Category: தலையங்கம்

பவள சங்கரி

தலையங்கம்

தலைநகர் தில்லியில் ஆக்கப்பூர்வமான ஒரு புதிய முயற்சி முன்னெடுக்கப்பட்டுள்ளது பாராட்டிற்குரியது. புற்றீசல் போல பெருகியுள்ள பள்ளிகள் மத்தியில் தில்லியில் உள்ள மூன்று மாநகராட்சிப் பள்ளிகளில் வாரத்திற்கு ஒரு நாள் புத்தகச் சுமை இல்லாத நாளாக அறிவுறுத்தப்பட்டுள்ளது. அன்று ஒரு நாள் குழந்தைகள் பள்ளிகளுக்கு புத்தகம் ஏதும் கொண்டு வரவேண்டியதில்லை. இது குழந்தைகள் மத்தியில் பெரும் வரவேற்பைப் பெற்றுள்ளது. (smart education) பொலிவுறு கல்வித் திட்டத்தின் கீழ் இதை அறிமுகப்படுத்தியுள்ளனர். மேலை நாடுகளில் 10 ஆண்டுகளுக்கு முன்பே இத்திட்டங்கள் முழுமையாக செயல்படுத்தப்பட்டு +2 வரை படிக்கும் மாணவர்கள் பள்ளிகளுக்கு புத்தகங்கள் கொண்டு செல்ல வேண்டியதில்லை. ஆனால் அவர்களின் அறிவுத்திறன் பன்மடங்கு பெருகும் வகையில் கல்வித் திட்டங்கள் வரையறுக்கப்பட்டுள்ளன. வகுப்பில் நடைபெறும் கற்பித்தலும் வீட்டில் அதைப் பயிற்சி கொடுத்தலும், மாணவர்களின் கல்வித்தரம் குறித்த செய்திகளை பெற்றோருக்குத் தெரிவித்தலும் அனைத்தும் கணினி மூலமாகவே நடைபெறுகின்றன. மாணவர்கள் வீட்டுப்பாடங்கள் செய்வதற்கு மடிக்கணினியையே பெரும்பாலும் பயன்படுத்துகின்றனர்.. இப்போதுதான் நம் கல்வித் திட்டத்தில் அதுவும் தலைநகரில் உள்ள 3 மாநகராட்சிப் பள்ளிகளில் மட்டும், வாரத்தில் 1 நாள் மட்டும் இத்திட்டத்தைக் கொண்டு வந்திருக்கிறார்கள். இந்தியா முழுமைக்கும் இத்திட்டம் விரைவில் செயல்படுத்துதல் நலம். சிபிஎஸ்இ பாடத்திட்டத்தின் படி பயிற்றுவிக்கும் பள்ளிகளில் கணினி மூலமாகப் பயிற்றுவிக்கும் இந்த முறை அனைத்து மாணவர்களுக்கும் கிடைக்கும்படி செய்வதே சிறந்த கல்வித் திட்டமாகும். தட்டச்சு பயிலும்போது 10 ஆம் வகுப்பு மாணவன் ஆரம்ப நிலையில் ஆரம்பித்து வார்த்தைகள் வந்து சேர்வதற்கே 2 ஆண்டுகள் ஆகிவிடுகின்றன. ஆனால் மேலை நாடுகளில் பயிற்றுவிக்கும் திட்டங்களின்படி மூன்றாம் வகுப்பு படிக்கும் மாணவன் ஒரு நிமிடத்திற்கு 120 முதல் 140 வரை வார்த்தைகளைப் பதிவிடுவதாகக் கூறப்படுகின்றது. அறிவில் சிறந்த நமது மாணவர்கள் இந்த வளர்ச்சியை அடைவதற்கு ஏற்ப நம் கல்வித் திட்டங்களை வகுக்க வேண்டியது அவசியம். தமிழறிஞர்களின் கல்வியாளர்களின் பங்களிப்பைப் பெற்று நம் மாணவர்களின் தரத்தை உயர்த்த அரசு ஆவண செய்யவேண்டும். பொதுவாக 10 வயதிற்குள் குழந்தைகள் வளர்ந்தவர்களின் அறிவுத் திறனில் 60 விழுக்காட்டிற்கும் மேல் அறிவினைப் பெற்றுவிடுகிறார்கள். அந்த வகையில் குழந்தைகளுக்கு பாரபட்சமில்லாத முறையான கல்வி வளர்ச்சியே, இந்தியாவின் வளர்ச்சி.

பவள சங்கரி

தலையங்கம்

பஞ்சாப் தேசிய வங்கியில் ஒரே கிளையில் இத்தனை பெரிய முறைகேடு நடந்திருப்பது அதிர்ச்சியளிக்கக் கூடியது. முற்றிலும் நிர்வாகச் சீர்கேடுகளையே வெளிப்படுத்தும் நிகழ்வு இது. பாராளுமன்றத்தின் கேள்வி பதில் பகுதியில் எழுத்து மூலமாக அறிவிக்கப்பட்ட பதில் மூலமாக அனைத்துப் பெரிய வங்கிகளிலும் பல்வேறு காலகட்டங்களில் தொடர்ச்சியாக பல ஆயிரம் கோடிகளுக்கு முறைகேடுகள் நடந்து வந்துள்ளது தெரிய வந்துள்ளது. பொருளாதார வல்லுனர்களால் 25,000 கோடி வரையில் முறைகேடுகள் ஏற்படலாம் என்ற எச்சரிக்கை விடுக்கப்பட்டபோதும் அது உதாசீனப்படுத்தப்பட்டுள்ளதால் பஞ்சாப் தேசிய வங்கியில் இந்த முறைகேடு நடந்துள்ளது. சம்பந்தப்பட்ட நீரா மோடி இங்கிருந்து தப்பி அமெரிக்காவில் சொகுசு விடுதியில் தங்கியுள்ளதாக தகவல்கள் தெரிவிக்கின்றன. இதற்கு உடனடியாக நடவடிக்கை எடுக்க அரசு ஆவண செய்யவேண்டும். சமீபத்தில் ரிசர்வ் வங்கி அறிவித்த கணக்கின்படி 4 மணி நேரங்களுக்கு ஒரு முறை ஏதோ ஒரு வங்கியில் ஒரு முறைகேடு நடந்துகொண்டிருப்பதாக புள்ளிவிவரங்கள் தெரிவிக்கின்றன. வழக்கம்போல இந்த முறையும் இந்தியன் வங்கி அதிக அளவில் பஞ்சாப் தேசிய வங்கி மூலமாக நீரா மோடிக்கு பணம் அளித்துள்ளது. திரு கோபாலகிருட்டிணன் மூலமாக ஏற்பட்ட சரிவிற்குப் பிறகு இந்தியன் வங்கியின் மற்றுமொரு பின்னடைவு இது. பஞ்சாப் தேசிய வங்கியின் அத்தாட்சிக் கடிதத்தின் பேரில் பணம் கொடுக்கப்பட்டிருந்தாலும் அந்த வங்கிகளுக்கு அந்தப் பணம் எப்போது திரும்பக் கிடைக்கும் என்பது தெரியாது. நீரா மோடியின் மோசடி விவகாரம் அதிகபட்சமாக 2017 இல்தான் நடைபெற்றுள்ளது. வங்கிகளின் தணிக்கைக் குழுவினர் 2013 இலிருந்து இந்த மோசடிகளை வெளிக்கொண்டுவராமல் விட்டதற்கு என்ன காரணம். மத்திய அரசின் தலைமை கணக்காய்வாளர் இதைப்பற்றி இதுவரை எந்தக் கருத்தும் சொல்லாமல் இருப்பது ஏன் அல்லது அவருடைய கருத்துகள் நிராகரிக்கப்பட்டனவா என்றும் தெரியவில்லை. இந்த ஆண்டில் மட்டும் இதுவரை 13,000 கோடி உரூபாய் வாராக்கடனாக அறிவிக்கப்பட்டுள்ளது. இதை நிவர்த்தி செய்வதற்கான வழி முறைகள் மத்திய அரசால் இதுவரை ஏதும் அறிவிக்கப்படாத நிலையில் மக்களின் வரிப்பணத்திலிருந்து 2.25 இலட்சம் கோடி பங்கு மூலதனமாக அறிவிக்கப்பட்டுள்ளது என்பது வேதனைக்குரியதாக உள்ளது. இதில் ஆச்சரியப்படத்தக்க ஒரு விசயம் தனியார் வங்கியில் ஒன்றுகூட இந்த முறைகேடுகளில் சிக்கி பணத்தை இழக்கவில்லை என்பது ஆறுதலான செய்தி. முன்னாள் பிரதமர் இந்திரா காந்தி அவர்களால் மக்கள் நலனுக்காகவே தேசியமயமாக்கப்பட்ட வங்கிகள் தற்போது பெரும் சரிவுகளைச் சந்திக்கின்றன. பஞ்சாப் தேசிய வங்கி உட்பட அனைத்து தேசியமயமாக்கப்பட்ட வங்கிகளும் ஏன் தனியார்மயமாக்கப்படக்கூடாது. அப்படி தனியார்மயமாக்கப்பட்டால் அதனால் வரக்கூடிய தொகை அரசுக்குக் கிடைக்கும் என்பதோடு பங்கு மூலதனமாக ஒரு பெருந்தொகையும் அளிக்க வேண்டியதில்லை. குறைந்தபட்சம் பஞ்சாப் தேசிய வங்கியும், இந்தியன் வங்கியும் உடனடியாக தனியார் மயமாக்கப்படவேண்டியது அவசியமாகிறது.

