பவள சங்கரி
மருத்துவர்கள் போல, கணினித் தொழில்நுட்ப வல்லுநர்கள் போல, வருங்காலச் சமுதாயத்தையே நிர்ணயிக்கும் ஆசிரியர்களும் புதுமையான சிந்தனைகளையும், சமுதாயத்தின் நவீனக் கட்டமைப்புகளையும் அறியும் வகையில் தங்களைப் புதுப்பித்துக்கொள்ள வேண்டியதும் அவசியம் அல்லவா? அதற்கான பயிற்சித் திட்டங்களும் அமைக்க வேண்டியது அரசின் தலையாயக் கடமை அல்லவா? தற்போது 3 முதல் 5 ஆண்டுகளுக்குஒரு முறை மட்டுமே ஆசிரியர்களுக்கு பயிற்சி அளிக்கப்படுவதை ஆண்டிற்கு ஒரு முறையாகவாவது மாற்றியமைக்க வேண்டியது அவசியம்!
பவள சங்கரி
ஏர் இந்தியா நிறுவனம் முழுவதுமாகவோ அல்லது அதனுடைய 50% பங்குகளையோ தனியாருக்கு விற்பனை செய்ய மத்திய அரசு முடிவெடுத்திருப்பதாக செய்திகள் மூலம் அறியமுடிகிறது. விமானங்களுக்குரிய எரிபொருள் மற்றும் சில சலுகைகள் அளிக்கப்பெற்றும் ஏர் இந்தியா நிறுவனம் இத்தொழிலில் வெற்றி பெற முடியவில்லை என்பது வேதனைக்குரியது. பல ஆயிரம் கோடி ரூபாய் கொடுத்து இந்த நிறுவனத்தை விலைக்கு வாங்கி ஒரு தனியார் நிறுவனத்தினரால் வெற்றி பெற முடியுமென்றால் அரசு நிறுவனமாகிய ஏர் இந்தியா தன்னுடைய நிர்வாகச் சீர்கேட்டை சீர்செய்து நட்டம் ஏற்படாமல் விமான சேவையை நடத்த முடியாதா என்ற ஐயமே எழுகிறது. அரசு சரியான நடவடிக்கை எடுத்து இந்த நிறுவனத்தைத் தக்க வைத்துக்கொள்ள முயற்சி எடுக்கவேண்டும். நவரத்னா நிறுவனங்களும், மினி நவரத்னா நிறுவனங்களும் அரசு நிர்வாகத்தில் சிறப்பான செயல்பாட்டில் இருக்கும்போது ஏர் இந்தியா நிறுவனமும் நவரத்னா நிறுவனங்களைப்போல சிறப்பாகச் செயல்பட முடியும் என்பதே நம் நம்பிக்கை.
பவள சங்கரி
கல்வி நிலையங்களில் அனுமதிப்பதற்கான ஒதுக்கீடுகளில் முற்படுத்தப்பட்ட பிரிவினர்களுக்கான அளவில் 50.5 சதவிகிதமாகவும் பிற்படுத்தப்பட்ட, மிகவும் பிற்படுத்தப்பட்ட, தாழ்த்தப்பட்டவர்களுக்கான ஒதுக்கீடுகள் 49.5 சதவிகிதமாகவும் இருக்கும் என்றும் மத்திய அமைச்சர் அறிவித்துள்ளார். பிற்படுத்தப்பட்ட மாணவர்கள் உயர் மதிப்பெண் பெற்றிருந்தாலும் அவர்களுடைய வாய்ப்பு பிற்படுத்தப்பட்டவர்களின் ஒதுக்கீடான 49.5 சதவிகிதத்திலிருந்துதான் கிடைக்கப்பெறும். அதாவது உயர் வகுப்பு பிரிவினர்க்கான 50.5 சதவிகிதத்திலிருந்து அனுமதி அளிக்கப்படமாட்டாது என்றும் தெளிவுபடுத்தப்பட்டுள்ளது. அதாவது உயர் வகுப்பு பிரிவினருக்கான ஒதுக்கீடு எண்ணிக்கை அதிகமாகியுள்ளது என்பதே செய்தி.
