Category: தலையங்கம்

பவள சங்கரி

தலையங்கம்

பேரிடர் சமயங்களிலும் பேரிழப்பு ஏற்படும் காலங்களிலும், தமிழன் தலை நிமிர்ந்து நிற்கும் வகையில் செயல்படுவது நெஞ்சில் நெகிழ்ச்சியை ஏற்படுத்துகிறது. மழை வெள்ளத்தில் சிக்கித் தவிக்கும் பல்லாயிரக் கணக்கான மக்களுக்கு உடன் பிறந்தோர்களாக எண்ணி சேவை செய்யும் நல்லுள்ளங்களை வாழ்த்தாமல் இருக்க முடியவில்லை. சென்னை மேட்டுப்பகுதி, கோவை, ஈரோடு, சேலம், திருப்பூர், மதுரை போன்ற பல பகுதிகளிலிருந்து தன்னார்வ சேவை மையங்கள் பல கோடி ரூபாய் மதிப்புள்ள உணவுப் பொருட்கள், போர்வைகள், மருந்துப் பொருட்கள், மருத்துவக் குழுக்கள் என மனமுவந்து அள்ளி வழங்கும் நேசமிகு நெஞ்சங்களைக் காணும்போது நாட்டில் மனிதம் மீதமிருக்கிறது என்ற நம்பிக்கை ஒளிர்விடத்தான் செய்கிறது.

நிதி மிகுந்தவர் பொற்குவை தாரீர்
நிதி குறைந்தவர் காசுகள் தாரீர்
அதுவுமற்றவர் வாய்ச்சொல் அருளீர்
ஆண்மையாளர் உழைப்பினை நல்கீர்
மதுரந்தே மொழி மாதர்களெல்லாம்
வாணி பூசைக்குரியன பேசீர்
எதுவும் நல்கியங் கெவ்வகையானும்
இப்பெருந்தொழில் நாட்டுவம் வாரீர்

என்றானே பாரதி. எண்ணித்தான் இருக்கிறோமோ அதை.

சென்னை நகரிலேயே உயர்வான பகுதியில் வாழக்கூடியவர்கள் தாங்கள் முன்பின் அறிந்திராதவர்களைக் கூடத் தங்கள் இல்லங்களில் தங்கவைத்து உணவு, உடை என முடிந்ததைக் கொடுத்து நலிந்தவருக்கு ஆறுதலாய் இருக்கிறார்கள். நடுவர் பரிந்துரையின் பேரில் நகரில் பேருந்தில் பயணம் செய்வதற்கு இலவச அனுமதி அளித்திருப்பது வெளியூர் மக்கள் மற்றும் உறவினர் வீடு செல்பவர்களுக்கு ஆறுதலளிக்கக்கூடியது.

பால் தட்டுப்பாடு குழந்தைகளை பெரிதும் பாதித்துள்ளது. எரிகிற வீட்டில் பிடுங்கிய வரை இலாபம் என்ற நோக்கில் வியாபாரிகள் கொள்ளை இலாபம் அடித்து வெந்த புண்ணில் வேலைப் பாய்ச்சியிருக்கிறார்கள். ஈரோடு, கோவை , நீலகிரி மாவட்டங்களிலிருந்து வரக்கூடிய ஆவின் பால் கொள்முதலை அதிகப்படுத்தி முன்னேற்பாட்டு நடவடிக்கைகளை முன்னரே சரியாகச் செய்திருந்தால் குழந்தைகளின் பசியையாவது போக்கியிருந்திருக்கலாம். போர்க்கால நடவடிக்கைகளுக்குரிய பணிகளும் காலந்தாழ்த்தி செய்திருப்பது வருந்தத்தக்கது. ஆம்னி பேருந்துகளில் பயணச்சீட்டு ரூ.3000 முதல் 5000 வரை விற்பதாகச் செய்திகள் வருகின்றன. அரசின் தீவிர கண்காணிப்பின் தேவைகள் அதிகரித்துக்கொண்டிருப்பதை அரசு உணர்ந்து அதற்கான நடவடிக்கைகளை துரிதமாக எடுக்க வேண்டியதும் அவசியம்.

ஒரு பிரச்சனை என்று வரும்போதுதான் புதைந்து கிடக்கும் மர்ம ஊழல்கள் வெளிவர ஆரம்பிக்கின்றன. இது போன்ற பேரிடர் சமயங்களில் உயிர் காக்கவேண்டிய முக்கியப் பொறுப்பில் இருக்கும் மருத்துவமனையே 18 உயிர்களின் இழப்பிற்கு காரணமாகியிருப்பது பெருங்கொடுமை. மிகப்பெரிய மருத்துவமனைகளுக்கு உரிமம் கொடுக்கும்பொழுது அதற்குரிய குறைந்தபட்ச அடிப்படைத் தேவைகளாவது பூர்த்தியாகியுள்ளதா என்ற சோதனைகூட செய்யாமல் உரிமம் கொடுத்ததன் விளைவே இந்த 18 உயிரிழப்புகளுக்குக் காரணமானது நாம் வெட்கித் தலைகுனிய வேண்டிய விசயமாகிறது. மியாட் மருத்துவமனையில் நடந்த இந்த சம்பவம் கண்டிக்கத்தக்க ஒன்று. இறந்தவர்களின் உடல்கூட இன்னும் உரியவர்களிடம் ஒப்படைக்கப்படவில்லை என்ற செய்திகளும் வருத்தத்திற்குரியது.

உதவிகள் செய்வதிலும் அரசியல் ஆதாயங்கள் தேடுபவர்களின் செயல்பாடுகள்தான் வேதனையின் உச்சம்.

 இலகுவான மண் உள்ள மலைப்பகுதிகளில் தடுப்புச் சுவர்கள் கட்டப்படாமல், நீரோடைகளையும், குளங்களையும், ஆக்கிரமித்து பலமாடிக் கட்டிடங்களைக் கட்டுவதும், மனைப்பகுதிகளாகப் பிரித்து விற்பனை செய்வதும் என்று முன்னெச்சரிக்கை நடவடிக்கைகளில் தீவிரம் காட்டாமல் இருந்துவிட்டு, இது போன்ற பேரிடர் வரும்போது செய்வதறியாது திகைத்து நிற்பதும் பல நேரங்களில் நமக்கு வாடிக்கையாகிவிடுகிறது.

கார்பன் வெளியேற்றத்திற்குரிய மாற்று ஏற்பாடுகளைப் பற்றி கொள்கை அளவில் அதனைக் குறைப்பதற்கு அனைத்து நாடுகளும் ஒப்புதல் அளித்து பேச்சு வார்த்தையின் முடிவில் குறைப்பது என்று முடிவெடுத்து மாற்று ஏற்பாடுகள் செய்யத் திட்டமிட்டிருக்கும் இவ்வேளையில் இந்தப் பேரிடருக்கு சுற்றுச்சூழல் மாசுதான் காரணம் என்று மத்திய வனம் மற்றும் சுற்றுச் சூழல் துறை அமைச்சர் பிரகாஷ் ஜவடேகர் கூறியுள்ளதும் கவனிக்கப்பட வேண்டிய விசயம்.

இதுவரை நடந்தததைக்காட்டிலும் இனி வரப்போகும் கொடுமையைச் சமாளிக்கத் தயாராக இருக்கவேண்டும். மழை நின்று முற்றிலுமாக வெள்ளம் வடிந்த பிறகு ஏற்படக்கூடிய நோய்த்தொற்றுப் பரவும் அபாயத்தைத் தடுக்க முன்னெச்சரிக்கை நடவடிக்கை எடுக்க வேண்டியதும் அவசியம். மத்திய அரசு இந்த கடும் மழையை தேசியப் பேரிடராக அறிவிப்பதும் அத்தியாவசியமாகிறது.

பவள சங்கரி

தலையங்கம்

தற்பொழுது அரசு நிறுவியுள்ள ஏழாவது ஊதியக்குழு தன்னுடைய பரிந்துரைகளை அறிவித்துள்ளது. அதன்படி அரசு ஊழியர்களுக்கு 16 % சம்பள விகிதமும், வீட்டுப்படி மற்றும் மற்ற படிகள் மூலமாகவும் ஒவ்வொருவருக்கும் 23.55 % அதிகப்படியாக தொகை வழங்க பரிந்துரைக்கப்பட்டுள்ளது. இதன் மூலமாக ஆண்டொன்றிற்கு அரசாங்கத்திற்கு சுமாராக 1.02 இலட்சம் கோடி ரூபாய் அதிகமாக சுமை சுமத்தப்பட்டுள்ளது. இந்த அறிக்கையை அரசும் ஏற்றுக் கொண்டுள்ளதாகத் தெரிகிறது. அரசு ஊழியர்களுக்கு உண்மையில் இது நல்ல செய்திதான். விலைவாசிகள் எகிறியிருக்கும் இந்த காலகட்டத்தில் மத்தியதர மக்களுக்கு இப்படி சம்பள உயர்வு கிடைப்பது பெருமகிழ்ச்சியளிக்கக்கூடிய விசயம்தான். ஆனால் இதனால் பயனடையப்போவது, இந்திய மக்கள் தொகையில் மிகச்சில சதவிகிதங்களே உள்ளவர்கள் மட்டுமே. அரசு ஊழியர்களுக்காக அளிக்கப்படக்கூடிய இந்தப் பணச் சுமையால் இந்தியாவினுடைய பண வீக்கம் மேலும் அதிகரிக்க உறுதி செய்யப்படுகிறது. ஒரு புறம் நிதியமைச்சகம் பண வீக்கத்தைக் கட்டுப்படுத்தப்போவதாகக் கூறிக்கொண்டே மறுபுறம் இது போன்ற நடவடிக்கையில் ஈடுபட்டால் எப்படி பணவீக்கத்தைக் கட்டுப்படுத்த முடியும். ஒரு சில சதவிகித மக்களுக்காக 90 சதவிகிதத்திற்கு மேல் உள்ள பொது மக்களுக்கு மேலும் பண வீக்கத்தைத் தலையில் சுமத்துவது எந்த விதத்தில் நியாயமாகும்? ரூபாயின் மதிப்பை கட்டுப்படுத்தக்கூடிய ஒரு கமிஷன் நியமித்து அது மத்திய ரிசர்வ் வங்கிக்கும் மத்திய நிதி அமைச்சகத்துக்கும் குறிப்பிட்ட கால வரையறைக்குள் தங்களுடைய அறிக்கைகளை சமர்ப்பித்து அதன் மூலமாக ரூபாயின் மதிப்பை கட்டுப்படுத்தினாலே இந்தியாவின் பொருளாதாரம் மேம்படும். சீனர்கள் அதிகாரப்பூர்வமாக அறிவித்து தங்களுடைய நாணயத்தின் மதிப்பைக் குறைத்ததன் மூலம் ஏற்பட்ட தாக்கத்தை சரிசெய்ய இன்னும் போராடிக் கொண்டிருக்கிறார்கள். இந்திய அரசின் மத்திய முக்கிய வங்கியான ஸ்டேட் பாங்க் ஆஃப் இந்தியாவின் மேலாண்மை அதிகாரி இந்திய ரூபாயின் மதிப்பைக் குறைக்க வேண்டும் என்று கூறியது குறிப்பிடத்தக்கது. இன்று நாணய மதிப்பீட்டுச் சந்தையில் டாலருக்கு நிகராக ரூபாயின் மதிப்பு சரிந்து 66 ரூபாயைக் கடந்துவிட்டது. ரூபாயின் மதிப்பைக் கூட்ட வேண்டிய ரிசர்வ் வங்கியும் நிதி அமைச்சகமும், இது தொடர்பான எந்த அறிவிப்பையும் வெளியிடாமல் பணவீக்கத்தை அதிகப்படுத்தக்கூடிய இந்த ஏழாவது பே கமிஷனின் அறிக்கையை ஏற்றுக்கொண்டுள்ளது. விமானப் போக்குவரத்துத் துறை அதிகம் பயன்படுத்தக்கூடிய எரிபொருள் செலவைக் குறைத்து அந்தத் துறையை வளர்ச்சிப்பாதையில் கொண்டு சென்ற அரசு இயற்கை எரிவாய்வு பெட்ரோலிய திரவ எரிவாய்வு மற்றும் பெட்ரோல், டீசல் போன்றவற்றின் விலையைக் குறைக்க வேண்டிய நேரத்தில் அதிகரித்திருப்பது வருந்தத்தக்க விசயம். பேரல் ஒன்றுக்கு 45 டாலருக்கும் கீழ் இருக்கக்கூடிய இன்றைய நிலையில் பெட்ரோலியப் பொருட்கள் பன்மடங்கு விலை குறைக்க வேண்டிய நேரத்தில் பெட்ரோலிய நிறுவனங்கள் விலையை அதிகப்படுத்தியுள்ளன. தங்கத்தின் விலை குறைந்துள்ளது. தங்கத்தின் இறக்குமதியும் குறைந்துள்ளது. ஆனால் ரூபாயின் மதிப்போ குறைந்து கொண்டே வருகிறது. அரசு ரூபாயின் மதிப்பை அதிகரிக்க என்ன நடவடிக்கை எடுக்கப் போகிறது என்று அறிய மக்கள் கவலையுடன் காத்திருக்கிறார்கள். இந்த 1 இலட்சம் 2 இலட்சம் கோடி ரூபாய்களை ஏற்றுமதித் துறைக்கோ அல்லது உற்பத்தி சார்ந்த தொழில்களுக்கோ பயன்படுத்தினால் இந்தியாவின் பொருளாதாரம் சீர்படும். அத்தோடு இதனுடைய பயன் அனைத்து மக்களுக்கும் சென்றடையும்.

