Blog

கோப்புக்கூட்டல்: இன்றைய கோப்பு: [5]

-இன்னம்பூரான்

ஆங்கிலத்தில் ‘எல்லாவற்றையும் உட்படுத்திய’ என்ற பொருள் கூறும் ecumenical என்ற சொல் உணர்த்தும் இலக்கை, ஒரு பெரிய கோரிக்கையாக முன்வைக்கிறேன். அதன்பொருட்டு, ஒரு கோப்புக்கூட்டல் செய்ய விரும்புகிறேன்.

இன்றைய கோப்பு: [5]
மார்ச் 25, 2017

இந்தியாவில் ஜனநாயக ஆட்சி நடக்கிறது. பொதுமக்களில் பெரும்பாலோர் வாக்காளர்கள். அவர்களின் பொன்னான வாக்கைப் பெற்றோ/கைப்பற்றியோ/அபகரித்தோ/ விலைக்கு வாங்கியோ/மற்றும் பல உத்திகளில் ஒன்றின் மூலமாகவோ அடைந்து, மாநிலச் சட்டசபைகளிலோ அல்லது நாடாளும் மன்றதிலோ மக்களின் பிரதிநிதிகள் சட்டம் இயற்றுகிறார்கள், அரசாளும் அமைச்சரவையை அமைக்கிறார்கள், அரசு இயந்திரத்தை மக்கள் நலத்துக்கோ சுயநலத்துக்கோ பயன்படுத்துகிறார்கள். முதல் தேர்தலில் போட்டியிட்டவர்களில் பெரும்பாலோர் செல்வந்தர்கள் அல்ல. இன்றைய நிலை வேறு. மேற்படி மன்றங்களில் கோடீஸ்வர்கள் கோலோச்சுகிறார்கள். அவர்களுக்கு எக்கச்சக்கமான ஊதியம், சலுகைகள், மான்யங்கள்; மேலும் சமுதாய மேன்மைக்குத் தன்னிச்சையாக உதவ, கோடிக்கணக்கான செல்வத்தின் மேல் உரிமை. அண்மையில் ஒரு எம்.பி. ஒரு விமான நிறுவனத்தின் நிர்வாகியைப் பொதுஇடத்தில் செருப்பால் பலமுறை அடித்து, அவருடைய மூக்குக்கண்ணாடியை உடைத்து, வசைகள் பல பாடி அவமதித்தார். அவர்மீது வழக்கு. விமான நிறுவனங்கள் அவரை ஏற்றுக்கொள்ளாததால், அரசு நடத்தும் ரயிலில் பயணித்தார். அதில் அவருக்கு இடம் கொடுத்தது, வழக்கு நிலுவையில் இருக்கும்போது, நியாயமா? அதுவும் அதுபற்றி மார்தட்டி அகம்பாவத்துடன் பேசும்போது. அவரை நம்பி நட்டாற்றில் இறக்கப்பட்ட வாக்காளர்கள் அவரை உதற முடியுமா? இது ஒருபுறம் இருக்க.

ஒரு நாள் எம்.பி. ஆக இருந்தாலும் ஆயுள் முழுதும் ஓய்வூதியம் உண்டு என்ற தோற்றம் நிலவுகிறது. உச்ச நீதிமன்றம் இந்த ஆனானப்பட்ட எம்.பி.கள் பெறும் சலுகைகள்தான் என்ன என்று ஒரு பொதுவழக்கை விசாரிக்கும்போது, மத்திய அரசை/தேர்தல் அதிகாரமையத்தை வினவ முயன்றவுடன், எல்லாக் கட்சிகளைச் சேர்ந்த எம்.பி.மகாஜனங்கள் சினம் மிகுந்து சண்டைக்கோழி மாதிரி சிலிர்த்துக்கொண்டனர். ஜெயராம் ரமேஷ் காங்கிரஸார். அவர் ஒரு உச்சமன்ற நீதிபதி 80% எம்.பி. கள் கோடீஸ்வரர்கள் என்று சொன்னதுக்கு ஆக்ஷேபிக்கிறார். சினம் மிகுந்த நிதி அமைச்சர் அருண் ஜெட்லி ‘பார்லிமெண்ட் அங்கத்தினர்களின் ஊதியம், படிகள், சலுகைகள் வகையறா பற்றி விவாதிக்க, முடிவுஎடுக்க பார்லிமெண்ட் மட்டும்தான் அதிகாரம் வகிக்கும் என்கிறார். அதாவது, ‘வாக்காளர்களின் பிரதிநிதிகள் தங்கள் சலுகைகளைத் தாங்களேதான் நிர்ணயிக்க உரிமை உண்டு. மற்றவர் வந்து புகல இங்கு என்ன நீதி’ என்கிறார். பேஷ்!

ஒரு சின்னக் கணக்கு. அது பூரணமானது இல்லை என்றாலும், விஷயத்தை பிட்டுப் பிட்டு வைக்கிறது.17 கட்சிகள் எடுத்துக்கொள்ளப்பட்டன. அதில் கோடீஸ்வர தி.மு.க. இல்லை. அந்தஸ்து விஷயம் பின்னர் நோக்கலாம். நாடாளுமன்றத்தில் 2009இல் 521 எம்.பி.களின் செல்வநிலை: 58% கோடீஸ்வரர்கள். 2014இல் 542 எம்.பி.களின் செல்வநிலை: 82% கோடீஸ்வரர்கள்.

பிஜேபி:

2009: 110 எம்.பி.களின் செல்வநிலை: 50% கோடீஸ்வரர்கள். 2014இல் 251 எம்.பி.களில் 84% கோடீஸ்வரர்கள்.

காங்கிரஸ் 2009இல் 199 எம்.பி.களின் செல்வநிலை: 71% கோடீஸ்வரர்கள். 2014இல் 44 எம்.பி.களில் 80% கோடீஸ்வரர்கள்

ஏடிஎம்கே 9 எம்.பி.களின் செல்வநிலை: 56% கோடீஸ்வரர்கள். 2014இல் 37 எம்.பி.களில் 78% கோடீஸ்வரர்கள்.

தி.முக. மாஜி எம்.பிகள் ஒரு கூட்டணி வைத்தால் கோடீஸ்வரர் கும்பலாக இருக்கும் என்பவர்களும் உண்டு.

அரசியல் சாஸனப்படி நாடாளும் மன்றம் ஒரு செல்வந்தர்கள் நிலையமாக அமைந்தாலும், அவர்களை மேம்படுத்திய பாமரமக்களுக்கு வாய்ஸ் கிடையாதா?

என்னத்தைச் சொல்ல? அந்த நீதிபதியையும், இந்தக் கட்டுரையாளரையும் பார்லிமெண்டார் வாட்டி எடுக்கலாம். அந்த கெய்க்வாட் அதற்கு ஆதரவு தெரிவிப்பார். அவர் தான் செருப்படி மக்கள் பிரதிநிதி மன்னர்பிரான்.

எனக்கு ஓர் ஐயம் எழுகிறது. இங்கிலாந்து அரசியல் சாஸனப்படி மஹாராணி தான் சகல மேலாண்மை; நடைமுறையில் இல்லை என்பது வேறு விஷயம். ஸர் ஹென்ரி போல்லக் என்ற அரசியல் ஆய்வாளரின் பொன் வாக்கு:

“மேலாண்மை ( Sovereign) எல்லா நீலக்கண் கொண்ட சிசுக்களை கொல்லவேண்டும் என்று ஆணையிட்டால், அதற்கு அப்பீல் இல்லை. ஆனால், அவர் அரியணையிலிருந்து இறங்கவேண்டும்.’

இந்தப் பொன்வாக்கு இங்கு செல்லுபடிஆகுமா?

-#-

சித்திரத்துக்கு நன்றி:

https://img.clipartfest.com/337e687de3a0fa4294d85e864d70b202_sovereignty20clipart-popular-sovereignty-clipart_450-335.jpeg

March 27, 2017
உதிரிப்பூக்கள்

ரா.பார்த்தசாரதி

இறைவனிடத்தில் அர்ச்சனைப் பூக்களாய் வீழ்கின்றோம்

மனிதனின் இறப்பின் போது காலடியில் மிதிப்படுகின்றோம்

யாரோ இறந்ததிற்கு எங்களை மிதித்து கொல்கின்றனரே

மணமானாலும், பிணமானாலும் கடைசியில் வீசி எறிகின்றனரே !

நாங்கள் பல நிறங்களில் இருந்தாலும் எங்களுக்கு ஜாதி இல்லை

எங்களின் மணம் பலவிருந்தாலும் எங்களிடத்தில் போலி இல்லை

உதிரிப்பூவானாலும், மாலையானாலும் எங்கள் அழகே ஒரு கவர்ச்சி !

எங்களை சூடியவர்களும் அடைவதோ பெருமிதத்தில் மகிழ்ச்சி !

மணமகன், மணமகள் கழுத்தில் அடையாளமாக தொங்குகிறோம்

அரசியல் தலைவர்கள் கழுத்தையும் பகடிற்காக அலங்கரிக்கின்றோம்

பாலியில் செய்யும் வேசியும் எங்களால் தன் அழகினை காண்பிக்கிறாள்

எங்கள் நறுமணத்தை உடலுக்கு நறுமண திரவியமாய் பூசுகிறார்கள் !

பல உதிரிப்பூக்கள் நாறுடன் சேர்த்து பூமாலையாகிறது

பல கைகள் சேர்ந்தால்தான் ஒரு திட்டம் முடிவாகிறது

வாசமில்லா மலருக்கு என்றும் மதிப்பு கிடையாது

நேசமில்லா உறவிற்கு என்றும் உயர்வு கிடையாது !

முதலிரவில் படுக்கையில் கிடப்போம்,மறுநாள் குப்பைத் தொட்டியில்

காகித பூவிற்கு தரும் கவர்ச்சி எங்கள் உண்மை தன்மைக்கு கிடைப்பதில்லை

எங்களை மிதிப்பவர்களே நீங்கள் இறந்தால் மீண்டும் பிறப்பதில்லை

நாங்கள் உதிர்வதே மீண்டும், பிறப்பதற்குத்தான் என்று எவருமறியவில்லை

March 27, 2017
சூரிய குடும்பத்தில் முன்பு விலக்கப்பட்ட புறக்கோள் புளுடோ மீண்டும் ஒன்பதாம் கோள் தகுதி பெறுகிறது
குள்ளக்கோள் புளுடோ

சி. ஜெயபாரதன் B.E.(Hons) P.Eng (Nuclear) கனடா

++++++++

புளுடோ வுக்கு மீண்டும்
சூரிய மண்டலக் கோள் மதிப்பீடு !
பரிதியைச் சுற்றும் கோள்கள் மீண்டும்
ஒன்பது என்று மாறியது !
புதன் முதல் புளுட்டோ வரை
விதவிதப் பாறை, வாயுக் கோள்களில்
விலக்கப் பட்டது புளுடோ !
நெப்டியூன் இறுதிக்கோள் என்பது மாறி
இப்போது மீண்டும் புளுடோ
ஒன்பதாம் கோள் தகுதி பெற்றது
அறிவிக்கப் பட்டது !
குள்ளக் கோள் புளுடோ
கோளாய் உயர்நிலை பெறும் !
வடிவத்தில் புதன் கோளுக்குப்
பாதி விட்டம் !
எட்டுக் கோள்கள் பரிதியை ஒரே
மட்டத்தில்
சுற்றி வரும் போது
குள்ளக் கோள் புளுடோ
கோணச் சாய்வு நீள்வட்டத்தில்
சுற்றி வரும் தனித்து!

+++++++++++++++

“நான் கெஞ்சிக் கேட்கிறேன் : (பரிதிக்கு) எத்தனைக் கோள்கள் உள்ளன வென்று உறுதியாகக் காரணங்கள் கூற முடியாதா உங்களுக்கு ? (இப்போது) அந்தப் பிரச்சனை தீர்க்கப்பட்டு விட்டது . . !”

ஜொஹான்னெஸ் கெப்ளர் (1571-1630)

ஒன்றை மட்டும் உறுதி செய்வேன். ஒப்பில்லா எந்த ஓர் விஞ்ஞான ஆணையகம் செப்பியதற்கும் மாறாக, புளுடோ ஒரு கோள் தகுதி கொண்டது நான் சொல்கிறேன். அதுபோல் பூதக்கோள் வியாழனின் துணைக்கோள் ஈரோப்பாவும், பூமியின் நிலவும் கோள்களே.

கிர்பி ருனியான் [Scientist, Johns Hopkins University]

புளுடோவின் சாய்வு நீள்வட்டச் சுற்றுப்பாதை

[சிவப்பு நிறத்தில்]

2006 இல் புகழ்பெற்ற அகிலநாட்டு வானியல் கூட்டகம் [International Astronomical Union (IAU)] புளுடோவின் கோள் தகுதியை நீக்கி, சூரிய குடும்பக் கோள்கள் ஒன்பதிலிருந்து எட்டான விளக்கம் அனுமதி பெற்றாலும், அந்த மாற்ற முடிவும் விஞ்ஞானத் தர்க்கத்துக்குள் மாட்டிக் கொண்டது. அது பொருளற்ற முடிவென்று, புளுடோவைப் பற்றிச் சாதமாக, அடுத்த வார [மார்ச்சு 21, 2017] வானியல் பேருரையில் மாற்றி அறிவிக்கப் போகிறேன்.

கிர்பி ருனியான் [Scientist, Johns Hopkins University]

பனிப்பாறைக் கோள் புளுடோ பரிதியின் ஒன்பது கோள்களில் சிறியது. நமது நிலவில் முக்கால் அளவு விட்டம். ஆயினும் அதன் மேற்தளத்தில் நிகழ்பவை யாவும் கோளைச் சார்ந்த குணப்பாடை ஒத்தவை. கோளுக்கு மாறாக எதுவும் புளுடோவுக்கு இல்லை.

கிர்பி ருனியான் [Scientist, Johns Hopkins University]
+++++++++++++++

புறக்கோள் புளுடோவுக்கு மீண்டும் சூரிய மண்டலக் கோள் தகுதி

2006 ஆம் ஆண்டில் அகிலநாட்டு வானியல் பேரவை விஞ்ஞானிகள் [International Astronomical Union (IAU)] கூடிக் குள்ளக்கோள் புளுடோ, சூரிய மண்டலக் கோள் தகுதி பெறாது என்று முடிவு செய்தது, தற்போது 2017 மார்ச்சில் தர்க்கத்துள் சிக்கியுள்ளது. அதாவது சூரிய மண்டலக் கோள்கள் எட்டு, ஒன்பது அல்ல என்னும் கோட்பாடு ஏற்றுக் கொள்ளப்படவில்லை, இப்போது. புகழ்பெற்ற விஞ்ஞானப் பேரவை கூற்றுக்கு மாறாகப் பரிதியின் புறக்கோள் புளுடோ சூரிய மண்டலக் கோள் தகுதி பெற்றது என்று உறுதியாகச் சொல்கிறார், ஜான்ஸ் ஹாப்கின்ஸ் பல்கலைக் கழகத்தைச் சேர்ந்த விஞ்ஞானி கிர்பி ருனியான் [Kirby Runyon]. நமது பூமியைப் போல் புளுடோவும் ஒரு கோள், அடுத்து பூதக்கோள் வியாழனின் துணைக்கோள் ஈரோப்பாவும் ஒரு கோள், பூமியின் நிலவும் ஒரு கோள், அவைபோல் சூரிய மண்டலத்தில் மறுக்கப்பட்டுள்ள 100 மேற்பட்ட அண்டங்களும் கோள்களே என்று வெகு அழுத்தமுடன் கூறுகிறார், கிர்பி ருனியான்.

சமீபத்தில் நாசாவின் தொடுவான் விண்ணுளவி [New Horizon Space Probe] புளுடோவை 8000 மைல் தூரத்தில் நெருங்கிப் பற்பல புதிய தகவலை அனுப்பியுள்ளது. புறக்கோள் புளுடோ நமது பூமியிலிருந்து சுமார் 4.67 பில்லியன் மைல் தூரத்தில் உள்ளது. அந்தக் கோளுக்குப் புதியதாக ஒரு விளக்கமும், அதற்கு நியாயப்பாடும் அளிக்கிறார் கிர்பி ருனியான். அவரது தலைமைக்குக் கீழ் ஐந்து அகில நாட்டு விஞ்ஞானிகள் ஒப்புமை தந்து இப்போது அந்தக் கோட்பாடு ஏற்றுக் கொள்ளப்பட்டுள்ளது.
1. அலன் ஸ்டெர்ன் & கெல்ஸி சிங்கர் [Southwest Research Institute, Boulder, Colarado]
2. டாட் லௌவர் [National Optical Astronomy Observatory, Tucson, Arizona ]
3. வில்லியம் கிரண்டி [Lowell Observatory, Flagstaff, Arizona]
4. மைக்கேல் சம்மர்ஸ் [George Mason University, Fairfax, Virginia]
அந்தக் கூட்டறிக்கை 2017 மார்ச் 21 இல் நடக்கும் நிலவு & கோள் விஞ்ஞானப் பேரரங்கில் [Lunar & Planetary Science Conference] வெளியாகப் போகிறது. கிர்பி ருனியான் தர்க்க வினாக்களுக்குப் பதிலும் கூறுவார்.

