Tag: சக்தி சக்திதாசன்

சக்தி சக்திதாசன்
இலண்டன்

2021 !

கோவிட் எனும் ஒரு நுண்கிருமியின் தாக்கத்தோடு ஆரம்பித்து அதே நுண்கிருமியின் தாக்கத்துடன் முடிவடைந்துள்ளது. இந்நுண்கிருமி கொடுத்த நோய்த்தாக்கத்திலிருந்து தப்பும் வழிகளில் மனதைச் செலுத்துவதிலேயே இவ்வகிலத்தின் பல நாடுகளின் முழுமுயற்சியும் செலுத்தப்பட்டுக் கொண்டிருந்த அதேவேளையில் வேறு பல நிகழ்வுகள் ஆரவாரமின்றியே நடந்தேறி விட்டிருக்கிறது.

உலக அரசியலை எடுத்துக் கொள்வோம், மிகுந்த அமர்க்களத்துடனும், ஆரவாரத்துடனும் அமெரிக்க முன்னாள் ஐனாதிபதி ட்ரம்ப் அவர்கள் தனது தேர்தல் தோல்வியை ஏற்றுப் பதவி துறக்கச் செய்யப்பட்டு, புதிய ஐனாதிபதியாக பைடன் அவர்கள் பலத்த எதிர்பார்ப்புகளோடு பதவியலமர்ந்தது 2021ம் ஆண்டின் ஆரம்பத்திலே. இவரின் மீதான எதிர்பார்ப்புகள் அமேரிக்க நாட்டு மக்களிடையே மட்டுமல்லாது சர்வதேச நாடுகளிலும் இருந்தது என்பதே உண்மை.

இன்று அந்த எதிர்பார்ப்புகள் எந்நிலையிலுள்ளன என்பது ஒரு கேள்விக்குறியே!

முன்னாள் ஐனாதிபதி ட்ரம்ப் அவர்கள் மீதிருந்த மாபெரும் குற்றச்சாட்டு, அவரின் உலகை நோக்கிய பார்வையாகும். அமேரிக்கா அமேரிக்கர்களுக்கு மட்டும் எனும் வகையில் அவரது செயற்பாடுகள் அமைந்திருந்ததே அதற்குக் காரணம் என்றார்கள் அனுபவமிகுந்த அரசியல் அவதானிகள். அத்தோடு ட்ரம்ப் அவர்களின் செயற்பாடுகள் உலக சமாதானத்துக்கு குந்தகம் விளைவிப்பவை எனும் கருத்தும் வலிமையாக நிலவி வந்தது.

ஆனால் இன்று மாற்று எதிர்பார்ப்புகளோடு ஐனாதிபதியான பைடன் அவர்களின் செயற்பாடுகள் அக்கருத்துகளில் எத்தகைய மாற்றங்களை விளைவித்திருக்கின்றது என்பதும் கேள்விக்குறியே! விடையை 2022 நல்குமா? என்பதற்குக் காலம்தான் விடை பகர வேண்டும்.

சரி இனி ஐக்கிய இராச்சியத்தின் நிலையைப் பார்ப்போமா?

2020ம் ஆன்டு டிசம்பர் 31ம் திகதியோடு பிரெக்ஸிட் எனும் கத்தி கொண்டு ஐக்கிய இராச்சியத்துக்கும், ஐரோப்பிய ஒன்றியத்துக்குமான 40 வருட உறவென்னும் தொடர்பை முற்றாக அறுத்தது ஐக்கிய இராச்சியம். இருப்பினும் இதன் முக்கியத்துவம் கோவிட் எனும் நுண்கிருமியின் முக்கியத்துவத்தினுள் புதைந்து போயிற்று என்பதே உண்மையாயிற்று. வழமையாக இந்நிகழ்வினை அறுத்து உருத்துப் புரட்டி எடுக்கும் ஊடகங்கள் தமது முழுக்கவனத்தையும் இதன்பால் திருப்ப முடியாமல் போனதுக்கு பிரதமர் பொரிஸ் ஜான்சன் கோவிட்டுக்கு நன்றி சொல்லியிருப்பாரோ?

கோவிட் தாக்கத்தினால் வைத்தியசாலைகள் நிரம்பி வழிய நிலைமையைச் சமாளிக்க ஒரு முழு லாக்டவுனை அமுலாக்கி ஐக்கிய இராச்சிய மக்களும் ஆவலோடு எதிர்பார்த்திருந்த 2020 கிறிஸ்மஸ் நிகழ்வையே இரத்தாக்கிய பெருமைக்குரியராகினார் பிரதமர் பொரிஸ் ஜான்சன், பாவம் பொதுமக்கள் தங்கள் உயிரைப் பாதுகாப்பதைப் பெரிதாக என்ணுவார்களா? இல்லை பொருலாதாரச் சிக்கலை உருவாக்கப் போகும் பிரெக்ஸிட்டின் தாக்கத்தை எதிர்நோக்குவார்களா?

பிரெக்ஸிட்டினால் உருவாகிய பொருளாதாரப் பின்னடைவுகள் அனைத்தும் கோவிட் தாக்கத்தினால் ஏற்பட்ட பொருலாதாரப் பின்னடைவு எனும் போர்வைக்குள் அமுங்கிப் போய் விட்டது.

ஐரோப்பிய ஒன்றியத்தினரின் ஐக்கிய இராச்சியத்துக்குள் நுழைவதற்கு உருவாகிய புதிய கட்டுப்பாடுகள் ஐக்கிய இராச்சியத்தின் பல துறைகளில் பணியாளர்களின் தட்டுப்பாட்டைத் தோற்றுவித்தது.

அதேநேரம் மகத்தான ஒரு பெரிய நன்மை விழைந்ததும் 2021இலேதான். ஆம் 2020 அக்டோபர்/ நவம்பர் மாதங்களில் வைத்தியத்துறையின் சாதனையால் உருவாக்கப்பட்ட கோவிட்டுக்கான தடுப்பூசி மக்களின் பரவலான பாவனைக்கு கொண்டு வரப்பட்டது 2021இலேதான். பலமுனைகளில் விமர்சிக்கப்பட்ட பிரதமர் பொரிஸ் ஜான்சன் அவர்களதும், அவரது மந்திரிசபையினதும் மாபெரும் வெற்றியாக இந்தத் தடுப்பூசி நடைமுறையாக்கம் ஊடகங்களினால் விமர்சிக்கப் பட்டது.

ஐக்கிய இராச்சியத்தின் ஜனத்தொகையில் அரைப்புங்குக்கும் அதிகமாக மக்களுக்குத் தடுப்பூசி போடப்பட்டதால் ஜீலை மாதம் 19 தேதி முதல் ஐக்கிய இராச்சியம் லாக்டவுனிலிருந்து விடுபட்டு மீண்டும் சகஜ நிலைக்குத் திரும்பியது. எந்தவொரு எதிர்மறையான விமர்சனங்களாலும் பாதிக்கப்படமுடியாதவர் எனும் நிலையிலிருந்த பொரிஸ் ஜான்சனது செல்வாக்கு கொஞ்சம், கொஞ்சமாக ஆட்டம் காணத் தொடங்கியது. ஒரு நிலையான முடிவை எடுக்க முடியாதவர் , நாட்டின் நம்பிக்கைக்கு பாத்திரமற்றவர் எனும் வகையிலான கருத்துகள் அவர் மீது எழ அடுத்தடுத்து அவருக்குப் பாதகமான செய்திகள் வரத் தொடங்கியுள்ளது.

2020ம் ஆண்டு கிறிஸ்துமஸ் பண்டிகைக் கொண்டாட்டங்களுக்குத் தடை விதிக்கப்பட்டிருந்த வேளையில் அவரது பிரதமருக்கான பணிமனையிலேயே அவருக்கு கீழியங்கும் சில துறைகளைச் சேர்ந்த ஊழியர்கள் அந்தப் பணிமனையிலேயே கிறிஸ்துமஸ் கொண்டாட்டங்களை நடத்தினார்கள் எனும் செய்திகள் புகைப்பட ஆதாரங்களுடன் வெளிவரத் தொடங்கியுள்ளது. இது பிரதமர் மீதும், அவரது மந்திரிசபை மீதும் மக்களுக்கான நம்பிக்கையைச் சிதறடித்துள்ளது எனலாம். அதைத்தவிர அவரின் இருப்பிடத்தினை சீரமைப்பதற்கான நிதி அவர் சார்ந்திருக்கும் கன்சர்வேடிவ் கட்சி ஆதரவாளரின் தயவால் கிடைத்தது என்பதும் அவரது நிலையை மேசங்கடத்துள்ளாக்கியுள்ளது.

இப்போது இக்கொரோனா நுண்கிருமியின் திரிபடைந்த தோற்றமான ஒமிக்குரோன் எனும் வகை உலகெங்கும் குறிப்பாக ஐரோப்பிய நாடுகளில் கட்டுப்பாடற்ற முறையில் பரவத் தொடங்கியுள்ளது. ஐக்கிய இராச்சியத்தில் தினமும் 120000 க்கும் மேற்பட்டவர்கள் இப்புதிய தொற்றால் பீடிக்கப்படுகிறார்கள். ஐக்கிய இராச்சியத்தின் பகுதிகளான ஸ்கொட்லாந்து, வேல்ஸ், வட அயர்லாந்து ஆகிய நாடுகள் புதிய கட்டுப்பாடுகளை விதித்த போதிலும் இங்கிலாந்தில் எதுவிதமான சட்டபூர்வமான கட்டுப்பாடுகளும் விதிக்கப்படவில்லை. தொற்றுக்கள் அதிகரிப்பினும் வைத்தியசாலைகளில் அனுமதிக்கப்படும் அளவிற்கு இது பாரதூரமானதல்ல எனும் கருத்தின் அடிப்படையில் செயற்படுவதாக பிரதமர் பொரிஸ் ஜான்சன் கூறியுள்ளார்,

இதன் தாக்கம் இனிவரும் நாட்களிளேயே தெரியவரும். இது சரிந்து வரும் பிரதமரின் செல்வாக்கை தூக்கி நிறுத்துமா? இல்லை அவரது செல்வாக்கை அதாள பாதாளாத்தை நோக்கித் தள்ளி விடுமா என்பதனை இனிவரும் நாட்களே முடிவு செய்யப்போகிறது. இதுதவிர ஐக்கிய இராச்சியத்தின் பொருளாதாரத்தின் மீதான பிரக்ஸிட்+ கோவிட் ஏற்படுத்திய தாக்கங்களின் விளைவுகள் கூட 2022இல் மேலும் வெளிப்படையாகத் தெரியும்.

இனி சர்வதேச அளவிலான சில முக்கிய பாதிப்புகளை பார்ப்போமா?

கடந்த வருடம் மிகப்பெரிய அளவில் பாதிக்கப்பட்ட நாடாக ஆப்கானிஸ்தான் அமைந்தது எனலாம். சர்வதேச பயங்கரவாதத்துக்கு துணைபோகும் நாடு ஆப்கானிஸ்தான் எனும் குற்றச்சாட்டின் பிரகாரம் அன்றைய ஆப்கானிஸ்தான் ஆட்சியைக் கலைத்து தலிபான்களுடன் போரிட்டு ஆப்கானிஸ்தானைத் தமது ஆதிக்கத்தின் கீழ் கொண்டுவர போரிட்ட சர்வதேச நாடுகளின் முன்னனியில் அமேரிக்காவும், இங்கிலாந்தும் இருந்ததை அனைவரும் அறிவோம்.

ஆப்கானிஸ்தானில் ஐனநாயகத்தை நிலைநாட்டுகிறோம் என்று அமேரிக்காவும், இங்கிலாந்தும் முன்னெடுத்த நடவடிக்கையில் இருநாடுகளும் பலநூற்றுக்கணக்கான இராணுவ வீரர்களைப் பலிகொடுத்துள்ளார்கள். இதைத் தமது நாட்டு மக்களுக்கு சர்வதேசப் பயங்கரவாதத்தை ஒலிப்பதன் மூலம் தத்தமது நாடுகளில் பயங்கரவாத நடவடிக்கைகள் முன்னெடுக்கப்படுவதைத் தடுக்கலாம் எனும் வாதத்தையே இவர்கள் முன் வைத்தார்கள்.

தலிபான் இயக்கத்தை எதிர்த்து ஆப்கானிஸ்தானில் ஒரு நிரந்தர ஐனநாயக அரசை அமைக்கும் முயற்சியில் தோல்வி அடைந்தார்கள் என்பதே உண்மை. அமேரிக்க முன்னாள் அதிபர் பதவிக்கு வரும்போது அமேரிக்கா இனி வெளிநாட்டுப் பிரச்சனைகளில் ஈடுபடாது எனும் கொள்கையை முன்வைத்தார். அவரது தேர்தல் வெற்றியைத் தொடர்ந்து அவர் 2021 இல் ஆப்கானிஸ்தானில் நிலை கொண்டுள்ள அமேரிக்க இராணுவத்தினர் அனைவரையும் வாபஸ் வாங்கிக் கொள்வதாக அறிவித்தார். அதைத்தொடர்ந்து ஆப்கானிஸ்தானை தலிபான்களிடம் கையளிக்க இரு பகுதியினருக்குமிடையில் பேச்சுக்கள் ஆரம்பமாகின.

பைடன் அவர்களின் வெற்றியைத் தொடர்ந்து இந்நிலையில் மாற்றம் ஏற்படுமா? எனும் எதிர்பார்ப்புகள் பல பகுதிகளில் இருந்து எழுந்தன. ஆனால் அதிபர் பைடனோ, ட்ரம்ப் அவர்களின் காலக்கெடுவையே தானும் கடைப்பிடிக்கப் போவதாக அறிவித்ததைத் தொடர்ந்து அமேரிக்க இராணுவத்தின் ஆதாரத்தில் தங்கியிருந்த எஞ்சிய ஐக்கிய இராச்சிய இராணுவமும் வெளியேறும் என்று ஐக்கிய இராச்சிய பிரதமரும் அறிவித்தார்.

இவ்விரு இராணுவத்தினரும் ஆப்கானிஸ்தானை தலிபான் அவர்களின் வார்த்தைகளின் அடிப்படையில் அவர்களிடம் கையளித்தார்கள். இவ்விரு இராணுவத்தினருக்கு பல வழிகளில் உதவி புரிந்து வந்த ஆப்கானிஸ்தானியரைத் தத்தமது நாடுகளுக்கு கொண்டு செல்ல தலிபான்களிடம் அனுமதி பெற்ற இவ்விரு நாடுகளும் பலரைத் தமது நாடுகளுக்குக் கொண்டு சென்றாலும் விடுபட்டுப் போன பலரின் கதை அம்போ என ஆகி விட்டது.

ஆப்கானிஸ்தான் ஒரு மாபெரும் பஞ்சத்தில் உழல்கிறது என்று ஐக்கிய நாடுகளின் சபையின் அறிக்கைகள் கூறுகின்றன. 20221இன் ஒரு மிகப்பெரிய இடரினை ஆப்கானிஸ்தான் மக்கள் சந்தித்துள்ளனர் என்பதுவே உண்மை.

என் தாய்நாடான சிறீலங்கா மாபெரும் பொருளாதாரச் சிக்கலுக்குள் தன்னை சிக்க விட்டுள்ளது. அரசியல் சூதாட்டக்களத்தில் பகடைக்காயாக இன்று உருட்டப்பட்டுக் கொன்டிருக்கின்றது. தமது எதிர்காலத்தை அச்ச உணர்வுடன் அந்நாட்டு மக்கள் எதிர்கொள்கிறார்கள். அவர்களுக்கான தீர்வை 2022வது கொண்டு வருமா? என்று போர்ச்சூழலில் இருந்து வெளிவந்தும் இன்னும் வாழ்வாதார அடிப்படை உரிமைகளுக்காக ஏங்கும் ஈழத்தமிழ் உறவுகள் எதிர்பார்த்தபடி காத்திருக்கிறார்கள்.

