Author: கிரேசி மோகன்

 

கிரேசி மோகன்

————————————————————————————————————
கண்ணன் திருப்புகழ்(வெண்பா)
——————————————————–
‘’கண்ணன் வெண்பாக்கள்’’
—————————————————–
கீதைக் கடமையைக், கண்ணன் மறந்துகாதல்,
ராதைப் பலனை எதிர்ப்பார்த்து, -போதைப்,
படபடப்பில் பார்க்கின்றான், பாவை வரவுக்(கு)
அடகடவு ளேயென்ன திது….(142)

 

ஹரிச் சுவடி
—————-

அந்தரி அண்ணா கோவிந்தா
ஆவுடை அப்பா கோவிந்தா
இந்திர லோகம் கோவிந்தா
ஈ கொசு எனக்கு கோவிந்தா
உந்தன் மலையில் கோவிந்தா
ஊர்வேன் புழுவாய் கோவிந்தா
எந்த நாளுமே கோவிந்தா
ஏகாந்த சேவை கோவிந்தா
ஐந்து பொறிகட்கு கோவிந்தா
ஐயமிட்டிடு கோவிந்தா
ஒன்றி உரைப்போம் கோவிந்தா
ஓம் நம நாரண கோவிந்தா….(143)

கேசவ் சாக்லேட் கிருஷ்ணா ஓவியம் பார்த்து
—————————————————————————-

இடைப்பிள்ளை உந்தன், இசையில் மயங்கி,
மடிப்பால் நிலத்தில் மணக்க, -கடைக்காலை,
கன்றென எண்ணிக், கறவை வருடிட,
நின்றிடென் நெஞ்சில் நிலைத்து….(144)

 

இப்போ(து) இதுவென்று, அப்போ(து) அதுவென்று,
எப்போ துமலைந்தேன் எம்பிரானே, -தப்பேதான்,
ஒப்பில்லா அப்பனே, ஒப்புக்கொள் கின்றேன்நான்,
துப்பில்லாத என்னைத் துலக்கு….(145)

இல்லா ததைத்துரத்தி, செல்லா ததைச்சேர்த்து,
பொல்லா தவனென்ற பேர்வாங்கி, -நில்லாது,
விட்டிலென மாயா, வெளிச்சத்தில் வீழாது,
விட்டலிருள் வண்ணன்தாள் வீழ்….(146)

காமியானாய் ராதைக்கு, நேமியாவோய் ராட்சசர்க்கு,
பூமியாவாய் போற்றும் அடியார்க்கு, -மாமியானாய்,
சாமிநாத ஸ்வாமிக்கு(வேலர்க்கு), நாமிருவர் சந்தித்தால்,
ஏமிரா நீயார் எனக்கு….(147)

காதலில் ராதையைக், காண ரகசியம்,
சீதையை மீட்க அவசரம், -கோதையைப்,
பெண்ணெடுக்கப் போகையில், பின்னடைந்தீர், பக்தியில்
பெண்ணுருகும் பாசுரம் கேட்டு….(148)

கலிமுடிவில் ஓரடியை ஆலிலையில் உண்டாய்
பலிமுடியில் வேறடியை வைத்தாய் -தெளிவடைய
நூற்றிடுவேன் வெண்பாக்கள் நீர்வண்ணா வாழ்த்திடுவாய்
ஈற்றடி யாக இருந்து….(149)

———————————————————————————————————————–

படங்களுக்கு நன்றி :

http://kamadenu.blogspot.in/2014_03_01_archive.html

 

 

கிரேசி மோகன்

கண்ணன் திருப்புகழ்(வெண்பா)….
———————————————————–
”கண்ணன் வெண்பாக்கள்’’
——————————————–

ஆலிங் கனித்தராதை, தோளிங்க நர்த்தனத்தால்,

காளிங்கக் காட்சி கவனமுற, – மாலிங்கு,
மாதை தலைசுமந்து காதல்கூத் தாடுகிறான்
கீதை வரிகள் மறந்து….(124)

ஆத்திலொரு காலாக, சேத்திலொரு காலாக,
காத்திருக்கேன் கேள்விக் குறியாக, -பூத்திருவை,
மார்பினில் சூடிய, மாதவா நேருக்கு,
நேர்பதில் கூறுவதென் நாள்….(125)

ஆழியில் தூங்கியொரு, நாழி முழித்துலகை,
ஊழியி லுண்டு களைத்தவா, -வாழிநீ,
உன்னை நினைந்து, ருகியுறங்கு மென்னைநீ,
உன்கனவில் காண உறங்கு….(126)

