Author: மலர் சபா

மலர் சபா
புகார்க் காண்டம் -07. கானல் வரி
 
(25)

ஆற்றுவரி
காவிரியை நோக்கிப் பாடியன
 

இரண்டு பக்கங்களிலும்
வண்டுகள் ஆர்த்து ஒலிக்க,
அழகுப் பூக்களால் ஆன
ஆடையைப் போர்த்திக் கொண்டு
கரிய கயல் போன்ற விழிகள் விழித்து.
நீ அசைந்து அசைந்து நடக்கின்றாய்!
காவிரியே, நீ வாழ்கவே!

இங்ஙனம் நீ அசைந்து அசைந்து
களித்து நடந்திடக் காரணம்
நின் கணவனாம் சோழமன்னன் கையிலுள்ள
வளையாத திருத்திய செங்கோலே காரணம்
இதை நானும் அறிந்து கொண்டேன்;
காவிரியே, நீ வாழ்கவே!

(26)

பூக்கள் நிறைந்த சோலையில்
மயில்கள் ஆடவும்
குயில்கள் விரும்பி இசை பாடவும்
அணிந்திருக்கும் அழகிய மாலைகள்
அசைந்து ஆடவும்
இவற்றினூடே புகுந்து செல்லும் காவிரியே!

இவ்வாறு நீ செல்லக் காரணம்
நின் கணவன் சோழமன்னனின்
பகைவர்க்கு அச்சம் தரும்
வேலின் ஆற்றலை நீ அறிந்ததால்தான் என
நானும் அறிந்து கொண்டேன்.
காவிரியே, நீ வாழ்கவே!

மலர் சபா

புகார்க் காண்டம் -07. கானல் வரி

புன்னை மரத்தின் நிழலில்
புலால் நாறும் அலைமீதினில்
அன்னப்பறவையது போன்று
அசைந்து நடக்கிறாளே,
இவளின் சிவந்த கண்கள், கண்களா?
அல்ல! அல்ல! கண்கள் அல்ல!
மிகவும் கொடிய கூற்றமாகும்!

(22)
தேனைத் தன் வாயிடத்துக் கொண்ட
நீல மலரினைக் கையில் ஏந்தி
மீன் வற்றலைத் தின்ன வரும்
பறவைகளை ஓட்டுகிறாளே!
இவளின் சிவந்த கண்கள்தாமும்
வெள்ளிய வேல்களோ?

அல்ல! அல்ல! வேல்கள் அல்ல!
அதனினும் கொடிது கொடிது!

 

 

அடிப்படையான சிலப்பதிகாரத்தின் வரிகள் இங்கே:

http://www.chennailibrary.com/iymperumkappiangal/silapathikaram20.html

படத்துக்கு நன்றி:

 

http://www.dollsofindia.com/product/contemporary-hand-painted/fisher-woman-from-kerala-painting-on-woven-bamboo-strands-HF77.html

 

 

மலர் சபா

புகார்க் காண்டம் – 07. கானல் வரி

 
திணைநிலை வரி
புணர்ச்சி நீட, இடந்தலைப்பாட்டில் புணர்தலுறுவான் ஆற்றாமையால் கூறுதல்

 
(17)

 
கடலில் புகுந்து உயிர்களைக் கொன்று வாழ்பவர்
உன் மூத்தோராகிய தமையன்மார்;
நீயோ கண்வழியே உடலினுள் புகுந்து
என் உயிரதனைக் கொன்று வாழ்கின்றாயே!
கச்சையினுள் இருந்தும்
விம்முகின்ற உன் மார்புகள்
மிகவும் சுமையானவை;
அதனால் வருந்தித் தளர்ந்து
ஒடிந்திடவும் கூடும் நின் இடை;
உன் இடைதனை நீ இழந்திடாதே.

 
(18)

 
வளைந்த கண்கள் கொண்ட வலையால்
உயிர்களைப் பிடித்துக் கொல்பவன் நின் தந்தை;
நீயோ உன் நெடுங்கண் வலையால்
என் உயிர்தனைக் கொல்கிறாயே!
முத்துவடம் தாங்கிநிற்கும்
நின் மார்புகளின் சுமையால்
மழைமேகத்தின் மின்னல் போல்
அசைந்து தளர்கின்றது நின் இடை;
அதை நீ இழந்திடாதே!

