Blog

சிகரம் நோக்கி … 26

சுரேஜமீ

ஆளுமை

வாழ்க்கை ஒவ்வொரு நிலையிலும், நம்மை மெருகேற்றி, உரு மாற்றி, இன்னும் செல்லவேண்டும் தூரத்திற்குச் சற்றும் தோய்ந்து விடாது உற்சாகத்துடனும், உறுதியுடனும்,

இதோ ஒரு கை பார்த்து விடலாம் என அழைத்துச் செல்லும் ஒரு பண்புக்குப் பெயர்தான் ‘ஆளுமை’ என்றால் மிகையாகாது.

ஆளுமைப் பண்பு என்பது அடிதொட்டு வரலாம்; அறிவு கற்று வரலாம்;ஆனால் அவையெல்லாம் அனுபவம் என்ற ஆசானுக்கு இணையாகாது என்பதைக் கற்றவர்கள் கூட மறுக்க முடியாது!

அத்தகைய ‘ஆளுமை’ எனும் பதத்தை அறியாமலேயே பாதையை வகுத்தவர்கள் நம் மரபில் ஏராளம். அவர்கள் தம் வாழ்வே மற்றவர்க்கு ஒரு உந்துதலாக இருந்தது என்பதே தற்காலத் தமிழர்களுக்கு இலக்கியங்கள் சொல்லும் ஆதாரம்!

இன்றைய பதிவில் ‘ஆளுமையின்’ அடிப்படையை நம் இதயத்தின் ஆழத்தில் விதைக்க முயற்சிப்பதே நோக்கமாகும்!

ஆளுமை என்றால் என்ன? ஆளுமையின் ஆற்றல் எங்கு தொடங்குகிறது? ஆளுமையின் வெளிப்பாடு எப்படி இருக்கும்? ஆளுமையை எப்படி ஒரு சமூக வளர்ச்சிக்குப் பயனுள்ளதாக்க முடியும்? எனச் சுருக்கமாகப் பார்ப்போமா?

ஆளுமை என்றால் என்ன?

மிக எளிதில் ‘ஆளுமை’ எனும் சொல்லைப் புரிய வைக்கக் கவியரசரின் வரிகள்தாம் நமக்குச் சட்டென நினைவுக்கு வருகிறது;

மாபெரும் சபைதனில் நீ நடந்தால்
உனக்கு மாலைகள் விழவேண்டும்;
ஒரு மாத்துக் குறையாத மன்னன்
இவனென்று போற்றிப் புகழ வேண்டும்!

ஆளுமையை மிக அருமையாகச் சில வார்த்தைகளில் வர்ணித்து விட்டார் கண்ணதாசன்!

ஆக, ஆளுமை என்பது ஒரு மனிதனை மிகச் சாதாரண நிலையில் இருந்து, சான்றோர்கள் நிறைந்த சபைக்கு அழைத்துச் செல்லும் உன்னத பண்பு மட்டுமல்ல;

கிஞ்சித்தும் அவனைப் பற்றிய இகழ்ச்சிக்கு வழிவிடாமல், அவனுக்கு நிகர் அவனே எனும் ஒப்பற்ற நிலையில் வைத்துப் புகழக் கூடியது என்று சொன்னால் மிகையாகாது!

ஒரு தனி மனிதப் பண்பு; ஒரு செயலில் அவனுக்கு இருக்கக் கூடிய வல்லமை; தன்னை இந்தச் சமூகத்திற்குக் காட்டக் கூடிய அடையாளம்; எல்லாவற்றுக்கும் மேலாக, அனைவரையும் அரவணைத்துச் செல்லக் கூடிய தலைமைப் பண்பு என அனைத்தும் ஒருங்கே பெற்றிருக்ககும்

ஒப்பற்ற அணிகலன்தான் ‘ஆளுமை’ !

என்ன ‘ஆளுமையை’ அறிய எத்தனையோ புத்தகங்களைப் படித்தோமே என யோசிக்கிறீர்களா?

வார்த்தையின் வலிமைகள் புத்தகத்தில் இருந்தாலும், வாழ்க்கையில் பயில்வதற்குத் தயாராக நமக்குப் புரியும் வகையிலும், நம் தாய்மொழியிலும் அறிந்தால் தானே முடியும்!

இதையே சற்று இலக்கிய நடையில் சொல்ல வேண்டும் எனில், அய்யன் திருவள்ளுவர் சொல்வதைக் கவனியுங்கள்!

கருவியும் காலமும் செய்கையும் செய்யும்
அருவினையும் மாண்டது அமைச்சு.

ஒரு செயலைச் செய்வதற்கான காலத்தையும்; அதனைச் செயல்படுத்தத் தேவையான சாதனம் அல்லது காரணிகள்; அச்செயலைச் செவ்வனே நிறைவேற்றக் கூடிய ஆற்றல்,

இவையெல்லாம் ஒருவனிடம் அமையப் பெற்றால்,

அதுதான் ‘ஆளுமை’ எனும் பண்பு என்று சொல்லலாம்! இதை ஒரு அமைச்சருக்கான பண்பு எனச் சொன்னலும்,

ஆளுமைக்கான இலக்கணம் எனக் கொள்வதில் இருவேறு கருத்து இருக்க வாய்ப்பில்லை!

ஆளுமையின் ஆற்றல் எங்கு தொடங்குகிறது?

நம்முடைய முதல் பள்ளிக்கூடமே நம் பெற்றவர்கள்தான் என்பதில் நமக்கு எந்தச் சந்தேகமும் தேவையில்லை. அத்தகைய பெற்றோர்களிடம்தான் ஆளுமைப் பண்பை முதன் முதலில் நாம் கற்று கொள்கிறோம்.

எந்த ஒரு பண்பிற்கும் அடிப்படைத் தேவை பழக்கம் என்பதை நாம் அறிவோம். ஆளுமையும் அதற்கு விதி விலக்கல்ல; நம் தாயின் அன்பிலும்; தந்தையின் கண்ணியத்திலும் தான் நாம் கற்றுகொள்கிறோம் ஆளுமையின் ஆற்றலை!

ஒவ்வொரு செயலையும் உற்று நோக்குவதிலும்; அதன் வடிவத்தைப் புரிந்து கொள்வதிலும்; முன் பின விளைவுகளை ஆராய்வதிலும், எத்தனை தடை வரினும்,

எடுத்த காரியத்தை முடிப்பேன் என்ற மன உறுதியிலும்தான் ஆளுமையின் ஆற்றல் தொடங்குகிறது!

மகாகவி பாரதியின் வரிகளில் சொன்னால்,

மனதில் உறுதி வேண்டும்;
வாக்கினிலே இனிமை வேண்டும்!
நினைவு நல்லது வேண்டும்;
நெருங்கின பொருள் கைப்பட வேண்டும்!!

ஆம்! எண்ணிய எண்ணியாங்கு எய்திடச் செய்யும் ஒப்பற்ற பண்புதான் ‘ஆளுமை’!

ஆளுமையின் வெளிப்பாடு எப்படி இருக்கும்?

மிகச் சுலபமாக ஆளுமையின் வெளிப்பாட்டைப் புரிந்து கொள்ளா இயலும்; எடுத்துக் காட்டாக, நம் பள்ளிக் கூடங்களிலே ‘வகுப்பின் தலைவர்’ என்று ஒரு மாணவனை நியமிப்பார்கள். அதை எவ்வாறு தீர்மானிக்கின்றனர்?

எந்த ஒரு மாணவன் ஒழுக்கமாக இருக்கிறானோ; நன்றாகப் படிக்கிறானோ; பெற்றோர் மட்டும் பெரியவர்களிடத்தில் அன்பாக இருக்கிறானோ; ஒரு செயலில் சுயமாகச் சிந்தித்து அதை நேர்த்தியாகச் செய்வதோடு மட்டுமல்லாமல்

சக மாணவர்களுக்கும் சொல்லிக் கொடுக்கிறானோ

அந்த மாணவனைத்தான் ‘வகுப்பின் தலைவர்’ எனும் பதவிக்கு நிர்ணயிக்கிறார்கள்!

ஆகவே, ஆளுமையின் வெளிப்பாடு என்பது ஒரு மனிதனின் தனிப் பட்ட பண்பு நலன்களில் உள்ள முதிர்ச்சி மற்றும் செயல்களின் வெற்றியில் அடங்கி இருக்கிறது என்றால் மிகையாகாது.

ஆளுமையை ஒரு சமூக வளர்ச்சிக்கு எவ்வாறு பயன்படுத்த முடியும்?

மண்ணில் புதையும் விதைகளெல்லாம் மீண்டு எழுவதில்லை; ஆனால், ஒரே ஒரு விதை மண்ணைப் பிளந்து வந்து ஒரு செடியாகி, வளர்ந்து மரமாகி, காயாகிப் பழமாகி எப்படி பல்லாயிரம் விதைகளுக்குக் காரணியாகிறதோ

அதைப் போலத்தான் இம்மண்ணில் வாழ்ந்த மாமன்னன் இராஜராஜன் முதல் இந்த நூற்றாண்டில் வாழ்ந்த காமராஜர், ராஜாஜி, வல்லபாய் பட்டேல், அம்பேத்கார் , அறிஞர் அண்ணா உள்பட,

அண்மையில் மறைந்த அப்துல் கலாம் வரை

காலம் நமக்கு எத்தனையோ சான்றோர்களின் ஆளுமையை பாடமாக்கி இருக்கிறது!