அடிசறுக்கி ஆனை, துடிதுடித்த போது,
நொடிக்கணக்கில் வந்தகால நேமி, -வடிவெடுத்து
ஆவென வாய்பிளந்த, பாவத்தின் பற்களுற்றேன்,
ஆவன செய்யவா தேவு….(127)

அறியாமை கொண்டேன், அகங்கார முற்றேன்,
அரிஆமை தோற்றம் எடுத்தோய், -சரியான
ஆளிதற்கு நீதான் அலைமனம் ஆழ்கடல்
போலிருக்கு, யோகம் புகட்டு….(128)

அம்மணக் கண்ணன், அலங்காரம் செய்கையில்,
கம்மென நிற்பதன் தாத்பர்யம், -நம்மனம்,
புத்தியை, மாற்றிடும் யுக்தியாம் கீதையை,
ஒத்திகை பார்ப்பதற்க் கோ….(129)

———————————————————————————

படங்களுக்கு நன்றி: http://kamadenu.blogspot.in/2013_07_01_archive.html

 

கிரேசி மோகன்

கண்ணன் திருப்புகழ்(வெண்பா)….
————————————————————-
’’கண்ணன் வெண்பாக்கள்’’
——————————————–

பல்லில்லா பாலகன், என்றெண்ணி பூதனை,
கொல்லவந்த கண்ணனைக் கண்டதும், -இல்லம்,
புகுந்து முலைதிணித்துப், பார்த்திட வாயில்,
முகுந்தனுக்கு முப்பத்தி ரெண்டு….(119)

 
பள்ள மதைநோக்கிப், பாய்கின்ற வெள்ளமென,
கொள்ளிடத் தானிருகால் கொள்கையாய், -உள்ளமே,
கள்ளமில்லா நம்பிக்கை, கண்மூடக் கும்பிடு,
வள்ளலென மாறும்காண் வாழ்வு….(120)
———————————————————————————————————————
நரஸிம்ஹ மந்த்ரராஜம்
—————————–
உக்ரம் வீரம் மஹாவிஷ்ணும் ஜ்வலந்தம் ஸர்வதோமுகம் |
ந்ருஸிம்ஹம் பீஷணம் பத்ரம் ம்ருத்யும்ருத்யும் நமாம்யஹம் ||
மேலே கூறிய ஸ்லோகத்தின் வெண்பாவாக்கம்….
————————————————————————————–

 

 

வீரியன், வீரன், வியாபகன், சைதன்ய

சூரியன், சூக்கும காரியன், -கூரிய
சிங்கன், எதிரிக்கு சொப்பனம், காலகாலன்,
மங்களம் சேர்த்திடும் மால்….(121)

ஏன வடிவெடுத்து, ஏந்தி உலகெடுத்து,
தீனர்க்(கு) அருள்புரிந்த தெய்வமே, -வான
வராகா பிணிகள், வருமுன் தடுத்து,
வராதுகா வைகுந்தா வா….(122)

வளைத்தாள் புருவத்தை, வைதேகி வில்லாய்,
வளைத்தான் சிவதனுசை ராமன், – முளைத்த,
முகச்சிகை கோதி, முனிவன் குளிர்ந்தான்,
இகத்தில் பரத்தை இணைத்து….(123)

————————————————————————————————————————

 படங்களுக்கு நன்றி:

http://bhagavatham.blogspot.in/

கிரேசி மோகன்

கண்ணன் திருப்புகழ்(வெண்பா)….
—————————————————————-
’’கண்ணன் வெண்பாக்கள்’’
—————————————————

நீல யமுனையில், நீந்திய கோபியர்,
சேலைப் புதையலை சேகரித்தோய், -நாளை,
சபையில் துரோபதை, சோகம் களைந்து,
அபயம் அளிக்கத்தா னே….(113)

 
நிறத்துக்கு நீலம், நினைப்புக்கு லீலை,
கருத்துக்கு கொள்மனமே கீதை, -சிரத்துக்குள்,
சீர்மல்கும் சீதரனை, சிந்திக்க ஜீவன்கண்,
ணீ ர்மல்க ஆன்மாவா கும்….(114)
நிவேதனம்
————–

 
திருக்கண் ணமுது, திரள்கின்ற வெண்ணை,
பருப்பு,தயிர் சாதம், பழங்கள் -உருக்குலைந்து,
அண்டாவில் சாறு, அதிரசம், சீடை,முறுக்கு,
உண்டேனுன் நாமம் உரைத்து….(115)

