Blog

நீயே சொல்லு!

கவிஞர் ஜவஹர்லால்

“வாடாப்பா படைத்தவனே! உன்ப டைப்பின்

வாழ்வுமுறை கண்டுமனம் மகிழ லாம்வா!

போடாப்பா அத்திசையில் கொஞ்சம்; சற்றுப்

பொறுத்துப்பார்! நடையோரம் கிழிந்து போன

நாடாவைச் சிற்றாடை என்னச் சுற்றி

நடைபயிலும் ‘அரைவயிற்றைப்‘ பார்த்தா யாநீ!

தாடாப்பா உன்கரத்தை; தயங்கா தேநீ!

தள்ளுகொஞ்சம் பள்ளத்தில் விழப்போ கின்றாய்!

பள்ளத்தைத் தாண்டப்பா; இங்கே என்ன

பள்ளமென்றா கேட்கின்றாய்? அடடா இஃதைப்

பள்ளமென்றா சொன்னோமிங் குறைவோர் கேட்பின்

பதைத்துமனங் குமுறிடுவார்; குளிக்க உண்ண

நல்லதென அன்னவர்கள் போற்று கின்ற

நனிசுவைநீர் இதுதான்நீ அறிந்து கொள்வாய்;

நில்லப்பா! ஏன்மூக்கைப் பிடித்தாய்? நாற்றம்

நினக்கொத்து வரவிலையோ? மேலே போ!போ!

‘ஈதென்ன திரைச்சீலை?’ என்கின் றாயா?

இதுதானுன் படைப்புக்கள் பல்லோர் வாழும்

தீதில்லாப் பேரில்லம்; வேண்டும் போது

தெருத்தாண்டி இடந்தாண்டி அமைத்தற் கேற்பத்

தோதான துணிவீடு; உள்ளே கொஞ்சம்

துணிவோடு நுழையப்பா! தோலை என்பின்

மீதாகப் போர்த்ததுபோல் இருப்ப வள்தான்

வீட்டுக்குப் பேரரசி! பேருக் குத்தான்;

அய்யய்யோ என்றகுரல் கேட்கு தாப்பா!

அடடேநீ ஏனப்பா ஓடு கின்றாய்?

மெய்யெல்லாம் புண்ணாக வெளுத்து கின்ற

‘மேலோனும்‘ அவன்கையில் மத்த ளம்போல்

மெய்சோர அடிவாங்கும் பெண்ணும் உன்றன்

மேன்மையினா லுயிர்பெற்ற பொருள்தா மப்பா!

பொய்யில்லை எண்ணிப்பார்; இந்தக் கோலம்

போற்றிவளர்த் திடவாநீ படைத்தாய்? சொல்லு!

தெருமுனையின் சிறுவீட்டைப் பாராய்; அங்கே

சிரிக்கின்ற தாரென்றா வினவு கின்றாய்?

வருவண்டை இதழ்வீசி அழைத்துக் கண்ணின்

வலைதன்னிற் பிணைத்திட்டு ‘மேனி‘ காட்டித்

தருபொருளைக் கொண்டுதினம் வாழு மந்தத்

தண்மலரும் உன்படைப்பே; அவள்தான் அந்தோ

வருகின்றா ளுனைநோக்கி; விரைந்து வா!வா!

வலைதன்னி லுனையுமவள் வீழ்த்தப் பார்ப்பாள்.

அதற்குள்ளா சலிக்கின்றாய்? அறத்தால் வாழும்

அருமைமிகும் உன்படைப்பைக் காண வா!வா!

புதர்க்குள்ளே பதுங்குகின்ற முயலைப் போலப்

பூமியிலே வாழ்கின்ற நல்லோ ரைப்பார்!

இதற்கில்லை அதற்கில்லை எதற்கு மில்லை;

என்றங்கே இல்லையெனும் பாட்டே கேட்கும்;

எதற்கிந்த நிலையென்றா எனைக்கேட் கின்றாய்?

என்னப்பா படைத்தவனே! நீயே சொல்லு!

April 10, 2017
தென்றல் ஏங்கும் அழகி

ராஜகவி ராகில்

கடிகார இரு முட்களும் முத்தமிடும் நள்ளிரவு நேரம்
நித்திரை என்னை ஆசீர்வதிக்கத் தயங்கியது
‘செல்போன்’ சிணுங்கியது
”ஹலோ ” என்றேன்
”உன்
கண்கள் தருவாயா
என்னை
நான் பார்ப்பதற்கு ?”

நீ ஒரு கவிதை சிந்திக் குரல் நிறுத்தினாய் .

உன் காதலை என் இதயம் கண்டதிலிருந்து
நான் தேனாக வடிந்து கொண்டிருந்தேன் .

ஒரு விடுமுறை நாளில் என் காரியாலயம்
வந்தாய் நீ !

‘என் வயதை நீதான்
எனக்கு ஞாபகமூட்டினாய் .
என் பருவம் தரித்து நிற்கிறது
உன்னைச் சுமந்துகொள்வதற்காக .
என் நரம்புகள் வயலின் தந்திகளாகி விட்டன
நீ வாசிப்பதற்காக.

உன் பார்வை பட்டதும்
ரோஜாவாக மாறுகிறேன் .
உன் குரல் கேட்டதும்
மின் குமிழாக எரிகிறேன் நான் .
ஏன்….ஏன்…?

நீ விடை தரவா !
விடையாக வா ?’

எழுத்துக்களால் நறுமணம் தந்து சென்றாய் நீ .

உன் சுவாசம் கிடைக்காதா என
தென்றலே ஏங்கும் அழகி நீ .

நீ பார்வைகளால் நெருங்கினாய்
வார்த்தைகளால் என்னை நெருக்கினாய் .
எழுத்துக்களால் என்னை நிறைத்தாய் .

”நீ எனக்குத் தந்த நறுமணம்
என் உயிர் வரை மணம் வீசுகிறது” என
என்னை உன்னிடம் அனுப்பினேன் .

நீ என் இதயத்தில் கவிதைகள் வளர்த்தாய் .
என் காதல் மிக அழகானது .

விடியல் நேரத்தில் என் நித்திரை கலைப்பாய்
உன் கவிதையால் .

‘என் விடியல்
உன்னிடம் இருக்கிறது
நீ விழித்தால்தான்
நான்
எழுந்து கொள்வேன் .” என்பாய் .

இப்படித்தான் இன்றும் நள்ளிரவில்
நீ என்னைக் கவிதையால் அழகுபடுத்தினாய் .

அடுத்த பொழுதில் நீ என்னோடு
பூங்காவில் வசித்தாய்.

”பேசு ” என்றேன் .
”உன்னோடு வசிக்கின்ற வினாடிகள் மிகவும் சுவையானவை
என்னைச் சுவைக்கவிடு !”என்றாய் நீ .

”………………………..”
நான் உன் மவுனம் ரசித்தேன் .
உதிர்ந்தன சில நிமிடங்கள் .

”நான் ஒரு கவிதை சொல்லட்டுமா ?” என்றேன் .
என்னை ஆச்சரியமாகப் பார்த்தாய் நீ .

‘இம் ….” என்றாய் .

”நீ
பாத்திரமாக இருந்தாய்
நான்
வந்து நிறைத்தேன்
பாலாக !”

நீ எனக்கு முதல் முறையாக முத்தம் தந்தாய்.
நான் சொன்னேன்
”கவிஞனாக இருக்கவே ஆசைப்படுகிறேன் ” என்று !

April 10, 2017
இளமையின் கேள்வி

ரா.பார்த்தசாரதி

என் இளமையின் கேள்விக்கு என்ன பதில்

அழகிய காதல் தேவதையே நீயோ என் எதிரில்,

என் தேவைகள் குறைவாய் இருந்திடுமே

நின் அழகே என் மனத்தைக் கவர்ந்திடுமே !

நீ ஆயிரத்தில் ஒருத்தி என்பதை நானறிவேன்

என் ஒவ்வொரு அணுவின் உணர்வும் சொல்லிடுதே

உன் எழிலை என் மனம் சொல்லிடாதா

காலம் கடந்தாலும், நம்மை வாழ வைத்திடாதா !

காதலிக்கும் போது அவசரம் ஆகுமா

பூத்து குலுங்கும் விழிகள் காத்திருக்குமா,

காதல் என்பது இரு விழிகளின் நேசமா

அதுவே அவர்கள் கண்ட காதல் தேசமா !

காதலுக்கு பொருள் விளங்காமல் தவித்தேனே

பூமழை மேனியில் பொழிவதைக் கண்டேனே

காதலின் பார்வை புதிரா ! புதினமா !

என் நெஞ்சை சுற்றிவரும் ராட்டினமா !

தாமரை இதழ் போன்ற உன் வதனமே

உன் முகம் நீரில் தெரியும் சந்திர பிம்பமே

காதலில் தாமதம் செய்து என் பொறுமையை சோதிப்பாயா

தாமதம் செய்யாமல் என்னை என்றும் மகிழ்விப்பாயா !

April 10, 2017
நலம் .. நலமறிய ஆவல் – (51)

நிர்மலா ராகவன்

கர்வமும் காலணியும்

கேள்வி: குள்ளமான ஒருவர் குதிகால் மிக உயரமாக அமைந்த காலணியை அணிந்தால் என்ன ஆகும்?

பதில்: எல்லாரையும்விட உயர்ந்திருக்கிறோம் என்ற பெருமை எழும். ஆனால் அது நிலைக்காது. அவர் சீக்கிரமே விழக்கூடும்.

அந்தக் காலணியைப்போல்தான் கர்வமும்.

பதவியால் வரும் கர்வம்

தாழ்மையான நிலைமையில் இருந்த ஒருவருக்கு எப்படியாவது பிறர் தன்னை மதிக்கச் செய்யவேண்டும் என்ற ஆத்திரம். எப்படியோ ஒரு சங்கத்தின் தலைமைப் பதவியைப் பிடித்தார். எல்லாரும் `தலைவரே’ என்றுதான் அவரை அழைக்கவேண்டும் என்ற நிபந்தனை வேறு!

`சாதித்துவிட்டோம்!’ என்ற அகந்தை அவர் கண்ணை மறைக்க, தன்னுடன் பழகியவர்கள் எல்லாருமே தன்னைவிடத் தாழ்ந்தவர்கள்தாம் என்பதுபோல் நடக்கத் தொடங்கினார். அச்சத்தாலோ, அல்லது தலைவரைவிட நாம் தாழ்ந்தவர்கள்தாமே என்ற மனப்பான்மையாலோ வாய்திறவாது பின்தொடர்ந்தவர்களுக்கு சிறப்புச் சலுகைகள் அளிக்கப்பட்டது.

அபூர்வமாக, தன்னம்பிக்கையுடன் எதிர்த்தவரை பேச்சாலும் செய்கையாலும் வீழ்த்தினார்.

இப்படியே சில காலம் சென்றது. அவரது போக்கைச் சகிக்க முடியாது, ஒவ்வொருவராக விலக, சற்று பயம் ஏற்பட்டது. தன் போக்கை சிறிதே மாற்றிக்கொண்டு, அவர்களை அழைத்து மிக மிக இனிமையாகப் பேசினார்.

