Category: தலையங்கம்

பவள சங்கரி

விவசாயிகளின் வாழ்வாதார மேம்பாட்டிற்கு ஊக்கம் தரும்விதமாக விஞ்ஞானிகளின் புதிய கண்டுபிடிப்பு. மாதுளம் பழம், மஞ்சள் ஆகிய இரண்டு விவசாயப் பொருட்களின் சாறுகளிலிருந்தும் சாயம் தயாரிக்கும் புதிய உத்தியை கண்டுபிடித்துள்ளனர். சிகப்பு, மஞ்சள், பச்சை, வெள்ளை, நீலம் போன்ற நிறங்களின் சாயப்பொருட்களை உருவாக்கியுள்ளனர். சென்னை ஐ.ஐ.டி இரசாயண பிரிவைச் சார்ந்த ஆய்வாளர்களான, டாக்டர் விக்ரம்சிங், பேரா. அசோக் மிஸ்ரா ஆகியோர் இதனைக் கண்டுபிடித்து சாதனைப்படைத்துள்ளனர். இதில் அடுத்தக் கட்டமாக மஞ்சளைத் தவிர்த்து மாதுளம்பழச்சாற்றிலிருந்தே வெண்மை நிறத்தைக் கொண்டுவந்துள்ளனர். இந்த வெள்ளை நிறம் நீலநிறத்தோடு கலந்துள்ளதானாலும் அதற்குரிய வெண்மைத்தன்மையுடனேயே இருப்பதாகவும் அறிவித்துள்ளனர்.

வெளிநாடுகளுக்கு ஏற்றுமதி செய்யும் இயற்கை பருத்தி (ஆர்கானிக் பருத்தி) ஆடைகளும் இயற்கை சாயம் ஏற்றப்பட்ட ஆடைகளுக்கும் நல்ல வரவேற்பு உள்ளதும் குறிப்பிடத்தக்கது. இந்த இயற்கை சாயத்தினால் தோல் வியாதிகள் முற்றிலுமாக தடுக்கப்படுவதோடு மண் மணம் மாறாமல் இயற்கையோடு இயைந்திருக்கும்! அந்த இரு இளம் விஞ்ஞானிகளையும் பாராட்டி ஊக்கப்படுத்துவதன் மூலம் நம் விவசாயப்பெருங்குடிகளின் வாழ்வாதாரமும் உயரும் என்று நம்புவோம்!

பவள சங்கரி

அனைத்துத் துறைகளிலும் வெளிப்படைத்தன்மையோடு கூடிய செயல்பாடுகளாகிய மத்திய அரசின் புதிய அணுகுமுறை ஏகோபித்த முறையில் பாராட்டு பெற்றுவரும் நிலையில் அனைத்து மாநில அரசு தொடர்பான கோரிப்பெறப்படும் ஒப்பந்தங்களும் வெளிப்படைத் தன்மையுடையதாக இருத்தல் அவசியம். பொது மக்களுக்கு அளிக்கக்கூடிய சமையல் எரிவாயுவிற்குரிய மானியத் தொகையோ, அல்லது விவசாயிகளுக்கு அளிக்கப்படும் மானியத்தொகையோ அனைத்தும் வங்கிகளில் நேரடியாகச் செலுத்தப்படுகின்றன. இதன் மூலமாக போலி கணக்குகள் ஒழிக்கப்பட்டு பல கோடி ரூபாய்கள் சேமிக்கப்பட்டுள்ளன. இதுபோல் மாநில அரசுகள் கொள்முதல் செய்யும் அனைத்து இனங்களும் வெளிப்படைத் தன்மையோடு கூடிய ஒப்பந்தங்களே கோரிப் பெறப்படவேண்டும். இதன் மூலமாக பல ஆயிரம் கோடி ரூபாய்கள் முறைகேடான முறையில் செல்வது தடுக்கப்படும். சமீபத்தில் உலக வங்கி சென்ற ஆண்டான 2016இல் மட்டும் 14 இலட்சம் கோடி கருப்புப் பணமாக வெளிநாடுகளுக்குச் சென்றுள்ளதாகவும், சுமார் 6,000 கோடி கருப்புப்பணமாக இந்தியாவிற்குள் வந்துள்ளதாகவும் தெரிவித்துள்ளது. பிரதமரின் கருப்புப் பணத்தை ஒழிக்கும் நடவடிக்கைகளில் ஒன்றாக அனைத்து ஒப்பந்தங்களும் (transparent tender) வெளிப்படையாக இருந்தால் இதில் ஒரு நல்ல முன்னேற்றம் ஏற்பட வாய்ப்புள்ளது. சமீபத்தில் பல ஆயிரம் கோடி ரூபாய்க்கான நிலக்கரி கொள்முதல் செய்யப்படும் என்று மாநில மின்சாரத்துறை அமைச்சர் அறிவித்துள்ளார். இந்த கொள்முதல் நெய்வேலி நிலக்கரி சுரங்கத்திலிருந்து பெறப்படுமா அல்லது இந்தியாவிலுள்ள நிலக்கரிச் சுரங்கங்களிலிருந்து வெளிப்படையான ஒப்பந்தங்கள் மூலமாக கொள்முதல் செய்யப்படுமா, அதற்குரிய தரங்கள், விலைகள் வெளிப்படையாக அறிவிக்கப்படுமா போன்ற தகவல்கள் ஏதும் வெளிவரவில்லை. இந்தியாவிலுள்ள பல தனியார் நிறுவனங்கள் இந்தியாவிலேயே நிலக்கரியை கொள்முதல் செய்கின்றனர். அவர்கள் தரமும், விலையும் பார்க்காமல் கொள்முதல் செய்ய வாய்ப்பில்லை. திறந்த சந்தை கொள்முதல் முறைப்படி நமது அனல் மின் நிலையங்களுக்குத் தேவையான நிலக்கரிகளை கொள்முதல் செய்தால் பல ஆயிரம் கோடி ரூபாய் மீதமாகும். பொறுப்பில் உள்ளவர்கள் இதுபற்றி சிந்திப்பார்கள் என்று எதிர்பார்க்கலாம்.