 
(19)

 
ஓடுகின்ற படகினைக் கொண்டு
கடல்வாழ் உயிர்களைக் கொன்று வாழ்வர்
நின் தமையன்மார்;
நீயோ உன் வளைந்த புருவம்கொண்டு
எனைக் கொன்று நிற்கிறாயே!
உன் பெருமையையும் நீ அறியாய்;
உன்னால் பிறர்படும் துன்பத்தையும் நீ அறியாய்;
உன் மார்புகளின் பாரம் சுமந்து
தளர்கிறதே நின் இடை;
அதை நீ இழந்திடாதே!

மலர் சபா

புகார்க் காண்டம் – 07. கானல் வரி

மலர் சபா

புகார்க் காண்டம் – 07. கானல் வரி

(12)

கரையினில் அலைகள்
எறிந்திடும் சங்குகளின்
முழக்கத்துக்கு அஞ்சி,
குருதிக்கறை இருபுறமும் படிந்த
செவ்வரி படர்ந்த
வேல் போலும்
கண்களையுடைய இவள்தான்
கொடிய கூற்றமோ?!

கடல்வளம் பொருந்திநிற்கும்
சிறிய இவ்வூர்தன்னில்
அழகு பொருந்திய
மென்சாயல் பெண்ணுருவில்
அக்கூற்றந்தான் வந்துள்ளதோ!

(13)

புலால் நாறும் மீன்களின்
வெள்ளிய வற்றலைக்
கவரவரும் பறவைகளை விரட்டி,
தன்னைக் காண்போரை எல்லாம்
மனம் தடுமாறச் செய்து,
காமநோய் வசப்படுத்தி
வருத்திநிற்கும் அணங்கு இவள்தானோ?!

அடும்ப மலர்கள்
நிறைந்து நிற்கும்
குளிர்ந்த கானலிலே
செறிந்த மெல்லிய கூந்தலையுடைய
பெண்வடிவம் கொண்டுதான்
ஓர் அணங்கு வந்துள்ளதோ?!

அடிப்படையான சிலப்பதிகாரத்தின் வரிகள் இங்கே:
http://www.chennailibrary.com/iymperumkappiangal/silapathikaram19.html

படத்துக்கு நன்றி:
http://my.opera.com/heisenberg16/albums/showpic.dml?album=8923052&picture=125081982

மலர் சபா

புகார்க் காண்டம் – 07. கானல் வரி

(10)

வலைகொண்டு வாழ்வு நடத்துபவர்
வாழ்கின்ற சேரிதனிலே
வலை உலர்த்தியிருக்கும் முற்றத்திலே
பூங்கொத்து ஒன்றினைக் கைதனில் ஏந்தி
விற்பதற்குரிய வற்றல் மீன்களைக்
காத்து நின்றாள் கன்னியொருத்தி.

அவள்தானும்
தான் வேண்டிய உருவம் எடுத்துக் கொண்டு,
கொலைத்தொழில் புரியும்
நீண்ட வேல்போன்ற விழிகளுடன்,
அலைகின்ற நீரையுடைய குளிர்ந்த கானகத்தில்
இங்ஙனம் வாழ்ந்து வருவதை
முன்னரே நான் அறியேனே!
அறிந்திருந்தால் அங்குதான்
சென்றிருக்க மாட்டேனே!

(11)

நிலை வரி
தமியளாக இடத்து எதிர்ப்பட்ட தலைவியை நோக்கித் தலைமகன் கூறுதல்

கண் எனக் கயலையும்
புருவம் என வில்லையும்
கூந்தல் எனக் கார் மேகத்தையும்
இவற்றுடன் சேர்த்து
எதிர்வரும் என்னையும்
வருத்துகின்ற கொடுந்தொழிலையும்
எழுதி வைத்துள்ள
இவளது முகம்தான் திங்களோ?!

அழகிய பரப்புடைய
வானத்தில் இருந்தால்
பாம்புகள் விழுங்கிவிடுமோ
என்று அஞ்சியே
மீன்பிடிக்கும் படகுகள் கொண்டு
வாழ்க்கை நடத்திவரும்
பரதவர் வாழும் சிற்றூரில்
தான் வந்து வாழ்கின்றதோ?!

