Tag: சித்ரப்ரியங்கா ராஜா

சிட்டே நீதான் எங்களை
விட்டுப் பிரியவில்லையே
சின்னஞ்சிறு மழலைபோல்
சிங்காரமாய் நீயுமே
தத்தித் தத்தி நடந்து வந்து
தாளம் கற்றுத் தருகிறாய்

உருட்டும் விழி பார்வையால்
சுற்றுமுற்றும் நீயுமே
ஒய்யாரமாய் பார்த்துப் பின்
ஓட எத்தனிப்ப தென்ன?
வைத்த அரிசி தன்னை நீ
கொத்தித் தின்னும் அழகையே
பெற்ற அன்னை போல் மனம்
பார்த்து ரசித்து மகிழுமே
கீச்சு கீச்சு என்று நீ
கூச்சலிடும் அழகைத்தான்
மூச்சு முட்ட நாங்களும்
ரசித்து மகிழ்ச்சி கொள்வோமே
அலைபேசி கோபுரங்கள் தாம்
உன்னை அசைய வைத்தாலும்
அசராது இன்னும் நீயே
எங்களுக்காய் வாழ்கிறாய்
அழகிய சிட்டே நீயும்தான்
எங்களின் அன்புச் செல்லமடி
எங்கள் அனைவரின் இதயமுமே
என்றும் உனக்கான அன்னை மடி.

– சித்ரப்ரியங்கா ராஜா.
திருவண்ணாமலை

மூவர்ண நிலா
31.01.18

வெண்ணிலா

என்னவளின் பால்முகம்
மறைக்கப்பட்டதால்

செந்நிலாவாகி

கோபத்திலும் தாபத்தை
கொஞ்சலோடு உணர்த்தி

நீல நிலாவாக

நீந்தி மீண்டு வந்து
பூரணப் பொலிவுடன்
புதுநகை பூத்தாளே
மீண்டும் வெண்ணிலாவாய்.

– சித்ரப்ரியங்கா ராஜா,
திருவண்ணாமலை.

தந்தை
18.06.17

அன்னைக்கும் தனயன்
ஆண்மையில் பேரழகன்
இல்லத்தின் ஆணிவேர்
ஈசனாய்க் காப்பவன்
உன்னத சுமைதாங்கி
ஊர்மெச்சும் குணவான்
எளிமையைத் தனதாக்கி
ஏற்றத்திற்கு வழிவகுப்பவன்
ஐயமறுக்கும் ஆசான்
ஒப்பற்ற நண்பன்
ஓய்விலும் ஜீவநதி
ஔடதமாய் ஆறுதலில்
ஃதே தந்தையாம் தாயுமானவன்.

– கவிஞர் சித்ரப்ரியங்கா ராஜா,
திருவண்ணாமலை.

அன்னை என்றும் நீதானே
ஆதாரம் உலகில் அனைவர்க்கும்
இல்லை நீயும் என்றாலோ
ஈரேழ் உலகிலும் உயிர்களேது?
உள்ளத்தில் நீயே வெண்மை மொட்டு
ஊழி நீக்குதலில் மென்மைப் பட்டு
எத்தனை மொழிகள் உண்டு எனினும்
ஏகமனதாய் அம்மாவே முதல் மொழி
ஐ! நீயே அனைவரின் அன்புக்கு அரசி
ஒப்பிலா தெய்வமே தலைமகளே தாயே
ஓம்காரமாய் முதலே என்றும் நீயே
கண்ணை இமை தான் காப்பது போல்
கால நேரம் பார்க்காது காப்பாய் என்
கிள்ளை மொழி கேட்டு அகமகிழ்வாய்
கீரிடம் எனக்கு சூட்டி சும்மாடு நீ ஏற்பாய்
குறைவின்றி விளங்கும் குணவதி நீ
கூறும் ஒவ்வொரு வார்த்தையும் வேதம்
கெடுதல் கனவினிலும் நினைக்காதவளே
கேட்பாரற்று கிடக்கும் மழலையும் உன்
கை மட்டுமே பிடித்து கரைசேர ஆசைப்படும்
கொண்டவனுக்கும் அவன் கொடுத்தவைக்கும்
கோடானு கோடி நலனே என்றும் சேர்க்கும்
மாசற்ற திருவுருவே மாதவே உந்தன்
மலரடி தான் பணிவோம் மகிழ்வுடன் இந்நாளில்
அன்னையர் தின வாழ்த்துகளுடன்