எல்லா மனிதர்களும் எப்போதுமே முட்டாள்களா, என்ன! ஒரு முறை அவரால் பாதிக்கப்பட்டவர்கள் அவரை எக்காலத்திலும் நம்பத் தயாராக இல்லை. மிதப்பாக இருந்தவர் சுருங்கிப்போனார். பதவி பறிபோக, யாரும் அவரை மதிக்கவில்லை. ஓங்காரக் குரல் மெலிந்தது, உருவத்தைப்போல.

நிறைய வாழ்த்து அட்டைகள்!

`நான் அரச பரம்பரையில் வந்தவள்!’ என்று பெருமையுடன் சொல்லிக்கொண்ட ஆசிரியை ஒருத்தி எங்கள் தலைமை ஆசிரியையாக நியமிக்கப்பட்டாள்.

பள்ளி மாணவர்கள் எல்லாரும் கூடும்போது, ஓரங்குல பருமனான(!) நீண்ட கழியை எடுத்துக்கொண்டு குறுக்கேயும் நெடுக்கேயும் நடப்பாள். அதிகாரம் செலுத்துகிறாளாம்! `Walking Tall!’ என்று கேலியாக ஆசிரியைகள் சிரித்தது அவளுக்குத் தெரிந்திருக்க நியாயமில்லை.

பண்டிகையின்போது, “எனக்கு இந்த வருடம் எவ்வளவு வாழ்த்து அட்டைகள் வந்திருக்கிறது, தெரியுமா!’ என்று என்னிடம் பெருமை பேசினாள்.

நான் சும்மா தலையாட்டி வைத்தேன். `நீ பதவி விட்டு விலகினால், எத்தனை வரும் என்று யோசிக்க மறந்துவிட்டாயே!’ என்று நினைத்துக்கொண்டேன்.

இம்மாதிரி குறுகிய காலம் பதவி வகிப்பவர்கள் பிறரை அவமரியாதையாக நடத்திவிட்டு, அதன்பின் அவர்கள் தங்களை மதிப்பதில்லையே என்று அவமானமோ, ஆத்திரமோ அடைவது என்ன நியாயம்?

செல்லத்தால் கர்வம்

பதவி என்றுதான் இல்லை, ஒரே குடும்பத்தில் மிக அதிகமாகச் செல்லம் கொடுத்து வளர்க்கப்படும் குழந்தைக்கும் கர்வம் எழுகிறது.

மூன்று ஆண்குழந்தைகளுக்குப்பின், பல வருடங்கள் கழித்துப் பிறந்தவள் ரூபா. பெற்றோர் மட்டுமின்றி, மூத்த அண்ணனுக்கும் செல்லக் குழந்தை ஆனாள்.

ஒருமுறை, அண்ணன் நடந்துவரும் வழியில் வேண்டுமென்றே காலை நீட்ட, அவன் தடுக்கி விழப்போனான். “ரூபா!” என்று அவன் இரைய, “நீ பார்த்து நடந்திருக்கவேண்டும்!” என்று தந்தை அருமை மகளுக்குப் பரிந்ததோடு நில்லாமல், அவனைத் திட்டினார்.

என்ன தவறு செய்தாலும் யாரும் கண்டிக்காததால், `தனக்கு நிகர் யாருமில்லை!’ என்ற கர்வம் ரூபாவிற்கு மேலோங்கியது. அருமை அண்ணனுக்கும் அவளைப் பிடிக்காமல் போயிற்று.

பெரியவர்களையும் எதிர்த்துப் பேசும்போது, தாய் மெல்ல விழித்துக்கொண்டாள்.

அடுத்த முறை அவள் பெரியவர்களை மரியாதைக்குறைவாகப் பேசியபோது, கன்னத்தில் அறை விழுந்தது.

பத்து வயதான அச்சிறுமி தந்தையைப் பார்த்தாள் — தனக்கு ஆதரவாக ஏதாவது சொல்வாரென்று எதிர்பார்த்து. அவரோ முகத்தைத் திருப்பிக்கொண்டார், `நடந்தது எதையும் நான் காணவில்லை,’ என்பதுபோல். அவளுடைய நடத்தை அவருக்கும் அதிருப்தியை விளைவித்திருந்தது.

தான் இப்படியே இருந்தால் அனைவருக்கும் தன்னைப் பிடிக்காமல் போய்விடும் என்று புரிந்துகொண்டாள் ரூபா. `ஏன் இப்படி ஆனோம்?’ என்று ஆராயத் தெரியாவிட்டாலும், இது தவறு என்றவரை புரிந்தது. குணம் மாறியது.

வித்யா கர்வம்

ஒரு சங்கீத வித்வான் தன்னுடன் வயலின் வாசித்தவரின் வாசிப்பு திருப்திகரமாக இல்லையென்று தன் வாத்தியத்தாலேயே அவரது தலையில் ஓங்கி அடித்தாராம்! இதைப் பார்த்த என் தாயார் அங்கலாய்ப்புடன் கூறினார்: “அதற்குப்பின் எந்த ஆணும் அவருடன் ஒரே மேடையில் உட்காரச் சம்மதிக்கவில்லை!”

ஒருவர் தான் மேதை என்று அதே துறையிலிருக்கும் பிறரை அவமரியாதையாக நடத்தினால், நாளடைவில் மற்ற கலைஞர்கள் மட்டுமின்றி, கலையும் அவரை விட்டுப்போய்விடும்.

அடக்கம் அமரருள் உய்க்குமோ, என்னவோ, நாம் அடக்கமாக இல்லாவிட்டால், வாழ்க்கை நம்மை அடக்கிவிடும்.

அடக்கம் என்பது நம் சுயமரியாதையை விட்டுக்கொடுப்பது என்பதாகாது. பொறாமை கொண்டு, பிறர் நம்மைத் தாக்க முயல்கையில், அவர்களை எதிர்ப்பதற்காக நம்மைப்பற்றிச் சற்றுப் பெருமையாகப் பேசிக் காட்டலாம். ஏனெனில், அவர்களுக்கு அம்மொழிதான் புரியும்.

எப்படி போதிப்பது?

உங்கள் குடும்பத்தில் ஒரு குழந்தை பல கலைகளிலும் சிறப்பாக இருக்கிறான் என்று வைத்துக்கொள்வோம். அவன் முன்னிலையில் அவனைப்பற்றிப் பிறரிடம் பெருமையாகப் பேசுவது வீண் அகம்பாவத்தைத்தான் வளர்க்கும். புகழ்ச்சியை நம்பி வீழ்ந்தவர்கள் பலர்.

மாறாக, தனிமையில், `நீ கெட்டிக்காரன். சுறுசுறுப்பானவன். உனக்கே தெரியும். உன் திறமைகளை யாராவது புகழ்ந்தால், `நன்றி!’ என்று சொல்லிவிட்டுப் போய்க்கொண்டே இரு. அதைப்பற்றி அதிகம் யோசிக்காதே. அப்புறம் சிந்திக்கும் திறன், விவேகம் எல்லாம் குறைந்துவிடும். தலைக்கனம் வந்துவிடும்,’ என்று சொல்லி வளருங்கள். தன்னம்பிக்கை அதிகரிக்க, மேலும் பலவற்றில் பிரகாசிப்பான்.

கனவே சுகம்

சிலர் ஒரு காரியத்தைச் செய்யும்போதே அதைப்பற்றிப் பெருமையாகப் பேசுவார்கள். இவர்கள் கனவிலேயே இன்பம் காண்பவர்கள். சாதிப்பது அப்படி ஒன்றும் பெரிதாக இருக்காது.

காரியத்தைச் செவ்வனே செய்து முடிப்பதற்குள் அதைப்பற்றிப் பிறருடன் பேசினால், அது நல்லபடியாக முடிவது ஏது!

சிறப்பான வெற்றி அடைவேன்!

ஓர் ஆங்கிலப் பத்திரிகையில் `சிறுகதைப்போட்டி’ என்று அறிவித்திருந்தார்கள். பரிசுகள் தங்கத்தாலான கைகடிகாரங்கள். எனக்கு இரண்டாவதாக இருந்ததைப் பிடித்தது. `நான் இதைப் பெறப்போகிறேன்!’ என்று நிச்சயித்துக்கொண்டேன்.

அதற்கு முந்திய வருடம் அப்போட்டியில் கலந்துகொண்டிருந்தேன். பிரசுரத்துக்கு ஏற்றதாகக்கூட என் கதை தேர்வு செய்யப்படவில்லை. அயராமல், `அடுத்த வருடம் நிச்சயம் பரிசு பெறுவேன்!’ என்றேன் என் குடும்பத்தினரிடம்.

கர்வமோ, அசட்டுத் தைரியமோ இல்லை. உறுதியாக ஒன்று கிடைக்குமென்று நம்பினால், அந்த நம்பிக்கையே நம்மை வழிநடத்தும். வாரத்தில் நான்கு நாட்களாவது அமெரிக்க வாசகசாலைக்குச் சென்று, கதைகளை எழுதும் விதங்களை விரிவாக விளக்கும் பத்திரிகைகளைப் படித்தேன்.

அரைமணி நேரத்தில் ஒரு கதை எழுதி, அதை அப்படியே விட்டுவிட்டு, சில நாட்கள் கழித்து திருத்தி அனுப்பினேன்.

நான் விரும்பிய கடிகாரமே கிடைத்தது. விரும்பியதை அணியும் ஆசை இருக்கவில்லை. பிறரது பாராட்டோ, பத்திரிகை செய்தியோ பெரிதாகப் படவில்லை. ஆங்கிலத்திலும் நிறைய எழுத வேண்டும், எழுத முடியும் என்ற நம்பிக்கையே பெருமகிழ்ச்சி ஊட்டுவதாக இருந்தது.

நமக்குப் பிடித்ததை நம்மால் இயன்றவாறு முனைப்புடன் செய்தால் வெற்றி கிடைப்பதை யாரால் தடுக்க முடியும்?

ஆனால், `சாதித்துவிட்டேன்!’ என்று கர்வப்பட்டால் அத்துடனேயே திருப்தி அடைந்துவிடுகிறோம். அதற்குமேல் பெரிய வெற்றி எதுவும் கிடைக்காது.

ஒரு மலை ஏறிவிட்டீர்களா? அடுத்து எந்த மலை என்று யோசியுங்கள்.

தொடருவோம்

April 10, 2017
கற்றல் ஒரு ஆற்றல் 73
க. பாலசுப்பிரமணியன்

அறிவுசால் சமுதாயமும் கற்றலும்

அறிவுசால் சமுதாயத்தைப் பற்றியும், அதன் வளர்ச்சி, நோக்கங்கள் மற்றும் அதன் தாக்கங்கள் பற்றியும் உலகளாவிய கருத்துக்கள விவாத மேடைகளிலும் அரங்கங்களிலும் மற்றும் அறிவியல், தொழில் வளர்ச்சி கருத்துக்கணிப்புக்களிலும் இடம் பெற்று வருகின்றன. கணினியின் வளர்ச்சியாலும் மற்றும் தொலைபேசித் தொழில் நுட்பங்களின் எதிர்பாராத உலகளாவிய வளர்ச்சிகளாலும் தகவல் பரிமாற்றங்களும் அதன் வாயிலாக கற்றலில் தாக்கங்களாலும் ஏற்பட்டுள்ள மாற்றங்கள் அதிசயத்தக்கவையாக அமைந்துள்ளன. இந்தத் தாக்கங்கள் இன்றய காலத்தில் ஒரு குழந்தையின் பள்ளிவருகைக்கு முன்னமேயே அவர்களின் கற்றலின் போக்கை நிர்ணயித்து விடுகின்றன. பல வீடுகளில் இரண்டு மூன்று ஆண்டுகளே அடைந்துள்ள குழந்தைகள் கணினியிலும் அலைபேசிகளிலும் தன்னம்பிக்கையுடனும், திறனுடனும் உறவாடுவதைப் பார்க்கும் பொழுது மாற்றங்களின் தாக்கங்களின் வேகங்கள் நம்மை வியக்க வைக்கின்றன.

