‘காலை எழுந்தவுடன் கண்ணன் -கேசவ்
கரம் கொடுக்கும் அவன் வண்ணம்-மாலை(திருமாலை)
நினைப்பது உன் அன்னம்-என்று
வழக்கப் படுத்திக் கொள்ள மன்னன்(நாம்)’…..
‘ஆனந்தக் கண்ணன், அயோத்தியின் மன்னனவன்,
வானந்த மாலின் வடிவவன், -நானந்த(‘நான்’அந்தம்)
ஆதி அவனேதான், ஆயர் குலமுதித்து
ஜோதியாய் வந்த ஜொலிப்பு’’….கிரேசி மோகன்….
பவள சங்கரி
எண்ணமதில் தோன்றுதொரு காட்சி – வண்ணக்
கோலங்களில் நல்லோரின் ஆட்சி!
வீடுதோறும் மங்கல முழக்கம்
வீதிதோறும் நவீனமயமான பள்ளி
கேடுதீரும் பெற்றோரும் துள்ளி
நாடு முற்றிலும் நல்லுழைப்பாளிகள்
விஞ்சுமெழில் நலமுடன் வந்துதித்தே
கொஞ்சுமொழி சிறாருடன் கூடிக்களித்தே
கேடின்றி வாழ வழியமைப்போர் நாடியே
கேண்மை கொண்டே ஏற்பீர் அவராட்சியே!
மேன்மை கொண்டே ஒளிருமேயவர் மாட்சியே!
தங்குமின்பம் என்றும் தகைமையின் நீட்சியே!
தரணிபோற்றும் பாரதத் தாயவள் காட்சியே!
க. பாலசுப்பிரமணியன்
தாய்மையை தத்தெடுத்த தனிக்குலமே,
தூய்மையைத் தோள்சுமக்கும் நற்குணமே !
துயர்நீக்கப் பறந்துவரும் புள்ளினமே
துயில்காத்துக் கண்விழிக்கும் உறவினமே!
கண்களிலே கொண்டதுவோ கருணைமொழி
கைகளிலே சேவைசெய்யும் கடமைவழி
கனிவுடை சொற்களெல்லாம் ஆற்றும்வலி
கலங்குகின்ற மனம் காக்கும் தீபஒளி !
கருவோடு பிறவாதாது உன் உறவன்றோ
கண்ணுக்குத் தெரிந்த கருணை வடிவன்றோ
மழலைக்கும் முதுமைக்கும் கண்மணியன்றோ
மாண்புடைய சேவைக்கு நீ அணியன்றோ!
கூகிள் படத்திற்கு நன்றி.
”ஆழியில் தூங்கியொரு நாழி முழித்துலகை
ஊழியில் உண்டு களைத்தவா -வாழிநீ-
உன்னை நினைந்து ருகியுறங்கு மென்னைநீ
உன்கனவில் காண உறங்கு”….
”அவலுக்கு செல்வம் அழகுமயில் ராதை
அவளுக்குக் காதல் விஜயன் -கவலைக்கு
கீதை அடியார்தம் கண்ணீர் திவலைக்கு
தாதை அளிப்பான் துடைப்பு”….கிரேசி மோகன்….
இன்று சங்கர ஜெயந்தி….அடியேன் ‘’பிரும்ம முரார்ச்சித ஸேவித லிங்கம்’’ மெட்டில் எழுதிய ‘’சங்கர லிங்காஷ்டகம்’’(பாடியது –கிரி டிரேடிங் திரு.ரங்கனாதன் அவர்கள்) இணைத்துள்ளேன்….
சங்கர லிங்காஷ்டகம்
—————————-
”பிரும்ம முராரி சுரார்ச்சித லிங்கம்”…. மெட்டில்….
—————————————————————-
சத்சிவ சித் தானந்தன லிங்கம்
சகுண உபாசக நிர்குண லிங்கம்
புத்தி அனுக்கிரக பாரதி லிங்கம்
சத் குரு சங்கர தத்துவ லிங்கம்….(1)
தொன்மையில் சிவமாய்த் தோன்றிய லிங்கம்
தென்முகம் நோக்கிய தெய்வத லிங்கம்
சின்மயமான சிதம்பர லிங்கம்
சத்குரு சங்கர தத்துவ லிங்கம்….(2)
ஆழ்நிலை த்யானத் தசலன லிங்கம்
அண்ட சராசர மாயா லிங்கம்
ஊழ்நாள் ஊர்த்தவ தாண்டவ லிங்கம்
சத்குரு சங்கர தத்துவ லிங்கம்….(3)
முப்புரம் கனலெரி மூட்டிய லிங்கம்
மன்மத தகன மகாதவ லிங்கம்
அப்புவிண் வாயுமண் அக்கினி லிங்கம்
சத்குரு சங்கர தத்துவ லிங்கம்….(4)
அயனரி அடிமுடி தேடிய லிங்கம்
அலைகலை தலைமுடி சூடிய லிங்கம்
நயன நுதலிடை நீறணி லிங்கம்
சத்குரு சங்கர தத்துவ லிங்கம்….(5)
”கனக மகாமழை” காட்டிய லிங்கம்
குருநெறி ”மனீஷா பஞ்சக” லிங்கம்
அனுதினம் ”பஜ கோவிந்தன” லிங்கம்
சத்குரு சங்கர தத்துவ லிங்கம்….(6)
ஷண்மத ஸ்தாபக சங்கர லிங்கம்
சத்திய சிவமய சுந்தர லிங்கம்
உன்னத அத்வை தாம்ருத லிங்கம்
சத்குரு சங்கர தத்துவ லிங்கம்….(7)
இகபர சுகமருள் ஈஸ்வர லிங்கம்
இம்மையில் மறுமையை ஈன்றிடும் லிங்கம்
பகலென ஒளிர் பரமாத்மக லிங்கம்
சத்குரு சங்கர தத்துவ லிங்கம்….(8)
பலஸ்ருதி
————-
ஜயஜய ஹரஹர சங்கர லிங்கம்
ஜனன மரண நிலைநீக்கிடும் லிங்கம்
தயவொடு தாயெனத் தேற்றிடும் லிங்கம்
தந்தை சதாசிவ சங்கர லிங்கம்….
————————————————————————
க. பாலசுப்பிரமணியன்
மேடைப் பேச்சு – திறன்கள்
கிட்டத்தட்ட ஐம்பத்து ஐந்து ஆண்டுகளுக்கு முன்னால் நடந்த ஒரு நிகழ்ச்சி – மதுரையிலே சேதுபதி உயர்நிலைப் பள்ளியிலே எட்டாம் வகுப்பு படித்துக் கொண்டிருந்தேன். அந்தப் பள்ளி ஆண்டு விழாவின் போது என்னுடைய ஆசிரியர் மேடையிலே ஒரு உரை ஆற்றுமாறு பணித்தார். அதற்காக நல்ல முறையிலே உரையை எழுதி மனப்பாடம் செய்து பலமுறை பயிற்ச்சியும் செய்த பின்னர் மேடையில் ஏறி நின்றேன்.
முன்னாலே அமர்ந்திருந்த சுமார் ஆயிரம் பேரையும் மேடை மேலிருந்து பார்க்கையில் ஏதோ ஆயிரம் யானைகள் அணிவகுத்து நின்றதுபோல் காட்சி அளித்தது. தலை சுழன்றது. வார்த்தைகள் எழவில்லை! எப்படியோ ஆசிரியர் துணையுடன் ஒரு மாதிரியாக உரையை முடித்துவிட்டு கீழே இறங்கியதும் வாழ்க்கையில் இன்னொருமுறை மேடையில் ஏறக் கூடாது என்ற சபதத்துடன் நின்றேன். ஆனால் அந்த அனுபவம் நல்ல ஒரு கற்றலைக் கொடுத்து என்னை ஒரு மேடை பேச்சாளனாக்கியது .
மேடைப் பேச்சு ஒரு வல்லமை வளர்க்கும் கலை. எந்த மேடையிலே நாம் ஏறுகின்றோம் என்பது பற்றிய அறிவு தேவை இலக்கிய மேடை, அரசியல் மேடை, கருத்தரங்க மேடை, போன்ற ஒவ்வொரு மேடையிலும் பேசுவதற்கு வேறுபட்ட திறன் வேண்டும். மேலும் ஒரு மேடையிலே:
இது போன்ற பல கருத்துக்களை வளரும் பருவத்திலேயே மாணவர்களுக்கு சொல்லிக்கொடுத்தால் பிற்காலத்தில் அவர்கள் தாங்கள் தேர்ந்தெடுக்கும் எந்தத் தொழிலிலும் சிறப்பாக முன்னேறுவதற்கு உதவும். தற்காலத்திய தொழில் தளங்களில் மேடைப் பேச்சுத் திறன் (Public Speaking skills) மிக இன்றியமையாததாகக் கருதப்படுகின்றது. பல நேரங்களில் பெரிய தொழிலதிபர்கள் கூட மேடையில் ஏறியதும் தயக்கப்படுவதும், வியர்த்தோ அல்லது ஒரு விதமான நடுக்கம் அல்லது பய உணர்ச்சியோடு நிற்பதையோ நாம் கண்கூடாகக் காண்கிறோம். இந்த உணர்வுகளை சிறு வயதிலேயே பயிற்சி மூலம் நீக்கிவிடலாம்.
பல அரங்கங்களில் ஒரு சிறந்த பேச்சாளர் பேசி முடிந்ததும் அங்கே அமர்ந்திருக்கும் ஐம்பதுக்கும் மேற்பட்ட விழுக்காடு மக்கள் அங்கிருந்து எழுந்து செல்வதை நாம் பார்த்திருக்கிறோம். ஆகவே, சிறந்த பேச்சைக் கேட்பதற்காகவே பலர் அரங்கங்களுக்கு வருவதை நாம் காணலாம்.
எத்தனை சிறப்பாக நாம் பேசினாலும் அதைக் கேட்பவர்களின் ஆர்வமும் கவனமும் குறைந்துவிடுமுன் முடித்துக்கொள்ளுதல் மிக்க அவசியம். விவேக சூடாமணி என்ற சம்ஸ்கிருத நூலிலே இவ்வாறு அழகாக சொல்லப்பட்டுள்ளது : “சொற்களின் வலையிலே ஒருவன் சிக்கிவிட்டால் ஒரு இருண்ட காட்டுக்குள்ளே சென்று தடுமாறுவதைப் போல; அது அறிவைத் தடுமாற வைத்துவிடும்”. பேசும் பொழுதில் முடிக்கத் தெரியாது தடுமாறுபவர்களின் நிலையும் இதுவே.
தொடருவோம்
அமெரிக்காவில் உள்ள ஒரு தலை சிறந்த மன இயல் வல்லுனரும் பேராசிரியரும் ஆராய்ச்சியாளருமான ஹோவர்ட் கார்ட்னெர் தான் வெளியிட்ட The Frames of Mind என்ற புத்தகத்தில் பலவிதமான புத்திகூர்மைகளை (Multiple Intelligence )பற்றி விவரிக்கும் நேரத்தில் மொழிசார்ந்த புத்திகூர்மையை (Linguistic Intelligence ) சிறப்பாக விளக்குகின்றார். இந்தத் திறன் இருப்பவர்களை Word Smart என்று கூறுவார். பலவித தொழில் மேன்மைக்கு இந்தத் திறன் அடிப்படியானது.
மேடைப் பேச்சுக்கும் இந்தத் திறன் அவசியம். எந்த இடத்தில் எப்படிப் பட்ட வார்த்தைகளை உபயோகப் படுத்தவேண்டும், அதன் விளைவுகள் என்ன, அதன் தாக்கங்கள் என்ன என்றெல்லாம் அறிந்து புரிந்து செயல் படுதல் அவசியம். இந்தத் திறனை முழுமையாக பயிற்ச்சிகள் மூலம் வளர்க்க முடியாவிட்டாலும் அதற்க்கான அடிப்படைத் திறன்களை பள்ளிகளிலும் கல்லூரிகளிலும் சொல்லிகொடுப்பது அவசியமாகத் தென்படுகின்றது.
