கட்டுரைகள்ஜோதிடம்வார ராசி பலன்

வார ராசி பலன்: 30.07.2012 முதல் 05.08.2012 வரை

காயத்ரி பாலசுப்ரமணியன்

மேஷம்: பெண்களுக்கு இல்லத்தில் மகிழ்ச்சியும், பரபரப்பும் நிறைந்திருக்கும். மாணவர்களுக்குப் புதிய நட்புகள் கிடைக்கும். எனினும் தராதரமறிந்து அளவோடு பழகுதல் நல்லது. பொது வாழ்வில் இருப்பவர்கள் விழிப்புணர்வோடு இருந்தால், வீண் சஞ்சலங்களிலிருந்து தப்பிக்கலாம். கலைஞர்கள் மேற்கொள்ளும் பிரயாணங்கள் மூலம் புதிய உறவுப் பாலம் உருவாகும். வியாபாரிகளுக்குத் தொழிலில் இருந்த மறைமுக எதிர்ப்புகள் விலகும். பணி புரியும் இடத்தில் அவ்வப்போது எழும் கருத்து வேறுபாடுகளை மனம் விட்டுப் பேசித் தீர்த்துக் கொண்டால், நிம்மதியாக வேலை செய்ய முடியும்.

ரிஷபம்: உங்கள் வாகனங்களைத் தகுந்த விதத்தில் பராமரித்து வந்தால், வீண் செலவுகள் கட்டுக்குள் இருக்கும். பணியில் இருப்பவர்கள் கவனக் குறைவிற்கு இடம் கொடாமல், உங்கள் பணியில் விழிப்பாய் இருங்கள். பொது வாழ்வில் இருப்பவர்கள் தங்களுக்கு நல்ல யோசனை சொல்பவர்களின் மனம் நோகாமல் நடந்து கொள்வதன் மூலம் அவர்களின் ஆதரவைத் தக்க வைத்துக் கொள்ளலாம். கலைஞர்கள் திறமை என்பதுடன் பொறுமையும் உடனிருக்குமாறு பார்த்துக் கொண்டால், எளிதில் பணிகள் முடியும். முதியவர்கள் உணவில் கவனமாக இருக்கவும். வியாபாரம், தொழிலிடங்களில் உங்களின் சொல்லுக்குத் தனி மதிப்பிருக்கும்.

மிதுனம்: மாணவர்கள் யோசித்து நிதானமாகச் செயல்பட்டால், எல்லா விஷயங்களும் ஏற்றமாகவே முடியும். குழந்தைகள் பெறக்கூடிய பெருமையால், பெற்றோரின் பெருமை உயரும். வியாபாரிகள் கணக்கு வழக்குக்களில் நேர்மையான போக்கைக் கையாள்வது சிறந்தது. பொது வாழ்வில் இருப்பவர்கள் வீண் தர்க்கங்கள் எழாதவாறு பேசி வந்தால், மனதில் அமைதி நிலவும். பணியில் இருப்பவர்கள் விலை உயர்ந்த பொருள்களைக் கையாளுவதில் கவனம் தேவை. பெண்கள் அடிக்கடி வரும் கோபத்தைக் குறைத்துக் கொண்டால், இல்லத்தில் சச்சரவு எழாது.

கடகம்: மாணவர்கள் படிப்பில் நம்பிக்கையுடன் செயல்பட்டால், அதிக மதிப்பெண் பெறுவது உறுதி. சேமிக்கும் வகையில் பண வரவு தாராளமாய் இருக்கும். உறவினர் இடையே சிறு பிரச்னைகள் எழக்கூடும். எனவே சிறிய விஷயங்களைப் பெரிது படுத்தாமலிருப்பது நல்லது. சிலர் குடும்பத்தோடு இனிய சுற்றுலா சென்று வருவார்கள். பொது வாழ்வில் இருப்பவர்களுக்கு எதிரிகளால் ஏற்படும் தொல்லைகள் குறைந்து விடும். கர்ப்பிணிப் பெண்கள் அதிக அலைச்சல், அறிமுகமில்லாத புதிய உணவு வகைகள் ஆகியவற்றை விலக்குவது நலம். அலுவலகத்தில் உயர் அதிகாரிகள் உங்களின் ஆலோசனைக்குத் தகுந்த மதிப்பும், மரியாதையும் அளிப்பார்கள்.

