வல்லமை

Author: மலர் சபா

  • நான் அறிந்த சிலம்பு – 76 (17.06.13)

    மலர் சபா

    புகார்க்காண்டம் – 08. வேனில் காதை
    யாழ் மீட்டிப் பாடி, புறத்து ஒரு பாணியில் மாதவி மயங்குதல்
    வலக்கையதன் பெருவிரல் வளைத்து
    மற்ற விரல்களை நிமிர்த்தி
    யாழதன் தண்டின் மீது
    அக்கையை வைத்து
    அது அசைந்திடாதபடி பிடித்தாள்.
    இடக்கையதன் நான்கு விரல்களை

    மாடகம் எனும்
    இசை வீக்கும் கருவி மீது பொருத்தி
    செம்பகை, ஆர்ப்பு, அதிர்வு, கோடம் எனும்
    பகை நரம்புகள் நான்கும்
    புகுந்துவிடாமல் நீக்கிடும்
    வழியது கடைப்பிடித்தாள்.

    முறைதவறா மரபு சார்ந்த்
    ஈரேழ் கோவையாய் அமைக்கப்பட்ட
    அந்த யாழ்தன்னில்
    முதலாக ‘உழை’ நரம்பினையும்
    இறுதியாக கைக்கிளை நரம்பினையும்
    வைத்தேதான் கட்டினாள்.

    இணை, கிளை, பகை, நட்பு எனும்
    இந்நான்கு நரம்புகளின் வழியே
    இசையது புணரும் குறிநிலையதனைப்
    பொருத்தமுறவே நோக்கினாள்.

    அது மட்டுமன்றி
    குரல் – இளி எனும்
    இரு நரம்புகளின்
    இசை ஒத்திருப்பதைத்
    தன் செவியால் அளந்தே அறிந்திட்டாள்.

    அடிப்படையாய் அமைந்த சிலப்பதிகாரத்தின் வரிகள் இங்கே: 27 – 35
    http://www.chennailibrary.com/iymperumkappiangal/silapathikaram23.html

    படத்துக்கு நன்றி:
    hool.discoveryeducation.com/clipart/clip/harp.html

    Share

  • நான் அறிந்த சிலம்பு – 75 (10.06.13)

    மலர் சபா

    புகார்க்காண்டம் – 08. வேனில் காதை

    தாழை மடலவிழ்க்கும் கானற்சோலையில்
    கடல் விளையாட்டு கண்டு களித்தபோது
    ஊடி நின்ற கோவலன் பிரிந்து சென்றிட
    தான் மட்டும் தனியளாய் இல்லம் புகுந்தனள்
    கரிய மலர் போன்ற நீண்ட கண்களையுடைய மாதவி.
    பின் குயிலோன் அறிவித்த செய்தியை விரும்பியவளாய்
    வானுயர்ந்த மேல் நிலை மாடத்தின் ஒரு புறமிருந்த
    இளவேனில் காலத்துக்குரிய பள்ளியறையில்
    மன்மதனை எதிர்கொள்ளச் சென்றனள்.

    பெருமையும் சிறப்பும் பொருந்திய அணிகலன்களும்
    தென்கடல் முத்தும் பொதிகை மலைச் சந்தனமும்
    மன்மதனுக்கு எப்போதும் செலுத்தப்படும் காணிக்கைகள்.
    மன்மதன் வீற்றிருக்கும் அரண்மனையாகிய
    தனது முலை முற்றத்தில்
    அக்குங்குமக் கோலமிடப்பட்ட பரப்பினில்
    குற்றமற்ற சிறப்புடைய பொருட்களைக்
    காணிக்கையெனச் செலுத்தினள்.

    ஒன்பது வகைப்பட்ட நிலையினுள் முதன்மையான
    பத்மாசன நிலையில் அமர்ந்து
    சுரங்கள் குலைந்திடாத மரபினை உடைய
    தனது யாழது தொழுது வாங்கித்
    தன் வாயால் இனிய பண் பாடினள்.
    பண் அது மயங்கவே
    யாழினை மட்டும் மீட்டினள்.

