வல்லமை

Blog

  • நினைவுகளுடன் ஒருத்தி

                      ———சீதாம்மா————————————–

    பொங்கல் திருநாள்

    pongal4-25

    ஒருவருக்கொருவர்  வாழ்த்துக்களைத்  தெரிவித்துக் கொள்வோம்

    இயற்கையின் சீற்றத்தில் இழந்தது எத்தனை எத்தனை?!

    பயிர்களும் தவித்து துவண்டதே

    ஆனால் இப்பொழுது எல்லோர் முகங்களிலும் ஓர் மலர்ச்சி

    மனத்தில் வாட்டமிருப்பினும் சொந்த பந்தங்களுடன் கூடியிருப்பது மகிழ்ச்சி

    இதுதான் வாழ்க்கை

    இது பொங்கல் வாழ்த்து மடல்மட்டுமல்ல. ஓர் மூதாட்டியின் மனக்குரலின் ஓசையும் கூட.    ஆம்   … ஓர் புதிய தொடரின் தொடக்கம்

    எழுதுவதை நிறுத்தி ஏறத்தாழ இரண்டாண்டுகள்  ஆகப் போகின்றன

    ஏன் இப்பொழுது எழுதத் தொடங்கினேன்?

    அது ஓர் தீவு. ஏரிகள் சூழ்ந்த ஓர் திடல் அங்கு நான்கு வீடுகள்.

    அத்திடலிலும் நான்கு ஏக்கர் பரப்பளவில் ஓர் பெரிய மரவீடு. அதன் பின்னும் ஓர் சின்ன ஏரி. ஓர் நீச்சல்குளமும் உண்டு. எத்தனை பறவைகள். கொக்குகள் வந்து கொஞ்சும். அணில்கள் துள்ளி விளையாடும்.  இவைகள் மட்டுமா? விதம் விதமான பாம்புகள். முதலையும் அவ்வப்பொழுது வரும்.  அந்த வீட்டில் ஒர் அறை. அதற்குள் ஒருத்தி. இயக்கங்களின் இயலாமை. உலகமெல்லாம் சுற்றிப் பறந்த ஓர் பறவை தங்கக் கூண்டில் அடைப்பு.

    அப்பப்பா, கொடுமை! முதுமை இவ்வளவு கொடியதா?  வாழ்வியலில் பன்முகம் தெரிந்தவள். அவளே திணறினாள். சுருண்டாள். அழுதாள்  ஒடுங்கிப் போயிருந்த அவளை மனக்குரல் தட்டி எழுப்பியது. அனுபவங்களின் சக்தி அவள் மனச் சிமிழைத் திறந்தது.. சிறிது சிறிதாக அவளிடம் ஓர் புத்துணர்வு.  அவள் துவண்டு போக மாட்டாள்.   மரணத்தையும் வரவேற்கும் வலிமை பிறந்துவிட்டது.

    முதுமையில் துணையிருப்பது நினைவுகள்

    உண்மை

    வாழ்வியல் தத்துவம்

    முயற்சிகளில் ஒன்றாக உங்கள்முன் வந்திருக்கின்றேன். என் நினைவுகளைப் பதிகின்றேன். எந்தப் பதிவிலும் ஓர் செய்தி இருக்கும். அதை உங்கள் ஆழ்மனத்தில் வைத்து பூட்டி வையுங்கள். உங்களுக்கும் பின்னால் உதவும்.

    அடிக்கடி சந்திப்போம்.

    ( கண்பார்வை மங்கிவிட்டது. விரல்கள் நடுங்குகின்றன எனவே எழுத்துப் பிழையைப் பொருத்தருள வேணடிக் கொள்கின்றேன்.)

    Share

  • இலக்கியச் சித்திரம் – இனிய பிள்ளைத்தமிழ்-10

    மீனாட்சி பாலகணேஷ்

    புலியும் அம்புலியும்!

    காலங்கள் மாறினும் சிலகாட்சிகள் மட்டும் மாறுவதேயில்லை! மாறாதகாட்சிகளாயினும் அவற்றின் புதுமையும் இனிமையும் நெஞ்சை மகிழ்விக்கவும் நெகிழ்விக்கவும் தவறுவதேயில்லை! நாம் எதனைப்பற்றிப் பேசப்புகுந்தோம் தெரியுமா? வாருங்கள், இதோ காணலாம் ஒரு இனிய இலக்கியச்சித்திரத்தினை!

    இந்தப் பெரியமாளிகையின் நிலாமுற்றத்தில் பரபரப்பும், ஓடியாடுதலும் இன்று மிகுந்துகாணப்படுகின்றது. ஏன் தெரியுமா? இன்று பௌர்ணமி எனப்படும் முழுநிலா மாலை. மாளிகைப் பணிப்பெண்கள் அனைவரும் நிலாச்சோறு உண்பதற்கு ஏற்பாடுசெய்ய ஓடியாடிக்கொண்டுள்ளனர்; அன்னையின் கையில் சிறு பெண்குழந்தை, பாலன்னத்தை வெள்ளிக்கிண்ணத்திலிருந்து எடுத்து அன்னை வானில் எழுந்து பளிச்சிடும் நிலாவைக்காட்டிக் கதைகூறியபடியே குழந்தைக்கு ஊட்டுகிறாள். இரண்டு கவளங்கள் உண்டகுழந்தைக்கு, அந்தப் பால்போலும் அழகுநிலாவிடம் ஆர்வம் மிகுகின்றது.

    “அம்மா, அம்புலிமாமாவை என்னோடு விளையாட இங்கே அழைத்துவாயேன்,” என ஒரு மாபெரும் கட்டளையை இடுகிறாள் இந்தச் சுட்டிச்சிறுமி. அரசிளங்குமரியல்லவா இந்தக் கிள்ளைமொழிக்குழந்தை? உடனே நிறைவேற்றவேண்டாமா?

    பணிப்பெண்கள் சாம, தான, பேத, தண்ட உபாயங்களை மாற்றிமாற்றி உபயோகித்து, அம்புலியைத் தங்கள் சிறுமியுடன் விளையாட வருமாறு அழைக்கின்றனர். அம்புலி அவ்வளவு எளிதாக வந்துவிடுமா என்ன? அவனும் செருக்குற்று நிற்கிறான். ‘இவர்களழைத்து இந்தச்சிறுமியுடன் நான் விளையாடப்போக வேண்டுமோ? நான் உலகிற்கே தலைவனான சிவபிரானின் சடையில் குடியிருப்பவன், இப்பெண்கள் என்னை மிரட்டி விரட்டினால் விரட்டட்டுமே, பார்த்து விடலாம்,’ என மெத்தனமாக இருக்கிறான்!

    தானத்தையும் (அதாவது நீ கீழிறங்கி இக்குழந்தையுடன் விளையாட வந்தால் என்னென்ன பெறலாம் எனக்கூறுவது) பேதத்தையும் (வராவிடில் எதையெல்லாம் இழக்க நேரிடும் எனவும் கூறுகிறாள்) கலந்து விரவி அழகான சொல்விளையாட்டாகப் பல கதைகளைப் பகிர்ந்துகொண்டு, அம்புலியைக் கூப்பிடுகிறாள் பாடலில் வல்ல செவிலித்தாய் ஒருத்தி! அவற்றைக் கொஞ்சம் கேட்கலாமா?

    “என் நாதன் ஒரு வெம்புலியைத் தோல்உரித்தனன்; நாமும் அவனுக்கு ஈடாக ஒரு வண்புலித்தோலை உரிக்கலாம் என்று இவள் உன்னைக் கூப்பிடுகிறாள் என்று அச்சங்கொண்டு வராமல் இருக்கிறாயோ அம்புலியே!” என்கிறாள்.