அடிப்படையான சிலப்பதிகாரத்தின் வரிகள் இங்கே:
http://www.chennailibrary.com/iymperumkappiangal/silapathikaram19.html

படத்துக்கு நன்றி:
http://www.shutterstock.com/pic-41345068/stock-vector-fishing-boat-with-seagulls-in-the-night.html

மலர் சபா

புகாரக் காண்டம் – 07. கானல் வரி

முகம் இல் வரி
குறியிடத்துச் சென்ற பாங்கன் தலைமகனது காதல் மிகுதியைக் குறிப்பினால் அறிந்து கூறுதல்

(8)

கடல்துறையில் மேய்ந்திருக்கும்
வலம்புரிச் சங்குகள்
தோய்ந்ததனால் மணலில் ஏற்படுகின்றன.
வடுக்களும் சிறு குழிகளும்.

அவ்வடுக்கள் மறையும்படி
பூந்தாதுகள் உதிர்த்து நிற்கின்றன
அழகிய புன்னைமரத்தில்
பூத்துநின்ற செழுமையான பூக்கள்.

அத்தகையதான கானலிடத்தே நிற்கின்ற
தலைவியின் முழுமதி போன்று
ஒளிரும் முகமதனில் இருக்கும்
கயல் போன்ற கண்கள் செய்த
வடுக்களைப் போக்க
காம நோயினைப் போக்க
எந்த மருந்தாலும் இயலாது.
மருந்தால் போக்க முடியாத நோய்தனை
தேமல் படர்ந்து நிற்கும்
அவள் மென்மையான மார்புகள் மட்டுமே
போக்கி நிற்கும் போலும்!

(9)

கானல் வரி
கழற்று எதிர்மறை

முள்பொருந்திய மீன்வற்றல்களைக்
காயப்போட்டிருக்கும் இடத்தில்
கவரவரும் பறவைகளை விரட்டவென்று
காவல் நிற்கிறாள் கன்னியொருத்தி.
வண்டுகள் சூழ்ந்திருக்கும்
புலிநகக் கொன்றைப்பூங்கொத்தைக்
கையில் ஏந்தியிருந்தாள்.
அந்த அணங்கு. (வருத்தும் தெய்வம்)

மணம்கமழ் பூக்ககளையுடைய அக்கானலிடத்தே
தன்னைப் பார்ப்பவரை வருத்தும் தெய்வம்
வாழ்ந்து கொண்டிருப்பதை நான் அறியேனே!
அறிந்திருந்தால் அங்கு போயிருக்க மாட்டேனே!

அடிப்படையாய் அமைந்த சிலப்பதிகாரத்தின் வரிகள் இங்கே:
http://www.chennailibrary.com/iymperumkappiangal/silapathikaram18.html
http://www.chennailibrary.com/iymperumkappiangal/silapathikaram19.html

மலர் சபா

புகார்க் காண்டம் – 07. கானல் வரி

மலர் சபா

புகார்க்காண்டம் – 07. கானல் வரி

(4)

ஆற்றினில் புதுப்புனல் கண்ட
உழவர் மகிழ்ந்து ஆர்க்கும் ஓசை,
நீர் மதகுதனில்
நிறைந்து வடிகின்ற ஓசை,
கரைகளை வரப்புகளை
உடைத்துப் பாய்கின்ற நீரின் ஓசை,
புதுப்புனல் விழாவில்
களித்து மகிழும் மாந்தர்
எழுப்பி நிற்கும் பல்வித ஓசை,

இவை அனைத்தும்  கரையின்
இருபக்கமும் ஆர்ப்பரிக்க
நின் கடமையாகிய
நல்லொழுக்கம் தவறாது
நடந்து செல்லும் காவிரியே,
நீ வாழ்க!

சோழனின் வளத்தை
அதிகரிக்க எண்ணியே
நீ அங்ஙனம் நடந்து செல்கிறாய்!
உன் வளத்தில் கொழித்திருக்கும்
போர் மறவர் வாயை மூடாமல்
ஆரவாரித்துக்கொண்டே இருக்கின்றர்.
அத்தகு வளத்துக்குக் காரணமான
காவிரியே நீ வாழ்க!

