண்டு செய்வதிலும் அவர் முன்னிலை வகித்தார். சிவதொண்டன் நிலையத்தைத் தொடக்கிவைத்து அது ஆன்மீகப் பயிற்சி மெற்கொள்ளும் இடமாகவும்,  சும்மா இருக்க மனத்தைப் பழக்கவும், தியானம் செய்யவும், ஞானதானத்தை புத்தகங்கள்மூலம் பரப்பவும் வழிகோலினார். சிவதொண்டன் என்ற ஒரு பத்திரிகையும் அன்பர்களை தொடங்கச் செய்தார். அதில் அன்பர்களின் ஆத்ம அனுபவங்களும், அவர்கள் பெற்ற உபதேசங்களும், சுவாமிகளின் நற்சிந்தனை பாடல்களும் வசனங்களும் இடம்பெற்றுள்ளன.

    முதல் இதழில் சுவாமிகளின் நற்சிந்தனையின் ஒரு பகுதி: “ நமது உயிருக்குயிராய் இருப்பவர் கடவுளே. ஆகையால் நாம் அவருடைய உடைமை. அவருடைய அடிமை. நம்முடைய அசைவெல்லாம் அவருடைய அசைவே. நாம் அவரை ஒருபோதும் மறந்திருக்க முடியாது. நமக்கு ஒரு குறைவுமில்லை. நாம் என்றுமுள்ளோம். எங்குமிருக்கிறோம். எல்லாமறிவோம். இப்படியே நாம் சிந்தித்து சிந்தித்துக் கீழ்மையான குணங்களைப் போக்கி, மேலான தெய்வ தத்துவத்தை அடைவோமாக.”

    சிவயோகசுவாமிகளின் சீடர்களில் மிக முக்கியமாகக் கருதப்படுபவர் அமெரிக்கா ஹவாயைச் சேர்ந்த சிவாயசுப்பிரமுனியசுவாமி. செல்லப்பசுவாமிகள் தன் தலையில் ஓங்கியடித்து தீட்சை வழங்கியதுபோல, யோகசுவாமிகளும் ஆன்மீக சாதனையில் மிகவும் பக்குவப்பட்ட நிலையில் இருந்த தன் அமெரிக்க சீடருக்கும் முதுகில் ஓங்கி அடித்து ஞானதீட்சையளித்தார். அவருக்கு ‘சிவாய சுப்பிரமுனியசுவாமி’ என்ற தீட்சா நாமத்தை வழங்கி, முதுகில் அடித்த அந்த ஓசை அமெரிக்காவில் கேட்கட்டும். பல கோயில்கள் நீ கட்டுவாய். பலருக்கு நீ உணவளிப்பாய்” என்றார்.

    யோகசுவாமியின் வாக்கு தவறவில்லை. அமெரிக்காவில் கவாய் தீவில் ஒரு ஆதீனத்தை அமைத்து, சிவாலயத்தை எழுப்பி, இந்துயிசம் டுடேய் என்ற சஞ்சிகை மூலமும், பல சமய புத்தகங்கள் மூலமும், பலருக்கும் ஞான உணவை அளித்துக் கொண்டடிருக்கிறார்கள்.

    Share

  • நான் அறிந்த சிலம்பு – 115

    மலர் சபா

     

    மதுரைக் காண்டம் – 11. காடு காண் காதை

    கோவலன் மறையோனுடைய வருகை பற்றி வினாவுதல்

    கோவலன் மறையோனிடம்,images (6)
    “உம் ஊர் யாது?
    நீவிர் இங்கு வருகை புரிந்ததற்குக்
    காரணம் என்ன?” எனக் கேட்க..

    மறையோன் தன் வரவின் நோக்கத்தை எடுத்துரைத்தல்

    குறையாத சிறப்புடைய
    அம்மறையோன் தானும்
    தான் வந்ததன் காரணத்தை
    எடுத்துச் சொன்னான் இங்ஙனம்.

    திருவரங்கத்தில் திரு அமர் மார்பன் கிடந்த வண்ணம்

    நெடிதுயர்ந்த பொன்மலைமேல்
    நீல நிற மேகம்
    பரந்து விரிந்து
    அகலாது படிந்ததுபோலவே,
    அகன்று எழுந்த ஆயிரம் தலையுடைய
    அரிய வலிமை பெற்ற
    ஆதிசேடன் பாம்பணை மீது
    பலரும் தொழுது வணங்கிடும்,

    விரிந்த அலைகளையுடைய
    காவிரியாற்றின் திருவரங்கத்தில்,
    திருமகள் அவள் விரும்பித் தங்கிடும்
    திருமார்பினையுடைய திருமால்
    பள்ளி கொண்ட கோலமதனையும்..

    திருவேங்கடத்தில் நெடியோன் நின்ற வண்ணம்

    அடிப்படையாக அமைந்த சிலப்பதிகாரத்தின் வரிகள் இங்கே:  32 – 53
    படத்துக்கு நன்றி:

     

    Share

  • மூன்றுதமிழ் தோன்றியதும் உன்னிடமோ?

    கவிஞர் காவிரி மைந்தன்

    மூன்றுதமிழ் தோன்றியதும் உன்னிடமோ? கவிஞர் வாலி

    தமிழக வரலாற்றில் அரசியலும் சினிமாவும் அளவின்றிப் பின்னிக் கிடக்கிறது. திரைத் துறையில் தடம் பதித்து மக்களுக்கு அறிமுகமானவர்கள் அரசியலிலும் கோலோச்சியது உலக வரலாற்றில் வேறெங்கும் கண்டிராத புதுமை! அதுபோலவே.. அரசியலில் வெற்றிகளை ஈட்டியவர்கள் – திரைப்படத் தயாரிப்பாளர்களாகவும் பரிணாமம் காட்டினார்கள். இதிலே ஆச்சரியம் என்னவென்றால், அரசியிலில் எதிரும் புதிருமாக விளங்கிய இருபெரும் தலைவர்களுமே – தாங்கள் சம்பந்தப்பட்ட திரைப்படங்களில் எழுத ஒப்பந்தம் செய்தது ஒரே கவிஞரைத்தான்! அவர் கவிஞர் வாலி என்பது நிதர்சனமான உண்மை! ஒற்றை வரியில் கவிஞர் வாலி பாணியில் சொன்னால் “எனது தமிழ் அவர்களுக்குப் பிடித்திருக்கிறது!”

    ஒரு சில ஆண்டுகளுக்கு முன் நடந்த கவியரங்கம் ஒன்றில் முத்தமிழறிஞர் கலைஞர் அவர்கள் தலைமையில் கவிஞர் வாலி பங்கேற்று தனது கவிதையில் “கூலிங்க்ளாஸ் போட்ட குறுந்தொகையே” என்று விழித்தபோது கலைஞரே ஆனந்தப் பரவசம் அடைந்தார். இப்படியெல்லாம் சொற்களைத் தொடர்பு படுத்தி பொருட்செரிவூட்ட முடியும் என்கிற வித்தகம் தெரிந்த வாலி அவர்களின் திரையுலக வெற்றி என்பது சத்தியமாக சாதாரண ஒன்றல்ல.. சரித்திர சாதனைதான்!

    கலைஞர் அவர்களின் மகன் மு.க. முது அவர்கள் நடித்து அணையா விளக்கு.. பூக்காரி… பிள்ளையோ பிள்ளை முதலான படங்கள் திரைக்கு வந்தன. அவற்றில் பாடல்கள் எழுதியவர் கவிஞர் வாலி அவர்களே! கலைஞரின் பிள்ளை நடிக்கும் படமோ – பிள்ளையோ பிள்ளை – பாடல்கள் எழுதித் தரும்படி கலைஞர் சொன்னபோது – காதல் பாடலின் பல்லவி ஒன்று இப்படி பிறக்கிறது.

    மூன்று தமிழ் தோன்றியதும் உன்னிடமோ – நீ
    மூவேந்தர் வழி வந்த மன்னவனோ?

    இதிலுள்ள உள்ளடக்கம் கலைஞரைப் பெருமிதத்தில் ஆழ்த்தியதைச் சொல்லவும் வேண்டுமோ?

    மக்கள் திலகத்துடன் மிக நெருக்கமான கவிஞர் வாலியிடம் ஒருமுறை எம்.ஜி.ஆர். அவர்களே .. இப்பாடலைக் குறிப்பிட்டு இதுபோன்ற பாடல் எனக்கு எழுதித் தரக் கூடாதா? என்று கேட்டார் என்கிற அளவு இப்பாடல் ஈர்ப்பு தந்தது என்பதைவிட வேறு சிறப்புகள் எதற்கு?

    கவித்துவம் பாடல் முழுவதும் சலங்கை கட்டி ஆடுவதைப்போல் காதல் பாடலில் வேண்டும் சுகங்கள் அனைத்தும் டி.எம்.சௌந்தரராஜன் – பி. சுசீலா குரல்களில் – மெல்லிசை மன்னரின் இன்னிசையில் – மு.க.முத்து – லக்ஷ்மி திரைதனில்!

    மூன்று தமிழ் தோன்றியதும் உன்னிடமோ – நீhqdefault
    மூவேந்தர் வழி வந்த மன்னவனோ – நீ
    மூவேந்தர் வழி வந்த மன்னவனோ

    நான்கு குணம் சேர்ந்ததும் ஓர் பெண்ணிடமோ – அது
    நடை பழகி வந்ததென்ன என்னிடமோ –
    அது நடை பழகி வந்ததென்ன என்னிடமோ என்னிடமோ (நான்கு)

    உதித்தது பார் செங்கதிர்தான் கீழ்த்திசையில் – அதன்
    ஒளிவெள்ளம் பாய்ந்தது பார் வான்வெளியில்
    கதிர் போலே நான் கண்டேன் மன்னன் முகம் – அதன்
    ஒளியாலே மலரும் நான் செங்கமலம் செங்கமலம் (மூன்று)

    பனிமழையில் நனைந்ததென்ன மலர் விழிகள் – உன்னைப்
    பார்க்கையிலே பேசிடுமோ கிளிமொழிகள்
    இரு கனிகள் காய்த்ததென்ன ஒரு கொடியில் – அது
    விருந்தெனவே தவழ்ந்ததென்ன என் மடியில் –
    அது விருந்தெனவே தவழ்ந்ததென்ன என் மடியில் (நான்கு)

    இள நகைதான் நீ எழுதும் சிறுகதையோ – அதன்
    இடை தோன்றும் நாணம்தான் முன்னுரையோ
    இடம் தந்தால் நடப்பதெல்லாம் தொடர்கதையோ – அந்த
    இலக்கியத்தில் விடிந்தால்தான் முடிவுரையோ (நான்கு)

    Moondru thamil – Pillayo pillai
    Share

  • சூரிய மண்டலத்தில் துணைக்கோள் நிலவு எப்போது பூமியைச் சுற்றத் தோன்றியது ?

    Moon birth Era

     

    சி. ஜெயபாரதன் B.E.(Hons) P.Eng (Nuclear) கனடா

     

    Is Earth a Satellite to the Moon

    Looking at the  Water Planet Earth from the Moon

     

    http://www.youtube.com/watch?feature=player_detailpage&v=h3kB0Z4HdSo

    http://www.youtube.com/watch?feature=player_detailpage&v=ye8bROSSq2g

    http://www.youtube.com/watch?feature=player_detailpage&v=hahpE8b6fDI

    http://www.youtube.com/watch?feature=player_detailpage&v=WGTBJHFNywI

    http://www.space.com/14908-moon-evolved-video-guided-tour.html

    http://www.space.com/14442-grail-mission-snaps-side-moon.html

     

    *********************

     

    பொங்கிவரும் பெருநிலவைப்
    புலவர் புனைந்தார் !
    மங்கிப் போன
    கரு முகத்தில் தடம் வைத்தார் !
    முழு நிலவுக்குத்
    தங்க முலாம் பூசுவது
    வெங்கதிர்ப் பரிதி  !
    கடல் அலை எழுப்பும் நிலவு !
    அச்சின்றி நகர்வது !
    அங்கிங் கெனாதபடி
    எங்கும்
    முகப் பருக்கள் ! பெருங்குழிகள் !
    சுற்றியும் சுழலாத பம்பரம் !
    ஒருமுகம் காட்டும் !
    மறுமுகம் மறைக்கும் !
    நிலவில்லை யென்றால்
    முடங்கி விடும்  உயிரலைகள்;
    கடல் நீருக்கு
    ஏற்ற மில்லை ! இறக்க மில்லை !
    காற்றில்லை, பருவ மில்லை !
    மழையில்லை !
    புவியை முடுக்கிய  விதி
    நிலவை ஏன்
    சுழற்ற  வில்லை ?

    +++++++++++++++++

    unnamed

     

    “பிண்டங்கள் பிளந்து விழுகின்றன, நடுமையம் தாங்க முடியாமல்.” 

    வில்லியம் பட்லர் ஈட்ஸ், ஐரிஸ் கவிஞர் (1865-1939)

    நம்மால் எட்டிப் பிடிக்க இயலாதபடி அல்லது நாம் கண்டுபிடிக்க முடியாதபடி எந்த ஒரு பொருளும் நம்மிடமிருந்து நீக்கப்பட வில்லை.

    டெஸ்கார்டிஸ், பிரெஞ்ச் கணித மேதை (1596-1650)

    காலாக்ஸியிலும், பால்மய வீதியிலும் விண்மீன்கள் தூள்களாய்ச் சிந்திக் கிடக்கின்றன.

    மில்டன், ஆங்கிலக் கவிஞன் “இழந்த சொர்க்கலோகம்” (1608-1674)

    இருள்வெளியின் திமிங்கலப் பற்கள் அப்படியே அதை விழுங்கிவிடும்.

    வில்லியம் ஷேக்ஸ்பியர் ஆங்கில நாடக மேதை (1564-1616)

     

    Fig 1 The Theia Planet Theory

     

    நமது பூமிக்கு நிலவு தோன்றி எத்தனை மில்லியன் ஆண்டுகள் ஆகின்றன ?

    பரிதி மண்டலம் தோன்றி சுமார் 95 மில்லியன் ஆண்டுகட்குப் பிறகு ஏற்பட்ட ஓர் அண்டக்கோள் மோதலில் நமது பூமியின் நிலவு உருவானது என்று  2014  ஏப்ரல் 2 ஆம் தேதி வெளிவந்த “இயற்கை இதழில்” [Nature Journal]  அண்டக்கோள் விஞ்ஞானிகள் அறிவித்துள்ளார்.   இந்த புதிய தகவல் தெரிவிப்பது என்ன வென்றால், 4.470 பில்லியன் ஆண்டுகட்கு முன்பு நமது பூர்வப் புவியோடு [Proto-Earth] செவ்வாய்க் கோள் வடிவத்தில், ஓர் அண்டம் மோதிச் சிதறிய தூசித் துணுக்குகளே நிலவாக உருண்டு திரண்டது என்று தெரிகின்றது.  இந்தக் கால ஆண்டு கணிப்பு எண்ணிகையில் 32 மில்லியன் ஆண்டுகள் குறைந்தோ, கூடியோ இருக்கலாம்.  சூரிய மண்டலம் சுமார் 4.567 பில்லியன் ஆண்டுகட்கு முன்பு உண்டாகி உள்ளது என்பது இப்போதைய துல்லிய மதிப்பீடு.   பூதளத்தில் கண்டெடுத்த பூர்வீக விண்கற்கள் மாதிரிகளின் [Oldest Meteorites] வயதை வைத்து அந்த மதிப்பீடு செய்யப்பட்டு உள்ளது.  பூமியானது சூரியன் தோன்றிய முதல் 150 மில்லியன் ஆண்டுகளில் உருவாகி இருக்க வேண்டும் என்ற கருத்தும் வெளியானது..

    இந்த மோத நிகழ்ச்சியில் நிலவு தோன்றியதுடன், நமது பூமியின் இறுதி வடிவமும் முடிவானது என்றும் புதிதாக அறிவிக்கிறார்.   அப்போது பூமியின் உட்கருவில் உள்ள திரவ உலோகங்கள் பெருங்கனல் தள நிலையை விட்டு மையத்துக்குச் சுருங்கின.  முன்கூறிய மதிப்பீட்டு அறிவிப்பில் பரிதி மண்டலம் தோன்றிய (30 -200) மில்லியன்  ஆண்டுகட்குப் பிறகு நிலவு உருவானது என்பது நிலவி வந்தது.   அந்தக் கால மதிப்பீடுகள் யாவும், பூமியில் கதிர்வீசிக் காணப்படும் பாறைத் தாதுக்களின் மூலகக் கதிரியக்கத் தேய்வு [Radioactive Decay of unstable Elements] வீதத்தைக் கணக்கிட்டு விஞ்ஞானிகள் கணித்தவையே.

    2014 ஏப்ரல் 2 ஆம் தேதி  இயற்கை விஞ்ஞான இதழில் வெளியான புதிய முறை வேறானது.   அந்த முடிவு ஃபிரான்ஸ், ஜெர்மனி, அமெரிக்க விண்கோள் விஞ்ஞானிகள் [Planetary Scientists] தயாரித்த “கணனிப் போலி மாடல்” [Computer Simulation Model] மூலம் அறிந்தவையே.   அந்தக் கணனி மாடல் பூர்வீகச் சூரிய குடும்பத்தில் எப்படித் தூசி, துணுக்குப் பாறைகள் சேர்ந்து திரண்டு “சிசுக்கருக் கோள்கள் ” [Planetesimals] ஆயின என்று ஆராயப் பட்டன.  இவையே பின்னர் நாமறிந்த புதன், வெள்ளி, புவி, செவ்வாய், நிலவுச் சிசுக் கோள்களாய்த் [Planetary Embryos] உருண்டு திரண்டன.  ஒவ்வோர் கோள் மோதலிலும் படிமானப் பிண்டத் துணுக்குகள் சேர்ந்து தாக்கப் பட்ட கோளின் வடிவம் பெருத்தது. பூமியைப் பொருத்த வரையில் நிலவு மோதச் சிறலில் மொத்த நிலவு நிறையில் 0.5% அளவுப் படிமானம் சேர்ந்துள்ளது.    அந்த சான்று முறைகள் மூலம் நமது புவிக்கோள் உருவாக 95 மில்லியன் ஆண்டுகள் ஆயின என்றும், சூரிய மண்டலத்தில் நீர்க்கோள் பூமியே உருவாக நீண்ட காலம் ஆனது என்றும் விஞ்ஞானி அலெக்ஸாண்ரோ மார்பிடெல்லி கூறுகிறார்.

