Author: கிரேசி மோகன்

கிரேசி மோகன்

கண்ணன் திருப்புகழ்(வெண்பா)….
———————————————————-
‘’கண்ணன் காப்பு’’
—————————–

கஷ்டம் கலைந்திடும், நஷ்டம் நகர்ந்திடும்,
இஷ்டம் நமக்கு இணங்கிடும், – அஷ்டமி
ரோகினியில் தோன்றிய, லேகிய வண்ணனின்,
காகநிறக் காலிரெண்டும் காப்பு!

 
தீக்குளிட்டு பாரதி தீண்டிய தெய்வத்தை,
வாக்கிலெட்டா கண்ணனை வாழ்த்துவோம்,-பூக்களிட்டு
அப்பம் , அதிரசம், முப்பழங்கள், அப்பயல்முன்
கப்பம்நீ கட்டிடக் காப்பு!

மாதவனை, கேசவனை, மாலொழிய வந்தவனை,
ஆதவனை, ஆயர் அணிவிளக்கை, -யாதவனை,
ரோகினி அஷ்டமியாய், ஆகிய கீதையை,
காகீ எனக்கத்தக் காப்பு!

நடுநிசியில் ரோகினி நட்ஷத் திரத்தில்,
கொடுஞ்சிறையில் தோன்றிய கண்ணா,-முடிமிசையில்
அப்பன் சுமந்திட ஆயர்தம் கோகுல.
குப்பம் நுழைந்தவனே காப்பு!

கட்டு மயிற்பீலி, கொண்டை யிலணிந்து,
பட்டுப்பீ தாம்பரம், பூண்டாவை, -வெட்ட
வெளிதனில், மேய்க்க வேய்ங்குழல் ஊதும்,
களிமிகு கண்ணனே காப்பு!!

—————————————————————————————————————-

படங்களுக்கு நன்றி:

http://kamadenu.blogspot.in/2014_04_01_archive.html

கிரேசி மோகன்

கண்ணன் திருப்புகழ்….
————————————–

’’கண்ணனை நெஞ்சே கருது’’
——————————————————–

“ஈவிரக்க நெஞ்சுக்(கு) இறைத்திடும் பக்திநீர்,
நாவிறக்க மாய்வாய்ப்பண் ணாகமாறி, – போயிறக்கம்
விண்நனைய மண்ணில் விழலுக்கும் பாயும்காண்;
கண்ணனை நெஞ்சே கருது!

“ஆயர் சகாயன் ,அலேக்நிரஞ்சன், மண்தின்று,
தாயார் திகைத்திட தன்பவள -வாய்க்குள்ளே,
வண்ணமதைக் காட்டி, விசுவரூபக் காட்சிதந்த,
கண்ணனை நெஞ்சே கருது”

’’பெண்ணழகைக் கண்டு பரவசிக்கும் போதினில்,
கண்ணைப் பறிக்கின்ற காட்சியில், -உன்இடர்
புண்ணை சொறிகையில், பேரின்ப சாட்சியாய்
கண்ணனை நெஞ்சே கருது’’….

“பெண்ணொருத்தி பின்னலை பாரதிப் பிள்ளையவன்
பின்நின்(று) இழுக்கையில் பிய்ந்ததால், -மின்னலாய்,
சென்னியில் சூடி சிருங்கார கோலமுற்ற,
கண்ணனை நெஞ்சே கருது”….

“ஆடா(து) அசங்காது, வாடாது வற்றாது,
மாடோ, மனிதனோ, மாமுனியோ ,-கூடாமல்
எண்ணி எதிர்போர்க்கும், முன்னம் குதித்திடும்,
கண்ணனை நெஞ்சே கருது”

கூட்டுக் குடும்பமாய் காட்ஷி தருகின்ற,
பாட்டுக்(கு) ஒருகவி பாரதியின் -வீட்டினுக்கு,
அண்மையில் நிற்கின்ற, அல்லியூர் சாரதியை,
கண்ணனை நெஞ்சே கருது!!