    அடிப்படையாய் அமைந்த சிலப்பதிகாரத்தின் வரிகள் இங்கே: 15 – 26
    http://www.chennailibrary.com/iymperumkappiangal/silapathikaram23.html

    படத்துக்கு நன்றி:

    http://kalaalog.com/2007/04/22/raja-ravi-varma/

    Share

  • நான் அறிந்த சிலம்பு – 74

    மலர் சபா

    புகார்க்காண்டம் – 08. வேனில் காதை
    இளவேனிலின் வருகை
    திருவேங்கடப் பெருமாள் எழுந்தருளிய
    வேங்கடமலையை வடக்கேயும்
    குமரிக் கடலைத் தெற்கேயும்
    எல்லையெனக் கொண்டது தமிழ்நாடு.

    மாடமாளிகைகள் நிறைந்த ஊரானது மதுரை;
    பெருமையில் சிறந்த ஊரானது உறையூர்;
    ஆரவாரம் நிறைந்த நகரானது வஞ்சி;
    ஒலிக்கின்ற கடலும் காவிரியும் உடையது புகார்.

    இந்நான்கு நகரங்களிலும் ஆட்சி செய்தனன்
    புகழும் சிறப்புமுடைய மன்மதராசன்.
    அவனுக்குத் துணையெனவே
    வந்துவிட்டனன் இளவேனில் என்பவனும்.
    இச்செய்தியை குயிலோனுக்குத் தூது கூறினன்
    வளத்தில் சிறந்த பொதிகை மலையில்
    அகத்தியர் பெற்றெடுத்த தென்றல் என்பவன்.

    ஆதலின்,
    “மீன்கொடி மைந்தன்
    மன்மதனின் படையிலுள்ள
    மகளிர் அனைவரும்
    நல் அலங்காரங்கள் செய்திடுங்கள்”
    என்றேதான் சொல்லும் வண்ணம்
    தென்றல் தூதுவன் இட்ட கட்டளையதனை
    பூங்கொடிகள் நிறைந்த
    சோலைப் பாசறையிலிருந்து
    கொம்பு ஊதும் குயிலோன்
    அறிவித்தனன் கூவியே.

    அடிப்படையாய் அமைந்த சிலப்பதிகாரத்தின் வரிகள் இங்கே: 1 – 14
    http://www.chennailibrary.com/iymperumkappiangal/silapathikaram23.html

    படத்துக்கு நன்றி:
    http://www.indiamart.com/forum-art-gallery/abstract-paintings.html

    Share

  • நான் அறிந்த சிலம்பு – 73 (27.05.13)

    மலர் சபா

    புகார்க் காண்டம் – 07. கானல் வரி

    “வரைவு நீட்டித்த இடத்துத் தலைமகன் சிறைப்புறத்தானாகத் தோழி கூறுதல்”

    (51)

    தீயைக் கொட்டிப் பரப்பி
    அதன் வெப்பத்தினால்
    எமை வருந்தச் செய்கிறதே
    இம்மாலைப்பொழுததுவே!

    இது இங்ஙனம் நமை வருத்தும்
    என்று சற்றும் நினைந்து பார்த்திடாது
    தலைவன் உரைத்திட்ட
    பொய்ச் சூளுரைகளை
    உண்மையென நம்பி ஏமாந்துவிட்டோமே!

    பூமணம் நிறை கானற்சோலையில் வாழுகின்ற
    சிறப்புப் பொருந்திய கடல் தெய்வமே!
    எம் தலைவர்தம் பொய்ச்சூளுரையைத்
    தண்டிக்காது பொறுத்தருள்வாயாக!
    நின் மலரடி போற்றி வணங்குகிறோம்.

    கட்டுரை

    “கோவலன் ஊழ்வினையால் மனம் மாறுபட்டு மாதவியைப் பிரிந்து போதல்”

    (52)

    இவ்வாறெல்லாம் மாதவி பாடக்கேட்ட கோவலன்
    நான் கானல்வரி பாடினேன்;
    அங்ஙனம் பாடாமல்
    வஞ்சனைப் பொய்கள் கூட்டி
    மாயம் செய்திடும் இம்மாயக்காரியோ
    வேறு யாரையோ நினைத்துப் பாடினள்
    என்று எண்ணுகையில்,
    யாழிசை மேல் வந்து நின்றது
    அவனுடைய ஊழ்வினை.

