— கவிஞர் காவிரிமைந்தன்.

மனம் ஒரு பறவை!  விரும்பும் திசையெல்லாம் பறந்துகொண்டேயிருக்கும்!  மனிதனுக்குத்தான் இறகுகள் இல்லை!  உடலால் பறக்க முடியாவிட்டாலும் உள்ளத்தால் பல தூரம் கடந்து விடுகிறான்.  நனவில் அல்ல!  கனவில்!!  எதார்த்தங்களை வாழ்வில் பார்த்துச் சலித்துப்போன பிறகு  நமக்கும்கூட அப்படிப் பறந்திட எண்ணம் வரும்!  அதுவும் காதல் கொண்ட பருவத்தில் என்றால் எல்லைகள் அங்கே இல்லவே இல்லை!

பொழுதுபோக்கிற்காக உருவாக்கப்படும் திரைச் சித்திரங்களில் இந்த எதார்த்தங்களை மீறி கொஞ்சம் மாய ஜாலம் கலந்து மக்களுக்குத் தர தொன்றுதொட்டு இயக்குனர்களுக்குக் கூட ஒரு வேட்கை இருந்து வருகிறது!

ஒரு ‘கார்’ தரையிலிருந்து விண்ணோக்கி கிளம்பி சென்னை நகரை.. அதன் முக்கிய சாலைகளை வலம் வருவது போன்ற காட்சியமைப்பு! மக்கள் திலகத்துடன் கன்னடத்துப் பைங்கிளி  அபிநய சரஸ்வதி சரோஜா தேவி அவர்களும் தோன்றிடும் வெற்றிப்படைப்பு!  எத்தனையோ பாடல்களை மனம் விரும்பிக் கேட்கும்போதும் இந்தப் பாடல் கேட்கும்போதெல்லாம் ஏதோ உற்சாக கங்கை உள்ளத்துள் ஊற்றெடுக்கும்!

முழுக்க முழுக்க மெலோடியும் இல்லாமல் அதே நேரம் முழுமையான ஜன ரஞ்சகப் பாடலாகவும் இல்லாமல் ஒருவிதக் கலவையாய் உருவாக்கித் தந்தவர் மெல்லிசை மன்னர் எம்.எஸ்.விஸ்வநாதன்!  கவி வண்ணம் வாலி கணை தொடுத்திருக்கிறார்!  திரு கிருஷ்ணன் பஞ்சு அவர்களின் இயக்கத்தில் ‘பெற்றால்தான் பிள்ளையா’ திரைப்படத்தில் அமைந்த பாடலிது!

மக்கள் திலகமும் அபிநய சரஸ்வதியும் இணைந்து தமிழ்த் திரையில் வழங்கிய காதல் பாடல்களின் பட்டியல் நீளும்..  என்றாலும் உயிரோட்டமான இப்பாடல் எப்போது கேட்டாலும் .. டி எம். சௌந்தரராஜன் மற்றும் பி. சுசீலா குரல்களில் தெவிட்டாத தெள்ளமுதம் என்கிற வகையில் ஆண்டுகள் பல தாண்டி நம் மனதை ஆண்டு வருகிறது!

http://www.youtube.com/watch?v=Tjwxq4Vh4a0
காணொளி:   http://www.youtube.com/watch?v=Tjwxq4Vh4a0

படம்: பெற்றால்தான் பிள்ளையா
பாடல்: வாலி
இசை: எம்.எஸ்.விஸ்வநாதன்
குரல்: டி எம் சௌந்தரராஜன், பி சுசீலா

சக்கரைக்கட்டி ராஜாத்தி –
என் மனச வச்சுக்கோ காப்பாத்தி
சந்தனக்கட்டி மேனியிலே –
நான் சாஞ்சுக்கவா சொல்லு மகராசி

பட்டுப் போன்ற உடல் தளிரோ –
என்னைப்பார்க்கையிலே வந்த குளிரோ
தோகை மயிலின் தோளை அணைத்து
தோகை மயிலின் தோளை அணைத்து
பழகிக்  கொள்வது சுகமோ

தொட்டுக் கொள்ள விரல் துடிக்கும் –
விழிதூரப் போகச் சொல்லி நடிக்கும்
ஆளை மயக்கும் பாளைச் சிரிப்பில்
ஆளை மயக்கும் பாளைச் சிரிப்பில்
ஆசை பிறந்தது எனக்கும்

கொடுத்த மனசுக்கும் எடுத்த மனசுக்கும்
கேள்வி  என்ன ஜாடை என்ன
தேவை இல்லை வெட்கம்

அத்தை மகனே அத்தானே –
உன்அழகைக் கண்டு நான் பித்தானேன்
தென்றலடிக்கும் தோட்டத்திலே –
நான்பூத்திருக்கும் முல்லை மொட்டானேன்….

உறவைச் சொல்லி நான் வரவா
என் உயிரை உன்னிடம் தரவோ
[உன் உதட்டில் உள்ளதைப் பெறவோ]
மாலை மயக்கம் தீரும் வரைக்கும்
மாலை மயக்கம் தீரும் வரைக்கும்
வாரி கொடுப்பேன் வா வா

மடியைத் தேடி வந்து விழவோ –
இந்தமாப்பிள்ளை அழகுக்கு அழகோ
காலை வரையில் சே(சோ)லை நிழலில்
காலை வரையில் சே(சோ)லை நிழலில்
கண்கள் உறங்கிட வா வா

கொடுத்த மனசுக்கும் எடுத்த மனசுக்கும்
கேள்வி  என்ன ஜாடை என்ன
தேவை இல்லை வெட்கம்

அத்தை மகனே அத்தானே –
உன்அழகைக் கண்டு நான் பித்தானேன்
தென்றலடிக்கும் தோட்டத்திலே –
நான்பூத்திருக்கும் முல்லை மொட்டானேன்….

சக்கரைக்கட்டி ராஜாத்தி –
என் மனச வச்சுக்கோ காப்பாத்தி
சந்தனக்கட்டி மேனியிலே –
நான் சாஞ்சுக்கவா சொல்லு மகராசி

இந்த வரிகளில் “உன் உதட்டில் உள்ளதைப் பெறவோ” என்கிற வார்த்தை தணிக்கைக் குழுவினரால் நீக்கப்பட்டு.. “என் உயிரை உன்னிடம் தரவோ” என்றும் ‘சேலை நிழலில்’ என்கிற வார்த்தை.. ‘சோலை நிழலில்’ என்றும் மாற்றப்பட்டு ஒலிப்பதிவானது!  காலத்தின் கோலத்தைப் பாருங்கள்..  சேலை என்பதும் உதட்டில் என்கிற வார்த்தைகள் கூட தணிக்கை செய்யப்பட்ட காலம் என்பதை இன்று நினைக்கும்போது சிரிப்புத்தான் வருகிறது!

— கவிஞர் காவிரிமைந்தன்.

அன்பின் ஆர்ப்பரிப்பா?  காதல்.. இல்லை.. அது ஆனந்த பைரவியா?

