Tag: செண்பக ஜெகதீசன்

செண்பக ஜெகதீசன்…

மிகச்செய்து தம்மெள்ளு வாரை நகச்செய்து
நட்பினுட் சாப்புல்லற் பாற்று.
-திருக்குறள் -829(கூடா நட்பு)

புதுக் கவிதையில்…

மிகுந்த நட்புபோல்
புறத்தே நடித்து,
அகத்தே
பகைமையுடன் இகழ்வாரிடம்,
நாமும்
புறத்தே அவர் மகிழுமாறு
நட்புக் காட்டி,
அகத்தே
அத்தகு நட்பு
அழியுமாறு செய்திடவேண்டும்…!

குறும்பாவில்…

நட்புபோல் வெளியே நடித்து
அகத்தே பகையுடன் இகழ்வோர் நட்பை
அவர்போல் நடித்தே அழித்திடு…!

மரபுக் கவிதையில்…

புறத்தே மிகுந்த நட்பதுபோல்
பாவனை செய்தே உள்ளமதில்
வெறுப்பு கொண்டே வஞ்சமுடன்
வேறு விதமாய் இகழ்ந்துபேசும்
பொறுப்பே யில்லா மாந்தரிடம்,
போயவர் வழியில் புன்னகைத்தே
அறுத்திட வேண்டும் அவர்நட்பை
அறிந்தது கூடா நட்பெனவே…!

லிமரைக்கூ..

உள்ளத்தில் நிறைந்த பகையில்,
நட்பாய் நடிப்பவர் தொடர்பை அறுத்திடு
நடித்தேயவர் நம்பிடும் வகையில்…!

கிராமிய பாணியில்…

வேண்டாம் வேண்டாம்
நட்பு வேண்டாம்,
நல்லகொணம் இல்லாத
கெட்டவுங்க நட்பு வேண்டாம்..

நண்பன்போல வெளியே நடிச்சி
மனசுல பகயோட பேசுறவன்
நட்பு வேண்டாம்,
அவனப்போல
வெளிய சிரிச்சிப் பேசி
மனசால அழிச்சிடணும்
அவங்கூடவுள்ள நட்ப..

அதால
வேண்டாம் வேண்டாம்
நட்பு வேண்டாம்,
நல்லகொணம் இல்லாத
கெட்டவுங்க நட்பு வேண்டாம்…!

-செண்பக ஜெகதீசன்

தம்மிற் பெரியார் தமரா வொழுகுதல்
வன்மையு ளெல்லாந் தலை.

-திருக்குறள் -444(பெரியாரைத் துணைக்கோடல்)

புதுக் கவிதையில்…

அறிவு ஒழுக்கம்
ஆகியவற்றில்
தம்மைக்காட்டிலும் உயர்ந்த
பெரியோரை
உறவாக்கி ஒழுகுதல்,
மன்னர்தம்
வல்லமை அனைத்திலும்
உயர்ந்த
முதன்மையானதாகும்…!

குறும்பாவில்…

தம்மைவிட அறிவாற்றலுடைப் பெரியோரை
உறவாக்கி ஒழுகுதல், அரசர்தம்
ஆற்றல் அனைத்திலும் முதன்மையானதே…!

மரபுக் கவிதையில்…

அறிவு ஒழுக்கம் ஆற்றலென
அனைத்திலும் தமைவிட உயர்ந்திருக்கும்
நெறியது மிக்கப் பெரியோரை
நன்றாய்த் தெரிந்து தேர்ந்தெடுத்தே,
உறவெனப் பழகித் துணையாக்கிடும்
உயர்ந்த ஒழுக்கம், மன்னர்தம்
நிறைந்த ஆற்றல் அனைத்தினிலும்
நிலையில் முதன்மை பெற்றிடுமே…!

லிமரைக்கூ..

அறிவாற்றல்மிகு பெரியோரைத் துணையாய்
ஏற்றொழுகும் மன்னர்தம் ஆற்றலதனுக்கே
உயர்வானது ஏதுமில்லை இணையாய்…!

