மேலோங்கி நிற்கிறது

எம்.ஜெயராமசர்மா …. மெல்பேண்

விஞ்ஞான வளர்ச்சியினால் விந்தை பல வந்தனவே
எஞ்ஞான்றும் பார்த்து நிற்க எத்தனையோ வருகிறதே
நல்ஞானம் என்றெண்ணி நயந்தேற்று நிற்கின்றோம்
விஞ்ஞானம் தானிப்போ மேல் ஓங்கி நிற்கிறதே

விளையாத நிலமெல்லாம் விளைந்தோடி நிற்கிறது
விதையெல்லாம் விரைவாக வேர்விட்டு எழுகிறது
தரையுள்ளே பலபாதை தலை நிமிர்ந்து நிற்கிறது
விரைவாகப் பயணிக்க விமானம் பல வந்தாச்சு

விண்ணோக்கிக் கட்டிடங்கள் விரைந்தோங்கி நிற்கிறது
மண்ணுள்ளோர் விண்செல்ல வாய்ப்புமே இருக்கிறது
எண்ணிவிடும் எண்ணமெலாம் எல்லோர்க்கும் சொல்லிவிட
கண்முன்னே வந்துள்ளார் கணினி எனும் காப்பாளர்

கணினி யிப்போ உலகெங்கும் களிப்புடனே வருகிறது
கணினியெனும் கருவியிப்போ காலத்தின் தேவையது
கணினியின்றி கல்விக்கூடம் காணுவதும் அரிதிப்போ
கற்கின்றார் கைகளெல்லாம் கணினி தான் இருக்கிறது

மடிக்கணினி வந்தாச்சு மனமெல்லாம் நிறைந்தாச்சு
படிக்கின்ற மாணவரின் பார்வையெல்லாம் அங்கேதான்
அடுக்கடுக்காய் பலவேலை அதனூடே பார்க்கின்றார்
தடுக்கிநாம் விழுந்திடுனும் தரையெங்கும் கணினிமயம்

தொலைக்காட்சி கூடயிப்போ கணினியுடன் தொடர்பாச்சு
தொழில் துறைகள் கணினியுடன் சொந்தமாய்ப் போச்சுயதிப்போ
கணினியில்லாத் துறையை நாம் காணவேமுடியாது
கணினியிப்போ நம்வாழ்வில் கச்சிதமாய் இணைந்தாச்சு

காதலரின் தூதுவனாய் கணினிதான் இருக்கிறது
காவல்துறை ஊழியனாய் கணினியே அமைஞ்சாச்சு
மருத்துவத்தில் நுழைந்திப்போ மகத்தான இடம்பிடித்து
இருக்கையிலே இருக்கிறது எல்லாமே கணினியன்றோ

வானவூர்தி போவதற்கு வழிசமைத்து நிற்கிறது
வானிலையைக் கணிப்பதற்கு வலக்கரமாய் இருக்கிறது
கானமெலாம் கேட்பதற்கு கைகொடுத்து நிற்கிறது
கணினியெனும் கருவியிப்போ கண்போல இருக்கிறது

பழந்தமிழ் நூலையெல்லாம் பத்திரமாய் வைப்பதற்கும்
பக்திப் பனுவல்களை பலபேரும் படிப்பதற்கும்
சுத்தியுள்ள கோவில்பற்றி சுகமாக அறிவதற்கும்
சக்திமிக்க ஒன்றாகிச் சபைநடுவே நிற்கிறது

ஓங்கி உலகளந்தான் புகழ்கேட்டு மகிழ்வதற்கும்
உமையோடு இணைந்தானின் உயர்பற்றி அறிவதற்கும்
பாங்காகத் தத்துவங்கள் பலபார்த்து விளங்குதற்கும்
வாங்கிநாம் மகிழ்ந்திடுவோம் வகைவகையாய் கணினிகளை !

படத்திற்கு நன்றி:

http://www.shutterbug.com/content/computer-digital-photography