வல்லமை

Blog

  • மீன்- கயற்கண்ணி- உத்தர கோசமங்கை

    மீனாட்சி பாலகணேஷ்

    வேத விற்பன்னர்கள் அமுதமென வேதத்தினை சுருதிசுத்தமாக ஓதியருளுகின்றனர். ஓமப்புகையும் தீச்சுவாலைகளும் வானளாவ எழுந்து திகழ்கின்றன. சிவபிரானும் பார்வதி அன்னையும் அருவமாக எழுந்தருளி அந்த அர்ப்பணிப்பை ஏற்றுக்கொண்டு மக்களை ஆசிர்வதிக்கின்றனர். வேதகோஷத்தின் இனிமையில் தோய்ந்த அன்னை உமையவள் ஐயனை நோக்கிக் கேட்கிறாள்: “ஐயனே! இவ்வேதத்தின் உட்பொருள் யாது? தேவரீர் எனக்கு விளக்கியருள வேண்டும்,” என்கிறாள்.

    முடிவில்லாத சொக்கவைக்கும் பேரழகனும் ஆலவாய் நகரின் இறைவனுமாகிய சோமசுந்தரக்கடவுள், அனைத்துலகங்களையும் கருப்பெறாதீன்ற கன்னியாகிய அங்கயற்கண்ணி அம்மையுடன் ஏகாந்தமான ஓரிடத்தில் அமர்ந்துகொண்டு அவளுக்கு வேதத்தின் உட்பொருளை விளக்கத் துவங்குகிறான். என்ன காரணத்தினாலோ உமையவளின் முழுக்கவனமும் அவ்வமயம் அதனைக் கேட்பதில் செல்லவில்லை. மிகவும் முக்கியமானதொரு விஷயத்தை ஒருவர் நமக்குக் கூறும்போது நாம் அதனில் கருத்தைச் செலுத்த வேண்டுமல்லவா? வேதங்கள் அதிரகசியமானவை. அவற்றைக் கருத்தொருமித்துக் கேளாமல் அம்மை அவ்வாறு கருத்தைச் சிதறவிட்டதனால் சிவபிரானுக்குச் சினம் மூளுகிறது.

    “நீ அஞ்ஞானம் நிறைந்த உள்ளத்து மகளிர் போன்று நம்மிடத்துப் பராமுகம் கொண்டு சிரத்தையின்றி இவ்வேதத்தைக் கேட்டாய். ஆகவே மன்னிக்கவியலாத தவறு செய்தவளாவாய். இதனால் (நோன்பும் அறனும் இன்றி) தருமநிலையில் ஒழுகாமல் மீன்களைப் பிடித்துக் கொலைபுரியும் செயலைச் செய்தலால் இழிந்தவர்கள் என்று கருதப்படும் பரதவர் குலத்தில் அவர்கள் மகளாகப் பிறக்கக் கடவாய்,” எனச் சாபமிட்டார்.

    rajam_med

    இங்கு ஒன்றினை நோக்க வேண்டும். இறைவன் சொற்களில் பரதவர் குலம் இழிந்தது என்று கூறியது எதனால்? அவர்கள் பிறப்பால் இழிந்தவரல்லர். செயலால் மட்டுமே இழிந்தவர்கள். இறைவனின் படைப்பில் மீன்களும் ஓர் உயிரினமே எனும் எண்ணமின்றி, நோன்பு- அறமாகிய தருமம், அருள் எண்ணம் ஆகியன இன்றி அவைகளைப் பிடித்து உண்பதற்காகக் கொலை செய்வோர் அவர்கள். இதனாலேயே அவ்வாறு கூறினார்.

    ‘விரதமு மறனு மின்றி மீன்படுத் திழிஞ ரான

    பரதவர் மகளா கென்று பணித்தனன்…’ என்பார் பரஞ்சோதி முனிவர்.

    (திருவிளையாடல் புராணம்)

    அம்மை பதைபதைத்து, “நான் உம்மைப்பிரிந்து இருப்பது எப்படி? இதற்கென்ன விமோசனம்?” எனக்கேட்க, இறைவனும், “நீ பரதவர் மகளாகப் பிறந்து வாழுங்காலை நாம் அங்கு வந்து உன்னை மணம் புரிவோம்,” எனக் கூறியருளினார்.

    அன்னையைக்காண ஓடோடி வருகிறான் விநாயகப்பெருமான். இதனைப் பற்றியறிந்த அவர் இவ்வேத நூல்களால் தானே இந்நிகழ்ச்சியனைத்தும் நடைபெற்றது?” எனச் சினங்கொண்டு அங்கிருந்த சுவடிகளையெல்லாம் துதிக்கையால் அள்ளி ஒருசேரக் கடலில் வீசியெறிந்தான். கிரவுஞ்சமலையைப் பிளக்க வேலேறிந்த முருகக்கடவுளும் தன் தந்தையின் திருக்கரத்திலிருந்த சிவஞானபோதம் எனும் நூலைப் பிடுங்கிக் கடலில் வீசினான். அன்னையை ஓடோடிச் சென்று அன்புமீதூர அணைத்துக்கொண்டான் முருகன்.

    ‘வரைபக வெறிந்த கூர்வேல் மைந்தனுந் தந்தை கையில்

    உரைபெறு போத நூலை யொல்லெனப் பறித்து வல்லே

    திரைபுக வெறிந்தான்…..’ (திருவிளையாடல் புராணம்)

    இப்போது சோமசுந்தரக்கடவுள் நந்திதேவரைப் பார்த்துச் சினம்கொண்டார்.

    “நாம் உமையுடன் தனித்து உரையாடும்போது நீ எவ்வாறு குழந்தைகளை உள்ளே புக அனுமதித்தாய்? அதனால்தானே தீங்கு விளைந்தது. ஆதலால் நீ சுறாமீன் வடிவெடுத்து கடலில் கிடந்துழலக் கடவாய்,” எனச் சபித்தார்.

    வேழமுகனைச் சபித்தால் அச்சாபத்தின் வலிமை தன்னையே வந்தடையுமென்றெண்ணி அவரை ஒன்றும் கூறவில்லை. முருகப்பெருமானை, “வணிகர் மரபில் ஊமையனாகத் தோன்றக் கடவை,” எனவும் சபித்தார் சிவபிரான்.

    சாபத்தின் விளைவினால் உமையம்மை பரதவர்குல மகளாகப் பிறந்து அழகு திகழ வளர்ந்தாள். நந்திதேவரும் சுறாமீன் வடிவுகொண்டு கடலில் உழலுவாராயினார். அச்சுறாமீன் கடலைக்கலக்கி கலங்கள், மீன்பிடிக்கும் பரதவர் யாவருக்கும் மிக்க துன்பத்தை விளைவித்தது. அதனைப் பிடிக்க இயலாது வருந்திய பரதவர் தலைவன், “இச்சுறாவைப் பிடிப்பவருக்குத் தன் மகளை (அவ்வாறு வந்து பிறந்திருந்த உமையம்மையை) மணஞ்செய்து கொடுப்பதாக அறிவித்தான். சிவபிரான் ஓர் இளம் வலைஞனாகக் கோலங்கொண்டு வந்து சுறாமீனைப் பிடித்துப்பின் உமையம்மையின் கரம் பற்றினார்.

    தனது துணைவியான அம்மையுடன் சிவனார் இடப ஊர்தியின்மீது எழுந்தருளிக் காட்சி தந்தார். சுறாமீனாக உருவெடுத்திருந்த நந்தியெம் பெருமானும் அவ்வடிவு நீங்கி, தம் இடப வடிவுடன் தோன்றினார். பரதவர் தலைவனுக்கு இவ்வாறு பேரருள் புரிந்த சிவபிரான் உமையம்மையுடனும் நந்திதேவருடனும் உள்நிறை அன்பரோடும் உத்தரகோச மங்கை எனும் திருத்தலத்தை அடைந்தான்.

    அங்கு உமையவளான மங்கைக்கு அதிரகசியமான வேதத்தை வாய்மொழியாகச் செவிகளில் புகட்டினான்.

    அங்கிருந் தநாதி மூர்த்தி யாதினான் மறைகள் ஏத்தும்

    கொங்கிருங் கமலச் செவ்விக் குரைகழல் வணங்கிக் கேட்ப

    பங்கிருந் தவட்கு வேதப் பயனெலாந் திரட்டி முந்நீர்ப்

    பொங்கிருஞ் சுதைபோ லட்டிப் புகட்டினான் செவிக ளார.

    (திருவிளையாடல் புராணம்)

    Uthirakosamangai-Emerald

    சிவபிரான் மங்கைநல்லாளாகிய உமையம்மைக்கு வாய்மொழியாக (உத்தரம்) வேதங்களை (கோசம்) உபதேசித்ததனால் இத்திருத்தலம் உத்தரகோசமங்கை எனப் பெயர் பெற்றது. உத்தரம் + கோசம் + மங்கை.

    இத்தலத்தே எழுந்தருளியுள்ள சிவபிரான் மங்களநாதர் எனவும் அம்மை மங்களநாயகி எனவும் போற்றப்படுகின்றனர். இத்தலத்தின்மேல் பெரும்பற்றுக் கொண்டிருந்த மாணிக்கவாசகர் இத்தலத்தை, “பார்மேல் சிவபுரம் போல் கொண்டாடும் உத்தரகோசமங்கை,” எனப் போற்றுகிறார். வாதவூரடிகளின் இருபிறவிகளிலும் இத்தலம் தொடர்புடையது எனத் திருக்கோவில் செய்தி கூறுகின்றது. இத்தலத்தில் அவர் ‘நீத்தல் விண்ணப்பம்,’ ‘திருப்பொன்னூசல்,’ ஆகிய இரு பதிகங்களையும் பாடியருளினார்.

    ‘திரு உத்தரகோச மங்கையில் எழுந்தருளியுள்ள வேதியன், வணங்குபவர் பாவங்களைப் போக்குபவன், அழகே வடிவெடுத்த சிவபிரான், தன்னிடம் உறவு கொண்டாடுபவர்க்கெல்லாம் நெருக்கமாகிறான்,’ என்கிறது ஒரு அழகான பாடல்.

    ‘உன்னற்கு அரியதிரு உத்தர கோசமங்கை

    மன்னிப் பொலிந்திருந்த மாமறையோன் தன்புகழே

    பன்னிப் பணிந்து இறைஞ்ச பாவங்கள் பற்றறுப்பான்

    அன்னத்தின் மேலேறி ஆடும் அணிமயில்போல்

    என்னத்தன் என்னையும் ஆட்கொண்டான் எழில்பாடி

    பொன்னொத்த பூண்முலையீர் பொன்னூசல் ஆடாமோ’

    (திருப்பொன்னூசல்- திருவாசகம்)

    இத்தலத்து அம்மையின்மீது இரு பிள்ளைத்தமிழ் நூல்கள் பாடப்பட்டனவாம். நமக்குக் கிட்டியுள்ளது ஒன்றே! அருமையான பொருள்நயம், சந்தநயம், சொல்நயம் அமைந்த பாடல்களைக் கொண்டு விளங்கும் இந்நூலை இயற்றியவர் யாரெனத் தெரியவில்லை.

