வல்லமை

Category: கட்டுரைகள்

கட்டுரைகள்

  • கம்பனில் கண்டெடுத்த முத்துக்கள் – 3

    கம்பனில் கண்டெடுத்த முத்துக்கள் – 3

    -மேகலா இராமமூர்த்தி

    ஒரு நாடு மேன்மையுற அந்நாட்டு மக்கள் புலனொழுக்கம் மிக்கவர்களாய் இருத்தல் இன்றியமையாதது என்பதைக் காப்பியத்தின் தொடக்கத்திலேயே வலியுறுத்திய கம்பர், அடுத்து அந்நாட்டை ஆளுகின்ற மன்னன் எவ்வாறிருக்கவேண்டும் என்பதையும் கோசலநாட்டு மன்னனான தயரதனை வைத்து விளக்குகின்றார்.

    தாய்ஒக்கும் அன்பில் தவம் ஒக்கும் நலம் பயப்பில்
    சேய்ஒக்கும் முன்நின்று ஒரு செல்கதி உய்க்கும் நீரால்
    நோய்ஒக்கும் என்னின் மருந்துஒக்கும் நுணங்கு கேள்வி
    ஆயப்புகுங்கால் அறிவுஒக்கும் எவர்க்கும் அன்னான்.     (கம்ப: அரசியற் படலம் – 171)

    தயரதன் குடிமக்களிடம் அன்புகாட்டுவதில் தாயைப் போன்றவன். மக்களுக்கு வேண்டிய நன்மைகளையெல்லாம் அளிப்பதில் தவம் போன்றவன் என்று அவன் பண்புகளை விவரிக்கத் தொடங்குகின்றார் கம்பர்.

    தவத்தைச் செய்வோரின் நோக்கமே ஏதேனுமொன்றைப் பெறவேண்டும் என்பதே. அதனால்தான் வள்ளுவப் பேராசானும்,

    ”வேண்டிய வேண்டியாங் கெய்தலால் செய்தவம்
    ஈண்டு முயலப் படும்”     (265) என்று அதன் இயல்பை விளம்புவார்.

    தயரதனும் வேண்டியதைத் தரும் தவத்தை ஒத்தவனாக மக்களுக்கு விளங்கியிருக்கின்றான். அடுத்து அவன் சேயைப் போன்றவன் என்கிறார் கம்பர். மக்கள் பிள்ளைகளைப் பெறுவதன் நோக்கம், தமக்குத் துன்பம்வந்த காலத்தில் அவர்கள் உதவுவார்கள்; முதுமைக் காலத்தில் அவர்கள் தம்மை அரவணைப்பார்கள் என்பதே!

    சிதலை தினப்பட்ட ஆல மரத்தை
    மதலையாய் மற்றதன் வீழுன்றி யாங்குக்
    குதலைமை தந்தைகண் தோன்றில்தான் பெற்ற
    புதல்வன் மறைப்பக் கெடும். (நாலடி – 197)

    கறையான்களால் அரிக்கப்பட்ட (முதிய) ஆலமரத்தை அதன் விழுது வீழாது தாங்குவதுபோல், முதுமைவந்து குதலைமை தோன்றிவிட்ட தந்தையைப் புதல்வன் தாங்கினால் தந்தையின் துயரம் மறையும் என்று நாலடியார் அறிவுறுத்தியிருப்பது ஈண்டு எண்ணிப்பார்க்கத் தக்கது.

    அப்படிப்பட்ட நன்மகனாய்த் தயரதனும் தன் நாட்டு மக்களுக்கு, குறிப்பாக முதியவர்களுக்கு இருந்திருக்கின்றான்.

    அடுத்து, மக்களுக்கு ஏதேனும் நோய் எனில் அதனைத் தீர்க்கும் மருந்தாகத் தயரதன் இருந்தான் என்கிறார் கம்பர். எனவே மக்களுக்குச் சங்கடங்கள் நேரும் காலத்தில் ஓர் அரசனானவன் அதற்குத் தீர்வாக இருக்கவேண்டுமே தவிர தானே சங்கடத்தைத் தருபவனாக – சிக்கல்களை உருவாக்குபவனாக இருக்கக்கூடாது என்பதையும் இதன்மூலம் நாம் உய்த்துணரமுடிகின்றது. இதனை இந்நாளைய ஆட்சியாளர்களும் உளங்கொள வேண்டும். அதுபோல் அரசனென்பவன் நுண்ணிய ஆராய்ச்சிகளில் ஈடுபடுவோர்க்கு உதவும் அறிவுபோன்றிருக்க வேண்டும் என்ற கருத்தையும் முன்வைக்கின்றார் கவிச்சக்கரவர்த்தி.

    எனவே, அரசப்பதவி என்பது மரபுவழியாக வருவது; அப்பதவியில் அமர்வதற்கு அரசமரபில் உதித்தவனாக இருத்தலே போதுமானது என்ற நடைமுறை விதிகளைத் தாண்டி, அரசனென்பவன் அப்பதவியை வகித்தற்குரிய தகுதியும் திறனும் படைத்தவனாகவும், மக்களின் நன்மதிப்பைப் பெற்றுத்தரக்கூடிய அனைத்து உயர்குணங்களும் கொண்டவனாகவும் இருக்கவேண்டியதன் கட்டாயத்தைச் சூரியகுலத் தோன்றலான தயரதன்வழி நமக்கு அறியத்தருகின்றார் கம்பர்.

    நாட்டு மக்களைத் தயரதன் எப்படிப் பாதுகாத்தான் என்பதை இன்னொரு பாடலின் வழியாக நமக்குத் தெளிவாக்குகின்றது இராமகாதை.

    வயிரம் முதலிய அணிகலன்களை அணிந்தவனும், சிங்கம்போன்ற ஆற்றலுடையவனுமான தயரதன், மன்னுயிர் அனைத்தையும் தன்னுயிர்போல் காத்துவரும் இயல்பினைக் கொண்டிருத்தலால், குற்றமற்ற இவ்வுலகின்கண் உள்ள இயங்குகின்ற, இயங்காது நிலையாயிருக்கின்ற அனைத்து உயிர்களும் உறைகின்ற உடம்பாயினான் என்கிறது இப்பாடல்.

    வயிரவான் பூண்அணி மடங்கல் மொய்ம்பினான்
    உயிர்எலாம் தன்உயிர் ஒக்க ஓம்பலால்
    செயிர்இலா உலகினில் சென்று நின்றுவாழ்
    உயிர்எலாம் உறைவதுஓர் உடம்பு ஆயினான்.     (கம்ப: அரசியற் படலம் – 177)

    இங்கே அரசனை உயிர்களுக்கு உடம்பு போன்றவன் எனும் கம்பரின் சிந்தனை அதுவரைத் தமிழ்ப்புலவோர் சொல்லாத புதுமையான ஒன்று. ஆம்! ”மக்களுக்கு உணவாகும் நெல்லோ நீரோ அவர்கட்கு உயிராகா; அகன்ற உலகத்தையும் அதன்கண் வாழுகின்ற மக்களையும் காக்கின்ற அரசனே அவர்கட்கு உயிர்போன்றவன். எனவே அதனை உணர்ந்து அதற்குத்தக்க வகையில் நடத்தல் வேந்தற்குக் கடன்” என்கிறது மோசிகீரனாரின் புறநானூற்றுப் பாடல்.

    நெல்லு முயிரன்றே நீரு முயிரன்றே
    மன்ன னுயிர்த்தே மலர்தலை யுலகம்
    அதனால் யானுயி ரென்ப தறிகை
    வேன்மிகு தானை வேந்தற்குக் கடனே.      (புறம் – 184)

    ஆனால் கம்பரோ அரசனே நாட்டுக்கு உயிர்போன்றவன் என்ற சங்கச் சிந்தனையை மறுக்கின்றார். நாட்டிலே மக்களே முதன்மையானவர்கள்; நாட்டுக்கு உயிர்போன்றவர்கள். அந்த உயிர்களைப் பாதுகாக்கின்ற உடல்போன்று – கவசம்போன்று இருப்பதுதான் ஒரு நல்ல அரசனுக்கு அழகு என்ற மாற்றுச்சிந்தனைக்கு அவர் தோற்றுவாய் செய்திருப்பது, மக்களை முதன்மைப்படுத்தும் மக்களாட்சித் தத்துவத்தில் அவருக்கிருந்த நம்பிக்கையை வெளிப்படுத்துகின்றது. அவ்வகையில் கி.பி. 9 அல்லது 12ஆம் நூற்றாண்டில் வாழ்ந்தவராகக் கருதப்படும் கம்பர் மக்களாட்சி குறித்து அப்போதே சிந்தித்த முன்னோடிச் சிந்தனையாளராகக் காட்சியளிக்கின்றார்.

    மக்களைத் தாயாகவும் சேயாகவும் காத்துவந்த தயரத மன்னனுக்கு நெடுங்காலம் மக்கட்பேறில்லை. தவமாய்த் தவமிருந்து அவன்பெற்ற புதல்வர்கள் இராமன், இலக்குவன், பரதன், சத்துருக்கனன் ஆகிய நால்வர்.

    தம்முடைய காப்பியத்தில் பத்தாயிரத்துக்கும் மேற்பட்ட பாடல்களை எழுதிக் குவித்திருக்கும் கம்பர், தயரதனின் பிள்ளைகளைப் போற்றிப் பிள்ளைத்தமிழ்ப் பாடல்கள் சிலவேனும் பாடியிருந்தால் காப்பியச்சுவை மேலும் கூடியிருக்கும். ஏனோ அவர் அதைச் செய்யவில்லை. தம்முடைய மகன் அம்பிகாபதியை அகாலத்தில் பறிகொடுத்த துக்கமே கம்பரைப் பிள்ளைத்தமிழ் பாடவியலாத மனநிலைக்குத் தள்ளிவிட்டது என்பர் சிலர். அதன் உண்மைத்தன்மையை அறியக்கூடவில்லை!

    தயரதப் புதல்வர்கள் நால்வருமே குணத்திலும் வீரத்திலும் மேம்பட்டவர்களாக இருந்தனர். அதிலும் மூத்தவனான இராமன் மக்கள் கொண்டாடும் கல்யாண குணங்கள் பலவும் கொண்டவனாய்த் திகழ்ந்தான்.

    ஒருநாள் தயரதனின் அவைக்கு வந்த விசுவாமித்திர முனிவர்,

    ”தயரதா! காட்டில் நான் செய்யவிருக்கும் தவ வேள்விக்கு அரக்கர்கள் பெரும் இடையூறு செய்யக் காத்திருக்கின்றார்கள். அவர்களிடமிருந்து என் வேள்வியைக் காத்துத்தர நின் புதல்வர்களில் கரிய செம்மல் ஒருவனைத் தருதி!” என்று கேட்கின்றார். கரியசெம்மல் என்றதுமே அவர் இராமனைத்தான் கேட்கிறார் என்பதை உணர்ந்துகொண்ட தயரதன் பெருங் கலக்கம் அடைகின்றான்.

    அப்போது அவனடைந்த துயரத்தை,

    எண்இலா அருந் தவத்தோன் இயம்பிய சொல்
       மருமத்தின் எறிவேல் பாய்ந்த
    புண்ணில் ஆம்பெரும் புழையில் கனல் நுழைந்தா
       லெனச் செவியில் புகுதலோடும்
    உள்நிலாவிய துயரம் பிடித்து உந்த
       ஆர்உயிர் நின்று ஊசலாட
    கண்இலான் பெற்று இழந்தான் என உழந்தான்
       கடுந் துயரம் கால வேலான்.  (கம்ப: கையடைப் படலம் – 328) 

    என்கிறார் கம்பர்.

    எண்ணருந் தவங்களை மேற்கொண்டவரான விசுவாமித்திரர் சொன்ன இந்தச் சொற்களானது, மார்பின்மேல் எறிந்த வேல்பாய்ந்த புண்ணாகிய புழையிலே, கனன்று கொண்டிருக்கும் தீ நுழைந்தது போலத் தயரதன் காதுகளில் புகுந்தது. அப்போது அவன் உள்ளத்திலே நிலைத்திருந்த துயரமானது உயிரை வெளியே தள்ள, அவனுடைய ஆருயிர் ஊசலாட, கண்கள் இல்லாதவன் அதனைப் பெற்றுப் பின்னர் இழந்தான் எனக் கூறும்படித் தயரத வேந்தன் கடுமையான துன்பத்தினால் வருந்தினான் என்பது கம்பர் தீ(கா)ட்டும் தயரதனின் உளச்சித்திரம்.

    இங்கே இரண்டு உவமைகளைக் கையாளுகின்றார் கம்பர். வேல்பாய்ந்து குழியாகிப்போன புண்ணிலே தீ நுழைந்தது போல என்பது அவற்றில் முதலாவது. நாம் இக்காலத்தில் ”வெந்த புண்ணில் வேல்பாய்ந்தது போல” என்று சொல்வதைத்தான் ”வேல்பாய்ந்த புண்ணிலே தீ நுழைந்தது போல” என்று மாற்றிச் சொல்லியிருக்கின்றார் கம்பர் எனக் கொள்ளலாம்.

    அடுத்து, ”கண் இலான் பெற்றிழந்தான்” எனும் அரிய உவமை. கண்கள் இல்லாதவன் காலம் முழுவதுமே கண்ணில்லாமல் – பார்வையில்லாமல் இருந்துவிட்டால் பார்வையின் பயன் என்னவென்றே அவன் அறியாதிருந்துவிடுவான். ஆனால், அவனுக்கு இடையில் கண்பார்வை கிடைத்துவிட்டால் அவன் அந்தப் பார்வையின் துணையோடு பல்வேறு நற்காட்சிகளைக் காணும் பேறுபெற்றுப் பார்வையின் அருமையை அறிந்தவனாகிவிடுகின்றான். அந்தச் சமயத்தில் திடீரென்று மீண்டும் அவன் பார்வை பறிக்கப்படுவதென்பது எத்தகைய கொடுமை?

    அதுபோல்தான் நெடுங்காலம் மகப்பேறின்றி வாடிய தயரதன், பின்னர்ப் புதல்வர்களைப் பெற்று, இப்போது மீண்டும் முனிவரால் அவர்களை இழந்துவிடுவோமோ என்று அஞ்சிய நிலை இருந்தது என்கிறார் உவமைகளைப் படைப்பதில் ஒப்பற்றவரான கம்பநாடர்.

    அந்த வேதனையோடு முனிவரை நோக்கிய தயரதன், ”ஐயா! இராமன் சிறுவன்! அரக்கரை அழிக்கும் பணியோ பெரிது; அத்தோடு கடிது. ஆதலால் அப்பணியை முடித்துத்தர நானே வருகின்றேன்” என்கிறான். முனிவர் அதற்கு ஒத்துக்கொள்ளவில்லை. சீற்றத்தோடு தம் ஆசனத்திலிருந்து எழுகின்றார். அப்போது தயரதனைச் சமாதானப்படுத்தி இராமனை விசுவாமித்திர முனிவரோடு அனுப்பிவைக்க உடன்படச் செய்கின்றார் தயரதனின் குலகுருவும் ஆசானுமான வசிட்டர்.

    அதைத்தொடர்ந்து இராமனும் அவனைப் பிரியாத இளவலான இலக்குவனும் விசுவாமித்திர முனிவரோடு காட்டுக்குப் புறப்படுகின்றனர் தயரதன் சம்மதத்தோடு!

    [தொடரும்]

    *****

    கட்டுரைக்குத் துணைசெய்தவை:

    1. கம்பராமாயணம் – கோவைகம்பன்  அறநிலை விளக்க உரைக்குழு.
    2. கம்பரும் வால்மீகியும் – பேரா. அ. பாண்டுரங்கன், எம்.ஏ., பிஎச்.டி., டிப் (மொழி), தமிழரங்கம் பதிப்பு, புதுவை – 605 008.
    3. கம்பர் கருவூலம் – தொகுப்பாசிரியர், பேரா. மு. சாயபு மரைக்காயர், கங்கை புத்தக நிலையம், சென்னை – 600 017.

     

    Share
  • அக இலக்கியச் சிறுபாத்திரங்கள்- 4 (உழவன்)

    அக இலக்கியச் சிறுபாத்திரங்கள்- 4 (உழவன்)

    ச. கண்மணி கணேசன்,
    முதல்வர் & தமிழ்த்துறைத் தலைவர் (ஓய்வு),
    ஸ்ரீகாளீஸ்வரி கல்லூரி, சிவகாசி.

    முன்னுரை

    ஒரே ஒரு பாடல் காட்சியில் நேரடியாகத் தோழியின் முன்னர் நின்று அவள் பேச்சைக் கேட்பதன் மூலம்; உழவன் சிறுபாத்திரம் என்ற தகுதியைப் பெறுகிறான். இடப்பின்புலத்திற்குத் துணைசெய்யு முகத்தான் உழவனும் அவனது செயல்களும் காட்சிப்படுத்தப்படும் பாடல்களைத் தவிர்த்து சொல்லாடலில் இடம்பெறும் உழவனைச் சிறுபாத்திரம் என்று கொள்வதே ஏற்புடைத்து ஆகிறது.

    நற்றிணைப் பாடற் செய்தி

    தலைவி இற்செறிக்கப் படுகிறாள். இது தலைவனுக்குத் தெரியாது. அவள் உழுவிக்கும் வேளாளன் மகள். அவன் தலைவியைச் சந்திக்கப் பகற்குறியில் வயல் வெளியின் சிறைப்புறமாக வந்து நிற்கிறான். தோழி அவனிடம் நேரடியாக நிலவரத்தைச் சொல்ல முடியாது. எனவே நாற்று நட வந்திருக்கும் உழவனிடம் பேசித் தலைவனுக்குப் புரிய வைக்கிறாள். உழவன் கழிக்கவிருக்கும் ‘நெய்தல், கோரை முதலியவற்றைத் தூர எறியாதே; அவை தாம் தலைவிக்கு வளையாகவும், ஆடையாகவும் பயன்படக் கூடியன’ என்று சொல்வதன் மூலம்; ‘இனித் தலைவி வீட்டை விட்டு வேறெங்கும் செல்ல இயலாது; இவற்றை அவளுக்குக் கொண்டு போய்த்தான் கொடுக்க வேண்டும்’ என்று பொருள்படும்படிக் கூறுகிறாள். தோழி சொல்வதை எல்லாம் உழவன் கேட்கிறான்; ஆனால் பதிலுரைக்கும் உரிமையைப் புலனெறி வழக்கு தரவில்லை.

    விடியுமுன்னர் உழவன் மனைவியரோடு வயலுக்குக் கிளம்புகிறான்.   கிளம்பும் முன்னர் வயிறார உண்கிறான். ஏனெனில் அன்று அவன் நாற்று நடவேண்டும். வேலையைத் தொடங்கினால் வெயிலேறும் வரை ஓய்விற்கும் உணவிற்கும் வழியில்லை.

    “மலைகண் டன்ன நிலைபுணர் நிவப்பின்
    பெருநீர் பல்கூட் டெருமை உழவ
    கண்படை பெறாது தண்புலர் விடியல்
    கருங்கண் வரால் பெருந்தடி மிளிர்வையொடு
    புகர்வை அரிசிப் பொம்மல் பெருஞ்சோறு
    கவர்படு கையை கழும மாந்தி
    நீருறு செறுவில் நாறுமுடி அழுத்தநின்
    அடுநரோடு நீ சேறியாயின் வண்
    சாயும் நெய்தலும் ஓம்புமதி எம்மில்
    மாயிருங் கூந்தல் மடந்தை
    ஆய்வளைக் கூட்டும் அணியுமார் அவையே“(பா- 60)

    எனப் பாடியுள்ளார் தூங்கலோரியார்.

    பாடலின் முதலடியில் இருப்பது உவமை. ‘மலை நிமிர்ந்து நின்றாற் போலத் தோன்றும் மிகுந்த நெல்லின் நாற்றுக்கட்டுக் குவியலை  நடவிருக்கும் உழவனே’ என்று அழைக்கிறாள்.

    பணிப்பளு காரணமாக அவனால் தூங்க இயலவில்லை என்பது மூன்றாம் அடியில் தொடர்கிறது. எனவே குளிர்ந்த காலைப் பொழுதில் எழுந்து; நீரில் ஊறிய நெல்லரிசிச் சோற்றைப்; பருத்த வரால்மீன் குழம்புச் சொட்டானத்தை ஊற்றிக் கைகளில் நீர் வழிய உண்டு; மீந்த நீராகாரத்தைக் குடித்து விட்டுத் தன் பெண்டிரோடு வயலில் நாற்றுநட வந்து சேர்ந்தான்.

    அவனை ‘எருமை உழவ’ என்று அழைப்பது அங்கதச்சுவைக்காக எனலாம். இங்கே நையாண்டிக்கு உரியவன் உழவன் அல்லன். அவன் எருமையை உடையவன்; அவ்வளவே. உழவனிடம் பேசுவது போலத் தலைவனிடம் பேசுகிறாள் ஆதலால்; இவ்விளி தலைவனைக் குறிப்பாகச் சுட்டுகிறது. தலைவியை மணந்து கொள்வதில் அவன் மந்தமாக எருமை போலச் செயல்படுகிறான் என்று உணர்த்துகிறது.

    தோழியின் அடுத்த செய்தி; உழவன் எவ்வாறு உலக வாழ்வைத் துய்க்கிறான் என்பதாகும். பாடல் சுட்டும் அடுநர்; உழவனுக்காகச் சமைத்த அவனது மனைவியர். பாடுபடுவதற்காகக்; குளிர்ந்த காலைப் பொழுதில் வயலுக்குக் கிளம்பியவன்; வயிறு முட்ட முந்தைய நாளில் வைத்த மீன்குழம்பும் பழைய சோறும் உண்டு விட்டுக் கிளம்புகிறான். பாடலின் ஏழாவது அடியிலுள்ளது இறைச்சிப் பொருள். நடவுக்குத் தயாராக இருக்கும் நீர் நிறைந்த வயலில் நாற்று முடிச்சினை அழுந்த ஊன்றிச் சுறுசுறுப்புடன் உழவன் செயலாற்றுகிறான். ஆனால் தலைவன்  இன்னும் தலைவியை மணந்து கொள்ளவே இல்லை.

    இல்லறத்தின் இன்பத்தை முழுவீச்சில் அனுபவித்து நிறைவு 

    அடைபவனாக உழவன் காட்டப்படுகிறான். தென்தமிழகத்தில் இன்றும் நடைமுறையிலிருக்கும் ஒரு சமூக வழக்கம் இங்கு நினைவுகூரத் தக்கது. திருமணத்திற்கு முந்தையநாள் மாலை ‘உறுதி பேசும்’ சடங்கு முடிந்ததும்; மணமகனின் சகோதரி அல்லது குடும்பத்தின் மூத்த சுமங்கலி மணமகளை அழைத்துக்கொண்டு அடுப்படிக்குச் சென்று; அடுப்புமேட்டில் மண்ணைக் குழைத்துச் சிறிய ‘அடுப்பும் திண்ணையும்’ போட்டு வருவர். என்ன தான் பகலில் பாடுபட்டாலும் கணவனும் மனைவியும் பசியாற அடுப்பில் ஆக்கி  உண்டு; திண்ணையில் ஓய்வெடுக்கும் போது களைப்பு நீங்கி இன்பமாக இல்லறத்தை அனுபவிக்கலாம் என்பதே இதன் பொருள் என்பர். இங்கே உழவன் அதைத்தான் செய்யக் காண்கிறோம். அவன் நாவிற்கு ருசியைப் பொம்மலும் மிளிர்வையும் தருகின்றன. அவனுக்குப் பொங்கிப்போட மனைவியர் உள்ளனர். அவனது பசி நீங்கி வயிறு குளிர்கிறது. மகளிரோடு  அவன் அனுபவிக்கும் இல்லறசுகத்தை இறைச்சி கூறாமல் கூறுகிறது. தலைவனோ இன்னும் தலைவியைப் பெண் கேட்கக்கூட  இல்லை; நீ உலக வாழ்வைத் துய்க்க வேண்டுமெனின் உடன் வரைதல் வேண்டும் என்பது குறிப்பான அறிவுரை.

    இவ்வாறு உழவன் நிலையையும், தலைவன் நிலையையும் அழகுற முரண்படுத்திக் காட்டி; அங்கதத்துடன் இறைச்சிப் பொருளும் இணைய; உலகியலான வாழ்க்கைத் தத்துவத்தைத் தெளிவுறுத்தி; குறிப்பாகத் தலைவனைத் திருமணத்திற்குத் தூண்ட உழவனெனும் சிறுபாத்திரத்தைப் பயன்கொண்டிருப்பது பாடலின் சிறப்பு.

    முடிவுரை

    கூடல் நிமித்தமாகிய திருமணத்திற்குத் தலைவனைத் தூண்ட மருதநிலக் கருப்பொருளான உழவன் எனும் சிறுபாத்திரம் உதவி உள்ளது.

    Share
  • சென்டாரஸ் உடுத் தொகுப்பு

    சென்டாரஸ் உடுத் தொகுப்பு

    வெ. சுப்ரமணியன்

    எழுதிக் கொண்டிருக்கும் எல்லோருக்கும் நன்கு அறிமுகமான இராசி விண்மீன் தொகுப்புகளை நட்ட நடுவில்  மேஷம், இரிஷபத்துடன் நிறுத்தி  விட்டுத் திடீரென்று, “எல்லாம் கிடக்க கிழவனைத் தூக்கி மனையில் வை” என்பது   மாதிரி சென்டாரஸ் உடுத் தொகுப்பை நான் ஏன் இப்போது எடுக்க வேண்டும் என்ற வினா உங்கள் மனதுக்குள் கண்டிப்பாக இருக்கும்.

    தற்போது இரவு சுமார் 8.00 மணி முதல்  தென்கிழக்கு அல்லது தெற்குத் திசையில் கிழக்கு மேற்காக அருகருகில் அமைந்த இரு பொலிவான உடுக்களை வெறும் கண்களால் தொலைநோக்கி அல்லது இருகண் நோக்கி போன்ற கருவிகளின் உதவியின்றி  நம்மால் எளிதில் காண இயலும். அந்த இரு உடுக்கள் ஆல்பா சென்டூரியும் (α-Centauri) பீட்டா சென்டூரியும் (β-Centauri) ஆகும் .

    சென்டாரஸ் உடுத் தொகுப்பு தெற்கு வான் அரைகோளத்தில் இருப்பது. ஆகவே நிலநடுக்கோட்டுக்கு வடக்கில் அதிக அட்சங்களில் இருப்பவர்களுக்கு இதனைக் காணும் வாய்ப்பு இல்லை. ஆனால்  நம் சென்னை 12° 59′ முதல் 13° 9′ வரையான வடக்கு அட்சத்தில்) நில நடுக்கோட்டுக்கு அருகில் இருப்பதால் குறிப்பிட்ட சில காலங்களில் நமக்குக் கட்புலனாகும் அரிய வாய்ப்பு கிடைத்துள்ளது.

    தற்போது சென்னை வானில் இரவு நேரத்தில் இவ்விரு உடுக்களையும் காண இயலும் என்பதால் இப்போது இவை இடம் பெற்றுள்ள  சென்டாரஸ் உடுத் தொகுப்பு (Centaurus constellation) குறித்த தகவல்கள் முடிந்தவரையில் எளிதில் புரிந்து கொள்ளும் வகையில் தரப்பட்டுள்ளன. பிராக்சிமா சென்டூரி (Proxima Centauri) விண்மீன் அல்லது உடுதான் நம் பூமிக்கு மிக அருகில் அமைந்த உடு. பூமிக்கு அருகில் அமைந்த உடு என்றால் நம் நில விற்பனை விளம்பரங்களில்

    “சென்னைக்கு மிக அருகே” என்று சொல்வது போன்ற அருகில் என்றுதான் எடுத்துக் கொள்ள வேண்டும். காரணம் புவியிலிருந்து பிராக்சிமா சென்டூரி சுமார் 4.2 ஒளி ஆண்டுகள் தொலைவில் உள்ளது. இப்போது நமக்கு இரண்டு ஐயங்கள் வர வேண்டும். முதலாவது ஆல்ஃபா சென்டூரி உடுவுக்கும் இப்போது சொல்லிக் கொண்டிருக்கும் பிராக்சிமா சென்டூரிக்கும் என்ன தொடர்பு? அடுத்தது தூரத்தை  ஒளி ஆண்டு என்றால் என்ன என்பது.

    முதல் ஐயத்திற்குப் பதில் ஆல்பா சென்டூரி (α – Centauri) உடுவானது  மூன்று உடு அமைப்பு. அதில் மொத்தம் மூன்று உறுப்பினர்கள். ஆல்பா சென்டூரி A , ஆல்பா சென்டூரி B மற்றும் பிராக்சிமா சென்டூரி.

    அடுத்தது ஒளி ஒரு வினாடியில் கிட்டத்தட்ட மூன்று இலட்சம் கிலோமீட்டர் தூரத்தைக் கடக்கும். அத்தகைய வேகத்தில் சுமார் 4.2 ஆண்டுகள் விடாமல் பயணித்தால்தான் பிராக்சிமா சென்டூரியை அடைய முடியும்.

    தவிரவும் பிராக்சிமா சென்டூரிக்கு  அருகில் பூமியைப் போன்று ஒரு கோள் இருப்பது கடந்த 2016 ஆண்டில் கண்டுபிடிக்கப்பட்டது. கடந்த 09.06.2020 அன்று கூடுதலாக இன்னுமொரு கோள் இருப்பதும் கண்டுபிடிக்கப்பட்டது பரபரப்பான செய்தியாகக் கடந்த சில நாட்களுக்கு முன்வெளியானதும் பிறிதொரு காரணமாக அமைந்துள்ளது.

    இரவு வானின் பொலிவான முதல் இருபத்தைந்து (25) உடுக்களை எடுத்துக் கொண்டால் அதில் மூன்றாம் (3) இடத்தில் ஆல்பா சென்டூரியும் (α – Centauri), பதினோராவது (11) இடத்தில் பீட்டா சென்டூரியும் (β – Centauri) உள்ளன.

    ஆல்பா சென்டூரி (α Centauri) பாரம்பரியப் பெயர்களான ரிகில் கென்டாரஸ் (Rigil Kentaurus), ரிகில் கென்ட் (Rigil Kent) மற்றும் டோலிமான் (Toliman) என்றெல்லாம்   அழைக்கப்படுகிறது. இதில் ரிஜில் கென்டாரஸ் என்பது அரபு சொற்றொடரான ரிஜ்ல் குவான்டாரிஸிலிருந்து (Rijl Qantūris) பெறப்பட்டது. சென்டூரின் பாதம் (foot of the centaur) என்ற பொருள் கொண்டது. டோலிமான் என்ற பெயர் அரபு அல் – ஜூல்மான் (al-Zulmān) என்பதிலிருந்து வந்ததாக நம்பப்படுகிறது. இதன் பொருள் தீக்கோழிகள் (ostriches).

    பீட்டா சென்டூரி (β Centauri) உடுவின் பாரம்பரியமான பெயர்  ஹதர் (Hadar) அல்லது ஏஜெனா (Agena). ஹதர் (Hadar) அரபு வார்த்தையான தரை என்பதிலிருந்து உருவானது, அதே நேரத்தில் ஏஜெனா (Agena) லத்தீன் வார்த்தையான முழங்கால் (knee) என்பதிலிருந்து வந்தது.

    இன்று (24.06.2020) இரவு 07.54.29 மணியளவில் சென்னை வானில் காணப்பட்ட உடுத் தொகுப்புகளின் படத்தைக் கீழே காணலாம். படம் Sky Wiki என்னும் கைபேசிச் செயலி மூலம் பெறப்பட்டது. வானம் சற்று மேகம் பூசியது போலிருந்தாலும் சிவப்புக் கட்டமிட்டுச் சுட்டிக் காட்டப்பட்ட உடுக்கள் ஓரளவு தெளிவாகவே தெரிந்தன.

