Author: கிரேசி மோகன்

திருமால் திருப்புகழ் (131)

கிரேசி மோகன்

Tulasi priyam – #Krishnafortoday – Keshav

கண்ணன் திருப்புகழ்(வெண்பா)….
———————————————————-
’’கண்ணன் வெண்பாக்கள்’’
————————————————-

Experiments with Krishna series. #Krishnafortoday

ரங்கா, அலர்மேல்வாழ் மங்கா, அரவணைக்கும்,
அங்கா, அசுரர்க்(கு) அரியுருவில், -சிங்கா,
பிரித்தாலும் மங்கா, பரிபூர்ண பங்கா,
உரித்தாவாய் என்னை உவந்து….(302)

சகஸ்ரமவன் நாமம், சகலமவன் ரூபம்,
ரகஸ்யமவன் மாயை, ரசிப்போர், -அகஸ்மாத்தாய்,
வானம் வசப்பட, நானவன் தானென்ற,
ஞானத்தில் நிற்பார் நிலைத்து….(303)

தீனர்க்(கு) அருளூற்றாய், ஈனர்க்(கு) இருள்கூற்றாய்,
மீனமாய் ஏனசிம்ம வாமன, -மூணான,
ராம, கிருஷ்ண, கலிபுருஷ னாய்வந்த,
நாம சகஸ்ரனை நாடு….(304)

எங்குநாம் சென்றாலும், அங்கவன் முன்னம்போய்,
தங்கு தடைகள் தவிர்த்திடுவான், -செங்கண்மால்,
தாளிரெண்டைப் பற்றித், துதிப்போர்தம் தீவினை,
தாளிரெண் டாகும் தெறித்து….(305)

இங்கிருப்ப தெல்லாம், இறப்பும் பிறப்புமாம்,
எங்கெங்கும் என்றும் எதிலுமுள்ள, -செங்கண்மால்,
இல்லா இடத்திலும், இல்லா(து) இருந்திடுவான்,
பொல்லாப் பயலவனைப் பேணு….(306)

உண்டா கடவுளென்றால், உண்டவன் கண்ணனென்பேன்,
கண்டதுண்டா என்றால், கருத்தவனை, -விண்டுரைத்த,
ஆழ்வார்கள் பாட்டில், அதிலொன்றுக்(கு) ஈடாக,
பாழ்வாய் புகல்கையில் பார்….(307)

—————————————————————————————————————-

படங்களுக்கு நன்றி :

http://kamadenu.blogspot.in/2013_12_01_archive.html

July 3, 2014
திருமால் திருப்புகழ் (130)

கிரேசி மோகன்

Vaatsalyam series. #krishnafortoday – Keshav

கண்ணன் திருப்புகழ்(வெண்பா)….
———————————————————-
”கண்ணன் வெண்பாக்கள்’’
————————————————–

Krithi drawings – Shambo, Shambo, Shivashambo Swayambo… Keshav

பூவிருக்கும் உந்தியா, காவிருக்கும் வேங்கட,
கோவிலுக்குள் வாழ்கின்ற கோவிந்தா, -பாவிருக்கும்,
ஆழ்வார்கள் நாவிருக்கும், ஆண்டவா வாயிருக்க,
தாழ்வான போதுமென்னுள் தாவு….(296)

என்னத்தைக் கண்டேன்நான், உன்பித்தம் கொண்டதால்,
கண்ணைத் திறந்துகேள் கார்முகிலே, -உன்னொத்த,
தெய்வமிங்(கு) இல்லையென்ற, தற்பெருமை தேவையா,
தொய்வுறுமுன் தற்பரமே தோன்று….(297)

குன்றெடுத்த கோவிந்தன், கன்றணைக்கும் கோபாலன்,
என்றுனக்கு கோலங்கள் ஏராளம், -இன்றெனக்கு,
காட்சி அளித்திடுவாய், மோட்ச அரசாங்கம்,
ஆட்சிசெய் சாட்சிபூதம் ஆய்….(298)

வண்டரி யென்றரி, யாமலே வந்திரு,
புண்டரி காட்ஷத்தைப் பார்க்கின்ற, -பண்டரி,
விட்டலா செங்கலை, விட்டுவா வெவ்வினை
கொட்டுதே தேளாய்க் கடுத்து….(299)

நித்திய சூரியாய், நூற்றியெட்டாம் தேசத்து,
முத்தியை வேண்டேன் முளைக்கதிரே, -சத்தியம்,
நன்குணர்ந்து பேத, நிலைகடந்து பூமியில்,
நின்குணமாய் நிற்கவேண்டும் நான்….(300)

வீசும் புயலில், விளையாடும் தென்றலில்,
நாசிக்குள் சென்றுவரும் நம்மூச்சில், -ஓசை,
இலாத பொழுதிலும் ஓமென்(று) ஒலிக்கும்
கலாபக் கடவுளைக் காண்….(301)

—————————————————————————————————————

படத்திற்கு நன்றி:

http://kamadenu.blogspot.in/2013_12_01_archive.html

July 2, 2014
திருமால் திருப்புகழ் (129)

கிரேசி மோகன்

ஓவியம் : கேஷவ்

——————————————————————————————————-
கண்ணன் திருப்புகழ்(வெண்பா)….
—————————————————————
’’கண்ணன் வெண்பாக்கள்’’
—————————————————

ஓவியம் : கேஷவ்

பூந்தன மாதோடு, சாந்தமும் பூசிய,
காந்தனே கண்துயில்ஏ காந்தனே, -நான்தினம்,
நின்புகழ், நின்னெழில், நின்கதை, நின்னருள்,
வெண்பாவில் பாட விரும்பு….(290)

காண்பதுன் கோலத்தை, கேட்பதுன் ஜாலத்தை,
பூண்பதுன் நாமத்தை போற்றுதலாய், -கூன்பதும,
கொங்கையாள் மார்பில், குலாவும் அரங்கனே,
சங்கையா உன்தாள் சரண்….(291)

குறையெனக்குன் காட்சி, நிறையெனக்குன் நாமம்,
சரியெனக்குன் மாயையின் சூழ்ச்சி, -அரியுனக்கு,
இன்னும் தயக்கமேன், என்னைப் பிடித்திட,
கண்ணா அவிழ்த்திடுகண் கட்டு….(292)

கரத்தில் எழுத்தாணி, கற்பனையில் வாணி,
புரத்தை மறந்து புணர்வோம், -தரத்தில்,
குறையாத வெண்பாக்கள், கூடிப் பெறுவோம்,
இறையாத வாவா இசைந்து….(293)

தூணுண்டு வீட்டில், துரும்புமுண்டு, வாஞ்சையாய்,
நானுண்டு வாராய் நரசிம்மா, -பூநின்ற,
சாந்த இலக்குமியை, ஏந்திக் களிக்கின்ற,
காந்த வடிவில் கனிந்து….(294)

அய்யோ எனக்குரல், அன்றிட்ட பாஞ்சாலி,
மெய்யாடை மேவ மறைத்தனை, -அய்யா,
தவலையில் கட்டித், தயிராடை ஏற்றென்,
கவலையை கட்டிக் கசக்கு….(295)

—————————————————————————————————————

July 1, 2014
திருமால் திருப்புகழ் (128)

கிரேசி மோகன்

ஓவியம் : கேஷவ்

கண்ணன் திருப்புகழ்(வெண்பா)….
———————————————————-

”கண்ணன் வெண்பாக்கள்’’
————————————————–

ஓவியம் : கேஷவ்

சாந்த வதனமும், சர்ப சயனமும்,
நீந்தும் சரோருக நாபியும், -ஏந்தும்,
கரங்கள் நான்கும், கருத்த வடிவும்,
வரங்க(ள்) அளித்திடும் வஸ்து….(283)

எந்தையே எவ்வுயிர்க்கும், முந்தையே ஏகாந்த,
சிந்தையே, சிக்காத விந்தையே, -கந்தையே,
ஆனாலு(ம்) என்நெஞ்சைக், கட்டிக் கசக்கிடு
தூணாளும் சிங்கா தயவு….(284)

பூதங் களால்வந்த, ஏதங் களாயிரம்,
மாதங் களில்நின்ற மார்கழியே, -பாதங்கள்,
ஓங்க உலகளந்த, உத்தமரே என்குறை,
நீங்க எனதுள்ளே நில்….(285)

வீழும் மலையருவி, சூழ்கின்ற வேங்கட,
ஏழு மலையானை ஏத்துமினோ, -வாழும்,
கடன்பட்ட மாந்தர்க்கு, கோவிந்த நாமம்,
புடமிட்டப் பத்தரைப் பொன்….(286)

ஏங்கா மலிருக்க, ஏங்கு கிறேன்பாம்பில்,
தூங்காமல் தூங்கும் திருமாலே, -சாங்கிய,
யோக மதையருள்வாய், யோக்கியதை பார்க்காதே,
மோகமுள்ளை வைத்ததுன் மாசு….(287)

நீதான் நானென்றும், நான்தான் நீயென்றும்,
சேதார மற்றென்றும் சேர்ந்திடுவோம், -ஏதோ,
இலக்கணம் காட்ட, எழுதவில்லை வெண்பா,
விலக்கணும் மாய விரிப்பு….(288)

மூலனே மல்லாண்ட, தோளனே விண்ணளந்த,
நீளனே, நற்கீதை நூலனே, -மாலனே,
கோகுல பாலனே, கோதைம ணாளனே,
ஆகுலம் தீர்த்தென்னை ஆள்….(289)

——————————————————————————————————————-

படங்களுக்கு நன்றி:

http://kamadenu.blogspot.in/2014_05_01_archive.html

June 30, 2014
சிறுவா புரி சதகம்

கிரேசி மோகன்

கவியோகியார் கந்தரலங்காரம் என்றவுடன் என் நினைவுக்கு கந்தரனுபூதி வந்தது….கபாலி கோயில் ‘’முத்துக்குமாரச்ச்சாமி’’ சன்னிதி சுவற்றில் பொறிக்கப் பட்டிருக்கும் ‘’கமலா குகசூ சுககுங் குமதே’’ சந்தத்தில் அருணகிரியார் எழுதிய ‘’கூகா யெனயென் கிளை கூடியழ….பெம்மான் முருகன் பிறவான் இறவான்….குருவாய் வருவாய் குகனே அருள்வாய்’’ வரிகள்….எனது டாக்டர் திருமணத்திற்காக காளஹஸ்தி போகையில், டிரைவர் பாதி வழியில் ‘’சார்….வலது கை பக்கம் போனா ‘’சிறுவாபுரி முருகர்’’ கோயில் வரும் என்றார்….நேரம் இல்லாததால் போக முடியவில்லை….ஆனால்….பூசலா நாயனார் போல காளஹஸ்தி போய் வருவதற்குள்,மனசுக்குள் ‘’கந்தரனுபூதி’’ மெட்டில் 25 பாடல்கள் எழுதி எனக்கு எழுத்தறிவித்த பூனா நண்பன் சு.இரவியிடம் படித்துக் காட்டினேன்….அவன் ‘’சிறுவாபுரி சதகம்’’ எழுதுமாறு பணித்தான்….எழுதியதை பகிர்ந்து கொள்கிறேன்….அடியேன் குறையொன்றும் இல்லா கிரேசி….நிறை இருப்பதாக நம்பும் மோகன்…..இத்துடன் அடியேன் வரைந்த முருகர் ஓவியத்தையும் இணைத்துள்ளேன்

————————-
காப்புச் செய்யுள்
———————-
“உரைபா ரதத்தை ஒருகொம் பொசித்து
தரைசே ரவடித் தருள்வே ழவரே
சிறுவா புரியார் சதகம் எழுதத்
தருவாய் எனக்குத் தமிழும் திறனும்”….

