வல்லமை

Category: பத்திகள்

பத்தி

  • அஞ்சலி: எழுத்தாளர் அரவிந்தன்

    அஞ்சலி: எழுத்தாளர் அரவிந்தன்

    அண்ணாகண்ணன்

    எழுத்தாளர், காலச்சுவடு பதிப்பாசிரியர் அரவிந்தன் (D.i. Aravindan) மறைந்த செய்தி, அதிர்ச்சி அளிக்கிறது. சுமார் 25 ஆண்டுகளாக என் நண்பர். 2001 – 2003 காலக்கட்டத்தில் உலகத் தமிழ் மின்னிதழில் அவர் ஆசிரியராக இருந்த போது, அவரை நேர்கண்டேன். தமிழில் இணைய இதழ்கள் என்ற என் எம்.பில். ஆய்வேட்டிலும், அதே பெயரில் பின்னர் வெளியான புத்தகத்திலும் அந்த நேர்காணல் இடம்பெற்றது. அதன் பிறகு பல்வேறு இலக்கிய நிகழ்ச்சிகளிலும் சந்தித்து வந்தோம்.

    அமுதசுரபியில் (2003 – 2005) நான் ஆசிரியராக இருந்தபோது, சுந்தர ராமசாமி குறித்த விமர்சனங்களை ஓர் இதழில் வெளியிட்டோம். வெங்கட் சாமிநாதன், கிருஷ்ணன் வெங்கடாசலம் Krishnan Venkatachalam உள்ளிட்டோர், சு.ரா.வை விமர்சித்து எழுதினர். அதற்குப் பிறகு, சென்னை, தென்னிந்திய திரைப்பட வர்த்தக சபையில் (பிலிம் சாம்பர்) ஒரு முறை சுந்தர ராமசாமி பேசினார். அவர் பேசி முடித்து அரவிந்தனுடன் வெளியே வந்தார். அப்போது, எதிரே நான் வந்தேன். சுந்தர ராமசாமியிடம் அரவிந்தன், இவர்தான் அண்ணாகண்ணன் என அறிமுகப்படுத்தினார். ஓ, நீங்கள்தானா என்று சு.ரா. சற்றே கடுமையாக ஏறிட்டுப் பார்த்தார். நீங்கள் நன்றாகப் பேசினீர்கள் என்றேன். நான் எப்போதுமே நன்றாகப் பேசுவேன் என்றார். நான், சுந்தர ராமசாமியைச் சந்தித்ததற்கு இருந்த ஒரே சாட்சியான அரவிந்தனும் இப்போது இல்லை.

    புதிய திரைப்படங்கள் வெளியாகும்போது, பத்திரிகையாளர்களுக்கான சிறப்புத் திரையிடலுக்கு அழைப்பார்கள். அவற்றில் அரவிந்தனுடன் இணைந்து திரைப்படங்கள் பலவற்றைப் பார்த்திருக்கிறேன். பிஆர்ஓ நிகில் முருகன், அவரை நல்ல கிரிட்டிக் (விமர்சகர்) என்று அனைவரிடமும் அறிமுகப்படுத்துவார்.

    அரவிந்தன், அழுத்தமான விமர்சனப் பார்வை கொண்டவர். ஆனால், மென்மையான, அமைதியான, கனிவான இயல்பு கொண்டவர். அரவிந்தன், இந்தியா டுடே, இந்து தமிழ் திசை போன்ற வணிக இதழ்களில் இருந்தாலும், தீவிரமான நடையிலேயே எழுதி வந்தார். மீண்டும் அவர் காலச்சுவடு நிறுவனத்துக்குத் திரும்பியது, ஒரு வகையில் வீடு திரும்பலே. ஆண்டுதோறும் சென்னைப் புத்தகக் காட்சியில் சந்தித்து வந்தோம்.

    எப்போதும் மழித்த முகத்துடன், சிரித்த முகத்துடன் இளைஞராகவே வலம் வந்தார். பெரிதாக எதற்கும் உணர்ச்சிவசப்பட மாட்டார். அவர் மனைவி ஸ்ரீதேவியும் அதே போன்று புன்னகை மாறாமல் இருப்பவர். இந்த இழப்பைத் தாங்கும் வலிமையை அவரும் குழந்தைகளும் பெற வேண்டும். அரவிந்தன், நினைவுகளால் வாழ்வார். நித்தியத்தில் தோய்வார்.

    நெஞ்சார்ந்த அஞ்சலி.

    Share
  • காவல் துறை அதிகாரத்தைத் துஷ்பிரயோகம் செய்யக் கூடாது

    காவல் துறை அதிகாரத்தைத் துஷ்பிரயோகம் செய்யக் கூடாது

    அண்ணாகண்ணன்

    சிவகங்கை மாவட்டம், மானாமதுரையில் இரண்டு பேரை வெட்டிய வழக்கில் கைது செய்யப்பட்ட ஆகாஷ் டெல்சன் என்ற இளைஞர், காவல் துறையின் காவலில் இருக்கும்போது இறந்துள்ளார்.

    முன்னதாக இவர் அளித்த வாக்குமூலத்தில், காவல் துறையினரே தன்னை அடித்தனர் எனக் கூறியுள்ளார்.

    “வெள்ளைத் துணியால் என்னுடைய கண்களைக் கட்டினர். என் கெண்டைக்காலுக்கும் இரண்டு முட்டிக்கும் இடையில் இரண்டு கற்களை வைத்தனர். ஈரமான சாக்கை வைத்துச் சுற்றினர். பின்னர் இரும்புக் கம்பியால் காலில் பலமாக ஒரு முறை அடித்தனர். இதில் என்னுடைய வலது கால் எலும்பு முறிந்து ரத்தம் வழிந்தது. நான் வலியால் துடித்தேன். யார் என்னுடைய காலில் தாக்கினார்கள் என்பது தெரியவில்லை. பின்னர் என்னை மானாமதுரை அரசு மருத்துவமனைக்கு அழைத்துச் சென்றனர். அங்கு, பாலத்தில் இருந்து கீழே விழுந்ததால் காலில் காயம் ஏற்பட்டது என்று தான் கூற வேண்டும் என போலீசார் மிரட்டினர்” என ஆகாஷ் வாக்குமூலம் அளித்துள்ளார். இதற்குப் பிறகு அவர் இறந்தும் போயுள்ளார்.

    இது முதல் நிகழ்வு இல்லை. விசாரணை என்ற பெயரில் இப்படியான கொடிய தாக்குதல்கள் நடந்த வண்ணம் உள்ளன.

    சிவகங்கை மாவட்டம் மடப்புரம் பத்ரகாளி அம்மன் கோவில் காவலாளி அஜித்குமார், 2025 ஜூன் மாதம் நிகிதா என்ற பெண் அளித்த போலி நகை திருட்டுப் புகாரின் பேரில், தனிப்படைக் காவலர்களால் விசாரணை என்ற பெயரில் சித்திரவதை செய்யப்பட்டு உயிரிழந்தார்.

    பற்பல வழக்குளில் கைது செய்யப்பட்டவர்கள் வழுக்கி விழுந்ததாகக் கூறி, மாவுக்கட்டுப் போட்டு அனுப்பப்படுகிறார்கள்.

    காவல் துறையினர், சட்டத்தைத் தங்கள் கையில் எடுத்துக்கொண்டு தாங்களே தண்டனையும் வழங்குவது மிகத் தவறானது. இது, சட்டத்தின் ஆட்சியையும் நீதித் துறையின் தேவையையும் கேள்விக்கு உள்ளாக்குகிறது. மேலும், காவல் துறையினர் தங்கள் தவறுகளை உணர்வதே இல்லை. இது சரிதான் என்ற மனப்போக்குடன் உள்ளனர்.

    அண்மையில் ஏராளமான பாலியல் துன்புறுத்தல், வன்கொடுமைச் சம்வங்கள் நடந்துள்ளன. இதைக் கண்டித்த அனைவரும் காவல் துறையின் மீது குற்றவாளிகளுக்குப் பயம் போய்விட்டது. காவல் துறை கடும் நடவடிக்கை எடுக்க வேண்டும் என்று வலியுறுத்தியுள்ளனர்.

    இந்தக் கடும் நடவடிக்கை என்பதைக் காவல் துறையினர் தவறாகப் புரிந்துகொள்ளக் கூடாது. சட்டப்படி என்ன செய்ய வேண்டுமோ அதைத் தாமதமின்றி, சமரசமின்றி, பாரபட்சம் இன்றிச் செய்ய வேண்டும். மாறாக, குற்றம் சாட்டப்பட்டவர்களைத் தாங்களே தாக்குவது, தண்டிப்பது கண்டிப்பாகக் கூடாது. இது, மனித உரிமைகளை மீறும் செயல். சட்ட – நீதி நெறிமுறைகளை மீறும் செயல்.

    குற்றம் நடக்காமல் இருக்க விழிப்புணர்வுடன் இருக்க வேண்டும். தீவிரமாகக் கண்காணிக்க வேண்டும். ஒருவேளை குற்றம் நடந்தால் உடனே நடவடிக்கை எடுக்க வேண்டும். வெளிப்படையாக விசாரணை நடத்த வேண்டும். நீதிமன்றத்தின் முன் சான்றுகளை அளித்து, பாதிக்கப்பட்டவர்களுக்கு உரிய நீதி கிடைக்கச் செய்ய வேண்டும்.

    குற்றம் சாட்டப்பட்டவர்களை அடித்து, அச்சுறுத்தி, சம்பவங்களைத் திரித்து, சித்திரித்து, குறுக்குவழியில் தண்டனை அளிப்பது, மிகப் பெரிய குற்றம். காவல் துறையினர் தங்கள் கடமையையும் அதன் எல்லையையும் உணர வேண்டும். தங்கள் அதிகாரத்தைத் துஷ்பிரயோகம் செய்யக் கூடாது.