    சென்டாரசும்  கிரேக்க வானியலாளர் தாலமியால் (Ptolemy) அட்டவணைப் படுத்தப்பட்ட நாற்பத்தெட்டு (48) உடுத் தொகுப்புகளில் ஒன்றே. இருப்பினும் அதற்கு முன்பாகவே வானியலாளர் யூடோக்ஸஸ் (Eudoxus) மற்றும் கவிஞர் அராடஸ் (Aratus) ஆகியோரின் கிரேக்க நூல்களிலும் சென்டரஸ் குறித்து சொல்லப்படுள்ளது.

    சென்டாரஸ் உடுத் தொகுப்பு தெற்கு வான் அரைக்கோளத்தில் (Southern hemisphere) அமைந்துள்ளது. 1060 சதுர டிகிரி பரப்பளவைக் கொண்ட சென்டாரஸ் வானத்தில் ஒன்பதாவது (9) பெரிய விண்மீன் தொகுப்பாகும் . இது தெற்கு அரைக்கோளத்தின் (SQ3) மூன்றாவது காற்பகுதியில் அமைந்துள்ளது மற்றும் + 25 ° மற்றும் – 90 ° இடையிலான அட்சரேகைகளில் காணலாம். கோகுலத்தில் கண்ணனைச் சுற்றிலும் கோபியர்கள் இருந்தது போல இந்த உடுத் தொகுப்பைச் சுற்றிலும் அன்ட்லியா(Antlia), கரினா(Carina), சர்க்கினஸ் (Circinus), க்ரக்ஸ் (Crux), ஹைட்ரா (Hydra), துலாம் (Libra), லூபஸ் (Lupus), மஸ்கா (Musca), மற்றும் வேலா (Vela)  என்று ஏகப்பட்ட பிற உடுத் தொகுப்புகள் கூடிக் கும்மியடிகின்றன. இது கிரேக்க கிரேக்க உடுத் தொகுப்புகளில் ஒன்றாக வகைப் படுத்தப்பட்டுள்ளது. “ஆளவந்தான்” என்ற திரைப்படத்தில் “ கடவுள் பாதி மிருகம் பாதி கலந்து செய்த கலவை நான்” என்று ஒரு பாடல் வரி வரும். ஆதுபோல் இங்கு சென்ட்டூர் (Centaur) என்பது “மனிதன் பாதி குதிரை பாதி கலந்து செய்த கலவையான உயிரினம்”. அதாவது மேல் பாதி மனித வடிவத்தையும் கீழ்ப்பாதி குதிரை வடிவமும் கொண்டகிரேக்க மற்றும் இந்தியத் தொன்மங்களில் சொல்லப்படும் விசித்திரமானதோர் உயிரினம்.

    பண்டைய கிரேக்க – ரோமானிய தொன்மங்கள், சென்டாரஸை பெரும்பாலும் சிரோனுடன் (Chiron) சென்ட்டூருடன் தொடர்பு படுத்துகின்றன. டைட்டன் (Titan) மன்னர் குரோனஸின் (Cronus) மகனான சிரோன் மேற்பாதி மனித வடிவமும் கீழ்ப் பாதி குதிரை குதிரை வடிவமும் கொண்ட விசித்திரமான படைப்பாக இருந்தார். இவர் மிகுத்த அறிவாற்றல் கொண்டவர் என்பதால் ஹெர்குலஸ் (Hercules) மற்றும் ஜேசன் (Jason) ஆகிய இருவருக்கும் ஆசிரியராக இருந்தார்.

    இந்த சென்ட்டூர் (Centaur) உயிரினங்கள் காட்டுமிராண்டித்தனத்தையும் கட்டுக்கடங்காத குழப்பத்தையும் சித்தரிப்பவையாகவே இருக்கின்றன.  அவை கிரேக்க கட்டடக்கலை, சிற்பம் மற்றும் மட்பாண்ட அலங்காரங்களில் அடிக்கடி குறிப்பிடப்படுகின்றன. பொதுவாகச் சென்ட்டூர்கள்  மிருகத்தனத்திற்கும், காம இச்சைக்கும் பெயர் பெற்றிருந்த இருந்தபோதிலும், சில சென்ட்டூர்கள் தொன்மக் கதைகளில் மதுப்போதையின் பிடியில் இருந்தாலொழிய கொடியவையாகச் சித்தரிக்கப்படவில்லை. ஒருகால் நாமும் நம்முடைய நாகரிகத்தை மறப்பதால் இந்திரியங்களும் மனமும் கடிவாளம் இல்லாத குதிரையாக நமது கட்டுப்பாட்டை இழக்குமானால்  நாம் அனைவரும் எதிர்கொள்ளும் ஆபத்துக்களுக்கு அவை ஒரு எச்சரிக்கை உருவகமாகக் (metaphor) கூட இருக்கலாம்.

    தெசலியின் (Thessaly) பண்டைய பழங்குடியினரான லாபித்ஸ்களின் (Lapiths) அரசன் இக்ஸியன் (Ixion).  இவன் ஃபிளெகியாஸின் (Phlegyas) மகன். ஈயோனியஸின் (Eioneus) மகள் தியாவைத் (Dia) திருமணம் செய்து கொள்வதாக அவன் உறுதியளித்திருந்தான். ஆனால் அவன் தியாவின் தந்தைக்குத் தருவதாக வாக்குறுதியளித்திருந்த அழகான விலையுயர்ந்த திருமணப் பரிசுகளை எப்படியாவது தவிர்க்க வேண்டுமென்ற எண்ணம் கொண்டிருந்தான். அதனால் ஈயோனியஸை வஞ்சகமாகக் கொல்ல முடிவு செய்தான். தன் சதிவலையில் ஈயோனியஸைச் சிக்க வைக்க லாபித் அரண்மனையில் பெரும் விருந்துக்கு ஒன்றை ஏற்பாடு செய்து  அதில் கலந்து கொள்ள அவரை அழைத்தான்.  அவரை அமர வைக்கப் போகும் இடத்திற்குக் கீழே ஆழமான குழியைத் தோண்டி அதில் கரியைப் பயன்படுத்தி நெருப்பு வளர்த்துத் தணலை மூடி மறைத்து வைத்திருந்தான் இக்ஸியன். முறையாக விருந்தழைப்பு நடந்தேற, ஈயோனியஸ் அவனைச் சந்தேகப்படவில்லை. இக்ஸியனின் திட்டப்படி குழிக்குள் ஈயோனியஸ் தவறி விழுந்து முற்றிலுமாக எரிந்து போனார்.  இந்தக் கொடூரமான செயலால் கடவுளர்கள் கோபமடைந்தனர். ஆனால் ஜீயஸ் (Zeus), என்ன  காரணத்தாலோ, இக்ஸியான் மீது பரிதாபப்பட்டு,  குற்றத்திலிருந்து அவனை விடுவிக்க முன்வந்தது மட்டுமல்லாமல் கூடவே ஒலிம்பஸ் மலைக்கு விருந்துக்கும் அழைப்பு விடுத்தார்.

    ஜீயஸின் விருந்தினராகச் ஒலிம்பஸுக்குச் செல்வதில் இக்ஸியன் மிகவும் மகிழ்ச்சியாக இருந்தான், ஆனால் இயல்பிலேயே முற்றிலும் மிக மோசமான எண்ணம் கொண்டவனாக இருந்ததால், ஒருமுறை தவறு செய்து மன்னைப்பு வழங்கப்பட்ட பின்னரும் அவன் நடத்தையில் சிறிது கூட மாற்றமில்லை. தமிழில் உண்ட வீட்டுக்கே இரண்டகம் செய்தல் என்று சொல்வார்கள் அதுபோலத் தெய்வங்களின் அரசியும் ஜீயஸின் மனைவியுமான ஹேராவை (Hera) எப்படியாவது கவர்ந்து கொள்ளும் திட்டத்தில் அவன் இருந்தான்.

    ஜீயஸ், அனைத்தையும் அறிந்தவர் என்பதால் ஹேராவைப் போலவே தோற்றமளிக்கும் ஒரு மேகத்தை உருவாக்குவதன் மூலம் இக்ஸியனின் மோகத்தை முன்கூட்டியே தூண்டினார். அவரது தந்திரச் செயலுக்கு  வீழ்ந்த இக்ஸியன்   மேகத்தை  முரட்டுத்தனமாக இச்சித்துக் கூடினான். அந்தக் கூடலில் முதல் சென்டார் பிறந்தது. பின்னர் அவரால் சென்டார்களின் இனம் உருவானது.

    மனிதர்களின் சட்டங்களுக்கு அப்பாற்பட்டு, தெசலியின் காடுகளில் இந்த சென்டார்கள் வாழ்கின்றன என்று நம்பப்பட்டது. தெசலியில் குதிரையின் மீது ஆரோகணித்தவாறு காளைகளை வேட்டையாடும்  ஒரு பாரம்பரியம் இருந்ததால் இந்தத் தொன்ம உயிரினங்கள் உண்மையில் ஒரு அடிப்படையைக் கொண்டிருந்திருக்கலாம்.  மேலும் சென்டார் என்ற வார்த்தை “காளையைக் கொல்பவன்’ (bull-killer)  என்ற பொருள்படும். ஒருவேளை தெசலியின் மிகவும் திறமையான குதிரை வீரர்கள் குதிரையைத் தங்களது ஒரு அங்கமாகவே எண்ணிப் பார்த்திருக்கலாம். அதிலிருந்து சென்டார் உயிரினத்தின் கட்டுக்கதை பிறந்திருக்கவும் கூடும்.

    தொன்மத்தின்படி டைட்டன்களின் மன்னரான குரோனஸ் கடல் தேவதையான பிலிராவை (sea nymph Philyra) மயக்கி அவளுடன் தகாத உறவு கொள்ளும் போது எதிர்பாராத விதமாக  குரோனசின் மனைவியான ரியா (Rhea) இடையில் வந்து விட,  ரியாவிடம் சிக்கிக் கொள்ளாமல் தப்பிக்கும் பொருட்டு குரோனஸ் குதிரையாகத் தன் வடிவத்தை மாற்றிக் கொண்டார்.  இதன் விளைவாகப் பிலிரா ஒரு கலப்பின மகனைப் பெற்றெடுத்தார். இதனால் அதிர்ச்சியடைந்த பிலிரா பிறந்த மகனை அநாதையாக விட்டுச் சென்றாள்.

    சென்டார் சிரோன் அல்லது சீரோன், அவரது சிறந்த ஞானத்துக்காகவும், மருத்துவக் கடவுளான அஸ்கெல்பியோஸ் மற்றும் பராக்கிரமிக்க வீரர்களான ஹெர்குலஸ், அகில்லெஸ், ஜேசன் மற்றும் அவரது மகன் மீடியஸ் ஆகியோரின் ஆசிரியராகவும் அறியப்பட்டதால் மிகவும் பிரபலமானவர் . மருத்துவம், வேட்டையாடுதல், இசை ஆகியயவற்றில் ஞானமுடைய ஆசானாக நன்கறியப்பட்டிருந்ததாகத் தொன்மக் குறிப்புகள் உள்ளன. இருந்த போதிலும் தொன்மங்களில் சிரோன் ஒரு சிறிய பாத்திரம் மட்டுமே என்பதால் அவர் குறித்த விவரங்கள் மிகக் குறைவாகவே காணப்படுகின்றன. தொன்மங்களில் ஒரு நிழல் உருவம் கொண்டவர் மற்றும் அவர் பிலிராவின் மகன் (டைட்டன் ஓசியனஸின் மகள்) என்றும் அவர் சாரிக்லோ(Chariklo) என்ற தேவதையை  மணந்தார் என்பதும் கிமு 700 ஆம் ஆண்டில் வாழ்ந்த கவிஞர் ஹெசியோட்டின் (Hesiod) படைப்புகளிலிருந்து நமக்குத் தெரிய வருகிறது.  பெலியன் (Pelion) மலைக் குகையில் சிரோன் வாழ்ந்ததாகவும் நம்பப்படுகிறது.

    சிரோன் பொதுவாக உடற்பகுதியிலும் பின்னிரு கால்களிலும் மற்ற சென்டார்களைப் போலிருந்தாலும் அவரது முன் கால்கள் மனிதர்களின் கால்களைப் போலக் குறைவான உரோமங்களுடன் காணப்படுகின்றன. இதனை அவர் நாகரீகமான சென்டார் என்பதைக் குறிப்பதாக எடுத்துக் கொள்ளலாம். சிரோன் பீலியஸின் (Peleus) ஆலோசகராகவும், தீடிஸுடனான (Thetis ) மன்னர்  பிலியஸின்  திருமணத்தில் தொடர்புடையவராகவும் இருந்தார்.  இந்த  அரசத் தம்பதிகளின் மகன் அகில்லெஸ் (Achilles) தனது இளம் பருவத்தில் குருகுலக் கல்வி கற்ற புத்திசாலியான சிரோன் வசம் ஒப்படைக்கப்பட்டார்.

    பெரும் பராக்கிரமசாலியான அகில்லெஸிக்கு, சிரோன் பெலியஸுக்கு கொடுத்த பெலியனின் சாம்பலிலிருந்து (Pelian ash) தயாரிக்கப்பட்ட ஒரு வல்லமைமிக்க ஈட்டியும் மரபு வழியில் கிடைத்தது. இந்த ஈட்டி மிகவும் பெரியதாகவும், கனமாகவும் இருந்தது. அதைக் கொண்டு போரிட அகில்லெஸ் மட்டுமே போதுமான வலிமையும் திறமையும் கொண்டவராக இருந்தார், ஹோமரின் (Homer) இலியாட்டில் (Iliad)  ட்ரோஜன் போரைப் (Trojan war) பற்றிய  விளக்கத்தில் அகில்லெஸின் தீரம் குறித்துச் சொல்லப்படும் இடத்தில்  சிரோனின் பரிசான ஈட்டி பற்றி இரண்டு முறை குறிப்பிடப்பட்டுள்ளது.

    இறுதியில் ஹெராக்கிசின் (Heracles) விஷம் தோய்ந்த அம்பு ஒன்றால் தற்செயலாக தாக்கப்பட்டதில் காயமடைந்த அவர் அழியாத பிறவியான குரோனஸின் மகனாக இருந்ததால் அவருமே அழியாத பிறவி எடுத்தவராக இருந்தார். ஆகவே இறக்க வழியின்றிப் பயங்கரமான நரக வேதனையை அனுபவித்தார். ஜீயஸ் இறுதியில் சென்டார் சிரோனின் மீது பரிதாபப்பட்டு அவரை இறவாவரம் மற்றும் உடல் வாதைலிருந்து விடுவித்து, அவரை இறக்க அனுமதித்து, அவரை வானில் நட்சத்திரங்களுக்கிடையில் வைத்தார்.

    கி.மு. 2600-1900 வரை தேதியிட்ட கலிபங்கன் உருளை முத்திரைகள் (Kalibangan cylinder seal) சிந்துச் சமவெளி நாகரிகம் குறித்த அகழாய்வுத்தலத்தில் கிடைத்தன. செண்டார் போன்ற உயிரினங்களின் முன்னிலையில் பெண்ணின் பொருட்டு இரு ஆண்களுக்கு இடையிலான வாட்போரைக் காட்டுகிறது. பிற ஆதாரங்கள் பிரதிநிதித்துவப்படுத்தும் இந்த உயிரினங்கள் உண்மையில்  அரை மனித மற்றும் அரைப் புலிகள் என்று கூறுகின்றன, பின்னர் அவை இந்துப் போர் தெய்வமாக உருவாகின்றன.  இந்த முத்திரைகள் கிமு 3 நூற்றாண்டில் சிந்துச் சமவெளி – மெசொபடோமியா உறவுகளுக்கு சான்றாக விளங்குகிறது.

    படம்; நன்றி https://www.harappa.com/blog/indus-cylinder-seals

    திருவனந்தபுரத்தில் உள்ள பழைய ஸ்ரீகாந்தேஸ்வரம் கோயிலுடன் தொடர்புடைய  பிரபலமான ஒரு தொன்மக்கதையில், அழகான யாதவ இளவரசனுக்குத் துறவியொத்த ஒரு பிராமணரால் இடப்பட்ட சாபம், குதிரையின் உடலையும், குதிரையின் தலை மற்றும் கழுத்துக்குப் பதிலாக இளவரசனின் தலை, கைகள் மற்றும் உடற்பகுதியையும் கொண்ட ஒரு உயிரினமாக மாற்றியது என்று சொல்லப்படுகிறது.

    இந்தியப் புராணங்களிலும், ​​இந்தியா முழுவதிலுமிருந்து பல்வேறு பண்டைய நூல்கள், கலைகள் மற்றும் சிற்பங்களிலும் இன்னொரு அரை மனிதன், அரைக் குதிரை புராண உயிரினமான கின்னரர்கள் (Kinnaras) காணப்படுகிறது. இது குதிரையின் தலை இருக்கும் ஒரு மனிதனின் உடற்பகுதியுடன் கூடிய குதிரையாகக் காட்டப்படுகிறது, இது கிரேக்க சென்டார்களை ஒத்ததாகும்.

    பட :நன்றி https://www.pinterest.co.uk/pin/255368241341065845/

    சென்டாரஸின் தோற்றம்  காட்டெருமை மனிதன் (Bison-man – MUL.GUD.ALIM) என்று அறியப்பட்ட பாபிலோனியர்களால் உடுக் கூட்டத்திற்கு இட்டுச் செல்கிறது. பாபிலோனியர்கள்  சென்டாரஸ் உடுக் கூட்டத்தை (Centaurus constellation)  மனிதனின் தலையுடன் கூடிய  நான்கு கால் காட்டெருமை அல்லது  மனித தலையும் உடலும்  காட்டெருமை அல்லது காளையின் பின்புற கால்களுடன் இணைக்கப்பட்ட ஒரு உயிரினமாகச் சித்தரித்தனர். பாபிலோனியர்கள் இந்த உயிரினத்தைச் சூரியக் கடவுளான உட்டு – ஷமாஷ்  (Utu – Shamash )  உடன் தொடர்புபடுத்தினர்.

    காட்டெருமை மனிதன்

    படம்: நன்றி https://www.pinterest.at/pin/734649757937219075/

    சென்டாரஸ் உடுக் கூட்டத்தின் (Centaurus Constellation), அருகிலுள்ள லூபஸ் (Lupus) உடுக் கூட்டமான முயலைச் (Hare) சென்டார் (Centaur) தன் கூரான் ஈட்டியால் ஆரா (Ara) உடுக் கூட்டத்தின் பலிபீடத்தில் (Altar) தெய்வங்களுக்குப் பலியிடுவதாக அரேபியர்களால் சித்தரிக்கப்படுகிறது. சென்டாரின் முன் கால்கள் வானத்தில் பிரகாசமான இரண்டு நட்சத்திரங்களால் குறிக்கப்படுகின்றன, ஆல்பா மற்றும் பீட்டா சென்டூரி, இவை முறையே ரிகில் கென்டாரஸ் (Rigil Kentaurus), ஹதர்  (Hadar) என்று அழைக்கப்படுகின்றன. இரண்டு நட்சத்திரங்களும் திரிசங்கு அல்லது சதர்ன் கிராஸ் (Southren Cross) உடுத் தொகுப்பின் சுட்டிகளாக செயல்படுகின்றன, இது திரிசங்கு உடுத் தொகுப்பு சென்டாரஸின் பின்புற கால்களுக்குக் கீழ் உள்ளது.

    இனி மீண்டும் வானியலுக்கு வருவோம்.

    சென்டாரஸ் பதினோரு (14) முக்கிய ஊடுக்கள்கள், ஒன்பது (9) பொலிவான உடுக்கள் மற்றும் பேயர்/ஃபிளாம்ஸ்டீட் பெயர்களைக் (Bayer/Flamsteed designations) கொண்ட அறுபத்தொன்பது (69) உடுக்களைக் கொண்டுள்ளது.

    (1) ஆல்பா சென்டாரி  என்ற ரிகல் கென்டாரஸ் (Alpha Centauri – Rigel Kentaurus) அதன் முதல் மிகப் பொலிவான உடு.  ஆல்பா சென்டூரி சூரிய மண்டலத்திற்கு மிக நெருக்கமான நட்சத்திர அமைப்பு. ஆல்பா சென்டூரி அமைப்பில்ஒரு வேளை யாராவது பார்வையாளர்கள் இருப்பார்களேயானால், நாம் பார்க்கும் வானத்தின் அதே உருவத்தை ஆனால் சென்டரஸின் பொலிவான உடுவான ஆல்பா சென்டூரியைத் தவிர்த்து அவர்களும் பார்த்துக் கொண்டிருப்பார்கள். அவர்களின் பார்வையில் காசியோபியா (Cassiopeia constellation) உடுத் தொகுப்பில் நம்முடைய சூரியன் + 0.5 தோற்றப் பொலிவெண் மதிப்புடைய உடுவாகத் தெரியும்.

    இது ஒரு மூன்று உடு அமைப்பு (Tri star system).  சூரிய குடும்பத்திற்கு மிக அருகில் உள்ளது.  பூமியிலிருந்து வெறும் 4.365 ஒளி ஆண்டுகள் தொலைவில் அமைந்துள்ள இந்தப் பல்லுறுப்பு உடு அமைப்பில் (multiple star system ),  ஆல்பா சென்டூரி – A (Alpha Centauri A) நிறமாலை வகையில் G 2 V மஞ்சள் வெள்ளை பிரதான வரிசை உடுவாகவும்  ஆல்பா செண்டூரி B  (Alpha Centauri B) நிறமாலை வகை K1V உடுவாகவும் உள்ளன. இந்த நட்சத்திர அமைப்பின் மூன்றாவது உறுப்பினராகக் கருதப்படுவது நிறமாலை M5Ve வகைச் சிவப்பு குள்ள அமைப்பான (Red dwarf system) ஆல்பா சென்டூரி – C  (Alpha Centauri C) என்னும் ப்ராக்ஸிமா சென்டூரி (Proxima Centauri) உடு. இந்த உடுவானது ஆல்பா சென்டூரி A மற்றும் ஆல்பா செண்டூரி B சோடியிலிருந்து  சுமார் 0.24 ஒளி ஆண்டுகள்  தொலைவில் அமைந்துள்ளது.  ப்ராக்ஸிமா சென்டூரி உடு அமைப்பு  பூமியிலிருந்து 4.2 ஒளி ஆண்டுகள்  தொலைவில் உள்ளது.  ஆகவே இதுதான் நம் பூமிக்கு மிக அருகில் உள்ள உடு.

    இந்த அமைப்பின் பொலிவான அங்கத்தினரான ஆல்பா சென்டூரி  A, இரவு வானத்தில் சுவாதி என்ற ஆர்க்டரஸுக்கு (Arcturus) அடுத்து தனிப்பட்ட வகையில் நான்காவது பொலிவான  உடு. ஆல்பா சென்டூரி B  வானத்தில் 21 வது தனிப்பட்ட வகையில் பொலிவான உடுவாகும். இருப்பினும் இரண்டு உடுக்களையும் ஒரு சேரக் கணக்கில் எடுத்துக் கொண்டால், அவை ஆர்க்டரஸை விடப் பொலிவானவையாக உள்ளன. ஆகவே பொலிவான  உடுக்களின் அமைப்பில் சிரியஸ் (Sirius) மற்றும் அகஸ்தி என்ற கனோபஸுக்கு (Canopus) அடுத்ததாக மூன்றாவது (3) இடத்தில் உள்ளன. இரண்டு உடுக்களுக்கும் ஏறக்குறைய சமவயது. அவை  சுமார் 4.85 பில்லியன் ஆண்டுகள் பழமையானவை என்று நம்பப்படுகிறது,  அவை நமது சூரியனுக்கு மிக அருகில் உள்ளன.

    24 ஆகஸ்ட் 2016  அன்று  ஆல்பா சென்டூரி பல்லுறுப்பு உடு அமைப்புக்கு (multiple star system) ப்ராக்ஸிமா சென்டூரி b (Proxima Centauri  b) என்ற ஒரு கோள் மட்டுமே உறுதிப்படுத்தப்பட்டது.   பூமிக்கு மிக நெருக்கமான புவியொத்த கோளான ப்ராக்ஸிமா சென்டூரி b (Proxima Centauri  b) ஆல்பா சென்டூரி C உடுவைச் சுற்றி வருவது உறுதி செய்யப்பட்டது. இது பூமியை விட சற்றே பெரியது, மேலும் அதன் வாழக்கூடிய மண்டலத்தில் ப்ராக்ஸிமா சென்டூரியைச் சுற்றி வருகிறது. ப்ராக்ஸிமா செண்டூரி b  வேறுவகையில் ஆல்பா சென்டூரி Cb என்றும் அழைக்கப்படுகிறது. இக் கோளின் மதிப்பிடப்பட்ட நிறை பூமியைப் போல 1.3 மடங்காக உள்ளது. இக் கோள் ஆல்பா சென்டூரி C உடுவைச்  சுமார் 11.2 புவி நாட்கள்  கொண்ட சுற்றுக் காலத்துடன் சுமார் 0.05 வானியல் தொலைவில் (AU) அதாவது 7.5 மில்லியன் கிமீ தூரத்தில் சுற்றி வருகிறது.

    மீண்டும் தற்போது கடந்த  2 ஜூன் 2020 அன்று மெக்டொனால்டு வானியல் ஆய்வகத்தில் (McDonald Observatory) உள்ள வானியலாளர்கள் இரண்டாவது கோளை உறுதிப்படுத்தியுள்ளனர். இது பூமியை விட ஏழு (7) மடங்கு பெரியது.  இதற்கு ப்ராக்ஸிமா சென்டூரி c (Proxima Centauri  c) அல்லது ஆல்பா சென்டூரி Cc என்று பெயரிடப்பட்டுள்ளது.

    ப்ராக்ஸிமா செண்டூரிக்கான இந்த இரண்டாவது கோள் பூமியை விட மிகப் பெரியது மற்றும்  1,907 நாட்களில் அதனுடைய தாய் உடுவான ப்ராக்ஸிமா சென்டூரியைச் சுற்றி வருகிறது. இது பூமி சூரியனைச் சுற்றி வரும் தொலைவை போல் அதனுடைய உடுவைச் சுமார் 1.5 மடங்கு தூரத்தில் சுற்றுகிறது.  இதனை ஒரு முக்கியமான வேறுபாடு என்று கருத இயலாது என்றாலும் ப்ராக்ஸிமா செண்டூரி ஒரு சிவப்புக் குள்ள உடு ((Red dwarf star). நமது சூரியனை விடச் சிறியது மற்றும் குளிரானது, எனவே அந்த தூரத்தில், கோளானது பூமியை விடக் கணிசமாக அளவுக்குக் குளிராக இருக்கும் என்று எதிர்பார்க்கலாம். புதிய இந்தக் கோள் குறித்த கட்டுரையை விரிவாகப் பின்னர் எழுதுகிறேன்.

    (2) பீட்டா சென்டூரி (β Centauri) என்ற ஹதர் (Hadar) அல்லது ஏஜெனா (Agena) 

    பீட்டா சென்டூரி (β Centauri) ஒரு நீல – வெள்ளை ராட்சத உடு (giant star), 348.83 ஒளி ஆண்டுகள் தொலைவில் உள்ளது. இதன்  தோற்றப் பொலிவு எண் + 0.6 மதிப்புடையது. இது இரவு வானத்தில் பதினோராவது (11) பொலிவான உடுவாகும். இது நிறமாலை வகுப்பு B1III ச் சேர்ந்தது.

    பீட்டா சென்டூரி ஒரு இருமை உடு, பொலிவான கூறிலிருந்து துணை உடுவானது 1.3 வில் விநாடிகளால் (Arc seconds) பிரிக்கப்பட்டுள்ளது. பொவிவான உடு ஹதர் A (Hadar – A) அல்லது பீட்டா சென்டூரி A ஒரு நிறமாலை இருமை உடு (Binary Star). ஹதர் A யானது, 357 நாட்கள் சுற்றுக் காலத்தைக் கொண்ட ஒரு ஜோடி ஒத்த நட்சத்திரங்களைக் கொண்டது. இந்த இரு உடுக்களில் குறைந்தது ஒன்று பீட்டா செஃபி வகை (Beta Cephei type variable) மாறியாக இருக்க வேண்டும். அதன் மேற்பரப்பின் துடிப்புகளின் விளைவாக அதன் பொலிவு  மாறுபடும். ஹதர் B (Hadar – B) முதன்மைச் சோடியை 250 நாட்கள் காலத்தில் சுற்றி வருகிறது.

    அடுத்துவரும் உடுக்கள் நமக்கு அத்தனை முக்கியமானவை இல்லை என்றாலும் கட்டுரையின் முழுமைக்காகக் குறிப்பிட்ட சில உடுக்கள் குறித்துக் குறைவான  விவரங்களே தரப்பட்டுள்ளன.

    (3) மென்கென்ட் (Menkent) அல்லது ஹரடன் (Haratan) என்னும் தீட்டா சென்டூரி (θ Centauri)

    மென்கென்ட் அதாவது சென்டூரின் தோள்  என்று பொருள் தரும் பாரம்பரிய அரபிப் பெயரைக் கொண்ட தீட்டா சென்டாரி சில நேரங்களில் ஹரடன் என்றும் அழைக்கப்படுகிறது. இது ஒரு ஆரஞ்சு K – வகை ராட்சத (Giant) உடுவாகும். சுமார் 60.9 ஒளி ஆண்டுகள் தொலைவில் உள்ள இதனுடைய நிறமாலைப் பிரிவு  K0IIIb. இந்த உடுவின் தோற்றப் பொலிவெண் +2.06.

    (4) முஹ்லிஃபைன் (Muhlifain) என்ற காமா சென்டூரி (γ Centauri)

    காமா சென்டூரி என்பது ஈருமை உடுவாகும், இது நிறமாலை வகை A0 ஐச் சேர்ந்த இரண்டு உடுக்களைக் கொண்டது, ஒவ்வொன்றின் தோற்றப் பொலிவெண் மதிப்பு +2.9. இந்த அமைப்பு பூமியிலிருந்து 130 ஒளி ஆண்டுகள் தொலைவில் உள்ளது, மேலும் இது 2.2 அளவைக் கொண்டுள்ளது. இரண்டு உடுக்களின் இணைந்த தோற்றப் பொலிவெண்ணின் மதிப்பு +2.2.  ஒன்றையொன்று 83 வருடங்களுக்கு ஒரு முறை   சுற்றி வருகின்றன.

    (5) எப்சிலன் சென்டூரி (ε Centauri) 

    எப்சிலன் சென்டூரி சுமார் 380 ஒளி ஆண்டுகள் தொலைவில் உள்ளது. இது  நிறமாலைப் பிரிவு  B1III ஐச் சேர்ந்த ஒரு நீல – வெள்ளை ராட்சத உடுவாகும்.. இது ஒரு பீட்டா செஃபி (Beta Cephei type variable)  வகை மாறி நட்சத்திரம். அதன் மேற்பரப்பின் துடிப்புகளின் விளைவாக பொலிவில் மாறுபாடுகளை வெளிப்படுத்துகிறது. பொலிவு மதிப்பு 2.29 முதல் 2.31 வரை மாறுபடும். இதன் சராசரி தோற்றப் பொலிவின் மதிப்பு 2.29    .

