Month: October 2017

நல் தீபாவளி !

( எம் . ஜெயராமசர்மா …. மெல்பேண் …. அவுஸ்திரேலியா

பட்டாடை உடுத்திடுவோம்

பட்சணமும் உண்டிடுவோம்

மத்தாப்புக் கொழுத்திடுவோம்

மனமகிழ இருந்திடுவோம்

தப்புக்கள் தனைமறப்போம்

தாழ்பணிவோம் மூத்தோரை

எப்பவுமே இறைநினைப்பை

இதயமதில் இருத்திடுவோம் !

ஆடம்பரம் அனைத்தையுமே

அனைவருமே ஒதுக்கிடுவோம்

ஆதரவு இல்லார்க்கு

அருந்துணையாய் அமைந்திடுவோம்

தீதுடைய செயல்களைநாம்

தீண்டாமல் இருந்திடுவோம்

தீபாவளி எமக்கு

சிறப்பாக அமையுமன்றோ !

பட்டாசும் மத்தாப்பும்

பலபேரின் உழைப்பாகும்

பட்டாசும் மத்தாப்பும்

பலவிழப்பை தந்துவிடும்

இட்டமுடன் வெடிக்காமல்

எச்சரிக்கை மனங்கொண்டால்

எல்லோர்க்கும் தீபாவளி

இங்கிதமாய் இருக்குமன்றோ !

வியாபாரம் தனையெண்ணி

விதம்விதமாய் பட்சணங்கள்

வண்ணவண்ண நிறமூட்டி

வாவெனவே அழைத்துநிற்கும்

அவையுள்ளே பொதிந்திருக்கும்

ஆரோக்கியம் தனைக்கெடுக்கும்

அத்தனையும் தீபாவளி

அகமகிழ்வைக் குலைக்குமன்றோ !

வேகமாய் வாகனங்கள்

ஓட்டுவதைத் தவிர்த்திடுவோம்

வேகமது கூடிவிடின்

விபரீதம் ஆகிவிடும்

தீபாவளித் தினத்தில்

தேடிவரும் ஆபத்தாய்

திசைதெறிக்க ஓடிவரும்

வாகனத்தைத் தவிர்த்திடுவோம் !

மதுவரக்கன் தனையெவரும்

மனமதிலே நினையாமல்

புதுவசந்தம் வீசுதற்கு

புத்துணர்வு பெற்றிடுவோம்

தீபாவளி நாளில்

திருப்பங்கள் பலவந்தால்

தித்திப்பு யாவருக்கும்

சொத்தாக இருக்குமன்றோ !

நல்லவற்றைச் சிந்தித்தால்

நாளுமே தீபாவளி

நல்லவழி நாம்நடப்பின்

நாட்டுக்கே தீபாவளி

அல்லவைகள் அகற்றிவிடின்

அனைவருக்கும் தீபாவளி

அமைதியுடன் இறைபணிந்தால்

அமைந்திடும் நல்தீபாவளி !

October 18, 2017
திருமந்திரத்தில் சில சிந்தனைத் துளிகள் 31

க. பாலசுப்பிரமணியன்

பாசத்திலிருந்து விடுபடுவது எப்படி?

“நான்” “எனது” என்ற எண்ணத்தை விட்டுவிடத்தான் நாம் துடித்துக்கொண்டிருக்கின்றோம். ஆனால் முடிவில்லையே ! இந்தப் புவியில் ஈடுபாடு உள்ளவரை, உறவுகளைப் பாராட்டும் வரை, ஐம்பொறிகளை நாம் பயன்படுத்தும் வரை இந்தத் துன்பக்கேணியில் நாம் மீண்டும் மீண்டும் மூழ்கிக் கொண்டுதான் இருப்போம். இந்த அவலத்திலிருந்து நீங்குவதற்கும் அந்தப் பேரருளாளன் துணை தான் வேண்டும். அவன் துணையில்லாமல் இந்தத் துயரிலிருந்து விடுபட முடியாது. அதனால்தான் தமிழ்மறை தந்த திருவள்ளுவரும் இவ்வாறு கூறுகின்றார்

“பற்றுக பற்றற்றான் பற்றினை அப்பற்றை

பற்றுக பற்று விடற்கு.”

இந்தப் பற்று என்பது நமது மனதின் மாயையால்தானே வந்தது? இந்த மாயையை எவ்வாறு அறுப்பது?

ஒரு முறை ஒரு முனிவர் காட்டில் பல காலம் தவம் செய்துவிட்டு அதன் பயனை சாதாரண மனிதருக்கும் பகிர்ந்து கொள்ள வேண்டுமென்று பல நகரங்களுக்குச் சென்று தம் கருத்துக்களை பகிர்ந்துகொண்டு வந்தார். தன்னுடைய உரைகளில் எவ்வாறு நாம் மாயையால் கட்டுப்பட்டுள்ளோம், அதிலிருந்து எப்படி மீள்வது என்று நல்லுரை அளித்து வந்தார். ஒரு காலத்தில் ஒரு நாட்டின் அரசனுக்கு இந்த முனிவரின் கருத்துக்கள் எடுத்துச் சொல்லப்பட்டு, அவன் இவரிடம் அருள்நாடி வந்தான்.

“முனிவரே, எனக்கு மாயை என்றால் என்ன என்பதைக் கண்களில் காட்டவேண்டும். கண்ணால் பார்க்காத எதையும் நான் நம்பத் தயாராக இல்லை. நீங்கள் காட்ட மறுத்தால் நீங்கள் சொல்வது அனைத்தும் பொய் என்று கருதி உங்களை தண்டிக்க நேரிடும்” என்றான். அந்த முனிவரும் புன்முறுவலுடன் “அதற்கென்ன? என்னுடன் வந்து சில நாட்கள் தங்கு. உனக்கு மாயையைக் காட்டுகின்றேன்” என்றார்.

அரசனும் தன் அரண்மனையை விட்டு விலகி முனிவரிடம் வந்து தங்க ஆரம்பித்தான், ஒரு வார காலம் போனபின் “முனிவரே, ஏழு நாட்கள் கழிந்து விட்டன. இன்னும் தாங்கள் காட்ட வில்லையே.” எனக் கேட்டான். முனிவரும் சிரித்தார். ” நேரம் வரும். காட்டுகின்றேன் ” எனக்கூறி நகர்ந்து சென்றார். மீண்டும் சில நாட்கள் கழிந்த பின் பொறுமையிழந்த அரசன் “முனிவரே. காலம் கடந்து கொண்டிருக்கின்றது. இன்னும் ஐந்து நாட்களுக்குள் தாங்கள் மாயையைக் கண்கூடாகக் காட்டவில்லையென்றால் தங்கள் உயிரை விட வேண்டி வரும் ” என எச்சரித்தான். ஐந்தாவது நாள் முனிவர் தன் கமண்டலுத்துடன் செல்வதைக் கண்டு அவரை நிறுத்தி “இன்னும் ஒரு அடி கூட தாங்கள் வைக்கக் கூடாது எனக்கு மாயையைக் காட்டாமல் ” எனச் சொல்ல முனிவரும் தன கமண்டலத்தைக் கீழே விட்டுவிட்டு அருகிலிருந்த ஒரு மரத்தை நோக்கிச் சென்று அதை இருகக் கட்டிக்கொண்டு “என்னை விட்டுவிடு, விட்டுவிடு” என்று அலற, அரசனும் “என்ன முட்டாள்தனம். நீங்கள் அதை பிடித்துக் கொண்டு அது விடவில்லை என்று சொல்கின்றீர்களே” எனக்கூற முனிவரும் “இதுதான் மாயை. ஏதாவது ஒன்றை நாம் பிடித்துக்கொண்டு அது நம்மை விடவில்லையே என்று துன்பக்கடலில் மிதக்கிறோமே அதுதான் மாயை” என்று விளக்கினார்.