சிறுவாபுரி சதகம்….கந்தரனுபூதி பாதிப்பில்….

ஓவியம் : கிரேசி மோகன்

“தனியா னைசகோ தரனார் துணையால்
வனமா துடல்மே விடவே டுவனாய்
தனியாய் வருவேல் தணிகா சலனே
வினைதீர்த் திடவா சிறுவா புரியே”….(1)

“அடடா எனவூர் அனுதா பமுற
சுடுகா டுடலே கிடுநாள் துணையாய்
உடனே வருவாய் உமைபா லகனே
இடுவாய் பிறவா இடமே விடநான்”….(2)

“புதனோ டொளிசேர் பொலிவாய் உமையாள்
சுதனே சிவனார் சிறுவா புரிவாழ்
மதலாய் பெருமாள் மருகா வருவாய்
அதுவாய் இதுவாய் எதுவா கிலுமாய்”…(3)

“உனைநா னறிவேன் உமையாள் சுதனா
திணைமா துடன்சேர் தணிகா சலனே
எனைநா னறியேன் எழுவாய் பயனாய்
சினைநான் உயிர்நீ சிறுவா புரியே”….(4)

“பணநா கவணை பெருமாள் மருகா
வானமா துடன்வா னவரா னையுடன்
மனவே கமுடன் மயிலே றிடவே
ஷணமே வருவாய் சிறுவா புரியே”….(5)

“ஆசா பாச மதனால் உலகில்
காசும் புகழும் குறியாய் உழலும்
நீசன் எனையுன் நிலைசேர்த் திடவே
வாஷண் முகனே வழிகாட் டிடவே”….(6)

“நமச்சி வாயன் நுதல்வாய் புதல்வ
உமைச்சி வேலை உடையோய் படையாய்
சுமக்கத் தாயார் ,சிறுவா புரியே
நமர்க்கை சேரா நிலைநாட் டிடுவாய்”….(7)

“தீயாய் வளியாய் திசைமண் ஜலமாய்
காயாய் மலராய் கனியாய் மரமாய்
வாயாய் ருசியாய் வயிறாய் பசியாய்
நீயாய் மறைவாய் நிருவா கனனே”…(8)

“அய்யோ யெனயென் கிளைகூ டியழும்
அய்யோ மணவா ளரவர் வரவால்
அய்யா அதனால் அனுபூ தியுறச்
செய்யாய் முருகா சிறுவா புரியே”….(9)

“அண்ணா மலையும் அவன்பா திபடர்
உண்ணா முலையும் சிறுவா புரியில்
முன்னால் இருக்க முகநா ணமுறும்
பெண்ணா லோலப் பிடிமால் மருகா”….(10)

“மரணா கதியில் மனிதா செலுமுன்
சரணா கதிசெய் சிவனார் செவியில்
மறையோ தியவன் திருவே ரகனை
சுரர்நா யகனை சிறுவா புரியை….(11)

“அத்திக் கிறைவா அமரா வதியின்
வெற்றிக் குதவும் விசுவேஸ் வரரின்
நெற்றிக் கனலே நெடுமால் மருகா
சுற்றத் துடன்வாழ் சிறுவா புரியே”….(12)

“எதிரா ஜனரின் எஜமா னவனை
பதிநூ றுடன்எண் படர்மால் புகழை
துதிசெய் அருணை கிரிபோல் எழுத
உதவத் தமிழே உடனே வருவாய்”….(13)

“அயனார் அரியார் அறியா நுதல்வாய்
நயனார் புதல்வா நரையும் திரையும்
மயமாய் இவனா குமுனே வருவாய்
பயனாய் சிறுவா புரிவாழ் பொருளே”….(14)

“ஓரா றுமுகம் ஒளிரும் இருதாள்
ஈரா றுபுயம் இறைவா மறவேன்
சேறாம் உலகில் செந்தா மரையாய்
போரா டஅருள் பஞ்சா மிருதா”….(15)

“பாதிக் கொருபெண் பரமேஸ் வரியின்
ஆதிக் கமுறும் அரனார் நுதற்க்கண்
ஜோதிக் கருவே சிறுவா புரியில்
சாதித் தருள்வோய் சரணா கதியை”….(17)

“கிரௌஞ்ச மலையைக் கூழா கிடவேல்
எறிஞ்ச முருகா என்றும் இளையோய்
குறிஞ்சி மலைவாழ் கிழவா தமிழைத்
தருஞ்சி வைமுலை திகழ்வோய் சரணம் ….(18)

“கூறும் அருணை கிரியின் புகழில்
ஏறும் மயிலோ டெழில்சே வலுடன்
சூரன் பதுமன் சிரம்வாங் கியவா
சேரும் தமிழே சிறுவா புரியே”….(19)

“கல்லா லமர்வோன் காதில் ப்ரணவச்
சொல்லாழ் பொருளை ஸ்லாகித் தவனே
எல்லாம் அறிந்தும் எனைநான் அறியேன்
வல்லான் ரமணர் வழிசேர்த் திடுவாய்”….(20)

“தள்ளா டிவுடல் தடுமா றிடவாய்ப்
பல்லா டிடமண் புதையப் படரும்
புல்லா டிடநான் போகா வகையென்
உள்ளா டிடவா உமையாள் சுதனே”….(21)

“வடமா லையுடன் வனமா லையணி
திடமா ருதிதோ ழனவன் மருகா
கடலா டிடுவாய் குடிபோ கியவா
உடனே வருவாய் உயிர்மெய்ப் பொருளாய்”….(22

“வேதா கமநூல் வழிபோ னதிலை
ஏதா கிலும்செய் துனைஏத் தவிலை
சாதா ரணநென் சகமா யையற
நீதான் வரணும் நிகமான் தகனாய்”….(23)

“இம்மா மடையன் இறைவாழ் வதனில்
எம்மா திரியும் இசையான் எனவே
சிம்மா சனமுன் சீர்பா தமுற
சும்மா இருயென் றொருசொல் அருளேன்”….(24)

“சொப்பன வாழ்வில் சுகமாய் உறங்கி
இப்புற உலகே இயல்பென் றிருந்தேன்
அப்பர ஞானம் அடியேன் பெறவே
செப்பிட வாராய் சிறுவை முருகா”….(25)

“எஞ்சா மியெனக் கருளே ரகனே
பஞ்சா ம்ருதமே பழனிக் குமரா
அஞ்சாய் எனவுன் அடியார்க் கருளும்
செஞ்சாந் துநிறச் சிறுவை முருகா”….(26)

“சிந்தை மகிழச் சிவனார் செவியில்
முந்தைப் பொருளின் முழுமை உரைத்த
கந்தச் சுவையே செந்தூர் வளரும்
சந்தக் கவியார் சிறுவை முருகா”….(27)

“இருவாட் சிமலர் இருட்கூன் தலணி
குரவாட் சியர்கோன் குலவா ரிசினை
கரிசாட் சியமாய் கரம்கொள் சிறுவா
புரியாட் சியமர் பொலிவே முருகா”….(28)

“அறுகார்த் திகையர் ஒருமூர்த் தியென
உருவாக் கியவா உமைபா லகனே
முறைமா மன்மகள் குறமா தணைய
சிறுவா புரிவாழ் சிவதே சிகனே”….(29)

“மலைவாழ் முகிலே ,அலைவாய் அமுதே
சிலைஜா னகிரா கவனார் மருகா
குலவே டமகள் குறமா தணைய
சிலையா கியருள் சிறுவா புரியே”….(30)

“கண்மாய் தனில்கார்த் திகைமங் கையரால்
ஒண்ணா னவனே ஓமா றுமுகா
என்னா வியுடல் பொருள்யா வையும்நீ
நன்நாள் இதுவே நலம்சேர்த் திடவா….(OR )
அண்ணா சிறுவை அழகா வருக”….(31)

“மயில்வா கனனே அயில்வே லவனே
கயிலா யசிவன் குருவா னவனே
பயிலா தழின்தேன் பரஞா னமதை
மயல்தீர்த் தருள்வாய் முருகா சரணம்”….(32)

“பிடிவா தமுடன் பிழைசெய் திடுமென்
கடிவா ளமிலாக் குதிரைப் புலனை
அடிபோ ட்டதைஆண் டருளச் சிறுவை
வடிவே லவரே வருவீர் குருவாய்”….(33)

“வனபாக் கியமாய் வள்ளி இருக்க
தனபாக் கியமாய் தாரிணி சுரக்க
சினம்போக் கியவா செந்திற்க் கடலில்
மனபாக் கியமாய் வழிகாட் டிடவா”….(34)

“கிழவே டமுடன் குறமா தணையும்
மழுமான் சிவனார் விழிபா லகனே
அழவேண் டிவரும் அடியார் வினையை
விழத்தீண் டிடுவேல் விடுநா யகனே”….(35)

“வானாய் நிலநீர் வளியாய்க் கனலாய்
ஆணாய் அலியாய் அவளாய் அருவாய்
ஆனாய் ஜடமாய் அறிவாய், ரமணர் (OR )அகந்தை
நானாய்ன் துனைநா டிடவா முருகா”….(36)

“எப்படி வருவான் எமனென் றறியேன்
அப்படி வருமுன் அனுபூ தியினை
இப்படித் தானென் றிரவுக் கனவில்
செப்பிட வாராய் சிறுவை முருகா”….(37)

“முற்றம் வரையில் மனையாள் வருவாள்
சுற்றமும் பெற்றதும் சுடுகா டுவரை
கற்றதும் கொண்டதும் கால்தூ சிபெறா
நற்றமி ழேவா நமனார் வருமுன்”….(38)

“மாவாய் பிளந்த மதுசூ தனர்க்கு
ஆவாய் மருமான் அவன்சோ தரியால்
வாவா எனகா டழைக்கும் தருணம்
போபோ எனவீ டுபுகுத் திடவா”….(39)

“தந்தைக் கொருமந் திரம்தந் தவரின்
சிந்தைக் கபிமா னசிரோன் மணியே
கந்தக் கனலே குருவாய் அருள்வாய்
மந்தப் பயலென் மதம்மாற் றிடவே”….(40)

“வாயிட் டயென்பின் வடித லென்றே
நாயிட் டமொடு நறுக்கும் நாவை
ஆயிற் றதுபோல் அடியேன் வாழ்வு
பாயுற் றுடும்முன் பிணியோட் டிடவா….(41)

“தப்பா னவாழ்க்கை தவறா னசேர்க்கை
இப்பா வியுற்றான் இதனா லெமன்கை
ஒப்பா ரிவைத்தூர் அழுமுன் செவியில்
செப்பாய் முருகா சிவஞா னபோதம்”….(42)

“திருவோ டணையும் திருமால் மருகா
திருவோ டணையும் திருவா திரையான்
பிறைவான் நுதற்கண் புதல்வா ,கருணை
சிறுவா புரிவாழ் சிறுவா புரிவாய்”…(43)

“வாசத் துழாய்மால் வயிற்றுப் புதல்வி
நேசக் குறத்தி நினைவோய், திருத்தைப்
பூசத் திறைவா ப்ரணவப் பொருளை
ஈசர்க் குபதே சிகனே இறைவா….(44)

“வருந்தாய் மனமே வருவான் முருகன்
பிருந்தா வனமாய் பொழிவான் அருளை
கருந்தா மரைக்கண் குறத்தி மணாளன்
திருந்தா தவர்க்கும் மருந்தா கிடுவான்”….(45)

“எலிவா கனரின் இளையோய், சபரிப்
புலிவா கனர்முன் பிறந்து வளர்ந்த,
கிலிநா கமுறக் கிளம்பும் அகவல்
ஒலிவா கனரே உடனே வருக”….(46)

“கீரன் துதிசெய் ஆற்றுப் படையை
பேரன் புடனே ஏற்றக் குகையுள்
சேரும் புலவர் சிறைமீட் டிடவே
கூர்வேல் எரிந்து கிரிசாய் குகனே”….(47)