——————————————————————————————————————–

படங்களுக்கு நன்றி

கிரேசி மோகன்

கண்ணன் திருப்புகழ்(வெண்பா)….
———————————————————-
’’கண்ணனை நெஞ்சே கருது’’
——————————————————-

காதுகண்வாய் மூக்குடல், பூதப் புலனைந்தும்,
ஏது உனக்கென்று எண்ணினையோ, – சூதிலன்று
பெண்ணவள் பாஞ்சாலி இன்னல் களைந்தவனை
கண்ணனை நெஞ்சே கருது….

கரம்தயிர் வெண்ணை கவர்ந்தவர் வீட்டில்,
அறம்பொருள் இன்பம் அனைத்தும் – தரும்பரம்,
பின்னிவைகள் எச்சமுற, முன்னிருத்தும் மோட்ஷமதை,
கண்ணனை நெஞ்சே கருது….

கிளரொளி இன்பம் இளமையில் தங்கும்,
தளரளி மூப்பதில் தேயும், – மலரளித்(து),
உன்னகத்தை பக்தி உணர்வால் உருமாற்ற,
கண்ணனை நெஞ்சே கருது….

தூய யமுனைத் துறைவனை, நந்தகோபன்
ஆயர் குலம்குதித்த ஆரமுதை, -சேயாக,
இன்னமுதாய் பேய்ச்சி இருமுலை உண்டவனை,
கண்ணனை நெஞ்சே கருது….

 
“நாணல், யமுனா நதிநெல் நிமிர்தலாய்,
கூனல் அர்ஜுனரை கீதையால்,-நாணதிர,
விண்ணென்று காண்டீப வில்லெடுக்க வைத்தவனை,
கண்ணனை நெஞ்சே கருது”!!

————————————————————————————————————–

படங்களுக்கு நன்றி

கிரேசி மோகன்

கண்ணன் திருப்புகழ் (வெண்பா)….
———————————————————-
’’கண்ணனை நெஞ்சே கருது’’
—————————————————

பீலி மயில்கொண்டை, பீதாம் பரஆடை
காலிகள் மேய்க்கும் கழியுற்றான் -போலிருந்தும்
எண்ணுதலுக்(கு) எட்டானை, கண்ணுதலான் மைத்துனனை
கண்ணனை நெஞ்சே கருது….

சொர்ணமாய் வீசிடும் சூரிய னால்காலம்
நிர்ணயம் ஆகிடும், நீகும்ப -கர்ணனாய்
திண்ணமாய்த் தூங்காமல் தூங்கி சுகம்காண
கண்ணனை நெஞ்சே கருது….

படுத்த(து) அரவணைமேல், பாண்டவர்க்காய் அன்று
தொடுத்தது பாரதத் தொல்போர் -கொடுத்தது
எண்ணிலா செல்வத்தை ஏழை குசேலனுக்கு
கண்ணனை நெஞ்சே கருது….

ஓதநீர் வண்ணத்தை ,யாதவ சின்னத்தை
ஓதுமறை நான்குமுரை உன்னதத்தை -பேதமற
என்னவென்று சொல்ல எழுத்துக்(கு) அகப்படாத
கண்ணனை நெஞ்சே கருது….

எண்திசையை ஏழ்கடலை விண்முகடை விஸ்வத்தை
கண்ணசைவில் பக்தரைக் காத்திட -முன்னசையும்
அன்னத்தன் வீற்ற அரவிந்த நாபியோன்
கண்ணனை நெஞ்சே கருது!!

படங்களுக்கு நன்றி :

http://kamadenu.blogspot.in/2013_09_01_archive.html

கிரேசி மோகன்

கண்ணன் திருப்புகழ்(வெண்பா)….
———————————————————-

”கண்ணனை  நெஞ்சே கருது’’
——————————————–

கடவுள் மடியில் கிடக்கும் வரையில்,
அட!உள் வெளியேது அஞ்சேல்! -கடலுள்ளே,
பன்னகத்தில் யோகம் பயிலும் பரம்பொருளாம்,
கன்ணனை நெஞ்சே கருது….

