Blog

வாழ்த்துகள், ஈழத் தமிழருக்கு அரணாகத் தொடர்வீர்களாக.

மறவன்புலவு க.சச்சிதானந்தன்

மாண்புமிகு புரட்சித் தலைவி ஜெ ஜெயலலிதா அம்மையார் அவர்களுக்கு,

வணக்கம்.

வரலாறு காணாத வெற்றியைச் சுமந்து பூரிக்கும உங்களுக்கும் அகில இந்திய அண்ணா திராவிட முன்னேறக் கட்சிக்கும் தொண்டர்களுக்கும் வாக்காளர்களுக்கும் ஈழத் தமிழரின் வாழ்த்துகளையும் பாராட்டுகளையும் நெஞ்சாரத் தெரிவிக்கிறோம்.

தமிழகத்தின் வளர்ச்சி, முன்னேற்றம் எதிர்காலம் யாவும் உங்கள் தலைமையில் பாதுகாப்பாகவும் சிறப்பாகவும் தொடரும் என்பதில் ஈழத் தமிழருக்கு என்றும் நம்பிக்கை இருந்தே வந்தது.

தமிழக வாக்காளப் பெருமக்கள் அந்த நம்பிக்கையை வலுவூட்டினர்.

தமிழக மீனவர் வாழ்வாதாரம், கச்ச தீவு, ஈழத்தமிழரின் எதிர்காலம் யாவிலும் தாங்கள் கொண்ட கொள்கையும் கோட்பாடும் ஈழத்தமிழருக்கு உகந்தது. உங்கள் வழியே ஈழத்தமிழராகிய நாமும் சிந்திக்கிறோம். இச்சிந்தனைகள் நடைமுறைக்கு வரும் காலம் வெகு தொலைவில் இல்லை.

பாண்டிய அரச சின்னங்களை எடுத்துச் சென்ற சிங்கள மன்னன் ஐந்தாம் மகிந்தனைக் கைப்பற்றிப் பாண்டிய அரசுச் சின்னங்களை மீட்டு, சிங்களத்தின் அரசு, ஆட்சியையும் கைப்பற்றிய தமிழகத்தின் பேராண்மை அறியாத, வரலாற்றை மறந்த, இன்றைய சிங்களத் தலைவர்கள் தமிழகத்தைச் சீண்டி வருகிறார்கள், தமிழக மீனவரைத் தாக்குவதையும் சுடுவதையும் அரசுக் கொள்கையாக முன்னெடுக்கிறார்கள். ஈழத் தமிழரைக் கொடுமைக்கு உள்ளாக்குவதை அரசுக் கொள்கையாக முன்னெடுக்கிறார்கள்.

உங்களின் சாணக்கியமும் பொறுமையும் அரசியல் சதுரங்கத்தில் காய் நகர்த்தலும் கொடுமை நோக்குடைய தமிழக எதிர்ப்பும், தமிழர் எதிர்ப்பு நோக்குமுடைய சிங்களத் தலைவர்களைக் கட்டுக்குள் கொண்டுவரும் காலம் விரைவில் கனியும்.

மீண்டும் ஈழத் தமிழரின் வாழ்த்துகளையும் பாராட்டுகளையும் கூறி அமைகிறேன். தமிழகத்தில் நல்லாட்சி தொடர்வதாக. ஈழத் தமிழருக்கு அரணாகத் தொடர்வீர்களாக.

நன்றி.

அன்புடன்

மறவன்புலவு க. சச்சிதானந்தன்

இலங்கைத் தமிழரசுக் கட்சி.

May 20, 2016
எதற்காய் நீதி நூல்கள்

பாவலர் கருமலைத்தமிழாழன்

திருக்குறளில்    சொல்கின்ற   கருத்தைப் போன்று

            திகழ்நீதி   நூல்கள்இவ்   வுலகில்   உண்டோ

அரும்நூல்கள்   பதினென்கீழ்க்   கணக்கில்   கன்னம்

            அறைந்தாற்போல்   சொலும்நீதி   வேறெங்   குண்டோ

பெருமைமிகு   காப்பியங்கள்   உரைக்கும்   நீதி

            பெயர்சொல்லும்   வேற்றுமொழி   நூல்கள்   உண்டோ

செருக்களமோ    இல்லறமோ   சங்க   நூல்கள்

            செப்பியப்போல்   நீதிகள்தாம்   எங்கே   உண்டு !

வகைவகையாய்   நீதிகளைச்   சொல்லும்   நூல்கள்

            வரிசையாக     இங்கிருந்தும்   பயன்தான்   என்ன

நகையாகும்   காட்சியாக    நெருப்பைத்   தொட்டால்

            நன்குசுடும்   என்றறிந்தும்    தொடுகின்   றார்கள்

பகையாக்கும்    கடன்அன்பை   முறிக்கும்   என்று

            பார்த்தறிந்தும்    வாங்கிநட்பை   இழக்கின்   றார்கள்

புகைஉயிரைக்    குடிக்குமென்று   தெரிந்தி   ருந்தும்

            புதுசுருட்டைப்   பற்றவைத்தே   இழுக்கின்   றார்கள் !

வாழ்வுமதி    அழியுமென்னும்   கள்ளுண்    ணாமை

            வடித்தகுறள்    படித்தபடி    குடிக்கின்   றார்கள்

தாழ்வில்லை   பிறப்பொக்கும்    குறளைக்   கற்றும்

            தமக்குள்ளே    சாதிகூறி    வெட்டு   கின்றார்

ஊழ்வினைதாம்    ஏழ்மைக்கு   வித்தாம்   என்றே

            உழைப்புயர்த்தும்    என்றறிந்தும்   முடங்கு   கின்றார்

வீழ்கின்றார்   அறிவிருந்தும்    அறிவற்   றாராய்

            விட்டிலென    இறப்பதற்கா   நூல்க   ளிங்கே !

May 20, 2016
அனைத்துமே உனக்கு !

எம் . ஜெயராமசர்மா .. மெல்பேண் .. அவுஸ்திரேலியா

அன்புடன் இரு
ஆணவம் அகற்று
இன்முகம் காட்டு
ஈகை வளர்
உண்மையை உரை
ஊக்கத்தை நாடு
எரிக்கும் கோபத்தை
ஏற்காது இரு
ஐக்கியமாகு சத்தியவழியில்
ஒன்றிய மனத்துடன்
ஓதிநீ அறிந்திடு
ஒளடதம் ஆகும்
அனைத்துமே உனக்கு !

கள்ளமனத்தினை காணாமல்செய்திடு
கிள்ளியெறிந்திடு கீழவர்தொடர்பினை
குறைகள்சொல்வதை கூறுகள்போட்டிடு
கெட்டவர்நட்பு கேடெனவுணர்ந்திடு
கைகளால் அன்பொடு கைகளைப்பற்றிடு
கொலைவெறி ஊட்டிடும் கோபத்தைவிட்டிடு
கெளரவமுந்தன் ஒளடதமாகுமே !

சன்மார்க்கம் நின்றால் சாந்தியைப் பெறலாம்
சிறுமதி கொண்டால் சீரெலாம் மறையும்
சுகம்பெற வேண்டில் சூழலை மாற்று
செகமதில் உன்னைச் சேவிப்பர் நாளும்
சைகள் மூலம் சகலதும் உணர்த்தலாம்
சொல்லும் சொல்லை சோர்விலா சொல்லு
செளக்கியம் ஆகும் சகலதும் உனக்கு !

தர்மம் செய்வதை தாமதம் ஆக்காதே
திருட்டு என்பதை தீண்டாமல் இருந்திடு
துன்மார்க்க குணத்தைத் தூரவே விரட்டு
தென்படும் உனக்கு தேவையாம் தெளிவு
தைக்கும் வார்த்தையை தவிர்த்தே நில்லு
தொட்டிடும் யாவும் தோன்றிடும் நன்றாய் !

May 20, 2016

மேகதூதம்

-ல. புவனேஸ்வரி & சி. சத்தியசீலன்

முன்னுரை:

கி. பி. ஐந்தாம் நூற்றாண்டில் வாழ்ந்த புகழ்பெற்ற சமற்கிருதப் புலவரான காளிதாசரால் இயற்றப்பட்ட பாடல் மேகதூதம் ஆகும். இது தமிழில் உள்ள தூது இலக்கியத்தை ஒத்ததாகும். பணி காரணமாக நீண்ட நாட்களாக திரும்பாத தலைவர், தன் மனைவிக்கு மேகத்தைத் தூதுவிடுவதாக இப்பாடல் அமைகிறது. இது இலத்தீன், ஜெர்மன், பிரெஞ்சு போன்ற பல்வேறு மொழிகளில் மொழிபெயர்க்கப்பட்டுள்ளது. எளிமையும் அழகும் மிகுந்த மேகதூதக் கதையைப் பற்றி இக்கட்டுரையில் காண்போம்.

1. தூது எனப்படுவது:

நேரடியாகச் சொல்ல முடியாத வேளைகளில், ஒருவர் சொல்ல விரும்பும் செய்தியை இன்னொருவர் மூலம் தெரிவிப்பதே தூது. தூது என்ற தமிழ்ச்சொல்லுக்கு தனிப்பெரும் சிறப்பு இருக்கிறது. ஒரு நெடில் எழுத்தும் அதே எழுத்தின் குறிலும் சேர்ந்து பொருள் தரும்படியான சொல் தூது என்ற சொல் மட்டுமாகும்.

1.1. தூதின் இலக்கணம்:

தூது இலக்கிய வகையின் இலக்கணத்தைப் பின்வரும் பாட்டியல் நூல்கள் கூறுகின்றன:

இலக்கண விளக்கம்
பிரபந்த மரபியல்
சிதம்பரப் பாட்டியல், மரபியல்
நவநீதப் பாட்டியல், செய்யுளியல்
முத்துவீரியம், யாப்பதிகாரம், ஒழிபியல்

பாட்டியல் நூல்கள் கூறும் இலக்கணம் மூலம் தூது இலக்கியம் என்பது,

	தூது அனுப்புவோர் ஓர் ஆணாக அல்லதுபெண்ணாக இருக்கலாம்.
	தூது பெறுவோரும் ஓர் ஆண் அல்லது பெண்ணாக இருக்கலாம்.
	காதல் காரணமாக ஏற்பட்ட பிரிவுத்துயரம், தூதுஅனுப்புவதன் நோக்கமாக அமையும்.
	தூது அனுப்புவோர், உயர்திணை மாந்தர் அல்லது ஓர் அஃறிணைப் பொருளிடம் தம் செய்தியைக்கூறி அனுப்புவது.
	தூது பெறுவோரிடம் இருந்து மாலையை அல்லது வேறு ஏதேனும் ஒரு பொருளை வாங்கிவருமாறு வேண்டித் தூது அனுப்புவது.

என்பன தெரியவருகின்றன.

தூது விடப்படுபவை:

மனிதர்: தோழி, விறலி
பிற உயிரினங்கள்: அன்னம், மயில், தென்றல், வண்டு, பூ, மான், நெல்
அஃறிணைப் பொருட்கள்: முகில், தென்றல்
கருத்துருக்கள்: பணம், தமிழ், நெஞ்சம்

1.2. தூது நூல்கள்:

கி.பி. 14ஆம் நூற்றாண்டில் தோன்றிய நெஞ்சுவிடு தூது என்ற நூலைத் தொடர்ந்து தமிழ்விடு தூது, அன்னம்விடு தூது, மேகம்விடு தூது, காக்கைவிடு தூது, பழையதுவிடு தூது, மான்விடு தூது, கிள்ளைவிடு தூது போன்று நூற்று ஐம்பதற்கும் மேற்பட்ட தூது நூல்கள் தோன்றியுள்ளன.

