வல்லமை

Blog

  • நைவுறும் நினைவுகள்

    எஸ்.ரவி 

    மனிதர் வாழ்வில் நிகழ்வன எல்லாம்

    நினைவெனும் நன்னூல் நிலையத்துள்ளே

    படிந்து படிந்து படிமங்க ளாகும்.!

    கற்றதும், கேட்டதும், படித்ததும், பட்டதும்,

    குறிப்பே டுகளாய்க் குவிந்து கிடக்கும்!

    குவியலுக் குள்ளே குடைந்து தேடினால்,

    மடிதவழ்ந் திருந்த மழலை நாட்களின்

    “அம்மா” வாசனை அங்கே இருக்கும்!

    ஒண்ணாம் வகுப்பில் ஒன்றாய்ப் படித்த

    கண்ணம்மாவும், கிருஷ்ணமூர்த்தியும்,

    ஓரம்  ஒன்றில் ஒளிந்து கிடப்பர்!

    ஐந்தாம் வகுப்பில், தீபாவளிக்கு

    அடம் பிடித்து வாங்கிய டெரிலின் சட்டை

    பச்சை நிறத்தில் பசுமையாய் இருக்கும்.

    கவனமாய்ச் செய்த கணக்குப் பாடம்,

    மனனம் செய்த செய்யுள், ஸ்லோகம்,

    கல்லூரி நாட்களின் கலாட்டா வாழ்க்கை

    எல்லாம் அங்கே இறைந்து கிடக்கும்.

    கண்ணையும், கருத்தையும் கவர்ந்து இழுத்த

    யாரோ ஒருத்தியின் ஓரப் பார்வையும்,

    காதல்  பதித்த  காலடித்  தடங்களும்

    திருமண தினமும்,  முத்லிர வளித்த

    புதுஅனு பவமும்,  தேனாய் இனித்த

    இல்லற வாழ்வும், இணைந்து கிடக்கும்,

    மக்களைப் பெற்(று)அவர் மழலை உகந்து,

    அட்மிஷனுக்கு அலைந்து திரிந்து,

    ஆளாக்கி விட்டதில் அலுத்துக் களைத்து

    முதுமை நெருங்கிய மூளைக் குள்ளே,

    பாசம்,  நட்பு, பகைமை, அன்பு,

    துவேஷம், துரோகம், கருணை, காதல்,

    எனப்பல அலைகள்; எத்தனை புயல்கள்!

     

    இத்தனை சுமைகள் அழுத்திய தாலோ,

    சரிவர ஒழுங்கு செய்யாமை யாலோ,

    பக்கங்கள் சிலசற்று பழுப்பேறி மங்கின!

    மறதிக் கரையான் மற்றதைத் தின்றது

    கவிதை வரிகள்   கண்ணீர் பட்டுக்

    கரைந்து போயின! காலனுக் காகக்

    காத்துக் கிடந்த காலப் போக்கில்

    எஞ்சி இருந்த பதிவுகள் எல்லாம்

    தடம் புரண்டங்கே தடுமாறிப் போயின!

    புத்தகம், வித்தகம், தத்துவம் எல்லாம்

    அர்த்த மிழந்திடும் அந்நேர த்தில்

    ‘நி’னைவுகள் ‘நைவதால் நிச்சயமாக

    வார்த்தைகள் சற்றே வரிசை கலைந்து

    கோர்வை தவறிக் குலைந்து போகும்!

     

    ஆனால் என்ன? ஆன்மா மட்டும்

    ஆண்டவனோடு அமைதி கொள்கையில்,

    நினைவுக ளெல்லம் நீறாய்ப் போகும்!

    படத்துக்கு நன்றி

     http://alzheimers.about.com/library/blbrain.htm

    Share

  • தணிக்கை என்றொரு முட்டுக்கட்டை – 29

    இன்னம்பூரான்

    இந்தத் தொடரை விட்ட குறை எட்டு மாதங்களுக்கு முன், ஒரு வாசகரின் பதிலுக்குக் காத்திருந்ததால். ஐயர் வரும் வரை அமாவாசை காத்திருப்பதில்லையே! தற்காலத்திய ஆடிட்டர் ஜெனெரல் திரு. விநோத் ராய் அவர்கள் மே மாதம் வேலையிலிருந்து ஓய்வு பெறுவார். புதிய ஆடிட்டர் ஜெனெரல் நியமனம், பிரதமர் கையில். இது தான் முப்பது-நாற்பது வருடங்களாக நடந்து வருகிறது. தணிக்கைத் துறையிலிருந்து தலைமையை தேர்வு செய்வதில்லை. எல்லாம் ஐ.ஏ.எஸ். தலைகள். திரு. விநோத் ராயும் அங்கிருந்து வந்தவர் தான். ஆனால் பாருங்கள். தணிக்கைத்துறை, தன்னுடைய சீரிய மரபுகள், உகந்த நடைமுறைகள், வைக்கோல் போரில் ஒளித்து வைத்த ஊசியை தேடிப் பிடித்து விடும் திறன், விருப்பு/வெறுப்புக்கு அப்பாற்பட்ட தன்மை, அச்சம் தவிர்த்த மனப்பான்மை ஆகியவை மூலம் அவரைப் போன்ற, காலம் சென்ற திரு. சி.ஜி.சோமையா அவர்களைப் போன்ற உயர் ஐ.ஏ.எஸ். அதிகாரிகளை தன்வசம் இழுத்துக்கொண்டது. தற்காலம் ஊடகமெங்கும், உலகளாவிய வகையில் இந்திய தணிக்கைத் துறையின் சாதனைகள் புகழப்படுகின்றன. ஐ.நா. அமைப்புகள் எல்லாவற்றிலும், இத்துறையினர் பேரும், புகழுமாக, பணி செய்கிறார்கள். மத்திய அரசின் அசரீரி வாக்கு ஆகிய அமைச்சரொருவர், ‘ஒருவர் தலைமை’ வேண்டாம். ஒரு ஆடிட் குழு அமைக்கலாமே என்று பட்டம் விட்டுப் பார்த்தார். துரிதமாக, அதை வாபஸ் பெற்றார். மற்றொரு அழகிய பெருமாள் அமைச்சர், ‘அதிகாரிகள் என்ன? நானே ஆடிட்டுக்கு அஞ்சுகிறேன்!’ என்று பூச்சாண்டி காண்பித்து விட்டு, எள்ளல் செய்கிறார்.

    எதற்கும், இங்கு நினைவூட்ட வேண்டியது,  மே 30, 1949 அன்று, அரசியல் சாஸனம் வகுக்கும் அவையில் டாக்டர் அம்பேத்கார் அவர்கள், ‘…இந்திய அரசியல் சாசனத்தின் முதல் முக்கிய பதவியாக ஆடிட்டர் ஜெனெரல் பதவியைக் கருதுகிறேன்…நீதிபதிகளின் ஸ்தானத்தை விட இது மேலும் பொறுப்பு மிகுந்த பதவி.. நீதித்துறையை விட இதை முக்கியமாகக் கருதுகிறேன்..‘என்றார், என்பதே. பல சான்றோர்கள் அதை வழி மொழிந்தார்கள். தணிக்கை மட்டுமல்ல; அரசின் வரவு/செலவு விஷயங்களை, ஆதியோடந்தமாக அலச வேண்டியதால், Comptroller and Auditor General என்ற நாமகரணம் தேவை என்றார், திரு.டி.டி.கிருஷ்ணமாச்சாரி. அதையெல்லாம் முற்றும் புறக்கணித்து விட்டார்கள். அரசு-தணிக்கை மோதலை கண்டு மனம் வருந்தி, ஓய்வு பெற்ற சில தணிக்கை அதிகாரிகள் ஜனாதிபதியிடம், ஒரு மேன்மை குழு மூலம்தான் அடுத்தத் தலைவரை தேர்ந்தெடுக்கவேண்டும் என்று விண்ணப்பித்துள்ளார்கள். அதில் என்னுடைய கருத்து, அமெரிக்கா/இங்கிலாந்து போல, ஓய்வு பெறும் ஆடிட்டர் ஜெனரலும் அந்தக் குழுவில் இருக்க வேண்டும் என்பதே. என்ன செய்யப்போகிறார்களோ! தெரியவில்லை, பாரதமாதாவே! நல்லதே நடக்கட்டும்.

    அடுத்த செய்தி விசித்திரமானது. சில அரசுத் துறைகள், ‘நாங்கள் செய்யும் வேலைகளை முன்னாலேயே பரிசீலித்து, தணிக்கைத்துறை நற்சான்று கொடுக்கட்டும்.’ என்று வேண்டுகோள் விடுத்துள்ளனர். ரோடு போடப்போறோம். ஒப்பந்தம் வரையுமுன், எங்கள் திட்டவட்டத்தைப் பாருங்கள் என்கிறார்கள், ஒரு துறையினர். நாங்கள் டெண்டர் திறகும்போது, வந்து சாட்சி இருங்கள் என்கிறது, மற்றொரு துறை. திரு.கேம்கா என்ற யோக்கியமான ஐ,ஏ.எஸ். அதிகாரியை வறுத்தெடுக்கும் ஹரியானா அரசு, நிலபுலன்கள் மதிப்பை தணிக்கைத்துறையே போடட்டும் என்று சொல்கிறது.  இது ஒரு பகடியாகத்தான் தோன்றுகிறது. என்னுடைய அனுபவத்தில் தணிக்கைத்துறை முன்கூட்டியே அரிதான சில சமயங்களில் அரசை அன்புக் கட்டளையாக எச்சரித்தது உண்டு. ஆனால், ‘நாங்கள் செய்யும் வேலைகளை முன்னாலேயே பரிசீலித்து, தணிக்கைத்துறை நற்சான்று கொடுக்கட்டும்.’ என்று கோஷமிடுவது ஒரு தகிடுதத்தமே அல்லது பகடியே. வாசகர்களின் விருப்பத்தைப் பொறுத்து, அது பற்றி, விவரமாக அலசி, அடுத்த கட்டுரை அமையலாம். சமைக்கும் முன் ருசி பார்ப்பது எப்படி?

    சித்திரத்துக்கு நன்றி: http://2.bp.blogspot.com/-QuT8xa5bgrc/UNGPnQOl_xI/AAAAAAAAFCY/_0hUWBnS_DY/s400/auditor.jpg

    Share

  • தமிழ்நாடு விசைத்தறி சம்மேளனத்தின் சார்பாக மகாசபைக் கூட்டம்

    பத்திரிக்கைச்செய்தி

    21.04.13 ஞாயிற்றுக்கிழமை  தமிழ்நாடு விசைத்தறி சம்மேளனத்தின் சார்பாக மகாசபைக் கூட்டம்

    தமிழ்நாட்டிலுள்ள ஜவுளி உற்பத்தியாளர்கள் சுமார் 90 சதவீதத்தினர் பருத்தி நூலை வைத்துதான் நெசவு செயது வருகிறார்கள். ஆனால் கடந்த காலங்களில் விசைத்தறித் துறை பல்வேறு இன்னல்களை சந்தித்து வருகிறது.  அதன்மூலமாக தமிழ்நாட்டிலுள்ள அனைத்து ஜவுளித் தொழிலாளர்களையும் ஒருங்கிணைத்து ஒரு அமைப்பாகக் கொண்டுவர வேண்டுமென்று அதன் தலைவர் எம்.எஸ். மதிவாணன் அவர்கள் கருத்து தெரிவித்தார்.