(காப்பியத்தின் திருப்புமுனை – மாதவி தவறாகப் புரிந்து கொள்ளுதல்

தான் உடன் இருப்பதால், பரத்தையருடன் கூடி மகிழ முடியாத கோவலன் வருந்துகிறான்;
மாதவி தன்னிடம் இருக்கும் வளமெல்லாம் தான் அருளிய வளம்தான் என்று பாடுகிறான்;
இவ்வாறாக மாதவியின் சந்தேகம் அதிகரித்தது.
இந்த இப்பகுதிதான் காப்பியத்தின் திருப்புமுனையாக அமைகிறது.)

(5)

சார்த்து வரி- முகச் சார்த்து
புகார் நகரைச் சிறப்பித்துப் பாடுதல்
தோழி தலைமகன் முன் நின்று வரைவு கடாதல்

கருங்குவளை மலர்போலும்
நீண்ட கண்களை உடையவள்
எம் தலைவி;
அவளிடம்
கடலின் பெருந்தெய்வமான
வருணனைச் சுட்டிக் காட்டிச்
சாட்சியாக வைத்திருந்து
நின்னைப் பிரிய மாட்டேன்;
விரைவில் மணம்புரிந்து கொள்வேன்
என அன்று கூறிய எம் தலைவர்
அச்ச்சுளுரைகள்
நிறைவேற்றாமல் பொய்த்துவிட்டார்.

ஐயனே!
அறனில்லாதவர் அவர் என்று
எங்ஙனம் நாங்கள் அறிவோம்!

நிலத்தில் கிடக்கின்ற வெண்சங்குகளையும்
வெண்முத்துகளையும் கண்டு
அவைதாம் தம்மை மலர்விக்க வந்த
வெண்மதியும் விண்மீன்களும் என்றெண்ணி
மொட்டவிழும் ஆம்பல்கள்
பகலை இரவென்று
தவறாக நினைக்கும்
தன்மை வாய்ந்த
புகார் அன்றோ எம் நகரம்!

(ஆம்பல் பொழுது கண்டு ஏமாந்தது போல, தலைவனின் இயல்பு குறித்துத் தவறாக
நாங்கள் புரிந்து கொண்டோம்…என்பது கருத்து)

அடிப்படையாய் அமைந்த சிலப்பதிகாரத்தின் வரிகள் இங்கே:
http://www.chennailibrary.com/iymperumkappiangal/silapathikaram18.html

படத்துக்கு நன்றி:
http://www.eegarai.net/t77585-topic

மலர் சபா

புகார்க்காண்டம் – 07. கானல் வரி

மலர் சபா

புகார்க்காண்டம் – 07. கானல் வரி

http://www.magnoliabox.com/art/117361/Muse_Playing_the_Harp

மலர்சபா

புகார்க்காண்டம் – 06. கடல் ஆடு காதை

ஆங்கே,
கடலின் புலால் நாற்றம்…
அதை மாற்றி
நறுமணமாக்கிய
மடல்கள் அவிழும்
பூக்களை உடைய
தாழை மரங்கள்
வேலியெனச் சூழ்ந்திருந்து
காவல் புரிந்த
ஓர் இடத்தினில்……….

மலர் சபா

புகார்க்காண்டம் – 06. கடல் ஆடு காதை

 
 
வைகறையில் கடற்கரைக் காட்சி
 
 
இடிக்கப்பட்டுச் சலிக்காத
மாவினைப் போல
நுண்மையாக விளங்கியது
கடற்கரை மணற்பரப்பு.
 
அவ்விடத்தில் வெண்சிறு கடுகு
இட்டாலும் கூட
கண்ணுக்குப் புலப்படும்படி
பரவியிருந்தது வெளிச்சம்.
 
 
நீர் மிகுந்த பரப்பதனில்
தாமரையை வேலியாகக் கொண்ட
அழகிய மருதநிலம்போல்,
அழகுறத் தோன்றும்
தாழையை வேலியாக உடைய
நெய்தல் நிலத்தில்
கானலின் மருங்கில்
கோவலனுடன் வந்த மாதவி
தனது தோழியர் கூட்டத்துடன்
விளையாடி மகிழ்ந்தனள்.
 