கிராமிய பாணியில்…

வச்சிக்கோ வச்சிக்கோ
தொணைக்கு வச்சிக்கோ,
தெறமயுள்ள பெரியவங்களத்
தொணைக்கு வச்சிக்கோ..

அறிவுலயும் ஒழுக்கத்திலயும்
தம்மவிட ஒசந்த
பெரியவங்களத்
தொணைக்கு வச்சிக்கிறது,
தேசமாளும் ராசாவோட
தெறமயிலயெல்லாம் ஒசத்தியானதுதான்..

அதால
வச்சிக்கோ வச்சிக்கோ
தொணைக்கு வச்சிக்கோ,
தெறமயுள்ள பெரியவங்களத்
தொணைக்கு வச்சிக்கோ…!

…

-செண்பக ஜெகதீசன்

எண்ணித் துணிக கருமந் துணிந்தபி
னெண்ணுவ மென்ப திழுக்கு.

-திருக்குறள் -467(தெரிந்து செயல்வகை)

புதுக் கவிதையில்…

செய்யத்தகுந்த செயல்களையும்
செய்து முடிக்கும் வழிகளை
ஆராய்ந்து அறிந்தபின்
துணிந்து தொடங்கவும்..

தொடங்கியபின்
எண்ணிப் பார்த்துக்கொள்ளலாம்
என்பது
தவறாகிவிடும்…!

குறும்பாவில்…

செய்துமுடிக்கும் வழிகளை
ஆராய்ந்தறிந்தபின் செயல்தொடங்கு,
தொடங்கியபின் எண்ணுதல் தவறாகும்…!

மரபுக் கவிதையில்…

செயலைச் செய்யத் தொடங்குமுன்னே
செயல்படும் வழிவகை தெரிந்தவைதான்
பயன்படும் முறைகளை ஆய்ந்தறிந்தே
புறப்படு செயலினைத் தொடங்கிடவே,
செயல்படத் தொடங்கி நடக்கையிலே
செயல்வகை எண்ணலாம் என்பதாலே
பயனது யேதும் வருவதில்லை
பழியாய்ச் சேரும் இழுக்கதுவே…!

லிமரைக்கூ..

செயல்படுமுன் ஆய்ந்தறிந்திடு வழியை,
செயலதைத் தொடங்கியபின் எண்ணிக்கொள்ளலாமென்பது
பயனிலாதுதரும் இழுக்காம் பழியை…!

கிராமிய பாணியில்…

எறங்கு எறங்கு செயலுல எறங்கு,
எல்லாம் நல்லாத் தெரிஞ்சபின்னே
எறங்கு எறங்கு செயலுல எறங்கு..

வழிவகயெல்லாந் தெரிஞ்சபின்னே
துணிச்சலா செயலுல எறங்கு,
செயலச் செய்யத் தொடங்கிப்புட்டு
அப்புறம் யோசிக்கலாமுண்ணு இருந்தா
அதுவே பெரிய தப்பாப்போவும்..

அதால
எறங்கு எறங்கு செயலுல எறங்கு,
எல்லாம் நல்லாத் தெரிஞ்சபின்னே
எறங்கு எறங்கு செயலுல எறங்கு…!

 

-செண்பக ஜெகதீசன்…

தொடங்கற்க வெவ்வினையு மெள்ளற்க முற்று
மிடங்கண்ட பின்னல் லது.

-திருக்குறள் -491(இடனறிதல்)

புதுக் கவிதையில்…

தக்க இடத்தினைத்
தேர்ந்தெடுக்குமுன்
பகைவரைத்
தாக்கும் செயலைத்
தொடங்கிடாதே..

அவரை
எளியரென்றெண்ணி
எள்ளி நகையாடாதே…!

குறும்பாவில்…

பகைவரைத் தாக்க, தக்கயிடம்
தேர்ந்தெடுக்குமுன் தொடங்காதே தாக்குதலை,
எளியரென்றவரை ஏளனம்செய்யாதே…!