++++++++++++++

பூமியும் மற்ற எல்லாக் கோள்களும் தம்தம் இடங்களில் தங்கி இருக்க வேண்டும் என்பதும், பிரளயம் ஏற்படாத வரை அவை இருப்பிடத்திலிருந்து மாறிச் செல்லா என்பதும் இயற்கை நியதி !

அரிஸ்டாட்டில் (கி.மு. 382-322)

“இப்போது நான் குள்ளிக் கோள் புளுடோவைக் (Dwarf Planet Pluto) கண்டுபிடித்த விஞ்ஞானியின் மனைவி”

பாட்ரீஷியா, புளுடோவைக் கண்டுபிடித்த டாம் டாம்பாஹின் மனைவி (2006)

பரிதியின் கோள்கள் வெவ்வேறு கட்டங்களில் விருத்தியான போது, பூமியை வடித்த ஒரே மாதிரி விசைகளால் அவையும் செதுக்கப்பட்டன. ஆதலால் ஒரே மாதிரி தள வடிவமைப்பு, உயிரினத் தோற்றம், நமது கடந்த காலம், எதிர்காலம் அவற்றிலும் நிகழலாம் !

அமெரிக்க ராக்கெட் விஞ்ஞானி ராபர்ட் கோடார்டு (1882-1945)
புளுடோவின் நிகழ் காலம் இறந்த காலமானது !

1930 ஆம் ஆண்டு புளுடோ கண்டுபிடிக்கப்பட்ட காலம் முதலே அது பரிதி மண்டலத்தின் ஓர் அண்டக் கோள் என்னும் கருத்தில் அடிப்படை ஐயப்பாடுகள் விஞ்ஞானிகளிடையே எழுந்தன ! 2006 ஆம் ஆண்டில் புளுடோ உலக விஞ்ஞானிகளால் பரிதிக் குடும்பத்திலிருந்து நீக்கப் பட்டு, புதிய கோள் குழுவில் ஒன்றாகக் “குள்ளிக் கோள்” (Dwarf Planet) என்று அழைக்கப் படுகிறது ! ஒன்பதாவது கோள் புளுடோவை முதன்முதல் கண்டுபிடித்த வானியல் நிபுணர் கிளைடு டாம்பாஹ் (Clyde Tombaugh) தனது 90 ஆவது வயதில் (1997) காலமானார். அவரை எரித்த சாம்பலைப் “புதிய தொடுவானம் விண்ணுளவியில்” (New Horizon Space Probe) வைத்து விண்வெளி எங்கும் நாசா விஞ்ஞானிகள் தூவினர். 2015 இல் திட்டப்படிப் புதிய தொடுவானம் விண்கப்பல் பயணம் செய்து, புளுடோவை உளவுவதற்கு முன்னமே புளுடோ பரிதி மண்டலத்தின் பட்டியலிலிருந்து நீக்கப் பட்டது குறித்து மிகவும் மனமுடைகிறார் 93 வயதான அவரது விதவை மனைவி பெட்ரீஷியா (Patricia) ! “இப்போது நான் குள்ளிக் கோள் புளுடோவைக் கண்டுபிடித்த விஞ்ஞானியின் மனைவி” என்று தனது பெயர் தாழ்ந்து போய் விட்டதென்று அவர் கலங்குகிறார் !

புளுடோ ஏன் பரிதி குடும்பத்திலிருந்து நீக்கப்பட்டது ?

2006 ஆம் ஆண்டில் உலக வானியல் விஞ்ஞானிகள் [International Astronomical Union (IAU)] பிரேகில் (Prague) ஒன்றுகூடி, புளுடோ அண்டக் கோள்களின் பண்பாட்டு நிலையை ஒத்திருக்க வில்லை என்று முடிவு செய்து அதைப் பரிதிக் குடும்பத்திலிருந்து நீக்கி விட்டார்கள். பிறகு அதைக் கோளின் மதிப்பு நிலையிலிருந்து தாழ்த்திக் “குள்ளிக் கோள்” (Dwarf Planet) என்னும் புதிய குழுவில் தள்ளினார்கள் ! 1992 இல் கியூபெர் வளையத்துக் கோள் (Kuiper Belt Object) ஒன்றைக் கண்டுபிடித்த பிறகு, டேவிட் ஜெவிட், ஜேன் லு (David Jewitt & Jame Luu) மற்றும் சில வானியல் நிபுணர்கள், வளையத்துக்கு அருகிலே சூரிய மண்டலத்தில் ஏராளமான புதிய அண்டக் குள்ளிகளைக் (70,000 Small Planet Bodies) கண்டார்கள். அவற்றில் எரிந்து போன வால்மீன்கள், விண்கற்கள் நெப்டியூன் கோளுக்கு அப்பால் பரிதியிலிருந்து 2.8-4.5 பில்லியன் மைல் தூரத்தில் இருப்பதை நோக்கினார்கள் ! அத்தகைய புதிய கோள் குள்ளிகளைக் கியூபெர் வளையத்தில் கண்டுபிடித்தது விஞ்ஞானிகளுக்குக் கோள்களைப் பற்றிய புதியதோர் கருத்தை உருவாக்கியது.

புதிய கண்ணோட்டத்தில் கோள்கள் என விஞ்ஞானிகள் குறிப்பிடுபவை எவை ? 2006 இல் பிரேகில் கூடிய உலக வானியல் விஞ்ஞானிகள் கோளுக்கு ஒரு புதிய குறிவிளக்கம் (Definition of a Planet) தந்தனர்.

முதன்முறை வந்த குறிவிளக்கம் :

முதலாவது : கோள் என்பது விண்வெளியில் ஒரு விண்மீனைச் சுற்றி வருவது. அது விண்மீனும் இல்லை. வேறு ஒரு கோளின் துணைக்கோளும் இல்லை.

இரண்டாவது : அதன் நிறை முழுவதும் ஈர்ப்பாற்றலால் இழுத்துச் சுருக்கப்பட்டுக் கோளமாய் உருட்டி யிருக்க வேண்டும்.

மூன்றாவது : அதன் வடிவம் பெரிதாக இருந்து சுற்றுவீதியில் எதுமில்லாது விலக்கப் பட்டிருக்க வேண்டும்.

கோள் குறிவிளக்கம் தர்க்கத்துக்குள் சிக்கியது !

உலக விஞ்ஞானிகள் பலர் முடிவு செய்த குறிவிளக்கத்தை ஏற்றுக் கொள்ளாத விஞ்ஞானிகள் சிலர் இருக்கிறார்கள். நாசாவின் “புதிய தொடுவான் விண்ணுளவிக் குறிப்பணியின் தலைவர் (New Horizon Space Probe Mission Leader) அலன் ஸ்டெர்ன் (Alan Stern) IAU விஞ்ஞானிகள் கூறிய மூன்றாவது விளக்கம் தவறு என்று சொல்கிறார். ஆகவே மூன்றாவது விளக்கம் தர்க்கமுள்ளதாக ஆகிவிட்டது. எப்படி ? பூமி, செவ்வாய், வியாழக் கோள், நெப்டியூன் ஆகிய நான்கும் மூன்றாவது விதிக்கு முரணாக உள்ளன. அந்த நான்கு கோள்களைச் சுற்றிலும் உள்ள தளப் பாதைகளில் எண்ணற்ற விண்கற்களின் குறுக்கீடுகள் உள்ளதால் கோள்கள் எனப்படும் குறிவிளக்கத்திற்கு அவை முரண் படுகின்றன என்று அலன் ஸ்டெர்ன் போல் எதிர்ப்பவரும் சிலர் இருக்கிறார்கள். பின்னால் IAU விஞ்ஞானிகளின் குறிவிளக்கத்துக்கு மேம்பட்ட செம்மை விளக்கமும் வெளிவந்தது.

மேம்பட்ட குறிவிளக்கம் :

1. விண்மீன் ஒன்றைச் சுற்றி வருவது கோள்.

2. பெரிதாக உருண்டை வடிவில் இருப்பது கோள்.

3. அது பழுப்புக் குள்ளிபோல் (Brown Dwarf) ஆகப் பெரிதாக இருக்கக் கூடாது. 13-75 மடங்கு நிறையுள்ள வியாழக் கோள் அல்லது விண்மீன் போல “தவறிய விண்மீனாக (Failed Star) இருக்கக் கூடாது.

கோள்களின் குறிவிளக்கம் எதிர்காலத்தில் நுட்பமாக இன்னும் செம்மைப்படலாம் அல்லது மாறலாம். 21 ஆம் நூற்றாண்டு புதுக் குறிவிளக்கப்படி மைய நிறையுடைய பரிதியை எட்டுக் கோள்களும், நான்கு குள்ளிக் கோள்களும், மற்றும் எண்ணற்ற சிறு அண்டங்களும் (Small Bodies) சுற்றி வருகின்றன !

புளுடோவின் நீள்வட்டக் கோணச் சுற்றுவீதி !

பரிதியைச் சுற்றி வரும் புளுடோவின் நீள்வட்டச் சுற்றுவீதி மட்டும் மற்ற கோள்களின் சீர் மட்ட வீதிகள் போலின்றி 17 டிகிரிக் கோணத்தில் சாய்ந்துள்ளது. மேலும் அதன் சுற்று வீதி நெப்டியூன் சுற்றுவீதியைத் தனித்துவ நிலையில் இரண்டு இடங்களில் வெட்டிக் குறுக்கிடுகிறது ! மேலும் புளுடோவின் நீள்வட்ட வீதி கியூபெர் வளையத்தை ஊடுருவிச் சென்று மீள்கிறது. நெப்டியூனும், புளுடோவும் தம் பாதைகளில் சுற்றிவரும் போது எப்போதாவது இரண்டும் ஒன்றை ஒன்று நெருங்கும் தருணத்தில் புளுடோ நெப்டியூனில் மோதித் தகர்ந்து போய் விடலாம். அல்லது நெப்டியூன் ஈர்ப்பு மண்டலத்தில் புளுடோ சிக்கிக் கொண்டு, நிரந்தரமாய் அதன் துணைக்கோளாகி விடலாம் ! அத்தகையதோர் விந்தைக் காட்சி எப்போது நிகழும் என்று கணனி மூலம் நுட்பமாகக் காலத்தைக் கண்டு விடலாம் !

ஒளிநிறப் பட்டை ஆய்வில் [Spectroscopic Analysis] புளுடோவில் எந்த வித வாயும் இருப்பதாக அறிய முடிய வில்லை. புளுடோவின் வாயு அழுத்தம் மிக மிக பலவீன மானது. காரணம், புளுடோ மண்டலத்தின் கடும் குளிரில் [-230 டிகிரி C] ஹைடிரஜன், ஹீலியம் தவிர மற்ற எல்லா வாயுக்களும் குளிர்த் திரவமாகும்; அல்லது தணிவு [Liquefied or Frozen] நிலை பெறும்! புளுடோ வலுவற்ற ஈர்ப்பு சக்தி கொண்டுள்ளதால், தணிவாகாத வாயுக்கள் விண்வெளியில் பறந்து போய்விடும்! புளுடோ ஒரு காலத்தில் நெப்டியூன் கோளுக்குச் சந்திரனாய் இருந்து, ஓடுகாலித் துணைக் கோளாய்த் [Runaway Satellite] தன்னை விடுவித்துக் கொண்டு பின்னல் பிரிந்திருக்கக் கூடும் என்று எண்ணப் படுகிறது!

சூரிய மண்டலம் எப்போது தோன்றியது ?

வானியல் விஞ்ஞானிகளும், பூதளவாதிகளும் (Astronomers & Geologists) பூமியின் வயதைக் கணித்து அதிலிருந்து பரிதி மண்டலத்தின் தோற்ற வயதை அறியப் பல்வேறு முறைகளைக் கையாள்கிறார். நாமறிந்த பூமிப் பாறைகளின் கதிரியக்கத் தேய்வு வீதங்களைப் “பாறைக் கதிரளப்புக் காலக் கணிப்பு” மூலம் (Radiometric Dating of Rocks) கணக்கிட்டுச் சூரிய குடும்பம் சுமார் 4.6 பில்லியன் ஆண்டுக்கு முன்பு தோன்றியிருக்கலாம் என்று கருதுகிறார்கள். பூமியின் பூர்வீகப் பாறை வயது கதிரியக்கத் தேய்வு வீதக் கணிப்பில் 3.9 பில்லியன் ஆண்டுகள் என்பது தெரிய வருகிறது ! பூதளத்தட்டு நகர்ச்சிகள் (Plate Tectonics) தூண்டி பூமியில் எழும் பூகம்ப எரிமலை நிகழ்ச்சிகளால் பூர்வீகப் பாறைகள் நிலைமாறி அவற்றைக் காண முடியாமல் சிதைத்து விடுகின்றன !

பூமியின் பூர்வீகப் பாறைகளைத் தவிர விண்வெளிக் கற்கள், எரிகற்கள், நிலவிலிருந்து அல்லது செவ்வாய்க் கோளிலிருந்து வீழும் விண்கற்கள் மிகத் துல்லியமாகப் பரிதி மண்டல வயதுக் காலத்தை நிர்ணயம் செய்ய உதவுகின்றன. அந்த மாதிரிகளின் கதிரியக்கத் தேய்வு வீதத்தைக் கணித்ததில் அவை 4.6 பில்லியன் ஆண்டு வயதைக் கொண்டவை என்று அறியப்பட்டு, பரிதி மண்டலம் அந்த வயதை ஒட்டி உண்டாகி இருக்க வேண்டும் என்று யூகிக்கப்படுகிறது.

சூரிய குடும்பத்திலே மிகச் சிறிய புறக்கோள் புளுடோ!

இருபதாம் நூற்றாண்டில் விஞ்ஞானிகள் கண்டுபிடித்த இரண்டு புறக்கோள்களில் [Outer Planets] ஒன்று, புளுடோ. மற்றொன்று அதைச் சுற்றி வரும் அதன் துணைக்கோள், சாரன் (Charon). இரண்டும் விண்வெளியில் வெகு தூரத்தில் மிகவும் மங்கிப்போய் தெரியும் கோள்கள். சூரிய குடும்பத்தின் ஒன்பதாவது கோளான புளுடோவை, அமெரிக்க வானியல் விஞ்ஞானி, கிளைடு டாம்பாக் [Clyde Tombaugh] 1930 ஆம் ஆண்டில் கண்டு பிடித்தார். ரோமானியக் ‘கீழுலகக் கடவுள்’ [God of the Underworld] புளுடோவின் பெயரால், புதுக் கோள் பெயரிடப் பட்டது.

நெப்டியூன் கண்டுபிடிக்கப் பட்டதுபோல், புளுடோவும் வானியல் கணித முறைப்படி ஊகித்துக் கண்டு பிடிக்கப் பட்ட ஒரு கோள்! நெப்டியூன் சுற்றி வரும் வீதி, எதிர்பார்த்த பாதை போல் இல்லாமல் புதிராக இருந்தது! இருபதாம் நூற்றாண்டின் ஆரம்பத்தில் [1905-1916] அமெரிக்க வானியல் விஞ்ஞானிகள், பெர்ஸிவல் லோவெல் [Percival Lowell], வில்லியம் பிக்கரிங் [William Pickering] இருவரும், ஒளிந்து கொண்டுள்ள ஏதோ ஒரு புறக்கோள் பாதைத் திரிபு [Straying from the Path] செய்து வருகிறது, என்று உறுதியாக நம்பினார்கள்! அந்த நம்பிக்கையில் ஜமெய்கா மண்டவில் நோக்ககத்தில் [Observatory Mandeville, Jamaica] பிக்கரிங், புதுக் கோள் இருப்பிடத்தைக் கணித்துக், குறிப்பிட்ட விண்வெளியில் தொலை நோக்கி மூலம் தேடினார். அதே போல் லோவெல், பிளாக்ஸ்டாஃப், அரிஸோனா நோக்ககத்தில் [Observatory Flagstaff, Arizona] முயன்றார். பல வருடங்கள் தேடியும், இரண்டு விஞ்ஞானிகளும் புதுக்கோளைக் கண்டு பிடிக்க முடியவில்லை!

