Blog

படக்கவிதைப் போட்டி 58-இன் முடிவுகள்

-மேகலா இராமமூர்த்தி

மனங்கவரும் இந்தப் பனங்காய் வண்டியை ஓட்டிச்செல்லும் சிறார்களைக் காண்கையில் நம் உள்ளமும் குழந்தையாய் மாறிக் குதூகலிக்கின்றது.

காலச்சக்கரமும் இந்த வண்டிச்சக்கரங்களைப் போலவே சுழன்றுசெல்லும் இயல்புடையது என்பதை இத்தருணத்தில் நம் மனம் எண்ணிப்பார்க்கின்றது.

நுங்குவண்டி கண்ட நம் கவிஞர்கள் மனத்தில் நுங்கும் நுரையுமாகக் கற்பனைவெள்ளம் கரைபுரண்டோடத் தொடங்கியிருக்கும். அந்தக் கவிவெள்ளத்தில் நாமும் நனைந்துவரலாம்!

***

’நொங்குவண்டி பூட்டிக்கிட்டுச் சந்துபொந்தெல்லாம் சுற்றிவரும் சிறுவர்களின் மகிழ்வைத் தன்கவிதையில் கவினுறப் பதிவுசெய்திருக்கின்றார் திருமிகு. ஹிஷாலி.

நொங்கு வண்டி பூட்டிக்கிட்டு
சந்து பொந்து தாண்டி வந்தோம்
பத்து மரக் காற்றிலும்
பட்ட துன்பம் தான் மறந்தோம்
எட்டு திசை போனபின்பும்
விட்டு மனம் போகலையே
ஒட்டு மொத்த சிறுவர்களுக்கும்
உஷ்ணம் தனிக்கும் நொங்கு வண்டி

***

இற்றைய வாழ்வில், உடலுக்கும் உள்ளத்துக்கும் உறுதிபயக்கும் பழைய விளையாட்டுக்கள் எல்லாம் காணாமற்போய்க் கணினி விளையாட்டுக்களே கதியென்று சிறார்கள் மாறிவிட்டிருப்பது கண்கூடு. அதனை விளக்கும் கவிதை…

வெப்பம் நிறைந்த கோடையிலே
விளையா நுங்கு குடித்தபின்னே
அப்பா லெறிந்த கூந்தலிலே
அழகு வண்டி தனைச்செய்து
கொப்பை ஒடித்தே ஓட்டியநாள்,
கணினி உலகில் மெய்மறக்கும்
இப்போ துள்ள பிள்ளைகட்கே
இலாமல் போன பழங்கதையே…!

***

”வெம்மை தணிக்கும் நுங்கையுண்டு அதிலே வண்டிசெய்து ஓட்டிமகிழும் பாக்கியத்தை இழந்துவிட்ட தலைமுறை இது!” என்று இன்றைய குழந்தைகளின் நிலைக்காக இரங்கியுரைக்கும் இக்கவிதையை இயற்றியிருக்கும் திரு. செண்பக ஜெகதீசன் இவ்வாரத்தின் சிறந்த கவிஞராய்த் தேர்வுபெறுகின்றார்.

***

இயற்கையை மறந்தோம்…கூடவே இயற்கையோடு நம்மை இணைத்துவைக்கும் விளையாட்டுக்களையும்! ”நுங்கே அறியாத் தலைமுறைக்கு நுங்குவண்டி குறித்துமட்டும் என்ன தெரிந்துவிடப்போகிறது? இயற்கையன்னையே என்செயப் போகிறாய் எம் இளைய தலைமுறையை?” எனச் சீற்றத்தோடு வினா எழுப்பும் கவிதை…

வனங்கள் தொலைந்தது போல நம்
வாழ்வின் வசந்தங்கள் தொலைந்தனவோ……
மரங்கள் தொலைந்தது போல நம்
மனம்லயிக்கும் விளையாட்டுகள் தொலைந்தனவோ…..
கூடிவிளையாடும் கூத்துகள் தொலைந்து
கணிணி விளையாட்டில் தனிமைப்பட்டனவோ…..
காலக்கொடுமையால் இயற்கையைத் தொலைத்து
மூச்சுத்திணறும் செயற்கையில் வாழ்கிறோம்.
முன்னோர் காட்டிய பாதை தொலைந்து
முட்டுச்சந்தில் முட்டிமோதி வாழ்கிறோம்.
இளந்தலைமுறை மீதொரு இறுக்கத்தை
எதற்குச் சுமத்துகின்றீர் கல்வியின் பெயரால்…
பள்ளிக்கூடங்கள் சிறைச்சாலைகளா…
மனனஞ்செய வைக்கும் தொழிற்சாலைகளா….
நுங்கையே மறந்த சிறுவர்க்கு
நுங்குமட்டை வண்டியோட்டத் தெரியுமா….
சுற்ற மறந்த பம்பரங்களாய்…
துள்ள மறந்த கோலிக்குண்டுகளாய்….
தாவ மறந்த கிட்டிப் புள்ளாய்….
தாண்ட மறந்த குதிரைகளாய்…
பூப்பறிக்க வரமறந்த சிறுமிகளாய்…..
பாண்டியாட மறந்த நொண்டிகளாய்…….
சிறுமணல்வீடு கட்டமறந்த சிறுசுகளாய்…
காக்காக்கடி மறந்த வெள்ளந்திகளாய்….
பல்லாங்குழி விழ மறந்த பட்டுகளாய்….
தட்டாங்கல் மறந்த தளிர்களாய்……

இயற்கையை மறந்து இயற்கையை இழந்து
இயற்கையைத் தொலைத்து இயற்கையைக் கலைத்து
எங்கெங்கோ திரிகின்றோம்
இழந்தனவற்றை அறியாமலேயே….
என்செயப்போகின்றாய் இயற்கையன்னையே….
எம் இளந்தலைமுறையையே!

பழைய விளையாட்டுக்கள் அனைத்தும் பொய்யாய்ப் பழங்கதையாய் வழக்கொழிந்துவரும் வேதனையை உணர்வுபூர்வமாய்த் தன் ஆக்கத்தில் சுட்டியிருக்கும் திரு. இளவல் ஹரிஹரனுக்கு என் பாராட்டுக்கள் உரித்தாகுக!

April 11, 2016
சிருங்கேரி ஸ்ரீ சந்திரசேகர பாரதீ மகாஸ்வாமிகள்

-மீ.விசுவநாதன்

துங்கைக் கரையிலே தூயதோர் யோகியின்
திங்கள் குளிர்முகம் தேடினேன் – அங்குள்ள
சாரதை “சந்திர சேகர பாரதியை”ச்
சேரெனச் சொன்னாள் சிரித்து.

இன்பமோ துன்பமோ எல்லாமும் ஈடில்லாத்
தன்மையுள முக்தன் தவசியாம் இன்முகத்தோன்
சந்திர சேகர பாரதியின் பாதத்தில்
வந்தனையாய் வைத்து வணங்கு.

தூங்காத கண்ணுக்குள் தூயதோர் யோகியின்
நீங்கா நினைவே நிறைந்திருக்கும் – ஓங்காரச்
சொல்லான “சந்திர சேகரரே” என்றுமிப்
பொல்லா(ன்) அடையும் புகல்.

எதுபொய் எதுமெய் எதுவு மறியேன்!
மதுவுண்ட மானுடனாய் வாழும் விதியேன்!
கதிநீயே “சந்திர சேகர”ரே யென்று
பதித்தேன் தலையைப் பணிந்து.

என்னையே உன்னிலே என்றோ அளித்துவிட்டேன்!
தன்னையே நன்றாகத் தானறிந்தோன் உன்னையே
நம்புவேன் “சந்திர சேகர பாரதீ”
சம்புவாம் நீயே சரண்.

April 11, 2016
குறளின் கதிர்களாய்…(116)

–செண்பக ஜெகதீசன்

அன்பின் வழியது உயிர்நிலை அஃதிலார்க்கு
என்புதோல் போர்த்த உடம்பு. (திருக்குறள் -80:அன்புடைமை)

புதுக் கவிதையில்…

அன்பு காட்டி வாழ்வோர்
உடல்தான்
உயிரோடு இயங்குவது…
அன்பிலார் உடலது,
எலும்பில் தோல்போர்த்திய
வெற்றுடம்பே…!

குறும்பாவில்…

அன்புகொண்டோர் உடலதுதான்
உயிருள்ள உடல்,
வெறும் எலும்பும் தோலுமே, அல்லாதார்க்கு..!

மரபுக் கவிதையில்…

அடுத்தவர் மீதே அன்புகாட்டி
–அவரொடு சேர்ந்து வாழ்வோர்தான்,
எடுத்த உடம்பதில் உயிரோடு
–என்றும் வாழும் மனிதராவர்,
கொடுத்தே அன்புடன் ஒன்றாகக்
–கூடி வாழார் கொண்டவுடல்,
அடுக்கி வைத்த எலும்பின்மேல்
–ஆடைத் தோலது போர்த்தியதே…!

லிமரைக்கூ…

அன்புகாட்டில் அடுத்தவரைப் பார்த்து,
அவரதுதான் உயிருடம்பு, அல்லார்க்குளது
வெறுங்கூடு எலும்புதோல் சேர்த்து…!

கிராமிய பாணியில்…

அன்புகாட்டு அன்புகாட்டு
அடுத்தவர்கிட்ட அன்புகாட்டு,
அன்புகாட்டுற மனுசனுக்குத்தான்
ஆயுசுநெறஞ்ச உசிரொடம்பு,
அடுத்தவர்க்கொதவும் நல்லொடம்பு…

அன்புகாட்டத் தெரியாதவனெல்லாம்
கொண்டு அலைவது வெறும்ஒடம்பு,
எலும்பத் தோலால மூடிவச்ச
சீவனில்லா வெறும்ஒடம்பு…

அதால,
அன்புகாட்டு அன்புகாட்டு
அடுத்தவர்கிட்ட அன்புகாட்டு…!

April 11, 2016
கேசவ் வண்ணம் – கிரேசி எண்ணம்

”குந்தி மகனேகாண், வந்துவிட்டார் வானத்தில்,
மந்திமகன் மாவீரன் மாருதி, -சந்திப்பாய்,
வெற்றியை சத்தியம் வேர்த்தலை விட்டொழித்து
பற்றுவை பற்றின்றி போர்”….கிரேசி மோகன்….

”இல்லாமல் நாமிருவர் என்றும் இருந்ததில்லை
இல்லா திருப்பதே இங்குண்மை ! -வல்லானென்
வேத மிதையுணர்ந்தால் வேதனைகள் இல்லைகாண்
பாதமதைப் போரில் பதி”….

”தீண்டும் இயற்கையின் தூண்டுதலால் வந்துபோகும்
யாண்டும் குளிர்,வெப்பம் இன்ப,துன்பம் ! -பாண்டு
மகனே பொறுப்பாய், மனதால் பொருப்பாய்
புகழாம் போரில் புகு”….

”கொல்வோன் எனவும் கொலையுண் டோனெனவும்
சொல்வோர் இருவரும் மூடராம் -உள்ளான்மா
கொல்வதும் இல்லை கொலையுண் பவனுமில்லை
வெல்வதுன் வேள்விவிஜ யா”….

”வியப்பென பார்த்து, வியப்பென கூறி
வியப்பென கேட்டும் விளங்கா -வியப்பாம்
விவரிக்க ஒண்ணா விசித்திர ஆன்மா
எவருக்கும் எட்டா எழில்”….

”வாழையடி வாழையாய் வீரமுற்ற வாரிசுனை
கோழையென இவ்வுலகோர் கூறிடுவர் -தோழனே
சாதலினும் தீதன்றோ சூழும் அவமானம்
ஊதிடு சங்கை உரத்து”….கிரேசி மோகன்….

ஸ்ரீ பகவான் உவாச:
—————————————

“அஞ்சனை சேயிருக்க அஞ்சுவதேன் அர்ஜுனா
அஞ்சாளும் நூறை அழித்தபின்: -அஞ்சுதல்
அஞ்சாமை ஆணவம், ஆதலால் பாரதப்
பஞ்சா மிருதம் புசி’’….கிரேசி மோகன்….

April 10, 2016
நைல் நதி நாகரீகம், எகிப்தின் உன்னத ஓவியக் கலைத்துவக் காட்சிகள் – 5

–சி. ஜெயபாரதன்.

(Ancient Great Egyptian Paintings)

சி. ஜெயபாரதன் B.E.(Hons) P.Eng (Nuclear), கனடா

‘ஓவியன் எல்லா வித மாந்தரையும் விட உன்னதப் படைப்பு அதிபதி! … உயர்ந்த மலைத் தொடுப்பிலிருந்து, புல்வெளிச் சாய்தளம் கடற்கரை நோக்கிச் சரியும் காட்சியை வரைய விழைந்தால், அந்த வேட்கைக்கும் அவனே அதிபதி! பிரபஞ்சத்தில் எந்த ஓர் உருவமும் மகத்துவத்தில், தோற்றத்தில், கற்பனையில் உதயமாகி நிலைத்தாலும், முதலில் ஓவியன் தன் மனதில் படம் பிடித்த பிறகுதான் கையால் வரையத் துவங்குகிறான்! ‘

ஓவிய மேதை: லியனார்டோ டவின்ஸி

ஓவியக் கலை வடிப்பில் அற்புதர்

கற்பாறை செதுக்கிய வல்லுநர்

ஆலய வடிப்பில் உன்னத வித்தகர்

சிற்பம், சிலைகள், சித்திரச் சிற்பிகள்

நைல் நதி நாகரிகப் பிறவிகள்

+++++++++++++

பூர்வீக உலகில் மலர்ந்த கலைத்துவப் புரட்சிகள்!

5000 ஆண்டுகளுக்கு முன்பே எகிப்து, மெஸோபொடாமியா, இந்தியா, சைனா போன்ற நாடுகளின் பூர்வீக நாகரீகங்கள் செழிப்பான நைல் நதி, டைகிரிஸ் நதி, யுஃபிராடிஸ் நதி, சிந்து நதி, மஞ்சள் நதிக்கரைகளில் சீராகத் தலைதூக்கி விருத்தியாகி வந்துள்ளன. இங்குமங்கும் சிதறிய இனக்குழுக்கள் ஆடு, மாடு, கோழிகளை வளர்த்து, வேளாண்மை செய்து பயிரினங்களை விதைத்துத் தளிர்க்க வைத்துச் சிற்றூர் ஆட்சி முறை நிலைபெற்றுப் பல இடங்களில் சிற்றரசர்களும், சில தளங்களில் பேரரசர்களும் சிறப்பாக ஆண்டு வந்திருக்கிறார்கள். நூற்றுக் கணக்காக கிராமங்களும், நகரங்களும் பெருகி, மக்கள் அறிவு வளர்ச்சி அடைந்து சிற்பக்கலை, ஓவியக்கலை, கட்டடக்கலை, காவியம், நாடகம், நாட்டியக் கலைகளும் தழைத்து வந்துள்ளன.

புரட்சிகரமான அந்தப் புதிய நாகரீகம், கற்காலத்திற்குப் பிறகு குப்பென தோகை விரித்தது. வலுப் பெற்ற வல்லரசுகள், பலமற்ற மெல்லரசுகளை நசுக்கி அவரது நாடுகளை ஆக்கிரமிப்பு செய்து கொண்டன! போர்வாள் இட்ட விதிகளே சட்டங்களாய் நிலவி வந்தன. ஆரம்ப நாகரீக வரலாறுகளில் சமயவாதிகளும், ஜோதிட வானியல் ஞானிகளும், திறமைசாலிகளும், பேச்சாளர்களும், எழுத்தாளர்களும், கலைஞர்களும் தோன்றினர். எழுத்துத் திறம் சிறப்புற்று எகிப்து, கிரேக்க [மெஸோபொடமியா] எழுத்தாள ஞானிகள் தமது நாகரீக வரலாறுகளை எழுதிப் பதிவு செய்து வைத்துள்ளது பண்டைய இனங்களின் வரலாறுகளை அறிய உதவி நமக்கு செய்கின்றன.

