–சக்தி சக்திதாசன்.

அன்பினியவர்களே !
இனிய வணக்கங்கள்.
இன்னொரு வாரம், இன்னொரு மடல், இன்னொரு சந்திப்பு.

ஐக்கிய இராச்சியம் நான் அறிந்த நாள் முதல் வட அயர்லாந்து, இங்கிலாந்து, ஸ்காட்லாந்து, வேல்ஸ் எனும் நான்கு பகுதிகளின் சேர்க்கை ஆகும்.

இந்த ஒன்றிணைப்பான ஐக்கிய இராச்சியம் தான் ஒரு காலத்தில் பிரித்தானிய ஏகாதிபத்தியமாக தனது காலனித்துவ நாடுகளின் மீது கோலோச்சியது.

இங்கிலாந்து அரசர் முறையே வேல்ஸ், அயர்லாந்து ஆகிய நாடுகளை வெற்றி கொண்டு பிளவு பட்ட அயர்லாந்தின் வடபகுதியையும், வேல்ஸ்சையும் ஒன்றாக இணத்தார்.

அதன் பின்பு இரண்டு அரசுகள் அதாவது இங்கிலாந்துடன் இணைக்கப்பட்ட வேல்ஸ், வடஅயர்லாந்து உள்ளடங்கிய ஒரு அரசும், ஸ்கொட்லாந்து அரசும்  தனியே இயங்கி வந்தது.

பின்பு 1503ம் ஆண்டு ஸ்காட்லாந்தின் அரசரான ஐந்தாவது ஜேம்ஸ் இங்கிலாந்தின் அரசரான 7வது ஹென்றியின் மூத்த புதல்வி மார்கிரெட் டியூடோர் என்பவரை மணந்ததும் தான் ஸ்காட்லாந்து அரசரின் கனவான இங்கிலாந்து அரசும் ஸ்காட்லாந்து அரசும் இணையும் படலங்கள் ஆரம்பமாகின.

இப்படியாக மலர்ந்ததுதான் ஐக்கிய இராச்சியம். இந்த ஐக்கிய இராச்சியம் ஒன்றான  யூனியன் ஆக அமைந்திருந்தாலும் கடந்த லேபர் கட்சியின் அரசு டோனி பிளேயரின் தலைமையின் கீழ் ஐக்கிய இராச்சியத்தின் அங்கங்களான ஸ்காட்லாந்து, வட அயர்லாந்து, வேல்ஸ் என்பனவற்றிற்கு சட்டசபை முறையிலான அதிகாரங்களை வழங்கியது.

இன்று அப்பகுதிகளுக்கு இந்திய முறையப் போன்று முதலமைச்சரும் சட்டசபைகளும் உண்டு.

ஆனால் பிரச்சனை அத்தோடு நின்று விடவில்லை. ஸ்காட்லாந்து அரசியல் கட்சியில் ஒன்றான ஸ்கொட்லாந்து தேசியக் கட்சி தாம் தனிநாடாகத் திரும்பப் பிரிந்து போக வேண்டும் எனும் கோரிக்கையை முன்னெடுத்து பல தேர்தல்களில் ஜயித்தது.

அத்தோடு ஸ்காட்லாந்து உள்நாட்டுத் தேர்தலில் அக்கட்சியே ஜெயித்து சட்டசபையை அமைத்தது.

அதைத்தொடர்ந்து இங்கிலாந்து அரசாங்கம் ஸ்காட்லாந்து நாடு தனியே பிரிந்து போவதை அந்நாட்டு மக்கள் விரும்புகிறார்களா இல்லையா என்று தெரிந்து கொள்வதற்காக ஒரு பொதுஜன வாக்கெடுப்பை ஸ்காகொட்லாந்தில் நடத்தப் போவதாக அறிவித்து அதற்கான திகதி இவ்வருடம் செப்டெம்பர் மாதம் என அறிவித்தது.

