வல்லமை

Blog

  • காவல் துறை அதிகாரத்தைத் துஷ்பிரயோகம் செய்யக் கூடாது

    காவல் துறை அதிகாரத்தைத் துஷ்பிரயோகம் செய்யக் கூடாது

    அண்ணாகண்ணன்

    சிவகங்கை மாவட்டம், மானாமதுரையில் இரண்டு பேரை வெட்டிய வழக்கில் கைது செய்யப்பட்ட ஆகாஷ் டெல்சன் என்ற இளைஞர், காவல் துறையின் காவலில் இருக்கும்போது இறந்துள்ளார்.

    முன்னதாக இவர் அளித்த வாக்குமூலத்தில், காவல் துறையினரே தன்னை அடித்தனர் எனக் கூறியுள்ளார்.

    “வெள்ளைத் துணியால் என்னுடைய கண்களைக் கட்டினர். என் கெண்டைக்காலுக்கும் இரண்டு முட்டிக்கும் இடையில் இரண்டு கற்களை வைத்தனர். ஈரமான சாக்கை வைத்துச் சுற்றினர். பின்னர் இரும்புக் கம்பியால் காலில் பலமாக ஒரு முறை அடித்தனர். இதில் என்னுடைய வலது கால் எலும்பு முறிந்து ரத்தம் வழிந்தது. நான் வலியால் துடித்தேன். யார் என்னுடைய காலில் தாக்கினார்கள் என்பது தெரியவில்லை. பின்னர் என்னை மானாமதுரை அரசு மருத்துவமனைக்கு அழைத்துச் சென்றனர். அங்கு, பாலத்தில் இருந்து கீழே விழுந்ததால் காலில் காயம் ஏற்பட்டது என்று தான் கூற வேண்டும் என போலீசார் மிரட்டினர்” என ஆகாஷ் வாக்குமூலம் அளித்துள்ளார். இதற்குப் பிறகு அவர் இறந்தும் போயுள்ளார்.

    இது முதல் நிகழ்வு இல்லை. விசாரணை என்ற பெயரில் இப்படியான கொடிய தாக்குதல்கள் நடந்த வண்ணம் உள்ளன.

    சிவகங்கை மாவட்டம் மடப்புரம் பத்ரகாளி அம்மன் கோவில் காவலாளி அஜித்குமார், 2025 ஜூன் மாதம் நிகிதா என்ற பெண் அளித்த போலி நகை திருட்டுப் புகாரின் பேரில், தனிப்படைக் காவலர்களால் விசாரணை என்ற பெயரில் சித்திரவதை செய்யப்பட்டு உயிரிழந்தார்.

    பற்பல வழக்குளில் கைது செய்யப்பட்டவர்கள் வழுக்கி விழுந்ததாகக் கூறி, மாவுக்கட்டுப் போட்டு அனுப்பப்படுகிறார்கள்.

    காவல் துறையினர், சட்டத்தைத் தங்கள் கையில் எடுத்துக்கொண்டு தாங்களே தண்டனையும் வழங்குவது மிகத் தவறானது. இது, சட்டத்தின் ஆட்சியையும் நீதித் துறையின் தேவையையும் கேள்விக்கு உள்ளாக்குகிறது. மேலும், காவல் துறையினர் தங்கள் தவறுகளை உணர்வதே இல்லை. இது சரிதான் என்ற மனப்போக்குடன் உள்ளனர்.

    அண்மையில் ஏராளமான பாலியல் துன்புறுத்தல், வன்கொடுமைச் சம்வங்கள் நடந்துள்ளன. இதைக் கண்டித்த அனைவரும் காவல் துறையின் மீது குற்றவாளிகளுக்குப் பயம் போய்விட்டது. காவல் துறை கடும் நடவடிக்கை எடுக்க வேண்டும் என்று வலியுறுத்தியுள்ளனர்.

    இந்தக் கடும் நடவடிக்கை என்பதைக் காவல் துறையினர் தவறாகப் புரிந்துகொள்ளக் கூடாது. சட்டப்படி என்ன செய்ய வேண்டுமோ அதைத் தாமதமின்றி, சமரசமின்றி, பாரபட்சம் இன்றிச் செய்ய வேண்டும். மாறாக, குற்றம் சாட்டப்பட்டவர்களைத் தாங்களே தாக்குவது, தண்டிப்பது கண்டிப்பாகக் கூடாது. இது, மனித உரிமைகளை மீறும் செயல். சட்ட – நீதி நெறிமுறைகளை மீறும் செயல்.

    குற்றம் நடக்காமல் இருக்க விழிப்புணர்வுடன் இருக்க வேண்டும். தீவிரமாகக் கண்காணிக்க வேண்டும். ஒருவேளை குற்றம் நடந்தால் உடனே நடவடிக்கை எடுக்க வேண்டும். வெளிப்படையாக விசாரணை நடத்த வேண்டும். நீதிமன்றத்தின் முன் சான்றுகளை அளித்து, பாதிக்கப்பட்டவர்களுக்கு உரிய நீதி கிடைக்கச் செய்ய வேண்டும்.

    குற்றம் சாட்டப்பட்டவர்களை அடித்து, அச்சுறுத்தி, சம்பவங்களைத் திரித்து, சித்திரித்து, குறுக்குவழியில் தண்டனை அளிப்பது, மிகப் பெரிய குற்றம். காவல் துறையினர் தங்கள் கடமையையும் அதன் எல்லையையும் உணர வேண்டும். தங்கள் அதிகாரத்தைத் துஷ்பிரயோகம் செய்யக் கூடாது.

    குற்றத்தை யார் செய்தாலும் அது குற்றமே. தங்கள் செயலுக்கான விளைவுகளிலிருந்து யாரும் தப்பிக்க முடியாது.

    அரசியல் பிழைத்தோர்க்கு அறம் கூற்றாகும், தெய்வம் நின்று கொல்லும் என்ற கூற்றுகள், பல முறைகள் நிறுவப்பட்டுள்ளன.

    காவல் துறை, மக்களின் நண்பனாகவே இருக்க வேண்டும்.

    Share

  • பல்லழகன் – பகுதி – 22

    திவாகர்

     

    மறுபடியும் கந்தசாமியின் வீடு.

     

    “இதுதான் சார் நடந்தது. இதுதான் உண்மை.. நான் அப்படித்தான் பேசினேன்.. ஆனா துப்பாக்கில சுடப்பட்டு இறந்தார்னவுடனே எனக்கு ஒண்ணும் தோணலே.. ஒருபக்கம் இந்த பிரச்னை முடிவுக்கு வந்ததுன்னு நினைச்சு சந்தோஷப்படறதா இல்லே இப்படி எல்லாம் நம்ம வாழ்க்கைல நடந்ததுன்னு வருத்தப்படறதான்னு தெரியலே. ஆனா எங்கம்மா மேல சத்தியமா இதுதான் நடந்தது.”

     

    இன்ஸ்பெக்டர் அவனைப் பார்த்துப் புன்னகை செய்தார்.

     

    “சரி, இப்போ அந்த மொபைலை நீங்க வெச்சிருக்கீங்களா?”

     

    “ஸார்.. அது ஆசிரமத்துல வெச்சிருக்கேன். என்னோட அக்கவுண்ட் டேபிள் ஒண்ணு இருக்கு.. அங்கதான் வெச்சேன்.”

     

    சட்டென கோம்டி தன் கைப்பையிலிருந்து ஒரு மொபைல் ஃபோனை மேலே வைத்தாள். இன்ஸ்பெக்டர் அதை எடுத்துக் கொண்டார். சுந்தர் கத்தினான்.

     

    “இதுதான்,, ஓ! இது எப்படி உங்க கைக்கு?.. ஆசிரமத்தை சோதனை போட்டீங்களா?”

     

    “அது இருக்கட்டும். இப்போ இந்த கேஸை எப்படி முடிக்கலாம் கோம்டி?”

     

    “ஸார்.. சம்பவம் நடந்த நேரம் சரியா நாலேமுக்காலேர்ந்து அஞ்சு மணிக்குள்ளே.. சுந்தர் ஃபோனை வெச்சவுடனே கந்தசாமி கவலைக்குள்ளாயிருக்கணும்தான். அடுத்த நாள் பொழுதுவிடிஞ்சா கல்யாண் வந்துடுவார்.. இந்த முரளி வெறி பிடிச்சு எல்லா விஷயத்தையும் அவருக்கு சொல்லிடலாம். கல்யாணுக்கு விஷயம் தெரிஞ்சா ரொம்ப அசிங்கமாகும்.. அதுவும் இவங்க எல்லாரும் சேர்ந்து போலீஸ்னு போனா அதை விட அவமானம் இருக்கவே இருக்காதுன்னு கந்தசாமி நினைச்சிருக்கலாம்தான்.”

     

    கோம்டியை இடை மறித்தார் இன்ஸ்பெக்டர் மோகன்.

     

    “நினைச்சிருக்கலாம் என்ன? அதுதான்னு நான் தீர்மானமா சொல்லமுடியும். கல்யாண், இந்த மூணு பேர் விஷயத்திலேயும் சம்பந்தப்படலேங்கிற விஷயம் ஒண்ணு. கல்யாண் தன்னோட பெரியப்பாவை ஏதோ மிகப் பெரிய இடத்துல மரியாதையா வெச்சதெல்லாம் ஒரேயடியா இழந்துடுவோமேன்ற பயம். இன்னொண்ணு. இதோ நீங்க கொடுத்த சுமதிக்கான நாமினேஷன் டாக்குமெண்ட்.. பேங்க்குக்கும் அதை ஏற்கனவே கொடுத்திருக்கார்னும் சொல்லறீங்க.. அப்போ அவரோட தற்கொலைக்கான முடிவை அப்பவே எடுத்திட்டாருன்னுதான் சொல்ல முடியும். அந்தக் கடைசி நேரத்துல சுந்தர் அவர்கிட்டே பயமுறுத்தி தற்கொலை வேண்டுமானாலும் பண்ணிக்கோ.. கல்யாண்கிட்ட எல்லா விஷயமும் சொல்லிடப் போறேன்னு சொன்னவுடனே அந்த தற்கொலைதான் ஒரே வழின்னு அவருக்குத் தெரிஞ்சுடுச்சு.. அவர் தற்கொலைதான் பண்ணியிருக்கவேணும்..”

     

    “ஸார்.. அந்த முடிவை உங்ககிட்டே விடறேன் சார்.. நான் விசாரிக்கறவரைக்கும் விசாரிச்சாச்சு.. எனக்கு மிஸ்டர் கல்யாண் கொடுத்த வேலையை நான் பண்ணியாச்சு. போலீஸ் என்ன பண்ணனுமோ அதை தாராளமா பண்ணலாம்.”

