சைவத்தின் விளக்காகத் திகழுகிறார் அம்மையார் !

மகாதேவ ஐயர் ஜெயராமசர்மா
மேனாள் தமிழ்மொழிக் கல்வி இயக்குநர்
மெல்பேண், ஆஸ்திரேலியா

மேன்மைகொள் சைவநீதி விளங்கிட வைப்பதற்கு
மாதராய் வந்தமைந்தார் மங்கையர் கரசியாரும்
அரசியாய் ஆனபோதும் அரனது அடியைப்பற்றி
தினமுமே தொழுதுநின்றார் தீயவை அகன்றுபோக

தீயதாம் சமணந்தன்னை சிந்தையில் கொண்டதாலே
பாண்டிய நாட்டுமன்னன் பரமனை மறந்துபோனான்
பரமனைப் பற்றிநின்ற அவனது மனைவியான
மங்கையர் கரசியாரோ பரமனைப் பணிந்துநின்றார்

சைவத்தின் போக்குவேறு சமணத்தின் போக்குவேறு
அனைவரும் இணைந்துநிற்கும் அன்பதே சைவமாகும்
ஒறுப்பது சமணமாகும் வெறுப்பது சமணமாகும்
மக்களை விட்டுவிட்டு தத்துவம் சொல்லிநிற்கும்

பெண்களைச் சைவமென்றும் பெருதுமே போற்றிநிற்க
பெண்களை சமணமென்றும் வெறுத்துமே நின்றதாலே
பொங்கியே எழுந்துநின்ற மங்கையற் கரசியாரும்
சைவத்தை மீட்டெடுக்கத் தலைமையைத் தாங்கினார்கள்

ஆடலும் வேண்டாம் பாடலும் வேண்டாம்
அழகும் வேண்டாம் அலங்காரம் வேண்டாம்
எல்லாம் மாயை எதுவும் வேண்டாம்
என்று சொன்னதே இப்புவி சமணம்

சமணம் வெறுத்ததைச் சைவம் உயர்த்தி
இறைவனை வழிபட ஏற்றது என்றது
ஆலயம் அனைத்தும் ஆடலும் பாடலும்
ஆண்டவன் பிரார்த்தனை ஆகியே நின்றது

பாண்டிய மக்கள் மனங்கள் மாறின
மன்னனின் மனமே சமணத்தில் இருந்தது
மன்னனை மாற்றிட மங்கையற் கரசியார்
தென் னாடுடைய சிவனையே வேண்டினார்

சிவனது அருளாலே தவமுதல் வந்தார்
கால்பதித்த உடனே கடுங்கோபம் கொண்டார்
எதிர்த்தார் எரித்தார் எத்தனையோ செய்தார்
அத்தனையும் அரசர்க்கு வெப்புநோயாய் ஆகியதே

சமணத் தலைமைகள் மந்திரமோ தந்திரமே
எதுவுமே அரசர்க்கு ஏற்றசுகம் அளிக்கவில்லை
மனைவியின் கருத்தை மன்னனப்போ கேட்டான்
மந்திராமாம் திருநீற்றை சம்பந்தர் கொடுத்தார்

திருநீறு மன்னனின் நோயினையும் போக்கியது
திருநீறு மன்னனின் மனதினையும் மாற்றியது
தீமையென சமணத்தை உணரவும் வைத்தது
மங்கையற் கரசியார் மனநிறைவை எய்தினார்

வளவர்கோன் பாவை வழிகாட்டி ஆகினார்
சம்பந்தர் தலைமையிலே சைவத்தை நிலைநாட்டினார்
சேக்கிழார் போற்றினார் சிவனாரின் அடியாரை
சைவத்தின் விளக்காகத் திகழுகிறார் அம்மையார் !

பதிவாசிரியரைப் பற்றி

ஜெயராமசர்மா

பேராதனை பல்கலைகழக தமிழ் சிறப்புப் பட்டதாரி.அத்தோடு, கல்வியியல் துறையில் டிப்ளோமா, சமூகவியல் துறையில் டிப்ளோமா,கற்பித்தல் நுணுக்கத்தில் முதுகலை தத்துவமானி பட்டங்களையும் பெற்றவர்.கல்வித்திணைக்களத்தில் உதவிக் கல்விப் பணிப்பாளராகவும்,வட இலங்கை புனித பிரான்சிஸ் சேவியர் செமினறியில் பகுதி நேர‌ தமிழ், இந்துகலாசார விரிவுரையாளராகவும், யாழ்/ பேராதனை பல்கலைக்கழகங்களின் வெளிவாரி பட்டப்படிப்புப்பிரிவில் தமிழ் விரிவுரையாளராகவும்,இலங்கை ஒலிபரப்புக்கூட்டுத்தாபனத்தில் அறிவிப்பாளராகவும், நாடகத்தயாரிப்பாளராகவும் கடமையாற்றியுள்ளார். மாற்றம்,உதயன்,ஈழ நாடு, சிந்தாமணி, உதயசூரியன் இந்துசாதனம், மெல்லினம், உதயம்,பத்திரிகைகளில்.. கவிதை, கட்டுரை,சிறுகதை,விமர்சனம், ஆகியவற்றை எழுதியுள்ளார்.10க்கு மேற்பட்ட நூல்களையும்,100 ஓரங்க நாடகங்களையும்,10க்கு மேற்பட்ட வில்லுப்பாட்டுக்களையும்,20க்கு மேற்பட்ட நாட்டிய நாடகங்களையும், எழுதியுள்ளதோடு.. “முதற்படி” என்னும் குறுந்திரைப்படத்துக்கு கதை வசனம் எழுதி நடித்து 2007ல் அவுஸ்த்திரேலியாவில் மெல்பேண் நகரில் வெளியீடும் செய்யப்பட்டது.ஈழத்தில் பல ஸ்தலங்க‌ளுக்கு ஊஞ்ஞல் பாடியுள்ளதோடு.. அண்மையில் மேற்கு அவுஸ்த்திரேலியா பேர்த் மாநகரில் கோவில்கொண்டிருக்கும் பாலமுருகப்பெருமான் மீதும் ஊஞ்ஞல் பாடியுள்ளார்.2008ல் மதுரைமாநகரில் நடைபெற்ற அகில உலக சைவ‌ சித்தாந்த மாநாட்டில் புராணப்பகுதிக்கு தலைவராகவும், ஆய்வுக் கட்டுரையாள‌ராகவும் விளங்கியுள்ளார்.அண்மையில் ஐரோப்பிய நாடுகளுக்கு சுற்றுப்பயணம் சென்று அங்கெல்லாம்.. தமிழ்,கலாசாரம், இந்துசமயம்,சம்பந்தமாக விரிவுரைகள் ஆற்றியுள்ளார்.லண்டனில் ஜி.ரி.வி. நிலையத்தார் சமயம்,தமிழர்பண்பாடுசம்பந்தமாக இரண்டு தினங்கள் பேட்டி கண்டு நேரடியாக ஒளிபரப்புச்செய்தனர்.
தற்போது மெல்பேண் தமிழ்ச்சங்கத்தின் ஆலோசகராகவும்,விக்டோரியா இந்து கல்விமையத்தின் ஆலோசகராகவும், தமிழ் அவுஸ்த்திரேலியன் சஞ்சிகையின் இணை ஆசிரியராகவும் விளங்குகிறார்.
பூர்வீகம் தமிழ்நாடு தாராபுரம். வளர்ந்தது, படித்தது, வேலை பார்த்தது, யாவுமே இலங்கையில்..தற்போது குடியுரிமை பெற்றிருப்பது அவுஸ்த்திரேலியாவில்.

See author's posts