    முழுநிலவு நாளில் தோன்றுகின்ற
    நிலா போலும் முகமுடைய மாதவியுடன்
    இணைத்த தன் கையை
    அப்போதே ஞெகிழவிட்டனன்;
    பொழுது சாய்ந்துவிட்டது என்று கூறியே
    ஏவலர் மட்டும் சூழ
    மாதவியை விடுத்துப் புறப்பட்டனன்;

    மாதவி, கோவலனுடன் இன்றி, தனியளாய் ஆயத்துடன்
    தன் மனை புகுதல்”
    தாது விரிந்த பூக்கள் நிறைந்த சோலையில்
    தனித்துக் கோவலன் விட்டுச் சென்றிட
    செயலற்றுத் தவித்த மாதவி
    ஆங்கே நிலவிய ஆரவார ஒலிகள் அடங்கியதும்
    வண்டியில் சென்றமர்ந்து
    தனியே தன்மனை புகுந்தனள்
    கோவலன் உடன் இன்றியே.

    புகுந்தபின்,
    இவ்வுலகின் அரசர்கள் எல்லாம் தலைவணங்கும்
    சோழ மன்னனையும்,
    அவனது
    முகபடாம் அணிந்த யானையையும்
    ஒளி பொருந்திய வாளையும்
    “மிகப்பெரிய சக்கரவாளம்
    எனும் மலையை உள்ளடக்கி
    ஆட்சி புரிவதாகுக” என்று
    வெண்கொற்றக் குடையையும்
    வாழ்த்தி நின்றனள் மாதவி.

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram23.html

    படத்துக்கு நன்றி:
    http://www.tamilvu.org/courses/diploma/a021/a0214/html/a02141l6.htm
    கானல்வரி முற்றியது; தொடர்வது வேனில் காதை

    Share

  • நான் அறிந்த சிலம்பு – 72 (20.05.13)

    மலர் சபா

    புகார்க் காண்டம் – 07. கானல் வரி
    (49)

    இன்று எமைப் பிரிந்து சென்ற காதலர்
    அன்று அன்புடன் சொல்லிச் சென்றார்
    ‘உனைப் பிரியேன்’ என்று;
    அந்தச் சொற்கள் தருகின்ற நிழலதனில்
    தங்கியே ஏங்கியே நானும் வாழ்கிறேன்.

    மாலைப்பொழுதே!
    நீயோ தனித்திருந்து வருந்தி வாழும்
    என்னுயிரைக் கவர்ந்திட
    எனைச் சூழ்ந்து கொள்கிறாய்!
    இங்ஙனம் எமைத் துன்புறுத்தும் நீதானும்,
    கோட்டையதன் உள்ளே
    வலிமையற்றிருக்கும் வேந்தனவன்
    மதிலின் புறத்தே சூழ்ந்து நிற்கும்
    பகை வேந்தனுக்கு
    என்னதான் உறவு உடையாயோ!

    (50)

    பகல் செய்யும் கதிரவன் மேற்குக் கடல்புரத்தில்
    மறைந்து விட
    பலருக்கும் துன்பம் தரும்
    காமநோய் அதிகரிக்கச் செய்கிறாய் நீ
    மயக்கத்தயுடைய மாலைப்பொழுதே!

    நின் கொடுமைதான் காணச் சகியாமல்
    நிலமகளும் கண் மூடிக்கொண்டனள்;

    நீ மட்டும் வந்திடுவாய் ஆயின்,
    எம் தலைவர் வாராதிருப்பார் ஆயின்,
    யாம் மட்டுமின்றி இவ்வையமே
    இங்ஙனம் துன்புறுமன்றோ..
    மாலையே! நீ வாழ்வாயாக!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram22.html

    படத்துக்கு நன்றி:
    http://www.tamilvu.org/courses/degree/d011/d0111/html/d0111111.htm

    Share

  • நான் அறிந்த சிலம்பு – 71

     

    மலர் சபா

     

    புகார்க் காண்டம் – 07. கானல் வரி

     

    “முகம் இல் வரி”
    “காமம் மிக்க கழிபடர் கிளவி”
    (46)

    நாரையே! நாரையே!
    எம் கானலிடத்தே வந்துதான் அடையாதே!
    கரையில் அடித்து
    அதை உடைக்கின்ற அலைகளையுடைய
    கடல் பகுதி சார்ந்த
    எம் தலைவனுக்கு
    நீ எம் காதல் நோயை
    உரைக்கவே இல்லை.
    எனவே,
    இனி எம் கானலில் வந்துதான் அடையாதே!