பவள சங்கரி

தலையங்கம்

பாலியல் வன்முறைக்கு பெயர்போன நகரமாக நம் தலைநகர் தில்லி மாறி வருவது வேதனைக்குரியது. தில்லியில் சென்ற ஆண்டைக்காட்டிலும் அதிகமான பாலியல் வன்முறை வழக்குகள் பதிவாகி உள்ளன. கடந்த 2014-ம் ஆண்டில் மட்டும் 1,800 வழக்குகள் பதிவாகி உள்ளன. 2013-ம் ஆண்டில் 1,440 வழக்குகள் பதிவாகி இருந்தன. தில்லியில் கடந்த 2014-ம் ஆண்டில் மட்டும் பெண்களுக்கு எதிரான வன்முறை சம்பவம் தொடர்பாக 15,265 வழக்குகள் பதிவாகி உள்ளது. இது நம் நாட்டில் பெண்களுக்கு எதிராக நடைபெற்ற வன்முறைகளில் 4.5 சதவீதமாகும்.

நம் நாட்டில் பெண்களுக்கு எதிரான வன்முறைச் சம்பவங்கள் கடந்த 2011 ஆம் ஆண்டு முதலே வெகுவாக அதிகரித்து வருகின்றன. தேசிய குற்ற ஆவணங்கள் பதிவுத் துறை தகவலின்படி 2011ல் 2,28,650 வழக்குகள், 2012ல் 2,44,270 வழக்குகள் மற்றும் 2013ல் 3,09,546 வழக்குகள் பதிவு செய்யப்பட்டுள்ளன. முக்கியமாக குழந்தைகளுக்கு எதிரான வன்முறைகளும் அதிகரித்துள்ளன. இது தொடர்பான புகார்கள் மீது 2011ல் 33,098, 2012ல் 38,172, 2013ல் 58,224 வழக்குகள் பதிவு செய்யப்பட்டுள்ளன என்பதும் குறிப்பிடத்தக்கது. அதாவது, 2013 ஆம் ஆண்டு தரவுகளின்படி பெண்களுக்கு எதிரான வன்முறை இந்தியாவில் 27% அதிகரித்துள்ளது.

2013 ஆம் ஆண்டில் 33,707 பாலியல்  புகார்கள் பதிவாகியுள்ளன. அதாவது 15 நிமிடங்களுக்கு ஒரு பாலியல் பலாத்காரம் என்ற எண்ணிக்கையில் நடந்துள்ளது. சிறுமிகளைப் பாலியல் பலாத்காரம் செய்யும் புகார்கள் 45% அதிகரித்துள்ளது. தேசிய குற்றப்பதிவு மையம் வெளியிட்டுள்ள புள்ளி விவரத்தின்படி, கடந்த 2001 முதல் 2011-ம் ஆண்டு வரை 48 ஆயிரத்து 338 குழந்தைகள் பாலியல் பலாத்கார கொடுமைக்கு ஆளாக்கப்பட்டுள்ளனர். 10 ஆண்டுகளில் இதன் விகிதம் 336 சதவீதம் அதிகரித்துள்ளது என்பது கொடுமையிலும் கொடுமை. மனிதாபிமானம் என்ற ஒன்று மொத்தமாக செத்துக்கொண்டிருப்பதையே இது காட்டுகிறது.

தலைநகரில் சமீபத்தில் நடந்த சம்பவம் ஒவ்வொரு இந்தியரும் வெட்கித் தலை குனிய வேண்டிய ஒரு நிகழ்வு. உலகமே அறியாத ஒரு இரண்டரை வயது குழந்தைக்கும், ஐந்து வயது குழந்தைக்கும் கூட பாதுகாப்பு இல்லாத நிலை. இதன் பின்னணியாக மின்வெட்டு, போதைப் பொருட்கள், இன்னும் ஏதேதோ காரணங்கள்… காரணிகளை ஆய்ந்து குற்றங்களை களைவதை விடுத்து தில்லி முதல்வர் பிரதமரைக் கைகாட்டுவது வருத்தத்திற்குரியது. இவ்வளவு பெரிய பிரச்சனைக்கு பொறுப்பேற்காமல் வெகு எளிதாக தவிர்க்க நினைப்பது தலைமைப் பதவியில் இருப்பவருக்கு முறையல்ல. குற்றவாளிகளை உடனடியாகக் கண்டுபிடித்து தண்டனையை வழங்க வேண்டும். குற்றவாளிகள் சட்டத்தின் ஓட்டையில் நுழைந்து வெளிவராதவாறு சட்டம் கடுமையாக்கப்பட வேண்டும். பாலியல் வன்கொடுமைகளுக்கு, குறிப்பாக பிஞ்சுக் குழந்தைகளுக்கு துன்பம் இழைக்கிற கொடூரர்களுக்கு அதிகபட்ச தண்டனை வழங்கப்பட வேண்டும். இவையனைத்திற்கும் மேலாக காவல் துறை மேலும் அதிக விழிப்புணர்வுடன் செயல்பட வேண்டியது அவசியம். இது போன்ற ஒரு கொடுமை இனி எப்போதும் நடைபெறாது என்ற உறுதியெடுக்க வேண்டும்.

கடுமையான இந்த சூழலில் பெற்றோரும் மிகுந்த கவனமுடன் இருக்க வேண்டியது அவசியம். உறவுகள், பழகியவர்கள் என யாராக இருப்பினும் குழந்தைகள் அளவறிந்து நெருங்கும்படி விழிப்புடன் பார்த்துக் கொள்ள வேண்டியது அவசியம். பதிவு செய்யப்பட்ட பெரும்பாலான பாலியல் வல்லுறவு வழக்குகளில் 94 சதவிகித வழக்குகளில், குற்றவாளிகள் பாதிக்கப் பட்டவர்களுக்குத் தெரிந்தவர்களாக உள்ளனர் என்பது குறிப்பிடத்தக்கது . பணிக்குச் செல்லும் பெண்கள் தங்கள் குழந்தைகளுக்குத் தகுந்த பாதுகாப்பு ஏற்பாடுகள் செய்வதில் அதிக கவனமுடன் செயல்பட வேண்டும்.

சற்றுமுன் கிடைத்த செய்திகளின்படி இது போன்ற குற்றங்களைக் களைவதற்கும், இதற்குரிய தண்டனைகளை கடுமையாக்குவதற்கும் துணை முதல்வர் தலைமையில் ஒரு குழு அமைக்கப்பட்டுள்ளது என்பது சற்று ஆறுதலான விசயமாக உள்ளது.

பவள சங்கரி

தலையங்கம்

சமீபத்தில், நிதியமைச்சகத்தின் சார்பாக புதிய வரி விகிதங்கள் மாற்றியமைத்தல் தொடர்பாக, மக்களுடைய கருத்துகளையும் கேட்டுள்ளது வரவேற்பிற்குரியது. சுதந்திரம் பெற்றதிலிருந்து இதுவரை, பொது மக்களிடமும், பொருளாதார நிபுணர்கள் மற்றும் மாநில அரசுகளிடமோ கருத்து கேட்பது பெரும்பாலும் அரிதாகவே உள்ளது. உண்மையிலேயே கருப்புப் பணத்தை முற்றிலும் ஒழிக்க வேண்டுமென்றால் அனைத்துத் துறையினரும் நியாயமான முறையில் வரி செலுத்தும் வகையில் வரி விதிப்புகள் அமைக்கப்பட வேண்டியது அவசியம். கருப்புப் பணத்தை ஒழிப்பதற்கான திட்டங்களை நிறைவேற்றும் முன்பு, மேலும் அவை புதிதாக உருவாகாத வகையில் வரிவிதிப்பு முறைகளை செயல்படுத்த வேண்டியதும் அவசியம். எந்த ஒரு பொருளுக்கும் அதற்குரிய பரிவர்த்தனைகள் வங்கிகளின் வாயிலாகவே நடைபெற வேண்டும். தனி நபர்கள் மற்றும் நிர்வாகத்தினர் வங்கியிலிருந்து ஒரு நாளைக்கு எடுக்கக்கூடிய தொகைகளின் அளவு வரையறுக்கப்பட வேண்டும். சேமிப்புக் கணக்குகள் மற்றும் நடப்புக் கணக்குகளில் நாள் ஒன்றிற்கு குறைந்தபட்ச தொகைக்கு மேல் அனுமதிக்காமல் இருப்பதும், கார்ப்பரேட் நிறுவனங்களுக்கும் குறிப்பிட்ட தொகைக்கு மேல் வங்கியிலிருந்து பெறுவதற்கு கட்டுப்பாடு விதிக்கப்பட வேண்டும். சில தனியார் வங்கிகளில் உள்ளது போன்று ‘ஹோம் பிராஞ்ச்’ என்று சொல்லக்கூடிய கணக்கு துவக்கப்பட்ட வங்கிகள் அல்லது மற்ற வங்கிகளிலும் குறிப்பிட்ட தொகைக்கு மேல் பணத்தை செலுத்துவதற்கு கட்டணம் விதிக்கப்பட வேண்டும். எந்த நிலையிலும், எந்த வகையான பரிவர்த்தனைகளாக இருப்பினும் சேமிப்பு வங்கிக் கணக்கில் ரூ.1000 மற்றும் நடப்புக் கணக்கில் 10,000 ரூபாய்க்கு மேல் பரிவர்த்தனை செய்வது தடை செய்யப்பட வேண்டும். அமெரிக்கா அல்லது ஐரோப்பிய நாடுகளில் உள்ளது போல அனைத்து பரிவர்த்தனைகளுக்கும் பற்று அட்டை (டெபிட் கார்ட் ) அல்லது கடன் அட்டை (கிரெடிட் கார்ட்) அல்லது காசோலை மட்டுமே பயன்படுத்தப்பட வேண்டியது அவசியம். இப்படி செய்வதன் மூலம் எந்தவித வியாபாரத் துறையாக இருப்பினும் அதன் கணக்கு வழக்குகள் நிமிடத்திற்கு நிமிடம் அரசாங்கத்திற்கு வந்துசேர வழிவகுக்கும். மென்மேலும் நோட்டு அச்சடிப்பதையே பெருமளவில் குறைக்க வழிவகுக்கும். கருவூலங்களின் பணிகளும் பெருமளவில் குறைய வாய்ப்பாகும். இதுபோன்று பரிமாற்றங்கள் நடைபெறும்போது, அதனைத் துல்லியமாகக் கணக்கிட்டால், வருமான வரி, விற்பனை வரி, சேவை வரி போன்றவைகளும் அரசிற்கு முழுமையாக வந்து சேரும். கருப்புப் பணம் என்பதும் இல்லாமல் போகலாம். இவ்வாறு அனைத்து பரிவர்த்தனைகளும் முறைபடுத்தப்பட்டு, செயல்படுத்தும் விதத்தில் நிர்ணயிக்கப்பட்ட இலக்கை விட பன்மடங்கு அதிகமாக அரசுக்கு வருவாய் கிடைக்கவும் ஏதுவாகும்.

ஒரு துறை சார்ந்த பொருட்களுக்கு ஒரே விதமான வரி விதிப்புகள் இருப்பதும் பயனளிக்கலாம். உதாரணமாக, நூல் விற்பனை என்பதை எடுத்துக் கொண்டால் தற்போது சிட்டா நூலுக்கும் , ஜவுளிகளுக்கும் வரி விதிப்பிலிருந்து விலக்களிக்கப்பட்டுள்ளது. கோன் நூலுக்கு 5 சதவிகிதம் வரி விதிக்கப்படுகிறது. ஆனால் அனைத்து விதமான விற்பனைகளுக்கும் 2 % வரி விதித்தாலே தற்பொழுது நூல் விற்பனையில் கிடைக்கக்கூடிய வருவாயைவிட பன்மடங்கு வருமானம் கிடைப்பதோடு வரி ஏய்ப்பும் தடுத்து நிறுத்த ஏதுவாகும்.

தங்க விற்பனையை எடுத்துக்கொண்டால் பல விதமான முறைகேடுகள் நடந்து கொண்டிருப்பதை காணமுடிகிறது. தற்போது 1 % மட்டும் வரி விதிக்கப்படுகிறது. தங்கத்தை வாங்கி அதை நகைகளாக மாற்றும்போது பொது மக்களிடமிருந்து நான்கு முதல் 25 % சதவிகிதம் வரை வசூலிக்கப்படுகிறது. மற்ற துறைகளில் இருப்பது போல இந்தத் துறையிலும் ‘வேல்யூ ஏடட் சர்வீஸ் டேக்ஸ்’ விதிக்கப்பட்டால் பயனுள்ளதாக அமையும். தங்க இறக்குமதியை தாராளமாக்குவதோடு, ஏற்றுமதியின் அளவையும் அதிகரிப்பதற்கான ஊக்குவிப்பும் அரசாங்கம் அளித்தால் நலம்.

நம் இந்தியப் பொருளாதாரம் என்பது எப்பொழுதும் நம் நாட்டை மட்டுமே சார்ந்து இருக்க வேண்டுவது அவசியமாகிறது. மற்ற நாடுகளின் பிரச்சனைகள் நம் நாட்டை பாதிக்காமல் பார்த்துக்கொள்வதும் அவசியம். வலிமையான பொருளாதாரமே நம் இந்தியாவை வல்லரசாக்கும். இதற்கு ஏற்றுமதிகளை அதிகப்படுத்தியும் இறக்குமதிகள் அனைத்தும் ஏற்றுமதியைச் சார்ந்தும், ஏற்றுமதி இறக்குமதிக்குரிய விகிதாச்சாரங்களில் இறக்குமதி குறைந்தும் பெட்ரோலியப் பொருட்களுக்கான மாற்றுப் பொருட்களை ஊக்குவித்தும், நம் மண்ணில் கிடைக்கக்கூடிய இயற்கை எரிவாயுவை உபயோகிக்க ஊக்குவித்தும் எல்.பி.ஜி எரிவாயு எளிதான நடைமுறை உபயோகத்திற்குக் கொண்டுவந்தும், ஜி.எஸ்.டி வரி விதிப்பு முறையை உடனடி அமுலுக்குக் கொண்டுவந்தும் இந்திய பொருளாதாரத்தில் பெரும் மாற்றத்தை ஏற்படுத்தலாம்.