2. காளிதாசரும் மேகதூதும்:

“காளிதாசன் பரத கண்டத்திற்கு வெளியே தோன்றியவர் என்று நம்ப நிச்சயமான காரணங்கள் இருக்கின்றன. “காளிதாசன்” என்னும் அவர் பெயரே வித்தியாசமானது; megdoot அவர் பற்றிய கதைகள்கூட, அவரது பெயர் இயற்பெயர் அல்ல, அவரது வாழ்வில் பின்னர்க் கிடைத்த ஒருபெயர் என்று கூறுகின்றன. “தாசன்” (அடிமை) என்று பெயரின் பின்னால் ஒட்டிக் கொண்டிருக்கும் சொல்லின் சமூகப் பின்புலம் அழுத்தமானது; பழமையான ஹிந்துக்கள் இந்தப் பெயரைத் தவிர்த்தார்கள். காளிதாசனின் பிராமணீய பக்தி, புதிதாக மதமாற்றம் ஆன ஒருவரின் உத்வேகத்தையே காட்டிக் கொடுக்கிறது” – இப்படி ஓர் அறிஞர் (Benjamin Walker in “Kalidasa”, Hindu World) காளிதாசன் குறித்து எழுதினார். ஆனால், உண்மையில் காளிதாசன் யார்? எங்கே, எப்போது பிறந்து வாழ்ந்தார்? யாரிடம் கல்வி கற்றார்? கேள்விகள் ஏராளம். பதில் யாரும் இன்னும் கண்டுபிடிக்க வில்லை.

சமஸ்கிருத இலக்கியத்தில் பெரும் ஆளுமையாக இருக்கும் காளிதாசனைப் பற்றி பல கர்ணபரம்பரைக் (செவிவழி) கதைகள் உண்டு. இவற்றுக்குப் பெரும்பாலும் ஆதாரம் இருக்காது. இவ்வாறு பரவியுள்ளவற்றில், மிகப் பிரபலமான கதை ஒன்றில், காளிதாசன் முதலில் படிப்பறிவற்ற முட்டாளாக இருந்து, சிலரின் சதியால் ஓர் இளவரசியை மணக்க நேரிட்டதாகவும், பின்னர் அந்த இளவரசி அவரை விலக்க, காளியின் அருளால் கவிபாடும் திறன் பெற்றதாகவும், அதனாலேயே காளிதாசன் என்ற பெயரும் அடைந்ததாகக் கூறுவர். இதே கதையின் நீட்சியாக, காளியின் அருளோடு திரும்பி வந்த காளிதாசனைக் கண்டு அவர் மனைவி பேச்சில் ஏதும் முன்னேற்றம் உண்டா? என்று கேட்க, இதற்கு பதிலாகக் காளிதாசன் மூன்று பெரும் காவியங்களை (குமாரசம்பவ காவியம், மேகதூத காவியம், மற்றும் ரகுவம்ச காவியம்) இயற்றினார் என்ற ஒரு சுவாரசியக் கூற்று உண்டு.

இன்னொரு கதை இப்படிப் போகிறது. இலங்கை அரசன் குமாரதாசன் அவையில் காளிதாசன் வீற்றிருந்தபோது, அவ்வரசன் (கமலே கமலோத்பத்தி: ஸ்²ருயதே ந து த்³ருʼஸ்²யதே) – தாமரையில் தாமரை மலர்வது கேள்விப்படுவது மட்டுமே. எங்கும் கண்டதில்லை என்ற பொருளில் ஒரு வரியைச் சொல்லி இந்த ஸ்லோகத்தை முழுமையாக்குபவர்க்குப் பரிசு என்று அறிவித்தான். பிறகு காளிதாசன் இந்த ஸ்லோகத்தை முழுமைசெய்து (பா³லே தவ முகா²ம்போ⁴ஜே கத²மிந்தீ³வரத்³வயம்) – ஓ பெண்ணே! உன் தாமரைமுகத்தில் எப்படி இரண்டு தாமரைகள் உள்ளன? (அதாவது தாமரை முகத்தில் இரு தாமரை போன்ற கண்கள்) என்ற பொருளில் அந்த ஸ்லோகத்தை நிறைவுசெய்து விட்டார். இது அரசனின் காதுக்கு எட்டும் முன் அந்த அவையில் இருந்த நடனப் பெண்ணொருத்தி, அந்த வரியை அரசனிடம் கூறி பரிசு பெற்றுக் கொண்டு விட்டாள். பின் எங்கே காளிதாசன் தான் அந்த ஸ்லோகத்தை நிறைவு செய்தது என்று தெரிய வருமோ என்று அஞ்சிக் காளிதாசனைக் கொன்றுவிட்டாள் என்று கூட ஒரு கதை உண்டு.

காளிதாசரின் மேகதூதம் 111 சந்தங்கள் கொண்டது. இந்தக் காவியத்தை, 1813ஆம் ஆண்டு Megha Duta: The Cloud Messenger என்ற தலைப்பில் Horace Hayman Wilson என்பவர் ஆங்கிலத்தில் மொழிபெயர்த்தார். தவறு செய்ததினால், குபேரனால் நாட்டைவிட்டு விரட்டப்பட்ட ஒரு யக்ஷன், மழைக்கால மேகங்கள் மூலம் மனைவிக்குத் தூது அனுப்புகிறான். “நீ போகும் வழியில் இயற்கைக் காட்சிகள் எல்லாம் நன்றாக இருக்கும்; உன் மனம் நிறையும்; நீ போகும் வழியில் எல்லாம் மழை பொழிந்துகொண்டே சென்றால் பலர் உன்னை வாழ்த்துவர்” என்று அவற்றிற்கு போகவேண்டிய காரணத்தை எடுத்துச் சொல்கிறான். மேகத்தைத் தூது விடுபவர்கள் பொதுவாக வெயில்கால வெண்மேகத்தைத் தூது விடுவதில்லை.

3. மேகதூதக்கதை:

இம்மேகதூதம் “மந்தாக்கிரந்தம்” என்ற விருத்தப்பாவகையைச் சார்ந்தது. மந்தாக்கிரந்தம் என்றால் மெல்ல நடப்பது எனப் பொருள்படும். இந்நூல் பூர்வமேகம் மற்றும் உத்தரமேகம் என இரு பிரிவுகளைக்கொண்டது.

பூர்வமேகம்: கடமையில் தவறிய இயக்கன் ஒருவனுக்கு, நிதிஅரசன் குபேரன் சபித்துத் தொழில்நீக்கம் செய்து மற்றும் தலைவியை ஒருவருட காலம் பிரிந்து வாழும்படி ஆணையிட்டான். இயக்கன், தன் புதுமணங்கண்ட மனைவியைப் பிரிந்து சித்திரகூட மலையில் தன் வாழ்வைக் கழித்துவந்தான். அத்தகு தனிமையில் எட்டு மாதம் துன்பப்பட்ட அவ்வியக்கன் ஆடிமாதத்தின் முதல்நாளில் அம்மலை உச்சியில் ஒருமேகம், கொம்புக்கு மண்ணெடுக்கும் யானை போலக் கிடந்ததைக் கண்டான்.

அப்போது அவன் மனத்தில் ஓர் எண்ணம் பிறந்தது. “வடதிசையை நோக்கிச் செல்லும் இம்மேகம் என் அருமைக் காதலியையும் அளகாபுரியையும் நோக்கிச் செல்லும்மல்லவா; இதன் வாயிலாக மனைவிக்குத் தூதுசொல்லி அனுப்புதல் வேண்டும்” என்று சிந்தித்தான். சிந்தித்தவன், அன்றே மலர்ந்த கிரிமல்லிகைப் பூவினைத் தூவி, தூது போகுமாறு இரந்து வேண்டுகிறான். பின்னர் இமாலயத்திலுள்ள அளகாபுரிக்குப் போகும் வழியைக் கூறுகிறான். ”புறப்பட்ட நீ முதலில் ஆமிரக் கூடமலையை அடைய வேண்டும். அம்மலையை நீங்கி விஞ்சை மலையிலிருந்து விழும் இரேவா நதியை அடைய வேண்டும். கடப்ப மலரை நோக்கி வண்டுகள் விரையும். கதலிப் பூண்டின் முதல் தளிரை மான்கள் கறிக்கும். நிலத்திலிருந்து எழும் நறுமணத்தை விழுங்கி யானைகள் மகிழும். இவற்றால் உன் வழியறிந்து தசார்ணவ தேசத்தை அடைய வேண்டும்.

மெல்லிய மலர்கள் மணங்கமழ, ஊர்மருங்கிலுள்ள பெருமரங்களில் காக்கை ஆரவாரஞ்செய்யும்; நாவன் மரங்கள் கனி பழுத்துத் தூங்கும். இத்தேசத்தின் தலைநகரான விதிசையைக் காண்பாய். அங்கே அழகு மிளிரும் வேத்திராவதி ஆற்றின் புனலைக் கண்டபிறகு, நீச மலையில் இளைப்பாறுவாயாக. பின்னர், பூமியில் சுவர்க்கமாகக் கருதப்படும் உஞ்சைமா நகரச் சிறப்புகளைக் கண்குளிரக் காண்பாய். பின் நிருவிந்தை ஆற்றைக்கடந்து உஞ்சைனி வனப்பைக் கண்டபின் சண்டீசு வரனுறையும் புண்ணியத் தலத்தை அடைவாய். இங்கே, ஈசன் சன்னதியில் திருப்பலி செய்யும் மாதர், உன் துளியைப் பெற்று அயர்வு நீங்கி உன்னைக் கடைக்கண்ணால் நோக்குவர். சூலபாணிக்கு அந்திமாலையிலெடுக்கும் விழாவிலே நீ பலிமுரசறைந்து சேவை செய்தபின்னர், மாடப் புறாக்கள் கண்ணுறங்கும் மாளிகைத்தலத்தில் உன் மனையாள் மின்னலோடு இராக்காலத்தைக் கழிக்க வேண்டும். குளிர்ந்த மந்தமாருதம் உன்னை மெல்லென்று ஊக்கிச் செல்லும்.

நீ, பின்னர் முருகவேளுறையும் தேவகிரியை அடைவாய். பின் சருமவதி என்னும் ஆற்றைக்கடந்து தசபுர மக்களுக்கு உன் வடிவைக் காட்டிச்செல்வாய். பின்னர், புகழ்பெற்ற பார்த்தன் தன் வில்லினால் எதிரிகள் தலையைக் கொன்று குவித்த குருக்கேத்திரத்தைப் பார்த்துக்கொண்டு சரசுவதியாற்றின் புண்ணியநீரை உண்டு மேற்செல்வாயாக. பின்னர் வடபாற் சென்று சிவனுறையும் வெள்ளயங்கிரியை அடைவாய். அங்கே சிவபெருமான் செய்த அட்டகாசங்கள் திரண்டு குவிந்துகிடக்கும் அக் கைலையின் சாரலில் விளங்குவது அளகாபுரி.

உத்தரமேகம்: மேகமே! நீ அவ் வளகாபுரியின் மஞ்சு கொஞ்சும் மாளிகைகளைப் போன்றவன்; நீயோ மின்னலொடு தோன்றுவாய்; அம்மாளிகைகள் அழகிய பெண்களையுடையன; உன்னிடத்து இந்திரவில்லு; அங்கே அழகொழுகும் பல்வண்ண ஓவியங்கள்; நீ மெல்லென மெலிதாய் முழங்குவாய்; அங்கே இன்னிசை கனிந்த மத்தளவொலி. அங்கே மரங்கள் எப்போதும் மலர்களால் நிறைந்திருக்கும். மயில்கள் எல்லாப் பருவத்திலும் கலாபம் விரித்தாடும். இரவில் என்றும் வெண்ணிலா விளங்கும். இல்லத்தின் புறத்தே மரகதக் கல்லினால் செய்யப்பட்ட சலக்கிரீடை மற்றும் பொற்றாமரை மலர்கள் காணப்படும். அதனிடையே வீட்டுமயில் தங்குதற்கு ஒரு நிவாசத்தண்டம் அமைக்கப்பட்டிருக்கும்.

இக்குறிப்புகளை மனத்தில் வைத்து என் இல்லத்தை அடையாளங் கண்டுகொள்வாய், அங்கே எனது காதற்கிழத்தியைக் காண்பாய். என்னை நினைந்து அழுதுகொண்டே நான் வரும் நாட்களை எண்ணிக்கொண்டிருப்பாள். வீணையை எடுத்து என் பெயரமைந்த இனிய வரிப்பாட்டுகளைப் பாட நினைத்தவள், கண்ணீரால நனைந்த நரம்புகளை இசைக்கமுடியாது வருந்துவாள்; பின்னர், அதற்குரிய பண்ணை மறந்து சோருவாள். அவளை மாடச்சாளர வழியால் கண்டுகொள். கண்டு, ”சுமங்கலி! நானுன் காதலனுக்குற்ற நண்பன்; அவன் சித்திரகூட மலையில் உயிரோடு வாழுகின்றான். இன்னும் நான்கு மாதங்களையும் ஒருவாறு கழிப்பாயாக. அதன்பின் அவனது சாபம் நீங்கிவிடும். பின்னர் நான் உன்னை வந்தடைவேன்; இவ்வாறு உன் இனிய காதலன் என்னிடங் கூறினான்” என்று முகில் தூதை அவளுக்குக் கூறுகின்றது.