     

    “இதுல போலீஸ் என்ன பண்ணமுடியும்? எங்ககிட்ட இருக்கற டாக்குமெண்ட்ஸ், பிரேதப் பரிசோதனை ரிபோர்ட், இப்போ ரிகார்ட் பண்ணியிருக்கற ஒப்புதல் எல்லாமே ஒரே முடிவுக்குதானே போகறது.. ஒருமுறை துப்பாக்கியை சாய்வா வெச்சு மார்புல சுட்டுருக்கார்.. மார்புல அதுவும் வலது மார்புல பட்டும் படாம ஓரமா சுட்டதாலே கீழே விழுந்திருக்கார். மயக்கம் கூட வந்திருக்கணும்.. கொஞ்ச நேரத்துல நினைவு வந்து அது சரியா சுடலேன்னு தெரிஞ்சு அடுத்த அரை மணிக்குள்ளே தன் நெத்திப் பொட்டுல சுட்டுண்டு இருக்கார். அவ்வளவுதான்.. ஏன் முதல்லயே நெத்திப் பொட்டுல சுட்டுக்கலேன்னா என்ன பதில் சொல்லமுடியும். போஸ்ட்மார்ட்டம் ரிப்போர்ட் பிரகாரம் இது ரெண்டாவது தடவையில அதுவும் அரை மணி நேரம் கேப் வெச்சு சுட்டுருக்கார்.. அவர் என்ன ப்ரொஃபெஷனலா சுடர்றவரா என்ன? முதல்தடவை சுடறவங்க நிறைய தடவை இப்படித்தான் தப்பும் ஒப்புமா சுட்டுப்பாங்க.. எங்கிட்டே நிறைய ரிகார்ட்ஸ் இருக்கு. இப்படி முதல் தடவை தப்பா சுட்டுண்டு தப்பிச்சவங்க ரிகார்ட்ஸ் கூட நிறைய இருக்கு.”

     

    கோம்டி குறுக்கிட்டாள்

    “சார்! அப்போ அந்த பீரோ ஹேண்டில்ல அப்பறம் தரையிலே தெரிந்த ரத்தக்கறை இது எப்படி வந்தது?”

     

    “அதுல என்னம்மா.. ஒரு பொருளை பீரோவிலேர்ந்து எடுத்தவுடனே நம்ம கைன்னு இல்லே யாரோட கையுமே பீரோவை மூடத்தான் செய்யும். நம்மளை அப்படியே நம்மைப் பழக்கிண்டோம். கந்தசாமி கூட துப்பாக்கியை பீரோவிலேர்ந்து துப்பாக்கி எடுத்தவர் தன்னை முதல்ல மார்புல சுட்டுண்ட உடன் ரத்தம் குபுகுபுன்னு வந்திருக்கலாம். ரத்தம் பட்ட கையோட பீரோ ஹாண்டிலைப் பிடிச்சு  மூடியிருக்கணூம். போஸ்ட் மார்ட்டம் ரிப்போர்ட், டாக்டர் ரிப்போர்ட் ரெண்டும் கூட இடது கைரேகை பீரோ ஹேண்டில்ல பதிஞ்சிருக்குன்னு சொல்லுது. வலது கையில துப்பாக்கி இருந்துதுல அந்தக் கையில ரத்தக் கறை இல்லே. அவரு சுட்ட உடனே பீரோவை மூடினாலும் அதுக்கும் மேலே தாங்கமுடியாம தள்ளாடி கொஞ்ச ஸ்டெப் நடந்து விழுந்து மயக்கமாயிருக்கணும். அப்படி நடக்கறச்சே ரத்தக் கறை தரைல பறதும் சகஜம். ரத்தக்கறை கூட ஸ்டெப் ஸ்டெப்பா அஞ்சாறு இடத்துல விழுந்திருக்கு.  முதல் குண்டு மார்புல தெளிவா பாயலேங்கிறது அவருக்கு மயக்கம் தெளிஞ்சு புரிஞ்சிருக்கு. அதனாலே இந்த முறை நெத்தி பொட்டுல சரியா வெச்சு சுட்டுண்டிருக்கார். அது பட்டவுடனே மரணம் சம்பவிச்சிருக்கு. விரல்ல துப்பாக்கி டிரிக்கர் மாட்டினது கூட அப்படியே பதிஞ்சிருக்கு. இதை பி.எம் ரிப்போர்ட் கூட உறுதி செய்யுதும்மா. ஸோ.. இது தற்கொலைதான்னு எனக்கு ரிப்போர்ட் வந்த அன்னிக்கே கல்யாண்கிட்டே சொன்னேன். சில தற்கொலை கேசுங்க இந்த மாதிரி ஏற்கனவே ரிகார்ட் ஆகியிருக்கு. அதனால எனக்கு ஒண்ணும் பெர்சா தோணலே.”

     

    இன்ஸ்பெக்டர் சொல்லிவிட்டு சுந்தரைப் பார்த்தார்.

     

    மிஸ்டர் சுந்தர்.. உங்க ஃபைனல் ஸ்டேட்மென்ட் இதுல ரிகார்ட் ஆனாலும் உங்க பேச்சு அவரது தற்கொலைக்குத் தூண்டுதலா இருக்கு. இதுவும் பெரிய குற்றம்தான். ஆனா நீங்க கல்யாண்க்காக வெயிட் பண்ணறீங்க.. அவர் வந்தவுடனே அவரும் நீங்களும் சேர்ந்து போலீஸ்கிட்ட போகப் போறிங்கன்னு நீங்க சொன்னது எப்படியும் கந்தசாமியைப் போலீசுல ஒப்படைக்கவேண்டும்னுதான் உங்க எண்ணம் போனதாலே உங்களை நான் இப்போ விடறேன். ஆனா இந்த கேஸ்ல அவரோட மரண சம்பவத்துல இன்னும் கண்ணால நேரா பார்த்துச் சொல்லறவங்க யாரும் இல்லேங்கிறதும் கந்தசாமி தற்கொலை முடிவுக்கு ஒரு சாட்சியா இருக்கு… மிஸ் கோம.. சாரி, கோம்டி நீங்க இதுதான் ஃபைனல்னு சொல்ல வர்ரீங்களா?”

     

    “ஸார்.. முடிவு எப்பவுமே உங்க கையிலதான்.. நான் பிராபரா விசாரிச்சுக் கொடுக்கதான் முடியும்.. ஐ திங்க்.. நான் சரியாதான் விசாரிச்சுருக்கேன்னு நினைக்கிறேன்…”

     

    இன்ஸ்பெக்டர் புன்னகைத்தார்.

     

    “அதுல என்னம்மா சந்தேகம். கல்யாண் உங்களை இந்தக் கேஸுல இன்வெஸ்டிகேஷன் பண்ணச் சொன்ன முடிவு ரொம்ப சரியான முடிவு. இத்தனை கோர்வையா எங்க டிபார்ட்மெண்ட்ல யாரும் பண்ணியிருக்க மாட்டாங்க. ஹேட்ஸ் ஆஃப் டு யூ. கோம்டி!”

     

    “தாங்க்யூ சார்.  மிஸ்டர் கல்யாண்.. என் வேலை முடிஞ்சுது.. எனக்குக் கொடுக்கவேண்டிய ஃபீஸ் ரெடியா வையுங்க.. இல்லேன்னாலும் எதிர்வீட்லதானே என் க்லினிக்.. அங்க வந்து கொடுத்துடுங்க. நான் கிளம்பறேன்.. சுமதி.. ஆல் தி பெஸ்ட்.. உன் வாழ்க்கையிலே இனிமே துன்பம்ங்க்கிற வார்த்தையே வரக் கூடாது.. ரவி உன்னை ஜாக்கிரதையா அப்படி பார்த்துப்பான்.

     

    ரவி நெளிந்தான். “இதெல்லாம் வெளியெ சொல்லத்தான் வேணுமா கோம்டி!.. எனக்கும் சுமதின்னா ரொம்பப் பிடிக்கும்னு ஏற்கனவே அவளோட அண்ணன் கல்யாணுக்கும் தெரியும்.. ஸோ டோண்ட் வொர்ரி.

     

    கோம்டி முரளியைப் பார்த்தாள்.  “மிஸ்டர் முரளி உங்க வாழ்க்கையில பிரியா கூட இனிமே சந்தோஷத்தை மட்டுமே பாருங்க.. கடந்த காலத்தையெல்லாம் பார்க்காதீங்க.. மிஸ்டர் சுந்தர்.. உங்களுக்கு என்ன சொல்லறதுன்னு தெரியலே.. அனாதை ஆசிரமத்தை நல்லபடியா கவனிக்கறீங்க..  உங்களுக்கு இரக்ககுணம் இருக்குன்னு தெரியுது.. ஆனா நீங்க அதைப் ப்ரூவ் பண்ணிக் காமிக்கணும்னா விஜயாவை உங்க சொந்த தங்கச்சியா வளர்த்து நல்லா படிக்க வெச்சு அவளுக்கு நல்ல எதிர்காலத்தை உருவாக்குங்க.. அப்போதான் என்னால் உங்களைப் பாராட்டமுடியும். இன்ஸ்பெக்டர்.. நீங்க என்னை நம்பி என்னை சுதந்திரமா விட்டு இந்த கேஸு எங்கிட்டே கொடுத்ததுக்கு தேங்க்ஸ். நான் வரட்டுமா?”

     

    இன்ஸ்பெக்டர் சிரிக்கிறார். “இந்த கேஸ் ஒரு முடிவுக்கு வந்துடுச்சு. ஆனா இது இங்கே ஒவ்வொருத்தருக்கும் ஒரு பாடமா எடுத்துண்டு வாழ்க்கையை சந்தோஷமா அனுபவிக்கிறது எப்படின்னு கத்துக்குங்க.

     

    இரவு நேரம், கிலினிக்கில் உட்கார்ந்துகொண்டு கோம்டி ஃபோனில் சாந்தியிடம் பேசுகிறாள்.

     

    “சாந்தி இந்தக் கேஸைப் பத்தி இனிமே எதுவும் கேட்காதே.. எல்லாம்  முடிஞ்சுடுத்துதான்.. ஆனா ஒரு மனுஷன் என்னவெல்லாம் குரூரமா செய்யமுடியும்னு கந்தசாமி ப்ரூவ் பண்ணியிருக்கான். என்ன.. நம்ம சுமதிக்குதான் ஒரு நல்ல வாழ்வு வந்துதுன்னு சொல்லலாம்.”

     

    “யூ எஸ் டிக்கெட் புக் பண்ணனும்டி.. அங்க கிலினிக் இடம்லாம் பார்த்தாச்சு.. நாம ஓகேன்னா அவங்களும் அங்கே ஓகேதான்..”

     

    “சரிடி,, நான் இன்னும் அம்மாகிட்டே பேசலேடி.. ராத்திரியே பேசறேன்..”

     

    “இருந்தாலும் இந்த ‘ஆபரேஷன் கந்தசாமி’ல ஒரு விஷயத்துல மாத்திரம் நாம ரெண்டு பேருமே ஃபெயில்தாண்டி..”

     

    “என்னடி சொல்லறே.. ஆபரேஷன் கந்தசாமி’ல நாம எங்கே ஃபெயிலானோம்?”..

     

    “நீ உன் இன்வெஸ்டிகேஷன் கேஸுக்காக ஒரு க்ளையண்ட் பிடிச்ச.. ஆனா உன் க்லினிக்ல அந்த பல்லழகனோட எத்துப் பல்லை மட்டும் நம்மளாலே ஒண்ணும் தொடமுடியலையேடி..”

     

    அவள் சிரிக்கிறாள். “ஏண்டி.. நாம ரெண்டு பேருமே அவன் தெத்துப்பல்லைத்தான் நம்ம காலேஜ்ல,  க்ளாஸ்லயே தொட்டுப் பார்த்தோமேடி,, மறந்துட்டியா?”

     

    கதவு தட்டப்படும் சப்தம் கேட்கிறது. மெதுவான குரலில் கோம்டி பேசுகிறாள். “ஏய்.. எப்ப நீ அவன் பேரை எடுத்தியோ அவன் வர்றான் போல.. பணம் கொண்டு வர்றான் போல..”