    கட்டுரை
    மாதவி பண்ணுப் பெயர்த்துப் பாடத் தொடங்குதல்

    (47)

    அங்ஙனம் கோவலன் பாடியது போலவே
    பாடல்கள் பாடிமுடித்தனள் மாதவி;
    பின்னர் தன் மென்காந்தள் மென்விரல்களால்
    கைக்கிளையைச் சுருதியாகக் கொண்டு
    இன்னிசையுடைய செவ்வழிப்பாலை என்னும்
    இசையதனை எழுப்பி
    முறைப்படி பாடினள் மாதவி;
    அதற்குப் பின்பு
    வேறொரு பண்ணையும் பாடத் தொடங்கினள்.

    முகம் இல் வரி
    தலைவி மாலைபொழுது கண்டு கூறுதல்

    (48)

    மாலைப் பொழுதே!
    நெய்தல் நில மக்களுக்குரிய
    ‘விளரி’ எனும் இனிய பாலைப்பண்ணை
    யான் யாழ் மீட்டிப் பாடுங்கால்,
    இளி நரம்பைத் தடவுவதற்குப் பதிலாக
    கைக்கிளை எனும் நரம்பைத் தடவும் வண்ணம்
    எனக்குத்தான் மயக்கத்தைத் தந்துவிட்டாயே!
    இங்ஙனம் பகைநரம்பு
    எனை மீட்டவைக்க வல்ல நீ
    என் உயிரை மாய்க்கவும் வல்லாய்!
    ஆதலால்,
    என் உயிரினைக் கொண்டு சென்று வாழ்வாயாக!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram22.html<http://www.chennailibrary.com/iymperumkappiangal/silapathikaram22.html>

    படத்துக்கு நன்றி:
    http://blondesearch.ru/index.php?key=Raja_Ravi_varma_paintings&page=1

    Share

  • நான் அறிந்த சிலம்பு – 70

     

    மலர் சபா

     

    புகார்க் காண்டம் – 07. கானல் வரி

    **
    *(43)*
    **
    *”சாயல் வரி”
    “மெலிதாகச் சொல்லிக் குறைநயப்பித்தல் அல்லது ஆற்றுவிக்கும் பொருட்டுத் தோழி
    இயற்பழிக்க, தலைமகள் இயற்பட மொழிதல்”*

    தாழையை வேலியாகக் கொண்ட
    இக்கழியில்
    முன்னர் ஒருவர் வந்திருந்தார்;
    நாம் விளையாடிய
    பொய்தல் விளையாட்டை
    மறக்க வைத்துச் சென்ற அவர்
    நம் மையல் கொண்ட
    மனத்தைவிட்டு நீங்கி அகல்வாரல்லர்.

    *(44)*

    கடற்கரைச் சோலையை
    வேலியாகக் கொண்ட
    இக்கழியில்
    முன்னர் ஒருவர் வந்திருந்தார்;
    ‘நீ அருள்செய்வாய்” என்று
    வேண்டி நின்றிருந்த அவர்
    நம் மான் ஒத்த பார்வையை
    மறப்பாரல்லர்.

    *(45)*

    நேற்றைய நாளில்
    அன்னம் தன் துணையுடன்
    விளையாடக் கண்டிருந்தார் ஒருவர்.
    அதனையே நோக்கி நின்றிருந்த அவர்,
    பொன்னிறத்தில் நம் மேனிமீது
    படர்ந்திட்ட பசலை போல
    நம்மை விட்டு நீங்குவாரல்லர்.