4. முடிவுரை: மகாகவி காளிதாசர் வடமொழியில் இயற்றிய இம்மேக தூதம் vaடமொழியிலக்கியத்திலுள்ள சிறுகாப்பியங்களுக்கு மகுடமணி போன்றது. இம்மேக தூதத்தில் “பிரிவு” (பாலை) எனும் ஒரு மெய்ப்பாட்டை ஜீவசுருதியாக வைத்து மகாகவி காளிதாசர் மண், விண்ணைப் பிரிந்து வாடும் ஒரு தாபத்தை வருணிக்கிறார். இயற்கையின் தோற்றம், காதலர் கருத்தில் உண்டாகும் கிளர்ச்சிகளை வருணிக்கும் முறையில் காளிதாசருக்கு இணையில்லை என்றால் அது மிகையாகாது; அவர் ஒரு கற்பனைக் களஞ்சியம். இதனால் இவர் உலக மகா கவிகளில் மிக உயர்ந்த இடத்தைப் பெற்றுள்ளார். அவருடைய இலக்கியநடை எளிமையும் தூய்மையும் உடையது; தெளிவும் சுருக்கமும் விகற்பமில்லாத போக்குமுடையது. உவமைகள் பொருத்தமும் திட்பமும் உடையன. நாம் அவரின் காவியங்களைப் படித்து “எளிமையின் இனிய அழகே போற்றி” என வியந்து பாராட்டுவோம்.

மேற்கோள் பட்டியல்:

மேகதூதம், வடமொழி மூலம்: மகா கவி காளிதாசர், தமிழாக்கம்: நவாலியூர் சோ. நடராசன், கொழும்பு அப்போதிக்கரிஸ் லிமிற்றெட், இலங்கை.
மேகதூதக்காரிகையுரை, சி. கணேசையர், சோதிடப்பிரகாசயந்திரசாலை, யாழ்ப்பாணம், 1925.

*****

ல. புவனேஸ்வரி & சி. சத்தியசீலன்
முனைவர் பட்ட ஆய்வாளர், இணைப்பேராசிரியர் மற்றும் நெறியாளர்
காஞ்சிமாமுனிவர் பட்ட மேற்படிப்பு மையம்
இலாஸ்பேட்டை, புதுச்சேரி – 605008

May 20, 2016

நினைவு நல்லது வேண்டும் …. (8)

முனைவர் சங்கரராமன்

மதுரையில் இருந்து ஒரு அழைப்பு. “சார் வணக்கம். ப்ரீயா இருக்கீங்களா. பேசலாமா ?”… கல்லூரி விழாவில் இருந்ததால் “மன்னிக்கவும் நான் மாலையில் அழைக்கிறேன்… விழாவில் இருக்கிறேன்” என்று துண்டித்து விட்டு சற்று முன்னர் அந்த எண்ணுக்கு அழைத்தேன். முகநூலில் எனது நம்பிக்கை பதிவுகளை (?) பாராட்டி பேசிவிட்டு அடுத்த மாதம் ஒரு நிகழ்வுக்கு வர முடியுமா ? என்று கேட்டார். நான் என்ன நிகழ்ச்சி எங்கு நடக்கிறது என்று கேட்டேன். அவர் நடக்கும் இடத்தை சொன்னவுடன் எந்த நிபந்தனையும் இல்லாமல் உடனே ஒத்துக் கொண்டேன். கண்டிப்பாக வந்துவிடுகிறேன் என்று என்னையும் அறியாமல் அவரிடம் மூன்று முறை சொல்லிவிட்டு அழைப்பை துண்டித்து விட்டேன்.

இதுவரை நான் எத்தனையோ பள்ளி கல்லூரி, நிறுவனங்கள், கோயில்கள் ஆகியவற்றில் பேசியிருக்கிறேன். ஆனாலும் இவ்வளவு ஆசையோடு உடனடியாக எந்த நிகழ்ச்சிக்கும் ஒத்துக் கொண்டதில்லை. அப்படி என்ன இந்த நிகழ்ச்சி … நிகழ்ச்சியை விட நிகழும் இடமே என்னை ஒத்துக் கொள்ள வைத்தது.

“கண்ணாடி முன்னாடி நின்னு நல்லா பேசி பழகு. பேசுறதெல்லாம் அவ்வளவு ஈசியில்ல. உனக்கு முடியலனா எதுக்கு போட்டில கலந்துக்கணும்… காசு செலவழிச்சு வேஸ்ட் பண்ணாதே ” என்ற அறிவுரைகளோடு நான் ஶ்ரீ ராம் சிட்பண்ஸ் நிறுவனம் இன்று வரை வருடந்தோறும் நடத்தி வரும் பாரதி விழா பேச்சுப் போட்டியில் பள்ளி மாணவராக இருந்த போது தோற்று வெளியேறிய இடம் அது. அதன் பின் அதே போட்டிகளில் மாநில அளவில் மூன்று முறை பரிசு பெற்றாலும் அந்த தோல்விதான் என்னை மீண்டு எழச் செய்தது என் பேச்சுத் துறையில் எனலாம்.

எந்த இடத்தில் தோற்று வெளியேறினேனோ அதே இடத்தில் சிறப்பு விருந்தினராக பேச அழைப்பு.

வாழ்க்கை இதுபோன்ற சில ரகசியங்களை நமக்கே தெரியாமல் நமக்கு அளிக்கும்… காலம் எல்லாவற்றையும் மாற்றி விடும். நாம் மட்டும் நமது கடமைகளை சரியாகவும் நம்பிக்கையோடும் செய்துவந்தாலே போதுமானது…

நீங்கள்
எதனால் நிராகரிக்கப்பட்டீர்களோ
அதனைக் கொண்டே
வெல்ல வேண்டும்

தொடருவோம்

May 20, 2016
’’அமரர் தேவன்’’….

கிரேசி மோகன்

சமீபத்தில் (புத்தகத்தை தள்ளிவைத்துதான்…. சமீபத்தில் வைத்துப் படித்தால் கண் கெட்ட பிறகு தேவனைப் படித்த கதையாகிடும்…) ‘’அமரர் தேவனின்’’ ஜஸ்டிஸ் -ஜகன்னாதன், ஸ்ரீமான் சுதர்சனம், மிஸ்டர் வேதாந்தம், ராஜத்தின் மனோரதம்…etc etc….(உபயம் அல்லையன்ஸ் பிரஸ் நண்பர் ஸ்ரீனிவாசன்…. படிக்கும்படி ஊக்குவித்தவர் -நண்பர் ரகுநாதன் ஜெயராம்…. இருவருக்கும் நன்றி) வாசித்துக் கொண்டிருக்கிறேன்…. என்ன ஒரு ஹுயுமர் தேவனுக்கு…. எங்கப்பா சொன்னார் ‘’நம்மாத்துக்கு பக்கத்தாம் தேவன்(neibhour)…. உன்னை தோள்ள தூக்கி வச்சுண்டுருக்கார்’’…. ஒருவேளை அதான் ‘’ஹ்யூமர்’’ எனக்கு வந்துதோ….! இருக்கலாம்….! அப்புறம் ஒரு அனக்டோட் தேவனை பத்தி சொன்னார்…. நானும் அதை அப்புறமா சொல்றேன்….’’தேவரின் தெய்வம்’’ மாதிரி ‘’கிரேசியின் தெய்வம் தேவர்(மரியாதையாக)….

இணைத்த படத்தில் அடியேன் ராஜா….அருகில் இருப்பது நெய்வேலி பொறியாளர் சாமா என்கிற சாமிநாதன்….பால்ய நண்பன்…5வது ஷோவிலேயே அபார்ட் ஆச்சு “எல்லோரும் இந்நாட்டு மன்னர்”….பிறகு பிறந்தது “அல்லாவுதீனும் 100 வாட்ஸ் பல்பும்”… தொடர்ந்து நாடகப் பயணம்….இதுதான் முன்கதைச் சுருக்கம்…”அந்தநாள் ஞாபகம் நெஞ்சிலே வந்ததே…. இந்த நானுக்(கு) அந்த’தில்’ இல்லையே”…. ஏன் ஏன் ஏன்….!

‘’சாக்லேட் கிருஷ்ணா’’ வின் அமோக வெற்றிக்கு ஒரு காரணம் ‘’அதிதி தேவனோ பவ:’’….இவர் ‘’லண்டன் வுட் ஹவுஸ்’’….வுட் -ஹவுஸ் தமிழ்நாட்டு தேவன்….

“ஜஸ்டிஸ் ஜகன்னாத ,ஸ்ரீமான் சுதர்சன
மிஸ்டர்வே தாந்த மகாதேவர் -வெஸ்ட்க்(கு)
இவர்போக வுட்ஹவுஸ் ,இங்கு பிறந்து
டவர்போல நின்றார் தமிழ்க்கு”….

“வல்லாரை உண்ணாமலே வந்தது ஞாபகம்,
“எல்லோரும் இந்நாட்டு மன்னர்”எனக்; -கல்லூரி
தாக்கம் அமரரவர் தேவன் நகைச்சுவையே
சாக்லேட் கிருஷ்ணா சிரிப்பு”….கிரேசி மோகன்….
—————————————————————————————————————-

May 19, 2016
கேசவ் வண்ணம் – கிரேசி எண்ணம்

”துவமேவ தாயார், துவமேவ தந்தை,,
துவமேவ பந்து, தவமும் -துவமேவ,
என்றிருப்பாய் என்றும் யதுகுலக் கன்றேபோல்
அன்றவன் கொள்வான் அணைத்து”….கிரேசி மோகன்….

May 19, 2016
சிவபிரதோஷம் “சிவனை நினை”

மீ.விசுவநாதன்

வில்வ விதைநட்டு வைத்திருந்தால் – சிவ
விருட்ச மெனவே வளர்ந்திருக்கும்
செல்வ விதைமட்டும் நட்டதனால் -மனம்
சிவனை மறந்து திரிகிறதே !

நாவுக் கரசரைநா நன்கறிந்தால் – மனம்
நச்சு கலவா திருந்திருக்கும்
நாவு ருசிதேடி ஓடுவதால் – சிவ
நாமம் உணர மறுக்கிறதே !

ஓதும் கவிதைக்குள் போனாலே – சிவ
உணர்வு சிறிது கிடைத்திருக்கும்
சூதும் பகையையும் கொண்டதனால் – மனம்
சுத்த அறிவை மறக்கிறதே !

“அத்வை த”சிவமெனக் கண்டாலே -மனம்
அடங்கி அமைதி யுடனிருக்கும்
புத்தி தெளிவின்றிப் போனதினால் – அது
போன வழியில் தவிக்கிறதே !

சுடலை அரசன்தாள் எண்ணினாலே- கரு
சுற்றி வருதல் முடிந்திருக்கும்
உடலை வளர்க்கின்ற ஆசையினால் – சிவ
உயிரை வளர்க்க மறந்தேனே !

(பிரதோஷ தினம் : 19.05.2016)

May 19, 2016
துருவ சரித்திரம்

தாய் சொல்ல தவம் செய்யப்போன துருவனுக்கு தாமோதரன் தரிசனம்…. “கண்மூடி பக்தியால் விண்மீனாய் ஆனான் துருவ(நக்‌ஷத்திரம்)” …..