தொடரும்..
முனைவர் மு.பழனியப்பன்
தமிழ்த்துறைத்தலைவர்
அரசு கலைமற்றும் அறிவியல் கல்லூரி
திருவாடானை
பக்தி இலக்கியகாலத் தமிழகத்தில் சைவசமயம், வைணவ சமயம் ஆகிய இரண்டும் இலக்கிய இயக்கமாகவும் சமுதாய நல இயக்கமாகவும் செயல்பட்டுவந்தன என்பது எல்லாரும் அறிந்தது. இதே காலத்தில் வடநாட்டில் வைணவ சைவ சமய வளர்ச்சிகள் எப்படி இருந்தன என்ற கேள்விக்குத் தமிழ் இலக்கியங்களில் பதில் இருக்கிறதா என்பதைத் தேடினால் கண்டறிந்து பெறமுடிகின்றது. தென்னகக் கோயில்கள் போலவே வடநாட்டுக் கோயில்களையும் பக்தி இலக்கிய பெருமக்கள் பாடியுள்ளனர். சைவப் பெருமக்கள் வடநாட்டின் தலைப்பகுதியான கைலாயம் என்பதை எட்டவும் தொழவும் முயற்சி செய்ததை திருநாவுக்கரசர், காரைக்காலம்மையார் வழி பெறமுடிகிறது. வைணவ சமய வளர்ச்சி வடநாட்டில் இருந்த தன்மையை ஆண்டாளின் பனுவல்கள் வழி பெறமுடிகின்றது. ஆண்டாள் தன் பாடல்களில் வடநாட்டு வைணவத் திருத்தலங்கள் பற்றிய குறிப்புகளைத் தருகின்றார். அவர் பெண் என்பதால் தானிருந்த திருவில்லிப்புத்தூர், மற்றும் திருவரங்கம் ஆகிய இடங்களுக்குப் பயணிக்க முடிந்தது. ஆனால் வட நாட்டு வைணவத் தலங்களைப் பயணித்துப் பார்க்க வேண்டும் என்ற ஆவல் ஆண்டாளிடம் இருந்துள்ளது. மேலும் வடநாட்டில் வைணவத் தலங்கள் சிறப்புற்று விளங்கியதால் அவை பற்றிய குறிப்புகளைச் செவிவழிச்செய்திகளாகக் கேட்டு ஆண்டாள் பதிவு செய்துள்ளார் என்பதும் தெரியவருகிறது.
ஆண்டாளின் நாச்சியார் திருமொழியில் பன்னிரண்டாம் திருமொழி கண்ணன் இருக்குமிடம் கொண்டு செல்வீர் என்ற தலைப்பில் அமைகின்றது. இத்திருமொழியில் ஆண்டாள் வட நாட்டு வைணவத் தலங்களைக் குறிப்பாக கண்ணன் சார்புடைய தலங்களைக் குறித்துப் பாடியுள்ளார். கண்ணன் வாழ்ந்த வடநாட்டு ஊர்களுக்கு என்னைக் கொண்டு சேருங்கள் என்பது அப்பாடலின் பொதுப்பொருள். ஆண்டாள் தானாகப்போக இயலாத நிலையில் கண்ணன் மீதான காதல் அதிகரிக்கும் சூழலில் தன்னைச் சார்ந்தவர்களைக் கண்ணன் இருப்பிடங்களுக்கு அழைத்துச்செல்லக் கோருவதுபோல இப்பாடல்கள் பாடப்பெற்றுள்ளன.
வடமதுரை
கண்ணனின் நகரமான வடமதுரையில் இத்திருமொழி தொடங்குகின்றது.
~~பெற்றிருந்தாளை ஒழியவே, போய்ப் பேர்த்தொருதாய் இல் வளர்ந்த நம்பி, மற்பொருந்தாமல் களமடைந்த மதுரைப் புறத்தென்னை உயத்திடுமின்|| ( 617)
என்று மதுரா நகரத்தை எண்ணுகிறார் ஆண்டாள். மதுரா நகரில் கண்ணன் பிறந்த இடம் குறிக்கத்தக்க நினைவுச் சின்னமாக இன்னமும் பாதுகாக்கப்பெற்று வருகிறது. கண்ணன் பிறந்த இடம் பற்றிய செய்திகள் ஆண்டாளுக்கு ஆதி முதல் உணர்த்தப்பெற்றது என்பதற்கு இப்பாடல் சான்றாகின்றது. வடமதுரை நூற்றியெட்டு திவ்யதேசங்களில் நூற்றியிரண்டாம் இடத்தில் வைத்துப் போற்றப்பெறுகிறது.
ஆய்ப்பாடி
கண்ணன் நண்பர்களுடன் சுற்றித் திரிந்த இடம் ஆய்ப்பாடி ஆகும்.
~~ஆணையால் நீர் என்னைக் காக்கவேண்டில் ஆய்ப்பாடிக்கே என்னை உய்த்திடுமின்|| (618)
என்று ஆய்ப்பாடியைக் குறிக்கின்றார் ஆண்டாள். நூற்றியெட்டு திவ்யதேசங்களில் நூற்றிமூன்றாம் இடத்தில் வைத்துப் போற்றப்பெறுகிறது. வடமதுரையில் இருந்து எட்டு கிலோமீட்டர் தூரத்தில் உள்ள ஊர் ஆய்ப்பாடி ஆகும். வடமதுரையும் நில அளவிலும், கண்ணன் உலவிய அளவிலும் அருகருகு இருப்பது கண்ணன் வரலாற்றில் இருக்கும் உண்மைத்தன்மையை வெளிப்படுத்துவதாக உள்ளது.
யமுனை நதிக்கரை
யமுனை நதிக்கரையில் அமைந்துள்ள நகரம் வடமதுரை ஆகும். இந்த நதிக்கரை கண்ணன் திருப்பாதங்கள் பட்ட நதிக்கரை என்பதால் இவ்விடத்திற்கு வருவதற்கு ஆண்டாள் பிரியப்படுகிறார்.
~இங்குத்தை வாழ்வை ஒழியவே போய் யமுனைக் கரைக்கென்னை உய்த்திடுமின்|| (620) என்று யமுனை நதிக்கரையில் விளையாட எண்ணம் கொள்கிறார் ஆண்டாள்.
யமுனை ஆற்றில் வாழ்ந்த காளிங்கள் என்ற பாம்பினை அடக்கியவன் கண்ணபிரான். ஆண்டாள் தன் நிலையைக் கண்டு கலக்கமடைவதை விட்டுவிட்டு காளிங்களை அடக்கிய யமுனைக் கரைக்கு அழைத்துச் செல்லுங்கள் என்று வேண்டுகோள் வைக்கிறார். ~~நீர்க்கரை நின்ற கடம்பை ஏறிக் காளியன் உச்சியில் நட்டம் பாய்ந்து போர்க்களமாக நிருத்தம் செய்த பொய்கைக் கரைக் கென்னை உய்த்திடுமின்||(621) என்று பாடும் ஆண்டாளின் கண்ணன் குறித்தான வேட்கை குறிக்கத்தக்கது.
பத்த விலோசனம்
கண்ணனுக்கும், அவன் தோழர்களுக்கும் முனிபத்தினிகள் பசிக்கும் போது நாள்தோறும் உணவு கொடுத்த இடம் இதுவாகும். இவ்விடத்திற்குத் தன்னை அழைத்துப்போகச் சொல்லுகிறாள் ஆண்டாள். ~வேர்த்துப் பசித்து வயிறசைந்து வேண்டு அடிசில் உண்ணும்போது, ஈதென்று பார்த்திருந்து நெடுநோக்குக் கொள்ளும் பத்த விலோசனத்து உய்த்திடுமின்|| (622) என்ற ஆண்டாளின் வாக்கு கண்ணனின் மற்றொரு வட மாநில இருக்கையைக் காட்டுவதாக உள்ளது. மதுராவிற்கு அருகில் இவ்விடம் உள்ளது.
பாண்டிவடம்
மதுராவிற்கு அருகில் உள்ள மற்றொரு இடம் பாண்டிவடம் ஆகும். பரசுராமன் பிரலம்பாசுரனை அழித்த இடம் பாண்டீரமாகும். அந்த பாண்டீரத்தில் உள்ள ஆலமரத்திற்குத் தன்னை அழைத்துப்போக ஆண்டாள் வேண்டுகிறாள்.
~~பண்ணழியப் பலதேவன் வென்ற பாண்டிவடத் தென்னை உய்த்திடுமின்|| (623) என்ற ஆண்டாளின் வருகை பாண்டிவடம் என்ற மற்றொரு கண்ணன் தலத்தைக்; காட்டுகிறது.
கோவர்த்தன மலை
~~கொற்றக் குடையாக ஏந்தி நின்ற Nகுhவர்த்தனத் தென்னை உய்த்திடுமின் || (624) என்று கோவர்த்தனகிரியை கண்ணன் தலமாகக் காண்கிறார் ஆண்டாள்.
துவாரகை
கண்ணன் உருவக்கிய நகரம் துவாரகை ஆகும். குஜராத் மாநிலத்தில் உள்ள முக்கியமான தலம் இதுவாகும்.
~~சூட்டுயர் மாடங்கள் சூழ்ந்து தோன்றும் துவராபதிக்கு என்னை உய்த்திடுமின்|| (625)
என்று ஆண்டாள் இந்நகர் பற்றிக் குறிப்பிடுகிறாள். துவராகை என்பதற்கு பல வழிகள் கொண்ட ஊர் என்று பொருள். ஆண்டாள் மாடங்கள் சூழ்ந்த நகரம் என்று இதனைப் பாடுகிறார்.
இவ்வாறு வடமதுரையில் கண்ணன் பிறந்தது முதல் கண்ணன் தனக்கான நகரம் உருவாக்கிய துவாரகை வரையான தலங்களில் தன்னை நிறுத்தச் சொல்லி வெண்டுகோளை வைக்கிறார் ஆண்டாள்.
~~மன்னுமதுரை தொடக்கமாக வண்துவராபதி தன்னளவும்
தன்னைத் தமர் உய்த்துப் பெய்யவேண்டித் தாழ்குழலாள் துணிந்த துணிவைப்
பொன்னியல் மாடம் பொலிந்து தோன்றும் புதுவையர்கோன் விட்டுச் சித்தன் கோதை
இன்னிசையால் சொன்ன செஞ்சொல்மாலை ஏத்த வல்லார்க்கு இடம் வைகுந்தமே|| (626)
என்ற பாடலில் ஆண்டாள் பாடிய வடநாட்டுத் தலங்கள் அனைத்தும் குறிப்பிடப்பெற்றுள்ளன. இத்திருமொழி வழி ஆண்டாள் காலத்தில் கண்ணன் பிறந்த இடம், வளர்ந்த இடம், உருவாக்கிய இடம் ஆகியன பற்றிய தகவல்கள் தென்னிந்தியாவில் பரவி இருந்தது என்பதற்குச் சான்றாக உள்ளது. இலக்கியங்கள் வழியாக வடநாட்டையும் தென்னாட்டையும் சமயச்சான்றோர்கள் இணைத்து தேச ஒற்றுமையைக் காத்துள்ளனர் என்பதாகவும் இதனைக் கொள்ளலாம். ஆண்டாள் குறிப்பிட்ட இத்திருத்தலங்களில் தமிழ்ச் சமுதாய வம்சாவழியினர் வாழ்ந்துவருகின்றனர் என்பதற்கு பல சான்றுகள் உள்ளன. இவர்கள் தமிழகத்தில் இருந்து வடநாடு சென்று தமிழ்ப்பண்பாட்டுடன் வாழ்ந்து வருகிறார்கள் என்பதும் குறிக்கத்தக்க செய்தியாகும். இவ்வகையில் சமயங்கள் இடங்கள் கடந்து மக்களை ஒற்றுமைப்படுத்தும் முயற்சியில் ஈடுபட்டிருந்தன என்பதை உணரமுடிகின்றது.