 
 
நகரமக்கள் கடற்கரையில் களித்திருக்கும் காட்சி
 
 
நிரைநிரையாகக் குவித்த
குற்றமற்ற காட்சியையுடைய
மலைதரும் பல பொருட்களும்…
கடல்தரும் பல பொருட்களும்…
இவ்வளம் கொழிக்கும்
மரக்கலங்கள் அசைகின்ற கடற்கரை.
 
 
ஆங்கே,
சோலைகள் சூழ்ந்த இடத்தில்
அரசிளங்குமாரரும்
அவர்தம் உரிமை மகளிரும்
வணிக குமாரரும்
அவர்தம் பல்வேறு வகைப்பட்ட
காமக்கிழத்தியரும்,
ஆடல் மகளிரும்
பாடல் மகளிரும்
கூட்டம் கூட்டமாகத் தங்கியிருந்தனர்.
அவர்களைச் சூழ்ந்திருந்தன
திரைச்சீலைகள்.
 
 
அக்காட்சியானது,
விண்ணை எட்டும் புகழினையுடைய
கரிகால் வளவன் தானும்
புதுப்புனல் விழவு கொண்டாடும்
தலைநாள் அதனை ஒத்திருந்தது.
 
 
வேறு வேறு கோலங்களுடனூம்
வேறு வேறு ஆரவாரங்களுடனும்
விழாக்காணும் களம் போல
அப்பூம்புனல்துறை சிறப்புற்றுப் பொலிந்தது.
 
 
கடலின் கரையைக்
குத்தியெடுத்துப் பெயர்த்து வந்து
கடலதனுடன் கலக்கும்
காவிரியாற்றின் புகார் முகமெங்கும்
சிறிது கூட இடமின்றி
நால்வகை வருணத்தவரின்
அடங்காத ஆரவாரம்
ஒருங்கு கூடி
ஓர் ஒத்த ஓசையாய்
ஒலித்துக் கொண்டிருந்தது.
 

படத்துக்கு நன்றி:
http://www.colourlovers.com/group/Artist_Palette_Challenge/conversations/10646/APC_16_Raja_Ravi_Varma

மலர் சபா

புகார்க்காண்டம் – 06. கடல் ஆடு காதை

வண்ணக் கலவைகள், சாந்து வகைகள்,
மலர்கள் சுண்ணப் பொடிகள்
பணியாரம் முதலான தீனிவகைகள்
இவை விற்போர் வைத்திருந்த விளக்குகள்;
 
 
செய்யும் தொழிலில் வல்லவரான
கம்மியர்(தட்டார்)
அணிகலன் செய்யுமிடங்களில்
வைத்திருந்த விளக்குகள்;
 
 
பிட்டு வாணிகர்கள்
வரிசை வரிசையாய்
ஏற்றி வைத்திருந்த விளக்குகள்;
 
 
அப்பம் விற்கும் வாணிகர்
குடத்தண்டில் ஏற்றி வைத்திருந்த
கரிய அகல்விளக்குகள்;
 

பண்டங்கள் பலவும் விற்கும் பெண்கள்தம்
கடையில் வைத்த விளக்குகள்
 

ஆங்காங்கு இடையிடையே
மீன் விற்பவர்கள் வைத்த விளக்குகள்
 

கடலின் இடத்து துறை எதுவென்று அறியாது
ஓடுகின்ற மரக்கலங்களை
அடையாளம் காட்டி அழைக்கவென்று
வைத்த்திட்ட விளக்குகள்
 

மீன்களைக் குறுக்கிட்டுத் தடுத்து
வலையில் அகப்படுத்தும்
பரதவர் வைத்திட்ட
மீன் திமில் விளக்குகள்
 
வேற்றுமொழி பேசும் தேசத்தவர்
வைத்திட்ட விடிவிளக்குகள்
 
 
பெரிய பெரிய பண்டங்களையுடைய
பண்டகசாலைக் காப்பாளர்கள்
வைத்திட்ட விளக்குகள்
 
 
எண்ணுவதற்கு அரிய அளைவினதாய் விளக்குகள்
எங்கு காணினும் பொருந்தி இருந்தன.

அடிப்படையாக அமைந்த சிலப்பதிகாரத்தின் வரிகள் இங்கே: 134 – 145

http://www.chennailibrary.com/iymperumkappiangal/silapathikaram16.html

படத்துக்கு நன்றி:

http://aammaappa.mywebdunia.com/2008/11/20/1227199500000.html