வார ராசிபலன் 02.09.2012 முதல் 08.09.2012 வரை
காயத்ரி பாலசுப்ரமணியன்
மேஷம்: கலைஞர்கள் வீண் வதந்திகளை நம்பிச் செயலில் இறங்காமலிருந்தால், உங்களின் உயர்வு சீராக இருக்கும். கலைஞர்களுக்கு உங்கள் திறமைகளை மிளிரச் செய்யும் வாய்ப்புக்கள் பல தேடி வரும். அதனை நல்ல முறையில் பயன்படுத்துவது உங்கள் கையில்தான் உள்ளது! வியாபாரிகள் புதிய இடங்களில் பழக்கமில்லாதவர்களிடம் அதிகம் ஒட்டி உறவாட வேண்டாம். பெண்கள் குடும்ப விஷயங்களில் சிறிய சச்சரவுகளைப் பெரிதாக்காதவாறு சமாதானமாக நடந்து கொள்ளுங்கள். அலுவலகச்சூழலில் இருக்கும் இறுக்கம் தானே விலக, பணியில் இருப்பவர்கள் கோபதாபத்தைக் கட்டுக்குள் வைப்பது அவசியம். பொது வாழ்வில் இருப்போர்கள், எதிலும் நேர்மைக்கு இடம் கொடுக்க, வெற்றியோடு நல்மதிப்பும் உங்களுக்கே!
ரிஷபம்: மாணவர்கள் ஞாபக மறதியால் வரும் சிக்கல்களைத் தவிர்க்க, எதையும் உடனுக்குடன் குறித்து வைப்பது நல்லது. வியாபார வாய்ப்புக்களில், சில சந்தர்ப்பங்களில், புதிய ஒப்பந்தங்களைப் பெற கடும் போட்டி என்ற நிலையை எதிர்கொள்ள நேரிடும். எனினும் விடாமுயற்சியால் விரும்பியதை அடைந்து விடுவீர்கள். பெண்கள் வீண் செலவுகளைக் குறைப்பதில் சற்றுக் கவனமாக இருங்கள். சேமிப்பதற்கான வழி வகைகள் மேலும் அதிகரிக்கும் முதியவர்கள் உழைப்பிற்கு நேரம் ஒதுக்குவதைப் போல, ஆரோக்கியத்திற்கும் நேரம் ஒதுக்கினால், மருத்துவச்செலவுகள் கணிசமாகக் குறையும். வரவும் செலவும் சமமாக இருப்பதால், வியாபாரிகள் பண விவகாரங்களில் பிறர்க்கு சிபாரிசு செய்யும் முன் நன்கு யோசனை செய்து செயல்படுவது முக்கியம்.
மிதுனம்: குடும்பத்தில் மன வேற்றுமைகள் நீங்க பெண்கள் அனைவருடனும் மனம் விட்டுப் பேசுங்கள். குடும்பத்தில் மீண்டும் மகிழ்ச்சி மலர்ந்து விடும். கை வினைப் பொருட்களை வாங்கி விற்பவர்கள் தரத்தில் கவனமாக இருப்பது முக்கியம். வியாபாரிகள் தொழில் தொடர்பான பிரச்னைகளை வளர விடாமல் உடனுக்குடன் சுமூகமான முறையில் முடித்துக் கொண்டால், பொருளாதாரத்தில் தேக்க நிலை உருவாகாமலிருக்கும். மாணவர்கள் எந்தச் சூழலிலும், தவறான திசைப் பக்கம் திரும்பாமலிருங்கள்! வாழ்க்கை வசந்தமாகும். பொது வாழ்வில் இருப்பவர்கள் புதிய முயற்சிகளில் இறங்கும் முன் ஆலோசனை செயவது நல்லது.
கடகம்: நட்பின் இழை விலகாமலிருக்க மாணவர்கள் நண்பர்களுடன் தேவையற்ற விஷயங்களைப் பற்றிய விவாதங்களைத் தவிர்த்து விடவும். பிள்ளைகளின் கல்வி, திருமணம் போன்றவைகளுக்காகப் பெண்கள் தங்கள் சேமிப்பைக் கரைக்க நேரிடும். புதிதாக வேலைக்கு சேர்ந்துள்ளவர்கள் பணி புரியும் இடங்களில் முரண்பட்ட கருத்துள்ளவர்களுடன் மோதுதலைத் தவிர்க்கவும். மாணவர்கள் நண்பர்களின் சந்தோஷத்திற்காக அதிகப் பணம் செலவழித்துச் சிக்கலில் மாட்டிக் கொள்ளாதீர்கள்! பொது வாழ்வில் இருப்பவர்கள் தேவையில்லாமல் அதிக நேரம் கண் விழித்தலைக் குறைத்துக் கொண்டால், ஆரோக்கியத்தில் நலிவு உண்டாகாமலிருக்கும்.