பவள சங்கரி

“சிங்காரச் சென்னை”, இந்தியாவின் சுத்தமான நகரங்களின் பட்டியலில்  235வது இடத்திற்குச் சென்றதற்கான காரணங்களை புட்டுப்புட்டு வைத்துள்ளது இதற்கான தேர்வுக்குழு! புயலுக்குப்பின் 3 மாதம் கழித்து சென்னை மாநகரகத்தின் அனைத்துப்பகுதிகளிலும் சென்று ஆய்வு செய்து, புயலால் ஏற்பட்ட சேதங்கள் இன்னும் அகற்றப்படாமல் ஒவ்வொரு பகுதிகளிலும் குவிந்துகிடப்பதும், கழிவு சுத்தீகரிப்பு மேலான்மை செயல்படாமல் இருப்பதும், சரியான திட்ட வரைமுறைகள் தீட்டப்படாமல் இருப்பதும், கழிவறைகள் அருவருக்கத்தக்க முறையில் இருப்பதுமே இதற்கான காரணங்களாகக் கூறப்பட்டுள்ளன. இது முற்றிலும் உண்மை என்ற வகையில் நாம் சென்னையைச் சுற்றிப்பார்த்தாலே இந்த நிலையை காணமுடிகிறது. இதில் முக்கியமாகக் கவனிக்கப்படவேண்டியது நோய்கள் வேகமாகப் பரவக்கூடிய அபாயங்கள் உள்ளதையும் எச்சரிக்கையாகக் கொள்ளவேண்டும். மைசூர், பங்களூரு போன்ற பெருநகரங்களில் சுத்தத்திற்கு முன்னுரிமை கொடுக்கப்பட்டு காலை 6 மணி முதல் நூற்றுக்கணக்கான பணியாட்கள் துப்புரவு பணிகளில் ஈடுபட்டிருப்பதை கண்கூடாகக் காணமுடிகிறது. ஆனால் நமது மாநில அரசோ அல்லது மாநகராட்சி நிர்வாகமோ இதில் துளியும் கவனம் செலுத்துவதில்லை என்பதே வேதனைக்குரிய விசயம் ..

பவள சங்கரி

தலையங்கம்

ஜம்மு காஷ்மீர் பகுதியில் எல்லைக்கோட்டைத் தாண்டி சுமார் 250 மீட்டர் நமது இந்தியப் பகுதியில் ஊடுறுவி நமது இரண்டு இராணுவ வீரர்களை சுட்டுக்கொன்றதோடு, அநாகரீகமான முறையில் அவர்களின் உடல்களை சிதைத்துச் சென்றனர். இதற்கு நம் இராணுவ அமைச்சரும், பாதுகாப்பு அமைச்சரும் கண்டனம் தெரிவித்துள்ளனர். நேற்று இரவு பாகிஸ்தானுக்கு பதில் அளிக்கும் வகையில், நமது இராணுவத்திற்கு நடவடிக்கைகள் எடுப்பதற்கு முழு சுதந்திரமும் கொடுக்கப்பட்டுள்ளதாக அறிவிக்கப்பட்டது. இன்று அதற்கு பதில் அளிக்கும் வகையில் 7 பாகிஸ்தானிய வீரர்கள் சுட்டு கொல்லப்பட்டுள்ளனர். இதே நாளில் வங்கிக் கருவூலத்திலிருந்து பணத்தை மாற்றுவதற்காக எடுத்துச் சென்றபோது தீவிரவாதிகள் அந்தப் பணத்திற்கு பாதுகாப்பிற்காகச் சென்ற நமது இராணுவ வீரர்கள் மூவரையும், வங்கி அலுவலர்கள் இருவரையும் சுட்டுக்கொன்று பணத்தை கொள்ளையடிக்க முயற்சித்ததும் முறியடிக்கப்பட்டது.

சமீபத்தில் காஷ்மீர் பொது மக்களில் ஒருவரை இராணுவ வண்டியில் முன்னே கட்டி தற்காப்பிற்காகக் கொண்டுசென்றதை அனைவரும் வன்மையாகக் கண்டித்தனர். ஆனால் இந்த பொது மக்களுக்கு யார் இந்த தீவிரவாதி என்பது தெரியாமலா இருக்கும். அதைக்கண்டித்தவர்கள் இதற்கும் கண்டனம் தெரிவித்திருக்க வேண்டுமல்லவா. எல்லைக்கோட்டைத் தாண்டி நமது எல்லைக்குள் வந்து நமது இராணுவ வீரர்களை கொன்றுவிட்டு உடலையும் சிதைத்தவர்களையும் கண்டிக்க வேண்டுமல்லவா? முன்பு சர்ஜிகல் ஸ்டிரைக் செய்ததுபோல மீண்டும் ஒருமுறை இனி அவர்கள் இதுபோல் நடக்காதவண்ணம் நடவடிக்கை எடுக்கப்பட வேண்டும். பாகிஸ்தான் பொறுப்பிலுள்ள காஷ்மீர் மற்றும் ஆப்கானிஸ்தான் எல்லைப்பகுதியும் இணைத்து ஒரு புதிய மாகாணத்தை உருவாக்கி பாகிஸ்தான் பகுதியாக அறிவித்துள்ளனர். ஆனால் அங்கிருக்கும் மக்கள் இந்தியாவோடு இருப்பதையே விரும்புகின்றனர். அந்தப்பகுதியை இந்தியாவோடு இணைத்தாலே இந்தப் பிரச்சனைகளுக்கு தீர்வாக அமையும் என்று சமூக ஆர்வலர்கள் கருதுகின்றனர்.

கடந்த 4 ஆண்டுகளில் அமைதி உடன்படிக்கையை மீறி நமது எல்லையில் ஊடுறுவிய தீவிரவாதிகளும், நமது இராணுவத்தில் ஏற்பட்ட உயிரிழப்புகளும்!