    சமீபகாலங்களில் பல இன்னல்களை விசைத்தறி தொழிலாளர்களும் அதை சார்ந்த மற்ற தொழிலாளா;களும் சந்தித்த போதிலும் அவ்வப்போது ஜவுளித் துறை செயலர் மற்றும் அமைச்சரை அணுகி எங்களது குறைகளை கோரிக்கையாக சமர்ப்பித்து இருந்தோம்.  ஆனால், குறிப்பாக ஆறு மாதங்களாக  அமுல்படுத்தப்படாமல் இருந்த 11 ரக ஒதுக்கீட:டுச் சட்டத்தை காரணம் காட்டி விசைத்தறித் தொழிலாளர்களை அதிகாரிகள் அச்சுறுத்தியும் கைது செய்து விடுவோம் என்று கூறி வருவதனால் விசைத்தறியாளர்கள் உற்பத்தி செய்ய முடியாமல் மிகவும் பயந்து உள்ளார்கள்.  இந்த பதினோரு ரக சட்டத்தில் வேஸ்டி, சேலை, துண்டு, சர்டிங் போன்ற முக்கிய ரகங்கள் இடம் பெற்று உள்ளது.  விசைத்தறியில் இந்த ரகங்கள் எல்லாம்  அதிகமாக தயாரிக்கப்பட்டு உலகம் முழுவதும் அனுப்பப்படுகிறது.  ரகங்களின் உற்பத்தியை விசைத்தறியில் உற்பத்தி செய்யக்கூடாது என்றால் அதை ஈடு செய்வதற்கு கைத்தறியினால் முடியாதது மட்டுமல்லாமல் கைத்தறியில் செய்தால் அதனுடைய விலை மிகவும் அதிகமாகிவிடும்.  தேவைக்கேற்றாற்போல் துணிகள் கிடைக்காது. இதனை உணர்ந்து மத்திய மாநில அரசுகள் இந்த சட்டத்தை முழுமையாக செயல்படுத்துவதை தாமதித்து வந்தது.  ஆனால் சில இடங்களில் சில அதிகாரிகள் விசைத்தறிக் கூடங்களுக்குச் ;சென்று சட்டத்தை அறிமுகப்படுத்தியுள்ளோம் என்று சொல்லி அச்சுறுத்தி வருகிறார்கள்.  மேலும் காட் சட்டத்தின்படி உற்பத்தி செய்வதற்கு தடை இல்லை என்று இருக்கிறது.  வெளிநாட்டிலிருந்து ஒதுக்கப்பட்ட ரகங்களை இறக்குமதி செய்யலாம் என்றும் அரசு சட்டத்திலும், ஒப்பந்தத்திலும் கூறப்படுகிறது.  அப்படியிருக்கும்போது இந்திய நெசவாளர்கள் மற்றும் பொதுமக்களும் பெருமளவில் உபயோகப்படுத்தப்டும் ரகங்களை நெய்யக்கூடாது  இதனால் இந்த சட்டத்தை அமல்படுத்துவதை உடனடியாக நிறுத்த வேண்டுமென்று தமிழக அரசைக் கேட்டுக் கொள்கிறோம்.

    அவர் மேலும் கருத்து தெரிவிக்கையில்,  கைத்தறி ரக ஒதுக்கீடு சட்டம் என்ற பெயரில் ஒரு சட்டத்தை பல ஆண்டுகளுக்கு முன்பு மத்திய அரசு இயற்றியது.  அதன்மூலம் விசைத்தறியில் சாதாரண மக்கள் அணியும் துணிகளான வேஸ்டி, சேலை, துண்டு, சர்டிங் போன்ற ரகங்களை நெய்தால் விசைத்தறியாளர்கள் மீது நடவடிக்கைக எடுக்கப்பட்டு கடுங்காவல் தண்டனை வழங்கப்படும் என்று சட்டம் கூறுகிறது.  இதனை எதிர்த்து உயர்நீதி மன்றத்தில்  வழக்கு தொடுத்து இந்த சட்டத்தை தடை செய்தோம்.   பின்பு உச்சநீதி மன்றத்திற்கு இந்த வழக்கு கொண்டு செல்லப்பட்டு இந்த சட்டத்தை எந்த ஒரு தொழிலும் பாதிக்காமல் நடவடிக்கை எடுக்கலாம் என்றும் இதற்கு ஒரு ஆலோசனைக்குழுவை அமைத்து நடவடிக்கை எடுக்கப்படும் என்று உச்சநீதி மன்றம் கூறியது.  ஆனால் இதற்காக அமைக்கப்பட்ட ஆலோசனைக் குழுவில் விசைத்தறியாளர்கள் யாரும் சேர்க்கப்படவில்லை.  அவர்களுடைய பாதிப்பை மத்திய அரசு சிறிதும் கவனம் கொள்ள வில்லை.  எங்களின் வேண்டுகோளுக்கிணங்க இந்த சட்டத்தை அமல்படுத்துவதை நிறுத்தி வைத்திருந்தார்கள்.

    ..2..
    எந்த மாநிலத்திலும் இந்த சட்டம் அமல்படுத்தப்படுவதில்லை.  ஆனால், தற்போது கோவை, திருப்பூர் ஈரோடு ஆகிய மாவட்டங்களில் சில அதிகாரிகள் விசைத்தறிப் பட்டறைக்கு வந்து விசைத்தறியாளர்களை மிரட்டி அச்சுறுத்தி வழக்கு தொடுத்து வருகிறார்கள்.  இந்த சட்டத்தை முழுமையாக அமல்படுத்தினால் தமிழ்நாட்டிலுள்ள 3 இலட்சம் தறிகளினுடைய உற்பத்தி நிறுத்தப்பட்டு விடும்.  லட்சக்கணக்கான தொழிலாளர்கள் வேலையிழப்பார்கள்.  பெருமளவில் உற்பத்தி குறையும்.

    ஆகையினால் இந்த சட்டத்தை அமல்படுத்துவதை நிறுத்தி வைக்குமாறும் சம்பந்தப்பட்ட அதிகாரிகளுக்கு அறிவுறுத்துமாறும் ஜவுளித்துறை அமைச்சர், செயலர் மற்றும் மாண்புமிகு புரட்சித்தலைவி அம்மா அவர்களுக்கும் எங்களது கோரிக்கையினை பரிசீலிக்குமாறும மனுவினை சமர்ப்பித்து உள்ளோம் என்று தமிழ் நாடு விசைத்தறி சம்மேளத்தின் தலைவா; எம்.எஸ். மதிவாணன் தெரிவித்தார்..

    இருப்பினும் மென்மேலும் விசைத்தறி நெசவாளர்கள் அச்சுறுத்தப்படுவதினால் நமது கோரிக்கையினை அரசாங்கத்திற்கு தெரிவிப்பது மட்டுமின்றி விசைத்தறி தொழிலுக்கு நல்ல திட்டங்களை வழங்கி காப்பாற்றுமாறும் மத்திய மற்றும் மாநில அரசுகளுக்கு எங்களது கோரிக்கையினை தெரிவிக்க உள்ளோம்.  இதன் தொடர்ச்சியாக வருகின்ற 21.04.13ம் தேதி ஞாயிற்றுக்கிழமை அன்று சோமனூரில் அமைந்துள்ள லட்சுமி மகால் கல்யாண மண்டபத்தில் மாலை 3.00 மணிக்கு தமிழ்நாடு விசைத்தறி சம்மேளனத்தின் மகாசபைக் கூட்டத்தினைக் கூட்ட உள்ளோம்.  இதுசமயம் தமிழ்நாட்டிலுள்ள பல்வேறு மாவட்டங்களிலிருந்தும், விசைத்தறி நெசவாளர்கள் திரளாக கலந்து கொள்ள உள்ளார்கள் என்றும் தலைவர் எம்.எஸ். மதிவாணன் தெரிவித்தார்..

     

    Share

  • இந்த வார வல்லமையாளர்!

    திவாகர்

    வல்லமைக் குழுவின் அன்பு உள்ளங்களுக்கு விஜய வருடத்தில் அடியெடுத்து வைத்திருக்கும் நன்னாளில் புது வருட வாழ்த்துகளை அன்போடு தெரிவித்துக் கொள்கிறேன். இந்தப் புது வருடம் பெயருக்கேற்றாற்போல் எல்லா வெற்றிகளையும் நமக்குத் தரவேண்டும். தந்தே ஆகவேண்டும் (அப்படித் தராவிட்டால் அடுத்த அறுபது வருடம் கழித்து வரும் இந்தப் பெயரை எடுத்து விடுவோம்)

    பொதுவாக ஒவ்வொரு புதுவருடமும், தமிழ்நாட்டில் எப்படியோ, இந்த ஆந்திர தேசத்தில் மட்டும் ஊருக்கு ஊர் பஞ்சாங்கம் படிப்பார்கள். இந்த வருடத்தில் ஒவ்வொரு நட்சத்திரங்களுக்கும் ஆரூடம் சொல்லி, அந்த நட்சத்திரங்களில் பிறந்தவர்களுக்கு லாபம் எவ்வளவு கிரயம் எத்தனை என்பதைக் கூட கணக்கிட்டுச் சொல்வார்கள். தேச சுபிட்சத்தைப் பற்றியும், ஒவ்வொரு சமயம் சில அரசியல் வாதிகளைப் பற்றியும் கூட ஆரூடங்கள் வருவதுண்டு. தேச சுபிட்சம் என வரும்போது, பொய்த்துப் போகும் மழையைப் பற்றியும் அல்லது அதீதமான புயல் மழை போன்றவற்றினால் பாதிப்புகளைக் கூட கணக்கிட்டு சொல்லும்போது சில சமயம் எனக்கே வியப்பாக இருக்கும். இதுவெல்லாம் இப்படித்தான் என எப்படித்தான் கணிக்கிறார்களோ. ஆனால் பல சமயங்களில் இவர்கள் கணக்குப்படிதான் நடக்கிறது என்பதையும் சமபவங்கள் நிகழ்கையில் நமக்குக் காணக் கிடைக்கின்றன என்பதையும் நாம் சொல்லிவிடவேண்டும்.