     

    சாந்தி உடனே ஃபோனில் கத்துகிறாள்.

    “எதுக்கும் அவனையே அந்த விஷயமும் கேட்டுடுடி”

     

    “கேட்கிறேன்.. கேட்கிறேன்.. அவ்வளோ சீக்கிரம் அவனை விட்டுடுவேனா.. கேட்டுட்டு உனக்கும் நாளைக்குச் சொல்லறேன்.”.

     

    அவள் எதிர்ப்பார்த்தபடியே கல்யாண் வருகிறான். கூடவே ரவி.. அவள் எதிரே உட்காருகிறார்கள். அவன் கையில் அவள் எதிர்ப்பார்த்த செக் இருக்கிறது.. அவளிடம் கொடுக்கவும் செய்கிறான்.

     

    கோம்டி அந்தச் செக்கைக் கையில் வைத்தபடி அவனைப் பார்க்கிறாள். அவள் அவனையே பார்க்கும் பார்வை அவனை ஒரு மாதிரி நெளிய வைத்தது.

     

    “எதுக்குங்க என்னையே பாக்கறீங்க?”

     

    கையில் உள்ள செக்கைக் காண்பித்துப் பேசுகிறாள்.

     

    “இல்லே.. இந்த செக்கைப் பார்த்தேன்,, அதான் உங்களைப் பார்த்தேன்..”

     

    “ஏங்க.. அமௌண்ட் குறைச்சலா இருக்கா?”

     

    “சேச்சே.. நான் என்னிக்குமே காசுக்காக இந்த உத்யோகம் பண்றதில்லே.. எனக்கு இன்வெஸ்டிகேடிவ் ஒரு ரொம்ப ரொம்ப விருப்பமான வேலை.. ஹாபி.. எனக்கு மெயின் ப்ரொஃபெஷன் இந்த பல் கிலினிக்.. பல்லைப் பிடுங்கிப் பணத்தைப் பிடுங்குற வேலைதான். அதுக்குதான் என்னைப் படிக்க வெச்சாங்க.. அவங்க ஆசைப்படி நல்லா படிச்சேன். காலேஜ்லயே ஃபர்ஸ்ட்டா வந்தேன்”.

     

    மறுபடியும் அவனையே உற்றுப் பார்த்தாள். அவன் தலை தாழ்ந்து கொண்டான்,

     

    “கல்யாண்.. நீங்க இங்கே வர்றப்போ இந்தக் கதவை உள்பக்கம் சாத்தினீங்களா.. ரவி! இல்லேன்னா கொஞ்சம் சாத்திட்டு வாயேன்.”

     

    “சாத்தினேங்க..” கல்யாண் சொன்னான்.

     

    “அப்போ இங்கே நாம மூவரையும் தவிர யாருமில்லன்னு நம்பறீங்களா?”

     

    “ஏன் கேக்கறீங்க?”

     

    “எங்கம்மா அப்பாவும் கூட உள் ரூம்ல அதாவது உள்ளே இருக்கற பெட்ரூம்லதான் டிவி சீரியல் பாத்துண்டுருக்காங்க.. ரெண்டு பேருமே கொஞ்சம் சௌண்ட் பார்ட்டிங்க.. காது கேக்காது அதாவது அவங்க ஒத்தருக்கு ஒத்தர் ரகசியம் பேசணும்னா கூட பக்கத்து வீட்டுக்கும் கேக்கறா மாதிரி கொஞ்சம் சப்தம் போட்டுதான் பேசுவாங்க.”

     

    “எனக்கு எதுக்குங்க இதெல்லாம் சொல்லறீங்க..?”

     

    “ஸோ நாம் இங்கே இருக்கறதோ.. பேசறதோ எதுவும் அவங்களுக்குக் கேட்காது.. அதனால”

     

    “அதனால?”

     

    “சொல்லுங்க..”

     

    “எதைச் சொல்லணும்?”

     

    “கல்யாண்..” என்றபடியே அவனை மறுபடியும் உற்றுப் பார்த்தாள்

     

    “என்னங்க அப்படிப் பாக்கறிங்க? .. எதைச் சொல்லணும்? ஓ.. இந்த சுமதியை ரவி எப்போலேர்ந்து லவ் பண்றான்னுதானே கேக்கறீங்க… அது ஒரு நாலு மாசத்துக்கு முன்னாடி வைசாக்ல..’

     

    ‘ரவி இருக்கட்டும் கல்யாண்.. அவன் நம்ம ரெண்டு பேருக்குமே நெருங்கினவன்.. அவன் சுமதியைக் கல்யாணம் பண்ணினா நாம போய் நல்லா சாப்ட்டுட்டு வாழ்த்தும் சொல்லிட்டு வரலாம். ஆனா’

     

    ரவி சிரித்தான்..’கோம்டி! நீ என்ன சொல்லவர்றே!’

     

    ‘நான் எதுவுமே சொல்லப் போறதில்லே.. கல்யாண்தான் சொல்லணும்..’

     

    ரவி முறைத்தான்.. ‘என்ன சொல்லணும்?’

     

    மறுபடியும் நிதானித்தாள் அவள். பிறகு அதே நிதானத்துடன் பேசினாள்.

     

    “அவர் பெரியப்பாவை அவர் கொலை செய்த விவரங்களை..”

     

    அதிர்ச்சியாகிப் போனான் கல்யாண்.. “அது அது..” என்று தடுமாறினான். ரவி ஏதோ சொல்ல வந்தான். கோம்டி அனனைத் தடுத்து நிறுத்தி கல்யாணைப் பார்த்துப் பேசினாள்.

     

    தொடரும்

     

    Share
  • மாசி மகத்தை மனதில் நினைப்போம் !

    மாசி மகத்தை மனதில் நினைப்போம் !

    மகாதேவ ஐயர் ஜெயராமசர்மா
    மெல்பேண், ஆஸ்திரேலியா

    நதி நீராடுதல் நலனே நல்கும்
    அதனை முன்னோர் அவசிய மாக்கினார்
    ஒவ்வொரு தினமும் உன்னத மென்று
    உள்ள மெண்ணி இணைத்தார் வாழ்வில்

    உள்ளத் தூய்மை உடலில் தூய்மை
    தெள்ளத் தெளிவுடன் தேர்ந்தார் முன்னோர்
    நீரால் உடலில் தூய்மை நிறையும்
    நேர்மையால் உளத்தில் தூய்மை நிலைக்கும்

    உடலில் தூய்மை உளத்தில் தூய்மை
    தருவதே சமயத்தின் நோக்கே ஆகும்
    இரண்டும் தூய்மை எய்திடும் நிலையில்
    இறையின் நினைப்பு இதயத்தில் அமரும்

    ஒவ்வொரு நாளும் ஒவ்வொரு மாதமும்
    ஒவ்வொரு பொழுதும் உன்னதம் ஆகும்
    உன்னதக் கருவை உட்கரு வாக்கி
    உயர்பரம் பொருளை உணர்ந்திடச் செய்தார்

    இறையினைத் தேடி ஓடவே வேண்டாம்
    இயற்கையை இறையாய் இருப்பதே தத்துவம்
    நீரும் இயற்கை நெருப்பும் இயற்கை
    இரண்டு மாகி இருக்கிறான் இறைவன்

    இருளிலும் இருப்பான் ஒளியிலும் இருப்பான்
    இறுதியும் தொடக்கமும் இல்லான் இறைவன்
    இறைவனைக் கண்டிட ஏங்கியே நிற்கிறோம்
    ஏக்கத்தைப் போக்கிட வழிகளைத் தேர்கிறோம்

    திருநாள் பெருநாள் தேடிடும் மார்க்கமாய்
    பக்குவம் பேணிக் கைக்கொண்டு வருகிறோம்
    மாசியில் மகமாய் வருகின்ற திருநாள்
    மாண்புடை மகத்துவம் கொண்ட நன்னாளே

    சைவம் வைணவம் இணையும் வகையில்
    மாசி மகமும் ஆகியே இருக்கு
    சிவனும் இருப்பார் முருகனும் இருப்பார்
    திருமால் இருப்பார் சிவசக்தியும் இருப்பார்

    இட்ட  பெயர்கள் பற்பல வாகினும்
    எல்லாம் இறையே எல்லாம் உயர்வே
    உயர்வாம் இறையை மனமதில் எண்ணி
    நதிநீராடல் மாசி மகத்தின் மகத்துவமாகும்

    மகத்துடன் இணையும் மாசிப் பெளர்ணமி
    மகத்துவம் மிக்கது என்பது தத்துவம்
    புனித நீராடுதல் மகத்துவம் என்பதால்
    மாசி மகத்துடன் இணைத்ததை வியப்போம் !

    Share

  • பதவி மோகம்

    முனைவர் கு. வளர்மதி,
    உதவிப்பேராசிரியர்,
    இளங்கலைத் தமிழ்த்துறை,
    தி ஸ்டாண்டர்டு ஃபயர்ஒர்க்ஸ் இராஜரத்தினம் மகளிர் கல்லூரி,
    சிவகாசி.

    “மனிதனை ஆட்டிப் படைக்கும்
    அமைதியான ஆயுதம் ‘பதவி’
    நிரந்தரமில்லா மனித வாழ்வில்
    நாற்காலி மட்டும் நிரந்தரமா?
    பதவிமோகத்தில் பேசும் மனிதன்,
    பகைக்கு மட்டுமே சொந்தக்காரன்!
    எத்தனையோ தலைவர்கள் உலகிலே;
    வந்தார்கள், சென்றார்கள், பெயர்பெற்றார்கள்!
    ஆணவத்தில் அதிகாரத்தில் தத்தளித்த
    மனிதர்கள் போனார்கள், பெயர்தொியாமல்…!
    சகமனிதனை மனிதனாகப் பார்!
    பதவிவெறியில் மாக்களாக நடத்தாதே;
    காலமாற்றத்தில் எதுவும் நிரந்தரமில்லை!”

    Share

  • பெண்மை போற்றுக

    முனைவர் கு. வளர்மதி,
    உதவிப்பேராசிரியர்,
    இளங்கலைத் தமிழ்த்துறை,
    தி ஸ்டாண்டர்டு ஃபயர்ஒர்க்ஸ் இராஜரத்தினம் மகளிர் கல்லூரி,
    சிவகாசி.

    “அந்நியருக்கு அடிமைப்பட்ட தேசத்துக்கு விடுதலை
    ஆணுக்கு அடிமைப்பட்ட பெண்ணுக்கும் விடுதலை!
    மாதவம் புரிந்து மங்கையராகப் பிறப்பு
    ஆணுக்குப்பெண் சரிநிகர் சமமென வாழ்வு
    கணவனுடன் உடன்கட்டை ஏறிடாத இறப்பு!

    தந்தையை கணவரை மகனையென – ஆணினத்தைச்
    சார்ந்தே வாழும் சார்புவாழ்க்கைக்கு முற்றுப்புள்ளி.
    வெளிநாட்டில் படிப்பு வேலையென தனித்தியங்கும்
    சொந்தக்காலில் நிற்கும் வாழ்க்கைக்குத் தொடக்கப்புள்ளி…
    எட்டாக்கனியான பட்டங்களும் பதவிகளும் எட்டின
    பேச்சுரிமைமுதல் சொத்துரிமைவரை அனைத்தும் வசப்பட்டன.