பவள சங்கரி

தலையங்கம்

பொருளாதாரச் சந்தையின் நேற்றைய வீழ்ச்சிகள் இன்றும் தொடருகின்றன. பொதுவாகவே அன்றைய நாளின் சந்தை துவக்கம், ஜப்பானிலிருந்துதான் துவங்குகிறது. பொருளாதார சந்தை தொடக்கமே சரிவுடன் ஆரம்பமாகியுள்ளது. அதைத் தொடர்ந்து சங்காய் பொருளாதாரச் சந்தையும் 6% சரிவுடன் தொடங்கியுள்ளது. இது இப்படியே தொடருமானால் சீனா, இந்தியா, ஆசுதிரேலியா, அமெரிக்கா போன்ற நாடுகளின் பொருளாதாரச் சந்தைகள் பெருமளவில் விழ்ச்சியடையும் என்று எதிர்பார்க்கப்படுகிறது. தற்போது நாணய மதிப்புகளில் சரிவுகளைச் சந்திக்காமல் தாக்கு பிடிப்பது யூரோ மற்றும் பவுண்டின் மதிப்புகள் மட்டுமே. இவற்றிற்கு அடிப்படை காரணமாக இருப்பது, அமெரிக்க மத்திய வங்கி வட்டி விகிதத்தை அதிகரித்ததும் சீனா தன்னிச்சையாக தனது நாணயத்தின் மதிப்பை குறைத்ததுமாகும். இந்த மதிப்பு குறைப்பின் மூலமாக தன்னுடைய பொருளாதாரத்தை சீர் செய்யும் நோக்கோடு செயல்பட்டது தவறான அணுகுமுறையாகிவிட்டது. அதனுடைய பொருளாதார நிலை சீர்படுவதற்குப் பதிலாக மேலும் படுபாதாளத்திற்கு சென்றடையும் அபாயமும் உள்ளது. கச்சா எண்ணெயின் கொள்முதலை மிகவும் குறைத்ததும் ஒரு தவறான நடவடிக்கையாகும். மீண்டும் பழைய நிலையில் உற்பத்தியைப் பெருக்கி, ஏற்றுமதியை அதிகரித்தால் மட்டுமே இந்நிலையிருந்து மீண்டு வரமுடியும். ஏற்றுமதியாளர்கள், உற்பத்தியாளர்கள் போன்றவர்களை உற்சாகப்படுத்தும் வகையில் சலுகைகளை அறிவித்தால் மட்டுமே இந்தச் சரிவுகளிலிருந்து பொருளாதாரத்தை தடுத்து நிறுத்த முடியும். வங்கிக் கொள்கைகள் மாறுபட வேண்டும். நாணய மதிப்பை குறைப்பதற்குப் பதிலாக வட்டி விகிதங்களைக் குறைக்க வேண்டும். சீனாவின் பாதிப்பு என்பது தமதளவில் மட்டும் நிற்காமல் உலகையே பாதிக்கக்கூடிய நிலையில் இருக்கிறது. மிக பிரமாண்டமாக வளர்சியடைந்த சீனா, அதை தக்கவைத்துக்கொள்ள போராட வேண்டிய நேரமிது. சீனா தன்னுடைய நாணயத்தின் மதிப்பைக் குறைத்ததால் மற்ற நாடுகளின் நாணய மதிப்பும் தானாகக் குறைய ஆரம்பித்துள்ளது. கச்சா எண்ணெயின் விலை என்றும் இல்லாத அளவிற்கு நேற்று மட்டும் 1.7 டாலர் குறைந்து 43 டாலரை அடைந்துள்ளது. இது இன்னும் தொடர்ந்து 40 டாலர்களை அடையும் என்று எதிர்பார்க்கப்படுகிறது. தங்கத்தின் விலை அதிகரிக்கும் என்பது பொருளாதார வல்லுநர்களின் கருத்து என்றாலும் அப்படி விலையேறும் வாய்ப்பு குறைவு. ஏனெனில் மக்களிடையே வாங்கும் சக்தி மிகவும் குறைந்துள்ளது. தங்கத்தில் முதலீடு செய்யக்கூடிய பெரும் முதலீட்டாளர்கள் குழப்பத்தில் இருக்கின்றனர். பங்குச் சந்தையில் மேலும் நிலையற்ற தன்மை நிலவி வரும் என்கிறனர். தொடர்ந்து சரிவையே சந்திக்கப்போகும் அபாயமும் இருப்பதாகத் தெரிகிறது.

மத்திய நிதியமைச்சரும், ரிசர்வ் வங்கி தலைவரும், இந்தியாவை சரிவிலிருந்து தடுத்து நிறுத்த என்ன நடவடிக்கை எடுக்கப் போகிறார்கள், இந்தச் சரிவிலிருந்து எப்படி மீட்கப் போகிறார்கள் என்ற எதிர்பார்ப்பு அதிகரித்துள்ளது. உற்பத்தியாளர்களையும், ஏற்றுமதியாளர்களையும் பாதுகாக்க அரசு உடனடி நடவடிக்கை எடுக்க வேண்டியது அவசியம். ரூபாயின் மதிப்பை சரிவிலிருந்து மீட்கும் நடவடிக்கைகள் குறித்தும் எதிர்பார்ப்புகள் வலுவடைந்துள்ளது. மத்திய வங்கி வட்டி விகிதங்களை பழைய அளவீடுகளான 8 அல்லது 7.25 சதவிகிதத்திற்கு குறைக்குமா என்ற எதிர்பார்ப்பும் இருக்கிறது. இதற்கெல்லாம் தீர்வு ஏற்படும் வகையில் இந்திய அரசு உடனடி நடவடிக்கை எடுக்க வேண்டியது அவசியம்.

பவள சங்கரி

தலையங்கம்

‘குடி குடியைக் கெடுக்கும்’ என்பது சர்வ சாதாரணமான வழக்கு மொழியாகிவிட்டபோதிலும் ஏனோ அது எப்போதும் ஆட்சியாளர்களின் செவியில் மட்டும் விழுவதே இல்லை. மது விற்பனையினால் அரசிற்கு கனிசமான வருமானம் வருவது மட்டுமே கணக்கில் எடுத்துக்கொள்ளப்படுவது நல்லது அல்ல. நாட்டு மக்களின் நலனில் சற்றேனும் அக்கறை எடுக்க வேண்டியதும் ஆட்சியாளர்களின் கடமை. திருவள்ளுவர் முதல் காந்தியடிகள் வரை குடிப்பழக்கத்தின் தீமையை எடுத்துரைத்துள்ளனர். இருந்தபோதிலும் வருமானத்தை மட்டுமே கருத்தில்கொண்டு மதுவிலக்கை அமல்படுத்தாமல் இருப்பது மக்களின் மனதில் வெறுப்பையே அதிகரிக்கச் செய்கிறது. இன்று மாணவர்களையும் இந்தக் குடிப்பழக்கம் தொற்றிக்கொண்டது வேதனையான விசயம். பெண்களும், மாணவ, மாணவிகளும் குடி போதைக்கு அடிமையாகி வருவதை ஊடகங்கள் தொடர்ந்து வெளியிட்டுக்கொண்டிருக்கின்றன. இதனால் காட்டுத் தீ போல பரவும் செய்திகள் மேலும் பல இளைஞர்களை சீரழிக்க வழி வகுக்கின்றன. வரலாற்றுக்கு முற்பட்ட காலத்திலேயே, அதாவது மனிதன் அநாகரிக நிலையில் இருந்த காலத்திலேயே கள் போன்ற போதை தரும் பொருளை காய்ச்சி உண்டது குறித்த தகவல்கள் சங்க இலக்கியங்கள் மூலம் தெரிய வருகின்றன. இருப்பினும் இந்த அளவிற்கு நாட்டில் குடி போதையால் குடி நோயாளிகள் ஏற்படுத்தும் சமுதாயச் சீரழிவுகள் சமீப காலங்களில்தான் மிகவும் அதிகரித்துள்ளது. குறிப்பாக மிக எளிமையாகக் கிடைக்கும்படி தெருவிற்கு தெரு திறக்கப்பட்டுள்ள டாஸ்மாக் கடைகள்தான் இதற்கு முக்கிய காரணம் என்றாகிறது. ஏதோ ஒரு காரணம் வைத்துக்கொண்டு, இன்று சிறுவர்கள், இளைஞர்கள் முதற்கொண்டு மது அருந்தும் பழக்கம் பரவலாகிக்கொண்டு வருகிறது. இந்த நேரத்திலாவது அரசு தன் கடமையை உணர்ந்து பூரண மதுவிலக்கை படிப்படியாக அமல்படுத்த வேண்டும். அதற்கு முதற்கட்டமாக, டாஸ்மாக் கடைகள் குறிப்பிட்ட நேரம் மட்டும் திறந்து இருக்கும்படியும், மது அருந்துபவர்களின் வயதுக் கட்டுப்பாட்டை நிர்ணயம் செய்து, அதனை மீறுபவர்களுக்கு கடுமையான தண்டனை வழங்கும் சட்டமும் ஏற்படுத்த வேண்டும்.

மதுவிலக்கை அமல்படுத்தக் கோரி தம் உயிரைத் தியாகம் செய்துள்ள காந்தியவாதி சசி பெருமாள் அவர்களின் தியாகத்திற்கு அஞ்சலி செலுத்துவதும், உதவித் தொகை வழங்குவதும் மட்டும் அவருக்கு செலுத்தும் நன்றியாகாது. அவர் விரும்பியபடி மதுவிலக்கை அமல்படுத்த முயற்சி எடுக்க வேண்டும். ஏற்கனவே இவர் சென்னை மெரினா கடற்கரையில் இதே காரணத்திற்காக, காந்தி சிலை அருகே 33 நாட்கள் உண்ணா விரதம் இருந்ததும் குறிப்பிடத்தக்கது. ஒரு மனிதாபிமானமிக்க நல்ல கோரிக்கைக்காக தம் இன்னுயிரை ஈந்துள்ள திரு சசி பெருமாள் அவர்களுக்கு உரிய மரியாதை செலுத்த வேண்டியதும் அரசின் கடமை. நம் தமிழ்நாட்டில் அரசு ஏற்று நடத்த வேண்டிய பணிகள் பல இருக்க வருமானத்தை மட்டுமே கணக்கில் கொண்டு சமுதாயத்திற்கு பேரழிவை ஏற்படுத்திக் கொண்டிருக்கிற மதுக்கடை வியாபாரத்தை மட்டும் ஏற்று நடத்துவதுதான் பெரும் அவலத்தை ஏற்படுத்துகிறது. அதற்கு முன்பு கள்ளச் சாராயமும், விசச் சாராயமும் ஏற்படுத்தியிருந்த அழிவைக் காட்டிலும் இது மோசமானதாக இருக்கிறது. நம் தமிழ்நாட்டின் கலாச்சாரமே சீர்கெட்டுப் போவதற்கு இதுவும் ஒரு காரணியாகும் அபாயம் வந்துவிட்டது. அதனால் தமிழகத்தில் அனைத்து மதுக்கடைகளையும் உடனடியாக தமிழக அரசு மூட வேண்டும்; அதாவது முழு மதுவிலக்கை அமுல்படுத்த வேண்டும். இப்படிச் செய்வதால் தேவையற்ற வன்முறைகளை கட்டுப்படச்செய்யவும் முடியும். கேரள மாநிலத்தில் 21 வயதிற்கு கீழ் உள்ளவர்கள் மது வாங்கி அருந்துவதற்கு அனுமதியில்லை. இதை கட்டாயமாகக் கடைபிடிக்கிறார்கள். ஆனால் நம் தமிழ்நாட்டில் குறைந்தபட்சம் இந்தக் கட்டுப்பாடு கூட இல்லை என்பதே இளைஞர்கள் மற்றும் சிறுவர்களின் சீரழிவிற்கு வழிவகுக்கிறது. பொதுவாக இயற்கையாக புளிக்க வைத்து தயாரிக்கப்படும் மது வகைகளை தயாரிப்பதற்குரிய கால அவகாசமும் செலவினமும் அதிகமாவதால், செயற்கையான ஆல்கஹால் பொருட்களைச் சேர்த்து குறைந்த விலையில் விற்பதால், இது உடல் ஆரோக்கியத்திற்கு மேலும் கேடு விளைவிக்கிறது. பிற மாநில மதுவகைகளை விட தமிழகத்தில் விற்கப்படும் மது மிக அதிகமாக உடல் பாதிப்புகளை ஏற்படுத்துகிறது என்ற கருத்தும் நிலவுகிறது. அதோடு கிட்டத்தட்ட ஆண்டொன்றிற்கு ரூபாய் 35,000 கோடிக்கு வியாபாரம் நடந்து, 20,000 கோடி வரை இலாபம் கிடைக்கக்கூடிய இத்தொழிலை சரியாக முறைப்படுத்தவும் இல்லை. விற்பதற்கும், வாங்குவதற்கும் பில் போடுவதோ அல்லது இரசீது கொடுப்பதும் இல்லை. இதனால் யார் வேண்டுமானாலும் எப்போது வேண்டுமானாலும் மது வாங்கி அருந்த முடிகிறது. குறைந்தபட்சம், மதுக்கடைகளில் கண்காணிப்பு கேமராக்கள் பொறுத்துவதன் மூலமாக சிறுவர்கள் மற்றும் இளைஞர்களை கட்டுப்படுத்த வாய்ப்பு இருக்கும். குடி போதையில் தகராறு செய்பவர்களையும், வண்டி ஓட்டுபவர்களையும் கடுமையாகத் தண்டிக்கும் சட்டம் வரவேண்டும். இந்தியாவில் குஜராத் மாநிலம் தவிர அனைத்து மாநிலங்களிலும் மது விற்பனை இருந்தாலும், ஆரோக்கியமற்ற சூழலில் விற்கப்படும் மதுவினால் அதிக உயிரிழப்பு , உடல் நல பாதிப்பு , குடும்ப சீர்கேடுகள் தமிழகத்தில் மட்டும் தான் மிக அதிகம் .