நைல் நதி நாகரீக ஓவியப் படைப்புகளின் அம்சங்கள்

3000 ஆண்டுகளாக பண்டை காலத்திய எகிப்தியக் கலைஞர்கள் தமது தனித்துவ ஓவியச் சிற்பக் கட்டிடக் கலைகளில் முனைந்திருந்தனர். அவையே பின்னால் எகிப்திய நாகரீகச் சின்னங்களாக அவரது வரலாற்றையும் வாழ்க்கை முறைகளையும் நமக்கு காட்டிக் கொண்டிருக்கின்றன. அந்த 3000 ஆண்டுகளில் எகிப்தியர் கையாண்ட ஓவியப் பாணிகள் அனைத்திலும் வண்ணங்கள், வடிவ அமைப்புகள் யாவும் ஓர் உயர்ந்த ஒருமைப்பாடு கொண்டிருந்தன. எகிப்தியர் ஒரு தனித்துவக் கலவை நிறங்களைப் பயன்படுத்தினர். அவரது ஒவ்வொரு வண்ணமும், மாந்தரின் வெவ்வேறு பண்பைச் சுட்டிக் காட்டியது! ஓவியத்தில் பண்டை எகிப்தியர் சிவப்பு, பச்சை, நீலம், மஞ்சள், கருமை, வெண்மை ஆகிய ஆறு நிறங்களைப் பயன்படுத்தினர். அவற்றின் குறிப்பிடத் தக்க சிறப்பு என்னவென்றால் அவ்வண்ணத் திரவங்கள் யாவும் உலோகவியத் தாதுக் கலவைகளிலிருந்து [Mineral Compounds] எடுக்கப் பட்டவை! நீர் கலந்த நிறக் கலவைகள் அல்ல!

வண்ணங்கள் அனைத்தும் உலோகவியக் கலவையாக இருந்ததால்தான் ஓவியங்கள் இன்னும் பழுதடையாமல், அழிந்து போகாமல் 3000 ஆண்டுகளாக நம்முடன் உரையாடிக் கொண்டிருக்கின்றன! பச்சை நிறம் பசுமை, செழுமை, வளர்ச்சி, பயிரினம் ஆகியவற்றைக் காட்டின. மரணக் கடவுளான ஓஸிரிஸ் [Osiris, God of the Dead] பச்சை நிற மேனி கொண்டதாக வரையப் பட்டிருந்தது! சிவப்பு நிறம் ஆற்றலை வலியுறுத்தும். ஆதிக்கம், ஆணவம், ஆங்காரம், வெற்றி, தீக்கனல் ஆகியவற்றைக் காட்டவும் செந்நிறம் கையாளப் பட்டது! கடவுள் இஸிஸ் [God Isis] அதன் குருதி இரண்டும் சிவப்பு நிறத்தில் வரையப் பட்டன. சாத்தான் என அழைக்கப்படும் சேத் தெய்வமான [God Set] கெட்ட துர்காவுக்குச் செந்நிறம் அளிக்கப் பட்டது. சேத் எனப்படும் துர்கா கேடுகளை விளைவிப்பதுடன், எகிப்தில் பெரும் மணற் புயலை [Sand Storms] உண்டாக்கும் தெய்வமாகவும் அஞ்சப்பட்டது! நீல நிறம் நீர்வளத்தைக் காட்டியது. அத்துடன் உலகப் படைப்பு, சொர்க்கபுரி ஆகியவற்றைக் காட்ட நீல நிறம் பயன்பட்டது.

படைப்புக் கடவுளாகக் கருதப்படும் எகிப்திய பிரம்மா, அமுன் [God Amun, The Creator] நீல நிற முகத்துடன் உள்ளதாக வரையப் பட்டிருக்கிறார். மஞ்சள் வண்ணத்தில் காட்டப் பட்ட அத்தனையும் அழிவற்ற நிரந்தர நிலையுறும் சிறப்பு பெற்றவை! தங்கத்தின் நிறம் மஞ்சள். பரிதியின் நிறம் மஞ்சள். ஆனால் பரியின் கனல் சிவப்பு. கடவுளாகக் கருதப்படும் ஃபாரோ மன்னர்கள் மஞ்சள் நிறத்தில் வரையப் பட்டனர். மரணத்தின் நிறம் கருமை. இரவைக் குறிக்கவும், அடித்தளப் பூமியைக் காட்டவும் கருமை நிறம் பயன்படுத்தப் பட்டது. ஓஸிரிஸ் மரணக் கடவுள், இறப்பிற்குப் பிறகு அடையும் வாழ்க்கை ஆகியவைக் கருமை வடிவில் வர்ணிக்கப் பட்டன. வெண்மை நிறம் புனிதம், தூய்மை, புண்ணிய பணிகள், தெய்வாம்சம் ஆகியற்றைக் காட்டியது. ஆலயப் பூசாரிகள் பயன்படுத்தும் பண்டங்கள், கருவிகள் வெள்ளை நிறத்தில் வரையப் பட்டன.

எகிப்திய ஓவியங்களில் காணப்படும் உருவங்கள்

பன்னிற வண்ணங்கள் எகிப்தின் தனித்துவப் பண்புகளைக் குறிப்பிட்டதைப் போல, உருவங்களின் அமைப்புகள் தனித்துவ அம்சங்களைக் காட்டின. சுவர், தூண் ஓவிய வடிவங்கள் அசையாமல் நேராக நின்றன. அல்லது நடந்தன. மற்றும் சில பொது அமைப்புகளை எகிப்திய ஓவியங்களில் நாம் காண முடிகிறது. ஓவிய மாந்தரின் முகங்கள் ஒரு கண் தெரியும்படிக் பக்க வாட்டில் வரையப் பட்டுள்ளன. மாந்தரின் கை, கால்கள் முழுவதும் காட்டப் பட்டன. மனித வடிவத்தின் நடுவுடல் எப்போதும் முன்நோக்கியே இருந்தது. ஃபாரோ மன்னரின் உடம்பைக் காட்டும் போது, அவரது தெய்வீக அம்சத்தையும், உன்னத நிலையைப் போற்றவும் மற்ற நாட்டு மாந்தரைவிட ஓவியத்தில் பெரிதாகக் காட்டினார்கள்.

எகிப்தியர் தமது கலை ஓவியங்களில் வாழ்க்கையின் ஒவ்வொரு போக்கைக் காட்டினார்கள். தமது ஆலயச் சுவர்களிலும், மரணக் கல்லறைகளிலும் தாம் வாழ்ந்த அன்றாட நிகழ்ச்சிகளை வரைந்தார்கள். தமது நாட்டு மனித இனம், தம்மிடம் வளரும் விலங்கினங்கள் ஆகியவற்றை ஓவியங்களாகவும், சிற்ப வடிவங்களாகவும் வடித்தார்கள். தங்கம், வெள்ளி, தாமிரம், பித்தளை ஆகிய உலோகங்களில் மானிட, விலங்கின வடிவங்கள், நகைகள், பயன்படுத்திய கலன்கள், ஆயுதங்கள் போன்றவற்றைச் செய்தார்கள். எல்லாவற்றிலும், அவரது சுவர் ஓவியங்களும், தூண் ஓவியங்களும் எழிலானவை. பலரும் அறிந்து புகழப் பெற்றவை. அந்த அரிய ஓவியங்களில் எகிப்திய மாந்தர் அனுதினமும் செய்யும் உணவு தயாரிப்புகள், வாணிபங்கள், மீன் பிடிப்பு, படகோட்டல், கப்பல் மிதப்பு, குடும்பச் சந்திப்பு ஆகிய சிலவற்றைக் குறிப்பிடலாம்.

அந்த ஓவியங்களில் சில மரண மடைந்தோர் மேலுலகில் அழியாத நிரந்தர நிலை பெறுவதற்கு வேண்டிய உதவிகளும் செய்பவை. மரணப் பேழையில் வைக்கப்படும் உயிர் பிரிந்த உடலைச் சுற்றிலும், அவர் புரிந்த நற்பணிகள் எழுதப்பட்டுப் பதிவாதி புதைக்கப் படுகின்றன. மாண்ட பின்பு ஆன்மாவுக்கு வழிகாட்டி உதவ செய்யப் பல தகவல் மரணப் பெட்டிக்குள் வைக்கப் பட்டன! அத்துடன் செத்தவரின் மனைவி, பிள்ளைகள், பணியாட்கள் ஆகியோரின் ஓவியப் படங்களும், அவரது உணவு, உடை போன்றைகளும் உள்ளே புதைக்கப் பட்டன. அப்படி எகிப்தியர் செய்ததின் காரணம் என்ன ? மரண மடைந்த நபர் உயிரோடு உள்ள போது, அவருடன் வாழ்ந்தோரும், அவருக்குத் தேவைப் பட்டவையும், அவரது மரணத்திற்குப் பிறகும் வேண்டி யுள்ளன என்பது பண்டைக் கால எகிப்தியரின் நம்பிக்கை.

எகிப்தியர் தீட்டிய அரிய ஓவியங்கள்

பலவித நோக்கமைப்புகள் [Perspectives] இணைந்து எகிப்தியர் தமது ஓவியங்களைத் தீட்டி யுள்ளார்கள். பெரும்பான்மையாக பக்க வடிவுத் தோற்றங்களே [Side View] பல ஓவியங்களில் காண முடிகிறது! மரணம் எய்திய ஒரு மாந்தரின் வரலாற்றை, சிவப்பு, ஆரஞ்ச், நீலம், வெண்மை நிறங்களில் ஒளிரும் வண்ண ஓவியங்களாக வரைந்து, அவரது உடலுடன் வைத்தார்கள். முதலில் ஓவியக் கலைஞன் கரித் துண்டால் பானை ஒன்றின் மீது வரைந்து, பயிற்சி அடைந்த பிறகு அதைப் பெரிதாக்கிச் சுவரில் மறுபடியும் கரியில் வரைகிறான். முதலில் தெளிவற்று வரையவும், அழிக்கவும், மீண்டும் சிறப்பாக்கவும் கரித்துண்டு மிகவும் ஏதுவானது. பிறகு வண்ணக் கலவைகள் சுவர் ஓவியங்களில் படக் கோடுகளின் உள்ளே நிரப்பப் படுகின்றன. எகிப்தியர் பயன்படுத்திய தூரிகை எவ்விதம் செய்யப் பட்டது ? நார் நாரான மரக் குச்சிகளின் முனை தூரிகையாகக் கலைஞனுக்கு உபயோக மானது. சுவர்கள் முதலில் மண்ணில் கட்டப்பட்டுப் பிறகு சுண்ணத்தால் பூசப்பட்டவை. ஃபாரோ மன்னர் காலத்திய ஓவியர்கள் வண்ண அலைகளை வரைந்து, அடுக்கடுக்கான விளைவுகளைக் காட்டினர். மேலும் சுவர் ஓவியங்களைப் பாதுகாக்க எகிப்தியர் ஒருவித வர்ணக் காப்பு ஆயிலைப் [Varvish] உபயோகித்திருப்பதாகத் தெரிகிறது. ஆனால் அது எதிலிருந்து உண்டானது அல்லது எப்பண்டங்கள் சேர்ந்து கலக்கப் பட்டது என்பது அறிய முடியாமல் ஒரு புதிராகவே உள்ளது!

அடுத்து எகிப்தியரின் ஒப்பற்றக் கட்டிடக் கலைத்துவம் பற்றிக் காண்போம்.

(தொடரும்)

தகவல்:

1. Guide to Places of the World Egypt By: Reader ‘s Digest (1987)

2. Atlas of the World History By: Harper Collins (1998)

3. The Ancient World, Quest for the Past (1984)

4. How in The World By: Reader ‘s Digest (1990)

5. Age of the Pyramids, Egypt ‘s Old Kingdom By: National Geographic (January 1995)

6. Finding A Pharaoh ‘s Funeral Bark & Riddle of the Pyramid Boats By: National Geographic (April 1988)

7. The History of Art for Young People By: H.W. Janson.

8. Ancient Egypt, Who Built the Pyramids, How old Are the Pyramids, PBS & WGBH Web Site (1997)

9. The Sphinx of Egypt – The Great Sphinx [www.nmia.com/~sphinx/egyptian_sphinx.html] (May 23, 2002)

10 Ramesses II Temple & Nafertari Temple at Abu Simbel Egypt [Several Web Sites]

11 The New American Desk Encyclopedia, Abu Simbel (1989)

12 Britannica Concise Encyclopedia, Abu Simbel Temples (2003)

13 Egyptian Art & Paintings [Several Websites]

14 Egypt: Art & Architecture [Several Websites]

15 Egyptian Art [ http://www.artchive.com/artchive/E/egyptian.html%5D From ‘The Story of Art ‘ By: Ernest Hans Gombrich.

****

jayabarathans@gmail.com [S. Jayabarathan] (April 5, 2016)

April 10, 2016
தேவகோட்டை பள்ளிமாணவர்களுக்கு விருது வழங்கும் விழா

தேவகோட்டை- தேவகோட்டை சேர்மன் மாணிக்கவாசகம் அரசு உதவிபெறும் நடுநிலைப்பள்ளி மாணவர்கள் அனைவருக்கும் விருது வழங்கும் விழா நடைபெற்றது.

• விழாவிற்கு வந்தவர்களை ஆசிரியை முத்துலெட்சுமி வரவேற்றார்
• பள்ளி தலைமை ஆசிரியர் லெ. சொக்கலிங்கம் தலைமை தாங்கினார்
• கமுதி நம்மாழ்வார் வேளாண்மை கல்லூரி தாளாளர் அஹ்மத் யாசின் முன்னிலை வகித்தார்
• விசாலயன்கோட்டை சேது பாஸ்கரா வேளாண்மை கல்லூரி தாளாளர் சேது குமணன் சிறப்புரை வழங்கினார்

தாளாளர் சேது குமணன் அவர்கள் தமது சிறப்புரையில், 8ம் வகுப்பு மாணவி தனம் மற்றும் 7ம் வகுப்பு மாணவி தனலெட்சுமி ஆகியோரின் கல்வியின் சிறப்புகளைப் பாராட்டி, உயர் கல்வி வரையிலான படிப்பு செலவைத் தான் முழுவதுமாக ஏற்றுக் கொள்வதாக உறுதி அளித்தார்.

பள்ளியில் 1ம் வகுப்பு முதல் 8ம் வகுப்பு வரை உள்ள அனைத்து மாணவர்களுக்கும் அவரது கல்லூரியில் மரம் நட்டதைப் பாராட்டி விருது வழங்கினார்.

விழாவில் ஏராளமான பெற்றோர்கள் கலந்து கொண்டனர். விழாவில் விருதைப் பெற்றுக்கொண்டு பேசிய மாணவிகள் தனலெட்சுமி, தனம், ராஜேஸ்வரி, பரமேஸ்வரி, ஜெயஸ்ரீ; மற்றும் மாணவர்கள் யோகேஸ்வரன், கண்ணதாசன், முனீஸ்வரன், ஜெகதீஸ்வரன், ராஜேஷ் ஆகியோர் நடுநிலைப் பள்ளியில் படிக்கும்போதே விருது பெற்றது மகிழ்ச்சியாக இருக்கிறது என்றும், அனைவருக்கும் விருது கிடைத்துள்ளது மிகுந்த மகிழ்ச்சியைத் தருவதாகவும் தெரிவித்தனர்.