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram22.html<http://www.chennailibrary.com/iymperumkappiangal/silapathikaram21.html>
    படத்துக்கு நன்றி:
    http://www.gunathamizh.com/2011_06_06_archive.html

    Share

  • நான் அறிந்த சிலம்பு – 69 (29.04.13)

    மலர் சபா

    புகார்க் காண்டம் – 07. கானல் வரி

    (41)
    கதிரவனும் மறைந்தனனே;
    கார் இருளும் படர்ந்ததுவே;
    அந்திமாலையை எதிர்நோக்கியிருக்கும்
    என் குவளை போன்ற கண்களும்
    நீரைத்தான் உகுக்கின்றனவே;

    புதிய நிலா போன்ற முகம் உடையவளே!
    திங்கள் ஒளியை உமிழ்ந்து
    ஞாயிற்றின் ஒளியை விழுங்கும்
    இம்மாலைப் பொழுது
    நம்மைப் பிரிந்து சென்ற
    தலைவர் தம் நாட்டிலும் இருந்திடுமன்றோ?!

    (42)

    பறவைகள் பாட்டு அடங்கிப்போயினவே;
    பகல் பொழுது செய்யும் சூரியனும் மறைந்தனனே;
    குறைவற்ற நிறைநிலா
    என் காமநோய் அதிகரிக்கச் செய்கிறது;
    நோய்மிகுதியால் என் நீண்ட கண்கள்
    நீரைத்தான் சொரிகின்றன;
    மொட்டவிழ் மலர்கள் சூடிய
    கூந்தலை உடையவளே!
    கொடுமையான வன்மையுடன்
    என்னுயிருடன் பகைகொண்டு விளங்கும்
    இம்மங்கிய மாலைப்பொழுது
    நம்மைப் பிரிந்து சென்ற
    தலைவர் தம் நாட்டிலும் இருந்திடுமன்றோ?!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram22.html

    படத்துக்கு நன்றி:
    http://arundhtamil.blogspot.com/

    Share

  • நான் அறிந்த சிலம்பு – 68 (22.04.13)

    மலர் சபா

    புகார்க் காண்டம் – 07. கானல் வரி

    (39)

    புலால் நாற்றம்
    தன் மீது பொருந்தியிருக்க
    அதற்கென வருந்தி
    அந்நாற்றம் நீக்க எண்ணி
    பொழிற்சோலையது புகுந்து
    ஆங்கே உதிர்ந்து நின்ற
    பூந்தாதுகளின் கலவையை
    மணம் கமழவெனத்
    தன் மேல் பூசிக்கொண்டு நிற்கின்ற
    அலைகள் உலாவிடும் கடலின் கரைகளையுடைய
    நெய்தல் நிலத் தலைவனே!

    பலவிதமான துன்பங்கள் உற்று வருந்துவதால்
    இது இன்ன நோய் என்று அறியாமல்
    எம் தலைவிதானும் தனித்துத் துன்புறுகிறாள்.
    இவள் மெலிவதும் இரங்குவதும்
    பிறர்க்குப் புலப்படவில்லை என்பதால்
    எவரும் உண்மை அறிந்திலர்.
    இதனைத் தாய் அவள் அறிந்திட்டால்
    என்னதான் நான் செய்வேன்?!

    “பொழுது கண்டு ஆற்றாளாகிய தலைமகள் தோழிக்கு உரைத்தல்”

    (40)

    மெல்லிய இருள் படர்ந்ததுவே;
    பகல் பொழுது தரும்
    கதிரவன் அவனும் மறைந்தனனே;
    நீக்கிட முடியாத தனிமைத் துன்பத்தால்
    என் கண்கள்தானும் நீரைச் சொரிகின்றனவே;

    மொட்டவிழ்ந்த மலர்கள் அணிந்த
    கூந்தலை உடையவளே!
    வளையல் கழன்று விழும்படி
    காமம் எனும் தீ கொண்டுவந்த
    இம்மாலைப் பொழுது
    நம்மைப் பிரிந்து சென்ற
    தலைவர் தம் நாட்டிலும் இருந்திடுமோ?!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram22.html

    படத்துக்கு நன்றி:
    http://arulalantamizh.blogspot.com/2012/07/4-971.html

     

    Share

  • நான் அறிந்த சிலம்பு – 67

     

    மலர் சபா

     

    புகார்க் காண்டம் – 07. கானல் வரி

    “மயங்கு திணைநிலை வரி அலர் அறிவுறுத்தி வரைவு கடாதல்”
    (37)

     

    நல்ல முத்துகளால் செய்த அணிகளை அணிந்த
    நன்மை பொருந்திய பவளத்தால் ஆன மேகலை அணிந்த
    செந்நெல் பயிரையுடைய மருத நிலம் தோறும்
    அலைகள் உலாவிடும் கடலின் கரைகளையுடைய
    நெய்தல் நிலத் தலைவனே!