க. பாலசுப்பிரமணியன்
ஆசைகளுக்கு அடிமையான மனம்
ஆசைகளை அடக்குதல் என்பது ஒரு கடினமான செயல். பல துறவிகள் கூட ஆசைக்கு அடிபணிந்து இன்னல்களுக்கு ஆளாகியிருக்கின்றார்கள். ஆசைகளை அடக்குதல் என்பது ஒருவிதமான யோகநிலை. யோகத்திற்கே இலக்கணம் வகுத்த குரு பதஞ்சலி முனிவர் “யோகம் என்பது சித்தத்தின் அசைவுகளை நிலைப்படுத்துவதாகும்” என்று கூறுகின்றார்..முற்காலத்தில் கல்வியின் நோக்கமே ஒரு மனிதனை நிலையான சமநிலை உணர்வுகளுக்குத் தகுதியுள்ளவனாக (ஸ்தித ப்ரஞனாக) உருவாக்குவதாகவே இருந்தது.
தற்போதைய நிலையில் மனம் ஒரு குரங்கினைப்போல் ஒரு ஆசையிலிருந்து இன்னொரு ஆசைக்குத் தாவி எங்கும் நிலையாக இல்லாமல் அலைச்சலுக்கு உட்படுகின்றது. மனத்தை கட்டுப்படுத்த வேண்டியதன் அவசியத்தை பல ஞானிகள் அழகாக எடுத்துரைத்திருக்கின்றனர்:
“மனத்தகத் தழுக்கறாத மவுன ஞான யோகியர்
வனத்தகத் திருக்கினும் மனத்தகத் தழுக்கறார் “
என்கிறார் சிவவாக்கியர்.
ஆசைகளை அடக்குவதற்கு ஒரு மனிதன் தன்னை வெல்ல வேண்டும். மற்றவர்களை வெல்வது என்பது எளிது, ஆனால் தன்னைத் தானே வெல்வது என்பது ஒரு கடினமான செயல். உலகின் மிகச் சிறந்த தத்துவ மேதையாக இருந்த அரிஸ்டோடில் கூறுகின்றார் ” தன்னுடைய வலிமை வாய்ந்த எதிரிகளை வெல்பவனை விட தன்னைத்தானே வெல்பவன் மிகச் சிறந்தவன்.” (I count him braver who overcomes his desires than him who conquers his enemies; for the hardest victory is over self)
இதே கருத்தை வலியுறுத்தும் சீன அறிஞர் லா டீஸு (Lao Tzu) “மற்றவர்களை வெல்ல வலிமை தேவை ஆனால் தன்னைத்தானே வெல்ல வல்லமை தேவை” (Conquering other requires Force; Conquering oneself requires strength)
எபிகுர்ஸ் (Epicurus) என்ற ஒரு மேதை மிக அழகாகக் கூறுகின்றார் “ஒரு மனிதனின் சந்தோஷத்தை அதிகரிக்க வேண்டுமென்றால் அவனையும் அதிக செல்வத்தைக் கொடுக்க வேண்டியதில்லை , அவனுடைய ஆசைகளைக் குறைத்தால் போதும்.” (If thou wilt make a man happy, add not unto his riches but take away from his desires)
ஆனால் மனிதனுடைய மனமோ ஆசைகளுக்கோ விலைபோய் தன்னை அடகு வைத்து விடுகின்றது, ஏதாவது ஒரு ஆசைக்கு அடிமையாகி தன் உண்மை நிலையை மறந்து துன்பக்கடலில் தன்னை மூழ்க வைத்துக் கொள்கின்றது .
குறிப்பாக காமத்தில் விழுந்த மனம் பெண்ணாசையில் மதி குலைந்து கள்ளுண்ட போதையில் நிலை மறத்தல் போல் தன்னை மறக்கின்றது.