     

    Earth Moon comparision

    சூரிய மண்டலத்தில் நூதனப் புதிரான நீர்மயப் பூகோளம்

    பிரபஞ்சக் காலாக்ஸிகளில் நாமறிந்த பால்மய வீதியின் பரிதி மண்டலத்தில் நாம் வசிக்கும் ஒரே ஒரு கோளில்தான் நூதனமாகப் பேரளவில் நீர்மயம் திரவ வடிவிலும், திடவ உருவிலும், ஆவியாகவும் (Liquid, Solid & Vapour) பல கோடி ஆண்டுகள் நீடித்து வருகிறது.  அதிலும் விந்தையாகப் பூமியின் பிரம்மாண்டன கடற்குழி எப்படி நீர்மயமாக நிரம்பியது என்பது புதிர்களில் ஒரு புதிராக உள்ளது !  அந்தக் கடல்நீர் எப்படி உப்புக் கலவை நீராகி உயிரினங்கள் எப்படித் தோன்றின என்பது மேலும் புதிராக உள்ளது !  பல மாதிரிச் சான்றுகளில் ஒத்திருக்கும் துணைக்கோள் நிலவு பூமியின் சேயாகக் கருதப் படுகிறது !  ஆனால் வாயு மண்டலமும், நீர் வளமும் தாய்க்கோளில் பெருவாரியாக இருக்கச் சேய்க் கோளில் ஏனப்படி இல்லாமல் போயின என்பதும் வியப்பாக இருக்கிறது !  பூமிக்கு ஒரே முகத்தை மட்டும் மில்லியன் ஆண்டுகளாய்க் காட்டிச் சுற்றிவரும் துணைக்கோள் நிலவு எப்படித் தோன்றியது என்பது உறுதியாக அறியப் பாடாமல் இன்னும் புதிரான ஒரு சிந்தனைக் கோட்பாடாகத்தான் உள்ளது.

    சூரிய மண்டலத்தில் உள்வட்டக் கோள்களான புதன், வெள்ளி, பூமி (நிலவு), செவ்வாய் ஆகிய நான்கு கோள்களும் திடப் பிண்டம் (Solid Matter) கொண்டவை.  பூமியில் மட்டும் திடப் பிண்டமும் பெருவாரிக் கடல் நீரும் உள்ளன.  ஆனால் வெளிவட்டக் கோள்களான வியாழன், சனி, யுரேனஸ், நெப்டியூன் ஆகிய நான்கும் ஏன் வாயுக் கோள்கள் ஆயின ?  திடக்கோள்கள் பரிதியின் மூர்க்க ஈர்ப்பு விசையால் இழுக்கப்பட்டு நெருக்கமான நீள்வட்ட வீதியில் சுற்றுகின்றன.  அதே சமயத்தில் வெளிவட்ட வாயுக் கோள்கள் உள்வட்டக் கோள்களுக்கு அப்பால் வெகு தொலைவில் சுற்றி வருகின்றன.

     

    Moon formation

     

    அப்பொல்லோ பயணத்தில் கிடைத்த ஒப்பில்லா மாதிரிப் பாறைகள்        

    பரிதியின் உள்வட்டக் கோள்களில் புதனுக்கும், வெள்ளிக்கும் துணைக்கோள் எதுவும் இல்லை.  செவ்வாய்க் கோளுக்கு உருளைக் கிழங்கு போல் இரண்டு சிறிய துணைக் கோள்கள்.  பூமிக்கு ஒரு துணைக்கோள்.  வெளிவட்டத்தில் உள்ள வியாழனுக்கு 63 நிலவுகள், சனிக்கு 62 நிலவுகள், யுரேனசுக்கு 27 நிலவுகள், நெப்டியூனுக்கு 13 நிலவுகள் இருப்பது வியப்பாக உள்ளன. பல ஆண்டுக் காலமாக வானியல் விஞ்ஞானிகள் பூமியும் சந்திரனும் தனித்தனியாகத் தோன்றிப் பிறகு ஈர்ப்பு மண்டலத்தில் சேர்ந்து கொண்டவை என்று கருதினார்கள்.  அதைக் “கூட்டுச் சேகரிப்பு” முறை  (Co-Accretion) என்று வானியல் விஞ்ஞானிகள் குறிப்பிடுவர்.  கூட்டுச் சேகரிப்பு முறையில் உருவாகும் ஓர் அண்டம் அருகில் பரவிய பிண்டத் துணுக்குகளை ஈர்ப்பு விசையால் தன்வசம் இழுத்து உடல் பெருத்து ஈர்ப்பாற்றலும் மிகையாக்கிக் கொள்வது.  இழுப்பு நியதி (Capture Theory) நிலவு உண்டான பிறகு, பூமி நோக்கி வந்து புவியீர்ப்பு மண்டலத்தில் இழுக்கப் பட்டுச் சுற்றி வருவதாகச் சொல்கிறது.  பிளவுக் கோட்பாடு (Fission Theory) சொல்கிறது: பரிதி மண்டலத்தில் தோன்றிய இளம்பருவக் காலத்தில் பூமி அரைத் திரவ நிலையில் (Semi-fluid State) இருந்து பிளவு ஏற்பட்டு சிறு கோளொன்று நிலவாகப் பிரிந்து பூமியைச் சுற்றியது.  அடுத்தது “குளிர்த்திண்மை விதி” (Condensation Theory) எனப்படுவது.  அந்த முறையில் பரிதி மண்டலக் கோள்கள் உண்டான “நிபுளாவிலிருந்து” (Nebula) தனித்தனியாக உருவாகிய இரண்டு கோள்களாக பூமியும், நிலவும் அனுமானிக்கப் படுகின்றன.

    1969-1970 ஆண்டுகளில் நிலவுக்குப் பயணம் செய்த பல்வேறு அப்பொல்லோ குறிப்பணிகளில் (Apollo Moon Missions) வானியல் விமானிகள் கொண்டுவந்த இரசாயன மாதிரிகள் நமது துணைக்கோள் நிலவைப் பற்றி மகத்தானப் புதுமைகளை வெளியிட்டன.  நிலாப் பாறைகளின் மாதிரிகளில் பூமியில் கிடைக்கும் “ஆக்ஸிஜென் ஏகமூலப் பொருட்கள்” (Oxygen Isotope Materials) போல் காணப் பட்டன.  அதாவது பூமியும், நிலவும் பரிதி மண்டலத்தின் ஒரே அரங்கப் பகுதியில் (Same Region of the Solar System) தோன்றையவை என்று நிரூபித்தன !  அத்துடன் நிலவிலும் பூமியைப் போல் உச்ச உஷ்ணத்தில் உருகும் ஆவியியல் மூலகங்கள் (Volatile Elemets that melt at high Temperatures) எதுவும் கிடையாது !  அவை இரண்டும் ஆதி காலத்தில் அதி உச்சநிலை உஷ்ணத்தில் வடிவானவை என்பது தெரிய வருகின்றன.

    வானியல் விஞ்ஞானிகள் நிலவின் இரசாயன மாதிரிகள் பூகோளத்தின் மேற்தளத் தட்டைப் போல் (Earth’s Mantle) ஒத்திருப்பதைக் கண்டறிந்தார்கள்.  ஆனால் தோன்றிய போது பூமியின் மேற்தளத் தட்டு மிகத் திண்மையான உலோகத்திலிருந்து உண்டானது.  தனித்துத் தோன்றிய நிலாவிலே எப்படி பூமியை ஒத்த உலோகவியல் தட்டுப் பொருட்களைக் கொண்டிருக்க முடியும் என்னும் கேள்வி எழுகிறது !   அப்பொல்லோ-11 வானியல் விமானிகள் கொண்டுவந்த வெள்ளைக் கூழாங்கற்களில் நூதனப் பாறை “அநார்த்தோசைட்” (Anorthosite) இருந்தது.  அப்பாறையில் பூமியில் தென்படும் சோடியம், கால்சியம் அலுமினியம் சிலிகேட் (Sodium & Calcium Aluminiuam Silicates) தாதுக்கள் இருந்தன.

    நிலவு தோன்றியதை முடிவு செய்ய மூன்று நிபந்தனைகள்  

    நிலவு எப்படி உண்டானது என்ற கேள்விக்குப் பதில் கூறும் எந்தக் கோட்பாடும் கீழ்க்காணும் மூன்று நிபந்தனை மெய்ப்பாடுகளைப் பூர்த்தி செய்ய வேண்டும் :

    1.  நிலவின் கீழான பிண்டத் திணிவு [(Moon’s Density 3.3 gram/c.c) (Earth’s Density 5.5 gram/c.c)] கூறுவது என்ன வென்றால், நிலவின் இரும்பு உட்கரு (Iron Core) பூமியை போல் கனமான தில்லை என்னும் கருத்து.

    2.  நிலவின் பாறைகளில் நீரைப் போல் ஆவியாகும் பொருட்கள் (Volatile Substances) இல்லை.  அதாவது பூமியை விடப் பேரளவில் சூடாக்கப்பட்ட தளத்தைப் பெற்றுள்ளது நிலவு (Baking of Lunar Surface).

    3.  பூமியிலும் நிலவிலும் காணப்படும் ஆக்ஸிஜென் ஏகமூலத் தாதுக்கள் ஒரே ஒப்புமை வீதத்தில் இயற்கையாகப் படிந்துள்ளன (Relative Abundane of Oxygen Isotopes).  அதாவது பரிதி மண்டலத்தில் ஒரே தூரப் பகுதியில் பூமியும், நிலவும் உண்டாகி உள்ளன.

    நிலவு எப்படி தோன்றியது என்பதற்குக் கூறப்படும் கோட்பாடுகள்

    பூமியின் இரட்டைக் கோள்போல் காணப்படும் நிலவு எப்படிப் பிறந்தது என்பதை விளக்க வானியல் விஞ்ஞானிகள் நான்குவிதக் கோட்பாடுகளை அனுமானம் செய்கிறார்.  முதல் மூன்று நியதிகளில் ஓரளவு மெய்யாடுகள் இருந்தாலும், நான்காவது “பூதத் தாக்கு நியதியே” (The Giant Impact Theory) பெரும்பான்மை விஞ்ஞானிகளால் ஏற்றுக் கொள்ளப்பட்டுள்ளது.

    1.  பிளவு நியதி (The Fission Theory) 

    இந்தக் கோட்பாட்டின்படி நிலவு ஒரு காலத்தில் பூமியின் ஒரு பகுதியாக ஒட்டியிருந்து பிறகு  சூரிய மண்டலத்தின் துவக்க காலத்தில் எப்படியோ பிளந்து தனியாகப் பிரிந்தது என்று கருதப் படுகிறது.  தற்போதுள்ள மாபெரும் பசிபிக் கடற்குழியே நிலவுக்குப் பூர்வீக இருப்பிடமாக இருந்திருக்க வேண்டு மென்று யூகிக்கப் படுகிறது !  அந்தப் பகுதியிலிருந்துதான் நிலவு பிரிந்து வந்திருக்க வேண்டும் என்பது ஒரு சித்தாந்தக் கருத்து.  இதற்கு ஒரு காரணம்.  பூமியின் மேற்தளத் தட்டு (Earth’s Mantle) நிலவின் தளப்பகுதி இரசாயனப் பொருட்களை ஒத்துள்ளது.  வேகமாகச் சுழலும் பூமியே, சுழல்வீச்சு விசையால் பிரிந்து போன சிறு கோளை வெளியே தள்ளிச் சுற்ற வைத்திருக்கும்.  அந்தக் கோட்பாடை மெய்யாக எடுத்துக் கொண்டால் பூமியிலும் நிலவிலும் ஏதாவது ஒத்திருக்கும் “பூர்வப் படிவச் சான்றுகள்” (Fossil Evidences) கிடைத்திருக்க வேண்டுமல்லவா ?  ஆனால் அத்தகைய நிரூபணச் சான்றுகள் அப்பொல்லோ பயண விமானிகளுக்கு கிடைக்கவில்லை.  மேலும் நிலவில் காணப்படும் பெரும் சூட்டுப் பொருட்கள் (Baked Rock Substances) எப்படி வந்தன என்பதற்கு இதில் விளக்கம் காண முடிவதில்லை.

     

    The big impact

    2. இழுப்பு நியதி (The Capture Theory)

    இந்தக் கோட்பாடு மூலம் அறிவது: நிலவு சூரிய மண்டலத்தில் முதலில் வேறெங்கோ தோன்றியது என்றும், பின்னால் அதைப் பூமியின் ஈர்ப்பு விசை இழுத்துக் கொண்டது என்றும் அனுமானம் செய்யப் படுகிறது.  நிலவில் காணப்படும் வெவ்வேறு விதமான இரசாயனப் பொருட்களுக்கு இவ்விதி உதவினாலும் பூகோள ஈர்ப்பில் கவரப்பட்டு, நிலவு சுற்றும் நீள் வட்டவீதிக்கு வந்தது என்பதை விளக்க முடியாவில்லை.  காரணம் பூமியை நோக்கி இழுக்கப்படும் நிலவைக் கட்டுப்படுத்தி மெதுவாக்கும் ஓர் எதிர்ப்பு உந்தாற்றல் எதுவும் இல்லாமல் அப்படிச் செய்ய முடியாது என்று விஞ்ஞானிகள் எண்ணுகிறார்.  மேலும் நிலவில் காணப்படும் பெரும் சூட்டுப் பொருட்கள் (Baked Rock Substances) எப்படி வந்தன என்பதற்கு இதில் விளக்கம் காண முடிவதில்லை.

    3. குளிர்த்திண்மை நியதி (The Condensation Theory) 

    சூரிய மண்டலத்தை உருவாக்கிய மூல “நிபுளாவிலிருந்து” (Nebula) பூமியும், நிலவும் தனித்தனியாகத் தோன்றியவை என்றும் நிலவு பூமியைச் சுற்றும் கோண வட்டவீதியில் தள்ளப்பட்டது என்றும் இந்தக் கோட்பாடு அனுமானம் செய்கிறது !  அந்தக் கோட்பாடு மெய்யென்றால் அவை இரண்டுக்கும் ஏறக்குறைய ஒரே அளவு திணிவுள்ள “கன உலோக உட்கரு” (Same Dense Iron Core) அமைய வில்லை யென்னும் முரண்பாடு உண்டாகுகிறது.  அத்துடன் அவை இரண்டும் ஒரே மாதிரி உட்பொருட்கள் (Composition of Materials) கொண்டிருக்க வில்லை.  மேலும் நிலவில் காணப்படும் பெரும் சூட்டுப் பொருட்கள் (Baked Rock Substances) எப்படி வந்தன என்பதற்கு இதில் விளக்கம் காண முடிவதில்லை.

    4. பூதத் தாக்கு நியதி அல்லது விலக்கு வளைய நியதி (The Giant Impact Theory or The Ejected Ring Theory)

    பெரும்பான்மையான வானியல் விஞ்ஞானிகள் தற்போது ஏற்றுக் கொண்டை கோட்பாடு இது.  இந்தக் கொள்கையின்படி செவ்வாய்க் கோள் அளவான குட்டிக் கோள் ஒன்று, சூரிய மண்டலம் உண்டான இளம்பருவத்தில் பூமியைத் தாக்கியதாகவும், மோதலின் விளைவில் இரண்டு கோள்களின் மேற்தளத் தட்டுப் பொருட்கள் பேரளவில் எறியப்பட்டன வென்று அனுமானம் செய்கிறது.  சிதறிய துணுக்குகள் ஒன்துடன் ஒன்று சேர்ந்து. நிலவாக உருண்டு திரண்டு பூமியைச் சுற்றும் ஒரு கோளானது.  மோதலில் எழுந்த கனல் வெப்பத்தால் நிலவின் பாறைகள் சூடாக்கப் பட்டன !  நிலாவின் பெரும்பகுதி ஏன் பாறைக் குன்றாக உள்ளது, அக்குன்றுகள் எப்படிக் கடுமையாகச் சூடாக்கப்பட்டன என்னும் கேள்களுக்கு விளக்கம் தருகிறது இந்தக் கோட்பாடு.  சூரிய மண்டலம் உருவான பிறகு இத்தகைய மோதல்கள் பெருமளவில் நேர்ந்ததற்குச் சான்றுகள் கிடைக்கின்றன.

    உறுதி செய்யப்பட்ட முடிவான நிலவுத் தோற்ற நியதி

    1970 ஆண்டுக் காலங்களில் நிலவுத் தோற்றத்தை விளக்க வானியல் விஞ்ஞானிகள் முடிவான பூதத் தாக்கு நியதியை (The Giant Impact Theory) அரங்கேற்றினார்கள்.  பூமி மீது மோதிய சிறிய கோள் முட்டிய போது, “கோண-மையத் தாக்குதலில்” (Off-center Impact) மோதியதாக அனுமானிக்கப் படுகிறது.  அத்தகைய மோதல் இளமைப் பருவப் பூமிக்கு விரைவான துவக்கச் சுழற்சியை (Fast Inititial Spin) அளித்திருக்க முடியும் என்றும், எறியப்பட்ட துண்டம் நிலவாக வடிவம் பெற்றுச் சுற்றியிருக்க வேண்டும் என்றும் கருதப்படுகிறது.  அத்துடன் மோதலில் விளைந்த வெப்பசக்தி நிலவின் பாறைப் பொருட்களைச் சூடேற்ற ஏதுவாக உதவியிருக்கும் என்று நம்பச் செய்கிறது. ஏறக்குறைய அடுத்த பத்தாண்டுகளாக “பூதத் தாக்கு நியதியை” விஞ்ஞானிகள் நம்பாமல் இருந்தனர். 1984 இல் நடந்த ஒரு கூட்டுக் கருத்தரங்கில் எல்லா நியதிகளும் விவாதிக்கப்பட்டு, முடிவில் பெரும்பான்மையான எண்ணிக்கையில் பூதத் தாக்கு நியதி பலரால் ஒப்புக்கொள்ளப் பட்டது.