இதோ ஜூன் வந்து விட்டது, ஸ்காட்லாந்து பிரிவதால் உண்டாகும் நன்மைகளைப் பற்றி தேசியக் கட்சியும், அதனால் ஸ்காட்லாந்து அடையப்போகும் தீமைகளைப் பற்றி இங்கிலாந்தின் மற்றைய பிரதானக் கட்சிகளும் கடுகதிப் பிரசாரங்களை மேற்கொள்கின்றன.

ஆனால் இங்கிலாந்து மக்களை ஸ்காட்லாந்து தாம் பிரிந்த பின்பு எப்படி இருக்க வேண்டும் என்று கூறும் சில விடயங்கள் மிகவும் எரிச்சலூட்ட வைக்கின்றன.

குறிப்பாக ஸ்காட்லாந்து பிரிவினையை வேண்டுவோர் பிரிவின் பின்னரும் தமது நாட்டின் கரன்சியாக பிரிட்டிஷ் பவுண்ஸ்சையே வைத்திருக்கப் போகிறோம் என்பது பல இங்கிலாந்து மக்களுக்கு மிகவும் ஆத்திரத்தையும் ஆச்சரியத்தையும் உண்டு பண்ணுகிறது..

இங்கிலாந்துக்கும் ஸ்காட்லாந்துக்கும் இது மிகவும் சிக்கலான சந்தியாகிறது முடிவு எதுவாயினும் அது இரு பகுதிகளையும் பாதிக்கத்தான் போகிறது.

சரி செப்டெம்பர் மாதத்தின் பின்னால் இதைப்பற்றிக் கொஞ்சம் விரிவாகப் பார்ப்போமே !

மீண்டும் அடுத்த மடலில்
அன்புடன்
சக்தி சக்திதாசன்

–விசாலம்

வடக்கில் கங்கை கங்கோத்திரியிலிருந்து  ஒரு வெள்ளிக்கம்பி போல ஆரம்பித்து  சில இடங்களில் அமைதியாகவும் சில இடங்களில் ஆக்ரோஷமாகவும்  பாய்ந்து ஓடுகிறது. புனித கங்கை ரிஷிகேசத்திலிருந்து ஏழு கிளைகளாகப் பிரிந்து  மிக வேகமாக சீற்றத்துடன்  பிரவாகமாக ஓடி வருகின்றது. இந்த  கங்கை கரையில்  இருப்பது ஹரிதுவார் என்ற  ஒரு க்ஷேத்திரம். ஹரியின் வாசல் என்று தமிழில் பொருள் வருகிறத. இந்த ஹரிதுவாரிலிருந்து சுமார் எட்டு கிமீ சென்றால் ஸ்ரீ வேதவியாசர் கோயில் வந்துவிடும். இந்த இடத்தின் பெயர் சப்தசரோவர் .. அதாவது, ஏழு ஏரி என்ற பொருள். இந்த இடத்திற்கு நான் பள்ளி மாணவர்களுடன் வந்திருக்கிறேன். ஸ்ரீ சுதீந்திர தீர்த்த மகாசுவாமிகள் இந்தக்கோயிலை சுமார் எட்டு ஏக்கர் நிலப்பரப்பில் மிக அழகாகக் கட்டியிருக்கிறார்.

யார் இந்த வேதவியாசர்? அவருக்கு ஏன் கோயில் கட்ட வேண்டும் ?

ஒரு சமயம் பராசர முனிவர் சிவனை நோக்கி தவம் இருநதார்.  சிவனும் அவர் முன் தோன்றி “உன் சிவபக்திக்கு மெச்சினேன் உன்னுடைய குமாரன்  வேதங்களில் நன்கு தேர்ச்சி பெற்று உலகமக்களின் நன்மைக்காக வேதங்களைத் தொகுத்து அளிப்பார்”  என்று கூறி மறைந்தார்.