    பிள்ளைத்தமிழ் நூல்களில் யாதேனும் ஒரு பருவத்துப்பாடலில் பாட்டுடைத்தலைவன்/ தலைவியின் புகழையோ, சாதனையையோ, அருளையோ கூறுமுகமாக அத்தலத்தின் தலபுராணம் பற்றிய செய்திகளையும் காணலாம். இப்பிள்ளைத்தமிழ் நூலிலும் அவ்வாறமைந்த பாடலொன்று சப்பாணிப்பருவத்தில் காணப்படுகிறது. இது தொடர்பான நிகழ்வை விளக்கவே மேலே திருவிளையாடல் புராணச் செய்தியொன்று கூறப்பட்டது.

    பிள்ளைத்தமிழ் என்ன கூறுகின்றதெனக் காணலாம்:

    கதை தொடர்கின்றது!

    விநாயகனும் முருகனும் இவ்வாறு வேதநூல்களைக் கடலில் எறிந்ததனைக் கண்டு அன்னை உமையாள் உள்ளம் நெகிழ்கிறாள். “என் குழந்தைகளுக்கு என்மீது எவ்வளவு பிரியம்?” எனத் துன்பத்திலும் உள்ளம் களிகொள்கிறாள். “என் முத்தையனே! உனக்கு என்னிடம் இத்துணை அன்பா?” எனக்கேட்பவள் அவனை வாரியணைத்து ஆசையாக முத்தமிடுகிறாளாம். அத்தகைய அன்னையே! உத்தரகோசமங்கை என்னும் திருவூரில் எழுந்தருளியுள்ளவளே! நீ சப்பாணி கொட்டியருளுக! எனப்புலவர் வேண்டுவதாக இப்பாடல் நயம்பட அமைந்துள்ளது. இப்பாடல் இத்திருத்தலத்தின் தலபுரானத்தை நமக்கு விளக்குகின்றது.

    மலைவளைத் திடுமங்க ளேசனை யெனக்கொரு

    மறைப்பொரு ளுரைத்தியென

    மங்கையர்க் கரசிநீ மறவாது கேளென்று

    வசனிக்க வுரைமறந்தே…….

    ……………………………………………………….

    முன்வைத்த புத்தகத்தை

    முன்கிழித் தெறியவுமென் முத்தைய னாமென்று

    முருகனெனு மிளையமகனைத்

    தலைவளைத் தேமுத்த மிட்டபெரு மாட்டியொரு

    சப்பாணி கொட்டியருளே!

    (திரு உத்தரகோசமங்கை மங்களேசுவரி பிள்ளைத்தமிழ்)

    மீனாட்சி க. (மீனாட்சி பாலகணேஷ்)

    {முனைவர் பட்ட ஆய்வாளர், தமிழ்த்துறை,

    நெறியாளர்: முனைவர் ப. தமிழரசி, தமிழ்த்துறை,

    கற்பகம் உயர்கல்வி கலைக்கழகம்,

    கோயம்புத்தூர்- 21.}

    கட்டுரைக்கு உதவிய நூல்கள்:

    திரு உத்தரகோசமங்கை மங்களேசுவரி பிள்ளைத்தமிழ் (நன்றி- ரோஜா

    முத்தையா ஆராய்ச்சி நூலகம்)

    2. திருவாசகம்- மாணிக்கவாசகர்.

    3. திருவிளையாடல் புராணம்- பரஞ்சோதி முனிவர்

    ************

    Share

  • குறளின் கதிர்களாய்…(202)

     

    செண்பக ஜெகதீசன்

     

    கடுமொழியுங் கையிகந்த தண்டமும் வேந்த                                                                 

    னடுமுரண் தேய்க்கும் அரம்.

           -திருக்குறள் -567(வெருவந்த செய்யாமை)

     

    புதுக் கவிதையில்…

     

    கண்டிப்பில் கடுமையான சொல்லும்,

    தண்டனை

    அளவுக்கு அதிகமாவதும்,

    அரசனின்

    வெல்லும் வலிமையெனும்

    இரும்பறுக்கும் அரமே…!

     

    குறும்பாவில்…

    கடுஞ்சொல் கண்டிப்பும், காவலனின்  

    கூடுதல் தண்டனையும், வெல்லுமவன்  

    வலிமை இரும்பறுக்கும் அரமாகும்…!

     

    மரபுக் கவிதையில்…

     

    நாட்டை யாழும் மன்னவர்க்கு

         நல்ல தல்லாக் கொடுஞ்சொல்லும்,

    காட்டிக் கொடுக்கும் வஞ்சகர்க்குக்

         கொடுக்கும் அதிக தண்டனையும்,

    ஆட்டம் காட்டிடும் அரசினுக்கே,

         அரமாய் அவையே அறுத்தழிக்கும்

    ஓட்டம் பிடிக்கப் பகையழிக்கும்

         வலிமை யென்னும் இரும்பினையே…!

     

    லிமரைக்கூ..

     

    கண்டிக்கும் கொடிய சொல்லும்,

    கொடுந்தண்டனையும், மன்னனின் வலிமையாமிரும்பை

    அரமாகி அறுத்துச் செல்லும்…!

     

    கிராமிய பாணியில்…

     

    நல்லதில்ல நல்லதில்ல

    ராசாவுக்கு நல்லதில்ல,

    கோவத்தல சொல்லுற கொடுஞ்சொல்லும்

    குடுக்கிற தண்டனயக்

    கூடுதலாக் குடுகிறதும் நல்லதில்ல..

     

    அதெல்லஞ் சேந்து

    அவுரு செயிக்கிற

    வலிமங்கிற இரும்ப

    அரம்போல அறுத்திடுமே..

     

    அதால,

    நல்லதில்ல நல்லதில்ல

    ராசாவுக்கு நல்லதில்ல,

    கொடுஞ்சொல்லும்

    கூடுதல் தண்டனயும் நல்லதில்ல…!

     

    -செண்பக ஜெகதீசன்…

    Share

  • நல்லதோர் வீணை..!

    நல்லதோர்

     

    நல்வளமாம் நீர்வளமும் நிலவளமும் நிறைந்ததிருநாட்டில்..

    ……….நீதிவழுவாதோர் நாட்டுக்கு நல்லதெனப் பலசொன்னார்.!

    நல்லெண்ணம் கொண்டஞானியரும் முனிவரும் உதித்தநம்..

    ……….நானிலத்தில் நாட்டுப்பற்றுக்கு இனியதிகப் பஞ்சம்தான்.!

    வல்லரசாகும் நம்நாடுமென இளைஞரின் இளநெஞ்சினில்..

    ……….வல்லமை யெனும் விதையன்றே விதைத்தானொருவன்.!

    வெல்லமுடியா மகாகவியாமவன்!கேட்டான் சிவசக்தியிடம்..

    ……….நல்லதோர் வீணைசெய்து புழுதியில் எறியலாமாவென.?

     

     

    நல்லாட்சி நல்குதற்கே நாட்டுப்பற்றுடன் நாளுமுழைத்தார்..

    ……….கல்லுடைத்துச் செக்கிழைத்தார் சிறைக்கும் சென்றார் .!

    பொல்லாத சொப்பனமின்று கண்டாற்போல்நாம் பெற்றது..

    ……….எல்லாமும் மீண்டுமிழக்கும் நாளுமினி வந்துவிடுமோ.?

    சொல்லாட்சி செய்கின்ற சொற்பெருக்கராலே மக்களுக்குச்..

    ……….சேவையொன்று மில்லை நற்சிந்தனையும் இல்லையாம்.!

    பல்லுயிரும் பெறுகின்ற பரமசுகமந்த இயற்கைவளத்தைப்..

    ……….பலருமொன்றாகச் சுரண்ட நினைப்பதுதான் தகுமோ.!

     

     

    தீரன்வீரனென்றும் தியாகியென..தனக்குத்தானேச் சொல்லி..

    ……….தன்பெயருடன் இணைத்துக் கொள்வார் சுயநலவாதிகள்.!

    காரணங்கள் பலசொல்லி சிந்தைமழுங்கும் செயல்தனில்..

    ……….கட்டிளங்காளையரை..கன்னியரைத் தன்பக்கம் இழுப்பர்.!

    பீரங்கி முழங்கப் பெற்றபெருஞ்சுதந்திரம் சீர்குலையும்படி..

    ……….பாரம்பரியமழிக்கவே முயல்வார் நயவஞ்சகத்தார் பலர்.!

    வீரத்தையெழச் செய்யும்தம் பாட்டினால் மீண்டுமொரு..

    ……….வண்ணக் கொடியேந்த பாரதிபோலின்னும் பலர்தேவை.!

     

     

    நல்லதோர் வீணையின் நரம்பிலெழும் நாதம்போல்..

    ……….நம் மனதிலெழும் நல்லெண்ணமாமதை மீட்கவேண்டும்.!

    புல்வனத்திலே தோன்றியதொரு புதியமலரைப் போலவே..

    ……….பாருலகத்தில் பாரதத்தின் தனித்தன்மை ஓங்கிடவேணும்.!

    சொல்லிலேமயங்கிச் சொக்கிநின்று கேடுறும் வாழ்வுநீக்கி..

    ……….செல்லும் நல்லியலார்வழி தோன்றவகை செய்யவேணும்.!

    வல்லுனர்கள்நல் வாழ்வுக்கு வழிவகுத்த வரையரையை..

    ……….வகையாய்க் கற்பதற்கே கல்வியறிவு பெற்றிடல்வேணும்.!

     

    ====================================================================

    நன்றி:: தினமணி கவிதைமணி வெளியீடு::28-01-18

    நன்றி:: கூகிள் இமேஜ்.

     

     

     

    Share

  • வாய்ப்பு

    -ஆ. செந்தில் குமார்

    இது
    திறமைகள் பளிச்சிட
    உதவிடும் திறவுகோல்!
    இது
    அவசரத்திற்கும்  தாமதத்திற்கும்  இடையில் இருக்கும் மணித்துளி!
    இது
    நோக்கமற்றோர்க்கு என்றுமே எட்டாக்கனி!
    நோக்கமுள்ளோர்க்கு உதவிடும் காரணி!
    இது
    ஆண்டியைக்கூட அரசனாக
    மாற்றிடும் வல்லமையுள்ளது!
    இதை
    துணிந்தவன் உருவாக்குவான்!
    இதற்காக
    அஞ்சுபவன் காத்திருப்பான்!
    இதை
    உணர்த்திடும்
    உறுதி கொண்ட எண்ணமும்!
    உற்று நோக்கும் திண்ணமும்!
    இதைப்
    பற்றிக் கொண்டவன்
    வெற்றி கொண்டவனாவான்!
    இதைப்
    பறிகொடுத்தவன் நூலறுந்து
    சுற்றும் காற்றாடியாவான்!

     

     

     

    Share

  • அம்மா…பால்!!