    (6) ஈட்டா சென்டூரி (η Centauri)

    ஈட்டா சென்டாரி 30 ஒளி ஆண்டுகள் தொலைவில் உள்ள தோற்றப் பொலிவெண் மதிப்பு + 2.33  கொண்டதோர் உடுவாகும். ஈட்டா சென்டூரி மிகவும் சூடான  B வகைக் குள்ளன் (Dwarf), 20 மில்லியன் ஆண்டுகளுக்கு குறைவான வயதுடையது. இது ஒரு B (e) வகையான நட்சத்திரம், அதாவது  மாறக் கூடிய நிறமாலை வரிக் கோட்டு உமிழ்வை அதன் ஹைட்ரஜன் நிறமாலைக் கோடுகளில் வெளிப்படுத்துகிறது. இது காமா காசியோபியா (Gamma Cassiopeiae type variable) வகை மாறி அல்லது கூடுவகைஉடு என்றும் வகைப்படுத்தப்படுகிறது. இது தனது நடுக்கோட்டில் (equator) அதைச் சுற்றியுள்ள வாயு வட்டுடன் வேகமாகச் சுழலும் உடு என்று சொல்லலாம். இந்த உடு நடுக்கோட்டில்  வினாடிக்கு 310 கிலோமீட்டர் வேகத்துடன் சுழலும்.  அதன் சுழற்சிக் காலம் ஒரு நாளுக்கும் குறைவாகவே இருக்கும்.

    (7) அல்னைர் (Alnair) என்னும் ஜீட்டா சென்டூரி (ζ Centauri) 

    தோற்றப் பொலிவெண் மதிப்பு +2.55 கொண்டஜீட்டா சென்டூரி ஒரு நிறமாலை இருமை உடுவாகும். இது சுமார் 385 ஒளி ஆண்டுகள் தொலைவில் உள்ளது. உடுவின் பாரம்பரிய பெயர், அல்னைர் (Alnair), அரபு சொற்றொடரான ​​நயீர் பதான் குவாண்ட்ரிஸிலிருந்து (Nayyir Badan Qanṭūris) பெறப்பட்டது, இதன் பொருள் “சென்டாரின் உடலின் பொலிவானஉடு” (bright star of the body of the Centaur) என்பதாகும். அல்னெய்ரின்  நிறமாலைப் பிரிவு B 2.5 IV . இது எட்டு நாட்களுக்கு சற்று அதிகமான சுற்றுக் காலத்தைக் கொண்டுள்ளது.

    (8) மா வீ  (Ma Wei)  என்ற டெல்டா சென்டூரி (δ Centauri) 

    டெல்டா சென்டூரி சுமார் 395 ஒளி ஆண்டுகள் தொலைவில் உள்ளது. இது காமா காசியோபியா வகை மாறி (Gamma Cassiopeiae type variable) என வகைப்படுத்தப்பட்டுள்ளது. இதன் பொலிவு 2.51 மற்றும் 2.65 க்கு இடையில் மாறுபடுகிறது. ஒரு B(e) வகையான உடு. B – வகையைச் சேர்ந்த நட்சத்திரமான இது B 2 IV வகுப்பைச் சேர்ந்தது, மா வீ என்ற பெயர் சீனப் பெயரான மா வீ சான் (Ma Wei san) என்பதிலிருந்து வந்தது. இதன் பொருள் “குதிரையின் வாலின் மூன்றாம் நட்சத்திரம் (Third Star of Horse’s Tail). இது டெல்டா செண்டூரி G மற்றும் ரோ (Rho) சென்டூரியுடன் சேர்ந்து ஒரு வானியல் தோற்றக் (asterism) குறிப்பைத் தருகிறது.

    (9) நு சென்டூரி (ν Centauri) 

    நு சென்டூரி பூமியிலிருந்து சுமார் 475 ஒளி ஆண்டுகள் தொலைவில் அமைந்துள்ளது. நட்சத்திரம் பீட்டா செஃபி வகை மாறி என வகைப்படுத்தப்பட்டுள்ளது, அதன் மேற்பரப்பின் துடிப்புகளுக்கு ஒளிர்வு ஏற்ற இறக்கங்கள் உள்ளன. என்பது நீல – வெள்ளைத் துணைக் குள்ளன் (sub giant) நிறமாலை வகை B 2 IV ஆகும்.

    இது ஒரு சுழலும் நீள்வட்ட மாறி நட்சத்திரம் (rotating ellipsoidal variable star) என்றும் வகைப்படுத்தப்படுகிறது. இதன் சராசரி தோற்றப் பொலிவெண் 3.41 ஆகும். இதன்பொலிவு 3.38 முதல் 3.41 வரை 2.62 நாட்கள் மாறுபடும். இது ஒரு நெருக்கமான இருமை உடு. இதன் கூறுகள் நீள்வட்டமாக உள்ளன, பார்வையாளருக்கு தெரியும் ஒளி உமிழும் பகுதியின் அளவின் மாற்றங்களின் விளைவாகப் பொலிவில் மாறுபாடுகள் ஏற்படுகின்றன. கன்னி ராசியில் பிரகாசமான நட்சத்திரமான சித்திரையும் (Spica) வானத்தில் பிரகாசிக்கும் சுழலும் நீள்வட்ட நட்சத்திரமாகும்.

    (10) கே குவான் (Ke Kwan) என்னும் கப்பா சென்டூரி (κ Centauri)   

    கப்பா சென்டூரி சுமார் 540 ஒளி ஆண்டுகள் தொலைவில் உள்ள ஒரு இருமை உடு.  இது நிறமாலை வகை B 2 IV க்கு உரியது. பொலிவான கூறு ஒரு நீல-வெள்ளை  B – வகை துணை இராட்சத (sub giant) உடு ஆகும். இது தோற்றப் பொலிவெண் + 3.13 ஆகும். இதன் ஒரு நிறமாலைத் துணை 0.12 வில் விநாடிகள் (arc seconds) தொலைவில் அமைந்துள்ளது.

    கப்பா சென்டாரி சில சமயங்களில் அதன் சீனப் பெயரான கே குவான் (Ke Kwan) என்பவரால் அறியப்படுகிறது, இது கு குன் சான் (Qí Guān sān) என்ற சொற்றொடரிலிருந்து பெறப்பட்டது, இதன் பொருள் மேன்மை பொருந்திய காவலர்களின் மூன்றாவது உடு (Third Star of Imperial Guards) என்பதாகும்.

    இது தவிர 225 ஆழ் வான் பொருட்கள் (Deep Sky Objects) சென்டரஸ் உடுத் தொகுப்பில் காணப்படுகின்றன. ஆழமான வானப் பொருள்கள்  அல்லது ஆழ் வான் பொருட்கள் என்பவை நமது சூரிய மண்டலத்திற்கு வெளியே இருக்கும் வானப் பொருள்கள். ஆழமான வான பொருட்களின் மூன்று முக்கிய வகைகள் உள்ளன. அவை நெபுலாக்கள் (Nebulae),  திறந்த மற்றும் கோளக உடுக் கொத்துகள் (Open and Globular star clusters ) மற்றும் விண்மீன் திரள்கள் (Galaxies) ஆகும். அவற்றில் 20 ஆழ் வான் பொருட்கள் பொலிவானவை. அவற்றின் பட்டியல் கடைசியில் தரப்பட்டுள்ளது.

    நெபுலா என்பது விண்வெளியில் தூசி மற்றும் வாயுவால் ஆன பெரிய மேகம். சில நெபுலாக்கள் (ஒன்றுக்கு மேற்பட்ட நெபுலாக்கள்) ஒரு சூப்பர்நோவா போன்ற இறக்கும் நட்சத்திரத்தின் வெடிப்பால் வெளியேற்றப்படும் வாயு மற்றும் தூசியிலிருந்து வருகின்றன.

    திறந்த மற்றும் கோளக உடுக் கொத்துகள் (Open and Globular star clusters ) 

    திறந்த உடுக் கொத்துகள்  (Open star clusters ) கோளக கொத்துக்களை (Globular star clusters ) விட மிகவும் வயதிலும், எண்ணிக்கையிலும் குறைந்தவை. அவை தூசி மற்றும் வாயு மேகங்களிலிருந்து உருவாகும் புதிய உடுக்களின் சமீபத்திய பிறப்பிடங்களாகும். மேலும் அவை நூற்றுக்கணக்கான அல்லது ஆயிரக்கணக்கான உடுக்களை மட்டுமே கொண்டிருக்கின்றன. ஒரு திறந்த உடுக் கொத்தில் உள்ள உடுக்கள்  அனைத்தும் ஒரே பொருளிலிருந்து ஒன்றாக உருவாகியிருப்பினும் அவை காலப்போக்கில் ஈர்ப்பு விசையுடன் பிணைக்கப்பட்டு பரவுவதில்லை. ஆகவே அவற்றின் உடுக்கள் வெகுதூரம் சிதறிக் கிடக்கின்றன. அவை ஈர்ப்பு விசையில் பிணைக்கப்படாததால், திறந்த உடுக் கொத்துகள் சீரற்ற மற்றும் ஒழுங்கற்ற வடிவங்களைக் கொண்டிருக்கலாம். அவை நமது  பால்வீதி உடுத் திரளின் தளத்தில், உள்ள வாயு மற்றும் தூசி இருக்கும் சுழல் கரங்களில் காணப்படுகின்றன. திறந்த உடுக் கொத்துகள் இளமையானவையாகவும், குறைந்த ஆயுட்காலம் கொண்டவையாக இருப்பதால், வானியலாளர்கள் நமது விண்மீன் மண்டலத்தில் பொருட்கள் எவ்வாறு பரவுகிறது என்பதற்கான இயக்கவியலை அறியவும் மற்றும் இளம் உடுக்களையும், உடு உருவாக்கத்தின் செயல்முறைகளையும் ஆய்வு செய்யவும் இவற்றைப் பயன்படுத்துகின்றனர்.

    கோள உடுக் கொத்துகள் என்பவை வயதான உடுக்களின்  கொத்துக்கள். இவை ஈர்ப்பு விசையால் இறுக்கமாகப் பிணைக்கப்பட்டுள்ளன. இந்தக் கொத்துகள் பொதுவாகத் தோராயமாக கோள வடிவமாக இருக்கும், இவற்றின் எண்ணிகை சில ஆயிரம் முதல் ஒரு மில்லியன் நட்சத்திரங்கள் வரை எவ்வளவு வேண்டுமானாலும் இருக்கலாம். ஆகவே அவை மேலே, கீழே, மற்றும்  தட்டையான, வட்டு வடிவ பால்வீதியின் தளத்தில் பரவியுள்ளன. கோளக உடுக் கொத்துகளின் வயது பொதுவாகச் சுமார் 13 பில்லியன் ஆண்டுகள் என்ற அளவில் உள்ள பழம் பெருச்சாளிகள். அதாவது கோளக உடுக் கொத்துகள் நமது பால்வழி உடுத் திரளின்  மிகப் பழமையான சில உடுக்களைக் கொண்டுள்ளன. கோளக உடுக் கொத்துகள் உருவாகும்போது பால்வழி உடுத் திரள் எப்படி இருந்தது என்ற நமது  உடுத் திரளின் ஆரம்பகால வரலாற்றை அறிந்து கொள்ள. வானியலாளர்கள் கோளக உடுக் கொத்துகளைப் பெரிதும் பயன்படுத்துகிறார்கள்.

    எளிய வார்த்தைகளில் சுருக்கமாகச் சொல்லப் போனால் திறந்த கொத்துகள் என்பவை இளைஞர் விடுதிகள் (Youth Hostels). கோளகக் கொத்துகள் முதியோர் இல்லங்கள் (Old age homes). வயதானவர்களைக் கூட்டமாக அதிக எண்ணிகையில் நாம் பொதுவாக கோவில் போன்ற வழிபாட்டுத் தலங்களில், ஆன்மீகக் கூட்டங்கள் நடக்கும் இடங்களில் காண முடியும். அவர்களைக் கஃபே காஃபி டே Cafe coffee Day) அல்லது பப்களில் (Pub) காண இயலாது. அதே போல் இளைஞர்களைக் கூட்டமாகச் சத்ஸங்கங்களிலோ அல்லது ஆலயங்களிலோ காண்பது அரிது. ஆனால்அவர்களைச் சிறு சிறு குழுக்களாகக் கஃபே காஃபி டே Cafe coffee Day) அல்லது பப்களில் (Pub) காண  முடியும். அது போலக் கோளக உடுக் கொத்துகள் நமது உடுத் திரளின் உப்பலான (Bulged) ஒளிவட்ட(Halo) நடுப்பகுதியில் காணப்படுகின்றன. பால்வீதி உடுத் திரளின் தளத்தில், உள்ள வாயு மற்றும் தூசி இருக்கும் சுழல் கரங்களில் திறந்த உடுக் கொத்துகள் காணப்படுகின்றன.

    உடுத் திரள்கள்  என்பவை உடுக்கள், தூசி மற்றும் வாயுக்களின் மிகப்பெரிய தொகுப்பாகும். உடுத் திரள்கள் பொதுவாகப் பல மில்லியனிலிருந்து ஒரு டிரில்லியனுக்கும் அதிகமான உடுக்களைக் கொண்டிருக்கின்றன. இவற்றின் அளவு சில ஆயிரம் முதல் பல லட்சம் ஒளி ஆண்டுகள் வரை இருக்கும். அண்டத்தில் நூற்றுக்கணக்கான பில்லியன் உடுத் திரள்கள் உள்ளன. உடுத்திரள்கள் பல அளவுகளில், வடிவங்கள் மற்றும் பொலிவுகளில் காணப்படுகின்றன. உடுக்களைப் போலவே இவையும் தனியாகவும், சோடிகளாகவும் அல்லது கொத்துகள் எனப்படும் பெரிய குழுக்களாகவும் காணப்படுகின்றன. சுருள் வடிவ, நீள்வட்ட மற்றும் ஒழுங்கற்ற உடுத் திரள்கள் என்று அடிப்படையாக மூன்று வகைகளாகப் பிரிக்கப்படுகின்றன.

    (1) IC 2944 லாம்டா சென்டூரி நெபுலா (Lambda Centauri Nebula)

    (2) NGC 3766 பேர்ல் கொத்து – திறந்த உடுக் கொத்து (Pearl Cluster – Open Cluster)

    (3) NGC 5139 ஒமேகா சென்டூரி – கோளக உடுக் கொத்து (Omega Centauri – Globular Cluster)

    (4) NGC 5138 – திறந்த உடுக் கொத்து (Open Cluster)

    (5) NGC 5662 – திறந்த உடுக் கொத்து (Open Cluster)

    (6) NGC 5460 – திறந்த உடுக் கொத்து (Open Cluster)

    (7) NGC 5281 – திறந்த உடுக் கொத்து (Open Cluster)

    (8) NGC 5316 – திறந்த உடுக் கொத்து (Open Cluster)

    (9) NGC 5617 – திறந்த உடுக் கொத்து (Open Cluster)

    (10) NGC 5128 சென்டரஸ் -A (Centaurus A) – இருகுவி வில்லை வடிவ உடுத் திரள் ( Lenticular Galaxy)

    (11) NGC 3680 – திறந்த உடுக் கொத்து (Open Cluster)

    (12) NGC 5606 – திறந்த உடுக் கொத்து (Open Cluster)

    (13) NGC 3918 –  கோள் நெபுலா (Planetary Nebula)

    (14) NGC 3960 – திறந்த உடுக் கொத்து (Open Cluster)

    (15) NGC 5286 – கோளக உடுக் கொத்து (Globular Cluster)

    (16) NGC 4852 – திறந்த உடுக் கொத்து (Open Cluster)

    (17) NGC 5168 – திறந்த உடுக் கொத்து (Open Cluster)

    (18) NGC 4230 – திறந்த உடுக் கொத்து (Open Cluster)

    (19) NGC 5102 – நீள்வட்ட/ சுருள் உடுத்திரள் (Elliptical/Spiral Galaxy)

    (20) IC 4291 – திறந்த உடுக் கொத்து (Open Cluster)

    மீண்டும் சந்திப்போம்.

    Share
  • அக இலக்கியச் சிறுபாத்திரங்கள்- 3 (ஆயம்)

    அக இலக்கியச் சிறுபாத்திரங்கள்- 3 (ஆயம்)

    ச. கண்மணி கணேசன் (ஓய்வு)
    முதல்வர் & தமிழ்த்துறைத்  தலைவர்,
    ஸ்ரீகாளீஸ்வரி கல்லூரி, சிவகாசி. 

    முன்னுரை

    அக இலக்கியச் சிறுபாத்திரங்களுள் தலைவியுடன் பெரிதும் தொடர்புறும் நெருக்கமான குழுப்பாத்திரம் ‘ஆயம்’ ஆகும். ஆயம் பற்றிய குறிப்புகள் புறப்பாடல்களிலும் காணப்படுகின்றன.

    ஆயம் என்னும் சொல்லின் பொருட்பரிமாணம்

    ஆயம் எனும் சொல் ‘நெருங்கிய சுற்றம்’ எனப் பொருள்படும். இது  உயர்திணை, அஃறிணை; ஆண்பால், பெண்பால், பலர்பால் அனைத்திற்கும் பொதுவானது.       .

    தொகை நூல்கள் ஆநிரையை ஆயம் என்கின்றன (புறம்.- பா- 224, 230, 258, 386; அகம்.- 54, 79, 291; நற்.- 37; மதுரைக்.- அடி- 692). ஆட்டுக் கூட்டம்  ‘சிறுதலை ஆயம்’ எனப்படுவது உண்டு (புறம்.- 54). பிடியும், கன்றும் கூடிய களிற்றுக் கூட்டமும் ‘ஆயம்’ ஆகும் (மதுரைக்.- அடி- 101).

    மகளிர் கூட்டத்தை ‘ஆயம்’ என்பர் (மதுரைக்.- அடி- 264). கூடலூர் கிழார் யானைக்கட்சேய் மாந்தரன் சேரல் இறந்த போது அவனது மகளிரை ‘ஆயம்’ என்றழைக்கிறார் (புறம்.- 229). பாணர் குழுவின் விறலியர் ஆயம் எனப்படுவர் (சிறு.- அடி- 176). வண்டல் ஆடும் மகளிர் ஆயம் என்றழைக்கப்  படுகின்றனர் (பெரும்.- அடி- 311). பல்வேறு நாடுகளைச் சேர்ந்த மக்கட்  கூட்டமும் ‘பல்லாயம்’ என்றழைக்கப்படும் (பட்டினப்.- அடி- 213). கரிகாற் பெருவளத்தானுக்குத் துணையாக இருந்த வீரர் ‘ஆயம்’ என்றே சுட்டப் படுகின்றனர் (புறம்.- 224). அவனது அவையத்து ஆயம் பற்றி ஆற்றுப்படை குறிப்பிடுகிறது (பொருநர்.- அடி- 123). நல்லியக்கோடனின் அவையில் ஆயம் சூழ்ந்திருந்தது (சிறு.- அடி- 220). வெளிமான் இறந்த பின்னர் அவனது பெண்டிர் ‘பேஎ யாயம்’ ஆகின்றனர் (புறம்.- 238). தொடித்தலை விழுத்தண்டினார் இளமையில் தன்னோடு சேர்ந்து ஆடிய நண்பர் கூட்டத்தை ‘ஆயம்’ எனச் சுட்டுகிறார் (புறம்.- 243).

    ஆயத்தார் எனப் பன்மை விகுதியுடனும் குறிப்பிடக்  காண்கிறோம் (பரி.- 16; கலித்.- 76, 114, 142).

    தலைவியின் ஆயம் = விளையாட்டுச் சுற்றம்

    தலைவியுடன் விளையாடும்; அவளை ஒத்த நெருங்கிய சுற்றம் ஆயம் ஆதலால்; ‘கலிகொள் ஆயம் (அகம்.- 11), ‘அலமரல் ஆயம்’ (அகம்.- 7) ‘கணங்கொள் ஆயம்’ (அகம்.- 250), ‘தன்னோரன்ன ஆயம்’ (அகம்.- 385), ‘விளையாட்டு ஆயம்’ (அகம்.- 254, 230; நற்.- 68, 172) என்றெல்லாம் அழைக்கப்படுகிறது.

    நெய்தல் நிலத்தலைவி ‘கானல் ஆய’த்துடன் சேர்ந்து (அகம்.- 220; நற்.- 72, 123) கழங்கு ஆடுவாள் (அகம்.- 17, 66); நண்டுக்குழிகளைக் கிண்டி; ஊஞ்சல்  ஆடிக்; குரவை அயர்ந்து; கடல்நீரில் ஆடுவாள் (அகம்.- 20, 110; நற்.- 90). மண்ணில் ஆடுவதால் ‘வண்டல் ஆயம்’ என்றழைக்கப்பட்ட அவர் (அகம்.- 60; நற்.- 127); பந்தும் ஆடுவர் (அகம்.- 153, 180& 219; நற்.- 140). உணங்க வைத்த மீன் குவியலுக்குக் காவலாக இருந்துகொண்டு உப்பு வண்டிகளை எண்ணுவர் (நற்.- 331). காலையில் உப்புக் குவியலில் ஏறி; மீன்பிடித்து மீண்டு வரும் திமில்களுள் ‘இது என் தந்தை திமில்; அது உன் தந்தை திமில்’ என்று அடையாளம் கண்டு எண்ணுவர் (அகம்.- 190). பன்றி கிண்டிய இருஞ்சேற்றைக் கிளறி; ஆமை முட்டையையும், இனிய ஆம்பல் கிழங்கையும் பெறுவர் (புறம்.- 176).

    குறிஞ்சி நிலத் தலைவி ஆயத்தோடு சேர்ந்து தழல் ஒலித்து; தட்டை முழக்கி; அசோகந் தளிரால் தழையாடை தைத்து உடுத்து; தினைப்புனம் காப்பாள் (அகம்.- 188); சுனை நீராடிக் (அகம்.- 358); குவளைப் பூக்களைப் பறிப்பாள் (நற்.- 317). அருவி ஆடுவதும் உண்டு (நற்.- 44).

    மருதத் திணைத் தலைவி ஆயத்தோடு சேர்ந்து பொய்கையில் பூப் பறித்து விளையாடுவாள் (நற்.- 115). மன்னன் மகளாகிய தலைவிக்கு விளையாட்டின் இடையில் சினம் வந்தால் ஆயம் அவளைக் கைதொழுது இரந்து நிற்பதுண்டு (நற்.- 300).

    தாய் தனது பெதும்பைப் பருவத்து மகள் ஆயத்தோடு விளையாடும்  பொழுதெல்லாம் அவளைத் தொடர்ந்து கண்காணிக்கிறாள் என்பது அவளது வாய்மொழியாகவே இடம் பெறுகிறது (அகம்.- 49; நற்.- 68, 143).

    தலைவி ஆயத்தின் தோற்றம்:

    தலைவியோடு ஒத்த வயதினர் ஆகையால்; அவரது தோற்றமும் ஒத்த தன்மை உடையதாக வருணிக்கப்பட்டுள்ளது. “வடிக்கொள் கூழை ஆயம்” (நற்.- 23) என வாரிக் கட்டிய அவரது தலைமுடி புனைவு பெற்று உள்ளது. ஐந்துவகையாக ஒப்பனை செய்யக்கூடிய ஐம்பாலெனும்  தலைமுடியை மயிர்ச்சாந்தம் பூசி அழகுறுத்த; அச்சாந்தம் புலர்ந்து  உதிர்ந்தது;

    “சிறுகோல் இணர பெருந்தண் சாந்தம்
    வகைசேர் ஐம்பால் தகைபெற வாரிப்
    புலர்விடத்து உதிர்ந்த துகள்படு கூழைப்
    பெருங்கண் ஆயம்” (நற்.- 140)

    என விரிவாகவே ஆயத்தின் தோற்றம் இடம்பெற்று உள்ளது. “இழையணி ஆயம்” (நற்.- 80) என்றும் “ஆயத்து ஒண்டொடி மகளிர்” (புறம்.- 176) என்றும் அவர்கள் அணிந்த கலன்களும் அவருடன் சேர்த்துப் பேசப்பட்டுள்ளன.

    ஆயத்தின் உணர்வுச் சித்தரிப்பு 

    ஆயத்திற்கு கூற்று நிகழ்த்தும் உரிமையில்லை. இரவுக்குறிக்குத் துணைசெய்யும் தோழி ஆயம் அறியாவாறு இருவரையும்  சந்திக்க வைக்கிறாள் (நற்.- 323).

    தலைவி உடன்போகிய பின்னர் ஆயத்தார்  எவ்வாறு துன்புற்றனர் என்று மகட்போக்கிய தாய் கூறுகிறாள்.

    “ஆயமும் அணியிழந்து அழுங்கின்று” (அகம்.- 165; நற்.- 295).

    அவர் வாடி அழுததோடு விளையாட்டையும் மறந்தனர் (அகம்.- 369).

    உடன்போக்கில் தலைவனோடு செல்லத் தயங்கும் தலைவி பற்றித் தோழி அவனிடம் பேசுங்கால் ஆயத்தையே காரணம் காட்டுகிறாள்.

    “வைகுபுலர் விடியல் மெய்கரந்து தன்கால்
    அரியமை சிலம்பு கழீஇ பல்மாண்
    வரிபுனை பந்தொடு வைகிய செல்வோள்
    இவை காண்தொறும் நோவர் மாதோ
    அளியரோ அளியர் என் ஆயத்தோர் என”ப் (நற்.- 12);

    பொழுது புலருமுன் தன்னை மறைத்துக்கொண்டு; ஒலி எழாதவாறு செல்ல ஏதுவாகக் கால்களில் அணிந்திருந்த சிலம்பினை நீக்கியவள் அழகாகப் புனைந்த பந்தினைக் கண்டவுடன்; ‘என் விளையாட்டுத் தோழியர் இதைக் கண்டு மனம் வருந்துவர் அன்றோ’; எனப் பின்வாங்கியதாக   விவரிக்கும் சூழலில் ஆயத்தோடு தலைவிக்கிருந்த உணர்வு பூர்வமான நெருக்கம் புலப்படுகிறது. அடக்க மாட்டாமல் அழுத தலைவி என்பதால் ஆயத்திற்கும் தலைவிக்கும் இடையிலான அன்பின் பிணைப்பு தெரிகிறது. நிலைமை தலைவனுக்குச் சொல்லப்படுவதால்; அவன் நேரில் வந்து அவளைப்  பெண்கேட்டு மணக்க வேண்டும் என்று குறிப்பாகக் கூறுகிறாள் தோழி. குறிஞ்சியின் கூடல் நிமித்தமாகிய வரைவு கடாஅதலைச் செயல்படுத்த ஆயம் பயன்பட்டுள்ளது.

    மகட்போக்கிய தாய் ‘ஆயமும் உள்ளாள்’ எனத்; தன்மகள் நெருங்கிய விளையாட்டுச் சுற்றத்தைக் கூட நினைத்துப் பார்க்காமல் போய்விட்டாள்  என அழுது புலம்புவதற்கு (அகம்.- 117) அவர்க்கு இடையில் இருந்த அன்புப் பிணைப்பே காரணமாகும்.

    ஆயத்தைக் காணும் தாயின் உணர்வு 

    மகள் பிரிந்து சென்ற பின்னர் பூங்கண் ஆயத்தைக் கண்ட பொழுதெல்லாம் மிகுந்த துன்பத்திற்கு ஆளாகிறாள் தாய் (நற்.- 143, 293).

    கற்புக்காலத்தில் ஆயம் கொண்ட அக்கறை

    புறத்தொழுக்கத்தால் ஊடல் கொண்ட தலைவி தன் கணவனை;

    “ஆயமும் அயலும் மருள” (அகம்.- 116)

    வாயில் மறுத்தாள் என்னுமிடத்து; மருட்சியின் காரணம் தலைவியது நலவாழ்வின் மேல் ஆயம் கொண்டிருந்த அக்கறை என்பது புலனாகிறது.

    தலைவன் இன்னொரு பெண்ணின் மேல் விருப்பு மீதுற்று ஒழுகினான் என்பதை ஆயத்துள் பேசத் தலைவியும் தோழியும் அறிந்து கொள்கின்றனர். ஆயம் பேசியதாகத் தோழி கூறுகிறாள்.

    “ஒண்டொடி ஆயத்துள்ளும் நீ நயந்து
    கொண்டனை என்ப ஓர் குறுமகள்” (அகம்.- 96)

    இவ்விடத்து ஆயம் நடப்பு உண்மையைத் தெரிவிக்கும் கருவி ஆகப் பயன்கொள்ளப் பட்டுள்ளது. மருதத்திணை உரிப்பொருளாகிய  ஊடல் நிமித்தத்திற்கும் ஆயம் காரியப்பொருள் ஆகிறது.

    ஆயத்தால் தலைவனின் அச்சமும் தலைவியின் ஐயமும்

    தலைவியோடு கூடியிருக்கும் வேளையில் தலைவன் ஆயத்தைக் காரணம் காட்டி; ‘அவர்க்குத் தெரிந்தால் கூட அலர் ஆகிவிடுமன்றோ’ எனத் தயங்கி விலகினான். தலைவிக்கு அவனது இச்செய்கை ஐயத்தை ஊட்டியது. தலைவியே அவன் பேசியதாகத் தோழியிடம் கூறுகிறாள்.

    “கானல் ஆயம் அறியினும் ஆனாது
    அலர் வந்தன்றுகொல் என்னும் அதனால்
    புலர்வது கொல் அவன் நட்பு எனா
    அஞ்சுவல் தோழி என் நெஞ்சத்தானே” (நற்.- 72)

    சிறைப்புறமாக நின்ற தலைவன் காதில் விழும் வண்ணம் நிகழும் கூற்று இது. தலைவனின் அன்பு சுருங்கியதோ என்று ஐயுற்ற தலைவிக்கு அந்த அன்பை அளந்து காட்டும் கருவி என்ற நிலையில் ஆயம் என்னும் சிறு  பாத்திரம் பயன்பட்டுள்ளது.

    தாயின் ஆயம்

    குடும்பத்தின் சொந்தபந்தம் தாயின் ஆயமாகும். உடன்போக்கின் பின்னர் தலைவியைத் தேடிச் செல்லும் ஆயம் பற்றி;

    “செய்போழ் வெட்டிப் பெய்தல் ஆயம்
    மாலைவிரி நிலவில் பெயர்பு புறம் காண்டற்கு” (நர்.- 271)

    என அவரது தொழிலும் செய்கையும் தோன்றத் தாய் விவரிக்கிறாள்.

    பனங்குருத்தைக் கீண்டு பதனிடப் போடும் மாலைப் பொழுதில் நிலவின்  ஒளியில் தாயின் ஆயம் தலைவியை மீட்கச் சென்றதென்கிறாள்.

    பரத்தையின் ஆயம்

    தலைவி மட்டுமின்றிப் பரத்தையின் சுற்றமும் ஆயம் என்றே அழைக்கப்படுகிறது. தலைவனோடு பரத்தை புனலாடியதை அவளது ஆயம் மறைக்க முற்பட்டது (அகம்.- 256)

    முடிவுரை

    நெருங்கிய சுற்றமாகிய ஆயம் தொல்காப்பிய அகப் பாத்திரங்களான  தலைவி; தாய், பரத்தை ஆகியோர்க்கு உண்டு. தலைவியின் ஆயம் ஒத்த வயதுடைய விளையாட்டுச் சுற்றம் ஆகும். தாயின் ஆயம் குடும்பத்தின் சொந்தபந்தம் ஆகும். பரத்தையின் ஆயம் அவளது செயல் தலைவிக்குத்  தெரியாதவாறு மறைத்துக் காப்பாற்ற முனையும். தலைவியும் ஆயமும் ஒத்த தோற்றத்தினாராக வருணிக்கப்பட்டு உள்ளனர். குழுப் பாத்திரமாகிய ஆயத்திற்கு பாடலில் நேரடியாகக் கூற்று நிகழ்த்தும் உரிமை இல்லை; கூறியதாகத் தோழி கூறுகிறாள். இரவுக்குறியில் தோழி ஆயம் அறியாவாறு இருவரையும்  சந்திக்க வைக்கிறாள். தலைவி உடன்போகிய பின்னர் ஆயம் மிகவும் துன்புறும். அவர்கட்கு இடையே அன்புப்பிணைப்பு இருந்தது. குறிஞ்சியின் கூடல் நிமித்தமாகிய வரைவு கடாஅதலைச் செயல்படுத்த ஆயம் பயன்பட்டது. மகள் பிரிந்து சென்ற பின்னர் தாய்  ஆயத்தைக் கண்ட பொழுதெல்லாம் துன்பத்திற்கு ஆளாகிறாள். தலைவியது நலவாழ்வின் மேல் ஆயத்திற்கு அக்கறை இருந்தது. ஊடலுக்கு ஆயம் காரியப்பொருள் ஆகிறது. ஆயம் தலைவனின் அன்பை அளக்கும் கருவியாகப் பயன்பட்டுள்ளது.