இருவரும் காலஞ் சென்றபின், 1930 இல் அவரது கணிதக் குறிப்புக்களைப் பயன்படுத்தி ஓரிளைய வானியல் விஞ்ஞானி கிளைடு டாம்பாஹ் [Clyde Tombaugh], தனது புதிய தொலை நோக்கி மூலம், பல இரவுகள் தொடர்ந்து வானத்தை வேட்டையாடிக் களைத்துக் கடைசியில் [Feb 18, 1930] புதிர்க் கோளைக் கண்டு பிடித்தார். ஆனால் சில நாட்கள் பொறுத்து லோவெல் பிறந்த நாளன்று, 1930 மார்ச் 13 இல் புதுக்கோள் புளுடோ கண்டு பிடிப்பை உலகுக்கு அறிவித்தார்.

புளுடோவைப் பற்றிய வானியல் தகவல்

புளுடோவின் துணைக்கோள் சாரன் [Charon] 1977 இல் கண்டு பிடிக்கப் பட்டது. புளுடோவை 12,000 மைல் தூரத்தில் சுற்றி வருகிறது சாரன். மங்கலான புளுடோவின் விட்டத்தைக் கணக்கிடுவது மிகவும் கடினம்! 1994 இல் பூமியின் வட்ட வீதியில் சுற்றி வரும் ஹப்பிள் விண்தொலை நோக்கி [Hubble Space Telescope] புளுடோ [1410 மைல்], சாரன் [790 மைல்] என்று இரண்டு கோள்களின் விட்டங்களை மிகவும் துள்ளியமாக கணக்கிட உதவியது. புளுடோவின் வடிவை ஒப்பு நோக்கினால், புதன் கோளின் விட்டம் 3030 மைல், பூமி நிலவின் விட்டம் 2100 மைல்.

பரிதிலிருந்து 3.7 பில்லியன் மைல் தூரத்தில் சூரிய குடும்பத்தின் புறவெளிக் கோளாக யுரேனஸ், நெப்டியூன் இரண்டுக்கும் அப்பால், புளுடோ சுமார் 248 ஆண்டுகளுக்கு ஒரு முறைப் பரிதியைச் சுற்றி வருகிறது. புளுடோ தன்னைத் தானே ஒருமுறைச் சுற்ற சுமார் 6 நாட்கள் எடுக்கிறது. புதுக்கோள் புளுடோ பரிதியைச் சுற்றி வரும் நீண்ட நீள்வட்ட வீதி மட்டம் [Elongated Elliptical Orbital Plane], மற்ற சூரியக் கோள்கள் சுற்றும் நீள்வட்ட வீதி மட்டத்திற்கு 17 டிகிரி சாய்ந்துள்ளது, ஒரு சிறப்பான வேறுபாடு! நீண்ட நீள்வட்டத்தில் சுற்றும் புளுடோ ஒரே ஒரு கோள்தான் பரிதிக்கருகில் வரும் போது, நெப்டியூன் வீதியைக் குறுக்கிட்டு [Transit], நெப்டியூனுக்கும் முன்னே புகுந்து, பரிதியை மிகவும் நெருங்குகிறது! 1989 இல் புளுடோ அவ்வாறு நீண்ட நீள்வட்டத்தில் பவனி வந்து குறுக்கீடு செய்து, பரிதியைச் சிறு ஆரத்தில் [Perihelion] மிகவும் நெருங்கியது. பிறகு 124 ஆண்டுகள் [248/2=124] கழித்து 2113 இல் புளுடோ பரிதிக்கு உச்ச தூரத்தில், [நீள் ஆரத்தில் Aphelion] பயணம் செய்து திரும்பி, அடுத்து 124 ஆண்கள் தாண்டி கி.பி 2237 இல் மீண்டும் பரிதிக்கு அருகே வரும்!

பரிதி மண்டலப் படைப்பில் தீர்க்கப்படாத சில புதிர்கள் !

அண்டக் கோள்கள் ஏன் பரிதியை நீள்வட்ட வீதிகளில் ஒரே தளமட்டத்தில் சுற்றுகின்றன ? அவற்றின் சீரொழுக்க இயக்க முறைக்கு என்ன காரணிகள் உள்ளன ? அகக்கோள்களும், புறக்கோள்களும் சூரியனை ஏன் எதிர்க் கடிகார முறையில் காலம் மாறாமல் சுற்றி வருகின்றன ? சூரியனை மற்ற கோள்கள் போலின்றித் தன்னச்சில் சுக்கிரன் மட்டும் ஏன் நேர்க் கடிகார வக்கிர திசையில் சுற்றி வருகிறது ? பூமியின் நிலவு தன்னச்சில் சுழாது ஏன் ஒரே முகத்தைக் காட்டிக் கொண்டு புது மாதிரிச் சுற்றி வருகிறது ? தன்னச்சில் கோள்களும் எதிர்க் கடிகாரச் சுழற்சியில் சுழல்வது ஏன் ? கோள்களின் துணைக்கோள்களும் எதிர்க் கடிகாரச் சுழற்சியில் சுற்றுவது ஏன் ? இந்த விந்தைகள் அனைத்தும் நிபுளாக் கோட்பாடு கூறும் “சுழற்தட்டு அமைப்பு” விதியைப் பெரும்பாலும் நிரூபிக்கின்றன.

(தொடரும்)

++++++++++++++++++++++++++

தகவல்:

Picture Credits: NASA, JPL; National Geographic; Time Magazine, Discovery, Scientific American & Astronomy Magazines.

1. Our Universe – National Geographic Picture Atlas By: Roy A. Gallant (1986)
2. 50 Greatest Mysteries of the Universe – How Many Planets are in the Solar System ? (Aug 21, 2007)
3. Astronomy Facts File Dictionary (1986)
4. The Practical Astronomer By Brian Jones & Stephen Edberg (1990)
5. Sky & Telescope – Why Did Venus Lose Water ? [April 2008]
6. Cosmos By Carl Sagan (1980)
7. Dictionary of Science – Webster’s New world [1998]
8. The Universe Story By : Brian Swimme & Thomas Berry (1992)
9. Atlas of the Skies – An Astronomy Reference Book (2005)
10 Hyperspace By : Michio kaku (1994)
11 Universe Sixth Edition By: Roger Freedman & William Kaufmann III (2002)
12 Physics for the Rest of Us By : Roger Jones (1992)
13 National Geographic – Frontiers of Scince – The Family of the Sun (1982)
14 National Geographic – Living with a Stormy Star – The Sun (July 2004)
15 The World Book of Atlas : Anatomy of Earth & Atmosphere (1984)
16 Earth Science & Environment By : Dr. Graham Thompson & Dr. Jonathan Turk (1993)
17 The Geographical Atlas of the World, University of London (1993).
18 Hutchinson Encyclopedia of Earth Edited By : Peter Smith (1985)
19 A Pocket Guide to the Stars & Planets By: Duncan John (2006)
20 Astronomy Magazine – What Secrets Lurk in the Brightest Galaxies ? By Bruce Dorminey (March 2007)
21 National Geographic Magazine – Dicovering the First Galaxies By : Ron Cowen (Feb 2003)
22 Astronomy Magazine Cosmos – The First Planet By : Ray Villard & Adolf Schaller & Searching for Other Earths By : Ray Jayawardhana [Jan 2007]
23 Discover Magazine – Unseen Universe Solar System Confidential [Jan 2007]
24 A Discover Special – Unseen Universe – Comets Captured By : Jack McClintock (Jan 31, 2007)
25 Newsweek Magazine : The New Solar System – Our Changing View of the Universe – Requiem for a Planet Pluto (1930-2006) By : Jerry Adler
26 http://www.thinnai.com/?module=displaystory&story_id=40804172&format=html(Creation of Solar System Planets)
27 http://www.thinnai.com/?module=displaystory&story_id=40207221&format=html(புதனும், புளுடோவும்)
28 Solar System Formation By Jeff Scott (October 16, 2005)
29 New Scientist Magazine – New Planet Definition Sparks Furore (August 25, 2006)

29(a) http://www.bizjournals.com/houston/prnewswire/press_releases/Texas/2017/03/13/DC35759

30. http://www.space.com/43-pluto-the-ninth-planet-that-was-a-dwarf.html [March 22, 2015]

31. http://sci-techuniverse.blogspot.ca/2017/03/scientists-make-case-to-restore-plutos.html

32. http://www.spacedaily.com/reports/Scientists_make_the_case_to_restore_Plutos_planet_status_999.html [March 21, 2017]

33. https://en.wikipedia.org/wiki/Pluto [March 23, 2017]

34. http://10times.com/planetary-science-conference [March 20-24, 2017]

35. http://www.hou.usra.edu/meetings/lpsc2017/events/education/ [March 20-24, 2017]

******************
S. Jayabarathan [jayabarathans@gmail.com] (March 24, 2017) [R-1]
March 26, 2017
அகில உலக ஆன்மீக மாநாடு – மலேசியா

பவள சங்கரி

ஆன்மீகம் பேசும்போது ஆன்மா ஒளி பெறுவதால் அளவிலா ஆனந்தமும், ஓர் ஆழ்ந்த அமைதியும் பேச்சில் கூட வெளிப்படும் போல.. தாவரத்தின் வளர்ச்சிக்கு நீர், காற்று, ஒளி தேவை. நீர், காற்று, உணவு, சூரிய ஒளியுடன் வளரும் நம் ஜீவ உடல். நம் ஆத்மாவின் வளர்ச்சிக்கு நாம் அளிக்க வேண்டிய சக்தி எது?

பவானி, சத்தியத்தின் சக்திநிலைச் சங்கம் , மெய்ஞ்ஞான தியான மையத்தின் தலைவர் கவாலியர் முனைவர் மதிவாணன் அவர்கள் சார்பில் ஸ்ரீலஸ்ரீ வாலைச்சித்தர் சுவாமிகள் மலேசிய நாட்டிலிருந்து வந்திருந்து, ஜூன் 9,10,11 ஆகிய நாட்களில் மலேசியா, கோலாலம்பூர், பத்துமலை, சுப்பிரமணியர் திருக்கோவிலில் நடைபெறும் அகில உலக ஆன்மீக மாநாட்டில் கலந்துகொள்ள அழைப்புவிடுக்கும் பொருட்டும் ஈரோடு செங்குந்தர் மேல்நிலைப்பள்ளியில் நடந்த கூட்டத்தில் கலந்துகொண்டு ஆசி வழங்கினார்கள். இத்தகையதொரு அற்புதமான மேடையில் எனக்கும் ஒரு இடம் கிடைத்தது இறையருள் என்றே கொள்ளமுடிகிறது!. ஆன்மீக மாநாட்டில் கலந்துகொள்ள விரும்புவோர் கிழ்கண்ட தொலைபேசி எண்களில் தொடர்புகொள்ளலாம்.

98940 64755, 99440 77789.

March 25, 2017
கேசவ் வண்ணம் – கிரேசி எண்ணம்

”தொப்புள் கொடியுச்சி தாமரையில் நான்முகர்
அப்புள்ளைக் கண்டஞ்சி அச்சுதர்க்கு, -தப்பில்லாமல்
தோற்றம்(உயிர்கள்) படைப்பதாய் தாமுவுக்கு வாக்குறுதி:
சீற்றமிகு அண்ணன் (பலராமச் சேடர்) சாட் சி’’….! கிரேசி மோகன்….!

SRI AUROBINDO
————————-

BEYOND PERSONALITY THE MAYAVADIN
SEES INDEFINABLE EXISTANCE; I FOLLOWED
HIM THERE AND FOUND MY ”KRISHNA”
BEYOND IN INDEFINABLE PERSONALITY….05-03-2012

முடிந்தவரை மொழிபெயர்ப்பு
————————————
நேதிநேதி என்று நினைப்பைக் கடந்தமாயா
வாதிகள் கண்டனர் வாழ்விருப்பை -பாதையில்
சென்றன்று கண்டேன்காண் கன்றன்று மேய்த்தோனை;
ஒன்றென்று உள்ளம் உவப்பு….

March 25, 2017
கேசவ் வண்ணம் – கிரேசி எண்ணம்

’’ஆயர்தம் மாளிகையில் ஆவதற்கு அன்னைபோல்
தாயன்பைக் காட்டுகிறார் தாலேலோ: -மாயவரின்
கால் வருடிடும் கன்றுக்(கு) கண்ணனவர்
பால்ஊட்டும் பாதம்ஆப் பிள்’’….கிரேசி மோகன்….!

‘’ஊட்டிக்கே ஆப்பிளா’’ போல ‘’பசுவுக்கே பால்”(பாத பால்-பாதாம்பால்)….!

March 24, 2017
கண்ணீர் அஞ்சலி

எழுத்துலக மேதை, தலைசிறந்த தமிழ் படைப்பாளி திரு . அசோகமித்திரன் அவர்களின் மறைவிற்கு வல்லமையின் கண்ணீர் அஞ்சலி. அவர்தம் ஆன்மா சாந்தியடைய பிரார்த்தனைகள்!

அசோகமித்திரன் படைப்புகள்

சிறுகதைத் தொகுப்புகள்
நாடகத்தின் முடிவு
வாழ்விலே ஒருமுறை
விமோசனம் விடுதலை
காலமும் ஐந்து குழந்தைகளும்
முறைப்பெண்
அப்பாவின் சினேகிதர்
பிப்லப் சௌதுரியின் கடன்
நாவல்கள்
பதினெட்டாவது அட்சக்கோடு
தண்ணீர்
இன்று
ஆகாசத்தாமரை
ஒற்றன்
மானசரோவர்
கரைந்த நிழல்கள்
குறுநாவல்கள்
இருவர்
விடுதலை
தீபம்
விழா மாலைப் போதில்
அசோகமித்திரன் கதைகள் தொகுப்பு 1&2
கட்டுரைகள்
அசோகமித்திரன் கட்டுரைகள் தொகுப்பு 1&2

March 24, 2017
எழிலரசி கிளியோபாத்ரா (7)

எழிலரசி கிளியோபாத்ரா

[பேரங்க நாடகம்]

மூலம்: ஷேக்ஸ்பியர் & பெர்னாட்ஷா
தமிழாக்கம்: சி. ஜெயபாரதன், கனடா

அங்கம் -2 பாகம் -7

கிளிபாத்ரா ஓர் நாகப் பாம்பு! பார்க்க அழகாக இருக்கிறது! ஆனால் பக்கத்தில் நெருங்கினால் பாம்பு கொட்டி விடும்!”

டாலமி XIII

ஓ! உன்னத வாழ்வே!
விலை மதிப்பிலா ஒளிக்கற்கள்,
வேண்டாம் எனக்கு!
நீண்ட நாள் வாழ்ந்திட மட்டும்
வேண்டி நிற்பவள் நான்!

சாதாரணச் சமயத்தில் கூட
இருபது முறை பாவை யவள்
சாவதைப் பார்த்தி ருக்கிறேன்!
மரணமும் வலையை வீசி
மாதின் மீது காதல் கொள்கிறது!
மரணமும் மயங்கிக் கரம் பற்றும் புகழ்மாது!

வில்லியம் ஷேக்ஸ்பியர் [அண்டனி & கிளியோபாத்ரா]

நேரம், இடம்:

அலெக்ஸாண்டிரியாவில் எகிப்த் மன்னர் அரண்மனை. ·பாரோ மன்னர் வரலாற்று ஓவியங்கள் உயர்ந்த சுவர்களை அலங்கரிக்கின்றன. பகல் வேளை.

நாடகப் பாத்திரங்கள்:

பால்ய அரசன் டாலமி, போதினஸ், தியோடோடஸ், அக்கில்லஸ், ஜூலியஸ் சீஸர், ரூபியோ, ரோமானியக் காவலர், எகிப்தின் படையினர், கிளியோபாத்ரா, கம்பள வணிகன், பணியாளி.

கிளியோபாத்ரா: [கனிவுடன் சீஸரைப் பார்த்து] ரோமாபுரித் தளபதியாரே! கப்பநிதி கட்ட நான் தயார்! இரண்டு நிபந்தனைகள் அதற்கு! முதல் நிபந்தனை டாலமி அகற்றப்பட வேண்டும்! இரண்டாவது நான் எகிப்தின் தனி ராணியாக மகுடம் சூடி ஆசனத்தில் அமர வேண்டும்! அருமை நண்பரே! நாமிருவரும் ஒன்று சேர்ந்தால் இந்த உலகையே கைப்பற்றலாம்! எனது பெரியப்பா மகா அலெக்ஸாண்டர் கிழக்கே சென்று இந்தியாவைக் கைப்பற்றினார்! அந்தப் பாதை எனக்குத் தெரியும்! நாமிருவரும் சேர்ந்தால் நமது பராக்கிரமத்தால் சீனாவைக் கூடப் பிடித்து விடலாம்!