பவள சங்கரி

தலையங்கம்

பாரதப் பிரதமர் மோடி அவர்களின் இந்த ஆட்சிக்காலத்தின் இறுதி நிதிநிலை அறிக்கையில் அறிவித்துள்ள அறிவிப்புகள் வெறும் அலங்கார வார்த்தைகளின் தொகுப்பாகவே உள்ளன. 10 கோடி மக்களுக்கு ஆண்டு ஒன்றிற்கு 5 இலட்சம் உரூபாய் இலவச மருத்துவக் காப்பீட்டுத் திட்டம் அறிவிக்கப்பட்டுள்ளது. இதில் ஒரு ஆண்டின் மொத்த மதிப்பு 50 இலட்சம் கோடி உரூபாய் ஆகிறது. இதற்கு நிதிநிலை அறிக்கையில் எந்த விதமான உரூபாய் பங்கீடு (Budgetery support) இல்லை. இருப்பினும் இதை செயல்படுத்துவதாக எடுத்துக்கொண்டால் இதற்கான கட்டமைப்புகள் உள்ளனவா என்றால் அதுவும் மிகப்பெரிய கேள்விக்குறியாகும். இதற்கான மருத்துவமனைகள், மருத்துவர்கள், மருத்துவ உயர்நிலைக் கல்லூரிகள் என அனைத்தையும் உருவாக்கினால் மட்டுமே இது சாத்தியமாகக்கூடும். இல்லாவிட்டால் இந்தத் திட்டம் மற்றுமொரு அவலம் நிறைந்த அரசு மருத்துவமனைகளுக்கானதாக மட்டுமே இருக்கக்கூடும். குறைந்த அளவு தொகையையாவது மக்களிடம் பெற்று அதனுடன் இந்தத் திட்டத்தை செயல்படுத்தும்பட்சத்தில் சிறு சாத்தியமாவது உருவாகலாம் என்ற நம்பிக்கை வரும்.

வங்கிகளுக்கு மக்களின் வரிப்பணத்திலிருந்து 2.40 இலட்சம் கோடி மூலதன நிதியாக அளிப்பதாக நிதியமைச்சர் கூறியுள்ளார். இதற்குரிய வட்டி விகிதாச்சாரப்படி அல்லது ஈவுத் தொகையாக அரசிற்கு வங்கிகள் செலுத்துகிறதா என்றால் இதுவும் மிகப்பெரியக் கேள்விக்குறியாகும். செப்டம்பர் மாதத்தில் மட்டும் வாராக்கடனாக 13,000 கோடி உரூபாய் அறிவிக்கப்பட்டுள்ளது. இவ்வாறு மாதாமாதம் பெருந்தொகைகள் வாராக்கடனாக இருக்கும்பட்சத்தில் வங்கிகள் மற்றும் அரசின் நிதி நிலைமைகளும் மிகப்பெரிய எதிர்விளைவுகளை சந்திக்கலாம் என்ற எண்ணமே மேலோங்குகிறது. வங்கிகளுக்குப் பிணையாகக் கொடுக்கப்பட்டுள்ள சொத்துகளை நிர்வகிக்க ஒரு தனி ஆணையம் உருவாக்கி அதன் மூலமாக வருவாய் ஈட்டினால் இந்தப் பிரச்சனைகளில் பாதியையாவது குறைக்க முடிவதோடு வங்கிகளுக்கும் வருமானம் வரும்.

இரயில்வேத்துறையும் நிதி ஒதுக்கீடும் குறித்த முழுமையான அறிவிப்புகளும் இல்லை. பிரதமர் மோதி அவர்களின் கனவுத் திட்டமாகிய புல்லட் ரயில் திட்டம், அதற்கான நிதி ஒதுக்கீடும், நூற்றுக்கும் அதிகமான இரயில்களின் வேகத்தை அதிகரிப்பதற்கான கட்டமைப்பை உருவாக்குவதற்கான நிதி ஆதாரங்களுக்கான அறிவிப்பும் இல்லை. ‘மேக் இன் இந்தியா’ திட்டத்தின் மூலமாக புல்லட் ரயில் திட்டம் செயல்படுத்துவதாக அறிவித்ததை ஜப்பானிய நிர்வாகம் நிராகரித்துள்ளதாகச் செய்திகள் வருகின்றன. இப்படி இந்த நிதிநிலை அறிக்கையில், ஆக்கப்பூர்வமான செயல்பாடுகள் ஏதுமின்றி, தெளிவற்ற சூழலே காணப்படுவது வருத்தம் அளிக்கக்கூடியதாகவே உள்ளது.