எப்போது இது தோன்றுமென்பதை எவரும் முன்கூட்டி சொல்வதில்லை! இந்த ஒற்றைப்பூ நெஞ்சுக்குள் பூத்துவிட்டால் சந்தோஷ மழைக்கென்றுமே பஞ்சமில்லை!  கண்ணுக்கு மட்டுமே முதல் தகவல் கிடைக்க..  அது மனசுக்குள் சென்று செய்யும் கலவரமிருக்கிறதே .. காதலித்தவர்களுக்கே புரியும் – அந்த ஆனந்த அவஸ்தை! பார்வையில் தொடங்கி நெஞ்சப் பரிமாற்றமென காதலின் நிலைகள் பலவும் கவிதையில் கேட்பது இனிமை!  வரைமுறைக்குள் நடக்கின்ற இந்த வாலிபத் திருவிழா பூங்காக்கள்.. கடற்கரை..  திருக்கோவில்.. தெருவீதி.. என அடிக்கடி இடம் மாற்றம் நிகழ்ந்தாலும் இதயங்கள் இரண்டு மட்டும் இணைந்தே இருப்பதென்ன?

இளமை ஊஞ்சலாடுகிறது என்னும் திரைப்படத்திற்காக கவிஞானி வாலி இயற்றி இசை ஞானி இளையராஜா அமைத்த இசையில் இதோ மெல்லிய பூங்காற்று செல்லமாய் பேசுவதைப் போல் எஸ்.பி. பாலசுப்ரமணியமும்  வாணிஜெயராமும் வழங்கியிருக்கும் சுகமான பாடல்! இது சிவரஞ்சனியா தெரியவில்லை.  காதல் மிதமிஞ்சிப் போகும் கலை!

ஒற்றைப் பாடலுக்குள் இத்தனை சுகங்களா? எண்ணிப் பாருங்கள்!!   இயக்குனர் ஸ்ரீதர் இயக்கத்தில் உருவான இந்தப் பாடல் பற்றி இளையராஜா அவர்கள் ஒரு மேடையில் குறிப்பிடும்போது கவிஞர் வாலி அவர்களின் பாடல் இயற்றும் திறம்பற்றி புகழ்ந்துரைத்து…  ஆரோகணத்தில் தொடங்கும் பல்லவியை அடுத்து..  உனை எனை என்று வார்த்தைகளைப் பயன்படுத்தி இருக்கிறார். வேறு எந்த வார்த்தைகளும் அந்த இடத்திற்கு இத்தனைப் பொருத்தம் ஆகா என்றார்.

வார்த்தைகளில் உள்ள அர்த்தங்களையும் அதன் ஆழத்தையும் தன் கற்பனையிலே கொண்டுவரும் வித்தகமே கவிதை!  அதைத் தன் இசை ஞானத்தால் இதயம் தொடும் விதத்தால் இளையராஜா நடத்தும் ராஜாங்கத்தில் என்றுமே சுகம்!  சுகம்!!

http://youtu.be/th3LJyFDZzY
காணொளி: http://youtu.be/th3LJyFDZzY

படம்: இளமை ஊஞ்சலாடுகிறது
பாடல்: கவிஞர் வாலி
இசை: இளையராஜா
பாடியவர்: வாணி ஜெயராம், SP பாலசுப்ரமணியம்

ஒரே நாள் உனை நான் நிலாவில் பார்த்தது
உலாவும் உன் இளமைதான் ஊஞ்சல் ஆடுது…

ஒரே நாள் உனை நான் நிலாவில் பார்த்தது
உலாவும் உன் இளமைதான் ஊஞ்சல் ஆடுது…

மங்கைக்குள் காதலெனும் கங்கைக்குள் நான் மிதக்க
மங்கைக்குள் காதலெனும் கங்கைக்குள் நான் மிதக்க

சங்கமங்களில் இடம் பெறும் சம்பவங்களில் இதம் இதம்

மனத்தால் நினைத்தால் இனிப்பதென்ன….

[ஒரே நாள்…]

நெஞ்சத்தில் பேர்எழுதி கண்ணுக்குள் நான் படித்தேன்
நெஞ்சத்தில் பேர்எழுதி கண்ணுக்குள் நான் படித்தேன்

கற்பனைகளில் சுகம் சுகம்
கண்டதென்னவோ நிதம் நிதம்

மழை நீ, நிலம் நான், மயக்கமென்ன…

[ஒரே நாள்…]

பஞ்சனை பாடலுக்கு… பல்லவி நீ இருக்க
பஞ்சனை பாடலுக்கு… பல்லவி நீ இருக்க

கண்ணிரண்டிலும் ஒரே ஸ்வரம்
கையிரண்டிலும் ஒரே லயம்

இரவும், பகலும், இசை முழங்க….

[ஒரே நாள்…]

— கவிஞர் காவிரிமைந்தன்.

ஆண்டவன் ஒரு நாள் கடைவிரித்தான் …

அன்பை வாங்கிட எவரும் இல்லை!!!????

ஜீவராசிகள் முதல் மானுடவர்க்கம்வரை வகை வகையான உயிரினங்கள், இயற்கை வளங்கள் முதல் விண்மீன்களென பால்வீதியையும் படைத்தவன்.. விநோதமாக இருக்குமிடம் தெரியாமல் தானிருந்து ஆட்டுவிக்கும் நாடகமே இவ்வாழ்க்கை!  இதில் ஏற்றுள்ள பாத்திரங்களை இயல்பாக நடிப்பதைத் தவிர வேறு வழியில்லாமல் மர்ம முடிச்சுக்கள் இடப்பட்டிருக்கின்றன!  மேலும் இதயத்தையும் மூளையையும் சம்பந்தப்படுத்தி – மனம் என்கிற கடலையும் மனிதனுக்குள் படைத்துவிட்டான்!  ஆசையெனும் அலைகளில் தனக்குள்தானே சிக்கி எவன் ஒருவர் மீள்கிறானோ எங்கே பார்க்கலாம்.. எனும் விசித்திர விளையாட்டை தினசரி நடத்துவிக்கும் சூத்திரதாரி இறைவன்!

அவன் படைத்த உலகமிது என்பதை அழகழகாய் வரியமைத்து வாலி தந்த பாடலிது!  அவரவர் ஆசை என்னவென்று ஆங்கோர் பட்டியலிட்டு அன்பினை வாங்கிட எவருமில்லை எனும் அவலத்தைப் படம் பிடித்துக் காட்டுகின்றார்! எண்ணரதமேறி.. எழுத்துப் படை நடத்தி ஈட்டிடும் வெற்றிகளில்தான் இதுபோன்ற தத்துவ தரிசனங்கள் தாமாக வந்து விழும்! அத்தகைய பாடலிது! சுட்டிக்காட்டிய நண்பர் ஷேக் சிந்தா மதார் அவர்களுக்கு சிறப்பு நன்றிகள் உரித்தாக்குகின்றேன்!

திரையிசைத் திலகம் கே.வி.மகாதேவன் இசையமைப்பில் வாலியின் வைர வரிகள்.. திரைப் படம் ‘டில்லி மாப்பிள்ளை’ பாடியவர் டி.எம்.சௌந்தரராஜன் அவர்கள்!!.

http://youtu.be/lN_4hTXIG9A

காணொளி: http://youtu.be/lN_4hTXIG9A

படம்: டில்லி மாப்பிள்ளை
பாடல்: வாலி
இசை: கே.வி.மகாதேவன்
குரல்: டி. எம். எஸ்.