– சித்ரப்ரியங்கா ராஜா,
திருவண்ணாமலை.

சித்திரை மகளை கரவொலி எழுப்பி
சப்தமாய் நாமும் வரவேற்போம்
நித்திரையில் கூட புத்துயிர் பெற்று
நிம்மதி காண வரவேற்போம்
காலையில் அன்று கனிமுகம் விழித்து
காண்போமே வருடம் முழுதும் சுபிட்சம்
கன்னிச் சித்திரை மகளாமே
ஹேவிளம்பி அவளை வரவேற்போம்
தமிழ் மாதங்களில் முதலும் இவளே
தாய்த் தமிழாலே போற்றுவோம் இவளை
சித்திரை நிலவுக்கும் சிறப்புண்டாம்
சித்ரா பௌர்ணமி நன்னாளிலே
கள்ளழகர் தான் ஆற்றில் இறங்கி
சித்திரை விழாவைச் சிறப்பித்தாரே
மாங்கல்ய பலன் தான் அடைந்தனளே
மீனாட்சி சுந்தரேஸ்வரர் தம்முடனே
மாங்கனி எறிதல் விழாவும் தானே
மாட்சிமை கண்டதே சித்திரையில்
இத்தனை பெருமை ஒருசேரப் பெற்ற
சித்திரை மகளே வாராயோ
இன்பமே எல்லார்க்கும் அள்ளி வழங்கிட
இன்முகத்துடனே வாராயோ!

– சித்ரப்ரியங்கா ராஜா,
திருவண்ணாமலை.

சித்ரப்ரியங்கா ராஜா

வாட்ஸப் செயலி அனைவர்க்கும்

வரமாய் அமைந்த ஒன்றாகும்

காணொலி கேட்பொலி படம் தன்னை

கண நேரத்தில் பகிர்ந்திடலாம்

தொலைவில் இருக்கும் நல்லவரை

அலைபேசி வழியே இணைத்திடுமே

தொல்லை கொடுக்கும் தீயோரை

தீயாய் தடையும் செய்திடுமே

நாடு கடந்து இருப்போரின்

நாடித் துடிப்பறிதல் இதனில் தான்

நலனும் அறிந்து அமைதி கொள்ள

நண்பனாய் உதவும் புலனம் தான்

அன்னப் பறவை போல் நாமும்

அல்லல் களைய வாழ்விலே

அளவாய் புலனத்தைக் கையாண்டால்

அரசன் நாமே அனைத்திலுமே.

சித்ரப்ரியங்கா ராஜா

அகிலம் காத்து அருளும் தெய்வமாய்

ஆருயிர் தந்து நம்முயிர் காக்கும் பெற்றோராய்

இறுகிய மனதை இளகச் செய்யும் கலைத்துறையினனாய்

ஈடற்ற சாகசங்களால் சாதனை படைக்கும் மாணவனாய்

உழைப்பே உயர்வென நம் சோற்றிற்கு வியர்வை சிந்தும்  உழவனாய்

ஊழிகள் பல  களைவதில் நல்ல மருத்துவனாய்

எத்தனை இடர்வரினும் நாட்டு எல்லையில் எதிர்கொள்ளும் இராணுவ வீரனாய்

ஏற்றங்கள் பல நல்கும் ஆற்றல்மிகு பொறியாளனாய்

ஐயங்கள்அகற்றி அறிவை விருத்திக்கும் ஆசிரியனாய்

ஒருவர் இருவரல்ல பலகோடி இவர் போன்றோர்!

