வன் கயிறு

-பத்மநாபபுரம் அரவிந்தன்

துடித்த கயிறு
அடங்கிய போது
எதையோத் திறந்து
எதுவோ போனது

விறைத்த கழுத்தில்
அழுந்தப் பதிந்த
கயிற்றின் தடம்

இருந்த இடமிருந்து
வெளிவந்து வெறித்த கண்கள்
கத்த நினைத்த நாக்கைக்
கடித்தழுத்திப் பிடித்த பற்கள்

கடை சொட்டுச் சிறுநீரும்
கால்வழி வழிய
இனியில்லை சுமையொன்றும்!

நிமிடத்தில் நிகழ்கிறது
வாழ்க்கையின் புரட்டல்
மறுயோசனை பற்றிச்
சாத்தியமற்றுப் போன
சில நிமிட அவகாசத்தில்
துடித்தடங்கியது வன்கயிறு

பதிவாசிரியரைப் பற்றி

பத்மநாபபுரம் அரவிந்தன்

கன்னியாகுமரி மாவட்டம், பத்மநாபபுரத்தைச் சேர்ந்தவர். கடல் வானொலி அதிகாரியாக (Marine Radio Officer) பணி புரிந்துகொண்டிருக்கிறார்.. கணையாழி, படித்துறை, திண்ணை, ஆனந்த விகடன், போன்ற இதழ்களில் இவருடைய குறு நாவல், சிறுகதைகள், கவிதைகள் வெளிவந்துள்ளது. கணையாழி இதழில் ஆழித் துரும்புகள் என்ற தலைப்பில் தன் கடல் அனுபவங்களைத் தொடராக வழங்கியுள்ளார்.

இவருடைய கவிதைத் தொகுப்பை,’விரிசலுக்குப் பிறகு’, என்ற தலைப்பில் வம்சி புக்ஸ் வெளியிட்டுள்ளது.

See author's posts

Tags: பத்மநாபபுரம் அரவிந்தன்