    உடனே மற்ற பெண்கள் அவளைச் சூழ்ந்துகொண்டு, “அதுவென்ன ஐயன் புலித்தோல் உரித்த கதை! எமக்கு முழுமையாக இக்கதையினைக் கூறுவாய்” எனக் கேட்கலாயினர். அவளும் நயம்பட அதனைக் கூறுகிறாள்!

    10a157d8-614f-4855-aefc-201cbf1fa4be
    “புலிக்கால்முனிவரான வியாக்கிரபாதர், பதஞ்சலி எனும் முனிபுங்கவர் ஆகியோர் போலும் அருந்தவமுனிவர்கள் போற்றும் சிறந்த ஊர் திருப்புலிநகர் ஆகும். அவ்வூரின்கண் சிவ அபராதம் செய்தவர்களை வாளால் கண்டனம்செய்த கோட்புலிநாயனார் என்னும் பெருமைமிக்க ஒரு அடியார் இருந்தார். அவ்வூரில் வாழ்ந்த வள்ளல்தன்மை மிகுந்த மற்றொரு அடியார் சிறப்புலி நாயனார் ஆவார். இவர்களுக்குப் பேரருள் செய்தவன் நமது சிவபெருமான்.

    “ஒருநாள் நமது உமையம்மை ஐயனிடம் ஏதோ காரணத்தினால் ஊடல் கொண்டபோது எம்பிரான் என்னசெய்தார் தெரியுமா? அவளது ஊடலைத் தீர்க்கும்வகையில் அவளைத் தன்னுடன் சேர்த்து இறுகத்தழுவிக்கொண்டு அவளை நகைபுரியச் செய்யும்வண்ணம் வினோதமான பல செய்திகளையும், தான் செய்த நகைப்புக்குரிய செயல்களையும் கூறினார்: “யாம் ஒரு புலியின் தோலையுரித்து அதனை எம் இடையில் அணிந்துள்ளதைப்பாராய் தேவி! இது தாருகாவனத்து முனிவர்கள் மிகுந்த கருவம்கொண்டு அபிசார வேள்வி செய்து வரவழைத்து என்மீது ஏவிய கொடியபுலியின் தோல்,” என்று அந்தக் கதையினை நகைத்தவண்ணம் உமையாளுக்குக் கூறினான்.

    659a37b0-9193-42a1-9b3a-5f29d4870d4a
    “அதுகேட்ட நமது உமையவள், “நாமும் ஒரு புலித்தோலை உரித்து நமது நாதனுக்கு ஈடாக வெற்றிச்செயல் செய்யலாம்,” என அம்புலியை அழைக்கிறாள் என்று அச்சம்கொண்டு இந்த அம்புலி சிவபிரானின் தலையை இறுகப்பற்றிக்கொண்டு வராமல் இருக்கிறது போலும்,” எனக்கூறவும், மற்ற நங்கையர் அனைவரும் கரம்கொட்டிக் ‘கலகல’ என நகைத்திடவும், அந்த நிலாமுற்றமே அவர்கள் நகையொலியில் தானும் மிளிர்கின்றது.

    “ஏ அம்புலியே! கேட்டனையோ இந்தக்கதையை? காலம் தாழ்த்தாது வந்தாயானால், இந்தக் கவுரியின் அருளைப்பெற்று உய்யலாம் தெரியுமா?” என்கிறாள் ஒருத்தி!

    “ஒருவேளை அவளுடைய மாற்றாளாகிய கங்கையோடு நட்புபூண்டவன் இந்த அம்புலியாகிய திங்கள்புலி எனச்சினம் கொள்வாள் உமையம்மை எனும் அச்சமோ என்னவோ!” எனச் சிலபெண்கள் குறும்புபேசிக் களிக்கின்றனர்.

    “அதனாலென்ன? ‘இவன் அம்புலி! உன்னோடு விளையாட வந்தனன் தாயே! இவன்மீது சினம்கொள்ளாதே!’ எனக்கூறித் தப்பவைத்துவிடுவோம்! ‘பயப்படாதே நிலாவே! அண்ணாமலையானுக்கு இனியவளான இந்த உண்ணாமுலையுடன் விளையாட வந்துவிடு!” எனக்கூறி அம்புலியை அழைக்கிறாள் மற்றொருபெண்!

    (குந்தலவராளி)

    செம்புலி பதஞ்சலி யெனுந்தவர்கள் போற்றத்
    திருப்புலி நகர்க் கண்டனஞ்
    செய்தருளி வாட்புலி யெனும் பெரிய கோட்புலி
    சிறப்புலிக் கருளுநாதன்
    வெம்புலி யுரித்தன னெனப்புலவி தீரும்வண
    மெய்ப்புலி நகைத்துரைக்கின்
    வெற்றிகொள நாமுமொரு வண்புலி யுரித்துமென
    வேண்டிவரு கென்றெனளெனக்
    கம்புலி யிருத்தியோ தாழாது வருதியேற்
    கவுரியருள் பெற்றுய்யலாம்
    கங்கை யொடு பழகுதிங் கட்புலியே னாவெனைக்
    காயினென் செய்வதென்னி
    லம்புலி யெனச் சொலித் தப்புவிப் பேமுண்மை
    யம்புலீ யாடவாவே
    அண்ணா மலைக்கினிய யுண்ணா முலைக்கனியோ
    டம்புலீ யாடவாவே.

    (உபாயம்- தானம், பேதம் )
    (மெய்ப்புலி- உடலினைப்புல்லி, தழுவி; கம்புலி- சிவபிரான் தலையை இறுகப்பற்றி)
    (திருவருணை உண்ணாமுலையம்மை பிள்ளைத்தமிழ்- அம்புலிப்பருவம்)

    17-ம் நூற்றாண்டில் எழுதப்பட்ட இந்த அழகிய பிள்ளைத்தமிழ் நூலின் ஆசிரியர் சோணாசல பாரதியார் என்பவராவார். இவர் இன்னும் கார்த்திகைத்தீப வெண்பா, சோணாசலவெண்பா ஆகிய பலநூல்களையும் படைத்துள்ளார். இப்பிள்ளைத்தமிழ்ப்பாடல்கள் பலவிதமான அணிகளையும் கவிதைநயங்களையும் கொண்டு திகழ்கின்றன. இப்பாடலிலும் இப்பிள்ளைத்தமிழ் நூலில் காணும் இன்னும் பலபாடல்களிலும் ‘சொல்பின்வருநிலையணி’ மிக அழகாகக் கையாளப்பட்டுள்ளது. புலி எனும் சொல் பலபொருள்களைக்கொண்டு (புலி- வேங்கை; வாட்புலி, கோட்புலி, புல்லி, தழுவி, திங்கட்புலி, அம்புலி) அமைந்து இனிய சந்தநயத்துடன் பயில்வோருக்குக் கவிதையின்பம் தருகின்றன.

    ********

    அம்புலி வரவில்லை! சேடியரும் சளைக்காமல் பலகதைகளையும் கூறி அவனை வரக்கூவுகின்றனர்.

    செவிலித்தாய் கூறுகிறாள், “அம்புலியே! இந்த மான்போலும் பெண்ணரசியின் கருணையினால் பிரமனும் பாவமொழிந்து உய்ந்தான். உனது பாவத்தையும் இவள் போக்கியருளுவள்; இவளுடன் விளையாட விரைவில் வந்துவிடு.”