பவள சங்கரி

தலையங்கம்

நீதித் துறையில் நடந்துள்ள சமீபத்திய நிகழ்வுகள் வருந்தத்தக்கது, தவிர்க்கப்பட வேண்டியது. உச்சநீதிமன்றத்தின் நான்கு நீதிபதிகள் கூறியுள்ள குற்றச்சாட்டுகள் ஆய்வுக்கு உட்படுத்தப்படவேண்டியது அல்லவா? தலைமை நீதிபதிக்கு எழுதப்பட்ட அவர்கள் சுட்டிக்காட்டிய கருத்துகள் அடங்கிய கடிதம் ஆய்வுக்கு உட்படுத்தப்பட்டு களையப்பட வேண்டியது அவசியம். இந்தப்பிரச்சனையிலிருந்து நடுவண் அரசு அவர்களேத் தீர்த்துக்கொள்ள வேண்டும் என்று ஒதுங்குவது சரியா? அவர்களால் தீர்த்துக்கொள்ள முடியவில்லை என்பதாலேயே அவர்கள் மக்கள் மன்றத்திற்கு வந்துள்ளனர். இந்த நால்வரோடு மேலும் இரு உச்சநீதிமன்ற நீதிபதிகள் ஆதரவு தெரிவித்துள்ளனர் என்பதும் குறிப்பிடத்தக்கது. இவர்கள் கூறியுள்ள கருத்தின்படி இந்த நிலை ஜனநாயகத்திற்கே ஆபத்தானது என்ற எச்சரிக்கை மிகவும் கவனம் கொள்ளத்தக்கது. இந்திய அரசு நிர்வாகத்தின் தலைவராகிய குடியரசுத் தலைவர் இப்பிரச்சனையைக் கையில் எடுத்து இதற்கான சரியானத் தீர்வு காணவேண்டியது அவசியம். தமிழக ஆளுநர் ஒவ்வொரு மாவட்டமாகச் சென்று ஆய்வு செய்வது சரியாக இருக்கும்பொழுது, குடியரசுத் தலைவர் நம் ஜனநாயகத்தையே ஆட்டம் காணச்செய்யும் இந்த முக்கியமானப் பிரச்சனையில் ஆய்வு செய்து தீர்வு காணவேண்டியது அவருடைய முக்கியமான கடமை அல்லவா? இப்படிப்பட்ட நேரத்திலும் அவர் மௌனம் காப்பது சரியாகுமா?

பவள சங்கரி

தலையங்கம்

ஆதார் அட்டை பயன்பாட்டை வலியுறுத்துகின்ற இக்காலகட்டத்தில் சமீப காலங்களில் இது தொடர்பாக வரக்கூடிய செய்திகள் நன்மையளிக்கக் கூடியதாக இல்லை. ஆதார் அட்டையின் பாதுகாப்பு உறுதி செய்யப்பட்டிருக்கவில்லை என்றே கருதமுடிகின்றது. தற்போது இரண்டடுக்குப் பாதுகாப்பு செய்யப்பட்டிருப்பதாகவும், பாதுகாப்பான அட்டைகள் வழங்கப்படும் என்றும் அறிவிக்கப்பட்டாலும் இது காலங்கடந்த அறிவிப்பாகவேக் கொள்ளமுடிகின்றது. இந்தச் சூழலில் வங்கிக் கணக்குகளில் ஆதார் எண்ணை இணைக்கவேண்டும் என்று கட்டாயப்படுத்துவது மேலும் குழப்பம் விளைவிக்கக்கூடியதாகவே உள்ளது. கோவை மாவட்டத்தில் சமீப நாட்களில் வங்கிக் கணக்குகளிலிருந்து பல இலட்சம் உரூபாய் இந்த முறையில் கையாடல் செய்யப்பட்டதாக வங்கிகளே அறிவித்து அவரவர் கணக்குகளை பாதுகாப்பாக வைத்திருக்கும்படி அறிவுறுத்தியுள்ளதும் குறிப்பிடத்தக்கது. இது மோசமானதொரு பின் விளைவுகளை ஏற்படுத்தக்கூடியதாகும். இப்பொழுதெல்லாம் சர்வ சாதாரணமாக ஒருவரது கைபேசி எண்களைப்பெற்று வர்த்தக நடவடிக்கைகளை மேற்கொள்ள முடிகின்றது. அதே கைபேசி எண்ணையும் ஆதார் எண்ணையும் கொண்டு வங்கிக் கணக்குகளை எளிதில் கையாள முடியும் என்பதும் உண்மை. அமெரிக்கா மற்றும் ஐரோப்பிய நாடுகளில் தனி நபர்களின் உரிமைகள் பாதுகாக்கப்படும் வகையறிந்து நமது நாட்டிலும் அதற்கேற்ப ஆய்வு செய்து நடவடிக்கை எடுக்கப்பட வேண்டியது அவசியம். சமீபத்தில் ஒரு பிரபல நிறுவனத்தின் அனைத்துத் தொடர்புகளும் செயலிழக்கச் செய்யப்பட்டு பல இலட்சம் டாலர்கள் பரிவர்த்தனைக்குப் பிறகே அதனுடைய வணிக இரகசியங்கள் பாதுகாக்கப்பட்ட செய்திகள் கருத்தில் கொள்ளத்தக்கது. இதுபோன்று தவறுகள் மேலும் நடக்காதவாறு அரசு உடனடி நடவடிக்கை எடுத்து நமது ஆதார் எண்ணின் உள் குறியீடுகள் பாதுகாப்பிற்கான உறுதி அளிப்பதன் மூலமாக மக்களுக்கு நம்பிக்கை ஏற்படுத்த வேண்டியது அவசியம்.

பவள சங்கரி

தலையங்கம்

2017இல் உலகளவிலும், இந்தியாவிலும் நடந்துள்ள பல்வேறு நிகழ்வுகள் இந்த ஆண்டை மறக்க முடியாத ஆண்டாக ஆக்கியுள்ளது. உலகளவில் பார்க்கும்போது ரொஹீங்கியா அகதிகள் பிரச்சனை நமது கிழக்காசியாவிலும், அரேபிய நாடுகளில் இன்றும் நடைபெற்று வரும் போர்களும், சிரியாவிலிருந்து உலகளவில் சென்ற அகதிகள் பிரச்சனையும், அமெரிக்காவில் புதிய அதிபராகத் தேர்ந்தெடுக்கப்பட்டுள்ள டிரம்ப் அவர்களின், ‘அமெரிக்கா அமெரிக்கர்களுக்கே’ என்ற கொள்கையும், ஆறு நாடுகளைச் சார்ந்த இசுலாமிய மக்கள் தங்கள் நாட்டிற்குள் வருவதைத் தடை செய்தும், அமெரிக்காவில் அளிக்கப்படும் எச்.1பி விசாவும், உடன் வரும் வாழ்க்கைத் துணைவர்கள் பணிக்குச் செல்லத் தடை விதித்தும் வெளியிட்ட அறிவிப்புகளால் சீனா மற்றும் இந்தியாவைச் சார்ந்த தொழில் வல்லுநர்களின் நிலையும் கேள்விக்குறியாகியுள்ளன. சிரியா நாட்டின் அகதிகள் ஜெர்மனி, பிரான்சு போன்ற நாடுகளுக்குக் குடிபெயர்ந்தும், சில நாடுகள் அவர்களை ஏற்க மறுத்தும் கடலில் பல ஆயிரம் பேர் இறந்ததும், உருசியாவில் வரவிருக்கும் அதிபர் தேர்தலில் எதிர்க்கட்சித் தலைவரை தேர்தலில் போட்டியிடாமல் தடை செய்யப்பட்டும் உலக அரங்கில் இதுபோன்று பல்வேறு நிகழ்வுகள் குறிப்பிடும்படியாக நிகழ்ந்துள்ளன.