பராசர முனிவருக்கும்  சத்யவதிக்கும்  ஒரு மகன் பிறந்தான். பெற்றோர்   அவருக்கு கிருஷ்ண துவைபாயனர்  என்று பெயரிட்டனர். அந்த  பரமேஸ்வரன் கூறியபடி  அவர் தன் தகப்பனார் மகரிஷி பராசரரிடத்தில் வேதம் பயின்றார். பின்னர் பதஞ்சலியிடமிருந்தும் ஆழமாக சென்று சிறந்த பாண்டித்யம் பெற்றார்.  பின் தேசயாத்திரை தொடங்கி பல இடங்களிலிருந்தும் வேதங்களைச் சேகரித்தார். பின்னர் அதை நான்காகப்பிரித்தார். அவையே ரிக் வேதம், யஜூர் வேதம், சாம வேதம், அதர்வண வேதம். பின்னர் தன்னுடைய நான்கு சீடர்களுக்கு அளித்தார்.

ரிக்வேதத்தை  பைல முனிவருக்கும், யஜூர் வேதம் வைசம்பாயனருக்கும்,  சாம வேதத்தை  ஜைமினி முனிவருக்கும், சுமந்து முனிவருக்கு  அதர்வணவேதத்தையும் கற்றுக்கொடுத்தார். இப்படி வேதத்தைப்பிரித்துக்கொடுத்ததால்  இவருக்கு வேத வியாசர் என்ற பெயர் வந்து  சேர்ந்தது.

பின் இவர் பிரும்ம சூத்திரம் என்ற அரிய நூலை எழுதி நமக்கெல்லாம் ஒரு பொக்கிஷமாக அருளியிருக்கிறார். மேலும் நமக்கு வேதம், உபநிஷதம், புராணங்கள் போன்று பல பொக்கிஷங்கள்  அவர் மூலம் கிடைத்திருக்கின்றன.

மகாபாரதத்தில் போர் கடுமையாக நடந்து அதில் பலர் மடிந்தனர். மகாபரதப்போரை கண் தெரியாமல் இருந்த திருதாஷ்டிரர் பார்க்க விரும்பினார். யுத்தபூமியில் நடக்கும் எல்லா காட்சிகளையும் அரண்மணையில் இருந்தபடியே வர்ணிக்கும் சக்தியை சஞ்சயனுக்கு அளித்து திருதாஷ்டிரரது ஆசையைப்பூர்த்தி செய்தவர் ஸ்ரீ வேதவியாசர் தான். அவரிடம் அத்தனை சக்தி  இருந்தது. போர் முடிந்த பின் குந்தி தேவியுடனும் மன்னர் திருதிராஷ்டிரனுடனும் சில நாட்கள் வியாசமுனிவர் தங்கினார். அப்போது மன்னர் போரினால் தனது செல்வங்கள் அனைவரும் அழிந்து  அத்துடன் பல உறவினர்ளையும் இழந்து விட்டேனே என்று வருந்தி, மறுபடியும்  அவர்களைப்பார்க்க மிகவும் ஆசையாக உள்ளது என்று வியாசமுனிவரிடம் தன் ஏக்கத்தைத் தெரிவித்தார் , வியாசமுனிவரும் அவரை கங்கைக்கரைக்கு  அழைத்துபோனார்  மகா பாரதப்போரில் இறந்தவர்களை வரச்சொன்னார். இறந்தவர்களும் அரச உடைகளுடன், அலங்காரமாக தங்களது தேரில்  வந்து காட்சியளித்தார்கள். இதனால் திருதாஷ்டிரரின் ஏக்கம் தீர்ந்ததாம்.  இந்தச்சம்பவம் ஒரு கதாகாலட்சேபத்தில் கேட்டது.

தவிர  மஹாபாரதத்தை ஸ்ரீ வியாசர் சொல்லிக்கொண்டு வர ஸ்ரீ மகாகணபதியே  அதை எழுதினார் என்பதை நாம் புராணங்கள் வாயிலாக தெரிந்துக்கொள்கிறோம். இத்தனைச்சிறப்பு பெற்ற ஸ்ரீவியாசபகவானுக்கு ஒரு கோயில் இல்லையே என்ற ஏக்கம் ஸ்ரீ சர்தார்வல்லப பாய் பட்டேலுக்கு இருந்தது இதற்காக அவர்  ஸ்ரீ வியாசபகவானுக்கு ஒரு ஆறடி சிலை  தயார் செய்து அதை யமுனை நதிக்கரையில் “குல்பீ” என்னும் இடத்தில் பிரதிஷ்டை செய்தார்.ஆனால் அங்கு நித்தியப்படி பூஜை . புனஸ்காரம் நடத்தப்படவில்லை .