    -நிலவளம் கு.கதிரவன்

    முன்னுரை: –

    பால் என்பது மனிதர்களுக்கு புரதச் சத்தினை வழங்கும் முக்கியமான உணவுப் பொருளாகும். முக்கியமாகக் கர்ப்பிணிப் பெண்களுக்கு மிகவும் ஏற்றதும், பேறுகாலப் பிரச்சினைகளைத் தவிர்ப்பதிலும் முக்கியப் பங்காற்றுகிறது.  இந்தப் பாலானது கர்ப்பிணிப் பெண்களுக்கு எவ்வாறு உதவுகிறது? அதிலும் உயர் பாக்டீரியா பால் இவர்களின் பேறுகாலங்களில் ஏற்படும் ஆபத்தான நோய்களிலிருந்து எவ்வாறு காக்கிறது என்று சமீபத்தில் நார்வே நாட்டில் ஆராய்ச்சிசெய்து வெளியிட்டுள்ளனர்.  அந்த ஆராய்ச்சியில் என்ன சொல்லியுள்ளார்கள்? ஆராய்ச்சி முழுமையானதா? இது பற்றிய அமெரிக்காவின் பார்வை என்ன? தமிழ்நாட்டில் வாழும் இந்தியனாய் நமது நிலைப்பாடு என்ன? என்பது பற்றித்தான் இக்கட்டுரை ஆராய்கிறது.  வாருங்கள் கட்டுரையின் உள்ளே செல்வோம்.

    புரோபயாடிக் பால் (Probiotic Milk) : –

    தற்பொழுது சந்தையில் பல்வேறு நிலைகளில் கொழுப்பு நீக்கிய பால், சமன் செய்யப்பட்ட பால், நல்ல பாக்டீரியா நிறைந்த பால் எனப் பெயரிட்டு விற்பனை செய்து வருகின்றனர்.  சரி, புரோபயாடிக் பால் என்றால் என்ன?  ஒன்றும் இல்லை.  பாக்டீரியாவில் நல்ல பாக்டீரியாவும் உள்ளது;  தீமை செய்யும் பாக்டீரியாவும் உள்ளது.  இதில் நல்ல பாக்டீரியா மட்டுமே உள்ளடக்கிய பாலின் பெயர்தான் உயர் பாக்டீரியா பால் அல்லது நல்ல பாக்டீரியா பால் என்றழைக்கப்படுகிறது.

    இந்த நல்ல பாக்டீரியா பால்… இனிமேல் புரோபயாடிக் பால் என்றே அழைப்போம்.  புரோபயாடிக் பால் கர்ப்பிணிப் பெண்களுக்கு எவ்வாறு உதவுகிறது? கர்ப்பப் பருவ காலங்களில் இப்பாலின் பங்கு என்ன? எவ்வளவு தாய்மார்கள் இப்பாலைத் தினசரி அருந்துகின்றனர்? இதன் விளைவால் கர்ப்ப காலங்களில் கர்ப்பிணிப் பெண்களுக்கு பேறு காலங்களில் ஏற்படும் மாற்றம் என்ன? என்பது பற்றியெல்லாம் மிகச் சமீபத்தில் நார்வே நாட்டில் புதிய ஆய்வு ஒன்றின் மூலம் முடிவுகளை வெளியிட்டுள்ளனர்.

    நார்வே நாட்டின் ஆய்வு :-  

    கர்ப்ப காலத்தில் உயர் பாக்டீரிக்கள் நிறைந்த புரோபயாடிக் பாலை அருந்தி வந்தால், இக்காலங்களில் பெண்களுக்கு ஏற்படும் இரண்டு அபாயங்களை குறைக்கலாம் என்கிறது நார்வே ஆய்வு.

    புரோபயாடிக் பாலை உட்கொண்டு வந்த, குழந்தை உருவாவதற்கு முன் நிலையுள்ள கர்ப்பிணிப் பெண்களுக்கும், இத்தகைய பாலை அருந்தாத கர்ப்பிணிப் பெண்களையும் இணைத்து ஆய்வுசெய்தபோது இவர்களில் புரோபயாடிக் பாலினை அருந்தி வந்த பெண்களுக்கு முன்கூட்டியே அதாவது 37 வாரத்திற்கு முன்னரே ( Preterm Delivery ) குழந்தை பிறக்கும் ஆபத்து பெருமளவில் குறைவு என்பதையும், கர்ப்ப காலத்திற்குப் பின்னர் புரோ பயாடிக் பால் எடுத்துக் கொள்ளும் பெண்களுக்கு ” ப்ரீஎக்ளாம்ஸியாவின் ” ஆபத்து குறைவாக உள்ளதாகவும் ஆய்வாளர்கள் கண்டறிந்துள்ளனர்.

    ப்ரிஎக்ளாம்ப்ஸியா (Preeclampsia) ஆபத்து என்பது கர்ப்ப காலங்களில், கர்ப்பிணிப் பெண்களுக்கு ஏற்படும் உயர் ரத்தஅழுத்தம் மற்றும் சிறுநீரில் அதிக அளவிலான புரதம் என்ற சிக்கல்கள்தான். இதனால் கர்ப்பிணிப் பெண்களின் உடல்நிலை பாதிக்கிறது. இவ்வகையான ஆபத்து உடல் அழற்சி பிரச்சினையோடு (Inflammation) இணைந்துவிடுகின்றபோது முன் கூட்டிய பிரசவம், சுகப் பிரசவமின்மை போன்ற அபாயங்கள் ஏற்படுகிறது.

    இந்நிலையில்தான் இதுபோன்ற ஆபத்துகளைக் குறைக்க புரோபயாடிக் பால் உதவுவதாகவும், இதனால் உடல்அழற்சிப் பிரச்சினை குறைவதாகவும், பேறுகால ஆபத்துகள் பெருமளவில் குறைவதாகவும் ஸ்வீடன் பல்கலைக் கழக மருத்துவர் மஹ்ஸா நார்ட்க்விஸ்ட் கூறுகிறார் .

    நார்வே தாய்மார்கள் மற்றும் குழந்தைகள் கூட்டாய்வு : –

    புரோபயோடிக் பால் சம்பந்தமாக ஆய்வு செய்வதற்கு நார்வே தாய்மார்களில் சுமார் 70,000 கர்ப்பிணிப் பெண்களை ஆய்வுக்கு உட்படுத்தினர்.  இவர்கள் அனைவரும் நீண்ட காலம் இக் கூட்டாய்வில் அங்கம் வகிப்பவர்கள்.  ஆய்வில் ஈடுபட்ட கர்ப்பிணிப் பெண்களிடம் கர்ப்ப காலத்தின் 15 மற்றும் 30ஆவது வார இறுதியில் அவர்களின் உடல்நிலை மற்றும் வாழ்க்கைமுறை பழக்க வழக்கங்களின் தரவுகள் பெறப்பட்டது.  22ஆவது வார முடிவில் அவர்கள் தங்களின் உணவுப் பழக்கவழக்கங்களின் தரவுகளை முன்னரே வழங்கியிருந்தனர்.

    ஆய்வில் கலந்துகொண்ட பெண்களில் கர்ப்பத்திற்கு முன் புரோபயோடிக் பாலை எடுத்துக் கொண்டவர்கள், கர்ப்ப காலத்தின் ஆரம்ப மற்றும் இறுதிக் காலத்தில் என பல கட்டங்களாக இப்பாலை எடுத்துக் கொண்டவர்கள் என பல பிரிவுகளாக பிரித்து கேள்விகள் கேட்கப்பட்டன.  காரணம் இவ்வாய்வில் ஈடுபட்ட ஆய்வாளருக்கு நார்வேயில் பரவலாக புரோபயோடிக் பால் கிடைக்கும் என்பதை நன்கறிந்தவர்.

    ஆய்வில் 23 சதவிகித பெண்கள் கர்ப்பம் தரிப்பதற்கு முன்னர் புரோபயோடிக் பாலை அருந்தியதாகவும், 38 சதவிகித பெண்கள் கர்ப்பம் தரித்த ஆரம்ப காலத்தில்  (கர்ப்பம் தரித்த 13ஆவது வாரம் வரை) புரோபயோடிக் பால் அருந்தியதாகவும், 32 சதவிகிதப் பெண்கள் கர்ப்பம்தரித்த இறுதி காலத்தில் ( 13ஆவது வாரத்திற்கும் 30ஆவது வாரத்திற்கும் இடையில்) நல்ல பாலை அருந்தியதாகவும், இவர்கள் அனைவரும் நாளொன்றுக்குச் சராசரியாக 1.5 கப் எடுத்துக் கொண்டதாகவும் கூறினர்.

    பாதுகாப்புச் சாத்தியமுள்ள விளைவுகள்: –

    ஆய்வின் முடிவில் கர்ப்ப காலத்தின் இறுதியில் புரோபயோடிக் பாலை அருந்தியவர்கள், புரோபயோடிக் பாலை எடுத்துக் கொள்ளாத பெண்களை விட 20 சதவிகிதம் ப்ரிஎக்ளாம்ப்ஸியா ஆபத்து குறைந்தவர்களாக இருந்தனர் என்பதை ஆய்வாளர்கள் கண்டறிந்தனர்.

    அதேபோன்று கர்ப்ப காலத்தின் இறுதி நாட்களில் புரோபயோடிக் பாலை எடுத்துக் கொண்டவர்களுக்கு ப்ரிக்ளாம்ப்ஸியா ஆபத்து அறிகுறிகளான உயர் ரத்த அழுத்தம், சிறு நீரகத்தில் உயர் புரோதம் போன்றவற்றின் பாதிப்புகள் குறைவாக இருந்ததை கண்டறிந்ததாக ஆய்வாளர் நார்ட்க்விஸ்ட் தெரிவித்தார்.

    இவ்வாய்வில் இப்பாலை உட்கொள்ளும் நேரத்தைக் கணக்கிட்டு, குறைப் பிரசவ காலத்தோடு ஒப்பிடப்பட்டது. இதில் ஆரம்ப கர்ப்ப காலத்தில் புரோபயோடிக் பாலை எடுத்துக் கொண்டவர்களுக்கு 21 சதவிகிதம் குறைப் பிரசவப் பிரச்சினை இல்லை என்பதும் தெளிவானதாக ஆய்வாளர் கூறினார்.

    நார்வே ஆய்வின் நீதி : –

    ஆய்வாளர் புரோபயோடிக் பால் சம்பந்தமாக ஆய்வில் ஈடுபட்டது, அவ்வாய்வுக்கு நார்வே தாய்மார்களை அதிக அளவில் பயன்படுத்தியது, அதன் தொடர்ச்சியாக முடிவுகளை வெளியிட்டது என எல்லாம் சரியாக நடைபெற்று, இறுதியில் ஒரு குண்டை தூக்கி போட்டார்.  அதுதான் அவர் ஆய்வின் நீதியாக சொன்னது.