பொருளாதார வளர்ச்சியில் முன்னேற்றமடைந்து கொண்டிருந்த இந்தியாவுக்கு கோவிட்டின் வரவு சில சிக்கல்களைத் தோற்றுவித்தும் அவற்றிலிருந்து மீள்வதற்கான அறிகுறிகள் ௹தென்படுகின்றன என்பது பொருளாதார நிபுணர்களின் கருத்தாக இருக்கின்றது. டெல்டா எனும் கொரோனாவின் தாக்கத்தினை அதிக அளவில் எதிர்கொண்ட இந்தியா அந்த அனுபவங்களின் அடிப்படையில் ஒமிக்குரோனின் தாக்கத்தினை மட்டுப்படுத்துமா? எனும் கேள்விக்கு 2022 இன் ஆரம்ப மாதங்கள் விடையளிக்கக் கூடும் எனும் எதிர்பார்ப்பு நிலவுகிறது.

கொரோனாவின் ஆரம்ப நிலைகளிலேயே தமது எல்லைகளை முற்றாக அடைத்து விட்ட அவுஸ்திரேலியாவும், நியூசிலாந்தும் மற்றைய நாடுகளின் அளவுக்கு பாதிக்கப் படவில்லை என்பதுவே உண்மை. ஏறத்தாழ இரண்டு வருடங்களின் பின்னால் தமது எல்லைகளை அவுஸ்திரேலியப் பிரஜைகளுக்கும், நியூசிலாந்துப் பிரஜைகளுக்கும் திறந்து விட்ட அவுஸ்திரேலியா ஒமிக்குரோனின் வரவினை எவ்வகையில் எதிர்கொள்ளப் போகிறது? என்பதற்கும் விடை 2022 இலேயே கிடைக்கும்.

கோவிட்டின் தாக்கம் ஒருபுறமிருக்க குளோபல் வோமிங் எனும் உலக வெப்பமயப்படல் எனும் தாக்கத்தினால் காலநிலைச் சீரழிவுகள் ஏற்படுத்தும் தாக்கத்தின் விளைவுகளையும் 2021இல் கண்கூடாகப் பார்த்துள்ளோம். வெப்ப மிகுதியால் ஏற்படும் பாரிய தீ விபத்துகள், அசாத்திய மழைப் பெருக்கினால் ஏற்படும் வெள்ளப் பாதிப்புகள்,அசாதரணமான சூறாவளிகள் எனப் பல்வேறு வகையிலான பாதிப்புகள் ஆசியா, ஐரோப்பா, அமேரிக்கா எனும் அனைத்துப் பகுதிகளையும் விட்டு வைக்கவில்லை.

ஆக மொத்தம் 2021 இல் மனித நடவடிக்கைகளினாலும், இயற்கை அனர்த்தங்களினாலும், கொரோனா எனும் கொடிய கிருமியால் ஏற்படும் நோயின் விளைவுகள் என்பன காவு கொண்ட உயிர்களின் எண்ணிக்கை எத்தனையோ கோடி எனலாம். இத்தனை எமக்கு அப்பாற்பட்ட சக்திகளை எதிர்க்க வேண்டிய சூழலில் இருக்கும் எம் மத்தியில் இன்னமும் இனம், மதம், மொழி, நாடு எனும் பாகுபாட்டினை முதன்மைப் படுத்தி பழிஉணர்வுகளால் வீணே சக மனிதர்களை அழிக்கும் செயல்களும் நடந்தேறிக் கொண்டிருப்பது உள்ளத்தை வருத்துகிறது. மனிதாபிமானத்தின் அடிப்படையில் ஒற்றுமை எனும் ஆயுதத்தைக் கையிலெடுத்து உலக மக்கள் அனைவரும்

ஒன்று எங்கள் ஜாதியே
ஒன்று எங்கள் நீதியே
உலக மக்கள் யாவரும்
ஒருவர் பெற்ற மக்களே

என்று இணைந்து செயற்பட்டால் மட்டுமே எமது எதிர்காலச் சந்ததிக்காக இவ்வுலகைக் காப்பாற்றுவர்களாவோம்.

2022 இத்தகைய ஒரு அற்புதத்தைக் கொண்டு தருமா?

சக்தி சக்திதாசன்
இலண்டன்

கிரிக்கெட் விளையாட்டில் சதம் அடிப்பதே ஒரு சாதனை எனும்போது வாழ்க்கையில் சதம் அடிப்பவர்களின் சாதனையை என்ன சொல்வது? அப்படியான ஒரு அருமையான சாதனைச் சந்தர்ப்பத்தை ஒரு இரண்டு மாத கால இடைவெளியில் தவற விட்டு விட்டார் எமது இங்கிலாந்து மகாராணியார் இரண்டாவது எலிசபெத் அவர்களின் கணவர் எடின்பரோ கோமகன் இளவரசர் பிலிப் (Duke Of Edinbrugh Prince Philip).

ஆமாம் கடந்த வெள்ளிக்கிழமை அதாவது 09.04.2021 அன்று காலை 9 மணிக்கு தனது 99வது வயதில் காலமாகிய கோமகன் பிலிப் அவர்கள் இன்னும் இரண்டு மாத காலம் உயிருடன் இருந்திருப்பாரேயாகில் 100 வயதை எட்டிப்பிடித்த சாதனையாளர்களின் பட்டியலில் தனது பெயரையும் இணைத்துக் கொண்டிருப்பார்.

இந்த 99 வருட பயணத்தினூடாக பயணித்த இந்தப் புதிரான மனிதரின் வாழ்வுப்பயணம் எத்தகையது என்பதைப் புரட்டிப் பார்க்கும் போது கொஞ்சம் வியப்பாகத்தான் உள்ளது. இவருடைய 99 வருடப் பயணத்தில் சுமார் 46 ஆண்டுகள் நான் இவர் பயணித்த இந்த இங்கிலாந்து மண்ணிலே பயணித்திருக்கிறேன் என்று எண்ணும்போது எனக்கு கொஞ்சம் ஆச்சரியமாகத்தான் உள்ளது.

இதுவரை காலமும் ஊடகங்களில் இவரைப் பற்றிய எதிர்மறையான விடயங்கள் முக்கியத்துவம் பெற்றுச் செய்தியாக வரும்போது அவரைப் பற்றி சிறிதளவு எண்ணத் தலைப்பட்டதைத் தவிர இவரின் வரலாற்றை அறியும் ஆர்வம் கொண்டிருக்கவில்லை, இயல்பாகவே இங்கிலாந்து இராஜ குடும்பத்தின் மீது என் மனைவி கொண்டிருந்த ஆர்வத்தினால் அவருடன் இணைந்து தொலைக்காட்சியில் இராஜ பரம்பரை சம்பந்தமான நிகழ்வுகளை பார்ப்பதில் இருந்தே இவரைப் பற்றிய ஓரளவு அறிந்திருந்தேன் என்பதே உண்மை.

ஆனால் ஒரு தம்பதியினர் 73 வருட காலம் மணவாழ்க்கையில் இணைந்திருந்தார்கள் அதுவும் அவர்கள் சமூகத்தில் வகிக்கும் அந்தஸ்தின் நிமித்தம் அவர்கள் எதிர்கொண்ட அழுத்தங்களையும் கடந்து இணைந்திருந்தார்கள் என்பதுவே ஒரு சாதனை என்றால் மிகையாகாது.

26 வயது இளைஞரான இளவரசர் பிலிப் அன்றைய 21 வயது இளைவரசியான இரண்டாவது எலிசபெத் அவர்களை மணமுடித்தது முதல் கடந்த வெள்ளிக்கிழமை மரணிக்கும் வரை தனது மனைவிக்கு ஒரு கருங்கல்லைப் போன்ற உறுதியான பக்கபலம் அளிப்பவராகத் திகழ்ந்தார் கோமகன் பிலிப் என்பதுவே உண்மை.

அன்றைய இங்கிலாந்தின் மகாராஜாவாக இருந்த ஜார்ஜ் அவர்களின் மறைவையடுத்து தனது 26வது வயதில் மகாராணியாராகப் பொறுப்பேற்ற இரண்டாவது எலிசபெத் அவர்களுக்கு தனது இறுதிநாள்வரை ஒரு ஆதரவு மிக்க கணவராக, மகாரணியாரின் கடமைகளைக் குறைவின்றி நிறைவேற்ற உறுதுணையாக இருந்தார் என்பது குறிப்பிடப்பட வேண்டிய ஒரு முக்கிய விடயமாகும்.

இங்கிலாந்து இராஜகுடும்ப வரலாற்றில் அதிக காலம் ஆட்சி செய்தவர் எனும் சாதனையை இங்கிலாந்து மகாராணியாரும், அப்படி ஆட்சி செய்த ஒருவரின் வாழ்க்கைத்துணையாக அதிக காலம் இருந்தவர் எனும் சாதனையை கோமகன் பிலிப்பும் படைத்துள்ளார்கள்.

இந்தச் சாதனைகளின் மத்தியில் இவர்க:ள் எதிர்கொண்ட சோதனைகள் ஏராளம். இளவரசர் சார்ள்ஸ், இளவரசி ஆன், இளவரசர் ஆண்ட்ரூ, இளவரசர் எட்வேர்ட் எனும் நான்கு குழந்தைகளின் பெற்றோர் இவர்கள்.

மகாரணியாரின் தங்கையான மார்கிரெட் அவர்களின் காதல் விவகாரம் பெரும் சர்ச்சைக்குள்ளான போதும், பின்னர் அவரது மணவாழ்க்கையில் முறிவு, அவரின் ஆண்களினுடனான தொடர்பு, போதைப்பழக்கம் என பல சர்ச்சைகள் ஊடகங்களில் அம்பலப்படுத்தப்பட்ட போது அவற்றையெல்லாம் எதிர்கொண்டு சமாளிப்பதில் மகாராணியாருக்கு பிலிப் கோமகன் ஆற்றிய பங்கு அளப்பரியது.

பின்பு இளவரசர் சார்ள்ஸ், டயானா அவர்களின் மணமுறிவும், டயானாவின் மரணமும், இளவரசர் ஆண்ட்ரூ அவர்களின் மணமுறிவு, இளவரசி ஆன் அவர்களின் முதல் மணமுறிவு அதன் பின்னான மறுமணம், இளவரசர் சார்ல்ஸ் அவர்களின் மறுமணம் என தமது வாரிசுகளின் வாழ்வில் ஏற்பட்ட பலவிதமான பிரச்சனைகளுக்கு முகம் கொடுப்பதில் மகாரணியாருக்கு பக்கபலமாக இருந்த்துடன் தகுந்த நேரத்தில் தகுந்த ஆலோசனைகளையும் வழங்கியவர் கோமகன் பிலிப் ஆவார்.

தமது பிள்ளைகளின் வாழ்க்கைப் பிரச்சனையைச் சமாளித்து முடித்து விட்டோம் என்றிருக்கையில் இப்போது சமீபத்தில் அவர்களது பேரனான இளவரசர் ஹரியும் அவரது மனைவி மெகன் மார்க்கலும் இராஜ குடும்பத்தினின்றும் பிரிந்து அமேரிக்காவில் நிலை கொண்டது மட்டுமின்றி தொலைக்காட்சி நேர்காணலில் இங்கிலாந்து இராஜ குடும்பத்தைத் தாக்கும் வகையில் கருத்துக்களை வெளியிட்ட துரதிர்ஸ்ட நிகழ்வை எதிர் கொள்ள வேண்டி வந்தது. அச்சமயத்தில் தான் சுமார் ஒரு மாத காலத்தின் முன் கோமகன் பிலிப் வைத்தியசாலையில் அனுமதிக்கப்பட்டு இரண்டு வாரங்களில் இல்லம் திரும்பினார், அதன் தொடர்ந்தே இந்த மரணமும் நிகழ்ந்துள்ளது.

இவ்வளவு பிரச்சனைகளையும் எதிர்நோக்கும் வகையில் இங்கிலாந்து மகாராணியாரின் கொள்கையான “விளக்கமும் இல்லை, சர்ச்சைகளில் ஈடுபடுவதும் இல்லை“ என்பதற்கமைய கோமகன் பிலிப் அவர்களும் மனைவியோடு ஒத்துழைத்தார் என்பது வெள்ளிடைமலை.

சரி இத்தகைய சூழல்களுக்கு முகம் கொடுக்கும் வகையில் திடகாத்திரமாக கோமகன் பிலிப் உருவாகக் காரணமான அவரது பின்புலத்தைக் கொஞ்சம் பார்ப்போமா?

1921 ம் ஆண்டு யூன் மாதம் 10ம் திகதி கிரெக்க நாட்டிலுள்ள கோர்பூ (Corfu) எனும் தீவில் கிரேக்கத்தினதும், டென்மார்க்கினதும் இளவரசரான ஆண்ட்ரூ (Prince Andrew) க்கும், ஜெர்மனிய பட்டன்பேர்க் (Battenburg) நகர இளவரசி அலீஸ் (Alice) என்பவருக்கும் ஜந்தாவது மகவாக நான்கு பெண்களுக்கு பின்னால் ஆண் மகவாக அவதரித்தவர் தான் கோமகன் பிலிப்(Prince Philip).

பிறப்பின் மூலம் கிரேக்க நாட்டினதும், டென்மார்க் நாட்டினதும் பட்டத்துக்குரிய இளவரசர் எனும் உரிமையைப் பெற்றவர் இளவரசர் பிலிப். இப்படி இராஜ பரம்பரையில் இராஜ உரிமை பெற்ரவர் எப்படி இங்கிலாந்துக்கு இடம்பெயர்ந்தார்?

இவரது தாய்வழிப் பாட்டனாராகிய பட்டன்பேர்க் இளவரசர் லூயிஸ் இங்கிலாந்துப் பிராஜாவுரிமை பெற்று லூயிஸ் மவுண்ட்பேட்டன் என்று வாழ்ந்து இங்கிலாந்தில் மடிந்தார். அப்போது இரண்டாம் உலகப்போரின் முடிவுக்கு பின்னால் இங்கிலாந்தில் ஜேர்மனிக்கு எதிரான அலை வீசிக் கொண்டிருந்தது. பாட்டனாரின் மரணவீட்டில் கலந்து கொண்ட பின்பு தனது தாயுடன் அவர் மீண்டும் கிரேக்க நாட்டிற்குத் திரும்பினார்.

அப்போது கிரேக்க நாட்டிற்கும் துருக்கிக்கும் ஒரு யுத்தம் நிகழ்ந்தது அப்போது கிரேக்க நாட்டின் அதிபராக இளவரசர் பிலிப்பின் தந்தையான இளவரசர் ஆண்ட்ரூவின் அண்ணன் முதலாம் கொன்சடன்டைன் அரசராக இருந்தார். துருக்கியுடனான யுத்தத்தில் படுதோல்வியடைந்த்துக்கான பொறுப்பு பிலிப் அவர்களின் பெரிய தந்தை மீது விழுந்ததினால் அவர் இராஜ பதவியிலிருந்து அகற்றப்பட்டு, இளவரசர் பிலிப்பின் தந்தையும் குடும்பமும் நிரந்தரமாக நாடு கடத்தப்பட்டனர், சிறிது காலம் பிரான்ஸில் வசித்து வந்ததன் பின்னால் அவரது தாயார் அலீஸ் மனநோயாளியாக அடையாளைப்படுத்தப்பட்டு மனநோயாளர் மனையில் அனுமதிக்கப்பட்டார். தந்தை மொன்டி கார்லோ வில் வசித்தார்.

இந்நிலையில் தான் இளவரசர் பிலிப் இங்கிலாந்தில் தனது தாய்வழிப் பாட்டியான விக்டோரியா மவுண்ட்பேட்டனுடன் வசித்தார். அவரின் பின்னால் அவரது தாய் மாமனான மவுண்ட்பேட்டன் பிரபு அவரைத் தனது மகன் போல வளர்த்தார். ஸ்கொட்லாந்து நாட்டில் கல்விபயின்று பின்னர் தனது கிரேக்க குடியுரிமையை இரத்துச் செய்து இங்கிலாந்து குடியுரிமை பெற்றுக் கொண்டார்.

இங்கிலாந்து கடற்படையில் இணைந்து அதிவேகமாக பதவிகளில் உயர்ந்த பெருமை பெற்றவராவார். 23 வயது நிரம்பிய அழகிய வலிபரான இவர் மீது 18 வயதே நிரம்பிய அப்போதைய இளவரசி இரண்டாவது எலிசபெத் அவர்கள் காதல் கொண்ட்தாகக் கூறப்படுகிறது. அவரை விட ஐந்து வயது அதிகமான இளவரசர் பிலிப்பை இளவரசி எலிசபெத் அவர்களின் பெற்றோர் மாப்பிள்ளையாக்க விரும்பவில்லை என்று கூறப்படுகிறது.