விழாவினை ஆசிரியை செல்வ மீனாள் தொகுத்து வழங்கினார். ஆசிரியை சாந்தி நன்றி கூறினார். அரசு உதவி பெறும் நடுநிலைப் பள்ளி அளவில் அனைத்து மாணவர்களுக்கும் விருது வழங்கப்பட்டது அளவு கடந்த மகிழ்ச்சியைத் தருவதாக பெற்றோர்கள் பேசினார்கள்.

பட விளக்கம் :
தேவகோட்டை சேர்மன் மாணிக்க வாசகம் அரசு உதவி பெறும் நடுநிலைப் பள்ளியில் மாணவர்கள் அனைவருக்கும் சேது பாஸ்கரா வேளாண்மை கல்லூரி தாளாளர் சேது குமணன் விருது வழங்கினார்.விருது பெற்ற பள்ளி மாணவர்களுடன் நம்மாழ்வார் வேளாண்மை கல்லூரி தாளாளர் அஹமத் யாசின் பள்ளி தலைமை ஆசிரியர் லெ .சொக்கலிங்கம் உள்ளனர்.

L.Chokkalingam,M.Sc,M.Phil,B.Ed,PGDHRM,BLISc,DGT
Head Master,
Chairman Manicka Vasagam Middle School,
Devakottai.630 302.
Sivagangai Dist.
TamilNadu.
09786113160.
E-Mail : jeyamchok@gmail.com
http://www.kalviyeselvam.blogspot.in/

April 10, 2016
கேசவ் வண்ணம் – கிரேசி எண்ணம்

”ஸ்ரீனிவாசப் பெருமாள்’’….
———————————————————-

கேசவ் வரைந்த சீனுவாசப் பெருமாளைப் பார்க்கையில்…. வருடாவருடம் விடிகாலை வெளிச்சமாய் எங்கள் எதிர் வீட்டுக்கு, தாயார் சமேதராய் மயிலை ஸ்ரீனிவாசப் பெருமாள் எழுந்தருளல் ஞாபகம் வந்தது….அப்போது எழுதியது….அப்போதைக்கிப்போதே….

’’சேதியொன்று கேளீரோ வீதியுலா செங்கமல
மாதுவுடன் சீனு மயிலையில் -காதினில்
கொட்டொலி கேட்கிறது விட்டொழி தூக்கத்தை
சட்டென வாராய்வா சல்’’….(1)

’’பேயோடு பொய்கையும் பூதமும் பாடிய
மாயோன் மணிவண்ணன் மாம்பழ -வாயோன்
வருகின்றான் வாசலுக்கு வந்தவனை வந்தி(வணங்கு),
தருகின்றான் நாளும் தவம்’’….(2)

’’வாநீவா சல்பக்கம் வீதியுலா வந்துள்ளார்
தூணிவாச சிங்கன் திருமார்பன் -சீனிவாசன்
பிம்மாலைப் போதில் பெருமாளை சேவிக்க:
நம்மாள் அருள்வான் நலம்’’….(3)

பிம்மாலை -(விடிகாலை வைணவ பரிபாஷையில்….)

“வானுலாவும் வாமனன், தூணுலா வும்சிங்கன்,
மீனுலாவும் பாற்கடலோன், மைலாப்பூர் -சீனுஉலா,
எங்களெதிர் இல்லத்திற்(கு) ஏளல், அலமேலு
செங்கமலத் தாயுடன் சேர்ந்து”….(4)

’’சுற்றிடும் ஆழியை(சுதர்ஸனம்), சூழ்கடல்வெண் ஆழியைப்(வெண்சங்கு)
பற்றி, எதிற்புரம் பத்தினிகள் -நிற்றிருக்க
புள்ளனெழாப் போதினிலே பல்லக்கில் ஊர்வலமாய்
கள்ளனென வந்தவரே காப்பு’’….(5)….

சீனுவாசப் பெருமாள் மீது எழுதிய சந்தக் கவிதை(அருணகிரி பாணியில்….)
—————————————————————————————————————————————–

பெருமாள் திருப் புகழ்….

தான தானன தனன தனத்த
தான தானன தனன தனத்த
தான தானன தனன தனத்த -தனதான

சீனிவாச பெருமாள்
————————————-

“மாலை நாடகம் மதியம் உறக்கம்
காலை ராவினில் கவிதை வழக்கம்
நாளும் வாழ்ந்திடும் நிறைவை எனக்கு -அருள்வாயே

கோல வாகன மயிலில் குறத்தி
தேவ யானையும் அருகில் இருக்க
வான வீதியில் விரையும் குகற்கு -முறைமாம

சேலை மோகமும் சினமும் செருக்கும்
ஆசை ஆர்வமும் அறிவு மயக்கம்
மோச மாகுமுன் முளையில் எடுக்க -வருவாயே

ஊறும் ஆணவம் உதியும் இடத்தில்
நானை யாரென நினைவு படுத்தி
பேசி டாதுயர் பிரம நினைப்பில் -ரமணேசர்

கோலம் கோவணம் கடமை இருப்பு
பாறை யாசனம் பதவி ப்ரபத்தி
சோணை ஈசனின் சரண முனைப்பு -எனவாழும்

வாழ்வு நானுற வழியை வகுத்து
கோழை யானவில் விஜயர் தமக்கு
கீதை யாலுரம் அளியும் அச்சுத -தருவாயே

காலில் பூமகள் களைய சொடுக்கை
பாலி னாழியில் படவி டமெத்தை
சாயும் யோகசு கமதை விடுத்து -எழுவாயே

ஏறு வாகனம் வினதை பிறப்பில்
சேரு மோகனென் அகம தில்நிற்க
சீனு வாசம ழைமுகில் நிறத்து -பெருமாளே”….(6)….கிரேசி மோகன்…

April 9, 2016
கேசவ் வண்ணம் – கிரேசி எண்ணம்

நீலம் அரவணைக்க நிர்மூலம் ஆகிடும்
காலம் இடம்பொருள் ஏவல்கள்: -கோல
விடமுறங்கி ஆலில் விளையாடும் பிள்ளை
தடந்தோளில் தாயின் துயில்’’….கிரேசி மோகன்….

April 9, 2016
பூரண மதுவிலக்கு!

பவள சங்கரி

தலையஙகம்

பீகாரில் 6.4.2016 முதல் பூரண மதுவிலக்கு நடைமுறைக்கு வந்துள்ளது. இதுநாள் வரை பெருந்துயருற்றிருந்த பெண்களும், பெண்கள் அமைப்புகளும் நேற்று மகிழ்ச்சியில் பாட்னா நகரெங்கும் ஆடியும் பாடியும் இச்சட்டத்திற்கு வரவேற்பு அளித்துள்ளனர். ஆனால் பெரும் குடிமக்கள் சிலரும் இதற்கு எதிர்ப்பும் தெரிவித்துள்ளனர். ஒரு பெரிய மனிதர் ஆண்டிற்கு 3000 கோடி வருமானத்தை நிதீசு இழந்துவிட்டார் என்று வசை பாடியுள்ளார். இன்னொரு தலைவர் நிதீசு இச்சட்டத்தைக் கொண்டுவந்தது சமூக நலத்திற்காக அல்ல, மாறாகத் தங்கள் அரசியல் ஆதாயத்திற்காகவே இந்த மதுவிலக்கைக் கொண்டுவந்துள்ளார். இதன் மூலம் 50, 60 விழுக்காடு வாக்குகளை தன்னகத்தே வைத்துக்கொள்ளுவார் என்று கூறியிருக்கிறார். எது எப்படியோ, காரணம் எதுவாக இருப்பினும், சமுதாயத்தை கரையான் புற்றாக அரித்துக்கொண்டிருந்த மதுவை ஒழித்த பெருமை நிதீசு குமார் அரசிற்கு உண்டு. இந்த 3000 கோடி உரூபாயை வசூல் செய்ய வேறு வழி இல்லாமல் இல்லை. மக்கள் அவதியுறாத வண்ணம் இந்தத் தொகையினை பீகார் மாநில அரசு எளிதாகப் பெற்றுவிட முடியும். இந்த மது விலக்கை எதிர்த்து உச்சநீதி மன்றம், உயர்நீதி மன்றங்களில் பல்வேறு வழக்குகள் தொடரப்பட்டுள்ளன. கேரளாவில், “பூரண மதுவிலக்கு எங்கள் கொள்கை அதைப் படிப்படியாக நிறைவேற்றுவோம்” என்று சில கட்டுப்பாடுகளை அம்மாநில அரசு முன்னெடுத்துள்ளது. இதையெதிர்த்தும் வழக்குகள் தொடரப்பட்டுள்ளன. மக்கள் நலனில் அக்கறை உள்ள நீதிமன்றங்களால் அவை தள்ளுபடி செய்யப்பட்டன. அதுபோலவே பாட்னா உயர்நீதி மன்றத்தில் தொடரப்பட்டுள்ள வழக்குகளும் தள்ளுபடியாக வேண்டும் என்று எதிர்பார்க்கலாம். இதேபோல நம் தமிழ்நாட்டிலும் மதுவிலக்கு வேண்டி மகாநாடு நடத்தத் திட்டமிட்டனர். ஆனால் அம்மகாநாடு தேசத்துரோக சட்டத்தின்கீழ் தடை செய்யப்பட்டது. தேசத் துரோகம் என்று சொல்வதற்கான காரணம் என்ன என்று தெரியவில்லை. மதுவிலக்கைக் கோரி உயிர் துறந்த காந்தியவாதி பிறந்த மண்ணில் மக்கள் நல்வாழ்வு வேண்டி நடத்தப்படும் இதுபோன்ற மகாநாடுகள் தேசத்துரோகமா?

சப்பானிய நாட்டில் பிறப்பு விகிதம் குறைந்துகொண்டே வருவதால் 60 வயதிற்கு மேற்பட்ட முதியோர்கள் எண்ணிக்கை 50 சதவிகிதத்தைத் தாண்டியுள்ளது. எல்லா நாடுகளிலும் வேலை இல்லாத நிலை இருக்கும்போது இங்கு மட்டும் வேலை செய்யக்கூடிய இளைய சமுதாயம் குறைந்துள்ளது என்று அந்நாட்டின் அரசு வருத்தப்பட்டு இளைய சமுதாயத்தின் வளர்ச்சி விகிதத்தை அதிகப்படுத்துவதற்கான முயற்சியில் ஈடுபட்டுள்ளது. சீனாவிலும், இதேபோல இளைய சமுதாயத்தினரின் எண்ணிக்கை குறைந்து வருவதால் ஒரு குழந்தைதான் பெற்றுக்கொள்ள வேண்டும் என்ற தங்களுடைய கொள்கையை மாற்றி ஒரு தம்பதியினர் இரண்டு குழந்தைகள் பெற்றுக்கொள்ளலாம் என்று அறிவித்துள்ளனர். உலக அளவில் 40 சதவிகிதத்திற்கும் அதிகமாக இளைய சமுதாயத்தினர் உள்ள ஒரே நாடு இந்தியாதான். ஒவ்வொரு நாடும் தங்கள் நாட்டின் இளைய சமுதாயத்தினரை தங்கள் நாட்டின் செல்வமாகக் கருதிப் பார்க்கின்ற இக்காலகட்டத்தில் நம் நாட்டில், குறிப்பாக தமிழகத்தில் இளைய சமுதாயத்தை பாதாளத்தில் தள்ளக்கூடிய மது விற்பனையை அரசே ஏற்று நடத்தி அதன் மூலமாக ஆண்டிற்கு 20,000 கோடி, 30,000 கோடி என்று வருமானத்தைப் பெருக்கத் துணிவது வேதனைக்குரிய செயலாகிறது. நமது நாட்டின் இளைஞர் சமுதாயத்தை அழிக்கத் துணிகிறோம் என்பதே நிதர்சனம் .

April 8, 2016
இங்கிலாந்திலிருந்து ஒரு மடல்….. (191)

— சக்தி சக்திதாசன்.

அன்பினிய நெஞ்சங்களே!

அன்பான வணக்கங்களுடன் உங்களை இம்மடல் மூலம் சந்திப்பதில் பெருமகிழ்வடைகிறேன். ஏப்பிரல் மாதத்தின் முதல்பகுதியில் வசந்தத்தின் முன்னே வரும் ‘ஸ்பிரிங்'(Spring) எனும் காலப்பகுதியில் நடைபயின்று கொண்டிருக்கிறோம்.

சமுதாயம் என்பது பலவிதமான பண்புகளையும், நடைமுறை வழக்கங்களையும் உள்ளடக்கிய மனிதர்களின் கூட்டுச்சேர்க்கையாகும். ஒரு நாட்டின் வளர்ச்சியும், முன்னேற்றமும் அந்நாட்டின் சமுதாயங்களின் முன்னேற்றத்தில் தான் தங்கியுள்ளது. சமுதாய முன்னேற்றத்திற்கு அச்சமுதாயத்தின் அங்கங்களாகிய மக்களின் முன்னேற்றமே அடிப்படைக் காரணியாகிறது. சமுதாயத்தின் முக்கிய தூண்களாக அவற்றைத் தாங்கிப் பிடித்திருக்கும் முதுகெலும்பாக இளையதலைமுறையினரே அமைகின்றனர். அச்சமுதாயத்தினை தகுந்த முறையில் முன்னேற்ற வேண்டுமானால் இளைய தலைமுறையினர் தகுந்தமுறையில் செதுக்கப்பட வேண்டும். அவர்களது வாழ்க்கைப் பண்புகளும் சரியான முறையில் பயிற்றப்பட வேண்டும்.

அவ்விளைய தலைமுறையினரைச் செதுக்கும் பணியில் முக்கிய பங்காற்றுவோர் யார் என்பது ஒரு முக்கியமான கேள்வி. இன்றைய அவசர சமூகத்திலே வசதிகளின் தேடல்களை மனதில் வகுத்துக் கொண்டு வாழ்க்கையை இயந்திர கதியில் வாழ்ந்து கொண்டிருக்கும் ஒரு சமூகச் சூழலில் நாம் உழன்று கொண்டிருக்கிறோம். இதிலே எமது அடுத்த தலைமுறையின் செழிப்பான வாழ்விற்கான செதுக்கல்களை மேற்கொள்வதற்கான ஆக்கமும் ஊக்கமும் எமக்கு உள்ளதா? என்பதே கேள்வியாகிறது. பெற்றோராக எமது கடமையை, சமுதாயக் காவலர்களாக எமது கடமையை, பொறுப்புள்ள அயலவர்களாக எமது கடமைகளை எத்தனைபேர் சமுதாய நோக்கோடு முன்னெடுக்கிறோம் என்பது கேள்விக்குரியதே ! பாடசாலைகளில் கற்பிக்கும் ஆசிரியர்கள் தமது தலையாய கடமையாக தாம் கற்பிக்கும் பாடத்தை மட்டுமே கொள்கிறார்களா ? இல்லை தாம் போதிக்கும் பாடங்களோடு சமூகத்தின் முன்னேற்றத்தை முன்னெடுக்கும் பண்புகளையும் போதிக்கிறார்களா? என்பதே முக்கியமாகிறது.