    அதே போல் மனிதர்களுக்கான ஆரூடச்செய்திகளும் கூட இவர்கள் சொல்படிதான் நடக்கின்றனவா என்ற மாயை எனக்கு அவ்வப்போது தோன்றுவதுண்டு. ஆரூடங்கள் பொய்ப்பதில்லை என்பதை சில சமயம் நானே உணர்ந்திருக்கும்போதும், பல சமயங்களில் இந்த ஆரூடத்தினால் நன்மைகள் விளைகின்றனவா என்றும் யோசிப்பதுண்டு. நாளை நடப்பது என்ன என்பது இப்போதே தெரிந்தால் வாழ்வின் சுவாரசியம் போய்விடாதா என என்னுள்ளேயே கேள்விகள் கேட்டுக் கொள்வதுண்டு. ஆனாலும் இந்த ஆரூடங்கள் ஒருவிதத்தில் நல்லதைத்தான் செய்கின்றன. அதாவது மனிதனது வாழ்வில் நம்பிக்கை மேலும் பெருகவும், இப்படி ஒருவேளை நிகழ்காலத்தில் நடந்து விட்டால் தன்னைத் தானே அவன் அதற்கேற்றபடி தயார் செய்து கொள்ளவும் நிச்சயம் உதவுகின்றன. நடப்பதும் நடக்க இருப்பதும் நம் கையில் இல்லை என்ற தத்துவ நிலையைக் கூட இந்த ஆரூடங்கள் உணர்த்துவதாக நான் நினைத்துக் கொள்கின்றேன். வாழ்வின் மீது நம்பிக்கையைப் பலப்படுத்துகின்றன என்றும் சொல்லலாம்.இந்த ஒன்றே போதுமல்லவா ஆரூடத்தினால் ஏற்படும் பலன்கள் உண்டு என்பதற்கு?

    வல்லமையில் பலவாரங்களாக இப்படிப்பட்ட வாரபலன்களை திருமதி காயத்ரி பாலசுப்பிரமணியம் அவர்கள் எழுதிவருகின்றார்கள் இந்தப் புதிய வருடம் நல்ல நல்ல பலன்களை எல்லாருக்கும் அள்ளி வழங்குமா என்று அவர்தான் கணித்துச் சொல்லவேண்டும் என்று கேட்டுக் கொண்டாலும் இத்தனை வாரங்களாக வாசகர்கள் மனதில் வாழ்வின் மீது ஒரு நம்பிக்கையை. வளர்த்து வந்திருக்கும் இவரை எத்தனை பாராட்டினாலும் தகும். ஆகையினால் வல்லமை குழுவினர் ஒரு மனதாக திருமதி காயத்ரி பாலசுப்பிரமணியம் அவர்களை இந்த வார வல்ல்மையாளராக சிறப்பிக்கிறோம்.

    வல்லமையாளர் விருது என்பது வல்லமையில் இது ஐம்பதாவது வாரமாக வழங்கப்படும் விருதாக இந்த வார விருது அமைகின்றதும். அதுவும் இந்தப் புதிய வருடமான விஜய வருட ஆரம்ப வாரத்தில் நிகழ்வதால் இந்த விருதுக்கு ஏதோ ஒரு சிறப்பு பெருமையும் சேர்ந்து கொள்வதாக எனக்குள் ஒரு பிரமை. எப்படி இருந்தாலும் இந்த விருதை வாங்கியவருக்கு என் வாழ்த்துக்கள்.

    கடைசி பாரா: பூந்தலைச் சிறுகோல் – முனைவர் பானுமதி.

    சிறு வயதில் தாய் (செவிலி) பொன்னால் ஆன கிண்ணத்தில் பால் சோற்றை ஏந்திக் கொண்டு குழந்தைக்கு ஊட்டுகிறாள். அந்தக் குழந்தை உண்ண மறுத்து கால் கொலுசு ஒலிக்க இங்குமங்கும் ஓடி ஒளிந்து கொள்கிறது.. மூச்சிறைக்கத் தோட்டத்தைச் சுற்றிச் சுற்றி வருகிறது. அக்குழந்தைக்கே மூச்சிறைக்கும் போது அத்தாய்க்கு எப்படி இருக்கும். பொறுமையாக அத்தாய் அக்குழந்தையின் பின்னால் ஓடுகிறாள். அப்போதும் உண்ண மறுக்கும் குழந்தையை அவள் அடிக்கவில்லை. மாறாக அடிப்பதாக நடிக்கிறாள். அதுவும் எப்படி? பூவால் சுற்றப்பட்ட ஒரு கோலைக் கையால் ஓங்கிக் காட்டி. ஆம் ஒரு வேளை அக்கோல் அக்குழந்தையின் மேல் பட்டு விட்டால் வலித்து விடுமே என்பதால் அக்கோலைப் பூவால் சுற்றியிருந்தாளாம். இதைச் செய்தவள் பத்து மாதம் சுமந்து பெற்றெடுத்த தாயல்ல. செவிலித்தாய். இக்கால வழக்கில் கூறவேண்டுமானால் வேலைக்காரப் பெண்மணி.

    “புடைப்பின் சுற்றும் பூந் தலைச் சிறு கோல்,‘உண்’ என்று ஓக்குபு பிழைப்ப, தெண் நீர்

    முத்து அரிப் பொற்சிலம்பு ஒலிப்பத் தத்துற்று,
    அரி நரைக் கூந்தற் செம் முது செவிலியர்
    பரி மெலிந்து ஒழிய, பந்தர் ஓடி,
    ஏவல் மறுக்கும் சிறு விளையாட்டி”

    Share

  • மரத்துப்போன மனம்.

    ராஜ்ப்ரியன்

    மஞ்சு எழுந்திரிம்மா என சரளா காபி டம்பளருடன் அறைக்குள் வந்து தன் ஒரே மகளை எழுப்பிக்கொண்டு இருந்தார்.

    தூக்கக் கலக்கத்திலேயே என்னம்மா ?.

    ஆறு மணியாச்சி எழுந்திருடா.

    எங்கம்மா போகப்போறன் இன்னும் கொஞ்ச நேரம் தூங்கிக்கறன்.

    இன்னைக்கு உன்ன பொண்ணு பாக்க வர்றாங்க செல்லம்.

    அதைக் கேட்டதும் தூக்கம் கலைந்து மஞ்சுவின் மனம் தவிக்க ஆரம்பித்தது. முதல் முறையா பொண்ணு பாக்க வர்றாங்க. பக்கத்து வீட்டு அக்காவ புடிக்கலன்னு மாப்பிள்ள சொன்னதைப்போல என்னை சொல்லக்கூடாது கடவுளே என மனதில் வேண்டிக்கொண்டே எழுந்து உட்கார்ந்தாள். அவள் கையில் காபி டம்ளரை தந்த சரளா சீக்கிரம் எழுந்து குளிச்சிட்டு அந்த மஞ்சள் கலர் புடவைய கட்டிக்கடா.

    என்னம்மா திடீர்ன்னு புடவை கட்டச்சொல்ற. நான் தான் இதுவரைக்கும் புடவை கட்டனதுயில்லன்னு உனக்கு தெரியும்மில்ல.

    உனக்கு புடவை கட்ட தெரியலன்னு பொண்ணு பாக்க வர்றவங்களுக்கு தெரிஞ்சதுன்னா அசிங்கமாயிடும். எதிர்த்த வீட்டு கவிதாவ வரச்சொல்றன் அவ வந்து உன்னை ரெடிப்பண்ணுவா எனச்சொல்லிவிட்டு வெளியே போனார். ஹாலுக்கு வந்து சோபாவில் அமர்ந்தபடி காபி குடித்துவிட்டு பாத்ரூம் சென்ற மஞ்சுவுக்கு குளிக்கும் போது மார்கழி மாத குளிர்ந்த நீரும் சுடு நீர் போல் இருந்தது. குளித்துவிட்டு தன் அறைக்குள் நுழைந்தபோது கட்டிலில் அமர்ந்திருந்த கவிதா எவ்ளோ நேரம்டீ குளிப்ப?.

    பயமாயிருக்கு அண்ணி.

    என்ன பயம்.

    பொண்ணு பாக்க வர்றவங்களுக்கு என்ன புடிக்கும்மில்ல.

    என்னடீ கேள்வியிது.

    சொல்லுங்க அண்ணீ.

    உனக்கென்னடீ. நல்ல கலரா அழகா கொழுக்கு மொழுக்குன்னு இருக்கற. எல்லாம்மே அளவா ஜம்முனு இருக்கு.

    ச்சீ……..

    என்னடீ ச்சீ. ஏரியா பசங்க உன்ன பாத்து ஜொள்ளு விடறானுங்க. அதவிட முக்கியம் நீ பி.எஸ்.சி பீ.எட் படிச்சியிருக்கற உன்ன கொத்திம்போவ நான் நீன்னு போட்டி போடுவானுங்க. நீ என்னடீன்னா புடிக்குமான்னு கேள்வி கேட்கற.

    அதில்ல பக்கத்து வீட்லயிருக்கற மலர் அக்காவ பொண்ணு பாக்க வர்றவங்கயெல்லாம் வேணாம் வேணாம்ன்னிட்டு போறாங்க என்னையும் அப்படி சொல்லிட்டா?.

    அவள பாக்க வர்றவங்க நகை அதிகமா கேட்கறாங்க. அத அவுங்களாள போட முடியல அதனால இழுத்தும் போவுது. உனக்கென்ன அழகிருக்கு, படிப்பிருக்கு. அதோட உங்கப்பா ஹெட்மாஸ்டர். வசதியா இருக்கிங்க. அப்பறம்மென்ன வர்றவனுக்கு உன்ன புடிக்கும் சும்மா ரெடியாகு எனச்சொல்ல மஞ்சு அவசர அவசரமாக பாவடை, ஜாக்கெட் அணிந்துக்கொண்டு நின்றாள். கவிதா அவளுக்கு அழகாக புடவை கட்டிவிடவும் வெளியே ஆட்டோ வந்து நிற்கும் சத்தம் கேட்கவும் சரியாக இருந்தது,

    மாப்பிள்ளை வீட்டுக்காரங்க வந்துட்டாங்கம்மா என மஞ்சுவின் அப்பா சோமசுந்தரம் குரல் தந்துவிட்டு வாசலுக்கு சென்றார். சரளாவும் வெளியே வந்து வாங்க வாங்க என புன்னகையிடன் அழைத்து வந்து சோபாவில் உட்காரவைத்தார்கள். இவர் தான் மாப்பிள்ளை. பேரு குமரன். இது அவரோட அப்பா மோகன், அது அவுங்க அம்மா என புரோக்கர் மணி அறிமுகப்படுத்தியவர் மஞ்சுவின் அப்பாவையும், அம்மாவையும் மாப்பிள்ளை வீட்டாருக்கு அறிமுகப்படுத்தினார்.

    காபி எடுத்துவாம்மா என தன் மனைவியிடம் மெல்லிய குரலில் சோமசுந்தரம் சொல்ல மஞ்சு மனதில் பயத்தோடும், வெட்கத்தோடு காபி டம்பளர்களை எடுத்துக்கொண்டு அன்ன நடையோடு வந்து மாப்பிள்ளை வீட்டாருக்கு தரும்போது அடிக்கண்ணால் மாப்பிள்ளையை ஒரு பார்வை பார்த்தால். மனதில் ஒரு குறுகுறுப்பு. எல்லோருக்கும் வணக்கம் வைத்தாள். இரண்டு பேரும் வெட்கப்படாம பாத்துக்குங்க கட்டிக்கிட்டு வாழ போறவங்க நீங்க தான் என புரோக்கர் மணி சொன்னதும் குமரன் மெல்ல அவளை பார்த்தான். அதிகம் உயரமும் இல்லாமல், மொத்தென்று இல்லாமல் அம்சமாக இருந்தாள் மஞ்சு.