இதை பற்றி தனது கருத்தை பீட்டர் டிரக்கர் என்ற ஒரு உலக பேராண்மைத்திறன் அறிவியல் மேதை இவ்வாறு கூறுகின்றார் :

“இனி வரும் நாட்களில் “ஏழை நாடுகள்” என்பவை அவைகளுடைய பொருளாதார இயலாமையையும் வறட்சியையும் வைத்து நிர்ணயிக்கப் படாது. ஒரு நாட்டின் “அறிவுத்திறன்களையும்’ அறிவுசால் சமுதாயத்தில் ‘அவர்களின் பேராண்மையை வைத்து மட்டுமே நிர்ணயிக்கப்படும்.” (The knowledge society will inevitably become far more competitive than any society we have yet known for the simple reason that with knowledge being universally accessible there are no excuses for nonperformance. There will be no poor countries. There will only be ignorant countries. Peter Drucker)

இந்தக் கருத்து எவ்வாறு ஒவ்வொரு நாடும் தன்னுடைய இளைய சமுதாயத்தை வரும் காலத்திற்குத் தேவையான நாட்டு வளர்ச்சிக்குத் தயாராக்க வேண்டும் என்பதைக் கோடிட்டுக் காட்டுகின்றது.

இந்த அறிவுசால் சமுதாயத்தின் குணாதிசயங்கள் என்ன? அது எவ்வாறு கற்றலையும் அதன் தலைவிதியையும் நிர்ணயிக்க உள்ளது?

யுனெஸ்கோ என்ற உலக அமைப்பின் பல கருத்துக் கணிப்புக்களில் மற்றும் ஆய்வு வெளிச்சங்களில் காணப்பட்ட கருத்துக்கள் இவை :
1. எல்லையின்மை (Borderlessness)
2. வேகமான முன்னேற்றமும் ஆதிக்கமும் (Speed of change and its universality)
3. வெற்றி தோல்விகளுக்கு அப்பாற்பட்ட ஆளுமை (Access beyond success and failure)
4. சமுதாய தொழில் ஆதிக்கங்களில் எதிர்பாராத மாற்றங்கள் (unforeseen changes in social and industrial architecture)
இதனால் “அறிவு” செல்வப்பெருக்கிற்க்கான மூலதனமாகவும் இயந்திரமாகவும் ஆகிவிட்டதாக உலக பொருளாதார நிபுணர்கள் கருத்துத் தெரிவித்துள்ளனர். “சிஸ்கோ” என்ற ஒரு பெரிய நிறுவனத்தின் முன்னாள் தலைவர் ஒரு மேடையில் பேசுகையில் “அறிவுசால் சமுதாயத்தில் பெரிய நிறுவனங்கள் சிறிய நிறுவனங்களை வீழ்த்தாது. வேகமாக கற்கும் நிறுவனங்கள் மெதுவாகக் கற்கும் நிறுவனங்களை வீழ்த்தும்” என்று கூறினார். (In the Knowledge society, the big will not beat the small, the faster will beat the slower John Chambers- Former CEO, Cisco)

இந்த அறிவு மற்றும் தகவல்களின் வேகங்கள் பல புராதனமான மற்றும் நிரந்தரமற்ற அறிவு மாடங்களைத் தரைமட்டமாக்கிக் கொண்டிருக்கின்றன. பழைய தகவல்கள், அவற்றின் மூலம் வளர்க்கப்பட்ட நுண்ணறிவுகள், அவற்றின் திறன்கள் தேவையற்றனவாகவும் காலத்திற்கு உகந்ததாக இன்றியும் அமைந்து கொண்டிருக்கின்றன. இதனால் பள்ளிகளிலும் கல்லூரிகளிலும் கற்றுக்கொள்ளப்படும் பாடத்திட்டங்களில் உடனடி மாற்றங்களும் அடிக்கடி மாற்றங்களும் தேவையாக அமைகின்றன. தற்போது அறிவின் வாழ்க்கைக் காலம் ஒரு சில வாரங்களே என உலக சமுதாய இயல் வல்லுநர்கள் தெரிவிக்கின்றார்கள்.

இதன் காரணமாக “கற்றல்” என்பது பள்ளி மற்றும் கல்லூரி வரையமைப்புக்குள் மட்டுமின்றி அதற்க்கு வெளியேயும் நேரங்களையும் காலங்களையும் கடந்ததாக அமைகின்றது. எனவே தற்கால சமுதாயத் தேவைகளுக்கும் தொழில் மற்றும் அறிவுசால் தொழில்களின் தேவைகளுக்கும் உகந்தவாறு நம்முடைய கற்றலை பதப்படுத்திக்கொண்டும் வளமைப்படுத்திக்கொண்டும் இருக்கவேண்டிய நிர்பந்தத்தில் சமுதாயமே இருக்கின்றது. இதனால் தான் உலக அளவில் “கற்கும் சமுதாயங்கள்” (Learning communities) என்று வளரும் சமுதாயங்களை சுட்டிக்காட்டுகின்றனர்.

ஆகவே, கற்றலும் கற்றலைச் சிறப்பிக்கின்ற ஆற்றல்களும் ஒரு பள்ளி மாணவனுக்கோ அல்லது ஒரு தனிமனிதனுக்கு மட்டுமோ அன்றி ஒரு சமுதாயத்திற்க்கே அடிப்படைத் தேவையாகக் கருதப்படுகின்றது. எனவே தான் பள்ளிகளிலும் கல்லூரிகளிலும் பாடத் திட்டங்களும் கற்பிக்கும் முறைகளும் நிகழ்காலத்தை மனதில் கொண்டு மட்டுமின்றி வருங்காலத்துத் திறன்களை நினைவில் வைத்துக்கொண்டும் அமைக்கப்படுகின்றது. ஆயின் இந்தியாவைப் பொறுத்தவரை இந்த விழிப்புணர்வு மிகவும் குறைந்த நிலையில் காணப்படுகின்றது. இந்தப் பயணத்தில் ஆசிரியர்களின் பங்கு மிக முக்கியமானது. ஏனெனில் இந்தக் கற்றல் பயணத்தில் ஆசிரியர்கள் முன்னோடிகளாக இருந்து வழிகாட்டாவிட்டால் அதன்பலன்கள் மாணவர்களைச் சென்று அடைவதில்லை. ஆகவே பல நாடுகளில் ஆசிரியர்களை கற்றலில் “பங்குதாரர்களாக” (Co-learners) கருதுகின்றனர்

ஆகவே ஆசிரியர்களைப் பொறுத்தவரை அவர்களுடைய முந்திய படிப்புகளும் பட்டங்களும் தொழிலுக்கு ஒரு முகாந்திரமாக அமைந்தாலும் “தொடர் கற்றல்” தொழில் தர்மத்திற்கு அடிப்படையானதாகத் தென்படுகின்றது. இந்தத் “தொடர் கற்றலுக்கு ” எவ்வளவுக்கெவ்வளவு அரசும் நிறுவனங்களும் உதவ வேண்டுமோ அதை விட கற்றலுக்கான ஆர்வமும் வேட்கையும் ஆசிரியர்களிடம் அதிகமாகத் தென்படவேண்டும்.

(தொடரும்)
April 10, 2017
குறளின் கதிர்களாய்…(163)

–செண்பக ஜெகதீசன்…

அறிவற்றங் காக்குங் கருவி செறுவார்க்கு

முள்ளழிக்க லாகா வரண்.

       –திருக்குறள் –421(அறிவுடைமை)

புதுக் கவிதையில்…

அரசனுக்கு அறிவு

அழிவு வராமல்

காக்கும் கருவி..

அதுவே

பகைவர் உட்புகுந்து

அழிக்கவியலா

அரணுமாகும்…!

குறும்பாவில்…

அழிவு நேராமல் அரசனைக்

காக்கும் கருவியாம் அறிவு,

அழிக்கமுடியா அரணாகும் எதிரிக்கு…!

மரபுக் கவிதையில்…

நாட்டை யாண்டிடும் மன்னவர்க்கு

   நலிவு யேதும் வாராமல்

கூட்டைப் போலப் பாதுகாக்கும்

   கருவி யாகும் அறிவென்பது,

கேட்டைக் கொணரும் பகைவரெலாம்

  கூடியு மழிக்க வியலாத

கோட்டை யாகும் அறிவெனவே

  கொண்டிடு நீயும் கருத்தினிலே…!

லிமரைக்கூ..

அழிவின்றி ஆண்டிடுவான் நாட்டை

அறிவுக்கருவி துணைகொண்டே, ஆகுமது

எதிரிக்கு அழிக்கவியலாக் கோட்டை…!

கிராமிய பாணியில்…

அறிவுவேணும் அறிவுவேணும்

அரசனுக்கு நல்ல அறிவுவேணும்,

அதுதானே அழிவுவராம

அவனக்காக்கும் கருவியாவும்..

அறிவுவேணும் அறிவுவேணும்

அரசனுக்கு நல்ல அறிவுவேணும்,

அதுதானே அவன

அழிக்கவாற எதிரியாரும்

ஒடைக்கமுடியாத கோட்டயாவும்..

அதால,

அறிவுவேணும் அறிவுவேணும்

அரசனுக்கு நல்ல அறிவுவேணும்…!

–செண்பக ஜெகதீசன்…

April 10, 2017
மரமேறிகள்!

-தமிழ்த்தேனீ

தென்னை மரம் ஏறுபரை அழைத்தேன் தேங்காய்ப் பறிக்க. ஐந்து முறை அழைத்தும் வருகிறேன்…வருகிறேன் என்று சொல்லியே ஏமாற்றிக் கொண்டிருந்தார். ஆறாவது முறையாக வந்தார். ஏம்பா வரேன்னு சொல்லிட்டு வரமாட்டேங்கற, அதனாலே உனக்காகக் காத்திருந்து காத்திருந்து என் வேலையெல்லாம் தள்ளிப் போயிட்டே இருக்கே, ஏன் இப்பிடி செய்யறீங்க, இன்னிக்கு வரேன் அல்லது இன்னிக்கு முடியாது நாளைக்கு வரேன்னு சொன்னா நாங்களும் எங்க வேலையைப் பாப்போமில்ல, உனக்கு நான் கொடுக்கும் பணத்தில் ஏதேனும் குறை இருந்தா சொல்லு என்றேன்.