மீ.விசுவநாதன்
சிவகுரு ஆர்யாம்பாள் சீர்மிகுச் செல்வன்
சிவனுரு வென்றே இருந்தார் – உவமை
எதுவு மிலாத எளியதோர் ஞானி
இதுவரை இல்லை இயம்பு. (1)
இயம்பிய எல்லாமும் என்று மிருக்கும்
சுயம்புவாம் தெய்வத்தைப் பற்றும் – பயம்வேண்டாம்
பக்தியினால் உன்மனத்தைப் பக்குவம் செய்தாலே
இத்தரையில் முக்தி எளிது. (2)
எளிதல்ல அத்வைத ஏற்பென்று சொன்ன
ஒளியற்ற வாதங்கள் ஓயப் பளிச்சென
சங்கரர் வைத்த சபைவாதம் வென்றது !
எங்குண் டவற்கே இணை. (3)
இணையிலா கீதை பிரும்மசூத்ரம் மற்றும்
அணையா உபநிடத பாஷ்யம் அனைத்துமே
கற்றோர்கள் மெச்சிடக் கச்சிதமாய்ச் செய்தவரின்
பொற்பாத மென்றும் புகழ். (4)
புகழுக்காய் இல்லாமல் பூமியில் வாழ்வோர்
அகழுக்கைப் போக்கியே ஆன்ம முகவொளியைக்
காட்டிடவே வந்தவர்தான் காலடி சங்கரர் !
சூட்டிடுவோம் நம்நன்றிப் பூ. (5)
பூவைக்கும் போதிலே பொன்மழை கொட்டியே
பூவைக்கு பேரனாக்கிப் போனவர்தான் – தேவை
எதுவும் தனக்கிலா இன்பத் துறவால்
பொதுவாகி நின்றார் பொலிந்து. (6)
பொலிகின்ற ஞானத்தால் பொல்லா மதத்தை
பலிசெய்த சன்யாசி ; பாபக் கலிதீர
பாரத தேசத்தில் பக்திப் பயிறோங்கக்
காரண சங்கரர் கார். (7)
கார்மேகங் கூடக் கலைந்துடன் போகலாம் !
சேர்நட்பும் பாய்ந்துநமைச் சீறலாம் – யார்செய்த
புண்ணியமோ சங்கரர் பூமியிலே வந்திட்டார் !
திண்ணிய முண்டு திரு. (8)
திருவும் அறிவில் திடமாய் பலமும்
அருவாம் அகத்திலே ஆன்மப் பெருக்கும்
உருவாய் அமைந்த ஒளிசங் கரரை
குருவாய்ப் பணியும் குலம். (9)
குலம்பார்க்க வேண்டாம் ; குருபக்தி வைத்தால்
நலம்கோடி சேருமாம் நம்பு – நிலம்வாழ்
மலம்நீங்கிப் போகும் ; வருந்தாதே உள்ளே
சிலம்ப லடங்க சிவம். (10)
(ஸ்ரீ ஆதிசங்கர ஜயந்தி தினம் – 11.05.2016)
திவாகர்
மீன்விழியாள் அருள்நல்கும் நல்
மாநகர்மதுரையே விழாக்கோலத்தில்
மன்னனுக்கு திருமணமாம் கோயிலிலே
பொன்னனைய புதுமனையாள் கைபிடித்தான்
கன்னல்மொழிபேசும் காரிகையோ கண்பார்த்தாள்
கணவனவள் கண்மொழியை அறிந்தான்போலும்
என்னவளே என்னவேண்டும் கேளென்றான்
புன்னகையாய் ஒருவரத்தைக் கேட்டாள்
ஐயனே என் மன்னவனே மீனாளின்
கோயிலிலே என்னைக் கரம்கொண்டவரே
ஆலயத்தில் சிலைகளெல்லாம் கண்டீரோ
காலத்தால் சிதையாத கற்சிலைகளாம்
அதுபோல அடியாளுக்கும் ஓர்சிலை
ஏதோ ஓர்மூலையில் வைப்பீரா?
மீனாளின் காலடியை எந்நாளும்நான்
வணங்கி ஏங்குவதுபோல வடிப்பீரா
மன்னனவன் மனம்மகிழ்ந்தான் அருகே
அன்புமிகுமந்திரியார் நீலகண்ட தீட்சிதர்
மன்னனவன்முகம் பார்த்து மனமறிந்தார்
மன்னன்மனைவிபோல் அச்சிலைசெய்ய
பொறுப்போடு பணி ஏற்றார்பின்னர்
சிறப்பான சிற்பிகளை அழைத்தார்
அழகானவள் அன்பானவளான அரசியாரின்
பிழையில்லா சிலைவடிக்க ஆணையிட்டார்
நாளும்பொழுதும் நன்றாகவே கழிந்தது
நாளொருமேனி பொழுதொருவண்ணமாய்
அரசியின் கற்சிலையும் உருப்பெற்றாலும்
அறிவே உருவாம்நீலகண்டரும் நித்தமும்
வருவார் குற்றம்குறை களையச்செய்வார்
பெருமையாய் சிற்பியும் சிலைவடித்தார்
ஆனாலும் ஓர்குற்றம் ஓரிடத்தில்வந்ததே
ஏனென்றுதெரியாமல் சிற்பியும் கலங்கி
மீனாளின் அடிப்பொடியாம் நீலகண்டரிடம்
தான்கண்ட குற்றத்தைக் காண்பித்தான்
ஏதுசெய்வேன் சொல்வீரோ ஐயன்மீர்
மாதரசி தொடையின் மேற்பகுதியில்
உளிகொண்டு செக்கினாலும் ஆங்கோர்
துளியிடத்தில் எத்தனைதான் செய்தாலும்
புள்ளியாய் அவ்விடத்தில் நின்றுவிடுகிறதே
எள்ளிநகையாட இடம்கொடுக்குமே
காரணம்நான் அறியேன் மன்னர்வந்து
பார்க்குமுன்னே சரிசெய்யவேண்டுமே
தினம்சக்தியை உபாசிக்கும் நீலகண்டர்
மனம் அதேசக்தியை நாடிக்கேட்டதுவே
கண்களைமூடி தியானித்தவர் முன்மனக்
கண்ணின்முன் காட்சிகிடைத்ததுவே
சிற்பியாரே கவலையை விடுமின்
கற்சிலையில்குற்றமில்லை மன்னன்
மனைவியாரின் மேற்கால்பகுதியில்
தினையளவுமச்சம் ஒன்றுண்டு அறிந்தேன்
அங்கயற்கண்ணியின் அரியபக்தை அவள்
ஆங்கதனால் அவள்சிலையும் இப்படியானதே
கூடயிருந்த வீரனொருவன் இவர்சொல்கேட்க
ஏடாகூடமாய் மன்னன்காதில் போட்டுவைக்க
மன்னன் மனம்தள்ளாடி தடுமாறிப்போனதுவே
என்னஇது எப்படியிது தான்மட்டுமே
பார்த்ததாய் தான்நினைத்தால் தன்னைமீறி
பார்முழுதும் பார்த்ததுபோல பறைகின்றார்
யார்கொடுத்தார் இத்தனை தைரியமிந்த
மூர்க்கதீட்சிதருக்கு..இனிவேண்டாம் இந்தமந்திரி
நிற்காதே போவீரனே ஆணையிடுகிறேன்நான்
கற்சிலையைப் பார்த்துப் பித்தாகிக்கிடக்கும்
நீலகண்டன் கண்களிரண்டையும் உடனே
காலம்தாழ்த்தாமல் தோண்டிப் பிடுங்கிவிடு
பறந்தார்வீரர்கள் இருவர் கட்டளையை
நிறைவேற்றவே நீலகண்டர் இல்லத்தில்
அம்மையின்முன்னே கண்மூடிக்கிடந்தவர்
அம்மையினருளால் நடந்ததை அறிந்தார்
சிறியோன் இந்தமன்னன் என்னை
அறிந்தோன் அல்லன் அறிந்தால்
அழகிய அவன்மனைவி என்னில்லத்தில்
குழந்தையாய் வளர்ந்ததை அறிந்திருப்பானே
கோபம் அறிவையும் மறைக்கும்
பாபம் செய்யவும் வைக்கும் ஐயோபாவம்,
மன்னனுக்கு ஏனிந்தவருத்தம் தரும்செயல்
மன்னராட்கள் வரும்வரை காத்திருப்பானேன்
சிற்பியின் குற்றமல்ல சிற்பத்தின்குறை
சிறப்பாய்காண்பித்தாளே இன்று அன்னைமீனாள்
மன்னனின்குற்றமல்ல விதிசெய்தவினையே
மன்னரை மன்னித்தருள்வாயே மதுரைமீனாளே
வேண்டினார் கையிலே எரிகற்பூரம்ஏந்தினார்
கொண்டுதழலைத்தம் கண்களிலே அப்பிக்கொண்டாரே
மன்னனுக்குவிஷயம் போனது ஓடிவந்தான்
மன்னித்துவிடுங்கள் என்றுதாள்பணிந்தான்
அடியேன்சிறியேன் சிறியேன் என்றான்
அடிபற்றிக்கொண்டே அழுதுபுரண்டான்
தன்கண்போனாலும் தவறாக தண்டித்தவனை
மன்னிக்கும்மாண்பு உடைய தீட்சிதரே
பெரியோனே உம்மையினிப் பிரியேனென்றான்
பெரியவள்மீனாளை மீண்டும்கண்வழங்க
பெரியமனம் செய்து பாடவேண்டுமென்றான்
பெரியவரும் மனம்கனிந்தார் மீனாளுக்கு
ஆனந்தசாகரஸ்தவம் நூற்றெட்டு பாடினார்
ஆனந்தமாய் அவர்பார்வை திரும்பியதுவே
திவாகர்
செயற்கரிய செய்வார் பெரியர் சிறியர்
செயற்கரிய செய்கலா தார் (திருக்குறள் -26)
செய்வதற்கு அருமையானவற்றை செய்பவரே பெரியோர்; செய்வதற்கு அரிய செயல்களை செய்ய மாட்டாதவர் சிறியர்,
(திருமலைநாயக்கரின் மந்திரியும் வேதாந்தியுமான அப்பய்யதீட்சிதரின் சகோதரி பேரன் நீலகண்டதீட்சிதர், அவர் வாழ்வில் நடந்த உண்மை நிகழ்ச்சி)
–து.கார்த்திகேயன்
முன்னுரை:
தமிழ் மொழியின் அமைப்பைப் புரிந்துகொள்ள உதவும் சொல்லிலக்கண நூல்களிலேயே முதன்மையானது தொல்காப்பியம் ஆகும். தொல்காப்பியச் சொற்பாகுபாடுகளுள் முதன்மையானவை பெயர்ச்சொல்லும் வினைச்சொல்லும் ஆகும். இவற்றைச் சார்ந்து இயங்குவன இடைச்சொல்லும் உரிச்சொல்லுமாம். தனித்து இயங்கும் ஆற்றல் இல்லை எனப்பெற்றாலும் இசை, பண்பு, குறிப்புப் பொருளுக்கு உரியனவாகவும், பெயர், வினைச் சொற்களுக்கு அடையாகவும் சில வேளைகளில் பெயர், வினைச் சொற்களாகவும் உரிச்சொற்கள் செய்யுள்களில் முதன்மைப் பங்காற்றுகின்றன. அந்த வகையில் தொல்காப்பியர் குறிப்பிடும் உரிச்சொற்களின் மரபுகளைக் காப்பிய இலக்கியமாகிய சிலப்பதிகாரத்தில் ஆய்வதே இக்கட்டுரையின் நோக்கமாகும்.