    குற்றத்தை யார் செய்தாலும் அது குற்றமே. தங்கள் செயலுக்கான விளைவுகளிலிருந்து யாரும் தப்பிக்க முடியாது.

    அரசியல் பிழைத்தோர்க்கு அறம் கூற்றாகும், தெய்வம் நின்று கொல்லும் என்ற கூற்றுகள், பல முறைகள் நிறுவப்பட்டுள்ளன.

    காவல் துறை, மக்களின் நண்பனாகவே இருக்க வேண்டும்.

    Share
  • சுருக்கெழுத்துகளால் சிதையும் தமிழ்

    சுருக்கெழுத்துகளால் சிதையும் தமிழ்

    அண்ணாகண்ணன்

    இன்றைய நாளிதழில் எஸ்.பி.கோயில் என்ற பெயரைக் கண்டேன். சிங்கப்பெருமாள் கோவில் என்ற அழகிய பெயரைத்தான் இப்படி எழுதியிருக்கிறார்கள். தியாகராய நகர் என்ற பெயர் தி.நகராகி, பலர் நாவில் டி.நகர் ஆகிவிட்டது. கலைஞர் கருணாநிதி நகர், எப்போதோ கே.கே.நகர் ஆகிவிட்டது. வியாசர்பாடியில் மகாகவி பாரதி நகர், எம்.கே.பி. நகர் ஆகிவிட்டது.

    அரியலூரில் தாதம்பேட்டை பழூர் என்ற ஊர், தா.பழூர் ஆகி, டி.பழூர் ஆனது. கோவையில் பாப்பநாயக்கன் பாளையம், பி.என்.பாளையம் ஆனது. குப்பைக் கோனான் புதூர், கே.கே. புதூர் ஆனது. மதுரை மாவட்டத்தில் தேவன்குறிச்சி கல்லுப்பட்டி என்ற ஊர், தே.கல்லுப்பட்டி ஆகி, பிறகு டி.கல்லுப்பட்டி ஆனது. இப்படி ஒவ்வொரு மாவட்டத்திலும் ஏராளமான ஊர்களும் சாலைகளும் சுருக்கெழுத்துகளால் அடையாளம் இழந்துள்ளன.

    பல ஊர்களில் கிழக்கு, மேற்கு, வடக்கு, தெற்கு என்ற முன்னொட்டுகளுடன் ஊர்ப்பகுதிகளும் வீதிகளும் உள்ளன. இவை அனைத்தும் இன்று ஈஸ்ட், வெஸ்ட், நார்த், சவுத் என வாய்க்கு வாய் பேசப்படுகின்றன.

    இடங்கள் மட்டுமில்லாமல், மனிதர்களின் பெயர்களும் இன்று சுருக்கப் பெயர்களாகி வருகின்றன. முதலெழுத்து மட்டுமின்றி, முழுப் பெயருமே ஆங்கிலச் சுருக்கெழுத்துகளால் அழைக்கப்படுகின்றன. பதவிப் பெயர்களும் பட்டப் பெயர்களும் கூட இதே போல் சுருங்கிவிட்டன. கட்சிப் பெயர்களும் தலைவர்களின் பெயர்களும் கூட ஆங்கிலச் சுருக்கெழுத்துகளால் அழைக்கப்படுகின்றன.

    இணைய உரையாடல்களின் சுருக்கெழுத்துகள், பெரும்பாலும் ஆங்கிலத்தில் கோலோச்சுகின்றன. அன்றாடம், புதுப் புதுச் சுருக்கெழுத்துகள் தீயாய்ப் பரவுகின்றன. திரைப்படங்களின் பெயர்களும் கூட இவ்வாறே சுருங்குகின்றன. பொன்னியின் செல்வன் பி.எஸ். ஆகிறது.

    உலகம் நம் உள்ளங்கைக்குள் சுருங்கி வருவதில் நமக்கு மகிழ்ச்சியே. ஆனால், நம் மொழியும் அவ்வாறு சுருங்கிவிடக் கூடாது. இடத்தின், பொருளின், தொழில்நுட்பத்தின், உயிர்களின், நபர்களின் முழுப் பெயரையும் வாயார அழைப்போம். ஒருவேளை சுருக்கினாலும் தமிழில் சுருக்குவோம்.

    உலகத் தாய்மொழி நாள் வாழ்த்துகள்.

    Share
  • மகளிர் உரிமைத் தொகையை என்ன செய்யலாம்?

    மகளிர் உரிமைத் தொகையை என்ன செய்யலாம்?

    அண்ணாகண்ணன்

    மகளிர் உரிமைத் தொகையாக, 1.31 கோடிப் பேருக்குத் தலா 5 ஆயிரம் என்ற அளவில் ரூ.6550 கோடியைத் தமிழக அரசு விடுவித்துள்ளது. இது பணப் புழக்கத்தை அதிகரிக்கும் என நம்புகிறார்கள். இதே போன்று, மாதந்தோறும் தலா ஆயிரம் ரூபாய் என்ற அளவில் ரூ.1310 கோடியை அரசு விடுவித்து வருகிறது.

    பெண்கள் அன்றாடச் செலவுகளுக்கு இதைச் செலவிடாமல், வேறு வழிகளில் செலவிட்டால் அவர்கள் அதிக லாபம் ஈட்ட வாய்ப்பு உண்டு. இந்தப் பணத்தைக் கொண்டு என்ன செய்யலாம்? எப்படிச் செலவிடலாம்? இதோ என் யோசனைகள்.

    தமிழ்நாடு மகளிர் கழகம் என்ற அமைப்பினை உருவாக்கி, இந்த 1.31 கோடிப் பேரும் அதில் சேர வேண்டும். இவர்கள் அனைவரும் தங்களுக்குள் தலைவர், செயலர், பொருளாளர் உள்ளிட்டோரைத் தேர்ந்தெடுக்க வேண்டும்.

    மகளிர் அனைவரின் பெயர், முகவரி, கல்வித் தகுதி, தொழில் உள்ளிட்ட விவரங்களைத் தொகுக்க வேண்டும். இவர்களைத் தொழில் அடிப்படையில், ஊர் அடிப்படையில், கல்வித் தகுதி / திறன் அடிப்படையில் வெவ்வேறு குழுக்களாகப் பிரிக்க வேண்டும். ஒவ்வொரு குழுவையும் ஒருவர் வழிநடத்த வேண்டும்.

    இந்தக் குழுக்கள் மாதந்தோறும் சந்தித்துத் தங்கள் தேவைகள், சிக்கல்கள், சவால்கள் ஆகியவற்றைப் பற்றிக் கலந்துரையாட வேண்டும். இந்தச் சிக்கல்களுக்கு அந்தக் குழுவிலேயே தீர்வு கிடைத்தால் நல்லது. கிடைக்காவிட்டால், இதர குழுக்களின் ஆலோசனைகளைப் பெற வேண்டும். ஒருவேளை, தங்கள் அமைப்பிற்குள் உரிய தீர்வு கிடைக்காவிட்டால், வெளியிலிருந்து ஆலோசனைகளைப் பெறலாம்.

    இந்த அமைப்பு, தொழில்முனைவுப் பிரிவு ஒன்றையும் உருவாக்க வேண்டும். அதை ஆதரிக்க, நிதி முதலீட்டுப் பிரிவையும் தொடங்க வேண்டும். தொழில்முனைவில் ஆர்வம் கொண்ட பெண்கள் அதில் சேர வேண்டும். தாங்கள் எந்தத் தொழில் தொடங்க விரும்புகிறோம், அதில் தங்களுக்கு என்ன திறமை இருக்கிறது, எவ்வளவு முதலீடு தேவை, எப்போது திருப்பிச் செலுத்த முடியும் என எடுத்துரைக்க வேண்டும் (Investment Pitch).

    நிதி முதலீட்டுப் பிரிவில், வாய்ப்புள்ள, ஆர்வமுள்ள பெண்கள், தங்கள் சேமிப்பையும் உரிமைத் தொகையையும் முதலீடு செய்ய வேண்டும். இவர்களின் பிரதிநிதிகள், உரிய தொழில்முனைவுத் திட்டங்களில் ஆராய்ந்து முதலீடு செய்வார்கள். இதன் மூலம், அந்தத் தொழில்களில் இவர்கள் முதலீட்டாளர்களாக, பங்குதாரர்களாக மாறுவார்கள். இது ஒரே நேரத்தில் தொழில்முனைவோர், முதலீட்டாளர் ஆகிய இருவருக்கும் பயன் அளிக்கும்.

    இதற்குத் துணையாக, வேலை தேடும் பெண்களுக்காகச் செயல் மகளிர் என்ற அமைப்பினை உருவாக்க வேண்டும். தொழில்முனைவோர் தங்களுக்குத் தேவையான பணியாளர்களை, விநியோகஸ்தர்களை இந்தச் செயல் மகளிர் குழுவிலிருந்து தேர்ந்தெடுக்கலாம்.

    தொழில்முனைவோர் உருவாக்கும் பொருள்களை, சேவைகளை இதர மகளிருக்குத் தள்ளுபடி விலையில் வழங்கலாம். இது விற்பனை வலையமைப்பாக உருவெடுக்கும். பொருள்களை உருவாக்குவது, விற்பது, விநியோகிப்பது, கொண்டு சேர்ப்பது ஆகிய அனைத்திலும் பெண்களை ஈடுபடுத்தலாம். இதன் மூலம் இந்த நிதி, பல்கிப் பெருகும். முதலீட்டாளர் அனைவருக்கும் லாபம் கிடைக்கும். தமிழ்நாட்டில் பொருளாதார வளர்ச்சியும் பெருகும்.

    எதிர்காலத்தில் இந்தப் பெண்கள் தங்களுக்குள் கூடிப் பேசி, உள்ளாட்சித் தேர்தல் முதல் பாராளுமன்றத் தேர்தல் வரை போட்டியிடவும் செய்யலாம். தங்கள் கோரிக்கைகளை முன்வைத்து, இவற்றை நிறைவேற்றினால் மட்டுமே வாக்களிப்போம் என வலியுறுத்தலாம்.