மரபுக் கவிதையில்…

பகைவர் தம்மைத் தாக்கிடத்தான்
பொருத்த மான இடமதையே
வகையாய்த் தெரிந்தே ஆய்ந்தறிந்து
வழிவகை நன்றாய்த் தெரிந்தபின்னே
பகையினை முடிக்கும் செயலினிலே
புகுதல் வேண்டும் தெளிவுடனே,
நகைத்திடல் வேண்டாம் எதிரியையே
நிலையில் குறைவாம் நினைவினிலே…!

லிமரைக்கூ..

தேர்ந்தெடு ஆய்ந்தறிந்தே இடத்தை
தொடங்கிடு அதன்பின் பகைவரைத்தாக்கும் செயலை,
செய்யாதேயவரை எள்ளிடும் மடத்தை…!

கிராமிய பாணியில்…

எடமறியணும் எடமறியணும்
தகுந்த எடமறியணும்,
செயல்படணும் செயல்படணும்
எடமறிஞ்சி செயல்படணும்..

எதிரியத் தாக்கப் போகுமுன்னே
அதுக்கு
ஏத்த எடமாப் பாத்துக்கணும்,
எடத்தப் பாத்துத் தெரிஞ்சபின்னே
தாக்கிற வேலயத் தொடங்கவேணும்..

எதிரிய எப்பவுமே
எளக்காரமா நெனைக்கவேண்டாம்..

எப்பவும்
எடமறியணும் எடமறியணும்
தகுந்த எடமறியணும்,
செயல்படணும் செயல்படணும்
எடமறிஞ்சி செயல்படணும்…!

 

செண்பக ஜெகதீசன்…

அரியகற் றாசற்றார் கண்ணுந் தெரியுங்கா
லின்மை யரிதே வெளிறு.

-திருக்குறள் -503(தெரிந்து தெளிதல்)

புதுக் கவிதையில்…

அரிய நூற்கள் பல
கற்றறிந்த
குற்றமற்றவர்களையும்
அணுகி ஆராய்ந்தால்,
அவர்களிடமும்
அறியாமை என்பது இல்லாதிருத்தல்
அரிதே…!

குறும்பாவில்…

பலநூல் படித்துத் தேர்ந்த
பண்பாளர்களையும் பரிசீலித்தால் அவர்களிடமும்
அறியாமை இல்லாதிருத்தல் அரிதே…!

மரபுக் கவிதையில்…

அரிய நூல்பல கற்றேதான்
அறிவில் பண்பில் சிறந்தோரெனத்
தெரிந்த சான்றோர் தம்மையுந்தான்
தீர வாய்ந்து பார்த்தாலே,
தெரியும் உண்மை ஒன்றேதான்
தூய பண்புடன் அறிவுடைய
பெரியோர் இவரிடம் அறியாமை
போகா திருத்தல் அரிதாமே…!

லிமரைக்கூ..

பலநூல்கற்ற அறிவு பெரிது
அத்துடன் பண்புநிறைந்தவரையும் ஆராய்தால்
அறியாமையவரிடம் இலாதிருத்தல் அரிது…!

கிராமிய பாணியில்…

தெரிஞ்சிக்கோ தெரிஞ்சிக்கோ
மனுசன நல்லாத் தெரிஞ்சிக்கோ,
தெளிவாகத் தெரிஞ்சுக்கோ..

பெரிய படிப்பெல்லாம் படிச்சி
பலநூல் படிச்ச அறிவாளி
நல்ல கொணமுள்ளவனாயிருந்தாலும்,
அவனயும் கொஞ்சம் ஆராஞ்சிபாத்தா
அவங்கிட்டயும்
அறியாம இல்லாமயிருக்கது பெருசுதான்..

அதால
தெரிஞ்சிக்கோ தெரிஞ்சிக்கோ
மனுசன நல்லாத் தெரிஞ்சிக்கோ,
தெளிவாகத் தெரிஞ்சுக்கோ…!