இதே ரொஹீங்கியா அகதிகளை இந்தியாவும் ஏற்க மறுத்தது. பொருளாதாரத்தில் நம் இந்தியப் பிரதமரின் அதிரடியான அறிவிப்புகளால் ஏற்பட்ட பொருளாதார தேக்க நிலையும் தமிழகத்தைப் பொருத்தவரை, முன்னாள் முதல்வர் ஜெயலலிதா மறைந்த இந்த ஓராண்டில் அண்ணா திராவிட முன்னேற்றக் கழகத்திலும், தமிழக அரசியலிலும் ஏற்பட்ட பல மாற்றங்களும் மிகுந்த விவாதங்களுக்குரியதாகும். பல ஆண்டுகளாக போக்குக் காட்டிவந்த நடிகர் திரு ரஜினிகாந்த் அரசியலுக்கு வருவதாகவும், தனிக்கட்சி தொடங்குவதாகவும், 234 தொகுதிகளிலும் போட்டியிடப்போவதாகவும் அறிவித்து, காலங்கடந்த முடிவெடுத்துள்ளார் என்றே சொல்லத் தோன்றுகிறது. ஏறு தழுவுவதற்காகத் தமிழக மாணவர்கள் தமிழ்நாடு முழுவதும் ஏற்படுத்திய போராட்டங்களும், தமிழ் இளைஞர்கள் கண்ணியமானவர்கள், கலாச்சாரத்திற்காகப் போராடுபவர்கள் என்று உலக அரங்கில் இந்த இளைஞர்களுக்கு மரியாதையை ஏற்படுத்திக்கொடுத்ததும் இந்த ஆண்டுதான். இதையொட்டி கர்நாடகாவில் எருது விழாவும் தொடங்கப்பட்டதும் இந்த ஆண்டுதான். புயலால் சென்னை பாதிக்கப்பட்டும், மீண்டும் குமரியில் புயல் வந்தபோதும் அரசு சரியான நடவடிக்கைகள் எடுக்காததால் பல ஆயிரம் மீனவத் தோழர்கள் மறைந்தும், பலர் காணாமல் போயிருப்பதால் இன்றும் தேடும் படலம் தொடர்ந்தவாறே உள்ள நிலையில் கேரள அரசின் மனிதாபிமான செயல்பாடுகளும் இந்த ஆண்டில் வரவேற்கத்தக்க வகையில் நடைபெற்றுள்ளன. வரும் புத்தாண்டில் அனைத்துத் தரப்பினருக்கும் மகிழ்வும், வளமான வாழ்வும் வழங்கக்கூடிய ஆண்டாக 2018 ஆம் ஆண்டு அமைய எல்லாம் வல்ல இறைவனைப் பிரார்த்திக்கின்ற அதே வேளையில் விளையாட்டுத் துறையில் பல்வேறு சாதனைகளை நிகழ்த்தியுள்ள இளைஞர்களைப் பாராட்டி வாழ்த்தி, உற்சாகப்படுத்துவோம்.

பவள சங்கரி

தலையங்கம்

பிரதமர் மோடி அவர்களுக்கு உளப்பூர்வமான வாழ்த்துகளை தெரிவித்துக்கொள்வோம். கட்சியையும் தாண்டி தனிப்பெரும் ஒரு தலைவர் மீது மக்கள் வைத்துள்ள நம்பிக்கையையே இந்த வெற்றி காட்டுகிறது. சென்ற முறை அடைந்ததைவிட குறைவான இடங்களைப் பெற்றாலும் இந்த வெற்றி பாராட்டுதலுக்குரியதே. பொருளாதார நடவடிக்கைகளுக்கு எதிர்ப்பாக மக்கள் வாக்களிப்பார்கள் என்ற மாயையை உடைத்தெறிந்து கிடைத்த இந்த வெற்றி மேலும் சிந்திக்கவைக்கத்தக்கதே. பல தொகுதிகளில் வாக்களிப்பட்ட நோட்டோ எண்ணிக்கை எதிர் கட்சியினருக்கு வாக்களிக்கப்பட்டிருந்தால் இந்த வெற்றி கிடைக்க வாய்ப்பில்லாமல் போயிருக்கலாம். தற்போது மேற்கொண்டுள்ள பொருளாதார நடவடிக்கைகளெல்லாம் சிற்சில மாற்றங்கள் செய்தாலே பொருளாதாரத்திற்கும், நாட்டு மக்களுக்கும் பயன் தருவதாக அமைவதால் மக்களின் நம்பிக்கையை மேலும் பெறக்கூடும். நோட்டோ வாக்களித்தவர்களின் நிலையை மாற்றி அவர்களுக்கு இந்தியப் பொருளாதாரத்தின்மீது நம்பிக்கை ஏற்படும் வகையில் செயல்பட்டால் அருதிப் பெரும்பான்மை மக்களின் ஆதரவு பி.ஜே.பி. கட்சிக்குக் கிடைக்கும் என்பதில் ஐயமில்லை. சமீபத்திய கருத்துக்கணிப்பின்படி, பெரும்பான்மையான மக்கள் 70 விழுக்காட்டிற்கும் அதிகமாக பிரதமர் மோடி அவர்களை தனிப்பெரும் தலைவராக ஏற்றுக்கொண்டுள்ளனர். 29 மாநிலங்களில் 19 மாநிலங்கள் பிரதமரின் ஆளுமையை ஏற்றுள்ளனர் என்பது எதிர்கால செயல்பாடுகளுக்கு ஊக்கம் அளிக்கக்கூடிய செய்தி என்பதில் ஐயமில்லை. வெற்றி அதிகரிக்கும் அதே வேளையில் பொறுப்புகளும் கூடுகிறது. எடுத்து வைக்கும் ஒவ்வொரு அடியிலும் மக்கள் நலம் சார்ந்ததாகவும், வாழ்வாதாரம் பாதிக்காமல், ஏற்றம் பெறும் வகையிலும் இருக்க வல்லமையின் உளப்பூர்வமான வாழ்த்துகளைத் தெரிவித்துக்கொள்கிறோம்!