    Share
  • நண்பர் திலகம் பக்தவச்சலம்!

    நண்பர் திலகம் பக்தவச்சலம்!

    முனைவர் ஔவை நடராசன்

    பதறிப் பதறிப் கதறிப் புலம்பினாலும் பக்தவச்சலம் இனி மீளப் போவதில்லை. அறுபதாண்டுகளுக்கு மேலாக என் உயிரில் கலந்த நண்பராகத் திகழ்ந்த திலகம் பக்தவச்சலம்.

    என் வாழ்வின் அனைத்து நிலைகளிலும் அவர் பங்கு பெற்றவர். ஞாயிற்றுக்கிழமை மாலை சிறிதும் மனம் குலையாமல் எனக்கு ஆறுதல் சொல்லிப் பேசினார்.

    தாமரையால் இத்துயரத்தைத் தாங்கவே முடியாது. இலைகள் உதிர்வது இயல்பு. மலையா இப்படிச் சாய்வது? என் மனக் கலக்கத்தை எழுத முடியவில்லை.

    எண்ணினால், எண்பது பேருக்கு மேல் “எங்கே உங்கள் பக்தவச்சலம் எப்படி நீங்கள் இனி அவர் துணையில்லாமல் நிகழ்ச்சிகளில் பங்கு பெறுவீர்கள்?“ என்று கேட்டு என் மனத்தை வாட்டியபடி இருக்கிறார்கள்.

    அவர் மறைந்தார் அல்லர். கவிப்பேரரசு ஆறுதல் கூறியது போல, அவர் வாழ்வில் நிறைந்தார். நினைவில் நினைத்தபடி இருப்பார். கண்ணை மூடினால் அவர் தோற்றம்தான் தெரிகிறது.

    தொட்டுத் தொட்டு அன்பைக் கொட்டிக் கொட்டிப் பழகியவர். தன் மனத்துயரை மற்றவரிடம் அவர் பகிர்ந்ததேயில்லை. அவர் எது சொன்னாலும் நான் முரண்பட்டதில்லை.

    ஒய்.எம்.சி.ஏ. அரங்கம் ஓவென்று கதறுகிறது. எண்பதாம் ஆண்டு விழா இப்படிதானா நடப்பது? ஊரடங்கு உலகத்தையே கலக்கும்போது, பக்தவச்சலம் அடங்கியிருப்பது விழிமேல் இடிவிழுந்ததாக இருக்கிறது.

    தாமரையின் தடந்தோள்களை இங்கிருந்தபடியே தழுவிக்கொள்கிறேன். பட்டிமன்றத்தைச் சொற்கட்டி மன்றமாக நடத்திய வரலாற்றினைத் தாமரைதான் தொடர்ந்து எழுத வேண்டும்.

    என் ஏக்கத்துக்கு எல்லையில்லை.
    அழுவதற்குக் கண்ணீரில்லை.
    தேம்புகிற நெஞ்சத்துக்குப் போதிய உரமில்லை.

    Share
  • அக இலக்கியச் சிறுபாத்திரங்கள்- 2 (அறிவன்)

    அக இலக்கியச் சிறுபாத்திரங்கள்- 2 (அறிவன்)

    ச. கண்மணி கணேசன் (ஒய்வு),
    முதல்வர் & தமிழ்த்துறைத்தலைவர்,
    ஸ்ரீகாளீஸ்வரி கல்லூரி, சிவகாசி 

    முன்னுரை:

    சிறுபாத்திர வரிசையில் இரண்டாவதாக இடம்பெறக் கூடியது அறிவன் எனும் பாத்திரம். இப்பாத்திரம் யாரைக் குறிக்கிறது? என்பது பற்றியும்; தொகை நூல்களில் இப்பாத்திரம் பெறும் பரிமாணத்தையும் கூர்ந்து நோக்குவது இக்கட்டுரையின் மையப் பொருளாகும்.

    இலக்கண நூல்களில் அறிவன்:

    தொல்காப்பியர் சொல்லும் அகப்பொருள் இலக்கணம் ‘அறிவர்’ கூற்றிற்கு உரியவர் எனக் கற்பியலில் பேசுகிறது (நூற்பா.- 12&13). ஒரு துணைப்பாத்திரம் என்று சொல்லத்தக்க வகையில்; ‘முக்காலத்திற்கும் வழிவழியாக வரும் நல்லனவற்றை உரைத்தலும்; தீயனவற்றை விலக்கலும் செவிலிக்குரிய கூற்றாவது போல அறிவர்க்கும் உரியன’ என்கிறார் தொல்காப்பியர். இதனால் அறிவர் இல்லறத்தார்க்கு உரிய உறுதிப் பொருட்களை தக்க நேரத்தில் அவர்க்கு அறிவுறுத்துவர் என்பது பெறுகிறோம்.

    இது ‘அறிவர்’ என்று பன்மைப்படுத்தப்பட்ட பாத்திரத்திற்கு உரியதெனக் கூறப்படினும்; அறிவன் என்னும் தனிப்பாத்திரத்திற்கு உரிய இலக்கணமாக ஏற்றுக் கொள்வதிலும் தயக்கம் ஏற்பட வழியில்லை. தொல்காப்பியப் புறத்திணையியலும்;

    “மறுவில் செய்தி மூவகைக் காலமும்
    நெறியின் ஆற்றிய அறிவன்” (நூற்பா- 20)

    என அகத்திணையியல்  செய்தியோடு ஒத்துச் செல்வதைக் காண்கிறோம். .      புறப்பொருள் வெண்பாமாலையும் வாகைத்திணைத் துறைகளுள் ஒன்றான ‘அறிவன் வாகை’ பற்றிப் பேசும்போது;

    “புகழ் நுவல முக்காலமும்
    நிகழ்பு அறிபவன் இயல்புரைத்தன்று”

    என்பதால் அறிவன்  மூன்றுகால நிகழ்ச்சிகளையும் அறிந்துணர்ந்து கூறக்கூடியவன் என்பது  உறுதிப்படுகிறது.

    தொகைநூல்களில் உள்ள  புலனெறி வழக்கு:

    அறிவன் பேசுவதாகத் தொகைநூல்களில் பாடல்கள் இல்லை. ஆனால் சிறுபாத்திரம் என்னும் தகுதியுடன் ஒரு பாடலில் நேரடியாக (கலித்தொகை- 39) இடம்பெறுகிறான். அப்பாத்திரம் பெறும் சிறப்பிடத்தைக்  காணலாம்.

    கலித்தொகையில் அறிவன்:

    ஆற்று வெள்ளத்திற்கு ஆற்றாமல் இழுத்துச் செல்லப்பட்ட தலைவியை; அவ்வெள்ளத்துட் பாய்ந்து; உய்வித்துத் தன் மார்போடு தழுவிக் கரையேறினான்  தலைவன். பால்வயத்தான் ஏற்பட்ட உறவில் தலைவி அவனுக்குக் கற்புக்கடம் பூண்டாள். ஊரார் தூற்றினர்; தமர் வெகுண்டெழுந்தனர்; தோழி அறத்தொடு நின்றாள். தாய் தமரை உய்த்துணர வைத்தாள்; இருவரிடத்தும் குற்றம் இல்லை என்று தெளிந்து சீற்றம் அடங்கினர். ஊரறி நன்மணம் நிகழ வரையுறைத் தெய்வத்திற்குக் குரவை அயர்ந்தனர் தோழியர். இந்தச் சூழலில்;

    “நெறிஅறி செறிகுறி புரிதிரிபு அறியா அறிவனை முந்துறீஇத்
    தகைமிகு தொகைவகை அறியும் சான்றவர் இனமாக ………..
    சேயுயர் வெற்பனும் வந்தனன்….”

    என்கிறார் கபிலர். ‘நூல் நெறி அறிந்து; தான் குறித்துச் சொல்லும் நல்ல நேரம் ஒருபோதும் தப்பாத பெருமையுடைய கணியனை முற்பட அழைத்துக் கொண்டு; இருவரும் மணமுடித்துக் கூடுதற்கு ஏதுவான நல்ல முகூர்த்தத்தை முடிவு செய்ய; தம் இனத்துப் பெரியோராகிய சான்றவரோடு தலைவன் வந்தான்’ என்பது பொருள். இங்கே புலவர் அறிவன் காலத்தைக் கணிப்பவன் என்ற பொருள் விளக்கத்திற்கேற்பப் பாடியுள்ளார்.

    பாடலில் அறிவன் ஏதும் பேசவில்லை; எனினும் அவனது பாத்திரம் கூடல்நிமித்தம் எனும் குறிஞ்சி ஒழுக்கமாகிய உரிப்பொருளுக்கு ஏற்ற வழிவகை செய்யும் தனிச் சிறுபாத்திரம் ஆகும். அவனது கணிப்பு தப்பாது என்னும் பெருமை சான்ற புகழ்மொழி நோக்கத்தக்கது.

    இன்னொரு அறிவன்:

    குறுந்தொகை 277ம் பாட்டு தலைவி கூற்றாக அமைந்துள்ளது; எனினும் முன்னிலையார் யார் என்னும் செய்தி வெளிப்படையாக இல்லை. ஆனால் பாட்டின் பொருளை ஒட்டி முன்னால் நின்று கேட்பவன் அறிவன் என்று சொல்ல வழியேற்படுகிறது. அத்தலைவி;

    “மின்னிடை நடுங்கும் கடைப்பெயல் வாடை
    எக்கால் வருவது என்றி
    அக்கால் வருவர் எம் காதலோரே”

    எனத் தன் கணவன் வருவதாகச் சொல்லிச் சென்ற மழைக்கால முடிவின் வாடைக்காலம் எப்போது வரும் எனக் கேட்கிறாள்.

    ஓரில் பிச்சையார் என்று தொகுத்தோர் பெயரிட்ட புலவர்; தலைவி தன் முன்னின்றவரை வாழ்த்தும் முறையில் தனிச்சிறப்பு பெறுகிறார். ‘நாய் இல்லாத குற்றமற்ற அகன்ற தெருவில் ஒரு வீட்டிலேயே உன் வயிறு நிரம்பும் படியாக செந்நெல் வெண்சோறும் வெண்ணெயும் கிடைத்து நீ பசியாறுவாயாக; அத்துடன் இம்மழைக்காலக் குளிரினை எதிர்கொள்ளும் பொருட்டு விரும்பத்தக்க வெப்பநீரை உம் சேமச்செப்பு நிறையப் பெற்றுப் பயன் பெறுவீராக’ எனும் வியங்கோள் மூலம் தன் கணவன் வரும் காலத்தைக் கணக்கிட அறிவனின் உதவியை அவள் நாடுகிறாள் என்பது பொருத்தமாகப் படுகிறது. குறுந்தொகையைத் தொகுத்தோர்  தலைவி அறிவனிடம் பேசுவதாகவே கூறியுள்ளனர். இப்பாடலிலும் அறிவன் கூடல் நிமித்தத்திற்கு ஏற்ற வலுவூட்டும் பாத்திரமாகக் காணப்படுகிறான்.

    உதவி கேட்ட அவள் அவனுக்குப் பிச்சை இடவில்லை; மாறாக நாயில்லாத தெருவில் பிச்சையேற்று அவன் வயிறு நிறைய வேண்டும் என்று வாழ்த்துவது அக்காலச் சமூகநிலையையும் தெளிவுறுத்துகிறது. அறிவன் அந்தணர் இல்லத்தில் பிச்சையேற்று உண்பவன் என்பதே புலப்படும் குறிப்புப்பொருள்.

    பெரும்பாணாற்றுப்படை விவரிக்கும்; சாணம் மெழுகிய, கோழியும் நாயுமற்ற; மறைகாப்பாளர் உறைவிடத்தைக் (அடி.-  298- 301) குறுந்தொகைத் தலைவி குற்றமற்ற தெரு என்று சொல்வதாகக் கொள்வது பொருத்தமே. பெருமழைப் புலவர் பொ.வே.சோமசுந்தரனார் இதே கருத்தைக்  கூறிச் செல்கிறார். செவ்விலக்கியக் காலத்தில் தமிழ்ச் சமூகத்தில் நிலவிய சாதிவேறுபாடு ஓரில் பிச்சையாரின் பாடலில் கோடிட்டுக் காட்டப்படுகிறது.

    முடிவுரை:

    தொல்காப்பியர் அறிவனைத் துணைப்பாத்திரம் எனும் தகுதிக்கு உரியனாகக் கூறினாலும்; தொகைநூல்களில் அவன் சிறுபாத்திரமாகவே காணப்படுகிறான். அறிவன் காலத்தைக் கணிப்பவன் ஆவான். கூடல்நிமித்தம் எனும் குறிஞ்சி உரிப்பொருளுக்கு வழிவகை செய்யும் தனிப் பாத்திரமாகக் காணப்படுகிறான். அறிவர் அந்தணர்களின் இல்லத்தில் பிச்சையேற்று உண்டனர்.

    Share
  • கம்பனில் கண்டெடுத்த முத்துக்கள் – 2

    கம்பனில் கண்டெடுத்த முத்துக்கள் – 2

    -மேகலா இராமமூர்த்தி

    மானுடம் வெல்லவேண்டுமாயின் அது புலனொழுக்கத்தைக் கைக்கொள்ளவேண்டுமென்று விரும்பிய கம்பநாடர், தம் காப்பியத்தின் தொடக்கமாக அமைந்த பால காண்டத்தின் முதற்படலமான ஆற்றுப் படலத்திலேயே கோசலநாட்டு மக்களின் ஒழுக்கத்தைப் பற்றித்தான் பேசுகின்றார்.

    ஆசலம் புரி ஐம் பொறி வாளியும்
    காசு அலம்பும் முலையவர் கண் எனும்
    பூசல் அம்பும் நெறியின் புறம் செலாக்
    கோசலம் புனை ஆற்று அணி கூறுவாம்     (கம்ப: ஆற்றுப்படலம் – 12)

    பொதுவாக மனிதர்களைத் தம் ஒழுக்கத்திலிருந்து விலகச் செய்யும் ஐம்பொறிகள் எனும் அம்புகளும், பெண்களின் கண்களாகிய அம்புகளும் ஒழுக்கநெறியினின்று விலகிச் செல்லாத கோசல நாட்டை அணிசெய்கின்ற சரயு என்ற ஆற்றின் அழகினை நான் இப்போது கூறுகின்றேன் என்று ஆரம்பிக்கும் கம்பர், ஆற்று வருணனையைச் சாற்றுவதற்கு முன்பாகவே கோசல நாட்டு மக்களின் நல்லொழுக்கத்தைப் பேசுவதைக் காண்கையில் நிலவளத்தைவிடவும், நீர்வளத்தைவிடவும் மக்களின் குற்றமற்ற மனவளத்தையே பெரிதும் போற்றும் பெற்றியுடையவராய் அவர் திகழ்ந்தார் என்பது புலனாகின்றது.

    இவ்விடத்தில் பாட்டரசி ஔவையின் சங்கப் பாடலொன்றை நாம் பொருத்திப் பார்க்கலாம்.

    நாடா கொன்றோ காடா கொன்றோ
    அவலா கொன்றோ மிசையா கொன்றோ
    எவ்வழி நல்லவர் ஆடவர்
    அவ்வழி நல்லை வாழிய நிலனே.     (புறம்: 187– ஔவையார்)

    ”நிலமே நீ ஓரிடத்தில் நாடாகவும், மற்றோர் இடத்தில் காடாகவும், வேறோர் இடத்தில் கடலாகவும், பிறிதோர் இடத்தில் மலையாகவும் தோற்றமளிக்கின்றாய். ஆனால் நிலஅமைப்பின் அடிப்படையிலா நீ பெருமை பெறுகின்றாய்? இல்லை! எந்நிலத்து ஆடவர் நல்லவரோ அவ்விடத்தில் நீயும் சிறப்படைந்துவிடுகின்றாய்” என்கிறார்.

    பாட்டரசி, ஆடவரின் ஒழுக்கத்தாலேயே நிலம் சிறக்கும் என்று செப்ப, கவிச்சக்கரவர்த்தியோ இன்னும் ஒருபடி மேலேபோய் எங்கே ஆடவர் பெண்டிர் இருதிறத்தாரும் புலனொழுக்கத்தில் சிறந்திருக்கின்றனரோ அந்நிலமே சிறக்கும் என்றுரைத்து நிலத்தைச் சிறப்படையச் செய்வதில் பெண்டிருக்கும் பங்குண்டு என்பதைத் தெளிவுபடுத்திவிடுகின்றார்.

    அடுத்து, கோசலத்தை அணிசெய்யும் மாசற்ற சரயு எனும் ஆற்றின் தன்மை குறித்துப் பேசத் தொடங்குகின்றார்.

    இரவிதன் குலத்து எண்ணில் பல் வேந்தர்தம்
    பரவுநல் ஒழுக்கின் படிப் பூண்டது
    சரயு என்பது தாய் முலை அன்னது இவ்
    உரவுநீர் நிலத்து ஓங்கும் உயிர்க்கு எலாம்.      (கம்ப: ஆற்றுப்படலம் – 23)

    சூரிய குலத்தை ஆண்ட வேந்தர்கள் கணக்கற்றோர். அவர்கள் அனைவரிடமும் காணப்பட்ட பொதுப்பண்பு, உலகம் போற்றும் ஒழுக்கநலம் வாய்ந்தோராய் அவர்கள் அனைவருமே விளங்கியமையாகும். அவர்களைப் போன்றே போற்றத்தக்க நல்லொழுக்கினை மேற்கொண்ட சரயுவானது, கோசல நாட்டின் உயிரினங்கள் அனைத்திற்கும் பாலூட்டி வளர்க்கின்ற தாயின் முலைபோன்றதாகும். தாய்முலையானது பால்சுரந்து குழந்தைகளைப் பேணிவளர்ப்பது போன்றே சரயுவும் நீர்சுரந்து கோசல மக்களைப் புரக்கின்றது என்பது கம்பர் காட்டும் உவமை.

    ஒழுக்கு என்ற சொல் இங்கே இருவேறு பொருளில் கையாளப்பட்டிருக்கின்றது. அரசர்களுக்கு அஃது இடையறாத ஒழுக்கப் பண்பையும், ஆற்றுக்கு இடையறவுபடா நீர் ஒழுக்கினையும் குறிப்பதாக அமைகின்றது.

    கம்பரைப் பொறுத்தவரை அவர் தமிழகத்தைத் தாண்டி வேறெங்கும் சென்றதாகத் தகவல்கள் இல்லை. அவர் பார்த்ததெல்லாம் சோழநாட்டையும் அதனை வளப்படுத்தி, சாலி நெல்லின் சிறைகொள் வேலி ஆயிரம் விளையவைத்த, காவிரியையும்தான்! எனவே சரயுவின் இயல்புகளாகக் கம்பராமாயணத்தில் அவர் குறிப்பிடுவதெல்லாம் ’வான்பொய்ப்பினும் தான்பொய்யா மலைத்தலைய கடற்காவிரி’யின் இயல்புகளாக அவர் கண்டவற்றைத்தாம்!

    சரயுவை எப்படித் தாய்முலைக்குக் கம்பர் ஒப்பிடுகின்றாரோ அதுபோன்றே ’ஈன்றணிமை தீர்ந்த குழந்தையைத் தாய்முலைப்பால் காப்பதுபோல் தன்னுடைய நீர்வளத்தால் சோழநாட்டைக் காக்கின்றது காவிரி’ என்று காவிரியைத் தம் புறநானூற்றுப் பாடலில் போற்றுகின்றார் புலவர் கோவூர்கிழார்.

    புனிறுதீர் குழவிக்கு இலிற்றுமுலை போலச்
    சுரந்த காவிரி மரங்கொல் மலிநீர்
    மன்பதை புரக்கும் நன்னாட்டுப் பொருநன்…     (புறம் 68 – கோவூர் கிழார்)

    எனவே கம்பரின் சரயு குறித்த கற்பனைக்குக் கோவூர் கிழாரின் இந்தப் பாடலடிகள் அடிப்படையாக அமைந்திருக்கக்கூடும்.

    நாட்டு வளத்தைப்பற்றிப் பேசுமிடத்து மீண்டும் கோசலநாட்டு மக்களின் பண்பு நலன்களைப் பரக்கப் பேசுகின்றார் கம்பர்.

    கோசல நாட்டில் வறுமையில்லாததால் அங்கே வள்ளன்மைக்கு வேலையில்லை; அங்குள்ளவர்களிடையே பகைமை இல்லாத காரணத்தால் வலிமையானவர் யார் எனும் ஆராய்ச்சிக்கு வழியில்லை. கோசலத்தில் அனைவருமே உண்மைவிளம்பிகளாய், அரிச்சந்திரனின் வாரிசுகளாய் விளங்கியமையால் உண்மைக்கென்று தனித்த மதிப்பில்லை. அம்மட்டோ? அங்குள்ளோர் அனைவரும் கல்வி கேள்விகளில் மிக்கோராய்த் திகழ்ந்தமையால் அறியாமைக்கும் இடமில்லாமற் போய்விட்டது என்பது கம்பர் தீட்டும் கோசலத்தின் கவினார் சித்திரம்.

    வண்மை இல்லை ஓர் வறுமை இன்மையால்
    திண்மை இல்லை ஓர் செறுநர் இன்மையால்
    உண்மை இல்லை பொய் உரை இலாமையால்
    வெண்மை இல்லை பல் கேள்வி மேவலால்.     (கம்ப: நாட்டுப்படலம் – 84)

    ”எல்லாரும் எல்லாமும் பெறவேண்டும்; இங்கு இல்லாமை இல்லாத நிலை வேண்டும்’ எனும் சமதர்மச் சமுதாயத்தை தம் பாடலில் படைத்துக் காட்டியிருக்கின்றார் கம்பர்.

    கிபி 15/16 ஆம் நூற்றாண்டில் இங்கிலாந்தில் வாழ்ந்த தத்துவவியல் அறிஞரும், மனிதநேயவாதியுமான தாமஸ் மூர் (Thomas More) தம்முடைய உட்டோப்பியா (Utopia) நூலில் கட்டமைத்த, 19ஆம் நூற்றாண்டில் வாழ்ந்த பாட்டாளி மக்களின் பிதாமகரான கார்ல்மார்க்ஸ் கனவுகண்ட, ஏற்றத்தாழ்வற்ற ஓர் உயர்ந்த சமூகத்தை, 12ஆம் நூற்றாண்டிலேயே தம் காப்பியத்தில் காணச்செய்திருக்கும் கம்பநாடரைப் பொதுவுடைமைச் சித்தாந்தத்தின் முன்னோடி என்று நாம் பெருமையோடு கருதலாம்.

    கோசல மக்களின் மேன்மைப் பண்புகளை மேலும் சில பாடல்களிலும்  விதந்தோதுகின்றார் கம்பர். அவற்றுள் ஒன்று!

    கூற்றம் இல்லை ஓர் குற்றம் இல்லாமையால்
    சீற்றம் இல்லை தம் சிந்தனையின் செம்மையால்
    ஆற்ற நல் அறம் அல்லது இல்லாமையால்
    ஏற்றம் அல்லது இழிதகவு இல்லையே.     (கம்ப: நாட்டுப்படலம் – 70)

    கோசல நாட்டில் குற்றங்களே நிகழாமையால் கூற்றுவனுக்கு அங்கே வேலையில்லை என்கிறார் கம்பர். அப்படியானால் கோசலத்தில் யாருமே இறக்கவில்லை என்று பொருளா?

    அப்படியில்லை! மண்ணில் பிறந்தவர்கள் அனைவரும் ஒருநாள் இறந்துதான் ஆகவேண்டும். எனவே கூற்றமில்லை என்பதைக் கோசலமக்கள் மரணமில்லாப் பெருவாழ்வு வாழ்ந்தார்கள் என்று பொருள்கொள்ளாமல், மக்கள் குற்றச் செயல்களில் ஈடுபடாமையால் சமூகக் குற்றங்களினால் நிகழும் கொடூரக் கொலைகள், அகால மரணங்கள் கோசலத்தில் இல்லை என்றே நாம் பொருள்கொள்ள வேண்டும். மக்களின் சிந்தனை செம்மையாக இருந்தமையால் யார்மீதும் யாருக்கும் சீற்றமோ சினமோ இல்லை. நல்லறங்களைத் தவிர பொல்லாச் செயல்களில் மக்கள் ஈடுபடாமையால் கோசலத்தில் ஏற்றமிருந்ததே தவிர இழிவில்லை என்பது கம்பரின் வாய்மொழி.

    இப்படியோர் பண்பட்ட மக்கட் சமுதாயம் எங்கிருந்தாலும் அந்த நாடு நலமும் வளமும் பெற்றுச் சிறப்பதில் வியப்பில்லைதானே?

    [தொடரும்]

    *****

    கட்டுரைக்குத் துணைசெய்தவை:

    1. கம்பராமாயணம் – கோவைகம்பன்  அறநிலை விளக்க உரைக்குழு.
    2. கம்பரும் வால்மீகியும் – பேரா. அ. பாண்டுரங்கன், எம்.ஏ., பிஎச்.டி., டிப் (மொழி), தமிழரங்கம் பதிப்பு, புதுவை – 605 008.
    3. கம்பர் கருவூலம் – தொகுப்பாசிரியர், பேரா. மு. சாயபு மரைக்காயர், கங்கை புத்தக நிலையம், சென்னை – 600 017.

     

    Share
  • அகஇலக்கியச் சிறுபாத்திரங்கள்- 1 (அயலிலாட்டி)

    அகஇலக்கியச் சிறுபாத்திரங்கள்- 1 (அயலிலாட்டி)

    ச. கண்மணி கணேசன் (ஓய்வு),
    முதல்வர்& தமிழ்த்துறைத் தலைவர்,
    ஸ்ரீகாளீஸ்வரி கல்லூரி, சிவகாசி.

    முன்னுரை:

    தொகைநூல்களாக உள்ள அகஇலக்கியங்களில் கூற்று நிகழ்த்த உரியவர் யார் என்பதைத் தொல்காப்பியர் கண்டு வரையறுத்துக் கூறியுள்ளார். அவர் விரித்துக் கூறும் பட்டியலில் இடம்பெறாத பல பாத்திரங்கள் அகப்பாடல்களில் உள்ளன. அவற்றைச் சிறுபாத்திரங்கள் எனலாம். அவற்றைத் தொகுத்து அகரவரிசைப் படுத்தி ஒவ்வொரு பாத்திரமாகக் கண்டு விதந்து விளக்கிச் சுவைக்கும் போது இலக்கியத்திறன் வெளிப்படுவதுடன் படைப்பாளியுடன் வாசகராகிய நாம் ஒத்துணர்வு கொண்டு இலக்கிய வானில் பறக்கலாம்.

    சிறுபாத்திர வகைகள்:

    தலைவனும் தலைவியும் தலைமைப் பாத்திரங்கள் என்னும் தகுதிக்கு உரியவராக; தோழி, செவிலி, பாங்கன் முதலாய கூற்று நிகழ்த்துவோர் துணைப் பாத்திரங்கள் ஆகின்றனர். அகப்பாடலின் இடப்பின்புலத்திற்குத் துணை செய்யும் கருப்பொருளாகிய மக்கள் தவிர்ந்த சிறுபாத்திரங்கள் பலதரப்பட்டனவாக உள.

    அவை பின்வருமாறு:

    1. காட்சியில் நேரடியாக இடம்பெற்றுக் கேட்பினும்; பேசாத பாத்திரங்கள்

    2. காட்சியில் நேரடியாக இடம்பெறினும் கேட்காத; கேட்க இயலாத; பேசாத தனிப்பாத்திரங்களும், குழுப்பாத்திரங்களும்

    3. காட்சியில் இடம்பெறாது; கூற்றில் இடையே சுட்டப்படும் தனிப்பாத்திரங்களும், குழுப்பாத்திரங்களும்

    4. காட்சியில் இடம்பெறாது; பேசியதாகக் கூறப்படும் தனிப்பாத்திரங்களும், குழுப்பாத்திரங்களும்

    அயலிலாட்டி = பக்கத்து வீட்டுக்காரி

    மனிதன் ஒரு சமூக விலங்கு என்பது உலகியல் வழக்கு. சமூகமாகச் சேர்ந்து வாழும்  மனிதனுக்குக் குடியிருக்கும் இல்லத்தின் அருகில் வசிக்கும் இல்லத்தார் நெருங்கிய தொடர்புடையவர் ஆகின்றனர். ஆனால் அகப்பாடல் நாடகவழக்கில் அண்டை வீட்டாருக்குப் பேசும் உரிமை இல்லை. பாடல் சான்ற புலவனின் திறம் நாடக வழக்கையும் உலகியல் வழக்கையும் இணைப்பதால் ‘பக்கத்து வீட்டுக்காரி’ சிறுபாத்திரமாகி இடம்பெறுகிறாள். நற்றிணை- 65ல் தோழியும், குறுந்தொகை- 201ல் தலைவியும், அகநானூறு- 386ல் தோழியும் ‘பக்கத்து வீட்டுக்காரி’ பேசியதாகக் கூறுகின்றனர். இப்பக்கத்து வீட்டுக்காரிகள் இரு திறத்தினர்.

    1. தன் வேலையைப் பார்த்துக்கொண்டு; தன் போக்கில் பேசிச் செல்பவள்.

    2. தலைவியின் இல்லத்திற்கு நேரில் வந்து அவளைச் சந்தித்துப் பேசுபவள்.

    நற்றிணை சித்தரிக்கும் அயலிலாட்டி:

    தலைவனுக்கும் தலைவிக்கும் இன்னும் மணவினை நிகழவில்லை.

    அவன் வருகையை எதிர்பார்த்துக் காத்திருக்கும் தலைவிக்கு ஆறுதல் சொல்ல முனைகிறாள் தோழி.

    “அமுதம் உண்க நம் அயலிலாட்டி
    ………………….
    பெருமலை நாடனை வரூஉம் என்றோளே” (மேற்.)

    ‘அவ வாய்க்கிச் சக்கரை தான் போடணும்’ என்று வாழ்த்துவது இன்றும் பேச்சில் உள்ள வழக்கே. அதுபோலத்தான் இங்கு தோழியும் வாழ்த்துகிறாள். யாரிடமோ பேசிக்கொண்டிருந்த பக்கத்து வீட்டுக்காரி ‘வந்துவிடுவான்’ என்கிறாள். அது யார்? என்ன விபரம்? என்றெல்லாம் தோழிக்கும் தெரியாது; தலைவிக்கும் தெரியாது. நமக்கும் அது தேவையில்லை. ஆனால் அச்சொற்கள் அசரீரி போல; நல்ல நிமித்தமாகப் பட்டது; நம்பிக்கை ஊட்டியது. அதனால் ஏற்பட்ட மகிழ்ச்சியில் ‘சாகாவரம் கொடுக்கும் அமுதத்தை அவள் உண்பாளாக’ என்று வாயாரப் புகழ்ந்து போற்றுகிறாள்.