2014இல் 153 முறை அமைதி உடன்படிக்கையை மீறி ஊடுறுவியவர்களில் 104 தீவிரவாதிகள் சுட்டுக் கொல்லப்பட்டுள்ளனர். இதில் நமது இராணுவ வீரர்கள் 31 பேர் வீரமரணம் அடைந்துள்ளனர். 2015இல் 150 முறையும் இதில் 101 பேர் தீவிரவாதிகள் கொல்லப்பட்டுள்ளனர். நம்முடைய 33 இராணுவ வீரர்கள் உயிரிழந்துள்ளனர். 2016இல் 223 முறை அத்துமீறி அதிகபட்சமாக இந்தியாவிற்குள் நுழைந்து 150 தீவிரவாதிகள் சுட்டுகொல்லப்பட்டுள்ளனர். அதில் நமது இராணுவ வீரர்களில் 63 பேர் வீரமரணம் அடைந்தனர். 2017இல் இந்த 4 மாதங்களில் மட்டும் 65 முறை நமது எல்லையைத் தாண்டி உள்ளே நுழைந்துள்ளனர். இதில் 42 தீவிரவாதிகள் சுட்டுக்கொல்லப்பட்டுள்ளனர். இதில் நமது இராணுவ வீரர்கள் 18 பேர் வீரமரணம் அடைந்துள்ளனர். ஆனால் இந்த ஆண்டில் முதன்முறையாக நமது இரண்டு இராணுவ வீரர்களைக்கொன்று அவர்தம் இன்னுடல்களையும் சிதைத்துள்ளனர் என்பது மிகவும் வேதனைக்குரிய செய்தி.

பவள சங்கரி

இன்று இந்தியாவில் பெரும்பாலும் அனைத்து மாநிலங்களும் வறட்சியின் பிடியில் சிக்கித் தவிக்கின்றன. ஒவ்வொரு முறை பருவகால மாற்றங்கள் ஏற்படும்போதும் நாம் வாயளவில் கூறிக்கொண்டிருக்கும் வரும்முன் காப்போம் என்ற திட்டங்களை உண்மையிலேயே செயல்படுத்தி வந்துள்ள சில மாநிலங்களில் நீர் ஆதார விகிதாச்சாரங்கள் மேம்பட்டிருப்பதை அறிந்து பாராட்டாமல் இருக்கமுடியவில்லை. கேரளா, தெலுங்கானா, குஜராத் போன்ற மாநிலங்கள் இதில் அடங்கும். ஆந்திரா மாநிலம் இன்று வறட்சியில் தவித்தாலும் வரும் ஆண்டுகளில் தங்களுடைய வாழ்வாதாரங்களை தற்காத்துக்கொள்ளும் வகையில் அனைத்து நதிகளையும் இணைக்கும் செயல்பாடுகளில் தீவிரமாக ஈடுபட்டுள்ளனர். கேரள மாநில மக்களோ, அரசை மட்டுமே நம்பி இருக்காமல், அங்குள்ள கிராம நிர்வாகங்களே அந்தந்த பகுதிகளில் கிட்டத்தட்ட 200 கிணறுகள் வரை தோண்டும் முயற்சியில் ஈடுபட்டுள்ளனர். கேரளாவும், தெலுங்கானாவும் ஆழ்துளை கிணறு போடுவதைத் தவிர்த்து வருவதும் குறிப்பிடத்தக்கது. கர்நாடக அரசாங்கமோ ஒரு படி மேலேபோய் இஸ்ரோவின் உதவியுடன் சாட்டிலைட் மூலமாக நீர் ஆதாரங்களைக் கண்டுபிடித்து அந்தந்த இடங்களில் மட்டும் ஆழ்துளை கினறுகள் தோண்ட திட்டமிடுகின்றது. 800 மீட்டர் ஆழத்திற்கு ஆழ்துளை கிணறு தோண்டப்பட்டு, அபரிமித நீராதாரங்களைக் கண்டுபிடித்து தங்களின் சுய தேவைகளைப் பூர்த்தி செய்துகொள்ளும் வகையில் 12.5 கோடி செலவிடத் திட்டமிட்டுள்ளனர். ஆனாலும் இத்திட்டம் எந்த அளவிற்கு வெற்றியடையும் என்று கணிக்க முடியாதவகையில் இதனுடைய செலவினங்களும் அதிகம் என்பதோடு, அதிக அளவில் ஆழம் தோண்டுவதால் நில அதிர்வு போன்ற பின் விளைவுகளையும் சந்திக்க நேரலாம் என்று இயற்கைவள மேம்பாட்டு ஆர்வலர்கள் குறிப்பிட்டுள்ளதையும் கருத்தில்கொள்ள வேண்டியுள்ளது.

நமது தமிழக அரசு இப்பொழுதுதான் தூர் வாரும் பணியை மெல்ல முன்னெடுத்துள்ளது. முதல் கட்டமாக மேட்டூர், பெருஞ்சாணி போன்ற 5 அணைக்கட்டுகளில் தூர் வாரும் பணியை ஆரம்பிக்க உத்தரவிட்டுள்ளதாக முதலமைச்சர் நேற்று அறிவித்துள்ளார். விவசாயிகளின் நீண்ட நாள் கோரிக்கையான தூர் வாரப்படும் இந்த வண்டல் மண் ஏக்கருக்கு 1 டன் என்ற விகிதத்தில் அவர்களுக்கேக் கொடுப்பதாகவும் அறிவித்துள்ளார். இதில் எந்தவித குளறுபடியும் இல்லாமல் அனைத்து விவசாயப்பெருமக்களுக்கும் வளம் நிறைந்த இந்த வண்டல் மண் குறை இல்லாமல் கிடைக்க வழி செய்யவேண்டும். வாழ்வாதாரம் காக்கப்போராடும் விவசாயப் பெருமக்கள் தங்கள் கவனத்தை இதன்பாலும் செலுத்தி பயன்பெற வேண்டியதும் அவசியம்.