துருவ சரித்திரம்
———————

உத்தான பாதனுக்குப் பத்தி னிகளிரெண்டு
சுத்தாத்மா மூத்தாள் சுநீதியும் -பித்தாக்கி
சக்கிர வர்த்தியை சேலைச் சிறைவைத்தாள்
சக்களத்தி மாதுசுரு ஸி….(1)

சித்திமகன் உத்தமன் அத்தன் மடியமர
தத்துமகன் போல்வாழ்ந்த அத்துருவ -புத்திரனும்
தாவி மடியேற தாங்காது சிற்றன்னைப்
பாவி பிடித்திழுத்தாள் பாய்ந்து….(2)

கருவ சுருஸி கடுஞ்சொற்கள் கேட்ட
துருவன் மனக்குறையை தாய்முன் -உருக
அநீதி முடிக்கு(ம்)அரி அப்பன் மடியில்
சுநீதி அமரென்றாள் சேய்க்கு….(3)

மாதாசொல் மிக்கதோர் மந்திரம் வேறிங்கு
ஏதேனும் உண்டோவென்(று) எண்ணியசேய் -பீதாம்
பரனை தரிசிக்கப் போகத்தம் பூரா
கரனை தரிசித்தான் கண்டு….(4)

வாசுதேவ மந்திரத்தை தேசிகர் நாரதர்
தேசுமிகு சேய்க்குப தேசித்து -கேசவர்க்கு
தாசனாய் வாசனாதி தோஷமின்றி வாழ்த்தென்றார்
ஆசன தர்ப்பை அமர்ந்து….(5)

கனியில் துவங்கியவன் காய்ந்த சருகை,
பனிநீரை, காற்றைப் புசித்து -முனியாய்
குடைசாய மூன்று குவலயங்கள் காலை
திடமாக ஊன்றி தவம்….(6)

ஈரைந்து மாதமேந்தி ஈன்றவள் சொற்கேட்டு
பேரைந்து மூன்றெழுத்தைப் பார்த்திட -ஓரைந்து
மாதங்கள் செய்த மகாதவத் தால்வியந்து
வேதங்கள் மூக்கில் விரல்….(7)

கும்பகத்தால் காற்று குறைந்திட மூச்சடைத்து
உம்பர்கள் ஓடி உலகெடுத்த -கொம்பனை
வேண்ட கருடாழ்வான் வாகனம் மீதமர்ந்து
ஆண்டவன் காட்சி அளிப்பு….(8)

உருவம் மறைந்திட உள்ளே, திகைத்து
துருவன் விழிகள் திறக்க -அருவம்
கருடனை விட்டிறங்கி கைச்சங்கால் கன்னம்
வருடியபின் வாஞ்சையாய் வாக்கு….(9)

மாண்டபின் செல்கின்ற மோட்சம் கொடுக்காது
ஆண்டுகள் முப்பத்தா றாயிரம் -ஆண்டபின்
வானில் துருவ விளங்குவாய் விண்மீனாய்
ஆணில் சிறந்தோன் அளிப்பு….(10)

பெற்றவளும் கூடவர புஷ்பகவி மானத்தில்
உற்றான் துருவன் உயர்பதவி -கற்றவர்க்கும்
கிட்டாத அந்தஸ்து கண்மூடி பக்திக்கு
கிட்டுமெனக் கூறும் கதை….(11)….கிரேசி மோகன்….

———————————————————————————————————————

May 18, 2016
கேசவ் வண்ணம் – கிரேசி எண்ணம்

ஒரு வெண்பா எழுத நாம் ஏஸியில் கணினி முன் நகம் கடித்து நாள் முழுவதும் வீணாக்குகிறோம்….”பூபாரம் போக்கணும், பார்த்தனுக்கு கீதை படிக்கணும், ராதை காதலுடன், குசேலன் அவலுடன் காத்திருக்கான்….இத்தனை ஆற்ற வேண்டிய கடமைகள் இருந்தும் பசுவை மறவாத ‘’கண்ணன் வாத்ஸல்யம்’’ அபாரம் கேசவ்….

‘’திண்தோள் அளிப்பு திருவடி மேய்ந்திட,
விண்பால்(ற்) கடல்விஷ்ணு வாத்ஸல்யம் -மண்பால்
களம்படிக்க கீதைக் கடமை இருந்தும்,
குளம்படிக்கும் சாய்த்திடுவான் காது’’(இதுதான் செவி சாய்ப்பு)….கிரேசி மோகன்….

குளம்படி -மாட்டின் அடிச்சுவடு….

May 18, 2016
பிரபஞ்சத்தின் மகத்தான நூறு புதிர்கள்! ஒளி மந்தைகளை இயக்கும் கருஞ்சக்தி என்பது என்ன?
(Dark Energy)

(கட்டுரை: 5)

சி. ஜெயபாரதன் B.E.(Hons) P.Eng (Nuclear) கனடா

++++++++++++

பிரபஞ்சக் குயவனின்
சக்கரக் களிமண் செங்கல்
கண்ணுக்குத் தெரியாத
கருமைப் பிண்டம்!

கண்ணுக்குப் புலப்படாத
கருமைச் சக்தி,
பிரபஞ்சச் சக்கரத்தின்
குதிரைச் சக்தி!

கவர்ச்சி விசைக்கு எதிரான
விலக்கு விசை கருஞ்சக்தி!
கைத்திறன் கண்டாலும்
கலைத்திறன் கண்டாலும், படைப்பில்
காரண, விளைவு காண்பது
இயற்கை நியதிகளின்
சீரமைப்பு !

+++++++++++++++

நமது பூகோளத்திலும், விண்மீன்களிலும் பிரபஞ்ச வெப்பத் தேய்வு (Entropy) தீவிரமாய் மிகையாகிக் கொண்டு வருகிறது. அதாவது சிறுகச் சிறுக முடிவிலே விண்மீன்களில் அணுக்கரு எரிசக்தி தீர்ந்துபோய் அவை செத்து வெறும் கனலற்ற பிண்டமாகி விடும். விண்மீன்கள் அவ்விதம் ஒவ்வொன்றாய்ச் சுடரொளி மங்கிப் பிரபஞ்சமானது ஒருகாலத்தில் இருண்ட கண்டமாகிவிடும்.

டாக்டர் மிசியோ காக்கு, (அகிலவியல் விஞ்ஞான மேதை)

1998 ஆண்டுக்கு முன்னால் “கருமைச் சக்தி” என்னும் ஓர் விஞ்ஞானக் கருத்தை யாரும் கேள்விப்பட்ட தில்லை ! கருமைச் சக்தி என்பது அண்டங்களின் ஈர்ப்பு விசையைப் (Gravity) போல ஒருவித விலக்கு விசையே (Anti-Gravity) ! அது முக்கியமாகக் காலாக்ஸிகளின் நகர்ச்சியைக் கட்டுப்படுத்துகிறது. அத்துடன் காலாக்ஸிகளின் வடிவங்களைச் சிற்பியைப் போல் செதுக்கி, அவை ஒன்றையொன்று மோதிக் கொள்ளாதவாது அவற்றுள் இடைவெளிகளை ஏற்படுத்திக் கொண்டும் வருகிறது.

கிரிஸ்டொ·பர் கன்ஸிலிஸ் (வானோக்காளர், நாட்டிங்ஹாம் பல்கலைக் கழகம்)

அகிலத்தின் மர்மப் புதிர்களை ஆராயப் புகுந்த விஞ்ஞானிகள்

பிரபஞ்சத்தின் மர்மங்களை ஆராயப் புகுந்த காலிலியோ, ஐஸக் நியூட்டன், ஆல்பர்ட் ஐன்ஸ்டைன், ஜார்க் காமாவ், கார்ல் சேகன், சுப்ரமணியன் சந்திரசேகர், ஸ்டா·பென் ஹாக்கிங் ஆகிய விஞ்ஞான மேதைகளின் அணியில் நின்று, இப்போது இந்தியாவில் விஞ்ஞானப் பணி புரிந்து வருபவர், டாக்டர் ஜெயந்த் நர்லிகர்! உலகப் புகழ் பெற்ற நர்லிகர், வானோக்கியல், வானவியல் பெளதிகம், அகிலவியல் ஆகிய துறைகளுக்குத் [Astronomy, Astrophysics, Cosmology] பெருமளவு பங்கை அளித்துள்ளவர். பிரபஞ்சத் தோற்றத்தின் ஆதி வரலாற்றையும், பிற்பாட்டு விரிவையும் விளக்கும் பெரும்பான்மையோர் ஒப்புக் கொண்ட ‘பெரு வெடிப்பு அகிலவியல் நியதிக்குச் ‘ [Big Bang Cosmology Theory] சவால்விடும் முறையில், விஞ்ஞானிகள் வேறுபட்ட கோட்பாடுகளில் ஆராய்ச்சிகள் புரிந்திட வழி வகுத்தன,

ஜெயந்த் நர்லிகரின் விஞ்ஞான அடிப்படைப் பணிகள்!

ஜெயந்த் நர்லிகர் அகிலவியல் துறையில் ஆய்வுகள் புரியும் ஓர் ஆராய்ச்சி விஞ்ஞானி [Cosmology Researcher]. அகிலவியல் ஆய்வு பிரபஞ்சத்தின் பிரம்மாண்டமான அமைப்பைப் பற்றியது. பிரபஞ்சம் எத்துணை அளவு பெருத்த உடம்பை உடையது ? அது எத்தகைய உபரிப் பண்டங்களால் ஆக்கப்பட்டது ? ஒரு பெரும் பிரளயத்தில் இந்தப் பிரபஞ்சம் உண்டானதா ? அந்த முதல் நிகழ்ச்சிக்குப் பிறகு நேர்ந்த தொடர் விளைவுகள் யாவை ? அண்ட வெளியில் உயிர் ஜீவிகள் எவ்விதம், எங்கே தோன்றின ? பிரபஞ்சத்தின் இறுதி முடிவுதான் என்ன ? அகிலாண்டத்தின் மர்மமான, புதிரான, நூதனமான, விந்தையான இந்த வினாக்களுக்குப் பதில் தேடிய முற்கால விஞ்ஞானிகள், தேடிக் கொண்டிருக்கும் நூற்றுக் கணக்கான தற்கால விஞ்ஞானிகளின் வரிசையில் வருபவர், ஜெயந்த் நர்லிகர்!

நர்லிகர் தன் குருவான பிரிட்டிஷ் விஞ்ஞானி ஃபிரெட் ஹாயிலுடன் [Fred Hoyle (1915-2001)] இணைந்து ஆக்கி முடித்த ‘நெறிக்குட்படும் ஈர்ப்பு நியதியை ‘ [Conformal Theory of Gravity], ஹாயில்-நர்லிகர் ஈர்ப்பியல் நியதியாக [Hoyle-Narlikar Theory of Gravitation] தற்போது விஞ்ஞானச் சகபாடிகள் ஏற்றுக் கொள்கிறார்கள். குவஸார்ஸ் [போலி விண்மீன் கதிரலை எழுப்பிகள்], மிகுசக்தி வானியல் பெளதிகம், குவாண்டம் அகிலவியல், தூர மின்னாட்டம் [Quasars, High Energy Astrophysics, Quantum Cosmology, Distance Electrodynamics] ஆகிய விஞ்ஞானத் துறைகளுக்கு ஜெயந்த் நர்லிகர் பெருமளவில் தன் படைப்புகளை அளித்துள்ளார்.

பிரிட்டிஷ் மேதை ஃபிரெட் ஹாயிலுடன் நர்லிகர் செய்த ஆராய்ச்சிகள்

பிரபஞ்சத்தின் தோற்றத்தை விளக்கிய பிரிட்டிஷ் விஞ்ஞானி டாக்டர் ·பிரெட் ஹாயில்தான் [Dr. Fred Hoyle (1915-2001)] ‘பொதுநிலை அமைப்புப் பிரபஞ்ச பெரு வெடிப்பு நியதி ‘[Standard Theory of the Origin of Universe (The Big Bang Theory)] என்னும் பதங்களை முதலில் பறைசாற்றியவர்! ஆனால் அந்த நியதியை ஏற்றுக் கொள்ளாது ஹாயில் புறக்கணித்தவர்! அதற்கு மாறாக ஃபிரெட் ஹாயில் தனது ‘நிரந்தரநிலை அமைப்புப் பிரபஞ்சத்தை’ [Steady State Theory of the Universe] பிரகடனம் செய்தார் ! ஆனால் தற்போது ஹாயிலின் கோட்பாடை நம்புவோர் எண்ணிக்கை சிறிது சிறிதாய்க் குறிந்து கொண்டே வருகிறது!