    அதாவது இவ்வாய்வு ஒரு வரம்பிற்கு உட்பட்டே நடைபெற்றதாகவும், புரோபயோடிக் பால் சம்பந்தமான மதிப்பீடு ஏதும் எங்களால் செய்யப்படவில்லையென்றும், உடல்அழற்சி விளைவுகளை (Inflammation) குறைப்பதில், இப்பாலில் உள்ள பாக்டீரியாவின் வீரியத்தை மதிப்பிடவில்லையெனவும் கூறினார்.  கூடுதலாக இவ்வாய்வு காரணம் மற்றும் விளைவுகளை (Cause and effect) நிரூபிப்பதற்கு பதிலாக புரோபயோடிக் பால் மற்றும் கர்ப்பிணிப் பெண்களின் பிரச்சினைகள் என்ற அளவில் மட்டுமே நிகழ்ந்ததாக குறிப்பிட்டார்.

    அமெரிக்காவின் நீதி : –

    இவ்வாய்வின் மீது ஆரம்பத்திலிருந்தே ஆர்வமாக இருந்தவர் வாஷிங்டன் மருத்துவ அறிவியல் பல்கலைக்கழக மகப்பேறு சிகிச்சை நிபுணர் டாக்டர் சூசன் பாத்கேட்.  காரணம் பெரும் எண்ணிக்கையிலான கர்ப்பிணிப் பெண்களிடமிருந்து உணவுத் தகவல்களைப் பெற்று ஆய்வு செய்ததுதான்.  ப்ரிஎக்ளாம்ப்ஸியா ஆபத்துகள் தொடர்பாக இவர் ஆராய்ச்சி செய்தவர் என்றாலும் மேற்கண்ட கள ஆய்வில் இவர் ஈடுபடவில்லை.

    ப்ரிஎக்ளாம்ப்ஸியாவின் அதிக ஆபத்தில் உள்ள பெண்களுக்குத் தங்களின் கர்ப்ப காலத்தின் இரண்டாவது பருவத்தில் அதாவது இரண்டாவது மூன்று மாதங்களில் தினசரி ஆஸ்பிரின் மாத்திரியைக் குறைந்த அளவு எடுத்துக் கொள்ளப் பரிந்துரைப்பதாக டாக்டர். பாத்கேட் கூறுகிறார்.  இது வீக்கத்தை, அழற்சியைக் குறைக்க உதவும் என கருதுவதாகவும் தெரிவித்தார்.

    நார்ட்க்விஸ்ட் குறிப்பிட்டுள்ளபடி ப்ரிஎக்ளாம்ப்ஸியா மற்றும் பேறு காலத்திற்கு முன்னரே பிறக்கும் ஆபத்துகளும், இதற்கான பாதைகள் அழற்சி நோயால் பாதிக்கப்படுதாகவும், இத்தகைய ஆபத்துகள் நஞ்சுக் கொடி வழியாகவும் தோன்ற வாய்ப்பிருப்பதாகக் கூறுகிறார்.

    மேலும் அழற்சி ஆபத்துக்களைக் குறைப்பதன் வழியாக, பேறுகாலப் பிரச்சினைகளையும் குறைக்க முடியும் என்ற அறிவும், தெளிவும் இருப்பதுடன் கர்ப்பிணிப் பெண்களுக்கு மேற்கண்ட சிக்கல்களைத் தடுக்க உதவும் புரோபயோடிக் பாலை அருந்துவதற்கு உரிய பரிந்துரைகள் அளிப்பதற்கு கூடுதல் ஆராய்ச்சிகள் தேவை என்கிறார் டாக்டர் சூசான்பாத்கேட்.  புரோபயோடிக் பால் என்பது நார்வே நாட்டினைப் பொறுத்து மக்களின் பொதுவான உணவுப் பொருள்களில் ஒன்றாக இருக்கலாம்.  ஆனால் அமெரிக்காவில் இவ்வழக்கம் இல்லை என்கிறார்.

    இந்திய நீதி : –

    நார்வே நாட்டு கர்ப்பிணிப் பெண்களிடம் புரோபயோடிக் பால் அருந்துவது  தொடர்பாக ஆய்வினை செய்த ஆய்வாளர் இறுதியில் அந்த பாலின் மீதான ஆய்வு இது இல்லை என்றும், நல்ல பாக்டீரியா மீதான வீரியத்தையும் நாங்கள் ஆய்வு செய்யவில்லை என்கிறார்.  அமெரிக்க பல்கலைக் கழக மருத்துவரோ நார்வே நாட்டில் புரோபயோடிக் பால் என்பது பொதுவான உணவுமுறை என்றும், பேறுகால ஆபத்துகளுக்கும், இப்பாலுக்கும் எவ்விதமான தொடர்பு உள்ளது என்பதை இனி வரும் ஆய்வுகள்தான் தெரிவிக்க வேண்டும் என்று கூறி அமெரிக்காவில் இத்தகைய பழக்கம் இல்லை என்று ஒரே போடுபோட்டுவிட்டார்.

    இப்பொழுது நமது இந்தியத் தாய்மார்கள் என்ன செய்ய வேண்டும்? ஒன்றும் இல்லை மக்களே, தலைப்பை ஒருமுறை படியுங்கள். ம்.. இப்படி அன்போடு தினசரி அழைத்து நம்மிடம் வழங்கும் பாலை நன்றாக காய்ச்சி உறையிட்டுத் தயிராக்கி தினசரி கர்ப்பிணித் தாய்மார்கள் அருந்தினால் பேறுகால ஆபத்துகளை தவிர்க்கலாம்.  காரணம் தயிரில் போலிக் அமிலம் மிகுதியாக உள்ளது.  தவிரவும் யோகர்ட் என்ற இனிப்புத் தயிரினை சாப்பிடலாம்.  இதில் நல்ல பாக்டீரியாக்கள் மிக அதிக அளவில் உள்ளது. இதைத் தவிர இட்லி, தோசை, ஆப்பம், முளை கட்டிய பீன்ஸ், முட்டை கோஸ் என இவை அனைத்திலும் நல்ல பாக்டீரியாக்கள் உள்ளன.

    உடல்அழற்சியை (Inflammation) தவிர்க்க வேண்டுமா? தினசரி 15 நிமிடம் நடைப் பயிற்சி.  நமது பாரம்பரியமான யோகா.  இதைத் தொடர்ந்து செய்து வந்தால் உடல் அழற்சியோ, வீக்கமோ ஏற்பட்டிருந்தால் கூட பெருமளவில் குறைத்துக் கொள்ளலாம். இதுவும் தவிர்த்து சத்தான காய்கறிகள், கீரை வகைகள். அப்புறமென்ன நமக்கு கவலை?

    முடிவுரை : –

    உணவுப் பொருட்களைப் பொறுத்தவரை தினசரி ஆய்வுகள் வந்த வண்ணம்தான் உள்ளன. தொடர்ந்து அதற்கு எதிர்க்கருத்துகளும் வருகிறது.  இதையும் தாண்டிக் கர்ப்பிணித் தாய்மார்களை முன்னிட்டு சர்வ தேச வியாபாரம்.  எனவே இதையெல்லாம் நாம் கணக்கில் எடுத்துக் கொள்ளாமல், நமது பாரம்பரியமான உணவு வகைகளைப் பேணிக் காத்தோமேயானால் கர்ப்ப காலம் வசந்த காலமாகவே அமையும்.

    Share

  • நலம் .. நலமறிய ஆவல் (93)

    நிர்மலா ராகவன்

    உன்னையே மதிப்பாய்!

    நலம்-1-1-1

    நான் ஏனோ இப்படி இருக்கிறேன்! எதையும் உடனடியாகச் செய்யத் தெரியாது!’

    இப்படி வருந்திய ஒரு தோழியிடம், “ உன் குறைகளை ஏன் வெளியில் சொல்கிறாய்?பிறர் கண்டுபிடித்துக் கொள்ளட்டும் என்று விட்டுவிடு,” என்றேன்.

    அடக்கம் என்றெண்ணியோ, இல்லை, மனம் பொருமுவதாலோ, பலர் தம் இயலாமையை வெளியில் சொல்கிறார்கள். பிறர் நம்மை மட்டமாக நினைத்து நடத்த நாமே வழி வகுப்பானேன்!

    நாம் பிறரை மதிக்க வேண்டுமென்றால் முதலில் நம்மையே மதிக்கக் கற்கவேண்டும்.

    `இது கர்வமில்லை?’ என்ற சந்தேகமே வேண்டாம்.

    இது சுய மரியாதை!  இதில் தற்பெருமை கிடையாது.

    கதை

    கேட்பவருக்கெல்லாம் உதவி செய்யும் தனது நற்குணத்தைப்பற்றி கவினுக்குக் கொள்ளைப்பெருமை. `இந்தக் காலத்தில் யார் இப்படி இருக்கிறார்கள்!’ என்று பார்ப்பவரெல்லாம் புகழ்ந்தார்கள்.

    ஒருநாள் விளையாடும்போது அவன் காலில் அடிபட்டுவிட்டது.  வலியை வெளியில் காட்டிக் கொள்ளவில்லை.

    வழக்கம்போல், அவனுடைய ஆசிரியர் மூன்றாவது மாடியில் தன் புத்தகங்களைக் கொண்டுவைக்கும்படி கூற, அவனும் அப்படியே செய்தான். கால் நன்றாக வீங்கிப்போயிற்று. சில நாட்கள் பள்ளிக்குப் போக முடியவில்லை.

    “காலில் அடி பட்டிருக்கிறது, நடக்க முடியவில்லை என்று ஏன் என்னிடம் முதலிலேயே சொல்லவில்லை?”  என்று ஆசிரியர் கடிந்துகொண்டார்.

    “பிறருக்கு நல்லவனாக இருக்க உனது நலனைத் தியாகம் செய்யக்கூடாது!இப்போது கஷ்டப்படுகிறாய், பார்!” என்று அவன் தாயும் அறிவுரை கூறியவாறு அங்கலாய்த்தாள்.

    நம்மை நாமே மதிக்க வேண்டுமென்றால், நம்மிடமோ, அல்லது பிறரிடமோ, `இப்போது முடியாது!’ என்று (மரியாதையுடன்தான்!) சொல்லும் தைரியத்தை வளர்த்துக்கொள்ள வேண்டும்.

    கதை

    குடும்பத்தில் எல்லாரும் ஒரு திரைப்படத்திற்குப் போனபோது எனக்குப் பரீட்சை சமயம்.

    “நீயும் வாயேன்! ஒரு நாளில் என்ன வந்துவிடப் போகிறது!” என்று எனக்கு ஆசை காட்டினார்கள்.

     “படிக்கணும்,” என்று அரைமனதாக முணுமுணுத்தேன்.

    நான் ஏதும் கூறுமுன், என் சித்தி, “அவள் என்னைமாதிரி! வேண்டாம் என்றால் வேண்டாம்தான்!” என்றாள்.