    தங்களைப் பகடைக் காய்களாகப் பயன்படுத்த நினைக்கும் அரசியல் கட்சிகளுக்கு எதிராக மாற்றுச் சக்தியாகப் பெண்கள் உருவெடுக்கலாம். அதிகாரத்தை வென்றெடுக்கலாம். தங்களுக்குத் தேவையான தொழில், வேலைவாய்ப்பு, பொருளாதாரம், கல்வி, அரசியல் உள்ளிட்ட அனைத்தையும் தாங்களே தீர்மானிக்கலாம். அவர்கள் ஒருங்கிணைந்து செயல்பட்டால், தமிழ்நாட்டில் ஆட்சியையே பிடிக்கலாம்.

    தமிழ்நாட்டு மகளிர், இதைக் குறித்துச் சிந்திக்க வேண்டுகிறேன்.

    Share
  • பராசக்தி – திரை விமர்சனம்

    பராசக்தி – திரை விமர்சனம்

    அண்ணாகண்ணன்

    பராசக்தியின் அடிப்படைத் தோல்வி, அதன் கதையிலிருந்து தொடங்குகிறது. மொழிப் போராட்டத்தில் 70 பேர் துடிதுடித்து மாண்டுள்ளனர். தங்கள் உடலுக்குத் தீவைத்துக்கொண்டு பலர் கருகிச் சாய்ந்துள்ளனர். இத்தனை உணர்ச்சிமிகு வரலாற்றுப் பின்புலத்தை எடுத்துக்கொண்டு, சப்பையான இறுதிக் காட்சியை வைத்தது, இயக்குநரின் திறமையின்மையைக் காட்டுகிறது.

    இந்தித் திணிப்பு என்பதற்கு உரிய காட்சிகள் குறைவாகவே உள்ளன. அதிலும் சமூகத்தில் அனைத்து நிலையினரையும் பாதிக்கும் வகையில் அது இருந்தது என முன்வைக்கவில்லை. அஞ்சல் நிலையத்தில் படிவங்கள் இந்தியில் மட்டுமே இருந்தன எனக் காட்டப்படுகிறது. பணம் அனுப்ப வந்த பெண்கள், தங்களுக்கு அதை நிரப்பத் தெரியாது என்று கூறுகின்றனர். சரி இதை நீங்களே நிரப்புங்கள் என அஞ்சல் அலுவலர்களிடம் கூறுகின்றனர். அவர்கள், எங்களுக்கும் இந்தி தெரியாது என்று கூறுகின்றனர். அஞ்சல் அலுவலர்களுக்கே இந்தி தெரியாத போது, அவர்களால் எப்படி இந்திப் படிவங்களைக் கையாள முடியும்? படத்தில் இது மிகப் பெரிய ஓட்டை. நடைமுறையில் இவ்வாறு செய்ய மாட்டார்கள்.

    புறனானூற்றுப் படையினர், தமிழின் ஆதி வடிவமான பிராமி மொழியில் செய்திகள் பரிமாறுவதாகக் காட்டுகிறார்கள். இதை நாயகன் தன் நெஞ்சில் பச்சை குத்தியும் இருக்கிறார். ஆனால், இந்தியா முழுவதும் உள்ள பல்வேறு மொழியினர் பிராமி மொழியை எவ்வாறு கற்றுக்கொண்டனர், இதைக் கற்பித்தவர் யார் எனப் படத்தில் காட்டவில்லை. இது அவ்வளவு எளிதான செயல் இல்லை. புதிதாக இந்தி மொழியைக் கற்க முடியாது என்று எதிர்க்கின்றனர். ஆனால், பிராமி மொழியில் கற்றுச் சங்கேத மொழியில் எழுதவும் பச்சை குத்தவும் கற்கின்றனர். இதிலும் இந்தி மொழியைக் கற்க அமைப்புகள் இருக்கின்றன. ஆசிரியர்களும் இருக்கின்றனர். ஆனால், பிராமி மொழியைக் கற்க உரியவர்கள் இல்லை. எப்படிப்பட்ட முரண் இது?

    நாயகன் இந்தி மொழியைக் கற்க முடிவு செய்கிறார். ஆனால், அந்த ஊரில் நாயகியைத் தவிர, இந்தி ஆசிரியர் ஒரே ஒருவரே இருக்கிறார். அவரும் நான் யாத்திரை செல்கிறேன் எனக் கிளம்புகிறார். இந்தித் திணிப்பு எனக் காட்டப்படும் படத்தில் தான் இந்த நிலை. பிறகு எங்கிருந்து திணிப்பு வருகிறது எனில், அரசின் கொள்கை அறிவிப்பு அளவில்தான் அது உள்ளது. இது நடைமுறைக்கு வந்தால் நம் வாழ்க்கை அவ்வளவுதான், நம் மொழி அவ்வளவுதான் என்ற கற்பனை அச்சமே மாணவர்களைப் போராடத் தூண்டுகிறது. அதாவது, திணிப்புக்கு முன்னதாகவே அதை எதிர்த்து அவர்கள் போராடுகிறார்கள்.

    ரெயில்வே துறை நேர்காணல், தில்லியில் நடக்கிறது. ரெயில்வே பயணச் சீட்டுப் பரிசோதகர் வேலைக்கு உனக்கு இந்தி தெரிந்திருக்க வேண்டும் என்கிறார்கள். இந்தி மாநிலங்களில் பணியமர்த்தப்பட்டால் அது தேவைதான். ஆனால், இதே போல் தென் மாநிலங்களில் பணியமர்த்தப்படும் வடமாநிலப் பயணச் சீட்டுப் பரிசோதகர்களுக்கு அந்தந்த மாநில மொழி தெரிந்திருக்க வேண்டும் என்று வலியுறுத்தியிருக்க வேண்டும். ஆனால், இந்தித் திணிப்பு என்ற அளவில் இந்தக் காட்சி முடிந்துவிடுகிறது.

    தமிழக முதலமைச்சராகக் காட்டப்படும் பக்தவத்சலம், மதுரையில் இந்தி மொழி வாரத்தைத் தொடங்கி வைக்கிறார். ஆனால், அவரோ, தமிழக அமைச்சர்களோ இந்தியில் ஒரு வார்த்தையும் பேசவில்லை. படத்தில் காட்டப்படும் கள யதார்த்தத்தின்படி சமூகத்தில் எந்தப் பெரிய தாக்கத்தையும் இந்தி செலுத்தவில்லை. இந்தித் திரைப்படங்கள் தமிழகத்தில் வெற்றிகரமாக ஓடியதைக் கூட இந்தத் திரைப்படத்தில் தெளிவாகக் காட்டவில்லை.

    இந்தித் திணிப்பு என வாய் ஓயாமல் பேசினாலும் அவற்றைத் தெளிவாகத் திரையில் காட்டவில்லை. தில்லியில் எல்லாப் பேருந்துகளிலும் தமிழில் எழுதியது போன்ற நடக்காத போராட்டங்களைக் காட்டியிருக்கிறார்கள். இறுதிக் காட்சி, மிக மிக மொக்கையாக அமைந்திருக்கிறது. எழுச்சி ஊட்டியிருக்க வேண்டிய ஒரு திரைப்படம், இயக்குநரின் அலட்சியத்தால் பிசுபிசுத்துவிட்டது. இதைப் படக்குழுவினரும் தயாரிப்பாளரும் கூடச் சரியாகக் கவனிக்கவில்லை.

    ஆனால், கற்பனை அச்சத்தைக் காட்டியே காலத்தை ஓட்டலாம், வாக்குகளை அறுவடை செய்யலாம் என்ற அரசியல் சாதுர்யத்தைப் படம் எடுத்துக் காட்டுகிறது.

    மாணவர்களின் தன்னெழுச்சியான போராட்டத்தை ஒரு குறிப்பிட்ட அரசியல் கட்சிக்குச் சார்பாக இயக்குநர் வளைத்துள்ளார். இந்தப் போராட்டம் குறித்து, அண்ணாவின் கருத்துகள் மட்டும் ஆங்காங்கே காட்டப்படுகின்றன. இதர கட்சியினர், தலைவர்கள், தமிழறிஞர்கள் ஆகியோரின் குரல் காட்டப்படவில்லை. இது, திட்டமிட்டு மாணவர்களைத் திமுக சார்பாளர்களாகக் காட்டுகின்றது.

    படத்தின் ஒரே நல்ல கூறு, இந்தித் திணிப்புப் போரை ஒடுக்கும் அதிகாரியாகத் தமிழர் ஒருவரைக் காட்டியதே. இவரை வட இந்தியராகக் காட்டியிருந்தால், வட இந்தியருக்கு எதிரான உணர்வு இங்கே பெருகியிருக்கும்.

    படம் என்பது வெறும் தொழில்நுட்பம், ஒப்பனை, அரங்கப் பொருள்கள் மட்டுமில்லை. அதற்கு வலுவான கதையும் பாத்திரங்களும் தேவை. எல்லாப் படங்களையும் எல்லோரும் எடுத்துவிட முடியாது என்பதைச் சுதா கொங்கரா உணர வேண்டும்.

    Share
  • சேலத்தில் தீபத் தூண்

    சேலத்தில் தீபத் தூண்

    அண்ணாகண்ணன்

    சேலம், கரிய பெருமாள் மலையின் உச்சியில் உள்ள கரிய பெருமாள் கோவிலுக்கு இன்று சென்றேன். பெருமாள் சந்நதிக்கு நேர் எதிரே தீபத் தூண் இருந்தது. அதன் உச்சியில் தீபம் ஏற்றுவதற்கான கிண்ணம் பொருத்தப்பட்டிருந்தது. தீபம் ஏற்ற, பக்கவாட்டில் ஏணிப் படியும் இருந்தது. நெடுங்காலமாகத் தீபம் ஏற்றியதன் அடையாளமாக, எண்ணெய்க் கறைகளும் இருந்தன.

