Tag: பெருவை பார்த்தசாரதி

சந்திரனையும் சூரியனையும் தந்தது யார்
=====சற்றேயொரு முறை யேனும் யோசியுங்கள்.!
எந்திர சக்தியை எங்கிருந்(அ)து பெற்றதாம்
=====எங்கேயோ அந்தரத்திலது தொங்கு தற்கு.!
மந்திரத்தால் இயங்க வில்லை தெரிந்துமது
=====மாயமாய் மறைந்து மீண்டும் திரும்புகிறது.!
தந்திரத்தால் அங்கே போகமுடியுமா?நிரந்-
=====தரமாய் நிலையா யங்கே தங்கமுடியுமா.?

தருகின்ற ஒளியும் தடங்களில்லாக் காற்றும்
=====தரணியைக் காக்கச் சன்மானம் ஏதுமில்லை.!
இருளும் ஒளியும் நீதராது இவ்வுலகுண்டா
=====இயற்கையே உன்னை என்றும் மதிப்பேன்.!
ஒருநாளில் ஒருமுறை யேனும் உன்னை
=====உறங்கு முன்னே நினைப்பேன் அதன்பின்.!
வருகின்ற மற்றை நாட்களில் எல்லாமும்
=====வாழ்வி லொருவகைப் பிடிப்பு வருமென்றே.!

ஒருமுறை தான்பிறவி வேண்டு மதுவும்
=====உலகுக்குதவி செயும் கிரகங்களைப் போல.!
கருவிலே இருக்கும் போதே நாங்களும்
=====கருணை யுள்ளமுடன் உயிராக வேண்டும்.!
இருளிலும் ஒளிதந்து பிரதிபலன் பாராத
=====உன்னொளியால் மலர்கள் கூட மலர்கிறது.!
உருவிலே சிறிதாய் இருந்தாலும் இப்பரந்த
=====உலகையே ஆளும் திறமை உனக்குண்டு.!

===================================================
நன்றி தினமணி கவிதைமணி:: 25-06-2018
நன்றி கூகிள் இமேஜ்.

கச்சத் தீவைக்கைவிட மாட்டோம் கத்தியே
=====கூச்சல் குழப்பம் விளைவித்தவர் எங்கே.?
மிச்சமின்றி ஆற்று மணல் அத்தனையும்
=====மழித்து வழித்ததை மறைத்தவர் எங்கே.?
இச்சகத்தில் வளமான இயற்கை வளமிருக்கு
=====இனியும் அழியாமல் இருக்கவே விழித்திரு.!
மிச்சத்தை இனியும் மீட்க வேண்டுமெனும்
=====மேலான மனதை இனிமேற் கொள்வாயே.!

அச்சம் நமைவிட்டு ஆங்கே பலமைல்தூரம்
=====அகன்று விட்டது என்றுதான் நினைத்தோம்.!
நச்சுக் கொடிபோன்ற நஞ்சாலை தழைத்ததால்
=====நன்னீரும் கெட்டது நதிநீரும் விஷமாகியது.!
இச்சைப் படிநடக்க எவருத்தரவு கொடுத்தார்
=====இடர் செய்தற்கும் இங்கேயொரு காவலாளி.!
மிச்சம் இருப்பதை மீட்கப்போய் மறுபடி
=====மீளாத துயரத்தில் மீண்டும் ஆக்கிடுவாரோ.?

அச்சமிலை அச்சமிலை என்றே முழங்கினான்
=====நன்றே மஹாகவி நல்பாரதி அவரைப்போல
உச்சக் கோஷம் எழுப்பினால் போதுமா
=====ஊர்மக்கள் குறைகேட்க ஓடிவந்தோர் யாராம்.?
பச்சாதாபம் வேண்டாம் பரிதாபம் கொளாதீர்
=====பகல்கொள்ளை பார்த்தால் விட்டு விடாதீர்.!
நிச்சயம் இழந்ததை நிலையாக மீட்டெடுக்க
=====நீண்ட போராட்டம் நிலைத்திடுமோ வாழ்விலே.!
===========================================
நன்றி:: தினமணி கவிதைமணி::18-06-18
நன்றி:: கூகிள் இமேஜ்

பெருவை பார்த்தசாரதி

வெல்லும் சொல்கொண்ட வார்த்தையை வைத்து
=====வியக்கின்ற வகையிலே கவிதை புனைபவருளர்.!
சொல்வீச்சால் பார்வையாளரைச் சொக்க வைத்துச்
=====சிந்தனையைச் சிறை வைக்கும் சொற்பெருக்கருளர்.!
இல்பொருளில் எதையோ பேசிநம்மை எழவிடாமல்
=====இருக்கை யிலமரச்செயும் வித்தை தெரிந்தவருமுளர்.!
எல்லாமும் அறிந்த எத்தனையோ அறிஞர்களை
=====ஈந்ததுதான் பெருமையெந்தன் தாய் நாட்டுக்கேயாம்.!