    படித்து, பெரிய உத்தியோகத்தில் இருப்பவள்! அவளைப்போல் நான் இருக்கிறேனாமே! `நம்மைப்பற்றி ஒருவர் இவ்வளவு நல்ல அபிப்ராயம் வைத்திருக்கிறாரே! அதை நாமே கெடுத்துக்கொள்ளலாமா?’ என்று தோன்றிப்போயிற்று. அப்போது எழுந்த பெருமையில், எனக்கு வெளியே போய்,நேரத்தை உல்லாசமாகக் கழிக்கத் தோன்றவில்லை. சபலமாக இருந்தாலும் அடக்கிக்கொண்டேன். சுய கட்டுப்பாடு வந்தது.

    எல்லாரையும் மதிக்க வேண்டும், ஆனால் ஒருவரது பணிவோ, அடக்கமோ பலவீனம் என்று துச்சமாக நினைப்பவர்களை ஏற்காமல் விலகி இருக்க வேண்டும் என்று புரிய ஒரு சம்பவம் வாய்த்தது.

    கதை

    பள்ளித் தலைமை ஆசிரியர் பழனியப்பன்  தம் வீட்டில் பசு மாடுகளை வளர்த்து,எங்களுக்குப் பால் விற்று வந்தார்.

    கன்று ஈன்றிருந்த மாட்டின் பாலை அவர் கொடுத்துவிட, என் தாய் அதை திருப்பி அனுப்பிவிட்டாள், என் உடம்புக்கு ஆகாது என்று. நானும் பிள்ளை பெற்றிருந்த சமயம் அது.

    ஒரேயடியாகக் கோபித்து, பால் அனுப்புவதை நிறுத்திவிட்டார் பழனியப்பன். சில மாதங்கள் கழித்து, நான் நேரில் விசாரிக்கப் போனேன்.

    ஒரேயடியாக இரைய ஆரம்பித்தார். ”வேண்டாம் என்றால் மரியாதையாகஎன்னிடம் வந்து சொல்லியிருக்க வேண்டும். அதுதான் முறை!” இந்த இரண்டாவது வாக்கியத்தை மீண்டும் மீண்டும் சொன்னார். வல்லின றகரம் அவர் வாயில் படாத பாடு பட்டது.

    “அம்மா விளக்கிச்  சொல்லி அனுப்பினார்களாமே!” என்றேன். அச்சமயம் நான் வெளியில் நடமாட இயலாதவளாக இருந்தேன் என்று சொல்லியாயிற்று. அப்படியும் சண்டை பிடித்தால் என்ன செய்வது?

    “நீங்களே வந்து சொல்லியிருக்க வேண்டும். அதுதான் முறை!” என்றார்,விடாப்பிடியாக. இன்னும் சிறிது நேரம் கத்தினார்.

    பொறுக்க முடியாது எழுந்தேன்.

    “எவ்வளவு வேண்டும்?” வந்த வியாபாரத்தை விடுவதா என்ற அக்குரல் அதிகாரமாகஒலித்தது.

    நான் மெல்லத் திரும்பினேன். “வேண்டாம்! உங்களுக்கு எதுக்கு அவ்வளவு கஷ்டம்?”என்றேன் — இனிமையாக.

    அதைச் சற்றும் எதிர்பாராது அவர் திகைத்து நிற்க, விறுவிறுவென்று நடையைக் கட்டினேன்.

    பழனியப்பன்மாதிரி சிறுவர்களிடமும் பெண்களிடமும் அதிகாரமாக நடப்பவர்கள் மேலதிகாரிகளின் முன்னிலையில் கூனிக் குறுகுவார்கள். அவர்களது சுய மரியாதை இடம், பொருள் மற்றும் காலத்தைப் பொறுத்து வளையும். அதனால் அவர்களுக்கே ஏதோ வெறுமை உண்டாக, எப்போதும் விறைப்பாக நடந்துகொள்வார்கள்.

    நான் தகுந்த காரணம் சொல்லியும், ஏதோ பெரிய அவமானத்திற்குத் தன்னைஉள்ளாக்கிவிட்டதுபோல் சண்டை பிடித்தாரே, இதில் என் தவறு என்ன?

    என்னை அவமானப்படுத்த நினைத்தவரின் குற்றச்சாட்டை நான் ஏற்கவில்லை.என் சுயமரியாதை அப்போது வீறுகொண்டு எழுந்திருக்க வேண்டும். நிமிர்ந்த தலையும் நேர்ப்பார்வையும் கொண்டவரைப் பார்த்து மரியாதை ஏற்படுகிறதோ,இல்லையோ, அச்சம் எழும்.

    இவர்களைத் தளரச்செய்ய பிறர் பல உத்திகளைக் கையாள்வார்கள்.

    1      `இந்தமாதிரி நீ சண்டை பிடித்தால் பிறருக்கு உன்னைப் பிடிக்காமல்போய்விடும்!’

    அட, மற்றவர்கள் என்ன வேண்டுமானாலும் நினைத்துவிட்டுப் போகட்டும்! நம்மையே நமக்குப் பிடித்தால்தானே பிறரையும் நம்மால் உண்மையாக விரும்ப முடியும்?

    பிறர் உன்னை மதிக்க, முதலில் நீ உன்னை மதி. 

    குறைகளுடன் நம்மை நாமே  ஏற்பது முதல் படி.  அந்த நிலை வந்தால், பிறரைப் பார்த்து பொறாமை எழாது. எப்போதும் அமைதியாக, மகிழ்ச்சியுடன்  இருக்கலாம்.

    2      `நீ அவளைப்போல், இவளைப்போல், இருக்க வேண்டும்!’

    பிறருடன் நம்மை ஒப்பிட்டுக்கொண்டால், அது நம்மையேதாழ்த்திக்கொள்வதுபோல்தான். பிறர் வித்தியாசமாக இருக்கலாம். அது அவர்கள்குணத்தை, வாழ்க்கைப் பின்னணியைப் பொறுத்தது.

    நான் என்னைப்போல் இருந்தால்தான் அசலாக இருப்பேன். பிறரிடமிருந்துவித்தியாசமாக, சுய சிந்தனையுடன் இருக்க இயலும். இன்னொருவரைப் பின்பற்றி,  எதற்குப் போலி வேஷம்?

    (இசைப் போட்டிகளில், பிரபல பாடகர்களைப்போல் கடும் பிரயத்தனத்துடன் பாடுகிறார்கள் சில இளம்பாடகர்கள். அவர்களைவிட, தம் சொந்தக்குரலில் பாடுகிறவர்களையே நீதிபதிகள் பாராட்டுவது ஏன் என்று அவர்களுக்குப் புரிவதில்லை).

    கெஞ்சாதே!

    கணவனிடம் வதைபட்ட பெண் ஒருத்தியுடன் நான் தொடர்புகொள்ள விரும்புவதாக சமூகநல அதிகாரிகளான என் தோழிகளிடம் தெரிவித்திருந்தேன்.

    அப்படி என்னுடன் வலியப் பேசவந்தவள்தான் திலகா. “என் கணவருக்கு என்னைக் கண்டால் ரொம்பப் பிடிக்கும், என்றாள், பெருமையுடன். “ஆனால், கொஞ்சம் முன்கோபி!”

    `ரொம்பப் பிடித்த கணவர்’ ஒரு மூர்க்கன். உயிர் போகும் நிலையில் அவனால் அடித்து உதைக்கப்பட்டு, காவல் துறையினர் மூலம் சமூகநல அதிகாரிகளின்  பொறுப்பிற்கு வந்தபின்னரும் திலகா இதையேதான் சொல்லிக்கொண்டிருந்தாள்.

    அன்புக்காக ஏங்கி, தன்மானத்தை விடலாமா? அப்படியாவது என்ன இல்லற இன்பம் வேண்டிக் கிடக்கிறது!

    பிறருடன் சுமுகமான உறவு இருக்கவேண்டுமே என்று எந்த அவமானத்தையும் பொறுத்துக்கொள்வது நம்மையே நாம் மதிக்கவில்லை என்பதைத்தான் காட்டுகிறது. நம்முடன் ஒருவரால் ஒத்துப்போக முடியவில்லை என்ற நிலைவரும்போது, நாம் கெஞ்சுவது நம்மையே இழிவு படுத்திக்கொள்வதுபோல்தான் .

    பாதுகாப்பு, பணம், சமூகத்தின் அங்கீகாரம் என்ற ஏதாவது காரணத்துக்காகநைந்துபோன உறவை விடாது பிடித்துக்கொண்டு, கெஞ்சலால் நீடிக்க முயன்றால் மேலும், மேலும் இழிவுபடுத்துவார்கள்.

    “சுயகௌரவத்தை இழப்பதைவிடப் பெரிய இழப்பு வேறொன்றுமில்லை!” (மகாத்மா காந்தி)

    � �{�ҭ��

    Share

  • இன்று ஒரு முகம் கண்டேன்!

    மூலம் : பீட்டில்ஸ் பாடகர்

    தமிழாக்கம் : சி. ஜெயபாரதன், கனடா

     barathan

     

    இன்று ஒரு முகம் கண்டேன்
    கண்டபொழுதை மறக்க முடியமா?
    இருவரும் சந்தித்த இடத்தை
    மறக்க இயலுமா?

    எனக்குத் தகுதி யானவள் அவளே;
    எமது சந்திப்பை
    இந்த உலகம் அறிய வேண்டுமென
    விழைபவன் நான்.
    வேறோர் நாளெனின்  நினைவில் கொள்ளேன்.
    தெரியாமல் போகும்.
    இன்றென் கனவில் தோன்றுவாள்!
    வீழ்வேன்  காதலில்! ஆம் நான்
    வீழ்வேன் காதலில்! 

    மீண்டும்  என்னை அழைக்கிறாள்
    மறுபடி!
    இதுபோல் வேதனை இதுவரை
    எனக்கில்லை!

    தனித்துக் கிடந்தேன்!
    சிலவற்றை நான் இழந்தேன்!
    மற்ற பெண்டிரை  நானினி நோக்கேன்!
    உன்னைப் போல் இல்லை
    அப்பெண்டிர்;

    மீண்டும் என்னை விளிக்கிறாள்
    மறுபடி!
    வீழ்ந்தேன் காதலில்!  ஆம் நான்
    வீழ்ந்தேன் காதலில்! 

     

     

     

    Share

  • வாழ்ந்து பார்க்கலாமே 6

    க. பாலசுப்பிரமணியன்

    தன்னம்பிக்கையில் நாம்  புலியா பூனையா?

    வாழ்ந்து-பார்க்கலாமே-1-1-1-1

    உலகின் மிகப்பெரிய அறிவியல் மற்றும் தத்துவ மேதையான ஆல்பர்ட் ஐன்ஸ்டீன் ஜெர்மனியில் மூனிச் என்ற நகரில் பள்ளியில் படித்துக்கொண்டிருந்த பொது அவருடைய பள்ளி ஆசிரியர் அவருடைய ரிப்போர்ட்டில் ”  இவன் எதையும் சாதிக்க மாட்டான்” என்ற பொருள் படும் வகையில் “He will never amount to anything”என்று குறிப்பிட்டிருந்தார். ஆனால் ஐன்ஸ்டீன் அவர்களின் தன்னம்பிக்கையும் விடாமுயற்சியும் ஆர்வமும் உழைப்பும் அவரை உலக அளவிலே ஒரு மேதையாக முன்னிருத்தியது.