ஆண்டவன் ஒருநாள் கடை விரித்தான்
அதில் ஆயிரம் ஆயிரம் பொருள் குவித்தான்
அவரவர் நிலைமைக்கு விலையைச் சொன்னான்
அவரவர் தேவைக்கு வாங்கச் சொன்னான்

ஆண்டவன் ஒருநாள் கடை விரித்தான்
அதில் ஆயிரம் ஆயிரம் பொருள் குவித்தான்
அவரவர் நிலைமைக்கு விலையைச் சொன்னான்
அவரவர் தேவைக்கு வாங்கச் சொன்னான்

பெண்களோ அழகை வாங்க வந்தார்
ஆண்களோ ஆசையை வாங்க வந்தார்
தலைவர்கள் புகழை வாங்கிக் கொண்டார்
புலவர்கள் பொய்களை வாங்கிக் கொண்டார்

ஆண்டவன் ஒருநாள் கடை விரித்தான்
அதில் ஆயிரம் ஆயிரம் பொருள் குவித்தான்
அவரவர் நிலைமைக்கு விலையைச் சொன்னான்
அவரவர் தேவைக்கு வாங்கச் சொன்னான்

குருடர்கள் பார்த்திட விழி கேட்டார்
ஊமைகள் பேசிட மொழி கேட்டார்
உறவினர் மாண்டவர் உயிர் கேட்டார்
ஒருசிலர் மேலுக்கு விலை கேட்டார்

எதையும் வாங்கிட மனிதர் வந்தார்
விலை என்னவென்றாலும் அவர் தந்தார்
இதயம் என்பதை விலையாய்த் தந்து
அன்பை வாங்கிட எவரும் இல்லை

– கவிஞர் காவிரிமைந்தன்.

வாலி வழங்கிய,  கொடை வள்ளல் எம்.ஜி.ஆருக்கே சமர்ப்பணம் என்ற வரி வரையப்பட்டால் அது சத்திய வாசகமே! கொட்டிக்கவிழ்த்திருக்கிறார் தனது தமிழறிவை! அதுவும் வெற்றி பெற்றுள்ள அனைத்து மெட்டுக்களிலும் தன் தமிழைக் கொடிகட்டிப் பறக்கவிட்டிருக்கிறார் என்பதும் மிகையில்லை!  எத்தகையப் பாடலென்றாலும் எழுதிவிடும் ஆற்றல் இறைவன் இவருக்குத் தந்தது!  தத்தகாரம் போன்ற விவகாரங்களில் இவரது நாடகத்துறை அனுபவம் கைகொடுத்து வந்தது!  தாலாட்டு, காதல், வீரம், சோகம், தத்துவம், கொள்கைப் பாடல்கள் என்று எந்த விதத்திலும் தனது பாடல் வரிகளில் பல்லவி முதலாக தீட்டித்தந்திட இவரென்றும் சளைத்ததில்லை!

கூர்ந்த மதிநுட்பம், கற்பக விருட்சம் போல் கற்பனா சக்தி, அற்புதமாய் பூத்துவரும் சிந்தனைகள், மக்கள் உள்ளப்பாங்கறிந்த பயிற்சி, தன்னிடம் எதிர்பார்ப்பது என்ன என்பதை நுண்ணியமாய் கண்டறியும் திறன், அதற்கேற்ப வரிகளை வரைந்து மனக்கண் முன்னே இருந்த ஓவியத்தை நிஜத்தினில் வரவைத்துவிடுகிற தனித்திறம் – இதுதான் வாலி என்று ஒரு விளக்கம் தரலாம்!

பெற்றால்தான் பிள்ளையா என்கிற திரைப்படத்தில் இடம்பெற்று காற்றில் மிதந்துவரும் தாலாட்டுப் பாடலிது!  மக்கள் திலகத்தின் பண்பட்ட நடிப்பை இப்படத்தில் காணலாம் என்பது பத்திரிக்கைகளின் பதிவாகும்!  டி.எம்.சௌந்தரராஜன் அவர்களின் குரலில் வரும் தென்பொதிகைக் காற்று!  கவிஞர் வாலி வரைந்தளித்த மென்மையான பாடலிது!  மெல்லிசை மன்னரின் கரங்களில் தவழ்ந்து இன்னும் மெருகேறி நம்மையும் தூங்க வைக்கக் கேட்கலாமே!

செல்லக்கிளியே மெல்லப் பேசு!
தென்றல் காற்றே மெல்ல வீசு!

பிள்ளை உறங்க பாடிடும் பாடல்!  பெற்றவர்கூட  உறங்கிட ஒலிக்கட்டும் நமக்காக!

http://www.youtube.com/watch?v=fH1ToWpJ6lw
காணொளி: http://www.youtube.com/watch?v=fH1ToWpJ6lw

படம்: பெற்றால்தான் பிள்ளையா  (1966)
கவிஞர்: வாலி
இசை: எம்.எஸ். விஸ்வநாதன்
குரல்: டி. எம். எஸ்.

லுலொல்லொலாயீ…….

செல்லக் கிளியே மெல்லப் பேசு
தென்றல் காற்றே மெல்ல வீசு
செல்லக் கிளியே மெல்லப் பேசு
தென்றல் காற்றே மெல்ல வீசு

தூங்கும் மன்னவன் தூங்கட்டுமே
தொடரும் கனவுகள் தொடரட்டுமே
தூங்கும் மன்னவன் தூங்கட்டுமே
தொடரும் கனவுகள் தொடரட்டுமே

செல்லக் கிளியே மெல்லப் பேசு
தென்றல் காற்றே மெல்ல வீசு
லுலொல்லொலாயீ…….

திங்கள் முகம் எடுத்து
செவ்வாய் இதழ் எடுத்து
வெள்ளை மலர் சிரிப்பில்
பிள்ளை வருவான்
திங்கள் முகம் எடுத்து
செவ்வாய் இதழ் எடுத்து
வெள்ளை மலர் சிரிப்பில்
பிள்ளை வருவான்
தத்தும் நடை நடக்க
தண்டை குரல் கொடுக்க
சித்தம் குளிர வைக்க
முத்தம் தருவான்

செல்லக் கிளியே மெல்லப் பேசு
தென்றல் காற்றே மெல்ல வீசு

ஆரிரரோ….ஆரிராரோ……ஆரிராரோ….
ஆரிராரோ……ஆரிரரோ….ஆரிராரோ…..

–கவிஞர் காவிரிமைந்தன்.

கன்னிப்பெண் திரைப்படத்திற்காக நடிகர் சிவக்குமார் வெண்ணிற ஆடை நிர்மலா இணைசேர.. கவிஞர் வாலி எழுதிய பாடலுக்கு மெல்லிசை மன்னர் அமைத்த இசையில் எஸ்.பி. பாலசுப்ரமணியம் மற்றும் எஸ். ஜானகி பாடியிருக்கிறார்கள்.  முழுமையான மெல்லிசைப் பாடலிது என்று முழங்குகிறது இசை!

அழகிய கவிதைக்கு ஆபரணம் பூட்டியிருக்கிறார் இசையமைப்பாளர்!  சொல் இனிதா.. இசைச் சுவை இனிதா என்று தரம்பிரிக்க முடியாத அளவு சுகம் சேர்த்திருக்கிறார்கள் பாடிய இருவரும்!