இன்று இங்கிலாந்தில் ஒரு நீதிபதி இரண்டு இளம் பெண்களுக்கு விதித்த தண்டனையே எனது இந்த மடல் மூலம் எனது கருத்துக்களை உங்களுடன் பகிர்ந்து கொள்ளத் தூண்டியது.

‘அஞ்சலா ரைட்சன்'(Angela Wrightson) எனும் 39 வயதான பெண்மணி கோரமாகக் கொலை செய்யப்பட்டார். இவர் குடிபோதைக்கு அடிமையான ஒருவராவார். ஒருநாளைக்கு சுமார் 8 லிட்டர் ‘சைடர்’ (Cider) என்றழைக்கப்படும் மதுவை உட்கொள்வார் என்று கூறப்படுகிறது. எட்டு சகோதரர்களுடன் பிறந்த இவர் மிகவும் கடுமையான வாழ்வுக்குள்ளாக்கப்பட்டார். பெற்றோரால் புறக்கணிக்கப்பட்டதால் இங்கிலாந்து அரசினால் சமூக நல்வாழ்வுப் பிரிவினால் பராமரிக்கப்படும் ‘பெற்றவர்களால் புறக்கணிக்கப்படும் குழந்தைகள் நலவிடுதி’யிலே தனது இளம்பிராயத்தைக் கழித்தார்.

வளர்ந்து குடிபோதைக்கு அடிமைப்பட்ட இவர் பலமுறை சட்டத்தினால் தண்டிக்கப்பட்டார் என்றும் கூறப்படுகிறது. போதையினால் புரியும் பல குற்றச்செயல்களினால் 47 தடவைகள் கிரிமினல் குற்றச்சாட்டுகளுக்கு உள்ளாகியிருக்கிறார் என்றும் கூறப்படுகிறது. இவரது வீட்டில் எப்போதும் ஒரு போதைக்கும்பல் கூடியிருக்கும் என்றும் கூறப்படுகிறது. 18 வயதுக்குட்பட்ட சிறுவர்களினால் இங்கிலாந்தில் மது உட்கொள்வது சட்டத்திற்குப் புறம்பானது. ஆகையால் இவர் வசிக்கும் பகுதியைச் சார்ந்த 18 வயதுக்குட்பட்ட சிறுவர்கள் இவரது வீட்டில் கூடி இவரது உதவியுடன் மதுவைப் பெற்றுக் கொள்வார்கள் என்றும் கூறப்படுகிறது.

அப்படியாக இவருடன் இணைந்த 13, 14 வயதுச் சிறுமிகள் இருவர் இவரது உயிருக்கு எமனாக வந்ததுவே இன்றைய வழக்குமன்றத் தீர்ப்புக்குக் காரணம். தமது அந்தச் சிறுபிராயத்திலே மிகவும் தீய பழக்கங்களுக்கு அடிமையாகி விட்டவர்களே இந்தச் சிறுவர்களாவார்கள். இவர்களும் சமுதாய முன்றிலிலே வழிநடத்த வேண்டிய பெற்றோர்களினால் கைவிடப்பட்டவர்களாவார்கள். ஒரு குழந்தையின் இளமைக்கல்வி சிலையில் எழுத்து என்பார்கள் முன்னோர்கள். அதாவது அந்த வயதில் அவர்கள் கற்றுக் கொள்ளும் பண்புகளே வாழ்வு முழுவதும் அவர்களுடன் கூடவரும் என்பதுவே அதன் விளக்கமாகும். ஆனால், அந்தப் பருவத்தில் திக்குத் தெரியாத காட்டில் விடப்பட்ட சிறகுகளற்ற பறவைகளைப் போன்றே இச்சிறுமிகள் கைவிடப்பட்டார்கள்.

சட்டத்தின் மதிப்பை உணரத் தவறிய இவர்கள் அதே சட்டத்திற்குப் புறம்பான செயல்களைப் புரியும் அந்த 39 வயதான அஞ்சலா ரட்சன் என்பவருடன் கூட்டிணைந்தது ஆச்சரியமில்லாத ஒன்றேயாகும். 2014ம் ஆண்டு டிசம்பர் மாதம் 8ம் திகதி தனது வீட்டில் வாடகைக்குக் குடியமர்ந்திருக்கும் அஞ்சலா ரைட்சன் இல்லத்திற்கு, அதற்கு முதல்நாள் அவர் தன்னை நோக்கிக் குடிபோதையில் தூக்கி எறிந்த வீட்டுச்சாவியைத் திரும்பக் கொடுக்க வந்த அவ்வீட்டின் சொந்தக்காரர் கண்ட காட்சி அவரைத் தூக்கி வாரிப்போட்டது.

அரைகுறை நிர்வாண கோலத்தில், படு கோரமாகத் தாக்கப்பட்டு கொலைசெய்யப்பட்டிருந்தார் அஞ்சலா ரைட்சன். அதைத் தொடர்ந்து விசாரணைகளை மேற்கொண்ட போலிசார் இக்கொலையை அவ்விரண்டு சிறுமிகளுமே நடத்தியதாகக் கண்டுபிடித்தனர். அப்போது அவர்களின் வயது வெறும் 13, 14 மட்டுமே. ஆடைகளை மினுக்கும் இயந்திரம், டி.வி, மற்றும் கதிரை என்பவற்றால் அந்தப் பெண்மணி முகம் மற்றும் பல பாகங்களிலும் கோரமாகத் தாக்கப்பட்டுள்ளார். அவரது உடம்பில் 100 காயங்களுக்கும் அதிகமாகக் காணப்பட்டுள்ளது.

இன்று 15 வயது நிரம்பிய அச்சிறுமிகள் இருவருக்கும் ஆயுள் தண்டனை விதித்த நீதிபதி, குறைந்தது அவர்கள் தலா 15 வருடங்களாவது சிறைவாசம் அனுபவிக்க வேண்டும் என்று உத்தரவிட்டுள்ளார். குடிபோதைக்கு அடிமையாகிய 39 வயதுப் பெண்ணொருவர், குடிபோதைக்கு அடிமையாகிய வெறும் 14 வயதே நிரம்பிய சிறுமிகளால் கொலைசெய்யப்பட்டிருப்பது செய்தி என்று பார்க்கையில் ஒரு சாதாரண நிகழ்வாக இருக்கலாம். ஆனால், நாகரீகமடைந்த ஒரு சமூகத்தில் வயது எனும் ஏணியின் நடுவிலும், அடியிலும் இருக்கும் இரு பகுதியினரும் இத்தகைய வகையில் கொடுமையான குடிபோதைக்கு அடிமையாகியதில் சமுதாயத்தின் பங்கு எத்தகையது என்பது நியாயமான கேள்வியே !

நாளைய உலகம் அமைதியையும், சமாதானத்தையும் நோக்கி நடக்க வேண்டுமெனில் இன்றைய உலகத்தின் பல்வேறு சமூகங்களில் வாழும் மக்களும் தமது அவசர வாழ்க்கையைக் கொஞ்சம் நிறுத்தி தம்மைத் தாமே சுயவிமர்சனம் செய்து கொள்ள வேண்டியது அவசரமாகிறது. வாழ்க்கை எனும் தராசின் ஒரு தட்டில் தேவைகளையும் அதன் மறுதட்டில் வசதிகளையும் போட்டு நிறுக்கத் தலைப்படும்வரை வாழ்வின் அர்த்தங்களும் திசைமாறிப்போவது தவிர்க்க முடியாததே.

மீண்டும் அடுத்த மடலில்
அன்புடன்
சக்தி சக்திதாசன்

(நன்றி- பி.பி.ஸி இணையதளம்- தகவல்களுக்காக)

http://www.thamilpoonga.com
http://www.facebook.com/sakthi.sakthithasan

April 8, 2016
மின்னூல்

–க.பிரகாஷ்.

மின்னணு புத்தகங்கள் அல்லது மின்னூல்கள் இன்றைய தொழில் நுட்ப உலகில் மிகவும் புகழ்பெற்று மறுவெளியீடு செய்யப்பட்டு வருகின்றன. மேலும் புதிதாக பதிப்பிக்கப்படும் புத்தகங்கள், கட்டுரைகள், அனைத்தும் மின்னூல்களாகக் காணப்படுகின்றன. மின்னூல் என்பது நூல் ஒன்றினுடைய மின்னணுவியல் அல்லது எண்முறை பதிப்பாகும். இன்று அதிக அளவில் பயன்படுத்தும் புத்தகங்கள் தாளில் அச்சிட்டு, கட்டுமானம் செய்து தயாரிக்கப்படுகின்றன. அப்புத்தகங்களில் இடம் பெற்றுள்ள செய்திகளைப் போலவே கணினி உதவியுடன் தட்டச்சு செய்து இணையத்தில் இடம் பெறச்செய்து அதை இணைய வழியில் படிக்கும் படியாக மின்புத்தகங்கள் உருவாக்கப்படுகின்றன. இணையத்திலிருந்து தரவிறக்கம் செய்து கணினியில் சேமித்துவைத்துத் தேவைப்படும் போது படிக்கும் நிலையிலும் மின்னூல் உருவாக்கப்படுகின்றன. இவ்வாறாக வளர்ந்த மின்னூல் இன்று உலகமொழிகள் அனைத்திலும் சிறப்பான முறையில் உருவாக்கப்பட்டுச் செயல்படுகின்றன. குறிப்பாகத் தமிழ்மொழியில் இன்று பரவலாக மின்னூல்கள் பயன்பாட்டுக்கு வந்துள்ளன. தனி ஆட்களும், சில தனியார் புத்தக நிறுவனங்களும், பலர்குழுவாக சேர்ந்து மின்னூல்களை வடிவமைத்து வெளியிட்டு வருகின்றார்கள்.

மின்புத்தகங்கள்:
நாம் இன்று அதிக அளவில் பயன்படுத்தும் புத்தகங்கள் தாளில் அச்சிட்டு கட்டுமானம் செய்து தயாரிக்கப்பட்டு வருகின்றன. அப்புத்தகத்தில் இடம் பெற்றுள்ள செய்திகளைக் கணினி உதவியுடன் தட்டச்சு செய்து இணையத்தில் அல்லது திறன்பேசியில் வெளியிடுவதே மின் புத்தகம் என்று அழைக்கப்படுகின்றன. இதனைப் பதிவிறக்கம் செய்து குறுந்தட்டு வடிவில் சேமித்து வைப்பதையும் மின்புத்தகங்களாக கருதப்படுகின்றன. மின்னூல்கள் பல்வேறு அமைப்பில் வெளியிடப்படுகின்றன. அவை பி.டி.எஃப், இணையத்தில் வெளியீடு, புதிய அனைத்துலகத் தரமான இ-பப் மற்றும் மொபி அமைப்புகளில் காணப்படுகின்றன.

மின்னூல் அமைப்பு:
• பி.டி.எஃப்
• இணைய அமைப்பு
• இ.பப்
• மொபி
ஆகிய நான்கு அமைப்புகளும் கணினி, இணையம் மற்றும் கையடக்க கருவிகளிலும் இயக்கப்படக் கூடிய அமைப்புகள் ஆகும். பி.டி.எஃப், அமைப்பில் உள்ள மின்னூலை வாசிப்பதற்கு பி.டி.எஃப் ரீடர் எனும் வகையிலான வாசிப்பு செயலிகள் தேவையாகிறது. இணைய அமைப்பில் மின்னூலை வாசிப்பதற்கு உலாவி, மற்றும், இ-பப் அமைப்பில் மின்னூலை வாசிப்பதற்கு இ-பப் ரீடர் என்னும் வாசிப்புச் செயலிகள் தேவையாகின்றன.

பி.டி.எஃப் அமைப்பு:
தாளில் அச்சிட்டு வெளியிடுவதற்காக வடிவமைக்கப்பட்ட ஒரு நூலை அச்சுக்கருவியில் அச்சிடுவதற்குப் பதிலாக மின்வடிவில் சேமிப்பதே பி.டி.எஃப் அமைப்பாகும். ஊடகத்தில் மாற்றம் உண்டே தவிர நூல் வடிவமைப்பில் மாற்றம் ஏதும் இல்லை. அட்டைப்படம், உள்ளடக்கம், பக்க எண்கள், பின்னூட்டம் முதலிய நூற் கூறுகள் அனைத்தும் அச்சு வடிவ நூலில் எவ்வாறு பதிக்கப்படுகின்றனவோ அவ்வாறு பி.டி.எஃப் நூலிலும் பதிக்கப்படுகின்றன. விரலைக் கொண்டு தாளில் அச்சிடப்பட்டப் பக்கங்களைப் புரட்டுவதற்குப் பதிலாக சுட்டியைக்கொண்டு திரையில் பக்கங்களைப் புரட்டுகின்றனர். பி.டி.எஃப் வாசிப்புக் கருவியில் தோன்றும் பக்கத்தைப் பெரிதாகவோ சிறிதாகவோ காணலாம். ஆனால் பக்கத்தின் அமைப்பு அவ்வாறே இருக்கும். எழுத்துக்களைப் பெரிதாக்கலாம் அல்லது சிறிதாக்கலாம். அதற்கேற்றாற்போல் படங்களின் அளவும் பக்கத்தின் அளவும் மாற்றப்படும். ஆனால் பக்கத்தின் தோற்றம் மாறாது. ஒரு பக்கத்தில் பத்து வரிகளும், இரு படங்களும், இருந்தால் எத்தனை அளவு மாற்றம் செய்தாலும் அதே பக்கத்தில் தோன்றும் அடுத்தப்பக்கத்தில் உள்ள வரிகள் இந்தப் பக்கத்தில் வராது. அதுபோல அந்தப்பக்கத்தில் உள்ள வரிகள் அடுத்தப்பக்கத்திற்குப் போகாது.

பி.டி.எஃப் மின்னூல்களை உருவாக்குவது மிகவும் எளிதாகும். அச்சிடுவதற்கான நூலை வடிவமைக்கும் அதே செயலில் இருந்து பி.டி.எஃப் மின்னூல்களைச் சேமிக்கலாம். மைக்ரோசாப்ட், அடோபிஇன்டிசைன், முதலிய செயலிகள் பொருத்தமானவை. கோப்புகளை பி.டி.எஃப், ஆகச் சேமிப்பதற்கு பி.டி.எஃப் ரைட்டர் என்னும் செயலி தேவை. இவ்வகை செயலிகள் இலவசமாகக் கிடைக்கின்றன. பி.டி.எஃப் அமைப்பில் சேமிக்கப்பட்ட மின்னூலில் ஒரு சில வசதிகளை மட்டுமே சேர்க்கலாம். அடோபி அக்ரோபட் போன்ற செயலிகளைக் கொண்டு உள்ளடக்கப் பக்கத்தில் உள்ள தலைப்புகளை நூலில் உள்ள பக்கங்களோடு இணைக்கலாம். இதுபோன்று சிறுசிறு முன்னேற்றங்களைத் தவிர பி.டி.எஃப் மின்னூல்களில் வேறு எந்தப் புதுமையையும் செய்ய முடியாது.

இணைய அமைப்பு:
இணைய அமைப்பில் உருவாக்கப்படும் மின்னூல் மீயுரை குறியீட்டு மொழியில் வடிவமைக்கப்பட்ட நூலாகும். ஓர் இணையதள உருவாக்கத்திற்குப் பயன்படும் அதே தொழில் நூட்பங்களைக் கொண்டே இந்த வகை மின்னூல்களும் உருவாக்கப்படுகின்றன. இணையத்தில் தமிழ் மின்னூல்களைப் பதிவேற்றும் திட்டங்கள் பல ஆண்டுகளுக்கு முன்பே தொடங்கப்பட்டன. மதுரைத்திட்டம், நூலகம் திட்டம், சென்னை நூலகம் திட்டம், முதலியவை நூற்றுக்கணக்கான தமிழ் நூல்களை இணையத்தில் பதிப்பித்து வருகின்றன. கட்டற்றக் கலைக் களஞ்சியமான விக்கிப்பீடியா ஒரு பெரிய மின்னூல் களஞ்சியமாகக் கருதலாம்.