    புன்னை மரங்களடர்ந்த சோலையதனில்
    வலிய மீன்கொடி உடைய மன்மதன் ஏவிய அம்புகளால்
    என் மேனியில் மேவிய புதிய புண்கள்
    என்னை அடையாளமே கண்டுகொள்ள முடியாவண்ணம்
    என் அழகதனை மறைத்துதான் விளங்குகின்றன.
    இதை என் அன்னையவள் அறிந்தால்
    என்னதான் நான் செய்வேன்?!

    (38)

    அழகிய பவளவாய் திறந்து
    கடல் முத்து நிகர்த்த புன்னகை புரியும்
    பரதவர் சேரியில் வலைகள் உலரும்
    அலைகள் உலாவிடும் கடலின் கரைகளையுடைய
    நெய்தல் நிலத் தலைவனே!

    மழைக்காலத்து மலரும் பீர்க்கம்பூக்களின்
    நிறமொத்த மேனியளாய்ப்
    பசலை படர்ந்த என் மேனி
    பொன்னிறத்தில் பொலிகின்றது.
    வெறியாட்டு நிகழ்த்தி தெய்வமது வழிபட்டு
    இக்கொடுமை செய்தவர் யார் என
    என் அன்னையவள் ஆராய்ந்து அறிந்தால்
    என்னதான் நான் செய்வேன்?!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram21.html

    படத்துக்கு நன்றி:
    http://www.tamilvu.org/courses/diploma/a031/a0312/html/a0312103.htm

    Share

  • நான் அறிந்த சிலம்பு – 66

     

    மலர் சபா

     

    புகார்க் காண்டம் – 07. கானல் வரி

    (35)
    பிரியேன் என்று
    அன்று சொல்லிச் சென்ற
    அன்பு பொருந்திய காதலரின்
    உருளையுடைய பெரிய வலிய தேர்
    சென்ற வழியது சிதையும்படி
    பரந்து விரிகின்ற கடல் வெள்ளமே!

    குளிர்பூக்கள் கொண்ட சோலையே!
    துணையுடன் கூடி மகிழும் அன்னமே!
    ஈரம் பொருந்திய குளிர் நீர்த்துறையே!
    இங்ஙனம் எமைப் பிரிதல் தகாது என்று
    அவரிடம் உரைக்க மாட்டீரோ!

    (36)

    பிரியேன் என்று
    அன்று சொல்லிச் சென்ற
    அன்பு பொருந்திய காதலரின்
    உருளையுடைய பெரிய வலிய தேர்
    சென்ற வழியது சிதையும்படி
    பரந்து விரிகின்ற கடல் வெள்ளமே!

    நீ வாழ்வாயாக!
    முன்பு எம்முடன் அன்புடன்
    உறவாடியிருந்த கடலே!
    இன்று உன் செயலால்
    உறவு கெடப் பகைமை ஆனாய்!
    என்றாலும் நீ வாழ்வாயாக!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram21.html

    படத்துக்கு நன்றி:
    http://www.tamilvu.org/courses/degree/c012/c0123/html/c01234l3.htm

    Share

  • நான் அறிந்த சிலம்பு – 65

    மலர் சபா
    புகார்க் காண்டம் – 07. கானல் வரி

     

    இனிய கள் ஊறும் வாயையுடைய
    நெய்தல் மலரே!
    வருத்தம் அதிகரிக்க வைக்கும்
    இம்மாலைப் பொழுதினில்
    தனிமையில் வருந்துகின்றன
    என் கண்கள்.