சிந்தை வெளிகடந்து, மந்தை வெளிபுகுந்து,
கந்தல் உடையணிந்து, கன்றுகளைத் – தந்தையாய்,
அன்னையாய்க் காத்து, அறுகம் அளித்திடும்,
கண்ணனை நெஞ்சே கருது….

கும்பிடுதல் கர்மம், குதூகலம் கோவிந்தன்,
தென்படுதல் ஆத்ம தரிசனம், – பண்படுஇவ்,
வண்ணமந்த, வாரிதி வண்ணனுடன் வாழ்ந்திடக்,
கண்ணனை நெஞ்சே கருது….

உன்னை அறிதல் உனக்கெதற்கு, உள்ளிருக்கும்
பொன்னுக்(கு) அணிகலப் போர்வையே, – தொன்னையில்,
வெண்ணெய் இருக்க, விழுதுநெய்க்(கு) ஏங்குவதேன்,
கண்ணனை நெஞ்சே கருது….

கழல்தொழுது கைகூப்பி கும்பிட்டு, செய்யும்
தொழிலுறங்கும் தென்னரங்க தேவன் – சுழல்திகிரி,
மின்னனைய நந்தகி, வெண்ணிற சங்குற்ற,
கண்ணனை நெஞ்சே கருது….கிரேசி மோகன்….

———————————————————————————————————–

படத்திற்கு நன்றி:

http://kamadenu.blogspot.in/2013_11_01_archive.html

கிரேசி மோகன்
கண்ணன் திருப்புகழ்(வெண்பா)….
———————————————————–

’’கண்ணனை நெஞ்சே கருது’’
—————————————————–

நானாக நம்முள்ளே, ஆணாகப் பெண்ணாகத்,
தானாகத் தோன்றிடும் தத்துவத்தை, – மீனாக,
எண்ணற்ற வண்ணமாய், மண்காக்க வந்தவனை,
கண்ணனை நெஞ்சே கருது….

ஆனந்த சாகரம், ஆத்ம தரிசனம்,
நானந்த பொய்கையில் நீந்திட – வானம்தன்,
வண்ணனை, அன்று வரையேந்தி நின்றவனை
கண்ணனை நெஞ்சே கருது….

அலுப்பினில் ஆழ்ந்து, சலிப்பினில் சோர்ந்து,
இலுப்பை மலரை இனிப்பென்(று), -உலுக்குகிறாய்.
மண்ணினை சர்க்கரையாய் மாற்றவல்ல மாதவனை
கண்ணனை நெஞ்சே கருது….

எதையோ நினைந்து அதையே முனைந்து
பதையாய்ப் பதைத்தது போதும் – கதையாக
மன்னனுக்கு முன்னம்  முனிசுகர் போதித்த
கண்ணனை நெஞ்சே கருது….

குவித்த திரவியம், கொண்டதோர் சுற்றம்,
தவித்த நிலையில்போம் தூரம் – பவித்திர
எண்ணமுற்ற மெய்யடியார் ஏகாந்த சேர்க்கைக்கு
கண்ணனை நெஞ்சே கருது!!

————————————————————————————————————–

படங்களுக்கு நன்றி:

http://kamadenu.blogspot.in/2013_11_01_archive.html

கிரேசி மோகன்
கண்ணன் திருப்புகழ்(வெண்பா)….
———————————————————-

’’கண்ணனை நெஞ்சே கருது’’….
———————————————————-

பாரீசன் வில்லொடித்து, பத்தினியாள் கைப்பிடித்து,
மாரீச மானால் மனைபிரிந்து, -பேராசை
மன்னனவன் லங்கேசன் மாள,வந்தோன் பின்வந்த,
கண்ணனை நெஞ்சே கருது….