இணையத் தொழில்நுட்பம் என்பதால் எந்தவிதக் கணினிகளிலும் இந்த மின்னூல்களை வாசிக்கலாம். ஒருங்குறி எழுத்துரு தரத்திலான தமிழ் எழுத்துரு மற்றும் உலாவி இருந்தாலே போதும், விண்டோஸ், லினக்ஸ், கணினிகளில் இந்த இரண்டும் உள்ளன. தமிழ் மின்னூல்களைப் படிக்கும் வாய்ப்பு இந்தக் கணினிகளில் இயல்பாகவே உள்ளது. சி.எஸ்.எஸ். மற்றும் ஜாவாஸ்க்ரிப்ட், ஆகிய கணினி மொழிகளின் துணைகொண்டு நூலோடு வாசகர்கள் ஊடாடுவதற்கான வசதிகளைச் சேர்க்கலாம். தாளில் அச்சிடப்பட்ட புத்தகத்தை புரட்டுவதைப் போன்ற உணர்வு, படங்களையும், எழுத்து வரிகளையும், ஓரிடத்தில் இருந்து மற்றோர் இடத்திற்கு நகர்த்துதல், அருஞ்சொற்களைத் தோர்வுசெய்து அவற்றிற்கான பொருளை இன்னொரு கட்டத்தில் காணுதல், குறிப்பிட்ட சொற்கள் வரும் பக்கங்களைத் தேடுதல் முதலிய பல வசதிகளை இணைய அமைப்பிலான மின்னூல்களில் சேர்க்கலாம்.

இணைய அமைப்பிலான மின்னூல்களில் பல புதுமைகளைச் செய்வதற்கான வாய்பு இருந்தாலும் சில குறைகள் உள்ளன. பி.டி.எஃப் நூலில் எல்லாப் பக்கங்களும் ஒரே கோப்பில் அடங்குவதுபோல் இணைய அமைப்பிலான நூலில் உள்ள பக்கங்கள் அடங்குவதில்லை. இந்த நூலில் பயன்படுத்தப்படும் படங்கள் தனித்தனியே வெவ்வேறு கோப்புகளில் சேமிக்கப்படுகின்றன. நகர்படங்கள் ஒலிப்பதிவுகள் அனைத்தும் தனித்தனி கோப்புகளில் சேமிக்கப்பட வேண்டும். இணையத் தொடர்பு இல்லாத போது இந்த நூலை வாசிப்பதாக இருந்தால் இந்த நூலுக்குத் தேவைப்படும் அனைத்துக் கோப்புகளும் கணினியில் பதிவிறக்கம் செய்யப்பட வேண்டும். இணைய அமைப்பில் இது போன்று குறைகளைத் தீர்ப்பதற்காகவும் மின்னூலுக்கென்றே சில சிறப்பு அம்சங்களைச் சேர்ப்பதற்காகவும் உருவாக்கப்பட்டதுதான் இ-பப் எனும் புதிய மின்னூல் தரம் ஆகும்.

இ-பப் அமைப்பு:
இ-பப் என்பது நவீன மின்னூல்களை வெளியீடுவதற்காக idpe எனப்படும் அனைத்துலக மின்பதிப்புக் குழுமத்தால் உருவாக்கப்பட்ட ஓர் இலவச கட்டற்ற திறந்தவெளி மின்தரம் என்று குறிப்பிடுகின்றனர். இணைய அமைப்பில் இருக்கும் அனைத்து வசதிகளையும் பயன்படுத்தி மின்னூலுக்கென்றே சில புதிய வசதிகளைச் சேர்த்து ஒரே கோப்பில் பதிக்கும் வாய்ப்பை இந்த இ-பப் அமைப்பு அமைந்துள்ளது. மின்னூல்களைக் கணினிகளில் மட்டும் இன்றி கையடக்க கருவிகளிலும் வாசிக்கும் வாய்ப்பை இ-பப் ஏற்படுத்தியுள்ளது. மின்னூல்களை வாசிப்பதற்காகவே சில கருவிகள் சிறப்காகத் தயாரிக்கப்பட்டுள்ளன.

மொபி அமைப்பு:
மொபி அமைப்பானது இ-பப் போன்றதே ஆகும். ஆனால் திறந்த நிலைக் கோப்பு அல்லாமல் அமேசான் நிறுவனத்தின் கிண்டில் கருவியில் மட்டும் படிக்கமுடியும் இதனை நாம் மொபி அமைப்பு என்கிறோம். மேற்குறிப்பிட்ட எல்லா அமைப்புகளிலும் தமிழ் மின்னூல்களைத் தயாரிக்கலாம். வின்டோஸ், மெக்கிண்டாஷ், லினக்ஸ், போன்ற கணினிகளில் தமிழ் ஒருங்குறி எழுத்துருக்கள் இயல்பாக இருப்பதால் அனைத்துக் கணினிகளிலும் இந்த நூல்களைப் படிக்கும் வாய்ப்பு உள்ளது. ஆனால் எல்லாக் கணினிகளிலும் அதே எழுத்துரு அமைந்திருக்கும் என்பதற்கு உத்தரவாதம் கிடையாது. எல்லாக் கணினிகளிலும் நூலைப் படிக்கும் வாய்ப்பு மட்டும் இருக்கின்றன. ஒவ்வொரு அமைப்பில் உள்ள எழுத்துருவைக் கொண்டு கோப்புகள் தோன்றும்.

மின்னூலை உருவாக்கும் முறை:
நாம் வெளியிட விரும்பும் ஆழ்ந்த உட்பொதிந்த கருத்துக்கள் அடங்கிய பொருட்கூறுகளை அல்லது பகுதிகளைக் கணினி தமிழ் எழுத்துக்களைப் பயன்படுத்தி தட்டச்சு செய்து கொள்ள வேண்டும். தட்டச்சு செய்து கொண்ட பகுதிகளை ஒரு கோப்பாகச் சேமித்து வைக்க வேண்டும். நாம் தட்டச்சு செய்து கொண்ட கோப்பு எந்த மென்பொருளின் மூலம் இணையத்தில் பயன்படுத்தித் தயார் செய்தோமோ அந்த மென்பொருளின் மூலம் இணையத்தில் பயன்படுத்தும் வகையில் Html – Asp கோப்புகளாகப் பதிவேற்றம் செய்ய வேண்டும். இணையத்தில் உள்ள அனைத்துத் தகவல்களும் இரண்டு வகை கோப்புகளாகவே வடிவமைக்கப்பட்டு வருகின்றன. அவை Html – Asp முதலில் குறிப்பிட்ட வகை கோப்பு நாம் அவ்வாறு தயார் செய்து ஏற்றுமதி செய்யமுடியும். நாம் தயார் செய்து ஏற்றுமதி செய்த கோப்புகள் இணையத்தின் சேமிப்புக்கிடங்கில் சென்று தேங்கி கிடைக்கும். பிறகு நாம் அந்தக் கோப்பை பயன்படுத்த முயற்சிக்கும்போது சேமிப்புக் கிடங்கில் உள்ள அந்தக் குறிப்பிட்ட கோப்பு செயல்படும் பக்கங்களாக மாறி கண்முன்னே தோன்றும். ஒவ்வொரு நாளும் ஏற்றுமதி செய்யப்படும் கோப்புகள் இணைய சேமிப்புக் கிடங்கில் ஆவணமாகப் பாதுகாக்கப்படும். இவ்வாறு வெளியிடப்படும் மின் புத்தகங்களை இணையத்தின் உதவியோடு மென்தட்டுகள் மூலம் பதிவிறக்கம் செய்து பயன்படுத்த முடியும். இவ்வாறு இணைய சேமிப்புக் கிடங்கை முறையாகப் பராமரிக்க வேண்டும். குறிப்பிட்ட இணையப் பக்கத்திற்கு ஒதுக்கிய இடத்தை ஒவ்வொரு ஆண்டும் ஒரு குறிப்பிட்ட தொகை செலுத்தி புதுப்பித்துக் கொள்ள வேண்டும். இல்லையேல் நாம் வெளியிட்ட மின் புத்தகங்கள் காலாவதியாகிவிடும்.

கிரியேடிவ் காமன்ஸ் உரிமம் மூலம் உள்ளடக்கத்தைக் காணுதல்:
கிரியேட்டிவ் காமன்ஸ் உரிமம் மூலம் தமிழில் பல வலைப்பதிவுகளும், தளங்களும் உள்ளன. நாம் அங்கிருந்து உள்ளடக்கத்தைப் பெற மற்றும் மின் புத்தகங்களும் அவர்கள் புத்தகங்களில் அதே உரிமம் மூலம் குறிப்பிட்டு உருவாக்கமுடியும். பல எழுத்தாளர்களும், பல வலைப்பின்னர்களும் கிரியேட்டிவ் காமன்ஸ் மூலமாக தங்களுடைய வலைப்பதிவில் வெளியிடுவார்கள்.

Press book.com என்ற வலைத்தளத்தில் ஒரு கணக்கை உருவாக்க:
Press book.com என்ற மென்பொருளைப் பயன்படுத்தி மின்னூலை உருவாக்க முடியும். epub, html, pdf போன்ற முறையில் மின்னூல்களை அமைகின்றன. Press book.com என்ற வலைத்தளத்தில் ஒரு கணக்கை உருவாக்கி, இக்கணக்கில் நமக்குத் தேவையான மின்னூல்களையும், புகைப்படங்களையும், மற்றும் ஒலி, ஒளி, ஊடகங்களையும் தேவைக்கேற்ப நிறுவிக்கொள்ளலாம். புதிதாக ஒரு மின்புத்தகத்தை உருவாக்கும் பொழுது எண் அட்டவணையைப் பயன்படுத்தி அவ்வாறு உருவாக்கிய புத்தகத்தின் வலை முகவரி மற்றும் புத்தகத்தின் தலைப்பு குறிப்பிட்டு பிறகு அதனை நாம் வெளியிடும் முறை தனியுரிமையாகவும் பொதுவாகவும் வெளியிடலாம்.

புத்தகத்தின் வடிவமைப்பு:
• அட்டைப் படம்
• முக்கிய பகுதி
• அட்டைப் பின் பகுதி

அட்டைப்படம் Front Matter:
அட்டைப்படம் என்பது ஒரு புத்தகத்தின் முதல் பகுதியாகவும் மற்றும் நூல் விவரம், தலைப்பு, அணிந்துரை, முகவுரை, பதிப்புரை ஆகியவை குறிப்பிடுவது அட்டைப்படமாகும்.

முக்கியப் பகுதி Main body:
ஒரு புத்தகத்தின் பொருளடக்கத்தையே முக்கியப்பகுதியாக குறிப்பிடுகின்றோம். ஒரு புத்தகத்தை உருவாக்கிய பிறகு ஏற்றுமதி சேர்க்கை மற்றும் ஏற்றுமதி தலைப்புக் காட்டும் சேர்க்கை என ஒவ்வொரு இயலுக்கும் அல்லது கட்டுரைகளுக்கும் இம்முறை பயன்படுத்திய பிறகு வெளியிடலாம்.

புத்தக தகவல் Book information:
ஒரு புத்தகத்தின் முழு விவரத்தையும் குறிப்பிடுவது புத்தக தகவல் ஆகும். தலைப்பு, குறுகிய தலைப்பு, துணைத் தலைப்பு, குறிப்பிட்டபிறகு அப்புத்தகத்தின் ஆசிரியர் பெயர், ஆசிரியரின் முழு முகவரியும், வெளியிடப்படும் இடம், மொழி, வருடம், ஆகியவை அனைத்தும் பதிவு செய்யவேண்டும்.

கருப்பொருள் Themes:
கருப்பொருள் என்பது வரியின் மற்றும் ஒரு பத்தியின் இடைவெளி விட்டு அமைப்பது கருப்பொருள் ஆகும்.

ஏற்றுமதி Export:
ஏற்றுமதி என்பது நாம் உருவாக்கிய ஒரு மின் புத்தகத்தை வடிவமைக்கும் அல்லது அமைப்புகள் ஆகும். pdf, epub, mobi, hpub, html, word, press, xml போன்ற வடிவங்களில் மின் புத்தகத்தை ஏற்றுமதி செய்யலாம். Press book.com என்ற வலைத்தளத்தில் உருவாக்கிய உங்கள் கணக்கில் உள்ள கருவிகளை பயன்படுத்தி மின் புத்தகத்தை உருவாக்கமுடியும். அக்கருவிகள், கட்டுப்பாட்டு அறை, மேம்படுத்தல், உரை, புத்தகத்தகவல், தோற்றம், ஏற்றுமதி, விற்பனை, ஊடகம், பயனர்கள் மற்றும் சுருக்கப்பட்டியல் ஆகியவை ஆகும்.

அட்டையின்பின் பகுதி Back Matter:
அட்டையின் பின்பகுதி என்பது அப்புத்தகத்தின் பதிப்புரிமை பற்றிய தகவல்களும், ஆசிரியர் பற்றிய தகவல்களும், கவிதைகளும், படங்களும், நூல்களும், விருதுகளும், அட்டவணைகளும், மற்றும் இது போன்ற பல கருத்துகளை வெளியிடுவது அட்டையின் பின் பகுதி ஆகும்.

மின்னூலை உருவாக்கும் போது ஏற்படும் சிக்கல்கள்:
இணையப் பயன்பாட்டில் இரண்டாவது இடத்தைப் பிடித்துள்ள தமிழ்மொழியில் பல்வேறு வகையான எழுத்துருக்கள் உள்ளன. ஒவ்வொரு இணைய தளமும் ஒவ்வொரு தமிழ் எழுத்துருக்கள் கொண்டு அமைந்துள்ளது. எனவே நாம் வெளியிடும் இணையதளத்தில் உள்ள எழுத்துருக்களைக் கொண்டே நமது நூல் உள்ளடக்கங்களைக் கணினியில் தட்டச்சு செய்ய வேண்டும். இல்லையேல் நமது நூற்பகுதிகள் இணையப் பக்கத்தில் இருந்து தாறுமாறாக மாறிவிடும். ஆங்கில மொழியில் இந்தச் சிக்கல் இல்லை. எந்த வகை ஆங்கில எழுத்துருக்களைக் கொண்டு மின்னூல் தயாரித்தாலும் அவை இணையப்பக்கங்களாக ஏற்றுமதி செய்யும் போது தெளிவாகத் தெரிகிறது.

சிக்கல் ஏற்படுவதற்கான காரணம்:
ஆங்கில மொழியில் அமைந்த விசைப்பலகைகள் ஒரே மாதிரியான அமைப்பைக் கொண்டவை ஆகும். ஒவ்வொரு வகை ஆங்கில எழுத்துருக்களும் மற்ற வகை எழுத்துருக்களும் இணைந்து கொள்ளும் வகையில் ஒன்றை ஒன்று சார்ந்தும் ஒன்றையொன்று துணை செய்வதுமாக வடிவமைக்கப்பட்டுள்ளது. ஆனால் தமிழ் மொழியின் எழுத்துருக்கள் பல விதமான விசைப்பலகைகள் கொண்டு வடிவமைத்துள்ளதால் தமிழில் மின்னூல்கள் தயாரிப்பதில் சிக்கல் ஏற்படுகின்றன.