திரைப்படம் வந்து ஓடிய பின்னரும் திரைப்பாடல் மக்கள் மனதில் ரீ்ங்காரமிடுவதற்கு காரணம் என்ன என்று கேட்டால்.. இதுபோன்ற பாடல்களை எவர்தான் கேட்க மறுப்பார்?  இசையால் இதயம் ஈர்த்து தமிழ்ச் சொற்களால் சொக்க வைக்கும் அற்புதம் திரைத்துறையில் அமைதியாக நடந்து கொண்டே இருக்கிறது.  அதற்கு கவிஞர்களும் இசையமைப்பாளர்களும் பாடக பாடகியரும் பெரிதும் காரணமாகிறார்கள் என்பதை இங்கே பதிவு செய்ய தக்கதொரு பாடலிது என்பேன்!

சுகம் சுகமாய் பயணம் செல்ல.. வாழ்க்கை முழுவதும் இதுபோன்ற பாடல்களை கேட்டுக்  கொண்டே தூரத்தை மறக்கலாம்!  இன்பஸ்வரங்களை எழுதிக்காட்டும் கவிஞர்கள்.. நம் இதயம் மீட்டும் இசையமைப்பாளர்கள்.. தமி்ழ்த்திரையில் கொடிகட்டிப்பறந்ததற்கு இப்பாடல் ஒரு சாட்சியாகும்!

http://www.youtube.com/watch?v=psge_FCFjVA
காணொளி: http://www.youtube.com/watch?v=psge_FCFjVA

பாடல்: வாலி
படம்: கன்னிப்பெண்
இசை: எம்.எஸ். விஸ்வநாதன்
குரல்கள்: எஸ்.பி. பாலசுப்ரமணியம், எஸ். ஜானகி

பௌர்ணமி நிலவில் பனிவிழும் இரவில்
கடற்கரை மணலில் இருப்போமா
மெளனத்தின் மொழியில் மயக்கதின் நிலையில்
கதை கதையாக படிப்போமா..

கம்பன் தமிழோ பாட்டினிலே
சங்கத் தமிழோ மதுரையிலே
பிள்ளைத் தமிழோ மழலையிலே – நீ
பேசும் தமிழோ விழிகளிலே..

நெஞ்சம் முழுதும் கவிதையெழுது
கொஞ்சும் இசையில் பழகும்பொழுது
துள்ளும் இளமை பருவம் நமது
தொட்டுத் தழுவும் சுகமோ புதிது
கண்பார்வையே உன் புதுப்பாடலோ
பெண் வீணையே உன் பூமேனியோ

பிள்ளைப் பருவம் தாய் மடியில்
பேசும் பருவம் தமிழ் மடியில்
கன்னிப் பருவம் என் வடிவில்
காலம் முழுதும் உன் மடியில்..

பன்னீர் மழைதான் விழிமேல் பொழிய
தண்ணீர் அலைபோல் குழல்தான் நெளிய
தன்னந் தனிமை தணல்போல் கொதிக்க
தஞ்சம் புகுந்தாள் உனைத்தான் அணைக்க
பொன்னோவியம் என் மன மேடையில்
சொல்லோவியம் உன் ஒரு ஜாடையில்..

— கவிஞர் காவிரிமைந்தன்.

எத்தனையோ மலர்களிங்கே மண்ணிலிருந்தாலும் மல்லிகைக்கென்று ஒரு மகத்தான இடம் மங்கையரிடம் மட்டுமில்லை,  ஆடவரின் உள்ளங்களிலும் உண்டு!  வெள்ளை நிறத்தில் மொட்டாகக் கூடிச் சரமாய்த் தொடுக்கப்பட்டுப் பின் மெல்ல மெல்ல இதழ் விரித்து மணம்தனைப் பரப்பி மனதையும் மயக்கும் மலரன்றோ? மஞ்சமென்றதும் மல்லிகைதான் முதலில் நினைவுக்குள் தோன்றும்! மங்கையரின் கூந்தலில் பெரும்பாலும் இடம் பெறுகின்ற மலர் – மல்லிகை!  எனவேதான் ‘தீர்க்கசுமங்கலி’ திரைப்படத்தில் ‘புன்னகை அரசி’ கே.ஆர்.விஜயா அவர்கள் நடிப்பில் உருவான பாடலிலே..

மல்லிகை என் மன்னன் மயங்கும்
பொன்னான மலரல்லவோ
என் நேரமும் உன் ஆசை போல்
பெண் பாவை நான் பூ சூடிக்கொள்ளவோ
மல்லிகை என் மன்னன் மயங்கும்
பொன்னான மலரல்லவோ….

கவிஞர் வாலி வரைந்தளித்த பாட்டு!  ஏழிசை ஸ்வரங்கள் என்றால் அந்த ஸ்வரங்களாகவே வாழும் திருமதி. வாணி ஜெயராம் அவர்களின் நாதலயஸ்வரம் கலந்த குரலில் மெல்லிசை மன்னர் எம். எஸ். விஸ்வநாதன் அவர்களின் மென்மையான இசையில் இதயங்களை ஈர்க்கும் பாடல்!  மயக்கும்  பாடல்!  மல்லின்கையின் மயக்கம் இப்பாடலைக் கேட்கும்போதெல்லாம் கூட வருகிறதே!  கவிஞரின் பொற்காலக் கூட்டணியில் விளைந்த அற்புத முத்துக்களில் இதுவும் ஒன்று!  ஏ சி திருலோகசந்தர் அவர்களின் இயக்கத்தில் உருவான மறக்க முடியாத பாடல்!

காணொளி: http://www.youtube.com/watch?v=OXb-MnTstR0

பாடல்: கவிஞர் வாலி
திரைப்படம்: தீர்க்க சுமங்கலி (1974)
இசை: M S விஸ்வனாதன்
குரல்: வாணி ஜெயராம்
இயக்கம்:A C திருலோகசந்தர்
நடிப்பு: முத்துராமன், K R விஜயா

 
மல்லிகை என் மன்னன் மயங்கும்
பொன்னான மலரல்லவோ
மல்லிகை என் மன்னன் மயங்கும்
பொன்னான மலரல்லவோ
என் நேரமும் உன் ஆசை போல்
பெண் பாவை நான் பூ சூடிக்கொள்ளவோ
மல்லிகை என் மன்னன் மயங்கும்
பொன்னான மலரல்லவோ

வான் மேகங்கள் வெள்ளி ஊஞ்சல் போல்
வான் மேகங்கள் வெள்ளி ஊஞ்சல் போல்
திங்கள் மேனியை தொட்டு தாலாட்டுது
குளிர் காற்றிலே தளிர் பூங்கொடி
கொஞ்சி பேசியே அன்பை பாராட்டுது
என் கண்ணன் துஞ்சத்தான்
என் நெஞ்சம் மஞ்சம் தான்
கையோடு நான் அல்லவோ
என் தேவனே உன் தேவி நான்
இவ் வேளையில் உன் தேவை என்னவோ
மல்லிகை என் மன்னன் மயங்கும்
பொன்னான மலரல்லவோ

பொன் மாங்கல்யம் வண்ண பூ சரம்
பொன் மாங்கல்யம் வண்ண பூ சரம்
மஞ்சள் குங்குமம் என்றும் நீ தந்தது
ஓராயிரம் இன்ப காவியம்
உந்தன் கண்களில் அள்ளி நான் தந்தது
நம் இல்லம் சொர்க்கம் தான்
நம் உள்ளம் வெல்லம் தான்
ஒன்றோடு ஒன்றானது
என் சொந்தமும் இந்த பந்தமும்
உன்னோடுதான் நான் தேடிக் கொண்டது
மல்லிகை என் மன்னன் மயங்கும்
பொன்னான மலரல்லவோ
என் நேரமும் உன் ஆசை போல்
பெண் பாவை நான் பூ சூடிக்கொள்ளவோ
மல்லிகை என் மன்னன் மயங்கும்
பொன்னான மலரல்லவோ

–கவிஞர் காவிரிமைந்தன்.