“சிறுபா லனென மதியா துசெலும்
மறைநான் முகனார் மிகுகர் வமற
சிறைசே றயிடும் சிவதே சிகனே
கரைசேர்த் திடுவாய் கடலா டுகுகா”….(48)

“கன்றா டிடவேய்ங் குழலோன் மருகா
மன்றா டிடுவோன் மகனே புவியில்
குன்றா டிடுவோய் குருவாய் வருவாய்
மன்றா டுகிறேன் மனம்வைத் தருள்வாய்”….(49)

“ஆகா இவனே அதிமே தையென
பாகாய் உருகும் பொருளுள் ளவரை
மோகா சனத்தில் முனியாய் இருக்க
ஏகாக் ரமதை எளிதாக் கிடுவாய்”….(50)

“மாலா டிடும்யவ் வனம்சொப் பனமே
கோலா டிடும்மூப் பதுநிச் சயமே
வாலா டிடும்வாழ்க் கையைவிட் டுவடி
வேலா யுதன்தாள் தலைவைத் திடுவாய்….(OR )
வேலா யுதன்தாள் வனசம் தொழுவாய்”….(51)

“நூறோ டிடவே தேரோ டியமால்
சீரா டிடுமூர் சிறுவை மருகன்
ஈறா றுபுயன் பேரா றுமுகன்
நீறா டநுதல் நினைவாய் மனமே”….(52)

“கள்ளப் புலனைந்த் துறவா லகந்தை
மெல்லப் புகுந்து மமதை மனமாய்
உள்ளத் தறையில் உனைபூட் டிடுவான்
வள்ளிக் கணவன் வாஞ்சைக் கிலைதாள்”….(53)

“புதிராம் புவியில் பொழுதோட் டிடவே
சதிரா டியபின் சலியும் மனமே
எதிரா ளியெமன் எதிரே கிடுமுன்
கதிர்வே லவனே கதியென் றிடுவாய்”….(54)

“மமகா ரமதை மனிதா விடுவாய்
எமனே கிடுமோர் எழிற்கா லையிலே(one fine morning )
சுமையா கிடுவாய் சுடுகா டுவரை;
சமபா வமுற சிறுவா புரிசேர்”….(55)

“பரங்குன் றலைவாய் பழம்வீழ் பொழில்,கோல்
கரங்கொள் பழனி ,குமிழ்வாய் சிவனார்
கரங்கொள் கிரியே ரகமும் தணிகை
வரங்கொள் அடியார் வரவீ டுடையோய்”….(56)

“முத்தாய் அருணை முனிநா எழுதிக்
கொத்தாய் அடைந்தாய் கவிசந் தமதை
அத்தா அதுபோல் அடியேன் அளிப்பு
கத்தா ழையெனின் கமல மெனக்கொள்”….(57)

“கிரியார் கந்த ரனுபூ தியின்மேல்….(OR )
அருணை கிரியார் அனுபூ தியின்மேல்
வெறியால் விளைந்த வடிகா லிதுவே
சரியா தவறா சதகம் அறியேன்
விரிஆர் வமிதை வளர்பக் தியென”….(58)

“பாக்கள் வருதல் பனிமா மலையோன்
தீக்கண் மகனுன் தயவென் றெண்ணி
ஊக்க மடைந்தேன், ஓங்கும் தமிழின்
தாக்க மெனநீ திரைபோ டாதே”….(59)

“அம்பாள் மகனே அரிமால் மருகா
உன்பால் உருகி உனைநான் அடைய
வெண்பா சதகம் வடித்தேன் ,புகழின்
சம்பாத் தியமாய் சொல்லி விடாதே”….(60)

“எமாதி கணமே கிடுநாள் ரமண
சமாதி நிலையில் ஸ்திரமாய் இருக்க
ரமாதி மாலர் ரமிக்கும் மருகா
உமாதி ஈசர்க் குகந்தோய் அருள்வாய்”….(61)

“உள்ளக் கனகல் லையுடைத் தெறிய
மெல்லத் தலைநீட் டிடு(ம்)ஆன் மவொளி
புல்லைப் புலியாக் கிடுமிக் கலையை
தெள்ளத் தெளிவாக் கிடுதே சிகனே”….(62)

“அலையும் மயிலை, அயில்வேல் அணிசே
வலையும், வனவான் வளையார் தமையும்,
மலையும், மலையே றிவளர் உனையும்,
முளையும் சதகம் மதிலா டிடவை”….(63)

“தாரா சுரன்தன் தவவாழ் வதனால்
பேரா சையுறப், பலிவாங் கிடவே
வீரா சனத்தோன் விழிவாய் பிறந்த
ஆரா அமுதே அமரர் துணையே”….(65)

“கெட்டாள் திருந்தி குருவாய் அழைக்க
சிட்டாய் வருவான் சும்மா இருக்கத்
தொட்டோ திடுவான் திருவா சகத்தை
முட்டாள் மனமே முனியச் சிறுவன்”….(66)

“பந்தத் தைவிடு பாசத் தைவிடு
சொந்தத் தைவிடு சோகத் தைவிடு
சிந்தித் துவிடு சிறுவா புரிவாழ்
கந்தத் தனைநீ கயிலா யமுற”….(67)

“சம்பந் தாண்டான் ஸ்தம்பித் திடவே
நம்பும் கிரியார் நவிலச் சந்தம்
கம்பம் தனிலா டியெழும் இளையோய்
உம்பர் துணைக்கு உருவா கியவா”….(68)

“கனிகை கிடைக்க ககனம் சுற்ற
புனிதர் கணேச பிள்ளைக் களிக்க
தணியா சினத்தில் தண்டா யுதனாய்
முனியாய் பழனி மலையே றியவா”….(69)

“அமரா வதியின் அணிகா வலனாய்
சமரால் கொடுசூ ரனுடல் கெடவே
உமையாள் கொடுவேல் உதிர்த்து அலைவாய்
குமரா சுரர்பெண் கரங்கொள் முருகா”….(70)

“எதிர்பார்த் திருந்த எமனே ளுகையில்
சதுர்வே தனைவெஞ்ச் சிறைவைத் திடுவோய்
கதிர்கா மமதில் கனிந்து பழமாய்
உதிர்சோ லைமலை உறவே வருக”….(71)

“பழுதூ றியவாழ் வினில்போக் கிரியாய்
பொழுதோட் டினைஐம் புலனார் வமதால்
தொழுதேத் திடுவாய் கழுகா சலனை
முழுதாட் கொளவான் மயிலே றிடுவான்”….(73)

“அயலார் சிரிக்க அருகார் வெறுக்க
மயலா டிமகா மடுவீழ் கையிலே
செயலா கிடுசிந்தை தையில்சீர் மிகவே
வயலூர் வளர்வாழ் வதன்தாள் விழுங்கோள்”….(74)

“பதினா றுபெரும் பெருவாழ் வுபெற
அதிகா ரவிடை அமர்வோன் நுதல்நீ
றதுகா யவுதித் தனலாய்ப் பிறந்த
பதியா றுடையோன் பதம்மே விடுவாய்”….(75)

“சேதா ரமிலா செய்கூ லியிலா
ஆதா ரமருள் அயில்வே லவனின்
பாதாம் புயமே பரமார்த் திகமாம்,
பேதாய் மனமே பணிந்தேத் திடுவாய்”….(76)

“மனமா ஸனமாய் மயில்வா கனமாய்
குணம்கோ ழியெழுப் பதிகா லையுமாய்
முனைவேல் மதியாய் மனையுன் மலையாய்
தினமாண் டிடவா திணைமா தணைவோய்”….(77)

“திகழா பரணம் திடமார் பசைய
நகைபூட் டிடநா டகமே டைதனில்
நகைப்பூட் டிடவா நடுநா யகமாய்
நகைபூத் திடுவாய் நதிபா லகனே”….(78)

“அதிகா ரமவா அழுக்கா றவச்சொல்
குதிகோ பமிலா குணம்வாய்த் திடவே
சுதிவள் ளுவனார் சொலும்வார்த் தையினை
மதியேற் றிடவை மருதா சலனே”….(79)

“மிகவாட் டமுறும் மனிதா ,ரமண
அகநாட் டமுற அங்குஷ் டமென
குகநாட் டியம்காண் குகையாழ் மனதில்
சுகசாட் சியமாய் சும்மா இருநீ”….(80)

“குசனார் லவணார் அசுவ மதைத்தம்
வசமா கயிரா கவன்வா ளியெதிர்
அசலம் சிறுவா புரிவாழ் அழகா
வசன முரைக்க வருவாய் குருவாய்”….(81)

“சோணை ரமணே சரைப்போல் சதமாய்
ஞானம் பெறநா டிடுசெந் தமிழின்
மோனை எதுகை யெனவள் ளியும்தே
வானை தழுவும் வடிவே லவனை”….(82)

“கங்கா தரனின் கபாலி புரியில்
சிங்கா ரமயில் சுமையாய் அமர்ந்து
மங்காப் புகழை மயிலைக் களித்தோய்
எங்கா துரைக்க சங்கோ சமதேன்”….(83)

“முருகா சரணம் மல்லாண் டிடுவோன்
மருகா சரணம் மனைவீ டுதர
அருகா மையிலூர் சிறுவா புரிவாழ்
குருகா வலதோள் கொடுதோ ழமையே”….(84)

“பிடிவா தகுணப் புலனால் அடைந்த
பிடிவா தகபம் பித்த மஜீர்ண
நொடிநோய் களெமை நெருங்கா தபடி
கொடிகோ ழியைஏந் துகலா பகுகா”….(85)

“காவித் துணியில் கரைவேட் டியினில்
தாவித் திரிந்தேன் திசையே றுமயில்
ராவுத் தனனுன் ரசபா தமதை
சேவித் துணர்ந்தேன் சகமே பரமாய்”….(86)

“பணக் காரனுமே பலசா லியுமே
கணக் காளியுமே கரிநாள் தனிலே
மனக்லே சமுடன் மடிசாய்ந் திடுவான்
மனக்காய் எதற்கு மலைவாழ் பழமே “….(87)

“சூதா டிடுவாய் சுகமேந் திடவே
மாதா டிடுவாய் மனமே ,சுமப்பாய்,
வேதாந் தியென வெறும்கோ வணமாய்
தீதாண் டிடும்தென் பழனிச் சுவையை”….(88)

“பாகத் துமையாள் நெஞ்சார் வமுறும்
போகர் சமைத்த பஞ்சா ம்ருதமே
ஏகப் பொருளே எஞ்சா மியெனக்
காகத் திறவாய் கோயிற் கதவை”….(89)

“தெண்டா யுதமோர் திருக்கை பிடிக்க
கொண்டாய் இடுப்பில் கரமொன் றினைநீ
பண்டா யநிலை பரமார்த் திகத்தை
விண்டோ திடுஆ விநன்வாழ் முருகா”….(90)

“மந்தா கினியேந் திடமா துமைபால்
வந்தாய் பெறவே வடிவேல் தனையே
பந்தா டிடுதே புலனைந் துமெனை
தந்தா யுதன்பின் தவழ்வோய் அருள்வாய்”….(91)

“இக்கா சினியில் இழவே புரிந்து
அக்கா சியில்அந் திமம்கொண் டிடுவாய்
முக்கால் சிவனம் முருகன் அருள்வான்
உக்கார் சிவனே உறும்கா சியதே”….(92

“சுப்ர மணிய புஜங்க மதிலே
சர்ப்பம் எனஆ டினைசங் கரனால்
தர்பை வழித்த தமியேன் திருநா
அற்பம் இதிலா டிடுமண் புழுவாய்”….(93)