ந்யாபகம் தொல்லை, நினைவு களோசத்ரு,
வ்யாபகம் கர்ம வினைகளாம், -தீபமாய்,
எண்ணத் தகளியில் ஏகாந்த நெய்யூற்றி
கண்ணனை நெஞ்சே கருது….

ஐயம் தகளியாய், அச்சமே நெய்யாக,
அய்யே!நீ ஏற்றுவாய் அஞ்ஞானம், – மையிருள்
வண்ணனை, ஞான வரதனை, வேய்ங்குழல்
கண்ணனை நெஞ்சே கருது….

விரலோடு வீக்கம்போல் வெற்பெடுத்(து) அன்று
திரளோடு தாங்கி, தவிக்க -உரலோடு,
வெண்ணையை உண்டதால், பின்னிப் பிணைந்தவனை,
கண்ணனை நெஞ்சே கருது….

அஞ்சுபுலன் ஓடு அதற்குள்ளே அக்கினிக்
குஞ்சொளிந்து கூவும் குருநாதா!, -அஞ்சன
வண்ணனை, கீதை உரைத்தகுரு நாதனைக்
கண்ணனை நெஞ்சே கருது….கிரேசி மோகன்….

—————————————————————————————————————-

படங்களுக்கு நன்றி:

http://kamadenu.blogspot.in/2013_03_01_archive.html

கிரேசி மோகன்

கண்ணன் திருப்புகழ்….
——————————————-
’’கண்ணனை நெஞ்சே கருது’’
————————————————

கனவு, தனைமறந்து கண்மூடும் தூக்கம்,

நனவிவை, மூன்றிலும் நான்யார், -வினவிட,
எண்ணவலை ஓய்ந்து, எழுந்திடும் பாற்கடல்
கண்ணனை நெஞ்சே கருது….

பாட்டிசைத்தக் கம்பனைக், கேட்டிசைந்து கொக்கரித்த
மேட்ட ழகியசிங்கன் மாலோலன், -சேட்டையாய்
பின்அணங்கு கள்சேலைப் பொய்கை பறித்தவன்,
கண்ணனை நெஞ்சே கருது….

கடல்கடைந்த போதாமை காயம் எடுத்து,
வடவரையைத் தாங்கும் வரதன், -இடையனை,
அண்ணனுடன் சேர்ந்தாயர் ஆநிரை மேய்த்தவனைக்,
கண்ணனை நெஞ்சே கருது….

நாடாய் விரக்தியை, கூடாய்வை ராக்கியத்தை,
தேடாய் தெளிவான்ம தத்துவத்தை, -வாடாய்நீ,
விண்ணகர் வைகுந்த வாய்ப்புண்டு, வேய்ங்குழல்
கண்ணனை நெஞ்சே கருது….

கோஹம் விசாரித்து, சோஹத்தின் சன்னிதியில்,
நாஹமித் தேஹமில்லை நன்குணர்ந்து, -மோஹமாய்,
பிண்ணனியில் மேயும் பசுபாசம் ஓட்டிட,
கண்ணனை நெஞ்சே கருது

———————————————————————————————————————-

படங்களுக்கு நன்றி :

http://kamadenu.blogspot.in/2014_01_01_archive.html

கிரேசி மோகன்

கண்ணன் திருப்புகழ் (வெண்பா)….
————————————————————–
’’கண்ணனை நெஞ்சே கருது’’
—————————————————–

சூர்பணகை ஆனாலும், சுந்தரி ஆனாலும்,
பார்ப்பன எல்லாம் பரம்பொருளே – தாற்பரியம்
தன்னை உணர்ந்து தவறா(து) இருந்திட,
கண்ணனை நெஞ்சே கருது!

சதிரிள மாதர் சகவாச தோஷம்,
உதிரிலைக் காலம் உணர்வாய் – மதிளரங்க
மன்னனை, மாயனை, மண்புகுந்த ஆயனை,
கண்ணனை நெஞ்சே கருது!