21 வயதில் தனது காதலை பகிரங்கப்படுத்திய அப்போதைய இளவரசி எலிசபெத் அவர்களின் விருப்பத்தினை அன்றைய மகாராஜா ஜார்ஜ் அவர்கள் ஏற்றுக்கொண்டார்.

மிகவும் துடிப்பாற்றல் கொண்டவரும், கடற்படையில் கட்டளையிடும் தளபதித் தகமையில் இருந்தவருமான இளவரசர் பிலிப் அவர்களுக்கு இங்கிலாந்து மகாராணியாரின் பக்கவாத்தியமாக மாறுவதில் பல சிக்கல்கள் இருந்ததாகவும் அக்காலகட்டத்தில் அவர் வாலிபர்களுக்குரிய லீலைகளில் ஈடுபட்டதை எலிசபெத் மகாராணியார் கண்டும் காணாதது போல பொறுமை காத்ததுமே அவர்களது ஸ்திரமான உறவுக்கு அத்திவாரமிட்டது என்கிறார்கள் இராஜ குடும்ப வரலாற்று ஆசிரியர்கள்.

அவரின் மிகச் சிறந்த சாதனையாக “எடின்பரோ கோமகனின் பரிசில்(Duke of Edinbrugh Award) “ எனும் இளைய தலைமுறைக்கான ஒரு தன்னம்பிக்கை வளர்க்கும் பரிசுத் திட்ட்த்தைக் குறிப்பிடுகிறார்கள். இன, மத, நிற, சமுதாய ஏற்ற தாழ்வுகள் எதுவுமின்றி அனைத்து இளம்பிராயத்தினரும் இந்தப் போட்டியில் கலந்து கொள்வதின் மூலம் ஒரு இலக்கையடைவதன் மூலம் அவர்கள் எதையும் சாதிக்கலாம் எனும் தன்னம்பிக்கையை வளர்த்துக் கொள்கிறார்கள். இந்தப் போட்டியில் கலந்துகொண்டு நிறைவு செய்பவர்கள் இதற்குரிய பரிசுப் பத்திரத்தை கோமகன் பிலிப் அவர்களிடமிருந்து நேரடியாகப் பெற்றுக் கொள்வதே இதன் சிறப்பம்சமாகும்.

இதுமட்டுமின்றி காலமாற்றத்துக்கு இராஜ குடும்பம் விதிவிலக்கானதல்ல எனும் கோட்பாட்டிற்கமைய சூழலுக்கேற்ப இராஜகுடும்பத்திலும் மாற்றங்கள் நிகழ உந்துகோலாகச் செயற்பட்டவர் கோமகன் பிலிப் என்கிறார்கள் அவருக்கு நெருக்கமானவர்கள்.. இங்கிலாந்து மகாராணியாரும் வரிவிதிப்புக்கு கட்டுப்பட்டவர் எனும் வகையிலேற்பட்ட மாற்றம் உட்பட, இராஜமாளிகையான “பக்கிங்காம் பலஸ்” எனும் மகாராணியாரின் வாசஸ்தலத்தை கோடை விடுமுறை காலங்களில் மக்கள் பார்வையிடும் வகையிலான வசதி ஏற்படுவதற்கும் இவர் ஒரு முக்கிய காரணமாகவிருந்தார் என்பது செய்தி.

தன் மனதில் பட்டதை எதுவித தயக்கமுமின்றி பேசிவிடுவது இவரைப் பல சமயங்களில் சர்ச்சைகளுக்குள்ளாக்கியிருக்கிறது. பண்ணைகள், சுற்றுச்சூழல் பாதுகாப்பு என்பதில் மிகவும் அக்கறை கொண்ட ஒரு மனிதராக இருந்தார்.

மிகவும் நகைச்சுவையாக பேசும் இவரிடம் ஒரு நிருபர் உங்களைப் பற்றி எவ்வாறு விவரிப்பீர்கள் என்று கேட்டதற்கு “நானோரு அகதிக் கணவன்” (I am a refugee husband) என்று பதிலளித்தாராம்.

மனநோயாளிகள் மனையிலிருந்து நலமடைந்து திரும்பிய இவரது தாயார் ஒரு கத்தோலிக்க சேவகியாக மாறி வாழ்ந்தார். தனது அந்திம காலங்களில் இங்கிலாந்தில் தன் மகனுடன் வாழ்ந்தார். இவரைத் தன் மகன் போல் வளர்த்த இவரது மாமனாரான மவுண்ட்பேட்டன் பிரபு அயர்லாந்து ஐ,ஆர்,ஏ தீவிரவாதிகளால் கொல்லப்பட்டார்.

கொரோனா எனும் கொடிய கிருமினியின் கட்டுப்பாட்டினுள் மறைந்த இவருக்காக எட்டுநாட்கள் துக்கதினங்களாக அனுசரிக்கப்படுகிறது. வரும் 17.04.2021 சனிக்கிழமை 3 மணியளவில் வின்சர் மாளிகையில் இவரது இறுதி நிகழ்வுகள் நிகழவிருக்கிறது. கொரோனா கட்டுப்பாட்டு விதிகளுக்கமைய முப்பது பேரே கலந்து கொள்ள முடியும். இராஜ குடும்பத்தைச் சேர்ந்த அவரது நெருங்கிய உறவினர்களே நேரடியாகச் சமூகளிப்பார்கள். இங்கிலாந்துப் பிரதமரே உறவினருக்கு வழிவிட்டு தான் கலந்து கொள்ளப்போவதில்லை என்று அறிவித்துள்ளார்.

இங்கிலாந்து மகாராணியாருடன் 73 வருடங்கள் வாழ்ந்து மறைந்த அவரது அன்புக் கணவர் எடின்பரோ கோமகன் இளவரசர் பிலிப் அவர்களின் மறைவுக்கு உலகத் தலைவர்கள் அனைவரும் துயர் பகிரும் செய்திகளை பகிர்ந்துள்ளார்கள். இங்கிலாந்து முழுவதும் கொரோனா தக்கத்தோடு யாரோ ஒரு நன்கு தெரிந்த ஒருவரையிழந்த ஒருவகை துயரில் ஆழ்ந்து போயிருக்கிறது. அன்னாரின் ஆத்மசாந்திக்காய் நாமும் பிரார்த்திப்போம்.

சக்தி சக்திதாசன்
லண்டன்

தொலைக்காட்சிப் பெட்டியைத் திருப்பினாலும் சரி, வானோலியைத் திருகினாலும் சரி கொரோனா எனும் வார்த்தையைத் தாண்டிச் செல்வது என்பது இப்போ எண்ணிப்பார்க்கவே முடியாத ஒரு சூழலில் நாமனைவரும் வாழ்ந்து கொண்டிருக்கிறோம். நான் வாழும் ஐக்கிய இராச்சியத்தில் கொரோனா வைரஸின் கட்டுப்படுத்துதலுக்கான கட்டுப்பாட்டு விதிமுறைகள் தளர்த்தப்படுவதற்கான அறிகுறிகள் எதுவுமே இன்றுவரை தெரியவில்லை. இந்நிலையில் கொரோவைத் தாண்டி என்று எதைப்பற்றிச் சிந்திக்க முடியும் என்று நீங்கள் எண்ணினால் அது நியாயமே!

ஆயினும் ஒரு நாளிலோ அன்றி ஒரு வருடத்திலோ நாம் இந்தக் கொரோனா எனும் நிலையைத் தாண்டிச் செல்ல வேண்டிய அதாவது இதையும் கடந்து செல்ல வேண்டிய நிலையிலிருக்கிறோம். கொரோனா எனும் இந்த வைரஸ் இன்று எம்மீது தொடுத்திருக்கும் தாக்குதல் எமது உடல்ரீதியிலான தாக்குதலே. ஆனால் இதிலிருந்து தப்பித்துக் கொள்வதற்கான உலகின் பலநாடுகளிலும் எடுக்கப்பட்ட கட்டுப்பாட்டு நடவடிக்கைகளினால் இக்கொரோனா வைரஸினால் அதிக அளவு பாதிப்பு பொருளாதாரப் பாதிப்பு என்பது தவிர்க்க முடியாத யதார்த்தமாகிறது.

பொருளாதாரத்தைப் பாதுகாத்துக் கொள்வதற்காக தேசங்களின் உடமையான மக்களின் உயிர்களைக் காவு கொடுக்க முடியாது என்பது அனைத்து நாடுகளைப் பொறுத்தவரையிலும் மறுக்கப்பட முடியாத உண்மையாகிறது. ஆனால் இதனால் ஏற்படும் பொருளாதாரப் பாதிப்பின் தாக்கம் எத்தகைய வகையில் இருக்கப் போகிறது என்பதை நிர்ணயிக்கப் போவது மக்களின் மீது விதிக்கப்பட்ட இக்கட்டுப்பாட்டு விதிமுறைகள் எத்தனை காலம் நீடிக்கப் போகிறது என்பதுவே.

இங்கிலாந்தைப் பொறுத்த வரையில் நாட்டின் பிரதமரே வாழ்வுக்கும் சாவுக்கும் மத்தியில் கொரோனாவின் கோரப்பிடியில் சிக்கி மீண்டு வந்திருக்கிறார் என்பதுவே உண்மை. வைத்தியசாலையில் இருந்து இல்லத்துக்குத் திரும்பி இருவார ஓய்வுக்குப் பின்னால் மீண்டும் பிரதமராக 27.04.2020 இலிருந்து செயற்பட ஆரம்பித்திருக்கிறார் பிரதமர் பொரிஸ் ஜான்சன். அவரது வரவை கட்சிப்பாகுபாடின்றி அனைவரும் வரவேற்றிருப்பது ஐனநாயகத்தின் முடிக்கு அழகு சேர்க்கும் மற்றொரு மணியாகிறது.

மீண்டும் தமது உத்தியோக வாசஸ்தலமாகிய 10, டவிணிங் சாலைக்குத் திரும்பியதும் 27ம் திகதி காலை 9 மணிக்கு தனது வாசஸ்தலத்திற்கு முன்னால் நாட்டு மக்களுக்கு திரு. பொரிஸ் ஜான்சன் அவர்கள் உரையாற்றினார். அவ்வுரையில் தான் ஒரு சிக்கலான கட்டத்திலிருந்து மீண்டு வந்திருப்பதாகவும், நாடு எதிர்நோக்கியிருக்கும் இந்த முன்னொருபோதுமில்லாத ஒரு சிக்கல் நிறைந்த கட்டத்தில் உயிர்களைக் காப்பாற்றப் போராடும் வைத்தியத்துறை ஊழியர்களுக்கும், கெடுபிடியான விதிமுறைகளை அனுசரித்து நடக்கும் நாட்டு மக்களுக்கும் தனது உளமார்ந்த நன்றியைத் தெரிவித்தார். கொரோனா வைரஸின் பிடியினால் தாக்கமுறும் மக்களின் எண்ணிக்கை குறைந்து வரும் வேளையில், இதுவரை நோய் பீடிக்கப்பட்டு வைத்தியசாலை தீவிர சிகீச்சைப் பிரிவில் சிகிச்சை பெற்று வருவோரில் உயிரிழப்போரின் எண்ணிக்கை கட்டுப்பாட்டுக்குள் கொண்டுவரப்பட வேண்டிய அவசியத்தை வலியுறுத்தினார். அனைத்தும் ஒரு கட்டுப்பாட்டுக்குள் கொண்டுவரப்படும் வரை இதுவரை அடைந்த முன்னேற்றத்தைப் பின்னடைவு செய்யக்கூடிய வகையில் கட்டுப்பாடுகளைத் தளர்த்த தான் ஒருபோதும் அனுமதிக்கப் போவதில்லை என்று திட்டவட்டமாகக் கூறினார்.

ஐக்கிய இராச்சியத்தின் பிரதமர்களுல் இரண்டாம் உ;லகப்போரின் பின்னால் எதிர்கொள்ளும் மிகச் சிக்கலான ஒரு நிலவரத்தை இன்றைய எமது பிரதமர் பொரிஸ் ஜான்சன் அவர்கள் எதிர்கொள்கிறார் என்பது நிதர்சனமான உண்மை. ஐக்கிய இராச்சியத்தின் சிறந்த அரசியல் அவதானிகளின் கருத்துக்களின் படி மக்களின் பாதுகாப்பு, நாட்டின் பொருளாதாரச் சூழல் என்பனவற்றின் இடையில் ஒரு கயிற்றில் நடப்பதைப் போல் மிக அவதனமாகச் செயற்படவேண்டிய நிலையில் பிரதமர் பொரிஸ் ஜான்சன் இருக்கிறார்.

வைத்தியசாலையில் இத்தொற்றினால் உயிரிழப்போரின் எண்ணிக்கை. தினசரி குறைந்து கொண்டு வருகிறது, தினசரி கொரோனா தாக்கத்தினால் வைத்தியசாலையில் அனுமதிக்கப்பட வேண்டியவர்களின் தொகையும் குறைந்து கொண்டு வருகிறது, சுமார் 20,000 பேர்வரை வைத்தியசாலையில் அனுமதிக்கப்பட்டு சிகிச்சை பெற்று வந்த நிலைமாறி சுமார் 15,000 பேராக இந்த எண்ணிக்கை குறைந்து வருகிறது. இவையெல்லாம் கொஞ்சம் நம்பிக்கை எனும் வெளிச்சத்தைத் தருகிறது எனினும் கட்டுப்பாடு தளர்த்தப்படக்கூடிய வகையில் இன்னும் நிலையத் தோற்றுவிக்கவில்லை.

ஐக்கிய இராச்சியத்தின் அரசாங்கத்தைப் பொறுத்தவரை கட்டுப்பாடுகள் தளர்த்தப்படுவதைப் பற்றிச் சிந்திப்பதற்கு ஜந்து நிபந்தனைகள் விதித்திருக்கிறார்கள். இந்த ஜந்து நிபந்தனைகளும் எட்டும் பட்சத்தில் மட்டுமே கட்டுப்பாடுகள் தளர்த்தப்படுவதைப் பற்றிச் சிந்திப்பதற்கு முனைவோம் என்பதே அவர்களது நிலைப்பாடு. இந்த ஜந்து நிபந்தனைகள் பின்வருமாறு,

1. தேசிய சுகாதார சேவை நிலைமையச் சாமாளிக்கும் நிலையில் உள்ளது

2. தினசரி இறப்போரின் எண்ணிக்கை தொடர்ந்து கணிசமான அளவில் குறைந்து கொண்டு வரவேண்டும்

3. தரமான தரவுகளின்படி வைரஸ் தொற்றுவோரின் எண்ணிக்கை கணிசமான அளவில் சமாளிக்கக் கூடிய எண்ணிக்கைக்கு குறைவாகும் நிலை வர வேண்டும்.

4. முன்னனி சேவையாளர்களுக்கான பாதுகாப்பு அணிகள் போதுமான அளவில் கையிருப்பில் கொண்டு தொடர் விநியோகத்திற்கான பொறிமுறைகள் திருப்திகரமாக இருக்க வேண்டும்.

5. எடுக்கும் நடவடிக்கைகள் எதுவும் இத்தொற்று நோய் பீடிக்கப்படும் எண்ணிக்கையை மீண்டும் அதிகரிக்காது எனும் ஒரு நிலை வரவேண்டும்.

மே மாதம் 7ம் திகதி அரசு இந்த ஜந்து நிபந்தனைகளையும் கருத்தில் கொண்டு அப்போதைய நிலையில் எந்தவிதமான நடவடிக்கையை முன்னெடுக்கலாம் என்று ஆராய்ந்து, மே 10ம் திகதி பிரதமர் இதுபற்றி நாட்டு மக்களுக்கு உரையாற்றுவார் என்று அறிவித்துள்ளார்கள்.

சரி இதுவரை அரசியல் நிலைப்பாட்டைப் பார்த்தோம். இனிச் சற்று பொருளாதாரச் சிக்கல்களை பார்ப்போம். கொரோனவைக் கட்டுப்படுத்தும் முயற்சியில் மக்கள் மீது விதிக்கப்பட்ட கட்டுப்பாட்டு விதிகளின் ஏற்பட்ட உடனடிப் பாதிப்புகளைச் சரி செய்வதற்காக இதுவரை காணாத வகையில் பல பொருளாதஅர நிதுயுதவிகளை அரசு பலதரப்பட்ட மக்களுக்கும் அறிவித்துச் செயற்படுத்தி வருகிறது.