உண்மை அதுவே! பல நேரங்களில் ஐம்பொறிங்களால் தூண்டப்பட்ட சிற்றின்பங்களுக்கோ நாம் விலையாகி அவைகள் நம்மை விடவில்லையே” என்று அங்கலாய்த்துக்கொண்டிருக்கின்றோம்.

இதனால்தான் திருமூலர் மிக அழகாகக் கூறுகின்றார்

“வென்று புலன்கள் விரைந்து விடுமின்கள்

குன்று விழுவதில் தாங்கலு மாமே.”

புலன்களால் உந்தப்பட்ட உறவினை வளர்த்துக்கொள்ளும் நாம் அந்த பாசத்தில், அந்த மயக்கத்தில் எத்தனை வினைகளுக்கு நம்மை இரையாக்கிக் கொல்லுகின்றோம். இந்தவினைப்பயன்கள் நம்மை விடுவதில்லையே.

பசு, பதி பாசம் என்ற மூன்றுக்கும் உள்ள விளக்கத்தை மிக வளமையான சொர்க்களால் விளக்கும் திருமூலர் கூறுகின்றார்

பசு பல கோடி பிரமன் முதலாய்

பசுக்களைக் கட்டிப் பாசமூன் றுண்டு

பசுத்தன்மை நீக்கிப் பாசம் அறுத்தாற்

பசுக்கள் தலைவனைப் பற்றிவிடாவே

ஐம்பொறிகளின் துன்பத்தில் துயருற்ற மாணிக்கவாசகரோ அந்த இறைவனின் துணையின்றி இதிலிருந்து விடுபட முடியாது என்பதை உணர்ந்தே அவன் ஒளி காட்டும் பொன்மேனியை வணங்கி அருள் நாடுகின்றார்.

மாறுபட்டு அஞ்சு என்னை வஞ்சிப்ப

யான் உன் மணி மலர்த் தாள்

வேறுபட்டேனை விடுதி கண்டாய்

வினையேன் மனத்தே

ஊறும் மட்டே மன்னும் உத்தரகோச

மங்கைக்கு அரசே

நீறுபட்டே ஒளி காட்டும் பொன் மேனி

நெடுந்தகையே

இந்த மாயையில் பிடிபட்டு தன்னை வஞ்சித்த மனத்தை பட்டினத்தார் தன்னுடைய கோபத்திற்கு ஆளாக்கிப் பாடுகிறார்

தித்திக்கும் தேனைத் தெவிட்டாத தெள்ளமுதை

முத்திக்கு வித்தான முப்பாழை போற்றாமல்

பற்றிப் பிடித்தியமன் பாசத்தால் கட்டும்வண்ணம்

சுற்றி யிருக்கும்வினை சூழ்ந்தனையே நெஞ்சமே

எனவே மாயையை விட்டு தியானத்தில் அவனை மட்டும் உள்நிறுத்தி அவன் அருளொருளியை நம்முடன் இணைக்கும் போது நமக்கு ஏற்படுகின்றது ஆனந்த அனுபவம்தானே ! ஆனால் பாசத்தில் உழன்று கல்லாகிப் போன இந்த நெஞ்சம் சிறிதேனும் மாறுமோ ?

திருமூலரின் நம்பிக்கைக்குத் தான் என்ன வலிமை !

“வான் பழித்து இம் மண் புகுந்து மனிதரை

ஆட்கொண்ட வள்ளல் “

என்று இறைவனைப் புகழ்ந்து பாடுகின்றார்

மாணிக்கவாசகரிடம் இந்த இறைக்கருணையின் இன்னொரு வளமை தென்படுகின்றது.

“கல்லைப் பிசைந்து கனி ஆக்கித் தன் கருணை

வெள்ளத்து அழுத்தி வினை கடிந்த வேதியனை”

என்று பாராட்டிப் பரவசம் அடைகின்றார்.

தொடரும்

October 18, 2017
ஞானச் சுடர்

-இன்னம்பூரான்
தீபாவளி தினம் 2017
அக்டோபர் 18, 2017

அன்பே தகளியா ஆர்வமே நெய்யாக
இன்புருகு சிந்தை இடுதிரியா – நன்புருகி
ஞானச் சுடர் விளக்கு ஏற்றினேன் நாரணற்கு
ஞானத் தமிழ் புரிந்த நான். (பூதத்தாழ்வார்)

*****

ஞானச் சுடர் [1]

முன்னுரை

மதிநுட்பம் அல்லது ஞானம் பற்றிய இந்த நூல் சராசரி மனிதனால், சராசரி மனிதனுக்கு எழுதப்படுகிறது. சான்றோர்களும், மேதாவிகளும் இதில் புதிதாக ஒன்றும் காணவில்லையே என்று அங்கலாய்க்கலாம். பொறுத்தாள்க. கருத்துரிமை யாவருக்கும் உண்டு என்பதால், மாற்றுக்கருத்து, திசைமாற்றம், குறுக்குசால் போன்றவற்றை தடுத்தாட்கொள்ளப்போவதில்லை. சிறு துரும்பும் பல் குத்த உதவும் என்று அசால்ட்டாக இருக்காமல், சிறு துளி பெரு வெள்ளம் என்று அமரிக்கையாகப் படித்துப் பயன்பெறுக.

*****

சித்திரத்துக்கு நன்றி: http://3.bp.blogspot.com/-GKTV8vAXyxE/TfOpUvFnW5I/AAAAAAAADRQ/jSnSKdaJMNE/s1600/5210610419_3a6291cd93_b.jpg

October 18, 2017
மர்மப் புன்னகை

“ எப்படிப்பட்ட புத்திமானாயினும் சில சிறு தவறுகளாலோ அல்லது அலக்‌ஷியத்தாலோ அல்லது தேவையில்லாத அவ நம்பிக்கைகளினாலோ அல்லது அதீத தன்னம்பிக்கை எனப்படும் கர்வத்தாலோ   பெரும் அவதிகளுக்கு உள்ளாவதுண்டு”

                                                                 அன்புடன்

                                                                 தமிழ்த்தேனீ



பலமுறை வெளி நாடுகளுக்கு அடிக்கடி செல்லும் அனுபவம் கை கொடுத்தது அதனால் எங்குமே ப்ரச்சனை இல்லாமல் சுமுகமாக போய் தங்கி மகிழ்ச்சியாக இருந்து அங்கே இருப்பவர்களையும் மகிழ்ச்சியாக வைத்துக் கொண்டு தாமும் மகிழ்ச்சியாக இருக்கப் பழகிய தம்பதியர் ராமநாதனும் காமக்‌ஷியும், அதே போல் இந்த முறையும் எல்லா ஏற்பாடுகளையும் செய்துவிட்டு புறப்படும் நாளுக்காக ஆவலுடன் காத்திருந்தனர்

அவர்களுக்கே தெரியாமல் அங்கே அவர்கள் பெட்டியில் வந்து அமர்ந்து கொள்ளத் தயாராக இருந்தது “ அது “ அது வந்து பெட்டியில் உட்காரப் போவதை அறியாமல் அவர்கள் மகிழ்ச்சியாக இருந்தனர்,

தொலைபேசி அழைத்தது தொலைபேசியில் சார் நான் உங்க மகன் வேலை செய்யும் அலுவலகத்திலே உங்கள் மகனுடன் பணிபுரியும் எங்கள் மகனுக்கு   சில அவசியமான மருந்துகள் தேவைப்படுகின்றன அதை எடுத்துப் போக முடியுமா என்றார் எதிர் முனையில் பேசியவர்

ராமநாதன் மிக ஜாக்கிரதையாக சரி சார் அதனாலென்ன கொண்டு போய்க் குடுக்கறோம் ஒருத்தருக்கொருத்தர் இந்த உதவி கூட செய்யமுடியாதா என்ன ஆனா டாக்டர் எழுதிக் கொடுத்த மருந்துச் சீட்டையும் சேர்த்துக் கொண்டு வாருங்கள் என்றார்,

சரி சார் அதையும் சேர்த்தே கொண்டு வரோம் என்றார் எதிர் முனையில் பேசியவர்,   சரிஎன்று தொலைபேசியை வைத்தவர்    காமாக்‌ஷி நான் போயி தொலைபேசி இணைப்பையும் இணைய இணைப்பையும் மூணு மாசத்துக்கு பாதுகாப்புப் பெட்டகத்திலே ( Safe Custody ) வெச்சுக்கறதுக்கு எழுதிக்குடுத்துட்டு வரேன் என்றபடி வெளியே கிளம்பினார் ராமநாதன்.