அதெல்லாம் இல்லே சார். நீங்க பணமும் குடுக்கறீங்க சாப்பாடும் போடறீங்க தண்ணீர் வேணுமான்னு கேட்டுக் குடுக்கறீங்க எங்க தொழில்லே இருக்கற கஷ்டத்தைப் புரிஞ்சவங்க நீங்க. என்று தலையைச் சொறிந்தார் அவர், இப்ப புரியுதுப்பா சரியா பணம் குடுக்காதவங்க வீட்டுக்குதான் சொன்ன நேரத்துக்கு போவீங்களா என்றேன் நான்.

அப்பிடியெல்லாம் இல்லீங்க நீங்க கோவிச்சுக்க மாட்டீங்க அப்பிடீங்கற தைரியம்தான் என்றார் அவர். என்னை ஏமாளின்னு நீயும் புரிஞ்சிகிட்டியா என்று சிரித்தேன் நான். அப்பிடியெல்லாம் சொல்லாதீங்க நீங்க நல்லவரு என்றார் அவர். சரி என் பிள்ளை வெளிநாட்டிலேருந்து வந்திருந்தான் அவனுக்கு நம்ம வீட்டிலே காய்க்கிற இளநீரைப் பறிச்சுக் குடுத்தா ஒரு சந்தோஷம் அதுனாலேதான் கூப்பிட்டேன். அவன் வெளிநாட்டுக்கு போயிட்டான்.

ஆனா நான் எப்பிடியோ கஷ்டப்பட்டுத் தொறட்டிக் கொம்பு வெச்சு ரெண்டு இளநீரைப் பறிச்சு அவனுக்கு குடுத்தேன் என்றேன் நான். மன்னிச்சிருங்க அடுத்த முறையிலேருந்து நீங்க கூப்பிட்டா உடனே வரேன் என்றார் அவர்.

இப்படி எல்லாத் தொழில் செய்வோருமே ஒத்துக்கொண்ட நேரத்துக்கு வருவதில்லை இவர்களும் மரமேறிகளே. இவர்கள் மட்டுமல்ல நாம் எல்லோரும் மரமேறிகளே என்று தோன்றுகிறது எனக்கு. நாம் சொல்லும்போது எந்த அறிவுரையையும் ஏற்றுக் கொள்ளாதவர்கள் காதிலேயே போட்டுக் கொள்ளாதவர்கள் அவர்களுக்காய் தோன்றும் போதுதான் உணர்கிறார்கள். ஆனால் அது காலம் கடந்த உணர்வு. அப்போது நிறைய நஷ்டங்களைச் சந்திக்கிறார்கள்.

இதைவிடக் கொடுமை அந்த சாலையிலே பள்ளம் இருக்கிறது; நேற்று தடுக்கியது அதனால் பார்த்து மெதுவாக செல்லுங்கள் என்று ஒருவருக்கு அறிவுரை சொன்னேன், அன்று மாலையே அவர் வீட்டுக்கு வந்தார், சார் நீங்க இனிமே எனக்கு அட்வைஸ் பண்ணாதீங்க. நீங்க அட்வைஸ் பண்றேங்கிற பேர்லே எதையாவது சொல்றீங்க. நீங்க வாயை வெச்சீங்க நான் விழுந்தேன் என்றார். திடுக்கிட்டேன் அன்று முதல் யாருக்கும் எந்த அறிவுரையும் சொல்வதில்லை என்று முடிவெடுத்தேன்.

ஆனால் என் தீர்மானம் ப்ரசவ வைராக்கியம் போல ராமாயண வைராக்கியம் போல நீர்த்துப் போயிற்று. ப்ரசவம் ஆகும் போது பெண்கள் அந்த இடுப்பு வலி தாளாமையினால் அதுக்குக் காரணமான கணவனைச் சபிப்பார்களாம். ஆனால் குழந்தை பிறந்து அந்தக் குழந்தையின் தெய்வீக முகத்தைப் பார்த்தவுடன் குழந்தையை தன் கணவன் வந்து பார்க்கவேண்டும் என்றே ஏங்குவாளாம்–

அதைப்போல பலகாலமாக ராமாயணப் ப்ரவசனம் கேட்டும் தன் தீய வழக்கங்களை நீக்காமல் இருப்போர் தளர்ந்து வயதான காலத்திலே படுக்கையில் ஒவ்வொன்றாக அசைபோட்டு நாம் திருந்தாமல் இருந்துவிட்டோமே என்று வருத்தப் படுவார்களாம். ப்ரசவம் ப்ரவசனம் எதுவுமே பலனளிப்பதில்லை என்று உணர்ந்தேன். ஆனாலும் வருங்கால சந்ததிகள் வளமாக வாழவேண்டுமே என்னும் கவலையால் உண்மையான அக்கறையால் என் தீர்மானமும் நீர்த்துப் போகிறது.

யார் வேண்டுமானாலும் மரம் ஏறட்டும்; மரம் ஏறுபவனை எத்தனை தூரம் தாங்க முடியும் என்கிற பழமொழி இருந்தாலும் நம்மால் முடிந்த வரை தூக்கலாம். என்றும் நம்மைத் திட்டுகிறார்களே அதனால் அறிவுரை சொல்லாமல் இருந்துவிடலாம் எப்படியோ போகட்டும் என்னும் மனக் கசப்பு வந்தாலும் அதையும் தாண்டி நம்மைத் திட்டினாலும் பரவாயில்லை… ஆயிரம் பேரில் ஒருவர் மாற்றிக் கொண்டு திருந்தினால் போதும் என்கிற முடிவுக்கு வந்து என் அனுபவங்களை அதனால் கிடைத்த அறிவை அறிவுறுத்திக் கொண்டேதான் இருக்கிறேன். என்னை ஏமாளி என்று நினைப்பவர்கள் நினைக்கட்டும்.–

நானும் ஒரு மரமேறிதானே!

பின்குறிப்பு: (அடுத்த முறை தென்னை மரத்தில் ஏறுபவரைத் தொலைபேசியில் அழைத்தேன். வந்துவிடுகிறேன் சார் இந்த முறை ஏமாற்ற மாட்டேன் என்று தீர்மானமாகச் சொன்னார். ஆனால் ஐந்து முறை தொலைபேசியில் அழைக்கும் போதும் அதையேதான் சொல்கிறார் காத்திருக்கிறேன் என்று. ஆனால் இந்த முறை நானே துறட்டுக் கொம்பு வைத்துக் கொண்டு நிறையக் காய்களைப் பறித்துவிட்டேன். ஆனால் தென்னை ஓலைகளைக் கழிக்க அவரை எதிர்பார்த்து காத்திருக்கிறேன்.)

இப்படிக்கு மரமேறி.

April 10, 2017
படக்கவிதைப் போட்டி 106-இன் முடிவுகள்

-மேகலா இராமமூர்த்தி

ஓவியம்போல் காட்சியளிக்கும் இப் புகைப்படத்தை எடுத்திருக்கும் திரு. ஷேக் முகமது பாராட்டுக்குரியவர். இவ்வழகிய படத்தைப் படக்கவிதைப்போட்டிக்குப் பாங்காய்த் தேர்ந்தெடுத்துத் தந்திருக்கும் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பனும் நம் போற்றுதலுக்குரியவரே!

மங்கலமான மனைமாட்சியின் நன்கலமாம் நன்மக்கட்பேற்றைப் பெற்றிருக்கும் இப்பெற்றோர் பேறுபெற்றோரே.

கண்ணைக்கவரும் இவ்வண்ணப்புகைப்படம் கவிஞர்களின் கற்பனைத்திறனைப் பொற்புடன் திறந்துகாட்டக் கிடைத்ததோர் நல்வாய்ப்பு!

இனி, கவிதைகளுக்குச் செல்வோம்!

*****

”ஆற்றின் கரைகளை இணைப்பது கற்பாலம்; ஆண் பெண் இதயங்களை இணைப்பதோ
காதலெனும் நற்பாலம். இந்தக் காதல் பாலம் தந்த பரிசே இவ்விணையர் கரங்களில் வரமெனத் தவழும் கனிமழலை; பிரிக்கும் மதிலினும் இணைக்கும் பாலமே மேல்” என இல்லறத்தின் இனிமையை நல்ல சொல்லெடுத்துப் போற்றுகின்றது திரு. செண்பக ஜெகதீசனின் கவிதை!

பாலங்கள்…

ஆற்றின் கரைகளை
இணைப்பது பாலம்..

ஆசையில்
ஆண்பெண் இதயங்களை
இணைக்கும் பாலம்-
காதல்..

காதல் மணவாழ்வில்
ஆணும் பெண்ணும்
அகலாமல்
இணைக்கும் பாலம்-
பிள்ளை..

பிரிக்கும் மதிலைவிட,
இணைக்கும் பாலம்
மேலல்லவா…!

*****

’ஆறில்லா ஊரின் அழகு பாழ்’ என்றனர் ஆன்றோர். இன்று ஆறிருக்கின்றது ஆனால் அதில் நீரில்லை. நீரற்ற ஆற்றின்மேல் பாலம் எதற்கு? வறட்சியால் வையமே பரிதவிக்கின்றது; வருணனின் கருணைப்பார்வை புவியின்மீது படாதோ? என்று நெஞ்சுநொந்து பேசுகின்றார் திரு. சி. ஜெயபாரதன்.

நீரில்லா ஊர்

தாகமாய் உள்ளது ஒருகாலத்தில்
வேகமாய் நீரோடிய இந்தக்
கால்வாய் !
காவேரி ஆறும் இப்படி ஒருநாள்
சாவை அடையும் !
மழை பெய்து நீரோட்ட மின்றேல்
வேளாண்மை கருகி
பஞ்சம் பெருகி
பசுமை எங்கும் மங்கி
நகரம் ஒருநாள் நரக மாகும் !
பாலம் கட்டியும் இங்கே
பயனில்லை !
நீரில்லாக் கால்வாய் மேல்
பாலமா ?
ஞாலத்தில் இன்று மாந்தர்க்கு
நீர்ப்பஞ்சம் ! நீர்ப்பஞ்சம் !
நீர்ப்பஞ்சம் !
வேர் உறிஞ்ச நீரின்றி
பச்சை இலைகள் பல மஞ்சளாய்
வெளுத்துப் போயின !
இளந்தம்பதிகள்
என்ன செய்வதென் றறியாமல்
கலங்கி நிற்கிறார் !
நீரில்லா ஊர் பாழாகும் !
கருணையுள்ள
வருண பகவானே ! எமக்கோர்
வழிகாட்டு !

*****

காணிநிலம் வேண்டினார் மகாகவி பாரதி; ஆசையாய்க் கட்டிய வீட்டில் குடிபோகத் தடையாயிருக்கும் குடிநீர்ப் பஞ்சம் நீங்கவேண்டும் என்று வேண்டுகின்றார் கவிஞர் திரு. பார்த்தசாரதி. அவர் வேண்டுதல் பலித்து, அக்கனவு இல்லத்தில் அவர் குடியேறும் நாள் நனவாக வேண்டும் என நாமும் வாழ்த்துவோம்!

ஆசைக்கோர் இல்லம்

எந்திரமய வாழ்க்கை மறந்து – நான்
****இயல்பாக வாழ எனக்கொரு
தனி வீடு கட்டவேண்டும் -அதில்
****தனிமைச் சுகம் காணவேண்டும்..!