விமானநிலையங்கள் அனைத்தும் மிகப்பெரிய அளவிலான விமானங்கள் நிறுத்தி வைக்கப்படும் இடங்கள் போலக் காட்சியளிக்கின்றன. அரசைப் பொறுத்தளவில் இக்கொரோனாவின் கோரப்பிடியில் இருந்து விடுபட்டதும் மீண்டும் வியாபாரங்கள், வர்த்தக ஸ்தாபனங்கள் இயங்க ஆரம்பிக்க வேண்டும் எனும் கருத்தோடு பணியாளர்களை வேலையிலிருந்து நீக்காமலிருக்கும் பட்சத்தில் அவர்களுக்கான ஊதியப்பணத்தின் 80 வீதத்தை தாம் அளிப்பதாக உறுதியளித்துள்ளார்கள். ஆனால் இவை சமூக விலத்தியிருத்தல் விதிகளைக் கடைப்பிடித்து இயங்க முடியாத ஸ்தாபனங்களுக்கு மட்டுமே.

ஆனால் இப்போதிருக்கும் நிலையையிலிருந்து திரும்பும் போது தாம் வங்குரோத்து நிலையை அடைந்து விடுவோம் எனும் வகையிலான சரிவைக்காணும் நிறுவனங்கள் வேறுவழியின்றிப் பலரை வேலையிலிருந்து நீக்குகிறார்கள், பணியிழந்தவர்கள் தமது வாழ்வாதரத்தைத் தக்க வைத்துக் கொள்வதற்கு அரசாங்கத்தின் உதவித்தொகையையே நம்பியுள்ளார்கள். இவர்கள் அனைவருக்குமான உதவிகளை அரசாங்கம் வழங்கினாலும் இதற்கான நிதிநிலைமைகள் மக்களின் வரிப்பணத்திலேதான் பெறப்படப் போகின்றன.

உலகமயமாக்கல் எனும் அமைப்பின் கீழ் ஐக்கிய இராச்சியம் தனது உற்பத்தி வன்மையை வெகுவாகக் குறைத்துக் கொண்டது. முதாலாளித்துவ கொள்கையின் வழி தமது இலாபங்களைப் பெருக்கிக் கொள்வதற்காக உற்பத்தி ஆலைகளை குறைந்தளவு ஊதியத்துடன் பணிக்கமர்த்தக்கூடிய ஊழியர்கள் கிடைக்கக்கூடிய நாடுகளில் நிறுவிக் கொண்டார்கள். இன்று கொரோனா எனும் ஒரு கண்ணுக்குத் தெரியாத கிருமியினால் அதற்கான விளைவுகளைச் சந்தித்துக் கொண்டிருக்கிறார்கள்.

மேற்கத்திய நாடுகள் இந்தக் கொரோனாவினால் கண்டு கொண்டிருக்கும் பொருளாதாரச் சரிவு 1920களில் உலகம் கண்ட மிகப்பெரிய பொருளாதாரச் சரிவினை விட அதிக அளவிலான சரிவினைக் காணவேண்டி வரும் எனும் அச்சம் பொருளாதார நிபுணர்கள் மத்தியில் எழுந்துள்ளது வேலையில்லாத் திண்டாட்டம் ஐக்கிய இராச்சியத்தினை ஆட்டம் காண வைக்கக்கூடும் எனும் வகையிலான கருத்துக்கள் ஆங்காங்கே நிலவுகின்றன.

இது ஒரு யதார்த்தமான உண்மை. இந்நிலையிலிருந்து மீண்டெழுவதற்கு மக்களின் மனதில் ஒருவகையிலான வைராக்கியம் தேவைப்படுகிறது. அத்தகைய மனநிலையை உருவாக்கும் வகையில் செயற்பட வேண்டிய தேவை அரசாங்கத்துக்கு இருக்கிறது.

ஒருசில பணியாளர்களுடன் இயங்கும் சிறிய வியாபார, வர்த்தக அமைப்புக்கள் பல இந்த இழப்பினை ஈடு செய்து மீண்டு வருவதை எண்ணிக்கூடப் பார்க்க முடியாத நிலையில் இருக்கிறார்கள். வியாபார நிறுவனங்களுக்கு உடனடித் தேவைகளுக்காக இடைத்தர நிறுவனங்களுக்கு 50000 பவுண்ட்ஸ் வரையும், பெரிய நிறுவனங்களுக்கு 250000 பவுண்ட்ஸ் வரையிலுமான நிதி உதவியைக் கடனாக கொடுத்துதவ வங்கிகளை அரசாங்கம் பணித்துள்ளது. அக்கடனைத் திருப்பிச் செலுத்த முடியாமல் போகும் பட்சத்தில் அவற்றிற்கு அரசாங்கமே பொறுப்பு எனும் உத்தரவாதத்தையும் அரசாங்கம் வங்கிகளுக்கு கொடுத்துள்ளது.

லண்டன் நகர மேயரின் அதிகாரத்தின் கீழியங்கும் லண்டன் பஸ், நிலக்கீழ் ரயில்சேவை என்பனவற்றின் சேவைகள் மிகவும் மட்டுப்படுத்தப்பட்ட நிலையாலும், நாட்டில் நிலவும், கட்டுப்பாட்டு விதிகளுக்கமைய மக்கள் தேவையற்ற பிரயாணங்களை மேற்கொள்ளக் கூடாதென்பதாலும் இச்சேவைகள் பாரிய நஸ்டத்தைச் சந்தித்து வருகின்றன.

ஐக்கிய இராச்சியத்தின் அடையாளமான பிரிட்டிஷ் எயர்வேய்ஸ் என்றழைக்கப்படும் விமானசேவை இக்கொரோனா பாதிப்பினால் ஏற்பட்ட இழப்பை ஈடு செய்ய தாம் தமது நிறுவனத்தின் கட்டமைப்பை மறுசீரமைக்க வேண்டியிருப்பதனால் ஏறக்குறைய 12000 பணியாளர்களை உலக அளவில் தாம் வேலைநீக்கம் செய்ய வேண்டி வரும் என்று எச்சரித்துள்ளது. அதேபோல மிகவும் பிரபலமான மற்றொரு விமான சேவையான ரயன் எயர் எனும் விமான சேவை தாம் 3000 பேரை வேலைநீக்கம் செய்ய வேண்டி வரும் என எச்சரித்துள்ளது.இவ்வேலை நீக்கங்கள் ஐக்கிய இராச்சியத்தின் இரண்டாவது முக்கிய விமான நிலையமான கட்விக் (Gatwick) எனும் விமான நிலையத்தில் இவ்விரு விமானசேவைகளின் நடவடிக்கைகள் முற்றாக நிறுத்தப்பட்டு விடும் எனும் ஒரு நிலையைத் தோற்றுவித்துள்ளது. இதன் விளைவாக கட்விக் விமானநிலையத்தில் பணிபுரியும் பணியாளர்களின் எண்ணிக்கை குறைக்கப்படலாம் எனும் அச்சம் நிலவுகிறது.

இது மட்டுமல்ல ஒரு விமானநிலையத்தின் நடவடிக்கைகள் அதைச்சுற்றி இருக்கும் பல வர்த்தக நிறுவனங்களின் வியாபாரத்தில் முக்கிய பங்கு வகிக்கிறது, இந்நடவடிக்கைகளின் மட்டுப்படுத்தல் என்பது அவ்விமான நிலையத்தை மட்டுமல்லாமல் அதன் இயக்கத்தில் தங்கியிருக்கும் வர்த்தக நிறுவனங்களிலும் பாதிப்பை ஏற்படுத்தும்.

நான் மேலே குறிப்பிட்டது ஒரிரு முன்னனி நிறுவனங்களின் பாதிப்பையே இதே போன்று பல வித்தியாசமான வர்த்தக நிறுவனங்களின் பொருளாதாரத்தையும் பாதிக்கும் என்பதுவே உண்மை. இப்பாதிப்புகளின் முதல்பலி அங்கு பணிபுரியும் பணியாளர்களே! விளைவாக நாட்டின் வேலையில்லாத் திண்டாட்டமும் அதைனைச் சமாளிக்க அரசு எடுக்க வேண்டிய நெருக்கடியான பொருளாதார முடிவுகளும் ஐக்கிய இராச்சியத்தை ஒரு உலுக்கு உலுக்கத்தான் போகிறது என்பது மட்டும் தெளிவாகத் தெரிகிறது.

இந்தக் கொரோனாவாவினால் முடுக்கி விடப்பட்டுள்ள பொருளாதார முடக்கம் ஐக்கிய இராச்சியத்தை மட்டுமல்ல உலக நாடுகள் அனைத்தையுமே ஆட்டிப்படைக்கப் போகிறது. இன்றைய உலகப் பொருளாதாரம் “உலகமயமாக்கப்படுதல் அன்றி குளோபலைசேஷன்” எனப்படும் கோட்பாட்டினால் கட்டியாளாப்படும் நிலையில் ஒரு நாட்டின் பொருளாதாரச் சிக்கல் மற்றொரு நாட்டினை தாக்குவது என்பது யதார்த்தமான உண்மை. குறிப்பாக கிடைக்கின்ற செய்திகளின் படி அமேரிக்க நாட்டின் வேலையற்றோர் தொகை 30 மில்லியனாக உயர்ந்துள்ளது எனத் தெரிகின்றது. ஏற்கனவே உள்மயமாக்கப்படுதல் எனும் கொள்கையை முன்னிறுத்திய அதிபர் ட்ரம்ப் அவர்களின் செயற்பாடுகள்ஐந்தச் சூழலில் எத்தகைய விளைவுகளை ஏற்படுத்தப் போகிறது என்பதும் மிகவும் கிலேசத்தையே வரவழைக்கிறது.

ஐக்கிய இராச்சிய பொருளாதார நிபுணர்களின் கணிப்பின்படி ஐக்கிய இராச்சியத்தின் பொருளாதாரம் கொரோனாவின் பாதிப்பால் சுமார் 14% சுருக்கமடையும். இது சமூக, சமுதாய நடவடிக்கைகளில் எத்தகைய பாதிப்புக்களை ஏற்படுத்தும் என்பது கேள்விக்குறியே. சுமார் ஆறு வாரங்களுக்கு மேலான தடைக் கட்டுப்பாடுகளைத் தொடர்ந்து 10.05.2020 ஐக்கிய இராச்சிய பிரதமர் பொரிஸ் ஜான்சன் கொரோனாவைத் தாண்டி எப்படி மக்களும், சமூகமும் வெளிவரப் போகிறது என்பதற்கான ஒரு பாதையை விளக்குவார் என எதிர்பார்க்கப் படுகிற௹௹௹து. கட்டுப்பாட்டு விதிகளைச் சிறிதளவு தளர்த்துவார் என எதிர்பார்க்கப் படுகிறது. சில, சில பிரதேச வாரியான வர்த்தக நிறுவனங்கள் அங்கு சமூக விலத்தலைக் கடைப்பிடிக்கும் வகையில் தமது வியாபாரங்களை ஆரம்பிக்க அனுமதிக்கப்படுவர் என்றும் எதிர்பார்க்கப் படுகிறது.

ஐக்கிய இராச்சியத்தில் இதுவரை கொரோனா பதிப்பில் இறந்தவர்களின் எண்ணிக்கை நேற்று அதாவது 09.05.2020 வரை சுமார் 32000 பேர். ஆனால் தொடர் நிகழ்வாக புதிதாக தொற்று ஏற்படுபவர்களின் எண்ணிக்கை, மற்றும் வைத்தியசாலையில் அனுமதிக்கப்படுவோரின் எண்ணிக்கை, தினசரி இறப்போரின் எண்ணிக்கை குறைந்து வருவது இத்தொற்று ஓரளவு கட்டுப்பாட்டுக்குள் கொண்டு வரப்படுகிறது என்பதைக் காட்டுகிறது. ஆயினும் சமூகக் கட்டுப்பாட்டு விதிகளை முற்றாகத் தளர்த்தினால் மற்றொரு முறை கொரோனா தொற்று அதிகரிக்கலாம் எனும் விஞ்ஞானிகளின் கருத்துக்களை ஐக்கிய இராச்சிய அரசு கவனத்தில் கொண்டு அவதானமாகவே செயற்படப் போகிறது என்று எதிர்பார்க்கப் படுகிறது. ஐரோப்பிய நாடுகளிலேயே அதிகூடிய மரண எண்ணிக்கையை. கொண்ட நாடாக ஐக்கிய இராச்சியம் முடிசூட்டிக் கொண்டது மிகவும் துன்பியல் நிறைந்த செய்தியே.

ஒவ்வொரு மரணத்தின் பின்னும் ஒரு மாபெரும் சோகம் பிணைந்திருக்கிறது என்பது மறுக்க முடியாத உண்மை. கொரோனா வைரஸ் எனும் இந்தக் கிருமியின் தொற்றினை இங்கிலாந்து அரசு எவ்வகையில் கையாண்டிருக்கிறது என்றும் இக்கையாளுதல் மரணமடைவோரின் எண்ணிக்கையை அதிகரிக்கச் செய்துள்ளதா? என்றும் கேள்விகள் ஆங்காங்கே எழுகின்றன. அரசோ தம்மீது எந்தத் தவறுமில்லை என்று வரையறுப்பதற்காக தாம் அரச விஞ்ஞானிகளின் ஆலோசனையின் படியே செயற்பட்டதாகக் கூறிவருக்கிறார்கள். தற்போதைய சூழலில் எந்த ஒரு அரசியல்வாதியும் இந்தச் சூழ்நிலையைத் தமக்குச் சாதகமாக்கிக் கொள்ள முயலவில்லை என்பது ஐனநாயகத்துக்குக் கிடைத்த வெற்றி எனலாம். ஆயினும் இந்நடவடிக்கைகள் என்றுமே ஆராயப்படாமல் இருக்குமா? என்பது சந்தேகமே !

கொரோனாவின் ஆர்ப்பாட்டங்களுக்கு மத்தியில் எதிர்க்கட்சியான லேபர் கட்சியின் தலைவர் தேர்தல் வந்தது தெரியாமல் நிறைவேறி முடிந்து விட்டது. ஆமாம் கடந்த பொதுத் தேர்தலில் பாரிய தோல்வியைச் சந்தித்த எதிர்க்கட்சியின் சர்ச்சைக்குரிய தலைவரான ஜெர்மி கோர்பன் பதவி விலகி அனைத்துத் தரப்பினராலும் ஒரு நடுநிலைவாதி எனக் கணிக்கப்படும் சேர் கியர் ஸ்டாமார் (Sir Keir Starmer) தெரிவு செய்யப்பட்டது மிகவும் சலனமில்லாமலே நடந்தேறிவிட்டது. பொதுவாகவே ஒரு கட்சிக்குத் தலைவராக தெரிவு செய்யப்படுபவர் ஊடகங்களினால் சல்லடை போடப்படும் வழமை இம்முறை கொரோனாவினால் கட்டுப்படுத்தப்பட்டு விட்டது. புதிய லேபர் கட்சித் தலைவரும் கட்சியை ஒரு புது மிதவாதமான போக்கினூடு நடத்திச் செல்லப் போகிறார் போன்றே அவரது ஆரம்ப நடவடிக்கைகள் தோற்றுவிக்கின்றன.

இக்கொரொனாவின் வரவினால் உலகிற்கு கிடைத்துள்ள ஒரேயொரு அனுகூலம் சுற்றுச்சூழலின் பாதிப்பு கட்டுப்படுத்தப்பட்டமையே. லண்டனில் சுற்றுச்சூழல் பாதிப்பு 50% குறைவடைந்திருக்கிறது என்று ஆய்வுகள் தெரிவிக்கின்றன. மக்கள் தமது பணிகளுக்கு திரும்பச் செல்கையில் சைக்கிள், மற்றும் நடப்பது என்பதை கடைப்பிடிக்கக்கூடிய வரையில் கடைப்பிடிக்கும்படி வேண்டப்படுகிறார்கள். இதற்காக சாலைகளில் மாற்றங்களை ஏற்படுத்த அரசு 2.5 பில்லியன் பவுண்ட்ஸ்களை ஒதுக்குவதாக போக்குவரத்து அமைச்சர் தெரிவித்திருக்கிறார். இம்மாற்றங்கள் கொரோனாவைத் தாண்டியும் நிலைத்திருக்குமா?