இவையனைத்திற்கும் மேலாக நம் நாட்டில் கனிம வளங்களும், இயற்கை வளங்களும் குவிந்து கிடக்கும்போது அதில் முழு கவனம் செலுத்தினாலே நல்ல வருமானம் பார்க்க முடியும். அவைகளை தனியார் வசம் ஒப்படைத்துவிட்டு மக்களின் ஆரோக்கியத்தை குலைத்து அதில் வரும் வருமானம் கொண்டுதான் இலவசங்கள் வழங்க வேண்டுமென்பதில்லை. தில்லியில் செயல்படுவது போல நம் தமிழகத்திலும் அரசு பேருந்துகள் இயற்கை எரிவாயு மூலம் இயங்க ஆரம்பித்தாலே, எரிபொருள் செலவு கனிசமாகக் குறையும் என்பதால் பல ஆயிரம் கோடி வருமானம் பெற முடியுமே. மணல் கொள்ளைத் தடுப்பு, கிரானைட் நேரடி விற்பனை, தேவையற்ற இலவசங்கள் வழங்கும் திட்டம், மின்சாரம் வழங்குவதின் முறைகேடுகள், உணவு வழங்கல் துறையில் உள்ள குறைபாடுகள் போன்றவற்றை கட்டுப்படுத்தி சீரமைத்தாலே மிகப்பெரும் தொகை வருமானமாகப் பெற முடியும் எனும்போது இப்படி பொது மக்களின் வாழ்வாதாரத்தையே சீர் குலைக்கும் மது விற்பனை அவசியம்தானா என்பதை போர்க்கால நடவடிக்கையில் முடிவெடுக்க வேண்டிய அத்தியாவசியத் தேவையில் நம் தமிழக அரசு இப்போது உள்ளது என்பதே நிதர்சனம்.

பவள சங்கரி

தலையங்கம்

பன்னாட்டு நிதியமான ஐ.எம்.எப், மற்றும் உலக வங்கி ஆகியவைகளுக்கு மாற்று வங்கியாக செயல்படும், ‘புதிய வளர்ச்சி வங்கி’ திறப்பு விழா, சமீபத்தில் சீன வர்த்தக நகரங்களில் ஒன்றான ஷாங்காய் நகரில் நடந்தேறியது. பிரிக்ஸ் நாடுகளான, பிரேசில், உருசுயா, இந்தியா, சீனா, தென் ஆப்பிரிக்கா ஆகிய ஐந்து நாடுகளும் இணைந்து இந்த வங்கியை துவக்கியுள்ளது. இவ்விழாவில் காமத் , சீன நிதியமைச்சர் லூ ஜிவெய் மற்றும் ஷாங்காய் மேயர் யாங் சியாங் ஆகியோர் கலந்துகொண்டனர். சென்ற ஆண்டு (2014) ஜூலை மாதம் பிரேசில் நாட்டின் போர்டலிசா நகரில் நடந்த பிரிக்ஸ் நாடுகளின் முதல் நாள் உச்சி மாநாட்டில் இறுதி வடிவம் பெற்ற, வங்கியை உருவாக்கும் இத்தீர்மானத்தின்படி ‘புதிய வளர்ச்சி வங்கி’ என்ற பெயரில் ஆரம்பிக்கப்பட்டுள்ளது. இந்த வங்கியின் நிர்வாகத்தில் பிரிக்ஸ் நாடுகளான ஐந்து நாடுகளும் சம பங்கு வகித்திருக்கும். உறுப்பினர்களின் கோரிக்கைகளை கவனத்துடன் கேட்டு அவர்களுக்குத் தேவையான உதவிகளை வழங்கவிருக்கும் இந்த வங்கிக்கு சிறந்த முறையில் ஒத்துழைப்பு நல்க வேண்டி இதன் முதல் தலைவரான இந்தியாவைச் சேர்ந்த, ஐசிஐசிஐ வங்கியின் முன்னாள் உயரதிகாரியான கே.வி.காமத் கேட்டுக்கொண்டுள்ளார்.

நிர்வாக முறைகளில் புதிய முறைகளைக் கடைபிடிக்கவுள்ளதாகக் கூறிய சீன நிதியமைச்சர் லூ ஜீவெய் , இந்த புதிய வளர்ச்சி வங்கி ஏற்கெனவே இயங்கி வரும் பன்னாட்டு நிதியமைப்புகளுக்கு ஒரு ஆரோக்கியமான மாற்றாகவும் செயல்படும் என்று கூறியிருக்கிறார். மேலும் அவர் தொடக்கத்தில் 50 பில்லியன் டாலர்களுடன் தொடங்கப்படும் இந்த வங்கி அடுத்த 2 ஆண்டுகளில் 100பில்லியன் டாலர்களாக அதிகரிக்கப்படும் வகையில், வளரும் நாடுகளில், தேவையுள்ள நாடுகளின் உள்கட்டமைப்பு வளர்ச்சிகளுக்கு இந்த வங்கி பெரிதும் உதவக்கூடிய வகையில் செயல்படும் என்றார். பிரிக்ஸ் நாடுகளின் உள் கட்டமைப்பை மேம்படுத்தும் வகையில் கூட்டு நிதித் திட்டத்துக்காக உருவாக்கப்பட்டதே இந்த வங்கி என்பதும் குறிப்பிடத்தக்கது.

இந்தியா, சீனா, பிரேசில் போன்ற நாடுகள் தங்கள் உள்நாட்டு திட்டங்கள் மற்றும் அதன் செயல்பாடுகளுக்காகத் தேவைப்படும் பெரியளவிலான நிதிகளை பன்னாட்டு நிதியம் அல்லது உலக வங்கியிடம்தான் கடன் வாங்கவேண்டி உள்ளது. கடன் பெறுவதில் சில நேரங்களில் அமெரிக்காவின் நெருக்கடிகளையும் சந்திக்கவேண்டிய இப்பிரச்சினைக்கு முற்றுப்புள்ளி வைக்கவும் இந்த வங்கி உறுதுணையாக இருக்கும் என்ற நம்பிக்கை வலுத்திருக்கிறது. உலக பொருளாதாரத்தில் 2-வது இடத்தில் இருக்கும் சீனா, முதல் 20 ஆண்டுகளுக்கு இந்த வங்கி நிர்வாகத்திற்கு தலைமை ஏற்க விரும்பவில்லை என்று தெரிவித்துவிட்டதும் குறிப்பிடத்தக்கது. அனைத்து நாடுகளும் ஒன்றிணைந்து செயல்பட்டால் வருகிற 2030-ம் ஆண்டுக்குள் வறுமையை முற்றிலும் ஒழிக்க முடியும் என்றும் உலக வங்கி தெரிவித்து உள்ளது.

இந்த வங்கியில் மொத்த மூலதனத்தின் பெரும் பகுதி, சீனா மற்றும் இந்தியா அளித்துள்ளனர். இந்த வங்கி தெற்காசிய நாடுகளை இணைத்து பொருளாதார வளர்ச்சியில் முன்னேற்றம் ஏற்படுவதற்கு உறுதுணையாக இருக்கும் என்று நம்புவோம். ஐரோப்பிய நாடுகள் இணைந்து யூரோவை உருவாக்கியது போன்று தெற்காசிய நாடுகள் அனைத்தும் இணைந்து உருவாக்கியுள்ள இந்த வங்கி மூலமாக பணப்பரிமாற்றத்திற்கு ஒரு பொது காரணியை உருவாக்கினால், தெற்காசிய நாடுகளும், கிழக்காசிய நாடுகளும் மிகுந்த வளர்ச்சியடைந்து ஐரோப்பிய பொருளாதாரத்திற்கு ஒரு மாற்று பொருளாதாரமாக உருவெடுக்கும். சந்தை மதிப்பிலிருந்து டாலர் மற்றும் யூரோவின் மதிப்புகளும் சரியும் வாய்ப்பும் அதிகரிக்கலாம். இந்தியா, சீனா, கொரியா ஆகிய நாடுகளின் பொருளாதாரமும் வளர்ச்சியடையும். உலகப் பொருளாதாரத்தை நிர்ணயிக்கும் காரணிகளாகவும் இவை உருவாகும் வாய்ப்புகளும் அதிகரிக்கலாம்.

பவள சங்கரி

தலையங்கம்

அன்னையர் தினம், தந்தையர் தினம், மகளிர் தினம், குழந்தைகள் தினம், காதலர் தினம் போன்று பல்வேறு தினங்களைக் கொண்டாடி மறந்து விடும் விசயங்களில் இதுவும் ஒன்றுதான் என்று குழந்தை தொழிலாளர் ஒழிப்பு தினம் மறக்கக் கூடிய விசயமன்று. தொழிலாளர் தினம் இன்றளவிலும் கம்யூனிச சிந்தாந்தத்தைப் போற்றுபவர்களால் மட்டும் கொண்டாடப்படுகிறது. அமெரிக்காவில் ‘லேபர்ஸ் டே’ என்றும், ஆசியக் கண்டத்திலும் இந்தியாவிலும், மே தினமாகவும் கொண்டாடப்படுகிறது. இந்த மே தினமும் கொண்டாட்டத்தோடு முடிந்து உள்ளது. எந்த அரசுகளும் அரசியல் கட்சிகளும், இந்த ஒரு நாளில்கூட தொழிலாளர்களுடைய நலவாழ்வைப் பற்றி சிந்திப்பதாகத் தெரியவில்லை. இது இப்படியிருக்க நேற்று, வெள்ளிக்கிழமை 12- 06 – 2015, குழந்தை தொழிலாளர் ஒழிப்பு தினமாகக் கொண்டாடப்பட்டது. ஐக்கிய நாடுகளின் ஓர் அங்கமான பன்னாட்டு தொழிலாளர் அமைப்பினால் (ஐ.எல்.ஓ) அங்கீகரிக்கப்பட்ட இந்த நாள் குழந்தைத் தொழிலாளர்கள் பற்றிய விழிப்புணர்வை ஏற்படுத்துவதற்காக, 2002ம் ஆண்டு முதல் கடைபிடிக்கப்பட்டு வருகிறது. குழந்தைகளின் கையில், குழந்தை தொழிலாளர் ஒழிப்பு பற்றி பெரியவர்கள் எழுதிக்கொடுத்த பதாகைகளுடன் ஊர்வலம் போகவிட்டு அதோடு அந்த தினத்தை முடித்துவிட்டோம். நேற்று தமிழக அரசு மற்றும் நடுவண் அரசிடமிருந்தோ இது பற்றி எந்த அறிவிப்பும் வரவில்லை என்பது வேதனைக்குரிய விசயம்.

மத்திய ஒன்றிய பகுதியான பாண்டிச்சேரியில் குழந்தைத் தொழிலாளர் முற்றிலும் ஒழிக்கப்பட்டது என்ற பாராட்டிற்குரிய செய்தி ஆறுதலிக்கிறது. உலகளவில் 21.5 கோடி பேர் குழந்தை தொழிலாளர்களாக உள்ளதும், இதில் 11 கோடி குழந்தைகள் பாதுகாப்பற்ற சிரமமான வேலைகளில் ஈடுபட்டுள்ளனர் என்றும் சர்வதேச தொழிலாளர் அமைப்பின் அறிக்கை தெரிவிக்கிறது. 5 முதல் 14 வயதுக்குட்பட்ட குழந்தைகளை வேலைக்கு அமர்த்துவது குற்றமாகக் கருதப்படுகிறது. அதோடு 2016ம் ஆண்டுக்குள் குழந்தை தொழிலாளர் முறை அறவே ஒழிக்கப்பட வேண்டும் என்ற இலக்கும் நிர்ணயிக்கப்பட்டுள்ளது. சர்வதேச தொழிலாளர் அமைப்பின் ஆய்வின் படி, உலகளவில் குழந்தை தொழிலாளர் அதிகம் உள்ள நாடுகளில், இந்தியா 12 வது இடத்தில் இருப்பதாகக் கூறப்படுகிறது. நிலக்கரி சுரங்கம், தீப்பெட்டித் தொழிற்சாலை. செங்கல் சூளை, துணிக்கடை, கட்டுமானப் பணிகள் ஆகியவற்றில் குழந்தைகள் ஈடுபடுத்தப்படுகின்றனர். குறைந்த ஊதியத்தில், வார விடுமுறையின்றி ஒரு நாளைக்கு 12 மணி நேரத்துக்கு மேல் குழந்தைகள் வேலை செய்கின்றனர்.