அழகின் எல்லையாக இருக்கவேணும் – அதன்
****அருகே ஆறுகுளம் அமையவேணும்
கடனில்லா வீடு கட்டவேணும் – அதில்
****கலையழகு கொஞ்சவேண்டும்..!

சொந்த உழைப்பில் விளையவேணும் – அதில்
****பந்தங்களுக்குப் பங்கில்லா நிலைவேணும்
இயற்கைச் சூழலோடு ஒன்றி – அதில்
****இன்பவுலா வரவேண்டும்..!

கண்குளிர ரசிப்பதற்கும் வாழ்ந்து – அதைக்
****கண்டுகளிப்பதற்கும் வேண்டுமொருவீடென்று
காலிமனையில் இல்லம் எழுப்ப – நெடுநாள்
****கனவோடுநான் காத்திருந்தேன்..!

காலமொரு நாள்கனிந்து வர – என்
****கனவுமதுநன வாகியதொருநாள்
நிலைக்கும் சொத்தாக இருந்தாலும் – அங்கே
****நிலையாகக் குடியேற வசதியில்லை..!

மண்ணுரிமை பெற்றுவிட்டென் – ஆனால்
****மழைக்கடவுள் அருளில்லை
நீரின்றி அமையாது உலகென – அய்யன்
****வள்ளுவன் மொழிந்ததுபோல்..!

கழனிகாடுகள் வீடுகள் குளிர்ந்திருக்க – ஆங்கே
****கனிந்தமழையின் கொடைவேண்டும்!
ஆசையாய்க் கட்டிய இல்லமதில்
****அங்கேயில்லை குடிதண்ணீர்..!

வெறிச்சோடிக் கிடக்குது எம்வீடு – மனம்
****வெதும்பிப் பார்ப்பேனவ்வப்போது
காலமாற்றத்தால் உருவாகும் கதைபோல் – அது
****கனவுவீடாக மாறித்தான்போனது..!

வருஷமொரு முறைபார்த்து வந்தேன் – இப்ப
****வயசு அறுபத்தியாறாச்சு
கட்டிய வீட்டில் குடியேற – காலமின்னும்
****எட்டியதூரத்தில் இல்லையம்மா..!

இரவானால் பறவைகள்தன் கூட்டிற்கு – அது
****இயற்கையாய்ச் செல்வதுபோல்
இருக்கும் வரையில் எண்ணங்கள் நம்மினிய
****இல்லம் நோக்கியே நகரும்..!

அன்புக்கோர் மனைவி பாசத்துக்கோர் பெண்
****பண்புக்கோர் பிள்ளையெனும்
வரிசையிலே வாழ்க்கையில் இன்னு – மொரு
****ஆசைக்கோரில்லம் எனவொன்று
இறையருளால் அனைவரும் பெறவேண்டும்..!

*****

நல்ல கவிதைகளை நம் உள்ளம் இரசிக்கத் தந்திருக்கும் கவிஞர்களுக்குப் பாராட்டுக்கள்!

அடுத்து வருவது இவ்வாரத்தின் சிறந்த கவிதையாய்த் தேர்வாகியிருப்பது…

வீடு பேறு அழகான குடும்பம் இது!
இல்லறமே நல்லறமாம்!
அன்பான மங்கை நல்லாள்!
பண்பு மிகு ஆண் மகனாம்!
மனதால் இணைந்தார்கள்!
பெற்றவர்கள் இசைவோடு
திருமணமும் முடித்தார்கள்!
அழகான வீட்டினிலே
அமைதியுடன் வசித்தார்கள்!
வீடென்ற பெயர் ஏன் வந்தது?
கவலையை விட்டதினால் வீடானதோ?
ஆணவத்தை விடும் இடம்
என்பதால் வீடானதோ?
கோபத்தை விடும் இடம்
என்பதால் வீடானதோ?
நான் என்பதை விட்டு
நாம் என்று வாழ்ந்தார்கள்!
ஆண்டவன் அருளாலே !
நல் மழலை பெற்றார்கள்!
அன்பை விதைத்தார்கள்!
ஆனந்தமாய் இருந்தார்கள்!
இசைபட வாழ்ந்தார்கள்!
ஈகை புரிந்ததினால்!
உயர்வை அடைந்தார்கள்!
ஊக்கத்துடன் உழைத்தார்கள் !
எண்ணியதை பெற்றார்கள்!
ஏழேழு பிறவியிலும் தொடரும் சொந்தமிது !
ஐயமில்லை! ஐயமில்லை!
ஒன்று பட்ட உள்ளத்தால்!
ஓங்கியது உங்கள் வாழ்க்கை!
ஔவை மொழி போல இனிக்கட்டும்!
அஃதே எங்கள் ஆசை!

ஆணவத்தைவிட்டு அன்பால் இணைந்த இணையர், இல்லறமாம் நல்லறத்தின் பயனாய்ப் பெறுகின்ற இன்மழலைக்கு ஈடேது இவ்வுலகில்?

பெருமவற்றுள் யாமறிவ தில்லை அறிவறிந்த
மக்கட்பே றல்ல பிற என்று மக்கட்பேற்றின் மாண்பைப் போற்றுகின்றார் வாழ்வியல் வலவர் வள்ளுவர்.

நன்மக்கட்பேற்றோடு முற்றுப் பெறுவதில்லை இல்வாழ்க்கை. ஈகை எனும் இனிய குணத்தால் அது மேலும் சிறக்கிறது எனும் அரிய வாழ்வியல் உண்மையை எளிமையாய்ச் சொல்லியிருக்கும் திரு. பழ. செல்வமாணிக்கத்தின் கவிதை இவ்வாரத்தின் சிறந்த கவிதையெனும் பெருமையைப் பெறுகின்றது. கவிஞருக்கு என் பாராட்டுக்கள்!

April 10, 2017
பண்பாட்டு மயக்கம்

ரா பார்த்தசாரதி

மேலை நாட்டு பிசாவும், பெர்கரும்   நாகரிக உணவானதே

   நம் சாப்பாட்டு மேசைக்கு இறங்கியது, விரும்பியசிற்றுண்டியானதே

   உடல்நலம் கெடுவதை நாம் அறியாமல் இருக்கின்றோமே

இயற்கை உணவு சிறந்தது என அறிந்தும், தவிர்க்கின்றோமே !

ஆணும்,பெண்ணும், அறிமுகத்தில் கைகுலுக்கினர்

பயமின்றி இரவு நேரங்களில் கூடிப் பேசுகின்றனர்

நகரின் மது கடையில் சேர்ந்து கும்மாளமிடுகின்றனர்

   இரவு நேர பணிகளில் ஆபாச பேச்சுக்கள் மிளிர்கின்றன !



ஒருவர்க்கொருவர் மரியாதையின்றி டா போடுதல்

கேட்டால், தெரிந்தவர், சிநேகம் என சொல்லி மழுப்புதல்

   பணத்திற்காக, பகடைக்காயாய் ஆணை ஆட்டிவித்தல்,

   நட்பா, காதலா ! என்ற நிலையிலே தடுமாறுதல் !



ஆணுக்கு நிகர் பெண் என்று நினைக்கும் பெண்

   பேதமின்றி ஆணுடையில் நடமாடும் கோலம் ,

    கண்டதே காட்சி, கவர்ச்சியான, ஆடை அலங்காரம்

    எங்கு முடியுமோ இந்த பண்பாட்டு மயக்கம் !

April 10, 2017
புதுவைப் பேராசிரியர் அ. அறிவுநம்பி மறைவு!

மு. இளங்கோவன்

புதுவைப் பல்கலைக்கழகத்தின் தமிழ்த்துறைப் பேராசிரியரும், புகழ்பெற்ற ஆய்வாளருமான முனைவர் அ. அறிவுநம்பி இன்று (09.04.2017) மாரடைப்பால் புதுச்சேரியில் இயற்கை எய்தினார். காரைக்குடியில் பிறந்த பேராசிரியர் அ. அறிவுநம்பி, காரைக்குடி அழகப்பர் கல்லூரி, மதுரை காமராசர் பல்கலைக்கழகம் ஆகியவற்றில் கல்வி பயின்றவர். மதுரை காமராசர் பல்கலைக்கழகத்தில் தமிழ் விரிவுரையாளராகப் பணியைத் தொடங்கியவர். பின்னர் புதுவைப் பல்கலைக்கழகத்தில் இணைப்பேராசிரியராக இணைந்து, பேராசிரியர், துறைத்தலைவர், புலமுதன்மையர் பொறுப்புகளை வகித்தவர். பல நூல்களையும் கட்டுரைகளையும் எழுதியுள்ளார். கல்விப்பயணமாகப் பலநாடுகளுக்குச் சென்று வந்தவர்.

இன்னும் இரண்டு மாதங்களில் பணி ஓய்வு பெற இருந்த நிலையில் அ.அறிவுநம்பி இன்று திடுமென இயற்கை எய்தியமை தமிழகத்துக் கல்வியாளர்களைப் பெரிதும் துயரத்தில் ஆழ்த்தியுள்ளது.

நாளை 10.04.2017 (திங்கள்) மாலை 4.30 மணிக்குப் புதுச்சேரி, இலாசுப்பேட்டையில் உள்ள கலைவாணி நகர் இல்லத்திலிருந்து உடல் நல்லடக்கம் செய்ய எடுத்துச்செல்லப்பட உள்ளது. பேராசிரியர்கள், மாணவர்கள் திரளாக வந்து பேராசிரியர் அ. அறிவுநம்பிக்கு அஞ்சலி செலுத்தியவாறு உள்ளனர்.

April 9, 2017
கேசவ் வண்ணம் – கிரேசி எண்ணம்

கேசவ் , மஹாகவி பாரதியாரின் ‘’குஞ்சென்றும், மூப்பென்றும் உண்டோ’’ வரிகள்தான் ‘’அக்கினிக் குஞ்சை’’ அன்னை தாலாட்டும் படம் பார்த்ததும் ஞாபகம் வந்தது….சூப்பர் கேசவ்….!

‘’காக்கைச் சிறகினை (ஏரார்ந்த) கண்ணி ,மடியிருத்தி
பூக்கச்செய் கின்றனள் பொன்குஞ்சாய்: -யாக்கை
நிறமெது வானாலும் நீலநிறக் கண்ணன்
பரமது பாகவதப் பிஞ்சு’’….!

’’அட்டைக் கரியாய் அவதார பாகவதர்,
பெட்டை யசோதையின் பாதுகாப்புத்-தொட்டிலில்
தன்நினைவு இல்லாது தாலாட்டில் தூங்கிடும்
கண்ணனை நெஞ்சே கருது’’….கிரேசி மோகன்….!