ரம்ஜான் வாழ்த்துகள்!!!

உடலுக்கு ஒன்பது வாசல்
மனதுக்கு எண்பது வாசல்
உடலுக்கு ஒன்பது வாசல்
மனதுக்கு எண்பது வாசல்
உயிருக்கு உயிராய்க் காணும்
ஒரு வாசல் பள்ளிவாசல்

கடவுள் அமைத்த மேடை இவ்வுலக வாழ்க்கை என ஒரு மதம் சொல்கிறது.  இறைவனின் படைப்பில்தான் எத்தனை எத்தனை உயிரினங்கள்..
தோன்றியது.. ஆதாம் ஏவாளில் என இன்னொரு மதம் சொல்கிறது.. இன்னும் எத்தனை எத்தனை விதமான மதங்கள் இங்கே படைத்தவனை அடையாளம் காட்டி முன் மொழிந்தாலும் அனைவரும் வழிமொழிவது ஏக இறைவனைத்தான்!

வாழ்க்கைக்கு நெறிவகுக்க.. மனித மனத்தைக் கட்டுக்குள் வைக்க.. சில வழிமுறைகள் வகுக்கப்பட்டிருக்க வேண்டும்.  அதை நடைமுறையில் செயலாக்கம் செய்ய உருவாக்கப்பட் சம்பிரதாய சடங்குகளை சற்றே விடுத்து உற்றே நோக்கினால் அந்த உண்மை புலப்படும்!  அகக் கண்களில் ஆண்டவன் காட்சியளிப்பான்!  ‘கடவுள்’ என்கிற சொல்லின் பொருளே உள்ளத்தில் உள்ளவன் என்பதைக் குறித்திடவே.. பகுக்கப்பட்ட சொல்லிலும் படைத்தவனின் காட்சி!

கவிஞர்களும் அடிப்படைத் தத்துவங்களை அறிந்து உணர்ந்து எடுத்தியம்பும் சிறப்பைப் பெற்றவர்களாய் திகழ்கிறார்கள்!  அவ்வரிசையில் கவிஞர் வாலியின் உள்ளம் அல்லாவை தரிசிக்கும் அழகைப் பாருங்கள்!  இசை அமைத்துப் பாடியவர் மெல்லிசை மன்னர் எம்.எஸ்.விஸ்வநாதன்.. ‘முகமது பின் துக்ளக்’ என்னும் திரைப்படத்திற்காக!!

http://youtu.be/r5F0CfsMgBY
காணொளி: -http://youtu.be/r5F0CfsMgBY

இயற்றியவர்: கவிஞர் வாலி
இசை: எம்.எஸ். விஸ்வநாதன்
பாடல்: அல்லா அல்லா
திரைப்படம்: முகம்மது பின் துக்ளக்
பாடியவர்: எம்.எஸ். விஸ்வநாதன்
ஆண்டு: 1971

அல்லாஹு அக்பர் அல்லாஹு அக்பர்
நீ இல்லாத இடமே இல்லை
நீ தானே உலகின் எல்லை

அல்லா அல்லா லா அல்லா அல்லா
நீ இல்லாத இடமே இல்லை
நீ தானே உலகின் எல்லை
அல்லா அல்லா லா அல்லா அல்லா
அல்லா அல்லா லா அல்லா அல்லா

நிலம் வெளுக்க நீர் தான் உண்டு
நீர் வெளுக்க மீன் தான் உண்டு
நிலம் வெளுக்க நீர் தான் உண்டு
நீர் வெளுக்க மீன் தான் உண்டு
மனம் வெளுக்க எது தான் உண்டு?
நபியே உன் வேதம் உண்டு

அல்லா அல்லா லா அல்லா அல்லா
நீ இல்லாத இடமே இல்லை
நீ தானே உலகின் எல்லை
அல்லா அல்லா லா அல்லா அல்லா

உடலுக்கு ஒன்பது வாசல்
மனதுக்கு எண்பது வாசல்
உடலுக்கு ஒன்பது வாசல்
மனதுக்கு எண்பது வாசல்
உயிருக்கு உயிராய்க் காணும்
ஒரு வாசல் பள்ளிவாசல்

அல்லா அல்லா லா அல்லா அல்லா
அல்லா அல்லா லா அல்லா அல்லா

இருப்போர்க்கு எல்லாம் சொந்தம்
இல்லார்க்கு எது தான் சொந்தம்
இருப்போர்க்கு எல்லாம் சொந்தம்
இல்லார்க்கு எது தான் சொந்தம்
நல்லார்க்கும் பொல்லார்க்கும் தான்
நாயகமே நீயே சொந்தம்

அல்லா அல்லா லா அல்லா அல்லா
நீ இல்லாத இடமே இல்லை
நீ தானே உலகின் எல்லை
அல்லா அல்லா லா அல்லா அல்லா
அல்லா அல்லா லா அல்லா அல்லா

 

தெய்வ சன்னிதானங்கள் – எங்கும் எப்போதும் புனிதமானவை!  பவித்ரமானவை!  அந்தச் சன்னிதியில் ஆண்டவன் அருள் எல்லோர்க்கும் நிச்சயம்! இது தெய்வ சத்தியம்!!
 

படம் உதவிக்கு நன்றி: www.nagoredargha.com

–கவிஞர் காவிரிமைந்தன்

கண்கள் பனிக்கும்! கருவறையில் உன்னைச் சுமக்கும் நொடி முதலாக தன்னை மறக்கும்! உன்னை நினைக்கும்! வண்ணக் கனவுகள் ஆயிரம் கண்டு உன்னை வளரத்திடும் பெண்மையின் பூரணம் தாய்!  கடவுள் ஒவ்வொரு வீட்டிலும் எடுக்கின்ற அவதாரம் ‘தாய்’ என்பதும் மிகையில்லை!  கருணை, அன்பு, பாசம், நேசம் என்று எத்தனையோ சொற்கள் தாயிடம்தானே குடிகொண்டுள்ளன.

“அம்மா” என்கிற ஆதாரச் சொல்லிலே அன்பின் அடையாளங்கள்!  ‘அம்மா’ என்று அழைக்கும்போதே.. நமக்குள் எத்தனை சுகஸ்வரங்கள்?  பூமியைக்கூட தாய் என்றுதானே நாமும் அழைக்கிறோம்!  அறிவியல் ஆயிரமாயிரம் கண்டுபிடிப்புகளைத் தந்து இந்த பூமியை சொர்க்கபுரியாக்கலாம்!  ஆனால் அவையெல்லாம் தாயின் மடியில் தலைவைத்து படுக்கும்போது கிடைக்கின்ற நிம்மதி சொர்க்கத்தைவிட மேலானதல்லவா?