சொல்லாடல் தெரிந்ததால்தான் இன்றும் கம்பனும்
=====வள்ளுவனும் இளங்கோவும் வாழ்கிறான் என்றுமே.!
சொல்லுக்கு வித்தகனாம் மஹாகவி பாரதியும்தன்
=====சொல்வன்மையால் சுதந்திர தாகமெழச் செய்தான்.!
நெல்மணிகளைத் தாங்கி நெற்கதிர் தாழ்வதுபோல்
=====நல்லதைத் தாழ்பணிந்துச் சொன்னாள் ஒளவையும்,!
நல்லகாலம் பிறப்பதற்கு நாம்வழுவ வேண்டியதை
=====நாலடியிலடக்கியது நாலடியாரின் வெல்லும் சொல்.!

வெல்லும் வாள்வீச்சுக்கு இணையாம்..சொல்லுமே
=====வள்ளுவன் சொல்வன்மை உலகையே யாள்கிறது.!
வல்லமைச் சொற்றொடரால் எழுந்த காப்பியமே
=====வலிமை கொண்ட மாபாரதமும் இராமாயணமும்.!
வில்லாளனின் சரமழைபோல் வெல்லும் சொல்லால்
=====விழுந்து வாக்கியமாகியது வீழாதின்றும் வாழ்கிறது.!
சொல்லாட்சி மிக்க தமிழிலக்கியங்கள் தருமின்பம்
=====சுரங்கம்போல் தோண்டத் தோண்டக் கிடைக்கும்.!
=============================================
நன்றி தினமணி கவிதைமணி:: 11=06=2018
நன்றி:: கூகிள் இமேஜ்

அரசியலில் அடிக்கடி வரும் நெருக்கடிபோல்
=====அவ்வப்போது துன்பம் வரலாம் நம்வாழ்வில்.!
இரக்கமற்ற செயல்களைச் செயும் சழக்கரால்
=====இயல்பான வாழ்க்கையில் இடர் வந்துசேரும்.!
சிரமமின்றி சீராகநம் வாழ்க்கை செல்தற்கே
=====சித்தர்கள் சிந்தைபுக பலநல் வழிசொன்னார்.!
வரவேற்று வகையாயதை மனதில் ஏற்றினால்
=====வாழ்க்கை யெனும் போர்க்களம் இனிக்கும்.!

வாழ்வில் துன்பங்கள் நெருங்கும் போதிலே
=====வாழ்வு குறுக்கிய நல்லதங்காள்களும் உளர்.!
வாழ்வு முழுதும் துன்பமே நிறைந்த போது
=====வாழ்ந்து காட்டிய இராமர்களும் உள்ளனர்.!
வாழ்வே சூனியத்தால் சூழ்ந்த போதிலும்
=====வழிகாட்டினர் பாண்டவர்கள் நம் வாழ்வில்.!
வாழ்க்கை என்பதே ஒரு போர்க்களமதில்
=====வாழப் பழகுவதே இப்பிறவியின் நோக்கம்.!

அயலான் நம்மையாட் கொண்ட போதிலே
=====அன்று நாமடைந்த துயரத்திற்கு அளவேது.!
கயவர்கள் செயும் கலவரத்தால் சிலசமயம்
=====கால முழுதும் கலங்குகிறோம் கண்ணீரால்.!
இயல்பாக இயங்கிக் கொண்டிருக்கும் நமது
=====இல் வாழ்விலெங்கோ இடிக்கிறது இடையூறு.!
வியர்வை சிந்தியுழைக்கும் எண்ணம் வரின்
=====வெல்லலாம் வாழ்வெனும் போர்க் களத்தை.!

நன்றி தினமணி கவிதைமணி வெளியீடு::03-06-18
நன்றி படம்:: கூகிள் இமேஜ்

இருவருமே இயற்கையாய் உரை யாடுதற்கு
=====இலகுவாய்த் தண்ட வாளத்தில் நடந்தோம்.!
வருகின்ற பேராபத்தை உணர வழியில்லை
=====வந்தவேக மிகுரயிலைக் கவனிக்க வில்லை.!
ஒருவர் இறக்க ஒருவருயிருக்கு ஊசலாட
=====உடனொரு மாற்று இருதய சிகிச்சையால்.!
இருவருயிர் ஓருயிராக இதயம் ஒன்றாகி
=====என்றும் என்இதயத்தில் நீயே வாழ்கிறாய்.!