April 9, 2017

விண்வெளியில் பூமிபோல் சூழ்வளி உள்ள நீர்க்கோள் ஒன்றை விஞ்ஞானிகள் முதன்முறை கண்டுபிடித்தார்

சி. ஜெயபாரதன் B.E.(Hons) P.Eng (Nuclear) கனடா

https://youtu.be/g9pCLcZEJIw

https://youtu.be/dqABeYr-KBw

http://exoplanet.eu/

http://www.ibtimes.com/gj-1132b-first-astronomers-detect-atmosphere-around-nearby-low-mass-super-earth-2522270

++++++++++++

ஊழி முதல்வன் உட்கொளும் மூச்சில்
உப்பிடும் பிரபஞ்சக் குமிழி
உடைந்து மீளும் !
விழுங்கிய கருந்துளை வயிற்றில்
உயிர்த்தெழும் மீன்கள் !
விண்வெளி விரிய விண்ணோக்கியின்
கண்ணொளி நீண்டு செல்லும் !
நுண்ணோக்கி ஈர்ப்புக் களத்தை
ஊடுருவிக் காமிரா
கண்வழிப் புகுந்த
புதிய பூமிகள் இவை !
பரிதி மண்டலம் போல்
வெகு தொலைவில் இயங்கிச்
சுய ஒளிவீசும்
விண்மீனைச் சுற்றிவரும்
மண்ணுலகம் இவை !
ஈர்ப்பு விண்வெளியில் முதன்முறை
பூமி போல் வாயுச் சூழ்வெளி
பூண்ட அண்டக்கோள் ஒன்றைப்
கண்டுள்ளது கெப்ளர் விண்ணோக்கி !
சில்லியின் வானோக்கி மூலம்
விண்வெளி நிபுணர்
கண்ட கோள்கள் பற்பல ! ஆயினும்
இன்னும் சவால் விட்டு
கண்ணுக்குத் தெரியாது ஒளிந்த வண்ணம்
தேடிக் கிடைக்கா கோள்கள்
கோடிக் கணக்கில் !

+++++++++++++++

[click to Enlarge]

The rocky exoplanet GJ 1132b was first pinpointed in 2015 (Dana Berry)

++++++++

பூமிபோல் சூழ்வளியுள்ள நீர்க்கோள் முதன்முறைக் கண்டுபிடிப்பு

2017 ஏப்ரல் 6 ஆம் தேதி ஜெர்மன் மாக்ஸ் பிளாங்க் வானியல் ஆய்வக விஞ்ஞானிகள் பூதப்பூமி [Super-Earth GJ 1132b] ஒன்று சூழ்வெளி வாயுவுள்ள நமது பூமிபோல் இருப்பதை முதன்முறைக் கண்டுபிடித்துள்ளதாக அறிவித்துள்ளார். வாயு உள்ள குன்றிய நிறை கொண்ட அண்டக்கோள் நமது பூமிபோல் வடிவமும், நிறையும் ஒத்திருப்பதை தெரிவித்துள்ளார். அண்டவெளிக் கோளில் உயிரினம் இருப்பதற்கு இந்த புதிய கண்டுபிடிப்பு முக்கிய எட்டடி வைக்கும் என்று தெரிகிறது. மாக்ஸ் பிளாங்க் ஆய்வகத்து ஜெர்மன் விஞ்ஞானிகள் இதன் விண்மீன் [GJ 1132] காண தென்னமெரிக்கா, சில்லியில் உள்ள 2.2 மீடர் விண்ணோக்கி [ESO/MPG Telescope] பயன்படுத்தி யுள்ளார். புதிய பூதப்பூமியின் நிறை நமது பூமிபோல் 1.6 மடங்கு. அதன் ஆரம் பூமிபோல் 1.4 மடங்கு. விஞ்ஞானிகளின் தற்போதைய குறிக்கோள் : புதிய பூமியில் உயிரின வளர்ச்சிக்கு உகந்த இரசாயனப் பொருள் கலந்த சூழ்வெளிக் காற்றுள்ளதா, போதிய உயிர்வாயு ஆக்சிஜென் உள்ளதா என்று அறிவதே. புதிய கோள் [GJ 1132b] அதன் செங்குள்ளி விண்மீனை [GJ 1132] சுற்றிவரும் பாதை, நமது பூமியிலிருந்து 39 ஒளியாண்டு தூரத்தில், வேலா தென்னக விண்மீன் மந்தையில் [Southern Constellation Vela] உள்ளது.

Gliese 1132 b
PARENT STAR
EXOPLANET		List of exoplanets
Size comparison of Gliese 1132 b with Earth.
Star		Gliese 1132
Right ascension	(α)	10h 14m 51.1s
Declination	(δ)	−47° 09′ 12″
Apparent magnitude	(mV)	14.7
Distance		39 ly (12 pc)
Spectral type		M3.5D
ORBITAL ELEMENTS
Orbital period	(P)	1.6 d
PHYSICAL CHARACTERISTICS
Mass	(m)	1.6 M⊕
Radius	(r)	1.2 R⊕
Stellar flux	(F⊙)	19 ⊕
Temperature	(T)	410 K (137 °C; 278 °F) K
DISCOVERY INFORMATION
Discovery date		May 10, 2015 (announced)[1]November 12, 2015 (confirmed)[2]
Discoverer(s)		MEarth-South Array Team
Discovery method		Transit
Discovery site		Chile
Discovery status		Confirmed
OTHER DESIGNATIONS
Gliese 1132 b, Gl 1132 b, GJ 1132 b

ஒரு கோள் தனது மூலச் சூரியனைக் கடந்து செல்லும் போது, இப்போது பயன்படுத்திய விதிமுறையைப் [Radial Velocity Technique] பின்பற்றி நீர் ஆவி, மற்றும் வேறு சூழ்வெளிக் கலவைகளையும் உளவிக் கண்டுபிடித்து விடலாம். கோளம் விண்மீனுக்கு வெகு தூரத்தில் இருந்தாலும், படமெடுத்துக் கோளின் சூழ்வெளியை அறிந்து விடலாம்.

அலெக்ஸாண்டிரா லாக்வுட் [விஞ்ஞானத் தகவல் வெளியீட்டு ஆசிரியர்]

இப்போதைய பொறிநுணுக்கம் பூமியை ஒத்த கோள்களைக் உளவிக் காண இயலாது. எதிர்கால ஜேம்ஸ் வெப் விண்ணோக்கி [James Webb Space Telescope] & 30 மீடர் விண்ணோக்கி [Thirty Meter Telescope] குளிர்ந்த கோள்களைக் காணவும், அவற்றில் நீர் உள்ளதா வென்று ஆராயவும் உதவும்.

ஜெஃப்ரி பிளேக் [பேராசிரியர் பிரபஞ்சவியல் இரசாயனம் & அண்டக்கோள் விஞ்ஞானி]

நாசாவின் கெப்ளர் விண்ணோக்கி புதிய புதையல் கோள்கள் கண்டுபிடித்தது

2014 பிப்ரவரி 26 இல் நாசா தனது கெப்ளர் விண்ணோக்கியில் குறுகிய காலத்தில் பூமியைப் போலுள்ள 715 கோள்களை நமது சூரிய மண்டலத்துக்கு அப்பால், வேற்று சூரிய மண்டல விண்வெளிப் புதையலாகக் கண்டுபிடித்துள்ளது. அந்த 715 கோள்கள் தமது தனிப்பட்ட 305 வெவ்வேறு விண்மீன்களைச் சுற்றி வருகின்றன. இதுவரை நாசா 1700 [2014 பிப்ரவரி] கோள்களைக் கண்டுபிடித்துள்ளது. புதுக்கோள்களில் உயிரினம் வாழ நீரும், சூழ்வெளியும் உள்ளதா வென்று இப்போது தெரியாது. அவை குளிர்ந்த கோள்களா, சூட்டுக் கோள்களா வென்றும் தெரியாது. அவற்றில் நான்கு கோள்கள் பூமியை ஒத்த வடிவமும், விண்மீனுகளுக்கு அருகில் உயிரின வசிப்பு அரங்குகளில் [Habitable Zones] இருந்தன. 2009 ஆண்டில் ஏவப்பட்டு முதலிரண்டு ஆண்டுகளில் கெப்ளர் விண்ணோக்கி உளவிக் கண்டுபிடித்த கோள்களே இந்த 715 புதையல் கோள்கள்.

சூடான புதிய பூதக்கோளில் நீர் ஆவி இருப்பு முதன்முறை காணப் பட்டது.

நமது சூரிய மண்டலத்துக்கு அப்பால் இயங்கும் பூதக்கோள் வியாழனைப் போன்ற ஒரு பெருங்கோளில் நீர் ஆவி [Water Vapour] இருப்பு முதன்முறை கண்டுபிடிக்கப் பட்டது. காலிஃபோர்னி யாவைச் சேர்ந்த கால்டெக் ஆய்வாளார்கள், ஒரு புதுவித பொறி நுணுக்கத்தைப் பின்பற்றி, புற அண்டங்களின் சூழ்வெளி வாயுக்களை ஆராய்ந்து, நீர் இருப்பதை உளவிக் கண்டுபிடித்துள்ளது. இந்த அரிய கண்டுபிடிப்பை வெளியிட்டவர் அலெக்ஸாண்டிரா லாக்வுட் [Alexandra Lockwood] என்று அழைக்கப்படும் ஒரு பட்டப் படிப்பு மாணவி. இம்முறையப் பயன்படுத்தி அண்டக் கோளில் உள்ள மற்ற சூழ்வெளி வாயுக்களையும் அறியமுடியும்.

“இந்த இரண்டு நீர்க்கோள்கள் நமது பரிதி மண்டலக் கோள்களைப் போன்றவை அல்ல. அவை கரையில்லாத, முடிவற்ற கடல்களைக் கொண்டவை. ஆங்கே உயிரினங்கள் இருக்கலாம். ஆனால் அங்கிருப்போர் மனிதர் போல் பொறியியற் திறமை உடைய வரா என்பது தெரியாது. இந்த நீர்க்கோள்களில் உயிரின வாழ்வு, உலோகம், மின்சாரம், நெருப்பு போன்றவை இல்லாது, கடலடியில்தான் நீடிக்க முடியும். ஆயினும் அவ்விரண்டு நீல நிறக் கோள்கள், பொன்னிற விண்மீன் ஒன்றைச் சுற்றி வருவதைக் காண்பது வனப்புடன் இருக்கும். மேலும் அவற்றில் உயிரின இருப்பைக் கண்டுபிடித்த பொறிநுணுக்க அறிவுத்தரம் நம்மை வியக்க வைக்கும்.”

லீஸா கால்டநேகர் [இயக்குநர் விஞ்ஞானி மாக்ஸ் பிளாங்க் வானியல் ஆய்வுக்கூடம்]

கண்டுபிடித்த நீர்க் கோள்கள் கெப்ளர் -62e, கெப்ளர்-62f [Kepler -62e & Kepler -62f] எனப் பெயரிடப் பட்டுள்ளன. அவை கெப்ளர் -62 [Kepler -62] என்னும் விண்மீனைச் சுற்றி வருகின்றன. நீர்க்கோள் கெப்ளர் -62e திரண்ட முகில் வானைக் கொண்டது. கணனி மாடலின்படித் துருவம் வரை பூராவும் சூடான வெக்கை மயமானது [Warm and Humid]. தூரத்தில் சுற்றும் நீர்க்கோள் கெப்ளர் -62f கார்பன் டையாக்ஸைடு வாயுவை மிகுதி யாகக் கொண்டு “கிரீன்ஹௌவுஸ் விளைவால்” சூடேறி நீர்மயத்தை நீடிக்கச் செய்கிறது. இல்லையென்றால் அதன் நீர்வளம் பனியாகி ஓர் பனிக்கோளாய் மாறிப் போயிருக்கும்.”