கவிஞர் வாலியின் கருத்து முத்துக்கள் தாயைப் பற்றி ‘மன்னன்’ என்கிற திரைப்படத்தில் வெளியான பாடலில் இசைஞானி இளையராஜாவின் இசையில் பத்மஸ்ரீ கே.ஜே.யேசுதாஸ் குரலில் – சூப்பர் ஸ்டார் ரஜினிகாந்த், நடிகை பண்டரிபாய் நடிப்பில்..

http://www.youtube.com/watch?v=9CKTKjIYXLw

காணொளி: http://www.youtube.com/watch?v=9CKTKjIYXLw

படம் : மன்னன்
இசை: இளையராஜா
பாடல்: வாலி
குரல்: கே.ஜே.யேசுதாஸ்
நடிப்பு: ரஜினிகாந்த், பண்டரிபாய்

அம்மா என்றழைக்காத உயிரில்லையே
அம்மாவை வணங்காது உயர்வில்லையே
அம்மா என்றழைக்காத உயிரில்லையே
அம்மாவை வணங்காது உயர்வில்லையே
நேரில் நின்று பேசும் தெய்வம்
பெற்ற தாயன்றி வேறொன்று ஏது
அம்மா என்றழைக்காத உயிரில்லையே
அம்மாவை வணங்காது உயர்வில்லையே

அபிராமி சிவகாமி கருமாயி மகமாயி
திருக்கோயில் தெய்வங்கள் நீதானம்மா
அன்னைக்கு அன்றாடம் அபிஷேகம் அலங்காரம்
புரிகின்ற சிறுத்தொண்டன் நான்தானம்மா
பொருளோடு புகழ் வேண்டும் மகனல்ல தாயே உன்
அருள் வேண்டும் எனக்கென்றும் அது போதுமே
அடுத்திங்கு பிறப்பொன்று அமைந்தாலும் நான் உந்தன்
மகனாகப் பிறக்கின்ற வரம் வேண்டுமே
அதை நீயே தருவாயே

அம்மா என்றழைக்காத உயிரில்லையே
அம்மாவை வணங்காது உயர்வில்லையே

பசும் தங்கம் புது வெள்ளி மாணிக்கம் மணிவைரம்
அவை யாவும் ஒரு தாய்க்கு ஈடாகுமா
விலை மீது விலை வைத்துக் கேட்டாலும் கொடுத்தாலும்
கடைதன்னில் தாயன்பு கிடைக்காதம்மா
ஈரைந்து மாதங்கள் கருவோடு எனைத்தாங்கி
நீ பட்ட பெரும்பாடு அறிவேனம்மா
ஈரேழு ஜென்மங்கள் எடுத்தாலும் உழைத்தாலும்
உனக்கிங்கு நான் பட்ட கடன் தீருமா
உன்னாலே பிறந்தேனே

அம்மா என்றழைக்காத உயிரில்லையே
அம்மாவை வணங்காது உயர்வில்லையே
நேரில் நின்று பேசும் தெய்வம்
பெற்ற தாயன்றி வேறொன்று ஏது
அம்மா என்றழைக்காத உயிரில்லையே
அம்மாவை வணங்காது உயர்வில்லையே
அம்மா என்றழைக்காத உயிரில்லையே
அம்மாவை வணங்காது உயர்வில்லையே…

அட்சர வாசகங்கள் வார்த்தைக் கோலங்களாய் விழ.. அந்த அர்த்தப் புஷ்பங்களை கானமழைபொழியும் யேசுதாஸ் குரல் மெருகேற்றித்தர.. கண்களைப் பனிக்க வைக்கும் அரிய பாடலாய் காதில் விழுகிறது!

இது குறித்து கவிஞர் வாலி அவர்களைச் சந்தித்து நெஞ்சாரப் பாராட்டிய நாளில்.. திரைப்படத்தில் இடம்பெறும்போது ஒருபாடல் எப்படி மக்களைச் சென்றடைகிறது என்பதைச் சுட்டிக்காட்டினார்.

இதைவிட 72 முறை ‘தாய்’ என்கிற சொல் பயன்படுத்தப்பட்டு தனிக் கவிதையில் தான் படைத்த தாய் கவிதைச் சரத்தை மடமடவென்று  உச்சரித்தார்!  (குமுதம் இதழில் வெளிவந்ததாக அறிகிறேன்)  மண்ணிலென்ன தோன்றக்கூடும் மழையில்லாதபோது.. மனிதனோ மிருகமோ தாயில்லாமல் ஏது என்கிற கவிஞர் வாலியின் வரிகளே மீண்டும் நெஞ்சில்!!

இன்னுமொரு செய்தி.. திருச்சியின் மையப்பகுதியில் அமைந்துள்ள ஐயப்பன் திருக்கோயிலில் பளிங்குக்கல்லில் பதிக்கப்பட்டிருக்கிறது இந்தப் பாடல்..அம்மா என்றழைக்காத உயிரில்லையே..

–கவிஞர் காவிரிமைந்தன்.

ஏதோ ஒரு சில பாடல்களில் மட்டும்தான் இசையும் கவிதையும் தங்களைப்பற்றி சிலாகித்துக்கொள்ளும் இதுபோல! எடுத்த எடுப்பிலேயே.. கவிதையே பல்லவியாகிறது பாருங்கள்!

எனக்கொரு காதலி இருக்கின்றாள் அவள் ஏழு சுரங்களில் சிரிக்கின்றாள்.

மெல்லிசை மன்னர் எம்.எஸ்.விஸ்வநாதன் இசையமைத்து பாடும்நிலா பாலசுப்பிரமணியனுடன் இணைந்து பாடிய பாடல்! இசையமைத்த பின் எழுதப்பட்டதா.. எழுதிய பின் இசையமைத்தார்களோ.. எதுவாயினும் கவிஞர் வாலியின் கற்பனா சக்தியும் மெல்லிசை மன்னரின் இசைப் பிரவாகமும் இங்கே நம்மை ஈர்க்கும் சக்தியைப் பெற்றுவிடுகின்றன!

அருமையான வயலின் இசைக்கோர்வையோடு தொடங்குகிறது பாடல்!  ஜெய்கணேஷ் மற்றும் தேங்காய் சீனிவாசன் ஆகியோரின் நடிப்பில்.. இசையால் நடத்தப்பட்டுள்ள திருவிழா!  குரல்கள் மென்மையாக ஒன்றும் கம்பீரமாக ஒன்றும்!!

ராகங்களில் உள்ள பெயர்களையும்கூட பாடலில்கொண்டுவந்து வைக்கிற உக்தி கவிதாஞானம் பெற்றவர்களுக்கே கைவரக்கூடும்!  இசையைப்பற்றியும் அங்கே எடுத்துரைக்கப்பட்டிருக்கிறது.. அதே நேரம் காதலிக்கும் பொருந்திவருகிறது!  அர்த்தபுஷ்பங்களின் அர்ச்சனையில் ஆலாபனை செய்யப்பட்ட பாடலாக..

காதல் உணர்வை கவிதையில் பதிக்க கவிஞர்களுக்கா சொல்லிக் கொடுக்க வேண்டும்!  அதுவும் இசையும் அதற்கேற்ப வளைந்துகொடுக்க.. குரல்களின்வழியே இன்பகங்கை வழிகிறது கேளுங்கள்!!

முத்தான முத்தல்லவோ திரைப்படத்திற்காக விளைந்த முத்தான முத்தல்லவோ இந்தப் பாடல்!