    “அந்தக் கதையைக் கூறக்கா,” என மற்ற பெண்கள் துளைத்தெடுக்க, அதனையும் நயம்பட விரித்துரைக்கிறாள் அவள்!

    “திருமகளும் திருமாலும் கூடி ஈன்றெடுத்த மகன் தாமரையிலமரும் பிரமன்; அவன் படைப்புக்கடவுள். அவன் திலோத்தமை எனும் அழகுமிகுந்த பெண்ணைப்படைத்து ஈன்றான். அவளுடைய பேரழகினைக்கண்டு தகப்பனான அவனுக்கே விலங்குபோல அவளிடம் இச்சைபிறந்தது. மானுருக்கொண்டு அவளைத் துரத்தினான்.”

    “ஐயோ! பின் என்னவாயிற்று?” கதை கேட்கும் ஆவலில் இப்பெண்கள் நிலவிடம் இடும் சண்டை சிறிதுநேரம் தடைபட்டு நிற்கிறது!

    “பின் என்ன? எங்கெல்லாமோ ஓடிய திலோத்தமை இம்மலையினை அடைந்து அருணைப்பெருமானைத் துணைசெய்யக் கூவியழைத்தாள். அப்போது அவருடன் இந்தப் பெண்மானான பெருமையுடைய உண்ணாமுலையம்மைதான் வந்தாள். திலோத்தமையை உய்வித்தாள்; அம்மையின் கருணையினால் பிரமனும் தான்பெற்ற பெண்ணை விழைந்த கொடும்பாவம் நீங்கப்பெற்றான். பிழையினை மன்னித்துக் கொடும்பாவத்தினையும் போக்குதல் இவள் இயல்பாகும். ஆகவேதான் அம்புலியினை இவள்பால் வந்து சரணடையக் கூப்பிடுகிறேன்,” என்கிறாள்.

    “அம்புலி செய்த பிழை யாதோ? பாவம் எதுவோ?” அறியாத இளம் சேடியர் செவிலியன்னையை வினவ, அவள் தொடர்ந்து கூறுகிறாள்.

    “இந்தச் சந்திரன் தனது குருவான பிருஹஸ்பதியின் பத்தினியையே விரும்பியவன்; அதுவே அவன் செய்த பெரும்பிழை! ஆயினும் நம் உண்ணாமுலையாளை அடைந்தால் அவனுக்கும் இவள் அருளமாட்டாளா என்ன?”

    “ஆம், அருளுவளே, இந்தச் சந்திரனின் குலத்தில் தோன்றிய ஒரு பாண்டியமன்னன்- வச்சிராங்கத பாண்டியன் என்பவன்- ஒரு குதிரைமீதேறி இவ்வருணாசலமலையின்மீது வேட்டைக்கு வந்தாராம்; பலவிலங்குகளைக் கொன்றுபின் ஒரு புனுகுப்பூனையைத் துரத்தினாராம். புனுகுப்பூனையும் அதனைத் துரத்தியவண்ணம் குதிரைமீது மன்னனுமாக மலையை வலம் வந்தனராம். பயத்தில் பூனை தனது உடலைவிட்டுத் தேவ உருவம் பெற்றதாம். குதிரையும் களைத்துவிழுந்து தேவ உருவம் பெற்றதாம். இருவரும் தேவர்கள் தொழ அங்குவந்த இந்திரவிமானத்திலேறினராம். ‘ஒரு சாபத்தால் இவ்வாறு விலங்குகளாக இருந்தோம். இவ்வருணையைக் கால்களால் வலம்வந்த புண்ணியத்தால் மீளவும் தேவரானோம் என பாண்டிய மன்னனிடம் ‘கால்களால் கிரிவலம் வருதலின் உயர்வை’க் கூறி உணர்த்தினர் என என் பாட்டியார் கூறுவார்களக்கா! ” என்றாள் ஒருபெண்.

    “நிச்சயமாக! தேவர்களும் இத்தலத்தின் பெருமையை நினைந்து வணங்குகின்றனர். இவனுக்குத்தான் என்ன மதியீனம்?” என இகழ்கிறாள் தாய். “உவமானம் அற்ற எங்கள் அருமை மான்விழிக்குமரியான இந்த உண்ணாமுலை, நீ அவளடிகளை அடைந்தால் உனக்குப் பெரிதும் மகிழ்ச்சி தருவாள்; ஆகவே, விளையாட வந்துவிடுவாய் அம்புலியே,” என வேண்டுகிறாள்.

    இப்பாடலில் மான்’ எனும் சொல் விளையாட்டினைக் கண்டு ரசிக்கலாம்!

    “திருமகளெனும் மான் (திரு+மான்) கருமைநிறமுள்ள திருமாலுடன் (கரு+மான்) கூடி ஈன்றெடுத்த மகன் தான் பிரமன். அவன் தான் பெற்ற திலோத்தமை எனும் பெண்மானை, மானுருக்கொண்டு சேர ஆசைகொண்டான். ஓடோடிவந்து திருவருணையை அடைந்த அவள் ‘அருணைப்பெருமானே,’ என முறையிட, உடன் வந்தவள் இந்த மான் (உண்ணாமுலை); திலோத்தமையும் உய்ந்தாள். பிரமன் செய்த கொடும்பாவத்தினையும் அம்மை நீக்கினாள். குருவிற்கிழைத்த பாவத்தை நீ தொலைக்கவும் இவளே அருளுவாள்.

    “ஒரு குதிரையிலேறி (ஒருமான் இவர்ந்து) உனது குலத்தோன்றலான (மருமான்) பாண்டியன் இழைத்த பாவத்தினை (காலாலன்றிக் குதிரைமேல் கிரிவலம் வந்தது) போக்கி, பூனை, குதிரை ஆகியன தேவ உருபெற்று இந்திரவிமானத்திலேறிச் சென்ற மகிமை வாய்ந்த மலையிலுறையும் மான்விழியாளான இந்த உண்ணாமுலை எனும் பெண்மான் உனக்குத்தரும் மகிழ்ச்சி (தருமான்) பெரிதாகையால் அவளோடு விளையாடவா!” என அழைக்கின்றனர்.

    அம்புலி வந்தானோ என்னவோ? நமக்கு படித்து இன்புற அருமையான வித்தாரகவிதையாகக்கிடைத்த இப்பாடல்கள் உள்ளனவே!

    (சுருட்டி)

    திருமான் மகிழ்ந்துபுணர் கருமா னயந்துபெறு
    செய்யமா நளினனீன்ற
    திலோத்தமைப் பெண்மானை யிச்சையான் மானுருச்
    சேருபுது ரத்தவருணைப்
    பெருமா னெனாவந்த வந்தமானிந்தமான்
    பெம்மா னளிக்கவுய்ந்தாள்
    பிரமனும் பவநீங்கி யெத்தினன் குரவற்
    பிழைத்தபவ நீயுமகல்வா
    யொருமா னிவர்ந்துனது மருமா னிழைத்தபவ
    மோவியிந் திரவிமான
    மூர்த்தும்ப ருற்றவித் தலமகிமை யோர்ந்தடையி
    னுவமான மற்றவெங்க
    ளருமான் விழிக்குமரி தருமான் மகிழ்ச்சிபெரி
    தம்புலீ யாடவாவே
    அண்ணா மலைக்கினிய வுண்ணா முலைக்கனியொ
    டம்புலீ யாடவாவே.