    50 மில்லியன் ஆண்டு வயதாகிப் பூமி தவழ்ந்து வளரும் பருவத்தில் உடல் முறுக்கேறாது கனிந்த நிலையில் உள்ள போது அத்தகைய பூத மோதல் நிகழ்ந்திருக்க முடியுமென்று நம்ப இடமிருக்கிறது !  அதை நிரூபித்துக் காட்ட அமெரிக்காவில் போல்டர், கொலராடோ தென்மேற்கு ஆய்வுக் கூடத்தில் ராபின் கானூப் (Robin Canup, Southwest Research Institute), என்பவரும் காலி·போர்னியா பல்கலைக் கழகத்தின் எரிக் ஆஸ்ஃபாக் (Erik Asphaug) என்பவரும் ஒரு புதிய “கணினி போலிப் படைப்பை” (Computer Simulation) வெற்றிகரமாகச் செய்தார்கள்.

    [தொடரும்]

    தகவல்கள்:

    Picture Credits: NASA, JPL; National Geographic; Time Magazine, Astronomy Magazine.

    1. Our Universe – National Geographic Picture Atlas By: Roy A. Gallant (1986)
    2. 50 Greatest Mysteries of the Universe – How Did the Moon form ? (Aug 21, 2007)
    3. Astronomy Facts File Dictionary (1986)
    4. The Practical Astronomer By Brian Jones & Stephen Edberg (1990)
    5. National Geographic – Invaders from Space – Meteorites (Sep 1986)
    6. Cosmos By Carl Sagan (1980)
    7. Dictionary of Science – Webster’s New world (1998)
    8. Physics for Poets By :  Robert March (1983)
    9. Atlas of the Skies (2005)
    10 Universe Sixth Edition By: Roger Freedman & William Kaufmann III (2002)11 Wikipedia – Inner Structure of the Moon (January 31, 2008)

    10 (a).  http://physicsforme.com/2011/09/19/how-common-are-earth-moon-planetary-systems/  [September 19, 2011]

    11.  http://en.wikipedia.org/wiki/Protoplanet  [December 23, 2013]
    12. http://www.space.com/55-earths-moon-formation-composition-and-orbit.html [June 21, 2013]
    13. http://www.space.com/25320-moon-evolution-photo-timeline-gallery.html[April 2, 2014]
    14. http://www.space.com/25322-moon-formation-wild-theories.html [April 2, 2014]
    15. http://en.wikipedia.org/wiki/Moon [April 11, 2014]
    16.http://www.ndtv.com/article/world/scientists-date-moon-at-4-47-billion-years-5037041 [April 2, 2014]

     

    ******************

    S. Jayabarathan [jayabarathans@gmail.com [April 12, 2014]

    When Planets Collide!
    Scientists date Moon at 4.47 billion years

    The Birth Of The Moon – AWESOME HQ VIDEO!

    Birth of the Moon
    Share

  • ஈழநாட்டு சித்தர் சிவயோகசுவாமி — (1)

    இரமேஷ் சிவநாதன்

          siddha1                                          சிவயோகசுவாமி சமாதிக் கோயில்

     

    சிவயோகசுவாமிகள் சமாதியடைந்து 10.4.2014 தினம் ஐம்பது ஆண்டுகள் நிறைவுவிழா கொண்டாடுவதை முன்னிட்டு இச்சிறப்புக் கட்டுரை வெளியிடப்படுகிறது.

    சிவயோகசுவாமி
    சிவயோகசுவாமி

    ஈழநாட்டின் சித்தர், துறவி, யோகி, தவமுனி, நடமாடும் தெய்வம் என்று பலவாறும் போற்றப்படும் சிவயோகசுவாமிகள்,  ஈழத்தில் அந்நியர் ஆட்சிக்குப் பிறகு, சைவசமயமும் சிவநெறியும் மீண்டும் தழைக்கச் செய்யவந்த ஒரு மாபெரும் சித்தமுனி என்றே போற்றலாம்.

    சுமார் முன்னூறு ஆண்டுகள் போர்த்துகீசியர், டச்சுக்காரர், பிரிட்டிஷ்காரர்கள் ஆட்சிக்கு ஈழதேசம் உட்பட்டிருந்தது. அதன்பின்னர்தான் கடையிற்சுவாமிகளும், அவர் சீடர் செல்லப்பாசுவாமிகளும்  அருள் தீபத்தை அங்கு ஏற்றிவைத்தனர். அந்த நாதசம்பிரதாய தீபம் அணையாமல் எரிய,  யோகசுவாமிகள் அந்த ஞானதீபத்தை கையிலேந்தி, ஈழத்தில் சைவசமயமும் கோயில் வழிபாடும் பக்திமார்க்கமும் செழித்தோங்க அருளினார்.

    ஒரு பித்தரைப் போலத்தான் யோகசுவாமிகள் வாழ்ந்தார். கொழும்புத்துறை வீதியொரங்களில் அவர் வெறும் வேட்டியோடும் குடையோடும் சுற்றித்திரிந்து கொண்டிருப்பார். வாயில் வந்தபடி ஏதேதோ பிதற்றிக் கொண்டிருப்பார். அவரை பைத்தியக்காரன் (விசரன்) என்றே பலரும் எண்ணியிருந்தனர். ஆனால் அவர் ஒரு ஞானப்பைத்தியம் என்று மிகச் சிலரே அறிந்துவைத்திருந்தனர். எவர் எப்படிப் பழகினாலும் அவரை முற்றும் உணரமுடியாமலும், அறிந்துகொள்ளவோ புரிந்துகொள்ளவோ முடியாமலும் பலர் இருந்தனர். முக்காலமும் உணர்ந்த ஞானசித்தராய், பஞ்சபூதங்களையும் அடக்கி ஆளுகின்ற ஆற்றல் உடையவராய் அவர் வாழ்ந்தார் என்றாலும் அவர் ஒரு சாதாரண மனிதன் போலவே பழகினார்.

    அவர் வாழ்ந்த கொழும்புத்துறை குடிசை வீட்டுக்குள் யாரும் அவ்வளவு எளிதில் நுழைந்துவிட முடியாது. அருகே யாரையும் வரவிடுவது மிக அரிது. சில வேளைகளில் கல்லை விட்டெறிந்து வருவோரை விரட்டிவிடுவார். இது குறித்து அவரிடம் கேட்டபோது, “குப்பையை எரிக்க நெருப்பு தேவைதானே,” என்றார்.

    என்றாலும் அவர் சந்நிதானத்தில் இருந்தால் மனம் அடங்கி நிற்பதையும், சஞ்சலங்கள் விலகி மனநிம்மதியும் இன்ப ஊற்றும் ஏற்படுவதை அடியார்கள் ஆன்ம அனுபவமாகப் பெற்றார்கள்.

    1890ம் ஆண்டுகளில் கிளிநொச்சியில் பொதுத்துறை இலாகாவில் கிடங்கு காப்பாளராக பணியாற்றியபோது யோகநாதன் வேலை நேரம் தவிர அதிக நேரம் தியானத்திலும், தேவாரம் திருவாசகம்  படிப்பதிலும் பாரயணம் பண்ணுவதிலும் அதிக நேரம் ஈடுபட்டார். இதர நாட்களில் நேரம் கிட்டும்போது கிளிநொச்சியிலிருந்து அதிக தூரம் உள்ள கோயில்களுக்கு  தேவாரம் பாடிக்கொண்டு கால்நடையாகவே சென்று வருவார். சிறுவயதில் அவரின் அன்புத் தாயார் ஊட்டிய சைவ பக்தி, பத்து வயதில் தாயாரின் மறைவுக்குப் பின்னும் ஓர் ஆன்மீக சக்தியாக அவர் உடலில் ஊறிக்கொண்டிருந்தது. இந்த யோக சாதனைகளினால் அவர் மனம் ஓரளவு பக்குவப்பட்டிருந்தது.  

    சீடன் தயாரானால்  சற்குருவும் தோன்றுவார் என்பது சைவசமயத்தின் உண்மை. சிவனே தட்சிணாமூர்த்தியாக கல்லால மரத்தின்கீழ் அமர்ந்து சனகாதி முனிவர் நால்வர்க்கு ஞானோபதேசம் செய்தார் என்று சமய சாத்திரங்கள் அருளுகின்றன.

    அப்படி அவருக்கும் ஒரு ஞானகுரு நல்லூர் கோயில் தேரடியில் ஞானோபதேசம் செய்யக் காத்திருந்தார்.

    ஒருநாள் நல்லூர் கோயிலருகே யோகநாதன் போய்க்கொண்டிருந்தபோது, அக்கோயிலின் தேரடியிலிருந்து  “யாரடா நீ?” என்று கர்ஜிக்கும் ஒரு குரல் கேட்டது.  செல்லப்பா சுவாமிகளின் இந்த கேள்வி யோகசுவாமிகளின் நெஞ்சில் ஈட்டிபோல் பாய்ந்தது.  செல்லப்பரின் கூரிய பார்வை யோகநாதனின் ஆன்மாவை ஊடுறுவியது. அவரின் கண்கள் சூரியனைப்போல் பிரகாசித்து ஒளிக்கதிர்களைப் பாய்ச்சியதில் யோகநாதனின் ஆன்மா அருள்வெள்ளத்தில் மூழ்கியது.

     

    ஆசானைக் கண்டேண் அருந்தவர்வாழ் நல்லூரிற்

    பேசா தனவெல்லாம் பேசினான் – கூசாமல்

    நின்றேன்நீ யாரடா வென்றே யதட்டினான்

    அன்றேயான் பெற்றே னருள்.

     

    அருளோளிக்குள் ளேபுகுந்து சென்றேன்யான் ஆங்கே

    இருள்சூழ்ந் திருப்பதைக் கண்டேன்– பொருளறியேன்

    ஓர்பொல்லாப் பில்லையென வோதினான் கேட்டுநின்றேன்

    மர்மந்தே ராது மலைத்து.

    என்று ‘ஆசானைக் கண்டேன்’ என்ற வெண்பாவில் அவர் கூறியிருக்கும் சில வரிகள் அவரின் அருள் அனுபவத்தை தெளிவாக எடுத்துரைக்கிறது.

     

     ஒரு நாள் நல்லூர்த் தேர்த்திருவிழாவின்போது, யோகநாதனை அருகே அழைத்து, “இன்று உனக்கு மகுடாபிஷேகம் செய்யப்போகிறேன்” என்று செல்லப்பா சுவாமி அவர் தலையில் ஓங்கியடித்தார். அதுவே யோகநாதனுக்கு சற்குரு அளித்த ஞானாபிஷேகம். ஞானோபதேசம். பிறகு நான்கு மகாவாக்கியங்களை செல்லப்பா சுவாமிகள் யோகநாதனுக்கு உபதேசித்தார்.

     

    முழுதும் உண்மை

    ஒரு பொல்லாப்புமில்லை

    எப்பவோ முடிந்த காரியம்

    நாம் அறியோம்

     

    இம் மகாவாக்கியங்கள் வேத வாக்கியம்போல் எல்லா ஞானசூட்சுமக் கருத்துக்களையும் உள்ளடக்கிவிட்டதை  யோகசுவாமிகள் உணர்ந்தார். அவை மனதுக்குள் பாய்ந்து, சித்தத்தைத் தெளியவைத்து , தியானத்துக்கு எடுத்துச்சென்று இறுதியில் ஆத்மஞானத்தைக் கொடுக்கிறது என்றும் எந்தவொரு மொழியும் போதிக்கும் மிக ஆழமான ஞானம் அதுவே என்றும் யோகசுவாமி தெளிவுபடுத்தியிருக்கிறார்.

     

    இதையே பின்னர் ஆத்ம வாக்கியமாக ஏற்று தன் வாழ்நாளில் கடைப்பிடித்து மக்களுக்கும் உபதேசித்து வந்தார். அவை அடியார்களின் சித்தத்துள் புகுந்து மெய்ஞானத் திறவுகோலாக செயல்பட்டன.

     

     

    Share

  • என்னதான் இருக்கிறது வேதத்தில்? – 1

    சு.கோதண்டராமன்

     

    என்ன தான் இருக்கிறது வேதத்தில்? –1

    பாமரனின் சந்தேகம்

    வேதங்கள் தாம் இந்து சமயத்தின் வேர்கள் என்று எல்லோரும் புகழ்கிறார்கள். இந்து சமயமோ பல வகையான மாறுபட்ட சம்பிரதாயங்களைக் கொண்டது. இத்தனைக்கும் ஆதாரமாக அப்படி என்ன தான் இருக்கிறது வேதத்தில் என்று அறிந்து கொள்ள விரும்பினான் பாமரன் ஒருவன். பல வகையான ஆன்மிகச் சொற்பொழிவுகளையும் கேட்டான். அவனுக்குத் தெளிவுக்குப் பதிலாகக் குழப்பமே ஏற்பட்டது. குழப்பம் ஏற்படக் காரணம் என்ன? கேட்ட செய்திகளுக்கிடையே முரண்பாடு இருந்தது தான்.

    கடவுளுக்கு உருவம் உண்டா?

    ஒரு புறம் வேதாந்தக்காரர்கள் கடவுளுக்கு உருவமில்லை, குணமில்லை என்கின்றனர். ஆனால் நடைமுறையில் உருவ வழிபாடு தான் வேத மந்திரங்களுடன் நடைபெற்றுவருகிறது. இரண்டுமே வேதத்திற்கு உகப்பானது தானா அல்லது இரண்டில் ஒன்று தான் வேத சம்மதமானதா?

     நட்ட கல்லை தெய்வமென்று நாலு புஷ்பம் சாற்றியே

    சுற்றி வந்து முணுமுணுத்து சொல்லும் மந்திரம் ஏதடா

    நட்ட கல்லும் பேசுமோ? நாதன் உள்ளிருக்கையில்

    சுட்ட சட்டி சட்டுவம் கறிச்சுவை அறியுமோ?

    என்று உருவ வழிபாட்டைக் கடுமையாகச் சாடிய சித்தர்களையும் நாம் வேத விரோதிகள் என்று இகழ்வதில்லை. மாறாக, அவர்களுக்கும் சிலை வைத்துக் கோயில் கட்டி வேத மந்திரங்கள் மூலம் பூசை செய்கிறோம்.

    முத்தி என்பது எது?

    வேதாந்தக்காரர்களிடையேயும் ஒற்றுமை இல்லை. காண்பதெல்லாம் கடவுள் அன்றி வேறு இல்லை, நீயும் கடவுள், நானும் கடவுள், அதை உணர்ந்து நம்மிடமுள்ள பர ப்ரம்மத்துடன் இரண்டறக் கலப்பது தான் முக்தி, அதை உயிருள்ள போதே அடையலாம் என்கின்றனர் அத்வைதிகள்.

    பர ப்ரம்மத்துடன் இரண்டறக் கலத்தல் சாத்தியமில்லை என்கின்றனர் விசிஷ்டாத்வைதிகளும், த்வைதிகளும். இறைவனின் கருணைக்குப் பாத்திரமான உயிர், உடலை விட்டு நீங்கிய பின் நாராயணனின் அருகாமைக்குச் சென்று அவனுக்குச் சேவை செய்யும் பாக்கியம் பெறும். இதுவே முக்தி, இதுவே மனிதன் அடையக் கூடிய மிகப் பெரும் பேறு என்கின்றனர்.

    எல்லோருமே வேதத்தைத் தான் பிரமாணமாகக் காட்டுகிறார்கள்.

     முழு முதல் கடவுள் எது?

    இந்து சமயத்தில் பல தெய்வங்களை வழிபடுகிறோம். எப்பெயரிட்டு அழைத்தாலும் எல்லாம் ஒரே கடவுளையே சென்றடையும் என்று சில சொற்பொழிவாளர்கள் கூறுகின்றனர். ஆனால் வேறு சில உபந்யாசகர்கள் பேசுவது வேறு வகையாக இருக்கிறது.

    ஒருவர், “விஷ்ணுவே மேலான தெய்வம். சிவன் என்பவர் அவருடைய பேரன் மாதிரி. அவருக்கு சுய சக்தி கிடையாது. அவருடைய சக்தியெல்லாம் விஷ்ணுவிடமிருந்து வருவது தான்” என்றார். அதற்கு ஆதாரமாக “நாராயண பரம் ப்ரம்ம” என்ற வேத மந்திரத்தை மேற்கோள் காட்டினார்.

    மற்றொரு உபந்யாசகர், “சிவன் தான் முதன்மையான தெய்வம்” என்று கூறி அதற்கு ஆதாரமாக ருத்ரத்தில் வரும் “ப்ரதமோ தைவ்யோ பிஷக்” என்ற சொல் தொடரைக் காட்டினார்.

                சிவனே மேலான தெய்வம் எனக் கூறிய ஒரு சைவ சித்தாந்தக்காரரோ, “விஷ்ணு என்பவர் காத்தல் தொழிலைக் கவனிப்பதற்காகச் சிவனால் நியமிக்கப்பட்டவர். அவர் சிவனடியார்களில் முதன்மையானவர்” என்றார்.

                ‘அரியும் சிவனும் ஒண்ணு, அறியாதவன் வாயில் மண்ணு’ என்ற பாமர வசனம் இந்த வேத விற்பன்னர்களின் பேச்சுப் போட்டியில் எடுபடாமல் போயிற்று.

    வழிபடுமுறை

    பல வகையான வழிபாட்டு முறைகள் நம்மிடையே வழக்கத்தில் உள்ளன. வேத மந்திரங்களைக் கூறி ஹோமம் செய்தால் எல்லா நலன்களை அடையலாம் என்று ஒரு சாரார் கூறுகிறார்கள். இன்னின்ன கோயிலில் சென்று அபிஷேகம், அர்ச்சனை, பிரதக்ஷிணம் முதலானவை செய்தால் தீராத வினைகள் தீரும் என்பர் சிலர். யாக யக்ஞம் செய்ய வேண்டாம், நாம ஜபம் ஒன்றே போதும் என்பர் சிலர். இன்னின்ன விரதங்களை அனுஷ்டித்தால் நமது கோரிக்கைகள் நிறைவேறும் என்பர் சிலர். இவை எல்லாமே வேத சம்மதமானவை தானா?