“அவர் வெளியே போனதை அறிந்து அது உள்ளே நுழைந்தது”.

சார் நீங்க எழுதிக் குடுத்துட்டீங்க   நாங்க சேஃப் கஸ்டடிலே வெச்சுக்கறோம்   கவலைப்படாம போயிட்டு வாங்க என்றார் பீ எஸ் என் எல் அதிகாரி , நன்றி   நான் திரும்பி வரும் போது முதல்லேயே உங்களுக்கு போன்லே செய்தி சொல்றேன் சேஃப் கஸ்டடிலே லேருந்து ரிலீஸ் பண்னிடுங்க , அந்த   ரிக்வெஸ்டையும் எழுதிக் குடுத்திருக்கேன் என்றபடி கிளம்பி வாயிலுக்கு வந்து காரிலேறி இக்னீஷியனை உசுப்பினார் ராமநாதன், காரிலிருந்த கென்வுட் இசைக்கருவி பாட்டை நிறுத்திவிட்டு யாரோ தொலைபேசியில் அழைப்பதை சொல்லியது , அவர் மனைவி காமாக்‌ஷி ஏங்க அவங்க வந்திருக்காங்க மருந்தை எடுத்துண்டு வந்திருக்காரு வாங்கிக்கவா என்றாள் , வாங்கிக்கம்மா பிரிஸ்க்ரிப்ஷனையும் வாங்கிக்கோ   என்றார்.

இல்லே ப்ரிஸ்க்ரிப்ஷனை உங்க மெயிலுக்கு அனுப்பரேன்னு சொல்றாரு என்றாள் அவள் சரி வாங்கிக்கம்மா என்று சொல்லிவிட்டு அவர் தெருவில் நுழைந்து வரும் போது ஒரு பெரிய விலை உயர்ந்த கார் அவர் வீட்டிலிருந்து வெளியே போனது . வீட்டுக்குள் நுழைந்து காரை நிறுத்திவிட்டு காமாக்‌ஷி டெலிபோனுக்கு எழுதுக்குடுத்தாச்சு என்றார். சரிங்க இந்தாங்க காபி சாப்பிடுங்க என்று காபியை நீட்டினாள் காமாக்‌ஷி

அவங்க கொண்டு வந்த மருந்தை எங்கே வெச்சே ஏன்றார்   ராமநாதன் நான் என் பெட்டியிலே வெச்சிட்டேன் என்றாள் காமாக்‌ஷி. “ ஒ அப்பிடியா சரி சரி சரி நான் போயி கிருஷ்ணா ஸ்வீட்ஸ்லே மசூர்பாக் வாங்கிண்டு அப்பிடியே கேஷ்யூ பைட்டுன்னு ஒண்ணு புதுசா போட்டிருக்காங்களாம் அதையும் வாங்கிட்டு வரேன் என்று ராமநாதன்   மோட்டார் பைக்கை எடுத்துக்கொண்டு கிளம்பினார்

“ அந்த அது உள்ளுக்குள்ளே இருந்து மெல்லமாக சிரித்தது மர்மமாய் “

குறிப்பிட்ட நாளில் விமான நிலையத்துக்கு வந்து இறங்கி உள்ளே போகும்போது பாஸ்போர்ட்டையும் விசாவையும் காண்பித்துவிட்டு உள்ளே நுழைந்து இமிக்ரேஷனுக்கு முன்னால் பேகேஜ் செக் செய்யும் இடத்தில் இவரை உள்ளே அனுமதித்துவிட்டு   காமாக்‌ஷியை நிறுத்தி வைத்தனர்   அதிர்ந்தார்   ராமநாதன்.

சார் என் பொண்டாட்டியை அங்கே நிறுத்திட்டாங்க நான் வெளியே போயி என்னான்னு பாக்கறேன் என்று சொல்லிவிட்டு வந்து என்ன ஆச்சு எதுக்கு என் பொண்டாட்டியை இங்கே நிறுத்தி வெச்சிருக்கீங்க என்றார் . ஒருவர் வந்து நீங்க இவங்களோட புருஷனா ப்ளீஸ் இங்க நீங்களும் வெயிட் பண்ணுங்க என்றார் அவர். என்னவென்று புரியாமல் நின்றார்

ஒரு ஆபீசர் வந்து உங்க மனைவியோட கைப்பையிலே ஒரு பாக்கெட் இருக்கு அது உங்களுதா என்றார்.   எது என்று எட்டிப் பார்த்தார் ராமநாதன் அவர் ஒரு பாக்கெட்டைக் காட்டினார் . “ அது ஒரு மர்மப் புன்னகை புரிந்தது “    காமாக்‌ஷி ஏங்க அவங்க கொண்டு வந்து குடுத்தாங்களே அந்த மருந்து பாக்கெட் அது என்றாள் பயந்த குரலில்

அதை உன்னோட பெட்டியிலே வெச்சேன்னு சொன்னியே என்றார் ராமநாதன் , அதுலேருந்து எடுத்து கைப்பையிலே வெச்சிண்டேன் என்றாள் காமாக்‌ஷி , ராமநாதன் அந்த அதிகாரியிடம் திரும்பி சார் அது என் பையனோட ஆபீஸ்லே வேலை செய்யற பையனோட மருந்து, அவங்க அப்பா கொண்டு வந்து குடுத்து அதை அவங்க கிட்டே குடுக்கச் சொன்னாரு என்றார், ஏன் சார் அதுக்கு ப்ரிஸ்க்ரிப்ஷன் இருக்கா என்றார் ஆபீசர்

அவரு என்னோட மெயில்லே அனுப்பறேன்னு சொன்னாரு   என்றார் ராமநாதன்.    சரி உங்க கம்ப்யூட்டரை எடுத்து அந்த மெயிலைக் காட்ட முடியுமா என்றார் ஆபீசர், சரி என்று அவர் கப்ம்யூட்டரை எடுத்து அதை உயிர்ப்பித்தார், அதிலே அவருக்கு ப்ரிஸ்க்ரிப்ஷன் எதுவும் வரவில்லை

மிஸ்டர் ராமநாதன் அந்த பாக்கெட்டை நாங்க பிரிச்சுப் பாக்கணும் , என்றார் ஆபீசர். ஒரு அதிகாரியை அழைத்து அதைப் பிரிக்கச் சொன்னார் .பிரித்தார்கள் அதிலே …… இருந்தவற்றைப் பார்த்த அதிகாரிகள் அதிர்ந்தார்கள்.       என்ன மிஸ்டர் ராமநாதன் இது உங்களைப் பாத்தா படிச்சவர் மாதிரி இருக்கீங்க இதுலே போதை மருந்து கலந்திருக்கு இதை அந்த நாட்டிலே தடை செஞ்சிருக்காங்க , நம்ம நாட்டிலேயும்தான்

அதுனாலே நீங்க ரெண்டு பேரும் இந்தப் பாக்கெட்டை உங்களுக்கு குடுத்தவங்களுக்கு தொடர்பு கொள்ளுங்க அவங்கதான் குடுத்தாங்கன்னு நிரூபிச்சா நீங்க இந்த ஃப்ளைட்டிலே போக முடியும் இல்லேன்னா நாங்க உங்க ரெண்டு பேரையும் காவல்துறை கிட்டே ஒப்படைக்க வேண்டி வரும் என்றார்