சிம்மம்: இந்த வாரம் நண்பர்களிடையே வேண்டாத விஷயங்களுக்காகச் சிறு வாக்குவாதங்கள் உண்டாகும். மாணவர்கள் பிறரிடம் கைமாற்றாகப் பணம் பெற்றுச் செலவழித்தால், வீண் தொல்லைக்கு ஆளாக வேண்டியிருக்கும். பெண்கள், பணச் செலவில் கட்டுப்பாடாய் இருந்தால், கடன்களும் கட்டுக்குள் இருக்கும். வேலையில் இருப்பவர்கள் பணியில் கவனமாய் இருந்தால், உயரதிகாரிகளின் சீற்றத்திலிருந்து தப்பிக்க இயலும். வியாபாரிகள் பங்குதாரரின் எண்ண ஓட்டங்களை அறிந்து கொண்டு செயல்பட்டால், லாபம் குறையாது. பெற்றோர்கள் பிள்ளைகளிடம் பக்குவமாக நடப்பது அவசியம்.

கன்னி: மாணவர்கள் வாகனம் ஓட்டும் போது விவேகத்தைக் கடைப்பிடித்து வந்தால், பயணங்கள் இனிமையாய் இருக்கும். வீடு, நிலம் வாங்குகையில், பத்திரத்தைச் சரி பார்த்த பின் பணத்தைக் கட்டுவது நல்லது. வாழ்க்கைத் துணையுடன் வாக்குவாதத்தில் ஈடுபடுவதைத் தவிர்த்தால், இல்லறம் நல்லறமாகத் திகழும். பெண்கள் அக்கம் பக்கத்தாரிடம் அதிக உரிமை எடுத்துக் கொள்ளாமல் அளவாகப் பழகுவது புத்திசாலித் தனம். பொது வாழ்வில் இருப்பவர்கள் பிறர் மனம் புண்படாமல் பேசுவதை மேற்கொண்டால், அதிக நன்மை பெறலாம். கலைஞர்கள் நேரம் காலம் பாராமல் உழைக்க வேண்டியிருக்கும்.

துலாம்: பெண்கள் நிதி நிலைமைக்கேற்றவாறு செலவுகளை மேற்கொண்டால், கடன் தொல்லை இராது. மாணவர்கள் கவனத்தைத் திசை திருப்பும் இடங்களுக்குப் போவதைத் தவிர்த்து விடவும். வியாபாரிகள் சமயோசிதமாகச் செயல்பட்டால், எதனையும் சாதிக்க முடியும். பொது வாழ்வில் இருப்பவர்கள் உங்கள் கோபமே பல சமயம் உங்களுக்கு வர வேண்டிய நன்மைக்குத் தடை போடாமல் பார்த்துக் கொள்ளுங்கள். கலைஞர்கள் ஆடம்பரச் செலவுகளைக் குறைத்து விட்டால், அவசியமான செயல்கள் நல்ல முறையில் நடைபெறும். உறவுகள் மற்றும் நண்பர்களோடு செலவு செய்யும் நேரம் இனிமையாகவும், மனதுக்கு இதமாகவும் அமையும்.

விருச்சிகம்: பெண்கள் உறவுகளிடம் இன்முகம் காட்டினால், அவர்களின் அன்பும் குறையாமலிருக்கும். மேலும் குடும்பத்தில் அனுசரித்து நடந்து கொண்டால், கணவன் மனைவி இடையே வாக்குவாதங்கள் ஏற்படாமல் இருக்கும். வியாபாரிகள் இந்த வாரம் வாகனப் பயணங்கள் மற்றும் பராமரிப்பிற்கெனக் கணிசமாகப் பணம் செலவு செய்யும் நிலை இருக்கும். முதியவர்களின் உடல் நலம் சீராக இருப்பதால், உற்சாகத்துடன் செயல்படுவார்கள். வழக்குகளில் நீங்கள் எதிர்பார்த்த நல்ல தீர்ப்பு கிடைக்கும். பொறுப்பில் இருப்பவர்கள் பணியாளர்களிடம் உங்கள் கோப தாபங்களைப் பிரதிபலிக்க வேண்டாம்.