வீட்டிலிருந்தே பணிபுரியும் முறை பல நிறுவனக்களினால் ஊழியர்களுக்கு வழங்கப்பட்டு வருவதும், வியாபார சந்திப்புகள் காணொளிகள் மூலம் நடத்தப்படுவதும் முன்னெடுக்கப்பட்டு வரும் இந்நிலைமையின் அனுகூலத்தை நிரந்தரமாகுவது பற்றிய அரசின் கணிப்பு எப்படி இருக்கப் போகிறது என்பதும் ஆவலுடன் எதிர்பார்க்கப்படுகிறது.

கொரோனாவைத் தாண்டி . . . . . .

பல கேள்விகளுக்கான விடைகள் தங்கியிருக்கின்றன

• பொருளாதாரப் பாதிப்பின் விளைவுகள் எத்தகையது?
• ப்ரெக்ஸிட்டினால் பிளவு பட்ட நாடு இன்று கொரோனாவினால் கண்ட ஒருங்கிணைப்பு கொரோனாவைத் தாண்டியும் நிலைக்குமா?
• சுற்றுச்சூழல் பாதிப்பினைக் கட்டுப்படுத்தக்கூடிய வகையில் நாட்டின் போக்குவரத்தில் ஏற்பட்ட மாற்றங்களை மக்கள் நிரந்தரமாக உள்வாங்கி காலநிலைச் சீர்கேட்டைத் தடுக்க முனைவார்களா?
• மக்களின் சமுதாய, சமூகத்தை நோக்கிய பார்வையில் எத்தகைய மாற்றங்கள் ஏற்படப் போகின்றன?
• மக்களின் அத்தியாவசிய சேவைகளுக்காய் உழைப்போரின் மீதான மக்கள் பார்வையில் ஏற்பட்ட மாற்றம் கொரோனாவைத் தாண்டியும் நிலைக்குமா?
• உலகம் எனும் பரந்த நோக்கம் மாறி எம் நாடு, எம் மக்கள் எனும் தனிமைப்படுத்துவோரின் செல்வாக்கு ஓங்குமா?
• வெளிநாடுகளுக்கான மக்கள் பயணங்கௐள் சகஜமான நிலைக்குத் திரும்ப வருடங்களாகுமா?

இரண்டாம் உலக மகாயுத்தத்தின் பின்னால் உலகம் கண்டிருக்கும் ஒரு மாபெரும் சோதனையான காலம் இது என்பதே அனைத்து மக்களின் அனுமானமும் ஆகும்.

கொரோனாவைத் தாண்டிய வாழ்க்கையின் மாற்றங்களுக்கு இனிவரும் காலமே பதிலிறுக்க வேண்டும். ஏனெனில் இன்று நாம் எதிர்கொள்வது முன்னொரு பொழுதும் கண்டிராத ஒரு நிகழ்வு.

சக்தி சக்திதாசன்
லண்டன்

அசாத்தியமான நிலை, அசாதாரணமான சூழல் நான்கு மாதங்களுக்கு முன்னால் எண்ணிப்பார்த்திருக்கக் கூட முடியாத ஒரு சூழலில் சிக்கித் தவிக்கும் இங்கிலாந்து மக்கள். இங்கிலாந்து மட்டுமல்ல முழு உலகுமே என்று கூடச் சொல்லலாம். எதையும், எப்படியும், எப்போதும் சமாளித்து விடுவோம் என்று பொருளாதாரத்திலும், முன்னேற்றத்திலும் முன்னனி வகித்து அனைத்து வசதிகளும் நிறைந்திருக்கும் நாடுகள் எனும் உல்கக்கணிப்பில் இருந்த நாடுகள் பல. பொருளாதார நெருக்கடிகளுக்குள் சிக்கி வெளியேவர அந்நியநாட்டு உதவிகளை எதிர்பார்த்து தத்தளித்துக் கொண்டிருந்த நாடுகள் பல கலந்து நிறைந்த உலகினை ஒரு கண்ணுக்குத் தெரியாத நுண்ணுயிர்க்கிருமி இன்று தன்னிலை உணரப் பண்ணியிருக்கிறது என்பதுவே உண்மை.

இயற்கைக்கு மனிதன் நாகரீக முன்னேற்றம், மனித வளர்ச்சியின் முன்னேற்றம் எனும் வகையில் விடுத்த சவாலை இயற்கை சத்தமின்றி சின்னாபின்னமாக்கியிருக்கிறது என்றே எண்ணத்தோன்றுகிறது. இனம், மதம், மொழி எனும் எல்லைகளுக்கப்பால் நாடுகள் எனும் எல்லைகளைக் கடந்து நான் உங்களையெல்லாம் பார்ப்பது மனிதர் எனும் ஒரேயொரு இனமாகத்தான் என்று உணர்த்தியிருக்கிறது இக்கொரோனா வைரஸ்.

நேற்று மாலை இல்லத்தில் அத்தியாவசிய உணவுப்பொருட்களுக்காக எமக்கருகாமையிலிருக்கும் ஒரு பல்பொருள் அங்காடிக்கு செல்ல வேண்டிய தேவையிருந்தது. புறப்படும்போது மனைவி “கையுறை (Gloves), முகவுறை (Mask), சுத்தம் செய்வதற்கான நனைக்கப்பட்ட காகிதத்தாள் (Anti Bacterial Wipes) இவைகளெல்லாம் எடுத்துக் கொண்டீர்களா” என்று கேட்டபோது ஏதோ போருக்குப் புறப்படுவோனிடம் ஆயுதங்களை எடுத்துக் கொண்டீர்களா? என்று கேட்பது போலிருந்தது.

ஆமாம் இதுவும் ஒரு சத்தமில்லா யுத்தம் தானே! கண்ணுக்குத் தெரியாத நுண்ணுயிர்க்கிருமி எத்தனை பேர்களின் உயிர்களைத் தன்னால் காவு கொள்ள முடியும் எனும் வகையில் காத்திருக்க, கண்ணுக்குப் புலப்படாத இந்த எதிரியிடமிருந்து எப்படி எம்மைக் காத்துக் கொள்வது எனும் தந்திர யுத்திகளை நாம் கையாள இதுவும் ஒரு நவீன போர் என்றுதானே கூற வேண்டும்..!

இங்கிலாந்து, ஸ்கொட்லாந்து, வேல்ஸ், வட அயர்லாந்து எனும் நான்கு மாநிலங்களை உள்ளடக்கிய ஐக்கிய இராச்சியம் இன்று அடங்கிப் போயிருக்கிறது. லாக் டவுண் எனப்படும் மனித நடமாட்டத்தை கட்டுப்படுத்தும் சட்டவிதிகளை அமுலாக்கி இக்கொரோனா வைரஸினை வெற்றி கொள்ளும் ஒரு தீவிரமான கட்டத்தில் தன்னை அமிழ்த்தியிருக்கிறது ஐக்கிய இராச்சியம்.

ஐக்கிய இராச்சியம் மட்டுமல்ல முழு அகிலமுமே இன்று ஏதோ ஒரு வகையிலான கட்டுப்பாட்டினை தமது மக்களின் நடமாட்டத்தின் மீது விதித்திருக்கின்றன. ஐனநாயகத்தினைக் கடைப்பிடிக்கும் எந்த ஒரு நாடுமே எந்த விதமான கட்டுப்பாட்டினைத் தமது நாட்டு மக்களின் மீது என்றுமே விதிக்க மாட்டா என்று இருந்தனவோ இன்று அந்நிலை மாறி அதே மக்களின் நன்மைக்காக அவர்மீது அக்கட்டுப்பாடுகளை விதிக்க வேண்டிய துர்பாக்கிய நிலையில் அரசாங்கங்கள் இருப்பது தவிர்க்க முடியாமல் போய்விட்டது.

இக்கொரோனா வைரஸினால் தாக்கப்பட்ட இங்கிலாந்துப் பிரதமரின் காய்ச்சல் பத்து நாட்களாகியும் குறையாததினால் முன்னெச்சரிக்கையாக வைத்திய சாலையில் அனுமதிக்கப்பட்டார். நாடு முழுவதுமே ஒருவகையிலான துயர நிலைக்குத்தள்ளப்பட்டது. கடைசியாகக் கிடைத்த செய்திகளின் படி அவர் தீவிர சிகிச்சைப்பிரிவிலிருந்து சாதாரன பிரிவுக்கு மாற்றப்பட்டது அவரது உடல்நிலை தேறிவருகிறது என்பதினை உறுதி செய்கிறது.

எந்தவிதமான அரசியல் பாகுபாடுமின்றி அனைத்துத் தரப்பினரும், நாட்டு மக்களின் பெரும்பான்மையினரும் அவரின் நலனை முன்னிறுத்தியது மனிதத்தின் வெற்றி என்றே எடுத்துக் கொள்ளப்பட வேண்டும்.

இங்கிலாந்து அரசாங்கத்தின் கட்டுப்பாட்டு விதிகளின்படி

1. ஒருநாளைக்கு ஒரு தடவை உடற்பயிற்சிக்காக தமது இல்லங்களுக்கு அருகாமையில் மக்கள் நடைபயிற்சிக்கோ அன்று தமது வளர்ப்புப்பிராணியின் நடைக்காகவோ வெளியே செல்லலாம்
2. அத்தியாவசிய உணவுப் பொருட்களுக்காக வெளியே செல்லலாம்
3. மருந்துப்பொருட்களை பெற்றுக் கொள்வதற்காக வெளியே செல்லலாம்
4. தம்மைத் தாமே பராமரித்துக் கொள்ள முடியாதவர்களுக்கு உதவுவதற்காக வெளியே செல்லலாம்
5. வீட்டிலிருந்தபடியே பணி செய்ய முடியாதவர்கள் அவர்களின் பணிகள் அத்தியாவசியமாக இருக்கும் பட்சத்தில் பணிமனை செல்லலாம். ஆனால் பணிமனையில் தனிமனித விலத்தல் விதிகளுக்கமையவே அவர்கள் பணிபுரியலாம்.

என்பனவே சட்டபூர்வமாக கடைப்பிடிக்கும்படி விதிக்கப்பட்டிருக்கிறது

மேலே குறிப்பிட்ட விதிகள் சாதாரண மக்களுக்கானவை. ஆனால் பலவிதமான தீவிரமான நோய்களுக்குட்பட்ட ஏறக்குறய ஒன்றரை லட்சம் மக்களுக்கு ஐக்கிய இராச்சிய வைத்தியத்துறை கடித மூலம் அவர்கள் 12 வாரங்களுக்கு வீட்டை விட்டு வெளியே செல்லக்கூடது எனவும் அவர்களுக்குத் தேவையான அத்தியாவசிய பொருட்கள், மற்றும் மருந்துகள் என்பனவற்றைப் பெற்றுக் கொடுக்க உதவிகள் இல்லாத பட்டத்தில் அதற்கான இணையத்தளத்தில் தம்மைப் பதிவு செய்தவன் மூலம் அவர்களுக்கான தேவைகளை அளிக்க கவுன்சில்கள் ஏற்பாடு செய்யும் என்றும் அரிவித்துள்ளார்கள்

பல வியாபார நிலையங்கள், வர்த்தக ஸ்தாபனங்கள் அனைத்தும் அடைக்கப்பட்டு விட்டன. தனியார், மற்றும் அரச ஊழியர்களில் வீடுகளில் இருந்து பணிபுரியக்கூடியவர்களுக்கு அத்தகைய வசதிகள் வழங்கப்பட்டிருக்கின்றன. உணவுப்பொருட்கள் விற்பனை செய்யும் வர்த்தக நிலையங்கள் மட்டும் திறப்பதற்கு அனுமதி உள்ளது.

பார்கள், உணவுவிடுதிகள் என்பனன அடைக்கப்பட்டு விட்டன. சில உணவு விடுதிகள் மட்டும் இணையத்தளம் வழியாக தமது வியாபாரத்தினை நடத்துகின்றன, கிரடிட் அட்டைகளின் மூலமாக பணத்தினைச் செலுத்த உணவு இல்லத்துக்கு எடுத்து வரப்படுகின்றன. உதரணமாக பிட்ஸா போன்றவைகளைக் குறிப்பிடலாம்.

பிரபலமான பல்பொருள் அங்காடிகள் காலை ஆறு மணி முதல் மாலை 10 மணிவரை திறக்கப்படுகின்றன. இங்கு தனிமனித இடைவெளி கடைப்பிடிக்கப்படுகின்றன. குறிப்பிட்ட எண்ணிக்கையிலேயே மக்கள் உள்ளே அனுமதிக்கப்படுகின்றனர். ஏனையோர் கடைக்கு வெளியே 2 மீட்டர் இடைவெளியில் வரிசையில் நிற்பார்கள் உள்ளே இருப்பாரில் எத்தனை பேர் வெளியே வருகிறார்களோ அத்தனை பேர் உள்ளே அனுமதிக்கப்படுகிறார்கள். ஷாப்பிங் வண்டிகளின் கைப்பிடியை சுத்தம் செய்வதற்கான வசதிகள் வாசலில் நிலைநிறுத்தப்பட்டுள்ளது. கடையின் உள்ளே ஒருவழிப்பாதை முறை கடைப்பிடிக்கப்படுகிறது. இது தனிமனிதருக்கிடையில் இருக்கும் இடைவெளியை தக்க வைப்பதற்கு உதவுவதற்காக எனலாம் .

ஆசிய உணவு வகைகளை விற்கும் கடைகள் இங்கிலாந்தில் பல உண்டு. இவைகளில் தமிழ்க்கடைகள் அதிகமாகவே இருக்கும். இங்கு வகை வகையிலான எமது நாட்டு காய்கறிகள் கிடைக்கும். ஆனால் இன்றோ இவைகளில் பெரும்பான்மையானவை மூடப்பட்டிருக்கின்றன. திறந்திருக்கும் ஒருசில கடைகளில் எமது நாட்டு காய்கறி கிடைப்பது அரிதாகவே உள்ளது.

இங்கிலாந்தின் பொருளாதாரம் முடங்கிக் கிடக்கிறது. ஆனால் வர்த்தக ஸ்தாபனங்கள் மூடப்பட்டு விட்டதால் இதனைக் கடந்து மீண்டும் பொருளாதாரத்தைக் கட்டியெழுப்புவது கடினம் என்பதினால் இதுவரை வரலாற்றில் காணாத வகையில் பல பொருளாதார உதவிகளை இங்கிலாந்து நிதியமைச்சர் அறிவித்திருக்கிறார். இங்கிலாந்தின் அரசாங்கத்தை அமைத்திருப்பது கன்சர்வேடிவ் கட்சி. பொதுச் செலவுகளை மிகுந்த கட்டுப்பாட்டுக்குள் வைத்திருப்பதில் ஒரு பெயர் பெற்ற கட்சி. அந்தக் கட்சியின் கொள்கைகளுக்கு முற்றும் முரணாக பலவகையிலான பொருளாதார உதவிகளை அள்ளி வழங்கியிருக்கிறது இங்கிலாந்து அரசு. இங்கிலாந்தின் நிதியமைச்சர் இந்தியாவின் முன்னனி நிறுவனமான “இன்போசிஸ்” நிறுவன உரிமையாளரான திரு நாராயணமூர்த்தி அவர்களின் மாப்பிள்ளையான ரிஷி சுனாக் என்பது இங்கே குறிப்பிடத்தக்கது.

வியாபார நிறுவனங்கள இழுத்து மூடி அங்கு பணிபுரிபவர்களை வேலையிலிருந்து நீக்காதீர்கள், இந்நிலையிலிருந்து நாம் மீளும்வரை நீங்கள் வேலையில் வைத்திருக்கும் ஊழியர்களின் 80% ஊதியத்தை அரசாங்கம் தரும் என்று அறிவித்திருக்கிறார். அத்துடன் Self employed எனும் வகையிலான பணிபுரிவோருக்கும் பொருளாதார உதவிகளை அறிவித்திருக்கிறது அரசு. இவ்வகை பணிபுரிபவர்கள் தமது வரிக்கான பத்திரத்தைச் சமர்ப்பிக்கும்போது தமது வருமானம் எவ்வளவு என்று குறிப்பிடிருந்தார்களோ அதன் 80% த்தை அரசு கொடுக்கும் என்பதுவே அது. அதுதவிர தமது வாழ்வாதரத்துக்கான நிதிப்பற்றாக்குறையுள்ளவர்கள் அதற்கான வழிமுறைகளைப் பின்பற்றி அரச உதவிகளைப் பெற்றுக் கொள்ளலாம் என்றும் அறிவித்துள்ளார்கள்.