    (உபாயம்- தானம்)
    (திருவருணை உண்ணாமுலையம்மை பிள்ளைத்தமிழ்- அம்புலிப்பருவம்)

    (இப்பாடலில் பொதிந்துள்ள சில அழகிய தொன்மங்களை அருணைப்புராணத்திலிருந்து விளக்கியளித்த முனைவர் ஐயா திரு. கோ. ந. முத்துக்குமாரசுவாமி அவர்களுக்கு என் மனமார்ந்த நன்றியினை உரித்தாக்குகிறேன்)

    மீனாட்சி க. (மீனாட்சி பாலகணேஷ்)
    {முனைவர் பட்ட ஆய்வாளர், தமிழ்த்துறை,
    கற்பகம் பல்கலைக் கழகம், கோவை,
    நெறியாளர்: முனைவர் ப. தமிழரசி,
    தமிழ்த்துறைத் தலைவர்.}

    ********************************

    Share

  • ஓவியக்கவி கலில் கிப்ரான் கவிதைகள் – 48

    –சி. ஜெயபாரதன்.

     

    கலில் கிப்ரான்

    (1883-1931)

    ஓவியக்கவி கலில் கிப்ரான் கவிதைகள்

    மூலம் : கலில் கிப்ரான்

    தமிழாக்கம் : சி. ஜெயபாரதன், கனடா

    மேடைப் பேச்சில் முழக்கிப் பேரரங்கை நிறுவிச் சமூகத்தை ஒன்று கூட்ட அறிவு ஜீவிகளாய்ப் பாவனை செய்யும் சிரியன் தேசத்துச் சீர்திருத்தவாதிகளுடன் சிறிது பேசிப் பாருங்கள் ! அவரிடம் பேசும் போது மாவரைக்கும் யந்திரத்தை விடக் கோரமாகவும் கோடைக் கால இரவில் கத்தும் தவளைகளை விட மேலானக் கீத அரவத்தைக் கேட்பீர் !
    கலில் கிப்ரான். (Decayed Teeth)
    ___________________

    பூமியின் சீற்றம் !
    ___________________

    நான் கண்டேன் இந்தப்
    பராக்கிரம மனிதர்
    கட்டி எழுப்புவதை !
    தகர்க்க முடி யாத
    கற் கோட்டைகள் !
    நான் கண்டேன்
    செம்மைக் கலை ஞர்கள்
    தம் சுவர்கள் மீது
    ஏராள மான ஓவியத்தைத்
    தோரண மாய்
    வரைந் திருப்பதை !
    ___________________

    நான் கண்டேன் இந்தப்
    பூமியை !
    அகண்டத் தனது
    தள வாயைத் திறந்து
    அப்படியே விழுங்கும் சுளுவாய்
    அத்தனைக்
    கைத்திறன் வித்தகரை !
    சிந்தனைச் சிற்பிகள்
    விந்தையாய்ச்
    செதுக்கி வைத்ததை !
    ___________________

    நான் அறிவேன் இந்த
    நளின மணப்பெண்
    பூமியை !
    எழிலைப் பெருக்கு வதற்கு
    இந்த மனிதன்
    செயற்கை யில் சூட்டும்
    எந்த ஓர் ஆபரணமும்
    இனித் தேவை இல்லை
    இந்த பூமிக்கு !
    ___________________

    Share

  • பொங்கல் வாழ்த்துகள்!

    கிரேசி மோகன்

    images

    ”புதியன ஏற்று பழையன போற்றி
    கதிரை குணதிசை காண்போம் -மதிநிறை
    திங்கட் தவம்முடிந்து தைப்பலன் தந்தது
    பொங்கலோ பொங்கலெனப் பாடு’’….

    ”எத்தைநாம் செய்தாலும் பித்தம் தெளியாது
    இத்தரை வாழ்வின் இயல்பது -இத்தையில்
    அத்தைதன் மீசைக்கும் ஆச்சரியம் கொள்ளாதே
    சித்தத்தின் பொங்கல் சழுக்கு’’(குற்றம்)….

    ”கங்குலைப் போக்கும் கதிரவா தைத்திங்கள்
    பொங்கலை வைத்துப் பணிகின்றோம் -எங்களுள்
    பொங்கிடும் காமத்துப் பாலைத் தணித்திடு
    சங்கராந்தி சூர்யா சரண்’’….கிரேசி மோகன்….

    Share

  • ”ஆண்டாள் திருக்கல்யாணம்’’….

    ’’ஆண்டாள் -30’’….
    ————————————-

    ‘’வங்கம் கடைந்தானை வாழ்த்தித் திருப்பாவை
    அங்கம் சிலிர்க்க அளித்தவள், -சங்கரன்(அட சங்கராந்தி வந்துடுத்தே)
    மைத்துனன் நம்பிக்கு மாலை அணிவித்துக்
    கைத்தலம் பற்றினாள்கோ ‘’தை’’(அட தையும் பிறந்து விட்டதே)….கிரேசி மோகன்….

    Share

  • வல்லமையின் போகித் திருநாள் வாழ்த்துகள்!

    பவள சங்கரி

    போகி

     

    தமிழர் தம் திருநாளாம்
    தரணி போற்றும் பெருநாளாம்
    தீயன தீயில் தீயும்நாளாம்
    வாழ்வன வரமாகும் போகித்திருநாளாம்
    நல்லன நலமே விளைநாளாம்
    நலிவிலா பலமே வாழ்நாளாம்
    குணமிலா குறுநகை பாழ்நாளாம்
    சருகான சாகசமும் வீழ்நாளாம்
    வரும்நாளெலாம் பாகும் பருப்பும்
    பெருகும் பொங்கல் திருநாளாம்!!

    Share

  • கேசவ் வண்ணம் – கிரேசி எண்ணம்

    ஆண்டாள் -29 ….
    ————————————

    caf5cd3d-704f-498d-b913-cd02c63d9147

    குற்றம் புரிந்தோமே, பெற்றோர்கள், கோவிந்தன்,
    பொற்றா மரைத்தாயார், பக்கமிருந்தும், – மற்றைநம்
    காமங் களாலானோம், காட்டு மிராண்டியாய்,
    ஷேமத் திருப்பாவை செப்பு ….கிரேசி மோகன்….

    Share

  • மார்கழி மணாளன் 29 – ஸ்ரீ வைகுண்டம் – கள்ளபிரான்  

     க. பாலசுப்பிரமணியன்

    631591bb-352f-47f8-b69b-757f4f92dc99

    வேதங்களைக் காத்திடவே வேண்டி நின்றான் நான்முகனும்

    வைகுண்டம் விட்டுவந்த மாதவனும் மனமிரங்கிக் காத்தான்

    வானில் மட்டுமின்றி  மண்ணிலோர் வைகுண்டம் படைத்தான்

    வந்தவர்கள் நலம் காத்து வாழ்க்கைக்குப் பொருள் கொடுத்தான் !

     

    கல்லுக்கும்  பால் பொழிந்து கருணைகண்ட பசுவிடம்

    குறை கண்ட மன்னவனும் பசுவைப் பழித்தே தொடர

    குறைவில்லா கோபாலனை மண்ணுக்குள் கண்டான்

    குலம் வாழ நல்லதோர் கோவில் கட்டி மகிழ்ந்தான் !

     

    கள்ளனும்  கொண்டான் கண்ணனிடம் காதல் நெஞ்சம்

    காத்திட வேண்டியே  நின்றான் கோகுலன் முன்னம்

    கண்ணனே கள்வனாய்ச் சென்றான் காவலில் தஞ்சம்

    கருணையின் வடிவே என்றும்  கள்ளபிரான் மஞ்சம் !

     

    கொஞ்சுபவர்க்குக் குழந்தையாய் வரும் கண்ணன்

    கோலாகல வாழ்க்கைக்கு  குழலூதும் அன்பன்

    கோடித்துயர் வந்தாலும் கூட நிற்கும் நண்பன்

    கோசங்கள் அழிந்ததுமே அணைக்கும் வைகுந்தன் !