ஒவ்வொரு ஆண்டும் நம் தமிழகம் பருவகால மாற்றங்களை எதிர்கொள்ள ஏதுவாக வரும் முன் காப்போம் என்ற செயல் திட்டத்தை நடைமுறைப்படுத்தத் தவறுவதால் ஏற்படும் இழப்புகள் மற்ற மாநிலங்களைவிட அதிகமாகவே உள்ளதை மறுக்க இயலவில்லை. இன்று வறட்சியில் அவதியுறும் மக்கள், மழைக்காலங்களில், மலைப்பிரதேசங்களில் மண் சரிவு ஏற்பட்டு பெரும் பாதிப்புகளையும், போக்குவரத்து இடையூறுகளையும் ஏற்படுத்துவதையும் பற்றி கவலைகொள்வதே இல்லை. மண் பிடிப்பைத் தரக்கூடிய பெரிய மரங்களை வெட்டிவிட்டு தேயிலை பயிரிடுவோர் அந்த இடங்களில் பாதுகாப்புக்காக தடுப்புச்சுவர்கள் கட்டுவதில்லை. அதே மரங்களால்தான் மழைவளம் பெறுகிறோம் என்பதையும் கவனம் கொள்வதில்லை என்பதும் வறட்சிக்குக் காரணமாகிவிடுகிறது.

பவள சங்கரி

இயற்கை மாற்றங்கள் தட்பவெப்ப நிலையில் மாறுதல்கள், இந்தியாவில் ஏற்படும் வறட்சி போன்ற அனைத்திற்கும் காரணம் தர்மல் பவர் பிளாண்ட் தான் என்று இலண்டனிலுள்ள புகழ்பெற்ற பல்கலைக்கழகம், தங்கள் ஆய்வின் முடிவாக அறிவித்துள்ளது. ஐரோப்பிய யூனியன் நாடுகள் மற்றும் இங்கிலாந்து, பிரான்சு போன்ற நாடுகளில் பல ஆண்டுகளாக செயல்பட்டு வரும் தர்மல் பவர் பிளாண்ட் அதாவது நிலக்கரியிலிருந்து மின்சாரம் தயாரிக்கும் நிறுவனங்களால், அதிக அளவு கார்பன் மற்றும் வெப்பங்கள் வெளியிடுதல், மேற்கு கிழக்கு காற்று சுழற்சியினால் அந்த பாதிப்பு இந்தியாவைத் தாக்குவதாகவும் அறிவித்துள்ளனர். மேலும் பல தொழில்நுட்பம் சம்பந்தப்பட்ட விவரங்களும் அளித்துள்ளனர். இவர்கள் கூறியது உண்மை என்று எடுத்துக்கொள்ளும் வகையில் நெய்வேலி தர்மல் பவர் பிளாண்ட் மற்றும் தூத்துக்குடியிலுள்ள பவர் பிளாண்ட் போன்றவைகள் அதன் சுற்றுப்பகுதிகளையே வனாந்திரமாக மாற்றிவிட்டிருக்கலாம் என்ற எண்ணத்தைத் தோற்றுவிக்கின்றன. நெய்வேலியிலிருந்து சேலம் வரும் வழியில் உள்ள அனைத்துப் பகுதிகளும், தூத்துக்குடி மற்றும் அதன் சுற்றுப்பகுதிகளும், அங்கிருந்து மதுரை வரும் வழியனைத்தும் தற்போது பாலைவனமாகவே காட்சியளிக்கின்றன. மத்திய அரசும், மாநில அரசும் இலண்டனிலுள்ள அந்த பல்கலைகழகத்தின் அறிக்கையையொட்டி ஆய்வுகளை மேற்கொள்ளவேண்டியது அவசியம். இல்லாவிட்டால் நமது இந்தியாவும், தமிழ்நாட்டின் பல பகுதிகளும் பாலைவனம் ஆவதை தடுக்கவியலாமல் போகலாம் என்ற அச்சத்தை ஏற்படுத்துகிறது. இந்த நிலையில் நெடுவாசல் போன்ற பகுதிகளில் பெட்ரோலியப்பொருட்களை எடுப்பதற்கு முன்பாகவும் ஆய்வு செய்யவேண்டியதும் அவசியமாகிறது.

பவள சங்கரி

டிவீட்டர் மூலம் சமீபத்தில் எடுக்கப்பட்ட 4.2 இலட்சம் பேரின் வாக்கெடுப்பில் 70% பேர் ஊழலற்ற ஆட்சியை எதிர்பார்த்துள்ளனர். 17% பேர் சுத்தமான இந்தியாவையும், மூன்றாவது இடத்தில் உடல் ஊனமுற்றோருக்கான அங்கீகாரத்தை உறுதி செய்யவேண்டும் என்றும் வாக்களித்துள்ளனர். வாக்களித்தவர்களில் 87% ஆண்களும்,  13% பெண்களும் பங்குபெற்றுள்ளனர். 70% பேர் ஊழலற்ற ஆட்சியை எதிர்பார்த்துள்ள நிலையில் ஊழல் என்ற ஒன்று உருவாவதே பொதுமக்களாகிய நம்மிடமிருந்துதான்… கையூட்டு தருவதில்லை என்ற உறுதியான முடிவெடித்தால் 60% ஊழலை ஒழித்துவிடலாம். அனைத்தும் கணினிமயமாகிவிட்ட இன்றைய நிலையில் நமக்குத் தேவையான அரசு ஆதாரங்கள் அனைத்தும் கட்டணமின்றி தரவிறக்கம் செய்துகொள்ள முடியும். இந்த ஆரம்பம் தொடர்ந்தால் 100% ஊழலற்ற ஆட்சிக்கு வழி பிறக்கும். மத்திய அரசு அலுவலகங்கள், வங்கிகள், பொதுத்துறை அலுவலகங்கள் ஆகியவைகளின் செயல்பாடுகள் அல்லது புகார்கள் இருப்பின் தொடர்புகொள்ள வேண்டியவர்களின் எண்கள்:

SP CBI ACB,Chennai call
044 28273186/0992 or SMS 9444442516
Mail : hobacchn@cbi.gov.in