     இறப்புக்குப் பின் என்ன?

    இறப்புக்குப் பின் உயிர் என்ன ஆகிறது என்பதைத் தெரிந்து கொள்ள விரும்பினான் நசிகேதன். அது தவிர வேறு எது வேண்டுமானாலும் கேள் என்றான் யமன். அவன் தன் கோரிக்கையில் உறுதியாக நின்றும், யமன் பிரம்மத்தைப் பற்றி விவரமாக விளக்கி அதை அடையும் வழியைச் சொன்னானே தவிர, கடைசி வரை தன் வாயால் நசிகேதன் கேட்ட கேள்விக்குப் பதில் சொல்லவில்லை. மறு பிறப்பு உண்டு என்பதை மட்டும் குறிப்பால் உணர்த்துகிறான்.

    மறு பிறப்பென்றால் எப்பொழுது? அது பற்றியும் தெளிவு இல்லை. “உடலை விட்டு நீங்கிய உயிர் பத்து நாட்கள் பயணம் செய்து வைதரணி நதியைக் கடந்து பித்ரு லோகத்துக்குப் போய்ச் சேருகிறது. இறந்தவரின் பிள்ளையோ மற்றவரோ செய்யும் அபரக் கிரியைகள் தான் வைதரணி நதியைத் தாண்ட உதவுகின்றன. அவ்வாறு கர்மா இல்லாமல் செத்துப் போனவர்கள் பிசாசுகளாகவே அலைந்து கொண்டிருப்பர்” என்று சில சொற்பொழிவாளர்கள் சொல்கிறார்கள்.

    வேறு சிலர், “இறந்த அந்தக் கணத்திலேயே, உயிரானது தான் செய்த பாப புண்ணியங்களுக்கு ஏற்ப வேறு ஒரு ஜன்மா எடுத்து பாப புண்ணியங்களின் பலனை அனுபவிக்கும்” என்கின்றனர்.

                இன்னும் சிலர், “ஒரு பிறவிக்கும் அடுத்த பிறவிக்கும் இடையில் சொர்க்கம் நரகம் என்ற நிலை உண்டு. பாப புண்ணியங்களின் பலனை சொர்க்கத்திலோ நரகத்திலோ அனுபவித்து விட்டு அது முடிந்தவுடன் உயிர் வேறு பிறவி எடுக்கிறது” என்கின்றனர்.

    பித்ருக்களுக்கு சிராத்தம் செய்வது எல்லாம் வேதத்தில் சொல்லப்படவில்லை என்கிறது ஸத்யார்த்த ப்ரகாசம் என்ற புத்தகம். இதை எழுதியவர் பிற மதக்காரரோ அல்லது நாஸ்திகரோ அல்ல. வேதத்தை தெய்வ வாக்காக நம்பிக் கொண்டாடியவரும், அதை நன்கு ஆராய்ந்து, வேதத்தில் இல்லாத பொருள் இல்லை, அது எக்காலத்துக்கும் எல்லா இடத்துக்கும் பொருந்தக் கூடிய ஒரு நூல் என்று உறுதிபடக் கூறி “மீண்டும் வேத காலத்துக்குப் போவோம்” என்று முழங்கியவருமான ஆரிய சமாஜ நிறுவனர் தயானந்த ஸரஸ்வதி  தான் அவர்.

    இதில் வேடிக்கை என்னவென்றால், இப்படிப்பட்ட முரண்பட்ட கருத்துகளைக் கூறுபவர் அனைவரும் வேதத்தை மிக உயர்வாக மதிக்கிறார்கள். அவர்கள் தங்கள் கருத்துக்கு வேதத்தையே ஆதாரமாகக் காட்டுகிறார்கள்.

    இப்படி ஒன்றுக்கொன்று முரண்பட்ட கருத்துகளை வேதம் கூறுமானால் அது  இவ்வளவு உயர்வாக மதிக்கப் பெறுமா என்பது பாமரனின் சந்தேகம்.

    வேதத்தின் பெயரால் அவரவர் தத்தம் சொந்தக் கருத்துகளைக் கூறி மக்களை ஏமாற்றி வந்தது பற்றி அவன் படித்திருக்கிறான். உதாரணமாக, ‘கணவனை இழந்த பெண்கள் உடன்கட்டை ஏறுவது வேதத்தில் விதிக்கப்பட்ட ஒரு  கடமை’ என்று ஒரு சாரார் வாதிட்ட காலத்தில் ராம் மோகன் ராய் என்ற வங்காளப் பிராமணர், ‘வேதத்தில் உடன்கட்டை பற்றி எங்கே இருக்கிறது, காட்டுங்கள்’ என்று கேட்டவுடன் கூட்டம் வாய் மூடிக் கொண்டது.

    காந்தி தீண்டாமையை எதிர்த்தபோது சில சனாதனிகள் அவர் வேத விரோதமாகப் பேசுவதாக எதிர்த்தனர். காந்தி, ‘வேதத்தில் தீண்டாமையை அனுமதிக்கும் பகுதியை எடுத்துக் கூறுங்கள்’ எனக் கேட்டபோது அவருக்குப் பதில் சொல்வார் இல்லை.

    இந்த உபந்யாசகர் உண்மையில் வேதத்தில் உள்ளதைத் தான் கூறுகிறாரா அல்லது தன் கருத்தைச் சொல்லி விட்டு வேதம் என்ற பெயரால் பூச்சாண்டி காட்டுகிறாரா என்பது புரிவதில்லை.

    எனவே, உண்மையில் வேதம் என்ன தான் கூறுகிறது என்று அதையே நேரடியாகப் பார்த்து விட வேண்டும் என்று பாமரன் விரும்பினான். அதன் விளைவு தான் வாரம் தோறும் வெளிவர இருக்கும் இந்தத் தொடர்.

    Share

  • அந்தப்புரத்தில் ஒரு மகராணி!…

    கவிஞர் காவிரிமைந்தன்

    ilayaraja

    சுஜாதா பிலிம்ஸாரின் தயாரிப்பில் நடிகர் திலகம் சிவாஜி கணேசன் – சுஜாதா திரையில் தோன்ற வெள்ளித்திரையில் வெளியான ‘தீபம்’ திரைப்படத்திற்காக எழுதப்பெற்ற பாடல்! தீண்டும் இன்பத்தைப் போல் தினம் கேட்கத் தூண்டிநின்ற பாடல்!  டி.எம்.சௌந்தரராஜன்  எஸ். ஜானகி பாடியிருக்க இராகதேவன் இளையராஜா இசையை வார்த்தெடுக்க.. புலவர் புலமைப்பித்தன் வரிகள் மின்னுகின்றன!..

    வழக்கமான காதல் பாடல் என்றாலும் கதகதப்பில் வார்த்தைகளைவிட கவித்துவங்கள் விளையாடிக்கிடக்க.. கலிங்கத்துப்பரணிகண்ட காட்சிக்கு வார்த்தைகள் வழங்கியதுபோல.. இன்பத்தின் மத்தளங்கள் இனிதாய் முழங்க.. மூன்றாம் பால் மோகனத்தை இப்பாடல் முழுவதும் காணலாம்!

    கவிஞர் ஒருவர் திரைப்பட ஊடகத்தில் கிடைக்கும் வாய்ப்பினை திறமை இருக்கும்போது எப்படியெல்லாம் கையாளலாம் என்பதற்கு புலவர் இலக்கணம் வகுக்கிறார்.

    ஏதோ சரித்திர காலத்திற்கு தள்ளப்பட்டவர்களாய் நாம் இந்தப் பாடலைக் கேட்கும்போதெல்லாம் கடத்தப்படுகிறோம்!

    காதலன் தோளில் காதலி சாய்ந்து காதலைப் பாடிடச் சொன்னால்.. அந்தப்புரமும் தெரியும் அதன் அந்தரங்கமும் புரியும் என்கிறாரோ புலமைப்பித்தன்!

    http://www.youtube.com/watch?v=e2c8c1LAZbY

    அந்தப்புரத்தில் ஒரு மகராணி

    அவள் அன்புக்கரத்தில் ஒரு மகராஜன்

    அந்தப்புரத்தில் ஒரு மகராணி

    அவள் அன்புக்கரத்தில் ஒரு மகராஜன்

    கண்கள் சிவந்திருக்க அவள் பார்த்தாள்

    காமன் திருச்சபைக்கு வழி கேட்டாள்

    சாமந்தி பூக்கள் மலர்ந்தன

    இரு சந்தன தேர்கள் அசைந்தன

    சாமந்தி பூக்கள் மலர்ந்தன

    இரு சந்தன தேர்கள் அசைந்தன

    பாவை இதழ் இரண்டும் கோவை

    அமுத ரசம் தேவை

    என அழைக்கும் பார்வையோ

    அந்தப்புரத்தில் ஒரு மகராஜன்

    அவள் அன்புக்கரத்தில் ஒரு மகராணி

    ஆசை கனிந்துவர அவன் பார்த்தான்

    அன்னம் தலை குனிந்து நிலம் பார்த்தாள்

    சங்கு வண்ண கழுத்துக்கு தங்கமாலை

    அவள் சங்கமத்தின் சுகத்துக்கு அந்திமாலை

    சங்கு வண்ண கழுத்துக்கு தங்கமாலை

    அவள் சங்கமத்தின் சுகத்துக்கு அந்திமாலை

    குங்குமத்தின் இதழ் சின்னம் தந்த காலை

    அவன் கொள்ளை கொள்ள துடித்தது என்ன பார்வை

    அது பார்வையல்ல பாஷையென்று கூறடி என்றாள்

    அந்தப்புரத்தில் ஒரு மகராஜன்

    அவள் அன்புக்கரத்தில் ஒரு மகராணி

    கண்கள் சிவந்திருக்க அவள் பார்த்தாள்

    காமன் திருச்சபைக்கு வழி கேட்டாள்

    முத்துச்சிப்பி திறந்தது விண்ணை பார்த்து

    மழை முத்து வந்து விழுந்தது வண்ணம் பூத்து

    முத்துச்சிப்பி திறந்தது விண்ணை பார்த்து

    மழை முத்து வந்து விழுந்தது வண்ணம் பூத்து

    பித்தம் ஒன்று வளர்ந்தது முத்தம் கேட்டு

    அவள் நெஞ்சில் வந்து பிறந்திடும் தொட்டில் பாட்டு

    அங்கே தென்பொதிகை தென்றல் வந்து ஆரிரோ பாடும்

    அந்தப்புரத்தில் ஒரு மகராஜன்

    அவள் அன்புக்கரத்தில் ஒரு மகராணி

    கண்கள் சிவந்திருக்க அவள் பார்த்தாள்

    காமன் திருச்சபைக்கு வழி கேட்டாள்

    ஆராரிரோ…ஆராரி…ராராரிரோ

    ஆரிராரோ ஆராரிரோ

    ஆராரிரோ ஆராரிரோ ஆராரிரோ ஆராரிரோ

    Share

  • இங்கிலாந்திலிருந்து ஒரு மடல்!…103

    சக்தி சக்திதாசன்

     

    europe2 eurpe1

     

    அன்பினியவர்களே !

    கனிவான வணக்கங்கள்

    இங்கிலாந்திலே நடக்கவிருக்கும் ஜரோப்பிய தேர்தல் களம் சூடு பிடிக்க ஆரம்பித்திருக்கிறது. ஓ , சூடு பிடிக்க ஆரம்பித்திருக்கிறது என்றதும் ஏதோ பொதுமக்கள் மத்தியில் பரபரப்பாக பேசப்பட்டு வருகிறது என்று எண்ணி விடாதீர்கள்.

    சூடு அரசியல்வாதிகள் மத்தியிலும் அரசியல் கட்சிகள் மத்தியிலும் தான் படுவேகமாக முக்கியத்துவம் பெற்று வருகிறது.

    பொதுவாகவே இன்றைய காலகட்டத்தில் தேர்தல்கள் அனைவற்றிலும் மக்களின் ஆர்வம் மிகவும் குறைவாகவே காணப்படுகிறது. காரணம் அரசியல்வாதிகள் மீது மக்கள் கொண்ட அதிருப்தியே காரணம்.

    அரசியல் என்பது மக்களின் நலத்திற்காக மக்கள் நலன் விரும்பிகளினால் தன்னல நோக்கமின்றி இடம்பெறும் ஒரு நடைமுறை என்பது மாறி அரசியல்வாதிகள் இதன்மூலம் தாங்கள் தமக்கு அனுகூலங்களை பெருக்கிக் கொள்ள பயன்படுத்தும் ஒரு ஆயுதமாக்கிக் கொண்டார்கள் என்பது மக்களின் பொதுவான அபிப்பிராயமாகி விட்டது போலவே தென்படுகிறது..

    ஆமாம் சில வருடங்களுக்கு முன்னால் பெரும் சர்ச்சையைக் கிளப்பி விட்ட பராளுமன்ற உறுப்பினர்கள் தமது பாராளுமன்றச் செலவீனத்தை அரசாங்கத்திடமிருந்து கோரும் வழிமுறைகளில் இருந்த தில்லுமுல்லுகளே மக்களின் இத்தகைய ஒரு அபிப்பிராய வளர்ச்சிக்கு காரணமானது.

    இனி இந்த ஜரோப்பிய பாராளுமன்றத் தேர்தலுக்கு வருவோம். இந்த ஜாரோப்பிய யூனியனும் அதனுடனான ஜக்கிய இராச்சியத்தின் உறவும் தற்போது இங்கிலாந்தில் மிகவும் அதிக அளவில் பேசப்பட்டு வரும் ஒரு விடயமாகும்.

    இதற்குக் காரணங்கள் பலவுண்டு அவற்றில் முக்கியமானவை,

    ஜரோப்பிய நாடுகள் ஒன்றியத்தில் அங்கம் வகிக்கும் நாடு ஒன்றில் வதிவுரிமை பெற்றவர்கள் எதுவிதக் கட்டுப்பாடுமின்றி மற்றைய ஜரோப்பிய நாடுகளில் வசிக்கலாம் எனும் விதியும் அவ்விதியின் துணையோடு இங்கிலாந்துக்குள் நுழைந்து வேலயற்றோர் பட்டியலில் தம்மை இணைத்துக் கொண்டு அரசாங்க உதவிப்பணத்தைப் பெற்று வாழும் ஜரோப்பிய மக்களின் அதுவும் குறிப்பாக கிழக்கு ஜரோப்பிய நாடுகளின் எண்னிக்கைப் பெருக்கமும்.

    இங்கிலாந்து நாட்டுச் சட்ட திட்டங்களின் மீது ஜரோப்பிய ஒன்றியம் கொண்டிருக்கும் கட்டுப்பாட்டு விதிகள் இங்கிலாந்தின் இறைமைக்கு விடுக்கப்படும் சவால் என பல மக்களின் மனதில் ஒரு பொது அபிப்பிராயம் ஏற்பட்டிருப்பது.வும்

    இவற்றில் நான் முதலாவதாக குறிப்பிட்டிருந்த பிரச்சனையின் அழுத்தமே தற்போது மக்கள் மனங்களில் ஒருவித அச்சத்தை ஏற்படுத்தியிருக்கின்றது.

    ஜரோப்பிய ஒன்றியத்தில் புதிதாக அனுமதிக்கப்பட்ட ரொமேனியா, பல்கேரியா போன்ற முந்தைய ரஷ்ய ஆதிக்கத்திலிருந்த நாடுகள் ஜரோப்பிய யூனியனில் இரண்டு வருடங்களுக்கு முன்னால் இணைந்ததன் பலனாக இவ்வாண்டு ஜனவரி மாதம் அமுலுக்கு வந்த ஜரோப்பிய சட்டத்தின் பிரகாரம் அந்நாட்டுப் பிரஜைகள் எதுவித கட்டுப்பாடுகள் இன்றி இங்கிலாந்துக்குள் நுழையும் அதிகாரம் பெற்றிருக்கிறார்கள்.

    ஒவ்வொரு நாளும் விக்டோரியா பேரூந்து நிறுத்தத்தில் பல பேரூந்துகளில் இவ்விரண்டு நாட்டைச் சேர்ந்த பலர் இங்கிலாந்துக்கு வந்த வண்ணம் இருப்பதாகச் செய்திகள் தெரிவிக்கின்றன. ஏற்கனவே பல இளைஞர்கள் வேலையில்லாமல் திண்டாடிக் கொண்டு இருப்பதுவும், பொருளாதாரச் சீர்படுத்தலுக்காக அரசாங்கம் நடைமுறைப்படுத்தி வரும் கடுமையான பொருளாதாரக் கொள்கைக் கட்டுப்பாட்டின் விளைவாக மக்கள் அன்றாடம் எதிர்நோக்கும் வாழ்க்கைப் பிரச்சனைகளும் இம்மேலதிக மக்களின் வருகையால் மேலும் அதிகரிப்பதான எண்ணம் அனைத்து மக்கள் மனங்களையும் ஆட்டிப் படைக்கின்றது.

    இதுவே தற்போதைய இங்கிலாந்து ஜரோப்பிய ஒன்றியத்தில் இருப்பதா? அன்றி வெளியேறுவதா? எனும் ஒரு விவாதத்தைப் பல அரசியல் கட்சிகள் மத்தியில் ஆரம்பித்து வைத்துள்ளது.

    இங்கிலாந்திலேயே முதல் தடவையாக் இரு கட்சித் தலைவர்களிடையே பகிரங்க விவாதம் இவ்விவகாரத்தில் சமீபத்தில் நடைபெற்றிருக்கிறது,

    இதுவரை நடந்த கருத்துக் கணிப்புகளின்படி ஜரோப்பிய ஒன்றியத்திற்கெதிரான வாதத்திற்கே மக்களின் ஆதரவு அதிக அளவில் இருப்பதாகத் தென்படுகிறது.

    ஜரோப்பிய ஒன்றியத்தில் இங்கிலாந்து அங்கம் வகிப்பதன் அவசியத்தை வலியுறுத்துவோர் இவ்வொன்றியத்திலிருந்து வெளியேறுவது பிரித்தானியாவின் பொருளாதார வளர்ச்சியை மிகப்பெரிய அள்வில் பாதிக்கும் எனும் வாதத்தை முன்வைக்கிறார்கள்.