    கிடங்கில் எனும் ஊர் போன்ற இனிய சொற்கள் என்பது அயலிலாட்டியின் பேச்சுக்குக் கபிலரின் கவித்துவ உவமை. அதையடுத்துத் தலைவியின் துன்ப நிலையைச் சொல்லாமல் சொல்லும் உள்ளுறை உவமை. அவ்வப்போது பெருகும் காட்டாறு; பெருகுங்கால் கலங்கும் கரையின்  பாசி; கலங்கி நீருடன் கலந்து வீழும் வெள்ளருவி; தன் தாகம் தீர அங்கு நீரருந்தும் யானை; அதே இடத்திற்கு வரும் புலி; புலியுடன் போர் செய்து புண்பட்ட யானை; அதன் கோட்டை விரும்பிய வில்திறன் மிகுந்த வேடர்; அவர் செலுத்திய கணைகள் புண்ணைத் தாக்க தாங்கவியலாத் துன்பத்தில் அலறிய யானை; அந்த அலறல் இடிமுழக்கம் போல் எதிரொலிக்கும் மலை; அம்மலைத்  தலைவனைக் கருதிக் காத்திருக்கும் தலைவி என இறைச்சியுடன் கூடிய அகச்சுவை ததும்புகிறது இப்பாடலில்.

    இங்கு அயலிலாட்டியின் பங்கு ‘நற்சொல் கூறல்’. தலைவி விரைவில் மணவினை பெறுவாள் எனும் கூடல் நிமித்தமாகிய உரிப்பொருள் விளக்கத்திற்கு வழிவகை செய்பவள் ஆகிறாள் அயலிலாட்டி.

    குறுந்தொகை சித்தரிக்கும் அயலிலாட்டி:

    “அமிழ்தம் உண்க நம் அயலிலாட்டி” என்பவள் குறுந்தொகைத்

    தலைவி. இங்கும் அச்சொற்கள் நன்நிமித்தமாகக் கொள்ளப்படுகின்றன. ‘அவன் வருவான்’ என்ற நற்சொல்லை முன்னர் கேட்டவள்; பின்னோக்கு உத்தியாக (flash back) அதுபற்றித் தோழியிடம் விவரிக்கிறாள்.

    பெயர் தெரியாப் புலவர் பாடிய இப்பாடலிலும் அகப்பாடலுக்கே உரிய உள்ளுறை அழகு பொருளாழத்துடன் அமைந்து சுவை கூட்டுகிறது. நீலநிறத்து இறக்கைகளைக் கொண்ட வௌவால்; அது உண்ட மாம்பழத்தில் பாலின் இனிமையும் சேர்ந்தது போன்று மிதமிஞ்சிய இனிமை. அடுத்து அந்த வௌவால் உண்டது புளிப்பு மிகுந்த நெல்லிக்கனி. நீரருந்திய பின்னர் தொடர்ந்து அது ஓய்வெடுத்தது மூங்கில் புதர்கள் மிகுந்த சோலை. அதாவது தொங்கிக் கொண்டு முட்களே இல்லாத மூங்கிலின் உச்சியில் இனிதாகத் துயின்றது.

    இங்கே புலவர் சொல்லாமல் சொல்லும் குறிப்புப் பொருள்; தான் விரும்பிய தலைவனோடு இல்லறம் நடத்தும் இன்பம்; நெல்லிக்கனி உண்டபின் நீரருந்திய நாவில் தங்கும் இனிப்புச்சுவை போன்றது என்பது தான். தலைவி தன் பிறந்த வீட்டில் அனுபவித்த செல்லமும், செல்வ வசதியும் பாலின் இனிமை கூட்டிய மாம்பழச்சுவை மாதிரி தான். என்ன தான் இனிமை என்றாலும் மாம்பழம் உண்ட பின்பு நீர் அருந்தினால் நாவில் துவர்ப்பு தானே மிஞ்சும். தன் களவுக்காலம் ஊரார் புறம்பேசும் முட்குத்துகளின் இன்னலோடு அமைந்து இருந்தாலும்; மனதிற்கினிய மணாளனோடு நடத்தும் இல்லறசுகம் ஊராரின் வம்புப் பேச்சே இல்லாத; சிறந்த  அமைதியான வாழ்க்கையை அவளுக்கு அளிக்கிறது. இத்தகு நிலைமை தனக்கு வாய்க்கும் என்பதை அயலிலாட்டி சொன்ன ‘அவன் வருவான்’ என்ற நற்சொல் மூலம் அறிந்து ஆற்றி இருந்ததாகத் தோழியிடம் எடுத்துச் சொல்கிறாள் தலைவி.

    ஆற்றியிருத்தல் என்னும் முல்லைத்திணை உரிப்பொருளை அழுத்தமாகக்  கூற அயலிலாட்டியின் நற்சொற்கள் பயன்பட்டதாகத் தலைவி உரைக்கிறாள்.

    அகநானூற்று அயலிலாட்டி:

    தலைவி விடியவிடியத் தலைவனின்றித் தனித்து தவித்திருக்கிறாள். அவனது புறத்தொழுக்கம் தலைவிக்குத் தாங்கொணாத் துயரைத் தருகிறது. ஆனாலும் அதுகுறித்து அவளுக்கும் தோழிக்கும் விபரமேதும் தெரியவில்லை. மனஅழுத்தத்திற்கு ஆளாகி; ஒப்பனை செய்யாதவளாய்த், தூங்காத விழிகளோடு சோர்ந்து போய்த் தன் இல்லத்தில் இருப்பவள் முன் அயலிலாட்டி பகற்பொழுதில்  வருகிறாள். ’நானும் இதே சேரியில் தான் வசிக்கிறேன்; என் வீடு சற்றுத் தள்ளி இருக்கிறது. நீ இவ்வளவு சோர்ந்து போவதேன்? என்று கேட்டு மோதிரமணிந்த தன் விரல்களால் அவளது தலையை நீவி; நெற்றியைத் தடவி; ஆறுதல் கூறி; உனக்குத் தங்கை ஆகும் தகுதி உடையவள் நான்’ என ஒரு பெரிய உண்மையைச் சிரமமே இல்லாமல் கூச்சமின்றித் தெளிவாக்கி விட்டுச் செல்கிறாள். பின்னர் தலைவன் வரும்போது தோழி ‘எனக்கு வெட்கமாக இருக்கிறது’ என்று கூறி வாயில் மறுத்து நிற்கிறாள். பரணரின் இப்பாட்டில் அயலிலாட்டி தலைவனின் புறத்தொழுக்கத்திற்குத் துணை நின்றவள்.

    தனது பாடல்களில் வரலாற்றுக் கருத்துக்களைப் பெய்து உவமிக்கும் தனித்தன்மை உடையவர் பரணர். இப்பாடலிலும் தோழியின் நாணத்திற்கு வரலாற்று நிகழ்ச்சி உவமை ஆகிறது. பாணன் எனும் பெயரிய மற்போர் வீரன் ஆரியப்  பொருநனைத் தனது பெருவலி கொண்ட மார்பினால் மோதித் துன்புறுத்தி; அவன் முழவு போன்ற திரண்ட தோள்களைக் கையகப்படுத்தி நெரித்துத்; தோற்கடித்து எழவொட்டாமல் வென்றதைக் கண்டு; கணையன் எப்படி நாணம் கொண்டானோ அப்படிப்பட்ட நாணம் எனக்கும் தோன்றுகிறது என்கிறாள் தோழி. தலைவனின் இழிந்த ஒழுக்கத்தையும் உள்ளுறை மூலம் தோழி குத்திக் காட்டுகிறாள். ‘பொய்கையிலுள்ள நாற்றம் மிகுந்த நீர்நாய் பகல் பொழுதில் வாளைமீனை இரையாகக் கொள்ளத் தேடும் ஊரை உடையவனே’ என்னும் கூற்றில் உள்ள வசை தலைவனுக்குரியது.

    மருதத் திணைக்கு உரிய ஊடல் எனும் உரிப்பொருள் விளக்கத்திற்கு அயலிலாட்டி எனும் சிறுபாத்திரம் பயன்பட்டுள்ளது.

    முடிவுரை:    

    அயலிலாட்டியின் சொல் நற்சொல்லாக அமைய; தலைவி விரைவில் மணவினை பெறுவாள் எனும் கூடல் நிமித்தமாகிய உரிப்பொருள் விளக்கத்திற்கு வழிவகை செய்பவள் ஆகிறாள். ஆற்றியிருத்தல் என்னும் முல்லைத்திணை உரிப்பொருளுக்கு அவளது நற்சொற்கள் பயன்பட்டதாகத் தலைவி உரைக்கிறாள். மருதத் திணைக்குரிய ஊடல் எனும் உரிப்பொருள் விளக்கத்திற்கும் இப்பாத்திரம்     பயன்பட்டுள்ளது.

    Share
  • உடுத் தொகுப்புகளின் குடும்பங்கள் (Constellation families)

    உடுத் தொகுப்புகளின் குடும்பங்கள் (Constellation families)

    வெ. சுப்ரமணியன்

    உடுத் தொகுப்புகளின் பெயர்களுமே (Names of the Constellations), உடுக்களின் பெயர்களைப் (Names of the stars) போலவே, பலவிதமான மூலங்களிலிருந்து வந்தவை. இவை ஒவ்வொன்றும் வெவ்வேறு கதையையும் பொருளையும் கொண்டவை. பொதுவாகப் பழைய உடுத் தொகுப்புகளின் பெயர்கள் கிரேக்க புராணங்களிலிருந்து வந்தவை. அதே நேரத்தில் சமீபத்தில் உருவாக்கப்பட்ட உடுத் தொகுப்புகள் பெரும்பாலும் அறிவியல் கருவிகள் மற்றும்  அயல் விலங்குகளைக் கொண்டு பெயரிடப்பட்டன. உடுக்களுடன் தொடர்புடைய கதைகள் ஒரு உடுத் தொகுப்பிற்கும் அடுத்த உடுத் தொகுப்பிற்கும் இடையிலேயே வேறுபடுவதால் பெயரிடுவதில் கண்டிப்பான விதிமுறைகள் எதுவும் பின்பற்றப்படவில்லை.

    இராசி உடுத் தொகுப்புகளைப் (zodiac constellations) போலவே கிரேக்க அல்லது ரோமானியத் தொன்மங்களில் சொல்லப்பட்டுள்ள கதாபாத்திரங்களைக் குறிக்கும் பல உடுத் தொகுப்புகளின் பெயர்கள் அநேகமாக நமக்கு நன்கு அறிமுகமானவைதான். இவை அனைத்தும் கிமு (BCE) இரண்டாம் (2) ஆம் நூற்றாண்டில் கிரேக்க வானியலாளர் தாலமியால் (Ptolemy)  உருவாக்கப்பட்டு ஆவணப்படுத்தப்பட்டன.

    தற்போது அறியப்பட்டுள்ள எண்பத்தெட்டு (88) உடுத் தொகுப்புகளும் எட்டு (8) குடும்பங்களாகப் பிரிக்கப்பட்டுள்ளது. உடுத் தொகுப்பின் குடும்பங்கள் (Constellation families) என்பது வான் கோளத்தில் உடுத் தொகுப்புகளின் அண்மை (Proximity), பொதுவான வரலாற்றுத் தோற்றம் (Common historical origin) அல்லது பொதுவான தொன்மக் கருப்பொருள் (common mythological theme)  போன்ற சில வரையறுக்கப்பட்ட பண்புகளைப் பகிர்ந்து கொள்ளும் உடுத் தொகுதிகளின் தொகுப்பாகும்.

    கிளாடியஸ் தாலமி
    Claudius Ptolemaeus
    (born c. 100 CE—died c. 170 CE)

    மேற்கத்திய பாரம்பரியத்தில், வடக்கு உடுத் தொகுப்புகளில் (Constellations) பெரும்பாலானவை தாலமியின் கணித மற்றும் வானவியல் நூலான அல்மாஜெஸ்டில் (Almagest) தரப்பட்டுள்ள பட்டியலிலிருந்து கிளைத்தவையே என்றாலும் அதன் வேர்கள் மெசபட்டோமிய வானியல் வரைக்குமே  செல்லுகின்றன. தூரத் தெற்கில் உள்ள பெரும்பாலான உடுக்கள் 16 ஆம் நூற்றாண்டு முதல் 18 ஆம் நூற்றாண்டுகளில் தெற்கில் பயணித்த மாலுமிகள் மற்றும் வானியலாளர்களால் அறிமுகப்படுத்தப்பட்டன. இந்தியாவிலும் சீனாவிலும் தனி மரபுகள் எழுந்தன.


    1975 ஆம் ஆண்டில் ஹார்வர்ட் வானாய்வுக் கூடத்தின் (Harvard Observatory) இயக்குநரான டொனால்ட் எச். மென்செல் (Donald H. Menzel) பல பாரம்பரிய குழுக்களைத் தன்னுடைய பிரபலமான கணக்கில் சேகரித்து அவற்றை எ ஃபீல்ட் கைட் டு தி ஸ்டார்ஸ் அண்ட் பிளானட்ஸ் (A Field Guide to the Stars and Planets ) என்ற நூலில் சரிசெய்து ஒழுங்குபடுத்தினார். இதனால் 88 உடுத் தொகுப்புகளை (Constellations) 8 உடுத் தொகுப்புக் குடும்பங்களுக்குள் (Constellation families) அடக்கி விட முடிந்தது.

    படம் : உடுத் தொகுப்புக் குடும்பங்கள்
    By Cmglee, Timwi, NASA – Own work, 
    http://svs.gsfc.nasa.gov/vis/a000000/a003500/a003572, Public Domain, https://commons.wikimedia.org/w/index.php?curid=27881844

    இந்த எட்டுக் குடும்பங்களில், முதலாவது இராசிக் குடும்பம் (Zodiac family). வானத்தை வடக்கு தெற்காகப் பிரிக்கும் கிரகணப் பாதையைக் (Ecliptic path) கடந்து செல்கிறது. கிரகணப் பாதை என்பது வானத்தில் ஆண்டு முழுவதும் சூரியன் இயங்குவதாகத் தோன்றும் பாதை. இராசிக் குடும்பத்தில் மேஷம் (Aries), ரிஷபம் (Taurus), மிதுனம் (Gemini), கடகம் (Cancer), சிம்மம் (Leo), கன்னி (Virgo), துலாம் (Libra), விருச்சிகம் (Scorpius), தனுசு (Sagittarius), மகரம் (Capricornus), கும்பம் (Aquarius), மீனம் (Pisces) ஆகிய  பனிரெண்டு உடுத் தொகுப்புகள் உள்ளன. கிரகணப் பாதை ஓபியுச்சஸ் விண்மீன் தொகுப்பின் (Ophiuchus constellation)  வழியாகவும் செல்கிறது என்றாலும் இது  இராசி உடுத் தொகுதிக் குடும்பத்துடன் அடையாளப் படுத்தப்படவில்லை.

    அடுத்து வரும் ஹெர்குலஸ் குடும்பம் (Hercules Family) மிகப் பெரியது. ஹெர்குலஸ் குடும்பம் வடக்கு மற்றும் தெற்கு வான் கோளங்களில் கிட்டத்தட்ட சமமான பகுதிகளைக் கொண்டுள்ளது. இது சரிவு (Declination) + 60  முதல் − 70° வரை நீண்டுள்ளது. இக்குடும்பத்தில் மட்டும் இருபது (20) உறுப்பினர்கள். வான் கோளத்தில் உடுத் தொகுபுகளின் அண்மையின் அடிப்படையில் இக் குடும்பத்தினர் இணைக்கப் பட்டுள்ளனர். ஹெர்குலஸ் (Hercules), சஜிட்டா (Sagitta), அக்விலா (Aquila), லைரா (Lyra), சிக்னஸ் (Cygnus), ஹைட்ரா (Hydra), கிரேட்டர் (Crater), கோர்வஸ் (Corvus), ஓபியுச்சஸ் (Ophiuchus), செர்பன்ஸ் (Serpens) , சென்டாரஸ் (Centaurus), லூபஸ் (Lupus), கொரோனா ஆஸ்ட்ரேலிஸ் (Corona Australis), வல்பெக்குலா (Vulpecula), ஸ்கட்டம் (Scutum), டிரையாங்குலம் ஆஸ்ட்ரேலி (Triangulum Australe), க்ரக்ஸ் (Crux), செக்ஸ்டன்ஸ் (Sextans) மற்றும் ஆரா (Ara) ஆகிய உடுத் தொகுப்புகள்  அடங்கும்.

    மூன்றாவதாக உர்சா மேஜருக்கு அதாவது பெருங்கரடி உடுக் கூட்டத்திற்கு அருகிலுள்ள பத்து (10) வடக்கு வான் அரைக் கோள உடுத் தொகுதிகளை  உள்ளடக்கியது  உர்சா மேஜர் குடும்பம் (Ursa Major Family). இந்தக் குடும்பத்தின் உறுப்பினர்கள் உர்சா மேஜர் (Ursa Major), உர்சா மைனர் (Ursa Minor), டிராகோ (Draco), கேன்ஸ் வெனாட்டி (Canes Venatici), போய்ட்ஸ் (Boötes), கோமா பெரனிசஸ் (Coma Berenices), கொரோனா பொரியாலிஸ் (Corona Borealis), கேமலோபார்டலிஸ் (Camelopardalis), லின்க்ஸ் (Lynx) மற்றும் லியோ மைனர் (Leo Minor). உர்சா மேஜர் என்ற பெயரிடப்பட்ட உடுத் தொகுப்பில்தான் புகழ்பெற்ற பிக் டிப்பர் (Big Dipper) உள்ளது.

    நான்காவதாக வருவது பெர்சியஸ் குடும்பம் (Perseus Family). பெர்சியஸ் குடும்பத்தில் (Perseus Family) பெர்சியஸுடன் தொடர்புடைய தொன்மக் கதாபாத்திரங்களின் பெயர்களைக் கொண்ட ஆறு (6) உடுத் தொகுதிகளைக் கொண்டது. பெர்சியஸ் குடும்பம் தொன்மக் கதாபாத்திரங்களுடன் தொடர்புடைய காசியோபியா (Cassiopeia), செபியஸ் (Cepheus), ஆண்ட்ரோமெடா (Andromeda), பெர்சியஸ் (Perseus) பெகாசஸ் (Pegasus)  மற்றும் செட்டஸ்  (Cetus) ஆகியவற்றையும் தொன்மக் கதாபாத்திரங்களுடன் தொடர்பற்ற ஆரிகா (Auriga), லாசெர்டா (Lacerta)  மற்றும் டிரையாங்குலம் (Triangulum) போன்ற  மூன்று (3) அருகில் உள்ள உடுக் கூட்டங்களையும் உள்ளடக்கியது. இவற்றில் செட்டஸைத் தவிர்த்து  மற்ற  உடுக் தொகுப்புகள் அனைத்தும் கிரகணப் பாதைக்கு வடக்கில் அமைந்துள்ளன. செட்டஸ் மட்டுமே கிரகணப் பாதைக்குத் தெற்கில் அமைந்துள்ளது.  இந்தப் பெர்ஸியஸ் குடும்பம் வட வான் அரைக் கோளத்தின்  துருவத்திற்கு அருகில் இருந்து அதாவது சரிவு – 90° முதல் – 30°  வரை பரவியுள்ளது.

    ஐந்தாவதாக ஓரியன் குடும்பம் (Orion Family) வருகிறது.  ஓரியன் குடும்பம், எட்டு குழுக்களில் மிகச் சிறியது, ஓரியனின் தொன்மக்கதையுடன் தொடர்புடைய ஐந்து  (5) உடுத் தொகுப்புகளைக் கொண்டுள்ளது. இது வானில் ஹெர்குலஸ் குடும்பத்திற்கு  எதிர் பக்கத்தில் உள்ளது. ஓரியன் குடும்பத்தில் ஓரியன் (Orion), கேனிஸ் மேஜர் (Canis Major), கேனிஸ் மைனர் (Canis Minor), லெபஸ் (Lepus) மற்றும் மோனோசெரோஸ்  (Monoceros) ஆகியவை அடங்கும்.

    இந்த உடுக் குழுக்கள் கிரேக்க புராணங்களிலிருந்து உருவாகின்றன, வேட்டைக்காரர் (ஓரியன்) மற்றும் அவரது இரண்டு நாய்கள் (கேனிஸ் மேஜர் மற்றும் கேனிஸ் மைனர்) முயலைத் (லெபஸ்) துரத்துகின்றன. மோனோசெரோஸ் என்னும் யூனிகார்ன், தொன்மத்துடன் தொடர்புடையது அல்ல. யூனிக்கார்ன் உடுத் தொகுப்பு மற்ற நான்கு உடுத் தொகுப்புகளுக்கும் இடையில் அமைந்துள்ளது என்பதால் மென்செல் (Menzel) முழுமைக்காக  இந்தக் குழுவில் சேர்த்துள்ளார்,

    ஆகாய நீர்கள் குடும்பம் (Heavenly Waters) ஆறாவது உடுத் தொகுப்புக் குடும்பம். இந்தக் குடும்பத்தில் ஒன்பது (9) உறுப்பினர்கள் உள்ளனர். இந்தக் குடும்பமானது மெசொபடோமியப் பாரம்பரியத்தை அடிப்படையாகக் கொண்டது.  தனுசிற்கும் (Sagittarius)  ஓரியனுக்கும் (Orion) இடையில் உள்ள மங்கலான வானத்தின் பகுதியை மெசொபடோமியப் பாரம்பரியத்தின் நீர் கடவுளான ஈ (Ea) என்கி (Enki) அல்லது யை பாதாளத்தின் நீர்களுடன்  (Waters of the Abyss) தொடர்புபடுத்துகிறது.

    சுமேரியக் கடவுள் ஈ (Ea)  அல்லது என்கி (Enki)
    படம் : நன்றி Pinterest

    கும்பம் (அக்வாரிஸ்) மற்றும் மகரம்  (காப்பிரிகார்னஸ்) ஆகிய இரண்டு உடுத் தொகுப்புகளும் மெசொபடோமிய பாரம்பரியத்தின் வழிவந்தவை. இவை இரண்டும்  இராசிக்  குடும்பத்தில் (Zodiac family) இல்லாமலிருந்தால், இயற்கையாகவே இந்த ஆகாய நீர்கள் குடும்பத்தில் உறுப்பினர்களாக இருந்திருப்பார்கள். ஆனால் ஏற்கனவே அவைகள் இராசிக் குடும்பத்தில் இணைக்கப்பட்டுள்ளதால் அவைகளுக்கு மாற்றாக மென்செல் இப்பகுதியை வேறு வகையில் விரிவுபடுத்தினார்.

    ஏதோவொரு வடிவத்தில் தண்ணீருடன் தொடர்புடைய  உடுத் தொகுப்புகளான டெல்ஃபினஸ் (Delphinus), ஈக்விலியஸ் (Equuleus),  எரிடனஸ் (Eridanus), பிஸ்கிஸ் ஆஸ்ட்ரினஸ் (Piscis Austrinus),  கரினா (Carina), பப்பிஸ் (Puppis), வேலா (Vela), பிக்ஸிஸ் (Pyxis) மற்றும் கொலம்பா (Columba) ஆகியவற்றை  ஒன்றிணைத்து ஆகாய நீர்கள் (Heavenly Waters) குடும்பத்தை அவர் உருவாக்கினார். கரினா, பப்பிஸ் மற்றும் வேலா ஆகியன வரலாற்று ரீதியாக முன்னாள் உடுத் தொகுப்பான ஆர்கோ நாவிஸின் (Argo Navis) ஒரு பகுதியாக இருந்தவை.  கிரேக்க பாரம்பரியத்தின்படி ஜேசனின் கப்பலைக் (ship of Jason) இது  குறிக்கிறது.

    16 ஆம் நூற்றாண்டின் பிற்பகுதியில் பெட்ரஸ் பிளான்சியஸால் (Petrus Plancius) அறிமுகப்படுத்தப்பட்ட பல தென் வான் அரைக் கோள உடுத் தொகுப்புகளைப் பேயர் குடும்பம் (Bayer Family) தன்னிடத்தில் கொண்டுள்ளது.

    பெட்ரஸ் பிளான்சியஸால்
    (Petrus Plancius) 
    1552  – 1622

    அயல் விலங்குகளின் பெயர்களைக் கொண்ட உடுக்கள் 16 ஆம் நூற்றாண்டில் டச்சு மாலுமிகளான பீட்டர் டிர்க்ஸூன் கீசர் (Pieter Dirkszoon Keyser) மற்றும் ஃபிரடெரிக் டி ஹூட்மேன் (Frederick de Houtman) ஆகியோரால் அறிமுகப்படுத்தப்பட்டன.

    இதில் முக்கியமாக ஜோஹான் பேயர் (Johann Bayer) குடும்பத்தைச் சேர்ந்த உடுக்களான டொராடோ (Dorado), க்ரஸ் (Grus), டுகானா (Tucana), கெமிலியன் (Chamaeleon), வோலன்ஸ் (Volans), ஏப்பஸ் (Apus), பாவோ (Pavo), பீனிக்ஸ் (Phoenix), ஹைட்ரஸ் (Hydrus), சிந்து (Indus), மற்றும் மஸ்கா (Musca) ஆகியவைகளே இடம் பெற்றுள்ளன. பேயர் மஸ்காவைத்  தேனீ (Apis) என்று பெயரிட்டார், ஆனால் காலப்போக்கில் அது மறுபடி பெயர் மாற்றம் பெற்றது.

    பேயரின் பன்னிரண்டாவது புதிய தெற்கு விண்மீன் டிரையாங்குலம் ஆஸ்ட்ரேல் (Triangulum Australe),  மென்செலால் இது ஹெர்குலஸ் குடும்பத்தில் வைக்கப்பட்டது. இந்த விண்மீன்கள் தொகுப்புகள் தொலைதூரத் தெற்கு வானத்தில் அமைந்திருப்பதால், அவற்றின் உடுக்களைப் பண்டைய கிரேக்கர்களுக்கும் ரோமானியர்களுக்கும் தெரிய வாய்ப்பின்றி இருந்தது.பேயர் குடும்பம் தெற்கு வான் துருவத்தை வட்டமிடும் ஒழுங்கற்ற ஆனால் தொடர்ச்சியான பட்டையை (Band) உருவாக்குகிறது.

    லா கெய்ல் குடும்பம் (La Caille Family) 1756 ஆம் ஆண்டில்  நிக்கோலா லூயிஸ் டி லாகெயிலால் (Nicolas Louis de Lacaille) பெரும்பாலான விஞ்ஞான கருவிகளின் பெயரிடப்பட்ட உடுத் தொகுப்புகள் உருவாக்கப்பட்டன. விஞ்ஞான கருவிகளைக் குறிக்க  அவர் அறிமுகப்படுத்திய பதிமூன்று (13) உடுத் தொகுதிகளில் பனிரெண்டைக் (12) தன்னகத்தே கொண்டுள்ளது. தென்னாப்பிரிக்காவில் டேபிள் மவுண்டனில் (Mons Mensa)  தனது தொலைநோக்கியை அமைத்ததை நினைவு கூரும் வகையில் இவ்வாறு பெயரிட்டார் . இந்த லா கெய்ல் குடும்பத்தில் (La Caille Family)

    நார்மா (Norma),  சர்க்கினஸ் (Circinus), டெலிஸ்கோப்பியம் (Telescopium), மைக்ரோஸ்கோபியம் (Microscopium), ஆக்டான்ஸ் (Octans) ஸ்கல்ப்சர் (Sculptor), ஃபோர்னாக்ஸ் (Fornax), கெய்லம் (Caelum), ஹொரோலஜியம் (Horologium), மென்சா (Mensa), ரெட்டிகுலம் (Reticulum), பிக்டர் (Pictor) மற்றும் ஆன்ட்லியா (Antlia) ஆகிய பனிரெண்டு உடுத் தொகுப்புகள் அடங்கும். மீதமிருந்த லாகெய்ல் கருவியான பிக்சிஸை (Pyxis) ஆகாய நீர்கள் குடும்பத்துடன் மென்செல் ((Menzel)   சேர்த்தார்.

    மீண்டும் சந்திப்போம்.

    Share
  • யாராத்தா குட்டை

    யாராத்தா குட்டை

    சேஷாத்ரி பாஸ்கர்

    நாகேஸ்வர ராவ் பூங்கா அதன் பெயரை பெறுவதற்கு முன் உள்ளூர் மக்கள் அதற்கு வைத்த பெயர் யாராத்தா குட்டை. இன்று அப்படி சொன்னால் அது கெட்ட பேச்சு என்பார்கள்.

    அங்கு எப்படி குட்டை உருவானது என தெரியவில்லை.

    ஒரு வேளை இரண்டு வருடங்கள் முன்பு இங்கு பெய்தது போல அம்பது வருடங்கள் முன்பு மழை வந்திருக்கலாம். ஒரே குட்டை பிரதேசம். காட்டு வெளி நிலம். எதிரே உள்ள தேவாலயம் அப்போது காட்டு கோயில் என அழைக்கப்பட்டது. ஆறு மணிக்கே வெளியே போக பயப்படும்படியான ஊர்.

    காரணம் திருடர்கள் இல்லை. இருட்டு. பேய் பிசாசு பயம். சங்கிலியை பறித்து கொண்டு ஓட இரண்டு சக்கர வாகனம் பெரிதாய் இல்லை. மிஞ்சி போனால் ஒரு வாடகை மிதி வண்டி. மன்னிக்கவும். அவர் சைக்கிள். வியாதி இல்லை.

    காற்று மிதம். மழை சுகம் கொஞ்சம் கஷ்டம். மாசு இல்லை. பெரிய வெளிச்ச விளக்குகள் இல்லை. தெருவின் குப்பைகள் வியாதி பரப்புவதாய் இல்லை. முக்கியமாய் பிளாஸ்டிக் இல்லை. இன்றுள்ள மருத்துவமும், கைபேசியும் அன்று உண்டா என்று விவாதம் செய்தால் என்னிடம் பதில் இல்லை.

    நான் சொல்ல வந்தது ஒப்பீடு இல்லை. வாழ்வு சுமை பற்றிய என் கவலை. எட்டு குழந்தைகள் பெற்ற தாய் எல்லோருக்கும் கல்யாணம் செய்து விட்டு சென்ற வருடம் இறந்ததை நான் அறிவேன். ஏன், சில வீட்டில் அம்மாவும் பெண்ணும் ஒரே நாளில் விலக்காகி இருந்த கதை கூட உண்டு. இன்று ஒரு குழந்தை பிரசவத்திற்கு பாடு படுத்தும் ஸோ கால்ட் மாட்டு பெண் எங்கே? எட்டு பெற்றவள் எங்கே? ஆரோக்ய ரீதியில் இதை பேசுகிறேன். சின்ன அடி பட்ட என் அம்மாவுக்கு ஹார்லிக்ஸ் வாங்கி வருவதற்குள் பாத்திரம் தேய்த்து விட்டு செல்வி பார்க்க ஆரம்பித்து விட்டாள். சின்ன அடி கூட எனக்கு பட்டால் அதை எல்லோர்க்கும் சொல்லி மாஞ்சு போய் நிற்கும் நான் அவர்கள முன் தூசி தான்.

    நமக்கு முன்னே வாழ்ந்தவர்கள் எத்தனை கோடி பாட்டு தான் ஞாபகம் வருகிறது. இன்று அரை டிராயர் போட்டு கொண்டு எகனாமிக்ஸ் பேசி கொண்டு நடக்கும் யுவன், யுவதிகளுக்கு இது தெரியாது.

    இந்த பூங்கா மூன்று பேரின் சொத்து. ஒன்று தர்மாம்பாள் முதலியார். இன்னொருவர் நாகேஸ்வரர். அவருக்கு அம்ருதாஞ்சன் கட்டிடமும் அப்போது சொந்தம். மெட்ராஸ் பிரெசிடென்சியில் அப்போது போட்ட தர்மம். இன்று சுந்தரம் பைனான்ஸ் வரை வந்து இருக்கிறது.

    நிஜ தர்மவான்கள் இருந்த ஊர் அது. நமக்கு தெரியாது. ஒரு வேளை அங்கிருந்த, இருக்கும் மரங்கள் அறியும். அன்று ராமாயி அம்மாளும், நைனியப்ப முதலியாரும், குமாரசாமி ராஜாவும், அரவாமுதன் அய்யங்காரும் இந்த நிலத்தை தரவில்லையெனில் நமக்கு நகரில் ஒரு நாலு ஏக்கர் பசுமை தோட்டம் கிடைத்திருக்குமா என்ன? சரித்திரம் மறக்கப்படகூடாது.