    வீட்டுக்குள்ளே பெண்ணைப் பூட்டிவைப்பது அக்காலம்
    நாட்டுக்குள்ளே பெண்ணை ஏற்றிவைப்பது இக்காலம்!
    அரியணையில் வீற்றிருக்கும் அதியன்போன்ற மன்னனுக்கு
    அறிவுரைநல்கும் ஔவையெனும் அமைச்சராக ஒருகாலம்,
    அறிவார்ந்த கருத்துக்களுடன் அரியணையில் வீற்றிருந்து,
    சிங்கப்பெண்ணாக வலம்வரும் பெண்ணினமே தற்காலம்!
    மண்ணில் மட்டுமல்ல, விண்ணிலும் பெண்ணென…
    மகத்தான சாதனைகளின் கொள்கலனான சக்தியை
    மாபெரும் பெண்மையை வணங்கிப் போற்றுவோம்!”

    Share
  • கவியரசர்…. சங்க இலக்கியம்….. காதல்…

    கவியரசர்…. சங்க இலக்கியம்….. காதல்…

    சக்தி சக்திதாசன்

    ​கவியரசர் கண்ணதாசன் எனும் இலக்கிய ஊற்று சிறுகூடல் எனும் மலையிலே உருவாகி தமிழர் வாழும் நன்னிலமெங்கும் வற்றாது பாய்ந்து தமிழ் மனங்களெல்லாம் செழிப்புற வைத்திருக்கிறது.

    ​கவியரசர் ஒரு இலக்கியப் பித்தர்.

    சங்க இலக்கியங்களையெல்லாம் ரசித்துப் படித்தார்.

    படித்து தன்னால் புரிந்து கொள்ளப்பட்டவை எல்லாம் அனைத்து மக்களையும் சென்றடைய வேண்டும் என அவாக் கொண்டார்.

    ​வகுப்பறையிலே ஒரு வாத்தியார் எமக்குப் பாடமாகப் புகட்டும் போது கசந்த சங்க இலக்கியங்களைத் தனது எளிமையான தமிழ் எனும் தேன் தடவி திரைப்படப் பாடல்களின் வரிகளாக்கினார்.

    ​சங்க கால இலக்கியங்களில் கூறப்பட்ட விடயங்கள் என்று தெரியாமலே நாங்கள் தான் ஆக்கிய வரிகளை முணுமுணுப்பதைக் கண்டு அளவிலா ஆனந்தம் கொண்டார்.

    சங்ககாலப் புலவர்களுக்கு தான் செய்யும் மிகப் பெரிய தொண்டு, தமிழன்னைக்கு தானாற்றும் சேவை என்றே அவர் இதை எடுத்துக் கொண்டார்.

    ​இப்போது நாம் இதைக் கேட்கும் போது படிக்கும் போது இது ஏதோ இலகுவாகச் செய்து முடிக்கக்கூடிய விடயம் என்று கூட எண்ணுவோம்.

    ஆனால் ஒரு விடயத்தைப் படித்துக் கிரகித்துக் கொள்வது சரி, ஆனால் அதை ஞாபகத்தில் வைத்து தேவையான இடத்தில் தேவையான காட்சிகளுக்கு அந்தச் சூழ்நிலைக்கு ஏற்றவாறு வரிகளை அமைப்பது என்பது கவியரசர் ஒருவராலேயே சாத்தியப்பட்டது.

    ​அவரது இந்த அசாத்திய திறமையைப் படித்து ரசித்த போது அவற்றில் சிலவற்றைப் பகிர்ந்து கொள்ள வேண்டும் என்று எண்ணம் ஏற்பட்டது.

    அதன் விளைவாக,

    காதல் இருக்கிறதே அது ஒரு விசித்திரமான உணர்வு.

    அது யாருக்கு எப்போது எப்படி ஏற்படுகிறது என்பதை வரையறுத்து வைத்தவர் யாருமிலர்.

    ​ஆனால் இவ்வுணர்வு எம் சங்க காலத்திலேயே மிகவும் பறந்து பட்ட உணர்வாக இருந்ததால் தான் இவ்வுணர்வுக்கு முதன்மை கொடுத்து பல சங்ககால இலக்கியங்கள் ஆக்கப்பட்டிருக்கின்றன.

    இவ்வுணர்வுகளிலே காதலி காதலை நினைந்து அன்றி அதைப் பிரியும் போது ஏற்படும் சோகக்கணங்களை விவரிக்கும் வகையே தனிதான்.

    ​சில உவமைகள், சில உதாரணங்கள் நடைமுறையில் ஏற்றுக் கொள்ளப்படக்கூடியவைகளாக இருக்காது.

    இருப்பினும் காதலை விவரிக்கும் புலவர்கள் இதனை கையாளும் போது அது ஏற்றுக் கொள்ளப்படக்கூடியவைகளே என்று பழமையான தொல்காப்பியத்தில் கூறப்பட்டிருக்கிறது.

    ​”உண்டா குரிய வல்லாப் பொருளை
    உண்டன போலக் கூறலும் மரபே”

    (தொல்: 1156)

    ​கனியை உண்கிறோம் ஆனால் கல்லை உண்ண முடியுமா?

    ஆனால் காதல் உணர்வை விளக்கும் புலவர்கள் கல்லை உண்ணலாம் எனும் வகையில் அவ்வுணர்வை விளக்க எழுதும் கவிதைகளைக் கூட ஏற்றுக் கொள்ளலாம் என்கிறது தொல்காப்பியம்.

    இதன் அடிப்படையிலே தான் கவியரசர் இவ்வரிகளை எழுதினாரோ?

    ​”தென்றலிலே எனதுடல் தேய்ந்தது பாதி – அது
    தின்றதெல்லாம் போக இங்கே இருப்பது மீதி”

    தென்றலின் தன்மையே என்ன இனிமையாக உடலைப் ஸ்பரிப்பது தானே !

    ​அப்படி அத்தென்றல் ஸ்பரிக்கும் உணர்வு அவளுக்கு அவள் காதலன் தனைப் ஸ்பரிசிக்கும் உணர்வைக் கொடுப்பதால் அவ்வுணர்வின் தாக்கம் அவளின் உடலை பாதியாக இளைக்கப் பண்ணி விட்டதாம் ….

    ​அப்படியானால் அவள் உடலின் பாதியைத் தென்றல் தின்றதாகத் தானே அர்த்தம் .

    ​அப்படி அத்தென்றல் தின்ற பாதி போக மீதியாக இருப்பதுதான் அவள் இப்போது கொண்ட இளைத்த தோற்றம் என்கிறாள்.

    அக்காதலினால் வாழும் பெண் .

    ​இரு வரிகளுக்குள் எத்தனை பெரிய விளக்கத்தை விதைத்து விட்டார் நம் கவியரசர் பாருங்கள் .

    ​காதல் கண்களைக் குருடாக்கி விடும் என்பார்கள் .

    ​நாம் கண்முன்னாலேயே பார்க்கும் நிகழ்வுகள் எத்தனையோ .

    ​மிகவும் பிரயத்தனப்பட்டு ஒரு பெண்ணின் மனதைக் கவரும் ஆடவர் பலர் மிகவும் இலகுவாக அப்பெண்ணை ஏமாற்றிவிடும் சந்தர்ப்பங்கள் பலவற்றைப் பார்த்திருக்கிறோம் .

    ​அதே சமயம் ஆண்களை ஏமாற்றும் பெண்கள் இல்லை என்பது என் வாதமல்ல .

    ​காதல் கண்களைக் குருடாக்கிவிடும் என்பார்கள்.

    ​தீர விசாரிக்காமல் , அவ்வாடவனைப் பற்றிச் சரிவர அறியாமல் காதலிலே விழுந்து விடும் பெண்களில் சிலர் ஏமாற்றப்பட்டு விடுகிறார்கள் .

    ​இதோ அகநானூறில் இதைப் பிரதிபலிப்பதாக வரும் பாடல் ஒன்று ,

    ​நெஞ்சுநெகிழ் பருவரல் செய்த அன்பி லாளன் அறிவுநயந் தேனே (அகம் :260)

    ​தன்னைக் காதலித்து கைவிட்டு , ஏமாற்றித் துன்பத்தைத் தனக்குப் புரிந்த அந்த அன்பற்றவனுடைய அறியாமையை அறியாது அவனை நம்பி ஏமாந்து போனேனே என்று புலம்பும் ஒரு பேதையின் நிலையைக் குறிக்கும் பாடலிது,

    ​இதைத் தனது பாணியில் கவியரசர் எப்படிச் சொல்கிறார் என்று பார்ப்போமா?

    ​இறைவன் என்பவன் பரம்பொருள். அவனை நம்பியவர்களை அவன் எப்போதும் கைவிடுவதில்லை என்பது ஒரு பொதுவான நம்பிக்கை.

    ​ஆனால் தன் காதலனை நம்பிய அப்பேதையின் நிலை?

    அழகாய்ச் சொல்கிறார் கவியரசர்,

    ​உன்னை நம்பினார் கெடுவதில்லை ஆண்டவனே
    உன்னை நம்பினார் வாழ்வதில்லை காதலனே

    ​என்கிறாள் அப்பேதை.

    ​அது மட்டுமா?

    ​ஒரு மரத்தில் விளையும் கனியின் தரத்தையும், அக்கனியின் சுவையையும் அம்மரம் அறியும் என்பதும், உண்மையான காதலை அக்காதலைத் தனதாக்கிக் கொண்ட மனம் அறியும் என்பதும் உண்மையே.

    ஆனால் காதல் வயப்பட்ட ஆண்களின் மனதில் கனிவான தன்மை இருந்தால் தானே தம்மை விரும்பித் தவிக்கும் ஒரு மடந்தையின் மனதைப் புரிந்து கொள்ளும் வகை அவர்களுக்குத் தெரியும் .

    ​இதோ மீண்டும் கவியரசர்,

    ​கனியை மரமறியும் காதலை மனமறியும்
    கனிவிருந்தால் அல்லவோ கன்னியர் நிலை தெரியும்

    ​என்று தனக்கேயுரிய பாணியில் ஒரு பேதையின் புலம்பலை அழகாய்க் கூறுகிறார்.

    ​அன்பினிய வாசகர்களே!

    ​என் மனதில் வாசம் செய்யும் கவியரசரின் தேன் துளிகளில் இரண்டை உங்களுடன் சேர்ந்து சுவைத்தேன் .

    இந்தத் தேன்கூட்டில் இன்னமும் பலதுளிகள் சொட்டிக் கொண்டிருக்கின்றன.

    அவற்றில் சிலவற்றோடு மீண்டும் வருவேன்.

    Share
  • உவேசா உயிர் மூச்சு தமிழே !

    உவேசா உயிர் மூச்சு தமிழே !