அவர்களின் வழியில் நம்மை பண்படுத்துவதில் தான் ஆளுமையின் வெற்றி அடங்கி இருக்கிறது; அடுத்த சமுதாயம் மலர்வதற்கு!!

வளர்ப்போம் நம்முள் ஆளுமையை; அன்னவர்களின் அடி பற்றி!

வெல்வோம் எண்ணிய செயல் யாவும்!

தொடரும்……..

October 14, 2015
சரவணப் பொய்கையில் நீராடி …

— கவிஞர் காவிரிமைந்தன்.

சரவணப் பொய்கையில் நீராடி …

இயற்கையெழில் கொஞ்சம் இதமான காலை வேளை!
இதயத்தில் வந்துமோதும் இனிமையான பாடல்!

சரவணப் பொய்கையில் நீராடி… பி.சுசீலாவின் குரலில் விளைந்த அற்புத நாதம்! விஸ்வநாதன் – ராமமூர்த்தி இணைந்து தந்த இன்னிசை வேதம்! ஆம், இது சத்தியம்!!

திருமால் மருகன் – செந்தில் குமரன் – கந்தன் – முருகன் என்னும் கடவுளை எண்ணி வணங்கி எழுகின்ற பாடலிது! குளிர்த்தென்றல் தாலாட்டும் குதூகலம் பரவும் வண்ணம் சந்திரகாந்தா என்னும் நடிகையின் திருமுகம் இப்பாடல் கேட்கும்போதெல்லாம் நினைவிற்குள் வரும்!

கர்ணன் திரைப்படத்திற்காக பாடல்கள் எழுதிட, கவிஞருடன் மெல்லிசை மன்னர்கள் பெங்களுரில் முனைந்திருந்த நேரம். அடுத்த நாள் பாடல் பதிவுடன் துவக்கப்படவிருந்த சரவணா பிலிம்ஸாரின் ‘இது சத்தியம்’ திரைப்படத்திற்காக இயக்குநர் கே. சங்கர சார்பாக சென்னையிலிருந்து ஒருவர் விமான வாயிலாக சென்று கவிஞரை அணுகி, அதற்காகக் கவிஞரால் எழுதப்பெற்ற பாடலிது. சூழல் விளக்கப்பட்டதும் கவியரசர் நாவில் புறப்பட்டுவந்த இப்பாடலில்தான் எத்தனை சுகமான வரிகள்! இதிலும் ஒரு செய்தி கிடைத்தது!!

சங்கரர்க்கும் ஆறுதலை சண்முகர்க்கும் ஆறுதலை
ஐங்கரர்க்கும் மாறுதலையானதே – சங்கைப்
பிடித்தோர்க்கு மாறுதலை பித்தா – நின் பாதம்
படித்தோர்க்கும் ஆறுதலைப் பார் …

காளமேகப் புலவரின் ‘ஆறுதலை’ எண்ணிக்கையோடு வேறுபொருள் தந்து நிற்பதைச் சுவைத்த கண்ணதாசன்,

அவனிடம் சொன்னேன் என் அஞ்சுதலை
அந்த அண்ணலே தந்துவைத்தான் ஆறுதலை
இவ்விடம் இவர்தந்த இன்பநிலை – கண்டு
என்னிடம் நான் கண்டேன் மாறுதலை!

இது காளமேகக் கடலில் மூழ்கிக்கிடைத்த முத்துக்களை வரிகளாக்கி முத்தையா தருகின்றார்! காலங்கள் கடந்தபோதும் காற்றில் கலந்து தவழ்ந்திருக்கும் கண்ணதாசன் பாடல் – இது சத்தியம் அல்லவா?

சரவண பொய்கையில் நீராடி
துணை தந்தருள் என்றேன் முருகனிடம்
சரவண பொய்கையில் நீராடி
துணை தந்தருள் என்றேன் முருகனிடம்
இரு கரம் நீட்டி வரம் கேட்டேன்
அந்த மன்னவன் இன்னருள் மலர் தந்தான்
சரவண பொய்கையில் நீராடி
துணை தந்தருள் என்றேன் முருகனிடம்

அவனிடம் சொன்னேன் என் அஞ்சுதலை
அந்த அன்னலே தந்து வைத்தான் ஆறுதலை
இவ்விடம் இவர் தந்த இன்ப நிலை
கண்டு என்னிடம் நான் கண்டேன் மாறுதலை
ஓ. ஓ…ஓ. ஓ…ஓ. ஓ..
சரவண பொய்கையில் நீராடி
துணை தந்தருள் என்றேன் முருகனிடம்

நல்லவர் என்றும் நல்லவரே
உள்ளம் உள்ளவர் யாவரும் உள்ளவரே
நல்லவர் என்றும் நல்லவரே
உள்ளம் உள்ளவர் யாவரும் உள்ளவரே
நல்ல இடம் நான் தேடி வந்தேன்
அந்த நாயகன் என்னுடன் கூட வந்தான்

சரவண பொய்கையில் நீராடி
துணை தந்தருள் என்றேன் முருகனிடம்
இரு கரம் நீட்டி வரம் கேட்டேன்
அந்த மன்னவன் இன்னருள் மலர் தந்தான்
சரவண பொய்கையில் நீராடி
துணை தந்தருள் என்றேன் முருகனிடம்

காணொளி: https://www.youtube.com/watch?v=GoNxhHAecVo

October 14, 2015
பொருளாதாரத்தின் சுயசார்பு நிலை

பவள சங்கரி

தலையங்கம்

சமீபத்தில், நிதியமைச்சகத்தின் சார்பாக புதிய வரி விகிதங்கள் மாற்றியமைத்தல் தொடர்பாக, மக்களுடைய கருத்துகளையும் கேட்டுள்ளது வரவேற்பிற்குரியது. சுதந்திரம் பெற்றதிலிருந்து இதுவரை, பொது மக்களிடமும், பொருளாதார நிபுணர்கள் மற்றும் மாநில அரசுகளிடமோ கருத்து கேட்பது பெரும்பாலும் அரிதாகவே உள்ளது. உண்மையிலேயே கருப்புப் பணத்தை முற்றிலும் ஒழிக்க வேண்டுமென்றால் அனைத்துத் துறையினரும் நியாயமான முறையில் வரி செலுத்தும் வகையில் வரி விதிப்புகள் அமைக்கப்பட வேண்டியது அவசியம். கருப்புப் பணத்தை ஒழிப்பதற்கான திட்டங்களை நிறைவேற்றும் முன்பு, மேலும் அவை புதிதாக உருவாகாத வகையில் வரிவிதிப்பு முறைகளை செயல்படுத்த வேண்டியதும் அவசியம். எந்த ஒரு பொருளுக்கும் அதற்குரிய பரிவர்த்தனைகள் வங்கிகளின் வாயிலாகவே நடைபெற வேண்டும். தனி நபர்கள் மற்றும் நிர்வாகத்தினர் வங்கியிலிருந்து ஒரு நாளைக்கு எடுக்கக்கூடிய தொகைகளின் அளவு வரையறுக்கப்பட வேண்டும். சேமிப்புக் கணக்குகள் மற்றும் நடப்புக் கணக்குகளில் நாள் ஒன்றிற்கு குறைந்தபட்ச தொகைக்கு மேல் அனுமதிக்காமல் இருப்பதும், கார்ப்பரேட் நிறுவனங்களுக்கும் குறிப்பிட்ட தொகைக்கு மேல் வங்கியிலிருந்து பெறுவதற்கு கட்டுப்பாடு விதிக்கப்பட வேண்டும். சில தனியார் வங்கிகளில் உள்ளது போன்று ‘ஹோம் பிராஞ்ச்’ என்று சொல்லக்கூடிய கணக்கு துவக்கப்பட்ட வங்கிகள் அல்லது மற்ற வங்கிகளிலும் குறிப்பிட்ட தொகைக்கு மேல் பணத்தை செலுத்துவதற்கு கட்டணம் விதிக்கப்பட வேண்டும். எந்த நிலையிலும், எந்த வகையான பரிவர்த்தனைகளாக இருப்பினும் சேமிப்பு வங்கிக் கணக்கில் ரூ.1000 மற்றும் நடப்புக் கணக்கில் 10,000 ரூபாய்க்கு மேல் பரிவர்த்தனை செய்வது தடை செய்யப்பட வேண்டும். அமெரிக்கா அல்லது ஐரோப்பிய நாடுகளில் உள்ளது போல அனைத்து பரிவர்த்தனைகளுக்கும் பற்று அட்டை (டெபிட் கார்ட் ) அல்லது கடன் அட்டை (கிரெடிட் கார்ட்) அல்லது காசோலை மட்டுமே பயன்படுத்தப்பட வேண்டியது அவசியம். இப்படி செய்வதன் மூலம் எந்தவித வியாபாரத் துறையாக இருப்பினும் அதன் கணக்கு வழக்குகள் நிமிடத்திற்கு நிமிடம் அரசாங்கத்திற்கு வந்துசேர வழிவகுக்கும். மென்மேலும் நோட்டு அச்சடிப்பதையே பெருமளவில் குறைக்க வழிவகுக்கும். கருவூலங்களின் பணிகளும் பெருமளவில் குறைய வாய்ப்பாகும். இதுபோன்று பரிமாற்றங்கள் நடைபெறும்போது, அதனைத் துல்லியமாகக் கணக்கிட்டால், வருமான வரி, விற்பனை வரி, சேவை வரி போன்றவைகளும் அரசிற்கு முழுமையாக வந்து சேரும். கருப்புப் பணம் என்பதும் இல்லாமல் போகலாம். இவ்வாறு அனைத்து பரிவர்த்தனைகளும் முறைபடுத்தப்பட்டு, செயல்படுத்தும் விதத்தில் நிர்ணயிக்கப்பட்ட இலக்கை விட பன்மடங்கு அதிகமாக அரசுக்கு வருவாய் கிடைக்கவும் ஏதுவாகும்.