தீர்வு:
தமிழ் மொழியின் எழுத்துருக்களின் சிக்கலைத் தவிர்ப்பதற்கு ஒருங்குறி (Unicode, NHM Writer) என்ற எழுத்துருக்கள் பெருமளவில் பயன்படுத்தப் படுவதால் அச்சிக்கலில் இருந்து விடுபட்டனர்.

மின்னூல் வரலாறு:
• மின்னூல் முதன்முதலாக ஆக்ஸ்ஃபோர்டு ஆங்கில விளக்க உரையுடன் இலக்கணப்படி அச்சு வடிவிலான நூலாக வெளிவந்திருக்கிறது
• “முதல் மின் புத்தகம் குறியீட்டு 1940 ஆம் ஆண்டுக்குப் பிறகு தொடங்கி ராபர்டோஸ்வீடிஷ் தயாரித்த தாமஸ்அக்வினாஸ் படைப்புகளைப் பெரிதும் உரைவிளக்கம் மின்னணு குறியீடாக இருக்கின்றன”
• ஆங்கிலத்தில் முதன் முதலாக மின் நூலை வெளியிட்டவர் தாமஸ்அக்யூனஸ், ராபட்பூசா, பாப்ரோன் என்பவர்கள் மிக முக்கியமானவர்கள் ஆவார். 1930 ல் மின்னூல்களை அடுத்தவர்கள் படிக்கின்ற வகையில் படத்துடன் கூடிய ஒளி நகர்வுடன் வெளியிட்டுள்ளனர்
• இதற்கு மாற்றாக டவ்ஏங்கல்பர்ட் என்ற வரலாற்று ஆசிரியர் 1960 ல் ncs ஆய்வுத்திட்டத்தில் நூல்களை வெளியிட்டுள்ளார். இதனைத் தொடர்ந்து 1992 ல் சோனி நிறுவனம் டேட்டா டிஸ்க்மென் என்பதை அறிமுகப்படுத்தியது. இது வன்பொருளில் சேமிக்கும் வசதியைப் பெற்றது.

மின்புத்தகங்களை வாசிக்க உதவும் கருவிகள்:
தமிழில் மின்புத்தகங்களை வாசிப்பதற்கான கணினி தொழில் நுட்ப வல்லுநர்கள் மற்றும் பல அம்சங்கள் கொண்ட பெரிய நிறுவனங்களாலும் பல கருவிகள் கொண்டு வரப்பட்டுள்ளன. அக்கருவிகளைப் பயன்படுத்தி மின்னூலை வாசிக்கலாம். மின்னூலை வாசிப்பதற்கென்று வன்பொருளும், மென்பொருளும், உருவாக்கப்பட்டுள்ளன. அவ்வன்பொருள்களிலும், மென் பொருள்களிலும் மின்னூலை வாசிக்கும் போது பக்கத்தைப் பெரிதாகவும் சிறியதாகவும் மாற்றமுடியும். நாம் விட்ட இடத்தில் இருந்து தொடங்கவும் முடியும் இது போன்று பல முறைகளைக் கொண்டு உள்ள கருவிகளாகவும், மென்பொருளாகவும், உள்ளன.

“மின்னூல் என்பது நூல்களின் மென்வடிவம் மட்டுமில்லை, அதனை எளிதில் படிப்பதற்கும், எடுத்துச் செல்வதற்கும், காகிதமில்லா மின்வழியாகும்” கணினியிலும் அனைத்து இயக்குதளக் கருவிகளிலும் நூல்களை விட்ட இடத்தில் இருந்து தொடர்ந்து படிக்கும் முறையுள்ளது. மின்னூலைப் படிப்பதற்கென்று கையில் வைத்துக் கொள்ளக்கூடிய அளவிற்குப் பல கருவிகள் வளர்ந்துள்ளது. அவை, வன்பொருளாகவும், மென்பொருளாகவும், உள்ளன.

வன்பொருள்கள்:
• Kindle
• Nook
• Sony
• kobo
• Android
• I phone
• Computer

மென்பொருள்கள்:
• Google play books
• News Reader
• Reader pdf Reader
• Speed Reader
• Books Reader
• Readuim – Chorme
• e – Reader
• FB – Reader

Iso கருவிகள் – I Books for ipad (e-pub), kindle for ipad (mobi), Google play books.
Android கருவிகள் – epub for Android, Fb Reader for Android, Google play books,
Google Chrome குரோம் உலாவி – Readium.org போன்ற பல கோப்புகளைப் படிக்கலாம்.
Mozilla Firefox பயர்ஃபாக்சு உலாவி – epubread.com தரும் நீட்சியில் epubகோப்புகளைப் படிக்கலாம்.
FBreader, Calibre மூலம் Windows, Linux முதலிய பல்வேறு இயங்கு தளங்களிலும் மின்னூல்களைப் படிக்க முடியும்.
இக்கருவிகளில் மின்னூலை நிறுவி விலையில்லாக் கருவிகள் மூலம் வின்டோஸ், ஐபேட், ஐபோன், ஆன்டிராய்டு, பிளாக்பெரி, எனப் பல கருவிகளில் நிறுவிப் படிக்கலாம்.

மின்னூல்களின் பயன்பாடுகள்:
அதிகப் பக்கங்கள் கொண்ட நூல் பகுதிகளைக் கையடக்க வடிவில் சுருக்கிவிடமுடியும். எளிதில் எங்கும் எடுத்துச் சென்று பயன்படுத்த முடியும். கட்டுமான நூல்களில் வண்ணப் புகைப்படங்களைக் கொண்டு அதிகப் பக்கங்களை இணைக்க முடியாது. அதிகப் பொருட்செலவு ஏற்பட வாய்ப்புள்ளது. ஆனால் மின் நூல்களில் அதிக அளவில் வண்ணப் புகைப்படங்களை இணைத்து வெளியிடலாம். மின் நூல்களில் உள்ள பக்கங்களைத் தேவைக்கேற்ப பெரிதாக்கிப் பயன்படுத்த முடியும். சாதாரண நூல்களை இவ்வாறு பயன்படுத்த முடியாது.

உலகின் எப்பகுதியிலும் எந்த நேரத்திலும் தேவையான பகுதிகளை இணையத்தில் தேடுபொறிகளைக் கொண்டு எளிதாக தேடிப் பார்த்துப் பயன்படுத்த முடியும். தேவையான மின்னூல்களை மின்வணிகம் வழியாக வாங்கிப் பயன்படுத்த முடியும். அச்சிடப்பட்ட நூல்களை அச்சுப் பிரதிகளை வாங்க வேண்டிய சூழ்நிலை ஏற்பட வாய்ப்புள்ளது. ஆனால் மின் புத்தகங்களைத் தேவையான நேரங்களில் உடனே தரவிறக்கம் செய்து கொள்ள முடியும். மின் புத்தகங்களில் உள்ள தகவல்களை ஆவணமாக நீண்ட காலம் பயன்படுத்த முடியும். அச்சிடப்பட்ட நூல்கள் குறிப்பிட்ட காலத்திற்குப் பிறகு சிதைந்து விடுகின்றன. ஆனால் மின் புத்தகங்களின் ஆயுள் காலம் பன்மடங்கு நீடிக்கக்கூடியவை ஆகும்.

வெளியிடப்பட்ட ஒரு புத்தகத்தின் கருத்துக்கள் ஒரு மாநிலமோ, அல்லது ஒரு நாடோ மட்டும் தான் சென்றடையும். மின்னூலாக பதிப்புச் செய்யும் போது உலகளாவிய நிலையில் பரவி எல்லோரும் படித்து இன்புறும் அளவிற்கு மின்னூல்கள் பயன்படுகின்றன.

பார்வை நூல்கள்:
http://www.muthalvan.in
http://ta.wikipedia.org/s/ma7
http:;//tech.neechalkaran.com

க.பிரகாஷ்
தமிழ்த்துறை
தொழில் நுட்ப கள ஆய்வு பணியாளர்
பாரதியார் பல்கலைக்கழகம்
கோயம்புத்தூர் – 46

April 8, 2016
இயற்கையும் அன்புவாழ்வும்!

-முனைவர் இராம. இராமமூர்த்தி

சங்கத்தமிழ்ப் பூங்காக்கள் எழில் நிறைந்தன. இனிய நன்மணம் பரப்புவன. உண்டற்கினிய நற்கனிகள் மிக்கு விளங்குவன. செறிவுமிக்க பயிரினங்கள் பரந்துவிளங்குவன. இச்சோலையில் நுழையவும் நன்மணத்தை நுகரவும், கனிகளை மாந்தியின்புறவும் நுகர்வோர்க்குப் பொறுமையும் கூர்த்த மதியுமே தேவைப்படும் கருவிகளாம். தமிழர்வாழ்வு இயற்கையோடியைந்தது என்பார் தமிழ்த்தென்றல் திரு.வி.க. மேலும் இயற்கையை…இயற்கை எழிலை இறைவனாகக் கண்டு வழிபட்டவர்கள் தமிழர்கள் என்பார் அவர். தமிழர்கள் தாம் கண்ட கடவுளை அழகென – முருகெனக் கண்டு வழிபாடாற்றியவர்கள். அவர்கள் கண்ட எழிலார் இறைவனே முருகன்; முருகன் என்றால் அழகன் என்பார் அந்தத் தமிழ்ப்பெரியார்.

இதனாலேயே, தமிழர்தம் வாழ்வை இயற்கையை ஒட்டியே முல்லை, குறிஞ்சி, மருதம், நெய்தல், பாலை எனப் பகுத்தனர் நம்முன்னோர். இந்நிலங்கட்குரிய ஒழுக்கங்களைக் குறிக்கவும் மேற்சுட்டிய பெயர்களையே இட்டுமகிழ்ந்தனர். இவ்வைந்திணைகளுள் முல்லைநிலக் காட்சி ஒன்றை இங்கே காணலாம்.

முல்லைநில ஒழுக்கமாக, இருத்தலும் இருத்தல் நிமித்தமும் கூறப்பட்டுள்ளது. பொருள்தேடவோ, போர் காரணமாகவோ தலைவன் பிரிந்து செல்லலும், தலைவன் திரும்பிவரும் வரையில் தலைவி இல்லத்தின்கண் ஆற்றியிருத்தலும் இத்திணைக்கண் மிகுதியாக இடம்பெறுஞ் செய்திகளாம். அத்தகைய எழிலார் காட்சியொன்றன் வாயிலாக இயற்கையின் கவின்பெறு வனப்பும் தலைமகனின் காதலன்புப் பெருக்கமும் இயம்பப்பெற்றுள்ள சிறப்பே கவிஞனின் சிறப்பாம். கவிஞன் படைத்த அவ்வழகோவியத்தைக் காணலாமே!

தலைவன், தான் மேற்கொண்ட அருஞ்செயலை முடித்துத் தன்னில்லந் திரும்புகின்றான். தேரேறி விரைந்துவர எண்ணிய தலைமகன், தேர்ப்பாகனைநோக்கித் ”தேரை விரைந்து செலுத்துக!” எனக் கூறுகின்றான். மனையிற் பிரிந்து காத்திருக்கும் தலைவியின் பிரிவுத்துயரைப் போக்க எண்ணுவது தலைவனின் இயல்புதானே!

தேர் புறப்பட்டது; கான் வழியாகக் காற்றினுங்கடிதாக விரைகின்றது. அவன் கடந்துவரும் கானத்தில், பிடா மலர்கள் புதரின்கண் வெள்ளிய கொத்துக்களாய் மலர்ந்து கண்ணைக் கவருகின்றன. அவ்வெண்மலர்க்கொத்துக்கள் மாலைபோல வனப்புடன் திகழ்கின்றன. அத்தகைய முல்லையங்காட்டில் வேடுவன் வேட்டைக்காகத் தன் தோளில் தாங்கியுள்ள கவைக்கோலைப்போல முறுக்கிய கொம்புகளுடன் அழகுற ஆண்மானொன்று துள்ளிப்பாய்கின்றது. அவ்வாண்மான், படர்ந்து விரிந்துள்ள தண்டுகளோடு கூடிய அறுகம்புற்கொத்துக்களைத் தன் குட்டிகளோடு விளையாடும் இளைய பெண்மானுக்குக் காட்டியுண்ணச் செய்கின்றது. அத்துடன் அமையாது, தெளிந்த நீரோடையின் நன்னீரைக் காட்டி அப்பெண்மானை அருந்தச் செய்கின்றது. நீர்வேட்கை தீர்ந்த பெண்மான் தன்குட்டிகளோடு உறங்குமிடத்தைக் காவலும் புரிகின்றது அவ்வாண்மான். என்னே மான்களிடைக் காணலாகும் காதலன்பு!

இவ்வெழின்மிகு காட்சியைக் கண்டனன் நம் தலைமகன். இக்காட்சி அவன் உளத்திடை எத்துணை எண்ணங்களை எழுப்பியிருக்கும் எண்ணுக. நம் கவிஞர்பெருமான் இக்காட்சியை இத்துடன் நிறுத்தித் தலைமகன் கண்முன்னே மற்றொரு காட்சியைக் காட்டுமுகத்தான், காட்சிமாற்றம் செய்கின்றார். இக்கவிஞர் காவியப்புலவர் மட்டுமல்லர்; நாடகந்தீட்டும் நற்கலைஞரும் ஆவார் போலும்! அடுத்த காட்சி நந்தலைவனின் நெஞ்சைத்தொடும் உணர்ச்சிமிக்க காட்சி!

தலைவியின் இல்லம் அது. ஆங்கு அன்னங்கள் தம்பெடைகளோடு ஆடிக்களிக்கின்ற அழகிய காட்சியினைத் தலைவனைப் பிரிந்த தலைவி காணுகின்றாள். வினைமேற்சென்ற தலைமகன் இன்னும் இல்லத்திற்கு மீண்டுவரவில்லையேயென அவளன்பு மனம் தனிமைத்துயரான் தவிக்கின்றது. தலைவி, தான் அன்புடன் பாலூட்டிப் பாராட்டும் பைங்கிளியை முன்கையில் ஏந்தியவளாய்த் தன்னில்லத்தார்க்கு அஞ்சியவளாய்ப் பிறரறியாவாறு கொல்லைப்புறம் சென்றாள். அங்கே தன் அன்புக்கிள்ளையை நோக்கி ஒரு வேண்டுகோளை வைக்கின்றாள். கிள்ளாய்! “என் தலைவர் இன்றே திரும்பிவருவார் என இன்மொழி கூறுக!” என்பாள் தலைவி. அவளது பிரிவுத்துயரும் தலைவனின் நெஞ்சத்திரையில் திகழும் காட்சியாய் வலம்வருகின்றது. தலைவன் உள்ளத்துடிப்புடன் தேர்ப்பாகனை நோக்கிச் ”செல்க தேரே!” எனக் கட்டளையிடுகின்றான்; காட்சிகள் நிறைகின்றன.

இத்தகு எழிற்காட்சியினைப் புனைந்த கவிஞரை அறிந்துகொள்ள விழைதல் இயல்புதானே! அக்கவிஞர் மருதனிளநாகனார். இவ்வழகோவியம் இடம்பெற்றுள்ள சங்கப்பனுவல் அகநானூறென்க. தமிழ்க்கவிஞர்கள், இயற்கையெழிலை வறிதே புனையாமல் வாழ்வுடன் இணைத்துக்காட்டும் நல்லியல்பினர் ஆவர். அச்சொல்லோவியத்தை அடியிற்காணலாம்.