பவள சங்கரி

ஆறடி தூரத்திலிருந்து கைவிரல்களின் எண்ணிக்கையை சரியாகக் கனிக்கமுடிந்தால் அவர்கள் கண்பார்வை உள்ளவர்களாம். மூன்றடி தூரத்திலிருந்து கனிக்க முடியாவிட்டால்தான் அவர்கள் பார்வையற்றவர்களாம். 1926இலிருந்த இந்த நிலையை மாற்றி புது உத்தரவால் சுமாராக 40 இலட்சம் மக்கள் பார்வை உள்ளவர்கள் பட்டியலில் இணைந்துவிடுவதால் அவர்களுக்குக் கிடைக்கக்கூடிய சிறப்பு சலுகைகள் மறுக்கப்பட்டுவிடுகின்றன. முந்தைய கணக்கெடுப்பின்படி நமது இந்தியாவில் 1 கோடி 20 இலட்சம் பேர் பார்வையற்றவர்கள். ஆனால் தற்போதைய திருத்தத்தின்படி இவர்கள் 80 இலட்சமாகக் குறைக்கப்பட்டுவிட்டனர். உலக சுகாதார மையத்தின் அறிவுறுத்தலின்படி 2020க்குள் பார்வையற்றவர்களின் எண்ணிக்கையை குறைக்கவேண்டும் என்ற திட்டத்தை இப்படி ஒரு ஆகாவழி திட்டத்தின் மூலம் குறைத்துவிட்டனர்! ஆனால் இதன் உண்மையான நோக்கம் இதுவல்ல. சரியான சிகிச்சை, சத்துணவு வழங்கல் போன்ற நல்ல நடவடிக்கைகள் மூலமே இந்த குறைகளை அகற்றவேண்டியதுதான் உலக சுகாதார மையத்தின் குறிக்கோள். ஆனால் நம்மை நாமே ஏமாற்றிக்கொள்வதற்காக இப்படி ஒரு குறுக்கு வழியை நடைமுறைப்படுத்துவது நியாயமா? இதனால் கண் பார்வையோடு, தங்களுக்குக் கிடைக்கும் சிறப்புச் சலுகைகளையும் இழக்கவேண்டிய துர்பாக்கிய நிலைக்கு ஆளாகியுள்ளவர்கள் இந்த 40 இலட்சம் மக்கள் என்பது வேதனைக்குரிய செய்தி.

உலகில் கண் பார்வையற்றோர், மொத்த சனத்தொகையில் 1% பேர். இந்த நிலையைக் குறைக்க வேண்டும் என்று உலக சுகாதார மையம் இதை 0.8% ஆகக் குறைக்க முடிவு செய்து, அனைத்து நாடுகளிலுள்ள அரசுகளுக்கும் இதைப் பரிந்துரை செய்துள்ளது. நமது அரசு மிக புத்திசாலித்தனமாக ஒரு சிறு அறிவிப்பின் மூலமாகவே இதை நிறைவேற்றிவிட்டதுதான் ஆச்சரியமான செய்தி!

பவள சங்கரி

புதுமைக்கும் அரசின் அணுகுமுறைக்கும் ஏற்படும் மற்றுமொரு போராட்டம். நடுவன் அரசாகட்டும், சமூக ஆர்வலர்களாகட்டும், சூரிய ஒளியை பெருவாரியாக பயன்பாட்டிற்குக் கொண்டுவரவேண்டும் என்று பிரச்சாரம் செய்யும் இந்நாளில், 2022இல் 20,000 மெகாவாட் மின்சாரம் உற்பத்தி செய்யப்படும் என்று இலக்கு நிர்ணயித்துள்ள இன்றைய நிலையில் இஸ்ரோ, குறைந்த விலையில் சோலார் பேனல் கிடைப்பதற்கான முயற்சியில் ஈடுபட்டுள்ளது. நமது மின்சாரப் பங்கீட்டு நிர்வாகம் ஒவ்வொரு தனி மனிதர்களும் தங்கள் இடத்தில் உற்பத்தி செய்யும் சூரிய மின்சாரத்தை வாங்குவதற்கும் தேவையற்ற கெடுபிடிகள் செய்ய ஆரம்பித்துள்ளனர். 200 யூனிட்டிற்கு மேல் 500 யூனிட்டிற்கு மேல் உபயோகிப்பாளர்களுக்குரிய கட்டண வேறுபாடுகளைக்காட்டி ஏற்க மறுப்பதாக செய்திகள் கூறுகின்றன.

ஜெர்மனியில் சூரியனுக்கு நிகராக ஒரு செயற்கைச் சூரியனையே உருவாக்கிவிட்டனர்! நாம் சோலார் பேனலிலிருந்து வீட்டு உபயோகத்திற்காக மின்சாரம் எடுப்பதற்கே இத்தனை குளறுபடிகள் நாமே ஏற்படுத்திக்கொள்கிறோமே, நாம் எப்போதுதான் ஜெர்மனி போல முன்னேறப்போகிறோம்? செயற்கை சூரியன் என்பது மிகப்பெரிய பல சக்திகளின் சிறு பெயர்! அதனுடைய விரிவாக்கங்களைப் பார்த்தால் நாம் எந்த அளவிற்கு பின் தங்கியிருக்கிறோம் என்பது புரியும் .. 🙁