    ஜரோப்பிய ஒன்றியத்தில் அங்கம் வகிப்பதன் மூலம் ஜக்கிய இராச்சியத்தின் ஏற்றுமதி வியாபாரத்தில் நேரடியாகவும், மறைமுகவும் எத்தனையோ ஆயிரம் ஜக்கிய இராச்சிய மக்களின் வாழ்வாதாரம் தங்கியுள்ளது என்கிறார்கள்.

    தற்போதைய பிரதமர் தமது கட்சி பெரும்பான்மை பலத்துடன் அடுத்த வருடம் நடக்கவிருக்கும் பொதுத்தேர்தலில் ஆட்சி அமைக்குமானல் 2017ம் ஆண்டு ஜக்கிய இராச்சியம் ஜரோப்பிய ஒன்றியத்தின் உள் இருக்க வேண்டுமா இல்லையா என்று பொது மக்களிடையே ஒரு கருத்துக் கணிப்பு நடத்துவேன் என்று உறுதியளித்திருக்கிறார்.

    இருப்பினும் தனது கருத்தாக தான் ஜரோப்பிய ஒன்றியத்தில் இருந்து வெளியேறுவதை விரும்பவில்லை என்றும் தற்போது இருக்கும் உடன்படிக்கைய மாற்றியமைத்து ஜரோப்பிய ஒன்றியத்தின் கட்டமைப்பையும் விதிகளையும் மீள்பரிசோதனை செய்வதே தனது நோக்கம் என்றும் டேவிட் கமரன் அவர்கள் கூறுகிறார்.

    எதிர்க்கட்சித் தலைவரும் ஏறக்குறைய இதே நிலைப்பாட்டைத்தான் எடுத்துள்ளார். அவரது கொள்கையின் படி தமது கட்சி ஜரோப்பிய ஒன்றியத்தில் சில நடைமுறை மாற்றங்களைக் கொண்டு வருவதற்கான முயற்சிகளில் ஈடுபடுவதோடு இங்கிலாந்துப் பாராளுமன்றத்தின் சட்டங்கள் ஏதாவது ஜரோப்பிய ஒன்றியத்தினால் அங்கீகரிக்கப்பட வேண்டும் எனும் பட்சத்தில் அதை ஒரு பொது கருத்து வாகெடுப்பின் முடிவின்படியே அமுல் படுத்தாலாம் எனும் சட்டத்தைக் கொண்டு வருவது என்கிறார்.

    கூட்டரசாங்கத்தின் மற்றைய பங்காளிக் கட்சியான லிபரல் கட்சியோ முழுவதுமாக தன்னை ஜரோப்பிய ஒன்றியத்துள் புதைத்துக் கொண்டுள்ளது. எனலாம்.

    ஆனால் இன்றைய மக்களின் மனவோட்டத்தைப் பிரதிபலிப்பவராக கோலோச்சும் தலைவர் ” ஜக்கிய இராச்சிய சுதந்திரக் கட்சி” இன் தலைவர் நைஜல் வெராக் என்பரே !

    இவரோ இங்கிலாந்து ஜரோப்பிய ஒன்றியத்திலிருந்து வெளியே வருவது ஒன்றுதான் இங்கிலாந்தின் மீட்சிக்கு வழி என்கிறார்.

    புதிதாக ஜரோப்பிய ஒன்றியத்திலிருந்து இங்கிலாந்துக்குள் நுழையும் உரிமை அவர்களுக்கு இருக்கும் வரை இங்கிலாந்தின் வெளிநாட்டுக்காரரின் குடியேற்றக் கட்டுப்பாட்டை அமுலாக்க முடியாது என்கிறார்.

    அதுமட்டுமல்ல அவரது மற்றுமொரு வாதம் சிந்திக்க வைக்கிறது.

    ஜரோப்பிய ஒன்றியத்திலிருந்து வருவோர் எத்துறையிலும் திறமை மிக்கவர்களாக இருக்க வேண்டியதில்லை ஆனால் ஜரோப்பிய ஒன்றியத்தை விட்டு வெளியேறி வெளிநாட்டவரின் வருகையைக் கட்டுப்படுத்துவதன் மூலம் ஜரோப்பிய ஒன்றியத்திற்கு வெளியேயுள்ள அதாவது கிழக்காசிய நாடுகளில் உள்ள திறமை மிக்கவர்கள் இந்நாட்டிற்கு வருவதன் மூலம் இந்நாடு வளமிக்கதாக முடியும் என்கிறார்.

    இந்தியா, அவுஸ்திரேலியா போன்ற நாடுகளில் உள்ள படித்த , திறமை மிக்கவர்களை உள்ளே அனுமதிக்காமல், ஜரோப்பாவில் உள்ள கல்வியறிவில்லாதவர்களை வரவிடுவதில் என்ன இலாபம் என்கிறார்.

    ஆனால் இவரது கட்சி ஏனைய விடயங்களில் என்ன நிலைப்பாட்டைக் கொண்டுள்ளது என்பது பலருக்கு புரியாமல் இருப்பதே இவருக்கும் இவரது கட்சிக்கும் உள்ள ஒரு பின்னடைவு.

    அத்தோடு வெளிநாட்டிலிருந்து இங்கிலாந்துக்கு வருவோரைக் கட்டுப்படுத்த வேண்டும் எனும் இவரது ஆக்ரோஷமான் வாதம் இவரது கட்சிக்குள் பல இனத்துவேஷிகளை உள்ளடங்கியுள்ளார்கள் போலவும் தெரிகிறது.

    எது எப்படி இருப்பினும் இன்றைய இங்கிலாந்து ஒரு புதுச் சந்திப்பில் நிற்கிறது இதன் பயணம் எந்தத் திசையை எடுக்கப் போகிறது என்பதே எம்முன்னே தொங்கும் கேள்விக்குறி !

    இதற்கான விடை காலதேவனின் கரங்களிலோ ?

    மீண்டும் அடுத்த மடலில்

    அன்புடன்

    சக்தி சக்திதாசன்

    http://www.thamilpoonga.com

    http://www.facebook.com/sakthi.sakthithasan

    Share

  • இணைய இதழாளர் நடையேடு

    முனைவர் அண்ணாகண்ணன்

    (annakannan@gmail.com | 9841120975)

     10150804_619889874774344_2540426917301829276_n

    தமிழில் பல்லாயிரம் வலைத்தளங்களும் வலைப்பதிவுகளும் தோன்றியுள்ளன. இலட்சக்கணக்கான தமிழ்ப் பக்கங்கள் கிடைக்கின்றன. சமூக ஊடகங்களில் துடிப்பாக இயங்கும் தமிழர்கள், பல இலட்சம் பேர் உள்ளனர். தமிழ்த் தரவுகள் பெருகி வரும் நிலையில், அவற்றில் பிழைகளும் குறைகளும் மலிந்துள்ளன. இந்நிலையில் இணைய இதழாளர்களுக்குச் சில அடிப்படைக் குறிப்புகளை அளித்தல், உதவிகரமாக இருக்கும்.

    இணையத்தில் எழுதுவோர் ஒவ்வொருவருக்கும் தனித் தனி நடை இருக்கலாம். ஆனால் இங்கு, செய்திகளையும் தரவுகளையும் எவ்வாறு பதியலாம் எனப் பொதுவான குறிப்புகளை அனுபவத்தின் அடிப்படையில் அளித்துள்ளேன். அவரவர் விருப்பத்திற்கும் தேவைகளுக்கும் ஏற்ப, இந்த நடை மாறுபடும் என்பதை நினைவில் கொள்வோம்.

    அச்சிதழில் எழுதுவதற்கும் இணையத்தில் எழுதுவதற்கும் நிறைய வேறுபாடுகள் உள்ளன. அவற்றுள் முக்கியமான சிலவற்றை இங்கே காணலாம்.

    காலக் குறிப்புகள்

    இணையத்தில் காலத்தைக் குறிப்பிடும்போது கூடுதல் கவனம் தேவை. நாளிதழில் ‘இன்று’ எனக் குறிப்பிட்டு எழுதும்போது, அதைப் பெரும்பாலும் அந்த நாளில் மட்டுமே படிக்கிறார்கள். அடுத்த நாள் அது, பழைய ஏடாகி, பொட்டலம் மடிக்கவும் இன்னபிற பயன்பாடுகளுக்கும் சென்றுவிடுகிறது.

    ஆனால், இணையத்தின் இயல்பின்படி எந்த ஒரு தரவும் எந்த நேரத்திலும் எந்தக் காலத்திலும் படிக்கப்படலாம். இந்தச் செய்தியை அடுத்த ஆண்டோ, பத்து ஆண்டுகள் கழித்தோ ஒருவர் படிக்கும்போது அது எந்த நாள் என்ற குழப்பம் ஏற்படும். என்னதான் தானாகவே அந்தச் செய்தியுடன் நாள் விவரம் தெரிந்தாலும், கூடுதல் விவரத்திற்காக அந்த நாளை முழுவதுமாகக் குறிப்பிடுங்கள்.

    இணையத்தில் சம்பவங்களைக் குறித்து எழுதும்போது, ‘இன்று பத்தாம் வகுப்புத் தேர்வு முடிவுகள் வெளியாயின’ என எழுதுவது சரியில்லை. ‘2009 மே 23ஆம் தேதி, பத்தாம் வகுப்பு முடிவுகள் வெளியாயின’ என்பது போல் எழுதுவது நல்லது. ‘இன்று கைது ஆனார்’, ‘நாளை விடுதலை ஆவார்’ என்றெல்லாம் எழுதாமல் நாள் குறிப்பிடுங்கள். ‘நேற்று முன்தினம்’, ‘நாளை மறுநாள்’ என எழுதுவதும் சரியில்லை. துல்லியமாக நாளைக் குறிப்பிட வேண்டும்.

    இதே போன்று கடந்த வாரம் என்பதும் மயக்கம் மிகுந்த சொல்லாட்சி. இறந்த காலத்தில் உள்ள எல்லா வாரங்களுமே கடந்த வாரம்தான். வரும் வாரத்தில் என எழுதுவதிலும் இதே சிக்கல் உண்டு. வரப்போகின்ற எல்லா வாரங்களுமே வரும் வாரம்தான். இதனை 2009 அக்டோபர் முதல் வாரத்தில், மூன்றாவது வாரத்தில் என எழுதுவது நல்லது. இது கடந்த மாதத்தில், கடந்த ஆண்டில்… என வரும் எல்லா வாக்கியங்களுக்கும் பொருந்தும்.

    இன்னும் கேட்டால் கி.பி. (கிறித்துவிற்குப் பிறகு), தி.பி. (திருவள்ளுவருக்குப் பிறகு) என எந்த ஆண்டு வரிசையினைக் குறிப்பிடுகிறோம் என்றும் குறிப்பிடுவது நல்லது. கிறித்து ஆண்டு முறை, பெருவழக்காக இருப்பதால், 2009 என்று குறிப்பிட்டாலே அது கிறித்து ஆண்டுதான் என நாம் எடுத்துக்கொள்கிறோம். திருவள்ளுவர் ஆண்டினைத்தான் தனியே குறிப்பிட வேண்டி இருக்கிறது. இப்பொழுது கிறித்து ஆண்டினைப் பொது ஆண்டு (CE – Common Era)1 எனக் குறிப்பிடுகிறோம்.

    காலத்தினைக் குறிப்பிடுவதில் இன்னும் ஒரு சிக்கலும் உண்டு. உலகம் முழுவதும் பொதுவான கால வரிசைகள் இல்லை. நீங்கள் இந்தியாவில் இருந்து எழுதும் போது, இன்று காலையில் என்று எழுதுவீர்கள். ஆனால், அமெரிக்காவில் அதைப் படிப்பவரும் இன்று காலையில் என்றுதான் படிப்பார். ஆனால், இருவரின் காலைகளும் வெவ்வேறானவை. இதைத் தவிர்க்க, 2009 மே 23ஆம் தேதி இந்திய நேரப்படி காலை 9 மணிக்கு என எழுதுதல் வேண்டும். அதே போன்று அமெரிக்காவிலிருந்து எழுதுவோர், அமெரிக்க நேரப்படி இன்று மதியம் 2 மணிக்கு என எழுதுவது நல்லது.

    இடக் குறிப்புகள்

    இடத்தினைக் குறிப்பிடும்போதும் கூடுதல் கவனம் தேவை. ஒரே மாதிரியான உச்சரிப்பில் பல ஊர்ப் பெயர்கள் வரக்கூடும். Quanzhou, Guangzhou என இரண்டு இடங்கள் உள்ளன. Quanzhou2 என்பது சீனாவின் ஃபுஜியான் (Fujian) மாகாணத்தில் உள்ளது. Guangzhou3 என்பது சீனாவின் குவாங்டாங் (Guangdong) மாகாணத்தில், ஹாங்காங்கின் வடமேற்காக 120 கி.மீ. தொலைவில் கேண்டன் (Canton) பகுதியில் உள்ளது. குவான்சோ, குவாங்சோ என இவற்றைத் தமிழில் எழுதினால் போதாது. அடைப்புக் குறிக்குள் அந்த ஊரின் பெயரை ஆங்கிலத்திலும் கொடுப்பது நல்லது.

    மதுரை – மதுரா, கடலூர் – கூடலூர் போன்றவையும் எழுத்தளவில் நெருங்கிய தொடர்பு கொண்டவை. வெளிநாட்டுப் பெயர்களில் பல, இவ்வித தோற்ற மயக்கங்கள் கொண்டவை. தமிழ்நாட்டைப் பொறுத்த வரையில் காட்டூர், கருப்பூர், புதூர்….. போன்ற ஏராளமான ஊர்கள் ஒன்றுக்கு மேற்பட்ட இடங்களில் உள்ளன. இத்தகைய ஊர்களைக் குறிப்பிடும்போது, நமக்குத் தெரிந்த வரையில் துணை விவரங்களையும் அளிக்கலாம். திருவாரூருக்கு அருகில் உள்ள காட்டூரில் என எழுதலாம். நன்றாகத் தெரியுமானால் திருவாரூரிலிருந்து 6 கி.மீ. தொலைவில் உள்ள காட்டூரில் என எழுதலாம்.

    அடைமொழிகள்

    நபர் பெயர்களைக் குறிப்பிடும்பொழுது, ஒரே வகையான தரநிலைகளைப் பின்பற்ற வேண்டும். நிறைய மனிதர்களின் பெயர்களைக் குறிப்பிடும்பொழுது, ஒவ்வொருவருக்கும் திரு. என அடைமொழிகள் அளிக்க வேண்டியது இல்லை. திருவாளர்கள் என எல்லாப் பெயர்களையும் வரிசையாக அளித்து விடலாம். ஒருவருக்குத் திரு என அடைமொழி அளித்துவிட்டு, இன்னொருவருக்கு அளிக்காமல் விடுவது சரியாய் இருக்காது. மேலும், செல்வி, திருமதி ஆகிய சொற்களை அடுத்துப் புள்ளிகள் வைப்பதைப் பல இடங்களிலும் பார்க்கிறேன். முழுச் சொற்களாக எழுதிய இடங்களில் எல்லாம், புள்ளி வைக்கக் கூடாது. திருவாளர் என்ற முழுச் சொல்லைச் சுருக்குவதால் தான் திருவுக்குப் பக்கத்தில் புள்ளி வைக்கிறோம்.

    அவசியம் இல்லாவிடில், திருவாளர், செல்வி, திருமதி ஆகிய அடைமொழிகளைப் பெரும்பாலும் தவிர்க்கலாம். பெண்களைப் பொறுத்தவரை திருமணம் ஆனவரா, இல்லையா என்பதைக் காட்டவே இந்தச் செல்வி, திருமதி ஆகியவை பயன்படுகின்றன. குறிப்பாக, வெளிநாட்டுப் பெயர்கள் பல, ஆண் பெயரா – பெண் பெயரா எனக் குழப்பும் வகையில் உள்ளன. நமக்கு உறுதியாகத் தெரியுமானால், ‘யாங் என்ற பெண்’ எனக் குறிப்பிடலாம்.

    இது போன்றே பட்டப் பெயர்களிலும் கவனமாக இருக்க வேண்டும். கலைஞர் மு.கருணாநிதி எனக் குறிப்பிடுவதாக இருந்தால், புரட்சித் தலைவி ஜெ.ஜெயலலிதா எனக் குறிப்பிட வேண்டியிருக்கும். இப்படியாக ஒவ்வொருவருக்கும் உள்ள பட்டப் பெயர்களைக் குறிப்பிடுவது எவ்வளவு பெரிய வேலையாக மாறுகிறது என்பதை நினைத்துப் பாருங்கள். நடுநிலையாளர்கள், முதல்வர் மு.கருணாநிதி, எதிர்க் கட்சித் தலைவர் ஜெ.ஜெயலலிதா எனக் குறிப்பிடுவதே நல்லது.

    முனைவர் பட்டம் பெற்றவர்களை டாக்டர் என அழைப்பதை விடவும் முனைவர் என்றே அழைக்க வேண்டும். எழுதுகின்ற மூன்றாவது நபருக்கு, அவர் என்ன டாக்டர் என ஒருவேளை தெரியாவிட்டால் டாக்டர் என்று குறிப்பிடுவதைத் தவிர வேறு வழியில்லை. இந்தச் சிக்கலை உணர்ந்து, இனி தமிழில் எழுதுகின்ற முனைவர்கள், தங்களை முனைவர் என்ற அடைமொழியுடன் குறிப்பிடுமாறு அன்புடன் வேண்டுகிறேன். ஆங்கிலத்தில் இவ்வாறு எழுதும்போது பின்னொட்டாக, பிஎச்.டி. எனக் குறிப்பிடலாம். தமிழில் அது குறைவாக இருப்பதால், அவரவரே தங்களை அடையாளம் காட்டுவது நல்லது.