    மகாதேவ ஐயர் ஜெயராமசர்மா
    மேனாள் தமிழ்மொழிக் கல்வி இயக்குநர்
    மெல்பேண், ஆஸ்திரேலியா

    உத்தம தானபுரம் ஈன்றிட்ட முத்து
    உவேசா என்றுமே தமிழுக்குச் சொத்து
    தமிழ் அன்னை தவமைந்தன் அவரே
    தமிழ் உலகில் வாழுகிறார் தமிழாய்

    ஆங்கிலத்தை வட  மொழியைப்  பாரா
    அன்னைத் தமிழ் அகமேந்தி நின்றார்
    தூங்காமல் தமிழ் படித்துச் சுவைத்தார்
    சுவைத் தனைத்தும் சொர்க்கமாய் கண்டார்

    நல்ல தமிழ் ஆசானைக் கண்டார்
    எல்லை இல்லா இன்பத்தை அடைந்தார்
    கற்பவைகள் தேர்ந் தெடுத்துக் கற்றார்
    கற்றபடி நடந்து அவரும் உயர்ந்தார்

    நாம் படிக்கும் அத்தனையும் ஏடாய்
    வீடெல்லாம் இருந்ததை நாம் அறியோம்
    ஏடு தேடி ஊரெல்லாம் ஓடி
    வீடிருக்கும் ஏடு கண்டு வியந்தார்

    எங்கள் தமிழ் அத்தனையும் ஏட்டில்
    தங்கியே இருந்ததை நாம் உணர்ந்தால்
    உவேசா செய்த பணி உணர்வோம்
    உயிர் கொடுத்து மீட்டார் தமிழனைத்தும்

    கட்டை வண்டி கைகொடுக்க அவரும்
    காடு மேடு சென்றலைந்து திரிந்தார்
    எத்தனையே தமிழ் ஏட்டைக் கண்டார்
    எடுத் தெடுத்து கையெடுத்து அணைத்தார்

    ஏடு தேடி சென்றபோது எரித்தார்
    ஓடு கின்ற ஆற்றினிலே விட்டார்
    பாடு பட்டு அத்தனையும் தடுத்தார்
    நாம் படிப்பதற்கு நூலாக்கித் தந்தார்

    சங்கத் தமிழ் தமிழனது சொத்து
    எங்கள் சுவாமிநாதன் மீட்டாரே நினைப்போம்
    உவேசா என்று சொன்னால் உழைப்போ
    உவேசா உயிர் மூச்சு தமிழே !

    Share
  • விவசாயி

    விவசாயி

    முனைவர் கு. வளர்மதி,
    உதவிப்பேராசிரியர்,
    இளங்கலைத் தமிழ்த்துறை,
    தி ஸ்டாண்டர்டு ஃபயர்ஒர்க்ஸ் இராஜரத்தினம் மகளிர் கல்லூரி,
    சிவகாசி.

    “விடியுமுன் குளியல்
    குளக்கரை குளிர்நீரில்;
    மானம் மரியாதைக்கு
    வேட்டியும் துண்டுமே!
    நெற்றிநிறை திருநீறு
    அதிகாலை சூரியவழிபாடு!
    தேவாமிர்தமாக வயிறுகுளிர
    பழையசோற்றுத் தண்ணீர்!

    உச்சிவெயிலையும் பொருட்படுத்தாத
    உன்னதமான உழைப்பு!
    கால்வயிற்றுக் கஞ்சிக்காக
    அயராது உழைத்தும்
    வயிற்றிலே சுருக்கங்கள்,
    கண்ணிலே ஏக்கங்கள்!
    பண்டிகை நாட்களிலும்
    பட்டாடை உடுத்தியதில்லை,
    விடுமுறை நாட்களிலும்
    ஏர்பிடிக்க மறந்ததில்லை!

    பெற்றபிள்ளையின் கல்விக்காக
    காய்த்துப்போன கரங்கள்!
    கண்ணாடி பார்க்காத அழகு,
    கள்ளங்கபடமற்ற புன்னகை!
    நெற்றிவியர்வை நிலத்தில்சிந்தி,
    விதைவிதைத்து, பயிர்காத்து,
    அறுவடைசெய்யும் விவசாயிக்கு
    அரிசிச்சோறு கிடைப்பதில்லை!
    உழைப்பிற்கேற்ற ஊதியமில்லை,
    உழும்நிலம் சொந்தமில்லை!
    தனக்கென வாழ்ந்ததில்லை,
    பஞ்சுமெத்தையில் உறங்கியதில்லை!

    வாயைக்கட்டி வயிற்றைக்கட்டி
    வளர்த்தபிள்ளைக்குத் தெரிவதில்லை
    விவசாயத்தின் அருமை!
    விதவிதமான பலகாரங்கள்
    பேரன்பேத்தியின் வாய்ருசிக்கு
    கடன்வாங்கியும் செய்ததுண்டு!

    ஊரார்உண்ண நெல்விளைவித்த
    விவசாயியின் விவசாயக்கடனை
    அடைத்திடயாரும் முன்வரவில்லை,
    அரசாங்கமும் தள்ளுபடிசெய்யவில்லை!
    மனம்உடைந்த கடைசிவிவசாயியின்
    பரிதாபநிலையோ தற்கொலை!”

    Share
  • தேடுவார் தேடினால் தெரிவான் இறைவன் !

    தேடுவார் தேடினால் தெரிவான் இறைவன் !

    மகாதேவ ஐயர் ஜெயராமசர்மா
    மேனாள் தமிழ் மொழிக் கல்வி இயக்குநர்
    மெல்பேண், ஆஸ்திரேலியா

    ஆதியு மில்லா அந்தமு மில்லா
    சோதியாய் சுடராய் இருப்பது இறையே
    வாதிட முடியா வண்ணமா யிருப்பது
    ஆதியா யிருக்கும் அரும் பொருளாகும்

    ஆணவ மிருப்பார் காணவு மாட்டா
    அஞ்ஞான மில்லா மெஞ்ஞானப் பொருளே
    வாய்மையும் தூய்மையும் வாய்த்த நற்பொருளே
    விண்ணாய் மண்ணாய் வியாபிக்கும் பொருளே

    அப்பொருள் சிவனே அதுவே முதலே
    எப்பொரு ளுள்ளும் இருப்பது மதுவே
    நிற்பதும் நடப்பதும் நினைத்திடு மனைத்தும்
    நிறைந்திடு பொருளாய் இருப்பது சிவமே

    சிவனை நினைவார் சிந்தை சிறக்கும்
    சிந்தை சிறந்தால் சிவனே தெரிவார்
    சிவனை நினைக்கச் சிவ ராத்திரியே
    சிறப்புடை நாளாய் அமைந்துமே இருக்கு

    புராணக் கதைகளைத் புறந்தள்ள வேண்டாம்
    புத்தியைப் புகட்டும் அத்தனை கருக்கள்
    விளங்கா உண்மையை விளக்கிட வந்த
    விளக்கே அவையென விளங்கினால் நலனே

    அறிவியல் அனைத்தும் அமைந்தது சமயம்
    அஞ்ஞான நிலையில் விளங்குதல் அரிது
    இறையின் தத்துவம் இயற்பியல் தத்துவம்
    எல்லாம் சிவ ராத்திரி மகத்துவம்

    மனத்தை ஒடுக்கினால் மர்மம் விலகும்
    மர்மம் விலக வைப்பதே நோன்பு
    பரம் பொருளாகிய சிவனைப் பரவி
    பக்தியால் நோற்றால் பக்குவம் கிடைக்கும்

    மாலொடு அயனும் அடிமுடி தேடிய
    கதையைக் கருத்தில் இருத்திட வேண்டும்
    அடிமுடி காணா அலைந்ததன் காரணம்
    அகத்தை என்பதே அடிப்படை அன்றோ

    தேடுவார் தேடினால் தெரிவான் இறைவன்
    தெளிவுடன் இருந்தால் தரிசனம் தருவான்
    இதுவே  சிவனின் ராத்திரி தத்துவம்
    தனித்து விழித்து பசியுடன் இருப்போம்

    நம்பிக் கைவைத்தால் நல்லதே கிடைக்கும்
    நம்பிக்கை யென்பதே நல்லதோர் மந்திரம்
    நமச்சிவாய நமைக் காக்கும் மந்திரம்
    சொல்லுவோம் மந்திரம் வெல்லுவோம் பகையினை !

    Share
  • ஊர் உவக்கும் பண்பு!

    ஊர் உவக்கும் பண்பு!

    மகாதேவ ஐயர் ஜெயராமசர்மா
    மேனாள் தமிழ் மொழிக் கல்வி இயக்குநர்
    மெல்பேண், ஆஸ்திரேலியா

    கடல் அலைகள் ஆர்ப்பரித்துக்
    கரை தொட்டு மீளும்
    மனதி லெழும் நினைவுகளும்
    மறு படியும் மீளும்

    வான் பறக்கும் பறவைகளும்
    மண் தொட்டு நிற்கும்
    மனம் இருக்கும் சுமையெல்லாம்
    மண் ஏற்று நிற்கும்

    தேன் எடுக்கும் வண்டெல்லாம்
    திசை எங்கும் திரியும்
    தெளிவு பெறா நிலையினிலே
    தேடுகிறார் பல பேர்

    ஊர் நடுவே பழுத்தமரம்
    ஒரு பேதம் காட்டா
    பேர் பெற்றார் என்பார்கள்
    பின் பற்றார் பண்பை

    நீர் கொடுக்கும் மழையே
    பார் பெற்ற வரமே
    ஊர் உவக்கும் பண்பே
    உயர் மனிதப் பிறப்பே

    Share
  • சுருக்கெழுத்துகளால் சிதையும் தமிழ்

    சுருக்கெழுத்துகளால் சிதையும் தமிழ்

    அண்ணாகண்ணன்

    இன்றைய நாளிதழில் எஸ்.பி.கோயில் என்ற பெயரைக் கண்டேன். சிங்கப்பெருமாள் கோவில் என்ற அழகிய பெயரைத்தான் இப்படி எழுதியிருக்கிறார்கள். தியாகராய நகர் என்ற பெயர் தி.நகராகி, பலர் நாவில் டி.நகர் ஆகிவிட்டது. கலைஞர் கருணாநிதி நகர், எப்போதோ கே.கே.நகர் ஆகிவிட்டது. வியாசர்பாடியில் மகாகவி பாரதி நகர், எம்.கே.பி. நகர் ஆகிவிட்டது.

    அரியலூரில் தாதம்பேட்டை பழூர் என்ற ஊர், தா.பழூர் ஆகி, டி.பழூர் ஆனது. கோவையில் பாப்பநாயக்கன் பாளையம், பி.என்.பாளையம் ஆனது. குப்பைக் கோனான் புதூர், கே.கே. புதூர் ஆனது. மதுரை மாவட்டத்தில் தேவன்குறிச்சி கல்லுப்பட்டி என்ற ஊர், தே.கல்லுப்பட்டி ஆகி, பிறகு டி.கல்லுப்பட்டி ஆனது. இப்படி ஒவ்வொரு மாவட்டத்திலும் ஏராளமான ஊர்களும் சாலைகளும் சுருக்கெழுத்துகளால் அடையாளம் இழந்துள்ளன.

    பல ஊர்களில் கிழக்கு, மேற்கு, வடக்கு, தெற்கு என்ற முன்னொட்டுகளுடன் ஊர்ப்பகுதிகளும் வீதிகளும் உள்ளன. இவை அனைத்தும் இன்று ஈஸ்ட், வெஸ்ட், நார்த், சவுத் என வாய்க்கு வாய் பேசப்படுகின்றன.

    இடங்கள் மட்டுமில்லாமல், மனிதர்களின் பெயர்களும் இன்று சுருக்கப் பெயர்களாகி வருகின்றன. முதலெழுத்து மட்டுமின்றி, முழுப் பெயருமே ஆங்கிலச் சுருக்கெழுத்துகளால் அழைக்கப்படுகின்றன. பதவிப் பெயர்களும் பட்டப் பெயர்களும் கூட இதே போல் சுருங்கிவிட்டன. கட்சிப் பெயர்களும் தலைவர்களின் பெயர்களும் கூட ஆங்கிலச் சுருக்கெழுத்துகளால் அழைக்கப்படுகின்றன.