அன்றுபெற்ற இதய தானத்தால் இன்றும்
=====என்றும் காதலுக்கு மரணம் இல்லையாம்.!
மென்று விழுங்கினாலும் உண்ட உணவு
=====மெல்ல இரைப்பை செல்லநீயே காரணம்.!
நன்றுடன் வாழ்ந்திட நீயளித்த இதயம்
=====நன்றே இயங்கி ஒன்றானது ஊனுடம்பில்.!
நன்றி சொல்கிறேன் நல்லுளம் மிக்கவளே
=====நீ இறந்தாலுமுன் இதயம் இயங்குகிறது.!

நேற்றிருந்தோர் இன்றிலை எனும் விதியை
=====நியதியை வென்று விடுமோ மருத்துவம்.!
மாற்றங்கம் பொருத்து மொரு மகத்தான
=====மருத்துவத்தால் மறுபடியும் வாழ முடியும்.!
கூற்றுவனை வெல்லவும் முடியும் மென்கிற
=====கூற்றை..கொடையுள்ளம் எளிதாய்த் தரும்.!
ஆற்றவொணாப் பெருந் துயரைக் களைந்து
=====என்றுமென் இதயத்தில் குடி கொண்டாய்.!

===================================================
நன்றி:: தினமணி கவிதைமணி வெளியீடு:: 27-05-18
நன்றி:: கூகிள் இமேஜ்

போர்வீரர்களின் மனைவி தான் பாஞ்சாலி
=====பொதுச்சபையில் பட்ட துன்பம் தெரியாதா..?
கூர்மதி கொண்டவர் பாண்டவர்! அவர்கள்
=====கொண்ட துன்பத்திற் கேதேனும் அளவுண்டா.?
சூர்யகுல அரசன் அரிச்சந்திரன் தன்வாழ்வில்
=====சுடலையில் பிணமெரித்த நிலை எதனால்..?
யார் இட்டசாபம் இதற்கெல்லாம் காரணம்?
=====ஏனிந்தக் கஷ்டம் ? புரிவது மிகக்கடினமே..!

மார்க் கண்டேயனுக்கு பதினாறில் மரணம்
=====மரணமில்லாச் சிரஞ்சீவி யானது எதனால்..?
நேர்வாரிசு இல்லாமல் நானூறு வருடமும்
=====நகர்ந்ததே மைசூர்மஹா ராஜவம்சம் எப்படி..?
நீர்மீதில் வாழ்நாளைப் போக்கும் மீனவர்
=====நித்தம் சோதனையில் நீந்திக்கழிக்கிறார் ஏன்?
யார் இட்டசாபம் இதற்கெல்லாம் காரணம்?
=====எவரும் எளிதில் அறியமுடியாத ரகசியமோ..?

பார்மீதில் மாந்தராய்ப் பிறந்தாலே ஏதோ
=====பெரியதொரு துன்பத்தி லுழல்வது சகஜமே..!
ஆர்வலரென தனைச் சொல்லிக் கொள்வார்
=====ஆதாய மிலாதெதையும் செய்ய நினையார்..!
ஊர் மக்களால் தேர்ந்தெடுக்கப் பட்டவர்
=====ஊரையே கொள்ளை யடிக்க நினைப்பார்..!
நேர்மையாக வாழமுடியா நிலை தானின்று
======நீரறிவீரோ?ஈதெலாம் யாரிட்ட சாபமென்று..!
======================================================

நன்றி:: தினமணி கவிதைமணி வெளியீடு::21-05-18
நன்றி:: கூகிள் இமேஜ்

-பெருவை பார்த்தசாரதி

பெண்களென்றாலே பிதற்று கின்ற இவ்வுலகில்
-பெண்மீது எனக்குள்ளொரு கொள்கை யுண்டு..!
கண்களால் அவர்களை ஏறெடுத்தும் பார்க்காத
-கண்ணியம் கடமையோடு கட்டுப்பாடு முண்டு..!
வண்ணமலர் வாசனை யோடொருத்தி ஒருநாள்
-வளையவந்து வசமாய் மனத்துளே புகுந்தாள்..!
கெண்டை விழியாலவள் கண்சிமிட்டினாள்..நான்
-கொண்ட கொள்கையுமன்றே காற்றில் பறந்தது..!

விண்மீனுமவள் கண் முன் தோன்றினாலதன்
-விழிமூடி வெளிச்சம் தருவதையும் மறந்துவிடும்..!
கண்ணாடி முன்னவள் முகம்பார்க்கையில் தான்
-கண்டவழகை கண்ணாடியும் கவிதை யாக்கிடும்..!
கொண்டையிலே வீற்றிருக்கும் தாழம்பூ… தான்
-கொண்ட பெருமிதத்தால் மணம்வீச மறக்கும்..!
கண்சிமிட்டி கருவிழிப் புருவமுயர்த்து மழகால்
-கட்டான காளையருமவள் காலடியில் வீழ்வார்..!