 

செண்பக ஜெகதீசன்

இதனை யிதனா லிவன்முடிக்கு மென்றாய்ந்
ததனை யவன்கண் விடல்.

-திருக்குறள் -517  (தெரிந்து வினையாடல்)

புதுக் கவிதையில்…

இவ்வினையை
இவ்வழியில்
இவன்
பழுதின்றிச் செய்வான்
என்பதைப்
பகுத்தாராய்ந்து அறிந்தபின்னே
அவனிடம் ஒப்படைக்கவேண்டும்
அச்செயலை…!

குறும்பாவில்…

செயல் கருவி செயல்படுவோன்
மூன்றையும் பகுத்தாராய்ந்து அறிந்தபின்னே,
அவனிடம் ஒப்படைக்கவேண்டும் செயல்பட…!

மரபுக் கவிதையில்…

செய்யும் செயலின் தரமறிந்து
சேர்க்கும் கருவி தனையறிந்து,
செய்வோன் தனது திறமறிந்து
சேர்த்து மூன்றையும் ஆராய்ந்து,
மெய்யதை நன்றாய் முழுதுணர்ந்து
முடிவு செய்த பின்னர்தான்
செய்யும் செயலினைத் தொடங்கிடவே
சேர்க்க வேண்டும் அவனிடமே…!

லிமரைக்கூ..

வினைவிவரங்கள் முதலில் எடுத்துவிடு
செயல் கருவி செய்பவன் தன்மை மூன்றையுமே,
ஆராய்ந்தறிந்து செயல்படக் கொடுத்துவிடு…!

கிராமிய பாணியில்…

வேலகுடு வேலகுடு
விவரமறிஞ்சி வேலகுடு,
ஆள அறிஞ்சி ஆராஞ்சி
அப்புறமா வேல செய்யவுடு..

வேல விவரமறிஞ்சி
செய்யிற வழியறிஞ்சி
செய்யிறவன் தெறமயறிஞ்சி,
எல்லாத்தையும் அலசி ஆராஞ்சி
அப்புறந்தான் அவங்கிட்ட வேலய
ஒப்படைக்கணும்..

அதால
வேலகுடு வேலகுடு
விவரமறிஞ்சி வேலகுடு,
ஆள அறிஞ்சி ஆராஞ்சி
அப்புறமா வேல செய்யவுடு…!

செண்பக ஜெகதீசன்

கண்ணிற் கணிகலங் கண்ணோட்ட மஃதின்றேற்
புண்ணென் றுணரப் படும்.
-திருக்குறள் -575 (கண்ணோட்டம்)

புதுக் கவிதையில்…

அணிகலன் கண்ணுக்குக்
கண்ணோட்டம்,
அது இல்லாத
கண்ணது முகத்தில்
புண்ணெனவே கருதப்படும்…!

குறும்பாவில்…

அணிகலனாய்க் கண்ணை
அழகுபடுத்துவது கண்ணிறைந்த கண்ணோட்டமே,
அது இலாதது கருதப்படும் புண்ணெனவே…!

மரபுக் கவிதையில்…

அணிகலன் ஆயிரம் போட்டாலும்
அவற்றி லெல்லாம் சிறந்ததான
அணியாய்க் கண்ணில் கண்ணோட்டமே
அழகு படுத்திடும் அதிகமாயே,
துணிந்தே அறிஞர் சொல்லிடுவர்
தயையது இல்லாக் கண்ணதுதான்
பிணியது வந்த உடம்பிலதுவோர்
புண்ண தென்றே கருதலாமே…!

லிமரைக்கூ..

கண்ணோட்டம் உள்ளதுதான் கண்ணே
அணிகலனாயது அழகினையூட்டும் கண்ணுக்கே,
அஃதில்லாத கண்வெறும் புண்ணே…!