ஒரு துறை சார்ந்த பொருட்களுக்கு ஒரே விதமான வரி விதிப்புகள் இருப்பதும் பயனளிக்கலாம். உதாரணமாக, நூல் விற்பனை என்பதை எடுத்துக் கொண்டால் தற்போது சிட்டா நூலுக்கும் , ஜவுளிகளுக்கும் வரி விதிப்பிலிருந்து விலக்களிக்கப்பட்டுள்ளது. கோன் நூலுக்கு 5 சதவிகிதம் வரி விதிக்கப்படுகிறது. ஆனால் அனைத்து விதமான விற்பனைகளுக்கும் 2 % வரி விதித்தாலே தற்பொழுது நூல் விற்பனையில் கிடைக்கக்கூடிய வருவாயைவிட பன்மடங்கு வருமானம் கிடைப்பதோடு வரி ஏய்ப்பும் தடுத்து நிறுத்த ஏதுவாகும்.

தங்க விற்பனையை எடுத்துக்கொண்டால் பல விதமான முறைகேடுகள் நடந்து கொண்டிருப்பதை காணமுடிகிறது. தற்போது 1 % மட்டும் வரி விதிக்கப்படுகிறது. தங்கத்தை வாங்கி அதை நகைகளாக மாற்றும்போது பொது மக்களிடமிருந்து நான்கு முதல் 25 % சதவிகிதம் வரை வசூலிக்கப்படுகிறது. மற்ற துறைகளில் இருப்பது போல இந்தத் துறையிலும் ‘வேல்யூ ஏடட் சர்வீஸ் டேக்ஸ்’ விதிக்கப்பட்டால் பயனுள்ளதாக அமையும். தங்க இறக்குமதியை தாராளமாக்குவதோடு, ஏற்றுமதியின் அளவையும் அதிகரிப்பதற்கான ஊக்குவிப்பும் அரசாங்கம் அளித்தால் நலம்.

நம் இந்தியப் பொருளாதாரம் என்பது எப்பொழுதும் நம் நாட்டை மட்டுமே சார்ந்து இருக்க வேண்டுவது அவசியமாகிறது. மற்ற நாடுகளின் பிரச்சனைகள் நம் நாட்டை பாதிக்காமல் பார்த்துக்கொள்வதும் அவசியம். வலிமையான பொருளாதாரமே நம் இந்தியாவை வல்லரசாக்கும். இதற்கு ஏற்றுமதிகளை அதிகப்படுத்தியும் இறக்குமதிகள் அனைத்தும் ஏற்றுமதியைச் சார்ந்தும், ஏற்றுமதி இறக்குமதிக்குரிய விகிதாச்சாரங்களில் இறக்குமதி குறைந்தும் பெட்ரோலியப் பொருட்களுக்கான மாற்றுப் பொருட்களை ஊக்குவித்தும், நம் மண்ணில் கிடைக்கக்கூடிய இயற்கை எரிவாயுவை உபயோகிக்க ஊக்குவித்தும் எல்.பி.ஜி எரிவாயு எளிதான நடைமுறை உபயோகத்திற்குக் கொண்டுவந்தும், ஜி.எஸ்.டி வரி விதிப்பு முறையை உடனடி அமுலுக்குக் கொண்டுவந்தும் இந்திய பொருளாதாரத்தில் பெரும் மாற்றத்தை ஏற்படுத்தலாம்.

October 13, 2015
அபிராமி அன்னை அந்தாதி

கிரேசி மோகன்

அன்னை அந்தாதி
———————-

காப்பு
——–

துலங்குவெண் நீறு துனிப்பிறை கோடு துணைக்கரங்கள்
இலங்கரன் பாகம் இடப்புறம் ஏகும் இமையவளின்
வளம்புகழ் வீரம் வணங்கியந் தாதி யினிலுரைக்க
களம்புகுந் தானை முகத்தனைக் கொன்றோன் பதமரணே….(1)

அரனும் அரியும் அயனும் அளிக்க இயன்றிடாத
வரம்தரும் கற்பக வல்லியின் பாதம் வழுத்திடுவோர்
நரனாய்ப் பிறந்து நடைபிண வாழ்வில் நலிந்திடாது
பரணப் பரத்துப் பதவியால் வெல்வர் பிறப்பிறப்பே….(2)

பிறவா வரம்தரும் மாறிப் பிறந்தால் எமன்கரத்தால்
இறவா திருந்திடச் செய்யும் இதய குகைதனிலே
மறவா தெழுந்தரு ளும்பார், மகனே எனவழைத்து
உறவாம் அபிராமி மாதா உறவிந் துலகினிலே….(3)

உலகவள் நெற்றி விழிவந்து காய்ந்த ஒளித்துகளே
திலகமாய் அங்கு திகழும் பரிதியும் திங்களுமே
உலவிடும் செவ்வாய் புதன்வ்யாழன் வெள்ளி கிரகமெலாம்
கலகங்கள் செய்யா கதியென் றவள்பாதம் கொள்ளுமினே….(4)

கொள்பவள் கற்பகம், வெல்பவள் காளி, கவிபுனையச்
சொல்பவள் பாரதி, செல்வமகள் லஷ்மி, சேர்த்தணைத்து
செல்கையில் தாயார், சினந்திட தோப்பனார், நேசமதை
நல்கிட நண்பன் நலம்தரு தோழி எனஅவளே….(5)

அவளை நினைத்து அவலை இடித்தால் அவளசையாள்
அவளைத் துதித்தல் அவளை ஸ்மரித்தல் அவளருளே
அவளே நமக்குள் அவளாய்த் திளைத்தால் அதுயிகமே
அவளில் கலந்து அவளாய் முடிந்தால் அதுபரமே….(6)

பரசிவ வெள்ளம் பராசக்தி உள்ளம் புரிந்துணர்தல்
பெறுதவம் ஆகும் பிரபஞ்சம் வந்து பிறந்திறக்கும்
உறுமவம் நீங்கும் உலகிதன் மாய உருவொழிந்து
சருவமும் சக்தி உருவெனும் உண்மை வசப்படுமே….(7)

வசமான சித்தி விஷமாம் அதனை விரும்பிடாதே
நிசமான கூலி யசமானி அம்மா நிழல்துணையே
அசலான தெய்வம் அவளுண்டு வேறே அணுக்கமெலாம்
பசையாகக் கம்பளிப் போர்வையில் ஒட்டும் பிசுபிசுப்பே….(8)

பிசுபிசுத் தோடும் பிறவிப் பிணிகள் கொசுக்கடியாய்
தசகத் தலைகள் துணித்தவன் தங்கை திருவடிமுன்
திசையெட்டு தீவளி அப்புமண் எங்கும் திகழ்பவளை
வசனித்த பட்டர் அபிராமி அந்தாதி வாழ்த்துமினே….(9)

வாழ்த்த வயதுண்டு வல்லாள் அவளென்றும் வாலையடா
பாழ்தவம் பூணும் விரதங்கள், பக்தியே போதுமடா
நாழ்பட நாழ்பட நம்பிக்கை சேர்த்திடும் நாயகிமுன்
தாழ்வு உயர்வெலாம் தாயவள் கண்முன் தளசமமே….(10)

சமமவள் நோக்கு சரியோ தவறோ சரணடைய
இமையெனக் காத்து இருகரம் நீட்டி இகபரத்தை
அமைவுறச் செய்வாள் அபிராமி அன்னை அவளிருக்க
சமயமாய் வீணே சடங்குகள் செய்தல் சிரிசிரிப்பே….(11)

சிரித்திட மாதுளை, சம்புமுன் கொவ்வை, சினமடைந்து
முறைத்திட பாகல், முறுவலில் முல்லை, முனிகணங்கள்
சிரத்தினில் காய்ந்து சிவப்பழம் ஆகிடும் செவ்விதழை
தரித்திடும் தாய்முன் தலைவணங் கித்தாள் தொழல்தவமே….(12)