ஹப்பிள் விண்ணோக்கி கண்ட சூப்பர்நோவா

ஹாயில் நர்லிகர் இருவரும் பறைசாற்றிய ‘நிரந்தரநிலை நியதி ‘ ஆல்பர்ட் ஐன்ஸ்டைன் ஆக்கிய ‘பொது ஒப்புமை நியதியின் ‘ [General Theory of Relativity] அரங்கிற்குள் அடங்கிப் பிண்டம் தொடர்ந்து உருவாகும் [Continuous Creation of Matter] ஒரு நடப்பானக் கோட்பாடை முதன்முதலில் கூறியது. ஜெயந்த் நர்லிகரும் ·பிரெட் ஹாயிலும் படைத்த ‘பிரபஞ்சத் தோற்றத்தின் நிரந்தரநிலை நியதியை ‘ [Steady State Theory of the Universe], நம்பி வருபவர் எண்ணிக்கை மிகவும் குறைந்து விட்டது ! காரணம் பெரு வெடிப்பு நியதியை நம்பி வானாராய்ச்சி செய்து வருபவர்கள், புதிதாகக் கண்டுபிடித்த கருமைப் பிண்டம், கருமைச் சக்தி ஆகிய கோட்பாடுகள் பெரு வெடிப்பு நியதியின் நிழலாகப் பின் தொடர்கின்றன.

பிரபஞ்சக் கூண்டுக்குள்ளே இருக்கும் மர்மப் பொருட்கள் என்ன ?

காரிருள் விண்வெளி எங்கணும் குவிந்த குடைபோல் பரந்து விரிந்து கிடக்கும் பிரபஞ்சத்தின் கூண்டுக்குள்ளே சிதறிக் கிடக்கும் பொருள்கள் என்ன ? சூரியன், சூரிய மண்டலம், சூரிய மண்டலத்தைப் போல் பல்லாயிரம் கோடி விண்மீன்களின் ஒளிக் குடும்பங்கள் கொண்ட நமது பால்மய வீதி, பால்மய வீதி போல் கோடான கோடி ஒளிமய மந்தைகள் கொண்டது பிரபஞ்சம் ! அவை எல்லாம் போக கருமையாகத் தெரியும் பரந்த கரு விண்ணில் உள்ளவைதான் என்ன ? அவை எல்லாம் சூனிய மண்டலமா ? வெறும் இருள் மண்டலமா?

சுமாராகச் சொல்லப் போனால் பிரபஞ்சத்தில் 75% கருமைச் சக்தி (Dark Energy), 21% கருமைப் பிண்டம் (Dark Matter) 4% தான் சூரிய மண்டலம் போன்ற ஒளிமய மந்தைகள் (Normal Matter). விபரமாகச் சொன்னால் கருமைச் சக்தி 65%, கருமைப் பிண்டம் 30%, விண்மீன்கள் 0.5% [Stars], உலவும் ஹைடிரஜன், ஹீலியம் சேர்ந்து 4% [Free Hydrogen & Helium], கன மூலகங்கள் 0.03% [Heavy Elements], மாய நியூடிரினோக்கள் 0.3% [Ghostly Neutrinos]. இவற்றில் நமக்குப் புரியாமல் புதிராகப் இருக்கும் கருமைப் பிண்டம் என்பது என்ன ? ஒளிச்சக்தி, ஒலிச்சக்தி, மின்சக்தி, காந்த சக்தி, அணுசக்தி, ஈர்ப்புச் சக்தி போலத் தெரியும் பிரபஞ்சத்தின் புதிரான கருமைச் சக்தி என்பது என்ன ?

கருமைப் பிண்டம் புரிவதென்ன ? கருமைச் சக்தி புரிவதென்ன ?

சூரியனைப் போன்று கோடான கோடி விண்மீன்களைக் கொண்ட நமது பால்மய வீதியின் விண்மீன் எதுவும் அந்த காலாக்ஸியை விட்டு வெளியே ஓடி விடாதபடி ஏதோ ஒன்று கட்டுப்படுத்தி வருகிறது. அதாவது அத்தனை விண்மீன்களின் அசுரத்தனமான ஈர்ப்பு ஆற்றல்களை அடக்கிக் கட்டுப்படுத்த ஏதோ பேரளவு ஆற்றல் உள்ள ஒன்று அல்லது பல பிண்டம் (Matter) அல்லது பிண்டங்கள் இருக்க வேண்டும் என்று விஞ்ஞானிகள் ஊகித்தனர். நமது பால்மய காலாக்ஸியில் அவை எங்கே மறைந்துள்ளன என்று ஆழ்ந்து சிந்தித்த போதுதான் காலாஸியில் கண்ணுக்குப் புலப்படாத கருமைப் பிண்டத்தின் இருப்பு (The Existance of Dark Matter) பற்றி அறிய முடிந்தது.

1930 இல் டச் வானியல் மேதை ஜான் ஓர்ட் (Jan Oort) சூரியனுக் கருகில் விண்மீன்களின் நகர்ச்சிகளை ஆராயும் போது, முதன்முதல் கரும் பிண்டத்தின் அடிப்படை பற்றிய தன்மையை அறிந்தார். அவரது அதிசய யூகம் இதுதான். நமது பால்மய வீதி போன்று, பல்லாயிர ஒளிமய மந்தைகள், (Galaxies) மந்தை ஆடுகள் போல் அடைபட்ட ஒரே தீவுகளாய் சிதைவில்லாமல் தொடர்ந்து நகர்கின்றன. அதாவது அந்த மந்தை அண்டங்கள் வெளியேறாதபடி ஒன்றாய் குவிந்திருக்க மகாப் பெரும் கனமுள்ள பொருட்கள் அவற்றில் நிச்சயம் பேரளவில் இருக்க வேண்டும் என்று நம்பினார். கனமான அந்த பொருட்களே விண்மீன்கள் தப்பி ஓடாதபடி, காலாக்ஸின் மையத்தை நோக்கிக் கவர்ச்சி விசையால் இழுத்து வைக்கின்றன என்று திட்டமாகக் கண்டறிந்தார்.

1998 ஆண்டுக்கு முன்னால் “கருமைச் சக்தி” என்னும் ஓர் விஞ்ஞானக் கருத்தை யாரும் கேள்விப்பட்ட தில்லை ! கருமைச் சக்தி அண்டங்களின் ஈர்ப்பு விசையைப் (Gravity) போல ஒருவித விலக்கு விசையே (Anti-Gravity) ! அது முக்கியமாகக் காலாக்ஸிகளின் நகர்ச்சியைக் கட்டுப் படுத்துகிறது. அத்துடன் காலாக்ஸிகளின் வடிவங்களைச் சிற்பி போல் செதுக்கி, அவை ஒன்றையொன்று மோதிக் கொள்ளாதவாது அவற்றுள் இடைவெளிகளை ஏற்படுத்தியும் வருகிறது என்று கூறுகிறார், பிரிட்டன் நாட்டிங்ஹாம் பல்கலைக் கழகத்தின் பேருரையாளரும், வானோக்காளரும் ஆகிய கிரிஸ்டொஃபர் கன்ஸிலிஸ் (Christopher Conselice)

Computer Model of Dark Energy In Supernova

கருமைப் பிண்டமும், கருமைச் சக்தியும் (Dark Matter & Dark Energy) பிரபஞ்சப் படைப்பின் கண்ணுக்குத் தெரியாத மர்மக் கருவிகள். கண்ணுக்குத் தெரியாத படைப்பு மூலத்தின் பிரபஞ்ச இயக்கக் கருவிகள் அவை இரண்டும் ! நியூட்டன் கண்டுபிடித்த ஈர்ப்பு விசை விண்மீனையும் அண்டங்களையும் இறுக்கிப் பிடித்துக் கொண்டு ஓர் குறிப்பிட்ட விண்வெளிச் சூழலில் இயக்கிய வண்ணம் உள்ளது. அதுபோல கருமைப் பிண்டத்தின் அசுரக் கவர்ச்சி விசை காலாக்ஸியில் உள்ள விண்மீன்கள் தமக்குரிய இருக்கையில் இயங்கி எங்கும் ஓடிவிடாதபடி இறுக்கிப் பிடித்துக் கொண்டு வருகிறது.

கருமைச் சக்தி பிரபஞ்சத்தில் என்ன செய்கிறது ? பிரபஞ்சப் பெரு வெடிப்பில் சிதறிச் சென்று உண்டான காலாக்ஸிகள் நியூட்டனின் நியதிப்படி நகரும் தீவுகளாய் மிதந்து செல்கின்றன ! ஆற்றல் மிக்க மிகப் பெரும் தொலைநோக்கிகள் மூலமாக நோக்கும் போது, பிரபஞ்ச விளிம்புகளில் நகரும் தொலைத்தூர காலாக்ஸியின் வேகம் மிகுந்து விரைவாகுவதை (Acceleration of Galaxies) விஞ்ஞானிகள் கண்டனர் ! நியூட்டனின் அடுத்தொரு நியதிப்படி தனிப்பட்ட தொரு விசையின்றி காலாக்ஸிகளின் வேகம் மிகுதியாக முடியாது. அந்த காரண-காரிய யூகத்தில்தான் காலாக்ஸிகளைத் தள்ளும் கருமைச் சக்தியின் இருப்பை விஞ்ஞானிகள் உறுதியாகச் சிந்தித்துக் கூறினர் !

ஒளிமந்தைக் கொத்துகள்

பிரபஞ்சத்தின் கண்ணுக்குத் தெரியாத மர்மக் கருவிகள்

பிரபஞ்சத்தின் மர்ம விதிகள், புதிரான நியதிகள் பல இன்னும் நிரூபிக்கப் படாமல்தான் இருக்கின்றன. பிரபஞ்சத்தின் விரிவு அல்லது சுருக்கத்தைத் தீர்மானிக்க கருமைப் பிண்டத்தின் இருப்பைத் தெளிவு படுத்தும் பிரச்சனை ! கருமைப் பிண்டம் “காணாத திணிவு” (Missing Mass) என்றும் அழைக்கப் படுகிறது. பிரபஞ்சப் பொருட்களின் 90% திணிவாக கருமைப் பிண்டம் கருதப் படுகிறது. அவை பெரும்பாலும் செத்த விண்மீன்கள், கருங்குழிகள், புலப்படாத துகள்கள் (Dead Stars, Black Holes & Unknown Exotic Particles). கண்ணுக்குத் தெரியும் பொருட்களின் மீது படும் அசுரக் கவர்ச்சி விசையை அறியும் போது, விஞ்ஞானிகள் கண்ணுக்குத் தெரிவதை விட, மிகையாகத் தெரியாத பொருட்கள் இருப்பதை நம்புகிறார்கள். அது மெய்யானால் பிரபஞ்ச விரிவைத் தடுத்து மீட்கக் கூடிய பேரளவுத் திணிவு உள்ளதென்றும், அது முடிவாகத் திரண்டு பிரளயத் சிதைவடைந்து (Eventual Collapse) “மூடிய பிரபஞ்ச நியதியை” (Closed Universe Theory) உறுதியாக்கச் செய்கிறது.

சூப்பர்நோவா முடிச்சுகள்

1998 இல் விஞ்ஞானிகள் பிரபஞ்சத்தில் சுமார் 75% மேவி அகிலத்தைக் கையிக்குள் இறுக்கிப் பித்து நம்மைச் சுற்றியுள்ள கருமைச் சக்தியைப் பற்றிக் கண்டுபிடித்தார்கள் ! அதன் இருப்பைத் தெரியாது நாம் குருடராய் இருந்திருக்கிறோம். பிரபஞ்சக் கூண்டைப் பெருமளவில் ஆக்கிரமித்துள்ளதைத் தவிர, இந்தக் கருமைச் சக்தியின் நிலைப்புத் தன்மை நீடித்தால், தற்போதைய பௌதிகக் கோட்பாடுகள் விருத்தி செய்யப்பட வேண்டும்.

பிரபஞ்சத்தில் கருமைச் சக்தி ஆட்சியின் கைத்திறன் !