அதிர்ந்து போன ராமநாதன் அவரைத் தொடர்பு கொள்ள முயன்றார் எதிர் முனையில் நீங்கள் தொடர்பு கொள்ளும் வாடிக்கையாளர் இப்போது தொடர்பு கொள்ளும் நிலையில் இல்லை அல்லது தொடர்பு எல்லைக்கு அப்பால் இருக்கிறார்   என்றே சொல்லிக்கொண்டு இருந்து ,

என்ன செய்வதென்றே தெரியாதவராய்   சார் அவர் என்னோட மெயிலுக்கு ப்ரிஸ்கிரிப்ஷன் அனுப்பறேன்னு சொல்லிட்டு இதைக் குடுத்துட்டுப் போயிருக்காரு, அதை நம்பி என் ஃவைப் இதை வாங்கி வெச்சிருக்காங்க, இது போதை மருந்துன்னு தெரிஞ்சிருந்தா கைப்பையிலேயே கொண்டு வருவோமா , நீங்களே யோசிச்சு பாருங்க என்றார் ராமநாதன்.

சார் எங்களுக்கு உங்க நிலைமை புரியுது ஆனா நாங்க எங்க கடமையை செய்யணும் வேற வழியில்லே என்றார் அதிகாரி.   அந்தப் பாகெட்டைப் பார்த்தார் ராமநாதன் “ அது ஒரு மர்மப் புன்னகை புரிந்தது “ ஏதோ ஒரு அதிர்ச்சியில் திடுக்கிட்டு கண்விழித்தார் ராமநாதன்!

அட மொத்தமும் கனவா    ! ஏம்மா காமாக்‌ஷி அவங்க கொண்டு வந்த மெடிசினைக் காட்டு என்று வாங்கிப் பார்த்தார் .   மீண்டும் அவருக்கு தொலைபேசியில் சார் நீங்க அனுப்பறேன்னு சொன்னீங்களே அந்த ப்ரிஸ்க்ரிப்ஷனை அனுப்பவே இல்லையே என்றார்

எதிர் முனையில் சார் மன்னிக்கணும் இணையத் தொடர்பு கிடைக்கவே இல்லே இதோ இப்போ அனுப்பிர்றேன் என்றபடி    சார் இப்போ பாருங்க உங்க மெயில்லே அனுப்பி இருக்கேன் என்றார்

மெயிலைத் திறந்து பார்த்தவருக்கு திருப்தி சாதாரண மருந்துகள்தான் சரி சார் நாங்க எடுத்துட்டுப் போயி உங்க   பிளைகிட்ட குடுத்துர்றோம் என்றார் ராமநாதன் . நன்றி சார் என்றார் அவர் மறு முனையில்.

திரு ராமநாதன் ப்ரிஸ்க்ரிப்ஷனைப் பார்த்தே நம்பிக்கை கொண்டார் , அவர் அந்தப் பாக்கெட்டைப் பிரித்துப் பார்த்திருக்கலாம் , அந்தப் பாக்கெட்டை அவர் பிரித்துப் பார்க்கவே இல்லை. அது அவருடைய விதியா   அல்லது தன்மேலே அவருக்கிருந்த அதீத   நம்பிக்கையா

அந்த மருந்து பாக்கெட் அவரைப் பார்த்து மர்மமாய்ச் சிரித்தது.

குறிப்பிட்ட பயண நாளும் வந்தது . பார்ப்போம் வேடிக்கை

                       சுபம்

அன்புடன்

தமிழ்த்தேனீ

October 18, 2017
விடிவெள்ளி விவேகானந்தர்

-தேனுகா மணி

மானுடம் போற்றும் வேந்தர்
விடிவெள்ளி விவேகானந்தர்

இளைஞர்களே
என் நம்பிக்கை என்றார்
இறையனுபவத்தால்
இவ்வுலகை வென்றார்

மனதின் நிறம்
வெண்மை என்றார்
அதன் மார்க்கம்
சுயநலமின்மை என்றார்

உறங்கும் ஆத்மாவை
எழுப்பு என்றார்
உண்மைகளின் இயல்பே
உன் இருப்பு என்றார்

அனைத்தையும் அளிப்பது
அன்பு என்றார்
அன்னையைப்போல்
அதனை நம்பு என்றார்

நமக்குத்
துயரத்தை அளிப்பது
அச்சம் என்றார்
அதை அகற்றுவது
ஞானத்தின் வெளிச்சம் என்றார்

எதிர்மறை எண்ணங்களைத்
திசை திருப்பு என்றார்
எதிரிகளை எரிக்கட்டும்
சத்தியத்தின்
நெருப்பு என்றார்

தனித்தன்மை
தன்னம்பிக்கை தேவை என்றார்
இவை இரண்டும்
இருப்பவனே
செய்வான் சேவை என்றார்

இருபுயம் விரிவடைந்தால்
வீரம் பிறக்கும் என்றார்
இருதயம் விரிவடைந்தால்
ஞானம் உதிக்கும் என்றார்

இவை…
விவேகானந்தரின் வாக்கு
அவ்வழியே இருக்கட்டும்
நம் நோக்கு

நம் சிறுதுளி
வெள்ளமாகட்டும்
நம் சிறுபொறி
வெளிச்சமாகட்டும்
அதுவும்…
மக்களைக் காக்கட்டும்

மானுடம் போற்றும் வேந்தர்
விடிவெள்ளி விவேகானந்தர்

October 18, 2017
தீபவிளக்கு எரிகிறது!

-தேனுகாமணி

விடியல் விடிகிறது
நல்விடியல் விடிகிறது
அனுதினம் மனம்கொண்ட
தீமைகள் மடிகிறது
இயலாமைகள் முடிகிறது!

அதிகாலை நீராடுவோம்
மனத்தீமைகளுக்குத் தீயூட்டுவோம்
எண்ணெயில் இலட்சுமி தேவி
அரப்பில் சரஸ்வதி தேவி
தண்ணீரில் கங்கா தேவி
குங்குமத்தில் கெளரி தேவி
சந்தனத்தில் பூமா தேவி
ஆம் இவர்கள்
வாசம் புரிகிறார்கள்…
மனத்தின்
பொய்வேசம் களைகிறார்கள்!

தீப ஒளித்திருநாள்
நரகன் உயிர் மடிந்த நாள்
ராமன் வனவாசம் முடித்த நாள்
மகாவீரர் நிர்வாணம் அடைந்த நாள்
பொற்கோயில் பணி தொடக்க நாள்
ஆம் இப்படித்தான்…
தீப ஒளித்திருநாளை
பல நாடுகள்
பல இனங்கள்
கொண்டாட வேறு வேறு
காரணங்கள்
கொண்டாட்டங்களில் தான்
மனம் அடைகிறது
உண்மை நெறியின்
பூரணங்கள்!

வாருங்கள்…
புத்தாடை அணிந்து
புதிதாகப் பிறப்போம்
இனிப்புகள் பகிர்ந்து
இனிதாக இருப்போம்
இயன்றதைச் செய்து
இவ்வுலகில்
மானுடம் காப்போம்!

விடியல் விடிகிறது
நல்விடியல் விடிகிறது
தீபவிளக்கு எரிகிறது
தீமைகள் மடிகிறது!

October 18, 2017
கேசவ் வண்ணம் – கிரேசி எண்ணம்

”படிகாரப் பச்சை, பவளச்செவ் வாயும்,
(எழுப்பும்)கடிகா ரமுரளியின் கீதம், -அடிசேர்ந்து,
கன்றுண்ணும் கோவிந்தன், என்றும் புதியவர்(NEW FOR EVER)
நன்றவர் தாளை நினை’’கிரேசி மோகன்….