    இணைய உரையாடல்களின் சுருக்கெழுத்துகள், பெரும்பாலும் ஆங்கிலத்தில் கோலோச்சுகின்றன. அன்றாடம், புதுப் புதுச் சுருக்கெழுத்துகள் தீயாய்ப் பரவுகின்றன. திரைப்படங்களின் பெயர்களும் கூட இவ்வாறே சுருங்குகின்றன. பொன்னியின் செல்வன் பி.எஸ். ஆகிறது.

    உலகம் நம் உள்ளங்கைக்குள் சுருங்கி வருவதில் நமக்கு மகிழ்ச்சியே. ஆனால், நம் மொழியும் அவ்வாறு சுருங்கிவிடக் கூடாது. இடத்தின், பொருளின், தொழில்நுட்பத்தின், உயிர்களின், நபர்களின் முழுப் பெயரையும் வாயார அழைப்போம். ஒருவேளை சுருக்கினாலும் தமிழில் சுருக்குவோம்.

    உலகத் தாய்மொழி நாள் வாழ்த்துகள்.

    Share

  • பல்லழகன் – பகுதி 21

    திவாகர்

     

    கோம்டி சமாதானப்படுத்தினாள்.

    “போலீஸ் எதையுமே சந்தேகக் கண்ணோடதான் பார்ப்பாங்க முரளி.

    உங்களுக்கு நிறைய விஷயங்க தெரியாதுங்கறது எனக்கும் போலீஸுக்கும் கூடத் தெரியும். சுமதி முதல்ல யாருன்னு நீங்க தெரிஞ்சுக்கணும் இல்லையா.. நான் சொல்லறேன். உங்க மாமா கந்தசாமியோட சொந்த மகள்தான் சுமதி.”

     

    “என்ன நிஜமாகவா.. அப்போ இதை எங்களுக்கு மறைச்சு வெச்சார் மாமா? என்னாலே நம்பமுடியலியே..”

     

    கல்யாண் குறுக்கிட்டான். “பெரியப்பா நிறைய விஷயங்களை மறைச்சு வெச்சிருக்கார் முரளி.. உன் விஷயமே நீ சொன்னப்பறம்தான் எனக்குத் தெரியும்.. இன்னும் சுந்தர் சொல்லப் போகற விஷயமும் நீ கேட்கணும்.. அதுக்கு முன்னாடி இந்த சுமதிதான் பெரியப்பாவோட ஒரே மகள்.. பெரியம்மாவையும் அழைச்சுண்டுதான் வந்திருக்கேன்.. ஆனா இதையெல்லாம் அவர் ஏன் மறைச்சார்னு தெரிஞ்சுக்கணும்னா அப்பறமா நிதானமா பேசலாம்.. பெரியப்பாவுக்கு நான் நேரடி உறவு.. நானே சொல்லறேன்.. இந்த சுமதி பெரியப்பாவின் உண்மையான வாரிசு. அதுக்கான ஆதாரம்னு நீங்கள்லாம் கேட்பீங்கன்னுதான் கோம்டி எப்படியும் ஒரு ஆதாரம் வேணுங்கறச்சே பெரியப்பாவே சமீபத்துல எழுதிக்கொடுத்த வாரிசு பத்திரத்தைக் கேட்டு வாங்கியிருக்காங்க. அதையும் கொண்டு வந்திருக்கேன். அதாவது தன் பேங்க்ல தன் பணத்தைத் தனக்குப் பிறகு தன் பெண் சுமதிக்குப் போய்ச் சேரணும்னு அவரே சுயமா கையெழுத்துப் போட்டு பேங்க்குக்கு ஒரு காபியும் சுமதியோட அம்மாகிட்டே ஒரு காபியும் கொடுத்திட்டுதான் போயிருக்கார் பெரியப்பா.”

     

    முரளி திகைத்துப் போயிருந்தது அவன் குரலில் தெரிந்தது கல்யாண் கோம்டியைப் பார்க்க அவள் தன் கையிலிருந்த பேங்க் பத்திரத்தை இன்ஸ்பெக்டர் மோகனிடம் கொடுத்தாள்.

     

    “பெரியப்பா சமீபத்துல எப்ப கொடுத்தார்?.. நான் இல்லாம பேங்க் கூட போகமாட்டாரே கல்யாண்? எப்ப சுமதி வீட்டுக்கு மறுபடி போனார்.. நான் மட்டுமே அவரை அழைச்சுண்டு போவேன்,, அப்ப சமீபத்துல எப்போ போனார்.?”

     

    “முரளி! மறுபடியும் உன் அப்பாவித்தனத்தைக் காமிக்கறே.. உன் அப்பாவித்தனம்தான் பெரியப்பாவை நல்லா அவர் சுய நலத்துக்காக யூஸ் பண்ண வெச்சது. பெரியப்பாவை நீ நாலு மாசத்துக்கு முன்னாடி ஒருதரம்தான் கார்ல அழைச்சுட்டுப் போனே.. ஆனா அதுக்கப்பறம் பத்துப் பன்னெண்டு தரம் சுமதி வீட்டுக்கு ஆட்டோவுல போயிட்டு வந்திருக்கார் பெரியப்பா. இதெல்லாம் உனக்குத் தெரியாது. இன்னொரு விஷயம்.. பிரியா விஷயத்துனாலே உனக்கும் பெரியப்பாவுக்கும் மனஸ்தாபம் வந்துதனாலே உன்னை அவர் தள்ளியே வெச்சிருக்கார் அவரு.”

     

    இன்ஸ்பெக்டர் குறுக்கிட்டார்.

    “நீ எங்கிட்டே உண்மையைச் சொல்லியிருக்கலாமே சுமதி.. நான் வந்து உன்னைக் கேள்வி கேட்டப்போ அப்ப ஒருமுறைதான் கார்ல உன் தங்கை மெடிகல் விஷயமா வந்தார்ன்னு சொன்னே.. அதுக்கப்பறம் பாக்கலேன்னு எதுக்குப் பொய் சொன்னே?”

     

    சுமதி நிமிர்ந்து இன்ஸ்பெக்டரைப் பார்த்தாள்.

    “நான் பொய் சொல்லலே சார். அவரு ஒவ்வொருமுறை வந்ததுமே அந்தப் பொண்ணு  விஷயமாதானே.. அத்தோட என்னோட நிலைமை வேற சார். நான் இப்போ வரைக்கும் அந்த ஆள் என்னோட அப்பான்னு சொல்லிக்கறதுக்கே வெட்கமா இல்லே அசிங்கமா ஃபீல் பண்றேன்.. அதுவும் விஜயா விஷயத்துல அவர் நடந்துகிட்ட விதம் வெறி பிடிச்ச வீதி நாயைப் பாக்கற மாதிரித்தான் அவரைப் பார்த்தோம். அந்த பயங்கரமான அருவறுப்பைச் சொன்னா புரியாது சார். அந்த ஆளை யாரோ அன்னிக்கு கொலை பண்ணிட்டாங்கன்னு சொன்னப்ப வீட்ல ஸ்வீட் வெச்சு நானும் எங்கம்மாவும் சாப்பிட்டோம். அப்படிப்பட்ட ஆளைப் பத்தி எதுக்கு சார் பேசணும்னுதான் பேசலை. இப்போ கூட இந்த வீட்டுக்கு வர்றதுக்கு எனக்கு விருப்பமில்ல சார்.. கல்யாண் அண்ணாவும் டாக்டர் கோம்டியும் கம்பெல் பண்ணினதாலே நாங்க வந்தோம்.’

     

    முரளியைப் பார்த்தாள். ‘முரளி அண்ணா.. உங்களை உறவு முறையில அண்ணான்னு நான் கூப்பிடலே.. வயசுல என்னை விடப் பெரியவருங்கற முறையில கூப்பிடறேன்.. இப்பவும் சொல்லறேன். அந்தாளோட வீடோ பணமோ எதுவும் எங்களுக்குத் தேவையில்ல.. எங்களைப் பொறுத்தவரைக்கும் நான் பொறந்தவுடனேயே அந்தாளு செத்துட்டதா இப்பவும் மனசார நினைக்கிறோம்..”

     

    முரளி வருத்தப்பட்டுச் சொன்னான்.. “இல்லைம்மா சுமதி.. என் பெண்டாட்டிக்கு ஏற்பட்ட கதி உனக்கும் ஏற்பட்டதோன்னு கொஞ்சம் பயந்துதான் சொன்னேன்மா. தப்பா நினைக்காதே”

     

    “கல்யாண்.. உங்களுக்கு சுமதிதான் பெரியப்பாவோட பொண்ணுன்னு தெரியுமா?”

     

    “தெரியும் சார்.. நான் எதுக்காக வெளியில சொல்லலேன்னா சுமதி எங்கிட்டே வாங்கின சத்தியம்தான். பெரியப்பாவோட பொண்ணுன்னு அவ வீட்டுக்கு வர்ற வேலையை வெச்சுக்க வேணாம்னு என்னை அன்னிக்கே சொல்லிட்டா.. ஆனா எனக்கு அப்பாவும் இல்லே அம்மாவும் இல்லே.. ஒரு தங்கச்சி இருக்குங்கிற முறைல வரலாமான்னு கேட்டப்ப அவ அழுதுட்டா சார். பாவம் சார்.. பாசம்ன்னா என்னன்னு தெரியாம வளர்ந்திருக்கற பொண்ணு சார். அதனாலதான் நீங்க கோம்டிகிட்ட சுமதியைப் பத்திக் குறையா பேசறச்சே  பெரியப்பா முறைல உறவு பாக்காம ஒரு அண்ணங்கிற முறையில அவளுக்கு ஆதரவாப் பேசினேன். சுமதியைப் பத்திய விஷயம் கோம்டிக்கு கூடச் சொல்லலே. சுமதியை விட என் பெரியம்மாவைச் சொல்லணும். பொறந்த குழந்தைக்குத் தகப்பன் பேரு தெரியாதுன்னு தைரியமா ஊருல சொல்லி நாலு வீட்டுல வெட்கப்படாம பத்துப் பாத்திரம் தேய்ச்சி அந்தப் பொண்ணை வளர்த்தாங்களாம். சுமதி  அவ பெரியப்பா பொண்ணுங்கறது ஒரு பக்கம் உண்மைதான்னாலும் பிறந்ததிலேர்ந்தே கஷ்டத்தைப் பார்த்தவ. இனிமேயும் எங்களுக்கு பெரியப்பா உறவு தேவையில்லே.. அதுக்குப் பதிலா விஷத்தைச் சாப்பிட்டுச் செத்துப் போறோம்னு எங்கிட்ட சொல்லறச்சே அதையும் மீறி என்னாலே எதுவும் செய்ய முடியல.. அவர் விஜயாவுக்கு செஞ்ச பாவத்துக்கு அந்த விஜயா நல்ல முறைல குணமாகணும்னு நானும் என்னால் ஆன உதவியைப் பண்ண வந்தேன் அவ்வளவுதான்..”

     

    “விஜயா சுமதிகிட்டே இருக்காளா?.. அவளுக்காக நானும் பணம் சேர்த்துவர்றேன் கோம்டி மேடம்!” சுந்தர் மிகக் கவலையுடன் குறுக்கிட்டான்.. கோம்டி அழுத்தமாகக் கேட்டாள்.