தவமறியேன் தான தர்ம மறியேன் திருமுறைகள்
விவரமாய் கூறும் வழிய றியேன்தாள் வணங்கிடுவோர்
சிவமறியேன் சக்தி வழிபா டறியேன் சலித்திடும்
அவமறிந்தேன் அம்மா அதனால் வந்தேன் அருள்பெறவே….(13)

பெறவந்தேன் பேரின்பம் பிச்சி யுனைப்போற்றி பாசுரங்கள்
அரவிந்த தாதுவை அள்ளும் அளிபோலே அம்பிகையே
குறவன்தன் பெண்வள்ளி கொண்டவன் கையில்வேல் கொள்ளவன்று
தரவந்த துள்ளலில் தந்தருள இங்கு வாவுமையே….(14)

(உமையாளை ஈசன் சுமையாளை பக்தர் படுந்துயர்க்கு
குமைவாளை கண்கள் இமையாளை கஷ்டம் களையபக்கம்
அமைவாளை சொல்லில் சமையாளை இல்லா உவமையாளை)

வாயுண்ட தாம்பூலம் சிந்த வரதன் வரகவியாம்
வாயென்றும் பேசாத மூகனோ வாக்கிற்(கு) அதிபதியாம்
வாயென்ற பட்டர்க்கு வானத்தில் வந்த வளர்பிறையே
தாயென்ற போர்வையில் தந்தைக்(கு) இணையான தத்துவமே….(15)

தத்துவக் கோலுக்குத் தேறா தருகற் பகமவளாம்
சத்தியம் தர்மங்கள் சார்ந்தோர் சிந்தையிலும் சிக்கவொணா
பத்தினி பக்தர்தம் பித்துக்(கு) அடிமையாம் பிச்சியவள்
உத்தமி ஈசர்தம் உடலி டபாகம் உற்றவளே….(16)

October 13, 2015
மயிலை கற்பகாம்பிகை – நவராத்திரி நாயகியர் (1)

க. பாலசுப்பிரமணியன்

கற்பகாம்பிகை – மயிலை

கற்பகமே ! அற்புதமே !!

கருணையின் தத்துவமே !!

கயிலையின் கனியமுதே !

மயிலையின் முத்தமிழே !!

கற்சிலையும் காந்த நிலை

கண்களிலோ அன்பின் விதை

கைகளிலே கருணை மழை

காலமெல்லாம் உந்தன் கதை !

மயிலாக நீ வந்தாய்

ஒயிலாக நீ நின்றாய்

மலராலே நீ துதித்தாய்

மகேசனை நீ அணைத்தாய் !

மாதவம் செய்தோரும்

மாமுனி குலத்தோரும்

மனங்கனிந்து அழைத்தோரும்

மாதங்கி! உன்னைப் பணிவார்!

நாதங்கள் வடிவாகி

நமச்சிவாயம் ஒன்றாகி

நானிலம் ஆட்சிசெய்யும்

நவராத்திரி நாயகியே!

நல்லோர்கள் காத்திடவே

வல்லோர்கள் வாழ்ந்திடவே

இல்லாமை நீங்கிடவே

இசையாக இன்றே வருவாய்!

படத்திற்கு நன்றி: http://nellaichokkar.blogspot.in/2012/06/blog-post.html

October 13, 2015
நவராத்திரி நாயகி (1)

இசைக்கவி ரமணன்

இமயமலை – ஜாகேஷ்வரிலிருந்து திரு இசைக்கவி ரமணன் அவர்களின் தேவி வந்தனம்!

ஆடவருக தேவி
ஆடவருக
அகலாத வினையாவும்
அடியோடு பெயர்ந்தோட
பகலிரவு புரியாமல்
பரவெள்ளம் தரைமேவ
இகமோடு பரம்யாவும்
இதழ்சேர்ந்து விளையாட
சுகமான பலஜதிகள்
சுவையாக நான்பாட
(ஆட)

பாடவருக தேவி
பாடவருக
கண்ணோடு காதலென
பண்ணோடு கவிபெருகி
மண்ணோடு விண்குலவி
மானுடம் இன்பமுற
எண்ணங்கள் ஒவ்வொன்றும்
இசையென்னும் சிறகேறி
மண்வீட்டில் மகனோடு
மடித்தாளம் போட்டபடி
(பாட)

கூடவருக! தேவி
கூடவருக!
கூட்டுக்குள் வானத்தை
கொண்டுவருக தேக
ஓட்டுக்குள் அமிழ்தத்தை
ஊற்றிவிடுக என்றன்
பாட்டுக்குள் பண்ணாகப்
பண்ணில் கவியாக, இனி
கூட்டுக்குள் மீளாமல்
கூட வருக! என்றும்
கூடவருக!

October 13, 2015
ஆன்மீகமும் நானும் (10)

“தத்வமசி”

சுவாமி சின்மயானந்தாவின் பிரதம சீடரான் சுவாமி தயனந்தா அவர்கள் ஒரு சமயம் இந்துக்களின் வேத சாரம் என்றழைக்கப் படும் உபநிஷத்துக்கள் பற்றி உரையாற்றினார். அப்போது “சந்தோக்ய” உபநிஷத் பற்றிப் பேசும்போது, ‘தத்வமசி’ என்னும் வார்த்தை வந்தது.

கூட்டத்தில் ஒருவர் கேட்டார், சுவாமிஜி இந்த வார்த்தையை எளிதில் புரிந்து கொள்ளும்படியாக விளக்குங்களேன் என்று.
சுவாமி தயானந்தா அவர்கள் ஒரு கதை சொன்னார்.

வருவாய் பொருத்த மட்டில் நல்ல நிலையில் இருந்த ஒரு வண்ணான் கால்நடைகள் சந்தைக்குச் சென்று நான்கு கழுதைகள் வாங்கி வந்தான். வீட்டை அடைந்ததும் கழுதை மீது அமர்ந்தபடி தான் வாங்கி வந்த கழுதைகளை எண்ணிப் பார்த்தான், ‘,ஒண்ணு’ ரெண்டு, மூணு’ என்று. ஆனால் அவன் அமர்ந்திருந்த கழுதையைக் கணக்கில் சேர்க்காமல், “அய்யயையோ! ஒரு களுதையைக் காணுமே” என்று உரக்கக் கத்தினான். அதைக் கேட்ட அவன் மனைவி வெளியே வந்து கேட்டாள், “என்ன ஆச்சு?” என்று.

வண்ணான் நடந்ததைச் சொன்னான். மனைவி கேட்டாள், “என்னது நாலு களுதெங்க வாங்கியாந்தியா அஞ்சில்லெ நிக்கிது இங்கெ?” என்று.

வண்ணான் கேட்டான், “அஞ்சு களுதெகளா இருக்குது? நாலுதான் நான் வாங்கினேன். வார வளிலெ ஒரு களுதெ குட்டி போட்டீட்டு இருக்குமோ?

“குட்டிக் களுதெ ஒண்ணும் இங்கெ இல்லெ. எல்லாமே பெரிய களுதைங்க தான்” என்று சொல்லிய அவள், “ஒண்ணு, ரெண்டு, மூணு, நாலு” என ஒவ்வொரு கழுதையின் தலையிலும் தட்டிக் கொண்டு வந்து கடைசியாக “ஐந்து” என்று சொல்லி அவன் தலையிலும் தட்டினாள். நீதான் அது, அந்த ஐந்தாவது கழுதை, என்று அவள் சொல்லாமல் சொன்னாள்.
கதையை முடித்தார் தயானந்தர்.

சந்தேகப் பிராணி மீண்டும் கேட்டார், “சுவாமிஜீ எனக்கு இன்னொரு சந்தேகம். நீ தான் அது, எல்லாமே ஒன்றுதான் என்றால் பின் அவை வெவேறாகத் தெரிவதேன்?”

“அது தான் மாயை. மாயையைப் பற்றி நாளை பார்க்கலாம்” எனச் சொல்லி அன்றைய பிரசங்கத்தை முடித்தார் சுவாமி தயானந்தர்.

தத்வமசி என்ற சமிஸ்கிருத வார்த்தையின் பொருள் நீ தான் அது என்பதாகும். நீ என்பது இந்த உடலையும், அது என்பது இறைவனையும் குறிக்கும் சொற்களாகும். ஆங்கிலத்தில் இதை That thou art (That you are) என்று சொல்வார்கள்.
உன்னுள் உறைந்து உன்னை இயக்குபவன் இறைவனே. அவனைத் தேடிக் கண்டு பிடிப்பதே ஆன்மீகம்.

(தொடரும்…..)

நடராஜன் கல்பட்டு

October 12, 2015
படக்கவிதைப் போட்டி (34)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

யெஸ்ஸெம்கே எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பு ஆசிரியர் திருமதி சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை (17.10.2015) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர் குழு உறுப்பினர், தமிழ் இலக்கிய ஆராய்ச்சியாளர் திருமதி மேகலா தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பல முறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். இது, கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்கு பெற அழைக்கிறோம்.