    ஹென்றி போர்ட் அவர்கள் மோட்டார் தொழிற்சாலைக்கான ஒரு வரைபடத்தோடு ஒரு வங்கி அதிகாரியை தொழில் முதலீட்டிற்காகக் கடன் கேட்டு அணுகியபோது “காரா? அதெல்லாம் வேடிக்கைக்கு நல்லதாக இருக்கும். குதிரை சவாரியை யாரால் நிறுத்த முடியும்?’ என்று பொருள்படப் பேசினார் அந்த வங்கி அதிகாரி ஆனால் ஹென்றி போர்டின் தன்னம்பிக்கையும் , வெற்றி பெற வேண்டும் என்ற சாகச உந்துதலும் அவரை வளர்ச்சியின் படியில் வளர்த்துக்கொண்டு சென்றன.

    ஒருவரின் வளர்ச்சிக்கு நம்பிக்கை மிகவும் அத்தியாவசியமானது. “என்னால் முடியும்” என்ற நம்பிக்கையே வெற்றியின் பாதையில் ஒருவரைக் கொண்டு நிறுத்திவிடும். ஆகவே ஒரு குழந்தையின் வளர்ச்சியில் அவர்களின் தன்னம்பிக்கையை வளர்ப்பது மிகவும் தேவையானது. பெற்றோர்களும் ஆசிரியர்களும் இந்த நம்பிக்கையை வளர்ப்பதற்கு ஏதுவான சூழ்நிலைகளை வீட்டிலும் பள்ளிகளிலும் வளர்ப்பது அவசியம். தன்னம்பிக்கை வளருவதற்கு பணமோ அல்லது வளமான சூழ்நிலைகளோ தேவையில்லை. அது மனதில் உள்ளே விதைக்கப்பட்டு வளர்க்கப்படும் ஒரு உன்னதமான உணர்வு.

    “இதெல்லாம் நமக்கு சரிப்பட்டு வராது” என்று முட்டுக்கட்டை போட்டு ஆர்வங்களைத் தடை செய்யும் பொழுது அவைகள் ஆரம்ப நிலையிலேயே துவண்டு கீழே விழுகின்றன. “சாதிப்பதற்கு நல்ல வசதி இருந்தால் தான் முடியும்” என்ற ஒரு கருத்தை இளைஞர்களின் மனதில் வளர்ப்பது அவர்களின் நம்பிக்கையை வித்திலேயே நசுக்கிவிடுவதாக மாறிவிடும். நோபல் பரிசு பெற்ற சர் சி வீ இராமன், இந்திய துணைக்கண்டத்தின் ஏவுகணை மன்னராக விளங்கிய விஞ்ஞானி திரு அப்துல் கலாம் போன்ற பல பேர்கள் மிகச் சாதாரணமான சூழ்நிலைகளில் வாழ்ந்து, உழைத்து முன்னேற்றத்தைக் கண்டவர்கள்தான்.

    மற்றவர்கள் உன்னைப் பற்றி என்ன நினைக்கிறார்கள் என்பதைவிட உன்னைப்பற்றி நீ என்ன நினைக்கிறாய் என்பது மிகவும் முக்கியமானது என்று மனநல வல்லுநர்கள் விளக்குகின்றார். “ஒரு மனிதனின் உருவாக்கம் அவன் சிந்தனைகளால் மட்டுமே. நீ என்ன நினைக்கின்றாயோ அவ்வாறே ஆகின்றாய் எனக் கூறினார்”  அண்ணல் மகாத்மா காந்தி. “பாதுகாப்பற்ற உன் எண்ணங்களை விட உனக்கு ஒரு மிகப் பெரிய எதிரி இருக்கமுடியாது”  என்று அறிவுரை கூறினார் புத்தர். நம்முடைய எண்ணங்களே நம்மை உருவாக்குகின்றன. எண்ணங்களின் வலிமையே செயல்களின் வலிமைக்கு வித்தாகின்றது. நாம் யாருக்கும் சளைத்தவர்கள் அல்ல என்ற எண்ணம் மனதில் உருவாகி விட்டால் நம்மை நாம் மதிக்கக் கற்றுக்கொள்ளுவோம்  எந்த ஒரு மனிதன் தன்னைத் தானே மதிக்கவில்லையோ அவனை நிச்சயமாக மற்றவர்கள் மதிக்க  மாட்டார்கள்.

    உயிரினங்களில் புலியும் பூனையும் ஒரே இனத்தைச் சார்ந்தவைதான். ஆனால் ஒன்றோ வீரத்திற்குச் சான்று., மற்றொன்று பயத்திற்கு அடையாளமாக உலவுகின்றது. இவைகளின் எண்ணங்கள் சிந்தனைகள் காலம்காலமாக அவற்றின் உயிரணுக்களில் உறைந்து அவர்களுடய வாழ்க்கை முறையை நிச்சயப்படுத்தி விட்டன.

    வாழ்க்கையில் சாதனை படைத்த பலரும் எளிய ஆரம்பத்தில் இருந்துதான் வந்திருக்கின்றனர். அவர்களின் வெற்றிகள் அவர்களின் தன்னம்பிக்கைக்கும், சாதிக்க வேண்டும் என்ற ஒரு விடாமுயற்சிக்கும் கிடைத்த பரிசு. இதிலிருந்து நாம் கற்றுக்கொள்ள வேண்டியது என்ன? மற்றவர்களின் வாழ்க்கையிலிருந்து நாம் கற்றுக்கொள்ளலாம் தவிர, அவர்களுடய வாழ்க்கையை நாமும் வாழ முயற்சிக்கக்கூடாது. முயன்றால் நமது வாழ்க்கை தொலைந்து விடும்.

    1. நாம் நாமாக இருக்க முயற்சிக்க வேண்டும்.
    2. நம் மீது நமக்கு நம்பிக்கை இருக்க வேண்டும்.
    3. நாம் திறமையும் தகுதியும் உள்ளவர்கள் என்ற எண்ணத்தை வளர்க்க வேண்டும்.
    4. நம்முடைய முயற்சிகளைத் தொடர்ந்து செய்தல் வேண்டும்.
    5. தோல்விகளைக் கண்டு தயங்காமல் மீண்டும் எழுந்து நிற்க வேண்டும்.
    6. காலத்தால் பழுக்கும் பழத்தைக் கல்லால் அடித்துப் பழுக்க வைக்க முடியாது என்பதை உணர்ந்து பொறுமையும் விவேகத்தையும் கடைப்பிடிக்க வேண்டும்.

    சற்றே துவண்டுவிட்டீர்களா? பரவாயில்லை.! சில நிமிடங்கள் “வெற்றி வேண்டுமா போட்டுப் பாரடா எதிர்நீச்சல்’ என்ற பாட்டை கொஞ்சம் முணுமுத்துக் கொண்டிருங்கள். ஒரு பத்து நிமிடம் கழித்துப் பாருங்கள். எ”உங்கள் எண்ணங்களுக்கு சக்தி அதிகம். அவைகளே உங்களுக்கு ஆற்றலைத் தருகின்றன. உங்கள் எண்ணங்களின் மூலமாக நீங்கள் உங்களுக்குத் தேவையான உலகைப் படைக்கலாம் அல்லது அதை அழிக்கலாம். உங்கள் உலகம் உங்கள் கைகளில் ” என்று பல மேதைகள் எடுத்துச் சொல்லி இருக்கின்றனர். ழுந்து வேகமாகச் செயல்பட வேண்டுமென்று தோன்றுகிறதா…?

    அதுதாங்க வாழ்க்கை.. வாழ்ந்து பார்க்கலாமே .

    (தொடருவோம்)..

    Share

  • ஆன்மீகப் பொக்கிஷம் !

     
    எம் . ஜெயராமசர்மா …. மெல்பேண் … அவுஸ்திரேலியா 
    ஆடைதனைக் குறைத்தார்
    ஆணவத்தைக் களைந்தெறிந்தார்
    நாடிநின்றார் நம்ரமணர்
    நல்வழியைக் காண்பதற்கு
    ஓடிவந்தார் அண்ணாமலை
    ஒடுக்கிநின்றார் மனமதனை
    வாடிவிடா அவரிருந்தார்
    வழங்கிநின்றார் அருளையெலாம் !

    தன்னையே அறிவதற்குத்
    தவமிருந்தார் ரமணரிஷி
    தனிமைதனை இனிமையாய்
    தவமுனிவர் ஏற்றுநின்றார்
    பொய்மையாம் உடலுக்குள்
    மெய்மையைத் தேடிநின்றார்
    மெய்மையை உணர்ந்தவவர்
    மேதினியில் ரிஷியானார் !

    அத்வைத தத்துவத்தை
    அனைவருக்கும் காட்டிநின்றார்
    ஆடம்பரம் அனைத்தும்
    அவர்க்கு வெறுப்பாச்சு
    ஆசைதனைக் குறைத்த
    ஆன்மீகப் பொக்கிஷமாய்
    அகிலமே போற்றும்வண்ணம்
    ஆகிவிட்டார் ரமணரிஷி !

    சொத்துக்கள் சேர்க்கவில்லை
    சுகதுக்கம் நோக்கவில்லை
    சத்தான உணவேதும்
    தானவரும் உண்ணவில்லை
    மாடிமனை ஆடம்பரம்
    மனமதிலும் இருக்கவில்லை
    மாசில்லா வழிதேடி
    மாமுனிவர் தவமிருந்தார் !

    Share

  • மயங்கொலிச் சொற்கள்

    -ஆ. செந்தில் குமார்

    அனையின் அணைப்பு பிள்ளைக்கு இனிமை!
    கனலின் அண்மை பஞ்சிற்கு அன்மை!

    ஊன் கலந்த ஊண் தவிர்த்தல் நலம்!
    கனி உணவே அதனினும் நலமென கணிப்பாய்!

    தண்மதி தண்னென தன்னொளி பாய்ச்சினாலும்
    கனல் கணை தைத்தால் கனைக்கும் பரி!

    காணத்திற்காக கானம் அழித்தால்
    கானலை நாம் காணலாம் என உணர்வாய்!

    சேணையும் சேனையும் கொண்டு வென்றாலும்
    கோன் இல்லா அரசு கோண் ஆகிப்போகும்!

    பொருள் :-
    அனை – அன்னை
    அணை – தழுவுதல்
    கனல் – நெருப்பு
    அண்மை – அருகில்
    அன்மை – தீமை
    ஊன் – மாமிசம்
    ஊண் – உணவு
    கனி – பழம்
    கணி – கணிப்பு
    தண் – குளிர்ந்த
    தன் – தன்னுடைய
    கணை – அம்பு
    கனை – கனைத்தல்
    பரி – குதிரை.
    காணம் – பொன்
    கானம் – காடு
    கானல் – பாலை நிலம்
    காணல் – பார்த்தல்
    சேணை – அறிவு
    சேனை – படை
    கோன் – அரசன்
    கோண் – கோணல்

    குறிப்பு :-
    °°°°°°°°°°

    மயங்கொலிச் சொற்கள் என்பன தமிழில்கிட்டத்தட்ட ஒரே வடிவிலான எழுத்துருக்களை கொண்டவைகளாகவும், முற்றிலும் வேறுபட்ட பொருள் கொண்டவைகளாகவும் காணப்படும். இவ்வகையான சொற்கள் ஒலிப்பின் போது நுண்ணிய வேறுபாடுகளை மட்டுமே கொண்டிருப்பதால் எது சரி, எது தவறு என மயங்க வைப்பவைகளாக இருக்கும். அதனாலேயே இவற்றை மயங்கொலிச் சொற்கள் என்றழைக்கப்படுகின்றன.