    பையன் சாப்ட்வேர் இன்ஜினியர் மாசம் முப்பதாயிரம் சம்பாதிக்கறாரு. கம்பெனியிலயிருந்து வெளிநாடு அனுப்புவாங்க. அப்ப பையன் சம்பளம் டபுள் மடங்காகிடும் என்ற மணி, பையனோட அப்பா முன்சிபால்டியில ஹெல்த் இன்ஸ்பெக்டரா இருக்காரு. ஒரு பையன், ஒரு பொண்ணு. பொண்ணு கல்யாணமாகி பெங்களுரூல இருக்கு எனச்சொன்னவர் சற்று இடைவெளி விட்டு இரண்டு குடும்பத்தாரும் சரின்னா ஜாதக பொருத்தம் பாக்கலாம் என்றார். தனது மகளின் ஜாதகத்தைத் தந்த சோமசுந்தரம் நீங்க பையன் ஜாதகத்தை தாங்க எங்க குடும்ப ஜோசியர்க்கிட்ட கேட்டுட்டு சொல்றோம் என வாங்கிக்கொண்டார்.

    மாப்பிள்ளை வீட்டார் போனதும் மஞ்சுவிடம் மாப்பிள்ளைய பாத்தியா உனக்கு புடிச்சியிருக்கா என சரளா பலமுறை கேட்டும் நீயும் அப்பாவும் பாத்து ஓ.கே சொன்னா எனக்கும் ஓ.கே ம்மா என்றாள். மழுப்பாம சொல்லுடீ என கவிதா கேட்டும் கடைசி வரை பதில் சொல்லவேயில்லை. அன்றைய இரவு மஞ்சுவுக்கு தூக்கம் போனது. அழகா தான் இருந்தான் என அவள் மனம் குளிற தொடங்கியது. அப்படியே தூங்கி போனால். அடுத்த இரண்டாவது நாள் ஜாதகம் பொருந்தமில்லைமின்னு ஜோசியர் சொன்னாரு என மனைவியிடம் சோமசுந்தரம் சொன்னது அறைக்குள் இருந்த மஞ்சுவின் காதில் விழுந்தபோது அவளின் மனம் வெறுமையானது.

    ஜாதகம் பொருந்தி வரலயாம் அண்ணி.

    கல்யாணம்ன்னா அப்படித்தாண்டீ. ஜாகதம் பொருந்தி வந்தாத்தான் அதுக்கப்பறம் பேச ஆரம்பிப்பாங்க என்றாள் கவிதா.

    கட்டிலில் படுத்திருந்த மஞ்சுவின் விம்மி புடைத்திருந்த அவளின் உடல் பாகத்தை ஒரு கை தீண்டீயது. அவளின் இடுப்பில் விளையாடியது. கூச்சத்தில் நெளிந்த இடுப்பிலிருந்து மேல் நோக்கி அந்த கை செல்ல சடாரென முழித்துக்கொண்டாள். வெட்கத்தில் அவளின் முகத்தில் ஒரு நாணம். மீண்டும் படுத்தபோது உடல் சூட்டில் உறக்கம் வரவில்லை. தூக்கம் வராமல் கட்டிலில் புரண்டுகிடந்தாள். காலை அறையை விட்டு எழுந்து வெளியே வந்தவள் அம்மா இன்னைக்கு வெள்ளிக்கிழமை சாயந்தரம் கவிதா அண்ணியோட நான் கோயிலுக்கு போயிட்டு வந்துடறன்ம்மா.

    இன்னைக்கு சாயந்தரம் உன்ன பொண்ணு பாக்க வர்றாங்கடா. நீ கோயிலுக்கு போனா லேட்டாகிடும் அடுத்தவாரம் போய்க்கடாம்மா.

    மஞ்சுவின் மனதில் மீண்டும் ஒரு குறுகுறுப்பு. காமாட்சி தாயே இப்பவாவுது ஜாதகம் பொருந்தி வரனும் என வேண்டிக்கொண்டால். எதிர்பார்த்தப்படி சாயந்தரம் பெண் பார்க்க ஒரு கூட்டம் வந்திருந்தது. பையன் பேரு சரவணன் என புரோக்கர் மணி அறிமுகப்படுத்த காபி டம்பளர்களுடன் வந்த மஞ்சு மாப்பிள்ளையை பார்த்தவளின் மனதில் முன்ன பார்த்தவனை விட இவன் சுமார் தான் என மனம் கணக்கிட்டது. ஜாதகம் பொருத்தம் வந்தா தாங்க அடுத்து பேச முடியும் என சோமசுந்தரம் சொன்னதும் மாப்பிள்ளையுடன் வந்திருந்தவர் நாங்க ஜாதகம் பாத்துட்டோம் 12 பொருத்ததுல 9 பொருத்தம் வருது. எங்களுக்கு பொண்ணு புடிச்சியிருக்கு. நீங்க ஜாதகம் பாத்துட்டு மணிக்கிட்ட சொல்லிவிடுங்க நாங்க கிளம்பறோம் என கிளம்பினார்கள்.

    ஒரு வாரம் கடந்த நிலையில் அப்பா ஜாதகம் பாக்கறன்னு சொன்னாரு. என்னாச்சி மாப்பிள்ளை வீட்டார்க்கிட்ட என்ன சொன்னாருன்னு தெரியலயே என மனம் கேள்வி மேல் கேள்வி கேட்டது. என்னடீயாச்சி என கவிதா கேட்டபோது தெரியல அண்ணீ.

    செவ்வாய்கிழமை மஞ்சுவும், கவிதாவும் கோயிலை சுத்தி வந்தவர்கள் பிரகாரத்தில் அமரும் போது ஜாதகம் பொருந்தி வந்துச்சாம் ஆனா பையன் குடும்பம் வசதியா இல்லை. என் பொண்ண நான் செல்லம்மா வளர்த்துயிருக்கன். அங்க போய் கஸ்டப்படக்கூடாதுன்னு சொல்லி உங்கப்பா வேணாம்ன்னிட்டாருன்னு சொன்னதா உங்கம்மா சொன்னாங்க என கவிதா சொன்னதை மஞ்சு அமைதியாக கேட்டுக்கொண்டாலும் அவள் முகம் சோகத்தில் இருப்பதை பார்த்து ஏய் இதுக்கெல்லாம் கவலைப்படாதடீ. கல்யாணம் தள்ளி தள்ளி போகுதுன்னா நல்ல புருஷன் அமைவான்னு அர்த்தம்.

    அத விடுங்க அண்ணி என சோகமாக சொல்ல கவிதா தன் மாமியார் பற்றி புகார் சொல்ல ஆரம்பித்தாள்.

    அதற்கடுத்து வந்த ஒரு ஞாயிற்றுக்கிழமை காலையில் ஒரு போலிஸ்கார மாப்பிள்ளையும், மாலை லெக்சரர் மாப்பிள்ளையும் வந்தார்கள். இப்படி வாரத்தில் இரண்டு, மூன்று முறை துணிக்கடையில் பொம்மைக்கு துணி மாத்தி மாத்தி கொண்டு வந்து நிறுத்தி வைப்பது போல மஞ்சுவுக்கு புடவையை கட்டி காபி டம்பளரை கையில் தந்து அனுப்புவதும் பெண் பார்க்க வந்தவர்கள் முன்னால் உட்காருவதும் இவன் தான் மாப்பிள்ளை என அறிமுகப்படுத்தும் போது மரக்கட்டையாக அமர்ந்திருந்தாள். பக்கத்து வீட்டு அக்கா மாதிரி ராசியில்லாதவன்னு முத்திரை குத்தப்போறாங்க என மனம் புழுங்கி இரவில் தன் அறையில் வெளியே கேட்க முடியாத சத்தத்தில் அழ தொடங்கியிருந்தாள்.

    அண்ணீ அண்ணீ என கவிதாவை சுற்றி வரும் மஞ்சு இப்போதுயெல்லாம் கவிதாவிடமும் சரியாக பேசுவதில்லை. இது கவிதாவுக்கும் புரிந்தேயிருந்தது. நல்ல குடும்பம்மா, மாப்பிள்ளையோட கூட பொறந்தவங்க இல்லாம, வசதியா, அழகா, கவர்மெண்ட் வேலையில இருக்கனம்ன்னு ஒருத்தன்கிட்டயே இவ்வளவும் பாத்தா எப்படி கிடைக்கும். இது இவுங்களுக்கு புரியமாட்டேன்குது. பாவம் அவ என மனதில் நினைத்துக்கொண்டாள் கவிதா.

    அன்றும் அப்படித்தான், மஞ்சுவின் வீட்டில் பெண் பார்க்கும் படலம் நடந்தது. மாப்பிள்ளை அருண் செவப்பாகயில்லை என்றாலும் மாநிறமாக அழகாக இருந்தான். மஞ்சு காபி எடுத்துவாம்மா என்றதும் முகத்தில் எந்தவித உணர்ச்சியும் இல்லாமல் காபி தட்டை எடுத்து வந்தாள். பொண்ண நல்லா பாத்துக்குங்க தம்பி. அப்பறம் சரியா பாக்கலன்னு சொல்லக்கூடாது என உடன் வந்த ஒரு பெருசு சொல்ல அருண் அப்போதும் முகத்தில் எந்தவித உணர்ச்சியும் காட்டாமல் தன் முன் நீட்டிய காபி டம்பளரை எடுக்கும் போது ஒரு முறை பார்த்தான். அந்தப்பெண் தன்னை பார்த்தாளா பார்க்கவில்லையா என்பதை அந்த முகத்தில் அருணால் அறிய முடியவில்லை.

    நீயும் பாத்துக்கம்மா என்றதும் வெறுப்பில் இருந்த மஞ்சு கையில் வைத்திருந்த காபி தட்டை எதிரில் இருந்த கண்ணாடி டீப்பா மேல் டமால் என போட சூடான காபி எல்லோர் மீதும் பட்டு தெரிக்க எல்லோரும் அதிர்ச்சியுடன் சடாரென எழுந்திருக்க மஞ்சு கண்ணீருடன் அப்படியே ரூம்க்குள் ஓடிப்போய் கதவை சாத்திவிட்டாள். அருண் உடன் வந்த உறவுக்காரர்களோ, புடிக்கலன்னா புடிக்கலன்னு சொல்ல வேண்டியதுதானே எதுக்கு பைத்தியம் மாதிரி நடந்துக்குது என பேசியபடி கிளம்பி சென்றனர்.

    அதிர்ச்சியான சோமசுந்தரமும், சரளாவும் மஞ்சுவின் அறைக்குள் சென்று என்னாச்சி என கெஞ்சி, கொஞ்சி கேட்டும் எதுவும் பதில் சொல்லவில்லை உம்மென மூடி வைத்திருந்த ஜன்னலையே பார்த்துக்கொண்டுயிருந்தாள். பயந்துப்போய் குடும்ப டாக்டர் மிருதளாவிடம் அழைத்து சென்றனர். மஞ்சுவை செக் பண்ணியவர் உடம்புக்கு ஒன்னும்மில்ல. அவ மனசுல ஏதோ பாரம்மிருக்கு. நான் கேட்டன் எதுவும் சொல்லல. சைக்காடிஸ்ட் டாக்டர் அட்ரஸ் தர்றன் அவுங்களைப்போய் பாருங்க. இதுக்கு அவுங்க ட்ரீட்மெண்ட் தர்றது தான் பெஸ்ட்.