சிறுகரும் பிடவின் வெண்தலைக் குறும்புதல்
கண்ணியின் மலரும் தண்நறும் புறவில்
தொடுதோற் கானவன் கவைபொறுத் தன்ன
இருதிரி மருப்பின் அண்ணல் இரலை
செறியிலைப் பதவின் செங்கோல் மென்குரல்
மறியாடு மருங்கின் மடப்பிணை யருத்தித்
தெள்ளறல் தழீஇய வார்மணல் அடைகரை
மெல்கிடு கவுள துஞ்சுபுறங் காக்கும்
பெருந்தகைக்கு உடைந்த நெஞ்சம் ஏமுறச்
செல்க தேரே நல்வலம் பெறுந
பசைகொல் மெல்விரற் பெருந்தோட் புலைத்தி
துறைவிட் டன்ன தூமயிர் எகினம்
துணையொடு திளைக்கும் காப்புடை வரைப்பிற்,
செந்தார்ப் பைங்கிளி முன்கை ஏந்தி
இன்றுவரல் உரைமோ சென்றிசினோர் திறத்தென
இல்லவர் அறிதல் அஞ்சி மெல்லென
மழலை இன்சொல் பயிற்றும்
நாணுடை அரிவை மாணலம் பெறவே! (அகம்-34: மருதனிளநாகனார்)

April 8, 2016
ஆசை யாரை விட்டது?

-மீ.விசுவநாதன்

ஆசையாரை விட்டது – அது
–அரசனை ஆண்டி யாக்குது!
காசைநேரே கண்டதும் – அது
–களவினைச் செய்யச் சொல்லுது!

நாக்கில்பொய் வைக்குது – மொத்த
–நாட்டினை ஆளத் துடிக்குது!
வாக்கில்மொய் தடவுது – மக்கள்
–வாயினை நன்றா யடைக்குது!

மானமுள்ள தொண்டென – அன்று
–மண்ணினைக் காக்க வந்தனர்!
ஆனவரை சுருட்டவே -இன்று
–ஆர்வமாய்க் கட்சி சேர்ந்தனர்!

தோற்றத்தில் மயங்கியே – புத்தி
–தொலைவதைக் கொஞ்சம் திருத்துவோம்!
மாற்றத்தை வழங்கிட – தூய
–மனிதரை நெஞ்சம் நிறுத்துவோம்!

April 8, 2016
அருங்காட்சியகம் ஓர் அறிவுக் கருவூலம் – 61

ஜிம் தோம்சன் அருங்காட்சியகம், பாங்கோக், தாய்லாந்து

முனைவர்.சுபாஷிணி

இந்த வாரம் நாம் காணவிருக்கும் அருங்காட்சியகம் அமைந்திருப்பது தாய்லாந்தின் பாங்காக் நகரில்.

இந்தப் பூவுலகில் மனிதர்கள் பிறந்து, வாழ்ந்து மறைந்து கொண்டேயிருக்கின்றோம். ஒவ்வொருவரும் இந்த உலகிற்கு வந்த காரணத்தை ஏதாவது ஒரு வகையில் நிறைவேற்றிவிட்டுத்தான் செல்கின்றோம். ஒரு சிலரது வாழ்க்கை தனக்கு மட்டுமே பயனளிப்பதாக அமைந்து விடுகின்றது. ஒரு சிலரது வாழ்க்கை பிற உயிர்களுக்குத் துன்பம் விளைவிக்கும் நாச செயல்கள் நிறைந்ததாய் அமைந்து விடுகின்றது. ஒரு சிலரது வாழ்க்கையோ அவர்கள் மறைவிற்குப் பின்னரும் கூட அவர்கள் பெயர் உலகில் நிலைத்து நிற்கும் வகையில் அமைந்து விடுகின்றது. அப்படி நிலைத்து நிற்கும் வரிசையில் இருப்போர் ஏராளம்.

ஒருவரை நினைத்துப் பார்த்து நினைவு கூர்ந்து அவர்களது செயற்பாடுகளை சில குறிப்பிடத்தக்க காரணங்களுக்காக பாராட்டுகின்றோம். அந்த வகையில் வருபவர்தான் திரு.ஜிம் தோம்சன் அவர்கள்.

ஜிம் தோம்சன் அவர்கள் பிறப்பால் ஒரு வட அமெரிக்கர். டெலேவர் மாநிலத்தில் உள்ள கிரீன்வீல் நகரில் 1906ம் ஆண்டில் பிறந்தார். கட்டிடக் கட்டுமானத்துறையில் பயிற்சி எடுத்தவர் இவர். இரண்டாம் உலகப்போருக்கு முன்னர் அவர் தாமாகவே முன் வந்து அமெரிக்க ராணுவத்தில் பணியாற்ற தம்மை ஈடுபடுத்திக் கொண்டார். முதலில் இவருக்குப் பணி ஐரோப்பாவில் வழங்கப்பட்டிருந்தது. ஆகையால் ஐரோப்பாவில் அச்சமயம் ராணுவப் பணியில் இருந்த துருப்புக்களோடு ஐரோப்பாவில் தங்கி பணியாற்றினார். பின்னர் பணிக்காக இவர் ஆசிய கண்டத்தில் உள்ள நாடுகளுக்கு அனுப்பப்பட்டார். இவரது முதல் பணி தாய்லாந்தில் அமைந்திருந்தது. ஆயினும் பாங்காக் வருவதற்கு சில தினங்களுக்கு முன்னரே இரண்டாம் உலகப் போர் முடிவுற்றது என்ற காரணத்தால் அவர் ராணுவச் சேவையில் ஈடுபட வாய்ப்பு அமையவில்லை. ராணுவச் சேவைக்காகத் தாய்லாந்து வந்து சேர்ந்த ஜிம் தோம்சன் தாய்லாந்தின் அழகில் தன் மனதைப் பறிகொடுத்தார்.

தாய்லாந்தின் கலையம்சங்களும் கிராமிய கைவினைப் பொருட்களும் துணி வேலைப்பாடுகளும், மர வேலைப்பாடுகளும் ஜிம் தோம்சனின் மனதைக் கொள்ளைக் கொண்டன. தான் இதுவரை பார்த்திராத கலையம்சங்கள் தாய்லாந்து கலை பாணியில், இருப்பதை அவர் உணர்ந்தார். அவரது சிந்தனை தாய்லாந்து கிராமப்புற வாழ்க்கையில் இருக்கும் நுணுக்கமான விஷயங்களிலேயே ஆர்வம் கொண்டு அவர்தம் கவனத்தை முழுமையாக ஈர்க்க ஆரம்பித்தது.

குறிப்பாக கையால் பின்னப்படும் பட்டு ஆடைகள் மறக்கப்பட்ட ஒருகலையாக அச்சமயம் மாறிக்கொண்டிருந்தது. இது ஜிம் தோம்சனின் கவனத்தை ஈர்க்கவே, இக்கிராமியத் தொழிற்கலை மறையக் கூடாது என்றுமுடிவெடுத்து இந்தக் கலையை மீட்டெடுக்கும் பணியில் தம்மை ஈடுபடுத்திக் கொண்டார். அவருக்கு இயற்கையாகவே துணிகளில் வர்ணம் சேர்க்கும் கலையில் அனுபவமும் இருந்தது. இதன் அடிப்படையில் இந்தக் கலையை புதுமைப்படுத்தி கிராமத்துக் கலைக்கு புதிய வடிவம் கொடுத்து இதனை ஒரு வர்த்தகப் பார்வையில் விரிவு படுத்தினார். உலக அளவில் குறிப்பாக ஐரோப்பா, வட அமெரிக்கா ஆகிய நாடுகளில் இக்கலை விரிவாக்கம் பெற தொடர்ந்து பல முயற்சிகளைச் செய்து வெற்றியும் கண்டார்.

அடிப்படையில் ஒரு கட்டிடக் கலைஞராகத் தொழில் முறையில் பயிற்சி பெற்றவர் ஜிம் தோம்சன். அவருக்குத் தாய்லாந்து தேக்கு மர கிராமிய வீடுகளின் கட்டுமானக் கலை மனதை கவர்ந்தது. தாய்லாந்து வீடுகளும் சரி, புத்த விகாரைகளும் சரி, பொதுவாகவே கூரைப்பகுதி என்பது சமமாக இல்லாது தனித்துவமிக்க வகையில் அமைந்திருக்கும் தன்மை கொண்டது. இது மேற்குலக கட்டுமானக் கலையிலிருந்து முற்றிலும் மாறுபட்டதொரு வடிவம்.

தாய்லாந்து வீடுகள் எனும்போது அவை தரைப்பகுதியானது நிலத்திலிருந்து உயரமாக தூக்கி வைத்து கட்டப்பட்ட வகையில் இருக்கும். கால்கள் அமைத்தது போன்ற அமைப்பும் இருப்பதால் வீட்டுக்குக் கீழ்ப்பகுதியில் மணல் தரை பார்வைக்குத்தென்படும் வகையில் இருக்கும். வெள்ளம் வரும் போது நீர்மட்டம் அதிகரித்தால் அது வீட்டை பாதிக்காதவாறு இவ்வகை வீடுகள் அமைந்திருப்பதும் மிக சமயோஜிதமாக யோசித்துக் கட்டிய கட்டுமானம் இவை என்பது புலப்படும்.

தாய்லாந்து கட்டுமானக் கலையில் மிகுந்த ஈடுபாடு கொண்ட ஜிம் தோம்சன் பாங்கோக் நகரின் மையப்பகுதியில் ஒரு நிலத்தை வாங்கி அங்கே தாய்லாந்து கட்டுமானக் கலையை வளர்க்கும் வகையில் 6 வீடுகளை அமைத்தார். அந்த வீடுகளில் தான் ஆசியாவில் பயணித்த சமயத்தில் தான் சேகரித்த கலைப்பொருட்களைக் காட்சிக்கு வைத்தார். ஒரு தனி வீட்டில் தாய்லாந்து பட்டு பற்றிய தகவல் களஞ்சியத்தை வடிவமைத்தார். பட்டுப்புழுக்களிலிருந்து நூல் தயாரிக்கும் விதத்தை விளக்கும் விபரங்களை அருங்காட்சியகமாக அமைத்தார்.

இந்த வீடுகளை அமைத்து காட்சிப்பொருட்களை வைக்கும் முன் தாய்லாந்து சமயச் சடங்கு முறைகளைப் பின்பற்றி புதுமனை புகு விழாவினையும் நடத்தினார். இதற்குத் தாய்லாந்து ஜோதிடர்களை அணுகி நல்ல நேரம் கணித்து புதுமனை புகுவிழாவை ஏற்பாடு செய்து பின்னரே தன் புதிய இல்லப் பூங்காவிற்கு குடி புகுந்தார். முதலில் இந்த இடத்தை தனது சொந்த கலையுணர்வுக்காக அமைத்த ஜிம் தோம்சன் இந்த இல்லப்பகுதி பலரது கவனத்தை ஈர்ப்பதைப் பார்த்து இதனைப் பொது மக்கள் பயன்பெறும் வகையில் அருங்காட்சியகமாக மாற்றினார். தனக்கென்று ஒரு குடும்பம் என இல்லாத நிலையில் இந்த அருங்காட்சியகத்திலிருந்து சேகரிக்கின்ற வருமானத்தை தாய்லாந்து கலைப்பண்பாட்டு வளர்ச்சிக்காகச் செயல்படும் நிறுவனங்களுக்குச் சென்று சேரும் வகையில் ஏற்பாடுகளைச் செய்தார்.

1967ம் ஆண்டு மார்ச் மாதம் 26ம் தேதி மலேசியாவின் கேமரன் ஹைலண்ட்ஸ் மலைப்பிரதேசத்தில் தமது நண்பர்களோடு சுற்றுலாவிற்குச் சென்ற ஜிம் தோம்சன் அவர்கள் திடீரென்று காணாமல் போனார். அவரை எங்கு தேடியும் யாராலும் கண்டு பிடிக்கமுடியவில்லை. எந்த வித தடயங்களும் அவரது மறைவைப் பற்றி யாருக்குமே கிடைக்கவில்லை. அவரது மறைவுக்குப் பின்னர் அவர் அமைத்த தாய்லாந்து கட்டுமானக் கலைக்கூட அருங்காட்சியகம் ஜிம் தோம்சன் அறக்கட்டளையினால் தொடர்ந்து பராமரிக்கப்பட்டு வருகின்றது. அவரது விருப்பப்படியே அருங்காட்சியகம் பொது மக்கள் பார்வைக்காகத் திறந்து வைக்கப்பட்டுள்ளது. இங்கே தொடர்ச்சியாக தாய்லாந்து பாரம்பரிய பட்டு நெய்யும் கலையும் காட்சிப்படுத்தப்படுகின்றது.

ஜிம் ஜோம்சன் அருங்காட்சியகத்திற்கு நான் 2013ம் ஆண்டில் ஜனவரி மாத ஆரம்பத்தில் சென்றிருந்தேன். தாய்லாந்தில் சுற்றுலா முடித்து பாங்காக் நகரில் இருந்த இறுதி நாட்களில் தற்செயலாக இந்த அருக்காட்சியகம் பற்றி கேள்விப்பட்டு சென்று வந்தேன்.

அருங்காட்சியகத்தின் உள்ளே நுழையும் முன்னரே பச்சை பசேலன தாவரங்கள் நம்மை வரவேற்கின்றன. எழில் கொஞ்சும் அழகிய கலைக்கூடம் இது. கலைப்பிரியர்களாக இருந்தால் ஒரு நாள் முழுவதையும் இந்த வளாகத்திலேயே நிச்சயம் செலவிடலாம்.

ஜிம் தோம்சன் இந்த அருங்காட்சியகத்தில்

தாய்லாந்து செல்பவர்கள் இந்த அருங்காட்சியகத்திற்குச் சென்று வரலாம். திரு.ஜிம் தோம்சனின் தாய்லாந்து கட்டிடக் கலை வேலைப்பாடுகளின் மீதான மிகுந்த ஈடுபாட்டினை இங்கு வருபவர்கள் நிச்சயமாக உணரமுடியும். ஜிம் தோம்சன் மறைந்தாலும் அவர் பெயரை சொல்லிக் கொண்டிருக்கும் வகையில் இந்த அருங்காட்சியகம் திகழ்கின்றது.

சரி.. அடுத்த பதிவில் வேறொரு நாட்டில் மற்றுமொரு அருங்காட்சியகத்திற்கு அழைத்துச் செல்கின்றேன்… தொடர்ந்து வாருங்கள்!

April 8, 2016
நைல் நதி நாகரீகம், எகிப்தின் பிரமிக்கத் தக்க ஆலய ஓவியங்கள் – 4

–சி. ஜெயபாரதன்.

(Paintings in The Great Abu Simbel Temples of Egypt)

சி. ஜெயபாரதன் B.E.(Hons) P.Eng (Nuclear), கனடா

ஓ! உறங்குகிறாய் நீயோ!

உறக்கம் என்ப தென்ன ?

இறப்பின் எதிர்ப் பிம்பம் அது!

சிறப்பாக உன்னதப் படைப்புகள்

பிறக்கட்டும்,

மறைந்த பிறகு நின் பிம்பம்

இறவாத ஓர் நிரந்தரம் நிலை

பெறுவதற்கு!