வறுமை, பெற்றோரோ அல்லது பாதுகாவலரோ இல்லாத சில காரணங்களால் குழந்தைகள் பள்ளிக்குச் செல்லும் வயதில் வேலைக்குச் செல்ல வேண்டிய வேதனையான நிலைக்கு ஆளாகிறார்கள். பல நேரங்களில் தாங்கள் செய்வது குற்றம் என்று அறியாமலே போதை மருந்து கடத்தல் உள்ளிட்ட பல சட்ட விரோதமான செயல்களில் ஈடுபடுத்தப்படுகின்றனர். இன்று இந்தியாவில் உள்ள குழந்தை தொழிலாளர்கள் ஐந்தில் ஒரு பகுதியினர் உத்திரப் பிரதேசத்தில் இருப்பதாகக் கணக்கிடப்பட்டுள்ளது. மிகவும் பின் தங்கிய மாநிலமான பீகாரைவிட குழந்தை தொழிலாளர்களுடைய எண்ணிக்கை உத்திரப் பிரதேசத்தில் அதிகமாக இருப்பது வெட்கப்படவேண்டிய விசயம். அனைவருக்கும் கல்வி, குறைவற்ற உணவு என்ற நிலையை என்று அடைகிறோமோ அன்றுதான், நம் நாடு வல்லரசு ஆவதற்கான பயணத்தில் நாம் முதற்படி வைத்தவர்களாக ஆகிறோம். இதைவிடுத்து வெற்று கோசங்களால் மட்டுமே இந்தியாவை வல்லரசாக உருவாக்க முடியாது. கல்வித் துறையிலும், தொழில் துறையிலும், பொருளாதாரத் துறையிலும் மிகுந்த மாற்றங்களைக் கொண்டுவர வேண்டியது நடுவண் அரசிற்கு காலத்தின் கட்டாயமாக உள்ளது. இந்த நேரத்தில், ‘கிரை’ என்ற சைல்ட் ரைட்ஸ் அண்ட் யூ (Child Rights and You)அமைப்பு வெளியிட்டுள்ள ஆய்வு அறிக்கை மிகவும் அதிர்ச்சியளிக்கக்கூடியதாக உள்ளது. ஆண்டுதோறும் 2.2 என்ற விகிதத்திலேயே குழந்தைத்தொழிலாளர் முறை குறைந்து வருவதாகவும், ஒரு கோடிக்கும் அதிகமான குழந்தைகள் இன்னமும் இந்தியாவில் குழந்தைத் தொழிலாளர்களாக இருப்பதாகவும் இந்த அமைப்பின் ஆய்வறிக்கை கூறுகிறது. இது ஆண்டு தோறும் 2.2 என்ற விகிதத்தில் மட்டுமே குறைந்து வருவதாக ஆய்வு முடிவுகள் தெரிவிப்பது குறிப்பிடத்தக்கது.

பவள சங்கரி

தலையங்கம்

பன்னாட்டு நிறுவனமான நெஸ்லேயின் ‘மேகி நூடுல்சு மசாலா’, உணவுப் பொருளில் காரீயம், மோனோசோடியம் குளுட்டாமேட் ஆகிய வேதிப்பொருள்கள் அனுமதிக்கப்பட்ட அளவைவிட அதிகமாக இருப்பதாக உத்தரப் பிரதேச மாநில உணவுக் கலப்படத் தடுப்புப் பிரிவு நடத்திய ஆய்வில் தெரிய வந்ததால் இராணுவத்தினர் மேகி நூடுல்சு உட்கொள்ள தடைவிதிக்கப்பட்டிருக்கிறது. நெஸ்லே நிறுவனத்தின் மேகி நூடுல்சு, ஸ்மித் அண்ட் ஜோன்ஸ் சிக்கன் மசாலா ரிலையன்சு செலக்ட் இன்ஸ்டன் ட் நூடுல்சு, வே வே எக்ஸ்பிரஸ் நூடுல்சு, ஆகிய நூடுல்சுகள் உணவுப்பொருட்களுக்கு தமிழ்நாட்டில் தற்காலிகமாக மூன்று மாதங்களுக்கு தடை விதிக்கப்பட்டுள்ளது. தில்லி அரசு 13 இடங்களில் இருந்து மேகி நூடுல்சு மாதிரிகளை சேகரித்து ஆய்வகத்தில் சோதனை நடத்தியுள்ளது. இன்று பல மாநிலங்களில் இது தடை செய்யப்பட்டுள்ளது என்பதும் குறிப்பிடத்தக்கது. அதை ஒத்த மற்ற பொருட்களும் ஆய்வுகளுக்கு உட்படுத்தப்படுகின்றன. மற்ற உணவுகளை ஒப்பிடும்போது, இதன் மலிவான விலையினால் இன்று கீழ்த்தட்டு மக்களின் குழந்தைகளையும் எளிதில் கவர்ந்திழுக்கும் இந்த நூடுல்ஸ் கவர்ச்சிகரமாக சந்தைப்படுத்தப்பட்டு வருவதும் குறிப்பிடத்தக்கது.

இன்னொரு அதிர்ச்சியான தகவல், நூடுல்சில் உள்ள கெடுதல் விளைவிக்கும் வேதிப் பொருளான மேனோசோடியம் குளுட்டோமேட் என்பதன் சந்தைப் பெயர் அஜினோமோட்டோ என்பதுதான். இன்று பெரும்பாலான வீடுகளில், பாரம்பரிய சமையல் உள்பட, அனைத்து வகையான பதார்த்தங்களிலும் இயல்பாகக் கலந்துவிட்ட இந்த அஜினோமோட்டோ ஏற்கனவே பல நாடுகளில் தடை செய்யப்பட்ட ஒன்று என்பது குறிப்பிடத்தக்கது. இதேபோன்று அனைத்து வகையான குளிர்பானங்களும், அனைத்து பதப்படுத்தப்பட்ட உணவுப் பொருட்களும் உடனடியாக ஆய்விற்கு உட்படுத்தப்படவேண்டும். இதில் முக்கியமாக பன்னாட்டு நிறுவனங்கள் தயாரித்து அளிக்கும் உணவுப் பொருட்கள் ஆய்விற்கு உட்படுத்தப்பட வேண்டியது அவசியம்.

உணவுப் பொருட்களைத் தவிர்த்து ரியல் எஸ்டேட் துறையும், நகை முதலீட்டுத் திட்டங்கள் என்ற பெயரில் மக்களை ஏமாற்றும் மிகப்பெரும் நகைக் கடைகளும் இந்த ஆய்விற்கு உட்படுத்தப்படவேண்டியதும் அவசியம். உணவுப் பொருட்கள், நகை, ரியல் எஸ்டேட், மற்றும் நுகர்வோர் சம்பந்தப்பட்ட பொருட்களின் விளம்பரத் தூதர்களின் பொறுப்புகள் இன்னும் சரியான முறையில் வரையறுக்கப்படாத சட்டங்கள்தான் இன்று நம் அரசியல் சாசனத்தில் உள்ளன. எதற்கெல்லாமோ அவசரச் சட்டங்கள் பிரகடனம் செய்யும் நாம், மக்களுக்காக இதுபோன்ற வரையறுக்கப்பட்ட அத்தியாவசிய சட்டங்களை உடனே அமல்படுத்த வேண்டியது அவசியம்.

பவள சங்கரி

தலையங்கம்

“கனவு காணுங்கள்” என்றார், அப்துல்கலாம் . கனவு காண்கிறோம். இந்தியா வல்லரசு ஆகவேண்டும். இது மட்டுமா? இது எங்ஙனம் சாத்தியம்? அதை நோக்கிய கனவுதான் இது! மக்களை வழிநடத்திச் செல்ல நல்ல தலைவர் வேண்டும் என்று கனவு காண்கிறோம். நல்ல தலைவர்களை மகிழ்வோடு ஏற்றுக்கொள்ளத் தயாராக இருக்கிறோம். யாரேனும் ஒருவர் இப்படி வந்தால் நாடே கட்டாயம் பின்னால் வரும். இளைய சமுதாயமே நாட்டு நடப்பைக் கண்டு நெஞ்சம் துடிக்கவில்லையா. உம் கனல் தெரிக்கும் பார்வையால் சுட்டுவிடத் தோன்றவில்லையா..

நம் கனவுத் தலைவர் எப்படி இருக்க வேண்டும்? காமராசர் போல் படிக்காதவராக இருந்தாலும்  பண்பாளராக இருக்கலாம். கக்கனைப் போல எளிமையான நேர்மையானவராக இருக்கலாம். காமராசர் இறந்தபோது அவர் விட்டுச் சென்ற சொத்து நான்கு அரைக்கை சட்டை, நான்கு வேட்டி, 150 ரூபாய் பணம்… இவ்வளவுதான் அவர் சொத்துக் கணக்கில் தவறு நேரவே வாய்ப்பிருக்காது. கணக்கிடுவோருக்கும் எளிது. கக்கனின் சொத்து ஒரு பழைய சைக்கிள், இரண்டு கதர் வேட்டி, 2 கதர் சிப்பா அவ்வளவுதான். தோழர் ஜீவா அவர்களிடமும் கிட்டத்தட்ட இதே அளவுதான் சொத்து. ஆனால் அவர்களெல்லாம் மக்களால் மிகவும் நேசிக்கப்பட்ட பெருந்தலைவர்கள். காந்தியடிகள் சுதந்திரப் போராட்டத்தின்போது, “மாணவர்களே கலாச்சாலை விட்டு வாருங்கள், சுதந்திரப் போராட்டத்திற்காகப் பாடுபடுங்கள். இளைஞர்களே தொழிலகத்தை விட்டு வாருங்கள் நாட்டின் போராட்டத்திற்கு நீங்கள் தேவை”, என்றார். இன்று இளைஞர்கள் கலாச்சாலையையும், தொழிற்சாலையையும் விட்டு தெருவில் இறங்கி சேவை செய்யத் தயாராக இருந்தாலும், தலைமையேற்று வழி நடத்த நல்ல தலைவர்கள் வேண்டுமே. கல்வி கற்காவிட்டாலும் கல்வி பற்றி தெரிந்தவர்கள் தேவை. பொருளாதாரத்தைக் கரைத்துக் குடித்தவர் இல்லையென்றாலும் எதைச் செய்தால் இந்தியாவின் பொருளாதாரம் நிலைபெறும் என்று அறிந்தவராக இருக்க வேண்டும். சுய இலாபம் பார்க்காமல் மக்கள் நலம் பார்ப்பவர்களே தேவை. இந்தியாவை வல்லரசாக்கும் தலைவரைத் தேட வேண்டியதில்லை. மக்களை வலிமையுடையவராக மாற்றக்கூடிய நல்ல தலைவரே இன்றைய அவசியத்தேவை. உறங்கவில்லை. அப்துல் கலாம் சொன்ன கனவைக் காண்பதற்காக உறங்கவில்லை. நினைவோடு இருக்கிறோம். நல்ல தலைவரை எதிர்பார்த்து.. நல்ல தலைவரின் வழி செல்லக் காத்திருக்கிறோம்.. தேவை நல்ல தலைவர்.

பவள சங்கரி

தலையங்கம்

இந்த ஆண்டு (2015) +2 தேர்வில் வழக்கம்போல் பெண் குழந்தைகள் அதிக விகிதத்தில் தேர்ச்சி பெற்றுள்ளனர். கொங்கு மண்டலத்தைச் சார்ந்த இரண்டு பெண்கள் மாநில அளவில் தேர்ச்சி பெற்றுள்ளனர். சென்ற ஆண்டு முதலிடத்தில் இருந்த ஈரோடு கல்வி மாவட்டம் இந்த ஆண்டு மூன்றாவது இடத்தைப் பிடித்துள்ளது. விருதுநகர் மற்றும் பெரம்பலூர் மாவட்டங்கள் முதல் இரண்டு இடங்களைப் பெற்றுள்ளது. தேர்வில் பங்கு பெற்ற அனைத்து மாணவர்களுக்கும் வல்லமையின் வாழ்த்துகள்.

போட்டிகள் நிறைந்த உலகத்தில் திறமையாளர்கள் மட்டுமே வெற்றி பெற முடியும் என்ற இந்த காலகட்டத்தில் நம்முடைய கல்வித் திட்டம் மற்றும் கற்பிக்கும் முறைகளில் மாற்றம் செய்ய வேண்டிய கட்டாய தருணம் இது. உலகளாவிய நாடுகளின் கல்வித் திட்டங்களைக் காணும்போது நம் நாட்டின் கல்வித்திட்டங்களில் நிறைய மாற்றங்கள் தேவை என்பதை உணர முடியும். இன்றைய நம் கல்வித் திட்டத்தின்படி பாடங்களை மனனம் செய்து திருப்பி எழுதக் கூடிய மாணவர்களையே சாதனையாளர்களாக உருவாக்க முடிகிறது. மனனம் செய்தவற்றை அப்படியே வார்த்தை மாறாமல் திருப்பி எழுதுபவர் மட்டும் வெற்றி பெற்றவராகக் கருதப்படுகிறார்கள். மதிப்பெண்களில் பின் தங்கியவர்கள் அறிவற்றவர்கள் என்பதைவிட மனப்பாடம் செய்ய முடியாதவர்கள் என்று சொல்வதே தகும். ஒவ்வொரு ஆண்டும் இப்படிப்பட்ட கல்வி முறையால் மதிப்பெண் குறைவாகப் பெற்று உயிரிழக்கும் குழந்தைகள் எண்ணிக்கை குறைந்தபாடில்லை. குறைந்த மதிப்பெண் பெற்றதால் உயிரை மாயத்துக்கொண்ட அந்த இளம் தளிர்கள் செய்த பாவமென்ன .. அப்படியென்றால் மதிப்பெண் முறையே தவறா? இன்றைய கல்வித் திட்டத்தின்படி +2 தேர்வு என்பது மனப்பாடம் செய்து அவற்றை பதிவு செய்வதற்குரிய போட்டியாகத்தான் இருக்கிறது. கல்வித் துறையில் உள்ளவர்கள் இது குறித்த ஆக்கப்பூர்வமான ஆய்வை உடனடியாக மேற்கொள்ள வேண்டிய காலகட்டம் இது. 1970 – 80 ஆண்டுகளில் 100/100 மதிப்பெண்கள் பெறுவது என்பது குதிரைக் கொம்பாக இருந்தது. இன்று தமிழ் மொழிப்பாடத்தில் கூட 100/99 மதிப்பெண்கள் வாங்கக்கூடிய மாணவர்கள் எண்ணிக்கை அதிகம். இன்றைய கல்வித் திட்டத்தின்படி வெற்றி பெற்று பட்டங்களைப் பெற்ற மாணவர்கள்கூட முழுமையாகச் சிந்திக்கும் திறனின்றி இருக்கின்றனர். முக்கியமான ஒரு கடிதம் எழுத வேண்டிய நேரத்தில்கூட அவர்களுக்கு ஒரு மாதிரிப் படிவம் தேவையாக இருக்கிறது. இதுதான் நம் கல்வித்திட்டம் உருவாக்கிய இன்றைய இளைய பாரதத்தின் நிலை. அதாவது மாணவர்களின் சுய சிந்தனையை ஊக்குவிக்கும் வகையில் இல்லாததே நம்முடைய கல்வித் திட்டத்தில் உள்ள குறைபாடு.