இந்த அவல நிலையை விளக்கும் திருமூலர், “எவ்வாறு ஒரு மனிதன் நல்ல பழுத்த மாங்கனி வீட்டில் இருக்கையில் அதை பதுக்கிவிட்டு புளிய மரம் ஏறி புளியம் பழத்தை நாடுவானோ அதுபோல் மனம் ஒரு மனை விட்டு இன்னொரு பெண்ணை நோக்கி ஓடுகின்றது.” என்று விளக்குகின்றார்.
திருத்தி வளர்த்ததோர் தேமாங் கனியை
அருத்தமென் றெண்ணி அறையிர்ப் புதைத்து
பொருத்தமில்லாத புளிமாங் கொம்பேறிக்
கருத்தறி யாதவர் காலற்ற வாறே.
இப்படி வாழுகின்ற மனிதனின் மனம் எப்படியிருக்கும்? எப்போதும் எதிலும் அவனுக்கு ஓர் பயம் இருக்கும். எங்கே தன்னை யாரவது பார்த்து விடுவார்களோ, மற்றவர்கட்கு தன் இழிவான செயல் தெரிந்தால் தம்மைப் பற்றி என்ன நினைப்பார்களோ என்ற பயத்திலே ஒரு நடைப்பிணமாக வாழ்வான். இந்த நிலையை நாலடியார் பாடல் வெகு அழகாக விளக்குகின்றது.
புக்க இடத்தச்சம் போதரும் போதச்சம்
துய்க்கும் இடத்தச்சம் தோன்றாமல் காப்பச்சம்
எக்காலும் அச்சம் தருமால் எவன்கொலோ
உட்கான் பிறனில் புகல்.
“விரும்பும் போதும் பயம், திரும்பி வரும்போதும் பயம், போகத்திலும் பயம், வெளியே தெரியாமல் காக்கும் பயம் என்று எப்போதுமே பயத்தில் வாழ்ந்தாவது பிறன் மனை ஏன் செல்லவேண்டும்? “
மனிதனின் மனநிலையை படம் பிடித்துக் காட்டி புத்தி புகட்டும் இந்த அருமையான கருத்து நமக்கு மந்திரமா இல்லை அரு மருந்தா?
(தொடரும் )
பவள சங்கரி
ரிசர்வ் வங்கி புதிய 1 ரூபாய் தாள்களை உடனடியாக புழக்கத்திற்கு விடப்போவதாக மத்திய அரசு அறிவிப்பு. 1 ரூபாய்க்கு நம் நாட்டில் இன்று என்ன மதிப்பு இருக்கிறது? சிறு வியாபாரிகள் முதற்கொண்டு, சாலையில் யாசகம் வாங்குபவர்கள்கூட ஒரு ரூபாயை வாங்க மறுப்பது அன்றாட நிகழ்வு. இப்படியிருக்க 1 ரூபாய் தாள் வெளியிட 50 காசுகள் செலவழிப்பது தேவையா? ஒரு டாலர், ஒரு பவுண்ட் என்றால் அதற்கு பல பொருட்கள் வாங்கலாம். நம் நாட்டில் 1 ரூபாய்க்கு சின்ன இனிப்பு மிட்டாய் தவிர வேறு எதுவும் வாங்க முடியாது. இந்திய அரசு பொருளாதாரத்தை மேம்படுத்தி ரூபாயின் மதிப்பைக்கூட்ட நடவடிக்கை எடுக்கவேண்டிய காலமிது!
-இந்து
ஒற்றைச் சுழியில் தொடங்கி
ஒரு வளைவு, இரு நெளிவு கடைசியில் ஒரு குழிவு ….
என்னே எழில்…!
தன் எழில் போதாதென்று சில சமயம் ஒய்யாரத் தங்கையுடன்….
சில சமயம் காலில் சி்ணுங்கும் மெட்டி சுழியுடன்….
மொத்தமாக அவள் பேரழகி….
அந்த அவள் ‘காவிரித்தாய்’ அல்ல…
அந்த அவள் உயிருள்ள மங்கையும் அல்ல….