கிராமிய பாணியில்…

எரக்கமிருக்கணும் எரக்கமிருக்கணும்
கண்ணுல எரக்கமிருக்கணும்,
எப்பவுமே எரக்கமிருக்கணும்..
நகநட்டு எதுவும் வேண்டாம்,
கண்ணுக்கு நகையே
கண்நெறஞ்ச கண்ணோட்டந்தான்..
அது இல்லாத கண்ணயே
எல்லாரும் புண்ணுன்னுதான்
எண்ணுவாங்களே..
அதால
எரக்கமிருக்கணும் எரக்கமிருக்கணும்
கண்ணுல எரக்கமிருக்கணும்,
எப்பவுமே எரக்கமிருக்கணும்…!

செண்பக ஜெகதீசன்

உள்ளுவ தெல்லா முயர்வுள்ளல் மற்றது

தள்ளினுந் தள்ளாமை நீர்த்து.

-திருக்குறள் -596(ஊக்கமுடைமை)

 

புதுக் கவிதையில்…

 

அரசாள்வோர்

எண்ணுவதெல்லாம்

உயர்வு கருதிய எண்ணமதாய்

இருத்தல் வேண்டும்..

ஊழ்வினையால்

உயர்வது நிறைவேறாதுபோனாலும்,

உயர்வு கருதிய எண்ணமதை

விட்டுவிடக் கூடாது…!

 

குறும்பாவில்…

 

உயர்வுகருதியதாயிருக்கட்டும் எண்ணம்,

நிறைவேறாதுபோனாலும் எண்ணிய உயர்வு

நிறுத்திவிடாதே உயர்வுகருதும் எண்ணமதை…!

 

மரபுக் கவிதையில்…

 

மக்களை யாளும் மன்னனவன்

மனதில் எண்ணும் எண்ணமெல்லாம்

மிக்க உயர்வது கருதியதாய்

மிளிர வேண்டும் எப்போதுமே,

சிக்கலாய் அந்த உயர்வதுதான்

செயலில் நிறைவே றாதுபோனால்,

துக்க மேதும் கொள்ளாமல்

தொடர்ந்திட வேண்டும் உயரெண்ணமே…!

 

லிமரைக்கூ..

 

உயர்வைக் கருதியதாயிருக்கட்டும் எண்ணம்,

உயர்வது நிறைவேறாதபோதும் நடந்துகொள்

எண்ணமதைக் கைவிட்டுவிடாத வண்ணம்…!

 

கிராமிய பாணியில்…

 

விட்டிடாதே விட்டிடாதே

ஒயர்வான எண்ணமத

விட்டிடாதே கைவிட்டிடாதே..

 

நாட்டயாளுற ராசாவுக்கு

எண்ணமெல்லாம் எப்பவுமே

ஒயர்வாத்தான் இருக்கவேணும்..

 

நெனச்சபடி நடக்காமப்போனாலும்

நெனப்பு அதத்தான் மாத்தவேண்டாம்,

எப்பவுமே ஒயர்வாவே இருக்கட்டும்..

 

அதால

விட்டிடாதே விட்டிடாதே

ஒயர்வான எண்ணமத

விட்டிடாதே கைவிட்டிடாதே…!

 

…

-செண்பக ஜெகதீசன்

 

பொறியின்மை யார்க்கும் பழியன் றறிவறிந்
தாள்வினை யின்மைப் பழி.

-திருக்குறள் -618(ஆள்வினையுடைமை)

 

புதுக் கவிதையில்…

உடலுறுப்புகளில்
ஒன்றிரண்டு குறைந்தாலும்,
அதனால்
யார்க்கும் பழியில்லை..
அறியவேண்டியவற்றை
அறிந்து
முயற்சி செய்யாமலிருப்பதே
பெரும்பழியாகும்…!

குறும்பாவில்…

பழியன்று உடலுறுப்புகளின் குறை,
உற்றதறிந்து உடன்முயற்சி செய்யாமலிருத்தல்
பெரும்பழி ஆகிவிடும்…!