     

    வேண்டியவர்க்கு வேண்டியதைத் தந்துவிடும் வைகுண்டம்

    வேண்டாதவர்க்கும் உடல் வினை முடிய வீடு தரும் !

    வீதியில் வாழ்ந்தாலும் வீடு பணம் சேர்த்து உயர்ந்தாலும்

    விதி முடிவில் விரும்பிச் செல்லும் வாசல் வைகுண்டம் !

     

    மனம்விரும்பி மாதவனைத் தேடும் நேரம்

    மாதங்கள் பன்னிரண்டில் மார்கழியைச் சேரும் !

    மங்கலங்கள் பொங்கிவர வழிவிடும் மார்கழி

    மாதவன்  அருளோடு வருவாய் மீண்டும் வீடுதேடி !

    Share

  • பொங்கல் பண்டிகை! 

    -ரா.பார்த்தசாரதி 

    உத்தராயணம்  உதித்துவரும் காலம்
    உதய சூரியனை வழிபடும்  காலம்
    உழவர்கள் விளைச்சலைக் கொண்டாடும் காலம்
    தை மாதத்தில் காணும் பொங்கல் விழாக்காலம்! pongal

    உழவர்கள்  உவகையுடன் கொண்டாடும் பண்டிகை
    விவசாயமும், உழவர்களும் பாதிப்பு அடைந்தது வெள்ளத்தாலே,
    திறமும், உறுதியும் கொண்டு வெற்றி காண்போம் உழைப்பாலே,
    இயற்கை உரமும், புதுமை புகுத்தி வெற்றி காண்போம் விவசாயத்திலே!

    உழவன் சேற்றினிலே இறங்கினால்தான் நமக்குச் சோறு!
    நகர்வாழ் மக்கள் அறியாமல் உலாவருவதைப் பாரு!
    விவசாயம் நமது நாட்டின் முதுகெலும்பு  என நினைத்திடுவோமே,
    விவசாயி  நலனில் அக்கறை கொண்டு  உதவி செய்திடுவோமே!

    கரும்பின் கணுவில் கரும்பு  துளிர்த்து  வளர்ந்திடுமே!
    உழவன் உழைப்பாலே விவசாயம் வளர்ச்சி அடைந்திடுமே!
    விவசாயிக்கு முக்கியப் பண்டிகை பொங்கல் திருவிழா!
    சூரிய பகவனை நினைந்து கொண்டாடும் திருவிழா!

    பழையன கழிதலும், புதியன புகுதலுமே போகிப்பண்டிகை
    பிடி வைக்கும் பெண்கள் கொண்டாடும் கனுப் பொங்கல்
    கால்நடைகளுக்காகக்  கொண்டாடும்   மாட்டுப் பொங்கல்
    உறவும், நட்பும் பரிமாற்றம் கொள்ளக்  காணும் பொங்கல்!

    எத்துயர் வரினும் துவளுதல் கூடாது!
    உழவன் மனம் என்றும் தளர்ச்சியுறக்கூடாது!
    கரும்பும், பொங்கலும் இறைவனுக்குப் படைப்போமே!
    குடும்பத்துடன் ’பொங்கலோ பொங்கல்’ எனக் கொண்டாடுவோமே!

     

     

    Share

  • நம்வாழ்வு விடிந்திடட்டும்!

      -எம். ஜெயராமசர்மா – மெல்பேண், அவுஸ்திரேலியா 

    வெள்ளம்  வடிந்தோட வேதனையும் விரைந்தோட
    உள்ளமெலாம் உற்சாகம் ஊற்றெடுத்து நின்றிடட்டும்
    நல்லவைகள் நம்வாழ்வில் நாளும்வர வேண்டுமென்று
    நாம்பொங்கி மகிழ்ந்திடுவோம் நம்வாழ்வு விடிந்திடட்டும்!pongal - jayaramasarma

    இயற்கை தந்தவிடர்கண்டு ஏக்கமுற்று விழுந்திடாமல்
    முயற்சியுடன் உதவிநின்றார் முழுமனதை வாழ்த்திநின்று
    அயற்சிதனை விட்டெறிந்து அனைவருமே அணைந்துநின்று
    உயர்ச்சிதர வேண்டுமென்று உளமாரப் பொங்கிநிற்போம்!

    நீர்பெருகி நின்றதனால் நீரருந்த முடியாமல்
    ஊர்மக்கள் யாவருமே உயிர்துடித்து நின்றார்கள்
    நீர்வற்றிப் போனாலும் நிம்மதியைத் தேடுமவர்
    சீர்பெற்று வாழ்வதற்கு இப்பொங்கல் உதவிடட்டும்!

    மார்கழி மாதமது மனங்குளிர வைத்தாலும்
    மாமழையும் பேரழிவும் மனம்வருந்தச் செய்ததுவே
    கோபமொடு கொடுமழையும் குளிர்காற்றும் சேர்ந்ததனால்
    மார்கழியை நினைப்பதற்கே மக்களெலாம் நடுங்குகின்றார்!

    நடுக்கமுறும் மனம்திரும்ப நம்வாசல் பொங்கல்வரும்
    இறுக்கமெலாம் இறங்கிவிட இன்பமாய்ப் பொங்கிடுவோம்
    பொறுப்புடனே பொங்கல்செய்தால் பூரிப்புவரு மென்றெண்ணி
    புத்தரிசி தனைப்பெற்றுப் பொங்கல்பொங்கி மகிழ்ந்திடுவோம்!

    சஞ்சலத்தில் உழன்றாரைச் சாதிமதம் பாராது
    நெஞ்சார உதவிநின்ற நீள்கரங்கள் உடையாரைக்
    கொஞ்சி யவர்கைபற்றிக் கூடவே வைத்தபடி
    அஞ்சாமல் பொங்கல்செய்து அவர்கையிற் கொடுத்திடுவோம்!

    பட்டாசு மத்தாப்பு புத்தாடை அத்தனையும்
    இட்டமுடன் இருந்துவிடின் இனித்துவிடாப் பொங்கலென்பர்
    துட்டகுணம் அட்டகாசம் துயர்ப்படுத்தும் அத்தனையும்
    பட்டென்று அகலுதலே பாங்கான பொங்கலாகும்!

    மக்களது மனங்களிலே மாற்றம்பல வருவதற்கும்
    மக்களெலாம் தோழமையில் மகிழ்ந்தென்றும் இருப்பதற்கும்
    தைத்திங்கள் வருகின்ற தைப்பொங்கல் அமைகவென
    முத்திக்கு வித்தான முழுமுதலை வேண்டிநிற்போம்!

    கோவில்சென்று கும்பிடுவோம் குறைசொல்லல் தவிர்த்திடுவோம்
    பாவநிறை செயலையெல்லாம் பள்ளமதில் புதைத்திடுவோம்
    தூய்மைநிறை பெரியோரைத் தொட்டுநின்று வணங்கிடுவோம்
    வாய்மைகொண்ட மனத்தோடு வாழவெண்ணிப்  பொங்கிடுவோம்!

     

     

    Share

  • கேசவ் வண்ணம் – கிரேசி எண்ணம்

    ஆண்டாள் -28 ….
    ——————————–

    2624baed-739c-469b-bae1-0244152da1d9

    பறவைகளும் தூங்கும் பனிமார் கழியில்,
    கறவைகள் பின்சென்று கானச் , -சிறையில்,
    பிறவைகள்(otherthings) விட்டொழித்து, புல்லாங் குழலின்
    சரணத்தில் பல்லவியாய் சேர் ….கிரேசி மோகன்….