பண்டரி எங்குளான், பாலன் புகன்றிட,
விண்டதிரத் தூண்வாய் வெளிப்பட்ட – பண்டரியில்
தன்நினைவு தப்பத் துதிப்போர்க்(கு) அருள்புரியும்,
கண்ணனை நெஞ்சே கருது!

பட்டதெல்லாம் பாழாகும், தொட்டதெல்லாம் தூளாகும்
எட்டிய(து) ஏதும்வாய்க்(கு) எட்டாது – அட்டமியில்
விண்ணகன்று தாய்மாமன் வெஞ்சிறைக்கு வந்தவனை
கண்ணனை நெஞ்சே கருது!

வானிருந்த, கீழிறங்கி தூணிருந்த, தந்தவர
வானிருந்த, தாம்பு வடமிருந்த – மாவிருந்தை
உண்ணுதற்(கு) ஆகா(து), உறியேறும் ஆகாயக்
கண்ணனை நெஞ்சே கருது!!
————————————————————————————————————

படங்களுக்கு நன்றி:

http://kamadenu.blogspot.in/2011_12_01_archive.html

கிரேசி மோகன்
கண்ணன் திருப்புகழ்(வெண்பா)
——————————————————-

’’கண்ணனை நெஞ்சே கருது’’
———————————————————

பூமங்கை நாயகனை, பாமங்கை ஆண்டாள்மேல்

காமங்கொள் காதலனைக், கள்வனை – ஜாமங்கொள்
வண்ணனை ஆயிரம் வாரணமாய் வந்தவனை
கண்ணனை நெஞ்சே கருது!

வாதாடி வம்படித்து வாழ்ந்ததெலாம் வையமெனும்
தீதாடி பிம்பத் திருக்கன்றோ – சூதாடி
தன்னனைத்தும் தோற்ற தருமர்க்(கு) உதவிய
கண்ணனை நெஞ்சே கருது!

ஆழியை பூமியை நாழிகை நேரத்தில்
ஊழியில் உண்டுமிழ்ந்த உத்தமனை – தாழியுள்
வெண்ணையை தான்வளர்ந்த மண்ணையும் உண்ணவரும்
கண்ணனை நெஞ்சே கருது!

விடையடக்கி பின்னை இடைபிடித்து கீதை
விடையளித்தான் வாழும் வகைக்கு – விடைகொடுக்க
எண்ணிலா ஆசைக்கும் ஏங்கும் நினைப்புக்கும்
கண்ணனை நெஞ்சே கருது!

உண்ணும் சுவையும், உணவைச் செரித்திடும்
வண்ணம் வயிறும், விழிசொருக – திண்ணையில்
எண்ணமற சாய்ந்திடும் ஏகாந்தம் வேண்டி
கண்ணனை நெஞ்சே கருது!!

————————————————————————————————————–

படங்களுக்கு நன்றி :

http://kamadenu.blogspot.in/2008_07_01_archive.html

கிரேசி மோகன்
’’கண்ணனை நெஞ்சே கருது”….
—————————————————–

கண்ணன் திருப்புகழ்(வெண்பா)….
——————————————————–

சீதக் களபமும் ஸ்ரீவத்ஸ மச்சமும்

போதமர் மங்கையும் பூந்துழாயும் – வாதிடும்
வண்ணம் இடமின்றி வாய்த்தமணி மார்பனை
கண்ணனை நெஞ்சே கருது!

மூவடி மண்கேட்ட சேவடி பொற்சிலம்பு
மாவலி உச்சி மவுலியில் – தீவெடிக்க
திண்ணெனத் தாக்க திருவடி சாத்திய
கண்ணனை நெஞ்சே கருது!

மத்தினால் மாதாவால் மொத்துண்ட மைந்தனை
பத்திலோர் பாகவதப் பிள்ளையை – ஒத்தனாய்
மண்ணினைக் காக்க மகாபா ரதம்செய்த
கண்ணனை நெஞ்சே கருது!