காலாக்ஸியின் தோற்றக் கோட்பாடுகளில் இடையிடையே சேராமல் இருக்கும் ஐயப்பாடுகளை இணைக்கும் ஓர் இணைப்பியாக கருமைச் சக்தி எண்ணப் படலாம். அவற்றில் ஒரு முடிவு காலாக்ஸிகளின் ஈர்ப்பாற்றல் விரிவைத் தடுப்பதில்லை (Galaxies’s Gravity does not resist Expansion). சுருக்கமாக விளக்கினால் கீழ்க்காணும் முறையில் கருமைச் சக்தியைப் பற்றிச் சொல்லலாம் :
1. கண்ணுக்குப் புலப்படாமல் பிரபஞ்ச முழுமையாக ஓர் அசுர விலக்கு விசையாக (Anti-Gravity Force) ஆட்சி செய்யும் கருமைச் சக்தி “அகில விரைவாக்கி” (Cosmic Accelerator) என்று குறிப்பிடப் படுகிறது.
2. பிரபஞ்சத்துக் குள்ளே இருக்கும் பொருட்களின் மீது கருமைச் சக்தி விளைவிக்கும் இரண்டாம் தரப் பாதிப்புகள் (Secondary Effects) என்ன வென்றால் : பெரும்பான்மை அளவில் பிண்டத்தின் நுண்மை துகள் சீரமைப்பை (Filigree Pattern of Matter) அறிய உதவியது. சிறுபான்மை அளவில் ஆறு மில்லியன் ஆண்டுகளுக்கு முன்னே “காலாக்ஸி முந்திரிக் கொத்துகள்” வளர்ச்சியை கருமைச் சக்தி நெறித்தது (Choked off the Growth of Galaxy Clusters)!
3. மிக்க சிறிய அளவில் கருமைச் சக்தி காலாக்ஸிகள் ஒன்றுடன் ஒன்று இழுத்துக் கொள்வதையும், மோதிக் கொள்வதையும், பின்னிக் கொள்வதையும் குறைத்துள்ளது ! அவ்வியக்கங்கள் காலாக்ஸிகள் உருவாகச் சிற்ப வேலை புரிகின்றன. கருமைச் சக்தி வலுவற்ற தாகவோ, வல்லமை யுற்றதாகவோ இருந்திருந்தால், நமது பால்மய காலாக்ஸி மெதுவாக உருவாகி இருக்கும் ! அதனால் நமது பூகோளத்தில் நிரம்பியுள்ள “கன மூலகங்கள்” (Heavy Elements) பிணைந்து கொண்டு தாதுக்களாய்ச் சேராமல் போயிருக்கும்.
விரைவாய் விரியும் பிரபஞ்சம்

(தொடரும்)

*********************

1. https://youtu.be/xp-8HysWkxw
2. https://youtu.be/7h_mB0WW0jM
3. https://youtu.be/gk8CxK0SJu4
4. https://youtu.be/bEz1-bLoOJM
5. https://youtu.be/BWn29kYjOZQ

தகவல் :

Picture Credit : 1. Astronomy (August 21, 2007) 2. Universe 6th Edition (2002) 3. National Geographic Encyclopedia of Space (2005) 5. 50 Years of Space (2004)
1. Astronomy Magazine : 50 Greatest Mysteries of the Universe (Aug 21, 2007)
2. Universe By Roger Freedman & William Kaufmann III (2002)
3. National Geographic Encyclopedia of Space By Linda Glover.
4. The World Book Atlas By World Book Encyclopedia Inc (1984)
5. Scientific Impact of WMAP Space Probe Results (May 15, 2007)
6. BBC News – Hubble Obtains Deepest Space View By Dr. David Whitehouse, Science Editor (Jan 16, 2004)
7. http://www.thinnai.com/?module=displaystory&story_id=40301192&format=html(பிரபஞ்ச விரிவை நோக்கிய எட்வின் ஹப்பிள்)
8. http://www.thinnai.com/?module=displaystory&story_id=40310231&format=html(ஜான் ஹெர்ச்செல் கண்டுபிடித்த பால்மய வீதி காலக்ஸி, நெபுளாக்கள்!
9. http://www.thinnai.com/?module=displaystory&story_id=40211102&format=html(பிரபஞ்சப் பிறப்பை விளக்கிய ஜார்ஜ் காமாவ் [George Gamow (1904-1968)]
10. Cosmic Collision Sheds Light on Mystery on Dark Matter [www.dailygalaxy.com/my_weblog/2007/05/dark_matter_hub.html(May 16, 2007)
11. “Beyond Einstein” Search for Dark Energy of the Universe
[www.dailygalaxy.com/my_weblog/2007/07/beyond-einstein.html (July 10, 2007)
1. Dark Matter & Dark Energy: Are they one & the Same ? Senior Science Writer [www.space.com/scienceastronomy/mystery_monday_040712.html(April 12, 2007)
13 Dark Energy By LSST Observatory – The New Sky (www.lsst.org/Science/darkenergy.shtml)
1. Stephen Hawking’s Universe By John Boslough (1985)
2. The Hyperspace By: Michio Kaku (1994)
3. The New York Public Library Science Desk Reference (1995)
4. Scientific American “The Cosmic Grip of Dark Energy” By Christopher Conselice (Feb 2007)
5. http://hubblesite.org/hubble_discoveries/dark_energy/
6. http://hubblesite.org/hubble_discoveries/dark_energy/de-what_is_dark_energy.php
7. http://science.nasa.gov/astrophysics/focus-areas/what-is-dark-energy/
8. https://en.wikipedia.org/wiki/Dark_energy[May 12, 2016]
******************
1. Jayabarathan (jayabarathans@gmail.com) May 14, 2016 [R-1]
May 18, 2016
ஒபாமாவின் ஜப்பான் விஜயம்

நாகேஸ்வரி அண்ணாமலை

1941-லிருந்து 1945 வரை நடந்த இரண்டாவது உலகப் போரில் ஜப்பானைப் பணியவைக்க அமெரிக்கா ஜப்பானின் ஹிரோஷிமா என்னும் ஊரின் மீது அணுகுண்டை வீசியது. மனித வரலாற்றிலேயே முதல் முதலாக வீசப்பட்ட அணுகுண்டு இது. (அமெரிக்கா வெடித்த இரண்டு அணுகுண்டுகளைத் தவிர அதன் பிறகு எந்த நாடும் மற்ற எந்த நாட்டின் மீதும் அணு குண்டு வெடிக்கவில்லை.) இந்த அணுகுண்டு அந்நகரின் எழுபது சதவிகிதம் மக்களைக் கொன்றது அல்லது காயப்படுத்தி முடமாக்கியது. அப்போது ஏற்பட்ட அணுக் கதிர் வீச்சினால் அதன் பிறகு ஒரு தலைமுறை மக்கள் பாதிக்கப்பட்டனர். ஹிரோஷிமாவில் போட்டது போதாதென்று மூன்று நாட்களுக்குப் பிறகு கொகுரா என்னும் ஊரைக் குறிவைத்து அங்கு காலநிலை சரியில்லாததால் நாகசாகி மீது இன்னொரு முறை அணுகுண்டை அமெரிக்கா வீசியது. முதலில் மூன்று ஊர்களைத் தேர்ந்தெடுத்து, காலநிலைக்குத் தகுந்தாற்போல் இரண்டில் அணுகுண்டை வீச முடிவுசெய்ததாம் அமெரிக்கா.

குண்டுவீச்சால் தாக்கப்பட்ட இடங்களில் ஒன்றை அப்படியே வைத்திருக்கிறார்கள். 1996-இல் ஜப்பானுக்குச் சென்றிருந்த எங்கள் குடும்பமும் அதைப் பார்வையிட்டது. அதற்கு அருகிலேயே அந்தக் கொடூர சம்பவத்தால் நிகழ்ந்த கோரக் காட்சிகளைக் கொண்ட ஒரு காட்சியகமும் இருக்கிறது.

அமெரிக்க ஜனாதிபதி ஒபாமா மே மாதம் 27-ஆம் தேதி ஹிரோஷிமா செல்லவிருக்கிறார். அங்கு நடக்கப் போகும் ஜி-8 நாடுகளின் மாநாட்டில் கலந்துகொள்ளப் போகிறார். ஹிரோஷிமாவில் போரில் நாசமடைந்த பகுதியில் இருந்த ஒரு கட்டடத்தை நினைவுச் சின்னமாக ஜப்பான் வைத்திருக்கிறது. ஒபாமா அங்கு விஜயம் செய்ய விரும்புகிறார். பதவியில் இருக்கும்போது ஹிரோஷிமாவுக்குப் போகும் முதல் அமெரிக்க ஜனாதிபதி ஒபாமாதான். ஜனாதிபதி பதவிக்குப் போட்டியிட்டபோது தன்னுடைய தேர்தல் பிரச்சாரத்திலேயே ஒபாமா அணு ஆயுதங்கள் இல்லாத உலகை உருவாக்கப் பாடுபடுவேன் என்று அமெரிக்க மக்களுக்கு வாக்களித்தார். பதவிக்கு வந்த பிறகும் அம்மதிரியான முயற்சிகளில் அவர் இறங்கியதற்காக 2009-இல் அவருக்கு அமைதிக்கான நோபல் பரிசு வழங்கப்பட்டது. (இன்னொரு அணு ஆயுதப் போரை அவர் தொடங்காமல் இருப்பதற்காகவும் நோபல் பரிசு வழங்கப்பட்டதாகக் கூறுவோரும் உண்டு.)

ஒபாமா ஜப்பானுக்குச் சென்றாலே அமெரிக்கா ஹிரோஷிமாவில் குண்டு போட்டது தவறு என்று ஒப்புக்கொள்ளுவதாக இருக்கிறது என்று சில அமெரிக்கர்கள் ஒபாமா அங்கு போவதை ஆட்சேபிக்கிறார்கள். மேலும் அப்போது அமெரிக்க ஜனாதிபதியாக இருந்த ட்ரூமன் ஜப்பான் மீது அணுகுண்டு வீச எடுத்த முடிவு சரியானதல்ல என்று அமெரிக்கா இப்போது நினைப்பதாகவும் கொள்ளலாம் என்று ஒபாமாவின் ஹிரோஷிமா விஜயத்தை எதிர்ப்பவர்கள் கூறுகிறார்கள். ஆனால் வெள்ளை மாளிகையோ, ‘ஜப்பான் பிரதமர் ஷின்ஷோ அபே 1945-இல் அமெரிக்கா ஜப்பான் மீது அணுகுண்டு வீசியதற்கு இப்போது அமெரிக்காவிடமிருந்து எந்தவித வருத்தம் தெரிவிப்பதையும் எதிர்பார்க்கவில்லை என்றும் அதில் இறந்தவர்களுக்கு மரியாதை தெரிவிக்கும் பொருட்டுத்தான் சாமாதான விரும்பியான ஒபாமா அங்கு போக விரும்புகிறார் என்றும் உலகில் ஹிரோஷிமாவில் நடந்தது போன்ற கொடூரங்கள் இனியும் நிகழும் வாய்ப்பு இல்லையென்று சொல்ல முடியாது என்று உலகிற்கு உணர்த்துவதற்காகவும் போகிறார்’ என்று ஒரு அறிக்கை வெளியிட்டது.

அமெரிக்கா ஜப்பான் மீது குண்டுவீச எடுத்த முடிவு சரிதானா என்ற வாதம் இப்போதும் நிகழ்ந்துகொண்டிருக்கிறது. 1995-இல் அந்தக் கொடூர சம்பவம் நடந்து ஐம்பது ஆண்டுகள் நடந்ததை நினைவூட்டும் வகையில் அமெரிக்கத் தலைநகர் வாஷிங்கடனில் உள்ள ஸ்மித்ஸோனியன் மியுசியத்தில் குண்டுவீசப் பயன்படுத்தப்பட்ட எனோலா கே (Enola Gay) என்னும் பி-29 விமானத்தை பொதுமக்கள் பார்வைக்கு வைப்பதில் கருத்து வேறுபாடுகள் ஏற்பட்டு, பின் அதனுடைய சில பகுதிகள் மட்டும் வைக்கப்பட்டனவாம். அப்படி அமெரிக்கா குண்டு வீசாமல் இருந்திருந்தால் அமெரிக்கா ஜப்பானின் ஒகினாவா பகுதியை முற்றுகையிட்டிருக்கும், அதனால் பல அமெரிக்க வீரர்களும் ஜப்பானின் குடிமக்கள் பலரும் இறந்திருப்பார்கள், அதைத் தவிர்ப்பதற்காக குண்டு வீசப்பட்டது சரியே என்று இரண்டாவது உலகப் போரில் கலந்துகொண்ட ராணுவ வீரர்கள் அபிப்பிராயப்பட்டார்களாம். அதனால் அந்த விமானத்தை ஸ்மித்ஸோனியன் மியுசியத்தில் பொதுமக்கள் பார்வைக்கு வைக்கும் எண்ணத்தைக் கைவிட்டார்களாம். (எனோலா கே என்ற பெயர் அந்த விமானத்திற்கு எப்படி வைக்கப்பட்டது தெரியுமா? அதை ஓட்டிக்கொண்டு போய் குண்டைப் போட்ட விமானி தைரியசாலியான தன் தாயின் பெயரை அதற்குத் தேர்ந்தெடுத்தாராம்.)