புதுச்சேரி மாநிலத்தின் காரைக்காலில் பிறந்த திருமதி மேகலா இராமமூர்த்தி கணிப்பொறி (MCA) மற்றும் தமிழில் (MA) முதுகலைப் பட்டம் பெற்றவர். அமெரிக்க தமிழ்ச்சங்கப் பேரவையின் (FeTNA) 2008, 2009 ம் ஆண்டுகளில் (ஆர்லாண்டோ & அட்லாண்டா) கவியரங்கம், இலக்கிய வினாடி வினா நிகழ்ச்சிகளில் பங்கேற்று பாராட்டுகளும், பரிசுகளும் பெற்றுள்ளவர். புறநானூறு, குறுந்தொகைப் பாடல்களில் அதிக நாட்டமும், இலக்கியக் கூட்டங்களில் சுவைபட பேசுவதிலும் வல்லமை பெற்றவர். இவருடைய வலைப்பூ – மணிமிடைபவளம்

October 12, 2015
ஆச்சி மனோரமாவுக்கு அஞ்சலி…

–கவிஞர் காவிரிமைந்தன்.

வா… வாத்தியாரே… வூட்டாண்டே …
நீ வாராங்காட்டி நான் வுட மாட்டேன்…
ஜாம்பஜார் ஜக்கு… நான் சைதாபேட்டை கொக்கு…

மாலையிட்ட மங்கை திரைப்படத்தில் கவியரசு கண்ணதாசன் அவர்களால் நகைச்சுவை நடிகையாகத் தொடக்கம் தந்த ஆச்சி மனோரமா உலக வரலாற்றில் எவரும் எட்ட முடியாத உயரத்தை எட்டியுள்ளார். கதாநாயகியாக ஜொலித்திருந்தாலும் கூட அவரால் இந்த சரித்திரத்தைப் படைத்திருக்க முடியாது. தமிழ்த் திரையுலகில் பெண் சிவாஜி என்கிற அளவு நடிப்பில் தனது பரிமாணங்களைத் தந்து மக்கள் மனதில் நிலைத்திருக்கிறார்.

தில்லானா மோகனாம்பாள், சம்சாரம் அது மின்சாரம் போன்ற படங்களில் இவரது நடிப்பு இணையற்றது. புரட்சித் தலைவர் முதல், புரட்சித் தலைவி வரை முன்னாள் முதல்வர்கள் ஐவரோடு கலையுலகில் இணைந்து பணியாற்றிய பெருமைக்குரியவர்.

1300 திரைப்படங்களுக்கு மேல் நடித்து, 300க்கும் மேலான பாடல்கள் பாடி தமிழ்த்திரையில் தனித்துவ முத்திரை பதித்து, எல்லோர் நெஞ்சங்களிலும் இடம்பெற்ற நகைச்சுவை நடிகை ஆச்சி மனோரமா அவர்களின் நினைவாக இப்பாடல் பதிவேறுகிறது …

பொம்மலாட்டம் திரைப்படத்தில் வி. குமார் இசையமைப்பில் கவிஞர் வாலி அவர்களின் பாடல். திரையில் தோன்றும் சோ, மனோரமா ஜோடி ஜாடிக்கேத்த மூடி ரகம்!

ஒரு திரைக்கவிஞன் எத்தனைவிதமான பாடல்களை எழுத முடியும் என்பதற்கு கவிஞர் வாலி சரியான எடுத்துக்காட்டு! முத்தான தமிழில் மோகனப் பாடல்கள் தரவும் தெரியும், சல்பேட்டாத் தமிழில் சென்னைத் தமிழ்ப் பாடல் தரவும் முடியும் என்று நிரூபித்தவர்.

அசுரத்தனமான இசை ஞானம், கேட்ட மாத்திரத்தில் வந்துவிழும் பல்லவிகள், பாடல் முழுவதும் அந்தப் பத்திரத்தின் பதிவுகள், விழியிமையினை விரிய வைக்கும் துள்ளல் இசையுடன் நையாண்டி கலவை செய்து மக்கள் மனதில் ‘லபக்’ என்று ஒட்டிக்கொண்ட பாடல்!

ஆச்சி மனோரமாவின் குரலில் இப்பாடல் அமைந்தது இப்பாடல் பெற்ற புகழுக்கு உச்சம்! நகைச்சுவையை தன்னிலே கலந்தளிக்கும் வல்லமை பொருந்திய “சோ” அவர்களும் ஈடுகொடுத்து உருவாக்கிய இப்பாடல் ‘பொம்மலாட்டம்’ திரைப்படத்தில் ஏனைய பாடல்களை மிஞ்சி நிற்பது இதற்கான தனித்துவன்களே காரணம்!

ஒவ்வொரு வார்த்தையையும் அப்படியே கோர்த்தெடுத்து தருகிற யுக்தி “கவிஞர் வாலி”க்கு சபாஷ் போடவைக்கும்!

பொதுவாகவே இப்பாடல் கேட்போரை குதூகலம் செய்யும்போது இந்தப் பாஷையை அன்றாட வாழ்வில் கொண்டிருப்பவர்கள் கொண்டாட்டம் அல்லவா போட்டிருப்பார்கள்!

வா… வாத்தியாரே… வூட்டாண்டே …
நீ வாராங்காட்டி நான் வுட மாட்டேன்…
ஜாம்பஜார் ஜக்கு… நான் சைதாபேட்டை கொக்கு…
ஜாம்பஜார் ஜக்கு… நான் சைதாபேட்டை கொக்கு…

வாராவதிலே நின்னுக்கினிருந்தேன் அமராவதியாட்டம்
கைப்பிடித்து நீ ஜகா வாங்கினே அம்பிகாபதியாட்டம்!
லவ்வா பார்த்து ஷோக்கா பேசி
டேக்கா கொடுத்தே பின்னாலே
லவ்வா பார்த்து ஷோக்கா பேசி
டேக்கா கொடுத்தே பின்னாலே
சரிதான் வாம்மா கண்ணு… பட
பேஜாரச்சு நின்னு…
சரிதான் வாம்மா கண்ணு.. பட
பேஜாரச்சு நின்னு… (வா வாத்தியாரே)

நைனா உன் நினைப்பாலே நான்
நாஷ்டா துண்ணு நாளாச்சு…
நைனா உன் நினைப்பாலே நான்
நாஷ்டா துண்ணு நாளாச்சு…
மச்சா உன் மூஞ்சைப் பாத்து
சால்னா நினைப்பு வந்தாச்சு…
மச்சா உன் மூஞ்சைப் பாத்து
சால்னா நினைப்பு வந்தாச்சு…
ஆயாக்கடை இடியாப்பம்னா …
பாயாக்கறியும் நீயாச்சு…
ஆயாக்கடை இடியாப்பம்னா …
பாயாக்கறியும் நீயாச்சு…
வா வா மச்சா வா மச்சான்…
வா வா மச்சா வா மச்சான்…
வா வா மச்சான் ஒண்ணா சேர்ந்து
வாரவதிக்கே போகலாம் … (வா வாத்தியாரே)

காணொளி:https://www.youtube.com/watch?v=oiqJrRG1b7s

October 12, 2015
மென்பொருள் பொறியியலில் அறிவுமாற்றத்தை ஏற்படுத்துதல்

—நீலமேகம் ராமலிங்கம் சஹஸ்ரநாமன்.

மென்பொருள் பொறியியலில் அறிவுமாற்றத்தை ஏற்படுத்துதல்

(Knowledge Transfer in Software Engineering)

இரண்டாயிரம் ஆண்டுகளுக்கு முன்னரே நம் திருவள்ளுவர், அறத்துப்பால் (இல்லறவியல்), ஒழுக்கம் உடைமை, அதிகாரம் 14, “அறம் தவறாமலும் கடமை தவறாமலும் நடத்தல்” குறள் எண் 140ல் ”அறிவு என்றால் என்ன? “ என்பதை பின் வருமாறு குறிப்பிடுகின்றார்.

உலகத்தோடு ஒட்ட ஒழுகல் பலகற்றும்
கல்லார் அறிவிலா தார்

(உயர்ந்தவரோடு ஒட்டி வாழ்தலைக் கல்லாதவர் பல நூல்களைக் கற்றவாராயினும் அறிவில்லாதவரே)1
(Those who know not how to act agreeably to the world, though they have learnt many things, are still ignorant) 2
மேலும், அறத்துப்பால் (இல்லறவியல்), ஒப்புரவு அதிகாரத்தில், அதிகாரம் 22 , “உலகத்தோடு ஒட்டி நடந்து உதவி செய்து வாழ்தல், குறள் எண் 214ல் அறிவை பற்றி விளக்கம் தருகின்றார்.