தூணிருந்த பல்லியின் துண்டித்த வாலாக
வீணகந்தை யால்வீழ்ந்து வாடுகின்றாய் – நீநெகிழ்ந்து
அண்ணனாய் தம்பியாய் ஆன பலராமக்
கண்ணனை நெஞ்சே கருது!

திண்தடக்கை நீட்டி தலைகிடத்தி ஆயிரங்
கண்படுக்கை தன்னில் களைப்பாறும் – தென்னிலங்கை
அண்ணனைந்(து) ஈறெடுத்து,தம்பியாள தந்தராம
கண்ணனை நெஞ்சே கருது!!

——————————————————————————————————————-

படங்களுக்கு நன்றி :

http://photos1.blogger.com/img/141/4502/1024/Mvc-008f.jpg

கிரேசி மோகன்

கண்ணன் திருப்புகழ்(வெண்பா)….
———————————————————–

நினைத்திட நம்முள் நவநீதம் பொங்கும்

கனைத்திடக் காமம் கலங்கும் – மணத்துழாய்
திண்ணிய தோளில் துலங்கும், துவாபரக்
கண்ணனை நெஞ்சே கருது!!

காரோத வண்ணனின் பேரோத ஆயிரம்
நீரோடை போல்தெளிவு நம்வாழ்வில் – ஆராத
இன்னமுதை தீந்திருக் கண்ணமுதைக், கற்கண்டைக்
கண்ணனை நெஞ்சே கருது!!

வேறார்வம் கொள்ளாமல், ஆராப் புலனடக்கி
நாரா யணனை நினைப்பதே – சாராம்சம்
அந்நிலைக்குச் செல்ல அனுபூதி தந்திடும்
கண்ணனை நெஞ்சே கருது!!

சினம்மிகுந்த மாமன் சிறைபிறந்து ஆயர்
இனம்புகுந்து வாழ்ந்த இடையன் – மணம்குவிந்த
மண்ணணைநீர் மேகத்து வண்ணனை, மாற்றான்தாய்க்
கண்ணனை நெஞ்சே கருது!!

தந்தைசொல் மந்திரம் தப்பென்ற பிள்ளைக்காய்
அந்தவோர் தூணில் அலமலங்க – வந்தொளிந்து
மன்னன் இரணியன் மார்பைப் பிளந்தவனைக்
கண்ணனை நெஞ்சே கருது!!

கிரேசி மோகன்

———————————————
கண்ணன் திருப்புகழ்(வெண்பா)….
——————————————————

“கண்ணனை நெஞ்சே கருது”
—————————————————–

பாலுக்(கு) அழும்பாலன், பாவை களின்லோலன்,

ஞாயலத் துயர்தீர்க்கும் நாயகன், -மாலுக்குள்

எண்ணமாய்த் தோன்றி, இடைசாதி வந்தவன்,
கண்ணனை நெஞ்சே கருது….

பக்திக்(கு) அவன்பதங்கள், சக்திக்(கு) அவன்சரணம்
முக்திக்(கு) அவனின் மலர்த்தாள்கள், -யுக்தியாய்
கண்ணினுன் தாம்பினால் கட்டும் உரிமைக்குக்
கண்ணனை நெஞ்சே கருது….

அப்பண ஆதி அனந்தனில் தூங்குவோன்
சொப்பனம் இவ்வுலக சாராம்சம், -அற்பநான்
எண்ணம் தொலைத்து எழுவாய் விழிப்புடன்
கண்ணனை நெஞ்சே கருது….

இதுநிஜமாய் ஆகும், அது பொய்யாய்ப் போகும்,
விதவிதமாய் எண்ணல் விடுத்து, -எதுவரினும்,
கண்ணணைந்த போதுதிக்கும் காரிருள் வண்ணத்துக்
கண்ணனை நெஞ்சே கருது….