எதிர்க்கட்சியான காங்கிரசிற்கும் 41.4% மக்கள் வாக்களித்துள்ளனர். எதிர்க்கட்சி என்பதாலேயே பிரதமர் கொண்டுவரும் அனைத்துத் திட்டங்களையும் எதிர்க்கவேண்டும் என்ற அவசியம் இல்லை. ஆக்கப்பூர்வமான எதிர்க்கட்சியாகச் செயல்படுவார்கள் என்ற நம்பிக்கையும் மக்கள் கொண்டுள்ளனர். தற்போது ஏற்பட்டிருக்கும் முதிர்ச்சியான செயல்பாடுகள் மக்களால் பெரிதும் வரவேற்கப்பட்டுள்ளதும் குறிப்பிடத்தக்கதாகும். இந்தியாவின் வளர்ச்சிக்கு ஆளும் கட்சியும், எதிர் கட்சியும் இணைந்து செயல்படுவதையே மக்கள் பெரிதும் எதிர்பார்த்து இருக்கின்றனர் என்பதையும் கருத்தில் கொள்ளவேண்டும்.

பவள சங்கரி

தலையங்கம்

வாஷிங்டனில் உள்ள உலக உணவு ஆய்வறிக்கை 2017 பட்டியலின்படி, பசியோடு வாழும்  119 நாடுகளில் இந்தியா 100வது இடத்தில் உள்ளது என்று வெளியிட்டுள்ளது. 2014 இல் 45வது இடத்தில் இருந்த இந்தியா இன்று 100வது இடத்தில் உள்ளது. என்ன கொடுமை இது ஆண்டவா ..  இதில் ஆச்சரியப்படவேண்டிய செய்தி ஈராக் (78வது) பங்களாதேஷ் (88) வட கொரியா (93) போன்ற நாடுகளைவிட மோசமான நிலையில் உள்ளது நம் இந்தியா என்பது மிக வேதனைக்குரிய செய்தி. இந்த 119 நாடுகளில் 50% நாடுகள் அபாயகரமான நிலையில் கொடுமையான பசிப்பிணியால் வாடுகிற நாடாம். இதிலும் இந்தியா மிக மோசமான இடத்தில் இருப்பதாகச் சொல்லப்பட்டுள்ளது. இந்தியாவில் உள்ள மொத்த மக்கள் தொகையில்  19 கோடி மக்கள் அன்றாடம் பசியால் வாடுகிறார்கள். இதில் நாள் ஒன்றுக்கு 3,000 குழந்தைகள் பட்டினி, சத்துணவு இன்மையால் இறக்கின்றனர். உலகளவில் இறக்கக்கூடிய குழந்தைகளில் 24% குழந்தைகள் இந்தியக் குழந்தைகளாம். இந்தியாவின் மொத்த உணவு உற்பத்தி 275.68 மில்லியன் டன் (2016 – 2017) இந்த அளவிற்கு உணவு தானியங்களின் விளைச்சல் இருந்தும் பசியால் இறக்கக்கூடியவர்களின் எண்ணிக்கை மிக அதிகமாக இருப்பது மிக வேதனையான விசயம். இந்தியாவில் தனி நபர் வருமானம் ஒரு இலட்சத்து மூவாயிரம் ரூபாயாக இருந்தும், அனைத்து வளங்களும் நிரம்பியிருந்தும் மக்கள் பசியால் வாடிக்கிடப்பதற்கு மூல காரணம் என்ன என்று தீவிரமாக அனைவரும் யோசிக்க வேண்டிய காலகட்டம் இது!

பவள சங்கரி

தலையங்கம்

இந்திய ரிசர்வ் வங்கி (RBI) பிட் காயின் மூலமாக நடத்தப்படும் வணிகத்தை ஒழுங்குபடுத்தவில்லை என்றும் அதன் மூலம் முதலீடு செய்வதற்கு எதிராக மக்களை எச்சரித்துள்ளபோதிலும், பிட் காயினின் விலை, 2017 ஆம் ஆண்டு நவம்பர் 30 ஆம் தேதி, 8,400 சதவீதமாக அதிகரித்துள்ளது. அதாவது 2013 ஏப்ரல் 28 ஆம் தேதி, இருந்த விலையான 7,304.24 ரூபாயிலிருந்து, தற்போது 6,26,396.07 ரூபாயாக உயர்ந்துள்ளது. இந்த கண்மூடித்தனமான விலை உயர்வே இந்திய முதலீட்டாளர்களிடையே ஒரு புதிய அதீதமான கவர்ச்சித் தன்மையை ஏற்படுத்தியுள்ளது என்பதில் ஆச்சரியமில்லை.

உண்மையில் பிட் காயின் பயன்படுத்தி எதையும் வாங்க முடியாது. குறைந்தபட்சம் இந்தியாவிலாவது, பிட்காயின் ஏற்றுக்கொள்வது குறைவாக இருந்தாலும் மக்கள் இதை ஒரு அனுமானத்தில் அன்றி பரிவர்த்தனைக் கருவியாகப் பயன்படுத்தும் நோக்கத்தில் வாங்குவதில்லையாம்..

பங்குச்சந்தையில் இறக்கம் ஏற்பட்டால், முதலீட்டு பணம் போனதுதான். மூலதனச் சந்தை, மியூசுவல் நிதி போன்றவைகள் பத்திரங்கள் மற்றும் பரிவர்த்தனை வாரியம் ஆகியவற்றால் ஒழுங்குபடுத்தப்படுகின்றன. இந்திய ஒழுங்குமுறை மற்றும் மேம்பாட்டு ஆணையம், இந்தியாவின் காப்பீட்டுத் துறை ஒழுங்குமுறை ஆணையம் (Securities and Exchange Board of India, the Insurance Regulatory and Development Authority of India) ரிசர்வ் வங்கி போன்றவைகள் வங்கி முறைமையை ஒழுங்குபடுத்துவது போன்று பிட் காயின்களுக்கு எந்த கண்காணிப்பும் இல்லை என்பதை மக்கள் கருத்தில் கொள்வது அவசியம். முதலீட்டாளர் ஏதேனும் ஒரு மோசடியான பிட்காயின் பரிமாற்றத்தில் முதலீடு செய்ய நேர்ந்தாலும் எந்தவொரு அரசாங்கத்தையும் அவர்கள் அணுகவோ, பணத்தைத் திரும்பப்பெறவோ முடியாது.

இந்திய அரசினால் தடையுத்தரவு போடப்பட்டால், இந்த பரிமாற்றங்கள் எந்த நேரமும் மூடப்பட வேண்டிய சூழலில் முதலீடு செய்த பணத்தை முழுமையாக இழக்கவும் நேரிடலாம் என்று வல்லுநர்கள் கூறுகிறார்கள்.