அவள் பாரதி தீராத காதல் கொண்டிருந்த உயிர்க் காதலியின் வாரிசுகள்…
ஆம்….
அவள் கன்னி ‘தமிழ்’த்தாயின் பிள்ளைகள்….
அந்த அவள் ‘ஒ’, ‘ஓ’, ‘ஔ’…..
***
பொறுமையாக இருக்க வேண்டும்…
மிகவும் பொறுமையாக இருக்க வேண்டும்…
எதிரே தடைகள் இருக்கலாம்…
இருந்தால் ஒதுங்கிச் செல்ல வேண்டும்…
முன்னேறிச் செல்லும்போது தோல்வி அடையலாம்…
தோல்விகளைக் கண்டு துவண்டுவிடக் கூடாது….
விடாமுயற்சி செய்ய வேண்டும இலக்கை அடையும் வரை ….
இவை என் வாழ்க்கை கற்றுத் தந்த பாடங்கள் அல்ல…
பெங்களூரு ட்ராபிக் கற்று தந்த பாடங்கள்!!
***
குட்டிக் குட்டி கைகள்…
ரோஜா நிறக் கால்கள்….
உன் குட்டி மூக்கு…
பூந்தளிர்க் கன்னம்…
பிறைநிலா நெற்றி…
இப்படி இருப்பாயாடி என் மருமகளே…!
அண்ணன் ஜாடையில் கண்கள் இருக்குமோ…?
அண்ணி ஜாடையில் குட்டி உதடு இருக்குமோ..?
நித்தமும் உன்னையே எண்ணி
என் கவிதைச் சரக்கும் சுவைக்கவில்லையடி..!.
முதல் முறை உருப்படியாய் என் அண்ணன் தந்த அழகுப் பொம்மை
நீ மட்டும் தான் என் பெண்ணே…!
பவள சங்கரி
நமது இஸ்ரோவின் மற்றுமொரு சாதனை பெட்ரோலியப் பொருட்களுக்கு மாற்றாக சூரிய ஒளியை பயன்படுத்தி கார்களை இயக்கும் முறையை உருவாக்கியுள்ளனர். நேற்று மாருதி ஆம்னி வண்டியில் இதை பரீட்சார்த்த முறையில் செயல்படுத்தி வெற்றி கண்டுள்ளனர். இந்த காரின் மேற்கூரையில் சோலார் பேனல்களை வடிவமைத்து அதில் உற்பத்தியாகும் மின்சாரத்தை அவர்களின் மற்றொரு கண்டுபிடிப்பான, புதுவகையான லிட்டானியம் பேட்டரியில் சேமித்து அதற்குரிய தனி மோட்டாரில் இயந்திரச் சக்தியாக மாற்றி கார் ஓட்டும் முறையை உருவாக்கிவிட்டனர். இதில் சில மாற்றங்களைச் செய்து வணிகரீதியில் கொண்டுவர உள்ளனர் என்பது மகிழ்ச்சியான செய்தி. நேற்று இவர்கள் பச்சைக்கொடி காட்டி வெள்ளோட்டம் விட்டது சூரிய சக்தி பயன்பாட்டின் வெற்றிக்கான பச்சைக்கொடி என்பதும் மிக மகிழ்ச்சியான செய்தி!
http://auto.ndtv.com/news/isro-demonstrates-solar-hybrid-electric-car-1688371
பவள சங்கரி
இன்னும் 5 ஆண்டுகளில் நம் இந்தியா உலகின் 4வது பணக்கார நாடாக முன்னேறப்போகிறது என்று IMF (International Monitory Fund) நிறுவனர் தெரிவித்துள்ளார். தற்போது 4வது இடத்திலுள்ள ஜெர்மனியை பின்னுக்குத் தள்ளிவிட்டு நம் இந்தியா அந்த நான்காம் இடத்தைப் பிடிக்கும். ஜிடிபி வளர்ச்சி 8 சதவிகிதத்தை தாண்டிவிடும். ஜிஎஸ்டி இந்தியாவின் பொருளாதாரத்தை வலுப்படுத்தும் என்றும் கணிக்கப்பட்டுள்ளது. தற்போது ஜெர்மனிக்கும் இந்தியாவிற்கும் இடையே உள்ள வேறுபாடு 1 டிரில்லியனுக்கும் குறைவாகவே உள்ளது.