முரளி -வேணுகானம்…..

October 17, 2017
சிவபிரதோஷம் “வெண்பனித் தீயினன்”

மீ.விசுவநாதன்

“அன்பே சிவம் “

இறைவனுண்டா ஏமாற்றா? – என்
ஏக்கத்தைத் தாய்க்குத் தெரிவித்தேன்
நிறைமனத்தில் அன்புவைநீ – அந்த
நிமிடமுதல் இறையே நீயென்றாள் .

தெய்வமுண்டா கிடையாதா ? – குருவே
தெளிவுதாரீர் எனக்கே எனக்கேட்டேன்
ஐயமின்றி உண்டென்றார் – அதை
அனுபவத்தில் கண்டே உணரென்றார்.

கடவுளுண்டா கற்பனையா ? – இரு
கண்மூடிக் கேட்டேன் எனக்குள்ளே
அடமனிதா உன்னைநம்பி – நீ
வைக்கின்ற அடியே கடவுள்தான்.

(இன்று 17.10.2017 பிரதோஷம்)

October 17, 2017
கேசவ் வண்ணம் – கிரேசி எண்ணம்

“காதலுக்குக் கண்ணில்லை, கண்ணனின் பக்திக்கண்
காதலி கோபியரைக் கண்டுகொள்ள:-ஆதலினால்
காதலிப்பீர் கண்மூடி காற்றிசைக்கும் கீதத்தை;
யாதுமான யாதவனே யாப்பு”….!

யாப்பு-Grammar….

October 16, 2017
கேசவ் வண்ணம் – கிரேசி எண்ணம்

தான தானன தத்தன தத்தன தான தானன தத்தன தத்தன
தான தானன தத்தன தத்தன -தனதான
மயிலை சீனிவாச பெருமாள்
———————–

171014 – Srinivāsa -lr

“ஆல வாயினில் செத்துணர் வுற்றவர் நானை யாரென கற்றுடல் விட்டவர்
சோணை மாமலை உற்றது ரைத்திடு -ரமணேச
ஞான மாமுனி செப்பிய சத்தினில் நானும் வாழயில் பற்றுவி ருப்பினை
கீதை நாயக விட்டுவி ரக்தியில் -விஜயோனாய்

தோளி லாளிடும் விற்கணை விட்டது போல யாவையும் விட்டுயர் வெற்றியை
வாழும் நாளிலே வெற்றிலை வட்டிலில் -எளிதாக
ராஜ யோகமும் ,பக்தியும் ,கர்மமும் ஞான மார்க்கமும் வைத்தருள் இக்கணம்
ராசா லீலையில் முக்திய ளித்திடும் -குருநாதா

கால நேமிவ லக்கரம் விட்டிட ஆழி ஊதலி டக்கரம் பற்றிட
தோளி லாடிட விற்சுமை மற்றிரு -கதைவாளை
ஆளு மாதவ விக்ரம சொப்புரு வான வாமன நச்சர வத்துயில்
ஆதி நாரண உச்சரி பத்திரு -திருநாமம்

நாளு மோதிட நற்கதி பெற்றுயர் வான வாசலில் விட்டுவின் நித்திய
சூரி யாகுவர் இப்பிற விப்பிணி -குணமாகும்
கோல மாமயி லைப்புகழ் கற்பக பாலி ஈசனின் பக்கஅ கத்துறை
சீனு வாசம கத்துவ மைத்துன -பெருமாளே”….!
————————————————————————————————

பெருமாள் திருப் புகழ்….

தான தானன தனன தனத்த
தான தானன தனன தனத்த
தான தானன தனன தனத்த -தனதான

மயிலை சீனிவாச பெருமாள்
———————————–

“மாலை நாடகம் மதியம் உறக்கம்
காலை ராவினில் கவிதை வழக்கம்
நாளும் வாழ்ந்திடும் நிறைவை எனக்கு -அருள்வாயே
கோல வாகன மயிலில் குறத்தி
தேவ யானையும் அருகில் இருக்க
வான வீதியில் விரையும் குகற்கு -முறைமாம

சேலை மோகமும் சினமும் செருக்கும்
ஆசை ஆர்வமும் அறிவு மயக்கம்
மோச மாகுமுன் முளையில் எடுக்க -வருவாயே
ஊறும் ஆணவம் உதியும் இடத்தில்
நானை யாரென நினைவு படுத்தி
பேசி டாதுயர் பிரம நினைப்பில் -ரமணேசர்

கோலம் கோவணம் கடமை இருப்பு
பாறை யாசனம் பதவி ப்ரபத்தி
சோணை ஈசனின் சரண முனைப்பு -எனவாழும்
வாழ்வு நானுற வழியை வகுத்து
கோழை யானவில் விஜயர் தமக்கு
கீதை யாலுரம் அளியும் அச்சுத -தருவாயே

காலில் பூமகள் களைய சொடுக்கை
பாலி னாழியில் படவி டமெத்தை
சாயும் யோகசு கமதை விடுத்து -எழுவாயே
ஏறு வாகனம் வினதை பிறப்பில்
சேரு மோகனென் அகம தில்நிற்க
சீனு வாசம ழைமுகில் நிறத்து -பெருமாளே”….கிரேசி மோகன்….!

October 16, 2017
படக்கவிதைப் போட்டி 130-இன் முடிவுகள்

-மேகலா இராமமூர்த்தி

தளிர்க்கர மழலைக்குத் தகவோடு வளையலிடும் பெரியவரையும், அணிஅணியாய்க் கண்ணைப் பறிக்கும் வளையல்களையும் கச்சிதமாய்ப் புகைப்படமெடுத்து வந்திருக்கும் திரு. ராம்குமார் ராதாகிருஷ்ணனுக்கும், கவினான இந்தக் காட்சியைக் கவிதைப் போட்டிக்குத் தேர்தெடுத்துத் தந்திருக்கும் திருமதி. சாந்தி மாரியப்பனுக்கும் என் நன்றிகள்!

பெண்களின் எழிலைப் பேரெழிலாக மாற்றும் மந்திரவித்தை கற்றவை வளையல்கள். விலையுயர்ந்த பொன் வளையல்களைவிட விலைமலிவான கண்ணாடி வளையல்களும் இரப்பர் வளையல்களும் கூடுதல் பொலிவைக் கரங்களுக்குத் தரவல்லவை.

பார்த்தவுடனேயே மனத்தில் வண்ண வண்ணக் கற்பனைகளைச் சிறகடித்துப் பறக்கவைக்கும் சிறப்பான புகைப்படம்! எனவே கவிஞர்கள் தம் கைவரிசையைக் காட்டத் தயாராகியிருப்பார்கள் என எண்ணுகிறேன்.

இதோ போட்டியை ஆரம்பித்துவிடுவோம்!

*****

”ஆடம்பர விளக்கொளியில் மின்னும் பெருங்கடைகளில் வாங்கியணியும் வளையல்களைவிடக் கீற்றுவேய்ந்த எளிய திருவிழாக் கடைகளில் கிடைக்கும் வளையல்களின் அழகே அழகு!” என உளம் பூரிக்கிறார் திரு. செண்பக ஜெகதீசன்.

எளிமை அழகு…

அடுக்கு மாடிக் கட்டிடத்தில்
அழகு விளக்குகள் ஒளியினிலே
எடுத்துக் கொடுக்கும் காப்புகளின்
எண்ணிலா வகையிலே இன்பமில்லை,
தடுத்து வைத்தே கீத்துகட்டிய
திருவிழா வளையல் கடையினிலே
எடுத்துப் போட்டே அழகுபார்க்கும்
எளிய வளையலுக் கீடிலையே…!

*****

வளையோசையின் சிறப்பை மெட்டியோசையோடு சேர்த்துக்கட்டித் தன் பாட்டில் ஒலிக்கவிட்டிருக்கிறார் திரு. ரா. பார்த்தசாரதி.