அந்த விமானம் ஸ்மித்ஸோனியன் மியுசியத்திற்குப் பதில் டல்லாஸ் விமான நிலையத்திற்கு அருகில் உள்ள ஒரு மியுசியத்தில் வைக்கப்பட்டிருக்கிறது. குண்டு வீசியதால் ஏற்பட்ட விளைவுகளைப் பற்றிச் சரியாக விவாதிப்பதில்லை என்றும் குண்டு வீசியதின் சரித்திரப் பின்னணியையே மாற்றிவிட்டார்கள் என்றும் ஒரு சிலர் வாதிக்கிறார்கள். குண்டு வீசுவதாக முடிவு எடுக்கப்பட்டதும் ஏன் முதலில் மனிதர்கள் யாரும் இல்லாத பகுதியில் வெடித்து புதிய ஆயுதமான அணுகுண்டினால் ஏற்படப் போகும் விபரீத விளைவுகளை ஜப்பானியர்களுக்கு உணர்த்தியிருக்கலாமே என்கிறார்கள் இவர்கள். (அமெரிக்காவில் மனிதர்கள் இல்லாத இடத்தில் அணுகுண்டை வெடித்து அமெரிக்கா அதனால் ஏற்படும் விளைவுகளைச் சோதித்துப் பார்த்தது. ஆனால் ஜப்பானியர்களுக்கு அது பற்றித் தெரிவிக்கவில்லை.) ஜப்பான் சரணடைந்துவிடும் என்பது தெரிந்த பிறகும் நாகசாகி மீதும் அமெரிக்கா குண்டு வீசியது எந்த விதத்தில் நியாயம் என்கிறார்கள் இவர்கள்.

ஜப்பானிலும் அமெரிக்கா குண்டு போடுவதற்கு ஜப்பானின் எந்தச் செய்கை தூண்டுகோலாக அமைந்தது என்று சொல்வதில்லை. அமெரிக்கா குண்டு வீசியதற்கு முன் ஜப்பான் அரசு போரில் செய்த கொடும் செயல்களைப் பற்றி பள்ளிப் பாடங்களில் சரியாகச் சொல்லிக் கொடுப்பதில்லையாம். ‘இரண்டாவது உலக யுத்தத்தின்போது ஆசியாவில் ஜப்பான் இழைத்த கொடுமைகள் பற்றியோ அமெரிக்காவின் பெர்ள் துறைமுகத்தை ஜப்பான் முற்றுகை இட்டதைப் பற்றியோ ஹிரோஷிமாவில் உள்ள நினைவுச் சின்னத்திற்கு அருகில் உள்ள மியுசியத்தில் எதுவும் கூறப்படவில்லை. ஒபாமா அந்த இடத்திற்கு விஜயம் செய்தால் போரில் கொடூரமாகத் தண்டிக்கப்பட்டதும் கஷ்டப்பட்டதும் ஜப்பான்தான் என்று கூறும் ஜப்பானின் வலதுசாரிகளின் கூற்று சரியாகிவிடும் என்று அமெரிக்காவிலுள்ள ஒபாமா எதிர்ப்பாளர்கள் கூறுகிறார்கள்.

இந்தக் கொடூர சம்பவம் நடந்து முடிந்த சில ஆண்டுகளிலேயே அமெரிக்காவும் ஜப்பானும் நண்பர்கள் ஆகிவிட்டன. துயரங்களுக்கு ஆளானவர்கள் அப்பாவிப் பொதுமக்கள்தான். சமாதான விரும்பியான ஒபாமா தன்னுடைய பதவிக் காலத்தில் எந்தப் புதிய படையெடுப்பையும் (ட்ரோன் மூலம் பயங்கரவாதிகளோடு பாமர குடிமக்களையும் அமெரிக்கா கொன்று வருகிறது ஏன்பது வேறு விஷயம்) தொடங்கவில்லை. ஈரான் மீது படையெடுக்கும்படி எத்தனையோ நிர்பந்தங்கள் வந்தும் ஒபாமா அந்த நாட்டோடு பேச்சுவார்த்தையின் மூலம் சமாதானம் செய்துகொண்டார். ஒபாமாவிற்குப் பதில் வேறு யார் ஜனாதிபதியாக இருந்திருந்தாலும் இதற்குள் அமெரிக்கா இன்னும் இரண்டு யுத்தங்களையாவது தொடங்கியிருக்கும். நல்லவேளை, ஒபாமா அமெரிக்க ஜனாதிபதியாக இருக்கிறார், உலகம் யுத்த பயத்திலிருந்து ஒருவாறு தப்பித்துக்கொண்டிருக்கிறது.

சமாதான விரும்பியான ஒபாமா யுத்தத்தின் கொடூரச் சின்னமான ஹிரோஷிமாவிற்குப் போவது சரியே. உலகம் யுத்தத்தின் கோரத்தை மறந்துவிடக்கூடாது. இதை அமெரிக்கா தவறே செய்யாது என்று மார்தட்டும் ஒபாமா எதிர்ப்பாளர்கள் ஒப்புக்கொண்டேயாக வேண்டும்

May 18, 2016
துணைவஞ்சி

-முனைவர் இராம. இராமமூர்த்தி

முன்னுரை: புறத்திணைகள் ஏழெனத் தொல்காப்பியமும், பன்னிரண்டெனப் பன்னிருபாட்டியலும், புறப்பொருள் வெண்பாமாலையும் சுட்டுகின்றன. தொல்காப்பியங் கூறிய ஏழுதிணைகளைப் பன்னிரண்டாகப் பகுத்துரைப்பதோடு சில திணைவிளக்கங்களிலும் புறப்பொருள் வெண்பா மாலை வேறுபடுகின்றது. குறிப்பாகக் காஞ்சித் திணையமைதியில் தொல்காப்பியமும் புறப்பொருள் வெண்பா மாலையும் பெரிதும் வேறுபடுகின்றன.

காஞ்சிதானே பெருந்திணைப் புறனே
பாங்கருஞ் சிறப்பிற் பன்னெறி யானும்
நில்லா வுலகம் புல்லிய நெறித்தே. (தொல்: பொருள்: 67)

என நிலையாமை குறித்துத் தொல்காப்பியங்கூற,

வேஞ்சின மாற்றான் விடுதர வேந்தன்
காஞ்சிசூடிக் கடிமனை கருதின்று. (புறப்: 61)

எனப் பகை எதிர்நிலையைப் புறப்பொருள் வெண்பா மாலை கூறும். மேலும், பொதுவியல், கைக்கிளை, பெருந்திணைப் படலங்கள் புறப்பொருள் வெண்பா மாலையான் திணைகளாக வகுக்கப்பெற்றன. இந்நிலையில் இப்பாடல்களுக்கு உரைவகுத்த உரைகாரர், அவர் தாம் மேற்கொண்ட மதத்திற்கேற்பத் (கொள்கை) திணை, துறை வகுப்பர். இதனாற் சில பாடல்கட்கு இரண்டு மூன்று துறைகள் வகுக்கப்படுவதுமுண்டு. இந்நிலை அகப்பாடல்கட்கும் விலக்கன்று.

புறநானூற்றுப் பாடல்கட்கு வகுக்கப்பெற்றுள்ள திணை, துறைகள், பெரும்பாலும் தொல்காப்பியம், பன்னிருபாட்டியல், புறப்பொருள் வெண்பா மாலை போன்ற நூல்களில் ஏதேனும் ஒன்றைப் பின்பற்றி யிருப்பதைக் காணலாம். இந்நூல்களுள் கூறப்படாத துறைகளும் இருக்கலாம். அங்ஙனம் காணப்படுகின்ற ஒரு துறையே ’துணைவஞ்சி.’ இதனைக் குறித்தே இக்கட்டுரையாளர் ஈண்டுச் சிந்திக்கின்றார்.

துணைவஞ்சித் துறையில் அமைந்துள்ள பாடல்களாகப் புறநானூற்றில் ஆறு பாடல்கள் இடம்பெற்றுள்ளன. அவை, 36, 45, 46, 47, 57, 213 என்ற எண்களில் அமைந்துள்ளன. 36-ஆம் புறப்பாடல் சோழன் குளமுற்றத்துத் துஞ்சிய கிள்ளிவளவனை ஆலத்தூர் கிழார் பாடியது. 45-ஆம் பாடல் சோழன் நலங்கிள்ளியையும், நெடுங்கிள்ளியையும் கோவூர் கிழார் பாடியது. 46-ஆம் பாடல் சோழன் குளமுற்றத்துத் துஞ்சிய கிள்ளிவளவனைக் கோவூர் கிழார் பாடியது. 47-ஆம் பாடல் இளந்தத்தன் எனும் புலவரைக் காப்பான்வேண்டி, நெடுங்கிள்ளியைக் கோவூர் கிழார் பாடியது. 57-ஆம் பாடல் இலவந்திகைப் பள்ளித் துஞ்சிய பாண்டிய நன்மாறனைக் காவிரிப்பூம்பட்டினத்துக் காரிக்கண்ணனார் பாடியது. 213-ஆம் பாடல் கோப்பெருஞ்சோழனைப் புல்லாற்றூர் எயிற்றியனார் பாடியது. இவ்வகைப் பாடல்களின் பொருளமைதியைக் காணப் புகுமுன் துணைவஞ்சியின் இலக்கணத்தைக் காண்டல் இன்றியமையாதது.

துணைவஞ்சி: இப்பெயர் மாத்திரையானே, இத்துறை வஞ்சித்திணையின் பாற்படும் என்பதனை நன்கறியலாம். ஆனால், துணைவஞ்சி எனும் துறைப்பெயர், தொல்காப்பியப் புறத்திணை நூற்பாக்களில் ஒன்றிற்கூட இடம்பெறவில்லை. தொல்காப்பியர் ‘இயங்குபடை அரவம்’ முதலாக ‘அழிபடை தட்டோர் தழிஞ்சி’யொடு துறை பதின்மூன்றே என வஞ்சித்திணையின் துறையாமாறு சுட்டுவர். ஈண்டுத் துணைவஞ்சி என்ற பெயரான் துறையொன்றும் இடம்பெறவில்லை.

’வாடா வஞ்சி’ முதலாக ’நல்லிசை வஞ்சி’ யீறாக இருபத்தொரு துறைகளையே புறப்பொருள் வெண்பா மாலை சுட்டுகின்றது. இவ்வாசிரியரும் துணைவஞ்சியெனத் துறையொன்றையும் வகுக்கவில்லை. இஃதிவ்வாறாக, துணைவஞ்சி குறிக்கப்பெறும் இடத்தைக் காண்போம்.

’கழிபெருஞ் சிறப்பின் துறைபதின் மூன்றே’ என்ற அடிக்குச் சிறப்புரை வரைந்த இளம்பூரணரே, முதன்முதலில் இன்னும் ”கழிபெருஞ்சிறப்பின்” என்றமையின் பேரரசர் துணையாக வந்த குறுநில மன்னரும் தாமும் பொலிவெய்திப் பாசறை நிலை உரைத்தலும் பிறவும் கொள்க. இவை பற்றியன துணைவஞ்சி. “நீயே புறவின் அல்லல்” (புறம்: 46) “வள்ளியோர்ப் படர்ந்து” (புறம்: 47) என்னும் புறப்பாட்டுகளில் காண்க” எனவுரைப்பர் (தொல்.பொருள். இளம். ப.94). இதனால், பேரரசர் துணையாகவந்த குறுநில மன்னரும் பேரரசரும் பொலிவெய்திப் பாசறைநிலையுரைத்தலும் பிறவும் துணைவஞ்சி என்பது இளம்பூரணர் கருத்துரையாகும்.

இனி, முன்குறித்த பாடல்கட்கு உரைவரைந்த பழையவுரைகாரர், ‘சந்து செய்வித்தலின் துணைவஞ்சி’யாயிற்றென்பர். இவர் கருத்துப்படி, போர் நிகழாவாறு தடுக்கும் நிலைமை – அமைதிப்படுத்தும் நிலைமை – துணைவஞ்சியெனச் சுட்டப்பெறுதல் காண்க. புறநானூற்றுப் பழையவுரைகாரர், இளம்பூரணர் கருத்தையே ஏற்றுக்கொண்டு துறைவிளக்கம் தந்துள்ளமை இதனாற் தெள்ளிதிற் புலனாகும்.