காணொளி: http://www.youtube.com/watch?v=ILzy6ev7Y4c

திரைப் படம் : முத்தான முத்தல்லவோ (1976)
பாடியவர்கள் :S P B , M S  விஸ்வனாதன்
பாடல்: வாலி
இசை:M S விஸ்வனாதன்
நடிப்பு:  ஜெய்கணேஷ், சுஜாதா, தேங்காய் சீனிவாசன்
இயக்கம்: R விட்டல்

எனக்கொரு காதலி இருக்கின்றாள்
அவள் ஏழு சுரங்களில் சிரிக்கின்றாள்

காம பத நிஸறிஸ நினி ஸ நித தப மஸ  மக கப

ஆஹ ஹா ஹோ ஹோ ஹோ

எனக்கொரு காதலி இருக்கின்றாள் அவள்
ஏழு சுரங்களில் சிரிக்கின்றாள்
கீதம் அவளது வளையோசை
கீதம் அவளது வளையோசை
நாதம் அவளது தமிழோசை
தமிழோசை

எனக்கொரு காதலி இருக்கின்றாள் அவள்
ஏழு சுரங்களில் சிரிக்கின்றாள்
கீதம் அவளது வளையோசை
கீதம் அவளது வளையோசை
நாதம் அவளது தமிழோசை
தமிழோசை

எனக்கொரு காதலி இருக்கின்றாள் அவள்
ஏழு சுரங்களில் சிரிக்கின்றாள்

பஞ்சமம் பேசும் பார்வையில் என்றும்
பஞ்சமம் பேசும் பார்வையில் என்றும்
பஞ்சணை போடும் எனக்காக
தெய்வதம் என்னும் திருமகள் மேனி
கைகளை அணைக்கும் இனிதாக
இனிதாக

எனக்கொரு காதலி இருக்கின்றாள் அவள்
ஏழு சுரங்களில் சிரிக்கின்றாள்

என்னுடன் வாழும் இன்னொரு ஜீவன்
என்னுடன் வாழும் இன்னொரு ஜீவன்
மெல்லிசையாகும் என்னாளும்
வையகம் யாவும் என் புகழ் பேச
கைவசம் ஆகும் எதிர் காலம்
எதிர் காலம்
எனக்கொரு காதலி இருக்கின்றாள் அவள்
ஏழு சுரங்களில் சிரிக்கின்றாள்

தேன் சுவைக் கிண்ணம் ஏந்திய வண்ணம்
நான் தரும் பாடல் அவள் தந்தாள்
மோகனம் என்னும் வாகனம் மீது
தேவதை போலே அவள் வந்தாள்
ஆ ஆ ஆ ஆ ஆ ஆ

எனக்கொரு காதலி இருக்கின்றாள் அவள்
ஏழு சுரங்களில் சிரிக்கின்றாள்
கீதம் அவளது வளையோசை
நாதம் அவளது தமிழோசை
தமிழோசை

–கவிஞர் காவிரிமைந்தன்.

நான் ஏன் பிறந்தேன்!!!

பத்துத் திங்கள் சுமந்தாளே அவள் பெருமைப் படவேண்டும்
உன்னைப் பெற்றதனால் அவள் மற்றவராலே போற்றப்பட வேண்டும்
க‌ற்ற‌வ‌ர் ச‌பையில் உன‌க்காக‌ த‌னி இட‌மும் த‌ர‌ வேண்டும்
உன் க‌ண்ணில் ஒரு துளி நீர் வந்தாலும் உல‌க‌ம் அழ‌ வேண்டும்

கவிஞர் வாலி அவர்கள் இயற்றி மக்கள் திலகம் நடித்து வெளியான பாடல்கள் என்பதா?  மக்கள் திலகத்திற்காக கவிஞர் வாலி இயற்றிய பாடல்கள் என்பதா?  இந்தக் கலவை தந்திருக்கும் முத்துக்கள் கொட்டிக் கிடக்கின்றன தமிழ்த்திரைசையில்!  நான் ஏன் பிறந்தேன்… என்கிற திரைப்படத்தில் இடம் பெரும் இனிய பாடலிது!  கவிஞர் வழங்கிய தேவரின் சங்கர் கணேஷ் இசையமைப்பில் உருவான பாடல்கள் என்றும் நம் இதயம் தொடுகின்றன!

நான் ஏன் பிறந்தேன்
நாட்டுக்கு நலம் என்ன புரிந்தேன்
என்று நாளும் பொழுதும் வாழும் வரையில்
நினைத்திடு என் தோழா
நினைத்து செயல்படு என் தோழா
உடனே செயல்படு என் தோழா

முன்னோர் சொன்ன சொல்லே ஆனாலும் எளிய தமிழில் வினாக்களாய் நம் நெஞ்சில் பதிக்கிறார்.  மறைந்த முன்னாள் அமெரிக்க அதிபர் கென்னடி தான் பதவி ஏற்றக் கூட்டத்தில்  “Ask not what your country had done for you;  Ask what you have doe for the country” என்ற பொன்மொழியின் பிரதிபலிப்பாக இப்பாடல் திகழ்கிறது!

பத்துத் திங்கள் சுமந்தாளே அவள் பெருமைப் படவேண்டும்
உன்னைப் பெற்றதனால் அவள் மற்றவராலே போற்றப்பட வேண்டும்
க‌ற்ற‌வ‌ர் ச‌பையில் உன‌க்காக‌ த‌னி இட‌மும் த‌ர‌ வேண்டும்
உன் க‌ண்ணில் ஒரு துளி நீர் வந்தாலும் உல‌க‌ம் அழ‌ வேண்டும்

இந்த வைர வரிகள் என்னையும் கூட வாழ்க்கைப் போராட்டத்தில் நீந்தி வெற்றி பெற வைத்திருக்கின்றன என்றால் அது மிகையில்லை!  அந்த நன்றிக் கடனாக “வாழும் தமிழே வாலி” என்கிற நூலை கவிஞர் வாலிக்கு நன்றி காணிக்கையாக எழுதி குமரன் பதிப்பகத்தால் வெளியிட்டேன்.. பாடலாசிரியன் என்கிற தகுதியோடு திரையுலகில் பாட்டு எழுதிச் சென்றவர் பலர் இருக்கலாம்!  அதே பாடல்கள் மக்கள் நெஞ்சில் குடியிருக்கச் செய்தவரைத்தான் ‘கவிஞர்’ என்கிற வரிசையில் கொள்கிறோம். மேலும் அதிலும் மானுட வாழ்விற்கான தேவைகளைக் கருத்துக்களை வழங்கிய கவிஞர்களையே காலம் போற்றிப் புகழ்ந்து கொண்டிருக்கிறது.

http://youtu.be/m_d5bAbO0fM
காணொளி: -http://youtu.be/m_d5bAbO0fM

நான் ஏன் பிறந்தேன்
நாட்டுக்கு நலம் என்ன புரிந்தேன்
என்று நாளும் பொழுதும் வாழும் வரையில்
நினைத்திடு என் தோழா
நினைத்து செயல்படு என் தோழா
உடனே செயல்படு என் தோழா
நாடென்ன செய்தது ந‌ம‌க்கு என கேள்விகள் கேட்பது எதற்கு
நீயென்ன செய்தாய் அதற்கு என நினைத்தால் நன்மை உனக்கு
நாடென்ன செய்தது ந‌ம‌க்கு என கேள்விகள் கேட்பது எதற்கு
நீயென்ன செய்தாய் அதற்கு என நினைத்தால் நன்மை உனக்கு
நான் ஏன் பிறந்தேன்
நாட்டுக்கு நலம் என்ன புரிந்தேன்
என்று நாளும் பொழுதும் வாழும் வரையில்
நினைத்திடு என் தோழா
நினைத்து செயல்படு என் தோழா
உடனே செயல்படு என் தோழா