பவள சங்கரி

மின்னணுப்பரிமாற்றங்களை ஊக்குவிக்கின்ற மத்திய அரசு அதிலுள்ள பாதுகாப்பு அம்சங்களை ஆராய்ந்து உடனடியாக நடவடிக்கை எடுக்க வேண்டிய சூழ்நிலை ஏற்பட்டுள்ளது. வங்கிசாரா அமைப்புகளின்றி அனைத்து நிதி மின்னணுப் பரிவர்த்தனைகளும் பாதுகாக்கப்பட வேண்டிய சூழலில் உள்ளது. இதைப்பற்றி சமீபத்தில் NSA (National Security Agency) உலகின் அனைத்து வங்கி சேவைகளும் தங்களால் முடக்கப்படும் என்று அறிவித்து சில நாட்களுக்குள்ளாகவே வங்க தேசத்திலிருந்து 89 மில்லியன் டாலர் பரிவர்த்தனை முறைகேடாகச் செய்யப்பட்டு அது நமது இந்தியாவின்,  யூனியன் பேங்க் ஆஃப் இந்தியா சேர்மன் மற்றும்  தேசிய வங்கித்துறை பாதுகாப்பு ( National Security Advisor) ஆலோசகரும் இணைந்து அந்தத் தொகைக்கு இருமடங்கு சுமாராக 180 மில்லியன் டாலரை மறுபரிவர்த்தனை மூலமாக திரும்பப்பெறச் செய்துள்ளனர்.  சுமார் 6 நாட்களுக்குள் இந்தத் தொகை திரும்பப் பெறப்பட்டுள்ளது. நமது அனைத்து வங்கிகளும், மத்திய ரிசர்வ் வங்கியும் மத்திய அரசின் நிதி பரிவர்த்தனைகளும் இதுபோன்ற முறைகேடான பரிவர்த்தனைகளிலிருந்து பாதுகாக்கவும், முறைகேடாக அனைத்து வங்கிக் கணக்குகளும், நிதித்துறைக் கணக்குகளும் முடக்குவதிலிருந்து தக்க பாதுகாப்பு நடவடிக்கைகள் எடுக்கவேண்டியது அவசியம். வங்கித் துறைகளின் நடவடிக்கைகள் மின்னணுப் பரிமாற்ற வளர்ச்சிக்கு ஏற்ப சைபர் கிரைமும் வளர்ச்சியடைகிறது என்பதையும் கருத்தில் கொள்ளவேண்டும். சமீபத்தில் சிலிகான் மூலம் வங்கி அட்டைகளின் கணக்கு எண்ணும்,  பின் நம்பரும் எளிதில் கைப்பற்றக்கூடியதாக இருப்பதாக அறிவிக்கப்பட்டுள்ளது. ஆகவே மின்னணுப் பரிமாற்றங்கள் பற்றிய முழு பாதுகாப்பும் இன்றைய அத்தியாவசியம் ஆகிறது. ஆறு நாட்களில் கண்டுபிடிக்கப்பட்டு மீட்கப்பட்டதாகக் கூறினாலும், ஆறு நாட்கள் ஆகியுள்ளதே என்று அதிர்ச்சியடையாமல் இருக்க முடியவில்லை.

பவள சங்கரி

பன்னாட்டு நிறுவனங்களின் தயாரிப்புகளில் மிகுந்த எச்சரிக்கையாக இருக்க வேண்டிய காலமிது. வங்காளத்தில் அபாட் எனும் பன்னாட்டு மருந்து நிறுவனம் ஆண்டிற்கு 2,300 கோடி ரூபாய்க்கு உற்பத்தி செய்து சுமாராக 350 கோடி ரூபாய் இந்தியாவில் மட்டும் வருமானம் பார்க்கும் இந்நிறுவனம் காலாவதியான மருந்துகளை திரும்பப் பெற்றுக்கொள்ள மறுக்கின்றது. இப்படி காலாவதியான மருந்துகளை அழிப்பதற்கான முறைகளும் அவர்களிடமே உள்ளன. இது தொடர்பாக மேற்கு வங்காள அரசு அறிவுறுத்தியும் திரும்பப்பெற மறுக்கின்றது. இது தொடர்பாக உணவு மற்றும் மருந்து கட்டுப்பாட்டு ஆணையத்திடம் உத்தரகாண்ட் அரசு, மேற்கு வங்க அரசு, குஜராத் அரசு போன்றோர் புகார் தெரிவித்தும் இதுவரை எந்த நடவடிக்கையும் அந்த பன்னாட்டு நிறுவனம் எடுக்கவில்லை என்பது உண்மை. இதுபோல பன்னாட்டு நிறுவனங்கள் இந்தியர்களுக்காக மட்டும் தனிப்பட்ட முறையில் வாகனங்கள், குளிர்பானங்கள், மின்னணு சாதனங்கள் போன்ற அனைத்தையும் மிக மட்டமாகத் தயாரித்து இந்தியாவின் வாங்குவோர் சந்தையையே குப்பையாக்கிவிடுகின்றனர். நாமும் கடைக்காரர்களையே மருத்துவர்களாக்கி அவர்கள் கொடுக்கும் மருந்தைக்கூட கண்ணை மூடிக்கொண்டு வாங்கிப் பயன்படுத்தி பின்விளைவுகளைச் சந்தித்தாலும் அது பற்றிய விழிப்புணர்வே இல்லாமல் இருக்கிறோம். இது பற்றி நடுவண் அரசோ அல்லது மாநில அரசோ எந்தவித நடவடிக்கையும் எடுக்கவில்லை என்பதே வேதனைக்குரிய செய்தி. தமிழகச் சுகாதாரத் துறை அமைச்சரும், சுகாதாரத்துறை செயலரும் இதுகுறித்து எந்தவித நடவடிக்கையும் இதுவரை எடுத்ததாகத் தெரியவில்லை..

பவள சங்கரி

தலையங்கம்

ஆந்திராவும், தெலுங்கானாவும் போட்டி போட்டுக்கொண்டு வளர்ச்சிப்பாதையில் முந்திக்கொண்டிருக்கின்றன. தடுப்பணைகள் பல கட்டப்படுகின்றன, நதிகள் இணைக்கப்படுகின்றன, முதல்வர் சந்திரபாபு நாயுடு அவர்களே தடுப்பணை கட்டுவதற்குரிய கலவையை தம் கைகளால் எடுத்துக்கொடுக்கிறார். இதற்குப் போட்டியாக தெலுங்கானா தன்னுடைய நாட்டை வளர்ச்சிப் பாதையில் முந்திக்கொண்டிருக்கிறது. மின்சாரத் துறையில் பற்றாக்குறையாக இருந்த மாநிலம், இன்று மின்மிகுதி மாநிலமாக மாறியுள்ளது. மிகுதியாக உள்ள மின்சாரத்தை என்ன செய்வது என்று தெரியாமல் உள்ளனர். தற்போதைய அவர்களின் பிரச்சனை மக்களுக்கு வழங்கக்கூடிய மின்சாரத்திற்குரிய கட்டணம்தான். மேலும் 20,000 மெகாவாட் மின்சாரம் எடுக்கும் திட்டமும் செயல்பாட்டில் உள்ளது. ஒரு யூனிட் ரூ.5.30 என்பதிலிருந்து ரூ 5.60 ஆக மாற்றலாம் என்று யோசனை செய்கின்றனர். ஆனால் அமைதிப் பூங்காவாகவும், தொழில் வளர்ச்சியில் முதல் மாநிலமாகவும், மனித மேம்பாட்டு வளத்திலும் முதலிடத்தில் இருந்த நம் தமிழகம் இன்று வறட்சி மாநிலமாக மாறிவிட்டது. எல்லா வளங்களும் நிறைந்திருந்தும் வளர்ச்சியடையாமல் அண்டை மாநிலங்களை ஏக்கப்பார்வையுடன் பார்த்து வாழும் சூழ்நிலைக்குத் தள்ளப்பட்டிருக்கிறோம் என்பதே உண்மை…