ஒத்தது அறிவான் உயிர்வாழ்வான் மற்றையான்
செத்தாருள் வைக்கப் படும்

(ஒப்பரவறிந்து பிறருக்கு உதவி செய்து வாழ்பவன் உயிரோடு கூடி வாழ்பவன் ஆவான். அவ்வாறு வாழாதவன் செத்தாருள் ஒருவருனாக் கருதப்படுவான்)1
(He / she truly lives who knows (and discharges) the proper duties (of benevolence) , he / she who knows them not will be reckoned among the dead) 2

“அறிவை அறிவதற்கே அறிவு தேவைப்படுகிறது என்று சட்டக்கதிர் இதழில் (மார்ச் 2009) படித்த ஞாபகம். அறிஞர்களின் ஆய்வறிக்கைக்குள் அகப்படவே அறிவு மறுக்கிறது. அறிவுக்கு விளக்கம் தேடிய உளவியல் அறிஞர் எம். தெர்மன் என்பவர் 1921 ஆம் ஆண்டில் ஒரு நாள் அமெரிக்காவில் நடந்த கருகத்தரங்கில் அறிவு என்பது சிந்திப்பதற்கான திறன் என்றார். மற்றொரு உளவியல் அறிஞர் எட்வர்ட் எல். தாண்டிக் என்பவரோ கேள்விக்கு உறிய வகையில் பதலளிக்கும் திறனே அறிவு என்றார். 1996 ஆம் ஆண்டில் அறிவு பற்றி விவாதித்தவர்கள் “சுற்றியிருப்பதோடு முரண்படாமல் ஒட்டி உறவாட உதவுவதே அறிவு “ (Effective adaption of the environment) என்று முடிவெடுத்தனர். என்ன செய்ய வேண்டும்? ஏன் செய்ய வேண்டும்? எதற்காக செய்ய வேண்டும? எப்படி செய்ய வேண்டும் என்பதை உணர்த்துவதே அறிவு தான். 3

அறிவு என்பது தகவல்கள். skills (திறமை) , செய்முறை பயிற்சியானாலும் மற்றும் அனுபவத்தினாலும் , சுற்றுப்புற சூழ்நிலைகளினாலும் பெறுவது. புத்திசாலி ஆவதற்கு அறிவு தேவைப்படுகிறது. நம்பிக்கையின் அடிப்படையில் ஒரு காரியத்தை தீhமானிக்கலாம். தீர்மானம் மெய்யாகவும் (True) நிகழலாம் அல்லது தவறாகவும் (False) அமையலாம். அறிவும், தரவும் (Data) வெவ்வேறானவை. உதாரணமாக, ஆஸ்பத்திரியின் நோயாளி பற்றிய விவரங்களை (பெயர், பிறந்த தேதி, பாலினம், வியாதியின் தன்மை, மதிப்பீடுகள், நிலவரம்) கணனியில் பதிவு செய்ததை, மருத்துவர் அறிந்து கொண்டு சிகிச்சை செய்வதாகும்.

மென்பொருள் மூலம் நிறுவப்பட்ட கருவிகள் சில சமயங்கள்ல் நூறு சதவிகதம் துல்லியமாக வேலை செய்துவிடும் என்று கூறிவிடமுடியாது. அறுவை சிகிச்சையின் போது ஒரு சிறிய உபகரணத்தினாலோ, கருவியானலோ அல்லது மென் பொருளினால் பழுது ஏற்பட்டால் நோயாளி கடுமையாக பாதிக்கபடுவார். உதராணமாக ஐரோப்பாவின் விண்வெளி நிறுவனத்தால் ஏவப்பட்ட மாதிரி ராக்கெட் (Ariean 5) மென்பொருளின் கோளாறினால் 5 பில்லியன் அமெரிக்கன் டாலாகள் நஷ்டமானது. (Therac-25 radiation therapy device) ஒரு தரம் கொடுக்க வேண்டிய தெராக் கதிர்வீச்சு, (one dose, ஒரு விழுங்கு) கதிர்வீச்சு உபகரணத்தின் மூலம் கொடுத்த பொழுது, “தெரக் 25 ரேடியேஷன் தெரபி” கருவி சரியாக செலுத்தப்படாத காரணத்தால் நோயாளி இறந்தார். எனவே. மென்பொருளில் பிழைகளை கண்டுபிடிப்பது என்பது ஒரு மிகப்பெரிய சவலாகும்.

மனிதர்களிடம் மட்டும் தான் சிந்திக்கும் திறனான “அறிவு” என்ற கண்ணுக்கு புலப்படாத பொருள் இருப்பதால் தான், பற்பல புதிய கருவிகள், உபகரணங்கள், பொருள்கள் ( ராக்கெட், விமானம், கார், கப்பபல், மென்பொருள்) உருவாக்கி, அதை உபயோகித்தும் வருகின்றார்கள். உதராணமாக விஞ்ஞானி சர். ஐசக் நீயூட்டன், ஆப்பிள் மேலிருந்து கீழே விழுகிறது என்பதை ஆராய்ந்தார். பஞ்ச பூதங்களில் (நிலம் , நீர் , தீ, காற்று, ஆகாயம்) ஒன்றான பூமிற்கு புவியீர்ப்பு சக்தி இருக்கிறது என நியூட்டன் விஞ்ஞான விதிகளை உருவாக்கினார்.

அறிவு மேலாண்மை பற்றி தகவல் தருவோரும், சேகரிப்பவரும், தொடர்பு படுத்துவோரும், உருவாக்கவோரும், அமுல்படுத்துவோரும் மற்றும் நன்கொடையாக வெளியிடுபவரும் உறுப்பினர்கள் ஆவார்கள்.

அறிவு கட்டமைப்பிலிந்து (Knowledge Structure) அறிவு பொருட்களை உருவாக்கலாம். அதை பகிர்ந்தளிக்கவும் செய்யலாம்.

Reference :

1. திருக்குறள் மிக மிக எளிய உரை , பேராசிரியர் முனைவர் மு.பெரி.மு இராமசாமி, ஸ்ரீ இந்து பப்ளிகேஷன் , சென்னை, நவம்பர் 1991
2. (http://www.gokulnath.com/thirukurals/22)
3. பேராசரியர் ஆ. சந்திரசேகரன் அவர்களின்: அறிவுசார் சொத்துரிமை சட்டம்”என்ற நூலின் அணிந்துரையில் நீதியரசர் கே. ரவிராஜ பாண்டியன்)
4. Marian Pompillu, CRISTESCU, Corina loana,, Knowledge Management Archittecture – Princples and Tendencies, Revista Informarmatic Economica, nr. 4(48)/2008,pp 65-68. Marian Popmpillu, CRISTESCU, “Lucian Blaga” University of Sibiu, Romania, Corina Loana CRISTESCU, Faculty of C.S.I.E., Academy of Economic Studies, Bucharest, Romania

October 12, 2015
இந்த வார வல்லமையாளர்!

அக்டோபர் 12, 2015

இவ்வார வல்லமையாளர்
வல்லமைமிகு லட்சுமி அவர்கள்

வல்லமை மின்னிதழின் இவ்வார வல்லமையாளராகப் பாராட்டப்படுபவர், அக்டோபர் 8, 2015 அன்று, அமெரிக்காவின் கலிஃபோர்னியா மாநிலத்தின், பெர்க்லி நகரில் நடைபெற்ற விழாவில், சீக்காலஜி என்ற கடல்சார் சுற்றுச்சூழல் பாதுகாப்பு அமைப்பின் 2015 ஆம் ஆண்டிற்கான சர்வதேச அளவிலான சீக்காலஜி பரிசைப் பெற்ற மீனவர் திருமிகு லட்சுமி அவர்கள்.

இராமநாதபுரம் மாவட்டத்தின் கடற்கரைக் கிராமம் சின்னப்பாலத்தைச் சேர்ந்த 46 அகவை நிரம்பிய மீனவர் லட்சுமி அவர்கள், கடந்த நாற்பதாண்டுகளாகக் கடற்பாசி சேகரிக்கும் பணியில் ஈடுபட்டு வருபவர். மீனவச் சிறுமிகள் சிறுவயதிலிருந்தே கடற்பாசி சேகரிப்பில் பெற்றோர்களால் பயிற்சி அளிக்கப்படுகிறார்கள். இராமேஸ்வரம், பாம்பன், சின்னப்பாலம் பகுதியைச் சேர்ந்த 25 கிராமங்களின், சுமார் 2,000 த்திற்கும் மேற்பட்ட மீனவமகளிரின் வாழ்வாதாரம் மன்னார் வளைகுடாப்பகுதியில் மருக்கொழுந்து, கட்டக் கோரை, கஞ்சிப் பாசி, பக்கடா பாசி வகைகளை, நீரில் மூழ்கி, இரண்டு நிமிடங்களுக்கு மேல் மூச்சை அடக்கிச் சேகரித்து விற்று வருவது.

மன்னார் வளைகுடா உயிர் கோளக் காப்பகத் தீவுகளான சிங்கில் தீவு, குருசடை தீவு, மணலி தீவு, மணலிபுட்டி தீவு ஆகியப் பகுதிகளில் பவளப்பாறைகளுடன், கடற்பாசிகளும் வளர்ந்து வருகின்றன. இவ்வாறு இவர்களால் சேகரிக்கப்படும் இவ்வகை கடற்பாசிகள் விண்வெளி வீரர்களுக்குத் தயாரிக்கப்படும் உணவு தயாரிப்பதில் அடிப்படைத் தேவையான உணவுப் பொருள் என்பது குறிப்பிடத்தக்கது.