டாலமி: [கோவென அழத் தொடங்குகிறான்] ஜெனரல் சீஸர்! என்னைக் காப்பாற்றுங்கள். எகிப்தை என்னிடமிருந்து பறிக்காதீர். நாடோடி நங்கைக்கு மகுடம் சூட்டாதீர். கிளியோபாத்ரா ஓர் நாகப் பாம்பு! பார்க்க அழகாக இருக்கிறது பாம்பு! ஆனால் பக்கத்தில் நெருங்கினால் பாம்பு கொட்டி விடும்! எச்சரிக்கை செய்கிறேன்! உமது உடைவாளை உருவி, என்னை ஒரு நொடியில் கீழே தள்ளி விட்டாள். அவள் சொல்லைக் கேட்டு என்னை அகற்றி விடாதீர்! எனக்கு நீங்கள்தான் அடைக்கலம் தரவேண்டும்.

ஜூலியஸ் சீஸர்: [டாலமியைத் தட்டிக் கொடுத்து] கவலைப் படாதே, டாலமி! உன் உயிருக்கு ஒரு கேடும் வராது! உன்னைக் காப்பது என் பொறுப்பு. நீயும், அவளும் சேர்ந்து வாழ வேண்டும் என்பது என் ஆசை! அதை நிறைவேற்றி வைப்பது என் கடமை!

போதினஸ்: [கோபத்துடன்] ஜெனரல் சீஸர் அவர்களே! உண்மையைச் சொல்லுங்கள்! நீங்கள் வற்புறுத்திக் கேட்கும் பெருந்தொகை எங்கள் விடுதலை வாங்க யாம் உமக்கு அளிக்கும் விலைப்பணம்! தருகிறோம் உமக்கு! ஆனால் வாங்கிக் கொண்டு திரும்பிப் பார்க்காது செல்ல வேண்டும் நீங்கள்! எங்கள் அரசியல் பிரச்சனைகளில் தலையிட வேண்டாம்! எம் தோளிலிலிருந்து இறங்குவீர்! நீங்களும் உங்கள் படைகளும் பணத்தைப் பெற்றுக் கொண்டு உடனே வெளியேறுங்கள்! எகிப்த் நாடு எகிப்தியருக்கு உரிமை யானது!

ஜூலியஸ் சீஸர்: [வெடித்துச் சிரிக்கிறார்] நல்ல வேண்டுகோள் போதினஸ்! எகிப்து ரோமாபுரியின் ஆக்கிரமிப்பு நாடு! எங்களை யாரும் விரட்ட முடியாது!

கிளியோபாத்ரா: [கெஞ்சலாக] மேன்மைமிகு ஜெனரல் அவர்களே! நீங்கள் வெளியேறக் கூடாது! ரோமானியப் படை வெளியேறினால் நான் எகிப்தின் ராணியாக முடியாது! டாலமிக் கழுகுகள் என்னை உயிரோடு தின்றுவிடும்! உங்கள் பாதுகாப்பில்தான் நான் எகிப்தை ஆள முடியும்! அரண்மனையை விட்டு உங்கள் படையினர் நீங்கினாலும், நீங்கள் தங்கி யிருக்க வேண்டும்!

ரூஃபியோ: [கொதிப்புடன்] போதினஸ்! வாயை மூடு! எகிப்த் நாடு எகிப்தியருக்குத்தான்! ஆனால் ரோமாபுரிப் படையன்று எகிப்தில் பல்லாண்டு காலம் உள்ளதை மறந்தீரா? எகிப்த் நாடு ரோமாபுரிக்குக் கீழிருப்பதை மறந்தீரா? யாமிதை விட்டு நீங்க மட்டோம்! மதிப்புடன் உரையாடி மதிப்பைப் பெறாமல் நாக்கு பிறழ்வதைக் காண்கிறோம்! எச்சரிக்கை செய்கிறேன்! அறிவோடு உரையாடுவீர்! சிறிய பாலகன் போல் பேசாதீர்!

ஜூலியஸ் சீஸர்: [கனிவுடன் கிளியோபாத்ராவை அணுகி] கண்ணே, கிளியோபாத்ரா! உன்னை எகிப்துக்குப் பட்டத்து ராணியாக மகுடம் சூட வைப்பது என் பொறுப்பு! டாலமி இன்னும் பாலகனாக இருப்பது எமக்கு வருத்தமாக உள்ளது! நானிதைச் சற்றும் எதிர்பார்க்க வில்லை! மன்னர் டாலமி பொம்மை ராஜாவாக ஆசனத்தில் அமர, அமைச்சர் போதினஸ் உண்மை ராஜாவாக ஆள்வதை நான் விரும்பவில்லை!

அக்கிலஸ்: [சினத்துடன்] ஜெனரல் அவர்களே! உமது தவறான கூற்றை நான் ஏற்றுக் கொள்ள மாட்டேன்! எமது மன்னர் டாலமியை ஆசனத்திலிருந்து நீக்க உமக்கு எந்த உரிமையுமில்லை! எமது விரோதி கிளியோபாத்ராவை எகிப்துக்கு ராணி ஆக்கவும் உமக்கு உரிமை யில்லை! ஒருதலைப்பட்ட உமது முயற்சி நாட்டில் குழப்பத்தை உண்டாக்கும்!

தியோடோடஸ்: ஜெனரல் சீஸர் அவர்களே! எகிப்த் நாட்டுக்கு வருகை தந்த நீங்கள் எமக்குப் புதியவர்! எங்கள் நாகரீகம் அறியாதவர்! எங்கள் கலாச்சாரம் புரியாதவர்! யார் நாட்டை ஆளத்தகுதி உள்ளவர் என்பது எமக்குத்தான் தெரியும்! உமக்குத் தெரியாது! எகிப்தை ஒரு பெண்ணரசி ஆள்வது எனக்கு அறவே பிடிக்கவில்லை! காலை முதல் மாலை வரை கண்ணாடி முன்னின்று தனது வனப்பை எப்படி மிகையாக்குவது என்பதிலே காலம் களிப்பவர்! நாட்டைக் கவனிக்க பெண்ணரசிக்கு நேரம் ஏது? நினைப்பேது? கிளியோபாத்ராவை உயிரோடு நாடு கடத்தியது எமது தவறே! அவள் தற்போது உமது நிழலில் நின்று கொண்டு மன்னர் டால்மியின் ஆசனத்தைப் பிடுங்கப் பார்க்கிறாள்!

கிளியோபாத்ரா: [கைவாளை தியோடோடஸ் கழுத்தருகில் நீட்ட, தியோடோடஸ் நடுங்குகிறார்] கிழட்டுக் குருவே! எமது உப்பைத் தின்று உமக்குத் திமிர் மிஞ்சி விட்டது! டாலமிக்கு கூட்டல், கழித்தலைத் தவிர, பெருக்கல், வகுத்தல் தெரியாது. பிரமிடில் ஒளிந்திருக்கும் வான சாஸ்திரம் தெரியாது! வானத்தில் பரிதிக்குப் பக்கம் எந்த கோள் சுற்றுகிறது என்பது தெரியாது. சூரிய கிரகணம் எப்படி வருகுது என்று அறிய மாட்டான்! பிரமிடை அவனுக்காகக் கட்டினாலும், பித்தகோரஸ் கோட்பாடு தெரியாத மடையன்! கிழட்டுக் குருவே! எனக்கு நீவீர் சொல்லிக் கொடுத்த எதுவும் டாலமியின் மண்டை ஒட்டுக்குள் ஏன் நுழைய வில்லை? எனக்குள்ள அறிவும், ஞானமும், திறனும் அவனுக்குக் கிடையாது! அவன் பொம்மை ராஜாவாக இருந்தால், உம்மைப் போன்ற அரசாங்க ஊழியருக்குக் கொண்டாட்டம்தான்!

ஜூலியஸ் சீஸர்: [மிகவும் ஆச்சரியமடைந்து, கிளியோபாத்ராவின் கூந்தலைத் தடவி] மெச்சுகிறேன் கிளியோபாத்ரா! இருபது வயதுக் குமரிக்கு எத்தனை ஞானம் உள்ளது? பிரமிடின் அமைப்புக்கு வரைகணித மூலமான பித்தகோரஸ் கோட்பாடு உனக்குத் தெரியுமா? எனக்குக் கூடத் தெரியாதே! குருநாதரைப் படபட வென்று வெளுத்துக் காயப் போட்டு விட்டாயே! ஐயமின்றி எகிப்தை ஆளத் தகுதி பெற்ற பெண்ணரசி நீதான்! நீ ஒருத்திதான்! பாராட்டுகிறேன் உன்னை! எகிப்தின் பேரரசியாக வர வேண்டுமென உன்னை நீயே தயார் செய்து கொண்டது, என்னை வியப்பில் தள்ளுகிறது! உன்னைப் போலொரு ஞானப் பெண்ணை நான் எங்கும் கண்டதில்லை! நீயே எகிப்தைத் தனியாக ஆட்சி செய்வதை நான் விரும்புகிறேன்! உன்னை ஆசனத்தில் அமர்த்தி மகாராணியாக மகுடம் சூட்டிய பிறகுதான் நான் ரோமுக்கு மீளுவேன்! இது உறுதி!

கிளியோபாத்ரா: [புன்னகையோடு சீஸரின் கன்னத்தைத் தடவி] என்னருமைத் தளபதி! நீங்கள்தான் மெய்யான ரோமாபுரித் தீரர்! என் உள்ளத்தைக் கொள்ளை கொண்ட நண்பர்! என்னருமை நண்பர்! நீங்கள் எகிப்தை விட்டு ஏன் ரோமுக்குப் போக வேண்டும்? இங்கே எமது அரண்மனை விருந்தினராகத் தங்கி சில காலம் இருக்க வேண்டும்!

ஜூலியஸ் சீஸர்: என்னருமைக் கிளியோபாத்ரா! அது முடியாது! நான் ரோமாபுரிக்கு உடனே மீள வேண்டும்! கவலைப் படாதே! உன்னை எகிப்தின் ராணியாக ஆக்கிய பிறகுதான் செல்வேன்.

கிளியோபாத்ரா: நீங்கள் எகிப்தை விட்டு நீங்கினால், நான் நிரந்தர ராணியாக ஆட்சி செய்ய முடியாது! ஈதோ பாருங்கள் கழுகுகளை! கண்களில் கனல் பறக்கிறது! உங்கள் துணை அருகில் இல்லா விட்டால், என்னைக் கொன்று விடுவார்! நான் உங்களை விட்டுத் தனியாக எப்படி அரசாளுவேன்?

டாலமி: [கோபத்துடன்] பார்த்தீரா பசப்பியை? குழைந்து, நெளிந்து, மெழுகாய் உருகி விட்ட பாவையை!

தியோடோடஸ்: [சற்று மெதுவாக] மெழுகாய் உருகியது கிளியோபாத்ரா இல்லை! மகா வீரர் ஜூலியஸ் சீஸர்! சில வினாடிகளுக்கு முன்பு டாலமியும், கிளியோபாத்ராவும் ஒன்றாக ஆளப் போவதைக் கனவு கண்டார். சில வினாடிகளில் டாலமியை மறந்தார்! வாலிப மங்கை மீது வாஞ்சை வந்து விட்டது! சீஸர் சரியான ராஜ தந்திரி! சரியான அரசியில்வாதி! சரியான பச்சோந்தி! பாவையைக் கண்டதும் அவரது மோகக் கண்கள் திறந்து விட்டன! எகிப்த் ரோமா புரிக்கு அடிமை நாடு! ஆனால் சீஸர் கிளியோபாத்ராவின் அடிமை! இனிமேல் சீஸர் கிளியோபாத்ராவின் கைப் பொம்மைதான்!

அக்கிலஸ்: [போதினஸ் காதுகளில் மெதுவாக] தெரியுமா உனக்கு! சீஸருக்குச் சென்ற விடமெல்லாம் காதலியர் உண்டு! ஆம் இப்ப்போது எகிப்தில் ஓர் ஆசைக் கிளி! இது எத்தனை நாட்களுக்கோ?

போதினஸ்: [கோபத்துடன்] அக்கிலஸ்! அந்த காதல் பேச்சு உனக்குத் தேவை யில்லை! உனக்கு அறிவிருக்கு மானால், சீக்கிரம் சிறைப்படுத்து கிளியோபாத்ராவை! .. ஏன் தயங்குகிறாய்? போ கைப்பற்று அவளை! [அக்கிலஸ் உருவிய வாளோடு நகர்கிறான்]

ரூபியோ: [கோபத்துடன் வழிமறைத்து] நில் அக்கிலஸ்! நகராதே! மகாராணி கிளியோபாத்ரா பக்கத்தில் அடிவைத்தால், உமது சிரம் அறுபட்டுக் கீழே உருண்டோடும்! அங்கேயே நில்! எகிப்தின் பெண்ணரசிக்கு ரோமாபுரிப் படையினர் பாதுகாப்பு அளிக்கிறோம்! தள்ளி விலகி நில்! … என்ன மடத்தனமான செயலுக்கு உடன்பட்டிருக்கிறாய்? கூடவே ஜெனரல் சீஸரையும் சிறைப்படுத்தப் போகிறீரா? [வெடித்துச் சிரிக்கிறான்]

*********************

March 24, 2017
கு. க

கிரேசி மோகன்
—————

அட, ஒரு பேச்சுக்கு… ஒருவேளை அன்று போலவே இன்றும் வியாசர் விருப்பத்தின் பேரில் மகாபாரதம் மீண்டும் ஒரு தபா நடந்தால்..! அட ஒரு பேச்சுக்கு… அன்று போலவே இன்றும் தர்மபுத்திரர் “நச்சுப்பொய்கையில்” நீர் அருந்த சென்றால்…! அன்று போலவே இன்றும் கண்களுக்குப் புலப்படாத அருவமான அசரீரி யட்சதேவனுக்கும் அரசர் தர்மபுத்திரருக்கும் இடையே கேள்வி – பதில் பகுதி ஆரம்பித்தால்…!

கேள்வி கேட்டுக் குடைய நினைத்த அசரீரிபுரத்து யட்சத்தேவசாமியை அசர வைக்கும் அளவுக்குத் தர்மபுத்திர ராஜா பதில்கள் இன்றைய சூழ்நிலைக்கேற்ப ஏக்குத்தப்பான ரூட்டில் கீழ்க்கண்டவாறு செல்லும்…

அசரீரி: “தர்மபுத்திரா… நச்சுப் பொய்கையில் மயங்கிக் கிடக்கும் உன் தம்பிமார்கள் பிழைக்க வேண்டுமென்றால் நான் கேட்கும் கேள்விகளுக்குச் சரியான பதிலைக் கூறு… உலகிலேயே பெரியது எது?”

தர்மர்: “யட்சதேவா… யாம் அறிந்த வரையில் தற்சமயம் உலகிலேயே பெரியது திருவல்லிக்கேணி சிங்கராச்சாரி தெரு ஒண்டுகுடித்தனத்தில் வசிக்கும் கே.எஸ். சந்தானகோபாலனின் குடும்பம் தான்..!

அசரீரி (வழக்கத்துக்கு விரோதமான பதிலால் குழம்பினார் அசரீரி!): “குந்தியின் புதல்வா… என்ன குழப்புகிறாய்…?

தர்மர்: “குழப்பவில்லை தேவா… சத்தியம் பகிர்கிறேன்… கே.எஸ். சந்தானகோபாலனின் குடும்பத்தில் உள்ள மொத்த உறுப்பினர்களின் எண்ணிக்கை முப்பத்துநான்கு!”

அசரீரி: “என்ன… இன்று இருக்கும் விலைவாசியில் முப்பத்துநான்கு நபர் அடங்கிய குடும்பத்தை சந்தானகோபாலன் குடும்பத்தில் முப்பத்துநான்கு பேரா? தாத்தா, பாட்டி, அப்பா, அம்மா, வெட்டியான சித்தப்பா, விதவை அத்தை, வேலூரிலிருந்து வந்து நிரந்தரமாகத் தங்கிவிட்ட மாமா என்று பட்டியல் போட்டால் கூட முப்பத்துநான்கு தேரவில்லையே… சொல்ல வந்ததை நேரடியாக சொல்…”

தர்மர்: “உம்… மொத்தம் முப்பத்துநான்கு பேர்… சந்தானகோபாலன்… சகதர்மி சகுந்தலா… இவர்கள் இருவரது இருபது வருட மனைமாட்சியின் மகத்தான சாதனையாக முப்பத்திரெண்டு மக்கட் செல்வங்கள்…! கணக்கு சரியா…?

அசரீரி: என்னது! சந்தானகோபாலன் – சகுந்தலா தம்பதிக்கு முப்பத்திரெண்டு குழந்தைகளா…?