    Share

  • இணையத்தில் தொற்றுநோய் – 2

    — தேமொழி.

    Echo Chamber Online

    உண்மைக்குப் புறம்பான தகவல்கள் ஏன் இணையத்தின் சமூகவலைத்தளங்கள் மூலம் வெகு வேகமாகப் பரவுகிறது? சுலபமாக ஒரு இணையத் தேடல் செய்து உண்மையைக் கண்டுபிடிக்கும் வழியிருக்கும் பொழுதும், மக்கள் எதனால் அதைச் செய்யாமல் பொய்யான வதந்திகளை நம்புகிறார்கள்? எதனால் அவற்றைத் தம்முள் பகிர்ந்து மேலும் மேலும் பரப்புகிறார்கள்? ஏன் பிழைகளைச் சரி செய்ய முயலுவதில்லை? ஏன்? ஏன்? ஏன்? என்று நம்மைக் குழப்பும் இந்த ஏன் கேள்விகளுக்கு உளவியல் அடிப்படையில் விளக்கம் கொடுக்க முற்படுகிறது சமீபத்தில் (ஜனவரி 4, 2016) வெளியான ஆய்வறிக்கை ஒன்று.

    ஃபேஸ்புக் பயனர்களிடம் நடத்திய இந்த ஆய்வு கூறும் முடிவு; மக்கள் தாங்கள் கொண்டுள்ள நம்பிக்கையின் சார்பு நிலை காரணமாக, தங்கள் நம்பிக்கைகளை உறுதி செய்யும் தகவல் கிடைத்தால், உடனே தங்களுக்கு கிடைக்கும் அந்தச் செய்தியையே நம்ப விரும்புகிறார்கள். அதனைப் பற்றி மேலும் ஆராய்ந்து அது உண்மைதானா எனத் தெரிந்து கொள்ளும் எண்ணம் அவர்களுக்குத் தோன்றுவதில்லை. மேலும் அதற்கு மாறான தகவல் கிடைத்தாலும் அதைப் பொருட்படுத்தாமல் புறக்கணித்துவிடுவார்கள் என்கிறது. இவ்வாறு தனது நம்பிக்கையை உறுதிப்படுத்துவதில் கொண்டிருக்கும் சார்புநிலையானது ஆங்கிலத்தில் confirmation bias எனக் குறிப்பிடப்படுகிறது.

    மக்களிடையே காணப்படும் தனது நம்பிக்கையினைப் பரப்பும் இந்த மனநிலையின் காரணமாக இணையத்தில் தங்கள் எண்ணங்களை எதிரொலிக்கும் குழுக்கள் உருவாகிறது. இக்குழுக்கள் echo chambers என ஆங்கிலத்தில் குறிப்பிடப்படுகிறது. இவ்வாறு குழுக்களாகப் பிரியும் மனப்பான்மை எந்தச் சமூக வலைத்தளமாக இருந்தாலும், டிவிட்டர், கூகிள் குழுமம், யாஹூ குழுமம் என எந்தச் சமூக வலைத்தளத்திலும் “அவர்கள், நாங்கள்” என்ற குழுக்களாக மக்களை அணிபிரியச் செய்யும். இந்த எதிரொலிக்கும் குழுக்கள் உருவாவது குறிப்பிட்ட கருத்துகளுக்குத்தான் என்ற வரையறையும் கிடையாது. தாங்கள் நம்பும் நம்பிக்கைக்கு மாறான கருத்து தோன்றினால், அதனைச் சகிக்க இயலாது மக்கள் குழுக்களாகப் பிரிவர். நம் இந்தியாவைப் பொறுத்தவரை கட்சிகள், மதங்கள், சாதிகள், தனிநாடு கோரிக்கை, கடவுள் நம்பிக்கை, ஆட்சி மொழிகள் என விவாதக் கருத்துகளுக்கும் பஞ்சமில்லை.

    ‘மிசெல்லா டெல் விகாரியோ’ என்ற இத்தாலிய கணினி சமூக அறிவியலாளர் (Michela Del Vicario of Italy’s Laboratory of Computational Social Science) ஃபேஸ்புக் பயனர்களிடம் 2010 முதல் 2014 வரை நடத்திய ஒரு ஆய்வின் நோக்கம், மக்கள் தாங்கள் விரும்பாத கருத்தை எதிர்கொள்ள முன் வருகிறார்களா? அல்லது தங்களுக்குள் குழுவாகப் பிரிந்து கொள்கிறார்களா? என்று அறிவதாகும்.

    ஐந்தாண்டுகளாகத் தரவுகளை சேகரிக்க 32 பொதுவான வலைத்தளங்கள், 35 அறிவியல் செய்திகள் தரும் வலைத்தளங்கள், ஆய்விற்காக வேண்டுமென்றே பொய்யான தகவலைப் பரப்ப உருவாக்கப்பட்ட 2 சோதனை போலி வலைத்தளங்கள் என மொத்தம் 69 வலைத்தளங்கள் இந்த ஆய்வில் பயன்படுத்தப்பட்டன. பொதுவாக இருவகைக் குழுக்கள் இருப்பது தெரிய வந்தது. ஒரு பிரிவினர் conspiracy theories என்று கூறப்படும் ‘சதிச்செயல் கோட்பாடு’களை நம்புபவர்கள். இவர்கள் ஒசாமா மீது தாக்குதல் நடத்தி கொன்றதாகக் கூறுவது பொய், வேற்றுக்கிரக மனிதர்கள் இருப்பதை அரசாங்கங்கள் மறைக்கின்றன, செப்டெம்பர் 11 நிகழ்வு அமெரிக்க இராணுவமே நடத்திய தாக்குதல் போன்ற சதிச்செயல் கோட்பாடுகளை நம்பும் வகையினரைப் போன்றவர்கள். மற்ற பிரிவு ஆராய்ந்து, அறிவியல் சான்றுகளை எடுத்துக் கூறி, உண்மை என்னவென்று விளக்க முற்படுபவர்கள் (Debunking campaigns). இந்த இருவகையினரும் ஒத்த கருத்துடையவர்களுடன் இணைந்து பற்பல குழுக்களாக இணையத்தில் இருக்கிறார்கள். இவர்கள் தகவல்களை பரப்புவதிலும் வேறுபாடுகள் இல்லை.

    பொதுவாக, இந்த ஆய்வில், பயனர்கள் தாங்கள் ஒப்புக்கொள்ளும் செய்திகளை பரப்புவதும், தங்களால் ஒப்புக் கொள்ள முடியாத செய்திகளைப் புறக்கணிப்பதும் தெரிந்தது. தான் கொண்டிருக்கும் நம்பிக்கையை உறுதி செய்யும் செய்திகளை விரும்பி அதனை மட்டும் பரப்புவதில் முனைகிறார்கள். ஃபேஸ்புக் பயனர்களில் எதிரெதிர் சிந்தனை கொண்டவர்கள், தங்களுக்குள் ஒத்த கருத்துடைய குழுக்களாக (homogeneous, polarized cluster) அமைந்துள்ளதால் தங்களுக்குள் தங்களுக்குப் பிடித்த செய்திகளை விரைவில் பரப்ப முடிகிறது. ஆதாரமற்று இருந்தாலும் வதந்திகள் ஒரு சில மணி நேரங்களுக்குள் இவர்கள் மூலம் அதிவிரைவில் பரவுகின்றன.