    திருப்பரங்குன்றத்தில் இருப்பது எல்லைக்கல் என்போர், இதைக் கவனிக்க வேண்டும். அதே போன்ற தூண், அதே வடிவத்தில், உயரத்தில் பல இடங்களில் அமைந்துள்ளது. இந்தத் தூண், மலை உச்சியில் ஒரே இடத்தில் தான் அமைந்துள்ளது. எல்லை நெடுகிலும் இந்தக் கல்லை நடவில்லை. முக்கியமாக, சேலத்தில் அது தீபத் தூணாகவே பயன்பாட்டில் இருக்கிறது. திக்கெட்டும் காண, திரியில் தீபம் ஏற்றுங்கள். வரலாற்றைத் திரிக்காதீர்கள்.

    Share
  • ஜி.டி.நாயுடு பெயர் சர்ச்சை – தீர்வு என்ன?

    ஜி.டி.நாயுடு பெயர் சர்ச்சை – தீர்வு என்ன?

    அண்ணாகண்ணன்

    விஞ்ஞானி ஜி.டி.நாயுடு பெயர், சமூக வலைத்தளங்களில் படாத பாடு படுகிறது. இதைச் சற்று ஆழ்ந்து பார்ப்போம்.

    முதலில் இவர் விஞ்ஞானி இல்லை என்பவர்களுக்காக. எதையேனும் கண்டுபிடித்தவரைத் தான் விஞ்ஞானி என அழைக்க வேண்டும் என்பது இல்லை. விஞ்ஞானச் சிந்தனையும் அணுகுமுறையும் கொண்டு, பல்வேறு படிநிலைகள் கொண்ட இந்த மிகப் பரந்த துறையில் எந்த நிலையில் பணிபுரிந்தாலும் அவரை விஞ்ஞானி என அழைக்கலாம். மத்திய அரசின் டி.ஆர்.டி.ஓ. உள்ளிட்ட துறைகளில் சயின்டிஸ்ட் என்பது ஒரு பதவியின் பெயர். அந்தப் பதவியில் இருந்தாலே அவரை விஞ்ஞானி என்று அழைக்கலாம். இளநிலை விஞ்ஞானி, முதுநிலை விஞ்ஞானி என்றெல்லாம் பதவிகள் உண்டு. ஜி.டி.நாயுடு, மிகக் குறைந்த வளங்களையும் வாய்ப்புகளையும் வைத்துக்கொண்டு, எத்தனையோ கருவிகளை இந்தியாவுக்கு ஏற்ற வகையில் உருவாக்கியுள்ளார். அவரைத் தாராளமாக விஞ்ஞானி என அழைக்கலாம்.

    ஜி.டி. என ஆங்கிலத்தில் ஏன் வைக்க வேண்டும்? கோபால்சாமி துரைசாமி எனத் தமிழில் வைக்கலாமே எனச் சிலர் சொல்கிறார்கள். வைக்கலாம் தான். ஆனால், இதே போன்ற கொள்கையை எல்லோருக்கும் எல்லா இடங்களிலும் நடைமுறைப்படுத்த வேண்டும். அதற்கு நாம் ஆயத்தமாய் இருக்கிறோமா என்பதே கேள்வி. இன்றும் எம்.ஜி.ஆர்., என்.டி.ஆர்., டி.எம்.எஸ்., எம்.எஸ்.வி…. எனப் பலரும் ஆங்கிலச் சுருக்கப் பெயர்களுடன் அழைக்கப்படுகிறார்கள். அந்தக் காலத்தில் ஆங்கில முதலெழுத்துகளைக் கொண்டு எழுதுவதும் அழைப்பதும் பெருவழக்காக இருந்தது. பின்னர் அதுவே அவர்களின் அடையாளமாய் ஆனது. ஜி.டி.யையும் அந்த வரிசையில் தான் நாம் வைக்க வேண்டும். காலத்தின் அடையாளமாக, ஒரு காலக்கட்டத்தின் போக்காக இதைக் கருத வேண்டும். அதை அப்படியே வைப்பதே எல்லோருக்கும் புரியும்.

    நாயுடு என்ற சாதிப் பெயரை ஏன் வைக்க வேண்டும் எனப் பலரும் கேட்டிருக்கிறார்கள். உ.வே.சாமிநாதர், வ.உ.சிதம்பரம் என இதர பெயர்களில் உள்ள சாதிப் பெயர்களை நீக்கியது போல் இதையும் நீக்க வேண்டியது தானே எனக் கேட்கிறார்கள். நியாயமான கேள்வி. ஒரு கொள்கையை ஏற்றுக்கொண்டால், அதை எல்லா இடங்களிலும் நடைமுறைப்படுத்த வேண்டும். சரோஜினி நாயுடு என்ற பெயரை இன்று கவிக்குயில் சரோஜினி தேவி என எழுதுவதைப் பார்க்கிறேன். ராமசாமி நாயக்கர், காமராஜ் நாடார், வ.வே.சு.ஐயர் என அழைத்தவர்களை இன்று பெரியார், காமராஜர், வ.வே.சு. என அழைப்பது போல், முன்னோடி ஜி.டி. என அழைக்கலாம். நாம் எப்படிச் சொல்கிறோமோ அப்படித்தான் நமக்குப் பின்வரும் தலைமுறையினர் அழைக்கத் தலைப்படுவார்கள். எனவே இதில் தெளிவான ஒரு கொள்கையைக் கடைப்பிடிக்க வேண்டும்.

    ஜி.டி.நாயுடு பெயரையே வைத்திருக்கக் கூடாது, வேறு பலர் பெயர்களை வைக்கலாமே என்றும் சிலர் கேட்டிருக்கிறார்கள். இத்தகைய கருத்துகளை ஆளும் தரப்பினர் ஆக்கப்பூர்வமாகக் கருத வேண்டும். புயலுக்குப் பெயர் வைக்க ஒரு குழு அமைத்து, எல்லா நாடுகளுக்கும் வாய்ப்பு வழங்கியுள்ளார்கள். அதுபோல், பொதுத் திட்டங்களுக்கு யார் யார் பெயரை வைக்கலாம் என அரசு கேட்கலாம். எல்லோரும் பரிந்துரைகளை வழங்கலாம். அனைத்துப் பரிந்துரைகளும் பரிந்துரைத்தவர் பெயர்களும் அதற்குரிய காரணங்களும் இணையத்தில் ஏற்றப்பட வேண்டும். குறிப்பிட்ட பகுதிக்கு, திட்டத்துக்குப் பங்களித்தவர் பெயர்களையும் வைக்கப் பரிசீலிக்கலாம். ஒரே பெயரை மீண்டும் மீண்டும் வைப்பது, தங்கள் தலைவர் பெயர்களை மட்டும் வைப்பது என்பது மக்களாட்சிக்கு அழகு இல்லை. நடுநிலையுடன் பெயர்களைப் பரிசீலித்து, தேவைப்பட்டால் இணையத்தில் வாக்கெடுப்பு நடத்தி இதற்குரிய முடிவுகளை எடுக்க வேண்டும். இந்த நடைமுறை முழுவதும் ஒளிவு மறைவின்றி, திறந்த புத்தகமாக எவரும் காணும் வகையில் இருக்க வேண்டும்.

    ஜி.டி. என்ற ஆளுமையை வெறும் சாதியக் குறிப்புக்குள் அடைக்கக் கூடாது. சாதியை விட அவரது சாதனைகளே முன்னிறுத்தப்பட வேண்டும். அவரது பணிகளிலிருந்து ஊக்கமும் உத்வேகமும் பெறுவதே நம் நோக்கமாக இருக்க வேண்டும்.

    ஆளும் தரப்பினர் எந்தப் பெயரை வைத்தாலும் மக்கள் ஏற்றுக்கொண்டால் மட்டுமே அது நிலைபெறும். இப்படிப் பெயர் மாறிய பாலங்கள், ஊர்கள், ஆள்கள் பெயர்கள், நம்மிடையே அதிகம் உள்ளன. எனவே, மக்கள் அனைவரும் ஜி.டி.பாலம் என அழைக்கத் தொடங்கினால், நாயுடு என்ற பெயர் நாளடைவில் மறைந்துவிடும். ஜி.டி.பாலம் ஒன்னு கொடுங்க, ஜி.டி.பாலத்துல ஏறிக்கிட்டு இருக்கேன், ஜி.டி. பாலத்துக்குக் கீழ இடது பக்கம் திரும்புங்க என ஒவ்வொரு வாய்ப்பிலும் கூறினால், அதுவே நிலைபெறும். எனவே, இதில் முடிவு எடுக்க வேண்டியவர்கள் மக்களே.

    Share
  • அரசுப் பள்ளி மாணவர் சாதனையில் அரசு உரிமை கோரலாமா?

    அரசுப் பள்ளி மாணவர் சாதனையில் அரசு உரிமை கோரலாமா?

    அண்ணாகண்ணன்

    அரசுப் பள்ளி மாணவி, ஜப்பானிய மொழியில் பேசிவிட்டார். அரசுப் பள்ளி மாணவர், ஐஐடியில் சேர்ந்துவிட்டார். பழங்குடியின மாணவி, வழக்குரைஞர் ஆகிவிட்டார்… என்பன போன்ற செய்திகளில் ஓர் அடிப்படைச் சிக்கல் இருக்கிறது.

    ஏதோ இவர்கள் கீழ்நிலையில் இருப்பது போலவும் அதிலிருந்து ஏறி வந்து, மேல்நிலைக்கு வந்துவிட்டது போலவும் ஒரு தொனி இவற்றில் இருக்கிறது. அரசுப் பள்ளி என்றால் மதிப்புக் குறைந்தது போன்ற ஒரு கண்ணோட்டத்தை அரசினரும் அமைச்சர்களும் அதிகாரிகளும் தொடர்ந்து தங்களை அறியாமலே வலுப்படுத்துகின்றனர். அரசுப் பள்ளி, அரசுப் பள்ளி என அழுத்திச் சொல்வதன் மூலம், கழிவிரக்கத்தை ஏற்படுத்த முயல்கின்றனர். தனியார் பள்ளி மாணவர்கள் யாரும் இவ்வாறு சொல்வதில்லை. தங்கள் பள்ளியின் பெயரை மட்டுமே சொல்கின்றனர். அதுவும், தன்னம்பிக்கையுடன், தலை நிமிர்ந்து சொல்கின்றனர்.