ஒரு நாள்  காசியில்  காசிமட சமஸ்தானத்தின் முதல் ஆச்சாரியார் ஸ்ரீ யாதவேந்திர தீர்த்த சுவாமிகள் கங்கையில் ஸ்னானம் செய்ய இறங்கினார். அவர் காலில் ஏதோ ஒன்று பளுவாக தட்டுப்பட்டது. முதலையாக இருக்குமோ என்று எண்ணினார். ஆனால் அது கற்போல் காலில் தட்டுப்பட்டதால் குனிந்து அதை எடுத்தார். அது ஒரு அழகான விக்கிரகம். அதுவும் ஶ்ரீ வேத வியாசரின் விக்கிரகம். அதை தன் மடத்தில் எடுத்துக்கொண்டு  போய் தினமும் பூஜை செய்யலானார். வரிசை வரிசையாக அது பலரால் பூஜிக்கப்பட்டது, பின்னர் காசி மடத்து  சமஸ்தான இருபதாவது பட்டத்தில் அருளப்பட்ட ஸ்ரீ சுதீந்திர தீர்த்த மகா சுவாமிகள் இவருக்கு ஒரு கோயில் கட்ட வேண்டும் என்று கடும் முயற்சியில் இறங்கி  வெற்றியும் கண்டார்.

இனி கோயிலைப் பார்ப்போம். கோயிலின் முகப்பில் அஷ்டதிக்கு பாலகர்கள் இல்லை. அதற்கு பதிலாக இரண்டு முனி குமாரர்கள் நின்றபடி இருக்கின்றனர். பிரகார சுவர்களில் பல சித்திரங்கள் காணப்படுகின்றன. இதில் ஸ்ரீராமர், சீதாதேவி, ஸ்ரீ நரசிம்மர்,  ஸ்ரீ பாலாஜி,  கீதாநாயகன் கண்ணன், ஸ்ரீ வியாசபகவானின் வாழ்க்கையில் நடந்த சில சம்பவங்களைக்  காணமுடிகிறது. கர்ப்பகிரகத்தில் ஸ்ரீ வியாசபகவான் எழந்தருளியுள்ளார். அவரின் நான்கு பக்கங்களிலும் நான்கு சீடர்களான பைலமுனிவர், வைசம்பாயனர், ஜைமினி முனிவர், சுமந்து முனிவர்  ஆகியோர் தனித்தனி சன்னிதியில் அருள் புரிகின்றனர்.

தவிர சப்தரிஷிகள் ஸ்ரீ காச்யபர், கௌதமர் , ஜமதக்னி , அத்ரி ,பரத்வாஜர், விஸ்வாமித்ரர் ,வசிஷ்டர் இவர்களின் உருவங்கள்  நான்கு பக்கச்சுவர்களிலும் பெரிய அளவில் மிக அருமையாக  வரையப்பட்டுள்ளன.

கோயிலின் கோபுரம் சுமார் அறுபது அடியாகும் கோயிலில் தங்க விடுதிகளும் சமையல் செய்யும் கூடங்களும் உள்ளன. தவிர ஆயுர்வேத மருத்துவம், பெரிய நூலகம், வேதபாடசாலை  என்று பல பாகங்களைப் பார்க்கமுடிகிறது . உத்திரபிரதேசத்திற்கு இந்தக்கோயில் மேலும் பெருமை சேர்க்கிறது என்றால் மிகையாகாது.

படம் உதவிக்கு நன்றி: http://arundathiga.blogspot.com/2008/08/badrinath-to-bangalore-may-2008.html

–செம்பூர் நீலு.

10,000 புத்தர் உருவச்சிலைகள் உள்ள நகரம்

நாப்பா வாலியை சுற்றிப்பார்த்துவிட்டு இரவில் ஒரு நல்ல லாட்ஜில்  தங்கிவிட்டு மறு நாள் காலையில் உக்கியா நகரிலிருந்து 2 மைல் தொலைவிலுள்ள 10,000 உருவச் சிலைகள் கொண்ட புகழ் வாய்ந்த புத்தர் கோவிலுக்குச்  சென்றோம்.