தர்மர்: “ஆம் தேவா… அந்த முப்பத்திரெண்டு குழந்தைகழில் பதினாறு ஆண் குழந்தைகள்… பதினைந்து பெண் குழந்தைகள்…”

அசரீரி: “நீ சொல்வதை பார்த்தால் முப்பத்தொன்றுதானே வருகிறது… எப்படி முப்பத்திரெண்டு என்று கூறினாய்…?

தர்மர்: “முப்பத்திரெண்டாவது குழந்தை ஆணா பெண்ணா என்று அறிவதற்கு நாம் இன்னும் ஏழு மாதங்கள் பொறுத்திருக்க வேண்டும். ஆம் சகுந்தலாவுக்கு இது மூன்றாவது மாதம்!”

அசரீரி: (தர்மபுத்திரரை மடக்க வந்த அசரீரிக்கு சந்தானகோபாலன் – சகுந்தலா குடும்பப் புள்ளிவிவரக் கணக்கில் மாட்டிக் கொண்டு விழி பிதுங்கியது…): அப்போ… இனிமேல்தான் முப்பத்திரெண்டாவது குழந்தை பிறக்க போகிறதா…? தர்ம புத்திரா, ஒரு சந்தேகம் சந்தானகோபாலன் – சகுந்தலா தம்பதி மனித இனத்தை சேர்ந்தவர்களா… இல்லை… முட்டையிட்டுக் குஞ்சு பொரிக்கும் இனத்தை சேர்த்வர்களா…? எனக்கு நேரமாகிறது… எங்கே மளமளவென்று சந்தானகோபாலனின் குழந்தைகளின் பெயர்களை வரிசையாகச் சொல்லிவிட்டு… மயங்கிகிடக்கும் உன் தம்பிமார்களை அழைத்துச் செல்…”

தர்மர்: “யட்சதேவா… இந்தக் கேள்விக்கு சரியான பதிலை கூற குழந்தைகளைப் பெற்ற சந்தானகோபாலனே திணருவான்…”

(இந்தக் கலிகாலத்தில் இப்படியும் ஒரு குடும்பமா என்ற ஆச்சரியத்திலும்… இனிமேலும் சந்தானகோபாலன் சகுந்தலா சம்பந்தபட்ட குடும்ப விஷயத்தில் மாட்டிக்கொண்டு தர்மபுத்திரரிடம் தான் தவிப்பதைத் தவிர்க்கவும்… யட்சதேவன் இந்தப் பதிலைச் சாக்காக வைத்து மயங்குவது போல் நடித்து, தான் உருவாக்கிய நச்சுப் பொய்கையில் தானே தொப்பென்று விழுகிறான்…)

தர்மர் (தம்பிமார்களை எழுப்பிவிட்டு… தனக்குதானே…): இருபது வருட தாம்பபத்யத்தில் முப்பத்திரெண்டு குழந்தைகள் எப்படிப் பொறந்ததுன்னு கேக்கத் துப்பில்லை… இவன்லாம் ஒரு அசரீரி…வாங்கடா..! (தம்பிமார்களோடு தர்மபுத்திரர் செல்கிறார்).

அசரீரி -தர்மர் சம்பாக்ஷிணையை வேண்டுமானால் சந்தானகோபாலன் சகுந்தலா தம்பதியை அறிமுகப்படுத்த எழுதிய கற்பனை உரையாடலாகக் கொள்ளலாம். ஆனால், சந்தானகோபாலன்- சகுந்தலா தம்பதி செய்த இந்த சிசுப்புரட்சி உலகப் பிரசித்தமில்லாவிட்டாலும் உள்ளூர் திருவல்லிக்கேணியில் மிகவும் பிரபலம்! திருவல்லிக்கேணியில் ஒரு சிறு குழந்தையைக் கேட்டால்கூடச் சந்தானகோபாலன் வீட்டை அடையாளம் காட்டும். பாதி சமயங்களில் நாம் அட்ரஸ் கேட்ட அந்தக் குழந்தையே சந்தானகோபாலனின் வம்சவிருட்சத்தில் ஒரு கிளையாக இருக்கும்!

‘அது சரி… எப்படி இருபது வருடத்தில் முப்பத்தோரு குழந்தைகள்…? ஒன்பது மாசக் குழந்தை போல் கணக்கு உதைக்கிறதே…’ என்று அசரீரி சார்பாக நீங்கள் கோரஸாக அலறுவது காதில் விழுகிறது. ஆரம்பத்தில் வருடத்துக்கு ஒரு பிரசவம், பிரசவத்துக்கு ஒரு குழந்தை என்ற நியாயமான விகிதாசாரத்தில் வம்சவிருத்தி செய்ய ஆரம்பித்த சகுந்தலா, ஐ.ந்தாவது ஆண்டிலிருந்து உற்சாகமடைந்து உற்பத்தித் திறனை உயர்த்த ஆரம்பித்தாள். அடுத்த சில ஆண்டுகள்… ஆண் – ஆண், பெண் -பெண், ஆண் -பெண், பெண் – ஆண் என்று பல காம்பினேசன்களில் ப்ளஸ் டூ பிரசவத்தில் ஆர்வம் காட்ட ஆரம்பித்தாள். ரெட்டை என்ற பெயரில் ஒரு குழந்தையோடு இரண்டாவதை இலவச இணைப்பாகக் கொடுத்து அலுத்தவள் அதன் பிறகு ஆவேசமடைந்து ஒரே பிரசவத்தில் பவுண்டரி, சிக்ஸர் என்று ஸ்ரீகாந்த் கணக்காக வேகமாக ஆட ஆரம்பித்தாள்.

சென்ற பிரசவததின்போது சகுந்தலாவை ‘ஸ்கேன்’ செய்து பார்த்த டாக்டர் வெலவெலத்துவிட்டார்! ஸ்கேனிங்கில் கிடைத்த படம் காமிரா ட்ரீக் ஷாட் போல் இருந்தது. ஆம்.ஐந்தாறு குழந்தைகள் அடங்கிய குரூப் போட்டோ. இந்த இருபதாவது பிரசவத்தில் புள்ளிவிவரக் கணக்குப்படி பார்த்தால் சகுந்தலாவிடமிருந்து குறைந்தபட்சம் ஏழு குழந்தை
களாவது எதிர்பார்க்கப்படுகிறது! (கணக்கு வாத்திியார்களா இருக்கும் வாசகர்களே! குழைந்தைகளைக் கூட்டி நம் மீது தவறு கண்டுபிடிக்கவேண்டாம். சந்தானகோபாலனே குழந்தைகள் கணக்கைத் தப்பும் தவறுமாகச் சொல்வது சர்வசாதாரணம்.

இந்த இருபது வருடத்தில் சகுந்தலா மசக்கையாக ஒரு மாமரத்தையோ சாப்பிடிருக்கிறாள்! சந்தானகோபாலன் வீட்டுப் பின்புறம் வளர்ந்த அந்த மாமரம் அடையாறு ஆலமரம் போல் திருவல்லிக்கேணி மாமரம் என்று பெத்த பெயர் வாங்கியது..குழந்தைப்பேறு இல்லாதவர்கள் இப்போது அரசமரத்தைச் சுற்றுவதை ஓல்டு ஃபாஷன் என்று விட்டு விட்டு சந்தானகோபாலன் வீட்டு மாமரத்தைச் சுற்ற ஆரம்பித்துவிட்டார்கள். சந்தானகோபாலன்-சகுந்தலா தம்பதிக்கு வேட்டி புடவை கொடுத்து வேண்டிக்கொண்டு அந்த மாமரத்தில் தூளி கட்டித் தொங்கவிட்டால் ஆண்களுக்கே கர்ப்பம் உண்டாக்கிக் குழந்தை பிறக்கும் என்ற அளவுக்கு நம்பிக்கை வளர்ந்தது!

இத்தனைக்கும் சந்தானகோபாலனும் சரி, சகுந்தலாவும் சரி… அவர்களது பெற்றோருக்கு ஒரே வாரிசு! சந்தானகோபலனைப் பெறுவதற்குக் குடந்தை சீனிவாசன் பட்டபாடு ‘கொஞ்சநஞ்சமல்ல… காசி, ராமேஸ்வரத்தில் ஆரம்பித்து நாகூர் தர்கா, அன்னை வேளாங்கண்ணி என்று ஒரு கோயில் விடவில்லை…

அவரது நாற்பதாவது வயதில் சந்தானகோபாலன் வாராது வந்த மாமணியாக உதித்தான். நாற்பது வயது வரை மலடன் என்ற பெயரில் தந்தை பட்ட கஷ்டத்தை, தன் சார்பாகப் பழிவாங்க ‘ரிவெஞ்ச்’ எடுக்கும் தமிழ் கதாநாயகன் போல் சந்தானகோபாலன் முப்பத்தோரு குழந்தைகளைப் பெற்றுவிட்டான். ஆரம்பத்தில் சந்தானகோபாலன் ஆபீஸில் தன் பெயரைக் குடந்தை சந்தானகோபாலன் என்றுதான் எழுதுவான். நாளாவட்டத்தில் நண்பர்கள் குடந்தை சந்தானகோபலனைக் குழந்தை சந்தானகோபாலன் என்று கூப்பிட ஆரம்பிக்க, தனது இனிஷியலை கெ.எஸ். என்று சுருக்கிக் கொண்டுவிட்டான்.

திருமணத்தன்று “பதினாறும் பெற்றுப் பெருவாழ்வு வாழ்க” என்று சந்தானகோபாலன்-சகுந்தலா தம்பதியைப் பலபேர் தெரியாத்தனமாக வாழ்த்திவிட, இருவரும் அதை வேதவாக்காக ஏற்றுக்கொண்டு, தலா பதினாறு என்று கணக்கு வைத்துப் பெற்றுத்தள்ளி இந்தப் பிரவசத்தோடு முப்பத்திரண்டைத் தொட்டு விழி பிதுங்குகிறார்கள்!

குழந்தைகளுக்குப் பெயர் வைக்கும் விஷயத்தில் சந்தானகோபாலன் சினிமாவுக்குத் தலைப்பு வைக்கும் கதாசிரியன் போல் மண்டையைப் பீய்த்துக் கொள்வான்! எந்தப் பெயர் வைத்தாலும் அந்தப் பெயரில் ஏற்கெனவே ஒரு பிள்ளை இருப்பதைப் பார்த்து அலுத்துப் போன சந்தானகோபாலன், சில குழந்தைகளுக்கு ஐந்து வயதாகியும் இன்னமும் பெயரே வைக்கவில்லை!

மாலையில் வீடு திரும்பியதும் எல்லாக் குழந்தைகளும் வந்துவிட்டதா என்று உறுதிப்படுத்திக்கொள்ள அட்டெண்டன்ஸ் எடுக்க வேண்டிய நிலை, சாப்பாட்டு நேரத்தில் குழந்தைகள் சத்துணவுக்கூடம் போல க்யூவில் நிற்க வேண்டிய நிர்ப்பந்தம். இரவு படுக்கும் நேரம்… இரண்டு குழந்தைகளுக்கிடையே இடைவெளி இல்லாமல் முப்பத்தோரு குழந்தைகளும் மூச்சுத் திணற ஒன்றன்மீது ஒன்று உருள வேண்டிய கட்டாயம்!

ஒரு நாள் இரவு… ஓய்ந்துபோன சந்தானகோபாலன் ‘என்ன செய்தால் வசதியாக வாழலாம்’? என்று யோசித்தபடி வெளியே வர…எதிர்ச்சுவரில் ‘கு.க’ விளம்பரம் கண்ணில் பட்டது. வீட்டுக் குள்ளிருந்து சகுந்தலா வாந்தியெடுக்கும் சத்தம்.. வெறுத்த்துப்போனவன் விறுவிறுவென்று பார்த்தசாரதி கோயிலை அடைந்தான்.

கோயில் பிராகாரத்தில் சந்தானகோபாலனின் புராண கால பார்ட்னர் குசேலர் கதை உபன்யாசம் நடந்து கொண்டிருந்தது.

“ஒரு பிடி அவல் கிருஷ்ணனுக்குக் கொடுத்துக் குசேலன் குபேரனானான்!” – உபன்யாசகர் உரைத்தது இவன் மனத்தில் உரைத்தது! எதிரே உள்ள மளிகைக் கடைக்கு ஓடி உபன்யாசகர் கையால் அபிநயித்துக் காட்டிய ஒரு பிடி அவலை வாங்கிக்கொண்டு சந்நிதிக்கு விரைந்தான்…

அந்த ஒரு பிடி அவலைத் துண்டில் முடிந்து அர்ச்சகர் பார்க்காத சமயம் பெருமாள் பாதத்தில் போட்டுவிட்டு ‘கிருஷ்ணா, உன் கூடப் படிச்சாத்தான் குசேலனா? குழந்தைங்க பெத்தா குசேலன் இல்லையா…? நான் சூப்பர் குசேலன்… என்னைக் குபேரனாக்கமாட்டியா… கரெக்டா ஒரு பிடி அவல் போட்டுட்டேன்… அப்புறம் உன் சௌகரியம்’ – மனசுக்குள் வேண்டிக் கொண்டு வீடு திரும்பினான்.

சந்நிதியில்… ருக்மணி தாயார் பெருமாளைப் பார்த்து “பிரபோ… இது என்ன உங்கள் காலடியில் டவல் நிறைய அவல்?” என்று கேட்டாள். பேசாமலிருந்த பெருமாளின் கண்களில் குசேலன் எபிஸோட் ஃப்ளாஷ்பாக்காக ஓடியது. குசேலன் கதையை ஆக்ஷன் ரீப்ளே செய்து பார்க்கும் ஆர்வம் அவரது நீல நயனங்களில் தோன்றியது.

“வேண்டாம் இந்த விபரீதம். கலி அழகு என்று ருக்மணிதேவி எச்சரித்தாள். அவள் சொல்வதைக் கேட்காமல் தான் எடுத்த முடிவை நிறைவேற்றிப் பார்க்கும் ஆசையில் பெருமாள் சிலையிலிருந்து பிரிந்து மனித வடிவில் சந்நிதியை விட்டு வெளியே வந்து, ‘பெரிய தெரு சீவல் ஸ்டோர்ஸ்’ கடையில் புகையிலை குதப்பும் கலியுகக் குசேலன் சந்தானகோபலனை நோக்கி நடந்தார். சந்தானகோபாலனுக்கு தெரியாமல் அவன் ஜிப்பா பாக்கெட்டில் குலுக்கலில் நீட்சயம் முதல் பரிசு பெறப்போகும் அரியானாவில் ஆரம்பித்து அமிஞ்சிக்கரைவரை உள்ள அத்தனை பம்‌பர் லாட்டரி டிக்கெட்டுகளையும் சொருகி விட்டு வந்த சுவடு தெரியாமல் கிருஷ்ண பரமாத்மா சந்நிதிக்குத் திரும்பினார்.

முன்னேற்றம் எதுவும் இல்லாமல் முப்பது ஆண்டுகள் ஓடியது. பிரகாரத்தில் அதே குசேலர் கதையை அதே திரைக்கதையில் வேறு யாரோ ஓர் உபன்யாசகர் கூறிக் கொண்டிருந்தது சந்நிதிக்குள் இருந்த கண்ணன் காதில் விழுந்தது. கூடவே குசேலன் பார்ட்-டூ – அதாவது சந்தானகோபாலன் நினைவும் வந்தது. தான் அளித்த செல்வத்தால் சந்தானகோபாலன் சௌக்கியமாய் இருப்பதைப் பார்க்கும் ஆசையில் மூலவர் உற்சவராகிச் சந்நிதியைவிட்டு வெளியே வந்தார்.

சந்தானகோபாலன் கூடியிருந்த ஒண்டுக்குடித்தனம் இருந்த இடத்தில் இப்போது ஏழு மாடி ஃப்ளாட் இருப்பதைப் பார்த்தார். வாசலில் ‘சகுந்தலா அபார்ட்மென்ட்ஸ் பலகை தொங்கியது. கீழ் போர்ஷன் வாசலில் வயதான சந்தானகோபாலன்-சகுந்தலா தம்பதி சாய்வு நாற்காலியில் அமர்ந்திருக்க… அவர்களைச் சுற்றிப் பேரக் குழந்தைகள்.

‘பரவாயில்லை… கிடைத்த செல்வத்தை வீணாக்காமல் வீடு கட்டி வாடகைக்கு விட்டு வாழ்கிறானே’ என்ற சந்தோஷத்துடன் பெருமாள் அவர்களைப் பார்த்து விட்டுக் கட்டடத்துக்கு வெளியே தூங்கிக் கொண்டிருந்த செக்யூரிடியை எழுப்பி விசாரித்தார்.

“ஏம்பா… இந்த ஏழு மாடிக் கட்டடத்துல எத்தனை பேர் குடியிருக்கலாம்…?”