“காட்சி கொடுத்து கற்கண் டளித்து
தீட்ச தரின்வாய் மொழிகீர்த் தனையாய்
ஆட்சி புரிந்தோய், அவர்தம் குருவாய்
தீட்ஷை கொடுத்த தணிகை குகனே”….(94)

“ஒலிபா ஷைவரா துருகித் தவிக்க
கலிவெண் பாவை குமர குருவுக்
அளிசீ ரலைவாய் அகக்கா ரிகளோ(டு)
ஒளியாய் விளங்கும் உயர்வான் பதியே”….(95)

“பழம்காய் இலைஆல் மரம்வேர் விதையாய்
விழபுள் விழுங்கி அதைவே றிடமாய்
புழங்கப் புதைக்கப் புதிதா வதுபோல்
விழுவாய் கனலாய் எழுவாய் புனலில்
தொழும்தாய் வளர்சேய் பழனிக் குமரா”….(96)

“சதிசெய் திடுசங் கரன்கைக் கனியால்
பதியாய் திருவா வினன்வாழ் பரமே
இதிகா சபுரா ணமறை புகழும்
துதிகே சவனார் மருகா துணைவா”….(97)

“சிறுவா புரியில் சதகம் தொடங்கி
திருவா வினன்சீர் தலத்தில் முடிய
நிறைவேற் றியவா நதிவே கமுடன்
மறவேன் உனைமால் மருகா சரணம்”….(98)

“பாலும் பழமும் பஞ்சா ம்ருதமும்
கோலும் இடுப்பில் கரமும் கொடுப்பேன்
நாளும் இவன்நா டகமே டையில்செங்
கோலும் குடையாய் கொடியேந் திடச்செய்”….(99)

“தணிகை ,பரங்குன், ரலைவாய் , திருவா
வினன்கை கனிகொள் பொழிலே ரகமாய்
கனிகை இருக்க இவர்க்காய் அவர்க்காய்
இனிகை ஏந்தாய் ,இறைசேய் பதம்சேர்”….(100)

சுபம்
முடிவு
மங்களம்

June 30, 2014
திருமால் திருப்புகழ் (127)

கிரேசி மோகன்

ஓவியம் : கேஷவ்

———————————————————————————————-
கண்ணன் திருப்புகழ்(வெண்பா)….
——————————————————–
”கண்ணன் வெண்பாக்கள்’’
——————————————-
பக்தகோ லாகலன், முக்திமூ லாதரன்,
சக்தி உமையாளின் சோதரன், -சித்தி,
வரம்நூறு தந்துந்தன், வாழ்வில் மலர்வான்,
பரணூர் பிரேமிக்காய்ப் பூத்து….(277)

மூப்பிழைய, மூச்சடைக்க, சாப்பாடே நஞ்சாக,
கூப்பிடாத காலன் கரம்குலுக்க, -ஆப்பழியும்,
அந்திம நாளேனும், அய்யோ மறவாது,
நந்த குமாரனை நம்பு….(278)

ஆழியை பூமியை, நாழிகை நேரத்தில்,
ஊழியில் உண்டுமிழ்ந்த உத்தமனை, -தாழியுள்,
வெண்ணையை தான்வளர்ந்த, மண்ணையும் உண்ணவரும்,
கண்ணனை நெஞ்சே கருது….(279)

போகமவன் ஐம்புலனில், யோகமவன் மெய்ப்பொருளில்,
தாகமவன் துய்ப்போர் தரத்தினில், -வேகமவன்,
வேண்டும் அடியார்பணிக்கு, பாண்டுமவன் தோழனவன்,
யாண்டுமவன் ஆயர்தம் யாப்பு….(280)

படநச் சரவில், படுத்துறங்கும் அச்சுதன்,
வடபத்ர சாயியாய் வந்தவன், -வெடவெடத்த,
மாரியில் வெற்பெடுத்தாய்ச், சேரியைக் காத்தவன்,
காரிருள் வண்ணன்தாள் காப்பு….(281)

காயில் பழமாகி, நோயில் கிழமாகி,
பாயில் உழல்கின்ற காயத்தை, -ஆயுள்,
முழுதும் சுமந்தேன், முழுமுதலே ஈதுன்,
பழுதன்றோ பாம்பணையோய் பார்….(282)

——————————————————————————————————————

June 29, 2014
சுஜாதா சார்….கிரேசி மோகன்….

கிரேசி மோகன்

என்னமோ தெரியவில்லை எனக்கு இன்று ஏக மசக்கை, இந்தச் ஷணமே அமரர் ‘’சுஜாதாவின்’’ ‘’கற்றதும் பெற்றதும்’’ படித்தே ஆகவேண்டுமென்று….சுஜாதாவின் தோழரும் எனது நண்பருமான திரு.ரகுநாதன் அவர்களை தொடர்பு கொண்டேன்….உடனடியாக க.பெ வின் பாகம்-3 அனுப்பியதோடல்லாமல், மற்ற பாகங்களையும் வாங்கி அனுப்புவதாக கூறியிருந்தார்….ஏற்கனவே பல சுஜாதா புத்தக தானம் எனக்காக நிறைய செய்திருக்கிறார்….அவரிடம் சொன்னேன் ‘’இம்முறை ‘’கற்றதும் பெற்றதும்’’ தாங்கள் விற்றதும் அடியேன் வாங்கியதுமாக இருக்கட்டுமே என்று….மனுஷன் மறுத்து விட்டார்….பழையபடி க.பெ தும்மும் இலவச இணைப்பாகி விட்டது….ஓஸியில் படித்தால்தான் கிரேசிக்கு ஒட்டும் போலிருக்கிறது….மேலும் விற்க சுஜாதா என்ன வெறும்பொருளா….எழுத்தச்சன் அவர் பரம்பொருள் அல்லவா….எதற்கு இத்தனை முகாந்திரம் என்றால்….பாகம்-3 ல் சுஜாதா சார் என்னுடைய கவிதையை போட்டுள்ளார்….
ரீ-டெலிகாஸ்ட் செய்ததில் , அவருக்கு நான் காண்பித்த ‘’பெருமாளே சரிதானா’’ என்ற கவிதைகள் நினைவுக்கு வந்தது….அதில் ஒன்றுதான் க.பெ தும்மில் வெளியாகியிருந்தது….நன்றி ரகு சார்….

ரகுநாதன் சாரின் அன்புக் கட்டளைக்கேற்ப , சுஜாதாவின் ‘’ஸ்ரீரங்கத்து தேவதைகள்’’….இரா.முருகன் சாரின் ‘’ரெட்டைத் தெரு’’ பாதிப்பில் ‘’மை லவ்வாப்பூர் டைம்ஸ்’’ என்ற எனது மயிலை மந்தைவெளி அனுபவங்களுக்கு சுஜாதா சுழி போட்டு விட்டேன்….பார்ப்போம்….முருகனுக்கும், சுஜாதாவுக்கும் இருந்த மூளையும், திறனும் அடியேனுக்கு இருக்கிறதா என்று….

சுஜாதா சார் பரமபதம் எய்திய போது, அவரது ஸ்கெட்ச்சையும், ஒரு இரங்கல் வெண்பாவும் என்னால் இயன்ற அஞ்சலியாக செய்தேன்….அவைகளையும் இணைத்துள்ளேன்….

எழுத்தாளர் சுஜாதா மறைவால் வருந்தி
————————————————-
கதையா ? கவிதையா ? கட்டுரையா ? கேட்போர்க்(கு)
எதையும் வழங்கும் எழுத்துப் -புதையலே
ஸ்ரீரங்க தேவதையே ஏரங்க ராஜனே
பாரிங்கு நீரின்றி பாழ்….

சுஜாதா சாரிடம் அடியேன் படித்துக் காட்டிய ‘’பெருமாளே சரிதானே’’….

” பெருமாளே சரிதானே ”
—————————–

பால் குடத்தை நோக்கிப் படையெடுக்கும் எறும்புகளாய்
தோல் குடத்தைத் தொத்த வரும் தீவீர வியாதியெலாம்
மால் படுத்த அரங்கன் மணிவண்ணன் பேர் சொல்ல
வால் சுருட்டிக் கொள்ளுமாமே ,பெருமாளே சரிதானே….(1)

நாய் வால் நிமிர்த்தலுக்கு இணையான நாற்பதிலே
நோய்வாய் கிடந்து வளைந்த நேரத்தில்
தாய்போல் தேற்றி தூக்கி நிறுத்த வல்ல
மாயா ஜால மருந்தாமே பெருமாளே சரிதானே….(2)

கானல்நீர் இளமைக் காலம் கண்சிமிட்டும் நேரம்
கூனல் முதுகில் முதுமை மூப்பு மூட்டை பாரம்
நாணல் யமுனா நதி நாதன் திருநாமம்
பூணல் பொலிவாமே பெருமாளே சரிதானே….(3)

முயலாமை கதையாக முடிகின்ற வாழ்க்கையின்
இயலாமை தன்னை இளமையிலே உணர்ந்து
செயலாவையும் ஸ்ரீரங்கனுக் களித்தால்
பயமில்லையாமே பெருமாளே சரிதானே….(4)

கள் ஒழுகு மலர் தேடி கருவண்டு மொய்ப்பது போல்
உள் ஒழுகும் உணர்வுக்கு ஓடிவரும் ஒப்பில்லா
கள்ளழகன் கார்வண்ணன் காகுத்தன் கண்ணனென்று
தெள்ளமுதப் பிரபந்தம் சொல் பெருமாளே சரிதானே….(5)

சிலந்திதன் வலையில் சிக்கிடும் பூச்சியாய்
புலன்கள் ஐம்பொறி புகுந்து புலம்பாமல்
நலம்தரும் நாராயணன் நாமம் சொன்னால்
பலன் பரம் பதமாமே பெருமாளே சரிதானே….(6)

பத்தியம் இல்லாத பகாசுர வாழ்க்கையை
சத்தியம் என்றெண்ணி சஞ்சலம் அடைவோர்
நித்திய கல்யாண வைபவன் அருளால்
முத்தி அடைவாராமே பெருமாளே சரிதானே….(7)

இல்லாததை இருப்பதென்று எண்ணிக் குவித்து
செல்லாத இவ்வாழ்வை செலவழிக்க முயலாமல்
மல்லாண்ட மணிவண்ணன் மலர்பதம் பற்றினால்
எல்லாமும் தெளிவாமே பெருமாளே சரிதானே….(8)….கிரேசி மோகன்….

