இரக்கமுடன் அருள்புரிவாய்!

-எம். ஜெயராம சர்மா – மெல்பேண்

கல்வியின் தெய்வமே நீ
கண்திறந்து பார்க்க வேணும்
கல்விக்குள் காசை வைத்துக்
கற்பவரை முடக்கு கின்றாரே
செல்வம் இல்லா நிலையிலுள்ளார்          goddess-saraswati
சீராகக் கல்வி பெற
எல்லை இல்லா நாயகியே
இரக்க முடன் அருள்புரிவாய்!

கல்வியைக் காசாக்கிக்
கடைத்தெருவில் விற்கின்றார்
காமராசர் பிறந்தமண்ணில்
கல்வியிப்போக் காசாச்சு!!

இலவசமாய்க் கல்விதரின்
எல்லோரும் படித்துநிற்பார்
இந்தநிலை வருவதற்கு
எங்களம்மா அருளிவிடு!

காந்தீயம் பிறந்த நாட்டில்
காசுகையில் இல்லை என்றால்
கல்வி தனை நாடிடுவார்
கனவில்தான் கற்க வேணும்!

காசில்லாக் குடும்ப மதில்
பிறந்து விட்ட காரணத்தால்
கல்வி கற்க இயலாரை
கைதூக்கி விட்டி டம்மா!

மருத்துவம் படிப்பதற்கு
மனம் அவர்க்கு இருந்தாலும்
தரித்திரத்தின் காரணத்தால்
தான் ஒதுங்கி நின்றிடுவார்!

வருத்தமின்றி அவர்படித்து
வாழ் நாளில் உயர்வடையத்
தரித்திரத்தைப் போக்கிடுவாய்
தயை நிறைந்த நாயகியே!

பள்ளித் தலமனைத்தும் கோவில் எனச்சொல்லிச்
துள்ளி வரும்தமிழாலே சொன்னானே பாரதியும்
கிள்ளி எறிந்துநிற்கும் கீழான குணமுடையோர்
பள்ளிகளை இப்போது பணக்கிடங்காய் மாற்றிவிட்டார்!

பாரதியின் தமிழ் கொண்டு
பாட்டாலே வேண்டு கின்றேன்
பலபேரும் கல்வி கற்கப்
பராசக்தி அருள் புரிவாய்!

About ஜெயராமசர்மா

பேராதனை பல்கலைகழக தமிழ் சிறப்புப் பட்டதாரி.அத்தோடு, கல்வியியல் துறையில் டிப்ளோமா, சமூகவியல் துறையில் டிப்ளோமா,கற்பித்தல் நுணுக்கத்தில் முதுகலை தத்துவமானி பட்டங்களையும் பெற்றவர்.கல்வித்திணைக்களத்தில் உதவிக் கல்விப் பணிப்பாளராகவும்,வட இலங்கை புனித பிரான்சிஸ் சேவியர் செமினறியில் பகுதி நேர‌ தமிழ், இந்துகலாசார விரிவுரையாளராகவும், யாழ்/ பேராதனை பல்கலைக்கழகங்களின் வெளிவாரி பட்டப்படிப்புப்பிரிவில் தமிழ் விரிவுரையாளராகவும்,இலங்கை ஒலிபரப்புக்கூட்டுத்தாபனத்தில் அறிவிப்பாளராகவும், நாடகத்தயாரிப்பாளராகவும் கடமையாற்றியுள்ளார். மாற்றம்,உதயன்,ஈழ நாடு, சிந்தாமணி, உதயசூரியன் இந்துசாதனம், மெல்லினம், உதயம்,பத்திரிகைகளில்.. கவிதை, கட்டுரை,சிறுகதை,விமர்சனம், ஆகியவற்றை எழுதியுள்ளார்.10க்கு மேற்பட்ட நூல்களையும்,100 ஓரங்க நாடகங்களையும்,10க்கு மேற்பட்ட வில்லுப்பாட்டுக்களையும்,20க்கு மேற்பட்ட நாட்டிய நாடகங்களையும், எழுதியுள்ளதோடு.. "முதற்படி" என்னும் குறுந்திரைப்படத்துக்கு கதை வசனம் எழுதி நடித்து 2007ல் அவுஸ்த்திரேலியாவில் மெல்பேண் நகரில் வெளியீடும் செய்யப்பட்டது.ஈழத்தில் பல ஸ்தலங்க‌ளுக்கு ஊஞ்ஞல் பாடியுள்ளதோடு.. அண்மையில் மேற்கு அவுஸ்த்திரேலியா பேர்த் மாநகரில் கோவில்கொண்டிருக்கும் பாலமுருகப்பெருமான் மீதும் ஊஞ்ஞல் பாடியுள்ளார்.2008ல் மதுரைமாநகரில் நடைபெற்ற அகில உலக சைவ‌ சித்தாந்த மாநாட்டில் புராணப்பகுதிக்கு தலைவராகவும், ஆய்வுக் கட்டுரையாள‌ராகவும் விளங்கியுள்ளார்.அண்மையில் ஐரோப்பிய நாடுகளுக்கு சுற்றுப்பயணம் சென்று அங்கெல்லாம்.. தமிழ்,கலாசாரம், இந்துசமயம்,சம்பந்தமாக விரிவுரைகள் ஆற்றியுள்ளார்.லண்டனில் ஜி.ரி.வி. நிலையத்தார் சமயம்,தமிழர்பண்பாடுசம்பந்தமாக இரண்டு தினங்கள் பேட்டி கண்டு நேரடியாக ஒளிபரப்புச்செய்தனர். தற்போது மெல்பேண் தமிழ்ச்சங்கத்தின் ஆலோசகராகவும்,விக்டோரியா இந்து கல்விமையத்தின் ஆலோசகராகவும், தமிழ் அவுஸ்த்திரேலியன் சஞ்சிகையின் இணை ஆசிரியராகவும் விளங்குகிறார். பூர்வீகம் தமிழ்நாடு தாராபுரம். வளர்ந்தது, படித்தது, வேலை பார்த்தது, யாவுமே இலங்கையில்..தற்போது குடியுரிமை பெற்றிருப்பது அவுஸ்த்திரேலியாவில்.

உங்கள் கருத்துகளைத் தெரிவிக்க