தொல்காப்பியம் காட்டும் உரிச்சொல்:
தமிழ் இலக்கண நூல்களுள் தொல்காப்பியம், நன்னூல், இலக்கண விளக்கம், நேமிநாதம், தொன்னூல் விளக்கம் ஆகியன உரிச்சொலுக்கென தனி இயல் வகுத்துள்ளன. இவை பெரும்பாலும் தொல்காப்பிய உரிச்சொல் மரபுகளையே பின்பற்றியுள்ளன என்பது குறிப்பிடத்தக்கது. தொல்காப்பியர் குறிப்பிடும் உரிச்சொல் இலக்கணத்தை அடிப்படையாகக் கொண்டு வடிவநிலை மற்றும் பொருள்நிலையில் உரிச்சொற்களின் ஆறு நிலைகளை அறியமுடிகிறது.
வடிவநிலை:
1.எழுத்துப் பிரிந்து இசையாப் பண்பு (தொல்.சொல்.297)
2.பெயரினும் வினையிலும் மெய்தடுமாறல் (தொல்.சொல்.297)
3.நெறிப்பட வாராக் குறைச்சொற் கிளவி
பொருள்நிலை:
1.இடையினும் பண்பினும் குறிப்பினும் தோன்றல் (தொல்.சொல்.297)
2.ஒருசொல் பலபொருள் தோன்றல் (தொல்.சொல்.297)
3.பல்சொல் ஒருபொருள் தோன்றல் (தொல்.சொல்.297)
வடிவநிலை உரிச்சொற்கள்:
தொல்காப்பிய எழுத்ததிகாரத்திலேயே உரிச்சொல்லைப் பற்றித் தொல்கப்பியர் குறிப்பிடுகின்றார். “புள்ளியும் உயிரும் இறுதியாகி நெறிப்பட வாரா குறைச்சொற்கிளவி (தொல்.எழு.421)” என உரிச்சொற்களை குறைச்சொற்கள் என அறிமுகப்படுத்துகிறார் தொல்காப்பியர்.
சால,மழ,குழ போன்ற சொற்கள் முழுச்சொற்கள் அல்ல; குறை வடிவங்களே. இவை நேரடியாகப் பெயரையோ வினையையோ குறிப்பிடவில்லை. மாறாக இலக்கியத்தில் பெயர், வினைகளைச் சார்ந்து வந்தே பொருள் தருகின்றன. இத்தன்மையினாலேயே அவற்றைக் குறைச்சொல் என்றார் தொல்காப்பியர். எடுத்துக்காட்டாக கயமலர் (சிலம்பு:2,10), மழவிடை (சிலம்பு:22,15), வயப்புலி (சிலம்பு:12,27), கவவுக்கை (சிலம்பு:1,61), மதகரி (சிலம்பு:25,49) என்பன போன்ற சொல்லாட்சிகளில் கய,மழ, வய, கவவு, மத ஆகிய குறைச்சொல் வடிவங்கள் பெயரடைகளாக வழங்குகின்றன.
உரிச்சொற்கள் பெயரினும் வினையினும் மெய்தடுமாறி வருகின்றன. மெய்தடுமாறி என்பதற்கு சேனாவரையர் இசை, பண்பு, குறிப்பு என்னும் பொருளாய்ப் பெயர், வினை போன்றும் அவற்றிற்கு முதனிலையாயும் தடுமாறியும் என்று விளக்கமளிக்கிறார். உரிச்சொற்களின் வடிவ நிலையிலான தடுமாற்றத்தை இது உணர்த்துகிறது. அலமரல் என்னும் உரிச்சொல் சிலப்பதிகாரத்தில் அலமந்து (சிலம்பு-21,44) என வினையெச்ச வடிவமாகப் பயின்று வந்துள்ளது. இலம்பாடு என்னும் உரிச்சொல் இலம்பாடு நாணுத்தரும் (சிலம்பு:9,97) என்ற தொடரில் வறுமைப் பொருளைத் தருகின்றது. எனவே உரிச்சொற்கள் சொல் நிலையில் பெயர்களாகவும், வினை வடிவில் குறைச்சொற்களாகவும் (அடையாக) இயங்க வல்லன என உணரலாம்.
பொருள் நிலையிலான உரிச்சொற்கள்:
உரிச்சொற்கள் இசை, பண்பு குறிப்பு பண்புகளில் தோன்றும் எனத் தொல்காப்பியம் குறிப்பிடுகின்றது. உரையாசிரியர், சேனாவரையர், ”உரிச்சொற்கு இலக்கணமாவது இசை, பண்பு, குறிப்பென்னும் பொருட்குரியவாய் வருதலேயாம்” என விளக்கம் தருகிறார்.
தமக்கியல்பில்லாத இடைச்சொற்களைப் போன்று அல்லாது இசை, பண்பு குறிப்புப் பொருட்குத் தாமே உரியவாதலின் உரிச்சொல்லாயிற்று எனவும் உரிச்சொல்லின் இயல்பு எடுத்துக்காட்டப்பட்டுள்ளது. தொல்காப்பியர் குறிப்பிட்டுள்ள 120 உரிச்சொற்களையும் உரையாசிரியர்கள் இசை, பண்பு, குறிப்பு ஆகிய மூன்று நிலைகளில் அடக்கிக் காட்டியுள்ளனர். சேனாவரையர் உரைப்படி, 9 சொற்கள் இசைப்பொருளையும் 15 சொற்கள் பண்புப்பொருளையும் எஞ்சிய 96 சொற்கள் குறிப்புப்பொருளையும் உணர்த்துவன. இவற்றுள் தொல்காப்பியம் கூறும் பொருள்மரபிலேயே சிலம்பில் பயின்று வருவனவாக இயம்பல், கலி ஆகிய இசைச்சொற்களையும், நளி, துணைவு போன்ற சொற்கள் குறிப்புச் சொற்களையும் எடுத்துக்காட்டாக கலிகெழு கூடல் (சிலம்பு:3.125) என்ற தொடரில் கலி என்பது அரவப்பொருளையே தருகிறது. செழுமை என்னும் பண்பு உரிச்சொல் செழுங்குலை (சிலம்பு:25,46), செழுமுத்தம் (சிலம்பு:29.1) ஆகியவற்றில் முறையே, தொல்காப்பியர் குறிப்பிட்ட வளன், கொழுப்பு ஆகிய பொருளில் கையாண்டுள்ளார் இளங்கோவடிகள்.
நளிமலர் (சிலம்பு:2.56), துணைந்து சென்று(சிலம்பு:8.114) ஆகிய தொடர்களில் செறிவு, வரைவு எனக் குறிப்புப்பொருளில் ஆளப்பட்டுள்ளன. எனவே இவ்வாறு பொருள் நிலையில் உரிச்சொற்களை ஆராயும்இடத்து ஒருசொல் பலபொருள், பலசொல் ஒருபொருள் என்ற நிலையில் சிலப்பதிகாரத்தில் மிகுதியும் கையாளப்பட்டுள்ளது.
முடிவுரை:
சிலப்பதிகாரத்தின் சொற்கூறுகளில் உரிச்சொல் நிலைகளை ஆராய்ந்த இக்கட்டுரையின் வாயிலாக உரிச்சொற்களின் இயல்புகள் இலக்கணங்களை அறிய முடிகின்றது. உரிச்சொற்கள் ஒரு சொல் பலபொருள் நிலையிலும், பலசொல் ஒருபொருள் நிலையிலும், குறைச்சொற்களாகிய அடைச்சொற்களாக பெயர், வினைகளுக்கு முன்னேயும், அவற்றைச் சார்ந்தும், பெயர், வினைகளாகவே சில இடங்களிலும் இயங்க வல்லன என அறியலாம்.
***
து.கார்த்திகேயன்
முனைவர் பட்ட ஆய்வாளர்
உதவிப்பேராசிரியர்,
தருமபுரம் ஆதினம் கலைக்கல்லூரி,
தருமபுரம்–மயிலாடுதுறை
tamilkarthik82@gmail.com
தமிழ்த்தேனீ
அம்மாவே ஒரு குழந்தை
எத்தனையோ பேறுகள் பெற்றவள் ஆயினும் அம்மாவே ஒரு குழந்தைதானே மலடி பூக்காமரம் காய்க்காகொடி முளைக்கா விதை என்றெல்லாம் ஒருகுழந்தை பெற்றுத்தர வக்கில்லையென்றே ஏசும் வாய்மொழிகள் வீசும் தீக்கணைகள் எத்தனையோ பேர்கள் அத்தனையும் பெற்றுத் துடித்தாலும் ஏற்காத பழியெல்லாம் ஏற்று மனம் நொந்து போனபின்னே நோற்காத நோன்பெல்லாம் நோற்று வரமாய் ஒரு குழந்தை பெற்றாளே
அம்மாவே ஒரு குழந்தை
தாலாட்டி சீராட்டி பாலூட்டி வளர்க்க ஒரு குழந்தை வேண்டுமென்றே தவம் கிடந்தே பெற்ற ஒரு மகன் அந்தத் திருமகன் வாழ்வுக்காய் எத்தனையோ தியாகங்கள் செய்திருந்தாலும் அத்தனையும் அடி மனதில் அழுத்தி வைத்தே சிரித்தாள் அம்மாவே ஒரு குழந்தை
தவமிருந்து தான் பெற்ற அந்த ஒரு மகன் அந்தத் தாயின் திருமகன் அவளைக் காப்பான் என்று சற்றும் எண்ணாமல் அவனைக் காப்பதே வரமாய் வளர்த்தாள்
அம்மாவே ஒரு குழந்தை
எதிர்பார்ப் பேதுமின்றி அவன் சொன்ன சொல்லுக்கெல்லாம் மறுப்பேதுமின்றி எதற்கும் தலையாட்டி நயந்தாள் பயந்தாள் இழைந்தாள் குழைந்தாள் அவள் பெற்ற குழந்தைக்காய் அவள் குழந்தை ஆனாளே அம்மாவே ஒரு குழந்தை எதிர்பார்ப் பேதுமின்றித்தானே தவமிருந்தாள் தானே தவமிருந்தாள்
தாயறியாச் சூலா நூலறியாச் சீலையா தவமிருப்பதே வேலையா அதென்ன பிள்ளை பெறும் ஆலையா
சூலாயுதம் கொண்டே காக்கும் வேலாயுதா சூல் ஆயுதம் கொண்டே தாக்கினால் தாங்குவார் யாருளர் தவித்தே போனாள் தனித்தே அவன் போனான் தவித்தே இவள் போனாள்
பாவம் அம்மாவே ஒரு குழந்தை
தாய்க்குப் பின் தாரம்தானே அந்த அவதாரம் தானே சொன்ன மந்திரம் ஆக்கியதே அவளை யந்திரமாய் இனித்தே பெற்ற அந்த ஒரு மகன் அவளைத் தனித்தே தைரியமாய் துணித்தான்
அவளை பணித்தாயாய்ப் பணித்தான் அவளுக்கு தனிமையைத் திணித்தான் இனித்தேற வழியுண்டோ தனித்திருந்து தவமிருந்தாள் தவமிருந்து தனித்திருந்தாள் தனித்திருக்கும் நேரமெல்லாம் தவமிருந்தாள் தவமிருந்த காலமெல்லாம் தனித்திருந்தாள் அதனால்தான் பிள்ளை கனிந்தான் அறியாமல் அவனின்று நினைந்தான் அவளைத் தவிர்த்திருக்கக துணிந்தான்
பாவம் அம்மாவே ஒரு குழந்தை
அன்புக்காய் பரிவுக்காய் அன்பான உறவுக்காய் இதமான சொல்லுக்காய் பரிவான மனதுக்காய் ஏங்கியேங்கித் தவித்தாள் கனிகின்ற காயானால் கனியும் எப்போதும் கனியாத காயாலே தனித்தாள்
பாவம் அம்மாவே ஒரு குழந்தை
(கட்டுரை: 3)
++++++++++++++++
புனித வேத நூல்களில் நாம் காணும் மேன்மையான நியதிகளை நிலைநாட்டி மெய்ப்பிக்கவே, மனித முயற்சிகள் விஞ்ஞானத்தில் மேற்கொள்ளப் பட்டன என்று எனக்குத் தோன்றுகிறது.