தேசிய சுகாதார சேவையில் இருக்கும் அத்தியாவசிய ஊழியர்களுக்கான பாதுகாப்புக் கவசப் பற்றாக்குறையை நிவர்த்தி செய்ய பல நிறுவனங்கள் தாம் உற்பத்தி செய்யும் பொருட்களுக்குப் பதிலாக அரசுக்குத் தேவையான பாதுகாப்புக் கவசங்களை உற்பத்தி செய்யும்படி வேண்டப்பட்டு அதனை உற்பத்தி செய்கிறார்கள்.

இங்கிலாந்தின் தேசிய சுகாதரச் சேவையின் அன்றாட பொருட்கள், நோயாளர்கள், மருந்துகள் என்பனவற்றினை உரிய இடங்களுக்கு எடுத்துச் செல்வதற்கு தமக்கு உதவி தேவை அதற்காக தன்னார்வ முறையில் சுமார் 250000 பேர்வரை எதிர்பார்க்கிறோம் என்ற அவர்களது கோரிக்கை வந்த இரண்டு நாட்களுக்குள் சுமார் 750000 பேர் உதவ அதற்கான இணையத்தளத்தில் தம்மைப் பதிவு செய்தமை மக்களின் புரிந்துணர்வினை நன்கு எடுத்துக் காட்டுகிறது.

அரசாங்கத்தின் சட்டத்திற்கமைய மூடப்பட்ட வர்த்தக நிலையங்களுக்கு நஷ்டஈடு உரியவகையில் அறிவிக்கப்பட்டுள்ளது. இக்கொரோனா வைரஸினால் தாக்கப்பட்டவர்களைப் பராமரிக்கும் முன்னனி வைத்தியர்கள், தாதிமார்கள் மற்றும் வயோதிபர்களைப் பராமரிக்கும் விடுதிகளின் சேவையாளர்களுக்கான பரிசோதனை திருப்திகரமாக இல்லை எனும் குற்றச்சாட்டு இருந்து வருகிறது. இதற்காக இம்மாத இறுதிக்குள் நாளொன்றுக்கு 100000 பேரைப் பரிசோதிக்கக்கூடிய வசதிகளை நிர்ணயித்து விடுவோம் என சுகாதார அமைச்சர் உறுதியளித்துள்ளார்,

ஒவ்வொரு வியாழனும் இரவு 8 மணிக்கு அனைவரும் தமது இல்லங்களிலிருந்து வெளியே வந்து இத்தனை இன்னல்களுக்கு மத்தியிலும் தமது அன்றாடக் கடமைகளை ஆற்றும் அத்தியவசியத்துறை ஊழியர்களுக்கு நன்றி தெரிவிக்கும் வகையில் கரகோஷம் செய்து வருகிறார்கள்.

இதுவரை கிடைத்த தரவுகளின் படி இங்கிலாந்தில் 65,077 பேர்கள் இவ்வைரஸினால் தாக்கப்பட்டுள்ளார்கள். 7,978 பேர்கள் மரணத்தை தழுவியுள்ளார்கள். இங்கே குறிப்பிடப்பட்ட தாக்கப்பட்டவர்களின் எண்ணிக்கை வைத்தியசாலைக்குச் சென்று தம்மை அடையாளப் படுத்திக் கொண்டவர்களேயாகும். அவர்களைத் தவிர மேலும் பலர் மிகவும் குறைவான நிலையில் இவ்வைஸினால் பீடிக்கப்பட்டு வைத்தியசாலைக்கு செல்லத் தேவையில்லாமல் இருப்பார்கள் என்றே தெரிவிக்கப்படுகிறது. இதுவரை சுமார் 250000 க்கும் அதிகமானோர் பரிசோதிக்கப்பட்டுள்ளார்கள்.

மார்ச் 23ம் திகதியே ஐக்கிய இராச்சியத்தில் கட்டுப்பாட்டு விதிகள் அறிவிக்கப்பட்டன. இக்கட்டுப்பாட்டினை பெரும்பான்மையான ஐக்கிய இராச்சிய மக்கள் கடைப்பிடித்து வருகிறார்கள். இதன் காரணமாக புதிய வைரஸ் தொற்றுக்கள் குறைந்து வருவதோடு, வைத்தியசாலையில் அனுமதிக்கப் படுவோரின் எண்ணிக்கையும் குறைந்து வருகிறது. இறப்போரின் எண்ணிக்கை இன்னும் ஓரிரு வாரங்களுக்கு அதிகரிக்க வாய்ப்புண்டு எனவும் அதன் பின்னால் இறப்போரின் எண்ணிக்கை குறையும் என்றும் எதிர்பார்க்கப்படுகிறது.

ஒவ்வொரு நாளும் மாலை 5 மணியளவில் ஐக்கிய இராச்சிய அரசின் சார்பாக பத்திரிகையாளர் மகாநாடு நடத்தப்படுகிறது. இது தொலைக்காட்சியில் நேரலையாக ஒளிபரப்பப்படுகிறது. இப்போது அநேகமாக கேட்கப்படும் கேள்வி எப்போ மக்கள் மீது விதிக்கப்பட்ட கட்டுப்பாடுகள் நீக்கப்படும் என்பதே. அதற்கு அரசின் சார்பாக அடுத்த வார இறுதியில் இது மீள்பரிசோதிக்கப்படும் வரை எதுவும் கூற முடியாது எனும் பதிலே கிடைக்கிறது.

இவ்வைரஸினால் பாதிக்கப்படுவோரின் எண்ணிக்கை உச்சகட்டத்தை அடைந்து விட்டதா என்பதை இன்னமும் நிர்ணயிக்க முடியாமல் இருப்பதே இதற்குக் காரணமாகிறது. இங்கே இறப்போரின் எண்ணிக்கை என்பது ஒரு தொகையாகக் குறிப்பிடப்படுகிறது. ஆனால் ஒவ்வொரு மரணத்தின் பின்னாலும் ஒரு குடும்பத்தின் சோகம் காணாமல் போகிறது. இந்நோயினால் இறந்தவர்களின் உடல்கள் உறவினர்களுக்குக் கொடுக்கப்படுவதில்லை. ஒரேயொருவர் மட்டும் மரணச்சடங்கில் கலந்து கொள்ள அனுமதிக்கப்படுகிறார்கள். ஏனையோர் அதிக பட்சம் காணொளியில் மட்டுமே கண்டு கொள்ளலாம், தமது உறவினர்களின் கடைசி யாத்திரையைக் கூட நேரடியாகக் கண்டு கொள்ள முடியாத ஒரு அவலமான நிலையில் பலர் மனமுடைகிறார்கள். அது தவிர இறப்பவர்களின் உயிர் பிரியும்போது அவர்களின் உறவினர்கள் யாரும் அருகில் இல்லாமல் உலகை விட்டு நீங்குகிறார்கள்.. ஆனால் அவர்கள் தன்னந்தனியாக உலகை விட்டு நீங்காமல் தாதிமார்கள் அருகில் இருக்கிறார்கள். ஆனால் இதனைத் தொடர்ந்து கண்ணுறும் டாக்டர் மற்றும் தாதிமார் கூட மிகவும் மனமுடைந்து போகிறார்கள்.

இன்று ஐக்கிய இராச்சியமும், உலகும் கண்டு கொண்டிருக்கும் நிலை உலகப் போர்களுக்குப் பின்னால் வரலாற்றில் முதன்முறையாக நிகழ்கிறது. இதனை எதிர்கொள்வதும், கையாள்வதும், மக்களுக்கும், அனைத்து அரசுகளுக்கும் ஒரு புதிய அனுபவமே.

ப்ரெக்ஸிட் எனும் ஒரு நிகழ்வு ஐக்கிய இராச்சியத்தை பிளவு படுத்தியது. ஆனால் இன்று கொரோனா எனும் வைரஸ் ஐக்கிய இராச்சியத்தை மீண்டும் ஓரணியில் திரள வைத்திருக்கிறது. இவ்வைரஸின் தாக்கத்திலிருந்து மீண்டு வரும்போது உலகம் நிச்சயமாக ஒரு பொருளாதார பின்னடைவைச் சந்திக்கப் போவது உறுதி என்பதை பல பொருளாதார நிபுணர்களும் ஏற்றுக் கொள்கிறார்கள். உலகமயமாதல் எனும் நிலையை விட்டு முன்னனி நாடுகள் தாமும் தமது நலமும் எனும் ஒரு கோட்டுக்குள் நுழைந்து கொண்டிருக்கும் சமயத்தில் நிகழ்ந்த இந்நிகழ்வின் தாக்கத்தை உலகநாடுகள் ஒற்றுமையாக, ஒருங்கிணைந்து எதிர்கொள்ளப் போகின்றனவா? இல்லை மீண்டும் சுயநலத்தின் அடிப்படையில் இயங்கப் போகின்றனவா? என்பது கேள்விக்குறியே!

ஆனால் நிச்சயமாக இந்நிலையிலிருந்து மீண்டு வரும்போது மனித வாழ்க்கையின் செயற்பாடுகளிலும், வாழ்க்கையை நோக்கிய அவர்களது பார்வையிலும் நிச்சயம் ஒரு மாற்றம் இருக்கத்தான் போகிறது. இருப்போரும், இல்லையென்போரும் ஒரே தளத்தில் வாழ்வினை எதிர்நோக்க வைத்ததில் கொரோனா வைரஸ் வெற்றி கண்டிருக்கிறது என்பது மறுக்கமுடியாத உண்மை.

மனிதர்கள் அனைவரையும் எதுவித வேறுபாடுமின்றி மனிதர் என்றே பார்த்த வைரஸ் தந்த பாடம் எம்மையும் அதேபோல பார்க்க வைக்குமா? இல்லை மீண்டும் பழைய குருடி கதவைத் திறவடி! எனும் நிலைதானா ?

சக்தி சக்திதாசன், லண்டன்

2020 சர்வதேச மகளிர் தினம் இன்று. அன்றைய மகாகவி பாரதி காலத்திலிருந்து இன்றைய உலகம் எத்தனையோ மாற்றங்களைக் கண்டுவிட்டது. இம்மாற்றங்களு உள்ளாகியிருக்கும் மனித இனமும் அதனூடு பயணித்து, தம்மைப் பலவித மாற்றங்களுக்கு உள்ளாக்கியிருக்க வேண்டும் என்பதே சரியான எதிர்பார்ப்பாக இருக்கும்.

ஆனால் மனத்தளவில் மானிட சமூகம் அத்தனை மாற்றங்களையும் சரியான வகையில் உள்வாங்கியிருக்கிறதா?

சர்வதேசப் பெண்கள் தினம் என்று ஒரு தினம் கொண்டாடப்பட வேண்டியது அவசியமா? எனும் விவாதம் பல மேடைகளில் நடைபெறுகின்றது. இவ்விவாதத்துக்குச் சார்பான வாதமும் பல வகைகளில் முன்வைக்கப்படுகின்றது.

பெண்களுக்கென ஒரு தினத்தைக் கொண்டாடுவது அவர்களை ஆண்களின்றும் பிரித்து வைக்கும் ஒரு செயலாக அமைந்துவிடாதா? ஆணும் பெண்ணும் சமமான பலம் கொண்டவர்கள் எனும் வாதத்தை இது மறுதலிக்காதா என்றொரு வாதமும் பெண்கள்தான் அனைத்திலும் ஆண்களுக்குச் சமம் என்றல்ல அவர்களை விட முன்னேறிவிட்டார்கள் இன்னும் இத்தினம் தேவையா என்றொரு வாதமும் சில ஓரங்களில் கேட்கிறது.

ஆண்கள் என்றோர் இனமும் பெண்கள் என்றோர் இனமும் இயற்கையால் பிரித்தே படைக்கப்பட்டிருக்கிறது. மனித இனவளர்ச்சிக்கான அடிப்படைத் தேவையிது. அன்றைய காலக்கட்டங்களில் பெண்கள் இனவிருத்திக்கும் இல்லப் பராமரிப்புக்கும் மட்டுமே உகந்தவள் எனும் அடிப்படை எண்ணம், மனித மனங்களில் நிலை கொண்டிருந்தது உண்மை. அன்றைய உலகின் வளர்ச்சி அந்த எல்லைக் கோட்டுக்குள்ளேயே முடங்கிக் கிடந்தது.

ஆனால் மாறிக்கொண்டு வந்த காலக்கட்டத்தில் மனித அறிவின் வளர்ச்சியும் புரிந்துணர்வும் அதிகரிக்கத் தொடங்கிய பின்னும் கலாச்சாரம் எனும் விலங்கினைப் பூட்டி, பெண்களின் வளர்ச்சிக்கு முட்டுக்கட்டை போடப்பட்டதும் உண்மையே.

இக்கலாச்சாரப் பூட்டினைத் தகர்த்து பெண்களின் வளர்ச்சியை ஊக்குவிக்கும் கடமையில் படைப்பாளிகள் பாரிய பங்கினை வகித்துள்ளார்கள். இந்தக் கலாச்சார வட்டத்தினுள் அடைபட்டுப்போன மகாகவி பாரதியார், நிவேதிதா அம்மையாரின் சந்திப்புக்குப் பின்னரே பெண்களின் சமுதாயப் பங்கின் முக்கியத்துவத்தினை உணர்ந்தார் என்பது வரலாறு காட்டும் உண்மை.

இத்தகைய விழிப்புணர்வு பலருக்கு அக்காலத்திலே தோன்றியிருந்தாலும் கூட எத்தனை பேருக்கு இவ்வட்டத்தினை உடைக்கும் அளவுக்கு, தமது கருத்தினை உரக்கக் கூறும் அளவுக்கு துணிச்சல் இருந்தது என்பது கேள்வியே!

இங்கேதான் எமது பாரதியார் உயர்ந்து நின்றார். அனைவருக்குள்ளும் தம்மை வேறுபட்டவராகக் காட்டுவதிலும் உணர்ந்துகொண்ட உண்மைகளை உரக்கக் கூறுமளவுக்கு துணிச்சல் கொண்டிருப்பதிலும் தனித்து விளங்கினார்.

ஒரு சமுதாயம் முன்னேறிவிட்டது என்பதையோ, நாகரிகம் அடைந்துவிட்டது என்பதனையோ எடுத்துக்காட்ட அணிந்துகொள்ளும் ஆடைகளை மாற்றிக்கொள்வதோ, அன்றி தோற்றத்தை மாற்றிக் கொள்வதோ ஆதாரமாகிவிடாது. இது ஆண்கள், பெண்கள் இரு சாராருக்கும் பொருந்தும். கலாச்சார முன்னேற்றம், நாகரிக முன்னேற்றம் என்பன பற்றிய தவறுதலான புரிதலுக்கு இன்றைய இளைய தலைமுறை ஆளாகிவிட்டதோ எனும் ஓர் அச்சம் எழாமலில்லை.

பெண்களின் கல்வி முன்னேற்றத்தில்தான் ஒரு சமுதாயத்தின் வளர்ச்சி தங்கியுள்ளது என்பது நிதர்சனமான உண்மை. அத்தகைய ஒரு வளர்ச்சியை இன்றைய உலகின் மாற்றங்கள் எந்த அளவுக்கு கொண்டு வந்திருக்கின்றது என்பது விவாதத்துக்குரிய விடயம்.

முன்னேற்றம், நாகரிகம் என்பவற்றை மேற்குலக நாடுகளின் வளர்ச்சி எனும் எடைக்கல்லிலே நிறுத்துப் பார்க்கும் மனோபாவமே இன்றைய எமது பின்புல இளைய தலைமுறைகளிடம் பெரும்பான்மையாக குடிகொண்டிருக்கிறது போன்ற ஒரு நிலையே காணப்படுகிறது…

இன்றைய உலகில் பெண்களின் நிலையை, பெண்களை ஒரு ஆபாசப் பொருளாகப் பார்க்காமல், சக மனித வர்க்கமாகப் பார்க்கும் மனோபாவத்தைப் பெரும்பான்மையான ஆண்கள் கொண்டிருக்கிறார்களா? என்பதும் கேள்வியே!