பல மீனவமகளிருக்கு வாழ்வாதாரமாக இருக்கும் கடற்பாசி சேகரிப்பு, 2002 ஆண்டிலிருந்து இந்திய அரசால், கடல்வளம் பாதுகாக்கும் நோக்கத்தைக் காரணம் காட்டி தடை செய்யப்பட்டது. ஆழ்ந்த ஆய்வின்றி, மீனவ மகளிரின் வாழ்வாதாரத்திற்கும் ஒரு மாற்றுவழி காட்டாது எடுத்த அவசர முடிவினால் மீனவ மகளிர் பாதிக்கப்பட்டனர். கடற்பாசி சேகரிக்க செல்லும் மீனவ மகளிரின் படகுகள், கையூட்டு பெற நினைக்கும் ஊழல் அரசு அதிகாரிகளால் கைப்பிடிக்கப்பட்டும், ஆயிரக்கணக்கில் அபராதங்களும் விதிக்கப்பட்டதுடன், மீனவமகளிரும் சில அரசு அதிகாரிகளால் மரியாதைக் குறைவாகவும் நடத்தப்பட்டனர்.

லட்சுமி இவ்வாறு பாதிக்கப்பட்டோரை ஒருங்கிணைத்து, அவர்களது கோரிக்கையை அரசிடம் எடுத்துச் சென்று பேச்சுவார்த்தை நடத்தியுள்ளார். அவர்களது பாரம்பரிய கடற்பாசி சேகரிக்கும் முறை எவ்வாறு கடல்வளத்தைப் பாதிப்பதில்லை என்று கடல் ஆய்வாளர்களுக்கும், அரசுக்கும் எடுத்துக் கூறி, பாரம்பரிய முறையில் பாசி சேகரிக்கும் முறை குறித்து அவர்களுக்குக் கொடுத்த விளக்கங்களுக்குப் பிறகு, குறிப்பிட்ட காலங்களில் கடற்பாசி சேகரிக்கலாம் என்ற அனுமதியும், பணியை முறைப்படுத்தி பயோமெட்ரிக் அடையாள அட்டைகளும் நடைமுறைக்குக் கொண்டுவரப்பட்டது. மீனவமகளிரின் வாழ்வாதாரத்தை மீட்க உதவியதுடன் இவர் ஏற்படுத்திய விழிப்புணர்வு முயற்சிகளால் மன்னார்வளைகுடா கடல்வளப் பாதுகாப்பும் மேம்பட்டுள்ளது. லட்சுமியின் தன்னார்வப்பணி பரிந்துரைமூலம் சீக்காலஜி அமைப்பின் கவனத்திற்குக் கொண்டு செல்லப்பட்டது.

அரசு சாராத அறக்கட்டளை அமைப்பான சீக்காலஜி அமைப்பினால், 1992 ஆம் ஆண்டு முதல் கடல்சார்சுற்றுச்சூழல் மற்றும் கடல்வள பாதுகாப்பிற்காகவும், கலாச்சார பாதுகாப்பிற்காகவும் தனி நபருக்காக வழங்கப்படும் சீக்காலஜி விருதினைப் பெறும் முதல் இந்தியப்பெண்மணி லட்சுமி ஆவார். இவரது கடல்வள பாதுகாப்பு முயற்சிக்காகவும், மீனவ மகளிர் கூட்டமைப்பின் தலைவர் பொறுப்பேற்று, மீனவ மகளிருக்கு வாழ்வாதாரப் பணியை மீட்டுத் தர இவர் மேற்கொண்ட நடவடிக்கைக்காகவும் இவர் சீக்காலஜி விருதிற்காகத் தேர்வு செய்யப்பட்டார். இந்த விருதையும், சான்றிதழையும், ஆறரை லட்சம் ரூபாய் (பத்தாயிரம் டாலர்) மதிப்புள்ள பரிசுத் தொகையையும் சீக்காலஜி அமைப்பின் நிறுவனர் டாக்டர் பால் ஆலன் காக்ஸ் அவர்கள் லட்சுமிக்கு வழங்கி அவரைச் சிறப்பித்தார்.

விருது மூலம் கிடைக்கும் தொகையில் ஒரு பகுதியை மீனவ குழந்தைகளின் கல்விக்கும், மீனவ மகளிர் கூட்டமைப்பு செயல்பாட்டிற்கும் வழங்கவிருக்கிறார் லட்சுமி. மீனவ மகளிரின் உழைப்பிற்கு உலக அளவில் அங்கீகாரம் கிடைத்ததில் மகிழும் லட்சுமி, மீனவ மகளிர் சேகரிக்கும் பாசிகளுக்கு அரசே விலை நிர்ணயம் செய்தால் மீனவமகளிரின் வாழ்க்கை நிலை உயரும் எனக் கருதுகிறார்.

திருமிகு லட்சுமியின் கடல்வள பாதுகாப்பு முயற்சிக்காகவும், மீனவ மகளிர் கூட்டமைப்பின் தலைவர் பொறுப்பேற்று, மீனவ மகளிருக்கு வாழ்வாதாரப் பணியை மீட்டுத் தர இவர் மேற்கொண்ட நடவடிக்கைக்காகவும் இவரை வல்லமையாளர் எனப் பாராட்டுவதில் வல்லமை மின்னிதழ் குழுமத்தினர் மகிழ்ச்சி அடைகிறோம்.

**************************************************************************************
வல்லமையாளருக்குப் பாராட்டுகள்!!!
தங்களுடைய ஆக்கப்பூர்வமான பங்களிப்பினைத் தொடர்ந்திட
வல்லமை மின்னிதழ் அன்பர்களின் மனம் நிறைந்த வாழ்த்துகள்!!!

**************************************************************************************

[இந்த வாரத்தில் தனது ஆற்றலை சிறப்புற வெளிபடுத்தி உங்கள் கவனத்தைக் கவருபவரை வல்லமை ஆசிரியர் குழுவினரின் கவனத்திற்குக் கொண்டுவர விரும்பினால், வழக்கம் போலவே வல்லமை ஆசிரியரிடம் (vallamaieditor@gmail.com) உங்களது பரிந்துரைகளை அனுப்பி உதவிடுமாறு வேண்டுகிறோம், மேலும் வல்லமையாளர் விருது பற்றிய விவரங்களை இப்பக்கத்தில் காணலாம் –http://www.vallamai.com/?p=19391, இதுவரை வல்லமையாளர்களாகத் தேர்வு பெற்றோர் பட்டியலை இங்கே காணலாம் http://www.vallamai.com/?p=43179 ]

_____________________________________________________________________________________________

தகவல் பெற்ற தளங்கள்:
http://www.seacology.org/about/seacology-prize/
http://tamil.thehindu.com/todays-paper/tp-tamilnadu/ராமேசுவரம்-மீனவப்-பெண்ணுக்கு-அமெரிக்க-கடல்சார்-விருது/article7743942.ece
http://tamil.thehindu.com/society/women/முகம்-நூறு-கடல்பாசியால்-கிடைத்த-அமெரிக்க-விருது/article7620004.ece
http://www.thehindu.com/news/national/tamil-nadu/seaweed-collector-wins-environment-award/article7613833.ece
http://keelakaraitimes.com/award-ceremony-in-california/
http://www.dinakaran.com/News_Detail.asp?Nid=164786
http://www.viduthalai.in/home/viduthalai/women/108353-2015-09-08-11-35-57.html
http://news.webindia123.com/news/Articles/India/20151006/2695535.html
http://keelakaraitimes.com/seacology-award/
http://newstodaynet.com/tamil-nadu/tn-woman-gets-us-prize-protecting-sea-life

படங்கள் பெற்ற தளங்கள்:
http://www.seacology.org/about/seacology-prize/
http://keelakaraitimes.com/award-ceremony-in-california/

_____________________________________________________________________________________________

October 12, 2015
பந்தயம்

— மாலா மகாதேவன்.

ஜெயிப்பாண்டா, இந்த ரவுண்டு இவன் தாண்டா ஜெயிப்பான். என் செல்லம்டா இவன். நான் வளர்த்த பையன்.

ஆர்ப்பரித்த குரலில் இருந்த உற்சாகத்தை உணர்ந்த இவனாகப் பட்ட குதிரை சம்சுத் தலையைத் தலையை ஆட்டிக் கொண்டிருந்தது. அதன் மேல் நம்பிக்கை வைத்து லட்சத்துக்கு மேல் பந்தயத் தொகை கட்டியிருந்தான் செல்வா.

வாயில்லா ஜீவன் அது. முயன்றால் ஓடும். ஓடினால் ஜெயிக்கும். ஜெயிக்கா விட்டாலும் அதற்கு ஒன்றுமில்லை. அதன் மேல் கட்டினவன் பாடு. அது பாட்டுக்குத் தன் வயிற்றுக்குப் பார்த்து கொண்டு இருக்கும்.

செல்வாவின் பிரஷர் ஏறிக் கொண்டு இருந்தது. கடைசி சுற்று வெற்றி பெற்றால் இழந்த பந்தய தொகையை மொத்தமும் மீட்டு விடலாம். பரிகசித்த பண்டாரங்களை ஊதித் தள்ளி விடலாம்.