நன்மனத்துடன் வளையல்களை அணிவிக்கக் கையை நீட்டச்சொன்னார்
கைகளின் அளவிற்குக்கேற்ப வளையலைப் பெண்ணிற்கு அணிவித்தார்
என்றுமே வண்ணக் கண்ணாடி வளையல் அணிய விருப்பமுண்டு
இதில் ஏழை, பணக்காரன் என்ற மாறுபாடு இல்லாமல் இருப்பதுண்டு!
வண்ண வளையல்களைக் கன்னிப்பெண்களுக்கு அதிக விருப்பமுண்டு
அணிந்தவுடன் அவள் முகத்தில் புன்னகை மலர்வதுண்டு
அந்த வளையோசையுடன் பிறர்க்குக் காண்பிப்பதில் பெருமையுண்டு
வளையோசையும், மெட்டிஓசையுமே ஆடவன் மனதை அசைப்பதுண்டு!
ஆபரணங்களிலே வளையலே பெண்களை அதிகம் மகிழ்விக்கும்
வளையோசையும், மெட்டி ஓசையுமே ஈர்க்கும் தன்மை அதிகம்
பெண் வளையல்களை அணிவதன் காரணம்தான் ஏனோ?
கணவன் தன்னை வளைய வளைய வருவதற்குத்தானோ?
தாய்மையின் சிறப்பை வளைகாப்பின் மூலம் சிறப்படையச்செய்யுதே
வண்ண வளையல்கள் அணிந்த கருவுற்ற தாயும் மகிழ்ச்சி அடைந்ததே
தானும் அணிந்து, பிறர்க்கும் அவை வெகுமதியாய்க் கொடுக்கப்படுதே
வளையலின் ஓசை அவள் குழந்தைக்கும், கணவனுக்கும் சொந்தமானதே!

*****

”பெண்மணிகள் அணியும் அழகான அணிகலன் இந்த வளையல்; வாழ்ந்தால் இணையாகவே வாழவேண்டும் எனும் இணையற்ற பாடம் சொல்லும் அணியிது! மெட்டியும் கொலுசும் பயன்பாடின்றிப் பெட்டிக்குள் போனதுபோல் வளையலும் கைநழுவிப்போகும் காலம் வந்திடுமோ?” என்று கவலுகின்றார் பெருவை திரு. பார்த்தசாரதி.

வளையலோ வளையல்..!
நலமுடன் வாழமஞ்சள் குங்கும் வரிசையில்..
நற்பொருளாய் நடுவே வளையலும் உண்டாம்.!

மணிக்கட்டின் மேலே அழகு சேர்க்கும்..பெண்
மணிகள் மட்டுமே அணியும் அணிகலனாம்.!

வட்டமாய் அமைந்ததால் அது வளையலாகும்
எட்டவிரட்டும் சக்தியால் எதிர்வினை யகலும்.!

காதல் வலையில் மயங்கும் காளையர்கள்தன்
காதலிக்குப் பரிசாக இதைக் கொடுப்பதுண்டு.!

கலைநயம் கொண்ட தங்கம்வெள்ளி முத்தென
வளையலும் வரலாறு பல சொல்லுமணிகலன்.!

வளைந்து வருகின்ற வயிற்றின் ரகசியத்தை
வளையல்கள் சேர்ந்து வருமுன் அறிவிக்கும்.!

வகை வகையாய்ச் செய்தபல வண்ணங்களில்
வளைகாப்பு எனும்பெயரில் ஓரிடத்தில் கூடும்.!

வளையலின் உரசலில் எழும் மெல்லிசையை
வயிற்றுளே இருக்கும் குழந்தை கேட்டுமகிழும்.!

வாழ்ந்தால் ஜோடியாகத்தான் வாழ முடியுமென
வாழ்வியல் பாடம் சொல்லும் அற்புதணிகலன்.!

பத்திரமாக அணியும் வளையலுக்குக் புகழான
உத்திரப்பிரதேச மாநிலத்தை உலகம் அறியும்.!

அன்னமிடும் கையில் வளையலிருக்க வேணும்
சொன்னது சாஸ்திரம்தான் யார் கேட்கிறார்கள்.?

மெட்டியும் கொலுசும் காணோம்..வளையலும்
எட்டியே தூரமாகக் கைநழுவிப் போய்விடுமோ.!

*****

ஆகா…எத்தனை வண்ண வண்ண வளையல்கள்! நிலவைப் பழிக்கின்ற வெள்ளை வளையல்கள்! மாலைச்சூரியன்போல் மஞ்சள் வளையல்கள்! என வியக்கும் திரு. பழ.செல்வமாணிக்கம், வளையல்கள் பேசும் வன்னமொழி (வன்னம் – அழகு) கேளுங்கள்! வளத்தோடு வாழுங்கள்! என்று வாழ்த்துகிறார்.

வண்ண வண்ண வளையல்கள்:

வளையல் வியாபாரி வந்து விட்டார் வாருங்கள்!
வண்ண வண்ண வளையல்கள் இங்கே பாருங்கள்!
சின்னக் கை பிடித்து வளையல் மாட்டுகின்ற அழகைப்
பாருங்கள்!
நிலவைப் பழிக்கின்ற வெள்ளை வளையல்கள்!
கடலின் நிறம் கொண்ட ஊதா வளையல்கள்!
கார் மேக நிறம் கொண்ட கறுப்பு வளையல்கள்!
மாலைச் சூரியன் போல் மஞ்சள் வளையல்கள்!
வானவில் நிறமுள்ள வண்ண வண்ண வளையல்கள்!
பிள்ளை பிறந்தவுடன் கறுப்பு வளையல்கள்!
பிள்ளளை கருவில் வளர்கையில் சீமந்த வளையல்கள்!
ஆடிப் பூரத்தில் அம்மனுக்கும் வளையல்கள்!
ஆதி முதல் அந்தம் வரை கூட வரும் வளையல்கள்!
ஒரு முறை வளையலை அணிந்து பாருங்கள்!
வளையல்கள் பேசுகின்ற அழகு மொழி கேளுங்கள்!
வளை நிறை கை தரும் வளத்தோடு வாழுங்கள்!

*****

கிராமத்துத் திருவிழாவில், மக்கள் கூடிவாழும் ஒருவிழாவில், வண்ண வளையல்களை எண்ணம்போல் அணிந்துகொண்டு சுற்றிவரும் கிராமத்து மின்னலைப் பிடித்து நம்முன் நிறுத்துகிறார் திருமிகு மா. பத்ம பிரியா.

கிராமத்து மின்னல் இவள்
கிராமத்து திருவிழாவாம்
கூடி வழும் ஒருவிழாவாம்
பெரியவர் மகிழ்வுடனே
சிறியவர் மகிழ்வு தான் சிந்தை மயக்குதடி
பல்லாங்குழியாடி பாண்டி விளையாடி
அல்லியிதழ் பறித்தாடி
ஆலவிழுதுகளில் குதித்தாடி
கூட்டாஞ்சோறு கதைபேசி
குதூகலிக்கும் பிள்ளை மனம்
பெண்ணவளின் கிள்ளைமொழி
பேதமையைச் சுட்டுதடி

கோயில் திருவிழாவில்
கோதையவள் ஒய்யாரம்
கோயில் சிலை ஊர்வலமாய்
வீதியெல்லாம் சுற்றிவர
கடை கடையாய் வலம் வரும்
கன்னியவள் விழிகளிலே ஆனந்தம் பரவுமடி
வண்ண வண்ண வளையல்களை
வளைக்கரத்தில் அணிந்து கொண்டு
விருந்தினர் கைப்பிடித்து
விருந்திடுவாள் விந்தை மகள்
பரிமாறும் அழகினிலே
பந்தபாசம் மனம் நாடுமடி
பூலோகம் சுற்றினாலும்
பேரின்பம் கிட்டாது
கண்டுகொண்டேன் கிராமத்தில்
இயற்கையெனும் தாய்மடி.