    நன்றி : விக்கிபீடியா.

    Share

  • கேசவ் வண்ணம் – கிரேசி எண்ணம்

    180201 - Yadava 17 Vasudev-lr. Krishna kills kamsa and releases Ugrasena (Viveka-or discrimination) from MahaMoha (the great delusion). Then he meets his parents Devaki and Vasudeva. Vasudeva extolls Krishna as the Supreme one.
    180201 – Yadava 17 Vasudev-lr. Krishna kills kamsa and releases Ugrasena (Viveka-or discrimination) from MahaMoha (the great delusion). Then he meets his parents Devaki and Vasudeva. Vasudeva extolls Krishna as the Supreme one.

    ”உக்கிர சேனனவர், அக்கிரமக் கம்சனின்
    வக்கிர புத்தி விவேகமது -சிக்கிட,
    தந்தைதாய் மீட்பு, தகப்பனறிந் தார்கண்ணன்,
    விந்தை புரிகின்ற விஷ்ணு’’….!

    பேருண்மை, மாயப் பெரும்பொய் பிரகிருதி
    வேரொன்றும் இல்லா விருக்ஷமவர் -யாரென்று
    கேட்டால் விளங்காது! ,கேசவ் வரைந்தவரைக்
    கோட்டில் பிடித்துக் கொடுப்பு’’….கிரேசி மோகன்….!

    Share

  • கேசவ் வண்ணம் – கிரேசி எண்ணம்

    180131 -Yadavabhyudayam 16 — Akrura gets darshan of Krishna. It appeared that Narada was singing the glory of Krishna through sAmagana and the cows, seemed like the vedas, smelling his feet. Akrura extolls Krishna. The cowherds including Nanda leave for Mathura on Kamsa’s orders. The gopikas were in a state of grief of separation.
    180131 -Yadavabhyudayam 16 — Akrura gets darshan of Krishna. It appeared that Narada was singing the glory of Krishna through sAmagana and the cows, seemed like the vedas, smelling his feet. Akrura extolls Krishna. The cowherds including Nanda leave for Mathura on Kamsa’s orders. The gopikas were in a state of grief of separation.

     

    ”அக்ரூரர் கண்ணனை ஆராதித் தல்கண்டு

    உக்கிர(நாராயண பக்தியில்) நாரதர் உற்சாகம்: -வக்கிரன்

    கம்ஸனின் ஆணயால் கண்ணன் மதுராவுக்கு

    இம்ஸையில் கோபியர் இங்கு’’….கிரேசி மோகன்….!

    ”உலகை அளந்தோன் உபாசனை கண்டு
    கலக முனிக்கு களிப்பு: -புளுகனால்(பொய்யன் கம்ஸனால்)
    ’’போகாதே போகாதே போக்கிரிப் பையாபார்!
    தேகாபி மானம் தொலைப்பு!’’….கிரேசி மோகன்….!

    கண்ணன் இருந்தாலும் , சென்றாலும் கோபியர் ‘’தேகாபிமானம்’’ தொலைத்தனர்….!

    Share

  • பகவானின் ‘’உபதேச சாரம்’’….!(பாடல்கள் வெண்பாவாக்கம்….)….!

     

    ’’ஈன்று படைக்கும், இறையே பழம்தரும்,
    தோன்றும்உன் செய்கை தொணதொணப்பின் -சான்றிதழே!-
    சும்மா இருந்து சுகிப்பாய் பழத்தினை
    உம்மால் முடிந்தவரை உண்’’….(1)

    ’’கர்ம்மாய்க்(அட கர்மமே!) காயும்(அழுகிடும்) கனியின் பலனது
    கர்மமாம்(கருமம் -செயல்) கடலதில் கொண்டுதள்ளும் -தர்மமாம்
    ஆன்மீக வேகமோ ஆழியில்(கடலில்) மூழ்கிடும்:
    நான்மீகம் கண்டுணர்ந்து நம்பு’’….(2)

    ”சொந்த வெறுப்பு, சுவாதீனம், அற்றசெய்கை
    தந்த பலாபழத்தை தெய்வபதம் -தந்துவிட
    வேரில் பழுத்து விடுதலை தந்திடும்
    மாறா மனத்தில்தூய் மை’’….(3)

     
    ’’சாத்திரங்கள் சொல்யாகம்,தோத்திரங்கள் ஈசர்தீ
    நேத்திரர் , மற்றும் நெடுந்திருமால் -கோத்திரங்கள்
    செய்யுமயன்,ஆழ்நிலை சூஷ்ஷமங்கள்,யாவுமால்
    மெய்,வாய் மனங்கள்,மேன் மை’’….(4)….!

    ’’உலகுக்கு செய்யும் உபகாரம் ஈசர்
    பலகையில் வைத்திடு பூவை : -அலகிலாதோன்
    எட்டுருவ பூதமாம்,ஏகாக்ரம் கொண்டால்
    தொட்டுவிட லாமவரைத் தேர்’’….(5)….!

    மவுன தியானம் மனத்தால் செய்து
    கவனம் பிசகாது கொள்வாய் -அவன்விருப்பம்,
    சத்தமிட்டு சொல்லும் சகஸ்ரநாமம் அல்லவே
    மெத்தையில் எண்ணுவதே மேல்….(6)…..!

    உடைப்பின்றி கொட்டும் எண்ணையின் தாரை
    தடையின்றிக் கொட்டிடும் தண்ணீர் -படைப்பவர்
    ஆழ்நிலை மோனத்தில் அவ்வா(று) ஆழ்பவரின்
    ஊழ்வினை ,ஆழியுள்(கடலில்) உப்பு….(7)….கிரேசி மோகன்….!

    நானீசர் அல்லது நானென் சொரூபம்
    பூணும் தியானம் பரிசுத்தம்: -தோணுகின்ற
    பேதம் இரெண்டுக்கும் பார்ப்ப(து) அறியாமை
    வேதங்கள் நான்கும் வழி….(8)….!

    எண்ணமே இல்லாத ஏகாந்த மோனத்தில்
    சின்னவன் மன்னனாய் சித்திலே : -பின்னம்
    உயர்ந்திடும் பக்தியில் உன்னதம் காணும்
    அயர்ந்திடா ஆன்மன் அது’’….(9)….!

    மூலத்தில் மூழ்கு மனமே, இதயமாம்
    கோலத்தின் மத்தியில் குந்துவாய்: -தூலத்தின்
    சந்தேகம் அற்றதோர் சாங்கியம்(யோகம்), பக்தியது
    உன்தேகம் உற்ற உணர்வு’’….(10)…..!

    Share

  • குறுந்தொகை நறுந்தேன் – 22

    -மேகலா இராமமூர்த்தி

    தலைவனுக்கு வாயில்மறுத்த தலைவியின் உள்ளவுறுதி தோழிக்குப் பிடித்திருந்தாலும் அவனையன்றித் தலைவிக்குப் பற்றுக்கோடு யாது எனும் எண்ணமும் உள்ளத்தின் உள்ளே ஊடாடவே செய்தது. எனினும் தலைவன்பால் தலைவி கொண்டிருந்த ஊடலும் கோபமும் நியாயமானதாய்  இருந்தபடியால் தலைவியின் கருத்துக்கு எதிர்மொழி ஏதும் பகரவில்லை அவள்.

    தலைவியின் மறுமொழியை அறிந்துகொண்டு வீட்டுவாயிலுக்கு வந்த தோழி தலைவனிடம், “ஐய! வேற்றுப்புலம் செல்லாது அண்மையிலிருந்தும் நீர் தலைவிக்குத் தலையளி செய்யாதது அவள் உள்ளத்தை உடைத்துவிட்டது. அவள் அன்பைத் தாழ்போட்டு அடைத்துவிட்டது. ஆகவே அவள் உம்மை மன்னித்து ஏற்றுக்கொள்ள மறுத்துவிட்டாள்” என்று கூறிவிட்டு, தலைவனின் முகம்நோக்கத் தயங்கியவளாய் விருட்டென்று உள்ளே சென்றுவிட்டாள்.

    ஒருகணம் தலைவன் விக்கித்து நின்றான். மறுகணம், மற்றவரை வாயில்களாய்த் தூதனுப்பினால் பலனில்லை என்று உணர்ந்தவனாய்த் தானே தலைவியின் அனுமதிக்குக் காத்திராது அகத்தினுள்ளே நுழைந்துவிட்டான்.

    எதிரே தளர்நடை போட்டவண்ணம் வந்துகொண்டிருந்த பூங்கண் புதல்வனைக் கண்டான். அவனை ஆரத் தழுவித் தோளில் சார்த்திக்கொண்டு பள்ளியறைக்குள் நுழைந்தவன் குழந்தையை அணைத்தவண்ணம் அமளியில் அமளியேதும் செய்யாது படுத்துவிட்டான்.

    கண்ணிமைக்கும் நேரத்தில் தம்மெதிரே நடந்துமுடிந்துவிட்ட இக்காட்சிகளைக் கண்டு திகைத்து, ஒருவர் முகத்தை ஒருவர் பார்த்தபடி நின்றனர் தோழியும் தலைவியும்!

    சுதாரித்துக்கொண்ட தலைவி பள்ளியுள் புக்காள். அங்கே பள்ளிகொண்டிருந்த தலைவனின் காதில் விழுமாறு, ”உம்மை நான் வெறுக்கவும் இல்லை; அதேசமயம் உம்மோடு சேர்ந்துவாழ விரும்பவும் இல்லை. நீர் உம் விருப்பத்துக்குரிய புதிய காதலியான பரத்தையிடமே சிரத்தையோடு இரும்; எம்மை மறந்துவிட்டு இங்கிருந்து அகன்று செல்லும்” என்றாள் கோபம் கொப்பளிக்க.

    பரத்தைவயிற் பிரிந்துசென்று, தன் மனைக்கு மீண்டுவந்த தலைவன் ஒருவனைத் தலைவியொருத்தி கடிந்துரைத்து, ”நின் அடாத செய்கையை நான் மறக்ககில்லேன்” என்று குறிப்பிடும் பாடல் நற்றிணையிலும் இடம்பெற்றிருக்கின்றது.