பவள சங்கரி

தலையங்கம்

இன்று பல ஊடகங்களிலும் பெரிதும் பேசப்பட்ட போக்குவரத்துக் கழகங்களின் பணிமனைகளும், பேருந்துகளும், மண்டல அலுவலகங்களும் தனித்தனியாக சுமாராக ஏழு போக்குவரத்துக் கழகங்கள் அடமானம் வைக்கப்பட்டு 2000 – 2500 கோடி உரூபாய்களை கடனாகப் பெற்றுள்ளன. சட்டப்படி பொது மக்களுக்குச் சொந்தமான இந்த போக்குவரத்துக் கழகங்கள் அடமானம் வைக்க முடியுமா? தொகை செலுத்தப்படாவிட்டால் அவற்றை கையகப்படுத்த சட்டத்தில் வழிமுறை உள்ளதா? தலைநகரில் உள்ள போக்குவரத்துக் கழகங்களும் இதில் அடங்கும்.

இரண்டு பேருந்துகள் நான்கு பேருந்துகள் வைத்திருக்கும் தனியார் நிறுவனத்தினர்கள் ஆண்டிற்கு ஒன்றோ அல்லது இரண்டாண்டிற்கு ஒன்றோ இலாபத்திலிருந்து புதிய வழித்தடங்களையும் வாங்கி இணைக்கமுடிவதையும் காணமுடிகிறது. சில பெரிய தனியார் நிறுவனங்கள் மிகச் சிறப்பாகச் செயல்படுகின்றன. இது மட்டும் எப்படி சாத்தியமாகிறது.

ஒரு பேருந்திற்கு ஒரு நாள் வருவாய் சுமாராக 13 முதல் 14,000 உரூபாய். ஒரு நாளைக்கு அரசு அங்கீகரித்துள்ள டீசல் செலவு 103 லிட்டருக்கு சுமாராக 7,000 உரூபாய். ஓட்டுநர், நடத்துனர், உதிரி பாகங்கள், அலுவலகச் செலவுகளுக்காக ஒரு பேருந்திற்கு 3,000 உரூபாய் செலவு. ஆக மொத்தம் ஒரு பேருந்திற்கு ஆகக்கூடிய செலவுகள் 10,000 உரூபாய். இதற்கு மேலே ஆயிரம் உரூபாய் எதிர்பாராத செலவினத்திற்கு ஒதுக்குவோம். ஆக ஒரு பேருந்திற்கு 2,000 முதல் 3,000 உரூபாய் வரை மீதமாகவேண்டும். தமிழ் நாட்டிலுள்ள பேருந்துகள் மொத்தம் சுமாராக 1 இலட்சம் என்று வைத்துக்கொண்டால் போக்குவரத்துக் கழகங்களின் ஒருநாள் வருமானம் சுமாராக 20 முதல் 30 கோடியாகும். ஆண்டு ஒன்றிற்கு 7,000 கோடி உரூபாய் வருமானம் வர இருக்கும்போது எதற்காக இந்த அடமானங்கள்? இது நிர்வாக சீர்கேடுகளால் ஏற்படும் பிரச்சனையா என்ற ஐயத்தையே தோற்றுவிக்கிறது. வைத்த அடமானப் பொருளை மீட்பதற்கு நிர்வாகம் என்ன நடவடிக்கை எடுத்துள்ளது? தனியார் போக்குவரத்து நிறுவனங்கள் தங்கள் வருமானத்தைப் பெருக்குவதற்கு கூரியர் பணியகங்களை நடத்துவதுபோல அரசு போக்குவரத்துக் கழகங்களும் துணைப்பணிகளிலும் ஈடுபடுவதால் எந்தவித செலவுமின்றி பல ஆயிரம் கோடிகளை வருமானமும் பார்க்கலாம் என்பதும் கண்கூடு.

பவள சங்கரி

தலையங்கம்

உலகளவில் நிலக்கரி அதிகமாக பயன்படுத்தும் நாடுகளில் இந்தியா 2வது இடத்தில் உள்ளது. முதல் இடத்தில் சீனா உள்ளது. நிலக்கரி அதிகமாக பயன்படுத்துவதால் கார்பன் ஆக்சைட் அதிகமாக வெளியேறுகிறது. இது நச்சுத்தன்மை வாய்ந்தது. இதனால் இந்தியாவில் மூன்று கோடியே 30 இலட்சம் மக்கள் பாதிப்படைந்துள்ளனர். முதல் இடத்தில் உள்ள சீனாவில் 9 கோடியே 90 இலட்சம் பேர் பாதிப்படைந்துள்ளனர். இதனால் நுரையீரல் சம்பந்தமான பல்வேறு வியாதிகள் அதிகமாகின்றன. விழித்துக்கொண்ட சீன அரசு எடுத்துக்கொண்ட கட்டுப்பாடு நடவடிக்கைகளால் இந்த பாதிப்பு 50% குறைந்துள்ளது. இதே நேரத்தில் இந்தியாவில் இந்த பாதிப்பு மேலும் 30% அதிகரித்துள்ளது. இதனால் காற்று மாசடைகிறது. தில்லி, நொய்டா போன்ற பகுதிகளில் காற்று மாசடைந்திருப்பதற்கு இதுவும் ஒரு முக்கிய காரணம். இந்தப் பிரச்சனையை சரிசெய்ய மத்திய, மாநில அரசுகள் தக்க நடவடிக்கைகள் எடுக்கவேண்டும்.

பவள சங்கரி

நீரிழிவு (சக்கரை வியாதி) நோயாளிகளின் எண்ணிக்கையில் முதன்மையான பத்து நாடுகள் பட்டியலில் இந்தியா முதலிடம் வகிக்கிறது என்கிறது சர்வதேச நீரிழிவு கூட்டமைப்பு வெளியிட்டுள்ள அறிக்கை . இந்தியாவில் 70 மில்லியன் பேர் நீரிழிவு நோயால் பாதிக்கப்பட்டுள்ளனர்.

இன்று, 199.5 மில்லியன் பாதிக்கப்பட்டவர்களில் பாதிக்கும் மேல் பெண்கள் .  2040 இல் 313 மில்லியன் பெண்கள் சக்கரை நோயினால் பாதிக்கப்படக்கூடுமாம்.. ஆண்கள்தான் சக்கரை வியாதியால் அதிகமாக பாதிக்கப்படுகிறார்கள் என்ற பழைய கதையெல்லாம் மலையேறிவிட்டது. ஆம் இந்த இடைவெளி மிக விரைவாக மறைந்து வருகிறது. அதிகரித்து வரும் உடல் பருமன், அமைதியற்ற வாழ்க்கை முறை, ஆரோக்கியமற்ற உணவுகளை உட்கொள்வது போன்ற காரணங்களால் நகர்ப்புற பெண்கள் அதிக அளவில் பாதிக்கப்படுகின்றனர், கிராமப்புற பெண்களும் விதிவிலக்கல்ல!

இந்த எண்ணிக்கை மேலும் கூடுவதற்கான வாய்ப்புகளும் அதிகமாக உள்ளதால் உடனடி நடவடிக்கை அவசியமாகிறது என்கிறது அந்த ஆய்வறிக்கை.