 
ஒருவர் படுக்க, இருவர் அமர,
வருகை புரிந்தவரால் நிற்க, -ஒருயிரவில்,
பொய்கைபேய், பூதத்தார் பின்னிப் பிணைந்திடச்,
செய்த மழையோன் சரண்….(116)

 
பாங்கி முதற்கொண்டு, பாமாக்கள், ருக்மணிகள்,
தாங்கிய திண்தோள் மணிவண்ணா, -சாங்கிய,
யோகமகள் பாதாதி, கேசமதை நீயுரைக்க,
வாகனமாம் புள்ளேறி வா….(117)

 
பார்த்தோர் பசுமையாய், பாராதோர் பூதமாய்,
சேர்த்தணைக்கும் பெட்டைக்கு சேவலாய், -ஆர்த்தொலிக்கும்,
சங்கில் மவுனமாய், சக்கரத்தில் சீற்றமாய்,
எங்கும் திகழ்வோனை ஏத்து….(118)….கிரேசி மோகன்….

———————————————————————————————————-

படங்களுக்கு நன்றி:

http://kamadenu.blogspot.in/2013_01_01_archive.html

 

 

கிரேசி மோகன்

கண்ணன் திருப்புகழ்(வெண்பாக்கள்)….
———————————————————————–
’’கண்ணன் வெண்பாக்கள்’’
———————————————–

 

மனைவிமக்கள் சுற்றத்தார், மீது பொழிந்தாய்,
அணைதிறந்த வெள்ளமாய் அன்பை, -மனமே,
விழலுக்(கு) இறைத்தநீர் வீணாமே , கண்ணன்,
கழலுக்குப் பாய்ச்சதில் கொஞ்சம்….(101)
மதிலரங்கக் கோயில், தனிலுறங்கும் மாலே,
விதிநெருங்கும் வேளை வருமுன், -பதிலளிப்பாய்,
தேனடைக்குள் தேனியாய், நீயிருக்க என்னுள்ளே,
நானெதற்கு வீணாய் நவில்….(102)

 

மெய்யே அகலாக, மேவுமுயிர் நெய்யாக,
உய்யும்ஒரே ஆன்மன் ஒளியாக, -அய்யநின்,
ஆரா தனையல்லால், வேறே துமெண்ணாத,
சீரான வாழ்வில் செலுத்து….(103)

 

முக்திமார்க ஆனந்தம், சத்தான சித்தாகும்,
யுக்தியுடன் பூமிக்கு வந்துவிட்டால், -பக்திமார்க,
பாதைக்கு அப்பனாகும்; பத்தினியே ஆனாலும்,
சீதைக்கு சித்தப்பா ராமன்….(104)

 

முலைகனத் தாயை, அலைக்கழிய விட்டு,
கொலைகுண பூதனை கொங்கை, -மலைசுவைத்தாய்,
அந்நஞ்சைப் பாம்பின்மேல், ஆடி ஜெரித்தவன்பால்,
நன்நெஞ்சே நிற்பாய் நினைந்து….(105)

 

முரணெனப் பட்டாலும், மூலமே நின்னை,
வரவழைக்கக் கண்டேன் வழியை, -இரணியன்போல்,
இல்லை இறையென்று, சொல்லி இரையாக,
மல்லுக்(கு) அழைப்பேன் முனைந்து….(106)

 

 

——————————————————————————————————————

.

 

கிரேசி மோகன்

கண்ணன் திருப்புகழ்(வெண்பா)….
———————————————————–
’’கண்ணன் அந்தாதி’’
————————————-

கீழென்றும் மேலென்றும், தாழ்வு தகவென்றும்,
வாழ்வென்றும் சாவென்றும் வாடுவதேன், -பாழ்மனமே,
எங்கும் எதனுள்ளும், எப்போதும் உள்ளுறையும்,
சிங்கத்தைச் சந்திக்க முந்து….(96)

முந்துகின்ற மூளையும், உந்தும் புலன்களும்,
அந்தநாள் தொட்டே அசுரர்கள், -சிந்தையாம்,
எண்ணக் குடத்தினை, எண்ணற்ற தூளாக்கிக்,
கண்ணன் கழலடியில் கொட்டு….(97)

கொட்டுது தேளின், கொடுக்காய்ப் புலனைந்தும்,
பட்டது போதும் பரந்தாமா, -சட்டென,
வந்தெனக்குச் சத்துவ, வாழ்வை அளித்திடுவாய்,
நந்தலாலா இந்தநாளே நீ….(98)