    அரசுப் பள்ளி மாணவர் எனச் சொல்வதால், மாணவருக்கு எந்தப் பயனும் இல்லை. ஆனால், அந்த மாணவரின் உழைப்பில், ஆசிரியர்களும் அதிகாரிகளும் தமிழக அரசினரும் விளம்பரம் தேட முயல்கிறார்கள். மாணவருக்கு அரசு சார்பில் வழங்கப்படும் கல்வி சார்ந்த சேவைகள், மக்கள் வரிப்பணத்திலிருந்தே செய்யப்படுகின்றன. ஒரு வகையில் அது கடமை. அதை முறையாக, ஒழுங்காக, தரமாகச் செய்ய வேண்டும் என்பதே அனைவரின் எதிர்பார்ப்பும். சிறப்பாகப் படித்த மாணவர்களின் பெருமையில் அரசு உரிமை கோருகிறது என்றால், சரியாகப் படிக்காத மாணவர்களின் தரத்திற்கும் அரசே பொறுப்பு ஏற்க வேண்டும்.

    Share
  • நரேந்திர மோடியின் திருப்புமுனைப் பணிகள்

    நரேந்திர மோடியின் திருப்புமுனைப் பணிகள்

    அண்ணாகண்ணன்

    இந்தியாவின் தீர்க்க முடியாத சிக்கல்களாக, நெடுங்காலமாக நீடித்த பலவற்றைப் பிரதமர் நரேந்திர மோடி வெற்றிகரமாகத் தீர்த்துள்ளார்.

    * காஷ்மீருக்குச் சிறப்புச் சலுகைகளை நீக்கி, யூனியன் பிரதேசமாக மாற்றியது
    * பாபர் மசூதி வழக்கு முடிவு பெற்று, அயோத்தியில் பிரமாண்டமான ராமர் கோவிலை நிர்மாணித்தது
    * பெண்களுக்கு 33 சதவிகித இட ஒதுக்கீடு
    * பொருளாதாரத்தில் பின்தங்கியவர்களுக்கு இடஒதுக்கீடு
    * முத்தலாக் தடைச் சட்டம்
    * தமிழக மீனவர்கள் சுட்டுக் கொல்லப்படுவது அனேகமாக நிறுத்தப்பட்டது
    * 12 கோடி வங்கிக் கணக்குகள் தொடக்கம். மானியங்கள், அவரவர் வங்கிக் கணக்கில் செலுத்தப்படுகின்றன
    * பாஸ்டாக் வழியே சுங்கக் கட்டணம்
    * யூபிஐ வழியே பணப் பரிமாற்றம்
    * இந்திய ரூபாயில் இதர நாடுகளுடன் வர்த்தகம்
    * ரூ.12 லட்சம் வரை வருவாய் உள்ளவர்களுக்கு வருமான வரியிலிருந்து விலக்கு

    இந்த இலக்குகளை எட்டுவதில் அவருக்கு ஏராளமான தடைகள் இருந்தன. கடும் விமர்சனங்களை அவர் எதிர்கொண்டார். ஆனால், துணிச்சலாக இவற்றை நிறைவேற்றினார். தொலைநோக்குடன் முடிவுகளை எடுத்தார். உலக அரங்கில் இந்தியாவின் புகழை உயர்த்தினார். எழுச்சி மிக்க புதிய இந்தியாவை மீண்டும் கட்டமைத்ததில் இவருக்கு முக்கியப் பங்கு உண்டு.

    துணிவும் தொலைநோக்கும் ஆளுமையும் உறுதியும் மிக்கவராக நரேந்திர மோடி திகழ்கிறார். இன்று 75ஆவது பிறந்தநாள் காணும் அவர் இன்னும் பல சாதனைகளைப் படைக்க வாழ்த்துகிறேன்.

    Share
  • ஆசிரியர் பவளசங்கரி பிறந்த நாள்

    ஆசிரியர் பவளசங்கரி பிறந்த நாள்

    அண்ணாகண்ணன்

    இன்று பிறந்த நாள் காணும் வல்லமை நிர்வாக ஆசிரியர் பவளசங்கரி திருநாவுக்கரசு அவர்கள் நீடூழி வாழ்க.

    தமிழக அரசின் அம்மா இலக்கிய விருது பெற்றவர், 20க்கும் மேற்பட்ட நூல்களின் ஆசிரியர், கிம் யாங் ஷிக் கவிதைகளைக் கொரிய நாட்டுக் கவிக்குயில் என்ற தலைப்பில் தமிழில் மொழிபெயர்த்தவர், லெஸ்லி டவுனர் எழுதிய கெய்ஷா நூலைத் தமிழில் பெயர்த்தவர், கடைச்சங்கத்தில் கொங்கு கலாச்சாரம், கொங்கு நாட்டு வரலாறு உள்ளிட்ட பல நூல்களின் ஆசிரியர், தமிழ் கொரியத் தொடர்புகள் குறித்த ஆய்வறிஞர், தமிழர் வாழ்வியல் ஆய்வு அறக்கட்டளையை நிறுவி நடத்துபவர், வல்லமை மின்னிதழை வழிநடத்தும் ஆதார சக்தி, திறமையாளர்களைத் தேடிக் கண்டறிந்து ஊக்குவிப்பவர், ஆற்றல் வாய்ந்த பேச்சாளர், ஆளுமை மிகுந்த நிர்வாகி, அயராத உழைப்பாளர் பவளசங்கரி அவர்கள், பல்லாண்டு பல்லாண்டு பல்லாயிரத்தாண்டு வாழ்க

    இந்தப் படம், 2011ஆம் ஆண்டு மறவன்புலவு சச்சிதானந்தன் அவர்களின் இல்லத்தில் எடுத்தது. பின்னணியில் எழுத்தாளர் சுபாஷினி திருமலை

    Share
  • வாட்ஜ் பேங்க் பகுதியில் ஹைட்ரோ கார்பன் திட்டம்

    வாட்ஜ் பேங்க் பகுதியில் ஹைட்ரோ கார்பன் திட்டம்

    அண்ணாகண்ணன்

    கச்சத் தீவை இலங்கைக்கு அளித்த போது, வாட்ஜ் பேங்க் என்ற பகுதி, இந்தியாவிற்கே சொந்தம் என்ற ஒப்பந்தமும் போடப்பட்டது. இந்த வாட்ஜ் பேங்க் பகுதியில் பெட்ரோலியம், இயற்கை எரிவாயு போன்றவை இருந்தால், அவையும் இந்தியாவிற்கே சொந்தம் என உறுதி செய்யப்பட்டது.

    வாட்ஜ் பேங்க் என்பது கன்னியாகுமரிக்கு தெற்கில் 50 கிலோ மீட்டருக்கு அப்பால் உள்ள கடற்பகுதி. இந்தப் பகுதியில் கடலின் ஆழம் 200 மீட்டர் அளவுக்கு இருக்கும். வாட்ஜ் பேங்க் பகுதி 4,000 சதுர மைல் (சுமார் 6,500 சகிமீ) பரப்பளவுடையது. இந்தப் பகுதியில் கடல் பல்லுயிர் வளம் அதிகம் என்பதால் மீன் வளமும் அதிகம்.

    வாட்ஜ் பேங்க் பகுதி மீன் மற்றும் பல்லுயிர் வளத்திற்காக அறியப்பட்ட பகுதியாக இருந்தாலும் இந்தப் பகுதியில் பெட்ரோலியம் கிடைக்கும் சாத்தியமும் இருப்பதாக இந்தியா கருதுகிறது. பெட்ரோலியம் மற்றும் இயற்கை எரிவாயு அமைச்சகத்தின் ஹைட்ரோ கார்பன் இயக்குநரகம் கடந்த ஜனவரி மாதம் அறிவிக்கை ஒன்றை வெளியிட்டது. அந்த அறிவிக்கையில், வாட்ஜ் பேங்க் பகுதியில் அடையாளம் காணப்பட்டுள்ள மூன்று இடங்களில் பெட்ரோலியம் கிடைக்க வாய்ப்புள்ளதா என ஆராய ஆர்வமுள்ளவர்கள் விண்ணப்பிக்கலாம் எனக் கூறியது.

    ஆனால், இதைக் கன்னியாகுமரி மீனவர்கள் கடுமையாக எதிர்க்கின்றனர். இவர்களை ஆதரித்து, அரசியல் கட்சிகள் பலவும் போராட்டத்தில் இறங்கியுள்ளன. இதைத் தொடர்ந்து, இதற்கு வழங்கிய சுற்றுச்சூழல் அனுமதியைத் தமிழக அரசு திரும்பப் பெற்றுள்ளது.

    இந்தப் பகுதியில் இருக்கும் வளங்களுக்காக இலங்கை பங்கு கேட்கக் கூடாது என்பதற்காகவே கச்சத் தீவை இந்திய அரசு விட்டுக் கொடுத்தது. இப்போது, இந்த வளங்களை ஆராயக் கூடாது என்று தமிழக மீனவர்கள் போராடுகின்றனர். கொல்லம் பகுதியில் ஆராய்வதைக் கேரள மீனவர்களும் எதிர்க்கின்றனர். தங்கள் வாழ்வாதாரம் பாதிக்கப்படும் என்று மீனவர்கள் அஞ்சுகின்றனர்.

    இந்தச் சிக்கலைத் தீர்க்க, என் யோசனை இதோ.