விஞ்ஞான மேதை ஜான் ஹெர்ச்செல் [1792-1871]
விரியும் பிரபஞ்சத்தைப் பற்றி அறிய ஒரு பிறவிக் காலம் முழுதும் அர்ப்பணித்தாலும் போதாது! மறைந்து கிடக்கும் அகிலத்தின் மர்மங்கள் சிறிது சிறிதாகவே மலர்கின்றன! அநேக புதிய புதிர்களை வரப் போகும் எதிர்கால யுகங்களுக்காக, இயற்கை தனியாக வைத்துள்ளது! எல்லா மர்மங்களையும் ஒரே காலத்தில் விடுவிக்க, இயற்கை ஒருபோதும் நம்மை விடுவதில்லை!
ஸெனேகா (முதல் நூற்றாண்டு ஞானி)
பெருவெடிப்புத் தோற்றம்
பிரபஞ்சப் பெரு வெடிப்பை விளக்கிய ரஷிய விஞ்ஞானி
பிரபஞ்சத்தின் பிறப்புக் கோட்பாடுகளில் ஒன்றான ‘பெரு வெடிப்பு நியதியை ‘ [Big Bang Theory] உறுதியாக நம்பி அதை விருத்தி செய்த முன்னோடிகளான, ரஷ்ய விஞ்ஞானி அலெக்ஸாண்டர் பிரைடுமான் [Alexander Friedmann], அமெரிக்க விஞ்ஞானி எட்வின் ஹப்பிள் [Edwin Hubble], பிரிட்டிஷ் விஞ்ஞானி பிரெட் ஹாயில் [Fred Hoyle] ஆகியோருள் முக்கியமானவர் ரஷ்ய விஞ்ஞானி, ஜார்ஜ் காமாவ்.
பிரபஞ்சத்தின் முழுத் தோற்றத்தைப் புரிந்து கொள்ள வேண்டு மானால் அதன் மூலமான நுண்ணிய பரமாணுக்களையும், விரிந்து குமிழி போல் உப்பும் அதன் பிரமாண்ட வடிவத்தையும் பற்றிய எல்லாக் கருத்துக்களைத் தனித்தனியாக அறிய வேண்டும்! பிரபஞ்சத்தின் முதல் தோற்றம் ஒரு மாபெரும் வெடிப்பில் [Big Bang Theory] உண்டானது என்பதற்கு முதன் முதல் நிரூபணத்தைக் காட்டியவர் ஜார்க் காமாவ்! அதாவது பல பில்லியன் ஆண்டுகளுக்கு முன்பு ஓர் பேரளவு வெடிப்பு நிகழ்ச்சியில் [Colossal Explosion] பிரபஞ்சம் தோன்றி விரிவடைந்து வந்துள்ளது என்ற ஒரு கருத்தை ஆதரித்து, அதற்கு விளக்கம் அளித்து மெய்ப்பித்தவர்களில் முதல்வர், ஜார்ஜ் காமாவ்! பெரு வெடிப்புக்குப் பின்பு பிரபஞ்சம், பின்புல நுண்ணலைக் கதிர்வீச்சை [Background Microwave Radiation] உண்டாக்கி யிருக்க வேண்டும் என்று உறுதியாகக் கூறி, அதையும் நிரூபித்தும் காட்டினார்!
பெருவெடிப்பு வளர்ச்சி
1936 ஆம் ஆண்டுக்குப் பிறகு ஜார்ஜ் காமாவின் மிக்க விஞ்ஞானச் சாதனைகள் பிரபஞ்சத்தின் தோற்றம் பற்றியும், விண்மீன்களின் பிறப்பு, வளர்ச்சியைப் பற்றியும் சார்ந்திருந்தன. 1939 இல் விரியும் பிரபஞ்சத்தின் மாதிரிக் [Model of the Expanding Universe] கோட்பாட்டை ஆதரித்து அதை அபிவிருத்தி செய்தார். அத்துடன் நெபுளாக்களின் பிறப்பு [Origin of Nebulae], ராட்சதச் செம்மீன்கள் [Red Giant Stars] சக்தியை உற்பத்தி செய்யும் முறைகள் ஆகியவற்றை ஆராய்ந்தார். விண்மீன்கள் வெடிக்கும் போது, அவற்றிலிருந்து நியூட்ரினோ துகள்கள் [Neutrino Particles] வெளியேறுவதை 1940 இல் ஆய்வு செய்து, தான் ஆக்கிய பூதநோவாவின் நியூட்ரினோ நியதியை [Neutrino Theory of Supernova] வெளியீடு செய்தார்.
ஜார்ஜ் காமாவின் விஞ்ஞானச் சாதனைகள்
1948 இல் விஞ்ஞானி ரால்·ப் ஆல்·பருடன் [Ralph Alpher] காமாவும் சேர்ந்து, யூகிப்பட்ட பெரு வெடிப்புக்கு [Postulated Big Bang] நிகழ்ச்சிக்கு முன்பு, பிரபஞ்சத்தின் நிலைமை என்ன என்று ஆராய்ந்ததில் எஞ்சிய நுண்ணலை வெப்பவீச்சு [Residual Microwave Radiation] இருப்பதைக் கண்டார்கள்! அவர்களது அவ்வரிய கண்டுபிடிப்பு மெய்யானது என்று 1965 இல் பிரின்ஸ்டன் பல்கலைக் கழக விஞ்ஞானிகள், தாமும் கண்டு உறுதிப்படுத்தினர்!
எட்வின் ஹப்பிள் விண்ணோக்கி
விண்வெளியை வில்லாய் வளைக்க முடியுமா ? பிரபஞ்சத்தின் முடிவுக்கும் ஒழுங்கீனக் கோட்பாடு எனப்படும் ‘என்ட்ராப்பி நியதிக்கும் ‘ [Theory of Entropy] என்ன தொடர்பு ? அண்ட வெளியில் ஊடுறுவிச் செல்லும் ராக்கெட் ஏன் சுருங்குகிறது ? விண்மீன்கள் வெடிப்பதற்கு ஆதி அடிப்படையும், அவற்றுக்குக் காரணங்கள் என்னவென்று நாம் அறிந்து கொண்டதின் விளைவென்ன ? சந்ததியின் மூலவிகள் [Genes] புரியும் விந்தைப் புதிர்களைப் பற்றி நவீன விஞ்ஞானம் கண்டு பிடித்தவை என்ன ? உலகத்தைப் பற்றி நாம் அறிந்ததை, ‘இலக்கங்களின் விதிப் பிரச்சனைகள் ‘ [Problems in Laws of Numbers] எவ்விதத்தில் பாதிக்கின்றன ? இத்தனை வினாக்களையும் தான் எழுதிய ‘ஒன்று, இரண்டு, மூன்று.. முடிவின்மை ‘ [One, Two, Three…Infinity] என்னும் நூலில் எழுப்பியவர், ரஷ்ய அமெரிக்க விஞ்ஞானி ஜார்ஜ் காமாவ் [George Gamow]! ரஷ்யாவிலே பிறந்து அமெரிக்கக் குடியினராகிய ஜார்ஜ் காமாவ் அணுக்கரு பெளதிகம் [Nuclear Physics], பிரபஞ்சவியல் [Cosmology] பெளதிகம், மூலக்கூறு உயிரியல் ரசாயனம் [Molecular Biochemistry] ஆகிய முப்பெரும் பெரு வெடிப்பு நியதியின்படி, பிரபஞ்சம் முதற் சில இம்மி வினாடிகளில் [microseconds] அதி விரைவாக விரிந்து விட்டது! ஒரே ஓர் உச்சவிசை [Force] மட்டும் முதலில் இருந்து, பிரபஞ்சம் விரிந்து போய்க் குளிர்ந்ததும் அந்த ஒற்றை விசையே, பின்னால் நாமறிந்த ஈர்ப்பியல் விசை [Gravitational Fprce], மின் காந்த விசை [Electromagnetic Force], அணுக்கரு வலுத்த விசை [Strong Nuclear Force], அணுக்கரு நலிந்த விசை [Weak Nuclear Force] ஆகிய நான்கு பிரிவுகளாய் மாறியது!
ஹப்பிள் வெகுதூரக் காட்சி
சோப்புக் குமிழிபோல் உப்பிடும் பிரபஞ்சம்
விஞ்ஞானிகள் ஒளித்துகள் யந்திரவியலையும் [Quantum Mechanics], ஈர்ப்பியலையும் ஒருங்கே பிணைக்கும் ஒரு பொது நியதியைத் தேடி வருகிறார்கள்! இதுவரை யாரும் அதைக் கண்டு பிடிக்க முடிய வில்லை! புதிதான ‘இழை நியதி ‘ [String Theory]. அவ்விரண்டையும் பிணைக்கும் என்று விஞ்ஞானிகள் நம்புகிறார்கள். ஈர்ப்பியல் விசையை மற்ற மூன்று வித விசைகளுடன் பிணைத்துக் கொள்ள ‘இழை நியதி ‘ முயல்கிறது! ஆனால் பெளதிக விஞ்ஞானிகள் இப்போது இந்த நான்கு வித விசைகளையும் ஒருங்கே பிணைத்து விளக்கும் ‘மகா ஐக்கிய நியதி ‘ [Grand Unified Theory, GUT] ஒன்றைத் துருவிக் கண்டு பிடிக்க முற்பட்டு வருகிறார்கள்!
சோப்புக் குமிழிபோல் உப்பிடும் [Inflationary Model] பிரபஞ்சம், அந்நிலை முடிந்ததும் மெதுவாகவே விரிகிறது! கோளமாய் விரியும் பிரபஞ்சத்தின் விளிம்பு திறந்த வெளிக்கும், மூடிய வெளிக்கும் இடையே அமைகிறது! பிரபஞ்சம் திறந்த வெளியாக இருந்தால், எப்போதும் அது விரிந்து, விரிந்து, விரிந்து போய்க் கொண்டே யிருக்கும்! மூடிய விளிம்பாகப் பிரபஞ்சம் இருந்தால், அதன் விரிவு நிலை ஒரு காலத்தில் நின்று விடும்! பிறகு அது சுருங்க ஆரம்பித்து, திணிவு அடர்த்தி மிகுந்து, இறுதியில் வெடித்துச் சிதறிவிடும்! பிரபஞ்சம் மூடிய கோளமா அல்லது திறந்த வெளியா என்பது அதன் திணிவு [Density], அன்றி பளு அடர்த்தியைச் [Concentration of Mass] சார்ந்தது! பிரபஞ்சம் அடர்த்தி மிகுந்த பளுவைக் கொண்டிருந்தால், அதனை மூடிய கோளம் என்று கூறலாம்!