“அம்பது குடும்பம் குடியிருக்கலாம். ஆனா, இப்போ ஒரு குடும்பம்தான் குடியிருக்கு.”

“ஏன்…சாந்தானகோபாலன் மீதி போர்ஷனையெல்லாம் வாடகைக்கு விடலையா…?

“விடறதுக்கு ஏது சார் போர்ஷன்…? அம்பது போர்ஷன்லயும் அய்யா குடும்பம் தான் கீது…!”

“ஏன்…?!”

“ஏனா… அவர் மூத்த் புள்ளைக்கு முப்பது குழந்தைங்க…ரெண்டாவது புள்ளைக்கு இருபத்தாறோ இருபத்தேழோ புள்ளைங்க… மூணாவது புள்ளைக்கு அப்பன் மாதிரியே முப்பத்திரண்டு. நாலாவது புள்ளைக்கு நேத்து பொறந்ததோட சேத்தா நாப்பத்தொண்ணு… மொத்தம் கணக்குப் போட்டுப் பார்த்தா கிட்டதட்ட முந்நூறு பேர்… ஐயா குடும்பமே மொத்த எல்லா ஃப்ளாட்லேயும் இருக்காங்க. சாமி… சாமி, எங்கே போற…?”

தலையை தொங்கவிட்டபடி சந்நிதிக்குள் நுழைந்த பெருமாளைப் பார்த்து ருக்மணி தாயார் “என்ன ஆச்சு?” என்று வினவ…

“சே… பேசாம விட்டுருந்தா அப்பன் பட்ட கஷ்டத்தைப் பார்த்துப் பசங்களாவது புத்தி வந்து ஒண்ணு ரெண்டோட நிறுத்தியிருப்பாங்க… பணம் வந்த தெம்புல பசங்களும் அப்பன் மாதிரி ஆளுக்கு அம்பது அறுபதுன்னு கூறுகட்டிப் பெத்திருக்காங்க ருக்மணி இனிமே யாராவது குசேலன்னு சொல்லிக்கிட்டு வந்தா தயவுசெஞ்சு தடுத்து நிறுத்து… இனிமே நானும் கு.க.வைக் கடைப்பிடிக்கப் போறேன்.”

“கு.க.வா…? சுவாமி, என்ன சொல்கிறீர்கள்…? கு.க. என்றால் குடும்பக் கட்டுப்பாடு…!”

“நான் சொன்னா கு.க. எனக்கு… குசேலர் கட்டுப்பாடு.”

அர்ச்சகர் நுழைய… இருவரும் மௌனமாகச் சிலையாகிறார்கள்….! கிரேசி மோகன்….!
————————————————————————————————————————-

March 24, 2017
கவிதையைக் காதலி

சித்ரப்ரியங்கா ராஜா

அன்னை – அன்புக் கவிதை

ஆசான் – அறிவுக் கவிதை

இயற்கை – எழிற் கவிதை

ஈகை – கொடைக் கவிதை

உழைப்பு – முதலீட்டு கவிதை

ஊக்கம் – உயர்த்தும் கவிதை

எண்ணம் – சிந்தனை கவிதை

ஏற்றம் – வெற்றிக் கவிதை

ஐயம் – தேவையற்ற கவிதை

ஒழுக்கம் – உயிர்க் கவிதை

ஓய்வு-அத்யாவஸ்ய கவிதை

இப்படி

எங்கும் கவிதை

எதிலும் கவிதை!

மனிதரே கவிதை

மனிதருள்ளும் கவிதை!

கவிதை என்றும் இனியது

அதைக்

காதலித்துப் பார்த்த என் உணர்விது!

March 24, 2017
கவிதை மனம்

காயத்ரி பூபதி

அழுகின்றேன், சிரிக்கின்றேன்

கோபத்தில் கொந்தளிக்கின்றேன்

புரட்சியாய் பொங்கி எழுகின்றேன்

அமைதியாய் நடக்கின்றேன்

ஆனந்தத்தில் திளைக்கின்றேன்

அழகை இரசிக்கின்றேன்

அழகாய் இருக்கின்றேன்

அனைத்துமாய் இருந்து

அனைத்தையும் வெளிப்படுத்தும்

மனிதனே கவிதை என்கின்றாய்.

கவிதையே! இது தான் நீயென்று

உன்னை நான் வடித்துவிட்டு

பெருமிதம் கொள்கின்றேன்!

நீயோ! இது தான் நானென்று

என்னை செதுக்கிவிட்டு

அமைதியாய் புன்னகைக்கின்றாய்

நீயே கவிதை என்கின்றாய்!

March 24, 2017
இங்கிலாந்திலிருந்து ஒரு மடல். . . (231)

அன்பினியவர்களே!

அன்பான வணக்கங்களுடனும் துயரம் மிகுந்த நெஞ்சத்துடனும் உங்கள் முன்னே அடுத்த மடலுடன் நான். இவ்வாரம் வரும் ஞாயிறு அதாவது 26ஆம் திகதி இங்கிலாந்தில் “அன்னையர் தினம்” கொண்டாடப்படுகிறது. அன்னையின் தினத்தின் அருமைகளைப் பற்றியும் எனது அன்னையின் நினைவுகளைப் பற்ரியும் மடல் மூலம் உங்களுடன் உறவாட எண்ணியிருந்த எனக்கு இம்முறை அன்னையர் தினத்தின் போது மூடத்தனமான பயங்கரவாதச் செயலுக்கு தமது உயிரை இழந்து விட்ட துயர எண்ணங்களுடன் மடலை வரைய வேண்டிய நிர்ப்பந்தத்தைக் காலம் என்மீது திணித்து விட்டது.

ஆம், நேற்று அதாவது 22ஆம் திகதி இங்கிலாந்து நேரப்படி மதியம் சுமார் 2.40 மணியளவில் இங்கிலாந்தின் தலைநகரமான இலண்டனின் இதயமாகக் கருதப்படும் லண்டன் வெஸ்ட் மினிஸ்டர் பகுதியில் மிலேச்சத்தனமான பயங்கரவாதத் தாக்குதல் ஒன்று நிகழ்த்தப்பட்டதை ஊடகங்களின் மூலம் வாசகர்கள் அறிந்திருக்கலாம்.

என்ன உலகில் பல நாடுகளில் அன்றாடம் போர்களின் மூலம் உயிரிழந்துகொண்டிருப்போர் எத்தனையோ பேர் இல்லையா? பின் இதென்ன பெரிய விடயம்? எனும் கேள்வி எழுவது நியாயமே! போர் எனும் நிகழ்வின்போது உயிர்கள் இழப்பது துயரம் மிகுந்த சம்பவமாக இருந்தாலும் அது ஓரளவு எதிர்பார்க்கப்பட்ட நிகழ்வே! ஆனால் எதுவிதமான தடயங்களும் இல்லாமல் தமது அன்றாட அலுவல்களில் ஈடுபட்டிருக்கும் அப்பாவிப் பொதுமக்களின் மீது நிகழ்த்தப்படும் தாக்குதல்கள் உள்ளத்தில் ஒருவித மனக்கிலேசத்தை, அச்சத்தை ஏற்படுத்துவது தவிர்க்க முடியாததே!

பிரான்சு, ஜேர்மனி என்று ஐரோப்பிய முக்கிய நாடுகளில் சமீபகாலங்களில் மதத்தின் பெயரால் அப்பாவி மக்களின் உயிர் காவு கொள்ளப்பட்ட செய்தியின் போது உள்ளம் பதைத்தது.ஆனால் இங்கிலாந்தில் 2005ஆம் ஆண்டு ஜூலை மாதம் 7ஆம் திகதி நடத்தப்பட்ட பயங்கரவாதத் தாக்குதலுக்குப் பின்னால் உள்ளத்தைப் பதைக்க வைக்கும் நிகழ்வாக நேற்றைய நிகழ்வே அமைந்துள்ளது. வறட்சியால் ஏற்படும் பட்டினி, போரால் ஏற்படும் பட்டினி, பயங்கரத் தொற்று நோய்களால் ஏற்படும் உயிரிழப்புகள், இயற்கை அனர்த்தங்களினால் ஏர்படும் உயிரிழப்புகள் என உலகில் மக்கள் எதிர்கொள்ளும் இக்கட்டான சூழ்நிலைகள் எத்தனையோ! இவைகளின் மத்தியில் மதத்தின் பெயரால், தாம் தம்முடைய மேலாதிக்கத்தை நிலைநிறுத்த வேண்டும் எனும் முனைப்பால் மிலேச்சத்தனமாக மற்ற மனித உயிர்களை, அதுவும் அப்பாவிகளான மனித உயிர்களைக் காவு கொள்ளும் மிருகத்தனமான செயல்களின் நிகழ்வுகள் உள்ளத்தில் ஆறாத துயரத்தை ஏற்படுத்துகிறது.

மதம் என்பது இறைவன் எனும் ஓர் ஆன்மீக ஒளியை நோக்கிய பயணத்திற்கு ஏற்படுத்தப்பட்ட பாதை. அவ்வான்மீக ஒளியின் உண்மை வடிவம் அன்பேயாகும். உலகில் உள்ள மதங்கள் குறிப்பிடும் இறை வடிவங்கள் அனைத்தும் அன்பின் அடையாளங்களே! இவ்வன்பும், மனிதத் தன்மையும் அறிமுகமில்லாத மனிதர்களாகவிருப்பினும் அவர்கள் மீது கருணை கலந்த மனிதாபிமானத்தைக் காட்டுவதையே அடிப்படையாகக் கொண்டுள்ளன. இறை மார்க்கத்தை அடையும் இப்பாதையின் மீது கொள்ளும் வெறியால் மற்றொரு மனித உயிரைப் பறித்துக் கொள்வது எவ்வகையில் அவ்விறைக்கு நாம் செலுத்தும் காணிக்கையாக முடியும்?

18 வயதில் இந்நாட்டிற்கு வந்த எதுவித அறிமுகமற்ற எனக்கு ஆதரவளித்து கல்வியூட்டி தம்முடைய சமுதாயத்திலே ஓர் அங்கமாக இணைத்து எனக்கு இந்நாட்டிலேயே வசதிமிக்க வாழ்வாதாரத்தை ஏற்படுத்திக் கொடுத்தது இங்கிலாந்து. என்னுடைய இந்த 42 வருட கால இங்கிலாந்து வாழ்வின் அனுபவத்தில் என்னை நோக்கி வீசிய வெறுப்புக் கணைகள் மிகவும் சொற்பமே! இனத்துவேஷம், நிறவேற்றுமை என்பன சிலரது மனங்களில் இருந்தாலும் பெரும்பான்மையாக வாழ்வின் ஒவ்வொரு கட்டத்திலும் எனக்குக் கைகொடுத்து உயர்த்தி விட்டவர்கள் அநேகம் பேர்.

அதேபோல நான் பிறந்த எனது தாய்நாட்டில் எனது சகோதர சகோதரிகள் அல்லலுற்று அகதிகளாக இங்கு தஞ்சமடைந்தபோது அவர்களுக்கு வாழும் வகையை ஏற்படுத்திக் கொடுத்தது இங்கிலாந்து. நான் பிறந்து எனக்குத் தமிழ் கொடுத்த என் தாய் மண்ணிற்கு அடுத்து, தமிழ் தோன்றி வளர்ந்த பாரத தேசத்திற்கு பின்னால் என்னெஞ்சில் அதிமுக்கிய இடத்தை வகிப்பது இங்கிலாந்து. இவ்வினிய நாட்டில் நேற்று வெஸ்ட்மினிஸ்டர் பாலத்தில் நடைபாதையோரத்தில் நடந்து கொண்டிருந்தவர்கள் மீதும், இவ்வழகிய லண்டன் நகரின் அழகினை, தேம்ஸ் நதியின் அழகினை அப்பாலத்தில் நின்று ரசித்துக் கொண்டிருந்த அப்பாவி உல்லாசப் பிரயாணிகள் மீதும் சிற்றூர்தியை மோதவிட்டு மிலேச்சத்தனமான தாக்குதலை நடத்தியுள்ளான் ஒரு வெறியன். அது மட்டுமன்றி இங்கிலாந்து பாராளுமன்ற வளாகத்தினுள் கத்தியோடு ஓடி தடுப்பதற்கு முனைந்த காவற்துறை அதிகாரியின் மீது கத்தியைப் பாய்ச்சி உயிரைப் பறித்திருக்கிறான்.

உலக ஜனநாயக நாடுகளுக்கு எடுத்துக்காட்டாக முன்மாதிரியாக இயங்கிக் கொண்டிருப்பது உலகின் அதி பழமையான இங்கிலாந்துப் பாராளுமன்றம் என்றால் மிகையாது. இத்தகைய ஒரு சரித்திரப் பிரசித்தி பெற்ற அமைப்பின் மீது, அங்கே ஜனநாயகத்தின் அடிப்படையில் விவாதம் நடைபெற்றுக் கொண்டிருக்கும் வேளையில், இத்தகைய அசம்பாவிதத்தை இத்தகைய மூடக்கும்பல் ஏற்படுத்தியது உலக ஜனநாயகத்திற்கே விடும் சவாலாகத்தான் தெரிகிறது.இக்கண்மூடித்தனமான தாக்குதலில் நால்வர் உயிரிழந்திருக்கிறார்கள். வெஸ்ட்மினிஸ்டர் பாலத்தில் சிற்றூர்தியால் மோதுண்டு 48 வயதுப் பெண்மணியும், 50 வயது ஆணும் உயிரிழந்திருக்கின்றனர். காரைப் பாலத்தில் மோதவிட்டுவிட்டுக் கத்தியோடு பாராளுமன்றத்துக்குள் இப்பயங்கரவாதி நுழைய முற்பட்டபோது அதைத் தடுக்க முனைந்த காவற்துறை அதிகாரி இப்பயங்கரவாதியின் கத்திக்குத்துக்கு இலக்காகி உயிரிழந்துள்ளார். இப்பயங்கரவாதியை காவற்துறையினர் சுட்டுவீழ்த்தியுள்ளனர். துப்பாக்கிக் காயங்களினால் இப்பயங்கரவாதியும் உயிரிழந்துள்ளான். அதைத்தவிர சுமார் 40 பேர்வரை அப்பாலத்தின் மீது நடந்த விபத்தில் படுகாயங்களுக்குள்ளாகியிருக்கிறார்கள்.

இத்தகைய மூடர்களின் செய்கைக்கு அவர்கள் சார்ந்துள்ள மதம் எவ்வகையிலும் பொறுப்பாகாது. ஆனால் இதன் தீமையான விளைவு என்னவென்றால் தொடர்ந்து நிகழ்த்தப்படும் இத்தாக்குதல்களுக்கு மதத்தின் பெயரை இவர்கள் உபயோகிப்பதால் பொதுவாகவே மக்களுக்கு இம்மதத்தைச் சார்ந்தவர்களின் மீதான கண்ணோட்டத்தில் மாற்றம் ஏற்பட வாய்ப்பிருக்கிறது. இத்தகைய தாக்குதல்களைத் தடுப்பதற்காகவேதான் சில கடுமையான சட்டங்களை இயற்றுகிறேன் எனக் கொக்கரிக்கும் டொனால்ட் ட்ரம்ப் போன்றவர்களின் கை வலுவடைய இடமளிக்கிறது. வெளிநாட்டுக்காரரின் தொடர் வருகை இந்நாட்டின் இறைமைக்கு அச்சத்தை ஏற்படுத்துகிறது என வாதிடும் இனத்துவேஷிகளின் வாதத்தை இவ்வகையான கோழைத்தனமான, மிலேச்சத்தனமான எதுவித நியாயங்களுமற்ற தாக்குதல்கள் நியாயப்படுத்துகின்றன.

ஆகமொத்தம் தனது மதத்தின் பெயரால் அன்னையர் தினத்துக்கு முன்பாக சில குழந்தைகளின் அன்னையரையும், சில அன்னைகளின் குழந்தைகளையும் மோசமான விளைவுகளுக்குளாக்கியிருப்பதைத் தவிர இப்பயங்கரவாதி வேறொன்றையும் சாதிக்கவில்லை. பயங்கரவாதத்தினால் ஜனநாயகத்தை சீர்குலைக்க முடியாது என்று இன்று வழமை போல் இங்கிலாந்துப் பாராளுமன்றம் தமது அன்றாட நிகழ்வுகளை நடத்துகிறது.

தவறு செய்பவன் மனிதன்; தண்டனை இறைவனுக்கும், மதத்துக்குமா?