இளைஞர்களின் புதிய கண்டுபிடிப்புகள் அங்கீகரிக்கப்படுவதுடன் ஊக்குவிக்கப்படவும் வேண்டும். குறைந்த அளவு நீர் உபயோகித்து அதிகப்படியான மகசூலைப் பெறக்கூடிய முறைமையைக் கண்டுபிடித்தது மட்டுமல்லாமல் அதனை செயல்படுத்தி விளைச்சலைக்காட்டியுள்ள இளைஞரை நாம் அறிவோம். ஆனால் அவருக்கோ, அவருடைய கண்டுபிடிப்பிற்கோ பெரிய அங்கீகாரம் கிடைத்ததாகத் தெரியவில்லை. இதைப்போல பலரின் அறிவியல் கண்டுபிடிப்புகள் அங்கீகரிக்கப்படாமல் இருப்பது வேதனைக்குரிய விசயம். நம்முடைய கல்வித் திட்டத்தில் புதிய மாற்றங்களைச் செய்து, இளைஞர்களின் புதிய கண்டுபிடிப்புகளை ஊக்குவித்து, சுய சிந்தனையாளர்களை உருவாக்குவதாக அமைய வழிவகுக்க வேண்டும் என்பதே சமூகவியலாளர்களின் கருத்தாக உள்ளது.

இயல்பாகவே ஆற்றல் மிகுந்த மாணவியர்களை சுய சிந்தனையாளராக மாற்றுவதை விட்டு, ஒரு கணினியாகவோ, நகல் எடுப்பானாகவோ மாற்ற முயல்வது தவிர்க்கப்பட வேண்டும். பெண் குழந்தைகள் என்பதால் அவர்களுடைய கல்வி மற்றும் வேலை வாய்ப்பை குறுகிய எல்லைக்குள் அடைக்க முயல்வதை பெற்றோர் தவிர்க்க வேண்டும்.

அடிப்படைக் கல்வியில் வேண்டுமானால் இந்தத் திட்டம் சரியாக இருக்கலாம். ஆனால் ஆறாம் வகுப்பு முதல் கற்பிக்கும் முறையில் முற்றிலும் மாற்றம் வேண்டும். ஆசிரியர்களுக்கும் கற்பிக்கும் முறையில் மாற்றம் ஏற்படுத்த வேண்டும் . இருபது வயதிற்குட்பட்ட பெண்கள், அவர்களுடைய சம்மதமின்றியே 74 சதவிகிதம் திருமணம் செய்துவிடுகின்றனர் என்கிறது ஒரு ஆய்வறிக்கை. அரசு 18 வயதில் திருமணம் செய்யலாம் என்று கூறினாலும் அவர்களுக்கு விருப்பம் இருந்தால் மட்டும் திருமணம் செய்து வைக்கும் வழமை பரவ வேண்டும். ‘ரேகிங்’ என்ற கொடிய அரக்கனால் நேற்று கேரளா மாநிலத்தில் நான்கு பெண் விளையாட்டு வீராங்கனைகள் உயிர் மாய்த்துக்கொள்ள முயன்று ஒரு பெண் உயிரிழந்துள்ளார். மற்ற மூவரும் கவலைக்கிடமான நிலையில் மருத்துவமனையில் உள்ளனர். ரேகிங் அறவே ஒழிக்கக்கூடிய வகையில் சட்டங்கள் கடுமையாக்கப்பட்டு மாணவிகள் அச்சமின்றி கல்விச்சாலைகளுக்கு வர ஆவண செய்ய வேண்டியதும் அவசியம்.

பவள சங்கரி

தலையங்கம்

மனித இனத்துக்கே அன்னமிடும் விவசாயிகள்  இப்படி வெந்து வேதனையில் சாகலாமா? நாடு தாங்குமா? விஞ்ஞானமும், அறிவியலும் வளர்ந்துகொண்டிருக்கிறது என்று மார் தட்டிக்கொண்டிருக்கும் இக்காலகட்டத்தில் நம்மோடு, நம் வயிறு நிரம்ப உழைக்கும் ஒரு இனம் இப்படி அழிந்து வருவது உணவு விசயத்தில் தன்னிறைவு பெற்றுள்ள நம் நாட்டிற்கு நல்லதா? இந்த நிறைவு நிலைக்குமா? இப்படி பல கேள்விகள் இன்று மக்களிடம் எழ ஆரம்பித்துவிட்டன. விவசாயிகளின் தற்கொலை விவகாரம் தொடர்ந்த வண்ணம் உள்ளது. நேற்றும் நம் தலைநகர் தில்லியில் தொழிலதிபர்களுக்கு ஆதரவான நில உரிமைப்படுத்தும் சட்டம் எதிர்ப்பு தெரிவித்து ‘ஆம் ஆத்மி கட்சி’ நடத்திய எதிர்ப்புப் பேரணி மற்றும் தில்லி முதல்வர் கேஜரிவால் கலந்துகொண்ட எதிர்ப்புக் கூட்டத்தில் அருகிலேயே மரத்தின் உச்சியில் ஏறி ராஜஸ்தானைச் சேர்ந்த ஒரு விவசாயி தற்கொலை செய்துள்ளார். தொண்டர்கள் தடுப்பதற்கு முயன்றும் பலனின்றி பரிதாபமாக இறந்துள்ளார். விவசாயிகள் தற்கொலை நிகழ்வுகள் அதிகரித்துக்கொண்டே இருக்கிறதேயொழிய குறைந்தபாடில்லை. 1995 ம் ஆண்டிலிருந்து, கிட்டத்தட்ட 3 இலட்சம் விவசாயிகள் தற்கொலை செய்துள்ளனர் என்ற அதிர்ச்சி தகவல் அளிக்கிறது கருத்துக் கணிப்பு. இதில், சட்டீஸ்கர் மற்றும் மேற்கு வங்காளம் ஆகிய மாநிலங்கள் தற்கொலை செய்திகள் வெளியிடுவதை நிறுத்திவிட்டன. நம் இந்தியாவில் மிக மோசமாக பாதிக்கப்பட்ட மாநிலங்கள் மகாராஷ்டிரம், ஆந்திர பிரதேசம், கர்நாடகம், மத்திய பிரதேசம் மற்றும் கேரளா ஆகியவை. போதாதற்கு அனைத்து விவசாயிகளுக்குமே பிரச்சனை தரக்கூடிய நிலங்களை உரிமைப்படுத்தும் சட்டம் வேறு அச்சமேற்படுத்திக்கொண்டிருக்கிறது.

இன்று சக்கரைத் தொழிற்சாலைகள் நலிவுடன் இருக்கின்றனவா அல்லது கரும்பை விளைவிக்கக்கூடிய விவசாயிகள் வளமற்று வாழ்கிறார்களா? சக்கரை விலை வீழ்ச்சி அடைந்துள்ளது. இன்று கிலோவிற்கு ரூ. 8 முதல் 10 வரை விலை இறங்கியுள்ளது. ஆனால் இந்த விலை இறக்கம் முழுமையாக பொதுமக்களைச் சென்று அடைந்துள்ளதா என்றால் இல்லை என்பதுதான் உண்மை. கிலோவிற்கு ரூ. 2 அல்லது 3 தான் பொதுமக்களைச் சென்று சேர்ந்திருக்கிறது. பொதுவாகவே அத்தியாவசியப் பொருட்களின் விலை இறக்கம் என்பது வரவேற்கப்பட வேண்டிய ஒன்றல்லவா. அதாவது நம் ரூபாயின் மதிப்பு அதிகரிக்கிறது என்றல்லவா அர்த்தம். இதைவிடுத்து விலையேற்றம் ஏற்படுத்தும் வகையில் ஆயத்தீர்வுகளையும், இறக்குமதி வரிகளையும் அதிகப்படுத்த அரசு முயல்வது சரியான தீர்வா? சக்கரை ஆலை அதிபர்களுக்கு மட்டுமே பயன் தரக்கூடிய திட்டமாகவே இருக்கிறது. இன்று கரும்பு விளை நிலங்களின் அளவு குறைந்து கொண்டே வருகிறது. முன்பு பெரியார் மாவட்டத்தில் 5 இலட்சம் ஹெக்டேரில் விளைவிக்கப்பட்ட கரும்பு தற்போது மூன்றரை இலட்சமாகக் குறைந்துள்ளது. இன்னும் அதனுடைய அளவு சுருங்கக்கூடிய வாய்ப்பே உள்ளது. இதற்கு இந்த விலை வீழ்ச்சி காரணமல்ல. நாம் எந்த ஒரு பொருளை வாங்குவதென்றாலும் பணம் கொடுத்துத்தானே வாங்குகிறோம். ஆனால் விவசாயிகளிடமிருந்து கரும்பை வாங்கும் போது அதற்குரியத் தொகையைக் கொடுக்காமல் காலந்தாழ்த்துவது ஏன்? தோராயமாக, 22,000 கோடி ரூபாய் விவசாயிகளுக்கு பட்டுவாடா செய்யப்படாமல் நிலுவையில் உள்ளது. இதுதான் விளை நிலங்களின் குறைவிற்குக் காரணம். பணப் பயிர் என்று கூறக்கூடிய கரும்பிற்கே இந்த நிலை. சக்கரை ஆலை அதிபர்கள் பணம் கைக்கு கிடைத்த பின்புதான் சக்கரையை வெளியே அனுப்புகின்றனர். ஆனால் விவசாயிகளுக்கு மட்டும் பணம் தராமல் இழுத்தடிப்பது சரியாகாது. சக்கரை ஆலை அதிபர்களுக்கு மொலாசஸ் மூலமாக ஒரு வருமானம் கிடைக்கும்போது அதற்குரிய ஆயத்தீர்வை அரசு ஏன் குறைக்க வேண்டும். கரும்புச் சக்கை கூட காகிதத் தொழிற்சாலையில் பெருமளவில் பயன்படுத்தப்படுகின்றன. இப்படி பல வகையிலும் வருமானம் பெறக்கூடிய சக்கரை ஆலைகளை ஒரு சிலர் நலிவடையச் செய்ய அரசு அனுமதிக்கலாமா. அண்டை மாநிலங்களிலிருந்து வரக்கூடிய உபரி சக்கரையும், வெளிநாடுகளிலிருந்து இறக்குமதி செய்யக்கூடிய சக்கரைக்கும் அதிகப்படியான வரி விதிப்பதால் செயற்கையான விலையேற்றம் ஏற்பட வழியாகிறது. அத்தியாவசியப் பொருட்களின் விலை குறைந்தால் நம் ரூபாயின் மதிப்பு கூடி நாட்டின் பொருளாதார உயர்வும் சாத்தியமாகும்.

பவள சங்கரி

தலையங்கம்

மனிதவள மேம்பாட்டு அமைச்சகம் (Ministry of Human Resource Development) என்பது நம் இந்திய அரசால் மனிதவளத்தின் முன்னேற்றத்தைக் கருத்தில் கொண்டு அமைக்கப்பட்ட அமைச்சகம் . இந்த அமைச்சகம் இரண்டு பிரிவுகளாகச் செயல்படுகிறது. கல்வி வளர்ச்சி மற்றும் மக்களின் படிப்பறிவின் முன்னேற்றத்திற்காக செயல்படுவது ‘பள்ளிக் கல்வித் துறை ’. மாணவர்களின் உயர்கல்வி, மேற்படிப்பு ஆகியவற்றிற்காக செயல்படுவது, ‘உயர்கல்வி அமைச்சகம்’. இந்தியக் கல்விக் கழகங்கள் அனைத்தும் இந்த அமைச்சகத்தின் வரம்பிற்குள்தான் செயல்படுகின்றன.

“பாரதமும், சீனாவும் 100 ஆண்டுகளுக்குப் பிறகு இவ்வுலகின் தலைவிதியை நிர்ணயிக்கும் சக்தியைப் பெற்றிருக்கும்” என்று சுவாமி விவேகானந்தர் கூறியது 130 ஆண்டுகளுக்கு முன்னர்.