     

    “எல்லாம் உங்க மாமாகிட்டேயிருந்து வாங்கின பணம்தானே? எனக்குத் தெரியுமே.. ஆசிரமத்து பேங்க் அக்கௌண்டும் ரசீது புக்கும் எல்லா உண்மையையும் சொல்லிடுச்சே சுந்தர்.  இவ்வளோ பேசறவரு உங்க மேல தப்பு இல்லேன்னா ஏன் இன்னிக்குக் காலைலேர்ந்து வீட்டை விட்டு ஓடிப் போக முயற்சிக்கணும்?”

     

    “நான் தப்பிக்க முயற்சிக்கலே.. இன்னிக்கு இங்க வர்றதை அவாய்ட் பண்ண விரும்பினேன்..  போலிஸ் ஸ்டேட்மென்ட் கூட தயார் பண்ணி ரெடியா வெச்சிருந்து அதை இன்னிக்கு போலீஸ் கேட்டப்ப கொடுத்திருக்கேன்.. ஏன் இன்னிக்கு வரவேண்டாம்னு நினைச்சேன்னா எனக்கு கோம்டி இந்த கேஸ்ல எப்படியாவது என்னை ஃப்ரேம் பண்றா மாதிரி மனசுக்குத் தோணிச்சு.. அதனாலதான் அவங்க விசாரணைக்கு இனிமே ஒத்துழைப்பு கொடுக்கவேணாம்னு வரல்லே.. இதையும் போலீஸ்கிட்ட சொல்லியிருக்கேன்..”

     

    கோம்டி முறைத்தாள்.

    “ஆனா மிஸ்டர் சுந்தர் இதுவரைக்கும் எல்லாமே மாத்தி மாத்தி சொன்னீங்க.. அதையும் நீங்க ஞாபகம் வெச்சுக்குங்க. இப்போ அதை எல்லாம் கூட விடுங்க.. சம்பவம் நடந்த அன்னிக்கு சாயங்காலம் நாலு மணிக்கு நீங்க கந்தசாமிகிட்டே ஃபோன்ல பேசினதையும் மாத்திதான் கொடுத்தீங்க.. அது ஏன்.. அன்னிக்கு நீங்க கரெக்டா என்ன பேசினீங்கங்கறத நல்ல ஞாபகப்படுத்தி நிதானமா எல்லோருக்கும் சொல்லலாமே. இதோ பாருங்க இப்பவாவது உண்மையைச் சொல்லணும். ஏன்னா உங்க ஃபோன் பேச்சு எல்லாம் என்கிரிப்ட் ஆக கந்தசாமி மொபைல்ல இருக்கு.”

     

    இன்ஸ்பெக்டர் சுந்தரைப் பற்றி விவரித்தார். சுந்தருக்கும் கந்தசாமிக்கும் அன்று முதன்முதலாக கம்ப்யூட்டரில் பிரிண்ட் எடுக்கும்போது நடந்த சண்டையை கோம்டியை வைத்துப் பேசச் சொன்னார். கோம்டி விவரித்தாள். தன்னிடம் ஒப்புக்கொண்டதையும் கந்தசாமியின் மன்மத லீலையையும் விவரித்தாள். ஆசிரமத்து விஜயாவுக்கு நேர்ந்த கோரமான நிகழ்வையும் விவரித்தாள்.

     

    விஜயாவை ஆஸ்பத்திரியில் சேர்க்க வந்தபோதுதான் கந்தசாமியைப் பற்றி முதன்முதலாக சுமதி தெரிந்துகொண்டதையும் அதன்பின் சிரமம் எடுத்துக்கொண்டு விஜயாவை ஆதரித்த விதம் பற்றியும் நெகிழ்ச்சியுடன் சொன்னாள் கோம்டி.

     

    சுமதி இப்போது வரை அந்த விஜயா மேல் பாசத்தோடு அந்தப் பெண்ணைக் காப்பாற்றி வருவதைப் பாராட்டிச் சொன்னாள்.

     

    “ஆனால் சுந்தர் உங்களுக்கும் அந்த விஜயா மேல் பாசம் இருந்திச்சு.. அந்தப் பாசத்தை வெச்சு கந்தசாமிகிட்டே பணம் பறிச்சீங்க இல்லையா.. என்னதான் இந்தப் பணமெல்லாம் விஜயாவோட ஆஸ்பத்திரி செலவுக்குன்னு நீங்க இப்போ சொன்னாலும் நீங்க அதைக் கொடுக்காதவரை எங்களாலே நம்பமுடியாது. இப்போதாவது சொல்லுங்க அன்னிக்கு சாயந்திரம் என்ன நடந்ததுன்னு.. விஜயா மேல உங்க பாசம் உண்மையான பாசம்னா அன்னிக்கு ஃபோன்ல என்ன பேசினீங்கன்னு அதுக்கப்பறம் என்ன நடந்ததுன்னு அப்படியே சொல்லணும். உங்களுக்கு இதுதான் கடைசி சான்ஸ் கூட”

     

    கோம்டி இதைச் சொன்னதும் தலை கவிழ்ந்தான் சுந்தர்.

    “அன்னிக்கு நாலரை மணிக்கு நான் ஃபோன் செஞ்சது வாஸ்தவம்தான்.” கந்தசாமியுடன் தான் பேசின விவரத்தையும் அதற்குப் பிறகு நடந்ததையும் விவரித்தான்.

     

    மாலை 4.30 மணியளவில் கந்தசாமிக்கு சுந்தர் ஃபோன் செய்கிறான், ஃபோனில் கந்தசாமியின் குரல் கேட்கிறது..

     

    “என்னடா சுந்தர் இந்த நேரத்துல நீ பேசறே? நீ நேரே இங்கே வரலாம் இல்லே.. உங்கிட்டே ஒரு விஷயம் கேட்கணுமே..”

     

    “நீங்க என்ன கேட்கப் போறிங்கன்னு தெரியும் மாமா.. குறிப்பிட்ட வஸ்துவைப் பத்திக் கேக்கப் போறீங்க.. வேண்டாம் இனிமே இந்த வேலை.. அதனாலதான் நான் எடுத்து ஒளிச்சு வெச்சுட்டேன். நான் உங்க நல்லதுக்குதான் பேசறேன் மாமா.. இன்னொரு விஷயம்.. அந்த விஜயாவோட நியூஸ் கிடைச்சுதான்னு சொல்லவே இல்லே.”

     

    “டேய் சுந்தர்.. நீ இப்படியெல்லாம் சொல்லலாமா? எனக்கு விஜயா விஷயமே தெரியாதுடா.. அன்னிக்கு பீச்சுல காணாம போனது காணாமப் போனதுதான்.. அந்தப் பொண்ணை விடு.. எனக்கு நீ எடுத்துண்டு போனது கட்டாயம் திருப்பித் தரணும்.. உன்னை வளர்த்து ஆளாக்கியது நான்.. எனக்கே இப்படி நீ துரோகம் செய்யலாமா.. சொல்லுடா?”

     

    “இதுல துரோகமெல்லாம் எங்கே வந்தது? நீங்க செய்துகிட்டுருக்கற விஷயம் வெளியிலே தெரிஞ்சா உங்களோட எப்பவுமே உதவியா இருக்கற நானும் முரளியும்தான் முதல்ல தூக்குல தொங்கணும்.. ஒருவேளை போலீஸ் உங்களைப் பிடிச்சுதுன்னாக் கூட எங்க ரெண்டு பேரையும் கூட விசாரிக்காம ஜெயில்லே போடலாம். நீங்க வளர்த்தீங்கன்ற ஒரு விஷயத்துக்காக நாங்க ரெண்டு பேரு ஜெயிலுக்குப் போகணுமா.. யோசிச்சுப் பாருங்க மாமா.”.

     

    “டேய் மடப்பயலே.. அதுக்குதான் பிராயச்சித்தம் பண்றேன்னு சொல்லி பத்து லட்சம் கொடுத்தேண்டா. அதைக் கூட நீ இன்னும் நான் கொடுத்த அட்ரஸுக்கு கொடுக்கலே.. சரி, விடு.. அந்த பத்து லட்சத்தை நீயே எடுத்துக்கோ, அடேய்.. என் வஸ்துவைக் கொடுத்துடுடா.. என்னை பிளாக்மெயில் பண்ணாதே..”.

     

    “முடியாது மாமா.. நான் கொடுக்க மாட்டேன். நான் இதைப் பத்தி கல்யாண்கிட்ட பேசணும்..”

     

    “டேய் டேய்  கல்யாண்கிட்ட எதுக்குடா. எங்கிட்டே பேசுடா. உனக்கு எவ்வளவு பணம் வேணும் சொல்லுடா..?”

     

    “பணம் என்ன மாமா.. அம்பது லட்சம் ஒரு கோடியானாலும் நீங்க கொடுப்பீங்கன்னு தெரியும்.. ஆனா உங்க மன்மத லீலையை கண்டிப்பா கைவிட மாட்டிங்க. விஜயா மாதிரி இன்னும் எத்தனை பெண்களை முன்னமே சீரழிச்சீங்களோ இனிமேயும் எத்தனை சின்னப் பொண்ணுங்க வாழ்க்கையை சீரழிக்கப் போறீங்களோ.. யாருக்குத் தெரியும்? அந்த ஆசிரமத்துல இருக்கற சின்னப் பொண்ணுங்களை நினைச்சாலே கதி கலங்குது.. பாவம் அந்த மேனேஜர் பெரியவர். அவருக்குத் தெரியாம நீங்க செஞ்ச அயோக்கியத்தனம் ரொம்ப குரூரமானது. நான் முதல்ல போலீஸ்கிட்டதான் போகலாம்னு இருந்தேன். ஆனா கல்யாணுக்கும் தெரியணும்.. நாங்க ரெண்டு பேரும் சேர்த்து இந்த விஷயத்தைப் போலீஸ்கிட்ட எடுத்துப் போவோம். . கல்யாண் வந்ததும்தான் இது முடிவுக்கு வரும். நான் அவன்கிட்டே சாட்சிக்காக இந்த வஸ்துவை ஒப்படைச்சுட்டு  எல்லா விஷயமும் நானே சொல்லப் போறேன்.”.

     

    கத்தினார் கந்தசாமி  “உனக்கு என்னடா தெரியும் என்னைப் பத்தி.. நான் இப்போ எந்த லீலையிலும் ஈடுபடலேன்னு சொன்னா நம்புவியா.. என் வஸ்துவைக் கொடுத்துடு.. சரி, அம்பது லட்சம் கொடுக்கறேன்.. இங்கே வா.. அந்த வஸ்துவையும் கொண்டு வா.. பேசலாம்..”

     

    “நான் அங்கே வரமாட்டேன். என்னை நேரப் பார்த்தீங்கன்னா என் மேல் இருக்கற ஆத்திரத்துல நீங்க என்னைக் கொன்னுப் போட்டாலும் போடுவீங்க.. அதான் ஒரு சைலன்ஸர் துப்பாக்கி உங்க பீரோவுக்குள்ள மறைச்சு வெச்சுண்டிருந்ததைப் பார்த்தேனே.. நாளைக்கு காலைல கல்யாணை நான் ஸ்டேஷன்லியே பார்த்து எல்லாவிஷயத்தையும் சொல்லிட்டுதான் அழைச்சுண்டு வரப் போறேன்.. அதுக்கப்பறம் அவனாச்சு.. நீங்களாச்சு..”

     

    “டேய்.. டேய்.. அப்படில்லாம் சொல்லாதேடா.. நான் செத்துடுவேண்டா.. என் பொணத்தைத்தான் நீ பாக்கப் போறே.. இதோ பார்.. நேருல வாடா.. பேசலாம்..”