மீண்டும் அடுத்த மடலில்…

அன்புடன்
சக்தி சக்திதாசன்

March 24, 2017
தரவு விஞ்ஞானம் (Data Science)

-நீலமேகம் ராமலிங்கம் சஹஸ்ரநாமன்

தரவு என்பது குறிப்பிட்ட சம்பவத்தின் அமைந்த நிகழ்வுகளாகும். உதாரணமாக, மாணவரின் மதிப்பெண் பட்டியலில், மாணவரின் பெயர், பிறந்த தேதி, பதிவு எண், பள்ளி அல்லது கல்லூரியின் பெயர், முகவரி, ஆகிய வகைகள் தரவுகளாகும். தரவுகள் கோப்புகளிலும் , கணினியில் டேட்டாபேஸ்களாகவும் சேமித்து வைக்கப்படுகின்றது. சேமிக்கப்பட்ட தரவுகள் புள்ளியியல் (Statistics) மூலம் ஆய்வுகள் செய்து தீர்மானங்கள் எடுப்பதற்கு ஏதுவாக அமைகிறது. அலைபேசி (Mobile) மூலம் பெறப்படும் தகவல்கள், குறுஞ்செய்திகளின் (SMS) உண்மைத் தன்மையினை ஆராய்ந்து, இவைகள் உண்மை என்றால் தரவுகளாக எடுத்துக் கொள்ளலாம்.. நிழற்படங்களின் தொகுப்புகள், வீடியோ பதிவுகளைத் தரவுகளாக மாற்றம் செய்து கொள்ளலாம். பெரிய தரவு பல்வேறு வடிவங்களாக உள்ளது.

உரைநடை வடிவம், டேட்டா பேஸ் வடிவம், ஒலி (Audio) , ஒளி (Video) வடிவங்களாகத் தரவுகள் எட்டு திசைகளிலிருந்தும் (கிழக்கு, மேற்கு, வடக்கு, தெற்கு, தென் கிழக்கு, தென் மேற்கு, வட கிழக்கு, வட மேற்கு) கிடைக்கப் பெறுகின்றது. விஞ்ஞானம், , தகவல் தொழில்நுட்பம், பொறியியல், புள்ளியியல் , பொருளாதாரம் சார்ந்த தரவுகள் பெரிய தரவின் காரணிகளாக அமைந்துள்ளது. அப்பாச்சி பவுண்டேஷனின் (Apache Foundation) இணையதளம் பெரிய தரவு தொழில் நுட்பத்தில் அமைந்துள்ளது. 19990இல் கூகுள் நிறுவனம் Distributed Data Processing System மற்றும் அதற்கான அல்காரித்தை வெளியிட்டது. ஸ்டான் போர்ட் பல்கலைக்கழகத்தின் டவுக், எரிக் பெரிவர், முனைவர் ஸ்டோன் பெரிக்கர் (Nutch Search Engine), யாஹூ (yahoo) தரவு விஞ்ஞானத் துறை வளர்வதற்குப் பங்களித்து வருகின்றனர். பெரிய தரவு பற்றிய அறிவை அறிந்தால் எளிதாக பெரிய வரவைப் பெறலாம். தரவுப் பகுப்பாய்வு என்பது தரவுத் தொகுப்பை அடிப்படையாக வைத்துக் கணனியின் சிறப்பு அமைப்பு, மென்பொருள் மூலம் கிடைக்கும் தீர்மானம் மற்றும் கணிப்பு பற்றிய செயல் முறையாகும்.

March 24, 2017
இனி என்னைப் புதிய உயிராக்கி…(5)

-மீனாட்சி பாலகணேஷ்

ஷீலா விருந்தினர்களை எப்படியோ சமாளித்தாள். அவர்கள் விடை பெற்றுப் போனதும் பூகம்பம் வெடித்தது.

“அருண், உனக்கு என்ன திமிர் இருந்தால் விருந்தினர்கள் முன்பு இப்படி உளறியிருப்பாய்,” வார்த்தைகள் நாகரிகத்துக்கு இடமின்றி இடம் பெயர்ந்தன.

தானும் கலையுலகில் அங்கீகரிக்கப்பட்டு விட்டோம் என்ற உற்சாகம், பெருமை,  இதன் பொருட்டு ஏற்படும் கர்வம் இவை அளவு மீறியதால், தன் வளர்ச்சிக்கு முழுப்பொறுப்பும் ஷீலாவினுடையது தான், அவளும் தானும் பரஸ்பரம் கொண்ட காதலால் தான் என்பதை அலட்சியம் செய்து விட்டான் அருண் சர்மா.

“வாயை மூடு. வரவர உன் அதிகாரம் ரொம்பத்தான் கொடிகட்டிப் பறக்கிறது. நீ போடும் பிஸ்கட்டுகளுக்காக உன் பின்னால் ஓடி வரும் நாய் என்று என்னை நினைத்தாயா?,” என்று ஆத்திரமாகக் கத்தியவன், விடுவிடுவென்று மாடியேறித் தன் அறைக்குப்போய், கதவை அறைந்து சாத்தித் தாளிட்டுக் கொண்டான்.

‘இது திரும்பவும் ஒரு நீண்ட தனிமையின் துவக்கம்,’ என்று ஷீலாவின் உள்மனது கூறியது. தலையைச் சிலிர்த்து உலுக்கிக் கொண்டு கண்ணீரைச் சுண்டி எறிந்தவள், ஒரு ‘ஜின் அண்ட் டானிக்கை’க் கலந்து எடுத்துக் கொண்டு தன் அறையை நோக்கித் தளர்ந்த மனத்துடன் நடந்தாள்.

நடு இரவில், பாதி உறக்கத்தில் விழித்தபோது, திடீர் எனத் தனிமையின் வெறுமை அவளை அறைந்தது. தூக்கம் பறந்தது. விடியா இரவு நீண்டது. இன்னொரு ‘ஜின்’னுக்காகப் பறந்த நாவைக் கட்டுப்படுத்திக் கொண்டு, படிக்க ஏதாவது தத்துவ சம்பந்தமான புத்தகத்தைத் தேடினாள். அத்தனை வெறுப்பிலும், துயரிலும் தத்துவ சம்பந்தமான விஷயங்கள் மனதுக்குச் சற்று ஆறுதலளிக்கக் கூடும் என அவளது கூர்மையான புத்தி கணக்குப் போட்டது.

ஒரு சிறிய புத்தகத்தை  அலமாரியின் மேல்தட்டிலிருந்து உருவினாள். தாகூரின் கீதாஞ்சலி-மனத்தினுள் பெரிய பெரிய அலைகள் ஆரவாரித்து ஓசையிட்டன. பிரித்த பக்கத்தில் இருந்த வரிகள் மனத்தை ஈர்த்தன.

‘நாளின் தொடக்கத்திலேயே அந்த ரகசியம் அறிவிக்கப்பட்டு விட்டது. நீயும் நானும் மட்டுமே ஒரு படகிலேறிப் பயணம் செய்வோம். நம்முடைய முடிவும் இலக்குமில்லாத இந்தப் புனிதப் பயணம் பற்றி வேறு ஒரு ஆத்மாவுக்கும் தெரியாது.’

தன் வாழ்க்கைப் பயணம் தொடங்கியதை எண்ணிப்பார்த்தாள். மனமெல்லாம் வலித்தது. நினைவுகள் கூரம்புகளாக எல்லாப் பக்கங்களிலிருந்தும் வந்து தைத்தன.

படிப்பதை நிறுத்திப் புத்தகத்தை மூடினாள். அதைப் பரிசளித்தது யார் என்று தெரியும். மெல்ல, தயக்கத்துடன் முதல் பக்கத்தைத் திறந்தாள். ‘டு ஷீலா- என் மனதைத் திறந்து காட்ட, இந்தப் புத்தகத்தைத் தவிர வேறெது நிகராகும்? ஷீலா, நான் உன்னை வழிபடுகின்றேன் என் தேவதையே- அன்புடன், ஜிம் ராபர்ட்ஸ்,’ என்ற எழுத்துக்கள் மீது விரல்களால் மெல்ல வருடினாள்.

உடலின் சக்தி எல்லாம் வடிந்து பஞ்சு மிதப்பது போல் இருந்தது. புத்தகத்தைத் திரும்ப எடுத்த இடத்திலேயே வைத்து விட்டு வந்து படுக்கையில் விழுந்தவள், தலையணையை அழுத்திக் கொண்டு, நினைவுகளை அழுத்தி உள்ளே தள்ள முயன்றவாறு உறங்கி விட்டாள்.

காலையில் எழுந்த போது, வீடு நார்மலாக இருந்தது போலத் தோன்றியது. அருண் இன்னும் தூங்கிக் கொண்டிருந்தாற் போல இருந்தது. யோகா செய்து முடித்து விட்டு, லைட்டாகக் காலை உணவைப் பழங்கள் ப்ரெட் டோஸ்ட் என முடித்துக் கொண்டாள். உறங்கிக் கொண்டிருந்தாலும் கூட அருணை எழுப்பி விடைபெற்றுக் கொண்டு கிளம்புபவள் இன்று காலை அதைச் செய்யாமலே கிளம்பி விட்டாள்.

இப்போது வீடு திரும்பியதும் அருணை எதிர்கொள்ளும்போது எப்படி, என்ன பேச வேண்டும் என்று யோசித்து மனதிற்குள் தயார் செய்து கொண்டாள்.

*****

அரைமணி நேரம் ஊறி விட்டதால், தாரா திரும்ப அந்த அறையின் வாசலில் தோன்றிப் புன்னகைத்தாள். “ஷாம்பூ போட்டுக்க ரெடியா மேடம்?”என்றபடி.

தாரா இரண்டாவது முறையாகக் கருவுற்றிருக்கிறாள். ஆறேழு மாதங்கள் இருக்கும். வயிற்றைச் சுமந்தபடி ‘துரு துரு’வெனப் பம்பரமாகச் சுழலுகிறாள். முதல் குழந்தைக்கு ஐந்து வயதாகிறது. கணவன் டிராவல் ஏஜன்சி வைத்து நடத்துகிறான். ஷீலாவின் உள் வெளிநாட்டுப் பயணங்கள் அனைத்தையும் ஏற்பாடு செய்து தருவது அவன்தான்.

டவலை எடுக்க முன்பக்கம் சென்ற தாராவைப் பார்த்து, ” ஹவ் இஸ் ரமேஷ்?” என்று கேட்டாள் ஷீலா. “மிகவும் நன்றாக இருக்கிறார்,” என்றபோது தாராவின் கண்களில் தாரகைகள் சுடர்விட்டன. அது ஷீலாவின் பார்வைக்குத் தப்பவில்லை. கழிவிரக்கத்தில் உள்ளம் சிறுபொழுது திரையை விலக்கிக் கொண்டு வெளியே வந்து பொருமியது.

‘என் கண்களில் எவ்வளவு தாரகைகள் சுடர்விட்டன தெரியுமா? தாரா…. வாழ்வே வண்ண மயமாக இருந்தது. ஆனால் மிகச் சில நாட்களுக்கே,’ என்று தாராவின் கரங்களைப் பிடித்துக் கொண்டு கதறவேண்டும் போல இருந்தது.

முடியுமா?  முடியாதே.  டாக்டர் ஷீலா ராபர்ட்ஸ் என்றால் இரும்பைப் போன்ற உறுதியான மனமும், உழைப்பும், எறும்பைப் போல சுறுசுறுப்பும் கொண்டு, பெண்மையின் நளினமும், நாகரிகமும் பொங்கி வெளிப்படும் ஒரு சூப்பர் வுமனாகத்தான் அவளை இந்த ஊரே உலகே அறியும். அந்த கணிப்பை மாற்றிவிடச் சுலபத்தில் முடியுமா என்ன?

தாராவின் விரல்கள் தன் தலை முடியினுள் நுழைந்து பரந்து ஷாம்பூவை நுரைத்துக் கொண்டிருந்த சுகானுபவத்தில் ஷீலாவின் காலக்கப்பல் பின்னோக்கி ஓடி விட்டிருந்தது.

*****

5

மங்கையராகப் பிறப்பதற்கே நல்ல மாதவம் செய்திட வேண்டுமம்மா
பங்கயக் கைந்நலம் பார்த்தல்லவோ இந்தப் பாரில் அறங்கள் வளருமம்மா…

சனிக்கிழமை மாலை. வெங்கடேசனின் வீடு கல்யாணக்களை கட்டியிருந்தது. நாளைக்காலை ரயிலில் ஜானகி தன் குடும்பத்தினருடன் வருகிறாள். அலமேலுவும் பாட்டியுமாகச் சமையலறையில் வெகு மும்முரமாகப் பட்சணங்கள் செய்து கொண்டிருந்தார்கள்.

“சைலு, இங்கே வா. இந்த முந்திரிப் பருப்பை விண்டு உடைச்சுக் கொடு,” என்று பொட்டலத்தை அவளிடம் நீட்டிய பாட்டி, “அலமு, அடுத்தபடியாக நெய்யை விட்டு முந்திரிப் பருப்பை வறுத்தெடுத்துக்கோ. பர்பியைக் கிளறிக் கொட்டி பரப்பப் போற தட்டிலே முதல்லே அந்த வறுத்தெடுத்த பருப்பைக் கொட்டிப் பரப்பு. மேலே பர்பியைக் கொட்டிப் பரப்பினால், கட்டிகளா வெட்டி எடுக்கிறப்போ முந்திரி எல்லாம் மேலே இருக்கும். பார்க்க அழகா இருக்கும்,” என்று கட்டளைகளைப் பிறப்பித்துக் கொண்டிருந்தாள். ஏலமும் பச்சைக் கற்பூரமும் மணத்தன.

“அம்மா,” வாசலில் பியூனின் அழைப்பு. “புதுசாக் காய்கறி கிடைச்சா நிறைய வாங்கிட்டு வான்னாரு அய்யா. பிஞ்சா அவரைக்காயும் கத்திரிக்காயும் இருந்திச்சு. தக்காளி, முருங்கைக்காய் ரெண்டும் பக்கத்திலே ஒரு தோட்டத்திலே இருந்து பறிச்சுக் கொடுத்தாங்க,” என ஒரு பெரிய பையை வாசல் திண்ணை மீது வைத்தான்.

“என்ன முருகேசா, காயெல்லாம் கிடைச்சுதா?” என்றபடி வந்த வெங்கடேசன், “அலமு, இந்தக் காபிப் பொடியைத் தனியா வை. ஸ்பெஷல் பிளான்டேஷன் மிக்ஸ். புதுசாப் பொடிபண்ணி வாங்கிண்டு வந்திருக்கேன். ஜானகி, அத்திம்பேர் எல்லாரும் அசந்துடணும் காபி வாசனையிலே,” என உற்சாகமாக ஆர்ப்பரித்தார்.

“அட குட்டி மாமி, என்ன பண்ணறேள் நீங்களும் சமையல் கட்டிலே,” எனச் சைலாவிடம் விளையாட்டாக விசாரித்தார்.

“ஒண்ணுமில்லேப்பா. நான் கொஞ்சம் திலகாவோட பேசிட்டு வரேம்பா,” என்று செல்லமாகக் குழைந்த மகளைப் பாசமிகுந்த பார்வையால் வருடியவர், “தாராளமாகப் போயிட்டு வாம்மா,” என உத்தரவு கொடுத்தார்.

“விளக்கேத்தினப்புறம் என்ன ஊர்சுற்றல், வயசுக்கு வந்த பொண்ணு,” என்று முணுமுணுத்த அலமுவிடம், “பக்கத்து வீடுதானே, ஏன் கிடந்து அலட்டிக்கிறே,” என்று கடுகடுத்து விட்டு, “அம்மா, ஒரு அரை தம்ளர் காபி தாயேன். இலை போட இன்னும் அரைமணி ஆகும் இல்லையா? நான் இங்கே கூடத்திலே ரேடியோ நியூஸ் கேட்டுண்டு இருக்கேன்,” என்றார்.

காபியைப் பருகிவிட்டு ஏழேகால் நியூஸ் கேட்டவர், பேப்பரைப் பிரித்துப் பார்த்துக் கொண்டிருந்தார். நாள் முழுதும் ஆபீஸில் வேலை செய்த களைப்பு. சாயங்காலம் மார்க்கட், கடைத்தெரு என்று சுற்றிய அலுப்பு. பேப்பர் மார்பில் தவழத் தலை சாய்த்தபடி, ஈஸிசேரில் லேசாகக் குறட்டை விட்டபடி உறங்கியே போனார்.

ரேடியோவில் திரைகானம் ஒலிக்க ஆரம்பித்தது. வழக்கமாக அந்த வீட்டில் ‘திரைகான’த்துக்கு அனுமதி கிடையாது. பெண்டிர் இருவரும் சமையல் கட்டில், பர்ஃபி கிளறிக் கொட்டியான பின், ஜானகி பிள்ளை சீனுவுக்குப் பிடித்த பொருள்விளங்கா(!) உருண்டையைச் சுடச் சுட பிடித்துக் கொண்டிருந்தார்கள். திரைகானம் கேட்க ஆளில்லை.