*****

வண்ண வளையல்கள் கிறங்கவைக்கும் கவிதைகளை நமக்குப் பரிசாய்ப் பெற்றுத் தந்துள்ளன. கவிஞர்களுக்கு என் பாராட்டும் நன்றியும்!

இவ்வாரத்தின் சிறந்த கவிதையாய்த் தேர்வாகியிருப்பது அடுத்து…

வண்ண வண்ண வளையல்களை
வகைவகையாய் அடுக்கி வைத்து
பெண்ணவளின் கைப்பிடித்து யாவாரி
அண்ண அண்ண நோகுதென்று
அவள் இழுத்தும் போகுதென்று
இன்னுமின்னும் போடுகிறான் யாவாரி

அறியாப் பெண் அவள் கேட்க அதையே சாக்காய் வைத்து
அடுக்கடுக்காய் போடுகையில் யாவாரி – அட
புரியாமல் போடுறியே போதுமினி யென்று தந்தை
பொக்கட்டைப் பார்த்துரைப்பான் தடுமாறி –

‘காப்புக் காப்புக்காப்பாய் எடுத்து அவள்
கையினிலே மாட்டுகிறாய்
சேப்புக் காலியாகுதடா தம்பி – ஊர்போய்
சேர்ந்திடவும் காசுவேணும் தம்பி
ஆப்பிழுத்த குரங்கானேன்
அவளையிங்கு கூட்டிவந்து
கூப்புகிறேன் கையுனக்குத் தம்பி – சேரும்
கோடிபுண்ணியம் நிறுத்து தம்பி.‘

சிறுவியாபாரிகளுக்குப் பெரிய வருமானம் எப்போதுமில்லை. ஆகவே, திருவிழாக் காலங்களில் தம் கடைகளுக்கு வருவோரிடம் தம் சரக்குகள் அனைத்தையும் விற்றுத் தீர்த்துவிடவேண்டும் எனும் பேரார்வம் அவர்களிடம் இருப்பது இயல்பே. அப்படித்தான் இந்த வியாபாரியும் தன் சேப்பு (pocket) காலியாகும்வரை சிறுமிக்குக் காப்புப் போடுகிறானே என்றஞ்சி, ”வளையல் போட்டது போதுமையா! நான் ஊர்போய்ச் சேரக் காசு வேணுமையா!” என்று கெஞ்சிநிற்கும் தந்தையைத் தன் கவிதையில் நகைச்சுவையாய்ப் படம்பிடித்துக் காட்டியிருக்கும் திரு. எஸ். கருணானந்தராஜாவை இவ்வாரத்தின் சிறந்த கவிஞர் என அறிவித்துப் பாராட்டுகிறேன்.

October 16, 2017
இந்த வார வல்லமையாளர்! (244)

செல்வன்

இவ்வார வல்லமையாளராக யது கிருஷ்ணா அவர்களை அறிவிக்கிறோம்.

இவ்வாரம் கேரளாவில் முதல்முதலாக பத்தனம்திட்டா திருவில்லா மகாதேவ ஸ்வாமி ஆலய கருவறையில் நுழைந்து பூசை செய்த முதல் பட்டியல் சாதி குருக்கள் எனும் சிறப்பைப் பெற்றுள்ளவர் யது கிருஷ்ணா. அதிலும் கேரளாவின் மிகச்சக்தி வாய்ந்த ஆன்மிக அமைப்பான திருவாங்கூர் தேவசம் போர்டில் இணைந்துள்ளார் யது கிருஷ்ணா.

யது கிருஷ்ணாவின் கதை நம் மனதை உருக்கும் சக்தி கொண்டது. அவர் பிறந்தது பட்டியல் சாதியான புலையர் எனும் சாதியில். அவரது குடும்பத்தில் ஆறாவது பிள்ளை அவர். அவரது தந்தை ரவியும் தாய் லீலாவும் தினக்கூலிகள். சிறுவயது முதல் ஆன்மிகத்தில் மிகுந்த நாட்டம் கொண்டவர் யது கிருஷ்ணா. தினமும் வீட்டுக்கு அருகே உள்ள பத்திரகாளி கோயிலுக்குச் சென்று வழிபடுவதை வழக்கமாக கொண்டிருந்தார். தன் தாய் மிகுந்த பக்தி உள்ளவர் என்றும் பூஜை சமயம் பூக்களை மாலையாகக் கட்டி அவர் தர அதைத் தான் எடுத்துச்சென்று காளியை வணங்கியதாகவும், தன் தாயே தன் ஆன்மிக குரு எனவும் கூறுகிறார் யதுகிருஷ்ணா

10ஆம் வகுப்பு முடித்தபின் சமஸ்கிருதம் கற்றார் யதுகிருஷ்ணா. வித்யாபீடம் எனும் அமைப்பில் சேர்ந்து தந்திரி தந்திரம் எனப்படும் பூஜை வழிமுறைகளையும் கற்றுத்தேர்ந்தார். அப்போதெல்லாம் அவருக்கு தான் பூசாரி ஆவோம் என்றே தெரிந்திருக்கவில்லை. ஆன்மிக நம்பிக்கையாலேயே இவற்றை கற்றுத்தேர்ந்தார். முழுமையாகக் கற்று முடிப்பதற்கு 20 ஆண்டுகள் ஆகலாம் என்ற நிலையில், இவர் தந்திரி தந்திரா பூஜை வழிமுறைகளை 10 ஆண்டுகளில் கற்றுத்தேர்ந்தார்.

அதன்பின் பரவூர் பத்திரகாளி கோயிலில் குருக்களாக பணியில் அமர்ந்தார். அங்கே பணியாற்றியபடி சமஸ்கிருதம் மற்றும் பூஜைமுறைகளைக் கற்றுக்கொண்டு கல்லூரிக்கும் சென்று வந்தார்.

அனைத்து சாதியினரும் அர்ச்சகர் ஆகலாம் எனும் சட்டம் நிறைவேறியபின் முதல் பட்டியல் சாதி பூசாரியாக தேர்வாகி திருவாங்கூர் தேவசம் போர்டிலும் தேர்ந்தெடுக்கப்பட்டார் யதுகிருஷ்ணா

தன் சாதியால் அவர் கோயிலில் அல்லது வித்யாபீடத்தில் அவமதிக்கப்பட்டதுண்டா என கேட்கப்பட்டபோது “ஒரு இடத்திலும் அவமதிக்கப்பட்டதில்லை. நான் சம்ஸ்கிருதம் படிக்கத் தங்கிய வீட்டில் என்னுடன் தங்கிய அறைத்தோழர் ஒரு கவுட சரஸ்வதி பார்ப்பனர். என் சாதி மனித சாதி என்றே அவர் கருதி என்னுடன் அன்புடன் பழகினார். அவர் மட்டுமல்ல குருதேவ வித்யாபீடத்திலும் பார்ப்பனர், பிறசாதியினர் என்ற பேதமே இருந்ததில்லை.

எனக்கு பத்தனம்திட்டா ஆலயத்தில் வேலை கிடைத்ததும் நான் பணியாற்றிய பரவூர் பத்திரகாளி அம்மன் கோயில் நிர்வாகிகளும், பக்தர்களும் என்னைப் பிரிவதை நினைத்து வருந்தினாலும், பதவி உயர்வு கிடைத்து செல்வதை மிகுந்த மகிழ்ச்சியுடன் பாராட்டி வாழ்த்தினார்கள். மற்றவர்கள் பூசாரி வேலையை ஒரு தொழிலாகக் கருதலாம். எனக்கு இது ஒரு ஆன்மிக சேவை. எனக்கு விடுமுறை எடுக்காமல் சனி, ஞாயிறு அன்றுகூட பூசை செய்வதே விருப்பமானது” என்கிறார்

குறைவற்ற பக்தி, நிறைந்த ஆன்மிகம் ஆகியவற்றைக் கொண்ட யதுகிருஷ்ணா குருக்கள் அவர்களை வாழ்த்தி, அவரை வல்லமையாளராக அறிவிப்பதில் வல்லமை மிகுந்த பெருமை அடைகிறது.