    இந்தத் துரப்பணப் பணிகளைத் தனியார் நிறுவனங்களுக்கு ஒப்படைக்காமல், அரசே இதை நேரடியாக நடத்தலாம். குறிப்பாக, தமிழக அரசு ஒரு புதிய நிறுனத்தை உருவாக்கலாம். தமிழகப் பகுதிகளில் இருக்கும் எண்ணெய், எரிவாயு வளங்களை ஆராய்வது, துரப்பணம் செய்வது ஆகிய பணிகளை இந்த நிறுவனமே மேற்கொள்ளலாம். அவ்வாறு இயற்கை வளம் கண்டறியப்பட்டால், அதை எடுப்பதால் வரும் லாபத்தில் ஒரு பகுதியை இந்தப் பகுதிகளின் மேம்பாட்டுக்காக ஆண்டுதோறும் செலவிடலாம். இங்குள்ள மக்களில் தகுதி உடையோருக்கு இதன் வேலைவாய்ப்பில் முன்னுரிமை வழங்கலாம். அரசே முன்னின்று நடத்துவதால், இதன் மீது மீனவர்களுக்கு நம்பிக்கை உண்டாகும்.

    உலகின் பல பகுதிகளில் நிலத்தில் அல்லது ஆழ்கடலில் இவ்வாறு எண்ணெய், எரிவாயு ஆகியவற்றை எடுத்து வருகின்றனர். அவ்வாறு எடுக்கும் பெட்ரோலியப் பொருள்களை நாம் இங்கே விலை கொடுத்து வாங்கிப் பயன்படுத்துகிறோம். நம் பகுதியில் அவ்வாறு ஒன்று கிடைக்கும் வாய்ப்பு இருக்குமாயின், அது குறித்து ஆராயக் கூடாது என்பது சரியா?

    சுற்றுச்சூழலுக்குப் பாதிப்பு இல்லாமல் திட்டங்களை நிறைவேற்ற, அறிவியல்பூர்வமான பார்வை தேவை. உணர்வுப்பூர்வமாக அணுகுவது, சிக்கல்களைத் தீர்க்காது. நமக்குத் தேவையான தீர்வு, நம் காலடியில் கூட இருக்கலாம்.

    Share
  • நினைவஞ்சலி – நாகேஸ்வரி அண்ணாமலை

    நினைவஞ்சலி – நாகேஸ்வரி அண்ணாமலை

    அண்ணாகண்ணன்

    எழுத்தாளர், முனைவர் நாகேஸ்வரி அண்ணாமலை (85 வயது), 2025 ஆகஸ்டு 1 அன்று மறைந்தார் என்ற கொடும் செய்தி, இன்று வந்து சேர்ந்தது. இது குறித்து அவர் கணவர், பேராசிரியர் இ.அண்ணாமலை விடுத்துள்ள உருக்கமான மடல் இங்கே:

    Nageswari, my wife of nearly sixty years of companionship and comfort, left me, and us, at 5.00 p.m. on August 01 in hospital. She passed away peacefully. She was 85. Her lungs got weaker in the last few months as her body got progressively more fatigued from poor appetite and reduced intake that started with some health problems in the last year. I feel that a part of me slipped away and another part says that she is still around me, supporting and critiquing. Yet, emptiness weighs me down.

    My Soliloquy

    ‘சாதலும் புதுவது அன்றே’
    புரிகிறது புறம்

    உண்மை உறவு மரிப்பதில்லை.
    தெரிகிறது அதுவும்.
    இருந்தும்,

    தோளோடு தோள் நின்ற தோழமையைத்
    தோளிலிருந்து இறக்க முடியவில்லை.
    இறப்பை, இழப்பை மறக்க முடியவில்லை.

    என் செய்வேன்?

    பேராசிரியரின் கைகளைப் பற்றிக்கொள்கிறோம். உங்கள் துயரில் பங்கு கொள்கிறோம். நாகேஸ்வரி அம்மா, மறையவில்லை. நம்முடனே, நம் சிந்தையில் வாழ்கிறார். தமது ஈர எழுத்துகளில், அறம் சார்ந்த ஆக்கங்களில் வாழ்கிறார்.

    சமூகவியலில் முனைவர் பட்டம் பெற்ற நாகேஸ்வரி அவர்கள், 1966 முதல், அமெரிக்காவில் வசித்தவர். கணவருடன் கருத்தொருமித்து வாழ்ந்தவர். அமெரிக்காவின் எந்த ஆடம்பரமும் இவர்கள் மீது ஒட்டவே இல்லை.

    வல்லமைக்கு நாகேஸ்வரி அவர்களின் படைப்புகள், பெரும் வலுச் சேர்த்தன. அதன் பெருமையை உயர்த்தின. அமெரிக்காவின் புதிய தரிசனங்களை, அதன் துல்லியமான சித்திரங்களை வல்லமையில் தொடர்ந்து எழுதினார். சொந்த அனுபவத்துடன் கூடவே, சமூகவியல் காரணங்களுடன், அரசியல் விமர்சனங்களுடன் தனது பார்வைகளை முன்வைத்தவர்.

    வல்லமை மின்னிதழில் மிகச் சிறப்பான கட்டுரைகள் பலவற்றை அவர் எழுதினார். பத்தி எழுத்தாளராக, அவ்வப்போது நடக்கும் நிகழ்வுகளை உடனுக்குடன் எழுதி வந்தார். இவை உண்மையான, நேர்மையான, ஆழமான கட்டுரைகள். அதே நேரம், எளிமையானவை. கடினமான சொற்களோ, கரடு முரடான வரிகளோ இல்லை. நீரோட்டம் போன்ற நடையில், நறுக்கென மனத்தில் தைக்கும் விதமாக எழுதினார். நாகேஸ்வரியின் கட்டுரைகளை வியந்து கொண்டாடி, தொலைபேசியில் அழைத்துப் பாராட்டியோர் பலர்.

    நாகேஸ்வரி அண்ணாமலை கட்டுரைகள்

    நாகேஸ்வரி அவர்கள், துணிவும் பரிவும் ஒருங்கே கொண்டவர். தமிழ்நாட்டில் பேருந்தின் படிகள் உயரமாக இருக்கின்றன, அதில் ஏற எனக்குச் சிரமமாக இருக்கிறது என எழுதினார். கல்வித் துறையில் முனைவர் பட்டங்களும் துணைவேந்தர் பதவிகளும் காசுக்கு விற்கப்படுவதைக் கண்டித்து எழுதினார். ஊழல் அரசியல்வாதிகளைச் சாடினார். அதிபர், பிரதமர், முதலமைச்சர், அமைச்சர்கள் என யாராக இருந்தாலும் அவரது விமர்சனங்களுக்குத் தப்பவில்லை.

    அமெரிக்காவைப் பற்றி மட்டுமல்லாது, பாலஸ்தீனம், இஸ்ரேல், கியூபா, வியட்னாம் எனப் பல நாடுகள் குறித்தும் எழுதினார். இவற்றுள் பயண இலக்கியமும் உண்டு. வல்லமையில் இவர் எழுதிய கட்டுரைகள், பின்னர் நூல் வடிவம் பெற்றன. இணையத்தில் வேறு இதழ்களிலும் எழுதத் தொடங்கினார். தனி நூல்களும் படைத்தார். *அமெரிக்காவின் மறுபக்கம்*, *அமெரிக்க அனுபவங்கள்*, *பலஸ்தீன–இஸ்ரேல் போர்*, *கியூபாவின் விடுதலை வெற்றி*, *வியட்நாமில் அமெரிக்கப் போர்*, *ஐந்து தலைமுறை நாடார் பெண்களின் கதை* ஆகிய நூல்கள், அவரது அழுத்தமான பங்களிப்புகள்.

    எளிய கிராமத்துப் பெண்ணாகத் தம் வாழ்வைத் தொடங்கிய நாகேஸ்வரி, பழுத்த அனுபவத்துடன், பரந்த உலகை வலம் வந்தவர். வளமான, வசதியான வாழ்க்கை அமைந்த பிறகும் எளியவர்கள், ஒடுக்கப்பட்டோர், வஞ்சிக்கப்பட்டோர் பக்கமே அவர் எப்போதும் நின்றார். அவர்களின் நியாயங்களுக்காகக் குரல் கொடுத்தார்.

    வல்லமைக்குப் பெரும் தூணாக, தமிழ்கூறு நல்லுலகின் சுடர்மிகு எழுத்தாளராகத் திகழ்ந்த முனைவர் நாகேஸ்வரி அவர்களின் மறைவுக்கு வல்லமை தனது ஆழ்ந்த இரங்கலைத் தெரிவித்துக்கொள்கிறது.

    நாகேஸ்வரி அம்மா, என்றென்றும் நம் நினைவுகளில் வாழ்வார்.

    Share
  • தன்கர் எங்கே? & முகிலன் எங்கே?

    தன்கர் எங்கே? & முகிலன் எங்கே?

    அண்ணாகண்ணன்

    குடியரசுத் துணைத் தலைவராக இருந்த ஜெகதீப் தன்கரைக் காணவில்லை. பதவி விலகிய பிறகு அவர் இருக்கும் இடமே தெரியவில்லை என எதிர்க்கட்சிகள் கூறி வருகின்றன. அவர் பாதுகாப்பாக இருக்கிறாரா என ஐயம் எழுப்புகிறார்கள். தன்கர் எங்கே என முழங்கி வருகிறார்கள்.

    தன்கரைக் காணவில்லை என அவரைச் சார்ந்தவர்கள், குடும்பத்தினர் யாரும் புகார் அளிக்கவில்லை. ஆனால், எதிர்க்கட்சிகள் மட்டும் இதை ஊதிப் பெரிதாக்கி வருகின்றன.

    இதே போன்ற முழக்கத்தை எங்கோ பார்த்திருக்கிறோமே என யோசித்த போது, எங்கே முகிலன் நினைவுக்கு வந்தது. முகிலன், ஸ்டெர்லைட், கூடங்குளம், காவிரி மணல்கொள்ளை போன்றவற்றுக்கு எதிரான போராட்டங்களில் பங்கெடுத்தவர். ஜல்லிக்கட்டுப் போராட்டத்திலும் பங்கேற்றார். திடீர்ப் போராளியாகப் பல கூட்டங்களில் தோன்றினார்.