    குழுக்களின் மனநிலை, ஒருவர் குழுவாக இயங்கத் தொடங்கும் பொழுது தனது நம்பிக்கையில் மிகவும் தீவிரமடைவார். அந்த நம்பிக்கையை வளர்க்கத் தன்னை அர்ப்பணிக்கும் மனப்பான்மையும் அவரிடம் உருவாகும். குழுவில் பிறரும் தனது நம்பிக்கையைப் போலவே நம்பிக்கை கொண்டவர்கள், தனது நம்பிக்கையை ஒப்புக் கொள்கிறார்கள் என்றவுடன் அவருக்குத் தான் கொண்ட கருத்தின் மீது அதிக நம்பிக்கை உருவாகும், அதில் தீவிரமடைவார்கள். இது குழுவாக இயங்கத் தொடங்கும் பொழுது ஒருவர் கொள்ளும் மனநிலை.

    நாட்டின் பொருளாதாரக் கொள்கை, அல்லது சுற்றுச்சூழல் பாதுகாப்பு போன்றவற்றில் தான் கொண்டிருக்கும் தனது கருத்து நையாண்டிக்குள்ளாகுமோ என முதலில் அமைதி காக்கும் ஒருவர், தன்னையொத்த கருத்துடையவர் தனது நம்பிக்கையை உறுதி செய்யும் வகையில் பேசியவுடன் தனது கருத்து வலிமையடைந்ததாகத் தன்னம்பிக்கை கொண்டு விவாதக் களத்தில் குதித்துவிடுவார். மற்றவரும் அவரை ஆதரித்தால் அவருக்குத் தான் கொண்ட நம்பிக்கையில் சார்புநிலை அதிகமாகும்.

    இந்தக் குழு மனநிலை அடிப்படையில்தான், சமூகத்தளங்களில் தாம் விரும்பும் கருத்துகளை இக்குழுக்கள் விரைவாக தங்களுக்குள் பரவவிடுகின்றன. தங்கள் நம்பிக்கைக்கு மாறாக உண்மை வெளிப்பட்டாலும் அதைப் புறக்கணித்து தங்கள் நம்பிக்கைக்கு வலு சேர்க்க முயல்கிறார்கள். இவ்வாறாக உண்மையைப் புறக்கணிக்கும், அதை எதிர்கொள்ளாது தவிர்க்கும்  மனநிலையே  வதந்திகள் பரவுவதன்  அடிப்படை.

    தளங்களில் கிடைக்கும் செய்திகளின் நம்பகத்தன்மையின் அடிப்படையில் செய்திகளை வகைப்படுத்தி உண்மையும், நம்பகத்தன்மையும் கொண்ட செய்திகளை முன்னிறுத்தச் சமூக வலைத்தளங்களும் தங்களால் இயன்ற வகையில் முயன்றுவருகின்றன. பொய்யான தகவல் என்றால் அதைத் தளங்களின் கவனத்திற்குக் கொண்டு வருவது வதந்திகளைக் குறைக்கும் என்பது ஒரு அவர்களின் எதிர்பார்ப்பு.

    ___________________________________________
    கட்டுரைக்கு உதவிய ஆய்வறிக்கைகள்:
    The spreading of misinformation online
    PNAS 2016 : 1517441113v1-201517441.
    Del Vicario et al., PNAS January 4, 2016
    http://www.pnas.org/content/early/2016/01/02/1517441113

    Debunking in a World of Tribes
    arXiv:1510.04267v1 [cs.CY]
    Fabiana Zollo et al.,Submitted on 14 Oct 2015
    http://arxiv.org/pdf/1510.04267v1.pdf

    படம் உதவி: விக்கிபீடியா

    Share

  • மார்கழி மணாளன் – 28 திருப்புல்லாணி ஆதி ஜெகந்நாதப் பெருமாள்

    க. பாலசுப்பிரமணியன்

     8a79f235-b849-4a74-9630-8b24b0d4ae02

    புல்லருடன் கன்வரும் வளர்த்திட்டார் வேள்வித்தீ

    புவியினிலே என்றும் பரந்தாமன் அருள் வேண்டி !

    அரசமரமாய் உருவெடுத்து அவன் அருள்தந்தான்

    அன்புடனே உருமாறி ஆனான் ஆதி ஜெகந்நாதன் !

     

    ஊழ்வினையில் உருண்டுவந்த பாவம் நீக்கி

    ஊர்போற்றும் வம்சத்தை வளர்த்திட வேண்டி

    தலைநாகர் சிலையொன்று முன் நிறுத்தி

    தவமிருக்க தயரதனும் வந்தான் திருப்புல்லாணி !

     

    ஊர்போற்றும் பிள்ளைகள் பெற்றான் தயரதனும்

    வான்போற்றும் வண்ணம் அருளியதே புல்லாணி !

    நாள்தோறும் தேடிவரும் நன் மக்கள் குறைதீர்க்கும்

    அற்புதமே ! ஆழ்வார்கள் போற்றிய திருத்தலமே !

     

    சூதுகொண்டு பண்பிழந்த சூர்ப்பனகையின் தமையன்

    சாதுவாக உருக்கொண்டு சத்தியத்தின் வேரழித்தான் !

    குலமகளைக் கடத்திச் சென்று கொக்கரித்த இராவணனின்

    குலமழிக்கக் கடலோரம் புடைசூழ வந்தான் காகுந்தனும் !

     

    தவத்தோர் விழைகின்ற தயரதனின் மைந்தனும்

    தர்பையிலே உடல் கிடத்தித் தவமிருந்தான் !

    குரங்கோடு அணிலும் கூடியொரு பாலமமைக்க

    குவலயமே வியந்திட்ட கோவில் புல்லாணி !

     

    ஆணவம் அழித்தே வருணனை வென்றான்

    அரங்கனின் அருளுடன் வில்லும் பெற்றான்

    அரக்கனின்  தம்பிக்கு அடைக்கலம் தந்தான்

    அன்புடை நெஞ்சுக்கு அருள்தரும் புல்லாணி !

     

    கண்மூடும் சொல்லிரண்டில் உனைச் சேர்க்க,

    கண்ணிரண்டில் நீ நிற்கச்  சொல் உறங்கும் !

    காட்சிக்கும் சொல்லுக்கும் ஏன் கண்ணாமூச்சி?

    காதலுற்றேன் ! கருணை செய்வாய்!  கற்பகமே!

     

    மண்ணுலகில் உன்னழகு மனம் கவரும்

    விண்ணுலகில் உன்னழகு என்ன சொல்லும் ?

    மண்ணுலகும் விண்ணுலகும் மயங்கிவிடும்

    மாதவனே! மலைத்தேனே ! மனம் நிறைவாய் !

     

     

     

    Share

  • பயன்மிகு இணையவழிச் சேவைகள் – குழந்தைகளுக்கான இணைய தளங்கள்

    – எஸ். நித்யலக்ஷ்மி

    குழந்தைகளுக்கான இணைய தளங்கள்

    INTERNET SITES FOR KIDS

    1. கல்வி விளையாட்டுக்கள், வேடிக்கையான கேம்ஸ், ஆசிரியர்களுக்கும் பெற்றோர்களுக்குமான தகவல்கள், கலை அம்சம் நிறைந்த பலவற்றிற்கு 20 ஆயிரத்திற்கு மேலான இணைய தொடர்புகள், வண்ணம் தீட்டி பழக தளங்கள், கணக்கு பழக பயிற்சிகள் மற்றும் டவுன்லோட் செய்து வைத்து விளையாட கேம்ஸ் என அனைத்து வகைகளிலும் குழந்தைகளுக்கான இணையக் களஞ்சியமாக இயங்குகிறது www.links4kids.co.uk என்ற முகவரியில் உள்ள தளம்.