சம்சுத் இதுவரைக்கும் வெற்றிக் கோட்டின் பக்கத்தில் போயிருக்கிறது. முதலாவதாக என்றுமே வந்ததில்லை. ஆதலால் அதன் மேல் பணம் கட்டாதே என பாதிப் பேர் சொல்லியும் செல்வா மிகுந்த நம்பிக்கையுடன் அதன் மேல் கட்டியிருந்தான். அதைச் சொந்தமாகவும் வாங்கி இருந்தான்.

தொண்டைத் தண்ணி தீரும் வரை விடாமல் கத்திக் கொண்டு இருந்தான் செல்வா.

“கமான் சம்சுத் கமான் கமான்..”

வின் வின் என்று கத்தியதில் அவனுக்கே தலை விண் விண் என வலித்துக் கொண்டு இருந்தது.

கண்ணுக்கு நேரே பாதை. வளைந்தும் குறுகியும் நெடிதுமாய் இருக்கும் நீள் வட்டப் பாதை. சம்சுத் ஓடும் ஒவ்வொரு நொடியும் அவனுக்குப் பொக்கிஷம். போட்டி தொடங்கியது. ஓடத் தொடங்கியது.

மின்னலாய் விரைந்த குதிரையின் முன் கத்துகின்ற மக்கள் கூட்டத்தில் செல்வாவின் தலை தனித்துத் தெரிந்தது. அவனைப் பார்த்து மிரண்ட சம்சுத் என்ன செய்கிறோம் எனப் புரியாமலே ஒரு வினாடி தயங்கி நின்றதில் பின் சென்ற ஜாக்குவார் வெற்றிக் கோட்டை தொட்டது.

பார்த்த செல்வாவுக்கு ஒன்றுமே புரிய வில்லை. எப்படி நடந்தது? வெற்றிக்குப் பக்கத்தில் நம் குதிரை தானே இருந்தது?

ஏன் போச்சு? எப்படி போச்சு? வாயில்லா ஜீவனைக் கம்பால் வதைத்தான். உன்னால் எனக்கு பணம் போச்சு. மற்றவர்களிடம் மானம் போச்சு எனக் குதிரையை முற்றிலும் புறக்கணித்தான். குதிரை பராமரிப்பு இல்லாமல் சோர்ந்து போனது.

இந்தக் குதிரை என்ன அவ்வளவு பெரிய ஆளா? ஒரு போட்டியில் வெற்றி பெற முடிய வில்லை.

“நான் ஜெயிச்சு காட்டறேன் பாரு இந்த குதிரையை என” வெறி கொண்ட செல்வா “கமான் க்விக் , கமான் க்விக் ” என்றபடி தானே இறங்கி பந்தயத்தில் ஓட ஆரம்பித்தான்.

அந்தோ ! பாவம் அது குதிரைகளின் பந்தயம்.

October 12, 2015
நான் அறிந்த சிலம்பு – 182

-மலர்சபா

மதுரைக் காண்டம் – 06: கொலைக்களக் காதை

பொற்கொல்லன் உரைத்த விடை

பொற்கொல்லன் கூறலானான்:
“அடியேன் அதைப்பற்றி அறியேன்;
எனினும், அரசனுக்குரிய முடி முதல் அனைத்து
அணிகலன்களை நான் நன்கு செய்வேன்;”
எனக்கூறிக் கைதொழுது நின்றான்
எமனின் தூதனாக வந்த பொற்கொல்லன்.

போற்றத்தக்க சிலம்பைத் தன்னிடம் இருந்த
பொதியிலிருந்து எடுத்தான் கோவலன்.

கோவலன் சிலம்பைக்காட்ட, கொல்லன் அதன் தகுதி பற்றிக் கூறுதல்

அந்தச் சிலம்பு தூய்மையான பொன்னால்
செய்யப் பட்டிருந்தது.
மணிகள் பதிப்பதற்கான குழிகளில்
சிறந்த மாணிக்க மணிகள் மற்றும் வைரங்கள்
வரிசையாகக் கோக்கப்பட்டிருந்தன.
அதன் உள்பக்கம் குழிவாகக்
குடையைப் போல் இருந்தது.
சித்திர நுணுக்கம் போல் வேலைப்பாடமைந்த
அந்தச் சிலம்பின் அழகையெல்லாம்
பொய் பேசுவதையே தொழிலாகக் கொண்ட
அந்தப் பொற்கொல்லன் கண்டதும்,
அரண்மனையில் முன் தான் களவாடிய
சிலம்பை ஒத்திருந்ததைக் கண்டான்.

“அரசியான கோப்பெருந்தேவிக்கு அல்லாது
இச்சிலம்பு வேறு யார்க்கும் பொருந்தாது;”
என்று கூறினான்.

வேந்தனுக்குச்சிலம்பு பற்றித் தெரிவித்து வருமளவும் தன் குடிலில் தங்கியிருக்க என்று பொற்கொல்லன் சொல்ல, கோவலன் அயலில் உள்ள தேவ கோட்டத்தின் மதில் புறத்துக்குச் செல்லுதல்

“வெற்றிச் சிறப்புப் பொருந்திய
நம் வேந்தனிடம் நான் இதைத்
தெரிவித்து வரும் வரை
நீவிர் இங்கே எம்
சிறு குடிலில் தங்கியிருப்பிர்”
எனக் கூறிச் சென்றான்.

கோவலனும் கீழ்மகனாம் அவனின்
இருப்பிடம் செல்லாமல்
அருகில் இருந்த தேவகோட்டத்தின்
மதிலுள் சென்று தங்கினான்.

அடிப்படையாக அமைந்த சிலப்பதிகாரத்தின் வரிகள் இங்கே: 113 – 126

http://ilakkiyam.com/sangailakkiyam/23-tamil/iyal/sangailakkiyam/pathinenmerkanaku/ettuthogai/pura-nanooru/1133-kolaikalakathai–

October 12, 2015
தலைமுறை

-கவிஜி

ஒவ்வொரு முறையும்
ஒருவன் எழுதியதை
இன்னொருவன்
மாற்றி எழுதி விடுகிறான்…
அவனையும்
மாற்றி எழுதுவதுதான்
ஒருவன் என்பதே
ஒவ்வொரு முறையும்
எழுதப்பட்டவை…
அது முதல்முறை
கடைசி முறை
என்பதையெல்லாம்
தாண்டிய
ஒரு தலைமுறை
அவ்வளவே…!

October 12, 2015
“அன்புள்ள அம்மா” (3)

ஸ்ரீ மாதா அமிர்தானந்தமயி சரிதம்

மீ.விசுவநாதன்

( பகுதி: மூன்று )

“பிள்ளைப் பருவம்”

தந்தை சுகுணானந்தர்,
தாய் தமயந்திக்கு
விந்தையான செல்வம்
சேய் சுதாமணி !
முந்தைய பிறப்பின்
மிச்சம்
வாய்த்த சிறப்பின்
உச்சம் இந்தக்
“கண்ணன்” பிரியமணி !

கார்மேக நீல வான்போல்
அவளுக்குக்
கருநீல உடம்பு !
நீர்சேர்த்த நீள்விழிகள்
திருமூல ஞான வரம்பு !

“இளவயதிலே இறைபக்தி”

அவள்
இரண்டு வயதில்
பேசினாள்!
மூன்று வயதில் பாடினாள்!
நான்கு வயதில்
நாமணக்கக்
கருங்குயிலாய் மாறி
கண்ணன்
பேரைக் கூவினாள் !
கடற்கரையில்
கண்ணன் தேடி ஓடினாள்!
அதனாலவள்
அண்ணன் கையால்
அடிவாங்கினாள் !

ஐந்தில் வளைந்து
பள்ளியில் பாடம் கேட்டாள் !
ஐயம் களைந்து
ஆசிரியர் பிள்ளை என்று
அனைவரும் உச்சி மோந்தார் !

சகதோழியர் தோழரின்
சங்கடம் கேட்கும்
அகத்தினைப் பெற்றவள் !
தன்கடன்
அவர்துயர் தீர்க்கின்ற
“அம்மா”வின்
முகத்தினை உற்றவள் !
அன்பு
இளகிய மனம் பெற்றவள்!
அதனாலே
அந்த மீனவச் சேரிச்
சோலையில்
தனி மணம் பெற்றவள் !

பாடலை இயற்றி
கண்ணன்
தேடலைச் செய்தவள்
பக்தி
ஆடையை நெய்தவள் !
தன் அப்பாவிடம்
இமயமலைக்கு
போகணும் என்றவள் !
தன் தோள் மீது
தூங்கியே
ஆகணும் என்ற
அப்பாவின் தோளிலே
மெய்யாகப் படுத்தவள் !
விழித்ததும்
பொய்யான வாழ்க்கையைப்
பூப்போல உதறிய
மெய்ஞானி ஆனவள் !

…….(நம்மோடு இன்னும் தொடர்வாள் அம்மா)

October 12, 2015