மரபுக் கவிதையில்…

மண்ணில் மனித வாழ்வினிலே
முற்றிலும் தேவையாம் மெய்யுறுப்புகள்
எண்ணில் ஒருசில குறைந்தாலும்
எவர்க்கு மில்லை பழியதுவே,
திண்ணமாய் அறிய வேண்டியதைத்
தெளிவா யறிந்தே செயலாற்றும்
எண்ணமே யின்றி முயலாமல்
இருப்போர்க் கதுதான் பெரும்பழியே…!

லிமரைக்கூ.. 

பழியில்லை உடலிலிருப்பினும் குறை,
அறியவேண்டியதறிந்து செயல்பட முயலாதவர்க்கு
அதுவேயாகிவிடும் பெரும்பழியாம் கறை…!

கிராமிய பாணியில்… 

மொயற்சிவேணும் மொயற்சிவேணும்
வாழ்க்கயில சோம்பலில்லா
நல்ல மொயற்சிவேணும்..
ஒடம்புலவுள்ள உறுப்புகளுல
ஒண்ணுரெண்டு கொறஞ்சாலும்
ஒருத்தருக்கும் பழியில்ல..
அறியவேண்டியத அறிஞ்சி
அதுபடியே வேலசெய்ய
மொயற்சியேதும் செய்யாதவனுக்கு
அதுவே பெரும்பழியாவிடுமே..
அதால,
மொயற்சிவேணும் மொயற்சிவேணும்
வாழ்க்கயில சோம்பலில்லா
நல்ல மொயற்சிவேணும்…!

–செண்பக ஜெகதீசன்

தூங்குக தூங்கிச் செயற்பால தூங்கற்க
தூங்காது செய்யும் வினை.

-திருக்குறள் -672(வினைசெயல் வகை)

புதுக் கவிதையில்…

செயல்படும்போது
காலம் கடத்திச்
செய்யவேண்டியதை,
அவசரப்படாமல்
காலம் கடத்தி
உரிய தருணத்தில்
செய்யவேண்டும்..

காலம் கடத்தாமல்
உடனடியாகச்
செய்யவேண்டியதைச்
செய்வதற்குக்
காலம் கடத்தித் தூங்கிடாதே…!

குறும்பாவில்…

வினைசெய்யக் காலதாமதமாய்ச் செய்யவேண்டியதைத்
தாமதித்து உரிய காலத்தில் செய்யவேண்டும்,
தாமதிக்காது செய்யவேண்டியதை உடனே செய்யவேண்டும்…!

மரபுக் கவிதையில்…

செயல்கள் செய்யும் வேளையிலே
செய்யக் காலம் தாழ்த்தியேதான்
செயல்பட வேண்டிய வினைகளிலே
செய்யத் தாமதம் காட்டிவிடு,
பயனது பெற்றிட உடனடியாய்ப்
பணியது செய்திட வேண்டியதில்
துயிலது கொள்ளும் தடையின்றி
தொடங்கிடு வினையை உடனடியே…!

லிமரைக்கூ..

செயல்படுவதில் வேண்டும் தூக்கம்,
செயலதற்குத் தாமதம் வேண்டுமெனில், இல்லையேல்
உடனேசெய் பெற்றிடவே ஆக்கம்…!

கிராமிய பாணியில்…

காலநேரம் பாத்துத்தான்
எந்த
காரியத்தயும் செய்யணும்,
கவனமாத்தான் செய்யணும்..

காலங்கடத்திச் செய்யவேண்டியத
அவசரப்படாம
காலங்கடத்திதான் செய்யணும்..

காலங்கடத்தாம
ஒடனே செய்யவேண்டியதுல
காலங்கடத்திடாத,
ஒடனே செய்யி…

தெரிஞ்சிக்கோ,
காலநேரம் பாத்துத்தான்
எந்த
காரியத்தயும் செய்யணும்,
கவனமாத்தான் செய்யணும்…!