ஓய்விற்குப் பின்னும் சோராது உழைக்கும்

சீரிய நல்மனிதர் இவர் அனைவரும்   உழைப்பாளிகளே!

அண்டம் முழுதும் உள்ளோர் இன்று

என் அன்புக் கவிதையின் உள்ளே அடக்கம் !

யாதேனும ஒருவரை யான்விட்டு இருப்பின்

சினமேனும் கொள்ளாது சிறியேன்

பிழைபொறுத்து அருள்க!

  சித்ரப்ரியங்கா ராஜா

அன்னை – அன்புக் கவிதை

ஆசான் – அறிவுக் கவிதை

இயற்கை – எழிற் கவிதை

ஈகை – கொடைக் கவிதை

உழைப்பு – முதலீட்டு கவிதை

ஊக்கம் – உயர்த்தும் கவிதை

எண்ணம் – சிந்தனை கவிதை

ஏற்றம் – வெற்றிக் கவிதை

ஐயம் – தேவையற்ற கவிதை

ஒழுக்கம் – உயிர்க் கவிதை

ஓய்வு-அத்யாவஸ்ய கவிதை

இப்படி

எங்கும் கவிதை

எதிலும் கவிதை!

மனிதரே கவிதை

மனிதருள்ளும் கவிதை!

கவிதை என்றும் இனியது

அதைக்

காதலித்துப் பார்த்த என் உணர்விது!

அன்னை ஊட்டிய பிள்ளைத்தமிழே
ஆசான் பயிற்றுவித்த முத்தமிழே
இல்லை உன் போன்ற செம்மொழியே
ஈடில்லாப் புகழ் கொண்ட தாய்மொழியே
உன்னில் தானே உயிர்மெய் அடக்கம்
ஊர் பல கடந்துமே நின் புகழ் சிறக்கும்
எளிய நடையிலும் உனைப் பயில்வோமே
ஏட்டுச் சுரைக்காயாய் நாங்கள் இரோமே
ஐ! எங்கள் தமிழே ஆரத்தியும் உனக்கு எடுத்து
ஒன்றா இரண்டா பலகோடி பாமாலை தொடுத்து
ஓதாமல் ஒருநாளும் இருக்க வேண்டா என்ற
ஔவை மூதாட்டி அவர்தம் நல்வழி நின்று
இஃதே எம் தாய்மொழியின் தனிச் சிறப்பென்று
இறுமாப்புடனே மார்தட்டி யாவரும் முன்னின்று
தப்பாது தானே நின் புகழ் பலவும் தன்னையே
தரணிக்கே உரக்கச் சொல்வோம் தமிழன்னையே
தாய்மொழித் திருநாள் நல்வாழ்த்துகள்!

– சித்ரப்ரியங்கா ராஜா,
திருவண்ணாமலை.

அஹிம்ஸையை நிலைநிறுத்தி
ஆங்கிலேயரை ஓட ஓட விரட்டி
இந்தியத் தலைமகனாய் நின்று
ஈன நிலையை அறவே கொன்று
உலக உத்தமனாய் நீ ஒளிர்ந்து
ஊழ்வினை தீர்த்த மகாத்மாவே
எங்கள் அன்னை பதறித் துடித்தாளே
ஏறு போன்ற மகன் மார்புச் சிதறக்
கண்டு
ஐயா நீ துயர் தந்து மறைந்தாய் இன்று
ஒற்றுமைக்கு வித்திட்ட குணவானே
ஓரிரு நிமிடமாவதுனை நினைப்போம்
மீண்டும் நீதான் மீண்டு வருவாயா
மலர்ந்து பாரதம் அமைதி கண்டிட!

– சித்ரப்ரியங்கா ராஜா,
திருவண்ணாமலை.