    அது போன்ற துன்பம்
    ஏதும் இல்லாததால்
    ஆழ்ந்து நீ உறங்குகின்றாய்!
    நீ உறங்கும்போது
    காண்கின்ற கனவுதனில்
    கொடியவராம் எம் காதலர்
    இச்சோலைப் பக்கம் வரக்கண்டாயா?

    (34)
    பறவைகள் போல
    விரைந்து சென்றிடும்
    குதிரைகள் பூட்டிய
    தேரின் சக்கரங்கள்
    சென்ற வழி அனைத்தையும்
    சிதைத்து நீ நிற்கிறாய்,
    தெளிந்த நீரையுடைய கடலே!

    என்ன செய்வேன் இனி யான்?
    என்னுடன் இருந்து கொண்டே
    பழிபோற்றும் அயலாரோடு
    சேர்ந்துகொண்டு
    நீயும் எனக்குத் துன்பம் தருகின்றாய்.
    என் நோயினை நீ அறியாய்;
    என்ன செய்வேன் இனி யான்?

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram21.html

    படத்துக்கு நன்றி:
    http://jaikrishnaraitushar.blogspot.com/2011_03_01_archive.html

    Share

  • நான் அறிந்த சிலம்பு – 64

    மலர் சபா

    புகார்க் காண்டம் – 07. கானல் வரி

    (31)
    திணைநிலை வரி
    “அறியேன் என்று வலிதாகச் சொல்லி, பாங்கி குறைநயப்பித்தல்”

    தன் துணையோடு கலந்து விளையாடும்
    புள்ளிகள் பொருந்திய உடம்பினை உடைய
    ஆண் நண்டினைக் கண்டான் தலைவன்.
    அதே நேரம்
    பூங்கொத்துகள் செறிந்த
    கானற்சோலையில் இருந்த
    என்னையும் நோக்கினான்.
    தன் உணர்வு ஒழியச் சென்றான்;

    வளைந்த சுருள் கூந்தல் உடையவளே!
    அவ்வாறு சென்ற தலைவனின்,
    ஒலிக்கும் அலைகள் கொண்ட
    அக்கடற் சேர்ப்பனின் நிலைமைதனை
    நானும் அறிந்திலேனடீ!

    (32)

    குளிர்ந்த தம் அருளைத் தரவென்று
    தம் குதிரை பூட்டிய தேரிலே
    வருபவர் நம் தலைவர்!
    இப்போது எனை நினைக்காது
    கைவிட்டுவிட்டாரே அவர்!

    அழகிய மென்கொத்துகளையுடைய
    அடும்புகளே!
    அன்னங்களே!
    நம்மை அவர் மறந்தாலும்
    நாம் அவரை மறக்காதிருப்போம்!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram21.html

    படத்துக்கு நன்றி:
    http://www.dollsofindia.com/product/contemporary-hand-painted/lady-in-moonlight-raja-ravi-verma-painting-painting-on-woven-bamboo-strands-BJ98.html

    Share

  • நான் அறிந்த சிலம்பு – 62

     

     

    நான் அறிந்த சிலம்பில் இடையில் 62-ம் பகுதி விட்டுப்போய்விட்டதற்கு வருந்துகிறோம். இதோ அந்த பகுதி

     

    மலர் சபா

     

    புகார்க் காண்டம் – 07. கானல் வரி

    (27)

    காவிரியே!
    நின் கணவனது நாடு
    வளநாடு ஆகுக!
    அந்நாடு நின் குழந்தையாக,
    நீ அதைத் தாயாய் நின்று வளர்த்து,
    தவறாது உதவி செய்கிறாய்!
    அதனால் காவிரியே! நீ வாழ்க!

    அங்ஙனம் நீ காத்து நிற்கக் காரணம்,
    நாடு காத்து ஓம்புகின்ற
    ஆணைச் சக்க்ரம் ஏந்தியவனும்,
    நடுவு நெறி பாராட்டுபவனும்.
    அனைவராலும் விரும்பப்படுபவனுமாகிய
    நின் கணவன் சோழமன்னனது அருளேயாகும்;
    அதனால் காவிரியே! நீ வாழ்க!