நாம் கடந்து வந்த காலப் பகுதி தனக்குள் புதைத்துக்கொண்ட, தம்மைப் பலமிக்க ஆண்களாக எண்னிக்கொண்டவர்களின் செய்கைகள் பல இன்று தோண்டி எடுக்கப்பட்டிருக்கின்றன “நானும் கூட (மீ டூ)” எனும் ஒரு இயக்கத்தினூடாக இன்று சமுதாயப் பெரிய மனிதர் பலரின் செய்கைகள் சமூக ஊடகங்களில் அலைபாய்ந்து கொண்டிருக்கின்றன…

இதன் மூலம் இன்றைய சமூகம் எடுத்துக்கொள்ள வேண்டிய விடயங்கள் பலவுள்ளன. இன்றைய உலகில் பெண்களின் சம உரிமை நிலைநாட்டப்பட்டுவிட்டது என்று கூறும் அதேவேளை திறமையிருந்தும் உயர்நிலையை அடையப் பல பெண்கள் வலிமை மிக்க பெரிய மனிதர்களுக்குத் தம்மை இழக்க வேண்டிய நிலையில் இருப்பது வெளிக்கொணரப்பட்டிருக்கிறது..

அதே சமயம் இந்தச் சூழ்நிலையை தமக்குச் சாதகமாக்கி, சில பேர்களின் கெளரவத்தைக் குலைக்கும் வகையில் சில பெண்கள் நடந்துகொள்வதும் உண்மையே! எது எப்படி இருப்பினும் பெண்களின் வளர்ச்சிக்கான காரணிகளுக்குப் போடப்படும் முட்டுக்கட்டைகளின் அளவு குறைந்திருக்கிறதே தவிர முட்டுக்கட்டைகள் குறையவில்லை,

இன்றும் தமது திறமைகளை வெளிக்காட்டியும் பெண்கள் எனும் ஒரே காரணத்தினால் முன்னேற முடியாமல் தவிக்கும் பலரை நாம் கண்கூடாகக் காணக்கூடியதாகத்தான் உள்ளது. இன்று நான் வாழ்ந்து கொண்டிருக்கும் இந்த ஐக்கிய இராச்சியத்திலே பெண்கள் வாக்குரிமை பெற நடத்திய போராட்டங்கள், சரித்திரப் பிரசித்தி பெற்றவை. அத்தனை பலமிக்க போராட்டங்களின் மூலம் வாக்குரிமைகளைப் பெற்றும் கூட இன்றுவரை பல சூழல்களில் தமது திறமைக்கேற்ற தகுதிகளைப் பெறுவதற்குப் போராடும் நிலையே இன்றும் உள்ளது.

இதற்கு இன்றைய தமிழுலகப் படைப்பாளிகளாக எமது கடமைகள் என்ன? இத்தகைய ஒரு நிலையை இளைய தலைமுறைகளின் மத்தியில் எடுத்துச் செல்ல வேண்டிய பாரிய கடமை அனைத்துப் படைப்பாளிகளுக்கும் உண்டு. தமிழிலக்கிய படைப்புகளொரு புதுப்பரிமாணம் எடுக்க வேண்டிய ஒரு காலக்கட்டத்திலே இருக்கும் இச்சமயத்தில், பெண்ணியக் கண்ணோட்டத்தில் ஆண் எழுத்தாளர்களின் பார்வைகள் அமைய வேண்டிய தேவையைச் சர்வதேச பெண்கள் தினம் எமக்கு நினைவூட்டுகின்றது.

இவற்றுக்கெல்லாம் முன்னோடியாக, பாரதியார் முதற்கொண்டு என் மானசீகக் குரு கவியரசர் கண்ணதாசன் வரை எத்தகைய முயற்சிகளை எடுத்துள்ளார்கள் என்பது நான் சொல்லிப் புரிய வேண்டிய ஒன்றல்ல.

சர்வதேசப் பெண்கள் தினம் ஏன் எனக் கேட்பதை விடுத்து பெண்களுக்கான உரிமைகளில் உள்ள விரிசல்களை வெளிக்காட்டும் படைப்புகளை வெளிக்கொணர முயல்வோம். இதுவே இச்சர்வதேச பெண்கள் தினத்தில் அனைத்துப் பெண்களுக்காகவும் நாம் செய்யும் கடமை.

சக்தி சக்திதாசன்

“இங்கிலாந்து”, “லண்டன்”, “ஐக்கிய இராச்சியம்” என்றதுமே பெரும்பான்மையான உலக மக்களின் மனங்களில் முன்னிற்பது ஐக்கிய இராச்சியம் அன்றி பெரிய பிரித்தானியா என்றழைக்கப்பட்ட நாட்டின் இராஜ குடும்பமே!

இராஜ குடும்பத்தை அதாவது நாட்டின் கெளரவத் தலைவராக ஒரு இராஜாவையோ அன்றி ஒரு ராணியையோ கொண்டிருக்கும் ஒரு சில உலக நாடுகளில், முன்னணியில் இருப்பது ஐக்கிய இராச்சியம் என்றால் அது மிகையில்லை.

எனது 45 வருட கால ஐக்கிய இராச்சிய வாழ்க்கை அனுபவத்தில் நான் கண்ட உண்மை, கலாச்சார விழுமியங்களுக்கு முக்கியத்துவம் கொடுத்துப் பாதுகாத்து வரும் நாடுகளில் ஐக்கிய இராச்சியம் முதன்மையானது என்பதுவே.

இந்த இராஜ குடும்பத்தினைப் பராமரிப்பதனால் நாட்டிற்கென்ன நன்மை எனும் கேள்வி எழலாம். 2017ஆம் ஆண்டு ஒரு நிதியறிக்கை சமர்ப்பிக்கும் ஸ்தாபனத்தின் கணிப்புப்படி இராஜ குடும்பத்தினால் சுமார் 330 மில்லியன் ஸ்டெர்லிங் பவுண்ஸ் உல்லாசப் பிரயாணிகளின் வரவினாலும் மேலும் சுமார் 150 மில்லியன் ஸ்டேர்லிங் பவுண்ஸ் இராஜ குடும்பத்தினரின் தாக்கத்தினால் கிடைக்கும் வர்த்தக உடன்படிக்கைகளினாலும் நாட்டின் நிதிக் களஞ்சியத்துக்குக் கிடைக்கிறது என்கிறது.

அப்படிப் பார்க்கையில் இராஜ குடும்பத்தினரால் நாட்டிற்கு நன்மை இல்லாமல் இல்லை. ஆனால் அந்த இராஜ குடும்பத்தைத் தகுந்த முறையில் பராமரிப்பதற்கு அரசாங்கம் நிதி ஒதுக்கீடு செய்கிறது. இது சாதாரண மக்களின் வரிப்பணத்தில் இருந்தே ஒதுக்கப்படுகிறது.

இந்த 21ஆம் நூற்றாண்டில் உலகம் அபார வேகத்தில் பல மாற்றங்களுக்கு உள்ளாகிக் கொண்டிருக்கும் நிலையில் இத்தகைய ஒரு வெறும் சம்பிரதாயத்துக்காக மட்டும் இத்தனை செலவு செய்து இராஜ குடும்பத்தைப் பேணுவது அவசியமா? எனும் கேள்வி முடியாட்சிக்கு எதிரானவர்களிடம் இருந்து பலமுனைகளில் எழுவதையும் நாம் பார்க்கக் கூடியதாக உள்ளது.

இந்நிலையில் தான் தற்போது ஐக்கிய இராச்சியத்தின் இராஜ குடும்பத்தினுள் ஏற்பட்டுள்ள சலசலப்பு எங்கே இதுதான் இராஜ குடும்பத்தின் சிதைவுக்கு வழிகோலிவிடுமோ என்று பல இராஜ குடும்ப ஆதரவாளர்கள் மத்தியில் பீதியைக் கிளப்பி விட்டுள்ளது.

எது எப்படி இருந்தாலும் ஐக்கிய இராச்சியத்தின் சம்பிரதாயத் தலைவியாக இருக்கும் இரண்டாவது எலிசபெத் மகாராணியாரின் திடகாத்திரமான வழிநடத்துதலையும், உறுதியான நிலைப்பாட்டையும் கண்டு பிரமிக்காமல் இருக்க முடியாது.

நான்கு குழந்தைகளுக்குத் தாயாரான எலிசபெத் மகாராணியாரின் மூத்த புதல்வரும் மகாராணிக்கு அடுத்து முடியுரிமை கொண்டவருமான இளவரசர் சார்ல்ஸ் 1981ஆம் ஆண்டு டயானா அவர்களை மணம் முடித்தார். அதேபோல மகாராணியாரின் இரண்டாவது புதல்வரான இளவரசர் ஆண்ட்ரூ 1986ஆம் ஆண்டு சாரா அவர்களை மணம் முடித்தார்.

1992ஆம் ஆண்டு எலிசபெத் மகாராணியாரின் பிரச்சினைகள் பூதாகாரமாகின. 1992 மார்ச் மாதம் மகாராணியாரின் இரண்டாவது புதல்வரான ஆண்ட்ரூவும், அவரது மனைவியும் தாம் பிரிந்து செல்வதாக அறிவித்தனர். அவர்களுக்கு இரண்டு பெண்குழந்தைகள் இருந்தனர். அதே வருடம் டிசம்பர் மாதம் மகாராணியாரின் மூத்த புதல்வரும் முடியுரிமை கொண்டவருமான இளவரசர் சார்ல்ஸும் அவரது மனைவியும் சமரசமாகப் பிரிந்து செல்வதாக அன்றைய பிரதமர் டோனி பிளேயர் நாட்டு மக்களுக்கு அறிவித்தார். அவர்களுக்கு வில்லியம், ஹாரி என்று இரண்டு ஆண்குழந்தைகள் இருந்தனர்,

1993ஆம் ஆண்டு நாட்டிற்கான புதுவருடச் செய்தி அளித்த எலிசபெத் மகாராணியார், நடந்து முடிந்த 1992ஆம் ஆண்டை “Annus Horriblis“ என்று வருணித்தார். லத்தீன் மொழியில் மிகவும் பாரதூரமான வருடம் என்று குறிப்பதாகும். அதைத் தொடர்ந்து 1996ஆம் ஆண்டு முதலில் இளவரசர் ஆண்ட்ரூவும், அடுத்து இளவரசர் சார்ல்ஸ்ம் தமது மனைவியரை விவாகரத்து செய்தார்கள்.

இளவரசர் சார்ல்ஸின் மனைவியான லேடி டயானா விவாகரத்தின் பின்னாலும் ஊடகங்களின் பரிசோதனைக்கு உள்ளானார். அவரது ஒவ்வொரு நடவடிக்கையும் ஊடகங்களில் அவதானிக்கப்பட்டு, அதன் தாக்கங்களை இராஜ குடும்பத்தினர் எதிர்கொள்ள வேண்டியதாகியது.

இவையனைத்தையும் தனக்கேயுரிய மனோதைரியத்துடன் எதிர்கொண்டார் எலிசபெத் மகாராணியார். விவாகரத்து பெற்ற டயானா, காதல் விவகாரத்தில் ஈடுபட்ட போது ஏற்பட்ட எதிர்மறையான விளைவுகளை மகாராணியார் தனது குடும்பத்தின் சார்பில் எதிர்கொள்ள வேண்டிய தேவையேற்பட்டது.

பாரிஸ் நகரத்தில் 1997ஆம் ஆண்டு ஏற்பட்ட விபத்தில் மரணமடைந்த டயானா அவர்களின் மீது வீசிய மக்களின் அனுதாப அலையின் தாக்கத்தினால் மகாராணியார் பல விமர்சனங்களை எதிர்கொண்டார். அதுவும் அவரைக் கடந்து போகும் வகையில் உறுதி குலையாமல் தனது விவகாரங்களைக் கையாண்டார்.

இங்கே எலிசபெத் மகாராணியரைப் பற்றி முக்கியமான விடயத்தைக் குறிப்பிட வேண்டும். 93 வயதான எமது மகாராணியார் 21 வயதில் திருமணமாகி அவரது தந்தையின் திடீர் மறைவுக்குப் பின்னால் 27 வயதாகும் போது இங்கிலாந்தின் மகாராணியானார். அந்த இளம் வயதில் போதிய அனுபவமின்றிப் பாரிய பொறுப்பினை ஏற்றுக்கொண்ட அவர், தனது இங்கிலாந்தின் மகாராணி எனும் பாத்திரத்தினுள் தன்னை வளர்த்துக்கொண்டார். வெறுமனே வளர்த்துக்கொண்டது மட்டுமில்லாமல் தன்மீது எவ்விதமான பாதகமான விமர்சனம் வராமல் நடந்துகொண்டார்.

இங்கிலாந்து மட்டுமல்ல பொதுநலவாய நாடுகள் அனைத்துக்கும் தலைமைப் பதவியேற்று, தமது தலைமையின் கீழ் அவரது முடியாட்சியிலிருந்து விடுபட்டு குடியாட்சி பெற்ற நாடுகளை அனுசரித்து அரவணைத்துக் கொண்டார்.

இத்தகைய பின்னணியில் ஐக்கிய இராச்சியத்தின் சரித்திரத்தில் அதிக காலம் அரசிலமர்ந்தவர் எனும் சாதனை படைத்த எலிசபெத் மகாராணியார், அவரது 93ஆவது வயதில் புதுச் சவாலுக்கு முகம் கொடுக்க வேண்டிய தேவைக்குத் தள்ளப்பட்டுள்ளார்.

மகாராணிக்கு பின்னால் அரசிலமரும் உரிமை கொண்டவர், இளவரசர் சார்ல்ஸ். இவரது இரண்டாவது புதல்வர் இளவரசர் ஹாரி. இவர் மணந்துகொண்டது கலப்பின மங்கையான மெகேன். இவர் கனடா குடியுரிமை பெற்றவர். ஏற்கனவே திருமணமாகி விவாகரத்து பெற்றவர். அமெரிக்க ஹாலிவுட்டில் நடிகையாயிருந்தவர். விளம்பரங்களில் இடம்பெற்ற ஒரு மாடல் ஆவார்

இவர்தான் ஐக்கிய இராச்சிய இராஜ குடும்பத்தில் இணைந்த முதலாவது கலப்பு இனத்தவர் ஆவார். இவரின் தந்தை, அமெரிக்காவைச் சேர்ந்த ஒரு வெள்ளை இனத்தவர், இவரின் தாயார் ஆப்பிரிக்க இனத்தைச் சேர்ந்த அமெரிக்கராவார். இவர் தன்னை ஒரு கறுப்பு இனப் பெண்மணி என்று கூறிக்கொள்வதில் பெருமையடைபவர்.

இவர்களின் திருமண வைபவமே சிறிய சலசலப்புடன்தான் நடந்தேறியது. வழக்கமான ஐக்கிய இராச்சிய அரச குடும்பத் திருமணங்கள் ஆங்கில கிறீஸ்தவ பாதிரிமாரால் நடத்தப்படும். ஆனால் இவர்களது திருமணம் கறுப்பு இனப் பாதிரியொருவரால் இவஞ்சலிக்கல் சேர்ச் எனும் முறையில் கிறீஸ்தவ பாடல்களுடன் கூடிய நிகழ்வாக இருந்தது. அத்துடன் வழக்கம் போலல்லாது அப்பாதிரியாரின் வைபவப் பேச்சு நீண்ட நேரத்திற்கு நிகழ்ந்தது, பலரின் புருவத்தையுயர்த்தியது. இத்திருமண வைபவத்தில் மணமகளான மெகன் மார்க்கல் அவர்களின் விருப்பமே முதலிடம் பெற்றது என்பது குறிப்பிடத்தக்கது.

இன்றைய உலகம் பல மாற்றங்களுக்கு உள்ளாகி வருகிறது. காலத்தின் கட்டாயமாக இங்கிலாந்து அரச குடும்பமும் காலத்திற்கேற்ப தம்மை மாற்றிக்கொண்டால்தான் தம்மைத் தக்க வைத்துக் கொள்ளலாம் என்பது உண்மையே. அதற்கேற்ப அவர்கள் தமது நிர்வாகத்தில் மாற்றங்களைச் செய்து வருகிறார்கள் என்பதும் உண்மையே.