    என்ன டாக்டர் என் பொண்ணு மெண்டல்ன்னு சொல்றிங்களா என லேசான கோபத்தோடு சோமு கேட்க நான் அப்படி சொல்லல. இது மனசு சம்மந்தப்பட்டது. மருந்து மாத்திரையால குணப்படுத்த முடியாது. சைக்காடிஸ்ட்ன்னா ஏன் பயப்படறிங்க. பயப்படமா போங்க. நான் விஷயத்த சொல்லிடறன் நீங்க போய் பாருங்க என அட்ரஸ் தந்தார். மனநல மருத்துவர் டாக்டர் புனிதாவை சந்தித்தனர். நீங்க வெளியில இருங்க என சோமுவையும், சரளாவையும் வெளியே அனுப்பிவிட்டு மஞ்சுவுடன் பேச தொடங்கினார்.

    உன் வயசு பொண்ணுங்க எல்லாம் ஜாலியா இருக்கும்போது நீ மட்டும் ஏன் டல்லா இருக்கற ?.

    எனக்கு யாரையும் புடிக்கல மேடம்.

    அதனால தான் கோயில்ல ஆடுகளுக்கு மஞ்சத்தண்ணி தெளிக்கற மாதிரி பொண்ணு பாக்க வந்தவங்க மேல நீ தண்ணி தெளிச்சியா?.

    அதைக் கேட்டு லேசாக சிரித்த மஞ்சு. அவுங்க மேல கோபம்மில்ல. எங்கப்பா மேல தான் கோபம். அத அவர் மேல காட்ட முடியல. அதனால தான் அவுங்க மேல காட்ட வேண்டியதா போச்சி.

    அப்பா மேல அப்படியென்ன கோபம் ?.

    பொண்ணு பாக்க இதுவரை அப்பா இருபது மாப்பிளைங்கள வரவச்சிட்டாரு. சும்மா எங்கிட்ட புடிச்சியிருக்கான்னு கேட்கறாரு. ஆனா அவர் விருப்பத்துக்கு ஏத்த மாதிரி இருக்காறான்னு தான் பாக்கறாரு. ஓவ்வொரு முறை இவர் தான் மாப்பிள்ளை இவர் தான் மாப்பிள்ளைன்னு சொல்லும் போது எனக்கு கூசுது. நிறைய மாப்பிள்ளை வந்துட்டு வந்துட்டு போறதால நானும் பக்கத்து வீட்டு அக்கா மாதிரி ராசியில்லாதவளோன்னு நினைக்க தோணுது. கோயிலுக்கு, மார்க்கெட் போகும்போது தெரிஞ்சவங்க மாப்பிள்ளை வீட்டுக்காரங்க வந்தாங்களே என்ன ஆச்சின்னு கேட்கும் போது பதில் சொல்ல முடியல. அப்பாவுக்கு பிடிச்சா அம்மாவுக்கு புடிக்கல, அம்மாவுக்கு புடிச்சா அப்பாவுக்கு புடிக்கல. இரண்டு பேருக்கும் புடிச்சா ஜாதகம் சரியில்ல, பையன் வீட்ல வசதி குறைவு, சம்பளம் குறைவா வாங்கறான்னு ஏதோ ஒரு காரணம் சொல்லி தட்டி கழிக்கறாங்க. அந்த கோபத்தல தான் அப்படி நடந்துக்கிட்டன் என்றவள் ரொம்ப செல்லமா வளக்கறன்னு வெளியில நண்பர்கள உருவாக்கிக்க கூட விடல. மனசுல இருக்கறத பகிர்ந்துக்கற அளவுக்கு கூட நெருக்கமான நண்பர்கள் இல்லாம போய்ட்டாங்க என கண்ணீர் விட.

    அழுது முடிக்கட்டும் என காத்திருந்த டாக்டர் புனிதா அழுகை சத்தம் குறைந்ததும், மஞ்சு உன்ன மாதிரி தான் இன்னைக்கு நிறைய பொண்ணுங்க மனசுல பாரத்தோட இருக்காங்க. அப்பா அம்மா சொன்னா கட்டிக்கறன்னு சொல்லதா. வாழப்போறது அவுங்கயில்ல, நீ தான் வாழப்போற. பொண்ணு பாக்க வர்றங்கக்கிட்ட உங்க அப்பா அம்மா பேசறத விட நீ பேசு இரண்டு பேருக்கும் ஒத்துப்போனா மட்டும் கல்யாணத்துக்கு சரின்னு சொல்லு. கல்யாணம் பண்ணிக்க பணம் முக்கியம்மில்ல. வாழ்க்கைக்கு முக்கிய தேவை புரிதல் தான். அடுத்த முறை பொண்ணு பாக்க யார் வந்தாலும் தெளிவா இரு. வாழ்க்கைங்கறது இப்பத்தான் தொடங்குது. அவுங்க அப்படி சொல்லுவாங்க, இவுங்க இப்படி சொல்லுவாங்கன்னு நினைச்சி கவலைப்படாத. நீங்க உங்களுக்காக வாழப்போறிங்க. அதனால ஒரு பிரச்சனை வந்தா தைரியமா எதிர்க்கொள்ளனும். அப்பத்தான் இந்த உலகத்தல வாழ முடியும். படிச்சியிருக்க எதையும் யோசிச்சி முற்போக்கா சிந்திச்சிப்பாரு. அப்பா அம்மா சொல்றத அப்படியே ஏத்துக்காத. அதுக்காக அவுங்க சொல்றத உதாசினமும் படுத்தாத. நீ பேசலன்னா யாருக்கும் எதுவும் தெரியாது. பேசு அப்பத்தான் உன் மனசுல இருக்கறது தெரியும்.

    பேச விடமாட்டேங்கிறாங்களே?.

    உடனே பேசவிடுவாங்களா. பெண்கள அடக்கி வச்சியிருக்கற சமூகத்தல உடனே பேசவிட்டுடுவாங்களா என்ன?. பேச முயற்சி செய். வுhழ்க்கை வாழப்போறது நீ தான் அதனால நீ தான் முடிவு எடுக்கனும் என்றபோது மஞ்சுவின் மனதில் ஒரு நம்பிக்கை வந்திருந்தது. அது முகத்தில் தெரிந்ததும் மஞ்சுவின் அப்பாவையும் அம்மாவையும் உள்ளே அழைத்தார்.

    என்ன டாக்டர் பிரச்சனை ?.

    நீங்க தான் பிரச்சனை. பொண்ணு மேல ரொம்ப பாசம் வச்சியிருக்கிங்க. அது எல்லா பெற்றோர்களும் செய்யறதுதான். ஆனா நீங்க உங்க பொண்ணு வாழ்க்கைய பத்தி அளவுக்கு அதிகமா பயப்படறிங்க. உங்க மேல அவுங்க வச்சியிருக்கற மரியாதைய, பாசத்த நீங்க தவற பயன்படுத்தறிங்க. வாரத்துக்கு இரண்டு, மூனு பேரை அழைச்சி வந்து இவர் தான் மாப்பிள்ளைன்னு அறிமுகப்படுத்தினா எப்படிங்க ஒரு பொண்ணால சகிச்சிக்க முடியும். உங்க பொண்ணு மனசுல என்னயிருக்குன்னு பாருங்க. அவுங்க தான் வாழப்போறவங்க. அவுங்க முடிவு எடுக்கட்டும். நீங்களா ஒரு முடிவு எடுத்து இதுதான் சரியா இருக்கும்ன்னு நம்பாதிங்க. ஜாதகம், பொருத்தம் பாக்கறிங்க அது உங்களோட நம்பிக்கை. இது மாடர்ன் உலகம் இங்க இன்னமும் ஜாதகம் சொல்றத உண்மைன்னு நம்பிக்கிட்டு இருக்காதிங்க. பல தம்பதிங்க வாழ்க்கையில ஜாதகம் பொய்ய போயிருக்கு. அதனால உங்க பொண்ணு சந்தோஷமா இருக்கனும்ன்னா மாப்பிள்ளைய தேர்ந்து எடுக்கறதல உங்க பொண்ணோட பங்கு அதிகமா இருக்கட்டும். அதுதான் அவுங்க வாழ்க்கைக்கு நல்லது என சொல்லி அவர்களை அனுப்பிவைத்தார்.

    மருத்துவமனையை விட்டு வெளியே வரும்போது சோமுவின் மனம் சின்ன புள்ள அதுக்கு என்ன தெரியும் என பேசியது. மஞ்சுவின் மனம் தெளிவாக இருந்தது.

    ——————

    Share

  • பாடுபொருள்!

     

    மேகலா இராமமூர்த்தி

     

    (எழுது)கோலைக் கையில் பற்றிய படியே

    கவிபாடு பொருள்தனைச் சிந்தித் திருந்தேன்!

    காலைக் கதிரோன் ஒளிமுகம் காட்டி

    ஏந்திழையே எனைப் பாடுக என்றான்!

     

    காலை ஆட்டித் தூங்கும் குழந்தையோ

    நானே கவிதை அறிகிலை நீஎன,

    கோலம் போட்டு நிமிர்ந்த அன்னையின்

    முறுவல் கூடக் கவிதையாய்த் தோன்றச்

    சாலை யோரம் நின்ற மரங்கள்

    மங்கையே என்னைப் பாடுவாய் என்றன!

     

    சேலை அணிந்து சென்ற பெண்ணோ

    நடக்கும் கவிதை(நான்) எனைப் பாடென்றாள்!

    வாலை ஆட்டியே சென்ற நாயும் – என்

    நன்றி குணத்தைப் போற்றிப்பா டென்றது!

     

    வேலையில் மூழ்கிப் போனத னாலே

    கவியெழு திடநான் மறந்தஅவ் வேளையில்

    மாலை மங்கி இருளும் வந்தது

    கோலநிலவும் குளிர்முகம் காட்டியே

    வாலைக் குமரியே எனை மறந்தனையே….

    வடித்திடு கவியொன்று என்மேல் என்றது!

     

    இயற்கை அன்னையின் இனிய அழகில்

    பாடு பொருளுக்கோர் பஞ்சமு மில்லை!

    வியக்க வைத்திடும் அவளின் படைப்பில்

    ஒவ்வொரு பொருளும் கவிதையே அன்றோ!

    Share

  • நான் அறிந்த சிலம்பு – 67

     

    மலர் சபா

     

    புகார்க் காண்டம் – 07. கானல் வரி

    “மயங்கு திணைநிலை வரி அலர் அறிவுறுத்தி வரைவு கடாதல்”
    (37)

     

    நல்ல முத்துகளால் செய்த அணிகளை அணிந்த
    நன்மை பொருந்திய பவளத்தால் ஆன மேகலை அணிந்த
    செந்நெல் பயிரையுடைய மருத நிலம் தோறும்
    அலைகள் உலாவிடும் கடலின் கரைகளையுடைய
    நெய்தல் நிலத் தலைவனே!

    புன்னை மரங்களடர்ந்த சோலையதனில்
    வலிய மீன்கொடி உடைய மன்மதன் ஏவிய அம்புகளால்
    என் மேனியில் மேவிய புதிய புண்கள்
    என்னை அடையாளமே கண்டுகொள்ள முடியாவண்ணம்
    என் அழகதனை மறைத்துதான் விளங்குகின்றன.
    இதை என் அன்னையவள் அறிந்தால்
    என்னதான் நான் செய்வேன்?!