Source : IMF World Economics Outlook Database – Apr. 2017 Edition
பவள சங்கரி
நீலகிரி மாவட்டத்தின் வனவிலங்கு சரணாலயங்களில் நீரின்றி இந்த ஆண்டில் இதுவரை 36 யானைகள் இறந்துள்ளன. அரசு இதற்குரிய நடவடிக்கையை உடனடியாக எடுக்க வேண்டும். முன்பெல்லாம் கோடைகாலத்தில் அங்குள்ள தொட்டிகள், நீர்நிலைகளில் தண்ணீர் எடுத்துச்சென்று நிரப்புவார்கள். தற்போது என்ன செய்கிறார்கள் என்று தெரியவில்லை. தண்ணீர் தேடியே விலங்குகள் மக்கள் வாழும் பகுதிகளுக்கு நுழைகின்றன… இதைக்கருத்தில் கொண்டு அரசு உடனடி நடவடிக்கை எடுக்கவேண்டும்.
ஆந்திர மாநிலம் கடப்பாவில் கோடையின் கொடுமையால் தண்ணீர் பஞ்சம் ஏற்பட்டு முதியோர்களையும், குழந்தைகளையும் தவிர்த்து மற்றையோர் ஊரையே காலிசெய்யும் கொடுமை ஏற்பட்டுள்ளது! போர்க்கால நடவடிக்கை உடனடி தேவை.
வறட்சி அதிகமாகி, தண்ணீர் தேவை அதிகமாகியுள்ள இந்தக்காலகட்டத்தில் கட்டுமானப்பணிகளை சிறிது காலம் நிறுத்தி வைக்கலாமே? கட்டுமானப் பணியாளர்களுக்குரிய மாற்று பணிகளும் ஏற்பாடு செய்யவேண்டும். அல்லது கட்டுமானப் பணிகளில் தண்ணீர் இன்றி செய்யக்கூடிய பணிகளை மட்டும் தற்போது செய்துகொண்டிருக்கலாம். இது கட்டுமானப்பணி மட்டுமன்றி அனைத்துத் தொழில்களுக்கும் பொருந்தும்.
பவள சங்கரி
நடுவண் அரசு உயிர்காக்கும் மருந்துகள் அனைத்தும் குறைந்த விலையில் மக்களை சென்றடையவேண்டும் என்ற நன்முயற்சியை ஏற்படுத்தியுள்ளது. இதயப் பிரச்சனைக்குரிய நிவாரணியான stent ஸ்டெண்ட், 29,600 ரூயாய் விலையில் மக்களுக்குக் கிடைக்கும் வகையில் செயல்பாட்டிற்கு வந்துவிட்டது. அபோட் மருந்து கம்பெனி தன்னுடைய இரண்டு உயர் மதிப்புடைய ஸ்டெண்ட் வகைகளை இதிலிருந்து விலக்கு அளிக்க கோரியுள்ளது. இதே நிறுவனம், தங்களுடைய காலாவதியான மருந்துகளைத் திரும்பப்பெற மறுத்துவருகின்றன. இந்த பன்னாட்டு நிறுவனம் நமது நாட்டில் விற்பனை செய்துகொண்டு பல ஆயிரம் கோடி ரூபாய் வருமானத்தைப் பெற்றுக்கொண்டு அரசின் நல்ல திட்டங்களுக்கு ஒத்துழைக்காமல் இருப்பது வருந்தத்தக்கது. 2 இலட்சம் ரூபாய் மதிப்புள்ள இந்த ஸ்டெண்ட் நமது பிரதமரின் முயற்சியால் ஏழைகளும் பயன்படும் வகையில் ரூ 29,600 க்கு விலை நிர்ணயித்துள்ளனர். இந்த விலையே இவர்களின் லாபத்தையும் கணக்கில்கொண்டே நிர்ணயித்துள்ளனர் என்பதும் குறிப்பிடத்தக்கது.