பவள சங்கரி

தலையங்கம்

ஈரோட்டில் சிறு குழந்தைக்கு தொடையில் அம்மை தடுப்பூசி  போட்டதால், ஏற்பட்ட இரத்தக்கட்டி மூன்று கிலோ எடையுடன் கூடிய  புற்று நோயாகிவிட்டது. பத்திரிக்கை செய்தியை வைத்து சென்னை உயர்நீதி மன்றம் (!) தானாக முன்வந்து வழக்கு பதிவு செய்தது. தற்போது 6 வயதான அந்த சிறுவனுக்கு அடையாறு புற்று நோய் மருத்துவமனையில் சிகிச்சை வழங்கவேண்டும் என்றும் தமிழக சுகாதாரத் துறை செயலாளருக்கு தடுப்பூசியால் பாதிப்பு ஏற்பட்டதா என்று அறிக்கை சமர்ப்பிக்கும்படியும் உத்தரவிடப்பட்டது. இதற்கு பதிலளித்த சுகாதாரத் துறை செயலாளர் தடுப்பூசியால் புற்று நோய் வரவில்லை என்று கூறியுள்ளார். இதையடுத்து உயர்நீதி மன்ற நீதிபதிகள் சிறுவனின் அனைத்து  மருத்துவ  ஆவணங்களையும் தில்லியிலுள்ள  எய்ம்ஸ் மருத்துவமனை மற்றும் மும்பையிலுள்ள டாட்டா நினைவு மருத்துவமனைக்கும் அனுப்பி கருத்துகளை அறிக்கையாகப் பெற்று தாக்கல் செய்யும்படி ஆணை பிறப்பித்துள்ளது. பன்னாட்டு நிறுவனங்களால் பெருமளவில் விநியோகிக்கப்படும் ரூபெல்லா தடுப்பூசியானது மக்களின் பயன்பாட்டிற்கு அனுமதிப்பதற்கு முன்பே நம் உயர் மருத்துவமனைகளில் ஆய்விற்கு உட்படுத்தப்பட்டு அது குறித்த தெளிவான விவரங்களை பொதுமன்றில் அளிக்கப்படவேண்டியது அவசியம். மக்களின் இது குறித்த குழப்ப நிலையை தெளிவாக்க வேண்டியது சுகாதாரத் துறையின் கடமையாகும்.

உயர்நீதிமன்றம் பத்திரிக்கை செய்திகளை மட்டுமே கருத்தில்கொண்டு தாமாக முன்வந்து அக்கறையுடன் வழக்கு பதிவு செய்துள்ளது பாராட்டிற்குரியது!

பவள சங்கரி

தலையங்கம்

சுற்றுச்சூழல் மாசுபடுவதால் இந்தியாவில் ஆண்டிற்கு 10 இலட்சம் குழந்தைகள் பாதிக்கப்படுகிறார்கள். ஹெ.ஐ.வி. பாதிக்கப்பட்ட குழந்தைகள் இதனால் அதிக அளவில் பாதிக்கப்பட்டு உயிரிழக்கிறார்கள். மொத்தமாக உலகளவில் பாதிக்கப்பட்டவர்களில், நைஜீரியாவிலும் இந்தியாவிலும் சேர்த்து 48% மக்கள் பாதிக்கப்பட்டுள்ளதாக புள்ளிவிவரங்கள் கூறுகின்றன. காற்று மாசுபடுவதால் சீனாவிலும், இந்தியாவிலும், அதிகளவில் குழந்தைகள் பாதிக்கப்படுவதாக புள்ளிவிவரங்கள் கூறுகின்றன. இரசாயண உற்பத்திகள் 28% உயர்ந்துள்ளதாகக் கூறப்பட்ட நிலையில் அதனால் பாதிக்கப்பட்ட குழந்தைகளின் விழுக்காடு அதிகமாக உள்ளன. மேலை நாடுகள் அனைத்திலும் சேர்ந்தே 5%ற்கும் கீழாகவே பாதிக்கப்பட்டவர்கள் உள்ளனர் என்பதும் குறிப்பிடத்தக்கது. அமெரிக்கா மற்றும் ஐரோப்பிய நாடுகள், அங்கு பாதிப்பை ஏற்படுத்தக்கூடிய தொழிற்சாலைகளை முற்றிலுமாக ஒழித்தோ அல்லது குறைத்தோ தங்களுடைய நாட்டின் குழந்தைகளை காப்பாற்றிவிடுகின்றனர். இந்தியாவில் தொடரும் இத்தகைய அவலங்களைக் களைவதற்கு மனித மேம்பாட்டு ஆணையமும், மத்திய அரசும் தக்க நடவடிக்கைகள் எடுக்கவேண்டும். இன்றைய குழந்தைகளே நாளைய நமது நாட்டின் செல்வங்களாகும். ஆரோக்கியமான குழந்தைகளை உருவாக்குவதே நமது நாட்டின் எதிர்கால வளர்ச்சிக்கு வழிவகுக்கும்.