    இது திறக்கப்பட்ட எண்பதாவது வருடம் இது. மெட்ராஸ் நல்ல மெட்ராஸ்.

    Share
  • கம்பனில் கண்டெடுத்த முத்துக்கள் – 1

    கம்பனில் கண்டெடுத்த முத்துக்கள் – 1

    -மேகலா இராமமூர்த்தி

    தமிழில் இயற்றப்பட்ட ஒப்பற்ற பெருங்காப்பியமாகவும் பேரிலக்கியமாகவும் திகழ்வது கம்பராமாயணம்.

    “யாமறிந்த புலவரிலே கம்பனைப் போல்
    வள்ளுவர்போல் இளங்கோவைப் போல்
    பூமிதனில் யாங்கணுமே பிறந்ததில்லை
    உண்மை வெறும் புகழ்ச்சி யில்லை    ” என்று மகாகவி பாரதியால் போற்றிக் கொண்டாடப்பட்ட புலவர்கள் வரிசையில் முதலிடத்தைப் பிடித்த கம்பரால் எழுதப்பட்ட காப்பியம் இது.

    கம்பராமாயணம் ஒரு முதனூலன்று; வடமொழியில் இயற்றப்பட்ட, ஆதி காவியம் என்று அழைக்கப்படுகின்ற, வால்மீகி இராமாயணத்தை அடியொற்றி எழுதப்பட்ட ஒரு வழிநூலாகும்.

    தேவபாடையின் இக் கதை செய்தவர்
    மூவர் ஆனவர் தம்முளும் முந்திய
    நாவினான் உரையின்படி நான் தமிழ்ப்
    பாவினால் இது உணர்த்திய பண்புஅரோ.     (பாயிரம் – 10)

    தேவ பாடை(பாஷை) என்றழைக்கப்படும் சமஸ்கிருதத்தில் இராமன் கதையைச் செய்தவர்கள் வால்மீகி, வசிட்டர், போதாயனர் எனும் மூவர். இவர்களுள் முந்தியவரான வால்மீகி தம் நாவால் உரைத்தவண்ணமே தமிழ்ப்பாவில் நான் இக்கதையை அமைத்துள்ளேன் என்று கம்பரே தம் பாயிரத்தில் இக்கருத்தை உறுதிசெய்திருக்கக் காண்கின்றோம்.

    வழிநூலாக இருப்பினும் வால்மீகி இராமாயணத்தின் மொழிபெயர்ப்பாகத் தம் காப்பியத்தைக் கம்பர் படைக்கவில்லை என்பதையும் நாம் அறிந்துகொள்ளவேண்டும். வால்மீகி தம்முடைய இராமாயணத்தில் விரிவாகப் பேசிய சில கருத்துக்களைச் சுருக்கமாகவும், சுருக்கமாகப் பேசிய கருத்துக்களை விரிவாகவும் கம்பராமாயணம் பேசுகின்றது.

    வால்மீகி இராமாயணத்தில் காணப்படாத இரணியன் வதைப்படலம், மாயா சனகப் படலம் ஆகியவை கம்பராமாயணத்தில் புதிதாகச் சேர்க்கப்பட்டுள்ளன. 176 பாடல்களைக் கொண்ட இரணியன் வதைப்படலம் ஒரு தனிக் காப்பியம் என்றெண்ணத்தக்க வகையில் பொலிவோடும் வலிவோடும் கம்பரால் படைக்கப்பட்டுள்ளது. இதனைக் காப்பியத்துள் அமைந்த குறுங்காப்பியம் என்றே போற்றுகின்றார்கள் பல்கலைச் செல்வர் தெ.பொ. மீனாட்சிசுந்தரனாரும், கம்பரை மேனாட்டுக் கவிவலாருடன் ஒப்பிட்டு மகிழ்ந்த கம்பர் திறனாய்வாளரான வ.வே.சு. ஐயரும்!

    வால்மீகியின் காவியத்தில் இராமன் சனகரின் அரண்மனையில் இருந்த அரன் வில்லை (சிவ தனுசு) வளைத்துச் சீதையை மணந்துகொண்டான் என்று குறிப்பிடப்பட்டுள்ளது.  பண்டைய மன்றல் முறைகளாகக் குறிப்பிடப்படும் பிரமம், பிரசாபத்தியம், ஆரிடம், தெய்வம், கந்தருவம், ஆசுரம், இராக்கதம், பைசாசம் எனும் எட்டனுள் இஃது ஆசுர மணத்தைச் சேர்ந்தது. ஆசுர மணத்தைப் பொறுத்தவரை அதில் ஆணுக்கும் பெண்ணுக்கும் மன ஒப்புதல் இருக்கவேண்டுமென்ற அவசியமில்லை. வில்லை வளைத்து நாணேற்றுபவர் எவரும் அப்பெண்ணைத் திருமணம் செய்துகொள்ளலாம்; கிழவனாக இருந்தாலும்!

    தமிழ் அகப்பொருள் மரபில் திளைத்தவரான கம்பருக்கு இம்மணமுறையில் உடன்பாடில்லை. எனவேதான் மணத்துக்கு முன்பே இராமனும் சீதையும் ஒருவரை ஒருவர் கண்டு காதல் கொண்டனர் எனும் அமைப்பில் கதையை மாற்றுகின்றார். மிதிலையின் அரசவீதியில் முனிவரோடும் இளவல் இலக்குவனோடும் நடந்துவருகின்ற இராமனைக் கன்னிமாடத்தில் நின்றிருக்கும் சீதை குனிந்து காண்கின்றாள். மேலே நிமிர்ந்துபார்க்கும் இராமனும் அவளை நோக்குகின்றாள். அப்போது நிகழ்ந்த இரசவாதத்தைத் தம் கவிதையில் ஓவியமாய்த் தீட்டி நம் உள்ளத்தில் பதித்துவிடுகின்றார் கம்பநாடர்.

    எண்ணரு நலத்தினாள் இனையள் நின்றுழி
    கண்ணொடு கண்ணிணை கவ்வி ஒன்றையொன்று
    உண்ணவும் நிலைபெறாது உணர்வும் ஒன்றிட
    அண்ணலும் நோக்கினான் அவளும் நோக்கினாள்.     (கம்பராமாயணம்: மிதிலைக் காட்சிப் படலம் – 598)

    இவ்வாறே நிறைகுணங்களின் உறைவிடமாய் விளங்கிய கேகயன் மட மானான கைகேயியின் தூயசிந்தை திரிந்தமைக்குத் தீய மந்தரையின் சூழ்ச்சியை மட்டும் காரணமாய்க் காட்டாமல், அரக்கர் பாவத்தையும் அல்லவர்செய் அறத்தையும் கூடுதல் காரணங்களாய்க் காட்டுவதும், இராவணன் சீதையைத் தொட்டுத் தூக்கிச்சென்றான் என்று மொழியாது, அவள் வசித்துவந்த பர்ணசாலையோடு பெயர்த்தெடுத்துச் சென்றான் என்று புனைந்திருப்பதும் வான்மீகத்திலிருந்து கம்பர் மாறுபடும் இடங்களாகும்.

    மூலநூலான வால்மீகி இராமாயணத்தில் இடம்பெற்றுள்ள சனகர், விசுவாமித்திரர், அசமஞ்சன், கங்கை போன்றோரின் வரலாறுகளைக் கம்பர் தம் காப்பியத்தில் பாடாமல் நீக்கியுள்ளார். வான்மீகத்தில் மிக விரிவாகப் பேசப்பட்டுள்ள சம்பராசுரப் போரை, அது கூனி கைகேயி விவாதத்தின் ஓட்டத்தைத் தடைப்படுத்தும் என்று கருதி, ஒரே ஒரு பாடலில் சுருங்கக் கூறி முடித்துவிடுகின்றார் கம்பர்.

    நாடி ஒன்று உனக்கு உரைசெய்வென்
         நளிர் மணி நகையாய்
    தோடு இவர்ந்த தார்ச் சம்பரன்
         தொலைவுற்ற வேலை
    ஆடல் வென்றியான் அருளிய வரம்
         அவை இரண்டும்
    கோடி என்றனள் உள்ளமும்
         கோடிய கொடியாள். (கம்பராமாயணம்: மந்தரை சூழ்ச்சிப்படலம் – 1576)

    இவ்வாறு மூலநூலினும் விஞ்சிய பல்வேறு சிறப்புக்களைக் கொண்டதாய், காலத்தால் அழியாத புத்தாக்கப் படைப்பாய் (recreation) கம்பரால் உருவாக்கப்பட்டுள்ள இராமனின் கதைக்குக் கம்பர் தேர்ந்தெடுத்த பெயர் ’இராமாவதாரம்’ என்பதாகும். இதனைக் காப்பியத்தின் பாயிரச் செய்யுள் பகர்கின்றது.

    நடையின்நின்று உயர் நாயகன் தோற்றத்தின்
    இடை நிகழ்ந்த இராமாவதாரப் பேர்த்
    தொடை நிரம்பிய தோம்அறு மாக்கதை
    சடையன் வெண்ணெய்நல் லூர்வயின் தந்ததே     (கம்பராமாயணம்: பாயிரம் – 11) ஆனால் கம்பராமாயணம் என்ற பெயரே கால ஓட்டத்தில் நிலைத்துவிட்டது.

    அளப்பரிய கவியாற்றலும் வியத்தகு சிந்தனைத் திறனும் வாய்க்கப்பெற்ற கம்பர் புதிதாகவே ஒரு நூலைப் படைத்திருக்கலாமே? எதற்காக வால்மீகி வடமொழியில் எழுதிய இராமனின் வரலாற்றைத் தூசுதட்டியெடுத்துத் தமிழில் மீட்டுருவாக்கம் செய்யவேண்டும் என்றொரு வினாவும் இத்தருணத்தில் நமக்கு எழுதல் இயல்பே.

    ஒரு சமுதாயம் சிறந்துவிளங்க வேண்டுமானால் அதற்கு முதன்மையான தேவை அங்குவாழும் மக்களின் புலனொழுக்கமே என்று கருதிய கம்பர், இன்றியமையா மக்கட் பண்பாகிய அப்புலனொழுக்கம் வழுவி நடப்பவர் எதிர்கொள்ளும் தீங்குகளையும் அவர்கள் பெறும் தண்டனைகளையும் விளக்கமாக அறிந்தால் இச்சமுதாயம் நன்னெறியில் நின்றொழுகும் என்று திண்ணமாய் நம்பினார். அக்கருத்தை விளக்குதற்குப் புதிதாகத் தாம் ஒரு கதையை உருவாக்குவதைவிடவும், தமிழ்மக்களிடம் ஏற்கனவே நன்கு அறிமுகமாகியிருந்த – அவர்களின் நன்மதிப்பைப் பெற்றிருந்த, நடையில் நின்றுயர் நாயகனான, இராமனின் கதை பயன்படும் என்றெண்ணியே அதனை மீட்டுருவாக்கம் செய்யும் முயற்சியில் அவர் இறங்கியிருக்க வேண்டும் என்பது கம்பரில் தோய்ந்து, கம்பராமாயணத்தைத் தீர ஆய்ந்தவரான பேராசிரியர் அ.ச. ஞானசம்பந்தன் அவர்களின் கருத்தாகும்.

    புலனொழுக்கத்தை வலியுறுத்துவதோடல்லாமல், அறம் வெல்லும், பாவம் தோற்கும் என்பதையும் இக்காப்பியம் விளக்குகின்றது. இவையன்றி, இன்னும் எத்தனையோ அறக்கருத்துக்களையும் வாழ்வியல் விழுமியங்களையும் வாய்ப்புக் கிடைக்கும்போதெல்லாம் நமக்கு விண்டுரைக்கும் பணியையும் கம்பரின் காப்பியம் குறைவறச் செய்திருக்கின்றது.

    பால காண்டம், அயோத்தியா காண்டம், ஆரண்ய காண்டம், கிட்கிந்தா காண்டம், சுந்தர காண்டம், யுத்த காண்டம் எனும் ஆறு காண்டங்களைக் கொண்ட இக்காப்பியத்தில், சென்னை கம்பன்கழகப் பதிப்பின்படி 10368 பாடல்கள் உள்ளன.

    கம்பர், தமிழ்க்கடலின் ஆழத்தைக் கண்டுணர்ந்த அறிஞர்; முத்தமிழ்த் துறையின் முறைபோகிய வித்தகக் கவிஞர்; தமிழ் மரபுகளில் ஊறித் திளைத்த நற்றமிழர். தம் பேரிலக்கியத்தில் இராமனைக் குறிப்பதற்கு அவர் பயன்படுத்தியிருக்கும், ”தென்சொல் கடந்தான் வடசொல் கலைக்கு எல்லை தேர்ந்தான்” (கம்பராமாயணம்: நகர்நீங்கு படலம்-1741) என்ற சொற்கள் தென்மொழியாம் தமிழிலும் வடமொழியிலும் பெரும்புலமை பெற்றிருந்த கம்பருக்கும் பொருந்துவனவாகவே உள்ளன.

    இத்தகு பேராற்றலும் பெரும்புலமையும் வாய்ந்த கம்பரின் கவிதை வாரிதியாம் கம்பராமாயணம் தமிழுக்குத் தகைசால் அணியாய்த் திகழ்கின்றதெனில் மிகையில்லை. இவ்வாரிதியில் அள்ள அள்ளக் குறையாத முத்தான கருத்துக்கள் வித்தாரமாய்க் கொட்டிக் கிடக்கின்றன. அவற்றில் சிலவற்றையேனும் நாம் அறிந்துகொள்வது தமிழ்ச் சமுதாயத்திற்கு நன்மை பயக்குமென நம்புகின்றேன்.

    [தொடரும்]

    *****

    கட்டுரைக்குத் துணைசெய்தவை:

    1. கம்பரும் வால்மீகியும் – பேரா. அ. பாண்டுரங்கன், எம்.ஏ., பிஎச்.டி., டிப் (மொழி), தமிழரங்கம் பதிப்பு, புதுவை – 605 008.
    2. கம்பர் கருவூலம் – தொகுப்பாசிரியர், பேரா. மு. சாயபு மரைக்காயர், கங்கை புத்தக நிலையம், சென்னை – 600 017.
    3. கம்பராமாயணம் – கோவை கம்பன் அறநிலை விளக்க உரைக்குழு.

     

    Share
  • சைவத் தமிழ்ச் சங்கிலியனும் சட்டத் தொடர்ச்சியும்

    சைவத் தமிழ்ச் சங்கிலியனும் சட்டத் தொடர்ச்சியும்

    மறவன்புலவு க. சச்சிதானந்தன்

    இலங்கையில் மூவர் அமரும் நீதிமன்றங்கள் அமைவது மிகக் குறைவு. ஆங்கிலத்தில் Trial-at-Bar எனச் சொல்வார்கள்.

    சங்கிலி மன்னனின் கடைசிக் காலங்களை 1976ஆம் ஆண்டு கொழும்பில் மூவர் நீதிமன்றத்தின் முன் பேசினர். சூடானில் நடந்தவை, சிம்பாப்வேயில் நடந்தவை, அவற்றுக்கும் சங்கிலி மன்னனுக்கும் என்ன தொடர்பு?ஆனாலும் நீதிமன்றத்தில் பேசினர்.

    குலேந்திரன், மகேந்திரன் அல்லது குலோதரன், மகோதரன் என்ற யாழ்ப்பாண (நாகநாடு) மன்னர்களை மகாவமிசம் கூறும்.

    முதலாம் கயவாகுவை மணம் முடித்தவள் யாழ்ப்பாண மன்னர் மகள் என மகாவமிசம் கூறும்.

    பூம்புகார்ச் சோழ மன்னன் கிள்ளிவளவன் மணம் முடித்ததும் யாழ்ப்பாண மன்னனின் மகள் என்று மணிமேகலை கூறும்.

    ஓர் அரசனிடமிருந்து மற்றோர் அரசனுக்கு ஆட்சி கைமாறும். அரசன் இறந்தால் இளவரசன்/ இளவரசி அரசராகுவர். அரசன் போரில் தோற்றால் வென்ற அரசன் அரசனாவான்.

    வாரிசு அரசன் ஆகலாம். போரில் வென்றவன் அரசன் ஆகலாம். அங்கே இறைமைத் தொடர்ச்சி, ஆட்சித் தொடர்ச்சி, சட்டத் தொடர்ச்சி.

    மகாவம்சம் கூறும் மகோதரனுக்கு முன்பும் பல அரசர். பின்பும் பல அரசர். இடை இடையே குறுகிய காலங்கள், சேரர் சோழர் பாண்டியர் எனத் தமிழரே யாழ்ப்பாணத்தைத் தொடர்ச்சியாக ஆண்டனர். போரில் வென்றதால் ஆண்டனர்.

    நீண்ட ஆட்சியாக யாழ்ப்பாணத் தமிழ் அரசர்கள் ஆண்டனர். இடையே கலிங்க மாகன் ஒருவன், சாவகச் சந்திரபானு மற்றவன், யாழ்ப்பாணத்தை வீழ்த்தித் தமது ஆட்சிக்குள் கொண்டுவந்தனர். இவர்கள் இருவருமே தமிழர் அல்லாத அரசர்.

    வரலாறுக்கு முற்பட்ட காலங்களிலிருந்து தொடர்ச்சியாக யாழ்ப்பாண அரசைத் தமிழரான வாரிசு அரசர்கள், போரில் வென்ற அரசர்கள் ஆண்டனர்.

    இடையில் திடீரென்று முளைத்த எவரும் அரசர் ஆகவில்லை. கலிங்க மாகனையும் சாவகச் சந்திரபானுவையும் தவிர அன்னியர் ஆட்சியில் யாழ்ப்பாணம் ஒருபோதும் இருந்ததில்லை.

    முடியாட்சிக் காலத்தில் இறைமைத் தொடர்ச்சி, ஆட்சித் தொடர்ச்சி, சட்டத் தொடர்ச்சி என யாழ்ப்பாணத்தில் பல நூற்றாண்டுகளுக்கு ஊடாக நிலையான ஆட்சி. தமிழரான செண்பகப் பெருமாளின் 16 ஆண்டு கால ஆட்சியைச் சிங்கள ஆட்சி எனலாமா?

    சங்கிலியனைப் போர்த்துக்கேயர் வீழ்த்தும் நாளில் தமிழரின் நீண்ட தொடரச்சியான முடியாட்சி அற்றது. சைவத் தமிழச் சங்கிலி மன்னனிடம் இருந்த தமிழர் இறைமை, கத்தோலிக்கப் போர்த்துக்கேய மன்னனைச் சென்றடைந்தது. போத்துக்கேயர் தாம் பெற்ற இறைமையை, ஆட்சி உரிமையை கிறித்தவ ஒல்லாந்த மன்னரிடம் கையளித்தனர். ஒல்லாந்தரும் அவற்றைக் கிறித்தவ ஆங்கிலேய மன்னரிடம் கையளித்தனர்.

    ஆங்கிலேயர் விட்டுச் சென்ற பொழுது சோல்பரி அரசியலமைப்புக் கொண்ட இலங்கை, விடுதலை பெற்று ஆங்கிலேய மன்னரின் கீழ் குடியாட்சி (Dominion) நாடாகியது.

    இலங்கையின் உச்ச நீதிமன்றத்தை நாடுவோர், அதன் தீர்ப்பை எதிர்த்து இங்கிலாந்து அரசவை நீதிமன்றத்துக்கு விண்ணப்பிக்கலாம், தீர்ப்பைக் கோரலாம். 1948-1972 ஆக 24ஆண்டுகளாக இந்த நிலை.

    1795 தொடக்கம் 22 மே1972 வரை சங்கிலிய மன்னன் கையளித்த சைவத் தமிழர் இறைமை ஆங்கிலேய அரசியிடம்.

    இலங்கை நாடாளுமன்றமே அரசியலமைப்பைத் திருத்தாமல், சட்டத் தொடர்ச்சி இன்றி, புதிய அரசியலமைப்பு யாக்க அவையை, கொழும்பு ரோயல் கல்லூரி மண்டபத்தில், நவரங்கல மண்டபத்தில் 1971 ஸ்ரீமாவோ ஆட்சியின் கீழ் கூட்டிய பொழுது சங்கிலியன் கையளித்த தமிழரின் இறைமையை யார் பயன்படுத்துவது? என்ற வினா.

    புதிய அரசியல் அமைப்பு யாக்க அவையில் தமிழர் பங்கு பற்றாததால் சைவத் தமிழச் சங்கிலியன் கையளித்த சைவத் தமிழரின் இறைமை கத்தோலிக்கப் போர்த்துக்கேயர், கிறித்தவ ஒல்லாந்தர், கிறித்தவ ஆங்கிலேயர், சோல்பரி அரசியலமைப்பு எனச் சட்டத்தொடர்ச்சியாக 1972 மே 22ஆம் நாள் மீண்டும் தமிழரிடம் வந்தது.

    படைப் புரட்சி வழியாகச் சூடான் நாட்டில் சட்டத் தொடர்ச்சியற்ற ஆட்சியை அமைத்தார்கள்.

    தமக்குத் தாமே விடுதலையை (Unilateral Declaration of Independence) அறிவித்துச் சட்டத் தொடர்ச்சியற்ற  ஆட்சியை சிம்பாப்வேயில் வெள்ளையர் அமைத்தனர்.

    இலங்கையில் நாடாளுமன்றத்துக்கு அப்பால், சோல்பரி அரசியலமைப்புக்கு அப்பால், நவரங்கல மண்டபத்தில் கூடி, நாடாளுமன்றத்துக்கு வெளியே கூடி, சட்டத் தொடர்ச்சியற்ற ஆட்சியைச் சிங்களவர், புத்த சமயத்துக்கு முன்னுரிமையுடன் அமைத்தனர்.

    சைவத் தமிழ் மன்னன் சங்கிலியன் கையளித்த தமிழரின் இறைமையை, ஆட்சி உரிமையாக்கப் புதிய அரசியலமைப்பு இடம் தராது. சட்டத் தொடர்ச்சியற்ற அரசியலமைப்பு இடம் தராது எனக் கொழும்பில், மூவர் நீதிமன்றத்தின் முன் 1976இல் இராணியின் வழக்குரைஞர், சட்டத்தரணி திரு மு. திருச்செல்வம் அவர்கள் வாதிட்டார்.

    தமிழரின் ஆட்சியின் எதிர்காலம் சைவத் தமிழ்ச் சங்கிலியன் விட்டுச் சென்ற சட்டத் தொடர்ச்சிப் பங்களிப்பு இன்றி இல்லை, எனத் திரு மு. திருச்செல்வம் அவர்கள் வாதிட்டார்.

    அவருடைய வாதத்துக்கு அமையச் சங்கிலியன் கையளித்த இறைமையைத் தமிழரின் ஒப்புதலின்றி ஆட்சியுரிமை ஆக்க எவராலும் முடியாது.

    ஈழத் தமிழரின் இறைமை, போரில் தமிழரிடம் இருந்து பறிபோன நாள், அதன் நினைவு நாள், அதன் 401ஆண்டு ஆண்டு நினைவு நாள் இன்று.

    கலியுகம் 4720, சகாப்தம் 1541, திருவள்ளுவராண்டு 1650, விபவ ஆண்டு, 27 வைகாசி புதன்கிழமை (05.06.1619) தேய்பிறை எட்டாம் நாள் அட்டமி பூரட்டாதி நட்சத்திரம் அன்று சைவத்தமிழ் அரசு வீழ்ந்தது. வீழ்த்தியவர்கள் மேலைநாட்டுக் கத்தோலிக்கப் போர்த்துக்கேயர்.

    கலியுகம் 5121, சகாப்தம் 1942, திருவள்ளுவராண்டு 2051, சார்வரி ஆண்டு, 30, வைகாசி சனிக்கிழமை (13.06.2020) தேய்பிறை எட்டாம் நாள் அட்டமி பூரட்டாதி நட்சத்திரம் அன்று சைவத்தமிழ் அரசு வீழ்ந்து 401ஆவது ஆண்டு. அதுவே சங்கிலியன் நினைவு நாள்.

    Share
  • தொல்தமிழகத்து விருந்துணவில் முதன்மை பெற்ற இனிப்பு

    தொல்தமிழகத்து விருந்துணவில் முதன்மை பெற்ற இனிப்பு

    ச.கண்மணி கணேசன் (ஓய்வு),
    முதல்வர்& தமிழ்த்துறைத்  தலைவர்,
    ஸ்ரீகாளீஸ்வரி கல்லூரி, சிவகாசி.
    kanmanitamilskc@gmail.com

    முன்னுரை

    பண்டைத்தமிழர் உணவுமுறை பற்றிக் கட்டுரைகள் உள; எனினும் விருந்துணவில் முதன்மை பெற்ற இனிப்பு பற்றி ஆழமாகவும் முழுமையாகவும் கூர்ந்து நோக்கி விளக்குவது இக்கட்டுரையின் நோக்கமாகும். அகநானூறு – 86ம் & ஐங்குறுநூறு – 211ம்; இவ்இனிப்புப் பண்டம் பற்றித் தெளிவாகவே பேசுகின்றன. புறநானூறு-381 அதே இனிப்பைக்  குறிப்பாகச் சுட்டுகிறது.

    இனிப்பு எது?

    திருமண விருந்தை விவரிக்கும் அகப்பாடலில் உழுந்தங்களி இடம்பெறுகிறது. அது நல்லாவூர் கிழாரின்;

    “உழுந்து தலைப்பெய்த கொழுங்களி மிதவை”(அகம்.- 86) என்று தொடங்கும் பாடலாகும். மேற்சுட்டிய பாடலடி மூலம் அறியக்கூடிய செய்திகளாவன:

    1. இப்பண்டத்தில் உழுந்து தலைமைப் பொருளாகும்.
    2. அது ‘களி’ என்று சொல்லக்கூடிய பதத்தில் இருந்தது.
    3. அதில் ஊட்டச்சத்து மிகுவதற்கேற்ப பிற பொருட்களும் சேர்க்கப்பட்டன.
    4. அத்துடன் சேர்த்துச் சுவைக்க ஒரு நீர்மப் பொருள் பயன்பட்டது.

    ‘உழுந்து தலைப்பெய்த’ என்னும் தொடர்; இவ்வுணவுப் பண்டத்தில் உழுந்தே முதன்மைப் பொருள் என்று உணர்த்துகிறது. ஏனென்றால் துணைப்பண்டத்தைத் தொகைஇலக்கியம் ‘கண்ணுறை’ என்று சுட்டுகிறது. சான்றாக ஒளவையாரின் புறநானூற்றுப் பாடல் (பா – 140) கீரை சமைக்கக் கண்ணுறையாகச் சில அரிசி வேண்டியமை பற்றிக் குறிப்பிடுகிறது. ஒளவை சு.துரைசாமிப்பிள்ளை இப்பாடல் சுட்டும் அரிசி துவரை மணிகள் என்றே உரை கூறுகிறார். இன்றளவும் கீரைக்கூட்டுக்குத் துவரம்பருப்பு சேர்க்கும் வழக்கம் உள்ளது. பக்கஉணவாகிய கீரையில் துணைப்பொருளாக அமையக்கூடிய துவரையைக் கண்ணுறை என்று ஒளவையார் கூறுவதால்; அதற்கு மறுதலைப்பட்டு ‘உழுந்து தலைப்பெய்த’ என்னும் தொடர் உழுந்தை முதன்மைப் பொருள் என்றுரைப்பது உறுதிப்படுகிறது.

    ‘கொழுங்களி’ என்னும் தொடர் அவ்வுணவுப் பண்டத்தின் பதம் பற்றியும், அது வளமான பிற பொருட்களுடன் சேர்த்துச் சமைக்கப் படுவதையும் குறிப்பாகப் புலப்படுத்துகின்றது. தொகை இலக்கியத்தில் ‘கொழு’ என்னும் பண்புப் பெயர்ப் பகுதி ‘வளம் மிகுந்த’ என்னும் பொருளில் பயின்று வருகிறது.

    “கொடுத்த தந்தை கொழுஞ்சோறு கொள்ளாள்” (நற்றிணை – 110) இங்கு கொழுஞ்சோறு வளம் மிகுந்த சத்துணவு என்றே பொருள்படுகிறது. இதே  போன்றே ‘கொழுங்களி’ எனும் தொடருக்கும் பொருள் கொள்வது  ஏற்புடைத்து.

    மிதவை என்னும் சொல் உணவுடன் சேர்க்கும் நீர்மப் பொருளைக் குறிக்கும். மலைபடுகடாம் அவரைப்புளிங்கூழ் ஊற்றிய மூங்கிலரிசிச் சோறு பற்றிப் பேசும்போது;

    “வேய்கொள் அரிசி மிதவை சொரிந்த
    சுவல்விளை நெல்லின் அவரையம் புளிங்கூழ்” (அடி- 435)

    என்கிறது. நீர்மப்பொருளையே ‘சொரிந்த’ என்ற சொல்லால் குறிக்க இயலும். பாலூற்றி உண்ணும் உணவு ‘பாலின் மிதவை’ என்று அழைக்கப்படும் (மலைபடுகடாம்- அடி- 417). தயிர் ஊற்றிய உணவு ‘தயிர்மிதி மிதவை’ (அகம்- 340) என்று அழைக்கப்பட்டது. மோர்க்குழம்பு “ஆய்மகள் அட்ட அம்புளி மிதவை” (புறம்- 215) என்றழைக்கப்பட்டது. இதனால் உழுந்தங்களியுடன் சேர்த்த மிதவை ஒரு நீர்மப் பொருள் என்று ஐயமின்றித் தெளியலாம்.

    ஐங்குறுநூறு உழுந்தாலான உணவு கெட்டுப்போவது பற்றிப் பேசுகிறது.  “நெய்யொடு மயக்கிய உழுந்து நூற்றன்ன” (பா- 221)

    என்னும் தொடர் காண்க. அத்துடன் அகநானூறு உழுந்தங்களியைக் ‘கொழுங்களி’ என்றழைத்த காரணமும் இப்பாடலடியில் வெளிப்படுகிறது. ‘நெய்யோடு மயக்கிய’ செய்முறை; மிதமிஞ்சிய நெய் சேர்த்துச் செய்யப்பட்டது என்னும் பொருளைத் தருகிறது. உழுந்தங்களி கிண்டும் போது அளவிறந்த நல்லெண்ணெயைக் குடிக்கும் என்பது நடைமுறை உண்மை. இங்கே சுட்டப்படும் நெய் எள்ளிலிருந்து எடுக்கப்படுவதாகும்.

    தொகைநூற் காலத்தில் எள்ளினின்றும் எடுக்கப்படுவது நெய் என்றே அழைக்கப்பட்டது. மலைபடுகடாம் ‘ஒருபிடி அளவிற்றாய தண்டில் ஏழு காய் அளவு நெய்மிக்கு எள் விளைந்திருந்த தன்மையை;

    “கெளவை போகிய கருங்காய் பிடியேழ்
    நெய்கொள ஒழுகின பல்கவர் ஈர்எள்” எனப் பாடி எள்ளில்
    இருக்கும் நெய்யைச் சுட்டுவது காண்க.