(தொடரும்)

March 24, 2017
“நளபாகம்”
-தமிழ்த்தேனீ

இல்லத்தரசியை நாம் வாழ்க்கைத் துணை என்று கூறுகிறோம். ஆங்கிலத்திலே Better Half என்கிறார்கள். ஆக மொத்தம் கடைசிவரை நம்மோடு சுகதுக்கங்களில் பங்கு கொள்ளவேண்டும் என்னும் எண்ணத்தில் நாம் வாழ்க்கைத் துணை என்கிறோம். ஆங்கிலேயர்கள் வாழ்க்கையில் பாதி வரை வந்தாலே போதும் என்கிறார்கள் மீதியை நான் வேறு ஒரு Better Half ஓடு கழிக்கிறேன் என்கிறார்கள்.

நம் இந்து மதத்தில் நம் வீட்டு கிருஹ லக்ஷ்மி என்கிறோம்; மஹாலக்ஷ்மி என்கிறோம். ஆகவே கிருஹத்தையும் செல்வத்தையும் அவளிடம் கொடுத்துவிட்டு அவளிடம் கையேந்துவதையே பெருமையாக நினைக்கிறோம். என்ன செய்வது நாம் வாங்கி வந்த வரம் அப்படி.

இப்படி இருக்கையிலே என்னோடு வாழ்க்கைத் துணையாய் தொடர்ந்து வருகின்ற என் வீட்டு மஹாலக்ஷ்மியை நினைத்துப் பார்த்தேன்.

இத்தனை வருடங்களாகப் பொறுமையாக என் சுக துக்கங்களில் சோதனையான காலங்களில் கூட என்னுடனே வாழ்கின்ற அவள் மிகப் பொறுமையாக சமைத்துப் போட்டுவீட்டு நிர்வாகத்தையும் கவனிக்கிறாள்.

நாம் என்ன செய்கிறோம் அவளுக்கு என்கிற எண்ணம் எழுந்தது. என்ன செய்யலாம் என்று யோசித்து என்னால் இயன்ற அளவில் ஏதேனும் உதவிகள் செய்கிறேன்.

ஆனாலும் ஒரு திருப்தி வரவில்லை. அதனால் எனக்குத் தோன்றிய ஒரு யோசனையைக் கடைப்பிடிக்கலாம் என்று வீட்டிலுள்ளோர் அனைவரையும் அழைத்து எப்பவும் உங்க அம்மா சமைக்கறாங்க நான் அவங்களுக்கு உதவி செய்யலாம்னு யோசிச்சு ஒரு முடிவுக்கு வந்திருக்கேன். ஒரு வாரமாவது அம்மாவை ஓய்வு எடுக்கச் சொல்லி அனுமதித்து நான் சமைக்கப் போறேன் என்றவுடன் ஒவ்வொருவர் முகத்திலும் ஒவ்வொரு பாவனை! வியப்பு பயம் எல்லாவற்றையும் பார்க்க முடிந்தது என்னால்.

அவர்களைச் சமாதானப்படுத்தி ஒரு நாள் சமைக்கிறேன். நீங்கள் அனைவரும் ஒப்புக் கொண்டால் ஒரு வாரம் சமைக்கிறேன் என்றேன். வேறு வழியில்லாமல் எல்லோரும் ஒப்புக்கொண்டனர்.

முதல் நாள் பெரும் சவாலான முதல் நாள் எப்படி சமைக்க வேண்டும் என்று யோசனை செய்து எல்லோரையும் அழைத்து ஒரு ஒப்பந்தம் நான் சமைக்கும் போது யாரும் அங்கே வரக் கூடாது. அம்மா மட்டும் எனக்கு வேண்டிய உப்பு புளி மிளகாய் கடலைப் பருப்பு பெருங்காயம் போன்ற சமைக்க உதவும் பொருட்களையும் எடுத்து வைத்துவிடவேண்டும் என்னால் எது எங்கிருக்கிறது என்று தேட முடியாது என்றேன்.

என் மனைவி என்னைப் பார்த்த பார்வையில் நான் ஒரு முறை சமைத்த அனுபவத்தை அவளிடம் சொன்னேன் அது அவள் மனதில் நிழல் படமாக ஓடுகிறது என்று புரிந்தது. ஆனாலும் அந்த அனுபவத்தை வைத்து அதன் பின்னர் நான் எவ்வளவு முன்னேறியிருக்கிறேன் சமையலில் என்று அவளுக்கும் தெரியாதே. ஆகவே அவள் பார்வையைத் தவிர்த்துவிட்டு தொடர்ந்தேன். அவளும் என்னையே குறும்பாகப் பார்த்தபடி சரி என்றாள்.

என்ன சமைக்க வேண்டும் நம் வீட்டில் உள்ளோருக்கு எது அதிகமாகப் பிடிக்குமோ அதையே செய்து இவர்களை வசப்படுத்திகொண்டுதான் ஒரு வாரம் சமாளிக்க வேண்டும் என்று முடிவு செய்தேன். அதன் ப்ரகாரமே சமையற்கட்டுக்குள் நுழைந்து என் நளபாகத்தின் முக்கியத் திறமைகளை உபயோகித்துச் சமைத்தேன். என்ன மெனுவென்று பார்க்கலாம்! எப்படியும் இரண்டு மணி நேரமாவது ஆகும். ஆகவே என் வாழ்க்கைத் துணையிடம் பகிர்ந்த என் சமையல் அனுபவத்தை சற்றே அசைபோடுவோம். உங்களுக்கும் சலிப்புத் தட்டாமல் இருக்கும்.

என் தாயார் இருந்த காலம் அது. சுவையோடு சமைத்து என் நாவை வளர்த்து என் உடலை வளர்த்து அன்போடு ஊட்டிய தாயார் ஆர் கமலம்மாள் அவர்கள். அப்போதெல்லாம் வீட்டு விலக்கானால் மூன்று நாட்கள் உள்ளே வரமாட்டார்கள். அப்படிப்பட்ட தருணங்களில் என் சமையல்தான். அடிக்கடி அவரிடம் சென்று யோசனை கேட்டுச் சமைப்பேன். அவரும் என் சமையலைப் பொறுமையாகச் சாப்பிடுவார்.

அப்போது சென்னையில் தங்கசாலைத் தெரு அருகில் இருந்த கிருஷ்ணப்ப நாயக்கன் தெருவில் இருந்த வீட்டில் பின் பக்கமாடியில் நாங்கள் இருந்த காலம்.

அப்படி ஒருநாள் சமைக்க வேண்டிய அவசியம் வந்தது. என் தாயாரிடம், ”அம்மா… நான் இன்னிக்கு மிளகு ரசம் வைக்கறேன்!” என்று சொல்லிவிட்டு எப்படிச் செய்ய வேண்டும் என்னும் சமையல் முறையை என் அம்மாவிடம் கேட்டுக்கொண்டு சமைக்க ஆரம்பித்தேன்.

சாதம் வடித்தேன். அதன் பிறகு என் அம்மா சொன்னபடி அடுப்பிலே ஈயச்சொம்பை வைத்தேன். ஒரு சந்தேகம் கேட்க பின்பக்க மாடியிலிருந்து கீழே இறங்கி முன்பக்கம் சென்று வாசலில் திண்ணையில் அமர்ந்திருந்த என் தாயாரிடம் மீண்டும் ஒரு முறை மிளகு ரசம் வைக்கும் முறையைச் சொல்லுங்கள் என்றேன். அவரும் விளக்கமாகச் சொன்னார். ”சரி அம்மா புரிந்தது!” என்று சொல்லிவிட்டுப் பின் பக்க மாடிக்கு சென்று அடுக்களைக்குள் நுழைந்தேன்.

அடுப்பைப் பார்த்தேன் ஈயச் சொம்பைக் காணவில்லை. ஒரு வேளை நாம் ஈயச் சொம்பை அதன் இடத்திலே இருந்து எடுக்காமல் மறந்து போய்விட்டோமோ என்று எல்லா இடத்திலும் ஈயச் சொம்பைத் தேடினேன் கிடைக்கவில்லை. மீண்டும் கீழே வந்து அம்மா ஈயச் சொம்பைக் காணோமே என்றேன். என்னப்பா நீதான் ஈயச்சொம்பை எடுத்தாச்சு அதுக்குள்ள ஒரு சந்தேகம்னு வந்து கேட்டியே என்றார்.

ஆமாம் நாமதானே ஈயச்சொம்பை அடுப்பிலே வைத்துவிட்டு அதன் பிறகுதானே கீழே வந்தோம் என்பது நினைவுக்கு வரவே ஆமாம் அம்மா நான்தான் அடுப்பிலே வைத்தேன் இப்போ அடுப்பிலே காணோமே என்றேன். சரி ஈயச் சொம்பிலே தண்ணீர் கொட்டி வெச்சியா இல்லே அப்பிடியே வெச்சியா என்றார் . (அப்போதெல்லாம் கிருஷ்ணாயிலில் எரியும் பம்ப் ஸ்டவ்தான் உபயோகிப்போம்) அப்பிடியேதான் வெச்சேன் தண்ணி கொட்டலையே என்றேன்.

அவர் சரி முதல்லே மேலேபோயி ஸ்டவ்வை அணைச்சுட்டு அந்த ஸ்டவ் இருக்கும் மேடையில் பாரு இருக்கும் என்றார். சரி பாக்கறேன் என்று மேலேபோய் ஸ்டவ்வைப் பார்த்து அதை முதலில் அணைத்தேன். அந்த ஸ்டவ் இருக்கும் மேடையிலேயே ஈயச்சொம்பு உருகிப்போய் திரவ வடிவமாகி அப்படியே திடவடிவமாக ஆகி உலக மேப்பையே வரைந்திருந்தது. அட உருகிப் போச்சு என்று தெரிந்தது.

கீழே ஓடிப்போய் அம்மா ஈயச்சொம்பு உருகிபோச்சு என்றேன் கலவரத்துடன், ஸ்டவ்வை அணைச்சுட்டியா என்றார் அம்மா அணைச்சுட்டேன் என்றேன் .ஏம்பா மிளகு ரசம் வைக்கறேன்னு சொல்லிட்டு ஈயச்சொம்பு ரசம் பண்ணிட்டியே என்று அம்மா சிரித்தாள். நல்லவேளை ஸ்டவ் வெடிக்கலே ஜாக்கிரதையா இருக்கணும். அடுப்பிலே ஈயச்சொம்பு வைக்கும்போது அதிலே தண்ணி இல்லாம வைக்கக்கூடாது எல்லாம் அனுபவம்தான் பயப்படாதே இனிமே ஜாக்கிரதையா இரு என்றார்கள்.

அந்த நிகழ்வுதான் என் வாழ்க்கைத் துணையின் மனதிலே படமாக ஓடிக்கொண்டிருக்கும் என்று புரிந்தது. இப்போ புரியுதா என் பொண்டாட்டியின் பரிகாசப் புன்னகைக்குப் பொருள்!

அடேடே நான் சமைக்க வந்து ரெண்டு மணி நேரம் ஆச்சே…! பரவாயில்லே… எப்பிடியோ சமைச்சாச்சு, எல்லாம் ரெடி! எல்லாரும் தட்டைப் போட்டுண்டு உக்காருங்க என்று சொல்லிவிட்டு ஒவ்வொன்றாக கொண்டு வந்தேன். என்ன ஐட்டம்ன்னு காத்திருக்கீங்கன்னு புரியுது!
1. வத்தக் குழம்பு 2, பருப்புத் துவையல் 3. வெள்ளரிக்காய் பச்சடி .4. உருளைக்கிழங்கு ரோஸ்ட் கூடவே பொரிச்ச அப்பளம்.
அப்பிடியே அதையெல்லாம் பார்த்து மலைச்சுப் போயிட்டாங்க என் வாழ்க்கைத் துணைவியாரும் பிள்ளைகளும். சரி உக்காந்து சாப்ட்டு பார்த்துட்டு அதுக்கப்புறம் சொல்லுங்க பயப்படாதீங்க நான் உங்க வயித்துக்கு கியாரண்டின்னு சொல்லிகிட்டே என் வாழ்க்கைத் துணைவியாரையும் பிள்ளைகளையும் உட்காரவைத்து நானே பரிமாறினேன்.

யாருக்கு என்ன பிடிக்குதோ சாப்பிடுங்க என்று சொல்லிவிட்டு அவர்கள் உண்ணுவதையே பார்த்துக்கொன்டிருந்தேன். முதலில் எல்லோர் கண்ணிலும் பீதி. அதன் பிறகு சுவைக்கச் சுவைக்க ஆச்சரியம்! அப்பா கலக்கிட்டீங்க என்று ஏகோபித்த பாராட்டுக்கள். அப்பாடா பட்ட கஷ்டம் வீணாகலேன்னு ஒரு திருப்தி எனக்கு.

எல்லோரும் உண்டு முடித்துவிட்டு என்னை உட்காரவைத்து அப்பா நீங்களும் சாப்பிடுங்க என்று அன்போடு பரிமாறினர்.

என் வாழ்க்கைத் துணைவி ஆச்சரியத்துடன் இவ்ளோ நல்லா சமைப்பீங்களா நீங்க? எனக்குத் தெரியவே தெரியாதே என்றாள். வத்தக் குழம்பு எல்லாமே ரொம்ப நல்லா செஞ்சிருக்கீங்க என்றவள் ஆமாம் இந்த வத்தக் குழம்பு செய்ய எனக்கும் சொல்லிக் குடுங்களேன் என்றாள்.

சரி சொல்லித் தரேன் என்று சொல்லிவிட்டு முதல்லே புளியை கரைச்சு வெச்சுக்கணும். அப்புறம் பாத்திரத்திலே என்ன காய் போடணுமோ அதை வதக்கி எடுத்து வெச்சிகிட்டு கொஞ்சம் உளுத்தம் பருப்பு கருவேப்பிலை பெருங்காயம் இதெல்லாம் வறுத்து தனியா எடுத்து வெச்சிக்கோ. பாத்திரம் நல்லாக் காஞ்சதும் அதிலே இந்தக் காயைப் போட்டு உடனே கரைச்சு வெச்ச புளியை அதிலே கொட்டி கொஞ்ச நேரம் கொதிச்சவுடனே கொஞ்சம் மஞ்சள் பொடி போடணும்.

அதுக்கு தேவையான உப்பைச் சேர்த்து அப்பிடியே குழம்பும்பொடியையும் போட்டு கலக்கி நல்லா கொதிக்க விடணும் அதிலே இந்த வறுத்த பெருங்காயம் உளுத்தம் பருப்பு கடுகு கருவேப்பிலை எல்லாம் போட்டு கொதிக்க விடு என்றேன் சரிங்க என்றாள் என் துணைவி. அப்பிடியே ஒரு மூடி போட்டு மூடிவெச்சிடு என்றேன் நான். சரிங்க என்றாள் என் துணைவி.

அதுக்கப்புறம் அப்பிடி ஒண்ணு நாம செஞ்சோம்கிறதையே மறந்து போயி துணி துவைக்கப் போயிட்டு ரெண்டு மணி நேரம் கழிச்சு வந்தா குழம்பு அப்பிடியே வத்திப் போயி கருப்பா கருகிப் போயி பாத்திரத்தோட பாத்திரமா ஒட்டிக்கும். அதுதான் வத்தக் குழம்புன்னேன். எல்லோருமாக சேர்ந்து என்னை அடிக்க ஓடி வராங்க யாராவது காப்பாற்றுங்களேன்!

பின் குறிப்பு: பொதுவாகவே இந்தப் பெண்களுக்கு நம்மை வேலைவாங்க வேண்டும் என்னும் எண்ணம் வந்தாலும் நாம் வேலை செய்தால் இரக்கம் வரும். மனசு ஆகாது அடிக்கடி வந்து நான் வேணா ஏதாவது உதவட்டுமா என்று கேட்பார்கள். ஒரு நாள் சமைக்கவே இவ்வளவு யோசிக்கவேண்டி வந்ததே! ஒவ்வொரு நாளும் என்ன சமைக்கறதுன்னு யோசிச்சு 360 நாளும் சமைச்சு நம்ம வாழ்நாள் முழுவதும் சமைச்சுப் போட்டு நம்மை ஆதரிக்கும் நம் தாயார் , வாழ்க்கைத் துணைவி இவர்களை ஒரு கணம் நினைத்துப் பார்ப்போமே. அப்படி நினைத்தால் இனியாவது அவர்கள் அன்போடு ஆசையோடு கைப்பக்குவத்தோடு நம் நலத்துக்காகச் சமைக்கும் சாப்பாட்டைக் குறைசொல்லாமல் வீணடிக்காமல் சாப்பிடத் துவங்குவோம்!
March 24, 2017