அடுத்து, மேற்குறித்த புறப்பாடல்களின் பொருளமைதியையும், அவை எழுந்த சூழ்நிலையையுங் காண்போம். இத்துறையில் முதலிற் காணலாகும் பாடல் (36) கருவூர் முற்றியிருந்த சோழன் குளமுற்றத்துத் துஞ்சிய கிள்ளிவளவனை ஆலத்தூர் கிழார் பாடியதாகும். காவன்மரம் வெட்டும் ஓதை செவியிற் கேட்டும், பகைஎதிர்த்து வாராதவனிடத்துப் போர்மேற்செல்லல் என்பது, நாணுத்தகவுடைத்து எனக் கூறிப் போரை விலக்கும் உட்கோள் கொண்டது இப்பாடல்.

அடுத்த பாடல், உறையூர் முற்றியிருந்த நலங்கிள்ளியையும், அடைத்திருந்த நெடுங்கிள்ளியையும் கோவூர் கிழார் பாடியதாகும். இப்பாடல் போர் மேற்கொண்டானும் அடைத்திருந்தானும் ஒரே குடியினர் (சோழ மரபினர்) அவருள் ஒருவர் வென்றாலும் தோற்றாலும் அவர்தம் குடியே பழியை யெய்தும் எனக்கூறிப் போரைத் தவிர்க்க முயல்கின்றார் புலவர்.

46—ஆம் புறப்பாடல், மலையமான் மக்களைக் கொல்லமுயன்ற குளமுற்றத்துத் துஞ்சிய கிள்ளிவளவனைக் கோவூர் கிழார் பாடியது. ஈண்டு, ஏதுமறியாச் சிறுவரைக் கொல்ல எண்ணிய முயற்சியைத் தடுத்தமை காட்டப் பெறுகின்றது.

47—ஆம் புறப்பாடல், இளந்தத்தன் என்ற புலவரை ஒற்றெனக் கருதிக் கொல்லப்புகுந்த நெடுங்கிள்ளியின் செயலைத் தடுப்பான்வேண்டிக் கோவூர் கிழார் பாடியது. ஈண்டுக் கொலை முயற்சியின்றின்றும் புலவரைக் காத்தலைச் சுட்டுகின்றார் கோவூர் கிழார்.

பகைவர் நாட்டின்மீது படையெடுத்தலைத் தவிர்(த்)தற்பொருட்டுப் பாண்டியன் இலவந்திகைப் பள்ளித் துஞ்சிய நன்மாறனைக் காவிரிப் பூம்பட்டினத்துக் காரிக்கண்ணனார் பாடியது 57—ஆம் புறப்பாடல். இப்பாடலில் போர் முயற்சியைத் தவிர்ப்பது சுட்டப்பெறுகிறது.

தன்மக்கள்மேற் படையெடுத்துச் சென்ற கோப்பெருஞ்சோழனைப் புல்லாற்றூர் எயிற்றியனார் பாடியது புறம் 213. இங்கும் போர்முயற்சியைத் தவிர்த்தலே பாடற் பொருளாகிறது.

மேற்காட்டிய ஆறு பாடல்களில் 36, 45, 46, 57-ஆம் எண்களில் அமைந்த பாடல்கள் நான்கும் பகைமேற் சென்று பொருதலைத் தவிர்ப்பான் வேண்டியெழுந்தன. இவை மண்நசையான் மேற்சென்றமை சுட்டுமாற்றான் வஞ்சித்திணைப் பாற்படும் என்பது பொருந்தும். இந்நான்கு பாடல்களிலும் புலவர்கள் சந்துசெய்ய முயன்றமையும் தெள்ளிதிற் புலனாகின்றன. சந்து செய்விக்கும் முயற்சியை நேரடியாகச் சுட்டும் துறையொன்றும் வஞ்சித்திணைக்குரிய துறைகளை விளக்கும் நூற்பாவில் இடம்பெறவில்லை.

இந்நிலையில் வஞ்சித்திணையிற் சார்ந்தும், அத்துறைகளில் அடக்கவியலாப் பாடல்களை யாங்ஙனம் அமைப்பது என்ற எண்ணம் அறிஞர்களிடத்து எழுந்திருக்கக் கூடும். அத்தருணத்தில் இத்தகைய பாடல்களைப் புறனடையிற் சுட்டுமாறு போன்று, துணைவஞ்சி என்றொரு துறையைப் படைத்திருக்க வாய்ப்புண்டு.

இத்தகைய புறப்பாடல்களைக் கண்ட இளம்பூரணர், ‘கழிபெருஞ் சிறப்பின்’ என்ற மிகையானே ‘துணைவஞ்சி’ என்ற ஒரு துறையை அமைத்து, அத்துறையுள் அடக்குவாராயினர்.

ஆனால் மலையமான் மக்களை (குழந்தைகளை)க் கொல்ல முயன்ற கொலை முயற்சியைத் தவிர்க்க முயன்றமை வஞ்சித் திணையில் அடங்குமாறு யாங்ஙனம்? பகைவர் மண்ணை நச்சிப் படையெழுதலும், பகைவரை வென்றபின் அவர்தம் மக்களைப் பற்றிவந்து கொல்லும் முயற்சியும் ஒன்றாதல் பொருந்துமா என்பதை எண்ணுக. ஈதொப்பவே, ஒற்றன் எனத் தவறாகக் கருதியமையான் இளந்தத்தன் என்ற புலவரைச் சிறைப்படுத்திக் கொல்லமுயன்ற செயலும் வஞ்சித் திணையாமோ? தன்மக்கள்மீது கொண்ட சினத்தான் அவரைக் கொல்லக் கருதியமையைப் பிறர் மண்ணை விரும்பிப் படையெழும் வஞ்சித் திணையுள் அடக்குவதும் பொருந்துமாறில்லை.

இப்பாடல்களுக்கு மன்னுயிர்மாட்டு அன்புசெலுத்தும் புலவர்தம் அருள் உள்ளங்களே கரணியமாகின்றன. பிற உயிர்கள்மாட்டு அன்புசெலுத்தும் பேருள்ளப் பாங்கினை வஞ்சித்திணையில் அடக்குவதும், துணைவஞ்சி எனப் புதியதொரு துறை வகுத்துரைப்பதும் தொல்காப்பியர் காட்டும் புறத்திணை நெறிக்குப் பொருந்தி வாராமையை எண்ணுக. அதனாலேயே தொல்காப்பியர், துணைவஞ்சி என ஒரு துறை வகுக்கவில்லை. பின்னர் விரிவாகப் புறத்திணைகளைச் சுட்டும் புறப்பொருள் வெண்பா மாலையும் ‘துணைவஞ்சி’ என ஒரு துறையை வகுக்கவில்லை.

இவ்வஞ்சித்திணைப் பகுதிக்கு உரைவரைந்த நச்சினார்க்கினியர், துணைவஞ்சியில் இளம்பூரணர் அடக்கிய புறப்பாடல்கட்கு அத்துறை பொருந்தாதெனக் கூறி மறுப்பர். அவர், “துணை வேண்டுதல் உலகியல் வழக்கு. “நீயே புறவினல்ல லன்றியும் பிறவும்” (46) என்னும் புறப்பாட்டும், “வள்ளியோர்ப் படர்ந்து” (47) என்னும் புறப்பாட்டு முதலியனவும் துணைவஞ்சி என்பார்க்கு அவை மேற்செலவின்கண் அடங்காமையிற் பாடாண்திணை யெனப்படுமென்றுரைக்க” எனக்கூறி இளம்பூரணர் கருத்தை மறுப்பர்.

புறநானூற்றுப் பழையவுரைகாரர் இந்த ஆறு புறப்பாடல்களையும் ‘சந்து செய்வித்தலின் துணைவஞ்சி யாயிற்று’ எனக் கூறுவதை நோக்கின், இளம்பூரணர் உரைசெல்வாக்கான் அவ்வாறு கூறியிருப்பாரோவென எண்ணத் தோன்றுகின்றது. இன்றேல் புறநானூற்றுப் பாடல்கட்குத் திணை, துறை வகுத்தார் இன்று கிட்டாதவொரு புறப்பொருள் இலக்கணநூலைப் போற்றியொழுகியிருக்க வேண்டும் என்பது புலனாம். எனினும், இத்துறை வகுப்பு தொல்காப்பியப் புறத்திணை நெறிக்குப் பொருந்துமாறில்லையென்க.

முடிவுரை: இதுகாறுங்கூறியவற்றான், புறப்பாடல்கட்கு வகுத்துரைக்கப்பட்ட திணை, துறைகள் பொருந்துமாற்றைத் தொல்காப்பியம் அல்லது புறப்பொருள் வெண்பா மாலையை முழுமையாகப் பின்பற்றி ஆய்வுசெய்தல் வேண்டும். அவ்வாறு செய்யின், ஐயத்திற்கும் குழப்பத்திற்கும் இடமின்றிப் புறப்பாடல்கட்குத் திணை, துறைகளைத் தெளிவாய்ச் சுட்டவியலும். ஆகலின், இலக்கணிகளும் ஆய்வாளர்களும் இத்துறையில் கருத்தினைச் செலுத்துதல் வேண்டும். ஆய்வொளி பரவின் ஐயவிருள் இரிந்தோடுமன்றோ!

May 18, 2016
சிறக்க வாழ்ந்திட!

-எம். ஜெயராம சர்மா, மெல்பேண், அவுஸ்த்திரேலியா

மதுவைநீ நாடாதே மதிகெட்டுப் போயிடுவாய்
மங்கையரை நாடுவதால் வலியுனக்கு வந்துவிடும்
சதிசெய்யும் குணமுடையார் சகவாசம் தனைவிடுத்தால்
சரியான வழிநடக்கத் தானாகப் பழகிடுவாய்!

ஏழ்மைநிலை இருப்பாரை இரக்கமுடன் அணைத்துவிடு
எதிரியென எவரையுமே என்றும்நீ எண்ணாதே
சோதனைகள் வந்திடினும் சோர்ந்துவிடா திருந்துவிடின்
சாதனையின் நாயகனாய்த் தலைநிமிர நின்றிடுவாய்!

அறத்தினை நினை அன்பை யணை
சிரத்தையுடன் நீ சிறந்தன தேர்ந்திடு
இறப்பினைப் பற்றி எண்ணா திருந்திடு
சிறக்க வாழ்ந்திட சிந்தனை செய்திடு!

அரக்க குணத்தை அடியோ டழித்திடு
உரக்க வுண்மையை வாழ்வினி லுரைத்திடு
குறைக்குள் சென்றிடா மனத்தைத் தடுத்திடு
சிறக்க வாழ்ந்திடச் சிந்தையைச் செலுத்திடு!

தாழ்வுமனப் பான்மையினைத் தானழித்து நில்லு
வீழ்கின்ற எண்ணம்வரின் விரட்டியே கொல்லு
ஆர்வந்து எதிர்த்தாலும் அன்புவழி நில்லு
அகிலமதி லுன்வாழ்வு அர்த்தமுட னமையும்!

May 18, 2016
வானம் உழவன்

ராஜகவி ராகில்

இருள் விதைக்கும் ஒரு பொழுது
பனித்துளிகள்
மலர்களில் புணரும் ஒரு வேளை
பிறப்பெடுத்துப் பரவும் நறுமணம்
ஞாபகப்படுத்துகிறது உன்னைத்தான் .
விழிகள் பயணிக்கப் பயணிக்க
நீண்ட சாலையாக உன் அழகு .
புதிது புதிதாகின்றன
வயதும் என் மனதும் .
ஆற்றங்கரை மரவேர் உணர்ச்சியுடன்
செழிப்பாய் என் காதல் .
சந்தனக்கட்டைகள் என் கண்கள்
அடுக்கி அடுக்கி எரிக்கிறேன் பார்வைத் தீ மூட்டி
உன் அழகெனும் புகை பரவுகிறது
என் உயிருக்குள் .
இலையுதிர்கால வரட்சி
ஒரு மொட்டு மலரும் முன் படுகின்ற அவஸ்த்தை
பறவைக்கு இரையாகாமல்
ஊர்ந்து செல்லும் புழுவின் பதட்டம்
இவைகளை விட அதிகமடி
உன் காதல் உன் அழகு தரும் துடிப்பு .

May 18, 2016