    பொ.வே.சோமசுந்தரனார் மேற்சுட்டிய ஐங்குறுநூற்றுப் பாடலுக்கு உரை எழுதுங்கால்; அதை உழுந்தங்களி என்று சுட்டவில்லை; மாறாக உழுந்தினின்று செய்யப்படும் வடகம் என்கிறார். இது ஏற்றுக்கொள்ளத் தக்கதன்று. ஏனெனில்; அப்பாடலடியில் ‘நூற்றுப் போவதைப் போல’ என்னும் உவமை இடம் பெறுகிறது. வடகம் என்னும் உணவு வகை வெய்யிலில் காயவைத்துச் செய்யப்படும். அது நூற்றுப் போக வழியில்லை. ஆனால் உழுந்தில் செய்த பிற உணவுப்பண்டங்கள் நூற்றுப்போகும் வாய்ப்பு மிகுதி. ‘ஊசிப்போதல்’ என்ற இக்கால வழக்கே பாடலில் நூற்றுப்போதல் எனச் சொல்லப்படுகிறது. ஊசிப்போன உழுந்துப் பலகாரத்தில் இருந்து கெட்ட வாடையுடன் நூல்போன்ற கசிவு ஏற்படும். இந்த நடைமுறை அனுபவ அறிவுடன் கபிலர் பாடியிருப்பது வியந்து போற்றத்தக்கது. உழுந்தங்களி உண்ணக் காலம் தாழ்த்தினால் நூற்றுப் போய் உண்ணத் தகுதியற்றதாகிவிடும்; அதுபோல் தலைவன் தந்த தழையாடையை ஏற்றுக்கொண்டு அணியாவிடில் வாடிப்போய் உடுத்தும் தகுதியை இழந்துவிடும் என்பதே பாடலின் பொருளாகும்.

    கரும்பனூர் கிழானைப் பாடும் புறப்பாடலில் உழுந்தங்களி ‘மிதவை’ என்று அழைக்கப்பட்ட காரணம் இடம்பெறுகிறது. அவன் கலைஞர்களை எவ்வாறு விருந்தயர்ந்தான் எனப் புலவர் பாடும்போது அவனளித்த உணவு வகைகள் இடம் பெறுகின்றன. அவ்வரிசையில்;

    “பாகின் கொண்டவும்” (புறம் – 381) எனும் தொடர் உள்ளது.

    பாலோடு சேர்த்துண்பவற்றையும்; பாகோடு சேர்த்துண்பவற்றையும் தாராளமாகக் கொடுத்தான் என்கிறார். பண்டைத் தமிழகத்துப் பாகு கருப்பட்டி என்று இன்று அழைக்கப்படும் பனம்பாகு ஆகும். இன்றும் உழுந்தங்களிக்கும், வெந்தயம் சேர்த்துச் செய்யும் வெந்தயக்களிக்கும் நடுவில் குழித்து; கருப்பட்டிப்பாகு ஊற்றிச் சேர்த்துச் சுவைக்கும் வழக்கம் உள்ளது. பாகு நீர்மப் பொருளாகையால் அத்துடன் சேர்த்து உண்ணும் களியை மிதவை என்று பாடியுள்ளனர்.

    விருந்து முறை:

    அகநானூற்றுப் பாடல் திருமணநிகழ்வுகளை வரிசைப்படுத்துங்கால்;

    “உழுந்து தலைப்பெய்த கொழுங்களி மிதவை
    பெருஞ்சோற்று அமலை நிற்ப” (மேற்.) என முதலில்

    விருந்தை வருணிக்கிறது. அந்த விருந்தில் முதலிடம் பெற்றது உழுந்தங்களி ஆகும். அதைத்தொடர்ந்து பெருஞ்சோற்றமலையுடன் விருந்து தொடர்ந்து நடந்தது  என்கிறார். இன்று உலகமயமாகும் சூழலில் ஐந்து நட்சத்திர உணவகங்களில் dessert என்று அழைக்கப்படும் இனிப்பு வகைகள் உண்ணும் வரிசையில் பின்னிடத்தைப் பெறுகின்றன. உணவக மேலாண்மையியல் சொல்லும் பாடங்களும் இனிப்பை இறுதியில் வழங்குவதை அறிவுறுத்துகின்றன. ஆனால் தமிழகப் பாரம்பரியம் விருந்தில் இனிப்பை முதலில் பரிமாறும் வழக்கத்தை ஈராயிரம் ஆண்டுக்காலப் பழமை வாய்ந்தது என்று காட்டுவது அறிந்து இன்புறத்தக்கது.

    முடிவுரை:

    பண்டைத் தமிழரின் ஒவ்வொரு உணவுமுறையையும் இங்ஙனம் ஆழமாக நோக்கும்போது உணவுமுறை சார்ந்த பண்பாட்டு நுட்பங்கள் புலப்பட வாய்ப்பு உள்ளது. அன்றைய திருமணவிருந்திலும், கலைஞர்க்குத் தலைவர் கொடுத்த விருந்திலும் முதலிடம் பெற்றது உழுந்தங்களி என்னும் இனிப்பு ஆகும்.

    Brief note on author

    Dr.(Mrs)S.Kanmani Ganesan a lecturer in Tamil published ‘chilappathikaaram kaattum naadum nakaramum’- her Ph.D thesis in 1992. It’s worthy to mention her publication – ‘Murukan Cult In Cilappathikaaram’ in Murukan The Lord Of The Kurinchi Land released by the Institute Of Asian Studies, Chennai. She has also translated the traumatology section of the book- An Introduction To Orthopaedics And Traumatology authored by Dr.M. Natarajan as ‘kaaya aruvaiyiyal maruththuvam’ which was published by the Madurai Kamaraj University; sponsored by the Text Book Society of Tamilnadu, Chennai. The booklet makalir udalnalach chikkalkal was published by her as the proceedings of a symposium sponsored by the UGC, New Delhi. She retired as a principal of an autonomous institution.

     

    Share
  • எழுவகைப் பெண்கள் – 17: பெண்களைக் குறிவைத்துப்  பணம் பண்ணும் கேசப் பொருள் வர்த்தகம்

    எழுவகைப் பெண்கள் – 17: பெண்களைக் குறிவைத்துப்  பணம் பண்ணும் கேசப் பொருள் வர்த்தகம்

    அவ்வைமகள்

    பெண்களைக் குறிவைத்துப்  பணம் பண்ணும் கேசப் பொருள் வர்த்தகம்  

    தலைமுடியைப் பற்றிய அறியாமை, அறிவியல் நூற்றாண்டான இந்த நூற்றாண்டில் மிகுந்திருப்பது வருத்தமே! இன்று பெண்கள், மாபெரும் வணிகப் பொறியில் மாட்டிக் கொண்டிருக்கிறார்கள். கேசப்பொருட்கள் வர்த்தகம் பெண்களின் புத்தியை மழுக்கி, அவர்கள் அவசர முடிவு எடுக்குமாறு வணிகக் கவர்ச்சிகள் காட்டி, வெகு வசமாய் அவர்களைப் பிடித்து வைத்துக் கொண்டிருக்கிறது.

    இன்று, கேசப்பொருள் வணிகம் பில்லியன் டாலர் வணிகமாகக் கொழித்துச் செழித்துக் கொண்டிருக்கிறது என்றால் அதற்குப் பெண்களே மூல காரணம். பெண்களின் ஆதரவினால் மட்டுமே இந்த வணிகம் நடக்கும் என்பதால் என்னென்ன வியாபாரத் தந்திரங்கள் உண்டோ அவையனைத்தும் பிரயோகிக்கப்படுகின்றன.  கேசப்பொருள் வணிகத்தின் ஒரே குறிக்கோள் என்னவென்றால், பெண்களை இந்த வணிகத்தில், தொடர் வாங்குவோர்களாக, தொடர் நுகர்வோர்களாக தக்கவைத்துக்கொள்ள வேண்டும் என்பதே.

    பெண்கள், ஆண்களின் சார்பின்றி சுயமாக இயங்கும் திறனை. சுயமாகக் கடைக்குச் சென்று பொருட்கள் வாங்கும் திறனை வெகு சாதுரியமாய் கேசப்பொருள் வணிகம் பயன்படுத்திக் கொண்டு வருகிறது. வறுமையில் வாடுபவர்கள் கூட, கணிசமான தொகையை, கேசப்பொருட்களுக்காகச் செலவிட வேண்டிய துர்ப்பாக்கிய நிலை இன்று என்பது உலகளாவிய விஷயமாய் நிலைபெற்றிருக்கிறது.

    இந்நிலையில், தலைமுடியின் நுண்ணமைப்பு மற்றும் அதன் பண்புகளை அனைவரும் தெரிந்துகொள்ளுமாறு செய்வது நமது தலையாய கடமையாயிருக்கிறது. குறிப்பாகப் பெண்களுக்கு, தலைமுடியின் அமைப்பு, அதன் தன்மைகள் ஆகியன அத்துப்படியாகத் தெரியவேண்டும். ஒவ்வொரு பெண்ணுக்கும் தலைமுடி பற்றிய ஞான வெளிச்சம் உண்டானதென்றால், அவளது குடும்பமே கேச ஆரோக்கியத்தில் கவனம் செலுத்தத் தொடங்கிவிடும்! ஏனெனில், ஒரு  குடும்பத்தின் ஒட்டுமொத்த உடல்நலப் பாதுகாப்பும் பெண்ணின் கையில் தான் இருக்கிறது.

    எனவே அதுபற்றி நாம் முதலில் பேசுவது நல்லது என்றார் – தொடர்ந்தேன்.

    சுமார் 100 மைக்ரான் அளவு சராசரி தடிமன் மட்டுமே கொண்டது, மனிதத் தலைமுடி (17 முதல் 181 மைக்ரான் வரை  தடிமன் மாறுபடும்); அதன் புறப்பரப்பு மிக அதிசயமான  அமைப்போடு காணப்படுகிறது. தடவிப் பார்க்க வெகுசன்னமாய்த் தெரிகிற தலைமுடியின் புறப்பரப்பு உண்மையில் ஒரு செதிலடுக்காகும். தலைமுடியின் புறப்பரப்பு Cuticle எனப்படும் தலைமுடிக் கவசத்தால் ஆனது.

    ஆம்! ஒன்றின் மீது செருகப்பட்ட எண்ணிறந்த நுண்ணிய செதில்களை, தலைமுடியின் புறப்பரப்பில் காணலாம். தலைமுடியின் புறப்பரப்பில் உள்ள செதில்களின் அடுக்கு முறை, ஓட்டு அடுக்கு முறை பாணியில் அமைந்துள்ளது. வீட்டின் கூரைமீது ஓடுகள் வேயப்படும்போது, இவ்வாறுதான் ஓடுகளை அடுக்குவார்கள். வீட்டின் கூரையின் ஓடுகள் கீழ்நோக்கி அமைந்திருப்பதைப் போலவே, தலைமுடியின் புறப்புரச் செதில்களும் கீழுநோக்கியே அமைந்துள்ளன.

    By Nicola Angeli/MUSEThis file was uploaded by MUSE – Science Museum of Trento in cooperationwith Wikimedia Italia. – MUSE, CC BY-SA 3.0, https://commons.wikimedia.org/w/index.php?curid=48293053

    இவ்வாறான செதிலடுக்கு கொண்ட புறப்பரப்பு, தலைமுடிக்கு மினுமினுப்பைத் தருவதோடு, நம் மீது விழும் ஒளி மற்றும் வெப்பத்தை வலுவாக எதிரொளிப்பதற்கான ஏற்பாடாகும். இவ்வகையில், homeostasis எனப்படும் உடல்வெப்பத் தகவுசீரமைப்பில் தலைமுடி முக்கியமான பங்காற்றுகிறது.

    தலைமுடியின் புறப்பரப்பு செய்யும் கூடுதல் பணி என்னெவென்றால், அது, சூழலிலிருந்து நம்மீது விழும் தூசு தும்புகள் மற்றும் நச்சுகள் யாவற்றையும் தன் மீது சேகரித்துத் துப்புரவு செய்கிறது. மேலும், அது முடியின் உள்பாகங்களுக்குப் பாதுகாப்புக் கவசமாய் இருக்கிறது. குறிப்பாக, தலைமுடியின் ஈரப் பதத்தைப் பாதுகாக்கிறது.

    தலைமுடியின் புறத்தோற்றம் ஓர் அதிசயம் என்றால், உட்தோற்றம் இன்னுமோர் அதிசயம். பார்க்கப் போனால், புறத்தைவிட, அகத்தின் அதிசயம் எண்ணுந்தோறும் எண்ணுந்தோறும் தொடர் அதிசயமாய் விரிகிறது. ஆம்! ஒவ்வொரு மயிரிழையும் ஒரு அற்புதச் சுரங்கம். வெளியிலிருந்து உள்நோக்கில், தலைமுடிக்குள் சென்று பார்த்தால், அதிநுட்பமான, அடுக்கடுக்கான புதையல் களஞ்சியத்தை அங்கே நாம் பார்க்க  முடியும். கீழே தரப்பட்டுள்ள படத்தைப் பாருங்கள் (https://www.mdpi.com/1420-3049/25/9/2143/htm) [1].

    தலைமுடியின் உள்கட்டமைப்பு பற்பல அடுக்குகளைக் கொண்டதாக இருப்பதை, படம் 2 ஐயும் படம் 3 ஐயும் சேர்த்துப் பார்த்தால் விளங்கும்.

    படம் 2: மனிதத் தலைமுடியின் படிநிலை உள்கட்டமைப்பு; Mullner , Alexander , R. M ., Ruben, Pahl, Doris, Brandhuber, Herwig Peterlik (2020). Porosity at Different Structural Levels in Human and Yak Belly Hair and Its Effect on Hair Dyeing, Molecules, 25(9), 2143; https://doi.org/10.3390/molecules25092143

    படம் 3. தலைமுடியின் குறுக்குவெட்டுத் தோற்றம்.
    https://biomedicalephemera.tumblr.com/post/66493115496/hair-cross-section-diagrams-and-representations/embed; A Treatise on the Diseases of the Skin. Dr. Henry W. Stelwagon, 1923

    தலைமுடியின் நெடுக்குவெட்டுத் தோற்றத்திலும், தலைமுடியின் அழகிய உள்ளமைப்புக் கட்டமைப்பைக் கூடுதலாக அறிந்துகொள்ள முடியும். இந்த நெடுக்குவெட்டுத் தோற்றத்தில், அடியிலிருந்து நுனி நோக்கிச் செல்வதான  அமைப்பு தெளிவாகக் காட்டப்பட்டுள்ளது. இந்தப் படத்தைப் பின்னாலும் நாம் உபயோகப்படுத்திப் பேசவிருக்கிறோம்.

    படம் 3. தலைமுடியின் நெடுக்குவெட்டுத் தோற்றம்.

    https://biomedicalephemera.tumblr.com/post/66493115496/hair-cross-section-diagrams-and-representations/embed; A Treatise on the Diseases of the Skin. Dr. Henry W. Stelwagon, 1923

    முதலாவதாக, க்யூட்டிகிள் எனப்படும் தலைமுடியின் கவசத்தின் தன்மையையும் அதன் செயல்களையும் அறிந்து கொள்வது ஒவ்வொருவரின் கடமையாகும். ஏனெனில். தலைமுடியின் தலையாய பிரச்சினைகள் க்யூட்டிகிளில்  தான் தொடங்குகின்றன.  “எனக்கு அறிவியல் ஞானம் இல்லை” “எனக்கு அறிவியல் ஆர்வம் இல்லை“ என்று எவரும் சொல்லிவிடக் கூடாது. சிறிது  நேரத்தை  இதற்கென  ஒதுக்கி,  ஒவ்வொருவரும், மிகக்  குறிப்பாகப் பெண்கள், இதனை நன்கு அறிந்து புரிந்துகொள்ளுதல் வேண்டும்.

    க்யூட்டிகிளின் செதில்கள் புரதத்தால் ஆனவை. இந்தச் செதில்களுக்கு இடையில் க்யூட்டிகிள் – க்யூட்டிகிள் செல் இழைக்  குழம்பு (Cuticle-Cuticle Cell Membrane Complex)  எனும் பொருள் இருக்கிறது. இதனை CCMB என்று சுருக்கமாக அழைக்கிறார்கள். CCMB-யில் என்னென்ன அடக்கம் என்றால்: டெல்டா மற்றும் பீட்டா புரதங்கள், 18- மீத்தைல் எய்க்கோசனாயிக் அமிலம் (18-methyl eicosanic acid), மற்றும் கட்டில்லாத அமிலங்களாக, ஒலியிக் அமிலம் மற்றும் பால்மிடிக் அமிலம் ஆகியன உள்ளன.

    இதில், 18- மீத்தைல் எய்க்கோசனாயிக் அமிலம், சுருக்கமாக 18-MEA என்று அழைக்கப்படுகிறது.

    CCMBயில், 18MEA எவ்வாறு அமைந்திருக்கிறது என்றால், அது  பீட்டா புரதங்களோடு,  கொவேலன்ட் பிணைப்புகளால் இணைக்கப்பட்டிருக்கிறது. கோவலன்ட் பிணைப்புகள் வெகு உறுதியான பிணைப்புகள் ஆகும்.

    CCMB குழம்பு என்ன செய்கிறதென்றால் முடிகளின் செதில்களுக்கு இடையே, ஒரு மெத்தை போன்று, சிமெண்ட் போன்று செயல்பட்டு, செதில்களைப் பிணைத்தும் அவற்றிற்கு இடையே ஒரு உயவு எண்ணெய் ஆகவும்  ஒரே நேரத்தில் செயல்பட்டு,  முடியின் செதில்கள் பிரியாமல் –  விரியாமல் காக்கிறது. முடியின் செதில்கள்  பிரியாது விரியாது இருப்பது தலைமுடியின் ஆரோக்கியத்துக்கு, மிக முக்கியமானது.  இதில் 18MEA செய்கிற பணி அதிமுக்கியமானது. முடியின் மிருதுத் தன்மைக்கும், வளைந்து நெளியும் இசைவுத்தன்மைக்கும், மினுப்புத் தோற்றத்திற்கும்   எது காரணமாகிறது என்றால், அது 18MEA தான்.

    மேலும், முடிக்கு Hydrophobicity எனப்படும் நீர் எதிர்ப்புத் திறனை 18MEA  தருகிறது. இதனால் தலையில் நீர் பட்டதென்றால், தாமரையிலையில் தண்ணீர் பட்டாற்போல், நீர் துளித்து நிற்கும் – முடியை நனைக்காது. இதனால், எந்தச் சூழலிலும் வெளியிலிருந்து அதிக நீரை முடி உறிஞ்சாதவாறு 18MEA காக்கிறது.

    நவீனம் – மாடர்னிசம் – என்றாகியிருக்கிற இந்த காலக்கட்டத்தில், ஏறக்குறைய அனைவருமே, 18MEA சிதிலம் அடைந்தவர்களாக இருக்கிறார்கள். காரணம் என்னவென்றால், ஷாம்பூ, கண்டிஷனர், சாயம், ஸ்டைலிங் ஜெல், என்று பல்வேறு வேதிப்  பொருட்களைப் பயன்படுத்துவதும், மற்றும் தலைமுடியை அயர்ன் செய்வது, போன்ற பழக்கங்களால்.

    ஷாம்புக்கள், ஆல்கலைன் பி. எச் எனப்படும் அளவீடு கொண்ட காரவகைப் பொருட்களால் ஆனவை. இவை 18-MEA உடன் வேதிவினை புரிந்து 18-MEAஐ அழித்துவிடுகின்றன. கண்டிஷனர்கள் தேவையற்ற ஒரு பூச்சை க்யூட்டிகிளின் மேல் இட்டு, தேவையற்ற எடையை முடியின் மீது ஏற்றி க்யூட்டிகிளைப் பிய்த்து இழுத்து முறிக்கின்றன. இதற்கு மேலாக, கூடுதல் சிதைவு, ஹேர் ட்ரையர் எனப்படும் உஷ்ண உலர்த்திகளால் நடைபெறுகிறது.  உஷ்ண உலர்த்திகள், க்யூட்டிக்கிளின் செதில்களை அகட்டி விரித்து, செதில்களுக்கு அடியில் இருக்கிற CCMB குழம்பை, துரத்தி வெளியேற்றி, வறள வைக்கிறது.

    இதனால், முடி உலர்ந்து, உறுதி இழந்து, பலவீனமாகி அறுந்து போகும் தன்மையை அடைகிறது; பல நேரங்களில் முடி, வேரோடு உதிரும் நிலையம் உண்டாகிறது. இருக்கும் முடிகளும் கூட நுனி வெடித்துப்  பிளந்து கதிர் கதிராய் விரியும்.

    க்யூட்டிகிள் பாதிக்கப்பட்டால், வேரறுபடுவது புரியவில்லையே என்று நீங்கள் கேட்கலாம்.

    முடியின் நெடுக்கு வெட்டுத் தோற்றத்தைப் பார்த்தால் க்யூட்டிகிளுக்கும், வேருக்கும் உள்ள தொடர்பு புரியும். க்யூட்டிகிள் வேரிலிருந்து தொடங்குவது, எனவே வேருக்கும் க்யூட்டிகிளுக்கும்  நேரடித் தொடர்பு உள்ளது. க்யூட்டிக்கிள் பாதிக்கப்பட்டதென்றால் வேரும் பாதிக்கப்படுகிறது. கியூட்டிகிள் பலவீனமாகும் ஒவ்வொரு தருணத்திலும் வேரும் பலவீனமாகிறது.

    இங்கு நாம் வேர் என்று குறிப்பிடுவது முடியின் அடியில் உள்ள குமிழி போன்ற பகுதி; இது Hair Bulb எனப்படுவது. இந்த, வேர் எனப்படும் முடியின் அடிக்குமிழி, உண்மையில் ஸ்கால்ப் (Scalp) எனப்படும் மண்டைத் தோலுக்கு உள்ளே, அடியில் இருக்கிறது. இதனை, படம் 5இல் பார்க்க முடியும்.

    படம் 5. முடியின் வேர்;  https://link.springer.com/protocol/10.1385/0-89603-441-0:101

    நாம் ஏற்கனவே பார்த்தது போல 1900 களின் தொடக்கத்தில் ஏற்பட்ட கொள்ளை நோய்களுக்கு முடி ஒரு ஊடகமாக இருந்தது என்கிற காரணத்தால், தலைமுடியில் தொற்றிக்கொள்ளும் நோய்க்கிருமிகளைக் களைந்து, முடியைக் கழுவி எடுப்பதற்கான முயற்சிகளில் உருவானதே ஷாம்பூ. அதைத் தொடர்ந்து அது நம்மிடையே நின்றுவிட்டதன் காரணம் விளம்பரங்கள் மட்டுமே. விளம்பரங்களின் மாய வலையில் மாட்டிக்கொண்ட பின் – அதிலேயே நாம் நின்றுவிட்டோம். ஷாம்பூவால் மண்டைத் தோலுக்கும், தலைமுடிக்கும் ஏற்பட்டுள்ள கேடுகள் ஒன்றா இரண்டா?  ஒவ்வாமை வியாதிகள் எத்தனை?

    நல்ல தலைமுடி ஆரோக்கியத்திற்குப் பேர்போனவர்களான கிழக்கு நாடுகளிலுள்ள மக்கள் யாவரும் முன்னெப்போதும் காணா தலைமுடி உதிர்வு, சொட்டை விழுதல், வழுக்கை ஆகிய வியாதிகளால் தாங்கொணா மன உளைச்சலும் பணச் செலவுமாக இன்று அலைந்து வருந்தி வருவது தலைமுடிக்காக விற்கப்படும் பொருட்களால் தான் என்றால் அது மிகையில்லை.

    அது மட்டுமல்ல, ஷாம்பூ, கண்டிஷனர், கேசச் சாயம், போன்ற வேதிப் பொருட்கள், குளியலறையிலிருந்து வெளியேறிப் பொதுக்கழிவில் கலந்து, வாய்க்காலோடி, நீர்நிலைகள் யாவற்றிலும் கலந்து, எத்தனை எத்தனையோ உயிரினங்களைக் கொன்றுள்ளன. இன்னமும் கொன்றுகொண்டே இருக்கின்றன.

    ஷாம்பு மற்றும் கண்டிஷனர்களில் உள்ள நுரை ஏற்படுத்தும் வேதிப்பொருட்கள், Eutrophication அல்லது Algal Bloom எனும் ஒரு கெடுதல் நிகழ்வை நீர் நிலைகளில் ஏற்படுத்தி, நீர்ப் பரப்பில் நஞ்சு மிகுந்த களைகளையும் பாசியையும் ஆல்காக்களையும் வளர்த்து. நீரில் கரைந்துள்ள உயிர்வாயுவான ஆக்சிஜனைக் கபளீகரம் பண்ணி, தவளை, தேரை, மீன், நண்டு, உள்ளிட்ட பல்வேறு உயிரினங்கள் வாழ இயலாதவாறு செய்கின்றன.

    ஷாம்பு  கேசச் சாயம் போன்றவற்றில் உள்ள பிற வேதிமங்களோ  உண்மையில் நச்சுத் தன்மை உடையன. அவை கொஞ்சம் கொஞ்சமாகச் சேர்வதுபோல் சேர்ந்து, சிறுதுளி பெருவெள்ளமாய், அளவு கூடி நிறைத்த நச்சூட்டலை நீர்நிலைகளில் நிகழ்த்திவிடுகின்றன. இவ்வாறான நீர்நிலைகளில் அற்ப சொற்பமாக வாழ்கிற மீன், நண்டு ஆகியன நச்சூட்டப்பட்ட நிலையில் தான் இருக்கின்றன. இவற்றை நாம் உணவாக உண்ணும்போது நாம் நஞ்சையும் சேர்த்துத்தான் உண்ணுகிறோம். கழிவுநீர்க் கால்வாயின் இருமருங்கிலும், நீர்நிலைகளின் கரைநெடுகிலும் நிலமும் நச்சூட்டப்படுகிறது, இந்நிலையில், அங்கு வளரும் தாவரங்கள் எவ்வாறு நச்சூட்டம் ஏற்படாமல் தப்பிக்க முடியும்?

    ஆக, நாலு சுவருக்குள் நாம் செய்கிற மதியீனமான செயல்கள் எத்தனை பெரிய சமுதாய அழிவை உண்டாக்குகின்றன என்பதை நாம் கருத்தில் கொள்ளவேண்டும்.

    ஷாம்பு, கண்டிஷனர், சாயம், இத்யாதிகள் வருகின்ற பாட்டில்கள், குப்பிகள், முதலியன சேர்க்கும் குப்பைகளுக்கு அளவுண்டா? இவற்றையும் நாம் காசு கொடுத்துத் தான் வாங்குகிறோம்! அவற்றைக் குப்பையில் வீசி, அந்தக் குப்பையை அள்ளவும் கூட நாம் தான் பணம் தருகிறோம். என்ன வேதனை இது? இந்தக் குப்பைகள் யாவும் அழியாக் குப்பைகள். பூமியின் பாரத்தைத் தெடர்ந்து ஏற்றுவதோடு – பூமியின் வெப்பமிகுதிக்கும் காரணமாகின்றன. என்ன வேதனை இது?

    மேற்கத்திய நாடுகள் தாம் அறியாமையாலும் ஆணவத்தாலும் தவறு செய்கின்றன என்றால், கிழக்கும் இத்தவறுக்கு உடந்தையானது ஏன்?

    பூர்வீகமான சுதேசி ஞானத்தை விடுத்து, நவீனத்தைத் தழுவியதால்தான், கேச ஆரோக்கியத்தில் இன்று துர்பாக்கியமான நிலைமையைக் கிழக்கு நாடுகள் சந்தித்துக் கொண்டிருக்கின்றன! கிழக்கத்திய நாட்டு மக்கள்,  பொதுவாகவே, பாதுகாப்பு உணர்வு கொண்டவர்கள். இயற்கைப் பொருட்களில் நாட்டம் கொண்டவர்கள். இயற்கைப் பொருட்களாலான சிறப்புக் கலவைகளால் கேசம் கழுவும்  பழக்கம் கொண்டவர்கள். அதனை அவர்கள் மறந்ததும் துறந்ததும் துர்பாக்கிய நிலையே.

    இதில், இந்தியா, தலைசிறந்த விஞ்ஞான அறிவியல், தொன்மை உடையது. இந்தியர்களுக்கு இருக்கிற தாவரவியல் ஞானம் ஒப்பாரும் மிக்காரும் இல்லாதது. அதுவும், “Phytochemistry” எனப்படுகிற தாவரவேதியியலில் இந்தியர்களுக்கு இணை உலகில் எவருமில்லை என்றே சொல்லலாம். பி. ராமச்சந்திரன் பய், டி. ஆர். கோவிந்தாச்சாரி போன்ற புகழ்மிக்க தாவர வேதியியல் விஞ்ஞானிகளை உலகிற்கு வழங்கிய பெருமை, தமிழகத்திற்கு  உண்டு. இன்று நம்மிடையே வாழ்ந்து கொண்டிருக்கிற எஸ். பி. தியாகராஜன் – கீழாநெல்லியிலிருந்து மஞ்சள் காமாலைக்கு மருந்து கண்டுபிடித்து உலகம் முழுமைக்கும் வழங்கியிருக்கிற பெருமையை நாமறிவோம்.

    தமிழ் மருத்துவ முறை என்று பெருமையாகச் சொல்லப்படும் சித்த மருத்துவ முறை முழுக்க முழுக்கத் தாவரப் பொருட்களையும் பூமியில் உள்ள இயற்கைத் தாதுக்களையும் மட்டுமே பயன்படுத்துவது. அதர்வண வேதம், ரிக் வேதம், மற்றும், சுஷ்ருத  ஸமிதா ஆகியவற்றில். எண்ணிறந்த தாவரங்களும், அவற்றில் இருக்கிற மருந்துப் பொருட்கள் பற்றியும் விரிவாகப் பேசப்பட்டுள்ளது. ஆயுர்வேத மருத்துவ முறை, இம்மூன்று நூல்களும் தரும் ஞானத்தின் கட்டமைப்பில் உருவாக்கப்பட்ட மருத்துவ முறையாகும்.

    “Wealth of India” என்று தலைப்பிடப்பட்டு பதினொரு பாகங்களாக வெளியிடப்பட்டுள்ள இந்திய அரசின் புத்தகத் தொகுப்பில், பாரத நாட்டின் பொக்கிஷங்களான தாவரங்கள் அனைத்தும் பட்டியலிடப்பட்டுத் தொகுக்கப்பட்டுள்ளன. இவற்றையெல்லாம் நாம் மறந்தது எப்படி?

    எங்கள் மக்கள், சிகைக்காய்ப் பொடி என்னும் ஒரு  அதியற்புதமான பொடியை, தேர்ந்தெடுத்தப் பல தாவரப் பொருட்களைச் சேர்த்து அரைத்துத் தயாரிப்பர். அதனைச் சோறு  வடித்த கஞ்சியில் கரைத்து.  அந்தப் பசையைக் கொண்டு, எண்ணெய்க்  குளியலில், தலையில் வைத்த எண்ணெய்ப் பூச்சை, இதமாய்க் கழுவி எடுப்பர், கேசம் துளியும் கெடாது, மெருகுடனும் வளத்துடனும், பட்டு போன்ற மிருதுத் தன்மையுடனும், ஒவ்வொரு பெண்ணும் பாதுகாத்து வாழ்ந்த மண்ணில் இன்று ஞானப் பஞ்சம் ஏற்பட்டு, மதியீனம் ஓங்கி வளர்ந்திருக்கிறது என்றால் இந்தத் துர்பாக்கிய நிலையை என்னென்று சொல்வது?

    சிகைக்காய்ப் பொடி என்பது நம்மவரின் மாபெரும் அறிவியல் கண்டுபிடிப்பு. சரியான pH சமநிலை, சரியான conditioning – ஈரப் பதனம், மிகச் சரியான போஷாக்கு, மிகச் சரியான கொரகொரப்புத்தன்மை, அற்புதமான வாசனை, நேர்த்தியாய்ச் சேர்த்த பாதுகாப்பான தொற்று நீக்கிகள், மிகச் சரியான நுரை வளம், நீர் நிலைகளுக்குப் பாதுகாப்பு, நிலத்துக்குப் பாதுகாப்பு எனச் சிகைக்காயின் பெருமைகளை அடுக்கிக்கொண்டே போகலாம்.