சும்மாயவளைப் பார்த்தாலே சிந்தனை பிறக்கும்
-சொற்களெலாம் ஒன்றுகூடி கவிதைகள் ஆகும்..!
எம்மாடி? எவ்வளவு அழகென வியக்கும்போது
-எழுத்துக்கள் எல்லாம் காவியமாகக் கைகூடும்..!
செம்மாதுளை பிளந்த சிவப்புதடைக் காட்டிச்
-சிரித்து விட்டாலது சிறந்த காதலோவியமாகும்..!
அம்சமான அழகுக்கவள் அற்புதப் படைப்பாக
-அந்தப் பிரம்மனுமே பெருமூச்சு விடக்கூடும்..!

கண்மூடி அவள் தியானத்தில் இருந்தால்
-காதலர் களுக்குக் கனவினைக் கொடுப்பாள்..!
கண்விழித்து அவள் சற்றேயுற்று நோக்கின்
-காமன் விடும் பாணமும் எதிர்கொள்ளாது..!
கண்ணின் கருவிழியை உருட்டும் போது
-கனியும் கன்னக் குழியாலவள் அழகுகூடும்..!
கண்சிமிட்டிக் காதல் வலை வீசினாலோ
-கலையோவியம் கூட உயிர் பெற்றெழுமாம்..!

******

நன்றி தினமணி வெளியீடு:: 30 ஏப்ரல் 2018
நன்றி படம்:: கூகிள் இமேஜ்.

-பெருவை பார்த்தசாரதி

சுத்தமாக எழுபது ஆண்டுகள் ஆனபின்னும்
===சுதந்திர தேசப்பிதாவின் கனவு நனவாகவிலை..!
பத்திரிகைத் தாளின் பக்கங்களிலெலாம் பத்தி
===பத்தியாகப் பாலியல் வன்கொடுமைச் செய்தி..!
சத்தமின்றியே எங்கோவோர் மூலையில் இது
===எப்போதும் அரங்கேறுகிற சமூகக் குற்றமாம்..!
அத்துமீறி இக்குற்றம் புரிவோரை யடக்கவே
===அசுரபலம் கொண்ட புதியசட்டம் வேண்டும்..!

எங்கும் நடந்தேறுகிற பாலியல் கொலைகளின்
===எண்ணிக்கையில் பச்சிளம் பிஞ்சுகளே அதிகம்..!
எங்கேயொரு ஊடகத்தில் வெளிவந்த பின்னே
===எரியும் தீபோல பரவுகின்ற அவலநிலைதாம்..!
எங்கும் சுதந்திரமாயுலவும் சமூகக் குற்றங்கள்
===இனி நிகழாதிருக்க ஏனின்னும் முடியவில்லை..?
அங்கங்கே அரங்கேறும் அராஜகம் அக்கிரமம்
===அதை மன்றத்தில் கையாளும் திறமையெங்கே..?

மண்டிக் கிடக்கும் சமுதாயச் சீர்கேட்டால்
===மங்கியநம் கலாசாரம் மெதுவாக மறைகிறது..!
கண்ட பழக்கமும் கைவரப் பெற்றதாலின்று
===காதல் வலையில் சிக்குவாராம் சிறாரும்கூட..!
எண்ணிப் பார்த்து எச்செயல் நல்லதுதீயது
===என வறியத்தான் பள்ளிக்கு அனுப்புகிறோம்..!
பண்பறியா ஆசான்கள் இல்லாது போனதால்
===பாழாய்ப் போனவது பள்ளியுள்ளும் புகுந்தது..!

மாற்றம் கொண்டுவரவே மனவுறுதி கொண்ட
===மகத்தான உத்தமர்கள் வாழ்ந்தநம் திருநாட்டில்..!
ஆற்றலிருந்தும் அன்றே தவித் தார்களவர்
===அருமைச் சமுதாயம் அமைந்திட உழைத்தார்..!
நாற்ற மெடுக்கின்ற சமுதாயத்தைக் காண
===நல்லவேளை இன்ற வர்கள் உயிருடனில்லை..!
ஏற்றமின்றி இன்றுவரை தத்தளிக்கும் சமூகம்
===ஏற்றமுற எத்துணைநாள் காத்திருக்க வேணும்..!

*****

நன்றி தினமணி வெளியீடு:: 22-04-18
நன்றி :: கூகிள் இமேஜ்