உலகிலேயே அதிக மக்கள் தொகை கொண்ட நாடுகளின் பட்டியலில் இரண்டாவது இடத்தில் இருப்பது நம் இந்தியாதான். 2028 இல் இந்தியாவின் மக்கள் தொகை மேலும் அதிகரிக்கும் என சமீபத்தில் ஐக்கிய நாடுகள் சபை வெளியிட்ட ஆய்வறிக்கையின் மூலமாக தெரியவந்துள்ளது. அதாவது நம் இந்திய மக்கள் தொகை 2030 இல் 160 கோடியாக அதிகரிக்குமாம். இந்தியா மற்றும் சீனாவில் இளம் வயதினர் மற்றும் அதிக அளவிலான மக்கள் தொகை இருக்குமாதலால் மூலதனத்துக்கு இது மிகப்பெரிய ஆதாரமாக இருக்கும் வாய்ப்பும் அதிகரிக்கும் என்கிறது உலக வங்கி சமீபத்தில் வெளியிட்டுள்ள அறிக்கையில்.

இதுமட்டுமல்லாமல், வரும் 2030ம் ஆண்டில் இந்தியா பொருளாதார வல்லரசாக இருக்கும் எனவும், சீனாவைவிட மேன்மையடைந்து உலகப் பொருளாதாரத்தில் ஆதிக்கம் செலுத்தும் எனவும் கோல்டுமேன் சாக்ஸ் என்ற பொருளாதார ஆய்வு அமைப்பு தமது அறிக்கையில் கூறியுள்ளது. கடந்த சில ஆண்டுகளாக வல்லரசான அமெரிக்காவில் கடும் பொருளாதார நெருக்கடி ஏற்பட்டபோது சீனா உள்பட பல உலக நாடுகள் பாதிக்கப்பட்ட காலகட்டத்தில் நம் இந்தியாவும் சற்றே பாதிக்கப்பட்டாலும், உடனடியாக நாம் சுதாரித்துக் கொண்டோம். இதனால் உலக அரங்கில் அனைத்து நாடுகளும் நம்மை வியந்து நோக்கின.

உலகின் மிகப்பெரிய பொருளாதார சக்தியாக தற்போது இருக்கும் நம் இந்தியாவை விட முன்னணியில் இருக்கும் சீனாவின் நிலை , 2030ம் ஆண்டிற்கு பிறகு மாற்றம் பெறும். அதாவது நம் இந்தியாவின் பொருளாதார வளர்ச்சி அதிகரிக்கத் துவங்கும் அதே வேளையில் தற்போதைய பொருளாதார வளர்ச்சி 8 முதல் 10 சதவீதம் வரை உள்ள சீனாவின் வளர்ச்சி குறையத் துவங்கும். ஆக 2030ம் ஆண்டில் நம் இந்தியா பொருளாதாரத்தின் வல்லரசாக இருக்கும். அடுத்த 20 ஆண்டுகளுக்கு உலக நாடுகளின் பொருளாதார வளர்ச்சி சராசரியாக 2.6 சதவீதத்திலிருந்து 3 சதவீதமாக இருக்கும். வளர்ந்து வரும் நாடுகளின் வளர்ச்சி 4.8 முதல் 5.6 சதவீதம் வரை இருக்கும். அமெரிக்கா மற்றும் ஐரோப்பிய கூட்டுறவு நாடுகளின் தாக்கம் குறைந்து, சீனாவின் நிதி கொள்கைகளும் பெரிய தாக்கத்தை ஏற்படுத்துவதாக இருக்கும். 2030 ஆம் ஆண்டில் உற்பத்தித் துறையை விட சேவைத் துறைக்கு அதிக தேவை இருக்கும் என்றும் உலக வங்கி அறிக்கையில் தெரிவிக்கப்பட்டுள்ளன.

கி.பி. 1750 வரை இந்தியாவே உலக அளவில் பொருளாதாரத்தில் முதன்மை வகித்தது. அதாவது உலக உற்பத்தியில் 33 சதவீதம் பங்களித்துவந்தது. அதையடுத்து சீனா 28 சதவீதம் பங்களித்துள்ளது என்ற தகவல் ஏங்கர் மேடிசன் என்ற பொருளாதார அறிஞர் எழுதிய, ‘இரண்டாயிரம் ஆண்டுகால உலகப் பொருளாதாரத்தின் போக்கு’ என்ற ஆய்வு நூலில் குறிப்பிடப்பட்டுள்ளது.

2030 ம் ஆண்டுகளில், சீன சமுதாயத்தை பின்னுக்குத் தள்ளிவிட்டு இந்தியாவில் இளைஞர்களின் சமுதாயம் அதிக அளவில் உருவெடுக்கும் என்று புள்ளி விவரங்கள் கூறுகின்றன. இந்த நிலைப்பாடு இந்தியா வல்லரசு ஆவதற்கு பெருமளவில் உறுதுணை புரியும் என்பதில் ஐயமில்லை. மற்றொரு புள்ளி விவரம், இந்திய பொருளாதாரம் உலகளவில் மூன்றாவது இடத்தில் வரும் என்றும் கூறுகிறது.

மேலும், 2030ம் ஆண்டிற்கு பிறகு அமெரிக்கா மற்றும் ஐரோப்பிய யூனியனைவிட அதிகமாக இந்தியாவில், நடுத்தர வர்க்கத்தினர் அதிக அளவில் நுகர்வோராக இருப்பார்கள். ஆனால் இந்தியா மற்றும் சீன நாடுகள் அடிப்படைத் தேவைகளான உணவு, தண்ணீர் மற்றும் எரிசக்தி பிரச்சனைகளுக்கு தீர்வு காண வேண்டியது அவசியம். இல்லாவிட்டால், ஒட்டு மொத்த வருமானத்தில், நடுத்தர வருமானம் உடையவர்கள் சிரம்ப்பட நேரிடலாம். பொருளாதார வளர்ச்சியைக் கருத்தில் கொண்டு அறிவியல் துறைகளில் அதிக முதலீடு செய்ய வேண்டும் எனவும் அந்த அறிக்கையில் கூறப்பட்டுள்ளது. எஸ் & பி யின் மதிப்பீடுகளுக்காக உள் கட்டமைப்புகளுக்கான நிதி ஒதுக்கீடுகளை குறைக்காமல் ஆய்வுத் துறைகளில் அதிக முதலீடுகள் செய்தும் உற்பத்தித் துறையை ஆதரித்தால் பொருளாதாரத்தில் மிகுந்த மேம்பாடு அடையலாம். அதே நேரத்தில் விவசாயத் துறையில் மத்திய அரசின் நிலைப்பாடு அச்சம் ஏற்படுத்துவதாக உள்ளது. உணவில் தன்னிறைவு அடைந்ததை தக்க வைத்துக்கொண்டாலே பொருளாதார வளர்ச்சியைப் பற்றி செயல்பட முடியும்.

தற்போது கிடைத்துள்ள மற்றும் சில புள்ளி விவரங்களின்படி புதிய தலைமுறையினருக்கு சரியான ஊட்டச்சத்துமிக்க உணவு கிடைப்பதில்லை. இதனால் அவர்களின் வளர்ச்சி விகிதம் குறைகிறது. இந்தியர்களின் சராசரி உயரம் 150 செ.மீ. என்பது பாரம்பரியத்தின் வழியில் அமைவது. ஆனால் இன்றைய நிலையில் அதிலிருந்து உயரம் குறைய ஆரம்பித்துள்ளதாக ஆய்வறிக்கைகள் கூறுகின்றன. அதே சமயத்தில் ஐரோப்பிய நாடுகளில் குழந்தைகள் 3 அல்லது 4 அங்குலம் உயரம் அதிகமாகிறார்கள். நம் நாட்டில் ஊட்டச் சத்து குறைபாடு இருந்தாலும் அறிவு வளர்ச்சியில் குறைபாடு ஏற்படவில்லை என்பது ஆறுதலான விசயம். வல்லரசு ஆகும் முனைப்பில் இருக்கும் இத்தருணத்தில் குழந்தைகளின் ஆரோக்கியத்தில் அதிக அக்கறை கொண்டு அவர்களுக்கு ஊட்டச் சத்து கிடைப்பதற்கு அரசு ஆவண செய்யவேண்டும். மனிதவள மேம்பாட்டுத் துறை இவைகளில் மிகுந்த கவனம் செலுத்த வேண்டியதும் அவசியமாகிறது. அப்பொழுதுதான் நம் நாடு வல்லரசு ஆவதற்குரிய அனைத்துத் தகுதியும் பெற்று நிலைத்து நிற்க முடியும். பொருளாதாரத் துறை மட்டுமன்றி, தொழில் வளர்ச்சி, கல்வி வளர்ச்சி, உள்கட்டமைப்பு ஆகிய முக்கியத் துறைகளில் அதிக கவனம் செலுத்த வேண்டும்.

உடல் ஆரோக்கியம், அறிவு வளர்ச்சி இவைகளை மட்டும் கருத்தில் கொள்ளாமல் இளைய சமுதாயத்தினரை நீதி போதனைகள் மூலமாக நல்வழிப்படுத்த வேண்டிய கட்டாயத்தில் இருக்கிறோம் என்பதும் சமீப காலங்களில் அரங்கேறியுள்ள சில மோசமான நிகழ்ச்சிகள் எச்சரிக்கை விடுக்கின்றன. திரைப்படத் துறைக்கு தணிக்கை செய்யப்படுவது போல அனைத்து மற்ற ஊடகங்களும் தணிக்கை செய்யப்பட வேண்டிய நிலையில் உள்ளது. கட்டுப்பாடற்ற சுதந்திரத்தை சரியான முறையில் பயன்படுத்தத் தவறும் நிலையும் காண முடிகிறது.

பெரும்பாலான கல்வி நிலையங்களோ மதிப்பெண் அதிகம் பெறுவதற்காக மட்டுமே கவனம் செலுத்துகிறார்களே தவிர, மதிப்பு மிக்க சமுதாயத்தை உருவாக்க முனைவதில்லை. 100 சதவிகித மதிப்பெண்களை மட்டுமே இலக்காகக் கொள்கிறார்களே தவிர 100 சதவிகித மனித சமுதாயத்தை உருவாக்கத் தவறிவிடுகின்றனர். மனித வள மேம்பாட்டுத் துறை இந்தக் குறைகளையெல்லாம் களைந்து ஒரு நிறைவான வல்லரசை உருவாக்க உறுதியளிக்க வேண்டும் என்பதே சமூக ஆர்வலர்களின் எதிர்பார்ப்பாக இருக்கிறது.

பவள சங்கரி

தலையங்கம்

முன்னாள் பிரதமர் மன்மோகன்சிங் அப்பழுக்கற்றவர் என்று ஆளும் கட்சியினரும் மற்றும் அவர் சார்ந்த காங்கிரசு கட்சியினரும் தெரிவித்து, தலைவர் திருமதி சோனியா காந்தியின் தலைமையில் ஊர்வலமாகச் சென்று அவருக்கு முழு ஆதரவு தெரிவித்துள்ளனர். திரு மன்மோகன்சிங் ஆட்சியில் இருந்தபோது அந்தத் துறைக்கும் பொறுப்பானவராக இருந்தபோதும் நிலக்கரி ஒதுக்கீட்டில் முறைகேடுகள் நடந்திருப்பதாக சிஏஜி தெரிவித்துள்ளது. அப்போது இதே காங்கிரசு கட்சியினர் இல்லை என்று மறுத்தனர். நடுவர் நீதிமன்ற ஆணைப்படி நிலக்கரி சுரங்கங்களின் ஒதுக்கீடுகளை ரத்து செய்து புதிய ஒதுக்கீடும் செய்யப்பட்டு அதன் மூலமாக அம்மாநில அரசிற்கும், மத்திய அரசிற்கும், பல ஆயிரம் கோடி ரூபாய் அதிகமாக வருவாய் கிடைத்தது. இதில் பிர்லாக்கள் குற்றம் சாட்டப்பட்டனர். நிலக்கரித் துறை மத்திய செயலாளரும் குற்றம் சாட்டப்பட்டுள்ளார். முன்னாள் பாரதப் பிரதமர் குற்றம் சாட்டப்படவில்லை. விசாரணைக்காக மட்டுமே அழைக்கபட்டுள்ளபோதும், காங்கிரசு கட்சியினர் ஏன் பொங்கியெழ வேண்டும் . அவர் பிரதமராக இருந்தபோதுதான் இந்த முறைகேடுகள் நிகழ்ந்துள்ளன. ஒதுக்கீடுகள் செய்யப்பட்டுள்ளன. இதனால் அரசுக்கு பல ஆயிரம் கோடி இழப்புகள் ஏற்பட்டுள்ளன. இந்த ஒதுக்கீடுகளை செய்தது நிலக்கரித்துறை செயலாளரா, இந்தப் பொறுப்பில் இருந்த பிரதமரின் அலுவலகமா, இவைகளெல்லாம் தம் கண் முன்னால் நடந்ததை தடுக்காமல், கண்டிக்காமல் இருந்த பொருளாதார மேதையான திரு மன்மோகன்சிங் அவர்களின் நிர்வாகத் திறமையின் குறைபாடுதான் காரணமா என்பதுதான் இப்போதைய கேள்வி. இப்படியொரு பூதாகரமான பிரச்சனையைத் தடுத்து நிறுத்தக்கூடிய அதிகாரம் தலைமைப் பதவியில் இருந்த ஒருவருக்கு இல்லையென்றால் அந்த அதிகாரம் யாரிடம் இருந்தது. அந்த பிர்லாக்களை வளரவிட்டதுதான் யார். நாட்டின் வளத்தை அழிக்கக்கூடிய கறையான் புற்று போன்ற பிரச்சனையை வேரறுத்து, முறைப்படுத்த முடியாத சூழ்நிலையென்றால், அவர் தம்முடைய பதவியிலிருந்து விலகியல்லவா இருக்கவேண்டும். நடந்த தவறுகளுக்கு முழுப் பொறுப்பேற்க வேண்டியவர் மன்மோகன் சிங் அவர்களே என்பது சிறு பிள்ளையும் அறியும் உண்மை.