ஆனால் இம்மாற்றங்கள் எனும் பெயரில் இக்காலாச்சார விழுமியத்தின் அடிப்படையையே ஆட்டிப் பார்க்க முயல்கிறார்களோ எனும் எண்ணம் ஏற்படாமல் இல்லை. மெகன் மார்க்கல் அவர்களின் வருகை, அரச குடும்பத்தினுள் பல சிக்கல்களை உருவாக்கியுள்ளது. முதலாவதாக இளவரசர் சார்ல்ஸ்க்கு அடுத்து முடியுரிமை கொண்டவரான இளவரசர் வில்லியம் அவர்களுக்கும் அவரது சகோதரர் இளவரசர் ஹாரிக்கும் இடையிலான உறவில் சிறு விரிசல் விழுந்துள்ளது என்கிறார்கள், அரச அவதானிகள். இரு சகோதரர்களும் இணைந்து நடத்திய தன்னார்வத் தொண்டு நிறுவனத்திலிருந்து இளவரசர் ஹாரி தாம் விலகிக் கொள்வதாகக் கூறியது இதற்குச் சான்றாகிறது.

ஐக்கிய இராச்சியத்தின் வெள்ளை இனத்தவரிடையே தேசியவாத மனப்பான்மை கொண்ட பலர் இருக்கிறார்கள். ஐக்கிய இராச்சியம் உலகில் பல நாடுகளை வெற்றிகொண்டு உலகின் அதிமுக்கிய நாடாக வலம் வந்த நாட்களே தமது நாட்டிற்குப் பெருமை சேர்த்தவை என்றே இவர்கள் எண்ணுகிறார்கள். தேசியவாதத்திற்கும், இனவாதத்திற்கும் உள்ள எல்லைக்கோடு மிக மெல்லியதே.

இத்தகைய மனப்பான்மை கொண்டவர்கள் மனத்தில் தமது இராஜ குடும்பத்தின் மீது கொண்டிருக்கும் அபிமானம், ஒரு பக்தி என்றே கூறலாம். அந்த இராஜ குடும்பம், கலப்பில்லாத ஒரு வெள்ளை இனத்தவரின் வெளிப்பாடு என்பதில் இவர்களுக்குப் பெருமை இருந்தது.

ஐக்கிய இராச்சியத்தில் பல இனத்தவர் குடியேறி இன்று அது ஒரு பல்கலாச்சார நாடாகக் கருதப்பட்டாலும் தமது இராஜ குடும்பம், தமது நாட்டின் தனித்தன்மையைப் பழமையை எடுத்துக் காட்டுகிறது என்றே அவர்களின் எண்ண ஓட்டமாக இருக்கிறது

இந்நிலையில்தான் இளவரசராக இருந்த ஹாரி, இராஜ குடும்பத்தின் ஒரு முக்கிய உறுப்பினர், ஒரு கலப்பு இனத்துப் பெண்மணி, அதுவும் தன்னைக் கறுப்பு இனப்பெண்மணி என்று இனங்காட்டிக் கொள்ளும் ஒரு பெண்ணான மெகன் மார்க்கல் அவர்களை மணமுடித்து இராஜ குடும்பத்தில் இணைத்துள்ளார்.

வெள்ளை இனத்தவரின் மேன்மையே தமது தேசியவாதத்தின் அடிப்படை எனக் கொண்டவர்களால் இதனை ஜீரணிக்க முடியுமா என்ன? மெகன் மார்க்கல் பற்றிய விமர்சனங்கள், அவரின் பின்னணி, குடும்ப உறுப்பினர்களின் கருத்து எனப் பலதரப்பட்ட விடயங்கள் ஊடகங்களிலே ஆராயப்பட்டன.

இவை ஒருபுறமிருக்க, புதிதாய் இராஜ குடும்பத்தில் இணைந்துகொண்ட மெகன் மார்க்கல் அவர்களின் செயற்பாடுகள் இவ்வூடகத்துறையின் விமர்சனங்களுக்கு வலுச் சேர்ப்பவையாக இருந்தன, இந்தக் குடும்பத்தில் தான் ஒரு வித்தியாசமானவராக நடப்பதற்கு எத்தனித்தார். இராஜ குடும்பத்தின் காலந்தோறும் கடைப்பிடிக்கப்பட்ட பொது நடைமுறைகளை விமர்சித்து தான் அதனை ஏற்றுக்கொள்ளாதது போன்ற செயற்பாடுகளை முன்னெடுத்தார்

இளவரசர் ஹாரியும் தம் மனைவியின் விருப்புக்கு எதிராக நடக்க விரும்பாதவராக, தானும் இராஜ குடும்பத்தின் அடையாளங்களிலிருந்து தன்னை விலக்கிக்கொள்ளும் முயற்சிகளில் ஈடுபட்டார்.

இளவரசர் ஹாரி, போரினால் அங்கவீனர்களாக்கப்பட்ட முன்னாள் போர்வீரர்களை உள்ளடக்கிய மாற்றுத் திறனாளிகளுக்கான விளையாட்டுப் போட்டியை ஆரம்பித்து, அதனை வெற்றிகரமாக நடத்தி வருகிறார். அவ்வமைப்பின் தூதுவராகச் செயற்படுகிறார். அதேபோல மெகன் மார்க்கல் ஆப்பிரிக்க நாட்டின் வறுமை ஒழிப்புக்கான நடவடிக்கைகளில் தன்னை ஈடுபடுத்திக் கொண்டுள்ளார்.

இந்நிலையில் இத்தம்பதியருக்கு ஆண்குழந்தை ஒன்று பிறந்தது. மெகன் மார்க்கல் அவர்களைப் பற்றி ஒரு சாராருக்கு விமர்சனங்கள் இருந்தாலும் இராஜ குடும்பத்தின் புதிய வரவினை , வம்ச விருத்தியை நாடு முழுவதும் கொண்டாடியதோடு உலக நாடுகளும் மிகவும் ஈடுபாடு கொண்டு நிகழ்வுகளை அவதானித்தன.

வழக்கமாக கிறிஸ்துமஸ் பண்டிகை சமயத்தில் இராஜ குடும்பத்து உறுப்பினர்கள் அனைவரும் மகாராணியார் இல்லத்தில் ஒன்றுகூடுவார்கள். மெகன் மார்க்கல் அவர்களின் வரவு, இக்கலாச்சார நடைமுறைக்கு முட்டுக்கட்டையானது. முதன்முறையாக இளவரசர் ஹாரி, மெகன் மார்க்கல் அவர்களது குழந்தை கிறிஸ்துமஸ் சமயத்தை, மெகன் மார்க்கல் வளர்ந்த நாடான கனடாவில் 2019ஆம் ஆண்டு கழித்தார்கள்.

இதைப் பற்றிப் பல கருத்துகள் ஊடகங்களில் விவாதங்களாகவும் விமர்சனங்களாகவும் இடம்பெற்றன..

இதைத் தொடர்ந்து இளவரசர் ஹாரியினதும், மெகன் மார்க்கலினதும் அறிவித்தல் தான் அனைவரின் மனங்களையும் ஆச்சரியத்தில் ஆழ்த்தியது. தான் இராஜ குடும்ப சம்பிரதாயங்களிலிருந்து முற்றாக விலகப் போவதாகவும், இராஜ குடும்ப உறுப்பினர்கள் அல்லாமல் சாதாரண மனிதர்களாகத் தமது எஞ்சிய வாழ்க்கையை முன்னெடுக்கப் போவதாகவும் அறிவித்தார்கள்.

தமக்கான தமது உத்தியோக இல்லத்தை 25 மில்லியன் பவுண்ட்ஸ் கொடுத்து திருத்தியமைத்தார்களே அது பொதுப் பணமல்லவா? எப்படி அவர்கள் திடீரென இப்படி அறிவிக்கலாம் என்றெல்லாம் விமர்சனங்கள் எழுந்தன. அப்பணத்தைத் தாம் திரும்ப அரசாங்கத்துக்கு அளிக்கப் போகிறோம். அத்தோடு இனி தமது சொந்தப் பணத்தில்தான் வாழ்க்கை நடத்தப்போகிறோம் என்று அறிவித்து தாம் கனடா தேசத்தில் வாழ்வை அமைத்துக்கொள்ளப் போவதாக அறிவித்தார்கள்..

இவ்வறிவித்தல்களுக்கு உத்தியோகப்பூர்வமாக பதிலிறுக்க வேண்டிய நிலைக்கு மகாராணியார் தள்ளப்பட்டார். இளவரசர் ஹாரியினதும், அவரது மனைவியினதும் விருப்பத்தைப் புரிந்து கொள்கிறோம். இளவரசர் ஹாரி உத்தியோகப்பூர்வமாக தாம் இராஜ குடும்பத்தினர் எனும் அடையாளத்தை உபயோகிக்க முடியாது என்று அறிவித்தார்கள். ஹாரி அவர்கள், இராஜ குடும்பத்தின் சார்பாகப் பங்கு கொள்ளவிருக்கும் அனைத்து உத்தியோகப்பூர்வமான நிகழ்வுகளிலிருந்தும் ஒதுங்கிக்கொள்கிறார் என்றும் அறிவித்தார்.

அனைத்தும் ஓரளவு சுமூகமாக நடந்தேறி விட்டது என்று இருக்கும்போது சிலநாட்களின் முன்னாள் இளவரசர் ஹாரியினதும் அவர் மனைவியினதும் பெயரில் வெளியிடப்பட்ட அறிக்கை திரும்ப சர்ச்சையைக் கிளப்பி விட்டிருக்கிறது. தம்மை இராஜ குடும்பத்தினர் அதாவது ஆங்கிலத்தில் Royals என்றழைக்க முடியாது என்று சொல்லும் உரிமை, இராஜ குடும்பத்துக்கு இல்லை என்று அந்த அறிக்கை கூறியதோடு, இராஜ குடும்பத்தின் தூரத்து உறவுகளே தம்மை இராஜ குடும்பத்தினர் என்று அழைக்கும்போது நாம் அழைப்பதில் என்ன தப்பு என்கிறார்கள்.

இத்தனையையும் மெளனமாக எதிர்கொண்டு எந்த விதமான கருத்துகளையும் பொதுவில் கூறாமல் அனைத்தையும் சாதுரியமாக நாகரீகமாக கையாண்டு கொண்டிருக்கும் 93 வயதான எமது எலிசபெத் மகாராணியார் இராஜதந்திரத்துக்கே ஓர் எடுத்துக் காட்டாகிறார்.

இளவரசர் ஹாரியின் நடவடிக்கைகளுக்குக் காரணமிருக்கலாம். அவரது அன்னையும், இளவரசர் சார்ல்ஸ் அவர்களின் முன்னைநாள் மனைவியும் மறைந்தவருமான லேடி டயானா அவர்களின் மீதான தொடர்ந்த ஊடகங்களின் ஆர்வமும், விமர்சனங்களுமே அவரது மறைவுக்குக் காரணம் என்று கருதப்படுகிறது. தன்னுடைய மனைவியும், குழந்தையும் அத்தகைய ஒரு ஊடகத் தாக்குதலுக்கு உள்ளாகக் கூடாது என்பதே அவரது நோக்கமாக இருக்கலாம். அது நியாயமானதாகக் கூட இருக்கலாம்.

ஆனால் இங்கே பல கேள்விகள் முன்னெடுக்கப்படுகின்றன.

ஐக்கிய இராச்சியத்தின் இராஜ குடும்பம் என்பது ஒரு சாதாரண கலாச்சார விழுமியமில்லை. நாட்டின், மக்களின், கலாச்சாரத்தின் முதுகெலும்பாகத் திகழ்கிறது. வெளிநாட்டவரின் ஐக்கிய இராச்சியத்தின் மீதான பார்வைக்கு ஓர் அத்திவாரமாகிறது. இத்தகைய ஒரு குடும்பத்தோடு இணையும் போது அதனோடு சேர்ந்து வரும் ஊடகங்களின் உபத்திரவத்தை எதிர்பார்க்காமலா மெகன் மார்க்கல் அவர்கள், இளவரசர் ஹாரி அவர்களை மணமுடிக்க விரும்பியிருப்பார்?

ஒருநாட்டின் பாரம்பரிய கலாச்சார விழுமியத்துடன் இணைகையில் தாமும் அந்நாட்டினுடன் தம்மை இணைத்துக்கொள்கிறோம் என்பதை அறியாமலா மெகன் மார்க்கல் இருந்திருப்பார்?

இதையெல்லாம் அறிந்துகொண்டு ஐக்கிய இராச்சியத்தின் இளவரசரரை மணந்துகொண்ட மெகன் மார்க்கல், அக்குடும்பத்தின் நல்ல மருமகளாக அக்குடும்பப் பெருமைகளைக் காப்பாற்ற முடியாமல் தமது இச்சைக்கு ஏற்ப, தொன்மை மிக்க இராஜ குடும்பத்தினையே மாற்றியமைக்க முயல்வது போலத் தென்படுகிறது.

இத்தகைய செயற்பாடுகள் நடுநிலையாக இருக்கும் வெள்ளை இனத்தவர் பலரைக்கூடக் கொஞ்சம் இனவேற்றுமை எனும் நிலைக்குத் தள்ளுகிறது. இதுவரை தமது விதிமுறைகளைக் கடைப்பிடித்து வந்த இராஜ குடும்பத்தினுள் நுழைந்த வேற்றுநிறப் பெண்மணி, குழப்பத்தை உண்டாக்குகிறார் எனும் வகையில் எண்ணுகிறார்கள்.

இத்தகைய எண்ணம் பொதுவாக நாட்டில் நிலவும் நிறத் துவேஷத்தினை அதிகரிக்கச் செய்கிறது போலவும் தோன்றுகிறது. நாட்டில் கலக்கும் வேற்று இனத்தவரால் நாட்டின் பாரம்பரியத் தன்மை மாற்றப்படுகிறது எனும் இவர்களது வாதத்துக்கு வலுச் சேர்க்கிறது.

ஐக்கிய இராச்சியத்தின் இராஜ குடும்ப அமைப்பினை முற்றாகக் கலைத்து விடவேண்டும் எனும் கருத்துக் கொண்ட பலர், அரசியல்வாதிகள் உட்பட இருக்கிறார்கள். ஹாரி தம்பதியினரின் செயற்பாடு அவர்களுக்கெல்லாம் மேலும் உந்துசக்தியாக இருக்கப் போகிறது.

இந்தச் செயற்பாடுகளின் விளைவுகளை நாம் பொறுத்திருந்துதான் பார்க்க வேண்டும். ஒரு நாட்டின் கலாச்சாரமே அதன் மக்களின் செயற்பாடுகளுக்கு அடிப்படையாகிறது. அத்தகைய வழியில் சட்ட திட்டத்தை மதிக்கும் ஒரு சமூகத்தை வளர்த்தெடுக்க உதவிய கலாச்சார அடிப்படையை அழித்துவிடுவது அந்நாட்டின் அத்திவாரத்தையே அசைத்துப் பார்ப்பது போலாகாதா?

எது எப்படியிருப்பினும் தமது அறிவித்தலை இவர்கள் தெரிவித்தது ஒரு சரியான நேரமா? எனும் கேள்வி எழத்தான் செய்கிறது.

நாடு ப்ரெக்ஸிட் எனும் ஒரு நிகழ்வுக்கு முகம் கொடுத்து ஐரோப்பிய ஒன்றியத்திலிருந்து வெளிவந்துள்ளது.

நாட்டின் மக்களிடையே இந்நிகழ்வு கொடுத்த பிரிவினையின் அதிர்வலைகள் இன்னும் ஓயவில்லை.

ப்ரெக்ஸிட் எனும் நிகழ்வு ஏற்படுத்திய ஒரு இனத்துவேஷ உணர்வு இன்னும் கொழுந்து விட்டு எரிந்துகொண்டிருக்கிறது. இம்முடிவில் மெகன் மார்க்கல் வகித்த பங்கு, எரிகின்ற இந்த இனத்துவேஷ நெருப்பில் எண்ணெய் வார்ப்பது போலாகாதா?

இராஜ குடும்பக் கலாச்சாரக் கட்டுப்பாடுகளில் இருந்து ஒதுங்கிக்கொள்வது இளவரசர் ஹாரியினது தனிமனித உரிமைக்கு உட்பட்டது என்றாலும் இதனை இக்காலக்கட்டத்தில் கொஞ்சம் தவிர்த்து தமது இராஜ குடும்பத்து ஈடுபாட்டைக் கொஞ்சம் கொஞ்சமாகக் குறைத்து மெதுவாக இதனைச் செய்திருக்கலாம்.

இந்தத் தலைமுறை, கொஞ்சம் தடுமாறத்தான் செய்கிறதோ?