    பின்னொட்டு என்றதும் ‘அவர்கள்’ நினைவுக்கு வருகிறார்கள். பெயர்களுக்குப் பிறகு ‘அவர்கள்’, ‘அவர்கள்’ என வரிசையாக எழுதுவது தேவையற்றது. பெயரைக் குறிப்பிட்டால் போதுமானது. குடியாட்சியில் அனைவரும் மதிப்பிற்கு உரியவர்களே. ஒருவரை ‘அவர்கள்’ என விளித்து, இதர பெயர்களை அவ்வாறு குறிப்பிடாவிடில் பேதம் மிகும். எனவே, மிகவும் முக்கியம் என்றால் தவிர, அவர்களைப் பயன்படுத்த வேண்டாம். இன்னும் சிலர் பட்டங்கள், திரு, டாக்டர் ஆகிய அனைத்தோடும் கல்வித் தகுதிகளையும் அவர்களையும் பின்னால் இணைத்து அழைத்து, மூச்சு வாங்க வைப்பார்கள். இவை போலித்தனமானவை. இதனைப் படிப்பவர்கள் உடனடியாக உணருவார்கள். எனவே, இத்தகைய வழக்கத்திலும் மாற்றம் வேண்டும்.

    பாலினம்

    இதே போன்று தலைவர் என்பது பொதுச்சொல். பெண்பாலுக்கு வருகையில் தலைவி என எழுதினால், ஆண்பாலுக்குத் தலைவன் என எழுத வேண்டியிருக்கும். எனவே இரு பாலருக்கும் பொதுவான சொற்களைப் பயன்படுத்துவது நல்லது. ஒரே தொடரில் ஒருவரைத் தோழர் என்றும் இன்னொருவரைத் தோழி எனவும் எழுதுவது சரியில்லை. இதனால்தான் ஆங்கிலத்தில் Chairman என்பதை விடுத்து, Chair Person4 என எழுதுகிறார்கள்.

    அலகுகள்

    வெவ்வேறு நாடுகளிலிருந்து, வெவ்வேறு துறைகளைச் சார்ந்த தரவுகளைப் பயன்படுத்தும்போது, பல்வேறு கூறுகளை நினைவில் கொள்ள வேண்டும். அந்தக் குறிப்பிட்ட மொழி பேசும் மக்களுக்கு எப்படிச் சொன்னால் புரியுமோ, அப்படி அந்தத் தரவுகளை அளிக்க வேண்டும். அவர்களிடம் பெருமளவு புழக்கத்தில் உள்ள அலகுகளையே அதற்குப் பயன்படுத்த வேண்டும்.

    அமெரிக்க டாலர், யூரோ, பவுண்டு, யென் என வேறு நாட்டு நாணயங்களை இந்திய ரூபாய்க்கு மாற்றி உரைக்க வேண்டும். இப்படியே மைல் என்பதைக் கிலோ மீட்டராகவும் காலன் என்பதை லிட்டராகவும் இது போன்றே இதர அலகுகளையும் மாற்ற வேண்டும். இதற்கு இலவச அலகு மதிப்பு மாற்றிகள், இணையத்தில் உண்டு.

    ஒருமையும் மதிப்புப் பன்மையும்

    சிறுவர்களை ஒருமையில் அழைப்பதையும் தவிர்க்கலாம். ‘ஏழாம் வகுப்பு மாணவன் குமார், பேச்சுப் போட்டியில் முதல் பரிசு வென்றான்’ என எழுதும் வழக்கம் உள்ளது. ‘மாணவர் குமார், முதல் பரிசு வென்றார்’ என எழுதுவது, உயர்வானது. மிகவும் உரிமையும் நெருக்கமும் உள்ளவரை மட்டும் சில நேரங்களில் ஒருமையில் அழைக்கலாம்.

    ‘திருடன் பிடிபட்டான்’, ‘விபசாரி பிடிபட்டாள்’ எனப் பாலினம் தெரியுமாறு ஒருமையில் எழுதுவதையும் தவிர்க்கலாம். சமூகத்தின் மனநிலையைக் காட்டுவதால், இது, பெரும் புழக்கத்திற்கு வந்துவிட்டது. ‘திருட்டு வழக்கில் ஒருவர் கைது’, ‘பாலியல் வழக்கில் பெண் கைது’ என எழுதுவது நல்லது. இன்னும் சொல்லப் போனால், கைது செய்யப்பெற்றவர் – குற்றம் சாற்றப்பெற்றவர், உண்மையான குற்றவாளியா என உறுதியாக நமக்குத் தெரியாது. அவர் நீதிமன்றத்தில் விடுதலை பெறலாம். கீழ் நீதிமன்றத்தில் தண்டனை பெற்றாலும் மேல் நீதிமன்றத்தில் விடுதலை பெறலாம். எனவே, அவசரப்பட்டு அவரது தன்மானத்திற்கு ஊறு விளைவிக்குமாறு எழுதுவது கூடாது.

    காவல் துறையினர் ஐயத்தின் பேரில்தான் பலரைக் கைது செய்கிறார்கள். சாட்சிகளின் பேரில்தான் வழக்குத் தொடுக்கிறார்கள். எனவே, குற்றம் சாற்றப்பெற்றவரைச் செய்திகளில் குறிப்பிடும்பொழுது மிகுந்த கவனம் தேவை.

    பெயர்கள்

    பெயர்களைக் குறிப்பிடும்பொழுது, அவரவர் தம் பெயர்களை எவ்வாறு எழுதுகிறார்களோ அவ்வாறே நாமும் எழுதுவது நல்லது. அண்ணன் – தம்பிகளான எஸ்.பி.முத்துராமன், சுப.வீரபாண்டியன் ஆகியோர் தம் முதலெழுத்துகளை எவ்வாறு எழுதுகிறார்கள் எனப் பாருங்கள். இதனை நாமும் அவ்வாறே எழுதுவது நல்லது. இங்கு சுப.முத்துராமன், எஸ்.பி.வீரபாண்டியன் என எழுதுவது அவர்களைக் குறிப்பிடாமல் போகலாம். இங்கு இன்னொரு முக்கிய குறிப்பு. S.P. முத்துராமன் என எழுதும் முறையை நாம் ஆதரிக்கக் கூடாது. எழுதுபவர், ஆங்கில எழுத்திலேயே எழுதினாலும் நாம் தமிழில் எஸ்.பி.முத்துராமன் என்றுதான் எழுத வேண்டும். அத்தகைய போக்கினை நாம் முற்றிலுமாக ஒழிக்க முடியாவிட்டாலும் கூடியமட்டிலும் இந்த வகையிலாவது முயல வேண்டும்.

    ஒரு பகுதிக்கு அறிமுகம் இல்லாத ஒருவரை முதன்முதலாகக் குறிப்பிடும்போது, அவரை ஓரளவு முழுமையாக அறிமுகப்படுத்த வேண்டும். எழுதுபவருக்குத் தெரிந்த அனைத்தும் படிப்பவருக்கும் தெரிந்திருக்கும் என நினைக்கக் கூடாது.

    யாருக்காக எழுதுகிறோம்?

    இன்று வாசகர்கள் பல்வகையினர்; பல்வேறு பின்புலங்களைக் கொண்டோர். எனவே ஒரு செய்தியை எழுதுபோது, மாணவர்கள் / சிறுவர்கள், நகரவாசிகள் / கிராமவாசிகள், பெண்கள், மூத்தோர்… எனப் பல கூறுகளாய் உள்ள வாசகர்களுள் எவரை முன்னிறுத்தி எழுதுகிறோம் என முடிவு செய்வது, ஒருவரின் எழுத்து நடையை அமைப்பதில் முக்கிய பங்கு வகிக்கிறது. இது, அந்தந்தப் பிரிவு மக்களுக்கு ஏற்ற சொற்களைப் பயன்படுத்தவும் எடுத்துக் காட்டுகளைத் தரவும் உதவும்.

    இங்கு நாம் ஒரு செய்தியினை எழுதுகையில் நேரம், காலம், இடம், பாலினம், ஒருமை, பன்மை, சிறுவர் – பெரியவர், குற்றம் சாற்றப்பெற்றவர், முன்னொட்டு, பின்னொட்டு எனச் சிலவற்றை எவ்வாறு கையாளுவது எனக் கண்டோம். இவையெல்லாம் செய்திகளுக்கும் செய்திக் கட்டுரைகளுக்கும் மட்டுமே. கதை, கவிதை ஆகிய படைப்பிலக்கியங்களுக்குப் பொருந்தா.

    தரவு மூல நம்பகத்தன்மை & இணைப்பேற்றம்

    இணையத்தில் எழுதுவோர், ஒரு செய்தியை அல்லது தகவலை மேற்கோள் காட்டும்போது, அதற்கான சான்றினை அளிக்க வேண்டும். அந்தச் செய்தி, எந்தப் பக்கத்தில் / அச்சிதழில் / நூலில் வெளிவந்துள்ளது என்பதைச் சொல்ல வேண்டும். அந்தப் பக்கத்தின் சுட்டியை இணைப்பேற்றமாகவும் (Hyperlink) அளித்தல் வேண்டும். இந்த வசதி, அச்சிதழில் இல்லை; இணையத்தில் மட்டுமே சாத்தியமாக உள்ளது.

    அத்துடன் ஒரு தரவு, மூலத் தரவா? இரண்டாம் நிலை / மூன்றாம் நிலைத் தரவா என்பதையும் சொல்ல வேண்டும். மூலத் தரவு எனில், அது எந்த நாளில் / நேரத்தில் எங்கே நடந்தது; அதற்கு வேறு சாட்சிகள் இருக்கிறார்களா? எனச் சொல்வது நல்லது.

    கல்வெட்டு, ஓலைச் சுவடி, பட்டயம் போன்றவற்றை மேற்கோள் காட்டுவோர், அந்தக் கல்வெட்டு எங்கே உள்ளது என்பதுடன், அதனைப் படித்துப் பொருள் கூறியவர் யார் என்ற விவரத்தையும் அளிக்க வேண்டும்; ஏனெனில் ஒரே சொல்லுக்கு வெவ்வேறு ஆய்வாளர்கள் வெவ்வேறு பொருள்களைக் கூறும் வாய்ப்பைக் கவனத்தில் கொள்ள வேண்டும்.

    மொழிபெயர்ப்புத் தரவு எனில், மூல ஆசிரியரின் பெயருடன், மொழிபெயர்த்தவரின் பெயரையும் சுட்ட வேண்டும்.

    இவை ஒரு தரவின் உண்மைத் தன்மையை உணர்த்தப் பெரிதும் உதவும்.

    படங்களும் தொடர்புடைய செய்திகளும்

    ஒரு செய்தியை எழுதும்போது, அதற்குப் பொருத்தமான படங்களையும் தொடர்புடைய செய்திகளையும் இணைக்க வேண்டும். இந்தப் படங்கள், நிழற்படங்களாகவும் விழியங்களாகவும் இருக்கலாம். இதே செய்திக்குத் தொடர்புடையவாறு உள்ள முந்தைய செய்திகளின் இணைப்புகளைத் தொகுத்து அளிப்பது, படிப்பவருக்குப் பெரிதும் பயனுள்ளதாக இருக்கும். இது, செய்தியை வெளியிடும் தளத்திற்கும் அதிகப் பக்கப் பார்வைகளைப் (Page views) பெற்றுத் தரும்.

    சிரிப்புருக்களும் உணர்நிலை அறிவிப்புகளும்

    இணையத்திலும் செல்பேசியிலும் ஒருவரின் உணர்வை வெளிப்படுத்த, சிரிப்புருக்கள் (smilies) பயன்படுகின்றன. மகிழ்ச்சியைத் தெரிவிக்க, கேலி செய்ய, இப்படியுமா என வியக்க, இன்னும் பற்பல செயல்களில் ஈடுபடுவதைத் தெரிவிக்க‌… எனப் பல வகைச் சிரிப்புருக்கள் உண்டு. இவற்றை இடத்துக்கேற்ப பயன்படுத்தினால், மிகச் சுருக்கமான எழுத்துகளில் அல்லது எழுத்தே இல்லாமல் கருத்துகளையும் உணர்வுகளையும் நம் நடவடிக்கைகளையும் பகிர முடியும்.

    அத்துடன் ஒருவர் தம் மனநிலையை ஒரே சொல்லால் அறிவிக்க‌லாம். முகநூலில் இந்த வசதி உள்ளது. எவ்வாறு உணர்கிறீர்கள் எனக் கேட்டு, மகிழ்ச்சியாக, கவலையாக, களைப்பாக, சிறப்பாக, அதிசயமாக, வெறுப்பாக, பயமாக, ஸ்பெஷலாக, செக்ஸியாக… என்றெல்லாம் தேர்ந்தெடுக்க வாய்ப்பு அளித்துள்ளது. பல சொற்களையும் தமிழாக்கிய முகநூல் குழுவினர், ஸ்பெஷல், செக்ஸி ஆகியவற்றை அப்படியே கொடுத்துள்ளதையும் நாம் கவனிக்க வேண்டும்.

    ஒரே சொல்லுக்குப் பல பொருள்கள் உள்ள நிலையில், இது, இணையத்தில் எழுதுபவரின் அப்போதைய‌ மனநிலையை வாசகர்கள் புரிந்துகொள்ள உதவுகிறது. இன்னொரு கோணத்தில் சொல்வதானால், எழுதுபவரின் மனநிலையைத் தவறாகப் புரிந்துகொள்ளும் வாய்ப்பைக் குறைக்கிறது.

    தலைப்பும் குறிச்சொற்களும்

    இணையத் தேடுபொறிகளில் ஒரு செய்தியைத் தேடும்போது, அது, அந்தக் குறிச்சொல் (Keyword) எந்தப் பக்கத்தில், எவ்வாறு அமைந்துள்ளது என்பதைப் பொறுத்து, தேடல் முடிவுகளைத் தருகிறது. முக்கியமாக, அக்குறிச்சொல், தலைப்பில் அமைந்துள்ளதா? செய்தியின் உடற்பகுதியில் அதிக முறைகள் இடம்பெற்றுள்ளதா என்றும் தேடுபொறி ஆராய்கிறது. தேடுபொறி உகப்பாக்கம்5 என்பது (Search Engine Optimization – SEO), மிகப் பெரிய துறையாக வளர்ந்துள்ளது.

    எனவே செய்தியை எழுதுபவர், தகுந்த தலைப்பினையும் குறிச்சொற்களையும் தேர்ந்தெடுக்க வேண்டும். இது, அதன் பரவலுக்கும் வீச்சுக்கும் அச்செய்தியை எளிதில் கண்டறியவும் பெரிதும் உதவும்.

    எழுத்தைச் செம்மையாக்கல்

    கணினியில் எழுதி, இணையத்தில் வெளியிடுவோருக்குப் பற்பல வசதிகள் உள்ளன. எழுதியதைப் பிழை திருத்தல், எத்தனை சொற்கள் / பக்கங்கள் உள்ளன, ஒரே சொல் எத்தனை முறைகள் கையாளப்பெற்றுள்ளது… எனப் பலவற்றைக் காணலாம். இவற்றின் மூலம், பிழைகள் இருந்தால் அவற்றைத் திருத்திக்கொள்ள முடியும். ஒரே சொல், பல முறைகள் வந்தால், மாற்றிக்கொள்ள முடியும். படைப்பின் சில பகுதிகளை வெட்டி ஒட்டல், முன்பின் மாற்றல் எனப் பல வகை வசதிகளை மின்னணுக் கருவிகள் தருகின்றன.

    பல கருவிகளில் சொற்களை எழுதுகையில் இயன்முற்று (Auto completion) வசதி உள்ளது. இதில் சில சிக்கல்கள் இருப்பினும் கவனமாகப் பயன்படுத்தினால், இதன் மூலம் நேரத்தைச் சேமிக்க முடியும். அகராதி வசதி இருப்பதால், தமிழ்ச் சொல்லுக்கு வேற்று மொழிச் சொல்லையும் வேற்று மொழிச் சொல்லுக்குத் தமிழ்ச் சொல்லையும் எளிதில் காணலாம். இவற்றின் மூலம் சரியான சொற்களை, சரியான அளவில், சரியான நேரத்தில், உரிய பயனர்களிடம் கொண்டு சேர்க்க முடியும். இதற்கு இணையமும் கணினி நுட்பங்களும் பேரளவில் துணை புரிகின்றன.

    (இந்தக் கட்டுரை, 2009 அக்டோபர் 5ஆம் தேதி அண்ணாகண்ணன் வெளி6 என்ற வலைப்பதிவில் வெளியான ஆக்கத்தின் விரிவாக்கம்)

    அடிக்குறிப்புகள்:

    1. http://en.wikipedia.org/wiki/Common_Era

    2. http://en.wikipedia.org/wiki/Quanzhou

    3. http://en.wikipedia.org/wiki/Guangzhou

    4. http://en.wiktionary.org/wiki/chairperson

    5. http://www.vallamai.com/?p=3767

    6. http://annakannan.blogspot.in/2009/10/blog-post_5644.html

    (திருச்சி பாரதிதாசன் பல்கலைக்கழக உறுப்பு கலை மற்றும் அறிவியல் கல்லூரியில் தமிழ்க் கணினி & இணையப் பயன்பாடுகள் என்ற கருப்பொருளில் 28.03.2014 அன்று நடந்த பன்னாட்டுக் கருத்தரங்கில் வாசிக்கப்பெற்றது)

    Share

  • தன்முன்னேற்றப் பயிலரங்கம் – அருணா மேல்நிலைப் பள்ளி – திருமாறான்பாடி என்ற இறையூர்.

    சொ.வினைதீர்த்தான்

    வணக்கம்.

    vinay2

    24.1.2014 அன்று பெண்ணாடத்திற்கு அருகிலுள்ள திருமாறன்பாடி என்ற இறையூரிலுள்ள அருணா மேல்நிலைப் பள்ளியில் பிளஸ் 2 படிக்கும் 170 மாணவ மாணவியருக்குத் தன் முன்னேற்றப் பயிலரங்கம் நடத்தும் வாய்ப்பு அமைந்தது.

    vinay3திருமாறன்பாடி சைவத்தில் ஒரு முக்கியமான தலம். இங்கு தாகம் தீர்த்தபுரீசுவரர் ஆலயம் அமைந்துள்ளது. இங்குள்ள ஆழ்குழாய் கிணறு சுற்றியுள்ள ஐந்து கிராமங்களுக்கு இன்றும் குடிநீர் வழங்கி வருவது அதிசயம்.