பவள சங்கரி
பிரெக்ஸிட் (BREXIT) அதாவது பிரிட்டன் ஐரோப்பிய ஒன்றியத்திலிருந்து விலகும் நடவடிக்கைகள் ஆரம்பித்த பிறகு இங்கிலாந்தில் மருத்துவர்களின் தேவை அதிகரித்தவண்ணம் உள்ளது. குறிப்பாக இந்திய மருத்துவர்களின் தேவை அதிகரித்துள்ளதால் அந்த அரசு இந்திய மருத்துவர்களை வரவேற்பதாக அறிவித்துள்ளது. இங்கு 2000 பேருக்கு ஒரு மருத்துவர் என்ற விகிதத்தில் மக்களின் நலனில் அக்கறை கொண்டு அந்நாட்டு அரசு செயல்படுகிறது. இந்தியாவில் 10,000 பேருக்கு ஒரு மருத்துவர்தான் என்று இருக்கும் நிலையில் ஒரு மருத்துவரை உருவாக்குவதற்கு அரசிற்கு பல இலட்சங்கள் செலவாகிறது. இங்கே படித்துவிட்டு இந்த மருத்துவர்கள் இங்கிலாந்து, அமெரிக்கா போன்ற மேலை நாடுகளுக்கு சென்றுவிடுகின்றனர். ஒவ்வொரு நாளும் அரசு மருத்துவமனையில் சென்று பார்ப்பவர்களுக்கு இதன் ஆதங்கமும், வேதனையும் புரியும். ஆகவே நமது இந்தியாவில் படித்து பட்டம் பெறுகின்ற அனைத்து மருத்துவர்களும், வாரத்திற்கு ஒரு நாள் மட்டுமாவது அரசு மருத்துவமனைகள் மற்றும் ஆரம்ப சுகாதார நிலையங்களில் மருத்துவம் செய்வது கட்டாயமாக்கப்படவேண்டும். இது இருதய அறுவை சிகிச்சை செய்யும் மருத்துவர்கள், உயர் மருத்துவம் புரியும் மருத்துவர்களுக்கும் பொருந்துதல் வேண்டும். இம்மருத்துவர்கள் தங்களது சொந்த மருத்துவமனையிலாவது வாரத்திற்கு ஒரு நாளாவது இலவச சிகிச்சை அளிக்க முன்வருவது கட்டாயமாக்கப்படவேண்டும். தில்லியில் நடைமுறையில் உள்ளது போன்று அனைத்து நகரங்கள், பெரு நகரங்களிலும் இதைச் செயல்படுத்த வேண்டியது அவசியம்.
பவள சங்கரி
மே 1 முதல் பாண்டிச்சேரி, விசாகப்பட்டினம், உதயபூர், ஜாம்ஷெட்பூர், சண்டிகார் ஆகிய ஐந்து நகரங்களில், அனைத்து பெட்ரோலியப் பொருட்களுக்கும் பரிட்சார்த்த முறையில் தினசரி விலை நிர்ணயம் செய்யப்பட உள்ளது. பின் படிப்படியாக அனைத்து நகரங்களிலும் இந்த முறை தொடரும். 2012 ஆம் ஆண்டு முதல் தொடர்ந்து மிகுந்த இலாபத்தை ஈட்டி வரும் இந்த நிறுவனங்கள் விலைவிதிப்பிலும் தனிக்கொள்கைகளை கடைபிடித்து போட்டிச் சந்தையை ஏன் உருவாக்குவதில்லை?
பவள சங்கரி
1330 குறட்பாக்களை ஈரடியில் எழுதிய தெய்வப்புலவர் திருவள்ளுவர் ஒரே ஒரு நாலு வரி பாடல் எழுதியுள்ளார்.