    (38)

    அழகிய பவளவாய் திறந்து
    கடல் முத்து நிகர்த்த புன்னகை புரியும்
    பரதவர் சேரியில் வலைகள் உலரும்
    அலைகள் உலாவிடும் கடலின் கரைகளையுடைய
    நெய்தல் நிலத் தலைவனே!

    மழைக்காலத்து மலரும் பீர்க்கம்பூக்களின்
    நிறமொத்த மேனியளாய்ப்
    பசலை படர்ந்த என் மேனி
    பொன்னிறத்தில் பொலிகின்றது.
    வெறியாட்டு நிகழ்த்தி தெய்வமது வழிபட்டு
    இக்கொடுமை செய்தவர் யார் என
    என் அன்னையவள் ஆராய்ந்து அறிந்தால்
    என்னதான் நான் செய்வேன்?!

    அடிப்படையாய் அமைந்த சிலப்பதிகாரத்தின் வரிகள் இங்கே:
    http://www.chennailibrary.com/iymperumkappiangal/silapathikaram21.html

    படத்துக்கு நன்றி:
    http://www.tamilvu.org/courses/diploma/a031/a0312/html/a0312103.htm

    Share

  • வந்து விட்டது வசந்த காலம் !!!

     

    பி. தமிழ்முகில் நீலமேகம்

     

    இலையுதிர்த்த  மரங்களெல்லாம்

    மலர்களால்  அலங்கரிக்கப்பட்டிருக்க

    மகரந்தங்களைத் தேடி மலர்களை

    சில் வண்டுகள் ரீங்கரிக்க

    குறுகிய காலத்துள்  –

    மரக் கிளைகளில்

    இலைகள் துளிர்த்திருக்க

    உதிர்ந்த மலர்கள்

    நிலமெங்கும் மலர் மஞ்சம்

    அமைத்திருக்க –

    எங்கெங்கு  காணினும்

    மஞ்சள்  மகரந்தங்கள்

    மங்களம் பரப்பிட

    கூடவே ஒவ்வாமையையும்

    இலவச  இணைப்பாய்

    அள்ளி வழங்கிட

    உற்சாகமூட்டும் வண்ணங்கள்

    நம்மைச் சூழ்ந்திருக்க

    பறவைகள் பரவசமாய்

    வானில் இசைபாடி

    வலம் வர – உறக்கத்திலிருந்த

    அணில்களும் முயல்களும்

    உற்சாகமாய் துயிலெழுந்து

    துள்ளியோட – வந்து விட்டது

    வசந்த காலம் !!! – எங்கெங்கும்

    உற்சாகமும் இன்பமும்

    சூழ்ந்திருக்கவே !!!!

    Share

  • “நாகரீக பெப்பே”…….

    தமிழ்த்தேனீ

     உனக்கும் பெப்பே உங்கப்பனுக்கும் பெப்பே  என்று முன் காலத்தில் ஏமாற்றுபவர்கள் கொக்கரிப்பது வழக்கம் .ஆனால் அந்தக் காலத்தில் வெறும் கோமணம் அல்லது,லங்கோட்டா என்று சொல்லுவார்கள் அதை உடுத்துக் கொண்டு, பாதுகாப்பாக வாழ்ந்தவர்கள்தான் அதிகம் பேர், அதற்குப் பிறகு அரை நிஜார், அரை நிக்கர் என்று சொல்லக் கூடிய பாதி கால்சட்டை வழக்கத்துக்கு வந்தது .

    பிறகு அயல் நாட்டாரைப் பார்த்து நாமும் முழுக் கால் சட்டையை

    அணிய ஆரம்பித்தோம் .ஆனால் நம்முடைய அரைக்கால் சட்டையிலிருந்து தோன்றியதுதான் அயல்நாட்டவரின் முழுக்கால் சட்டை.

    இப்போதெல்லாம் நாம் அனேகமாக அயல் நாட்டு நாகரீகத்துக்கு

    முழுமையாக ஆட்பட்டுவிட்டோம்.

    அதன் படி வீட்டிலே வேட்டி கட்டிக் கொண்டிருந்த ஆண்களும்

    வசதி காரணமாக  நம்முடைய பழைய அரைக்கால் சட்டையின் புதுப்பிக்கப் பட்ட வடிவமான தொளதொளவென்றிருக்கும் ஷார்ட்ஸ் என்று சொல்லக்கூடிய

    உடையை அணியத் தொடங்கி விட்டோம்

    தினமலரில் மேற் கண்ட செய்தியை வெளியிட்டிருக்கிறார்கள்.  இந்த பெப்பே என்கிற நிறுவனம் அரைக்கால் சட்டையைத் தயாரிக்க  இந்தியாவில் 150 கோடி ரூபாய்களை முதலீடு செய்யப் போகிறதாம்….ஜாக்கிரதை  .நம்முடைய வருமானத்தில் இன்னும் அதிகமாக  நம்மிடமிருந்து அரைக்கால் சட்டைக்காக அளிக்கப் போகிறோம்.  நம்முடைய பழைய கலாச்சாரங்கள் எப்படி உருமாறி நம்மிடமே  திரும்பி வந்து நமக்கே செலவு வைக்கிறது .

    சமீப காலங்களில்  கணிணித் துறையின் அமோக வளர்ச்சியால் பல இந்திய நடுத்தரக் குடும்பங்களில் இருந்து பல இளைஞர்கள்  அமெரிக்கா போன்ற அயல் நாடுகளுக்கு  கணிணித் துறை வல்லுனர்களாக தேர்ந்தெடுக்கப்பட்டு ஆங்கே சென்று  வாழ்க்கையைத் தொடங்கி  நம் நாட்டுக் கலாச்சரத்திலும்  அன்னிய நாட்டுக் கலாசாரத்திலும் இங்கொரு கால்  அங்கொரு கால் என்று  வைத்துக் கொண்டு நிலைதடுமாறி விட்டு கடைசியில்  இயலாமையினால்  அன்னிய நாட்டுக் கலாசாரத்தையே  முழுமையாக கடைப்பிடிப்பது  என்கிற முடிவுக்கு வந்து விட்டார்கள்,

    அப்படி அவர்கள் கலாச்சார மாறுதல்களுக்கு உட்பட்டு , ஜீன்ஸ், ஷார்ட்ஸ் என்று ஏகத்துக்கும் மாறிவிட்டதால்  பெற்றோரை அங்கே அழைத்துச் சென்று அவர்களுக்கும் அன்னிய நாட்டுக் கலாசாரத்தை கற்றுக் கொடுத்து  வாழப் பழக்கி விடுகிறார்கள்.  அப்படிப் பட்ட பெற்றோர் மறுபடியும்  இந்தியாவுக்கு திரும்பும்போது ஜீன்ஸ் , ஷார்ட்ஸ் என்று  அணிந்து கொண்டு  உலா வருகிறார்கள்.

    வேட்டி, சொக்காய் என்பதெல்லாம் மலையேறி வெகு காலம் ஆகிவிட்டது

    ஆகவே இந்தியாவிலும்  இந்த   பெப்பே நிறுவனம் தயாரிக்கும்    ஜீன்ஸ், ஷார்ட்ஸ் போன்றவை அதிக அளவிலே விற்கிறது.    ஒரு அரை நிஜார் தைக்க அந்தக் காலத்திலே   அரையணா  ஆகுமென்று வைத்துக் கொள்வோம்.   இப்போது அதே அரை  நிஜார் ,அதாவது அரைக்கால் சட்டை   உருமாறி ஷாட்ஸ் என்று ஒப்பனை செய்து  கொண்டு  இருப்பதால்

    ஒரு ஷார்ட்ஸ்  450 ரூபாய் ஆகிறது.

     அனேக வயதானவர்களும்  ஷார்ட்ஸ் அணிந்து கொண்டு    கையில் உயர்தர செல்போனையும் (பிள்ளைகள் வாங்கிக் கொடுத்தது)  பிடித்துக் கொண்டு  உலா வருகிறார்கள்.    இங்கே  அயல் நாடுகளுக்கு செல்ல இயலாமல்  இருக்கும் இளசுகள்,      அடேயப்பா  இந்தப் பெரிசுகள்  அலட்டும் அலட்டல் இருக்கிறதே   தாங்க முடியலைப்பா   என்று முணுமுணுப்பது  காதில் விழுகிறதா.அடிப்படைக் கலாச்சாரம்  மாறாமல்  பெரியவர்களும்  நடந்துகொண்டு பிள்ளைகளுக்கும் நம் கலாச்சாரத்தின் மேன்மையை உணர்த்த வேண்டிய தருணம் இது.   நாம் ஷார்ட்ஸில் மட்டும் மாறவில்லை,  மொத்த நாகரீகத்தின் ஆணி வேரையே   மாற்றிவிட்டோமோ  என்று தோன்றுகிறது

    ஷார்ட்ஸ் அணிய வேண்டாம் என்று சொல்லவில்லை  நம்  நாகரீகத்தையும் , நம் கலாச்சாரத்தையும்   முறையாகப் புரிந்து கொள்ளாமல்,  வேட்டி , அரை நிஜார்  ஆக மாறி , அரை  நிஜார்  ஷார்ட்ஸ்  ஆக மாறியதைப் போல

    நம் நாகரீகத்தின் பல மேன்மைகளைக் கைவிட்டு , நம் வசதிக்காக  நம் கலாச்சாரத்தை   சுருக்கி  மாற்றிவிட்டோம்.

    அதனால்தான்  இப்போது முறையற்ற திருமணங்கள், திருமணமாகி குறுகிய காலத்துக்குள்ளே  விவாகரத்துகள்,  சிறு வயதிலேயே  முறையற்ற கர்ப்பம்தரித்தல், குழந்தையைப் பெற்று குப்பைத் தொட்டியில் வீசுதல்,

    திருமணமான பிறகும்  ஆணுக்கு அன்னிய பெண்ணின் மேல் காதலும் , பெண்ணுக்கு அன்னிய ஆடவரின் மேல காதலும்  ஏற்படும் நிலை.

    தகாத காதல்களுக்காக   கொலைகள்,   என்றெல்லாம் நம் கலாச்சாரம் சீரழிக்கப்பட்டு விட்டதே.

    நாமாக  தவறான பாதையில் சென்றாலும் தடுக்கி விழுந்துஇ  அந்தப் பாதையில் பயணித்தாலும்  விபரீத விளைவுகளே   ஏற்படும்  என்பதற்கு இந்த   ஷார்ட்ஸ் என்னும் பெப்பே   ஒரு சிறிய உதாரணம்தான்  ஆனால் தற்போதைய   நாகரீகக் கலாச்சாரம்  உனக்கும் பெப்பே உங்கப்பனுக்கும் பெப்பே  என்று கொக்கரித்துக் கொண்டிருக்கிறது

     திசை தெரியாமல் குழம்பி  திரு திருவென்று விழித்துக் கொண்டிருப்போரை  ஏன் இப்படி   பேபே   என்று விழிக்கிறாய் என்பார்கள் .இப்படித்தான் நாமும் விழித்துக் கொண்டிருக்கிறோம்  ஆற்றில் ஒரு காலும் சேற்றில் ஒரு காலுமாய்

    இப்படியே நாம் விழித்துக் கொண்டிருந்தால் மொத்தக்  கலாச்சாரமும்  அழிந்து போகும் என்பதில் சந்தேகமில்லைஆமாம்  இந்தியர்கள்  என்னதான் செய்து கொண்டிருக்கிறோம்.