மலையில் பிறந்த நதியால் மக்கள் தாகம் தீர்ந்தது
மரத்தில் பிறந்த கனியால் அவர் பசியும் தணிந்தது
மலையில் பிறந்த நதியால் மக்கள் தாகம் தீர்ந்தது
மரத்தில் பிறந்த கனியால் அவர் பசியும் தணிந்தது
கொடியில் பிறந்த மலரால் எங்கும் வாசம் தவழ்ந்தது
அன்னை மடியில் பிறந்த உன்னால் என்ன பயன் தான் விளைந்தது
நான் ஏன் பிறந்தேன்
நாட்டுக்கு நலம் என்ன புரிந்தேன்
என்று நாளும் பொழுதும் வாழும் வரையில்
நினைத்திடு என் தோழா
நினைத்து செயல்படு என் தோழா
உடனே செயல்படு என் தோழா

பத்துத் திங்கள் சுமந்தாளே அவள் பெருமைப் படவேண்டும்
உன்னைப் பெற்றதனால் அவள் மற்றவராலே போற்றப்பட வேண்டும்
க‌ற்ற‌வ‌ர் ச‌பையில் உன‌க்காக‌ த‌னி இட‌மும் த‌ர‌ வேண்டும்
உன் க‌ண்ணில் ஒரு துளி நீர் வந்தாலும் உல‌க‌ம் அழ‌ வேண்டும்
நான் ஏன் பிறந்தேன்
நாட்டுக்கு நலம் என்ன புரிந்தேன்
என்று நாளும் பொழுதும் வாழும் வரையில்
நினைத்திடு என் தோழா
நினைத்து செயல்படு என் தோழா
உடனே செயல்படு என் தோழா

—கவிஞர் காவிரிமைந்தன்.

காதலிலே கடிதம் என்பது இன்ப ஊற்று! –  இப்படி எழுதப்பட்டால்..

காதலிக்கு மடல் தீட்டுவதென்பது – ஒரு சாதாரண மனிதனையும் கவிஞனாக்கும் படலம்! மடை திறந்த வெள்ளம் பெருகிவர வார்த்தை நதி ஓடிவருகிறதே.. அவள் உள்ளம் தொட!!  இந்தப் பகீரத முயற்சி – பலபேரை கவி எழுத வைத்திருக்கிறது எனவேதான்.. கவிஞர்கள் பிறப்பது காதலில் என்பார்கள்!

‘பேசும் தெய்வம்’ என்கிற திரைப்படத்திற்காக கவிஞர் வாலி வரைந்த மடலிது!  இசைவடிவம் திரையிசைத்திலகம் கே.வி.மகாதேவன் அவர்கள்.. தனக்கே உரித்தான பாவங்களுடன் பாடிக் கொடுத்திருக்கிறார் ஏழிசை வேந்தர் டி.எம்.செளந்திரராஜன்!!

http://youtu.be/R12D7i5PWGQ
காணொளி:-http://youtu.be/R12D7i5PWGQ

பாடல்: அழகு தெய்வம் மெல்ல மெல்ல்
திரைப்படம்: பேசும் தெய்வம்
பாடியவர்: டி.எம். சௌந்தரராஜன் .. பி.சுசீலா..
இயற்றியவர்: வாலி
இசை: கே.வி. மஹாதேவன்
ஆண்டு: 1967

ஆழியிலே பிறவாத அலைமகளோ? ஆஆ..ஆஅ…ஆ…
ஏழிசையைப் பயிலாத கலைமகளோ?
ஊழி நடம் புரியாத மலைமகளோ?
உலகத்தாய் பெற்றெடுத்த தலைமகளோ? ஆ..ஆ..ஆ..ஆஆஆ…

அழகுத் தெய்வம் மெல்ல மெல்ல அடியெடுத்து வைத்ததோ?
அழகுத் தெய்வம் மெல்ல மெல்ல அடியெடுத்து வைத்ததோ? – நான்
அன்புக் கவிதை சொல்லச் சொல்ல அடி எடுத்துக் கொடுத்ததோ?
அழகுத் தெய்வம் மெல்ல மெல்ல அடியெடுத்து வைத்ததோ? – நான்
அன்புக் கவிதை சொல்லச் சொல்ல அடி எடுத்துக் கொடுத்ததோ?
அழகுத் தெய்வம் மெல்ல மெல்ல அடியெடுத்து வைத்ததோ?

ஆ…ஆ..ஆ…ஆ..
இளநீரை சுமந்திருக்கும் தென்னை மரம் அல்ல
மழை மேகம் குடை பிடிக்கும் குளிர் நிலவும் அல்ல ஆஆ…ஆஅ..
இளநீரை சுமந்திருக்கும் தென்னை மரம் அல்ல
மழை மேகம் குடை பிடிக்கும் குளிர் நிலவும் அல்ல
இங்கும் அங்கும் மீன் பாயும் நீரோடை அல்ல
இங்கும் அங்கும் மீன் பாயும் நீரோடை அல்ல
இதற்கு மேலும் இலக்கியத்தில் வார்த்தை ஏது சொல்ல
ஆ…ஆ..ஆ…ஆ.

அழகுத் தெய்வம் மெல்ல மெல்ல அடியெடுத்து வைத்ததோ? – நான்
அன்புக் கவிதை சொல்லச் சொல்ல அடி எடுத்துக் கொடுத்ததோ?
அழகுத் தெய்வம் மெல்ல மெல்ல அடியெடுத்து வைத்ததோ?

ஆஅ..ஆ..ஆ.ஆஅ..
தத்தி வரும் தளர் நடையில் பிறந்ததுதான் தாளமோ?
தாவி வரும் கையசைவில் விளைந்ததுதான் பாவமோ?
தெய்வ மகள் வாய் மலர்ந்து மொழிந்ததுதான் ராகமோ? ஆஆஆஆ..
இத்தனையும் சேர்ந்ததுதான் இயல் இசை நாடகமோ?
ஆஆஆஆ..

அழகுத் தெய்வம் மெல்ல மெல்ல அடியெடுத்து வைத்ததோ? – நான்
அன்புக் கவிதை சொல்லச் சொல்ல அடி எடுத்துக் கொடுத்ததோ?
அழகுத் தெய்வம் மெல்ல மெல்ல அடியெடுத்து வைத்ததோ?

எத்தனையோ கவிஞர்கள் எழுதிக் கொண்டிருப்பது இந்தக் காதல் மடல்கள்!  ஆனால் கவிஞர் வாலி வரைந்திருப்பதோ காதல் கடல்!  மிக மிக எளிமையான பதங்கள் கொண்டு கவிதை விருந்தையல்லவா வழங்கியிருக்கிறார்.  முத்துக்களின் அணிவரிசை!  முழுநிலாவின் கோலமிது!  கற்பனை அணிவகுத்து கவிதைப் பண்பாடுது! இசையும் குரலும் ஏற்றதொரு பாத்திரங்களில் நடிகர்திலகமும் நாட்டியப் பேரொளியும்..

கேளுங்கள்.. மீண்டும் ஒருமுறை இன்பலஹரியில் இதயம் மூழ்கட்டும்!!