பவள சங்கரி

தலையங்கம்

உயர் மதிப்பு நோட்டு செல்லாது என்று அறிவித்தலும், விற்பனை மற்றும் சேவை வரி (ஜிஎஸ்டி) போன்றவற்றை மக்கள் பெருவாரியாக எதிர்ப்பதாக எதிர் கட்சிகள் பிரச்சாரம் செய்தாலும் மக்கள் பிரதமர் மோடியின் நடவடிக்கைகளுக்கு முழு ஆதரவு தெரிவித்துள்ளதாக எக்கனாமிக் டைம்ஸ் எடுத்த கருத்துக்கணிப்பு வெளியிட்டுள்ளது. 38% பேர் முழு ஆதரவும், 30% பேர் நன்மைகளும் தீமைகளும் இருப்பதாகவும், 32% பேர் மட்டுமே எதிர்ப்பதாகவும் இதனால் வேலையிழப்பு ஏற்பட்டதாகக் கூறுவது தற்காலிகமானதே என்றும் பெருவாரியாகத் தெரிவித்துள்ளனர். குறைந்த சதவிகிதத்தினரே இந்த வேலையின்மை பிரச்சனை நிரந்தரமானது என்றும் தெரிவித்துள்ளனர். 2000 ரூபாய் நோட்டை முடக்குவதற்கும் மக்கள் ஆதரவு தெரிவித்துள்ளனர். தேர்தலில் இதனால் மக்களின் அதிருப்தி என்பது மாயத்தோற்றமாகத் தெரிவதாகப் புலப்படுகிறது.

பவள சங்கரி

தலையங்கம்

இந்திய பொருளாதார வளர்ச்சியில் தற்போது ஏற்பட்டுள்ள தேக்க நிலை தற்காலிகமானதுதான் என்று உலக வங்கித் தலைவர் ஜிம் யாங் கிம் கூறியுள்ளது சமாதானம் ஏற்படுத்துவதாக இருந்தாலும் சமீப காலாண்டுகளில் இந்திய பொருளாதாரத்தில் மந்த நிலை உருவாகியுள்ளது வருத்தத்திற்குரிய விசயமாகவே உள்ளது. இந்த தேக்க நிலைக்குக் காரணமாக உலக வங்கியின் தலைவர் ஜிம் யாங் கிம் கூறுவதும் தேசிய அளவில் புதிய வரி விதிப்பினால் ஏற்பட்ட குழப்பம்தான்.

ஜிஎஸ்டி இந்திய பொருளாதாரத்தில் சாதகமான விளைவுகளை உருவாக்கும் என்ற நம்பிக்கையையும் கிம் விதைத்துள்ளார். பொதுவாக அனைத்துத் தரப்பினருக்கும் இது சிறந்த திட்டம் என்று அறிவிக்கப்பட்டுள்ளபோதும், சில குறைபாடுகளை நிவர்த்தி செய்யாத நிலையில் இன்று பிரச்சனைக்குரியதாகவே உள்ளது. வணிக உலகில் ஏமாற்று வேலை செய்பவர்களுக்கு ஜிஎஸ்டி பெரும் சவாலாக உள்ளது என்பது ஒரு நேர் மறையான சிந்தனை.

வியாபாரிகள் ஜிஎஸ்டி வரி விதிப்பிற்கு முன்னால் வருடம் ஒரு முறை கணக்கு செலுத்தினால் போதும் என்ற நிலை இருந்தது. ஆனால் தற்போது மாதம் ஒரு முறை கணக்கு செலுத்த வேண்டியதாக உள்ளது. இது பழக்கத்திற்கு வருவதற்கு சற்று சிரமம் மேற்கொள்ள வேண்டியுள்ளது. சில தொழில்களுக்கு மிக அதிகப்படியான வரிவிதிப்புகள் உள்ளதை கவனம் கொண்டு சரிசெய்ய வேண்டும். பெட்ரோலியப் பொருட்களையும் ஜிஎஸ்டி வரம்பிற்குள் கொண்டுவர வேண்டும். இந்திய ஜிடிபி ஆண்டு வளர்ச்சி விகிதம் ஏப்ரல் -ஜூன் காலாண்டில் 5.7 சதவீதமாக உள்ளது.

இந்தியாவின் பொருளாதார வளர்ச்சி முதல் காலாண்டில் குறைந்துள்ளதற்கான காரணம் ஜிஎஸ்டி சட்டத்துக்கு தயாராவதற்கு ஏற்பட்ட குழப்பம்தான் என்று கொள்வோமானால் இந்தப் பிரச்சனையை தற்காலிகமானதாகக் கொள்ளலாம்.ஆனால் இந்திய பொருளாதாரத்தில் இந்தச் சட்டம் மிகப் பெரிய அளவில் சாதகமான விளைவுகளை உருவாக்கும் என்ற எதிர்பார்ப்பில் இருந்தபோது கடந்த ஆண்டு கொண்டுவரப்பட்ட பணமதிப்பு நீக்கம் மற்றும் ஜிஎஸ்டி சட்டம் ஆகிய இரண்டும்தான் மந்த நிலைக்கு காரணம் என எதிர்க்கட்சிகளும், பொருளாதார அறிஞர்களும் குற்றம் சுமத்தி வருவது சிந்திக்கத்தக்கது.

இந்தியா இரட்டை இலக்க பொருளாதார வளர்ச்சியை எட்டுவது சாத்தியமாகுமா என்ற வினா இன்று பல தரப்பிலும் எழுப்பப்பட்டுள்ள இன்றைய நிலையில், இந்தியாவின் மொத்த உள்நாட்டு உற்பத்தியை (GDP) அதிகரிப்பதன் மூலமாக இந்தியாவில் வளர்ச்சித் தரத்தை அதிகரிக்க வேண்டுமானால் , முக்கியமான தளங்களில் பெண்களின் பங்களிப்பு அதிகமாக வேண்டும் என்று உலக பொருளாதார கருத்துக்களம் கருத்து தெரிவித்துள்ளது.

பொருளாதாரத்தில் பெண்கள் அதிக அளவில் பங்கு பெற்றால் அது உண்மை ஆகலாம் என்ற நம்பிக்கையையும் ஏற்படுத்துகிறது. கடந்த தசாப்தத்தில் உலகிலேயே வேகமாக வளர்ந்து வரும் இரண்டாவது நாடு என்ற நிலையை பொருளாதார வளர்ச்சியின் மூலம் இந்தியா வென்றது.

பாலின இடைவெளியைப் பொருத்தவரை உலகிலேயே மிக மோசமான ஒன்றாக நம் இந்தியா இருப்பதும் கண்கூடு. உலகளாவிய பாலியல் இடைவெளி கருத்துக்கணிப்பின் அறிக்கையில் இந்தியா மொத்த 144 நாடுகளில் 108 ஆவது இடத்தில் உள்ளது. உண்மையில் இந்த இடைவெளி மேலும் கூடுதலாக இருப்பதையே வேறு சில கருத்துக் கணிப்புகள் கூறுகின்றன.