    விழித்துக் கொள்ள வேண்டிய தருணம் இது !

     

     

     

     

    Share

  • வார ராசி பலன்!…(15-04-13 – 21-04-13)

     காயத்ரி பாலசுப்ரமணியன்

     மேஷம்:  அண்டை அயலாரின் மத்தியில் உங்கள் மதிப்பும், கௌரவமும் பெருகும். வேலை செய்யும் இடங்களில் அனுசரித்து நடந்து கொள்ளுங்கள். எந்த பணியும் சுமையாய் இராது. நல்ல நட்பு, இனிமையான அனுபவம் என்று பொழுது இன்பமாகச் செல்லும். மாணவர்கள் வாகனம் ஓட்டுகையில் அதிக வேகம் வேண்டாம்.நீங்கள் காட்டும் அக்கறைக்கேற்ப பிள்ளைகளின் படிப்பில் நல்ல முன்னேற்றம் இருக்கும். உறவுகளின் வரவால் சில தர்ம சங்கடங்களை சமாளித்து செல்ல நேரிடும். சேமிக்க வேண்டும் என்று நினைத்த பணத்திலிருந்து சற்று செலவழித்து விடுவீர்கள்.

    ரிஷபம்:  நீங்கள் மேற்கொள்ளும் வெளியூர்ப் பயணங்கள் லாபகரமாக இருக்கும். மனைவி வழி உறவுகளோடு கருத்து மோதலில் இறங்க வேண்டாம். வியாபாரிகள் முக்கியமான பொறுப்புக்களை தங்கள் வசம் வைத்துக் கொள்ளுதல் நல்லது. பெண்கள் மனம் விரும்பிய ஆடை,அலங்காரப் பொருட்களை வாங்கி மகிழ்வர். சில நேரங்களில் வேலை முடிவதற்கு காத்திருக்க வேண்டி வரும்.வெளி இடங்களில் குடிக்கும் நீர் மற்றும் உண்ணும் உணவு வகைகளில் மிதமாக இருக்க, அஜீரணம், வயிற்றுவலி ஆகியவை உங்கள் அருகில் வராமலிருக்கும்.

    மிதுனம்: கோபத்தைக் குறைத்துக் கொள்ளுங்கள். நட்பும், உறவும் உங்களை விட்டு விலகாது. துவங்கிய காரியங்கள் துரிதமாக நடப்பதால், மனதில் மகிழ்ச்சி தங்கும். பெண்கள் வீட்டுத் தேவைகளை பூர்த்தி செய்வதில் ஆர்வம் காட்டுவார்கள். உத்தியோகத்தில் உடன் பணி புரிபவர்களால் ஏற்பட்ட தொல்லை அகலும். சிலருக்கு வெளிநாடுகளுக்கு சென்று வரும் வாய்ப்பு கிட்டும். வாகன பராமரிப்புக்கு சற்று அதிக பணம் ஒதுக்க வேண்டியிருக்கும். கூட்டுத் தொழிலில் உள்ளவர்களுக்கு கையில் கணிசமான லாபத்தோடு ஒப்பந்தங்களும் வந்து சேரும்.

    கடகம்: அலைந்து திரிந்தாவது, உங்கள் வேலைகளை முடித்துவிடுவீர்கள். வீட்டில் கலகலப்பும், சந்தோஷமும் கூடும்.முக்கியமான முடிவுகளை குடும்ப உறுப்பினரோடு கலந்து ஆலோசித்து செயல்படுவது நன்று. பெண்கள் விலை உயர்ந்த பொருட்களை கவனமாகக் கையாளவும். மறதியால் மாணவர்கள் சிறு மன உளைச்சலுக்கு ஆளாகலாம். சொத்து சம்பந்தப்பட்ட பிரச்னைகளை நிதானமாகக் கையாண்டால், இழப்புக்களைத் தவிர்ப்பதோடு, உறவுகளின் அனுசரணையையும் தக்க வைத்துக் கொள்ளலாம். உடல் ஆரோக்கியத்தில் கவனம் தேவை.

    சிம்மம்: குடும்பத்தில் நிலவி வந்த பனிப்போர் விலகும். மனதுக்கு பிரியமானவர்களை சந்தித்து மகிழ்வீர்கள். பிள்ளைகளின் பெருமை மிகு செயல்களால் உங்கள் மதிப்பும் உயரும்.என்னதான் நெருங்கிய நட்பு என்றாலும், அடுத்தவரின் அந்தரங்க விஷயங்களில் மூக்கை நீட்டாதிருப்பதே நல்லது. கலைத்துறையினருக்கு வெளிவட்டாரப் பழக்கம் மூலம் சில சலுகைகள் வந்து சேரும். வியாபாரிகள் அரசு தொடர்பான காரியங்களில் கவனமாக செயல்படுதல் அவசியம். பண விஷயங்களில் அறிமுகம் இல்லாதவரை நம்ப வேண்டாம்.

    கன்னி: நீண்ட பயணம் மேற்கொள்ள வேண்டும் என்ற ஆசை நிறைவேறும். மாணவர்கள் மற்றவர்கள் தூண்டுதலால் கேளிக்கை, கொண்டாட்டம் என்று இறங்க வேண்டாம். மேலதிகாரிகள் உங்கள் வேலைகளை விமர்சனம் செய்யும் சூழலுக்கு ஆளாக நேரிடும். எனவே எதனையும் நாளை என்று தள்ளிப்போடாதிருப்பது புத்திசாலித்தனம். பெண்கள் வாக்கு வன்மையால் வேண்டிய காரியங்களை சாதித்துக் கொண்டு விடுவார்கள். வயதானவர்களின் சிறு உடல் உபாதைகளை உடனுக்குடன் கவனித்து விடுவது நல்லது.

    துலாம்: உங்களின் கல்யாணக் கனவுகள் நனவாகும். வீட்டை சீரமைத்து அழகு படுத்துவதில் பெண்கள் மும்மரமாக இருப்பார்கள். உடன் பிறப்புக்கள் வழியில் சிறு மனஸ்தாபங்கள் அவ்வப்போது தலை காட்டும். பண வரவு சீராக இருந்தாலும், செலவுகளின் மீதும் உங்கள் கவனம் இருப்பது நல்லது. மாணவர்கள்திட்டமிட்டப்படி வேலைகளை முடிப்பதோடு கூடுதல் மதிப்பெண்ணும் பெறுவர். கலைத்துறையில் இருப்பவர்கள் சாக்கு போக்கு சொல்லி நழுவும் நபர்களிடம் எந்த பொறுப்பையும் ஒப்படைக்க வேண்டாம். கடிதம் மூலம் நல்ல செய்தி வரும்.

    விருச்சிகம்: உயர்பதவியில் இருப்பவர்கள் ,பாரபட்சமின்றி பிறருக்கு சலுகைகளை வழங்கினால், நிறுவன வேலைகள் சுறுசுறுப்பாக செல்லும். தம்பதிகள் இடையே இருந்த மனக் கசப்பு நீங்குவதால், மீண்டும் மகிழ்ச்சி பூக்கும். பெண்கள் அக்கம் பக்கத்தாரோடு பழகுவதில் ஒரு எல்லை வைத்துக் கொண்டால், தொல்லை ஏதும் இராது. உங்கள் சாமர்த்தியத்தால் வர வேண்டிய வரவுகளை வசூல் செய்து விடுவீர்கள். குல தெய்வப் பிரார்த்தனையை மறவாமல் செய்து வாருங்கள். குடும்பத்திலும், உள்ளத்திலும் நிம்மதி நிலைத்திருக்கும்.

    தனுசு: துவங்கிய காரியங்கள் துரிதமாக நடைபெற, இதமான போக்கைக் கையாளும் வியாபாரிகளுக்கு அனைத்திலும் வெற்றிதான்! உறவினர் வருகையால், இல்லத்தில் பரபரபரப்பும் மகிழ்ச்சியும் கூடும். மாணவர்கள் சோம்பேறித்தனத்தை மூட்டை கட்டி வைத்து விட்டு செயல்பட்டால், பாடங்கள் சுமையாய் தோன்றாது. கர்ப்பிணிப் பெண்கள் அவ்வப்போது தேவையான மருத்தவ பரிசோதனைகளை மேற்கொள்ள, பிறக்கும் குழந்தை ஆரோக்கியமாக இருக்கும். பெண்கள் இரவலாகப் பொருள்களை தருவதையும், பெறுவதையும் தவிர்த்தல் நலம்.

    மகரம்: அரசுத் தொடர்பான காரியங்கள் நினைத்தவாறே முடியும். பெண்களுக்கு இல்லத் தேவைகளை இடுகட்டும் அளவிற்கு பணப்புழக்கம் இருக்கும். புதிதாக பணியில் அமர்ந்திருப்பவர்கள், வேண்டாத விவாகாரங்களிலிருந்து தள்ளியே இருங்கள். பொது வாழ்வில் இருப்பவர்கள், உடனிருப்பவர்களால் சில நெருக்கடிகளுக்கு ஆளாக நேரிடும். வேலையில் இருப்பவர்கள் பிறரிடமிருந்து பொறுப்புக்களை பெறும் போதும், தரும் போதும் விழிப்புடன் இருப்பது அவசியம். அதிக அலைச்சல், அதிக வேலை இரண்டும் உங்கள் உற்சாகத்தைக் குறைக்கலாம்.

    கும்பம்: புதிய ஒப்பந்தங்கள் கலைஞர்களை மகிழ்ச்சியில் ஆழ்த்தும். மாணவர்கள் சின்ன சின்னப் பிரச்னைகளுக்கு உணர்ச்சிவசப்படுவதை தவிர்த்தால், கல்வியில் அதிக கவனம் செலுத்தலாம். பெற்றோர்கள் பிள்ளைகள் விஷயத்தில் இதமான அணுகு முறையைக் கையாண்டால், பல பரச்னைகளுக்கு உடனடியான தீர்வு கிட்டும். பெண்கள் வரவுக்கு ஏற்ற செலவு என்பதில் கவனமாக இருந்தால், கடன் தொல்லையும் ஓரளவு கட்டுக்குள் இருக்கும். அனுசரித்து செல்லும் தம்பதியர் நடுவே அன்பும், பாசமும் பெருகும். புதியவரிடம் ரகசியங்களை பகிர்ந்து கொள்ள வேண்டாம்.