இன்று கோல்கேட் ஊழல் வெளிச்சத்திற்கு வந்துள்ளது. முன்பு அலைக்கற்றை ஒதுக்கீடும் பரபரப்பாக பேசப்பட்டது. அதனுடைய இன்றைய நிலை என்ன? அலைக்கற்றை ஒதுக்கீட்டின் மூலம் இன்றைய நிலவரப்படி அரசிற்கு வருமானம் 1 இலட்சம் கோடியைத் தாண்டிவிட்டது. இன்னும் பகிர்மானம் முடியவில்லை. இதன் மூலம் மொத்தமாக 2 இலட்சம் கோடி வருமானம் வரும் என்று எதிர்பார்க்கப்படுகிறது. அப்படியென்றால் முன்னால் ஏற்பட்ட இழப்பின் வீரியம் எவ்வளவு.. யார்யாரெல்லாம் இதில் பாதுகாக்கப்பட்டுள்ளார்கள் என்பதும் வெளிச்சத்திற்கு வரவேண்டிய உண்மைகள். இதற்கும் நடுவர் மன்ற ஆணைகள்தான் விடை சொல்லுமோ தெரியவில்லை.

இயற்கை எரிவாய்வு கிணறுகள் இதுவரை எத்தனை ஒதுக்கப்பட்டுள்ளன. அவற்றில் எத்தனை உற்பத்தியில் உள்ளன. உற்பத்தி செய்யப்படாத மற்ற கிணறுகளின் நிலை என்ன. ஓஎன் ஜிசி இதனை எடுத்து ஏன் செயல்படுத்த முனையவில்லை. இந்தியாவில் கிடைக்கும் இயற்கை எரிவாயுவிற்கு இந்தியக் குடிமகனான அம்பானிக்கு எதற்காக டாலரில் பணப்பரிமாற்றங்கள் நடக்க வேண்டும். அதன் உற்பத்தி செலவாக அவர்களுக்கு வழங்கப்பட்ட தொகை ஏன் இரண்டு மடங்காக உயர்த்தப்பட்டது? இதற்கெல்லாம் விடை சொல்லப்போகிறவர் எவர்? இதனால் அரசிற்கும் மக்களுக்கும் ஏற்பட்டுள்ள இழப்பீடு பல இலட்சம் கோடி. அமெரிக்காவில் செல் கேஸ் மூலமாக உலகப் பொருளாதாரத்தையே மாற்றியமைத்துள்ளார்களே அதை ஏன் நாம் கருத்தில் கொள்ள முடியவில்லை. இந்த இயற்கை எரிவாயுவை பயன்பாட்டிற்கு முழுமையாகக் கொண்டுவந்தால் அதன் விலை லிட்டருக்கு 12 அல்லது 13 ரூபாய் மட்டுமே வரும் என்பது வல்லுநர்களின் கருத்தாக இருக்கும்போது, அதை செயல்படுத்தி மக்களின் சுமையைக் குறைக்க ஏன் முன்வர முடியவில்லை. இப்போதைய நடுவன் அரசும் இதன் அடிப்படையில் செயல்படுத்தாமல் இருப்பதன் பின்னணி என்ன என்பதும் இந்த கோல்கேட் ஊழல் போல எப்போது வெளிச்சத்திற்கு வந்து மத்திய அரசிற்கும் மக்களுக்கும் பயன் கிடைக்க வழிவகுக்கப்போகிறது என்பதும் புரியாத புதிராகவே உள்ளது. நிலக்கரி புதிய ஒதுக்கீட்டின் மூலமாக மின்சார உற்பத்தி பெருமளவில் செலவினம் குறைந்து, அதனுடைய பயன் கடைநிலை மக்களைச் சென்றடையும் என்பதும், அதுபோல அலைக்கற்றை ஒதுக்கீட்டின் மூலமாக கிடைக்கக்கூடிய வருவாயால் பயன்பாட்டாளர்களுக்கு உரிய கட்டணமும் குறையும் என்பதும், இயற்கை எரிவாயுவின் மூலமாக செலவினம் கணிசமாகக் குறைந்து மக்களுக்கு மிகப்பெரிய பயன் கிடைக்கும் என்பதும் நடுவன் அரசு கண்களில்பட்டும் இன்னும் செயல்படாமல் இருப்பதன் காரணமும் புரியவில்லை.

வாழ்க பாரதம்!

பவள சங்கரி

தலையங்கம்

ஆண்டு தோறும் மார்ச் 8ம் தேதி உலகெங்கும், சர்வதேச மகளிர் தினம் கொண்டாடப்படுகிறது. 1789ம் ஆண்டு ஜூன் மாதம் 14ம் தேதி பிரான்சு நாட்டில் பெண்களால் பெரும் கிளர்ச்சி ஏற்பட்டுள்ளது. சுதந்திரத்துவம், சமத்துவம், பிரதிநிதித்துவம் போன்றவற்றை முன்னிறுத்தி துவக்கப்பட்ட இந்தக் கிளர்ச்சிதான் உலகெங்கும் பெண்கள் தங்கள் உரிமைக்காகப் போராட்டம் நடத்தும் விழிப்புணர்வையும் ஏற்படுத்தியது. சர்வதேச மகளிர் தினம் கொண்டாட வித்தாக அமைந்ததும் இந்தக் கிளர்ச்சிதான். மிக முக்கியமாக பெண்கள் மற்றும் குழந்தைகளுக்கு எதிரான வன்முறைகளைப் பற்றிய விழிப்புணர்வை ஏற்படுத்தும் நாளாகவே இது கொண்டாடப்படுகிறது. ஐக்கிய நாடுகள் சபையால் அறிவிக்கப்பட்ட இந்த நாளில் பல நாடுகளில் பொது விடுமுறை நாளாகவும் அறிவிக்கப்பட்டுள்ளது. 1921ம் ஆண்டிலிருந்து, 94 ஆண்டுகளாக ஒ‌வ்வொரு ஆ‌ண்டு‌ம் மா‌ர்‌ச் 8ஆ‌ம் தே‌தியை நா‌ம் மக‌ளி‌ர் ‌தினமாக‌க் கொ‌ண்டாடி வரு‌கிறோ‌ம். சமீபக் காலங்களில்தா‌ன் நம் இ‌ந்‌தியா‌வி‌ல் மக‌ளி‌ர் ‌தின‌க் கொ‌ண்டா‌ட்ட‌ங்க‌ள் சூடுபிடித்துள்ளன. நம் நாட்டில் அதிகரித்து வரும் பாலியல் வன்கொடுமைகள், மகளிருக்கான உரிமைகள், இட ஒதுக்கீடுகள், ஆண், பெண் பாலின சமநிலையில் வேறுபாடு போன்ற பல்வேறு பிரச்சனைகள் குறித்த விழிப்புணர்வு ஏற்படுத்துவதே இதன் முக்கிய நோக்கமாக உள்ளது.

நாட்டில் முதல் முறையாக பாலியல் வன்முறைக்காக தூக்கு தண்டனை கொடுக்கப்பட்ட சம்பவம் நிர்பயா என்ற பிசியோதெரபி – மருத்துவக் கல்லூரி மாணவிக்கு பேருந்தில் நடந்த பயங்கரம். 13 நாட்கள் தொடர் போராட்டத்தில் துடிதுடித்து இறந்தார் நிர்பயா.

சர்வதேச மகளிர் தினமான இன்று, அமெரிக்கப் பெண்களுக்கு எதிரான புதிய வன்கொடுமை தடுப்புச் சட்டத்தில் அதிபர் பாரக் ஒபாமா கையெழுத்திட்டுள்ளது குறிப்பிடத்தக்கது. மிகவும் முக்கியத்துவம் வாய்ந்த இச்சட்டத்திற்கு பல தன்னார்வ அமைப்புகளும் வரவேற்பு அளித்துள்ளன. 1994ல் கொண்டு வரப்பட்ட பாலியல் வன்முறை தடுப்புச் சட்டம், தற்போது மேலும் கடுமையாக்கப்பட்டுள்ளது. நாட்டின் ஆக்கப்பூர்வமான செயல்பாடுகளுக்கும், நேர்மறை வளர்ச்சிக்கும் இச்சட்டம் வித்திடும் என்றும், தங்களது கலாச்சாரத்தில் மாற்றம் ஏற்படச் செய்யும் எனவும், உள்நாட்டு பிரச்சனைகளுக்கு தீர்வு காண வழிவகுக்கும் என்றும் ஒபாமா குறிப்பிட்டுள்ளார். குடும்ப வன்முறையால் பாதிக்கப்பட்டவர்களுக்கு தன்னார்வ அமைப்புகள் உதவி செய்யும் வகையில் இந்தச் சட்டம் திருத்தி அமைக்கப்பட்டுள்ளது என்பதும் குறிப்பிடத்தக்கது.

நம் இந்தியாவில் குழந்தைகள் பிறப்பு எண்ணிக்கையில் பெருமளவு குறைந்திருந்தாலும், பெண் குழந்தைகளின் எண்ணிக்கை மேலும் குறைந்து வருவது கருத்தில் கொள்ளவேண்டிய செய்தி. 2010 ம் ஆண்டின் மக்கள் தொகை கணக்கெடுப்பின்படி மொத்தப் பெண்கள் எண்ணிக்கை 9,893,708 ஆகவும், ஆண் குழந்தைகளின் எண்ணிக்கை 11,004,520 ஆகவும் இருந்தது. அதாவது 5.44% ஆண் குழந்தைகளுக்கு, 4. 69% பெண் குழந்தைகளே பிறந்துள்ளன. இது எதிர்காலத்தில் பலவிதமான பிரச்சனைகளை உருவாக்கக்கூடும் என்பது சமூக ஆர்வலர்களின் கணிப்பு. உடனடியாக இதற்கான தீர்வைக் காண்பதும் அவசியமாகிறது. இந்தியாவில், இரண்டு சதவிகித பெண்கள் மட்டுமே 18 வயதிற்கு கீழ் திருமணம் செய்துகொள்கிறார்கள். 20 சதவிகிதத்திற்கும் குறைவான பெண்களே திருமணத்திற்கு முன்பே கணவனை அறிந்தவர்களாக இருக்கிறார்கள். 40 சதவிகிதத்தினர் தங்கள் திருமணம் குறித்து ஏதும் சொல்ல முடியாதவர்களாக இருக்கிறார்கள். வரதட்சணையாக குறைந்தபட்சம் ரூ.30,000 முதல் அதிகபட்சமாக கார் அல்லது இரு சக்கர வாகனங்கள் போன்றவைகளும் கூடுதலாக வழங்கப்படுகிறது.

உலகிலேயே மிகக் குறைவான பெண் தொழிலாளர்கள் வரிசையில் நம் இந்தியா 11ம் இடத்தில் இருக்கிறது என்கிறது ஒரு ஆய்வறிக்கை. சென்ற பதினைந்து ஆண்டுகளில், அதிகமான வேலை வாய்ப்பு இருந்த பத்து துறைகளில், எட்டில் பெண்களின் பங்களிப்பு மிகக் குறைவாகவே இருந்தது. பெண்கள் விரும்பி ஏற்கும் மற்ற இரண்டு துறைகளான ஆசிரியர் மற்றும் கைவினைப் பொருட்கள் போன்றவற்றில் அதிகமான பங்களிப்பு இருந்தாலும், அதுவும் பாதிக்கும் குறைவாகவே இருக்கிறது.

அரசியலைப் பொறுத்தவரை பெண்களின் சுய உரிமைகள் சார்ந்த தீர்மானங்களில் பெரும்பாலும் ஆண்களின் அரசியல் ஆதிக்கம் சார்ந்த முடிவுகளே எடுக்கப்பட்டுள்ளன. 16 வது மக்களவையைப் பொறுத்தவரை எப்பொழுதையும்விட மிக அதிக அளவிலான பெண்கள் பாராளுமன்ற உறுப்பினர்களாக இருந்தாலும், 62 என்ற எண்ணிக்கை 11 சதவிகிதமே ஆகும். நரேந்திர மோடி அவர்களின் அரசாங்கத்தில் 66 அமைச்சர்களில், 8 பேர் மட்டுமே பெண்கள். அமைச்சரவையில் 23 சதவிகித பெண்களே உள்ளனர். மாநிலங்களில் 10 சதவிகிதத்திற்கும் குறைவான பெண் சட்ட மன்ற உறுப்பினர்களே உள்ளனர். நாகாலாந்து, மிசோரம் மற்றும் புதுச்சேரி ஆகிய மாநிலங்களில் பெண் சட்டமன்ற உறுப்பினர்களே இல்லை என்பதும் குறிப்பிடத்தக்கது. மாநிலங்களில் பெண் அமைச்சர்களும் மிகவும் குறைவாகவே 7 சதவிகிதம் மட்டுமே உள்ளனர். எட்டு மாநிலங்களில் பெண் அமைச்சர்களே இல்லை. மூன்று பெண் அமைச்சர்கள் மட்டுமே உள்துறை அமைச்சகப் பொறுப்பேற்றுள்ளனர். அதில் இருவர் முதல் அமைச்சர்கள். இருவருக்கு மட்டுமே நிதி அமைச்சகப் பொறுப்பு வழங்கப்பட்டுள்ளதும் குறிப்பிடத்தக்கது. நாடாளுமன்றம், சட்டமன்றத்தில் 33 விழுக்காடு பெண்களுக்கு பிரதிநிதித்துவம் இன்னும் எட்டாக் கனியாகவே உள்ளது என்பது வெள்ளிடைமலை. அது சட்டமாக்கப்பட வேண்டும் என்பதும் நிதர்சனம்.