நுழை வாயில் வளைவு மண்டபம்
நகரின் நுழை வாசலில் உள்ள மண்டபம் அழகாக சைனா ஜென் கோவில் கட்டிடக் கலையை பிரதிபலிக்கிறது. இருமருங்கிலும் பச்சைப்  பசேலென்று அமைந்திருக்கும் செடிகள் பார்ப்பதற்குக்  கண்ணிற்குக்  குளுமையாக இருந்தது. 500 ஏக்கர் பரப்பளவில் அமைந்திருக்கிறது இந்தக்  கோவில் வளாகம், அதைச்  சுற்றி  புல்வெளிகள், எக்சிபிஷன் அறை, பெரிய தியான மண்டபம், புத்தா பல்கலைக்கழகத்தின் தர்ம பரிபாலனம், கல்விக்கூடங்கள்,  வெஜிடேரியன் உணவகம் மற்றும் அலுவலகக் கட்டிடங்கள் அமைந்திருக்கின்றன. நுழை வாயிலில் காலெடுத்து வைத்தவுடன் அங்கிருக்கும் அமைதியான சூழ்நிலை நம்மை மௌனமாக்கிவிடுகிறது. வழியில் தென்படும் யாத்திரிகர்கள் / புத்த பிக்குக்கள் கை கூப்பி சிரம் தாழ்த்தி  வணக்கம் தெரிவிக்கின்றனர்.

இந்த கோவில் வளாகம் சர்வ தேச புத்த சமூக ஜென் அமைப்பை, குறிப்பாக மேற்கத்திய நாடுகளின் முக்கிய அமைப்பை சேர்ந்த திரு ஹுசுவான் ஹுஆ என்பவரால் 1974 ம் வருடம் நிர்மாணிக்கப்பட்டது. உலகத்திலேயே முதல் சைனா ஜென் கோவிலாகவும் மேற்கத்திய நாடுகளின்  5 புத்த சமூகத்தினரின் கோவிலாகவும் கருதப்படுகிறது. மேற்கத்திய உலகில் வாழும் மக்களுக்கு புத்தரின் போதனைகளை கற்றுத்  தருவதற்காக வேண்டி இந்த வளாகத்தை நிர்மாணம் செய்தார்.

பிரதான அலுவலகத்தின் அதிகாரி கைகூப்பி வணங்கி வரவேற்கிறார். அங்கிருக்கும் பதிவேட்டில் பெயரையும் முகவரியையும் பதிவு செய்தபின் அருகிலிருக்கும் எக்ஸிபிஷன் அறைக்குள்  அடியெடுத்துவைக்கிறோம். அழகான கம்பீரமான சிங்க உருவச்சிலையும் பளிங்கு நிறமுள்ள நிற்கும் நிலையில் புத்தர் சிலையும் நம்மை வரவேற்கிறது.

அருகில் உள்ள புல் வெளிகளில் மயில்கள் கூவிக்  கூவி யாத்ரிகர்களை வரவேற்கிறது.
ஒரு மரநிழலில் மயில் தோகை விரித்தாடும் காட்சியை காண கண் கோடி வேண்டும். ஒரு மயில் மரத்தின் மேல் நின்றுகொண்டிருந்த்து. இன்னொன்று மரநிழலில் ஆடி அசைந்து நடந்து கொண்டிருந்தது.

அருகில் ஒரு சிறிய வாய்க்கால் ஒடிக்கொண்டிருந்தது. அதில் பல நிறங்களில் மீன்கள் நீந்தி விளயாடிக்கொண்டிருந்தன.
  

பின்னர் பிரதான கோவிலும் தியான ஹாலிருக்கும் இடத்திற்குச்  சென்றோம். முன்னால் கொடிமரம் போன்றொரு விளக்கு. இரண்டு சிங்கங்களின் உருவச்சிலைகள் மேல் மாடத்தில் புத்தரின் உட்கார்ந்த நிலையில் அமைந்திருக்கும் உருவச்சிலை. படியேறிச் சென்றவுடன் நம்மை வரவேற்பது ஒரு சிறிய கோவில் போன்ற அமைப்பு.
  