    மீனம்: புது உறவுகளின் வருகையால் குடும்பத்தில் மகிழ்ச்சியும், கலகலப்பும் கூடும். பிள்ளைகள் உடல்நலத்தில் கூடுதல் கவனம் செலுத்தி வந்தால், மருத்துவச் செலவுகள் கணிசமாகக் குறையும். உடன் பணிபுரிபவர்களின் ஆதரவால், வேலைகளை ஆர்வத்துடன் செய்து முடிப்பீர்கள். பெண்களுக்கு குடும்பத்தாரோடு புதிய இடங்களுக்கு சென்று மகிழும் வாய்ப்பு கூடி வரும்.முக்கிய பொறுப்பு வகிப்பவர்கள், வீண் பழிகளைத் தவிர்க்க, கூடுதல் கவனத்துடனும், திறமையுடனும் செயல்பட்டு வருவது அவசியம்.

    Share

  • ஶ்ரீவைகுண்டம் கோதண்ட ராமன்

     

    சு. ரவி

    சித்திரை, நவமி, புனர்வஸு நக்ஷத்திரம் கூடிய நன்னாளில் ஶ்ரீ ராம அவதாரம் நிகழ்ந்தது.

     

    “நீதிதன்னைநிலைநாட்ட-

    நைந்தவர்க்கு வழிகாட்ட

    வேதமந்த்ர சுகமார்க்கம்-மண்ணில்

    வாழ்ந்துகாட்ட வந்த மேகம்”

    என்றும்,

    “விழிகளரவிந்தம்-அதில்

    கருணை மகரந்தம்

    விதி கதி கலங்கவரும் கோதண்டம்”

    என்றும்,

    நணபன், கவிஞன் க.ரவியின் சொல்வண்ணத்திலே தீட்டப்பெற்ற

    கோதண்ட ராமனின் நெடிதுயர்ந்த திருக்க்கோலத்தை, ஶ்ரீவைகுண்டம் கோயிலில் உள்ளபடி

    அனுமன் மற்றும், சீதை சமேதனாகக் கோட்டோவியத்தில்

    முயற்சித்துள்ளேன் (இணைப்பு காண்க).

    பார்க்க, படிக்க, ரசிக்க…..

    தனுவினை இடக்கரத்தில்

    தாங்கிடும் தடந்தோள் வீரா

    இனகுலம் விளங்க வந்த

    இணையிலாக் கருணை ஊற்றே!

    அனுமனை வலக்கரத்தால்

    அணைந்து நீ நிற்கும் கோலம்

    மனமெலாம் நிறைத்ததையா!

    மலரடி சரணம் ராமா!

    வில்லிலே வீரம் வைத்தாய்

    விழியிலே ஈரம் வைத்தாய்

    சொல்லிலே வாய்மை வைத்தாய்

    செயலிலே நேர்மை வைத்தாய்

    இல்லிலெம்    ஜானகித்தாய்

    ஒருத்தியை இருத்திவைத்தாய்

    கல்லிலும் உயிர்கொடுத்தாய்

    கழலிணை சரணம் ராமா!

    விண்திரள் கார்மேகம் போல்

    விளங்கிடும் கரியமேனி

    கண்களோ பொய்கை பூத்த

    கமலமாய் விரிந்திருக்கும்

    திண்திறல் புஜங்கள் எங்கள்

    துயரெலாம் தாங்கிக் கொள்ளும்

    மண்ணிலே நடந்து சென்ற

    மலரடி சரணம் ராமா!

    கங்கையின் ஓடக்காரன்,

    குகனொரு தம்பி என்றாய்

    அங்கொரு வானரர் கோன்

    அவனையும் தம்பிஎன்றாய்

    வெங்களம் சரண்புகுந்த

    வீடணன் தம்பியானான்

    இங்கெனை ஏற்றுக் கொள்ள

    இன்னுமேன் தயக்கம் ராமா!

    வயோதிகம் நெருங்கும் போது

    வார்த்தையும் வருவதில்லை!

    வியாகுலம் சூழ்ந்த நெஞ்சில்

    விளைவகள் விளங்கவில்லை

    அயோத்தியின் அரசே, நானுன்

    அடைக்கலம், ஏற்றுக்கொள்வாய்!

    தயாபரா!   தாமதம் ஏன்?

    தளிர்ப்பதம் சரணம் ராமா!

    சு.ரவி
    Vice President – IT
    Alicon Castalloy Limited
    Gat No: 1426, Village Shikrapur, Tal. Shirur,
    Dist. Pune 412 208  Maharashtra, India

    Share

  • விஜய ஆண்டில் புத்தாண்டு வாழ்த்துக்கள்

    சக்தி சக்திதாசன்
    பங்குனித் தாயின் திரு உத்தரத்தில்
    பதமாய்ப் பிறந்த சித்திரைத் திருமகளே
    பைந்தமிழ் அகவையின் பூ மகளே
    பல நலம் கொண்டு நீ உதித்தாயோ ?
    முத்தமிழ் மொழியின் நல் புத்தாண்டாய்
    முப்பொருள் கொண்ட சுவைக் கற்கண்டாய்
    வித்தகர் விளைந்த இந் நானிலத்தில்
    விடியலைக் கொண்டு நீ வந்தாயோ ?
    கற்றவர் சபையில் ஒளிரும் செம்மொழியின்
    காலத்தின் பெருமைகொள் சரித்திரங்கள்
    யாதும் ஊரெனப் பரந்திருக்கும் இன்ப
    யவ்வன மொழியின் புதிய வருடமென்றேன்
    இத்தரை மாந்தர்கள் மனங்களிலெல்லாம்
    சித்திரைப் பூமகள் வலம் வந்திடுவாள்
    முத்திரை பதித்திடும் பெருங் காவியங்கள்
    பத்தரைப் பொன்னிலும் மிகும் செல்வங்களே
    விஜய ஆண்டிதன் வரவதனை நாமும்
    விரிந்திடும் மனம் கொண்டு மகிழ்ந்திடுவோம்
    வாட்டிய வேதனைக் காலங்கள் அனைத்தும்
    ஓட்டிய வருடம் இதுவென்றாகட்டும்
    கிட்டாதன அனைத்தையும் வெட்டென மறந்து
    கிட்டியவை அனைத்தாலும் சட்டென மகிழ்ந்து
    மனதின் மகிழ்ச்சியின் மந்திரம் ஒன்றே
    மகிழ்வோம் நம்மிடம் இருப்பதைக் கொண்டு
    அன்பிலும் பண்பிலும் சிறந்து விளங்கிடும்
    அன்பினும் இனிய உள்ளங்கள் அனைத்துக்கும்
    விஜய ஆண்டில் புத்தாண்டு வாழ்த்துக்கள்
    வாழிய அனைத்தும் பெற்றே உம் வாழ்வில்
    படத்துக்கு நன்றி
    Share

  • தமிழ்ப் புத்தாண்டில்…

     

    இத்தரை கணும் இன்பமெலாம்

    இரண்டாய், மேலாய்க் கிடைத்திடவே

    சித்திரை வந்தது சிறப்புடனே

    சீர்மிகு விஜய புத்தாண்டாய்,

    நித்தமும் இனிமேல் நந்நாளென

    நம்பியே உழைத்து நலம்பெறுவோம்,

    தத்துவம் இதுதான் தழைத்திடெனத்

    தமிழர் ஆண்டில் வாழ்த்துவமே…!

     

    -செண்பக ஜெகதீசன்…

    படத்திற்கு நன்றி:

    http://messages.365greetings.com/holiday/tamil-new-year/tamil-new-year-wishes.html

    Share

  • அழகார்ந்தநாயகி

     

    அழகார்ந்தநாயகி பஞ்சகம்

     

    சு. ரவி

     

     

    அழகினுக் கழகைத் தந்த

    அழகியே, அம்மை யே!பூம்

    பொழிலிடைப் பூந்துருத்திப்

    பொய்யிலி நாதர், கையில்

    மழுவினை, மானை ஏந்தும்

    மன்னவன் பாகம் கொண்டோய்!

    பழவினைக் காட்டைத் தீய்க்கும்

    பதமலர்    சரணம்   தாயே!    1

     

     

    தேவியே, மறைகள் நான்கும்

    தேடுமெய்ப் பொருளே! ஈசன்

    ஆவியே, அமுதம் தோய்ந்த

    அழகியே, அரனார் பாகம்

    மேவிய மேன்மையே நின்

    மென்மலர்ப் பாதம் பாக்கள்

    தூவிநான் தொழுது போற்றத்

    துணைவர வேண்டும் தாயே!    2

     

     

    பிரமனங் கிருக்க ஒட்டான்

    பிறப்பெனும் சிட்சை செய்வான்!

    இரக்கமில் எமனோ என்னை

    இவ்விடம் இருக்க ஒட்டான்!

    உரமழிந் தோய்ந்தேன்,தேய்ந்தேன்

    உதையுறு பந்தாய் ஆனேன்!

    அரனொரு பாகம் சேர்ந்த

    அழகியே, சரணம் தாயே!       3

     

     

    பொன்னிலே விருப்பம் இல்லை

    பொருளிலே நாட்டம் இல்லை

    உன்னையன் றின்றி யாரும்

    உறவெனக் கில்லை அம்மே!

    இன்னமு தழகீ! ஈசன்

    இடப்புறம் கவர்ந்த தாயே!

    மின்னலாய் முதுகுத் தண்டின்

    மிசையெழு சுடரே!போற்றி!        4

     

     

    பூரண நிலவாய்ப் பூத்த

    பூவன நாதர் வாழ்வே!

    நீறணி நிமலர் பாகம்

    நிறைவுசெய் அழகீ! அன்ன

    பூரணீ! புதுமைக் கெல்லாம்

    புதுமையே! உலகுக் காதி

    காரணீ! காளீ! காக்கும்

    கழலிணை சரணம் தாயே!         5

     

     

    Share

  • அறுமுகநூறு (9)

     

    சச்சிதானந்தம்

     

    குக் குடத்துக் கொடியோன் அடியை,

    இக் குடத்துக் கடியேன் பற்றி,

    முக் குடத்துக் கடுநோய் நீக்கிச்,

    சிக் கெடுத்துக் காக்கப் பணிந்தேன்!                                                                                   41

     

    பங்குனிக் கொண்டாட்டம் சித்திரை வரைக்கும்,

    பக்தர்கள் கொண்டாட்டம் பாருள்ள வரைக்கும்,

    சங்கரன் கொண்டாடும் சரவணன் படைத்த,

    மங்கலச் செந்தமிழ் நம்மை வழிநடத்தும்!                                                                     42

     

    தைப்பூசம் என்றால் தமிழ்மணம் வீசும்,

    கைபூசும் சந்தனம் திருமேனி எங்கும்,

    பைபூசும் கிளிகளின் செவ்வலகு போல,

    தைப்பூச நாயகன் அழகிதழ் சிவக்கும்!                                                                             43

     

    சிற்றின்ப பேரின்ப பேதங்கள் இன்றி,

    உற்றின்ப முனைக்கண்டு நின்றோமே ஐயா!

    சற்றுன்னை மனமாரக் கண்டிடும் பொழுது,

    பற்றின்றி வாழ்ந்திடப் பழகினோம் ஐயா!                                                                        44

     

    அலகினைச் சுமந்திடும் கன்னம், முருகன்

    அழகினைச் சுமந்திடும் பக்தனின் எண்ணம்,

    அமைதியில் நிறைந்திடும் அலகேற்ற உள்ளம்,

    அருளினை அடைந்திடும் அழகுற்று நெஞ்சம்!                                                               45

     

    Share