உப்பி விரியும் பிரபஞ்சம்
பிரபஞ்சத்தின் பெரு வெடிப்பு நிகழ்ச்சிக்கு முன்பு எந்த நிலை இருந்தது என்று, ஸ்டா·பன் ஹாக்கிங் [Stephen Hawking] போன்ற விஞ்ஞான மேதைகள் கேள்வி எழுப்பி யிருக்கிறார்கள்! பெரு வெடிப்பு நியதியில் பிரபஞ்சத்தின் முற்கால நிலை பற்றி எந்த விளக்கமும் இல்லை! காலக் கடிகாரமே பெரு வெடிப்பிற்கு பின்பு ஓட ஆரம்பித்திருக்கலாம்! ஆகவே பெரு வெடிப்புக்கு முன்பு என்ன இருந்திருக்கும் என்று எழும் கேள்விகளுக்கு ஒருகாலத்தில் பதில் கிடைக்கலாம் !
பெரு வெடிப்பு நியதியை மெய்ப்படுத்தும் நிகழ்ச்சிகள்
பிரபஞ்சம் பெரு வெடிப்பிற்குப் பிறகு விரிந்து கொண்டே குளிர்ந்து போகிறது. பெரு வெடிப்பிற்கு ஓரு வினாடி கழித்துப் புரோட்டான்கள் உண்டாயின. முதல் மூன்று நிமிடங்களில் புரோட்டான், நியூட்ரான்களும் பிணைந்து, ஹைடிரஜனுடைய ஏகமூலமான [Isotope] டியூடிரியம் [Deuterium], அடுத்து எளிய மூலகங்களான ஹீலியம், லிதியம், பெரிலியம், போரான் [Helium, Lithium, Beryllium, Boron] ஆகியவை உண்டாயின! விண்வெளியில் மித மிஞ்சிய அளவு ஹீலியம் இருப்பது, பெரு வெடிப்பு நியதியை மெய்ப்படுத்தி உறுதிப் படுத்துகிறது. டியூடிரியம் பிரபஞ்சத்தில் பேரளவில் பரவி யிருப்பது, அகிலத்தின் அண்டத் திணிவைக் [Density of Matter] கணிக்க அனுகூலமாய் இருக்கிறது!
பிரபஞ்சப் பின்புலக் காட்சி
பெரு வெடிப்பு ஏற்பட்டு ஒரு மில்லியன் ஆண்டுகளுக்குப் பிறகு, பிரபஞ்சத்தின் உஷ்ணம் 3000 டிகிரி C அளவுக்குக் குறைந்தது! அப்போது புரோட்டான்களும் எலக்டிரான்களும் சேர்ந்து ¨†டிரஜன் அணுக்கள் உண்டாயின. ஹைடிரஜன் அணுக்கள் ஒளியின் குறிப்பிட்ட சில அலை நீளங்கள், நிறங்கள் ஆகியவற்றை எழுப்பவோ அன்றி விழுங்கவோ செய்யும்! அவ்வாறு உண்டான அணுக்கள், தனித்த எலக்டிரான்ளுக்கு இடையூறு செய்யும், ஒளியின் மற்ற அலை நீளங்களை வெகு தூரத்திற்கு அப்பால் தள்ளி விடுகின்றன. இந்த மாறுதல் வெப்பவீச்சை விடுவித்து இன்று நாம் காணும்படிச் செய்கிறது! பல பில்லியன் ஆண்டுகளுக்குப் பிறகு குளிர்ந்த அந்த ‘அகிலவியல் பின்புல வெப்பவீச்சு ‘ [Cosmic Background Radiation] சுமார் 3 டிகிரி Kelvin [3 K (-273 C/-454 F)]. 1964 இல் முதன் முதல் அகிலவியல் பின்புல வெப்பவீச்சைத் தேடிக் கண்டு பிடித்த அமெரிக்க வானியல் மேதைகள் இருவர்: ஆர்னோ பென்ஸையாஸ், ராபர்ட் வில்ஸன் [Arno Penzias & Robert Wilson].
நான்கு வித அகில விசைகள்
பெரு வெடிப்புக்குப் பிறகு பின்புல வெப்ப வீச்சு
1989-1993 ஆண்டுகளில் தேசிய வானியல் விண்வெளி ஆணையகம், நாசா [NASA, National Aeronautics & Space Administration] ‘அகிலப் பின்புல உளவி ‘ [Cosmic Background Explorer, COBE] என்னும் விண்வெளிச் சிமிழை [Spacecraft] ஏவி, அண்ட வெளியில் அகிலப் பின்புல வெப்பவீச்சைத் தளப்பதிவு [Mapping] செய்தது. அந்த தளப்பதிவு ‘பெரு வெடிப்பு நியதி ‘ முன்னறிவித்தபடி மிகத் துள்ளியமாக பின்புல வெப்ப வீச்சு அடர்த்தியை [Intensity of the Background Radiation] உறுதிப் படுத்தியது! அத்துடன் அகிலவியல் பின்புல வெப்பவீச்சு சீராக நிலவாது [Not Uniform], சிறிது மாறுபட்டுக் காணப் பட்டது! அந்த மாறுதல்கள் பிரபஞ்சத்தில் காலக்ஸிகள் [Galaxies], மற்ற அமைப்பாடுகளின் வளர்ச்சிக்கு அடிப்படையாய்க் கருதப் படுகின்றன!
பின்புல வெப்பவீச்சு பிரபஞ்சப் பெரு வெடிப்பிற்குப் பிறகு எஞ்சிய நீண்ட கால விளைவு! ஜெர்மன் விஞ்ஞானி மாக்ஸ் பிளான்க் [Max Planck (1858-1947)] கருங்கோளக் கதிர்வீச்சை [Black Body Radiation] ஆராய்ந்து எழுதிய, ‘பிளான்க் கதிர்வீச்சுக் கணிப்பாடு [Planck ‘s Radiation Formula] மூலம் உட்சிவப்பு, நுண்ணலை, வானலை [Infrared, Microwave, Radio Waves] ஆகியவற்றின் அலை நீளங்களைத் தனியே கணக்கிட்டு விடலாம்! அவற்றின் கூட்டமைப்பே பின்புலக் கதிர்வீச்சுகளின் அடர்த்தியாகக் [Intensity of Background Radiation] காணப் படுகிறது. ‘ஓர் குறித்த உஷ்ண நிலையில் கதிர்வீச்சு அடர்த்திக்கும், அதன் அலை நீளத்திற்கும் உள்ள ஓர் ஒப்பான உறவை ‘ மாக்ஸ் பிளான்க் வளைகோடு முன்னறிவிக்கிறது. பெரு வெடிப்பின் பின் தங்கிய பின்புலக் கதிர்வீச்சு 3 டிகிரி K [-270 C/-450 F] உஷ்ண நிலையில், மாக்ஸ் பிளான்க் முன்னறிவித்த வளைகோட்டை வியக்கத் தக்கவாறு ஒத்துள்ளது! ஏறக்குறைய பின்புலக் கதிர்வீச்சு பிரபஞ்சத்தில் எத்திசையிலும் ‘சம வெப்பநிலை ‘ [Isotropic State] கொண்டுள்ளதாக அறியப் படுகிறது.
ஹப்பிள் தொலைநோக்கு ஆழ்நீட்சி
ஆழ்வெளியில் ஒளிவீசும் பால்மய காலக்ஸி, நெபுளாக்கள்
ஆதியின் முதல் பிரளயமாய்த் தோன்றிய பெரு வெடிப்பின் [Big Bang] விளைவாய் 10 பில்லியன் ஆண்டுகளுக்கு முன் பிறந்தவையாக காலக்ஸிகள் கருதப் படுகின்றன! பிரபஞ்ச வெளியில் விண்மீன் மந்தைகள் கொண்ட காலக்ஸிகள் சீரான அமைப்புத் தீவுகளாய் உண்டாக வில்லை! அகிலத்தின் ஆக்கிரமிப்பு விசையான ஈர்ப்பியல் [Gravitation] பண்பு இழுத்து இணைத்துக் கொண்ட தீவுக் கூட்டங்களாய் அவை தென்படுகின்றன! ஒரு பில்லியன் ஒளிமயத் தீவுகள் அல்லது விண்மீன் பூத மந்தைகள் [Giant Clusters of Stars] பிரபஞ்சத்தில் உள்ளதாக ஊகிக்கப் படுகிறது. அந்த ஒளிமயத் தீவுகளே காலக்ஸிகள் [Galaxies] என்று விஞ்ஞானிகளால் அழைக்கப்படுபவை.
ஒவ்வொரு காலக்ஸியிலும் 100 பில்லியன் விண்மீன்கள் கூடி யுள்ளன என்று கணிக்கப் பட்டுள்ளது! அத்தகைய ஒரு சுய ஒளிமீனே நமக்குச் சுடர்தரும் பரிதி! நமது சூரிய மண்டலம் நகரும் காலக்ஸியைக் கொண்ட பால்மய வெளியில் [Milky Way] ஏராளமான மற்ற காலக்ஸிகளும் இருக்கின்றன! காலக்ஸிகளின் இடைவெளிகள் நினைத்துப் பார்க்க முடியாத தொலைவு தூரம்! நமது பால்மய வீதிக்கு நெருங்கிய காலக்ஸி 1.9 மில்லியன் ஒளியாண்டு தூரத்தில் உள்ளது! [Light Years -Distance light covers in a year at the rate of 18600 miles/sec]. காலக்ஸித் தீவுகள் நீள்வட்ட உருவத்திலோ அல்லது சுருள் வடிவத்திலோதான் [Elliptical or Spiral Shape] தோன்றும்! ஒருவித ஒழுங்கு வடிவமும் இல்லாத காலக்ஸிகள், பிரபஞ்சத்தில் மிக மிகக் குறைவு.
பல்வேறு ஒளிமந்தைத் தோற்றம்
பிரபஞ்ச விரிவு பற்றி மாறான ஐன்ஸ்டைன் கருத்து.
1915 ஆம் ஆண்டில் ஒப்பியல் நியதியை ஆக்கிய ஆரம்ப சமயத்தில் ஐன்ஸ்டைன் பிரபஞ்சம் நிலையானது என்று நம்பினார்! பெரு வெடிப்பு நியதி வெளியாகி, பிரபஞ்சம் சோப்புக் குமிழிபோல் உப்பி விரிகிறது என்னும் கருத்தை முதலில் ஐன்ஸ்டைன் ஒப்புக் கொள்ளத் தயங்கினார்! அவரது பொது ஒப்பியல் நியதித் தளவியல் சமன்பாடுகளின் தீர்வுகளிலிருந்து பெரு வெடிப்பு நியதி தோன்ற ஓர் கூட்டமைப்பு [Framework] உருவானது. ஆனால் பல ஆண்டுகளுக்குப் பின் இன்றும் ஒப்பியல் நியதியின் பல விபரங்கள் மாற்றப் பட்டு வருகின்றன! நியதிச் சமன்பாட்டில் பிரபஞ்சம் விரிகிறதா அல்லது சுருங்குகிறதா என்பதை விளக்க வந்த இடத்தில், ஐன்ஸ்டைன் ஓர் நிலை யிலக்கத்தைச் [Constant] சேர்த்ததால், விரிவும் சுருக்கமும் கழிவு பட்டுப் போயின! பின்னால் பிரபஞ்சம் விரிகிறது என்ற கருத்துக்கள் உறுதியான போது, அகில நிலை யிலக்கத்தைச் [Cosmological Contant] இடையில் நுழைத்தது, ‘தனது மாபெரும் தவறு ‘ என்று ஆல்பர்ட் ஐன்ஸ்டைன் ஒப்புக் கொண்டார்!