    கழுநீர்  மேய்ந்த  கருந்தாள்  எருமை
    பழனத்      தாமரைப்  பனிமலர்  முணைஇத்
    தண்டுசேர்      மள்ளரின்  இயலி  அயலது
    குன்றுசேர்      வெண்மணல்  துஞ்சும்  ஊர
    வெய்யை      போல  முயங்குதி  முனையெழத்
    தெவ்வர்த்      தேய்த்த  செவ்வேல்  வயவன்
    மலிபுனல்      வாயில்  இருப்பை  அன்னஎன்
    ஒலிபல்      கூந்தல்  நலம்பெறப்  புனைந்த
    முகையவிழ்      கோதை  வாட்டிய
    பகைவன்      மன்யான்  மறந்தமை  கலனே.  (நற்: 260 – பரணர்)

    ”தாமரை மலரை வெறுத்துக் கழுநீர் மலரை மேய்ந்த buffaloஎருமை, மணற்குன்றிலே சென்று தங்கும்” என்பது இப்பாடலில் இடம்பெற்றுள்ள உள்ளுறை உவமம் ஆகும். கற்பிற் சிறந்தவளும் உயர்ந்தவளுமான தலைவியைவிட்டுப் பரத்தையை நாடிச்சென்ற தலைவனின் செயலை அது மறைபொருளாய்ச் சுட்டுகின்றது.

    தலைவியின் கோபத்தையும் கொடுமொழிகளையும் கேட்ட தலைவன் அவளிடம் சினங்கொள்ளவில்லை. அவளை ஆழ்ந்துநோக்கியபடி,

    ”என் தலைவி, என்னைத் தழுவுவதில் என்னினும் விருப்பமுடையவள்; விருப்பந்தரும் வனப்புடையவள்; மென்முலைகளையும் நீண்ட கூந்தலையும் உடையவள்; calfபக்கத்தில் மேயச்சென்ற நல்ல சுரப்பையுடைய பசுவின் நடுங்கும் தலையையுடைய சிறுகன்று அப்பசுவைக் காணவேண்டும் எனும் விருப்பொடு இருப்பதுபோல் என்மீது கொண்ட விருப்பத்தை வெளிப்படுத்தும் சிறக்கணித்த பார்வையுடையவள்; அவளை நான் எங்ஙனம் மறந்து வாழ்வேன்?!” என்று அன்று தன் பாங்கனிடம் தலைவிகுறித்துக் கூறியதை நினைவுகூர்ந்து அதனைத் தலைவியிடம் இப்போது மொழிந்தான் அன்பொழுக!

    கவவுக் கடுங்குரையள்  காமர்  வனப்பினள்
    குவவுமென்     முலையள் கொடிக்கூந்  தலளே
    யாங்குமறந்      தமைகோ  யானே  ஞாங்கர்க்
    கடுஞ்சுரை  நல்லா  னடுங்குதலைக்  குழவி
    தாய்காண்      விருப்பி  னன்ன
    சாஅய்நோக்      கினளே  மாஅ  யோளே.  (குறுந்: 132 – சிறைக்குடியாந்தையார்)

    தலைவனின் கனிந்த காதல்மொழிகளைக் கேட்டதும் தலைவியின் கோபமும் ஊடலும் பொங்கும் பாலிலிட்ட நீராய் அடங்கிப்போயின. புலந்த காதல் உள்ளங்கள் செம்புலப் பெயல்நீராய் கலந்தன மீண்டும்!

    வள்ளுவர் வரைந்த,

    ”பன்மாயக் கள்வன் பணிமொழி அன்றோநம்
    பெண்மை உடைக்கும் படை”     (1258) எனும் காதற் கவிதை இச்சூழலுக்கு நச்சென்று பொருந்துகின்றது.

    தலைவனின் பணிமொழிகளில் உளம்நெகிழ்ந்த தலைவி,

    “அணிற் பல்லையொத்த முள்ளையுடைய தாதுமுதிர்ந்த முள்ளிச் செடியையும், நீலமணியின் நிறத்தையொத்தHygrophila கரிய நீருடைய கடற்கரையையும் உடைய தலைவனே! இப்பிறப்பு நீங்கப்பெற்று மறுபிறப்பு உண்டாயினும் நீயே என் கணவன் ஆகுக! நின் நெஞ்சுகலந்தொழுகும் யானே அப்போதும் நின்னுடைய மனத்துக்குகந்த காதலி ஆகுக!” என்றாள்.

    அணிற்பல் லன்ன  கொங்குமுதிர்  முண்டகத்து
    மணிக்கே      ழன்ன  மாநீர்ச்  சேர்ப்ப
    இம்மை  மாறி  மறுமை  யாயினும்
    நீயா      கியரென்  கணவனை
    யானா      கியர்நின்  னெஞ்சுநேர்  பவளே.  (குறுந்: 49 – அம்மூவனார்)

    இக்குறுந்தொகைத் தலைவியைப் போலவே,

    ”கண்களுக்கு மை எழுதும்போது இமையகத்துப் புகுந்த எழுதுகோலைக் காணாத கண்போல, கொண்கனது குற்றத்தினையும் அவனைக் கண்டவிடத்துக் காணேனே” என்று நயந்தும், ”தலைவனைக் காண்கையில் அவன் தவறுகள் தெரிவதில்லை; அவனைக் காணாதபோதோ அவன் தவறுகளின்றி வேறெதுவும் தெரிவதில்லை” என்று வியந்தும் பேசும் தலைவியொருத்தியை வாழ்வியல் அறிஞர் வள்ளுவரும் நமக்கு அறியத்தருகின்றார்.

    எழுதுங்காற் கோல்காணாக் கண்ணேபோற் கொண்கன்
     பழிகாணேன் கண்ட விடத்து.  (1288)

    காணுங்காற் காணேன் தவறாய காணாக்காற்
    காணேன்     தவறல்ல வை  (1289)

    இவ்விடத்து, சங்கப் பெண்களின் இல்லறவாழ்வின் தன்மைகுறித்துச் சற்றே சிந்திப்பது பொருத்தமாக இருக்கும் என நினைக்கிறேன்.

    திருமணமான சங்கப் பெண்டிர் தம் கணவன்மார்களின் தகாத புறத்தொழுக்கத்தைக் கண்டித்தாலும், அதற்காக அவர்களைப் பெரிதாகத் தண்டித்ததாகவோ, அவர்களைவிட்டுப் பிரிந்துறைந்ததாகவோ செய்திகள் நமக்குக் கிட்டவில்லை.

    தலைவியரின் அளவிறந்த பொறையுடைமைக்குக் காரணம் யாது?

    சங்கச் சமூகமானது, நாடோடியாய்த் திரிந்த வேட்டைச் சமூகம் என்ற நிலையிலிருந்து விடுபட்டு, அடுத்தடுத்த வளர்ச்சிநிலைகளை எட்டி, நிரந்தரக் குடிகளாய் வாழத்தொடங்கிய நிலவுடைமைச் சமூகமாக மெல்ல மெல்ல மாறிவிட்டிருந்தது. அச்சமூகத்தில் ஆண்கள் புறத்தே சென்று பொருளீட்டுவதையும், பெண்கள் அகத்திலிருந்தபடியே குழந்தைகளைப் பெற்று வளர்ப்பதையும், குடும்பத்தைப் பேணுவதையும் தம் கடன்களாகக் கொள்ளத் தலைப்பட்டனர். அச்சூழலில் பெண்களுக்குப் பொருளாதாரச் சுதந்தரம் இல்லாமல் போய்விட்டிருந்தது. எனவே அவர்கள் உணவு உடை உறையுள் முதலிய தங்கள் அடிப்படைத் தேவைகளைப் பூர்த்திசெய்துகொள்வதற்குக் கூடத் தம் கணவரையே சார்ந்துவாழவேண்டிய நிலை ஏற்பட்டிருந்தது. ஆக, ஆணாதிக்கச் சூழல் அங்கு இயல்பாகவே உருவாகியிருந்தது.

    எனவே மனைவியரோடு இல்லறம் பேணிய கணவன்மார்கள் திடீரென்று அவர்களைத் துறந்து சென்றாலோ, அவர்களைப் பிரிந்து பரத்தையரோடு திரிந்துகொண்டிருந்தாலோ அப்பெண்களின்பாடு இரங்கத்தக்கதாகவே இருந்திருக்க வேண்டும். அத்தகு சங்கடமான தருணங்களில் தலைவியரின் பிறந்தகத்திலிருந்து அவர்களுக்குப் பொருளுதவியோ, உளவியல்சார் ஆதரவோ கிட்டினவா என்பதையும் சங்கப்பாடல்கள் வாயிலாய் அறிந்துகொள்ள இயலவில்லை.

    அனைத்துக்கும் மேலாகக் கணவனைப் பிரிந்து வாழும் மனைவியர்க்கு,

    அறவோர்க் களித்தலும் அந்தண ரோம்பலும்
    துறவோர்க்     கெதிர்தலும் தொல்லோர் சிறப்பின்
    விருந்தெதிர்     கோடலும்” ஆகிய இல்லறக் கடன்களைச் செய்யும் வாய்ப்பும் சமுதாயத்தால் மறுக்கப்பட்டிருக்கின்றது என்பதை அறியும்போது கணவனின்றித் தனித்து வாழும் பெண்களின் அவலநிலை நமக்கு அங்கை நெல்லியெனத் துல்லியமாய்ப் புலப்படுகின்றது.

    இத்துணைச் சமூகச் சிக்கல்களை எதிர்கொள்ள அஞ்சியதாலோ என்னவோ, தலைவர்களின் போற்றா ஒழுக்கம் தலைவியர்க்குச் சீற்றத்தையும் செற்றத்தையும் தந்தாலும், அவர்கள் அதனை (வேறுவழியின்றி) பொறுத்துக்கொண்டு, தலைவர்களை மன்னித்து ஏற்றுக்கொண்டிருக்கின்றனர் என்று எண்ணவேண்டியிருக்கின்றது.

    [தொடரும்]

     

     

    Share

  • கேசவ் வண்ணம் – கிரேசி எண்ணம்

     

    180131 -Yadavabhyudayam 15. — after he heard of how Krishna vanquished all the asuras he had sent to kill Krishna, Kamsa planned his next move. He called Akrura and asked him to bring Krishna along with the cowherds to Mathura and somehow find a way to kill Krishna. Krishna was Chakri (one who held the Sudarshana) and Kamsa was like a moth attacking a fire. Desika says that in his desperation Kamsa was raising a sword to kill himself.
    180131 -Yadavabhyudayam 15. — after he heard of how Krishna vanquished all the asuras he had sent to kill Krishna, Kamsa planned his next move. He called Akrura and asked him to bring Krishna along with the cowherds to Mathura and somehow find a way to kill Krishna. Krishna was Chakri (one who held the Sudarshana) and Kamsa was like a moth attacking a fire. Desika says that in his desperation Kamsa was raising a sword to kill himself.

    ‘சுகந்த துளசி சிலிர்க்க, வலிமை
    மிகுந்த இருதோளில் பூணும் -முகுந்தன்
    நிதர்ஸனம் என்று நடப்போர் வழியை
    சுதர்ஸனம் காக்கும் சுழன்று”….கிரேசி மோகன்….!

    Share