ஓவிய மேதை: லியனார்டோ டவின்ஸி

‘உன் மண்டை ஓட்டை எடு; எலும்புகளை சேகரி; மற்ற உடற் கூறுகளையும் சேர்த்து ஒட்டியுள்ள மண்ணை உடற் சதையிலிருந்து உலுக்கி விட்டு நீக்கு! …. உந்தன் கரங்களைப் பற்றி உன்னை சொர்க்க புரிக்கு அழைத்துப் போக, வாசல் காப்போன் உன்னை நோக்கி வெளியிலிருந்து வருகின்றான்! ‘

பண்டைப் பேராட்சிப் பிரமிட் வாசகம்

5000 ஆண்டுகளுக்கு முன்பாக இயற்கையான பாறைக் குன்றுகளைக் குடைந்து பிரமிக்கத் தக்க முறையில் பேரெழிலுடன் செதுக்கிய ஆபூ சிம்பள் ஆலயங்கள் [Abu Simbel Temples] போன்று உலகிலே வேறு எந்த நாட்டிலும் காண முடியாது! அப்பெரும் இரண்டு ஆலயங்களை ஃபாரோ வேந்தன் ராம்ஸிஸ் [Ramses II] கி.மு.(1279-1213) ஆண்டுகளில் தனது பராக்கிரமத்தையும், தெய்வீக உணர்ச்சியையும் எடுத்துக் காட்ட ரா-ஹாராக்டே [Ra-Harakhte] ஞாபகமாகவும், மனைவி நெஃபர்டாரி [Nefertari] நினைவாகவும் அமைத்ததாக அறியப்படுகிறது. 1813 ஆம் ஆண்டில் எகிப்தின் நைல் நதி நாகரீகத்தைக் காண வந்த ஜே.எல் புர்காரெட் [J.L. Burckhardt] என்பவர் நைல் நதியைக் கடந்து குன்றுகளைப் பார்வை யிட்ட போது, மணல் மூடிய அழகிய ஓர் ஆலயத்தை நவீன சூடான் எல்லைப் பகுதியில் கண்டுபிடித்தார். நைல் நதியில் அமைக்கப் பட்டுள்ள உலகப் பெரும் அணைகளில் ஒன்றான அஸ்வான் உயர்ந்த பேரணையிலிருந்து சுமார் 170 மைல் தூரத்தில் வரலாற்றில் புகழ் பெற்ற அப்பெரும் இரண்டு ஆலயங்கள் கட்டப் பட்டிருக்கின்றன.

ராம்ஸிஸ் வேந்தர் தனக்காகக் கட்டிய முதல் ஆபூ சிம்பள் ஆலயத்தின் வாசலில் 67 அடி உயரமுள்ள நான்கு பூத வடிவான சிற்பச்சிலை மன்னர் வீற்றிருக்கும் கம்பீரமான காட்சி காண்போரைப் பெரு வியப்பில் தள்ளிவிடும்! ஆலய முகப்பில் சிற்பச் சிலைகள் வீற்றிருக்கும் தளப்பகுதி மட்டும் 120 அடி அகலமும், 100 அடி உயரமும் கொண்டது! வேந்தரின் இரண்டு கற்சிலைகள் வலது புறமும், அவற்றைப் போல் இரண்டு கற்சிலைகள் இடது புறமும் பிரம்மாண்டமாக அமர்ந்துள்ளன. நான்கு பூதச் சிலைகளில் இடப்புறத்தில் உள்ள ஒன்று மட்டும் பூகம்பத்தால் உடைந்து போனதாக அறியப் படுகிறது! அந்த ஆலயம் கிழக்கு நோக்கி நிற்கிறது. சூரியக் கடவுளின் சிற்பம் தலை வாயிலின் மேலே உயரத்தில் செதுக்கப் பட்டிருக்கிறது. கோயில் நேரமைப்பு [Temple Alignment] முதலில் துல்லியமாக நகர்த்தப் பட்டு, ஆண்டுக்கு இருமுறை பரிதி கடக்கும் போது, அதன் ஒளிக்கதிர்கள் உள்ளிருக்கும் சன்னிதியில் இருக்கும் தெய்வங்கள் மீது நேராக விழும்படி நூதனப் பொறியியற் திறமையுடன் கட்டப் பட்டுள்ளது!

ஆபூ சிம்பளின் அடுத்த ஆலயம் ஹாதுர் [Hathur] என்னும் எழில் தேவதைக்கு அர்ப்பணம் செய்யப்பட்டு உள்ளது. அதை ராமெஸிஸ் வேந்தன் காதல், எழில் தேவதையான ஹாதுருக்கு [Hathur] அர்ப்பணம் செய்ததோடு, தனது மனைவி நெஃபர்டாரி நினைவாகவும் கட்டியதாக அறியப்படுகிறது. காதலிசை ஆலயத்தின் முன்பு 33 அடி உயரத்தில் பிரமிக்கத் தக்க ஆறு சிற்பச் சிலைகள் செதுக்கப்பட்டு கம்பீரமாக நிற்கின்றன! அப்பெரும் சிற்பங்களின் கீழே அவரது குழந்தைகளின் வடிவச் சிலைகளும் அமைக்கப் பட்டுள்ளன. அந்த இரண்டு கோயில்கள் சூடானின் எல்லையில் இருப்பதால் பல நூற்றாண்டுகள் பலரும் அறியாத வண்ணம் 1813 ஆண்டுவரை மறைந்தே இருந்து விட்டன. 1817 இல் இரண்டு ஆலயங்களையும் இத்தாலிய எகிப்திய புதைச் சின்னவாதி [Egyptologist] கியோவன்னி பாட்டிஸ்டா பெல்ஸானி [Giovanni Batissta Belzoni] என்பரால் துருவி ஆராயப் பட்டு ஃபாரோ அரசர், அரசிகளின் வரலாறுகள் பதிவு செய்யப்பட்டன. சிற்பங்கள், சிலைகள், சித்திரங்கள் யாவும் சீராக்கப் பட்டு, உலகிலே மிக உன்னத நாகரீகச் சின்னக் களஞ்சியங்களாய்ப் பாதுகாக்கப் பட்டு வருகின்றன!

ஆபூ சிம்பளில் உள்ள பேராலயம்

ஃபாரோ பரம்பரை மன்னன் இரண்டாம் ராம்ஸெஸ் கட்டிய ஆபூ சிம்பள் ஆலயங்களைப் பின்வந்த மதங்கள் எவையும் மாற்றமோ அல்லது சிதைவோ செய்யவில்லை என்பது ஆச்சரியமாக இருக்கிறது. 2001 மே 2 ஆம் தேதி ஆஃப்கானிஸ்தானில் மூடத்தனமான தாலிபான் மூர்க்கர்கள் உலகப் பெரும் உயரம் கொண்ட 2000 ஆண்டு வயது கடந்த புத்தச் சிலையை இஸ்லாமுக்குப் புறம்பானது என்று இகழ்ந்து தகர்த்துச் சிதைத்தது வரலாற்றில் குறிப்பிடப்பட வேண்டிய ஒரு வன்மை நிகழ்ச்சியாகும்! ஆபூ சிம்பள் ஆலய முகப்பின் சிகரத்தில் வரிசையாக ஆஃப்ரிகன் குரங்குகளின் சிலைகள் சூரியோதயத்தை வரவேற்றுச் சிரிப்பவை போல அமைக்கப் பட்டுள்ளன! ஆலயக் கதவின் அருகே அரசரின் பெயர் ‘செர்மாத்ரா ‘ [Ser-Ma ‘at-Ra] என்று எழிலுடன் எழுதப் பட்டிருக்கிறது. முகப்புக்கு அருகில் வீற்றிருக்கும் பிரம்மாண்டமான இரண்டாம் ராம்ஸெஸ் சிலையின் கால்களுக்கிடையே சிறு சிறு சிலைகளாக அவரது அன்னை முத்தூய் [Mut-tuy], மனைவி நெஃபர்டாரி, [Nefertari] புதல்வர், புதல்வியர் ஆக்கியோர் சிலைகளும் அமைந்துள்ளன. ராம்ஸெஸ்ஸின் திருமண நிகழ்ச்சிகள், அவரது போர் முறைகள் கூட சித்திரங்களாகச் சுவர்களில் பொறிக்கப் பட்டுள்ளன. ஹிட்டைட்ஸ் மன்னனின் மகளை ஃபாரோ வேந்தன் ராம்ஸெஸ் [King of the Hittites] திருமணம் புரிந்த நிகழ்ச்சி கூட ஒரு சுவரில் வரையப் பட்டிருக்கிறது.

ஆலய வாசற் படிகளைத் தாண்டி உள்ளே நுழைந்தால், எட்டுத் தூண்கள் தாங்கிய பெரு மண்டபம் ஒன்று எதிர்ப்படுகிறது. எட்டுத் தூண்களிலும் இரண்டாம் ராம்ஸெஸ்ஸின் சிலைகள் ஃபாரோ பரம்பரை மன்னரின் மரணக் கடவுளான, ‘ஓஸிரிஸ் ‘ [Osiris, God of the Dead] வடிவத்தில் செதுக்கப் பட்டுள்ளன! ஃபாரோ பரம்பரை மன்னர்களின் முதலான தெய்வம் சூரியக் கடவுள் என்று அறியப் படுகிறது. அதுபோல் மன்னர்கள் மரணக் கடவுளான ஓஸிரிஸ் தெய்வத்தின் மீதும் மதிப்பு வைத்திருந்தது காணப்படுகிறது. பண்டைக் கால எகிப்தில், ஃபாரோ மன்னர்கள் உள்பட ஏனைய எகிப்தியர்களும் மரணக் கடவுளையும் தொழுது வந்ததாகத் தெரிகிறது. புராண எகிப்து மத நூல்களில் ஓஸிரிஸ் தேவன் மனிதனாக இருந்து, மண்ணிலே வாழ்ந்து எப்படியோ மனித ஆற்றலுக்கும் மேலான ஓர் அசுர சக்தியைப் பெற்று, மரணத்துக்குப் பிறகு மாபெரும் பிரதேசத்தை ஆண்டதாகவும், அவரைப் போல் ஒழுக்க நெறிகளைக் கடைப்பிடித்து வாழ்ந்தோர் அனைவரும் தமது மரணத்திற்குப் பிறகு அவரது பிரதேசத்தில் வந்து சேர்ந்ததாகவும் நம்பப் படுகிறது!

அந்த எழில் உள் மாளிகைச் சுவர்களில் இரண்டாம் ராம்ஸெஸ் கதேஷ்ப் போரில் [Battle os Kadesh] ஹிட்டைட்ஸ் மன்னருடன் புரிந்த போர் ஓவியமாக வரையப் பட்டிருக்கிறது. ராம்ஸெஸ் பெரிய மாளிகையைத் தாண்டி இன்னும் உள்ளே சென்று சிறு மாளிகைக்குள் நுழைந்தால், அங்கே நான்கு சதுரத் தூண்களைக் காணலாம். அந்த சிறு மாளிகை ‘கோமகனார் மாளிகை ‘ [Hall of the Nobles] என்று குறிப்பிடப் படுகிறது. இறுதியில் சன்னதியின் புனித இடத்திற்கு வருகிறோம். அங்குதான் ரா-ஹாரக்டே, பிரா, அமுன்-ரா, ராம்ஸெஸ் வேந்தர் [Ra-Harakhte, Prah, Amun-Ra, King Ramses] ஆகிய நான்கு சிலைகள் உள்ளன. அபூ சிம்பள் முதல் ஆலயத்தின் சிறப்பு: ஆண்டுக்கு இரண்டு முறைகள் [பிப்ரவரி 21, அக்டோபர் 22] பரிதியின் ஒளி நேரடியாகப் புனிதச் சன்னதியின் மேல் படுகிறது. அந்த தேதிகளின் முக்கியத்துவம் என்ன ? பிப்ரவரி 21 ஆம் தேதி ராம்ஸெஸ் மன்னர் பிறந்த நாள்! அடுத்து அக்டோபர் 22 ஆம் தேதி மன்னர் மகுடம் சூடிய நாள்.

ஆபூ சிம்பளில் உள்ள சிற்றாலயம்

இரண்டாம் ராம்ஸெஸ் தனக்குக் கட்டிய பேராலயத்திற்கு வடக்கில் சிற்றாலயத்தைத் தன் எழில் மனைவி நெஃபர்டாரிக்குக் கட்டியுள்ளதாக அறியப் படுகிறது. ஆலயம் காதல் எழில் தேவதையான ஹாதுருக்கு [Hathur] அர்ப்பணம் செய்யப்பட்டது! ஆலய முன் முகப்பில் ஆறு சிலைகள் கம்பீரமாக நிற்கின்றன. அவற்றில் நான் கு சிலைகள் இரண்டாம் ராம்ஸெஸ் மன்னருக்கும், இரண்டு சிலைகள் அவரது மனைவி நெஃபர்டாரிக்கும் செதுக்கப் பட்டிருக்கின்றன. ஆலயத்தின் உள்ளே நுழைந்தால் ஆறு தூண்கள் நிற்கும் ஒரு மாளிகைக் காணலாம். ஆறு தூண்களிலும் ஹாதுர் பெண் தேவதையின் தலைகள் அமைந்துள்ளன. கிழக்குத் திக்கில் உள்ள சுவரில் ராம்ஸெஸ் மன்னன் ரா-ஹாரக்டே, அமுன்-ரா தேவர்கள் முன்பாக எதிரிகளைத் தாக்கி வீழ்த்தும் காட்சி வரையப் பட்டிருக்கிறது! மற்றுள்ள சுவர்களில் ராம்ஸெஸ் மன்னனும், மனைவி நெஃபர்டாரியும் தெய்வங்களுக்குப் பூசை செய்து தொழும் நிகழ்ச்சி காட்டப் பட்டுள்ளது. உள்ளே சன்னதியில் மாபெரும் ஹாதுர் பெண் தெய்வச்சிலைக் காண்போரைப் பிரமிக்க வைக்கிறது. அதன் மேலேதான் மனிதன் செதுக்கிப் படைத்த, மிக உயர்ந்த செயற்கையான வளை கோபுரம் அற்புதமாய்ப் பார்ப்போரை ஊர்ந்திடும் எறும்புகளாக ஆக்குகிறது!

அடுத்து எகிப்தின் உன்னத ஓவியக் கலைத்துவம் பற்றியும், ஒப்பற்றக் கட்டிடக் கலைத்துவம் பற்றியும் காண்போம்.

(தொடரும்)

1. Guide to Places of the World Egypt By: Reader ‘s Digest (1987)

2. Atlas of the World History By: Harper Collins (1998)

3. The Ancient World, Quest for the Past (1984)

4. How in The World By: Reader ‘s Digest (1990)

5. Age of the Pyramids, Egypt ‘s Old Kingdom By: National Geographic (January 1995)

6. Finding A Pharaoh ‘s Funeral Bark & Riddle of the Pyramid Boats By: National Geographic (April 1988)

7. The History of Art for Young People By: H.W. Janson.

8. Ancient Egypt, Who Built the Pyramids, How old Are the Pyramids, PBS & WGBH Web Site (1997)

9. The Sphinx of Egypt – The Great Sphinx [www.nmia.com/~sphinx/egyptian_sphinx.html] (May 23, 2002)

10 Ramesses II Temple & Nafertari Temple at Abu Simbel Egypt [Several Web Sites]

11 The New American Desk Encyclopedia, Abu Simbel (1989)

12 Britannica Concise Encyclopedia, Abu Simbel Temples (2003)

13. http://witcombe.sbc.edu/sacredplaces/abusimbel.html

14. http://www.ancient.eu/Abu_Simbel/

15. https://en.wikipedia.org/wiki/Abu_Simbel_temples [March 3, 2016]

**************

S. Jayabarathan [jayabarathans@gmail.com] (April 3, 2016) [R-1]

April 8, 2016