     

    “நான் வரல்லே மாமா.. என் முடிவு இதான். நீங்க எடுத்த படத்தையெல்லாம் பார்க்கறப்போ எனக்கு ரத்தக் கண்ணீர் வந்துச்சு, அதுவும் விஜயாவைப் போயி.. .. அப்படின்னு நினைக்கறச்சயே உங்க மேல ஆத்திரம் ஆத்திரமா வருது.. உங்க அழுகை ஒரு நாடகம், அதுவும் ஆசிரமத்துலேயே பொய் சொல்லி எதுவுமே தெரியாதுமாதிரி அழுதீங்களே.. போதும் மாமா.. உங்க சகவாசம்.. உறவு எல்லாமே போதும்.. இதுக்கெல்லாம் ஒரு முடிவு வேணாமா.. அதுதான் நான் கல்யாண் வர்றதுக்காக காத்திருக்கேன்.. உங்களை என் உறவுக்காரர்ன்னு சொல்லறதுக்கே வெட்கமா இருக்கு.. அதுதான் உங்க கையில பணம் வாங்கி உங்க கூட சாப்பிட்டு நான் வளர்ந்தேனே.. ச்சே.. தற்கொலை பண்ணிக்கலாமான்னு இருக்கு.. அது சரி, நான் என்ன தப்பு பண்ணினேன் தற்கொலை பண்ணிக்கறதுக்கு.. நீங்க சொல்லறா மாதிரியே நீங்களே பண்ணிக்குஙக மாமா.. நீங்க தப்பறதுக்கு நீங்க தற்கொலை பண்ணிக்குங்க.. அதுதான் ஒரே வழி.”

     

    ஃபோன் வைக்கப்பட்டுவிட்டது..

     

    தொடரும்

    Share
  • இங்கிலாந்திலிருந்து ஒரு மடல் … 313

    இங்கிலாந்திலிருந்து ஒரு மடல் … 313

    சக்தி சக்திதாசன்

    அன்பினிய வல்லமை வாசகர்களே !

    நானிங்கு நலமே !

    நீங்கள் நலமா ?

    இம்மடலை சென்னையில் இருந்து எழுதுகிறேன்.

    உலகம் முழுவதும் நிகழும் அரசியல், இயற்கை, மற்றும் அரச குடும்ப நிகழ்வுகளை உங்களுடன் பகிர்வதில் மகிழ்ச்சி அடைகிறேன்.

    இங்கிலாந்து அரசியல் ஜனவரி 2026 ஐ நோக்கினால்,

    தொழிலாளர் கட்சி (Labour Party):
    பிரதமர் கியர் ஸ்டார்மர் தனது புத்தாண்டு உரையில் “சரிவு மற்றும் பிளவுகளை வெல்லும்” அரசாங்கத்தை வாக்குறுதி அளித்தார்.
    மக்களுக்கு “நல்ல மாற்றங்களை உணரச் செய்வோம்” என்ற நம்பிக்கையை வெளிப்படுத்தினார்.

    கன்சர்வேட்டிவ் கட்சி (Conservative Party):
    எதிர்க்கட்சி தலைவர் கேமி பாடெனொக், 2025-இல் “வளர்ச்சி இல்லாமல், அதிக வரிகள், வேலைவாய்ப்பு குறைவு” என விமர்சனம் செய்தார்.
    “நாட்டின் பொருளாதாரத்தை சீர்செய்து, பாதுகாப்பு, கல்வி, மருத்துவம் ஆகியவற்றுக்கு நிதி வழங்குவோம்” என்ற திட்டத்தை முன்வைத்தார்.

    ரீபார்ம் யுகே (Reform UK):
    நைஜல் பாராஜ் ஜனவரி 19-ஆம் தேதி Newark-on-Trent-இல் உரையாற்றினார்.
    பிரெக்ஸிட் பின்னணியில், மக்கள் எதிர்பார்ப்புகள், பொருளாதார குழப்பம், பொறுப்புக்கூறல் ஆகியவை அரசியல் அமைப்பை மாற்றுகின்றன.

    இங்கிலாந்து காலநிலை ஜனவரி 2026இல் ,

    மாதத்தின் தொடக்கத்தில் ஆர்க்டிக் காற்று காரணமாக கடும் குளிர் நிலவியது.

    ஸ்காட்லாந்து மற்றும் உயரமான பகுதிகளில் பனிப்பொழிவு, பனிமூட்டம், பனிக்கட்டி போன்றவை காணப்பட்டன.

    லண்டனில் வெப்பநிலை -3°C வரை குறைந்தது

    மழை, பனிக்கட்டி, மற்றும் காற்று ஆகியவை பயணத்திற்கும் விவசாயத்திற்கும் சவாலாக இருந்தன.

    -இங்கிலாந்து அரச குடும்ப நிகழ்வுகள் ஜனவரி 2026

    ஜனவரி 9: இளவரசி கேத்தரின் 44வது பிறந்த நாள் கொண்டாடப்பட்டது.

    ஜனவரி 15: இளவரசர் வில்லியம் ஹெரிபோர்ட்ஷயரில் உள்ள பண்ணை ஒன்றை பார்வையிட்டார்.

    ஜனவரி 25: வில்லியம் மற்றும் கேத்தரின் ஸ்காட்லாந்தில் அரச நிகழ்வுகளில் பங்கேற்றனர்.

    பிப்ரவரி 3: கிங் சார்ல்ஸ் மற்றும் குவீன் கமில்லா, உள்ளாட்சி ஊழியர்களுக்காக அரண்மனையில் வரவேற்பு நிகழ்ச்சி நடத்தினர்.

    இங்கிலாந்து பொருளாதார நிலை
    ஜனவரி 2026

    பொருளாதார முன்னறிவிப்புகள்: HM Treasury – நிதி ஆணையம் வெளியிட்ட கணிப்புகளின்படி, 2026 இங்கிலாந்து பொருளாதாரம் “மிதமான வளர்ச்சி” பாதையில் உள்ளது.

    விலை உயர்வு (CPI): பணவீக்க விகிதம் குறைவாக இருந்ததால், வட்டி விகிதங்கள் மெதுவாக குறையும் என எதிர்பார்க்கப்படுகிறது.

    சம்பள வளர்ச்சி: மெதுவாக இருந்தது, ஆனால் வேலைவாய்ப்பு நிலைமை சீராக உள்ளது.

    நுகர்வோர் நம்பிக்கை: Which? பத்திரிகை ஆய்வின்படி, மக்கள் நம்பிக்கை 8 புள்ளிகள் உயர்ந்துள்ளது.

    பொருளாதார சீரமைப்பு: PwC- பிரைஸ் வாட்டர் கூப்பர் கணிப்புகளின்படி, 2026 “அடாப்டேஷன்” (Adaptation) ஆண்டாக இருக்கும்.

    அரசுகள், நிறுவனங்கள், மக்கள் புதிய சூழ்நிலைக்கு தங்களை ஏற்படுத்திக் கொள்கின்றனர்.

    உலகளாவிய நிகழ்வுகள் – ஜனவரி 2026

    பொதுவான விழாக்கள்:
    ஜனவரி 1 புதுவருடம், உலக அமைதி நாள்
    ஜனவரி 15: தைப்பொங்கல் (தமிழர்களின் பெருவிழா)

    அன்புள்ள வாசகர்களே !
    இங்கிலாந்து அரசியல், இயற்கை, மற்றும் அரச குடும்ப நிகழ்வுகள் அனைத்தும் ஒரு புதிய மாற்றத்தின் பாதையை நோக்கி நகர்கின்றன.

    நாம் எங்கே இருந்தாலும், உலகம் எவ்வாறு நகர்கிறது என்பதை அறிந்து கொள்ளும் விழிப்புணர்வும், பகிரும் மனப்பான்மையும் நம் வாழ்வை வளமாக்கும்.

    Share
  • பார் வியக்க வாழ்வோம் !

    பார் வியக்க வாழ்வோம் !

    மகாதேவ ஐயர் ஜெயராமசர்மா
    மேனாள் தமிழ் மொழிக் கல்வி இயக்குநர்
    மெல்பேண், ஆஸ்திரேலியா

    பெரு வெள்ளம் வந்தால்
    பெரு அணையும் உடையும்
    பெரு ஆசை வந்தால்
    பெரு வாழ்வு சிதையும்

    பசி வயிறு மிகுந்தால்
    வறுமை தலை விரிக்கும்
    வறுமை தலை விரித்தால்
    வாடி விடும் உலகு

    பொய் ஆட்சி செய்தால்
    மெய் மயங்கி நிற்கும்
    மெய் மயங்கி நின்றால்
    பொய் எழும்பி ஆடும்

    பொய் ஆடி நின்றால்
    மெய் விழிக்க நினைக்கும்
    மெய் விழிக்கும் வேளை
    வெளிச்சம் அங்கே விரியும்

    கண் கருணை இழந்தால்
    மண் சிறக்க மாட்டா
    மண் சிறக்க வேண்டில்
    மனம் சிறக்க வேண்டும்

    கல்வி எனும் பயிரை
    கிள்ளி விடல் கூடா
    கல்வி எனும் சொத்து
    எழு பிறப்பும் இருக்கும்

    பல நூற்கள் படிப்போம்
    படித்த படி நடப்போம்
    பகுத் தறிவு பெறுவோம்
    பார் வியக்க வாழ்வோம்  !

    Share
  • இருக்கிறார் கடவுள் என்பதே தத்துவம் !

    இருக்கிறார் கடவுள் என்பதே தத்துவம் !

    மகாதேவ ஐயர் ஜெயராமசர்மா
    மேனாள் தமிழ் மொழிக் கல்வி இயக்குநர்
    மெல்பேண், ஆஸ்திரேலியா

    மண்ணும் கடவுள் மரமும் கடவுள்
    நீரும் கடவுள் நெருப்பும் கடவுள்
    ஊர்கள் தோறும் பற்பல பெயரில்
    உருவம் பெற்று கடவுள் திகழ்கிறார்

    ஏகன் ஆகி இருப்பார் கடவுள்
    எங்கும் நிறைந்தும் இருப்பார் கடவுள்
    தாபங் கொண்டு தேடுவார் கண்ணில்
    தரிசனம் கடவுள் கொடுப்பார் என்பர்

    சமயச் சண்டையில் இருக்கார் கடவுள்
    சாதிச் சண்டையில் இருக்கார் கடவுள்
    இமயம் இருப்பார் கடவுள் என்கிறார்
    இறைவன் இல்லா இடமே இல்லை

    கடவுளை நம்பாச் சமயமும் உண்டு
    கடவுளே இல்லை என்பாரும்  உண்டு
    நம்பினார் நம்பாதார் யாவர்க்கும் என்றும்
    நல்லதை நல்குவார் கடவுளாய் தெரிவார்

    உருவாய் இருப்பார் அருவாய் இருப்பார்
    ஒருவரும் நினையா உருவமாய் ஒளிர்வார்
    அருளாய் இருப்பார் அன்பாய் இருப்பார்
    அனைத்தும் ஆகி இருப்பார் ஆண்டவன்

    கற்பனை யாகக் கடவுள் இருக்கிறார்
    கற்சிலை யாகக் கடவுள் இருக்கிறார்
    இத்தரை இருப்பார் எண்ணு மனைத்திலும்
    இருக்கிறார் கடவுள் என்பதே தத்துவம்  !

    Share