June 29, 2014
திருமால் திருப்புகழ் (126)

கிரேசி மோகன்

Bhagavatha: Akrura Darshanam – Keshav

கண்ணன் திருப்புகழ்(வெண்பா)….
————————————————————
”கண்ணன் வெண்பாக்கள்’’
—————————————————

ஓவியம் : கேஷவ்

பயமாசை கோபம், பொறாமைப் பழுக்கு,
மயமான மக்கு மனமே, -சயனம்,
அராவணை கொள்ளும், அரங்கன் பதத்தில்,
சரேலெனச் சேர சமத்து….(271)

கற்றது கையளவு, பெற்றது பையளவு,
உற்றதோர் சாம்பலே உன்னளவு, -சற்றிதை,
சிந்தி மடமனமே, சீர்மல்கும் ஆய்ப்பாடி,
நந்த குமாரனை நண்ணு….(272)

காலை எழுந்தவுடன், காலைப் பரத்திநின்று,
வேலைக்(கு) அலைவது வீண்மனமே, -நாளை,
நிகழ்த்தி நடத்தி, நிறைவேற்றும் கண்ணன்,
முகத்தில் சோம்பல் முறி….(273)

வாதாடி வம்படித்து, வாழ்ந்ததெலாம் வையமெனும்,
தீதாடி பிம்பத் திருக்கன்றோ, -சூதாடி,
தன்னனைத்தும் தோற்ற, தருமர்க்(கு) உதவிய,
கண்ணனை நெஞ்சே கருது….(274)

பார்த்தசாரதி பெருமாள் கருட வாகனம்….
————————————————————————-
கொள்ளும்புண் ணாக்கும், குதிரைக்(கு) அளித்தன்று,
வில்விஜயன் தேரை விரட்டியவன், -புள்ளமர்ந்து,
வல்லிக் குளத்தை, வலம்வருதல் காணாது,
பள்ளிக் கிடந்தொழிந்தேன் பாழ்….(275)

தவழ்ந்தான் தரையில், தயிர்மோர் திருட,
உவந்தான் எறிந்தான் உறிக்கு, -கவண்தான்,
சிவந்தான் இராதை, சினேகத் தொடர்பால்
அவன்தான் அனந்தன் அசைப்பு….(276)

படத்திற்கு நன்றி:

http://bhagavatham.blogspot.in/

June 28, 2014
திருமால் திருப்புகழ் (125)

கிரேசி மோகன்

Bhagavatha – Vamana Avatar. – Keshav

கண்ணன் திருப்புகழ்(வெண்பா)….
———————————————————-
’’கண்ணன் வெண்பாக்கள்’’
—————————————————–

Bhagavatha – Shakatasura – Keshav

நீர்வண்ணா, வெண்ணெய்நெய் மோருண்ணும் பால்வண்ணா,
கார்வண்ணம் ஆனதன் காரணம், -போர்முன்னம்,
தன்னில் அதர்மம், தொழிலாகச் செய்ததனால்,
உன்னில் கருப்பு உதிப்பு….(265)

உன்னிலே உள்ளது, என்னிலும் உண்டது,
பின்னிப் பிணைந்தபின் பேதமேன், -கண்ணனே,
எண்ணிலா ஜீவனுள், ஏகமாய் நிற்கிறான்
கண்ணிலே கோளாறு காண்….(266)

”உப்பில்லை ஆனாலும், தப்பில்லை ஏற்றிடுவேன்,
சொப்பில் விளையாடும் சீதனத்தை” -செப்பினோய்!,
உப்பிலி அப்பனே, உன்தாள் சரணடைந்தேன்,
இப்பயலை ஏற்பாய் இசைந்து….(267)

ஆத்துமாவில் ஓர்காலும், சோத்துமாவில் ஓர்காலும்,
மாத்திமாத்தி வைக்கும் மடமனமே, -நூத்தியெட்டில்,
நின்றமர்ந்து பாம்பில், நயனம் வளர்ப்பவர்முன்,
சென்றடங்கி சும்மா சுகி….(268)

அறம்பொருள் இன்பம், அளித்திட வந்தான்,
பரம்பொருள் அன்று பலிக்கு, -வரம்பெரும்,
மோகத்தில் அம்மூன்று, மூன்றடியாய் மாறிட,
லோகப் பாதாளம் லபிப்பு….(269)

காலை எழுந்தவுடன், கண்ணன் பெயர்சொல்லி,
மூளை அடுப்பை மூட்டிடு, -மாலை,
மலைவனம் சென்றாயர் மாடுகள் மேய்க்க,
அலைபவன் பேரால் அணை(SWITCH OFF)….(270)

———————————————————————————————————-

படங்களுக்கு நன்றி:

http://bhagavatham.blogspot.in/

June 27, 2014
வேண்டுதல் வெண்பாக்கள்

கிரேசி மோகன்

கிரேஸி கிரியேஷன்ஸ் குழுவினரின் ‘’சாக்லேட் கிருஷ்ணா’’, அரங்கேறி ஐந்தாறு ஆண்டுகளுக்குள் 700 ஷோக்கள் தொட்டு விட்டது….பல வெளியூர்கள் சென்றோம், இந்தியா முழுவதிலும்….அமெரிக்காவில் 500 வது நாடகத்தை ‘’ஹ்யூஸ்டனில்’’ கொண்டாடினோம்….இது தவிர சிங்கப்பூர், மலேஷியா, துபாய் மற்றும் வெளிநாடெங்கும் கோபால் பல்பொடி விளம்பரம் போல சுற்றி வந்தோம்….இந்த பிரும்மாண்டமான வெற்றிக்கு காரணம் என்ன….!அடியேன் வசனமா இல்லை….குழுவினரின் நடிப்பா இல்லை….பின்ன….வெண்பா அதுவும் வேண்டுதல் வெண்பாக்கள்….உள்ளூர் நீங்கலாக வெளியூரில் நாடகம் போடும்போது, அந்தக் கண்ணனை வெண்பா வாயிலாக வேண்டிக் கொள்வேன்…ஸோ….இது கண்ணனின் சாதனை….தட்டச்சு செய்த வரையில் ‘’சாக்லேட் கிருஷ்ணாவுக்காக’’ எழுதிய வெண்பாக்களை பகிர்ந்து கொள்கிறேன்….

———————————
சாக்லேட் – கிருஷ்ணா
—————————–
வெண்ணை தயிர்பால் மண்ணை கோபியர்தம்
கண்ணை உண்ட கிருஷ்ணா -உன்னையென்
வாக்கிலெட்ட வைத்திடுவாய் வையம்காண் நாடகமாய்
சாக்லேட் கிருஷ்ணா தலைப்பு….(1)….03-02-2008

சாக்லேட் கிருஷ்ணா பூஜை அழைப்பு
———————————————
கற்பகாம்பாள் சன்னிதியில்
———————————-
மகோதரன் வேலவன் மாதாவின் சன்னிதியில்
சகோதரன் சாக்லேட் கிருஷ்ணாவின் -முகாந்திர
பூசை நடக்குது நாளைமணி ஆறதற்க்கு
ஆசையுடன் எந்தன் அழைப்பு….(2)….26-4-2008

பதிலுக்கு சு.ரவி எழுதியது
———————————–
தகவலே போதும் அழைப்பெதற்கு, தட்டா(து)
அகமகிழ்ந்து நான்வருவேன் தானாய்-முகில்வண்ணன்
சாக்லேட் கிருஷ்ணா வெற்றி நடைபோட
வாக்தேவி தந்தாள் வரம்….(3)….26-4-2008
———————————————————————————-
சாக்லேட் – கிருஷ்ணா வெற்றி பெற வேண்டுதல்….
—————————————————————-
அரங்கேறி ஆதி அனந்தனின் மீது
உறங்கா(து) உறங்கிடும் மாலே-அரங்கேறும்
சாக்லேட் கிருஷ்ணாவை சக்சஸ்ஃபுல் ஆக்கயென்
வாக்கெட்ட வாராய் விரைந்து….(4)….23-5-2008

பதிலுக்கு சு.ரவி எழுதியது
———————————
நாடகம் நன்றாய் அரங்கேற, ஊரெல்லாம்
கூடி மகிழ்ந்து குதுகலிக்க -ஊடகங்கள்
பாராட்ட சாக்லேட் கிருஷ்ணா பவனிவர
தார்சூடி வெல்க தழைத்து….(5)….23-5-2008

சேலத்தில் சாக்லேட் கிருஷ்ணா
——————————————-

ஞாலத்தை உண்டுமிழ்ந்த காலத்தில் ஆலிலையில்
பாலொத்தப் பாதம் பருகியவா -சேலத்தில்
சாக்லேட் கிருஷ்ணாவை மாம்பழத்துக்(கு) ஈடாக
டாக்-ஃஆப் தி-டவுன் ஆக்கு….(6)….20-7-2008
கேசவ் சாக்லேட் கிருஷ்ணா ஓவியம் பார்த்து
——————————————————-
இடைப்பிள்ளை உந்தன் இசையில் மயங்கி
மடிப்பால் நிலத்தில் மணக்க -கடைக்காலை
கன்றென எண்ணிக் கறவை வருடிட
நின்றிடென் நெஞ்சில் நிலைத்து….(7)….12-9-2008
——————————————————

கேசவ் ஓவியத்துக்கு சு.ரவி எழுதிய கவிதை படித்து எழுதியது
————————————————————————

வாக்கிலெட்டா கண்ணனை வண்ணக் குளிப்பாட்டி
சாக்கலேட் ஆக்கினான் கேசவன் -பாக்குளிட்டு
பாலா பிஷேகப் பரவசத்தை சொன்னயிது
நாலா யிரத்திலொன் று….(8)….9-9-2008

பாரதி விழாவுக்காக சாக்லேட் கிருஷ்ணா
போடுவதாக இருந்தது….வானவில் பண்பாட்டு மையத்திற்காக…
பாரதி வீடு சற்றே சரிந்ததால் போடமுடியவில்லை….வக்கீல் க.ரவிக்கு எழுதியது
————————————————————————————————
கண்ணனென் சேவகன் கண்ணனென் காவலன்
கண்ணனென் மந்திரி நண்பனென -சொன்னவன்
கண்ணனென் சாக்லேட் கிருஷ்ணாவாய் ஆக்கினான்
புண்ணிய மாச்சென் பிறப்பு….(9)….29-9-2008

க.ரவி பதிலுக்கு எழுதிய வெண்பா
———————————————
அற்புதம் வெண்பா அடடா உனக்கிந்த
சொற்பதம் வாய்த்ததென்ன சூட்சமமோ -வெற்புக்(கு)
குடைபிடித்த வன்பேரில் கூத்து நிகழ்த்தத்
தடையின்றி பொங்கும் தமிழ்….(10)….30-9-2008

சாக்லேட் கிருஷ்ணா 100வது நாடகப் பூர்த்தி
————————————————————-
நூறு முடித்திட தேரை விடுத்தவா
நூறுநா னுறில் நிலைத்தவா -நூறு
முறையெங்கள் சாக்லேட் கிருஷ்ணா படைத்த
இறையின்று போலென்றும் இரு….(11)….30-11-2008
வேலூரில் சாக்லேட் கிருஷ்ணா….
——————————————
கோலோடு, ஊது குழலோடு, கோகுலத்தார்
தோளோடு தோள்சேர்த்த தோழனே -வேலூரில்
நாடகம் சாக்லே கிருஷ்ணா நலம்காண
ஊடகமாய்க் கண்ணா உத்வு….(12)….04-01-2009

ஈரோடில் சாக்லேட் கிருஷ்ணா
—————————————–
நூறோட பாரதத் தேரோட வைத்தவனே
நூறோடு நாற்பதாம் நாடகமாம் -ஈரோடில்
சீராட வைத்திடு சாக்லேட் கிருஷ்ணாவை
நாரோடு பூவாய் நுழைந்து….(13)….24-1-2009

கோவையில் சாக்லேட் கிருஷ்ணா
———————————————

கோவையில் சாக்லேட் கிருஷ்ணா நாடகச்
சேவையை செவ்வனே செய்திட -ஆவையும்
ஆய்க்குலப் பாவையும் மேய்த்தவா மாயனே
வாய்க்குளே வாக்காக வா….(14)….1-2-2009

திருச்சியில் சாக்லேட் கிருஷ்ணா
——————————————–
ஒருத்தி கருத்தரிக்க வேறொருத்தி காத்த
கருத்தநிறக் கண்ணா கோட்டை – திருச்சியில்
மாது பிளஸ்டூவில் சாக்லேட் கிருஷ்ணாவில்
தாதவிழ் பூவாய் மலர்….(15)….06-02-2009

மெச்சிட பக்தர்கள் மேதினியில் மாலவனை
குச்சுக் குடித்தனம் கொள்ளவைத்தோய் -உச்சி
மலைக்கோட்டை பிள்ளாய் மனமுவப்பீர் நாடகக்
கலைக்கோட்டை காபந்துன் கால்….(16)….07-02-2009