டிமித்தர் ஸஸ்ஸெலாவ் [ஹார்வேர்டு வானியல் வல்லுநர்] [Dimitar Sasselov]

“ஆதிகாலத்துப் பூர்வீக உலகங்கள் இன்னும் கண்ணுக்குத் தெரியாமல் மறைந்து கிடக்கின்றன.”

ரே வில்லார்டு & அடால்ஃப் ஷாலர் (Ray Villard & Adolf Schaller)

“இன்னும் பத்தாண்டுகளுக்குள் மற்ற விண்மீன் குடும்பங்களில் நமது பூமியைப் போல் உள்ள கோள்களையும், உயிரினச் சின்னங்கள் இருப்பையும் கூடத் தேடிக் கண்டுபிடித்து விடலாம் என்று விஞ்ஞானிகள் கருதுகிறார்கள்.”

ரே ஜெயவர்த்தனா (Ray Jayawardhana, Associate Professor of Astronomy, University of Toronto) (2007)

நாசாவின் கெப்ளர் விண்ணோக்கி முதன்முறை இரண்டு நீர்க்கோள்களைக் கண்டு பிடித்தது

2013 ஜூலை 6 ஆம் தேதி நாசாவின் கெப்ளர் விண்ணோக்கி முதன்முறை இரண்டு நீர்க்கோள்கள் சுற்றிவரும் ஒரு விண்மீனைக் கண்டுபிடித்தது. அந்த விண்மீனின் பெயர் கெப்ளர் -62 [Kepler -62]. விண்மீன் கெப்ளர் -62 நமது சூரியனை விடச் சிறியது. உஷ்ணமும் தணிந்தது. அந்த விண்மீனைச் சுற்றும் நீர்க்கோள்களின் பெயர்கள் : கெப்ளர் -62e, கெப்ளர் -62f [Kepler -62e and Kepler -62f]. நீர்க்கோள் கெப்ளர் -62e, அதன் விண்மீனை ஒருமுறைச் சுற்றும் காலம் 122 நாட்கள்; நீர்க்கோள் கெப்ளர் -62f விண்மீனைச் சுற்றும் காலம் 267 நாட்கள். அவற்றின் விண்மீன் குறுக்கீடு போக்கை நோக்கி அவற்றின் ஒப்புமை அளவுகள் அறிந்து கொள்ளப்படும். நீர்க்கோள் கெப்ளர் -62e, நமது பூமியை விட 60% பெரிதாகவும், நீர்க்கோள் கெப்ளர் -62f 40% பெரிதாகவும் இருப்பதாய்க் கணிக்கப் பட்டுள்ளன. வானியல் விஞ்ஞானிகள் நீர்க்கோள் இரண்டும் சுற்று வாயு மண்டலமின்றிப் பாறையாலும், நீராலும் உருவானவை என்று ஊகிக்கிறார். கெப்ளர் -62 விண்மீனை அருகில் சுற்றும் நீர்க்கோள் கெப்ளர் -62e, சற்று சூடாகவும், பூமியை விட மேகம் மூடியிருப்பதாகவும் தெரிகிறது. தூரத்தில் சுற்றும் நீர்க்கோள் கெப்ளர் -62f பேரளவு CO2 கரியமில வாயு மிகுந்து, “கிரீன் ஹவுஸ் விளைவால்” சூடேறி, முன்னதை விடத் தணிந்த உஷ்ண நிலையில் நீர்மயத்தைத் திரவ வடிவில் வைத்துள்ளது. இல்லையென்றால் அந்த அரங்கில் நீர்க்கோள் ஓர் பனிக்கோள் ஆகியிருக்கும்.

நாசாவின் ஹப்பிள் விண்ணோக்கி நீலக்கோள் ஒன்றைக் கண்டுபிடித்தது.

2013 ஜூலை 11 இல் நாசாவின் ஹப்பிள் விண்ணோக்கி பூமியிலிருந்து 63 ஒளியாண்டு தூரத்தில் உள்ள அண்டவெளி விண்மீனை ஒன்றைச் சுற்றி வரும் நீல நிற வாயுக் கோளைக் கண்டுபிடித்தது. நீலக்கோளின் பெயர் : HD 189733b. 2005 ஆம் ஆண்டில் கண்டுபிடிக்கப் பட்ட அந்தக் கோளின் மீது நீல நிறம் சிதறுவதாக முதலில் ஊகிக்கப் பட்டது. 2013 ஜூலையில் அதை ஹப்பிள் தெளிவாக மெய்ப்பித்தது. நீலக் கோள் அதன் தாய்ப் பரிதியி லிருந்து 2.9 மில்லியன் மைல் தூரத்தில் சுற்றி வருகிறது. மேலும் தனது ஒரு பாதி வடிவை விண்மீனுக்குக் காட்டி, மறு பாதி முகம் இருளில் தெரியாமல், ஈர்ப்பு விசையில் கட்டப் பட்டு [Gravitationally locked], நமது பூமியைச் சுற்றும் நிலவு போல் காணப்பட்டது. நீலக்கோளின் பகல் நேர உஷ்ணம் பயங்கர மானது : 2000 டிகிரி F. வாயுக்களின் வேகம் : 4500 mph. நீல நிறக் கோளின் [Cobalt Blue Colour] நீல நிறம் பூமியைப் போல் நீர் மீது ஒளிச் சிதறலால் எதிர்ப்படுவ தில்லை. அந்தக் கோளின் மேக மண்டலத்தில் கலந்துள்ள சிலிகேட் துகள்களே [Silicate Particles] நீல நிறத்துக்குக் காரணம் என்பது அறிய வருகிறது. 2007 இல் நாசாவின் ஸ்பிட்ஸர் [Spitzer Space Telescope] விண்ணோக்கி அறிவித்தபடி, நீலக்கோளின் இரவு-பகல் உஷ்ணங்கள் வேறுபாடு 500 டிகிரி F என்று கணிக்கப் பட்டது.

பரிதியைப் போல் தெரியும் விண்மீனான எப்ஸிலான் எரிடானியைச் சுற்றும் (Epsilon Eridani) வாயுத் தூசித் தட்டு ஒரு கோள் என்பது நிச்சயம். ஹப்பிள் மூலம் கண்டதால் அது தோல்வியான விண்மீனில்லை, ஓர் அண்டக்கோள் என்பது உறுதி ! அது பெரிதளவில் இருந்தால், கோளுக்கும் விண்மீன் தூசிக்கும் தொடர்பில்லாத பழுப்புக் குள்ளி (Brown Dwarf) என்று சொல்லி விடலாம்.

பார்பரா மெக் ஆர்தர் (Barbara McArthur, Project Leader, University of Texas) ”

பூதக்கோளின் விட்டம் நமது பூமியைப் போல் ஒன்றை மடங்கு [12,000 மைல்]. அந்த கோள் லிப்ரா நட்சத்திரக் கூட்டத்திலிருந்து 20 ஒளியாண்டு தூரத்தில் இயங்கிச் சுயவொளி வீசும் மங்கிய கிலீஸ்-581 விண்மீனைச் சுற்றி வருகிறது. அதன் சராசரி உஷ்ணம் 0 முதல் 40 டிகிரி செல்ஸியஸ் என்று மதிப்பிடுகிறோம். ஆகவே அங்கிருக்கும் தண்ணீர் திரவமாக இருக்கும் என்று கருதப் படுகிறது. அந்த கோள் பாறைக் குன்றுகளுடனோ அல்லது கடல் நீர் நிரம்பியோ அமைந்திருக்கலாம்.”

ஸ்டெஃபினி உட்றி [Stephane Udry, Geneva Observatory]

“மற்ற சுயவொளி வீசும் விண்மீன்களின் கோள்களை விட, கண்டுபிடிக்கப்பட்ட இந்த பூதக்கோள் ஒன்றுதான் உயிரின வளர்ச்சிக்குத் தேவையான அனைத்து உட்பொருட்களும் கொண்டதாகத் தெரிகிறது. அக்கோள் 20 ஒளியாண்டு தூரத்தில் உள்ளதால், விரைவில் அங்கு செல்லும் திட்டங்களில்லை. ஆனால் புதிய உந்துசக்திப் பொறிநுணுக்கம் விருத்தியானல், எதிர்காலத்தில் அக்கோளுக்குச் செல்லும் முயற்சிகள் திட்டமிடப் படலாம். பேராற்றல் கொண்ட வானோக்கிகளின் மூலமாக அக்கோளைப் பற்றி அறிந்து கொள்ளக் கூடியவற்றை நிச்சயம் ஆய்ந்து கொள்ளப் பயிற்சிகள் செய்வோம்.”

அலிஸன் பாயில் [Alison Boyle, Curator of Astronomy, London’s Science Museum]

“அண்டையில் உள்ள சின்னஞ் சிறு சுயவொளி விண்மீன்களைச் சுற்றிவரும் பூமியை ஒத்த அண்டக் கோள்களில் உயிரின வாழ்வுக்கு ஏற்ற பகுதிகள் உள்ளதாக இப்போது அறிகிறோம். இச்செய்தி புல்லரிப்பு ஊட்டுகிறது. இப்பணி நாசாவின் அண்டவெளித் தேடல் முயற்சிகளின் முடிவான குறிக்கோளாகும்.”

டாக்டர் சார்லஸ் பீச்மென் [Dr. Charles Beichman, Director Caltech’s Michelson Science Center]

“பூதக்கோள் போல பல கோள்களைத் தேடிக் காணப் போகிறோம். பூமியை ஒத்த கோள்களைக் கண்டு அவற்றின் பண்பாடுகளை அறிய விரும்புகிறோம். ஆங்கே வாயு மண்டலம் சூழ்ந்துள்ளதா? அவ்விதம் இருந்தால் எவ்வித வாயுக்கள் கலந்துள்ளன? அந்த வாயுக் கலவையில் நீர் ஆவி [Water Vapour] உள்ளதா? அந்த வாயுக்களில் உயிரினத் தோற்றத்தின் மூல இரசாயன மூலக்கூறுகள் கலந்துள்ளனவா? நிச்சயமாக அந்த கோள் எந்த விதமானச் சூழ்வெளியைக் கொண்டது என்பதையும் கண்டு கொள்ள விழைகிறோம்.”

டாக்டர் விக்டோரியா மீடோஸ் [Member, Terrestrial Planet Finder, NASA]

“தற்போது ஒருசில வாரங்களுக்கு ஒருமுறை வியாழக் கோளை ஒத்த புறவெளிக் கோள் ஒன்று கண்டுபிடிக்கப் படுகிறது ! சமீபத்தில் கண்ட புதிய கோள் கிலீஸ் 876 (Gliese 876) விண்மீனைச் சுற்றி வருகிறது ! மிக்க மகத்தானது ஹப்பிள் கண்டுபிடித்துப் படமெடுத்த கோள் இரட்டை விண்மீன்கள் வீசி எறியப்பட்டு 450 ஒளியாண்டு தூரத்தில் உள்ளது ! எல்லாவற்றுக்கும் உன்னதமான கோள் இனிமேல்தான் வரப் போகிறது !”

மிசியோ காக்கு (Michio Kakau, Professor Theoretical Physicist, City College of New York) (2007)

பூமியைப் போன்ற வெளிப்புறக் கோள்கள் கண்டுபிடிப்பு !