அடியிற்கினியாளே அன்புடையாளே
படிசொல் தவறாத பாவாய்- அடிவருடி
பின்தூங்கி முன்னெழும்பும் பேதாய்-
இனிதா(அ)ய் என் தூங்கும் என்கண் இரவு
அன்பு மனைவி இறந்தபின் அவர்தம் பிரிவைத் தாங்காமல் கலங்கி நின்றவர் , நேற்றிருந்தவர் இன்றில்லை என்பது தான் இந்த உலகத்திற்கே பெருமை என்று பாடியவர், அதன்படி தம் மனைவியாரின் மறைவுக்காக பெருமைப்பட்டிருக்க வேண்டியவர், அப்பிரிவைத் தாளாமல் இப்படி எழுதியுள்ளார்!
திருவள்ளுவர் எழுதியதாகக் கருதப்படும் நூல்கள்
1. ஞானவெட்டியான் – 1500 பாக்கள்
2. திருக்குறள் – 1330 பாக்கள்
3. ரத்தினசிந்தாமணி – 800 பாக்கள்
4. பஞ்சரத்தனம் – 500 பாக்கள்
5. கற்பம் – 300 பாக்கள்
6. நாதாந்த சாரம் – 100 பாக்கள்
7. நாதாந்த திறவுகோல – 100 பாக்கள்
8. வைத்திய சூஸ்திரம் – 100 பாக்கள்
9. கற்ப குருநூல் – 50 பாக்கள்
10. முப்பு சூஸ்திரம் – 30 பாக்கள்
11. வாத சூஸ்திரம் – 16 பாக்கள்
12. முப்புக்குரு – 11 பாக்கள்
13. கவுன மணி – 100 பாக்கள்
14. ஏணி ஏற்றம் – 100 பாக்கள்
15. குருநூல் – 51 பாக்கள்
பவள சங்கரி
தீம்புளி சாப்பிட்டதுண்டா? சங்கப்பாடல் சொல்லும் சுவையான பண்டம்!
புளியையும் கருப்பங்கட்டியையும் சேர்த்துப்பிசைந்து அதைப் பொரிப்பார்கள். இப் பண்டத்துக்குத்தான் தீம்புளி என்று பெயர்.
பரதர் தந்த பல்வேறு கூலம்
இருங்கழிச் செறுவிற் றீம்புளி வெள்ளுப்புப்
பரந்தோங்கு வரைப்பின் வன்கைத் திமிலர்
கொழுமீன் குறைஇய துடிக்கண் துணியல் . . (மதுரை காஞ்சி 318)
பண்டமாற்று முறை வாணிபத்தில், நம் நாட்டிற்கு குதிரைகளை மரக்கலங்களில் ஏற்றிக் கொண்டுவந்த யவனர்கள் அதே மரக்கலங்களில் பொன் அணிகலன்களையும், தீம்புளி, உப்பு, உணக்கிய மீன் ஆகியவற்றையும் தத்தம் நாடுகட்கு ஏற்றிச் செல்லுவார்களாம்.
பவள சங்கரி
புற்று நோய் மருத்துவத்திற்காக கடந்த 5 ஆண்டுகளில் 50 வகையான மருந்துகள் கண்டுபிடிக்கப்பட்டு அனைத்து மேலை நாடுகளிலும் பயன்பாட்டிற்கு வந்தபோதிலும் இந்தியா போன்ற வளரும் நாடுகளில் 7 வகையான மருந்துகள் மட்டுமே பயன்பாட்டிற்கு வந்துள்ளன. புதிய கண்டுபிடிப்புகள் அனைத்தும் நம் நாட்டிலும் உடனடியாகக் கிடைக்கும்படி தமிழ்நாட்டிலுள்ள அடையார் புற்றுநோய் மருத்துவமனையும், மும்பை டாடா நினைவு புற்றுநோய் மருத்துவமனையும் முயற்சிகள் மேற்கொள்ள வேண்டும். இந்த புதிய சிகிச்சை முறைகள் (தெரபி) உலகின் அனைத்து நாடுகளுக்கும் கிடைக்க வேண்டியதும் அவசியம்.