சாக்லேட் கிருஷ்ணா 150தாவது நாடகம்
—————————————————–

சாக்லேட் கிருஷ்ணா’’ 150தாவது ஷோவின் போது ஓவியர் கேசவ்வை அழைத்தேன்….இன்ப அதிர்ச்சியாக இணைத்த கண்ணன் ஓவியத்தை மேடையில் ‘’கமல், நித்யாஸ்ரீ’’ முன்னிலையில் எனக்கு பரிசளித்தார்….மனுஷன் இதற்காக ராவோடு ராவாக பெயிண்ட் பண்ணி இருக்கிறார்….வாத்சல்யத்தில் கேசவ் கண்ணனை விஞ்சி விட்டார்….கேசவ் ‘’சாக்லேட் கிருஷ்ணா’’ வந்த வேளை 150 இப்போது 700 ஆகப் போகிறது

நூறோடு அம்பதாம் நாடகம் நாளைக்கு
தேரிடர்ந்த கண்ணன் திருவருளால் -சீரோடு
சேர்த்து சிறப்பாக்க சாக்லேட் கிருஷ்ணாவை
பார்த்தனின் சாரதி பார்….(17)….21-2-2009
கேசவ் ஓவியத்திற்கு நன்றி
———————————-
விழிகள் சொருகிட வேய்ங்குழல் ஊதி
பொழிகின்ற ஆகாசப் பாலை -எழிலுடன்
கேசவன் உண்கின்ற கோலம் வரைந்தநீர்
ஆசுகவி ஓவியன் கேசவ்….(18)….23-2-2009

கோவையில் சாக்லேட் கிருஷ்ணா
——————————————

பாவைநப் பின்னைக்காய் தாவும் எருதாண்டோய்
பாவைநப் பின்னைக்காய் ஆவை அடக்கியவா
தேவை எமக்குன் துணைகண்ணா -கோவை
நகரிலின்றும் நாளையும் சாக்லேட் கிருஷ்ணாவை
நிகரிலாத வண்ணம் நடத்து….(19)….11-04-2009

பெங்களூரில் சாக்லேட் கிருஷ்ணா
———————————————–

அங்குள்ள தூணில் அடங்கிக் குதித்திரண்யன்
அங்கமதைக் கீண்ட அரியுருவே -பெங்களூரில்
நாடகம் சாக்லேட் கிருஷ்ணா நடக்கையில்
மேடையில் காப்பாய் மலர்….(20)….19-04-2009

சாக்லேட் கிருஷ்ணா அப்த பூர்த்தி
——————————————

ஓங்கி உலகளந்த உத்தமன் பேர்சொல்லி
நாங்கள் நடத்திய நாடகத்தை -பாங்குற
ஓராண்டு தாண்டியும் ஓயாது ஓட்டுவது
சீராயர் கண்ணன் சவுக்கு….(21)….23-05-2009

சேலத்தில் சாக்லேட் கிருஷ்ணா
—————————————-

ஞாலத்தைப் பேரூழி காலத்தில் உண்டுமிழ்ந்து
ஆலத்தில் தூங்கிய ஆழிவண்ணா -சேலத்தில்
சங்கடம் இல்லாது சாக்லேட் கிருஷ்ணாவை
மங்களம் ஆக மலர்த்து….(22)….13-06-2009
மதுரையில் சாக்லேட் கிருஷ்ணா
—————————————–
ராணி லலிதாங்கி ஸ்ரீராஜ மாதங்கி
மீன்விழியால் சொக்கனை மீறிநிற்கும்-ஆண்மகளே
கூடலில் எங்கள் குழுவின் பெயர்விளங்க
நாடகத்தை நன்கு நடத்து….(23)….05-07-2009
கோயம்புத்தூரில் சாக்லேட் கிருஷ்ணா
————————————————-

கோவை சாரதா அப்பா ”கோபாலன் சார்” எழுதியது….
————————————————————————
காணவே காத்துள்ளேன் கற்பூரச் சொல்லழகா
நாணேறும் அம்பாஇ நகைச்சுவையை -மாண்புறவே
செல்ல செலுத்தியெமை சிந்திக்கச் செய்திடும்
வெல்லப்பா மோஹனமே வெல்….(24)….10-09-2009
——————————————————————————

தாயன்பில் கட்டுண்ட தாமோ தராநாங்கள்
கோயம்புத் தூரில் கொடிகட்டி -ஆயனே
சீரும் சிறப்புகளும் சாக்லேட் கிருஷ்ணாவால்
நேர நிகழ்வை நடத்து….(25)….12-09-2009

பாண்டிசேரியில் இரு நாடகங்கள்….
———————————————-
கோரியன வாரிக் கொடுக்கும் புதுச்சேரி
ஊரிலிரு நாடகத்தை ஓகோவாய் -தேரிருந்து
பாரதம் செய்த பரந்தாமா நீவந்து
நேரில் இருந்து நடத்து….(26)….03-10-2009

கோரியன வாரிக் கொடுக்கும் புதுச்சேரி
ஊரிலிரு நாடகத்தை ஓகோவாய் -தேரிருந்து
பாரதம் செய்தமன பாரம் குறைந்திட
சேரில்(CHAIR) அமர்ந்து சிரி….(27)….03-10-2009

பெங்களூரில் இரு நாடகங்கள்….
———————————————-
மங்களமாய் மார்கழித் திங்களென்ற ஆண்டாளின்
கண்களுறை காதல் கருமுகிலே -பெங்களூரில்
எங்களிரு நாடகங்கள் ஏற்றமுற, வந்தமர்ந்து
பங்குபெற வேண்டுமதைப் பார்த்து….(28)….22-10-2009

பெங்களூரில் குஷா மகள் ஜானும், சு.ரவி மகள் பாரதியும்
விருந்தோம்பல் செய்ததற்கு நன்றி வெண்பா….
———————————————————————–
சோறும் ரசமும் சுவையான காய்களும்
மோரும் மணக்கும்மா காளியும் -ஜோராக
வாரிதி மேகமாய் வற்றாது தந்தது
பாரதி ஜானின் பரிவு….(29)….25-10-2009

கோவையில் நாடகங்கள்….
—————————————
ஏழை குசேலன் இதயம் சிரித்திட
தோழமைக்குத் தோள்கொடுத்த தெய்வமே -ஆழிவண்ணா
கோவையில் நாடகங்கள் கோலா கலமாக
நாவில் நகைச்சுவையாய் நில்….(30)….06-11-2009

காரைக்குடியில் சாக்லேட் கிருஷ்ணா
———————————————-

தேரை நடத்தி தனஞ்சயனைத் தேற்றியன்று
நூறை முடித்த நவநீதா -காரைக்
குடியிலெங்கள் சாக்லேட் கிருஷ்ணா சிரிப்பு
வெடிவிருந்தை வந்து வழங்கு….(31)….13-11-2009
ஹைதராபாத்தில் சாக்லேட் கிருஷ்ணா….
———————————————————-
வைதசிசு பாலனுயிர் கொய்திட சக்கரத்தை
எய்தனை நூறிகழ்ச்சி ஏற்றன்று -ஹைதரா
பாத்திலெங்கள் சாக்லேட் கிருஷ்ணா நகைச்சுவையில்
நூத்திலொன்(று) ஆக நடத்து….(32)….04-12-2009

திருச்சியில் சாக்லேட் கிருஷ்ணா
———————————————

தோப்புக் கரணமிட்டு , தந்தி சிரித்திட
சாப்பிட்ட சக்கரத்தை துப்பவைத்தோய்-காப்பாய்
திருச்சியில் சாக்லேட் கிருஷ்ணாவால் மக்கள்
சிரிச்சு மகிந்திடச் செய்….(33)….20-11-2009

மஸ்கெட்டில் சாக்லேட் கிருஷ்ணா
——————————————-

மாரதரும் மன்னவரும் நூறிடரும் பட்டழிய
வேரதிர தேரோட்டி வென்றவனே -பாரதத்தில்
ஷேக்லொட்ட பேகம் சிலிர்த்தல்போல் மஸ்கட்டை
சாக்லேட் கிருஷ்ணாவால் செய்….(34)….09-02-2010

வைத்தநெய் பாலை வடிதயிரை வெண்ணையை
பொய்த்த இடையாள்நப் பின்னையை-துய்த்தவா
ஷேக்கூர் மஸ்கெட்டை சாக்லேட் கிருஷ்ணாவால்
ஷோக்காய் சிரித்திடச் செய்….(35)….09-02-2010

செந்திரு ,சங்கு, சுடராழி, சாரங்கம்
நந்தகி, வைஜெயந்தி நாற்புறமும் -வந்திருக்க
மஸ்கெட்டில் சாக்லேட் கிருஷ்ணா மதிப்புயர
யெஸ்கொட்டு கண்ணா எமக்கு….(36)….09-02-2010

வலத்துறைய ஆழி ,இடத்துறைய சங்கு
தலத்திரு நூற்றெட்டு தங்கி -நிலத்திடை
உஸ்கொட்டும் பாம்பில் உறங்கும் பெருமாளே
மஸ்கெட்டில் வந்து மலர்….(37)….09-02-2010

தஞ்சையில் சாஸ்த்ரா கல்லூரியில் சாக்லேட் கிருஷ்ணா….
————————————————————————–
வெஞ்சிறை தோன்றி விடிவதற்குள் ஆய்ப்பாடி
தஞ்சம் புகுந்த திருமாலே -தஞ்சையில்
சாஸ்திரா காலேஜை சாக்லேட் கிருஷ்ணாவால்
ஹாஸ்யத்ரா காலேஜாய் ஹாக்கு….(38)….05-03-2010

விக்குருதி ஆண்டு வேண்டுதல்….
—————————————-
திக்கிறுதி கண்டதிரு விக்கிரம வாமனனே
அக்குறத்தி நாயகன் மாமனே -விக்குருதி
புத்தாண்டில் நாங்கள் புதுநா டகம்போட
மத்தாண்ட விட்டலா மேய்….(39)….13-04-2010

சேலத்தில் சாக்லேட் கிருஷ்ணா….
———————————————
வேலொத்த கண்மாதர் சேலை பறித்தாண்கள்
பாலுற்ற பாஞ்சாலி மேலளித்தோய் -சேலத்தில்
சாக்லேட் கிருஷ்ணா சிறப்பாய் நடத்தஅங்கு
கோகுலக் குட்டனே GO….(40)….08-05-2010

பெங்களூரில் சாக்லேட் கிருஷ்ணா….
————————————————-
செங்கமலத் தாயாருன் சேவடி சாதிக்க
பொங்கலை பாற்கடல் பள்ளிகொண்ட -செங்கண்மால்
சிங்கமே எங்களின் சாக்லேட் கிருஷ்ணாவை
பெங்களூரில் வந்தமர்ந்து பார்….(41)….15-05-2010

செங்கமலத் தாயாருன் சேவடி சாதிக்க
பொங்கலை பாற்கடல் பள்ளிகொண்ட -செங்கண்மால்
சிங்கமே பெங்களூரில் எங்களிரு நாடகத்தால்
அங்குளோரை ஆனந்தம் ஆக்கு….(42)….15-05-2010
கிரேசி கிரியேஷன்ஸ் 31வது ஆண்டில் நுழைந்தபோது
——————————————————————

கண்ணன் அருளால் கிரேசி கிரியேஷன்ஸ்
முன்னம்கால் வைக்குது முப்பத்தி -ஒண்ணிலே
இன்னுமோர் நூற்றாண்டு இக்குழு கண்டிட
எண்ணுவோர்க்(கு) என்நன்றி இன்று….(43)….6-9-2010

எழுபத்தி ஒன்பதில் ஒன்றாய் இணைந்து
முழுபக்தி கொண்டு முனைந்து -உழவொத்து
முப்பத்தி ஓராண்டு முப்போகம் கண்டது
ஒப்பற்ற நட்பின் உயர்வு….(44)….7-9-2010
மஸ்கெட்டில் சாக்லேட் கிருஷ்ணா
——————————————-