ஒரு ஆய்வறிக்கையின்படி இந்தியாவில் 66 சதவீதம் பெண்களுக்கு தங்கள் பணிகளுக்கான ஊதியமே செலுத்தப்படுவதில்லை, இதில் ஆண்கள் 12 சதவீதம் மட்டுமே. மேலும் இந்த அறிக்கையில், தொழிற்சங்கங்களில் பங்கேற்பு, சட்டமன்ற உறுப்பினர்கள், மூத்த அதிகாரிகள், மேலாளர்கள், தொழில் மற்றும் தொழில் நுட்பத்துறை போன்றவற்றில் பெண்களின் விகிதம் மிகக்குறைந்த அளவிலேயே உள்ளது. இந்திய பொருளாதாரத்தில் பெண்களின் பங்களிப்பு என்பது பெரும் சவால்களையே சந்தித்துக்கொண்டிருக்கிறது.

பெண்கள் பணியிடங்களில் சந்திக்கும் முக்கிய சவால் என்றால் அது குழந்தைப்பேறு காலங்களில்தான். இந்தப் பிரச்சனையைத் தீர்க்க இந்த ஆண்டு மார்ச் மாதத்தில் மகப்பேறு விடுப்புச் சட்டத்தில் அரசு சில மாற்றுத் திட்டங்களையும் ஏற்படுத்தியுள்ளது. முதல் இரண்டு குழந்தைகளுக்கு ஆறு மாதங்களுக்கு ஊதியத்துடன் மகப்பேறு விடுப்பு காலம் அதிகரிக்கப்பட்டுள்ளது. இந்தச் சட்டம் பிரசவத்திற்குப் பிறகும் பெண்கள் வேலைக்குத் திரும்புவதை ஊக்குவிக்கும். இதை கவனத்தில் எடுத்துக் கொண்ட உலக வங்கியின் சமீபத்திய வணிக வேலைவாய்ப்பு அறிக்கையும் இந்த புதிய சட்டம் ஒட்டுமொத்த வேலை தரத்தையும் மேம்படுத்தியுள்ளது என்று கூறியுள்ளதும் குறிப்பிடத்தக்கது.

தற்போது இந்தியாவில் பெரிய நிறுவனங்களின் உயர் பதவிகளில் மிகக் குறைந்த அளவிலேயே பெண்கள் உள்ளனர். நிறுவனங்களின் உயர் மட்ட பதவிகளிலும் பெண்களின் பிரதிநிதித்துவம் இருப்பதால் நிர்வாகத்தின் முன்னேற்றத்திற்கு வழிவகுக்கும் என்பதும் சமீபத்திய கார்ப்பரேட் ஆளுமை பற்றிய உதய கோடக் அறிக்கை மூலம் அறியமுடிகிறது.

பவள சங்கரி

மன அழுத்தம் என்பது உலகளாவிய அளவில் விழிப்புணர்வை ஏற்படுத்தவேண்டிய பெரும் பிரச்சனையாக உள்ளது. உலக சுகாதார அமைப்பின் சமீபத்திய மதிப்பீட்டின்படி, உலகெங்கிலும் 300 மில்லியனுக்கும் அதிகமானோர் மனச்சோர்வினால் பாதிக்கப்பட்டுள்ளனர். இது 2005 மற்றும் 2015 க்கு இடையிலான காலகட்டத்தில் 18% அதிகரித்துள்ளது.

இந்தியாவில், மனநல சுகாதார மற்றும் நரம்பியல் ஆய்வாளர்கள் (NIMHANS) நடத்திய, இந்தியாவின் தேசிய மனநல சுகாதார ஆய்வில், 2015-16, கணக்கெடுப்பு செய்யப்பட்ட மக்கள் தொகையில் 13.7% மக்கள் மன நோய்களின் பாதிப்படைந்திருப்பதை வெளியிட்டுள்ளது. மன அழுத்தம், பதட்டம் கோளாறுகள் உள்ளிட்ட பொது மனநல குறைபாடுகள் நம் இந்திய மக்கள் தொகையில் கிட்டத்தட்ட 10% பேரை பாதிக்கின்றன அதாவது இந்தியாவில் 20 பேரில் 1 நபர் மன அழுத்தத்தால் பாதிக்கப்பட்டுள்ளனர். நம் நாட்டில் கிராமப்புறங்களில் மிக அதிகமாக இருக்கிறது.
தேசிய மனநல சுகாதார திட்டத்தின் படி, ஒவ்வொரு முக்கியமான சுகாதார மையத்திலும் அடிப்படை மனநல பராமரிப்பை வழங்க வேண்டும் .
பல கிராமப்புற பகுதிகளில், மனநோய்க்கு எதிரான மூட நம்பிக்கைகள் ஒரு கடுமையான சமூகக் களங்கமாகி உள்ளது என்பதை NIMHANS ஆய்வு உட்பட பல ஆய்வுகளில் ஆவணப்படுத்தப்பட்டுள்ளது.கிராமப்புறங்களில் மன நோய் என்பது “தீய ஆத்மாவின் உடைமை” என்று கருதப்படுகிறது. இந்த தீய ஆவியை அகற்றுவதற்காக, மன நோயாளிகளை குடும்ப உறுப்பினர்கள் பாரம்பரிய வைத்தியர்களையோ அல்லது மத குருமார்களையோ நம்பியிருக்கிறார்கள். மனக் கோளாறுகள் பற்றிய விழிப்புணர்வு இல்லாததால், இந்தப் பிரச்சனை மேலும் கடுமையாகிறது. மன நோயாளிகளிடம் சமூகத்தில் பாகுபாடு சிந்தைகள் அதிகமாக இருப்பதால் பெரும்பாலான குடும்பங்கள் மன நோயாளிகளை மற்றவர் முன்னிலையில் சொல்லவே தயங்கி, மறைக்கவும் முயல்கிறார்கள்.

இந்தியாவில் பயிற்சி பெற்ற மன நோய் மருத்துவர்களின் எண்ணிக்கையில் பற்றாக்குறை அதிகமாகவே உள்ளது. 1,00,000 மக்கள் தொகையில் 0.2 உளவியல் நிபுணர்கள் மட்டுமே உள்ளனர். கிராமிய மற்றும் நகர்ப்புற இந்தியா முழுவதும் இந்தப் பிரச்சனை உள்ளது. மனநல குறைபாடுகளுடன் வாழும் பல தனிநபர்கள் சிகிச்சை அளிக்கப்படாத நிலையில், அதற்குரிய மனநல சுகாதார உள்கட்டமைப்புகளும் சரிவர இல்லாததால் பொது சுகாதார பிரச்சனைகளாலும் பாதிப்பு ஏற்படுகிறது. ஏழை குடும்பங்களைச் சேர்ந்த மன நோயாளிகள் பொருளாதார சிக்கலாலும் சரியான சிகிச்சை பெற முடியாமல் அவதிக்கு உள்ளாகிறார்கள். வெகு தொலைவில் இருக்கும் அரசு மருத்துவ மையங்களுக்கு அடிக்கடி செல்ல வேண்டிய சூழலில் போக்குவரத்துச் செலவைக்கூட அவர்கள் சமாளிக்க முடியாமல் போவதும் முக்கிய காரணமாகிவிடுகிறது. அரசும், தொண்டு நிறுவனங்களும் இந்தப்பிரச்சனையில் கவனம் செலுத்தி தீர்வு காண முயலவேண்டும்.