250 ஆண்டுகளுக்கு முன்பே விண்கோள் தோற்றத்தைப் பற்றிச் சொல்லும் போது ஜெர்மன் மேதை இம்மானுவல் கென்ட் 1755 இல் அண்டக் கோள்கள் விண்மீனைச் சுற்றும் வாயுத் தூசித் தட்டிலிருந்து உதிக்கின்றன என்று முதன்முதலில் அறிவித்தார் ! இதுவரை [ஜூலை 3, 2008] 307 கோள்கள் கண்டுபிடிக்கப் பட்டாலும் ஒரு விண்மீனைச் சுற்றி ஒரே சமயத்தில் கோளையும் வாயுத் தூசித் தட்டையும் சேர்ந்து நோக்கியதில்லை ! தனியாகக் கோளையோ அல்லது தனியாக வாயுத் தூசித் தட்டையோ விஞ்ஞானிகள் கண்டிருக்கிறார். இப்போது நாசா & ஈசா (NASA & ESA) விஞ்ஞானிகள் ஹப்பிள் தொலைநோக்கி மூலமாக கென்ட் கூறிய அரிய கருத்தை மெய்யென்று நிரூபித்துள்ளார். 1991 இல் முதன்முதல் விஞ்ஞானிகள் பரிதி மண்டலத்துக்கு வெளியே உள்ள ஒரு விண்மீனைச் சுற்றும் முதல் கோளைக் கண்டுபிடித்தார்கள். அடுத்து பதினாறு ஆண்டு களுக்குள் [2008] இதுவரை 307 வெளிப்புறக் கோள்கள் கண்டுபிடிக்கப் பட்டுள்ளன ! புதிய முதல் கோளின் பெயர் “மெதுசேலா” (Methusela) என்பது. 7200 ஒளியாண்டு தூரத்தில் இருக்கும் அந்தப் புதுக்கோள் பூமியை விட மூன்று மடங்கு வயது கொண்டது ! ஆயினும் பூமியைப் போல் நீர்வளம் மிக்க நீர்க்கோள் ஒன்று இதுவரையில் விஞ்ஞானிகள் கண்டுபிடிக்கப்பட வில்லை !

2006 நவம்பர் அமெரிக்க வானியல் இதழில் (American Astronomical Journal) பரிதியைப் போன்ற விண்மீன் எப்ஸிலான் எரிடானியை (Epsilon Eridani Star) பத்தரை ஒளியாண்டு தூரத்தில் விஞ்ஞானிகள் கண்டதாக அறிவிக்கப்பட்டது. சூரிய மண்டலத்தின் கோள்கள் சூரிய வாயுத் தூசித் தட்டில் ஒரே சமயத்தில் உருண்டு திரண்டு உதித்தவை. 4.5 பில்லியன் வயதுடைய நமது பரிதி ஒரு நடு வயது விண்மீன் ! அதனுடைய வாயுத் தூசித் தட்டு பல மில்லியன் ஆண்டுகளுக்கு முன்பே கரைந்து மறைந்து விட்டது ! ஆனால் எப்ஸிலான் எரிடானி விண்மீன் இளையது. அதன் வயது சிறியது – 800 மில்லியன் ஆண்டுகள்தான் ! ஆதலால் அதனுடைய தட்டு இன்னும் வெளிப்படை யாகத் தெரிகிறது ! எப்ஸிலான் எரிடானியைச் சுற்றும் தட்டு பூமத்திய ரேகைக்கு 30 டிகிரி கோணத்தல் சாய்ந்துள்ளது ! அதில் திரண்டு உருவாகும் கோளின் நிறை நமது வியாழக் கோளைப் (Planet Jupiter) போல் ஒன்றரை மடங்கு ! அந்தக் கோளே பூமிக்கு அருகில் உள்ள புறவெளிப் பரிதிக் கோள் (Extra-Solar or Exo-Planet) ! அது ஒருமுறைத் தனது விண்மீனைச் சுற்ற சுமார் 7 ஆண்டுகள் ஆகின்றன ! ஹப்பிள் தொலைநோக்கி முதலில் அந்த மங்கலான வாயுக் கோளைக் காண முடியா விட்டாலும், 2007 இல் பரிதி ஒளியைப் பிரதிபலித்த போது தெளிவாகப் படமெடுக்க முடிந்தது.

சூரிய மண்டலத்துக்கு அப்பால் புதியதோர் பூமியைக் கண்டுபிடித்தார்

ஐரோப்பிய விண்வெளி விஞ்ஞானிகள் இந்த வாரத்தில் (ஏப்ரல் 25, 2007), சூரியனைப் போன்ற ஆனால் வேறான ஒரு சுயவொளி விண்மீனைச் சுற்றிவரும் மனித இனம் வாழத் தகுந்ததும், பூமியை ஒத்ததுமான ஓர் அண்டக்கோளைக் கண்டுபிடித்ததாக அறிவித்தார்கள். தென் அமெரிக்காவின் சில்லியில் உள்ள அடாகமா பாலைவனத்து ஈஸோ வானோக்கு ஆய்வகத்தின் [Atacama European Science Observatory, (ESO) La Silla, Chille, South America] 3.6 மீடர் (12 அடி விட்டம்) தொலைநோக்கியில் பிரெஞ்ச், சுவிஸ், போர்ச்சுகீஸ் விஞ்ஞானிகள் கூடிக் கண்டுபிடித்தது. அந்த ஆய்வகம் கண்ணுக்குத் தெரியாத கோள்களின் ஈர்ப்பாற்றல் விளைவால் ஏற்படும் “முன்-பின் திரிபைத்” [Back-and-Forth Wobble of Stars, caused by the gravitational effect of the unseen Planets] தொலை நோக்கி வழியாக மறைமுகமாக விண்மீனைக் காண்பது. கண்டுபிடிக்கப்பட்ட கோள் நமது பூமியைப் போல் ஒன்றரை மடங்கு பெரியது; அதன் விட்டம் 12,000 மைல். புதுக்கோளின் எடை நமது பூமியைப் போல் 5 மடங்கு. அது சுற்றும் சுயவொளி விண்மீனின் பெயர்: கீலீஸ் 581 c [Gliese 581 c]. புதிய கோள், கிலீஸை ஒரு முறைச் சுற்றிவர 13 நாட்கள் எடுக்கிறது. கிலீஸா ஒளிமீன் லிப்ரா நட்சத்திரக் கூட்டத்தி லிருந்து 20.5 ஒளியாண்டு தூரத்தில் உள்ளது. ஒளியாண்டு என்பது தூர அளவு. ஓர் ஒளியாண்டு என்றால் ஒளிவேகத்தில் [விநாடிக்கு 186,000 மைல் வேகம்] ஓராண்டு காலம் செல்லும் தூரம். நாசா விண்வெளித் தேடலின் முடிவான, முக்கியக் குறிக்கோளும் அவ்விதக் கோள்களைக் கண்டு பிடித்து ஆராய்ச்சிகள் புரிவதே!

பரிதி மண்டலத்தைத் தாண்டி இதுவரை [டிசம்பர் 10, 2013] 1051, 797 பரிதிக் குடும்பங்கள்] வெளிப்புறக் கோள்கள் (Exoplanets) கண்டுபிடிக்கப் பட்டாலும், சமீபத்தில் கண்ட இந்தக் கோள்தான் சிறப்பாக நமது பூமியை ஒத்து உயிரின வாழ்வுக்கு ஏற்ற வெப்ப நிலை கொண்டதாக உள்ளது. மேலும் அந்த உஷ்ண நிலையில் நீர் திரவ வடிவிலிருக்க முடிகிறது. கிலீஸ் விண்மீனைச் சுற்றிவரும் நெப்டியூன் நிறையுள்ள ஓர் வாயு அண்டக்கோள் ஏற்கனவே அறியப் பட்டுள்ளது. பூமியைப் போன்று எட்டு மடங்கு நிறையுள்ள மூன்றாவது ஓர் அண்டக் கோள் இருக்க அழுத்தமான சான்றுகள் கிடைத்துள்ளன. வானோக்கிகள் மூலமாகப் புதிய பூமியின் வாயு மண்டலத்தில் மீதேன் போன்ற வாயுக்கள் உள்ளனவா, நமது பூமியில் தென்படும் ஒளிச் சேர்க்கைக்கு வேண்டிய குளோரோ·பைல் காணப்படுகிறதா என்றும் ஆய்வுகள் மூலம் அறிய முற்படும்.

…

[Message clipped] View entire message

Attachments area

Preview YouTube video GJ 1132b

GJ 1132b

Preview YouTube video GJ 1132b Update for 04/07/17 Exoplanet Atmospheres

GJ 1132b Update for 04/07/17 Exoplanet Atmospheres

April 9, 2017

புற்று நோய் சிகிச்சை

பவள சங்கரி

புற்று நோய் மருத்துவத்திற்காக கடந்த 5 ஆண்டுகளில் 50 வகையான மருந்துகள் கண்டுபிடிக்கப்பட்டு அனைத்து மேலை நாடுகளிலும் பயன்பாட்டிற்கு வந்தபோதிலும் இந்தியா போன்ற வளரும் நாடுகளில் 7 வகையான மருந்துகள் மட்டுமே பயன்பாட்டிற்கு வந்துள்ளன. புதிய கண்டுபிடிப்புகள் அனைத்தும் நம் நாட்டிலும் உடனடியாகக் கிடைக்கும்படி தமிழ்நாட்டிலுள்ள அடையார் புற்றுநோய் மருத்துவமனையும், மும்பை டாடா நினைவு புற்றுநோய் மருத்துவமனையும் முயற்சிகள் மேற்கொள்ள வேண்டும். இந்த புதிய சிகிச்சை முறைகள் (தெரபி) உலகின் அனைத்து நாடுகளுக்கும் கிடைக்க வேண்டியதும் அவசியம்.

April 9, 2017
கேசவ் வண்ணம் – கிரேசி எண்ணம்

’’அடிதனில் அன்னை, அவள்மடியில் கன்று,
விடியலில் வாசிப்பார் வேணு(குழல்): -படியளக்கும்
மன்னனை மாமதுரை மைந்தனை யாதவக்
கண்ணனை நெஞ்சே கருது’’….!

”தூணிருந்த பல்லியின் துண்டித்த வாலாக
வீணகந்தை யால்வீழ்ந்து வாடுகின்றாய் -நீநெகிழ்ந்து
அண்ணனாய் தம்பியாய் ஆன பலராமக்
கண்ணனை நெஞ்சே கருது”….கிரேசி மோகன்….!

April 8, 2017
‘’வாழ்நாள் விருது’’

மதிப்பிற்குரிய திரு கிரேசி மோகன் அவர்களுக்கு ‘’வாழ்நாள் விருது’’ அளித்து மைலாப்பூர் அகாடமி கெளரவித்திருக்கிறது. திருமிகு கிரேசி மோகன் அவர்களால் பெருமைப்படுகிறது இவ்விருது. இவர் இன்னும் பலப்பல விருதுகள் பெற்று, பல்லாண்டுகள் வாழ்ந்து தமது சேவையை நாடக உலகிற்கு அளிக்கவேண்டும் என்று எல்லாம்வல்ல எம் இறையை பிரார்த்திக்கிறோம்.

வல்லமை குழுவினர்

April 8, 2017