இத்தனை உயர்ந்த பக்தி கொண்ட உங்களுக்கு பூசை செய்ய வாய்ப்பளித்ததால் பத்தனம்திட்டா மகாதேவஸ்வாமி ஆலயமே பெருமை அடைவதாகத் தான் நான் கருதுகிறேன்.

“தாயினும் நல்ல தலைவர் என்று அடியார்

தம்அடி போற்றிசைப் பார்கள்

வாயினும் மனத்தும் மருவிநின்று அகலா

மாண்பினர் காண்பல வேடர்” (தேவாரம்)

இந்த வார வல்லமையாளராக தங்கள் கவனத்தைக் கவருபவர் எத்துறையைச் சார்ந்தவராக இருப்பினும் நம் வல்லமை ஆசிரியர் குழுவினரின் கவனத்திற்குக் கொண்டுவர விரும்பினால், vallamaiselva@gmail.com, vallamaieditor@gmail.com ஆகிய முகவரிகளில் தங்கள் பரிந்துரைகளை அனுப்பி வைக்கலாம். மேலும் வல்லமையாளர் விருது பற்றிய விவரங்களை இப்பக்கத்தில் காணலாம் –http://www.vallamai.com/?p=19391, இதுவரை வல்லமையாளர்களாகத் தேர்வு பெற்றோர் பட்டியலை இங்கே காணலாம் http://www.vallamai.com/?p=43179 ]

October 16, 2017
படக்கவிதைப் போட்டி (131)

பவள சங்கரி

அன்பிற்கினிய நண்பர்களே!

வணக்கம். கண்ணையும் கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் ஆற்றல் கொண்டவரா நீங்கள்?

முத்துகுமார் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை (21.10.2017) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும் தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு, ஏற்கனவே சிறந்த கவிஞராகத் தேர்ந்தெடுக்கப் பெற்றவர்களுக்கும் உண்டு.

ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச் சங்கப் பேரவையின் (FeTNA) 2008, 2009, 2014, 2016ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுகளும் பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்

October 16, 2017
நிசப்த வெளியில்..!

பெருவை பார்த்தசாரதி

எத்தனையோ எண்ணங்கள் எழுகிறது ஏட்டிலெழுத..

……….ஏனைய கவிஞர்பாவலரின் எழுச்சிமிகு சிந்தனையால்.!

புத்தகத்தைப் புரட்டிப்பார்த்து வித்தகனாய் வலம்வந்து..

……….பூவுலகில் வாழ்வோருக்கு புதியசெய்தி சொல்லவேணும்.!

சொத்தாவதெலாம் எழுதிச்சேர்க்கும் வரிகளொன்றே..நாம்..

……….செத்தபிறகும் நிலைத்திருக்கும் எழுதிய எழுத்தேயாம்.!

முத்தானக் கவிதைவரிகள் மூளையிலே முளைப்பதற்கு..

……….முனையும் எண்ணமும் நிசப்தமுமங்கே நிலவவேண்டும்.!

காலத்தால் அழியாத காப்பியத்தைக் கவிச்சக்கரவர்த்தி..

……….கம்பனும் வடிவமைத்தான் கடவுளிடம் பெற்றருளாலே.!

ஞாலத்தில் நிலைபெற்ற எழுச்சிதரும் கவிதையையே..

……….மணக்குள விநாயகனின்முன் புனைந்தான் மஹாகவியும்.!

காலத்துக்கும் பொருந்துகின்ற கவிதையைக் கொடுத்தான்..

……….கவியரசன் கண்ணதாசன் தன்கையில் கோப்பை ஏந்தி.!

நீலவானும் விண்வெளியும் கவியெழுதக் கைகொடுக்க..

……….நிசப்த வெளியிலமர்ந்து இயற்கையை நானெழுதுவேன்.!

கண்ணில் தோன்றுமியற்கைக் காட்சிகளுக் கிடையில்..

……….கதிரவன் தோன்றுமற்புத நேரம்தெய்வ நினைப்பூறும்.!

மண்ணிலோடும் சிற்றோடை மெல்லிசை எழுப்பும்போது..

……….மகரந்தக் கருத்தெலாம் மலர்போன்ற கவிதையிலுதிக்கும்.!

விண்ணிலுலவும் விண்மீன்களைக் காண மண்ணின்மீது..

……….விரியும் பூஞ்சோலைக் களியூட்டுமதில் கவியூற்றெழும்.!

பண்ணிலெழும் மகுடிச்சப்தத்திற் கெழும் பாம்புபோல..

……….எண்ணிலாச் சிந்தனைகளெழும் நிசப்தச் சூழ்நிலையில்.!

அழகான சூழலில் அடர்த்தியான மரங்களுக்கிடையில்..

……….அடுத்திருக்கும் அருவியில் எழுமெல்லிசைச் சப்தமும்.!

பழுத்திருக்கும் கனிகளைப் பறவைகளும் மந்திகளும்..

……….பகுத்துண்ணும் காட்சிகளால் பார்ப்பவர் மனம்துள்ளும்.!

நிழல்தருமரமும் புல்வெளியும் மழைநோக்கி நிமிரும்..

……….நெடுநேரமங்கே அமர்ந்திருக்க நெஞ்சமும் இசையும்.!

சூழலோடுசுற்றமும் சுகமானநிசப்தமும் சேரும் போது..

……….சாமரங்கள்வீசும் தென்றலால் பாவெழுதும் திறன்வரும்.!

நன்றி தினமணி கவிதைமணி வெளியீடு::14-10-17

நன்றி படம்:: கூகிள் இமேஜ்

October 16, 2017
வளையல்

ரா.பார்த்தசாரதி

நன்மனத்துடன் வளையல்களை அணிவிக்க கையை நீட்டச்சொன்னார்

கைகளின் அளவிற்கேற்ப வளையலை பெண்ணிற்கு அணிவித்தார்

என்றுமே வண்ண கண்ணாடி வளையல் அணிய விருப்பமுண்டு

இதில் ஏழை, பணக்காரன் என்ற மாறுபாடு இல்லாமல் இருப்பதுண்டு!

வண்ண வளையல் அணிய கன்னிப்பெண்களுக்கு அதிக விருப்பமுண்டு

அணிந்தவுடன் அவள் முகத்தில் புன்னகை மலர்வதுண்டு

அந்த வலையோசையுடன் பிறர்க்கு காண்பிப்பதில் பெருமையுண்டு

வலையோசையும், மெட்டிஒசையுமே ஆடவன் மனதை அசைப்பதுண்டு!

ஆபரணங்களிலே வளையலே பெண்களை அதிகம் மகிழ்விக்கும்

வலையோசையும், மெட்டி ஓசையுமே, ஈர்க்கும் தன்மை அதிகம்

பெண் வளையல்களை அணிவதன் காரணம்தான் ஏனோ ?

கணவன் தன்னை வளைய,வளைய வருவதற்குத்தானோ ?

தாய்மையின் சிறப்பை, வளைகாப்பின் மூலம் சிறப்படையச்செய்யுதே

வண்ண வளையல்கள் அணிந்த கருவுற்ற தாயும் மகிழிச்சி அடைந்ததே

தானும் அணிந்து, பிறர்க்கும் அதனை வெகுமதியாய் கொடுக்கப்படுதே

வளையலின் ஓசை அவள் குழந்தைக்கும், கணவனுக்கும் சொந்தமானதே !

October 16, 2017