    2. நூற்றுக் கணக்கில் இன்டர்நெட் இணைப்பில் விளையாட கேம்ஸ், கார்ட்டூன், மூவி கிளிப்கள், மியூசிக் வீடியோ, புதிர்கள், கற்பனைத் திறனை ஊக்கப்படுத்தும் செயல்பாடுகள், பக்கங்களுக்குக் கலர் தீட்டுதல், பாதுகாப்பான வழிகளில் இணையத் தேடல் என வேடிக்கை விளையாட்டுக்களையும் கல்வி கற்றலையும் இணைத்துத் தருகிறது www.alfy.com என்ற முகவரியில் உள்ள இணைய தளம்.

    3. www.surfnetkids.com என்ற தளத்தில் பலவாறான வித்தியாசமான கேம்ஸ், வேடிக்கை விளையாட்டுக்கள், குழந்தைகளுக்கான தகவல்கள், ஆசிரியர்கள் மற்றும் பெற்றோர்கள் குழந்தைகளுக்குக் கற்றுத் தர விரும்பும் விஷயங்கள், நினைவாற்றலை வளர்க்கும் விளையாட்டுக்கள் எனப் பல வகைகளில் குழந்தைகளுக்கான அனைத்து விஷயங்களும் வித்தியாசமான முறையில் தரப்பட்டுள்ளன.

    4. குழந்தைகளுக்கான இணைய தளங்கள் அனைத்தையும் நீங்கள் பார்க்க விரும்புகிறீர்களா? அனைத்தையும் தராவிட்டாலும் பெரும்பான்மையான தளங்களைப் பட்டியலிடுகிறது www.kidsites.org என்ற முகவரியில் உள்ள தளம்.

    5. குழந்தைகளுக்கு கணக்குகளைத் தந்து அவர்களின் சிந்திக்கும் திறனை வளர்க்கும் தளமாக விளங்குகிறது www.coolmath4kids.com உலக அளவில் இது சிறந்த தளம் என்ற பாராட்டினைப் பல அமைப்புகளில் இருந்து பெற்றது. குழந்தைகளுக்கு கூட்டல், கழித்தலில் தொடங்கி அல்ஜிப்ரா, பின்னங்கள், டெசிமல் கணக்குகள் எனக் கணக்கின் அடிப்படையையும் அதன் தொடர்பான பிறவற்றையும் கற்றுத்தரும் பல தளங்கள் இணையத்தில் உள்ளன. இவை அனைத்தும் கணக்கியலை விளையாட்டுக்கள் மூலமும் புதிர்கள் மூலமும் கற்றுத் தருகின்றன. அவற்றின் முகவரிகள்: www.coolmath.com, www.coolmath4kids.com, www.sciencemonster.com, www.spikesgamezone.com

    6. www.kids.yahoo.com என்ற முகவரியில் இன்னொரு அருமையான குழந்தைகளுக்கான தளம் உள்ளது. கேம்ஸ், மியூசிக், குறும் திரைப்படங்கள், ஜோக்ஸ், விளையாட்டுக்கள் மற்றும் படித்துப் பாருங்கள் எனப் பல பிரிவுகளில் இந்தத் தளம் குழந்தைகளுக்காகவே உருவாக்கப் பட்டுள்ளது.

    7. உங்கள் குழந்தை, தான் கம்ப்யூட்டரில் விளையாடும் கார்ட்டூன் படங்களையும் மற்ற கேரக்டர்களையும் தன் கம்ப்யூட்டரில் (ஏன், உங்கள் கம்ப்யூட்டரிலும் கூட) திரையில் வைத்துக் கொள்ள விரும்புகிறதா? அல்லது ஹோம் பேஜாக வைத்து இண்டர்நெட்டை இயக்கியவுடன் வர வேண்டும் என விரும்புகிறதா? இத்தகைய ஆவலை நிறைவேற்ற www.hitentertainment.com என்ற தளம் இயங்குகிறது. குழந்தைகள் உலகின் பல கேரக்டர்கள் இங்கு உள்ளன. இந்த கேரக்டர்கள் பங்கு கொள்ளும் சிறிய கதைகள் குழந்தைகளின் மனதில் நல்ல உறுதியை வளர்க்கின்றன.

    8. இரண்டு வயதிலிருந்து எட்டு வயது வரையிலான குழந்தைகளுக்கான அனைத்து விளையாட்டுக்களையும் அவர்கள் கற்றுக் கொள்ள வேண்டிய தகவல்-களையும் தருகிறது www.pbskids.org என்ற முகவரியில் உள்ள தளம். இந்த வகையில் இன்னும் சேர்க்கப்பட வேண்டிய தளங்களாக www.nickjr.com , www.uptoten.com, www.kidsgames.org, www.gameskidsplay.net ஆகியவை உள்ளன.

    9. இத்தகைய விளையாட்டுக்களோடு குழந்தைகளுக்கான அடிப்படை அறிவியல் விஷயங்களையும் சேர்த்து விளையாட்டுக்கள் மூலமாகத் தரும் ஓர் இணைய தளம் www.playkidsgames.com இந்தத் தளத்தில் குழந்தைகள் செயல்படுகையில் பெற்றோர்களும் உடன் இருந்து அவர்களுக்கு வழி காட்ட வேண்டும். கம்ப்யூட்டர், மேத்ஸ், பிரச்சினைகளைத் தீர்த்து வெற்றிகாணும் வழிகள், படித்துச் சிந்தித்து தகவல்களைக் கைக் கொள்ளும் வழிமுறைகள் எனப் பல வகைகளில் குழந்தைகளின் பொழுது போக்கும் வழிகளிலேயே நிறைய அறிவு வளர்க்கும் விஷயங்களையும் தருகிறது இந்தத் தளம்.

    10. அனைத்து வயதிலும் உள்ள குழந்தைகளுக்கான தளம் www.funbrain.com என்பது. கேம்ஸ் விளையாடுகையில் குழந்தைகளிடம் தகவல்களைப் பெற்று தொடரும் வகையில் கேம்ஸ்கள் அமைக்கப்பட்டுள்ளன. இதனால் விளையாடும் ஆசையுடன் வரும் குழந்தைகளின் ஆர்வம் தூண்டப்பட்டு அவர்கள் கற்றுக் கொள்ளக் கூடிய வழிகளையும் மேற்கொள்கிறது இந்தத் தளம். சொற்களைப் படிப்படியாகக் கற்றுக் கொடுக்கிறது. குழந்தைகளுக்குக் கற்றுக் கொடுக்கும் ஆசிரியர்களுக்கு அவர்களுக்கான பாடத்திட்டத்திற்கேற்ப விளையாட்டுக்களைத் தேர்ந்தெடுக்கும் வகையில் பல விளையாட்டுக்கள் வடிவமைக்கப்பட்டுத் தரப்படுகின்றன.

    Share

  • ஜென்

    -கவிஜி

    வா…வந்து
    தேநீர் போடு…
    மதிய மழை வரட்டும்…

    ***

    என்றாவது திறக்கப்படும்
    ஜன்னலில் திறக்காமலே
    கிடக்கின்றன கைகள்…

    ***

    ஜென் தத்துவம் ஒன்றுமில்லை
    ரொட்டித் துண்டு
    பெரிதென்கிறது…

    ***

    எறும்புகளைக்
    கொண்டாடுகிறது
    வரிசை…

    ***

    முதலில் இளையராஜாவின்
    பாடலைச் சொல்…
    பின், காதலை சொல்…

     

    Share