நீயின்றி நானில்லை, நானின்றி நீயுண்டு,
தீயின்றி தீபம் திரிதானே, -வாஇன்றே,
வெப்பமாய் வந்தென்னை, அப்புவாய் சந்தனமாய்,
அப்பனே ஆரா அமுது….(99)

அமுதா அளவினை, விஞ்சுகின்ற நஞ்சாம்,
எமதாசை நெஞ்சினை ஏற்று, -குமுதவாய்,
பேய்ச்சி முலைப்பாலை, உண்டதுபோல் எம்மனச்,
சூழ்ச்சியைக் கொள்வாய் சரண்….(100)

———————————————————————————————————————-

கிரேசி மோகன்

——————————————————————————————————————
கண்ணன் திருப்புகழ்(வெண்பா)….
———————————————————
’’கண்ணன் அந்தாதி’’
————————————

கொள்ளை அவன்கொள்கை, பிள்ளை அவன்செய்கை,
இல்லை எனும்சொல்லாய் உள்ளவன், -முள்ளை,
அவன்பெயர் சொல்லி, அணிந்திட மல்லி,
அவனேநான் ஆதல் அமைவு….(91)

அமைவதிங்(கு) எல்லாம், அவனருளால் அன்றோ,
சமயம் அவனால் அமையும், -குமையும்,
மனதே ஒருமுகம், ஆகி அவனை,
உனதே உனதாக்கி உய்….(92)

உய்ய வழியறியேன், உன்னிடம் சொல்லயென்ன,
பொய்யில் உழல்கிறேன் அய்யனே, -கையில்
கனியாக நீயிருந்தும், காய்ந்தேனே காமத்தில்,
முனியாக வந்தென்னை, மாற்று….(93)

மாற்ற உடையின்றி, மானமே கூரையாய்க்,
காற்றைப் புசிப்போரும் காணாத, -நாற்றத்
துழாய்மணி மார்பா, திருவருளை இந்தக்,
குழாய்வழி சோவென்று, கொட்டு….(94)

கொட்டும் மழைக்குக், குடையாகக் குன்றினைச்,
சுட்டு விரலால் சுமந்தவா, -திட்டம்,
உனக்குண்டோ என்னை, உருப்படியாய் ஆக்க,
குணக்குன்றே கொள்ளுந்தன், கீழ்….(95)

—————————————————————————————————————-

படங்களுக்கு நன்றி :

http://kamadenu.blogspot.in/2006_03_01_archive.html

 

கிரேசி மோகன்

கண்ணன் திருப்புகழ்(வெண்பா)….
—————————————————-
’’கண்ணன் அந்தாதி’’
———————————–

பகல்பத்து ராப்பத்து, புண்ணிய நாளில்,
அகில்மணக்கும் சன்னிதியில் ஆழ்வார், -முகில்நிறத்தன்,
மீதுகந்த பாசுரத்தைக், காதுகந்து கேட்போர்க்குப்,
பூதலத்தில் ஏது பிறப்பு….(86)

பிறப்பால் அரசன், விருப்பால் இடையன்,
திருப்பாற் கடலிலவன் தேவன், -பொறுப்பாய்,
இருப்போரைப் பேண, மறுப்போர்கள் நாண,
அறப்போர் புரிந்தஅவன் ஆண்….(87)

ஆணானாய், பெண்ணானாய், மீனானாய், ஏனமானாய்,
தூண்தோறும் சிங்கத் துருவானாய், -கூனானாய்,
வானானாய், ராமனாய் மூணானாய், கண்ணனானாய்,
நானாவாய் நாராய ணா….(88)

நாத்தழும்பு கொள்ளஅப், பூத்திரு மார்பனை,
தோத்தரிப்போர்(கு) இல்லை துயர்மனமே, -ஆத்திரம்,
காமம், அகங்காரம் ,கோபம், பொறாமையை,
நாமம் துலக்கிடும் நீறு….(89)

நீராய், நெருப்பாய், நிலம்காற்று, நீள்விசும்பாய்,
பாராய், பரந்தாமன் பார்வையாய், -மாறா(து),
இருந்தென்றும் வாழ்வை, இருண்டாலும் கண்ணன்,
கருந்தேகம் என்றதனைக் கொள்….(90)

———————————————————————————————————————-

படங்களுக்கு நன்றி

http://kamadenu.blogspot.in/2013_11_01_archive.html