தனுசு: வேலைக்குப் போகும் பெண்கள் இல்ல வேலை, அலுவலகப் பொறுப்பு இரண்டும் மோதாமல் பார்த்துக் கொண்டால், மன அமைதி குலையாமலிருக்கும். கலைஞர்கள் தொல்லை தந்து கொண்டிருப்பவர்களிடமிருந்து தள்ளியே இருப்பது நலம். கல்வியில் மேற்படிப்புக்கான வாய்ப்புகளுக்கு மாணவர்கள் எதிர்பார்த்த வங்கி உதவி கிட்டும். அடுத்தவர்க்கு உதவி செய்கையில் உங்கள் இரக்க குணத்தைப் பிறர் தவறாகப் பயன்படுத்த அனுமதிக்க வேண்டாம். பொது வாழ்வில் இருப்பவர்கள் எளிமையாய் இருத்தல், இனிமையாய் பேசுதல் இரண்டையும் கடைப்பிடித்தால், அனைவரும் உங்கள் பக்கமே இருப்பார்கள்.

மகரம்: பெண்கள் பக்குவமாக நடந்து கொண்டால், குடும்பத்தில் நிலவிய குழப்பங்கள் தானே நீங்கும். உங்கள் வரவு செலவுகள் கட்டுக்குள் இருந்தால், பொருளாதார ஏற்ற இறக்கங்களுக்கு இடமிராது. கலைஞர்கள் வாழ்க்கையில் உயர, வரும் வாய்ப்பு நல்லபடியாகப் பயன்படுத்திக் கொள்வது உங்கள் கையில் உள்ளது. தொழில் மற்றும் வியாபாரத்தில், கூட்டு முயற்சி முலம் புதிய முயற்சிகளை மேற்கொண்டால் அதிக லாபம் பெறலாம். நம்பிக்கையுடன் செயல்படும் குணத்தால் மாணவர்கள், தொட்ட காரியம் யாவிலும் எளிதான் வெற்றி கிடைக்கும்.

கும்பம்: சச்சரவுகள் பெரிதாகாமலிருக்க பெண்கள் இணக்கம், பொறுமை இரண்டையும் கடைப்பிடிப்பது அவசியம். மாணவர்கள் பேச்சில், படபடப்பும், பதற்றமும் காட்ட வேண்டாம். தொந்தரவுகள் புதிதாக முளைக்காமலிருக்க, பொது வாழ்வில் உள்ளவர்கள் இடம், பொருள் ஏவலறிந்து நடந்து கொள்வது நல்லது. சக ஊழியர்களின் ஒத்துழைப்பால் பணிகள் விரைந்து முடியும். வியாபாரிகள் பொருளாதாரத்தில் அகலக்கால் வைப்பதைத் தவிர்த்தால், செலவுப் பட்டியல் குறையும். கலைஞர்களின் வாழ்க்கை வளம் பெற்று விளங்க, உடன் இருப்பவர்களிடம் இதமாக நடந்து கொள்ளுங்கள்.

மீனம்: இந்த வாரம் வியாபாரிகள் பயணங்களில் கவனமாக இருந்தால் பொருள் இழப்பைத் தவிர்க்கலாம். பெண்கள் பிள்ளைகளின் ஆரோக்கியத்தில் தகுந்த கவனம் செலுத்தி வந்தால், அலைச்சல், வேதனை- இரண்டையும் கட்டுக்குள் வைத்து விடலாம். பெற்றோர்கள் பிள்ளைக்காக அதிகச் செலவுகள் செய்ய நேரிடும். உற்சாகம் குறையாமலிருக்க முதியவர்கள் உணவு, உரையாடல் இரண்டிலும் கட்டுப்பாடாக இருப்பது நல்லது. பணியிடங்களில் கவனமாக நடந்து கொண்டால், சிறு பிரச்னைகளால் சிந்தனை சிதறாமலிருக்கும். பொது வாழ்வில் இருப்பவர்கள் வேண்டாத செலவுகளை அதிகப்படுத்தாமலிருப்பது அவசியம்.

Print Friendly, PDF & Email
Download PDF
Share

உங்கள் கருத்துகளைத் தெரிவிக்க