புத்த பெருமானை வணங்கிவிட்டு தியான ஹாலில் நுழைகிறோம். ஒரு அமைதியான சூழ்நிலை. திரியிட்டு எரியும் நில விளக்குகள் மாதிரி மின்சார வட்ட வடிவமான உயர்ந்த விளக்குகள்

ஒவ்வொரு விளக்கிலும் புத்தரின் உருவம். எங்கிலும் எதிலும் புத்தர். எல்லாமே புத்தர் மயம்.

பெரிய தியான மண்டபத்திற்குள் நுழைகிறோம். நான்கு சுவர்களிலும் புத்தர் பெருமானின் உருவச்சிலைகள் வரிசையாக ஷெல்ஃபுகளில் வைக்கப்பட்டிருக்கின்றன. ஹாலின் இரண்டு பக்கத்திலும் வரிசையாக சிறிய சதுர வடிவ மெத்தைகள்.  பக்தர்கள் சிவப்பு க்ம்பளம் விரிக்கப்பட்ட தறையில்  சிறிய சதுர வடிவ மெத்தைகளின் முன்னால் அமர்ந்துகொண்டு கைகூப்பி சிரம் தாழ்த்தி அமைதியாக வழிபடுகின்றன்ர். முன்னால் மேடையில் புத்தர் பெருமானின் பெரிய உருவச்சிலை.
  
அருகில் சென்று பார்த்தால் அந்த பிரும்மாண்டமான உருவம் பரந்தாமன் கிருஷ்ண பகவான் அர்ஜுனனுக்கு காட்சிகொடுத்து பகவத் கீதையை உபதேசித்த காட்சி நினவுக்கு வருகின்றது. புத்த பகவானும் மஹாவிஷ்ணுவின் அவதாரம்தானே. அமைதியான சூழ்நிலையில் 30 நிமிடம் தியானம் செய்துவிட்டு வெளியில் வருவதற்கு மனது கேட்கவில்லை. அதிகம் வெளிச்சமில்லாத வெளிர் மஞ்சள் நிறமுள்ள விளக்கு ஒளியில் புத்த பெருமானின் தஙக நிறமுள்ள பெரிய உருவச்சிலை. நல்ல இனிமையான மணியோசை. எல்லா பக்தர்களும் அமைதியாக அமர்ந்து தியானத்தில் ஈடுபட்டிருக்கின்றனர். புத்த பிக்குகள் (ஆண்களும் பெண்களும்) தனித் தனியாக இரண்டு பக்கத்திலும் அமர்ந்து தியானம் செய்கின்றனர். வெளியில் வரும்போது அங்கிருக்கும் அதிகாரி பக்தர்களை உணவத்திற்கு செல்லுமாறு விண்ணப்பிக்கின்றார்.

பக்தர்கள் அனைவருக்கும் வெஜிடேரியன் உணவு இலவசமாக உணவகத்தில் பகல் 11 மணி முதல் 3 ம்ணி வரை அளிக்கப்படுகிறது.
  

உணவகத்திற்குச்  சென்று சோயா பாலாடைக்கட்டிகளுடன் காய்கறி சாலட், நூடுல்ஸ் மற்றும் சில சைனீஸ் உணவு வகைகளை சாப்பிட்டு விட்டு புல்வெளியில் சிறிது நேரம் அமர்ந்து இளைப்பாறினோம். இந்த மாதிரி ஒரு அமைதியான புத்தர் கோவில் வளாகத்தை பார்க்க கிடைத்த வாய்ப்பை அளித்த அந்த புத்த பெருமானுக்கு வணக்கம் கலந்த நன்றியை தெரிவித்துவிட்டு அடுத்த சுற்றுலா மையத்திற்குப்  புறப்பட்டோம்.

செம்பூர் நீலு ( நீலகண்டன் )
ஃப்ரீமாண்ட், கலிஃபோர்னியா
13-07-2014