Click to view large image
(தொடரும்)
*********************
தகவல் :
Picture Credit : 1. Astronomy (August 21, 2007) 2. Universe 6th Edition (2002) 3. National Geographic Encyclopedia of Space (2005) 5. 50 Years of Space (2004)
1. Astronomy Magazine : 50 Greatest Mysteries of the Universe (Aug 21, 2007)
2. Universe By Roger Freedman & William Kaufmann III (2002)
3. National Geographic Encyclopedia of Space By Linda Glover.
4. The World Book Atlas By World Book Encyclopedia Inc (1984)
5. Scientific Impact of WMAP Space Probe Results (May 15, 2007)
6. BBC News – Hubble Obtains Deepest Space View By Dr. David Whitehouse, Science Editor (Jan 16, 2004)
7. http://www.thinnai.com/?
8. http://www.thinnai.com/?
9. http://www.thinnai.com/?
10. https://en.wikipedia.org/
******************
70துகளில் எனது ஹீரோ திருமழிசைபிரான்….இவர் எழுதிய ‘’திருச்சந்த விருத்தம்’’ வாசித்துக் கொண்டேயிருப்பேன்….அந்தப் பிரேமையில் எழுதியது அன்று….இன்று என் ஹீரோ கேசவ் கண்ணன்….சமர்ப்பணம்….
“பெருமாள் புகழ்’’
—————————–
பொன்மகள் அமர்ந்து பாத பங்கயம் பிடித்திட
பொன்னிசூழ் அரங்கில் ஆதி சேடனார் படுக்கையில்
தென்னிலங்கை வென்ற சோர்வில் கண்துயின்றவன் புகழ்
பண் சிறக்க பாரதம் வடித்த வாரணம் சரண்….(1)
கயல் ஆமை பன்றியோடு கோர சிம்ம வாமனம்
புயல் பரசுராம ராம பலராமக் கண்ணனாய்
அயக்ரீவ கல்கியென அவதரித்து அதர்மநாள்
துயர் துடைக்கும் நாரணன் தூய தேசு பூரணன்….(2)
பஞ்ச பூத சேர்க்கையில் பிரபஞ்சமாய் விரிந்தவன்
செஞ்சரண் பணிந்த அன்பர் நெஞ்சகம் நிறைந்தவன்
அஞ்சு புலன் ஆண்டவர்க்கு ஆத்மஞான தேசிகன்
மஞ்சு வண்ண முழுமுதற்ப் பொருள் அனாதி கேசவன்….(3)
சொல்லவன் சொலப்படும் சொல் அருத்தமானவன்
அல்லுபகல் அந்திமாலை அர்த்த சாமமானவன்
புல்லவன் கல்லவன் பல்லுயிர் புகுந்துவாழ்
தொல்பொருள் தொடர்ச்சியாய் துலங்கு தாமோதரன்….(4)
உண்ட அன்னமாகி அதை உதரமிருந்து உண்பவன்
உண்டை செரித்து உபரி ஒதுக்கும் உந்திகனலவன்
மண்டையேறி ஐம்புலன் ஆடுமாடு மேய்ப்பவன்
அண்டவாணர் பண்டைமுனிகள் அடியுறைகொள் அச்சுதன்….(5)
விழியிரெண்டின் ஜோதிகண்டு வெட்கும்சோம சூரியன்
பொழியும்தேன் மலரோவென மதுகரம்மருள் பதயுகம்
மொழிவாணியை மெளனமாக்கும் மதுரமான சொல்அதரம்
தொழில்தவம் அரன்தழுவு எழில்வடிவ மோகனன்….(6)
ஈவிரக்கமற்ற கம்சன் காவலுற்ற தாய்வசு
தேவகிக்குடல் விளக்க ஆவாகனித்து ஓர்
ரேவதியில் அட்டமிநாள் ராத்திரியில் உதித்தபின்
ஆவலோடு ஆயர்பாடி அசோதைபால் புகுந்தவன்….(7)
தன்னையே மறந்துநாளும் தவமியற்றும் நாரதாதி
புண்ணியர்கள் பார்த்திராத ப்ரபஞ்சமாய தத்துவம்
இன்னதென்ற உண்மையை இடைச்சி அன்னைமட்டும் காண
மண்னையுண்ட செம்பவளச் சின்னவாய் திறந்தவன்….(8)
நஞ்சு காளியன் சிரத்தில் பிஞ்சுகால் பதித்தவன்
தஞ்சமென் றுஒடுங்க ஒயில் தாண்டவம் புரிந்தவன்
வஞ்சபேய் முலைச்சி தந்த நஞ்சு பாலினோடவள்
சஞ்சலங்கள் ஏதுமின்றி நெஞ்சுயிர் சுவைத்தவன்….(9)
சூறைவாயு போலவந்த சகடரக்கன் அச்சிலே
பாறையாய் அமர்ந்துஅவன் ஆரவாரம் அடக்கிவான்
கூரைதாண்டி கொண்டுபோய் குப்பையாய் எறிந்தவன்
நூறைஐந்து வென்றுஆள பாரதம் வகுத்தவன்….(10)
அங்கைநான்கில் ஆழிசங்கு அபயவரம் மாரில்பார்
நங்கையும் நறுந்துழாய் நலிந்தநாதர் செங்கண்மால்
இங்குளான் என்றுஈன் றதையிகழ் இரண்யன்முன்
அங்குஉள்ள தூண்பிளந்து சிங்கமாய் குதித்தவன்….(11)
அங்கைநான்கில் ஆழிசங்கு அபயவரம் மாரில்பார்
நங்கையும் நறுந்துழாய் நலிந்தநாதர் செங்கண்மால்
இங்குளான் என்றஈன் றதைஇகழ் இரண்யன்முன்
அங்குஉள்ள தூண்பிளந்து சிங்கமாய் குதித்தவன்….(11)
பரந்தமார் தனில்துழாய் பூவிருந்த கோமளை
சிரங்கள்நான்கு கொண்டஅயன் சிவந்தநாபி தாமரை
இருந்தவாறு பாற்கடல் அனந்தன்மேல் கிடந்துநீள்
அருந்தவம் புரிந்திடும் நிரந்தரப் பரம்பொருள்….(12)
இராம வென்றிறைஞ்சி வந்த இராக்கதன் விபீடணன்
தராதரம் விசாரியாது அவர்க்கடைக் கலத்தையும்
இராவணன் தொலைத்திலங்கை ஆட்சியும் அளித்தவன்
அண்ட சராசரங்கள் ஆள்பவன்….(13)
மூவடிக்கு மண்நயத்த மாணிக் குறளன்தனை
தேவுஎன்று அறியாமல் ஆவலோடு தாரைவார்
மாவலி விதிர்க்க மூ உலகளந்த விக்ரமன்
சேவடி கோன் சென்னிவைத்து சிரஞ்சீவி ஆக்கினன்….(14)
கரிராஜன் கஜேந்திரன் கால்கராம் வயப்பட
’’அரிமுகுந்த அச்சுதா’’ அபயம்என்று பிளிறிட
துரிதமாய்ப் பருந்திலே தடாகம் ஏகிகாத்தவன்
பரிமுகத்து தேசிகன் பரிவில்தாய் நிகர்த்தவன்….(15)
வேதம்நாலும் வேதியர் ஆகமங்கள் சாத்திரம்
பூதமைந்தும் ஆதிசங் கரர்அமைத்த ஷண்மதம்
தீதுகொல் தீர்த்தமேழும் தகவுசேர் யோகமெட்டும்
ஓதுயாகம் ஒன்பதும் பாதம்கொள் பவித்திரன்….(16)
போர்களம் புகமறுத்து பார்த்தனன்று வேர்த்ததும்
தேர்தளம் அமர்ந்துதிவ்ய கீதைசொல்லி தேற்றிபின்
ஆர்ப்பு பாஞ்சசைன்யம் ஊதிஅகைப்பு செய்தபாரதம்
நேர்த்தியாய் நடத்திநல் தர்மம்வெல்ல வைத்தவன்….(17)
திரிதராட்டினன் போல பெரிய பாட்டனார்களும்
துரியோதனன் செயலை தூசனித்து விழிமூட
அரிவை பாஞ்சாலி துகிலை உரித்த துச்சாதனன்
சரியசோர்வில் சேலைபெய்து தையல்மானம் காத்தவன்….(18)
துருவனுக்கு வானமும், துரோபதைக்கு மானமும்
தருமனுக்கு ஆட்சியும், கர்ணனுக்கு காட்சியும்
திருவை சுதாமனுக்கும் தோழமையை மாருதிக்கும்
சிறுமைக்கும் பெருமைசேர கருமைகாயம் கொண்டமால்….(19)
வனிதைபொன் மடந்தையும் வையகத்து மங்கையும்
புனிததுயில் அணங்கையும் பரமபதம் கொண்டுவாழ்
வினதைமகன் வாகனன் விண்ணளந்த வாமனன்
மனிதஜென்மம் எடுத்து மனுதர்மம் நாட்டும்மாதவன்….(20)
ஊழிதோறும் பாலனகி உலகனைத்தும் உண்டுஅலை
ஆழிமேல் ஆலிருந்து ஏழ்பிறப்பு லோகசிருஷ்டி
நாழிகைப் பொழுதிலே நினைப்பிலே படைப்பவன்
ஆழிசங்கு ஏந்துகின்ற ஆழிவண்ண ஊழியன்….(21)
சோவென்று இடிமின்னலோடு தேவேந்திர மாரிபெய்ய
கோவர்த்தன குடைபிடித்து கோகுலஇடர் தீர்த்தவன்
நாவனர்த்த சிசுபாலன் உவலைநகுதல் நூறுமீற
கோவமுற்று அவன்சிரத்தை சீவதிகிரி விடுத்தவன்….(22)
விருப்புடை உருப்பினிக் கரம்பிடித்து ஊர்தியில்,
இருத்திவாயு வல்லைகொள்ள துரத்திவந்த தமையனார்
உருப்பனை விரட்டிஊர் திருத்தலம் துவாரையில்
வரித்தவள் கழுத்தினில் தெரியலிட்ட திண்புயன்….(23)
கலநேமி வக்கிரன் கேசிகம்ச பவுண்டிரன்
மாலிகன் கரன்முரன் மதுகைடப தேனுகன்
கேலிசெய்த இரணியன் கோதைகள்வ ராவணன்
காலனோடு கூடவைத்து ஞாலஇடர் தீர்த்தவன்….(24)
கூடுகவிச் சேனையோடு கடல்கடந்து ராவணன்
நாடிலங்கை யோடவனை நசித்தசோக வனத்தினில்
வாடு சீதையோடு கூடி வான ஊர்தி வாயிலாய்
ஆடுவாகை சூடிசீர் அயோத்திபுக்கு ரகுவரன்….(25)
கேசவன் நாராயண மாதவன் குறள் இருடீ
கேசவன் சீதரன் குறையிலா கோவிந்தன்
வாசபத்ம நாபவிஷ்ணு விண்ணளந்த விக்கிரமன்
பாசதா மோதரன் மாசிலா மதுசூதனன்….(26)
தாதைவாக்கு மந்த்ரமென்ற தொன்மைசொல் தழைத்திட
சீதையோ டிலக்குவன் சேரதண்ட காவனம்
பாதம் நோகபுக்க மூலராம சந்த்ரமூர்த்தியே
வேதம்வந்து எதிரொலிக்கும் வடவேங்கட கீர்த்தியே….(27)
ஒருவனுக்கு ஒருத்தியென்ற நெறிதனைப் புகட்டினாய்
திருமுகத்து ஜனகமகள் அரவணைத்திண் புயத்தினாய்
கருநிறத்து அண்ணலே கவிமாருதி நண்பனே
வருபவர்க்கு அன்பனே வடவேங்கட இன்பமே….(28)
ஆசையோ டளித்தது அழுகலாய் இருப்பினும்
கூசமின்றி அமுதமாய் கொள்ளல்தகவு சொல்லவே
பாசமோடு சபரியுண்ட பழமிச்சம் உண்டவா
வீசுதென்றல் தேசுபாடும் வடவேங்கட ஈசனே….(29)
நிராயுதன் நசித்தல்போர் நீதியல்ல என்றுணர்த்த
இராவணா இன்றுபோய் நாளைஇகல் வாஇயம்பு
இராமனே இறைவனே இரவிகுலத் தோன்றலே
முராரியே முகுந்தனே மலைவேங்கட மாலனே….(30)
இரவிசோம சந்தியில் இடைகழி படிவாயிலில்
நரசிங்க உருவினில் நின்றதூண் பிளந்துஅயில்
கரநகமால் இரணியன் குடலுரித்து மாலையாய்
உரமார் பகமணிந்து உம்பரிடர் தீர்த்தவா….(31)
———————————————————————-
அருள்மிகு இராகவேந்திர சுவாமிகளின் இறுதி உபதேசங்கள்! அத்தனையும் சத்திய வாக்குகள்!