    பார்த்துக்கொண்டே இருங்கள் இந்த நூற்றாண்டிலேயே இதற்கு அமெரிக்காவிலோ அல்லது ஐரோப்பாவிலோ பேடண்ட் வாங்கிவிடுவார்கள். நாம் எவ்வெவற்றையெல்லாம் நமது பொக்கிஷம் எனப் பேணிக் காக்கத் தவறுகிறோமோ, அவையெல்லாம் இவ்வாறு தான், அடுத்தவன் அள்ளிக்கொண்டு போவதில் முடிவடைகின்றன.

    தலைமுடியின் வெளி உறையை மட்டுமே நாம் பார்த்திருக்கிறோம்.  உறைக்கு உள்ளே இருக்கிற, தலைமுடியின் உள் கட்டமைப்பின் முத்தாய்ப்பான விஷயங்களை அடுத்து நாம் கவனிக்க இருக்கிறோம்.

    (மேலும் பேசுவோம்)

    Share
  • இறையியல் சிந்தனைகள் – ஸ்டீவ் ஜாப்ஸும் வள்ளலாரும் – 21

    இறையியல் சிந்தனைகள் – ஸ்டீவ் ஜாப்ஸும் வள்ளலாரும் – 21

    அவ்வைமகள்

    21. ஞானோதயக் காலம் 

    இந்தியாவில், மக்களிடையே காணப்பட்ட சுதந்திரம் மிகுந்த சமயப் பழக்கங்களும் பயிற்சியும் மற்றும் மன்னர்களின் மூன்று தட்டு, தர்மபரிபாலனத்தில், அன்று காணப்பட்ட  செம்மையான முறைமைகள் ஆகியன  ஐரோப்பாவில் உதித்த, Age of Enlightenment எனப்படும் ஞானோதயக் காலம் பிறக்க முன்னோடிகளாக இருந்தன. ஞானோதயக் காலத்தின் நோக்கம் என்னவென்றால், ஆட்சிமுறைமை மூன்று தட்டுகளாக (சட்டம், நீதி, நிர்வாகம்) இருக்கவேண்டும் என்பதும், சமயம் என்பது  ஆட்சியாளர்கள் கையில் இல்லாமல், மக்கள் வாழ்வியலில், அவர்களது பரிபூரண மனச் சுதந்திரத்தில், சனாதனமாகப்   பொருந்தியிருக்க வேண்டும் என்பதாகும்.

    இந்நிலையில், சனாதனம் என்ன என்பதை அறிந்துகொள்ளுதல் நலம். சனாதனம் என்பது, இனம், நிறம், குலம், சாதி, பிறப்பிடம், வாழுமிடம், பேசும் மொழி, சமயம் சார்ந்த பழக்கங்கள், பொருளாதார  ஏற்றத்  தாழ்வுகள், இவற்றையெல்லாம் தாண்டி, ஒவ்வொரு தனி மனிதனுக்கும் இருக்கவேண்டிய இன்றியமையா நல்லொழுக்கங்கள்  (virtues) ஆகும். இந்த நால்லொழுக்கங்கள் யாவன என்றால்:  தூய்மை, நேர்மை, ஜீவகாருண்யம், நற்சிந்தை, கருணை, பொறுமை, சகிப்புத்தன்மை, சுயக் கட்டுப்பாடு, பெருந்தன்மை, விரதம் ஆகியன. இங்கு விரதம் என்பதைத் தியாகம் என்றும் கொள்ளலாம். அவரவர் வாழும் வாழ்முறை மற்றும் சூழலுக்கு ஏற்ப ஒவ்வொருவரும் இந்த நல்லொழுக்கங்களை அவர்களால் இயன்ற வகையால் ஆற்றுதல்  வேண்டும் என்பது தான் சனாதனத்தின் சாராம்சம். சமயத்தைவிட சனாதன தர்மம் தான் முக்கியமானது.

    சமுதாயம் என்பது தோப்பு; இதில் தனி மனிதர்கள், தனித்தனி தாவரம் போன்றவர்கள். தனி மனிதர்கள் சேர்ந்து சமுதாயம் எனும் தோப்பை உருவாக்கும்போது, தனிமனித ஒழுக்கங்கள் மற்றும் தனிமனித வளம் ஆகியனவற்றைப் பொறுத்தே, சமுதாயமெனும்  தோப்பின் ஒழுக்கமும் வளமும் அமைகிறது. எனவே, நல்லொழுக்கப் பண்புகள் யாவையும் உடைத்தவராய் தனிமனிதர்கள் உருவாக்கப்பட வேண்டும்  என்பது மட்டுமே சனாதன தர்மத்தின் நோக்கம்.

    இத்தகைய உன்னத  மார்க்கமான சனாதன தர்மத்தை அடைவதே, ஐரோப்பிய ஞானோதய காலத்தின் தலையாய நோக்கமாக இருந்தது. எனவே, ஞானோதய  கால முன்னோடிகளின் சித்தாந்தம் என்னவென்றால் – அவர்களால் வேண்டப்பட்டது, என்னவென்றால்: சனாதன தர்மம் கூறும் நல்லொழுக்கங்கள், தமக்கும், தம் சந்ததிகளுக்கும், பயிற்றுமாறு, பயிற்சிக்குமாறு அவரவர் தமக்குத் தோதான சமயப் பண்பாட்டு முறைமையை மேற்கொள்ளும் சுதந்திரம் வேண்டும் என்பதே. சமயம் என்பது தனிமனிதர்களின் கையில் இருக்கவேண்டிய கருவியே தவிர, ஆட்சியாளர்கள் கையில் இருக்கவேண்டிய ஆயுதம் இல்லை. 

    சமயத்தை ஆட்சியாளர்கள் தம் கையில் எடுத்துக்கொண்டு மனிதர்களையும் சமயத்தையும் ஆளக்கூடாது. சமயத்தை ஆளவேண்டியவர்கள்  மனிதர்களே தவிர, ஆட்சியாளர்கள் அல்லர்.

    இவ்வாறாக, ஞானோதய காலத்தில், ஐரோப்பா முழுவதும், சமயத்தை ஆட்சியாளர்களிடமிருந்து விலக்கப் போர்களும் போராட்டங்களும் நடக்க, அதே காலக்கட்டத்தில், மதவெறி பிடித்த, மதம் மூலம் மட்டுமே ஆட்சி நடத்தவேண்டும் என்கிற குறிக்கோள் கொண்ட ஐரோப்பியக் காலனி  ஆட்சியாளர்களோ,  தமது குடியேற்ற நாடுகளில், தமது ஆட்சிபலத்தின் முலம் கிறித்துவ மதத்தை, வன்முறையாக நிலைநாட்டலானார்கள். துரதிருஷ்டவசமாக, அன்று நம் தாய்நாடு காலனியாளர்கள் கைப்பிடியில் இருந்தது.

    புண்ணிய பூமி, ஞான பூமி, என்று ஆதி காலந்தொட்டே ஞானோதயக்  களஞ்சியமாக இருந்து வரும் பூமியாக நம் நாடு இருப்பினும், ஐரோப்பிய ஞானோதய காலத்தில், அந்த ஐரோப்பிய ஞானோதயத்துக்கே நம் நாடுதான் முன்மாதிரி நாடாய்க் கருதப்பட்டது என்றாலும் கூட, நம் நாட்டில், சுதேசி சமயமான இந்து சமயம், காலனி ஆதிக்க மதவெறியாளர்களால் கடுமையான சமய நெருக்கடிக்கு இலக்காகிறது.

    எனவே, அக்காலக்கட்டத்தில், இந்து சமயம்,  முன்னெப்போதும் இல்லாத முனைப்போடு எழுந்து நின்று, தனது கால்களைத் தன் சொந்த பூமியில் நிலைநாட்ட வேண்டிய  நிர்ப்பந்தம்  எழுந்தது.

    இந்தக் காலக்கட்டத்தை, இந்தியாவின் புதிய ஞானோதய காலம் என்று அழைப்பது பொருந்தும். சொல்லப்போனால், அது, மிகவும் சிக்கலானதொரு காலக்கட்டம். வரலாறு காணாத, இடர்ப்பாடு மிகுந்த காலம் அது. வெளியிலிருந்து வந்தவன், ஆட்சியைப் பிடித்தது மட்டுமில்லை;  தன் சமயத்தைப் பலம்கொண்டு பரப்பியது மட்டுமில்லை;  சுதேசி இந்து சமயத்தைப் பற்றி இல்லாததும் பொல்லாததுமாகப் புளுகினான் – இழித்துரைத்தான் – கேலி செய்தான் – கிண்டலடித்தான், தண்டித்தான், இந்துசமய தெய்வங்களை “Demons” பேய்கள் என்றான்,  இந்து சமயத்தில் இருப்பவர்கள் காட்டுமிராண்டிகள் – நாகரீகமற்றவர்கள் என்றான் – கோயில்களை, வழிபாட்டுத் தலங்களை இடித்தொழித்து, சர்ச்சுகளைக் கட்டினான். மக்கள் புத்தி பேதலித்தாற்போல் ஆகி, உண்மையெது பொய்யெது என்று புரியாமல் திணறலானார்கள். எனினும், ஆட்சியாளனை எதிர்த்துக்கொண்டு வாழ்வது சுலபமில்லை என்று சிலர் பய உணர்விலேயே  மதம் மாறிப் போயினர். வெகுபலரோ, ஆட்சியாளர்கள் மற்றும் கிறித்துவ மதக்கருவிகள் தந்த வெகுபல சலுகைகளினால் மதம் மாறினர், பிறரையும் மதம் மாற்றினர்.

    இந்நிலையில்தான், இந்து சமயப் பண்பாட்டு இயக்கங்கள் தோன்றுகின்றன. 1828இல் பிரம்ம சமாஜம்; 1857இல் பிரார்த்தனை சமாஜம்; 1865இல் சமரச வேத சன்மார்க்க சங்கம்; 1875இல் பிரம்ம ஞானசபை; 1897இல் ராமகிருஷ்ணா  மிஷன் என்று தொடர் சங்கிலியாய் ஒரு எழுச்சி நடக்கிறது.

    இவற்றுள், வள்ளலார் நிறுவியது: சமரச வேத சன்மார்க்க சங்கம்; 1872இல்.  சமரச சுத்த சன்மார்க்க சத்ய சங்கம் என்று பெயர் திருத்தம் செய்து வள்ளலார் இந்தச் சமயப்  பண்பாட்டு  இயக்கத்தை, அவ்வமயம்  நடாத்திச் செல்கிறார்.

    வங்காளத்தில் தோன்றிய பிரம்ம சமாஜம், மஹாராஷ்டிராவில் தோன்றிய பிரார்த்தனை சபை ஆகியவற்றிலிருந்து வள்ளலாரின் சமரச வேத சன்மார்க்க சங்கம் (சமரச சுத்த சன்மார்க்க சத்ய சங்கம்) எவ்வாறு வேறுபட்டது? ஏற்கெனவே இரண்டு இயக்கங்கள் எழும்பி நிற்க, அவற்றுடன் சேர்ந்து இயங்காமல், தான் தனியாக ஒரு இயக்கம் துவங்க வேண்டிய தேவை வள்ளலாருக்கு ஏன் ஏற்பட்டது என்கிற இரண்டு கேள்விகள் இப்போது நம்முள் எழுகின்றன.

    விந்திய சாத்பூரா மலைத்தொடருக்குக் கீழே தெக்கணத்தில் தோன்றிய முதல் சுதேசி சமயப் பண்பாட்டுப் புரட்சி எதுவென்று பார்த்தால்,  அது வள்ளலாருடையதுதான்.

    விந்திய சாத்பூரா மலைத்தொடருக்கு மேலே வட இந்தியாவில், மிகக் குறிப்பாக, வடகிழக்கு இந்தியாவில், வங்காளத்தில்,  கல்கத்தாவில் (இன்றைய கொல்கத்தா) தோன்றியது பிரம்ம சமாஜம், வடமேற்கில், மகாராஷ்டிரத்தில், குறிப்பாக, பாம்பேயில் (இன்றைய மும்பை) தோன்றியது பிரார்த்தனை சமாஜம்.

    இவை இரண்டுமே நடப்பில் இருப்பதான சுதேசி சமயமான இந்துசமயப் பண்புகளை ஆதரிக்காது அவற்றை எதிர்த்தவை. இரண்டிற்குமே அரசியல் சார்பு இருந்தது.

    இதிலே, பிரம்ம சமாஜம் என்பது, முழுக்க முழுக்க ஆங்கிலேயரின் கைக்கூலி இயக்கமாகும். இதனை பிரமோ சமாஜ் என்ற பெயரில், முதலில் தொடங்கியவர் ராம் மோகன் ராய். இவர் ஒரு செல்வந்தச் சீமான். குலின் எனப்படும் அரசகுல பிராமண வகுப்பைச் சேர்ந்தவர். கிழக்கிந்திய கம்பெனி அவ்வப்போது இந்தியச் செல்வந்தர்களிடம் வட்டிக்குக் கடன் வாங்குவதுண்டு. ராம் மோகன் ராய் இவ்வாறு, கிழக்கிந்திய கம்பெனிக்கு  வட்டிக்குப் பணம் தந்து உதவி வந்தார்; இவ்வாறான பழக்கத்தில் தான்,  ராம் மோகன் ராயின்  கணக்குப் போடும் துல்லியத்தையும், கில்லாடிக்குக் கில்லாடியாய் அவர் நடந்துகொள்ளும்  சாமர்த்தியத்தையும்,  பேச்சுச் சாதுரியங்களையம்  கிழக்கிந்திய கம்பெனி கவனிக்கிறது. இந்தியாவில், தான் வேரூன்றி நிலைநிற்க வேண்டுமென்றால்,  இவனைக் கூட்டாளியாக்கிக் கொள்ளுவது வேண்டும் என்கிற எண்ணம் கிழக்கிந்திய கம்பெனிக்குத் தோன்றுகிறது. எனவே, ராம் மோகன் ராயை, கிழக்கிந்திய  கம்பெனியில் நல்ல சம்பளத்துக்கு வேலைக்கு வர இயலுமா எனக் கேட்க,  அவரும் ஒப்புக்கொள்கிறார். இவ்வாறு,   கிழக்கிந்திய கம்பெனியின் சிப்பந்தியாகிறார் ராம் மோகன் ராய்.

    ஏற்கெனவே, முகலாய அரசர், இரண்டாம் அக்பருக்கும் இவருக்கும் கொஞ்சம் நெருக்கம் இருந்து வந்தது. கிழக்கிந்திய கம்பெனியில் எழுத்தர் பணி என்ற பதவி. கம்பெனியின் கணக்கு வேலை, வழக்குகளுக்கு எனக் கோர்ட்டுக்குத் தேவையான எழுத்துவேலை செய்வது, இந்தியர்கள் தொடர்பான பிரச்சினைகளில் வாய்ச் சவடால் செய்து பஞ்சாயத்துப்  பேசுவது, இந்துச் சட்டம் என்ற பெயரில், ஆவணங்களை எழுதி அவற்றை ஒரு சட்ட நூலாக கிழக்கிந்திய கம்பெனி இந்தியர்களுக்கு எதிராகப் பயன்படுத்துமாறு செய்வது போன்ற வேலைகளைக் கிழக்கிந்தியக் கம்பெனிக்காக, ராய் செய்துவந்தார்.

    இத்தோடு, கிழக்கிந்திய கம்பெனியின் சொற்படி, கிறித்துவ மதத்தை உயர்த்தியும் சுதேசி மதங்களைத் தாழ்த்தியுமான நூல்கள் எழுதுவதும் அவர் வழக்கம். ஆங்கிலேயர்களும் கிறித்துவ மதமும் உயர்வானவை என்பதைத் தொடர்ந்து ருசுப்படுத்துவதற்காக, ஆங்கிலக் கிறித்துவ மதபோதகர்களோடு கூட்டு சேர்ந்து கொண்டு, அவ்வப்போது, சுதேசி மக்களிடையே மறைமுகமாக, சமய பண்பாட்டுப்  பிரச்சினைகளைத் தூண்டிவிட்டு, அவற்றிற்கு, தான் முன்னின்று, ஆங்கில அரசின் மூலம், கிறித்துவர்கள் மூலம், கிறித்துவக் கொள்கைகள் மூலம்  தீர்வு காணுவதுபோல நாடகமாடுவது என்பதெல்லாம் ராம் மோகன் ராயின் வேலைகள்.

    இவை ஒவ்வொன்றுக்கும் அவருக்கு ஆங்கிலேயர்களால் சம்பளத்தைத்  தாண்டி, கூடுதல் சன்மானம் வழங்கப்பட்டது. எவ்வளவுக்கு எவ்வளவு, இந்து சமயத்தில் குழப்பம் விளைவித்து அதன் ஸ்திரத்தைக் குலைக்கமுடியுமோ முடியுமோ அவ்வளவுக்கு அவ்வளவு அவருக்குச் சன்மானம் வழங்கப்பட்டது. ஏனெனில், அவ்வாறான ஒவ்வொரு நிகழ்விலும், ஆங்கிலேயர்கள் அப்பிரச்சினையில் தலையிட்டு, தீர்வு காண்பதற்கான ஒரு சூழல் ஏற்படும்; ஆங்கிலேயர்கள், புதுப் புதுச் சட்டங்கள் இயற்றி, ஒரு பக்கம் நற்பேரும் மற்றோர் பக்கம், இந்திய மக்களை ஆள – பிரித்தாள வசதியும்  ஏற்படும் – பொய் வழக்கு போட்டு அவர்களைத் தண்டித்து அடக்கி ஆள வழி பிறக்கும். கிறித்துவ மதமாற்றத்தையும் அப்படியே சுலபமாக நடத்தி விடலாம்.

    ஆக, ராம் மோகன் ராய்க்கு வழங்கும் சன்மானம் என்கிற ஒரே கல்லில் பல மாங்காய்களை அடித்து வீழ்த்திக் கொண்டுவிட முடியும் என்பது தான் ஆங்கிலேயரின் கணக்கு.

    1803இல் கிழக்கிந்திய கம்பெனியில் சேர்ந்த ராம் மோகன் ராய், அதே ஆண்டில், வேலையில் சேர்ந்த ஒரு சில மாதத்திற்குள்,  கம்பெனியின் ஆதிக்கம் ஓங்கவும், கிறித்துவ மதம் ஓங்கவும் ஓர் அற்புதமான சதித்  திட்டம் தீட்டிவிடுகிறார் – அதை நடைமுறைப்படுத்தியும் காட்டுகிறார். அதனால், ஆங்கிலேயர்களின் கிறித்துவ மதமாற்றம் செய்வோரின் மிகுந்த நம்பிக்கைக்கும் நெருக்கத்துக்கும் உள்ளாகிறார். அந்த நிகழ்ச்சிதான்  “சதி” எனும் உடன்கட்டை ஏறுதல் எனும் நிகழ்ச்சி.

    1803இல் திடீரென்று வில்லியம் கேரி என்பவர் ஒரு அறிக்கை வெளியிடுகிறார்: “கல்கத்தாவைச் சுற்றிய  30 மைல் சுற்றுவட்டாரத்தில் 1803இல் மட்டும் 438 உடன் கட்டை ஏறுதல்கள் நிகழ்ந்திருக்கின்றன – இந்து சமயத்தில் நிகழும் இந்தக் காட்டுமிராண்டித்தனம் எனக்கு மிகுந்த மனவேதனையைத் தருகிறது” என்று.

    இந்த வில்லியம் கேரி யாரென்று பார்த்தால், அவர் ராம் மோகன் ராயின் நண்பர்;  கிறித்துவ மதபோதகர்;  மதமாற்ற வித்தகர்; ஏற்கெனவே, இவ்விருவரும் வித்யா வாகிஷ் எனும் ஒரு சம்ஸ்கிருத பண்டிதரும் சேர்ந்து, “மஹா நிர்வாண தந்த்ரா”எனும் நூலை வடமொழியாம் சமஸ்கிருதத்தில் எழுதி வெளியிட்டார்கள் (வடமொழி அறியாத கேரி இந்நூலை எழுதியிருக்க வாய்ப்பே  இல்லை என்பது உலகோர் கருத்து – பின்னாளில் வித்யாவாகிஷ் கேரியை தம் நட்பு வட்டத்திலிருந்து விலக்கிவிட்டார் என்பதும் இந்நூலை எழுதியது வித்யாவிகாஷ்  என்பதற்குச் சான்று. இந்நூல், வித்யாவிகாஷால் எழுதவைக்கப்பட்டது என்பதும் கூடத் தகும்). வில்லியம் கேரி, கிழக்கிந்திய கம்பெனியின் தொடர்பில் 1803இலிருந்து இருந்து வந்ததையும் நாம் அறிகிறோம்.

    1803க்குப் பிறகு,  சுமார் பதினைந்து ஆண்டுகள் கழித்து மீண்டும், உடன்கட்டை ஏறுதல் பற்றிய சேதி, மீண்டும் வருகிறது: 1815-1818 காலக்கட்டத்தில் உடன்கட்டை ஏறுதல், வங்காளத்தில் இரட்டிப்பாகிவிட்டது என்று.

    ஆக, பொய்யுரையும், பணம் கொடுத்துத் தூண்டிவிடப்பட்ட நிகழ்வாகவும் தான் உடன்கட்டை ஏறுதல் அன்று ஆங்கிலேய ஆட்சியில் நடந்திருக்கிறது என்பதை நம்மால் ஊகிக்கமுடிகிறது.

    கேரியும், மோகன் ராயும், ஆங்கிலேயர்களும் நடத்திய இந்த நாடகத்தில், அடுத்த கட்ட அரங்கேற்றம் என்னவென்றால். ராம் மோகன் ராய், இவ்விஷயத்தை ஆங்கிலேய ஆட்சியாளர்களுக்குத் தெரிவித்து, இந்து சமயத்தில் இவ்வாறு நடக்கும் இழிவான செயல்களில் தலையிட்டு – அவற்றைச் சட்டத்தின்  மூலம் தடுக்குமாறு வேண்டுகோள் வைக்கிறார். உடன்கட்டை ஏறுதல் தடைச் சட்டம் வருகிறது. ராம் மோகன் ராய், இந்து சமயத்தின் சீர்த்திருத்தவாதி என்று  மிகப்பெரிய புகழை அடைகிறார்.

    இவ்வாறு, ராம் மோகன் ராய், இந்தியர்கள் சார்பான விஷயங்களில், ஆங்கிலேயர்கள் தமக்கு வசதியான முடிவெடுக்க, ஆலோசனை தரும் உயர்நிலை ஆலோசகராகவும், இந்திய மக்கள் பிரதிநிதியாகவும் ராம் மோகன் ராய்,  பல விஷயங்களில் பகிரங்கமாகவே செயல்படலானார். இவற்றுள், பால்ய விவாகம் எனப்படும் குழந்தைகள் திருமணத் தடையும் அடக்கம்.

    இவையாவும், கிழக்கிந்திய கம்பெனியின் ஆட்சித்  தந்திரமே தவிர, எந்த ஒரு இந்திய பிரஜையும், ராம் மோகன் ராயைத் தம் தலைவராக கிழக்கிந்திய கம்பெனியிடம் மொழிந்துரைக்கவில்லை. ஆக, கைக்குள் கையாக ஆங்கிலேயருக்காகச் செயல்பட்டவர் ராம் மோகன் ராய். அதனால் தான் அவருக்கு அத்தனைப் பெரும் புகழும் பதவிகளும் அந்தஸ்தும் செல்வாக்கும் கிடைத்தன.

    ஒரு பக்கம், கிழக்கிந்திய கம்பெனிக்கு இத்தனை நெருக்கமாக இயங்கிய அதேவேளையில், இன்னொரு பக்கம்,  இரண்டாம் அக்பருக்கும் அவர் நெருக்கமாகவே நடந்துகொள்ளலானார். கிறித்துவ மதத்தை உயர்த்திப் பேசும் நூல்களை எழுதுவது போலவே, இஸ்லாமியத்தை உயர்த்தும் சில நடவடிக்கைகளிலும் அவர் ஈடுபட்டார். “மீரட் உல் அக்பர்” என்று இஸ்லாமியர்களுக்கான ஒரு செயதித்தாளையும்  பெர்சிய மொழியில் வெளியிட்டு வந்தார்.

    பிரிட்டிஷாரின் வலு பெருகப் பெருக, முகலாய மன்னர்கள் தாக்குப்பிடிக்க இயலாமல் போன நிலையில், பிரிட்டிஷாருக்கு நெருக்கமாயிருந்து  தேர்ச்சி பெற்ற  ராம் மோகன் ராயின் தயவு, இரண்டாம் அக்பருக்கு மிகவும் தேவைப்பட்டது. ராம் மோகன் ராய் அவ்வப்போது காட்டி வந்த இஸ்லாமிய வாஞ்சையும் இந்தத் தயவுத் தேவையில் அடக்கம். இரண்டாம் அக்பரிடம் ராய்க்கு இருந்த நெருக்கத்தை, கிழக்கிந்திய கம்பெனியும், இந்திய மக்களிடையே தமது “இமேஜ்” வளர, மிக அற்புதமாகப் பயன்படுத்திக்கொண்டார்கள்.

    சுதேசி சமயப் பண்பாட்டுக்கு எதிராகச் செயல்படுவதைக் குறைகூறும் அதிருப்தியாளர்களின் வாயை அடைப்பதற்காகத் திட்டம் தீட்டப்படுகிறது. ராம் மோகன் ராய் பிறருக்காகப் பாடுபடுவதாகக் காட்டவும், கிழக்கிந்திய கம்பெனி இந்தியாவில் சமயப் பண்பாடுகளைப் பாதுகாப்பதில் மிகுந்த அக்கறை காட்டுகிறது என்று மக்கள் நம்புமாறும் ஒரு தந்திர அரசியல் செயல் வடிவம் பெறுகிறது.

    இரண்டாம் அக்பர், தமது பணச்செலவில், ராம் மோகன் ராயை, தமது தூதுவராக பிரிட்டனுக்கு அனுப்புகிறார். அனுப்புமுன், ராம்  மோகன் ராய்க்கு ராஜா என்ற பட்டத்தைச் சூட்டி, இவரே இந்திய நாட்டு மக்களின் மானசீக ராஜா என்பதாக,  “ராஜா ராம் மோன் ராய்” பிரிட்டன் செல்கிறார்.

    உடன்கட்டை ஏறுதலைத் தடை செய்து,  வில்லியம் பென்டிங்க் இயற்றிய Bengal Sati Regulation of 1829 மறுக்கப்படாமல் உறுதி செய்யவேண்டும் என்றும், இரண்டாம் அக்பருக்கான உதவித் தொகையை (Stipend) அதிகரிக்க வேண்டும் என்றும் இரண்டு கோரிக்கைகளுடன் பிரிட்டன் சென்ற ராஜா ராம் மோகன் ராயின் கோரிக்கைக்கு ஏற்ப, பிரிட்டிஷ் அரசும் இரண்டாம் அக்பருக்கான உதவித் தொகையில்  30,000 பவுண்டுகள் சேர்த்து அதிகத் தொகையாக அளிக்க ஆணையிடுகிறது.

    “ராஜா” பட்டத்துடன், ராம் மோகன் ராயின் புகழ் இன்னமும் பெருகுகிறது.

    ராம் மோகன் ராய் கெட்டிக்காரத்தனம்  நிறைந்த அரசியல்  தந்திரவாதி, பணம், புகழ், அந்தஸ்து மட்டுமே அவருக்கு முக்கியம், சுதேசி சமயப் பண்பாடுகளோ, நாட்டின் சுயமரியாதையோ அவருக்கு முக்கியம் இல்லை என்பதற்குப் பற்பல எடுத்துக்காட்டுகள் உண்டு. அவற்றைத் தரவுகள் மூலம் நாம் தெரிந்துகொள்ள முடியும். இந்தக் கேரியுடன் அத்தனை நெருக்கமாகப் பழகினாரோ, பின்னாளில், அதே கேரியுடன் பிணக்கு ஏற்படுகிறது, கேரியின் பாப்டிஸ்ட் கிறித்துவம் தாழ்ந்தது என்றும்  “Unitarianism” எனப்படும் நவீன யூத மதமே உயர்ந்தது என்றும் கேரியைப் பழித்து அதனை ஆதரிக்கிறார். கிழக்கிந்தியக் கம்பெனியைத் தாண்டி, ஐரோப்பியர்கள் இந்தியாவில் குடியேற்றம் செய்ய – விவசாயம் செய்யவும் ஆதரிக்கிறார். (கிழக்கிந்திய கம்பெனியில்  வேலை பார்த்த வகையில், அவர்கள் இந்தியாவில் ஈட்டிய பெரும் செல்வம் கண்டு பொறாமை பட்டவராக இதைச் செய்ததாக உணர்கிறோம்).

    குழந்தைகள் திருமணத் தடைச் சட்டத்தைக் கொண்டவர் என்ற புகழை ஈட்டுவதில் மட்டுமே அவருக்கு ஆசை இருந்தது; அதனைப் பின்பற்றும் நோக்கம் அவருக்கு இல்லை என்பதும் உண்மை. இவருடைய மகளை, குழந்தையாக இருக்கும்போதே திருமணம் செய்து கொடுத்தவர்.

    ஆத்மீய சபா, யூனிடேரியன் கம்யூனிட்டி ஆகியனவற்றையும் தொடங்கி பல்வேறு வகைகளில் தம்மை பிரபலப்படுத்திக்கொண்டவர்.

    இன்று, நம்மிடையே இருக்கும் பல அரசியல்வாதிகளின் தந்திரங்களின் ஒட்டுமொத்தப் பிரதிநிதியாக அன்றே ராம் மோகன் ராய் பரிமளித்தார்.

    ஆக, பணம், புகழ், அந்தஸ்துக்காக, அந்நியர்களுடன் நெருக்கமாக இருந்து அவர்களின் இச்சைக்காய் எதனையும் செய்யத் தலைப்பட்டவராகவே ராம் மோகன் ராய் இயங்கி வந்தார்.  சுதேசி சமயம், சுதேசி மொழிகள், சுதேசிப் பண்பாடுகள், பற்றிய அக்கறை இல்லாத அவர்,  அந்நியரைக் குளிரவைத்து, அவர்கள் என்ன விரும்புகிறார்களோ அவற்றை அவர்களுக்காகச் சாதித்துத் தரவேண்டும் என்கிற ஒரே நோக்கம் கொண்டவர்.  சர்ச்சுகளின் கைக்கூலியாகச் செயல்பட்டு சுதேசி சமயப் பண்பாட்டுக்கு அவர்  செய்து போந்த நாசவேலைகள் பற்பல.

    சொந்த மக்களையும், சுதேசிப்  பண்பாடுகள், மொழி, இலக்கியம், கலை, காவியங்கள், கல்வி என எதனையும் பழிக்கவும் அழித்தொழிக்கவும் அவர் துணிந்தவரானார்.

    துரதிர்ஷ்ட வசமாக, அந்நிய ஆட்சியாளர்களுக்குக் கைக்கூலியாகச் செயல்பட்டவர்கள் மட்டுமே அன்று கவுரவிக்கப்பட்டார்கள். பட்டம், பதவிகள் தந்து உயர்நிலையில் வைத்து,  ஆராதிக்கப்பட்டார்கள் என்ற நிலையில் பிரம்ம சமாஜம் மற்றும் அதனை அடுத்துத் தோன்றிய பிரார்த்தனை சமாஜம் போன்றவற்றின்  சுதேசி சமயப் பண்பாட்டுச் சேவைகள் என்று சொல்லும்படியான விஷயம் இல்லை என்பது தெளிவு.

    இங்கு தான் வள்ளலார் எனும் தனிமனிதர், ஒரு சுதேசி சமயப் பண்பாட்டுப் பாதுகாவலராக எழுகிறார். அவரது  சுதேசி சமய இயக்கம் தோன்றுகிறது. ஆன்மீக உலகில், அது ஒரு விடிவெள்ளிக் காலம்.

    (மேலும் பேசுவோம்)

    Share