எங்கரி என்றே இரணியன் கேளும்முன்,
அங்கொரு தூணில் அதிர்ந்தவன், -சங்கரி
அண்ணனை, ஆகாய வண்ணனை ஆனந்தக்
கண்ணனை நெஞ்சே கருது
———————————————————————-

படங்களுக்கு நன்றி:

http://kamadenu.blogspot.in/2012_06_01_archive.html

கிரேசி மோகன்

————————————————————————————————————————
கண்ணன் திருப்புகழ் (வெண்பா)

“கண்ணனை நெஞ்சே கருது”
————————————————-

காட்டுப் பகுதியில் கீதம் இசைத்திடும்,

மாட்டுத் தொழுவத்தில் மண்ணுண்டு -கேட்டிடும்
அன்னைக்கு வாய்க்குள் அகிலத்தைக் காட்டிடும்
கண்ணனை நெஞ்சே கருது….

அட்டைக் கரியாக ஆடை கலைந்திட
வெட்ட வெளிதனில் வீற்றிருந்து -தொட்டிலில்
தன்நினைவு இன்றித்தாய் தாலாட்டில் தூங்கிடும்
கண்ணனை நெஞ்சே கருது….

பீதாம் பரமாட பீலி மயிலாட
தோதான தோழர்கள் தோள்கொடுக்க -மீதேறி
வெண்ணையை வாரி வழங்கிடும் வள்ளலை
கண்ணனை நெஞ்சே கருது….

நாணமின்றி யுத்தத்தில் நாலுகால் ஜந்துக்கள்
சாணமள்லிக் கொட்டும் ஜனார்த்தனனை -ஞானமள்ளி
உண்ணென கீதையை ஊட்டியதே ரோட்டியை
கண்ணனை நெஞ்சே கருது….

சூழ்ச்சி யுடன்வந்த பேய்ச்சி முலைபற்றி
மோட்ஷ விருந்தளித்த மோகனனை -மேய்ச்சலில்
கண்ணென கோகுலக் கன்றுகள் காத்திடும்
கண்ணனை நெஞ்சே கருது

கிரேசி மோகன்

திருவனந்தபுரம் பத்மநாப பெருமாள்….
————————————————-

தனனதந்த தனனதான தனனதந்த தனனதான
தனனதந்த தனனதான -தனதான….

—————————————————————————-

இருளகந்தை ஒளியும்மூல ஒளிதுலங்கு குகைவிசார
முறைபுகன்ற அருணைவாசி -ரமணேசர்
வழிநடந்து மனதையாளும், புலன்களைந்தின் பிடிபடாத,
சிவனினன்பு சுகவிலாசம் -குடியேற,

மருளஅன்று சிலையைவீசி விஜயன்கொண்ட மனவிசாரம்,
ஒழியசங்கு ஒலிஉலாவு -அருள்கீதை
மொழிபுகன்று, கவுரவாதி படையழிந்து புனிதபூமி
பளுவடங்க ரதம்கடாவு, -விரைவோடு,

அருளவந்து, அலையுமாசை கடல்கடைந்து அமுதஞானம்
அதில்பிறந்து அதனைநானும், -பெறவேணும்.
குறவணங்கு அமரஆனை மணம்புரிந்து கடலிலாடும்
சிவன்மகிழ்ந்த சுருதிபாலன் -முறைமாம.

பொருளுகந்த பழையதோழன், அவலுகந்து தருமதானம்,
புவிவிளங்க மனிதனாக -அவதார,
மலையடர்ந்து வளமையான, மழைபொழிந்து பசுமையான,
திருவனந்த பதுமநாப -பெருமாளே….
———————————————————————————–

படங்களுக்கு நன்றி:

http://www.findinsideindia.com/visit-thiruvananthapuram-the-abode-of-lord-vishnu/

http://thulasidhalam.blogspot.in/2009/05/2009-24.html