    (28)

    “சார்த்துவரி”
    “புகாரைப் பற்றிய பாடல்கள்”
    “கையுறை மறுத்தல்”

    இனிய கதிர்களையுடைய
    திங்களது போலும்
    ஒளிர்ந்திருக்கும் முகத்தையுடைய
    தலைவியின் சிவந்த வாயில் இருக்கும்
    அழகிய பற்களுக்கு
    நீ தரும் இந்த முத்துகள் ஈடாகா;

    எனினும்
    ‘முத்துகளை நீங்கள் வாங்குங்கள்’ என்று கூறித்
    திருமாலின் மகன் காமன் அவன் போல் பித்தேறி
    கடலே! நீயும் நாள்தோறும் இங்கு வருகின்றாய்!

    ஐயனே!
    ஒலிமிகுந்த கடல் அலைகள்
    ஒளிமிகுந்த வெண் முத்துகள் தந்து
    அவற்றுக்கு ஈடாக வணிகர்கள் போல்
    மணம்மிக்க மலர் மாலைகளைக்
    கானலிடத்தே பெற்று விளங்குகின்ற
    புகார் அன்றோ எமது ஊர்?!

    அடிப்படையாய் அமைந்த சிலப்பதிகாரத்தின் வரிகள் இங்கே:

    அடிப்படையாய் அமைந்த சிலப்பதிகாரத்தின் வரிகள் இங்கே:
    படத்துக்கு நன்றி:
    Share

  • நான் அறிந்த சிலம்பு – 63

     

     

    மலர் சபா

    புகார்க் காண்டம் – 07. கானல் வரி

    [ 29 ]

    “தோழியிற் கூட்டம் கூடி, பின்பு வந்து வரைவல்
    என்ற தலைவனுக்குத் தோழி கூறுதல்”

    வலிமைமிக்க பரதவர் வாழும் பாக்கத்தில்,
    களவில் கூடிய மகளிர்
    தலைவனைப் பிரிந்ததால் நேர்ந்த துயரால்,
    அம்மகளிர்தம்
    செம்மையான முன் கையில் இருந்து
    வளையல்கள் தாமே கழன்று வீழ்ந்து
    தூற்றுவதை, தலைவனே!
    ஏழைகளாகிய நாம் எங்ஙனம் அறிவோம்?

    பூக்களின் அரும்புகளின் சுமையால்
    பாரம் அதிகரித்த
    நீண்ட புன்னைமரத்தின் கொம்பதனில்
    அன்னமொன்று ஏறியிருக்க,
    அந்த அன்னத்தை முழுநிலவு என்றும்
    சுற்றி இருந்த பூக்களை
    நட்சத்திரங்கள் என்றும் எண்ணிய
    அந்தியில் மலரும் ஆம்பல் மலர்
    பகலிலேயே மலர்ந்தது.
    தேன் உண்பதற்காகவென
    அவ்வாம்பல் மலரை
    வண்டுகள் ஊதி நிற்கும்
    புகார் அன்றோ எமது ஊர்?!

    (30)

    தன்னை உண்டவரைத் தம் போதையாலே
    அறிவிழக்கச் செய்து அடிமை செய்யும்
    கள் எனும் ஊண் எம் பாக்கத்துள்
    அழியாது நிற்கும்.
    இங்கு வாழும் மகளிர்க்கு
    எம்மருந்தாலும் தீர்த்திட முடியாத
    காம நோய் அதனை நீ தருகின்றாய் என்று
    தலைவனே!
    நாங்கள் எங்ஙனம் அறிவோம்?

    சிறுமியர் வண்டல் கொண்டு இழைத்திருந்ததை
    கடல் அலைகள் அழித்துச் சென்றிட,
    சிறுமியரின் மதிமுகத்தில் இருந்த,
    பகைவர்கள் புண்ணில் தோய்த்தெடுத்த
    வேல்போன்ற கண்கள் நீரைத்தான் வார்க்கின்றன.
    கோபம் கொண்ட சிறுமிகள்
    கடலைத் தூர்க்க முயன்று
    மணலை வாரி இறைக்கின்ற
    புகார் அன்றோ எமது ஊர்?!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram21.html

    படத்துக்கு நன்றி:
    http://www.tamilvu.org/courses/degree/a011/a0113/html/a01134l7.htm

    Share