தீவிர முயற்சி எடுத்து போலியோ நோயை முற்றிலுமாக ஒழித்தது போல இந்தியாவில் பெரும்பாலான குழந்தைகளை சாவின் விளிம்பிற்கே கொண்டுசெல்லும் காச நோயையும் அரசு முற்றிலுமாக ஒழிக்கவேண்டும். இதை முற்றிலும் ஒழிக்கக்கூடிய அளவிற்கு தேவையான மருந்துகள் கையிருப்பில் இருந்தும், அவை சரியான முறையில் ஏழை மக்களையும் சென்றடையும்படி அரசு மற்றும் தொண்டு நிறுவனங்கள் முயற்சிகள் மேற்கொள்ளவேண்டும். பாதிக்கப்பட்ட குழந்தைகளுக்கு தகுந்த சத்துணவும் கிடைக்க ஏற்பாடு செய்ய வேண்டும். இதுமட்டுமே இதற்கான நிரந்தரத் தீர்வாக அமையும் என்பதில் ஐயமில்லை!

18 இலட்சம் பேர் காச நோயால் இந்தியா, இந்தோநேசியா, பாகிஸ்தான், நைஜீரியா, தென் ஆப்ரிக்கா சீனா போன்ற நாடுகளில் உயிரிழந்துள்ளனர். 2015 இன் கணக்கெடுப்பு இது. 2016 இல் இந்தியாவில் மட்டும் அரசு மற்றும் தனியார் மருத்துவமனைகளில் 17.5 இலட்சம் பேர் சிகிச்சை பெற்று வருகின்றனர். 33,820 பேர் போதைப்பொருள் பழக்கத்தால் இந்த காச நோய் பாதிப்பிற்கு ஆளாகியுள்ளனர். இந்தியாவில் மட்டும் காச நோயால் தினசரி 1,400 பேர் உயிரிழக்கிறார்கள்.

இந்தியாவில் இதை முற்றிலும் ஒழிப்பதற்காக அரசு தீவிர நடவடிக்கை எடுத்து வருகிறது. இது தொடர்பாக தேசிய வரைவு செயல் திட்டத்தை மத்திய அரசு வகுத்துள்ளது. அதன்படி தனியார் மருத்துவர்கள் சிகிச்சை அளிப்பதை ஊக்குவிக்கும் வகையில் அவர்களுக்கு ஊக்கத்தொகை அளிக்கப்படவேண்டும். காச நோயால் பாதிக்கப்பட்டிருக்கும் நோயாளிகள் குறித்து அரசின் கவனத்திற்குக் கொண்டுவரும் மருத்துவர்களுக்கு ₹ 250  ஊக்கத்தொகை அளிக்க வேண்டும். மாதந்தோறும் நோயாளிகளுக்கு சிகிச்சை அளிப்பதற்கு  ₹250 இம், இது தொடர்பான அனைத்து சிகிச்சைகளும் நிறைவு செய்வதற்கு  ₹500 அளிக்கவேண்டும் என்று திட்டமிடப்படுகிறது.

போதை பழக்கத்தால் பாதிக்கப்பட்ட காச நோய் நோயாளிகள் குறித்து கவனத்திற்குக் கொண்டுவருபவர்களுக்கு 6 முதல் 9 மாதங்களுக்கு  ₹ 2,750 ஊக்கத் தொகையாக அளிக்கப்படவேண்டும். 24 மாதங்கள் நோயாளிகளுக்கு   சிகிச்சை அளித்தால்  ₹6,750 ஊக்கத் தொகையாக வழங்கவேண்டும். இதே போல் காச நோய் சிகிச்சை எடுப்பதற்கு வசதி இல்லாதவர்களுக்கு, ஊட்டச்சத்து குறைபாடு உள்ளதை கவனத்தில் கொண்டு நேரடி மானியத் திட்டத்தின் மூலம் ₹2,000 அளிக்க வேண்டும் என்று வரைவுத் திட்டத்தில் குறிப்பிடப்பட்டுள்ளது. இந்த வரைவுத் திட்டம் நாடு முழுவதும் விரைவில் அமல்படுத்தப்படும் என்று மத்திய சுகாதாரத்துறை அமைச்சர் திரு நட்டா அறிவித்துள்ளார்.

பவள சங்கரி

தலையங்கம்

நடப்பு சட்டசபைக் கூட்டத் தொடரில் முதல்வர் எடப்பாடி பழனிச்சாமி அவர்களின் தலைமையில் நடைபெறும் அரசின் முதல் நிதிநிலை அறிக்கை வெளியிடப்பட்டது. இதில் பல ஆயிரம் கோடி உரூபாய்கள் வறட்சி நிவாரணத்திற்கு ஒதுக்கியுள்ளனர். இந்தத் தொகை வறட்சியால் பாதிக்கப்பட்ட சிறு, குறு விவசாயிகளுக்கு மட்டும் அளிக்கப்படுமா அல்லது பெரும் நிலக்கிழார்களுக்கும் பிரித்துக் கொடுக்கப்படுமா என்று தெளிவான விளக்கங்கள் கொடுக்கப்படவில்லை. அனைத்து நீர் நிலைகளும் வெகு வேகமாக வறண்டு வருகின்றன. இதற்கு அரசு என்ன செய்யப்போகிறது என்று தெரியவில்லை. ஆற்றுப் படுகைகளிலும், காய்ந்துள்ள வாய்க்கால்களிலும் ஆழ்துளைக் கிணறுகள் ஊருக்கு நான்கு என்ற கணக்கில் தோண்டினாலே தண்ணீர் பஞ்சம் நீங்கிவிடும். குறிப்பாக காவேரி, பாலாறு, தாமிரபரனி, வைகையிலும் ஆழ்துளைக் கிணறுகள் தோண்டப்பட்டால் அந்தந்த பகுதியில் உள்ள ஊர்களுக்கு வறட்சியைப் போக்க தண்ணீர் அளிக்க முடியும். இதே போல கண்மாய்களிலும், வறண்ட வாய்க்கால்களிலும் தூர்ந்து போன குளக்கரைகளிலும் இந்த ஆள்துளைக் கிணறுகள் தோண்டினால் நீர் கிடைக்கும் வாய்ப்புகள் அதிகம். இதற்கு அரசு ஆவண செய்யுமா?