    2019 மக்களவைத் தேர்தல், ஏப்ரல் 18 அன்று நடைபெறும் என அறிவிக்கப்பட்டிருந்தது. அந்த ஆண்டு பிப்ரவரி 15ஆம் தேதி அன்று இரவு முதல் முகிலனைக் காணவில்லை எனத் திமுக தரப்பில் பலரும் எழுதினார்கள். எங்கே முகிலன், முகிலன் எங்கே போன்ற ஹேஷ்-டாக்குகளில் பலரும் ஆவேசமாகக் கேள்வி எழுப்பினார்கள். தோழர் எங்கே? கடத்தப்பட்டாரா? கொல்லப்பட்டாரா? எனப் பலவிதமான கோணங்களில் அலசினார்கள். காணாமல் போய் இன்று இத்தனாவது நாள் என ஒவ்வொரு நாளும் பதற்றத்தை ஏற்றினார்கள். கொட்டை எழுத்துகளில் சுவரொட்டிகள் ஒட்டினார்கள். ஆர்ப்பாட்டங்கள், போராட்டங்களும் ஆங்காங்கே நடந்தன. அப்போது இருந்த அதிமுக அரசின் மீதும் காவல் துறை மீதும் ஐயம் எழுப்பினார்கள். அரசுக்கு எதிரான அலையை எழுப்பியதில் இந்த எங்கே முகிலன் என்ற பரப்புரைக்கும் ஒரு முக்கிய இடம் உண்டு.

    தேர்தல் முடிந்து, மே 23 அன்று முடிவுகள் வெளியாகின. மொத்தம் உள்ள 39 தொகுதிகளில் 38 இடங்களைத் திமுக கூட்டணி வென்றது.

    முகிலன் காணாமல் போனது குறித்து, பிபிசி வெளியிட்டுள்ள செய்தியின் ஒரு பகுதி இங்கே.

    மனித உரிமைச் செயல்பாட்டாளரான ஹென்றி திபேன், வழக்கறிஞர் சுதா ராமலிங்கம் ஆகியோர், முகிலனைக் கண்டுபிடித்துத் தர வேண்டும் எனச் சென்னை உயர் நீதிமன்றத்தில் ஆட்கொணர்வு மனு ஒன்றைத் தாக்கல் செய்தனர். இந்த வழக்கைத் தமிழக காவல் துறையின் சிபிசிஐடி பிரிவு விசாரித்து வந்தது.

    இந்த வழக்கு ஜூலை 8ஆம் தேதி மீண்டும் விசாரணைக்கு வரவிருந்த நிலையில் ஜூலை 6ஆம் தேதியன்று திருப்பதி ரயில் நிலையத்தில் தண்டவாளத்தில் அமர்ந்து கோஷமிட்டுக்கொண்டிருந்த முகிலனை ஆந்திரக் காவல் துறையினர் கைது செய்தனர். அவர்கள் அன்று இரவே தமிழக சிபிசிஐடி காவல் துறையினரிடம் முகிலனை ஒப்படைத்தனர்.

    ஜூலை 7ஆம் தேதியன்று சென்னை சிபிசிஐடி வளாகத்தில் முகிலன் வைக்கப்பட்டிருந்தபோது, அவரது மனைவி, வழக்கறிஞர் சுதா ராமலிங்கம் உள்ளிட்டோர் அவரைச் சந்திக்க அனுமதிக்கப்பட்டனர். இந்த நிலையில், முகிலன் இந்திய குற்றவியல் சட்டப் பிரிவுகள் 417, 376ன் கீழ் கைது செய்யப்பட்டார். தன்னைத் திருமணம் செய்துகொள்வதாகக் கூறி, பாலியல் ரீதியாக ஏமாற்றியதாக ஒரு பெண் அளித்த புகாரின் அடிப்படையில் முகிலன் கைது செய்யப்பட்டார்.

    முகிலன் காணாமல் போனவுடன் ஆட்கொணர்வு மனு தாக்கல் செய்த வழக்கறிஞரான சுதா ராமலிங்கம், சென்னையில் போலீஸ் காவலில் இருந்தபோது சென்று சந்தித்தார். “அப்போது அவர் எதுவும் சொல்லவில்லை. நன்றி என்று மட்டும் கூறினார். இத்தனை நாட்களாக எங்கே இருந்தீர்கள் என்ற கேள்விக்கு அவர் பதிலளிக்கவில்லை. மாஜிஸ்ட்ரேட்டிம் சொல்வதாகக் கூறினார். அதற்குப் பிறகு நான் வலியுறுத்தவில்லை” என்கிறார் சுதா ராமலிங்கம்.

    இன்று திரும்பிப் பார்க்கும்போது, மொத்த முகிலன் அத்தியாயமும், ஒரு நாடகமாகவே தெரிகிறது. ஒருவரைப் பல இடங்களில் போராளியாக முன்னிறுத்தினர். அவரைக் கொண்டே தூத்துக்குடி துப்பாக்கிச் சுடுதல் தொடர்பாக ஒரு வீடியோவை வெளியிடச் செய்தனர். அன்று இரவே அவரைக் காணவில்லை எனப் பதறினர். அரசுக்கு எதிராகப் பெரிய அளவில் பரப்புரை செய்தனர். தேர்தல் முடிந்து 45 நாள்களுக்குப் பிறகு எந்தச் சிக்கலும் இல்லாமல் அவராகவே வெளியே வந்தார்.

    இந்தப் பின்னணியை வைத்துப் பார்க்கிற போது, ஜெகதீப் தன்கரைக் காணவில்லை என்பதும் ஒரு நாடகமாகவே தெரிகிறது. ஒரே வித்தியாசம், இது தேசிய அளவிலான பரப்புரையின் ஒரு பகுதியாக நடைபெறுகிறது. இது, 2026 தேர்தலுக்கான செயல் திட்டமா என்பது, போகப் போகத் தெரியும்.

    Share
  • நீதிமன்ற வழக்குச் சுருக்கம் – ஒரு யோசனை

    நீதிமன்ற வழக்குச் சுருக்கம் – ஒரு யோசனை

    அண்ணாகண்ணன்

    ஒவ்வொரு நீதிமன்றத்திலும் முடிவுற்ற, ஒவ்வொரு நாளும் முடிவுறும் வழக்குகளின் விவரங்களை இவ்வாறு சுருக்கமாகத் தொகுக்க முடிந்தால், மிகவும் பயனுள்ளதாக இருக்கும். ஆர்வம் உள்ளவர்கள், முழு விவரங்களைத் தேடிப் படிக்கலாம். முழுச் செய்தியையும் அதன் வழக்கின் முழு விவரங்களையும் ஒருவர் படித்துத் தெரிந்துகொள்வதற்கு அதிக நேரமும் முயற்சியும் தேவை. இவ்வாறு சுருக்கமாகத் தொகுக்க முடிந்தால், நிறைய நேரம் மிச்சமாகும். இதை ஆங்கிலத்திலும் தமிழிலும் இந்திய மொழிகள் அனைத்திலும் வழங்கலாம். செயற்கை நுண்ணறிவைப் பயன்படுத்தி இவ்வாறு செய்ய முடிந்தாலும் முயன்று பார்க்கலாம்.

    இதற்கு அடுத்த நிலையாக, ஒரே மாதிரியான வழக்குகள், ஒரு துறை சார்ந்த வழக்குகள், ஒரு பகுதியைச் சேர்ந்த வழக்குகள், ஒரு நபரின் மீதான வழக்குகள், ஒரு குறிப்பிட்ட காலத்தில் தொடுக்கப்பட்ட வழக்குகள் எனத் தொகுக்க முடியும். நீதிபதி ஒருவரின் தீர்ப்புகள், வழக்குரைஞர் ஒருவரின் வழக்குகள், ஒருவர் தொடுத்த வழக்குகள் ஆகியவற்றையும் இவ்வாறு வரிசைப்படுத்தலாம். இவற்றை இணையத்தளத்திலும் செயலியிலும் வழங்க முடியும். நீதித் துறையே இதை முன்னெடுத்தால், மிகச் சிறப்பாக இருக்கும்.

    என் வேண்டுகோளுக்காக, கூகுள் ஜெமினி வழங்கிய விவரங்கள்:

    சென்னை உயர் நீதிமன்றத்தின் சமீபத்திய தீர்ப்புகள் குறித்த சில விவரங்கள் இங்கே கொடுக்கப்பட்டுள்ளன. கீழே கொடுக்கப்பட்ட தகவல்கள், சமீபத்திய செய்திகளின் அடிப்படையில் தொகுக்கப்பட்டவை.

    வழக்குச் சுருக்க விவரங்கள்

    1. தொலைபேசி ஒட்டுக் கேட்பு தொடர்பான வழக்கு

    • வழக்கு விவரம் என்ன? தனிநபர்களின் தொலைபேசி உரையாடல்களை குற்றங்களுக்காக ஒட்டுக் கேட்பதை தடை செய்வது.  
    • வழக்குத் தொடுத்தவர் யார்? கிஷோர் என்பவர்.  
    • யாருக்கு எதிராக? மத்திய உள்துறை அமைச்சகம்.
    • தீர்ப்பு என்ன? குற்றச் செயல்களை கண்டுபிடிக்க ரகசியமாக தொலைபேசி ஒட்டுக் கேட்பது அனுமதிக்கத்தக்கதல்ல என்று கூறி, உள்துறை அமைச்சகத்தின் உத்தரவை ரத்து செய்து நீதிமன்றம் உத்தரவிட்டது.  
    • வழக்குரைஞர் பெயர் கிடைக்கவில்லை.
    • நீதிபதி பெயர் கிடைக்கவில்லை.
    • மேல்முறையீட்டு நிலை தற்போதைய நிலையில், இது இறுதித் தீர்ப்பாக உள்ளது.