1671 ஆம் ஆண்டு சுவாமிகள் சமாதி நிலை அடையும்பொருட்டு பிருந்தாவனம் செல்ல ஆயத்தம் செய்யும் இறுதி வேளையில் தம் பக்தர்களுக்கு இறுதியாக அளித்த முத்தான உபதேசங்கள்!
வாழ்க்கையில் சரியான நடத்தை இல்லையெனில் சரியான சிந்தனையும் இராது.
நல்லார் மற்றும் தகுதியுடையாருக்குச் செய்யும் உதவியோ, தர்மமோ கடவுளின் உளமார்ந்த பூசைக்கு நிகராகும்.
சாத்திரத்தை முழுமையாகப் பின்பற்றாமல் தங்களைக் கடவுள் என்று சொல்லிக்கொண்டு அதிசயங்கள் செய்வோரை விட்டுவிலகியிருங்கள்.
நானும், சிரீமத் ஆசாரியாரும் நிகழ்த்தியுள்ள அதிசயங்கள் அனைத்தும் இறையருளினாலும், அவர்தம் மகிமையை உலகோருக்கு உணர்த்தவும், இறை சக்தியால் எப்பேர்ப்பட்ட பெரும் சக்திகளையும் அடைய முடியும் என்பதை பறைசாற்றவும் நிகழ்த்தப்பட்டதேயன்றி அதில் எந்த பொய்யும், பித்தலாட்டமும் இல்லை.
சரியான ஞானத்தை மிஞ்சிய அற்புதங்களோ, அதிசயங்களோ எங்கும் இல்லை. அத்தகைய ஞானம் இல்லாதோரின் செயலும், அதிசயங்களும், சூனிய வித்தைகள் மட்டுமே. அதைச் செய்பவருக்கும், நம்புபவருக்கும் எப்பயனும் விளைவிக்காது.
கடவுள் மேல் வைக்கும் குருட்டு பக்தியால் எப்பயனும் இல்லை. இறைவனின் மேலாண்மையை முழுமையாக உணர்ந்து செலுத்தும் உண்மையான பக்தியே முழுமையான பயனளிக்கக்கூடியது.
கடவுளிடம் உள்ள பற்றைக் கடந்து மற்ற இதர தேவதைகளிடமும் அவரவர்கள் தகுதிக்கேற்ப பக்தி செலுத்துதல் நலம்.
இவ்வாறு உபதேசங்கள் செய்து முடித்தவர், பிரணவ மந்திரத்தை ஓத ஆரம்பித்து ஆழ்நிலை தியானத்தில் ஆழ்ந்துவிட, ஒரு தருணத்தில் கையில் இருந்த அவருடைய சபமாலை ஓய்ந்து நின்றுவிட, அவர்தம் சீடர்கள் அவருடைய முக்தி நிலையை புரிந்துகொண்டு அவரைச் சுற்றி பிருந்தாவனச் சுவர் எழுப்ப ஆரம்பித்துவிட்டனர்!
பிரம்மஸ்ரீ.மகாதேவ ஐயர்.ஜெயராமசர்மா அவர்களின் ‘உணர்வுகள்’ கவிதை நூல் வெளியீட்டு விழா.
மெல்பேண் நவரத்தினம் அல்லமதேவன்
மெல்பேணில் கோலாகலமாகவும் உணர்வோடும் நடந்தேறிய பிரம்மஸ்ரீ.மகாதேவ ஐயர்.ஜெயராமசர்மா அவர்களின் ” உணர்வுகள் “ கவிதை நூல் வெளியீட்டு விழா.
மெல்பேண் ஸ்ரீ சிவா விஷ்ணு ஆலய பீக்கொக் மண்டபத்தில் கடந்த மாதம் 28.03.2016 திங்கட்கிழமை பிற்பகல் நான்கு மணிக்கு அரங்கம் நிறைந்த தமிழ் அறிஞர்கள், அன்பர்கள், நண்பர்கள் ஆதரவாளர்கள் முன்னிலையில் உணர்வுகள் நூல் வெளியீட்டு விழா ஆரம்பமானது.
ஸ்ரீமதி சாந்திசர்மா, ஸ்ரீமதி சுந்தரம்பாள், ஸ்ரீமதி தேவகி, ஸ்ரீமதி கௌசல்யா, ஸ்ரீமதி மங்களம் ஆகியோரின் மங்கள விளக்கேற்றுதல் நிகழ்ச்சியுடன் விழா ஆரம்பமானது. கடவுள் வாழ்த்துப் பாடலை செல்வி.ஆகர்ஷணா சாயி ஜீவானந்தக்குருக்கள், செல்வி.பிரவர்த்திகா சாயி ஜீவானந்தக்குருக்கள், ஆகிய இரு பிள்ளைகளின் மழலை மொழியில் கேட்டிருந்தோம். மழலைத் தமிழை நன்கு அழகாக உச்சரித்திருந்தார்கள்.
தமிழ் வாழ்த்துப் பாடலை ஸ்ரீமதி ஜனனி அபர்ணாசுத சர்மா அவர்கள் பாடியிருந்தார். அதனைத் தொடர்ந்து இன்னிசை அமுதம் நிகழ்ச்சியை செல்வி.அபிதாரணி சந்திரன் அவர்கள் வழங்கியிருந்தார். மெல்பேண் சிறுவர்கள் எவ்வளவு தூரம் தமிழை நன்கு உச்சரிபோடு பேசுகின்றார்கள், பண்ணோடு இசைக்கின்றார்கள் என்பதை பல மேடைகளில் பார்த்திருக்கின்றேன். அந்த வகையில் எமது பிள்ளைகள் அதற்கு குறையில்லாமல் இனிய குரலில் தமிழால் தமிழுக்கு அழகு சேர்த்திருந்தார்கள்.
இசைக்கோலம் என்ற நிகழ்ச்சியில் திருசிவபாலன் புல்லாங்குழல் இசை, திரு.முருகதாஸ் தவில் இசை, செல்வி.ஆகர்ஷணா மற்றும் செல்வி.பிரவர்த்திகா இருவரும் வயலின் இசை, செல்வன்.கார்த்திகேயன் கீ போட் வாத்திய இசை எனக் கலைஞர்கள் யாவரும் இணைந்து செவிக்கினிய, அற்புதமான இசையை வழங்கியிருந்தார்கள். உணர்வுகள் கவிதை நூல் வெளியீட்டிற்கு வந்திருந்த அனைத்து தமிழ் அன்பர்களையும் செம்மொழியாகிய சங்கத் தமிழால், மங்காத புகழுடைய எங்கள் தமிழ் சார்பில் ஸ்ரீமதி.ஜானகி சாயி ஜீவானந்தக்குருக்கள் அவர்கள் வரவேற்புரையை வழங்கினார்.
முக்கிய நிகழ்வான உணர்வுகள் கவிதை நூல் வெளியீட்டு விழாவினை தலைமை வகித்து நடாத்த வந்திருந்தவர் ஸ்ரீமதி.பாலம் லக்சுமண ஐயர் அவர்கள். ஸ்ரீமதி பாலம் லக்சுமண ஐயர் உடைய இனிய தமிழ், அழகு தமிழ், இன்பத் தமிழ் பற்றி அதிகம் குறிப்பிடத் தேவையில்லை. காரணம் தமிழ் உலகம் அறிந்த ஒரு பெண் பேரறிஞர் ஆகும். அவரது தமிழ்ப் பேச்சில் பல் சுவைகள் நிறைந்த செந்தமிழ் தமிழ் ஆறாக ஓடியதைக் கேட்டேன். தொடர்ந்து அவரது தமிழைக் கேட்க வேண்டும் போலிருந்தது. .
கவிதைத் தொகுப்பான உணர்வுகள் நூலினை நன்கு வாசித்து அதில் கவி வரிகளில் பொதிந்திருந்த விடயங்களை அலசி ஆராய்ந்து தங்கள் விமர்சனங்களை தமிழ்ப் பேச்சாளர்களான திரு.பொன்னரசு மற்றும் திரு.சசிதரன் ஆகியோர் தமது கருத்துக்களை முன் வைத்து விமர்சித்தார்கள். அதன் போதே நூலுக்குள் பொதிந்திருந்த பொக்கிஷங்களை எடுத்துரைத்தார்கள். உணர்வுகள் நூலின் வெளியீட்டுரையை வழங்கிய சிவஸ்ரீ.பிரேமகாந்தக்குருக்கள் உணர்வு பூர்வமான கருத்துக்களை முன் வைத்திருந்தார். அதே போன்று சிவஸ்ரீ.சாயி ஜீவானந்தக்குருக்கள் என் மனவானில் என்ற கருத்தில் அவர்பால் ஈர்த்துக் கொண்ட கவி வரிகளைக் குறிப்பிட்டு அந்த கவிதை நூல் படைப்பின், தரத்தின், மேன்மையை உணர்ச்சியோடு விளக்கமாகக் கூறியிருந்தார். உணர்வுகள் கவிதை நூல் படைப்பாளர் பிரம்ஸ்ரீம..ஜெயராமசர்மா வருகை தந்து ஆதரவு வழங்கிய அத்தனை உணர்வாளர்களுக்கும் மனமார்ந்த நன்றிகளைக் கூறினார். இறுதியில் அனைவருக்கும் இரவுணவு வழங்கப்பட்டது.
இந்த கவிதை நூலாசிரியர் பற்றிக் குறிப்பிட வேண்டும். பிரம்ஸ்ரீ.மகாதேவஐயர்.ஜெயராமசர்மா அவர்கள் இலங்கையில் தமிழ் மொழியில் நன்கு கற்றுத் தேர்ந்த தமிழ் அறிஞர். எழுத்தாளர், கவிஞர், நாடகாசிரியர், நூல் விமர்சகர், நூலாசிரியர், ஆராய்ச்சியாளர், விவுரையாளர், பத்திரிகை ஆலோசகர், சைவசமயக் குருத்துவப் பட்டம் பெற்ற குருக்கள் என்று பல பரிமாணங்களை தன்னகத்தே கொண்டதொரு பேரறிஞர். இவரால் தமிழ் உலகத்துக்குப் பெருமை என்றால் அது மிகையாகாது. அனைவரது முன்னிலையில் நூலாசிரியரைக் கௌரவித்து பட்டம் வழங்கப்பட்டது.
ஐயா உங்கள் சேவை எமது தமிழ் மக்களுக்கு கிடைக்க வேண்டும். அதே வேளை எல்லாம் வல்ல இறைவன் அனுக்கிரகத்தோடு பல்லாண்டு காலம் வாழ்கவென வாழ்த்துகின்றேன். இது போன்ற தமிழ்ப் படைப்புக்கள் எமக்குக் கிடைக்க வேண்டும். அதற்கு அனைவரும் ஆதரவு வழங்க வேண்டும் என ஆசைப்படுகின்றேன். வாழ்க தமிழ்.
மெல்பேண் நவரத்தினம் அல்லமதேவன்