    பல தலங்களில் பதிகம் இசைத்து வழிபட்டுப் பின்னர் கால் நடையாகவே இவ்விடம் வந்த பாலகனான திருஞானசம்பந்தர் நான்கு கல் தொலைவிலுள்ள பாடல் பெற்ற தலமான திருநெல்வாயில் அரத்துறை செல்வதற்காகத் தந்தையார், துணைவர்களுடன் இரவு இங்கு தங்கியிருந்தார். மறுநாள் காலை எழுந்தபோது சிவன் அருளால் திருஞான சம்பந்தருக்கு முத்துச் சிவிகை, மணிக்குடை, பொற்சின்னம் ஆகியவை தந்தருளப்பட்டுக் காத்திருந்தன.

    பயிலரங்கில் முதற் செய்தியாகத் தல வரலாறைப் பகிர்ந்துகொண்டு முயற்சியும் ஆர்வமும் இருந்தால் என்ன நிகழும் என்பதற்கு இத்தலமே ஒரு காட்டு என்று சுட்டினேன். முத்துச்சிவிகை என்பது என்ன? அது குறிக்கோளை எளிதல் அடைய உதவும் ஒரு சாதனம். அந்த ஊர்தி நமக்குத் தருவது குறிக்கோளை நோக்கியான வேகமான நகர்வு. குடையும், பொற்சின்னமும் குறிப்பது ஒரு உயரிய, கௌரவ, சமுதாய அடையாளம். முயற்சியும், பயிற்சியும், கொண்ட குறிக்கோளில் தணியாத ஆர்வமும் மாணவர்களிடமிருந்தால் அவர்களுக்குச் சமுதாயத்தில் ஏற்றமும், கௌரவமும், வாழ்வில் உயர்வும் ஏற்படுமென்பதற்குத் திருஞான சம்பந்தர் வாழ்க்கை நிகழ்வை மனதில் எண்ணிக்கொள்ள வேண்டுமென்றேன்.

    அடுத்து அந்தக் குறிக்கோளின் வரையறையை S M A R T வழியில் விளக்கிக் குறிக்கோளை நிர்ணயித்தலைvinai1 எடுத்துக்கொண்டேன். 4 “M” Goals – Micro, Mini, Middle, Mega goals – 1.ஒவ்வொரு நாளுக்கான செயல்பாடுகள் 2. பிளஸ் 2 தேர்வில் மதிப்பெண் எடுத்தல் 3. அடுத்துப் பட்டப் படிப்பு வாய்ப்புக்கள், படிப்பினைத் தெரிவு செய்தல், பட்டம் பெறல் 4. அடுத்த நீண்ட காலக் குறிக்கோளான தொழிலும் வாழ்வும் சமுதாயப் பணிகளும் என்ற நோக்கில் பயிற்சி அமைந்தது.

    S W O T – பலம், பலவீனம், வாய்ப்புக்கள், தடங்கல்கள் என்ற வகையில் மாணவச் செல்வங்களை எண்ணிப் பார்க்கச் செய்தேன். அவர்களைத் தன் திறமைகளையும், துணையாக அமையக் கூடியவர்கள் உதவக் கூடிய வழிகளையும் பட்டியிலிட வைத்தேன். பலவீனங்களையும் பட்டியலிட்டார்கள். பலத்தைப் பெருக்கும் வழிகளும் பலவீனத்தைத் தவிர்க்கவுமான வழிகளும் அவர்களே கூற ஆராயப்பட்டன. பலம் பெருகும்போது சந்தர்ப்பங்கள் “மடி தற்றித் தான் முந்துறும்” என்பது போல வந்தெய்துகின்றன என்பதை உணர்த்தினேன்.

    நான் அண்மையில் பயிலரங்கு நடத்திய பள்ளிகளில் மிகச் சிறப்பான மாணவச் செல்வங்களைக் கொண்ட பள்ளி அருணா மேல்நிலைப் பள்ளியாகும். முன்பு அருணா சுகர்ஸ் நிர்வாகத்திலும் தற்போது ஒரு குழு நிர்வாகத்திலும் இயங்கும் அரசு சார்ந்த பள்ளி இதுவாகும். பிள்ளைகள் பயிற்சியைப் பற்றியும், குறிக்கோள் பற்றியும், பெற்ற தாய்க்கும் பிறந்த பொன்னாட்டிற்கும் ஆற்ற விரும்பும் பணி பற்றியும் தங்கள் கருத்துக்களாக (Feed back) எழுதித் தந்தவற்றைப் படித்தபோது சிலிர்த்துப் போனேன். மன நிறைவடைந்தேன்.

    Share

  • அலங்காரம் கலையாத சிலை ஒன்று கண்டேன்!

    கவிஞர் காவிரி மைந்தன்

    அலங்காரம் கலையாத சிலை ஒன்று கண்டேன் – ரோஜாவின் ராஜா – கவியரசர் கண்ணதாசன் – டி.எம்.எஸ்.- பி.சுசீலா – எம்.எஸ்.விஸ்வநாதன் – சிவாஜி, வாணிஸ்ரீ

    இன்பலஹரியில் நம் இதயம்தொடும் இன்னொரு காதல் பாடலிது! கவியரசர் கண்ணதாசனின் கற்பனைக் களஞ்சியத்தில் பூத்த பூவிது! மெல்லிசை மன்னர் எம்.எஸ்.விஸ்வநாதன் விரல்களில் வருடப்பட்ட திரையிசைப் பொக்கிஷமிது! ரோஜாவின் ராஜா என்கிற திரைப்படத்தில்.. டி.எம்.எஸ். பி.சுசீலா பாடிய பாடலுக்கு நடிகர்திலகம் சிவாஜிகணேசன் வாணிஸ்ரீ நடிப்பில்..

    மங்கல வார்த்தைகளை மழைபோல பொழிந்திருக்கும் கவிஞர், இயற்கையின்மடியில் வைத்து இதயங்களைத் தாலாட்டுகிறார்.

    பொட்டோடு பூக்கண்ட பன்னீர் மரம்
    பொன் மாலை பெண்ணுக்கு மஞ்சம் தரும்
    நீரோடு விளையாடிப் போகின்ற தென்றல்
    நீ கொஞ்சம் விளையாட நெஞ்சம் தரும்

    பொற்காலப்பாடல்கள் என்று போற்றும் தமிழ்த்திரைக்குத் தன் முத்தான தமிழால் மோகனப் பண் பாடிவைத்திருக்கிறார்.

    உண்டாயின் உண்டென்று மணம் கொள்ளவோ
    இல்லாயின் இல்லென்று நான் செல்லவோ
    எங்கேனும் பூப்பந்தல் மேளங்களோடு
    கல்யாணத் தமிழ் பாடி நடமாடுவோம்

    இலக்கியத்தமிழையும் திரைத்தமிழாக்கித் தந்து கல்யாணத் தமிழ்ப்பாடல் பாடுகின்றார்! எத்தனை முறை கேட்டாலும் அலுக்காத பாடலாய் அது இன்னுமின்னும் காதினில் .. காதலைச்சொல்கிறது கேளுங்கள்!

    தன் சூடி மலர் தந்த ஆண்டாளிடம்
    அழகான மலர் மாலை நாம் வாங்குவோம்
    தேனாட்சி தான் செய்யும் மீனாட்சி சாட்சி
    திருவீதி வலம் வந்து ஒன்றாகுவோம்

    ஆன்மீகத்தின் அடிநாதம் தன் மனதில் எப்போதும் அலங்காரம் செய்வதனால்.. தேன்சிந்தும் காதல்பாடலிலும் தெள்ளுத்தமிழில் ஆண்டாள் வருகிறாள் பாருங்கள்..

    கண்ணதாசனின் கவிதைக்கரும்பில் எந்தப்பக்கமும் இனிக்கவே செய்கிறது அதிலும் காதலைப்பிழியும்போது இதயத்தின் மென்மையும் அ்னுபவங்களின் அடர்த்தியும் சங்கமம் ஆகிறது.

    பலர் கவிதை எழுதுகிறார்கள் சிலர் கவிதையாய் வாழ்கிறார்கள். வாழ்வையே கவிதையாக்கும் நோக்கம் கவிஞரின் வெற்றி!

    எழுதும் எல்லாக் கவிதையும் இணையற்றவைகளாக இருக்க வேண்டிய கட்டாயமில்லை

    ஏதேனும் ஒன்று நம்மை உரசிச் சென்று இதயத்தில் தீப்பிடிக்கச்செய்தால் போதும்.

    கண்ணதாசனின் கவிதைகளோ அனைத்துமே இதயத்தைப் பற்றிக்கொள்கிறது!

    அலங்காரம் கலையாத சிலை ஒன்று கண்டேன்

     

    அன்பே உன் எழில் கண்ட ஒரு நாளிலே
    ஆனந்த மேகங்கள் பூத்தூவக் கண்டேன்
    அய்யா உன் முகம் பார்த்த ஒரு நாளிலே
    அய்யா உன் முகம் பார்த்த ஒரு நாளிலே

    பொட்டோடு பூக்கண்ட பன்னீர் மரம்
    பொன் மாலை பெண்ணுக்கு மஞ்சம் தரும்
    நீரோடு விளையாடிப் போகின்ற தென்றல்
    நீ கொஞ்சம் விளையாட நெஞ்சம் தரும்
    நீ கொஞ்சம் விளையாட நெஞ்சம் தரும்

    அலங்காரம் கலையாத சிலை ஒன்று கண்டேன்
    அன்பே உன் எழில் கண்ட ஒரு நாளிலே
    ஆனந்த மேகங்கள் பூத்தூவக் கண்டேன்
    அய்யா உன் முகம் பார்த்த ஒரு நாளிலே
    அய்யா உன் முகம் பார்த்த ஒரு நாளிலே

    உண்டாயின் உண்டென்று மணம் கொள்ளவோ
    இல்லாயின் இல்லென்று நான் செல்லவோ
    எங்கேனும் பூப்பந்தல் மேளங்களோடு
    கல்யாணத் தமிழ் பாடி நடமாடுவோம்
    கல்யாணத் தமிழ் பாடி நடமாடுவோம்

    அலங்காரம் கலையாத சிலை ஒன்று கண்டேன்
    அன்பே உன் எழில் கண்ட ஒரு நாளிலே
    ஆனந்த மேகங்கள் பூத்தூவக் கண்டேன்
    அய்யா உன் முகம் பார்த்த ஒரு நாளிலே
    அய்யா உன் முகம் பார்த்த ஒரு நாளிலே

    தன் சூடி மலர் தந்த ஆண்டாளிடம்
    அழகான மலர் மாலை நாம் வாங்குவோம்
    தேனாட்சி தான் செய்யும் மீனாட்சி சாட்சி
    திருவீதி வலம் வந்து ஒன்றாகுவோம்
    திருவீதி வலம் வந்து ஒன்றாகுவோம்

    அலங்காரம் கலையாத சிலை ஒன்று கண்டேன்
    அன்பே உன் எழில் கண்ட ஒரு நாளிலே
    ஆனந்த மேகங்கள் பூத்தூவக் கண்டேன்
    அய்யா உன் முகம் பார்த்த ஒரு நாளிலே
    அய்யா உன் முகம் பார்த்த ஒரு நாளிலே

    படம் : ரோஜாவின் ராஜா
    குரல் : டி.எம்.எஸ்., சுசீலா
    பாடல் : கண்ணதாசன்
    இசை : எம்.எஸ்.வி.
    நடிகர்கள் : சிவாஜி, வாணிஸ்ரீ

    http://www.inbaminge.com/t/r/Rojavin%20Raja/Alangaram%20Kalaiyana.eng.html

    Share

  • அமெரிக்காவின் மத்தியஸ்தம்!

    நாகேஸ்வரி அண்ணாமலை

    இஸ்ரேல்-பாலஸ்தீனப் பிரச்சினை என்பது நூறு ஆண்டுகளாக நடந்துகொண்டிருப்பது.  ஆயிரத்துத் தொளாயிரத்து அறுபதுகளிலிருந்து அமெரிக்கா இஸ்ரேல்-பாலஸ்தீனப் பிரச்சினைக்குத் தீர்வு காண்பதாகக் கூறிக்கொண்டு இருவருக்கும் இடையே மத்தியஸ்தம் செய்து வருகிறது.  மத்தியஸ்தம் செய்வதாகக் கூறிக்கொள்ளும் அமெரிக்கா எப்போதும் இஸ்ரேலுக்குச் சாதகமாகவே நடந்து வந்திருக்கிறது.

     pon2

    பைபிள் காலத்தில் இப்போதைய சிரியா, லெபனான், ஜோர்டான், இஸ்ரேல், பாலஸ்தீன நாடாக உருவாகப் போவதாக பாலஸ்தீனர்கள் கனவு கண்டுகொண்டிருக்கும் வெஸ்ட் பேங்க், காஸா இடங்களையும் சேர்த்து பாலஸ்தீனம் என்று அழைத்தார்கள்.  இப்போது மத்திய தரைக் கடலின் கிழக்குப் பகுதிக்கும் ஜோர்டான் நதியின் மேற்குக்கரைப் பகுதிக்கும் இடையேயான இடம் பாலஸ்தீனம் என்றும் அது தங்கள் மூதாதையர் மூவாயிரம் ஆண்டுகளாக வாழ்ந்தவந்த இடம் என்றும் அதனால் தங்களுக்கு அதில் முழுப் பாத்தியதையும் இருக்கிறது என்று கூறிக்கொண்டு பத்தொன்பதாம் நூற்றாண்டின் கடைசியிலிருந்து வெளியிலிருந்து வந்த யூதர்கள் அங்கு ஏற்கனவே மனிதர்கள் வாழ்ந்துகொண்டிருக்கிறார்கள் என்ற உண்மையைத் தங்கள் வசதிக்காக மறந்துவிட்டுக் குடியேறிக்கொண்டே இருந்தார்கள்.  அப்போது வளம் மிகுந்த நாடான அமெரிக்காவில் ஏற்கனவே குடியேறி பல யூதர்கள் பெரும் செல்வந்தர்களாக விளங்கினார்கள்.  இவர்களின் பண உதவியாலும் ஐரோப்பாவிலிருந்து வந்த யூதர்கள் தங்களோடு கொண்டுவந்த தொழிநுட்ப அறிவாலும் ஏற்கனவே பாலஸ்தீனத்தில் வாழ்ந்துகொண்டிருந்த அரேபியர்களின் நிலங்களை வாங்கிப்போட்டு அந்த நிலங்களில் அமோக விளைச்சலை உண்டுபண்ணினர்.  இந்த நிலங்களில் யூதர்களை மட்டுமே வேலைக்கு வைத்துக்கொண்டனர்.  இதனால் அரேபியர்கள் தங்கள் நிலங்களை இழந்ததோடல்லாமல் தங்கள் வாழ்வாதாரத்தையும் இழந்தனர்.  இதனால் பலர் அரேபியர்கள் கொதித்தெழுந்தனர்.  இதனால் யூதர்களுக்கும் அரேபியர்களுக்கும் இடையே நிறைய மோதல்கள் நடந்தன.

    1922-லிருந்து பாலஸ்தீனம் பிரிட்டிஷ் நியமனத்தின் (British Mandate) கீழ் இருந்து வந்தது.  பிரிட்டனும் யூதர்களுக்கும் அரேபியர்களுக்கும் இடையே நடந்த மோதல்களைத் தடுத்து நிறுத்த முடியாமல் பல முயற்சிகளுக்குப் பிறகு பாலஸ்தீன நிர்வாகத்தை இரண்டாம் உலக யுத்தத்திற்குப் பிறகு நாடுகளிடையே ஏற்படும் சச்சரவுகளைத் தீர்க்க ஏற்படுத்தப்பட்ட ஐ.நா.விடம் ஒப்படைத்துவிட்டு பாலஸ்தீனத்தை விட்டு வெளியேறியது.  ஐ.நா.வும் வெளியிலிருந்து வந்த யூதர்கள், தங்கள் மூதாதையர்களுக்கும் பாலஸ்தீனத்திற்கும் மூவாயிரம் வருஷங்களுக்கு முன்னால் இருந்த சம்பந்தத்தைக் காட்டி பாலஸ்தீனத்தில் பங்கு கேட்பது சரியல்ல என்று யூதர்களுக்கு அறிவுறுத்தவில்லை.  சமரசம் செய்வதாக நினைத்து பாலஸ்தீனத்தை இரண்டாகப் பிரித்து அரேபியர்களுக்கும் யூதர்களுக்கும் கொடுத்தது.  வெளியிலிருந்து வந்த யூதர்கள் தங்கள் மூதாதையர் வாழ்ந்த தங்களுடைய புண்ணிய தலத்தில் தங்களுக்கு ஒரு தனி நாடு அமைக்கும் உரிமை கிடைத்தது என்று மகிழ்ந்துபோய் அந்தப் பிரிவினையை ஒத்துக்கொண்டனர்.  அரேபியர்களோ தங்கள் நாட்டை வெளியிலிருந்து வந்த, வரும் யூதர்களோடு எப்படிப் பகிர்ந்துகொள்வது என்று கோபமடைந்து தங்கள் ஆயுத பலத்தால் எப்படியும் தங்கள் நாட்டை யூதர்களிமிருந்து திரும்பப் பெற்றுவிடுவது என்று தீர்மானித்து காரியத்தில் இறங்கினர்.  அவர்களுடைய படைபலத்தை விட அமெரிக்க யூதர்கள் கொடுத்த பண உதவியால் இப்போது யூதர்களின் படைபலம் அதிக அளவு உயர்ந்துள்ளது என்பதை அவர்கள் உணரவில்லை.  பல முறை யூதர்களோடு மோதியும் பலன் இல்லை.  முழு நாடும் தங்களுக்கு வேண்டும் என்று அரேபியர்கள் வீம்பிக்கொண்டிருக்க, யூதர்கள் மிகவும் தந்திரமாக இஸ்ரேல் என்ற நாட்டை தங்களுக்கென்று உருவாக்கிக்கொண்டதோடு ஐ.நா. அரேபியர்களுக்குக் கொடுத்த இடங்களையும் கொஞ்சம் கொஞ்சமாகப் பிடித்துக்கொண்டிருக்கிறது.  இஸ்ரேலைத் தட்டிக் கேட்க யாரும் இல்லையாதலால் இஸ்ரேல் தன்னிச்சையாகப் பாலஸ்தீனத்தில் இடங்களைப் பிடித்துக்கொள்ளும் தன் பேராசையைத் தொடர்ந்து வருகிறது.