    2. ரிதன்யா தற்கொலை வழக்கு

    • வழக்கு விவரம் என்ன? வரதட்சணை கொடுமை காரணமாக தற்கொலை செய்து கொண்ட ரிதன்யா வழக்கில், கைது செய்யப்பட்ட அவரது கணவர் மற்றும் குடும்பத்தினருக்கு ஜாமீன் வழங்குவது.
    • வழக்குத் தொடுத்தவர் யார்? ரிதன்யாவின் கணவர் கவின்குமார் மற்றும் அவரது மாமனார், மாமியார்.
    • யாருக்கு எதிராக? தமிழக அரசு (காவல்துறை).
    • தீர்ப்பு என்ன? முக்கிய சாட்சிகளின் விசாரணை முடிந்துவிட்டதால், குற்றவாளிகளை தொடர்ந்து சிறையில் வைத்திருக்க வேண்டிய அவசியம் இல்லை எனக் கூறி, மூவருக்கும் நிபந்தனை ஜாமீன் வழங்கி நீதிமன்றம் உத்தரவிட்டது.
    • வழக்குரைஞர் பெயர் கிடைக்கவில்லை.
    • நீதிபதி பெயர் கிடைக்கவில்லை.
    • மேல்முறையீட்டு நிலை இந்த ஜாமீன் உத்தரவு தொடர்பாக மேல்முறையீடு செய்யப்பட்டதாக தகவல்கள் இல்லை.

    3. நிலுவை வழக்குகள் தாமாக முன்வந்து விசாரணை (Suo Motu)

    • வழக்கு விவரம் என்ன? மூன்று ஆண்டுகளுக்கும் மேலாக நிலுவையில் உள்ள, மூன்று ஆண்டுகள் வரை தண்டனை விதிக்கப்படக்கூடிய வழக்குகளை விரைந்து முடித்து வைக்க தாமாக முன்வந்து விசாரணைக்கு எடுத்தது.
    • வழக்குத் தொடுத்தவர் யார்? சென்னை உயர் நீதிமன்றம் தாமாக முன்வந்து விசாரணைக்கு எடுத்துக்கொண்டது (Suo Motu).
    • யாருக்கு எதிராக? இது எந்த ஒரு தனிநபர் அல்லது அமைப்புக்கு எதிரானது அல்ல. இது வழக்குகளை விரைந்து முடிப்பதற்கான நீதிமன்றத்தின் நடவடிக்கை.
    • தீர்ப்பு என்ன? நிலுவையில் உள்ள வழக்குகளை அடையாளம் கண்டு, அவற்றை விரைந்து முடித்து வைக்க ஏதுவாக, தாமாக முன்வந்து விசாரணைக்கு எடுத்து நீதிமன்றம் உத்தரவிட்டுள்ளது.
    • வழக்குரைஞர் பெயர் கிடைக்கவில்லை.
    • நீதிபதி பெயர் தலைமை நீதிபதி எம்.எம். ஸ்ரீவஸ்தவா.
    • மேல்முறையீட்டு நிலை இது நீதிமன்றத்தின் உள் நடைமுறை என்பதால் மேல்முறையீடு இல்லை.

    4. அண்ணா பல்கலைக்கழக மாணவி பாலியல் வழக்கு

    • வழக்கு விவரம் என்ன? அண்ணா பல்கலைக்கழக மாணவி பாலியல் வன்கொடுமை வழக்கில் குற்றவாளிக்கு தண்டனை வழங்குவது.
    • வழக்குத் தொடுத்தவர் யார்? இந்த வழக்கை காவல்துறையினர் விசாரித்தனர்.
    • யாருக்கு எதிராக? ஞானசேகரன்.
    • தீர்ப்பு என்ன? குற்றம் நிரூபிக்கப்பட்டதையடுத்து, குற்றவாளி ஞானசேகரனுக்கு 30 ஆண்டுகளுக்கும் குறையாத ஆயுள் தண்டனையும், ரூ.90,000 அபராதமும் விதித்து சென்னை மகளிர் நீதிமன்றம் உத்தரவிட்டது.
    • வழக்குரைஞர் பெயர் கிடைக்கவில்லை.
    • நீதிபதி பெயர் நீதிபதி ராஜலட்சுமி.

    • மேல்முறையீட்டு நிலை இந்த தீர்ப்புக்கு எதிராக மேல்முறையீடு செய்யப்படலாம்.

    Share
  • வெட்கம் இல்லாத பதவி நேசர்களுக்காக ஒரு சட்ட மசோதா

    வெட்கம் இல்லாத பதவி நேசர்களுக்காக ஒரு சட்ட மசோதா

    அண்ணாகண்ணன்

    தொடர்ச்சியாக 30 நாட்களுக்கு காவலில் வைக்கப்பட்டாலோ அல்லது கைது செய்யப்பட்டாலோ பிரதமர், முதலமைச்சர்கள், மத்திய, மாநில அமைச்சர்களைப் பதவி நீக்கம் செய்யும் மசோதாவை மத்திய உள்துறை அமைச்சர் அமித் ஷா மக்களவையில் தாக்கல் செய்தார்

    மசோதாவின் வரைவின்படி, ஓர் அமைச்சர் பதவியில் இருக்கும்போது, ஐந்து ஆண்டுகள் அல்லது அதற்கு மேற்பட்ட தண்டனை விதிக்கப்படக்கூடிய குற்றச்சாட்டில் தொடர்ச்சியாக 30 நாட்களுக்கு கைது செய்யப்பட்டு காவலில் வைக்கப்பட்டால், பிரதமரின் ஆலோசனையின் பேரில் குடியரசுத் தலைவரால் அவர் பதவியில் இருந்து நீக்கப்படுவார். இந்த மசோதாவை எதிர்க்கட்சிகள் எதிர்த்து வருகின்றன.

    என் பார்வையில், செந்தில் பாலாஜி போன்றவர்களுக்காகவே இந்தச் சட்டம் கொண்டு வரப்படுகிறது. கடுமையான குற்றச்சாட்டுகளின் பேரில் கைது ஆகி, எவ்வளவு காலம் சிறையில் இருந்தாலும் அமைச்சர் பதவியை விடாதவர்களுக்கு இனி வேறு வழியில்லை.

    We cannot be so shameless that we continue to occupy constitutional positions while facing serious charges என அமித் ஷா கூறியுள்ளார். வெட்கம் இல்லாமல் பதவியில் ஒட்டிக்கொண்டிருப்பவர்களைப் பதவியிலிருந்து விரட்டத்தான் வேண்டும்.

    ஐந்து ஆண்டுகளுக்கு மேல் தண்டனை வழங்கத்தக்க குற்றச்சாட்டில், 30 நாள்களுக்கு மேல் சிறையில் இருந்தால், 31ஆவது நாள் அவர்கள் பதவி இழந்துவிடுவார்கள். இதில் பிரதமர் பதவியையும் சேர்த்தது, பா.ஜ.க.வின் நடுநிலைமையைக் காட்டுகிறது. சட்டம் எல்லோருக்கும் ஒன்றுதான் என்று இதன் மூலம் நிலை நாட்டுகிறார்கள்.

    பொய்யான குற்றச்சாட்டில் கைது ஆகிச் சிறையில் இருந்தால்…? இப்படி நிறைய நடந்திருக்கிறதே.

    பொய் என நிரூபித்துவிட்டு வெளியே வந்து, பிறகு பதவி ஏற்க வேண்டியதுதான். குற்றம் நிரூபிக்கப்பட்டு, தண்டனையே விதித்தாலும் உயர்நீதிமன்றத்திலும் உச்சநீதிமன்றத்திலும் மேல்முறையீடு செய்து, வழக்குகளைக் கால வரையின்றி இழுப்பார்கள். சாட்சிகளைக் கலைப்பார்கள். எதிர்க்கட்சிகளின் சதி என்பார்கள். இந்த அரசியல் விளையாட்டில், பொதுமக்களின் வரிப்பணம் வீணாகிறது. மேலும், சிறையில் இருந்து இவர்கள் எந்த அலுவலும் பார்க்க முடியாது. அப்படி இருக்க, அந்தப் பதவி எதற்காக?

    குற்றம் நிரூபிக்கப்படும் வரை ஒருவர் நிரபராதி என்றே சட்டம் கருதும். ஆனால், பெரும் பதவிகளில் இருப்பவர்கள், தங்கள் செல்வாக்கைப் பயன்படுத்தி, மிரட்டி, சாட்சிகளைக் கலைத்து, வழக்கை நீர்த்துப் போகச் செய்ய அதிக வாய்ப்பு உண்டு. எனவே தார்மீக ரீதியாக அவர்கள் தாமாகப் பதவி விலக வேண்டும். அல்லது நீக்கப்பட வேண்டும்.

    சிறையில் இருக்கும் அமைச்சரைப் பதவியிலிருந்து நீக்காத முதலமைச்சரை இந்தச் சட்டம், மறைமுகமாகக் கண்டிக்கிறது. இது ஈகோ விஷயம் கிடையாது, அரசு அலுவல் தடைப்படுகிறது, மக்கள் பணம் வீணாகிறது, குறுக்குவழியில் செல்வாக்கு செலுத்த இடம் உண்டாகிறது எனச் சுட்டிக் காட்டுகிறது.

    செந்தில் பாலாஜியைப் பதவியிலிருந்து நீக்கத் தமிழக ஆளுநர் வலியுறுத்திய போது, தமிழக முதலமைச்சர் மறுத்தார். இப்போது ஆளுநரின் நிலையே சரி என்பதை இந்தச் சட்டம் நிறுவுகிறது. இது ஒரு வகையில் ஆளுநருக்கு வெற்றி. தமிழகத்திற்கு மட்டுமின்றி, இந்தியா முழுமைக்கும் ஆளுநர் வழிகாட்டுகிறார்.

    Share