மாரதரும் மன்னவரும் நூறிடரும் பட்டழிய
வேரதிர தேரோட்டி வென்றவனே -பாரதத்தில்
ஷேக்லொட்ட பேகம் சிலிர்த்தல்போல் மஸ்கட்டை
சாக்லேட் கிருஷ்ணாவால் செய்….(45)….09-02-2010

வைத்தநெய் பாலை வடிதயிரை வெண்ணையை
பொய்த்த இடையாள்நப் பின்னையை-துய்த்தவா
ஷேக்கூர் மஸ்கெட்டை சாக்லேட் கிருஷ்ணாவால்
ஷோக்காய் சிரித்திடச் செய்….(46)….09-02-2010

செந்திரு ,சங்கு, சுடராழி, சாரங்கம்
நந்தகி, வைஜெயந்தி நாற்புறமும் -வந்திருக்க
மஸ்கெட்டில் சாக்லேட் கிருஷ்ணா மதிப்புயர
யெஸ்கொட்டு கண்ணா எமக்கு….(47)….09-02-2010

வலத்துறைய ஆழி ,இடத்துறைய சங்கு
தலத்திரு நூற்றெட்டு தங்கி -நிலத்திடை
உஸ்கொட்டும் பாம்பில் உறங்கும் பெருமாளே
மஸ்கெட்டில் வந்து மலர்….(48)….09-02-2010

விக்குருதி ஆண்டு வேண்டுதல்....
—————————————-
திக்கிறுதி கண்டதிரு விக்கிரம வாமனனே
அக்குறத்தி நாயகன் மாமனே -விக்குருதி
புத்தாண்டில் நாங்கள் புதுநா டகம்போட
மத்தாண்ட விட்டலா மேய்….(49)….13-04-2010

பெங்களூரில் சாக்லேட் கிருஷ்ணா....
————————————————-
செங்கமலத் தாயாருன் சேவடி சாதிக்க
பொங்கலை பாற்கடல் பள்ளிகொண்ட -செங்கண்மால்
சிங்கமே எங்களின் சாக்லேட் கிருஷ்ணாவை
பெங்களூரில் வந்தமர்ந்து பார்….(50)….15-05-2010

செங்கமலத் தாயாருன் சேவடி சாதிக்க
பொங்கலை பாற்கடல் பள்ளிகொண்ட -செங்கண்மால்
சிங்கமே பெங்களூரில் எங்களிரு நாடகத்தால்
அங்குளோரை ஆனந்தம் ஆக்கு….(51)….15-05-2010

ஹைதராபாத்தில் நாடகம்….
————————————
பெய்தவாளி ஏற்றன்று பார்த்தனின் சாரதியாய்
ஐதரப்பு வெல்லமகா பாரதத்தை -நெய்தவா
ஹைதரா பாத்தையே ஆனந்த பாத்திலாழ்த்த
செய்திட வேண்டுமெங்கள் ஜோக்கு….(52)….30-09-2010

வைதசிசு பாலன் வசைநூறு தாண்டிட
கைதவழ் சக்கரத்தால் கொன்றவா -ஹைதரா
பாத்திலெங்கள் நாடத்தைப் பார்த்தவர்கள் நெஞ்சிலே
பூத்திடச் செய்நகைப் பூ….(53)….30-09-2010

அயோத்தியார் பக்கமென்ற ஹைகோர்டின் தீர்ப்பால்
வயோதிகம் காணும் வழக்கு….(54)….30-09-2010

நேந்திரங்காய் கேரளத்தில் நீகுரு வாயூரன்
பாண்டுரங்கன் பண்டரியில் பக்தர்க்காய் -ஆந்திராவில்
ஆவென நாடகத்தால் ஆடியென்ஸ் வாய்பிளக்க
தேவுடு காமெடியாய்த் தோன்று….(55)….30-09-2010
கிரேசி கிரியேஷன்ஸ் 31வது ஆண்டில் நுழைந்தபோது
——————————————————————

கண்ணன் அருளால் கிரேசி கிரியேஷன்ஸ்
முன்னம்கால் வைக்குது முப்பத்தி -ஒண்ணிலே
இன்னுமோர் நூற்றாண்டு இக்குழு கண்டிட
எண்னூவோர்க்(கு) என்நன்றி இன்று….(56)….6-9-2010

எழுபத்தி ஒன்பதில் ஒன்றாய் இணைந்து
முழுபக்தி கொண்டு முனைந்து -உழவொத்து
முப்பத்தி ஓராண்டு முப்போகம் கண்டது
ஒப்பற்ற நட்பின் உயர்வு….(57)….7-9-2010

ஹைதராபாத்தில் நாடகங்கள்….
—————————————-

நேந்திரங்காய் கேரளத்தில் நீகுரு வாயூரன்
பாண்டுரங்கன் பண்டரியில் பக்தர்க்காய் -ஆந்திராவில்
ஆவென நாடகத்தால் ஆடியென்ஸ் வாய்பிளக்க
தேவுடு காமெடியாய்த் தோன்று….(58)….30-09-2010
கோவையில் சாக்லேட் கிருஷ்ணா….
———————————————
அய்யனே, ஆயர்தம் பையனே, ஆழிசங்குக்
கையனே, அந்தரான்மா காண்போர்க்கு -மெய்யனே
கோவையில் சாக்லேட் கிருஷ்ணா ஜெயித்திட
தேவையுன் பக்கத் துணை….(59)….25-12-2010

கோயம்புத்தூரில் நாடகம்
———————————-
தாயன்புக்(கு) உட்பட்ட தாமோ தரனேநீ
காயம்பத்(து) ஏற்றோய் கலிதீர்க்க -கோயம்பத்
தூரிலெங்கள் நாடகத் தூறல் மழையாக
நேரில்வா நீர்வண்ண னே….(60)….07-01-2011

கும்பகோணத்தில் சாக்லேட் கிருஷ்ணா
————————————————-
குடம்குடமாய்ப் பால்வெண்ணெய் கோகுலத்தில் உண்டு
அடர்ந்தானாய் ஆரா அமுதாய் -கிடந்தாய்
குடந்தையில் சாக்லேட் கிருஷ்ணா சிரிப்பாய்
நடந்திட வேண்டும் நகைத்து….(61)….16-01-2011
டெல்லியில் சேஷாத்திரி சபா ”நாடக ரத்னா”
விருது தந்த போது….
———————————————————-

தலைநகரில் நாளை தருகிறார்கள் பட்டம்
கலைநா டகரத்னா கண்ணா -அலைநகரும்
பாற்கடல் தன்னில் படுத்த பெருமாளே
நேர்கடன் பட்டேன் நினக்கு….(62)….04-03-2011

(ALTERNATIVE வெண்பா)
————————————
தலைநகரில் நாளை தருகிறார்கள் பட்டம்
கலைநா டகரத்னா கண்ணா -மலைநகர்த்தி
சுண்டு விரலில் சுமந்த கடவுளுனை
விண்டு வழுத்தல் விருது….(63)….04-03-2011

டெல்லி குளிரில் நடுங்கிய போது
———————————————
நாடக ரத்தினாவை நான்பெற டெல்லியில்
வேடமிட்டேன் கம்பளி ஆடையில் -பாடாய்
குளிரெனைக் கொல்லுது குன்றேந்தி கண்ணா
தளிர்விரலால் முன்போல் தாங்கு…(64)….05-03-2011

இரா.முருகன் பதில் வெண்பா
————————————-
தெம்பாய் கரம் கஜர்கா ஹல்வாவும்
சொம்பில் ருசியான காப்பியும் -நம்பியே
துளிராக வெற்றிலையும் நாமணக்க மென்றால்
குளிர்போகக் கொள்வீர் விருது….(65)….05-03-2011

கோவையில் மீசை ஆனாலும் மனைவி….
—————————————————
சங்கு சுடராழி சாரங்கம் நந்தகி
அங்கை தனிலேந்தும் அச்சுதா -கொங்கிலே
மீசையா னாலும் மனைவிக்குக் கைத்தட்டல்
ஓசை இடவை உரத்து….(66)….26-03-2011

ஆவினைக் காக்கவன்று கோவர்த் தனக்குன்றை
பூவினைப் போல்சுமந்த பாலகா -கோவையில்
மீசையா னாலும் மனைவியை மக்களின்
ஓசை சிரிப்பால் உயர்த்து….(67)….27-03-2011

கடலூரில் டாக்டர் விஜயராகவனுக்காக ”சாக்லேட் கிருஷ்ணா”….
————————————————————————————
படம்பத்து நூறுகொண்ட பஞ்சணையில் சாய்ந்துபாற்
கடலூரில் கண்வளரும் கண்ணனே -கடலூரில்
கூடியோர் சாக்லேட் கிருஷ்ணாவை உச்சியில்
சூடிடச் செய்வாய் சிரித்து….(68)….30-03-2011

பெங்களூரில் மதில்மேல் மாது & அல்லவுதீன்….
————————————————————
தோலை வெளுக்கத் திருட்டுத் தயிர்வெண்ணை
பாலுக்(கு) அலைந்த பரம்பொருளே -நாளைகர்
நாடகாவில் எங்களிரு நாடகங்கள் வெற்றியை
நாட அருள்செய்வாய் நன்கு….(69)….15-04-2011

பெங்களூரில் ”மாது பிளஸ் டூ & மீசை ஆனாலும் மனைவி”….
——————————————————————————–
பங்குபெற பாண்டவர்க்காய் பாரதம் செய்தவனே
சங்குகர சுற்றும்கை சக்கரனே -எங்களிரு
பெங்களூர் நாடகங்கள் பேஷாகப், பண்டரியில்
செங்கலேறி நின்றோய் சரண்….(70)….20-05-2011

உன்நடத்தைக் கண்டன்னை உன்னை உரலிலிட
முன்னிடந்து சென்று மருதொடித்தோய் -கன்னடத்து
பெங்களூரில் எங்கள் ”பிளஸ்டூக்கும் மீசைக்கும்”
பொங்கிடச் செய்வாய்கும் பல்….(71)….20-05-2011

சங்கர நாரண சங்கம சாஸ்தாக்கு
கொங்கை அமுதளித்த கோபாலா -எங்களின்
ஹாஸ்யம் சவுடையா ஹால்வரு வோரினட்ட
காஸ்ய சிரிப்பாயாக் கு….(72)….20-05-2011

முன்னூர்ந்து தேரில் மகாபா ரதம்செய்து
முன்நூறை ஐந்துக்காய் மாளவைத்தோய் -முன்னூறு
ஐம்பதுக்கும் மேல்தாண்டி ஆடியன்ஸை சாக்லேட்டால்
மெய்மறக்கச் செய்வாய் மகிழ்ந்து….(73)….23-05-2011

திருச்சியில் சாக்லேட் கிருஷ்ணா….
————————————————
உச்சிமலைக் கோட்டை ஒருகொம்பன் உத்தியினால்
மச்சுமதில் காவிரிசூழ் மாநகர்வாழ் -கொச்சுரங்கா
சாக்லேட் கிருஷ்ணா சிரிப்புமழை பெய்திடனும்
ROCKFORTடில் நாளைக்கு ராவு….(74)….22-09-2011

ஈரோடு, கோவையில் நாடகங்கள்….
———————————————–
போராடும் பாண்டவர்க்காய் பாரதம் செய்தன்று
நூறோட வைத்த நவநீதா -ஈரோடு
கோவையில் நாடகங்கள் கோலா கலமாக
தேவையுன் பேரா தரவு….(76)….07-10-2011

வேண்டுதல் தொடரும்….
——————————————————————————————————————–

June 27, 2014
திருமால் திருப்புகழ் (124)