    தன் சொந்த நன்மைக்காகவும் அமெரிக்கா வாழ் யூதர்கள் கொடுத்த நிர்ப்பந்தித்தினாலும் அமெரிக்கா 1967-க்குப் பிறகு இஸ்ரேல்-பாலஸ்தீனப் பிரச்சினையில் மத்தியஸ்தம் செய்வதாகக் கூறிக்கொண்டு ஒரு தலைப்பட்சமாக நடந்துகொண்டு வருகிறது.  இதற்கெல்லாம் காரணம் அமெரிக்காவில் நிறைய அதிகாரம் வகிக்கும் அமெரிக்க யூதர்கள்.  அமெரிக்க யூதர்களிடம்தான் அமெரிக்காவின் பெரிய வங்கிகள் இருக்கின்றன.  ஹாலிவுட் முழுவதும் இவர்களின் கைகளில்தான்.  எல்லாவற்றிற்கும் மேலாக பத்திரிக்கைகள், ஊடகங்கள் எல்லாம் இவர்களின் அதிகாரத்திற்குள்தான்.  அமெரிக்க மக்களின் கருத்துக்களையும் எண்ணங்களையும் அமெரிக்கா வாழ் யூதர்களால் திசை திருப்ப முடிகிறது.

    இதற்கும் மேலாக இரண்டு அரசியல் கட்சிகளைச் சேர்ந்த அரசியல்வாதிகளும் இவர்களின் பாக்கெட்டிற்குள்.  வித்தியாசமான அரசியல், பொருளாதாரக் கொள்கைகளையுடைய இரண்டு கட்சியைச் சேர்ந்த அரசியல் தலைவர்களும் இஸ்ரேலைப் பொறுத்த வரை ஒரே மாதிரியான கொள்கைகளைத்தான் கொண்டிருக்கிறார்கள்.  ஏனென்றால் இவர்களுடைய தேர்தல் நிதி பெருமளவு யூதர்களிடமிருந்து வருகிறது.  யூதர்களைப் பகைத்துக்கொண்டு யாரும் அமெரிக்க ஜனாதிபதியாகவோ அமெரிக்கப் பாராளுமன்ற உறுப்பினராகவோ வர முடியாது.  இதனால்தான் தேர்தலுக்கு நிற்கும் வேட்பாளர்கள் எல்லோரும் இஸ்ரேலுக்குப் பக்கபலமாக இருப்பதாகக் காட்டிக்கொள்கிறார்கள்.  இஸ்ரேலை எதிர்த்து ஒரு வார்த்தை சொன்னாலும் அமெரிக்க அரசியலில் குப்பை கொட்ட முடியாது என்பது ஒபாமா உட்பட எல்லா அரசியல்வாதிகளுக்கும் தெரிந்திருக்கிறது.  தேர்தல் பிரச்சாரத்தின் போது பாலஸ்தீனர்களின் மீது தனக்கிருந்த பச்சாதாபத்தைப் பற்றிக் கூறிய ஒபாமா, ஜனாதிபதி ஆன பிறகு அதை அறவே மறந்துவிட்டார்.  அமெரிக்க அரசு கூறும் எந்த அறிவுரையையும் இஸ்ரேல் செவிமடுப்பதாக இல்லை.  அதனால் ஒபாமாவும் அறிவுரை கொடுப்பதை விட்டுவிட்டு இஸ்ரேலுக்கும் பாலஸ்தீனர்களுக்கும் நடுவே நடக்கும் சமாதானப் பேச்சுவார்த்தையில் அவருடைய வெளியுறவு அமைச்சர் கெரிக்கு கொஞ்சம் அதிகமாகவே சுதந்திரம் கொடுத்திருக்கிறார்.

    பல தசாப்தங்களாக நடந்துவரும் இந்த சமாதானப் பேச்சுவார்த்தைகளில் பல அமெரிக்க ஜனாதிபதிகள் கலந்துகொண்டிருக்கிறார்கள்.  கார்ட்டர் தவிர மற்ற எந்த அமெரிக்க ஜனாதிபதிக்கும் பாலஸ்தீனர்களுக்கு இழைக்கப்பட்ட அநீதியைப் பற்றிக் கவலையில்லை.  மேலும் இந்தப் பேச்சுவார்த்தைகள் சுமுகமாக முடிந்து மத்திய கிழக்கில் அமைதி நிலவ வேண்டும் என்பதை விட  எப்படியாவது பேச்சுவார்த்தைகள் முடிந்து – இன்னும் கொஞ்சம் அநீதி பாலஸ்தீனர்களுக்கு இழைக்கப்பட்டாலும் – அவற்றை முடித்த அமெரிக்க ஜனாதிபதி என்ற பெயர் சரித்திரத்தில் தங்களுக்குக் கிடைக்க வேண்டும் என்பதுதான் இவர்கள் நோக்கம்.

    இஸ்ரேலுக்குச் சாதகமாகவே பேசிக்கொண்டிருக்கும் எல்லா அமெரிக்க மத்தியஸ்தர்களையும் போல் இப்போது பேச்சுவார்த்தையில் கலந்துகொண்டு வரும் கெரியும் எப்படியாவது பாலஸ்தீன அத்தாரிட்டியின் தலைவர் அப்பாஸை வளைத்துப் போட்டுவிடலாம் என்று நினைக்கிறார்.  எப்படியாவது அவரை ஏதாவது ஒரு சமாதான ஒப்பந்தத்தில் கையெழுத்திட வைத்துவிட வேண்டும் என்பதில் குறியாக இருக்கிறார்.  பாலஸ்தீனத் தலைவர்கள் முன்னால் ஒப்புக்கொண்ட நிபந்தனைகளை இப்போது அப்பாஸ் மறுக்கிறார் என்று அவர் மீது குற்றச்சாட்டு வேறு.  பாவம் அப்பாஸ் அமெரிக்கா கொடுக்கும் நிர்ப்பந்த பிடியில் சிக்கித் தவிக்கிறார்.  அப்பாஸுக்கு இவ்வளவு நெருக்கடி கொடுத்தாலும் இஸ்ரேல் மீதும் அமெரிக்காவுக்கு உள்ளுக்குள் கோபம் இருக்கும் போலும்.  ஏப்ரல் நான்காம் தேதி அல்ஜீரியாவுக்கும் மொரோக்கோவுக்கும் விஜயம் செய்த கெர்ரி நேற்று அல்ஜீரியாவில் உள்ள அமெரிக்கத் தூதரகத்தில் அவரைப் பார்க்க வந்திருந்த தூதரக ஊழியர்களிடமும் அவர்களுடைய குடும்பத்தாரிடமும் தான் தாமதமாக வந்ததற்கும் அவர்களைக் காக்க வைத்ததற்கும் வருத்தம் தெரிவித்துவிட்டு ‘நான் இங்கு வருவதற்கு முன் போனில் பேசிக்கொண்டிருந்தேன்.  என்னோடு பேசிக்கொண்டிருந்தவருக்கு நான் பேச்சை முடித்துவிட்டேன் என்பதை புரிய வைப்பதற்கு மிகவு கஷ்டமாகப் போய்விட்டது’ என்று கூறியிருக்கிறார்.  இஸ்ரேல் பிரதம மந்திரி நேத்தன்யாஹுவைத்தான் பேச்சை நீட்டித்தார் என்று மறைமுகமாகக் குறை கூறியிருக்கிறார்.  நேத்தன்யாஹுவிடம் இதை நேரிடையாகச் சொல்லத் தைரியம் இல்லை.  பாவம் அமெரிக்கா, அமெரிக்காவின் உதவியாலும் அமெரிக்கா வாழ் யூதர்கள் செய்யும் உதவியாலும் இன்று மத்திய கிழக்கில் இராணுவ பலத்தில் பூதாகாரமாக வளர்ந்திருக்கும் இஸ்ரேலுக்கு (மத்திய கிழக்கில் இஸ்ரேலிடம் மட்டும்தான் அணு ஆயுதங்கள் இருக்கின்றன) அமெரிக்கா பயப்பட வேண்டியிருக்கிறது.  இது காலத்தின் கோலமா அல்லது அமெரிக்கா இஸ்ரேலுக்குக் கொடுத்திருக்கும் /கொடுக்கும் அதிக சலுகையா?

    படத்திற்கு நன்றி:

    http://samuthayaarangam.blogspot.in/2013/12/blog-post_25.html

    Share

  • நான் அறிந்த சிலம்பு – 114 (31.03.14)

    மலர் சபா
    மதுரைக் காண்டம் – 11. காடு காண் காதை

    மாங்காட்டு மறையோன் தென்னனை வாழ்த்திய வண்ணம் இளமரக் காவில் புகுதல்

    அம்மண்டபத்தில் ஒரு மறையோனும் இருந்தான்.
    அவன் பாண்டியர்களின் பெருமைகளை
    இங்ஙனம் பேசினான்.

    “வாழ்க எம் மன்னன்!
    மன்னர் பெருந்தகையாளன்!
    பல்லாண்டு காலம் இவ்வுலகை
    அவனே காத்து நிற்பானாக!
    அவன், தன் பெருமை
    பிற மன்னர்களுக்குப் புலப்படும்படி
    அவர்களைத் தம் காலடியில்
    பணிந்திட வைத்தவன்.
    அவன் தன் வடிவேலைக் கடல்மீது எய்திட
    அதனைத் தாங்காத கடலானது
    பஃறுளி ஆற்றோடு சேர்த்துக்
    குமரிமலை அடுக்குகளையும் விழுங்கியது.

    வடக்குத் திசையிலுள்ள
    கங்கையையும் இமயத்தையும்
    கைப்பற்றிய அம்மன்னன்,
    தென் திசை முழுவதையும்
    ஒரு குடையின் கீழ் ஆண்டவனுமாவான்.
    அவன் வாழ்வாங்கு வாழ்வானாக!

    சந்திரகுலத் தோன்றலாகிய
    பாண்டியர் மரபு சிறக்க
    ஆயிரம் சிவந்த கண்களையுடைய
    இந்திரன் பூட்டிய
    வலிமைமிக்க ஆரத்தைத்
    தன் மார்பில் அணிந்து வாழ்ந்து வந்தான்.
    அப்பாண்டிய மன்னன் வாழ்வானாக!

    முதல்வனாகிய இந்திரன்
    தன் தலையில் சூடிய முடியில் இருந்த
    கிம்புரியை உடைத்தவன்..
    அவனது நாட்டில் சிலகாலம்
    இடி கொண்ட மேகங்கள்
    மழை பொழிவிக்காது பொய்த்தன.
    அவ்வேளையில்,
    மேகக்கூட்டத்தை விலங்கிட்டு அழைத்துவந்து
    பெருமழை பொழியச்செய்து
    விளைநிலங்களை விளையச் செய்தவன் அவன்.
    உக்கிரகுமாரபாண்டியன்..
    அவனது புகழ் வாழ்வதாக!”

    இங்ஙனம்
    குற்றமற்ற பெருமை வாய்ந்த
    பாண்டியர் மரபினை
    வாழ்த்திக் கொண்டிருந்தனன் மறையோன்.

    அடிப்படையாக அமைந்த சிலப்பதிகாரத்தின் வரிகள் இங்கே: 15 – 31
    http://www.chennailibrary.com/iymperumkappiangal/silapathikaram6.html

     

    Share

  • இறைவா உன் மாளிகையில்!…

     

    கவிஞர் காவிரிமைந்தன்

     

    kavingar vaali

     

     

     

     

     

     

     

    இறைவா உன் மாளிகையில்…

     

    வியத்தகு நிகழ்வொன்று தமிழகத்தில் நிகழ்ந்தது.  அதுவும் திரைப்பாடல் ஒன்றில் எழுதிய வரிகள் மக்களின் பிரார்த்தனை கீதமாக முழங்க ஒரு தலைவனின் உயிருக்காக ஜாதி, மதங்கள் கடந்து மக்கள் ஒருமித்த வகையில் கடவுளிடம் கருணை மனு போட்டனர்.  இதுவெல்லாம் சாத்தியமா என்று எண்ணிப்பார்த்தால் வாய்ப்பில்லை என்பதுவே அனைவரின் பதிலாகும்.  ஆனால்,  நடந்தது தமிழ் நாட்டில்.. ஏழைகளின் பங்காளன், தாய்மார்களின் தலைமகன், எங்கவீட்டுப் பிள்ளை, வாத்தியார்.. மக்கள் திலகம்., பொன்மனச்செம்மல், புரட்சி நடிகர் என்றெல்லாம் புகழினை எட்டியதோடு.. மட்டுமின்றி மக்கள் நெஞ்சிலும் நிலைத்து வாழ்கின்ற பேறு பெற்ற எம்.ஜி.ஆர். அவர்கள் – திரைத் துறையில் தனக்கென்று தனியிடம் பெற்று திகழ்ந்ததோடு.. அரசியலிலும் ஈடுபட்டு தமிழகத்தின் தனிப்பெரும் தலைவனாக உயர்ந்து – முதல் அமைச்சராக பொறுப்பேற்று 11 ஆண்டுகள் பதவி வகித்தமை உலக வரலாற்றில் ஒரு சகாப்தம்.

     

    எம்.ஜி.ஆர். அவர்களின் 100வது திரைப்படம் ஒளிவிளக்கு..  பாத்திரப்படி கள்வனாக இருந்தாலும் – ஏழைகளுக்கு உதவுகின்றவராக – ஊரில் பரவிய கடும் நோயின் காரணமாய்.. அனைத்து மக்களும் ஊரைவிட்டு ஓடிடும்போது.. உடல்நிலை குன்றிய நிலையில் உள்ள ஒரு விதவையை மட்டும் வெறுத்து ஒதுக்கி.. அவ்வீட்டிலேயே விட்டுச்செல்லும் காட்சியில் கள்வனாக அவ்வீட்டில் திருடவந்த கதாநாயகன் அவளைக் காப்பாற்றி புகலிடம் கொடுக்கிறான்.

     

    பின்னர் ஒரு கட்டத்தில் ஏழைக்குடிசைகள் தீக்கிரையாகையில் – ஒரு குழந்தையைக் காப்பாற்றிடும்போது தன் உடல் முழுவதும் தீயால் பாதிக்கப்பட்டு  உயிருக்குப் போராடும் உணர்வுமிகுந்த கட்டத்தில் .. அவனால் பயன்பெற்ற அனைத்து மக்களும் ஒருமித்த குரலில் அவனது உயிருக்காக கடவுளிடம் வேண்டுவதை காட்சியமைப்பு..  தனக்கு பாதுகாப்பு தந்து காத்த அந்த நாயகனை எமனின் பிடியிலிருந்து காப்பதற்காக அந்த நாயகி பாடுகின்ற பாடல்.  வாலி அவர்களின் இந்த வரிகள் தமிழகத்தின் ஒரு வரலாற்றுப் பதிவன்றி வேறென்ன?

     

    வார்த்தைகளை கவிஞர் வாலி அவர்கள் வரைந்தெடுத்தபோது ஒவ்வொரு வரியும்.. ஒவ்வொரு வார்த்தையும் என்னை எடுத்துக் கொள்.. என்னை எடுத்துக் கொள் என்று சொல்லியதோ..  உள்ளம் உருக.. மெல்லிசை மன்னர் அமைத்த இசையில்  இது வெறும் பாடல் அல்ல..  பி. சுசீலாவின் குரலில் இழையோடும் சோகம்.. நம் இதயங்களை நனைக்கிறதே!

     

    பிற்கால வரலாற்றின் முன்பதிவு என்பதை சூசகமாய் சொல்லி வைத்தாரோ?

     

    இறைவா உன் மாளிகையில்

    எத்தனையோ மணிவிளக்கு

    தலைவா உன் காலடியில்

    என் நம்பிக்கையின் ஒளிவிளக்கு

    நம்பிக்கையின் ஒளிவிளக்கு

    ஆண்டவனே உன் பாதங்களை நான்

    கண்ணீரில் நீராட்டினேன் இந்த

    ஓருயிரை நீ வாழவைக்க இன்று

    உன்னிடம் கையேந்தினேன் முருகையா

    ஆண்டவனே உன் பாதங்களை நான்

    கண்ணீரில் நீராட்டினேன் இந்த

    ஓருயிரை நீ வாழவைக்க இன்று

    உன்னிடம் கையேந்தினேன்

    பன்னிரண்டு கண்களிலே ஒன்றிரண்டு மலர்ந்தாலும்

    என்னிரண்டு கண்களிலும் இன்ப ஒளி உண்டாகும்

    உள்ளமதில் உள்ளவரை அள்ளித் தரும் நல்லவரை

    விண்ணுலகம் வாவென்றால் மண்ணுலகம் என்னாகும்?

    ஆண்டவனே உன் பாதங்களை நான்

    கண்ணீரில் நீராட்டினேன் இந்த

    ஓருயிரை நீ வாழவைக்க இன்று

    உன்னிடம் கையேந்தினேன் முருகையா

    மேகங்கள் கண் கலங்கும் மின்னல் வந்து துடிதுடிக்கும்

    வானகமே உருகாதோ வள்ளல் முகம் பாராமல்

    உன்னுடனே வருகின்றேன் என்னுயிரைத் தருகின்றேன்

    மன்னனுயிர் போகாமல் இறைவா நீ ஆணையிடு

    இறைவா நீ ஆணையிடு ஆணையிடு

     

    http://www.youtube.com/watch?v=iwh71IiRVLQ

     

    பாடல்: இறைவா உன் மாளிகையில்

    திரைப்படம்: ஒளிவிளக்கு

    பாடியவர்: பி. சுசீலா

    இயற்றியவர்: கவிஞர் வாலி

    இசை: எம்.எஸ். விஸ்வநாதன்

    ஆண்டு: 1968

     

    Share