கிரேசி மோகன்

Bhagavatha –Ulukala bandhanam – Keshav

கண்ணன் திருப்புகழ்(வெண்பா)….
—————————————————————
’’கண்ணன் வெண்பாக்கள்’’
————————————————

ஓவியம் : கேஷவ்

எத்தனை நாளுனைக், கற்பனையில் காண்பது,
கத்தும் கடல்கிடக்கும் கார்முகிலே, -சித்தம்,
குளிர எதிரே, குதித்து வருவாய்,
ஒளிரும் இருளோய் உவந்து….(259)

அலையானை பச்சை, மலையானை, கீதைக்,
கலையானை, ராதைபேர் கேட்கச், -சிலையானை,
கஞ்சன் குலயானை, கொன்ற இளையானை,
நெஞ்சே நிலையாய் நிறுத்து….(260)

தீதண்டும் நேரம், திருவள்ளூர் செல்வோரை,
கோதண்டம் காக்கும் கவசமாய், -நீதெண்டம்,
இட்டு சரணம், இயம்ப வினைகளின்,
குட்டு வெளிப்படும் காண்….(261)

அறங்காக்க அன்று, குரங்கோடு சென்று,
திறங்காட்டிப் பத்தைத் துணித்தோய், -அரங்கேறி,
உள்ளூறும் யோக, உறக்கத்தில் கண்விழிக்கும்,
வள்ளூரின் ராகவா வா….(262)

யாப்புக் கயிற்றில், எதுகையும் மோனையாய்,
கூப்பிய கைகளில் கொண்டுவந்த, -பாப்பூக்கள்,
மாலை தொடுத்தந்த, மாலைத் தொழுவோர்க்கு,
மாலயம் வாழ்வில் மலர்….(263)

வாடிக்கை ஆனது, வேடிக்கை ஆகவரும்,
வாடிக்கை ஏந்தி விரையாதீர், -சூடிக்கை,
மாலை சுமந்தவள், மாலை மணந்தாற்போல்,
வேலை பொருத்து வேளை….(264)

————————————————————————————————————–

படங்களுக்கு நன்றி :

http://bhagavatham.blogspot.in/

June 26, 2014
திருமால் திருப்புகழ் (123)

கிரேசி மோகன்

Hayagreevar – Keshav

கண்ணன் திருப்புகழ்(வெண்பா)
———————————————————-
’’கண்ணன் வெண்பாக்கள்’’
————————————————-
எங்கள் வீட்டுக்கு எதிர் வீட்டில் ‘’செட்டிப் புண்ணியம் அயக்ரீவர்’’ எழுந்தருளியபோது எழுதியவை….
——————————————————————————————————

Dialogues with Arjuna series. #Krishnafortoday
Keshav

நிகமாந்த தேசிகன், நாவில் அமர்ந்து,
புகழ்வாய்ந்த பாதுகையைப் பாடி, -அகமகிழ்ந்த,
எண்ணியதை நல்கும், ஏற்றம் தரும்செட்டிப்,
புண்ணியத்தில் வாழும் பரி….(252)

புண்ணியச் செட்டியில், புண்ணாக்(கு) அளித்தனரோ!,
நண்ணிய(து) ஏனங்கு நாலுகாலில்!, -கண்ணனே,
பாரதப் போரில், பழகிய நன்றியோ!
நீரதைப் போலின் நிலத்து….(253)

கொள்ளுக்(கு) அடங்காய், கவிதே சிகன்கூறும்,
சொல்லுக்குள் பாயுமுயர் ஜாதியே, -கல்விக்கு,
வாய்த்த கடவுளே, வாணி அரிதாரா,
போய்த்தவம் செய்யப் பழக்கு….(254)

கட்டுக்(கு) அடங்காது, செட்டிக்குப் புண்ணியத்தை,
கொட்டுமருள் கல்விக் குதிரையே, -குட்டக்,
குளம்பால் தலையில், குருவே வருக,
தளும்பா அறிவினைத் தா….(255)

புல்லும், படிகநீரும், புண்ணாக்கும், கொள்ளும்நான்,
அல்லும் பகலும் அளித்திடுவேன், -மெல்லும்,
தலம்செட்டிப் புண்ணியத்தில், தங்கும் பரியே,
பலனெட்டெட் ஆயகலை போடு….(256)

ஊர்செட்டிப் புண்ணியத்தில், உய்யும் அசுவமே,
மார்தட்டிச் சொல்லும் மடையன்நான், -சீர்கொட்டும்,
வெண்பாக்கள் யாத்துன்மேல், வாழும் வரமருள,
பெண்பால் பாரதியே பார்….(257)

சண்டித் தனமாய், சகத்தில் உழல்கின்ற,
நொண்டிக் குதிரைநான் நாரணா, -அண்டி,
வருவாய் அருகே, குருவாகிக் காட்டு,
பரிமேல் அழகா பரிவு….(258)
—————————————————————————————————————

படங்களுக்கு நன்றி:

http://kamadenu.blogspot.in/2014_04_01_archive.html

June 25, 2014
திருமால் திருப்புகழ் (122)

கிரேசி மோகன்

Bhagavatha: The story of Rama
Keshav

கண்ணன் திருப்புகழ்….
——————————————-
”கண்ணன் வெண்பாக்கள்’’
———————————————–
ராமன் வெண்பா
——————————-

Sri Rama – Keshav

அவனியைக் காக்க, அவதார மாக,
நவமியில் வந்தோய் நினக்கு, -உவமையாய்,
தந்தைதாய் போற்றியொரு, தாரத்துடன் வாழ,
சிந்தையை ராமா செலுத்து….(246)

தீதண்ட வந்தாலும், மோதுண்டு மாய்ந்திடும்,
ஸ்ரீமுண் டகத்தாய் சமேதனாய், -கோதண்ட,
ராமனையே எண்ணியி, ராப்பகல் வாழ்வோர்கள்,
காமனையே வெல்வார் களித்து….(247)….
———————————————————————————————————-

விடையேழ் அடக்க, வளைக்கரம் கொண்ட,
இடையா எனையடக்கு ஏறே, -தடையான,
பாழும் வினைகளும், பஞ்சப் புலன்களும்,
வீழ வகைசெய் விரைந்து….(248)

ஆயர்தம் சேயினை, ஆசையோ(டு) ஆய்ந்திட,
ஆயிரம் பேருண்டு ஆயினும், -மாயிருள்
சாயலான் கட்டுண்டு, சாதுவாய் நிற்பது
தாயுரை தாமோ தரன்….(249)

பேரா யிரமோதி, நாரா யணன்சீரை,
பாரா யணம்செய்வாய் பாழ்மனமே, -ஆரா,
அமுதனைப் பாடு, அனுதினம் நாடு,
குமுதமாய்ப் பூத்துக் குலுங்கு….(250)

சீரவன்காண், பாற்கடல் நீரவன்காண், பாரதப்,
போரவன்காண், பாண்டவர், நூறவன்காண், -பாரினைப்பூண்,
மாரவன்காண், உண்கின்ற, சோறவன்காண், உந்தியனல்,
ஜீரணம்காண், ஜீவனவன் ஜீன்(GENE)….(251)

——————————————————————————————————

படங்களுக்கு நன்றி :

http://kamadenu.blogspot.in/2014_04_01_archive.html

June 24, 2014
திருமால் திருப்புகழ் (121)

கிரேசி மோகன்

Bhagavatha – Narakasura vadham – Keshav

கண்ணன் திருப்புகழ்(வெண்பா)….
——————————————————–
’’கண்ணன் வெண்பாக்கள்’’
————————————————–

Krishna as Andal. #krishnafortoday

ஆயிரம் பேருடையான், ஆண்டாளின் தாருடையான்,
பாயிரம் நாலா யிரமுடையான், -ஆயினன்,
சீரடைவு கொண்டு, சுமங்கலியாய் வாழ்ந்திட,
காரடையான் நோன்பில்கால் கட்டு….(240)

பாம்பில் படுத்தானை, பாரேழ் கடந்தானை,
தாம்பில் தணிந்து கிடந்தானை, -சோம்பல்,
கடந்தானை சோகம், இடர்ந்தானை நெஞ்சம்,
குடைந்தானைக் கண்டுகை கூப்பு….(241)

காயாம்பூ வண்ணத்தை, கற்றோர்தம் எண்ணத்தை,
ஆயர்தம் சின்னத்தை மண்ணையுண், -ஓயாத
மாயத்தை ஒப்பில்லா, சீயத்தை நேயத்தில்,
தாயொத்த தாயத்தைத் தேடு….(242)

பட்டும் படாமலே, பாம்பின் தலைமேலே,
கெட்டும் கெடாமலே கோகுலத்தில், -இட்டும்,
இடாமலே போரில், இருந்த இடையன்,
தொடாமல் தகிக்கின்ற தீ….(243)

ஒருத்தி கருத்தரிக்க, வேறொருத்தி காத்த,
கருத்த நிறக்கண்ணன் நின்போல், -பிறப்பில்,
அனாதை ஆனாலும், ஆய்ச்சியர் அன்பால்,
அனாதி அவன்கதை ஆச்சு….(244)

ஆவின்தன் கன்றோடு, ஆடிக் கலந்திடும்,
கோவிந்தன் நாமம் குதூகலம், -யாவும்தன்,
உள்ளே அடக்கியன்று, உண்டுமிழ்ந்த ஓணத்தான்,
புள்ளேறும் வாகனனைப் போற்று….(245)

—————————————————————————————————————

படங்களுக்கு நன்றி:

http://kamadenu.blogspot.in/2014_01_01_archive.html

June 23, 2014
திருமால் திருப்புகழ் (120)

கிரேசி மோகன்

Gitacharya. Oil on canvas. #krishnafortoday – Keshav

கண்ணன் திருப்புகழ்(வெண்பா)….
—————————————————————–
”கண்ணன் வெண்பாக்கள்’’
————————————————-

Bhagavatha — Kaliyamardhana – Keshav

ஆபாசம், அச்சம், அழுக்கா(று), அகங்காரம்,
நாபேசும் இன்னா நயவஞ்சா! -ஏபாவா!
என்பக்கம் வாராதே, உன்னுருவைப் புண்ணியமாய்,
கண்ணப்பன் மாற்றிடுவான் காண்….(233)

காணல் அவன்ரூபம், பூணல் அவன்நாமம்,
நாணல் யமுனா நதிதீரம், -சாணப்,
புரவிக்கு நீரூற்றி, புல்வார்க்கும் கண்ணன்,
கருமமே கண்ணான வன்….(234)

அந்தரங்க சுத்தியுடன், அந்தணங்கு ஆண்டாள்போல்,
அந்தரங்க ராஜனை அர்ச்சிக்க, -வந்திறங்கி,
வைகுண்டம் வாவென்று, கைகொடுத்து தூக்கிவிடும்
பைகொண்ட நாகமுற்ற பொற்பு….(236)

நீராடை பூண்ட, நிலத்தை உண்டன்று,
ஓரா லிலையில் உறங்கிய, -சீராளன்,
போரானை கொம்பொசித்து, நூறோர் கதைமுடித்த,
நாரா யணனே நெறி….(237)

கருந்தா மரையின்கீழ், செந்தா மரைபோல்,
புறங்கை அடியில் புலர்ந்த, -வரங்கை,
கோலும் குழலுமேந்த, கோகுலம் காத்தவனாம்,
மாலோன் மலர்த்தாள் மருவு….(238)

திருவிருந்த மார்பன், திருத்துழாய் மார்பன்,
மருவிருந்த மார்பன், மகனாய்ச் -சிறையில்,
கருவிருந்த மார்பன், தெருவிருந்த மண்ணை,
பெருவிருந்தாய் உண்ட புதிர்….(239)

—————————————————————————————————————-

படங்களுக்கு நன்றி:

http://bhagavatham.blogspot.in/

June 22, 2014