சிம்மம்: மாணவர்கள் கல்வி சம்பந்தமான விஷயத்தைத் தள்ளிப் போடாமல் உடனடியாகச் செயலில் இறங்குங்கள். கிடைக்கும் பலனும், மகிழ்ச்சியும் இரட்டிப்பாகும். வியாபார விரிவாக்க விவகாரங்களில், பங்குதாரர்களுடன் கலந்து பேசிச் செயல்பட்டால், கருத்து வேறுபாடுகள் தோன்றாமலிருக்கும். வரும் வாய்ப்புகளைத் தட்டிப் பறிப்பவரிடம் சுய தொழில் புரிபவர்கள் உஷாராக இருந்தால், பொருளாதாரத்தில் தொய்வு ஏற்படாமல் பார்த்துக் கொள்ளலாம். பொது வாழ்வில் இருப்பவர்களுக்கு எதிரிகளின் தொல்லை சற்று அதிகரிக்கலாம். எனவே கவனமாகச் செயல்படுவது அவசியம். கலைஞர்கள் புதிய ஒப்பந்தங்களைப் பெற, சில நெருக்கடிகளைத் தாண்டிச் செல்ல வேண்டியிருக்கும்
கன்னி: மாணவர்கள் வாகனம் ஓட்டும் போது சிந்தனையைச் சிதற விடாமலிருப்பது நல்லது. பொது வாழ்வில் இருப்பவர்கள் பிறரிடம் உள்ள குறைகளை விடுத்து, நிறைகளை மட்டும் கணக்கில் கொள்ளுங்கள். உங்களுக்கு உதவுபவர்களின் எண்ணிக்கை மேலும் அதிகமாகும். வியாபாரிகள் பக்குவமாகச் செயல்பட்டால் நிலுவையில் உள்ள பாக்கியை வசூலிப்பதில் ஓரளவு வெற்றி கிட்டும். அலுவலக அளவில் பெண்கள் கிடைக்கும் வாய்ப்பை நல்ல முறையில் பயன்படுத்துவதில் கவனமாக இருந்தால், உங்கள் திறமைகளை பிறர் எளிதில் கண்டு கொள்ள முடியும். கலைஞர்களுக்கு வேலைப்பளுவும், வேண்டாத பிரச்னைகளும் வந்து சேரும்.
துலாம்: பெண்கள் அக்கம் பக்கம் இருப்பவர்களிடம் அதிக உரிமை எடுத்துக் கொள்ளாமல் அளவாகப் பழகி வருவது நல்லது. காரணமற்ற கோபம் மற்றும் எரிச்சலால் கலைஞர்களுக்கு வேலைகள் தேங்கும் நிலை உருவாகலாம். மாணவர்கள் இயன்ற வரை வீண் செலவுகளைக் குறைக்கப் பாருங்கள். வரவுக்குள் செலவுகள் அடங்கி விடும். பொதுவாழ்வில் இயங்கிக் கொண்டிருப்பவர்கள் தம்முடைய பொறுப்புகளை உணர்ந்து செயல்பட்டால், நல்ல பெயரைத் தக்க வைத்துக் கொள்ள முடியும். வியாபாரிகள் ஆரோக்கியமான போட்டி மூலம் வாடிக்கையாளர்களின் வரவைத் தக்க வைத்துக் கொள்வதுதான் புத்திசாலித்தனமாகும்
விருச்சிகம்: கர்ப்பிணிப் பெண்கள் ஆரோக்கியத்தில் சற்றுக் கவனம் எடுத்துக் கொண்டால் சுறுசுறுப்புடன் திகழலாம். போட்டிகள் மூலம் உங்கள் திறமை வெளிப்படும் வரை கலைஞர்கள் பொறுமையாய் இருப்பது நல்லது. வியாபாரிகள் புதுப்புது யுக்திகளை பயன்படுத்துவதன் மூலம், கூட்டுத் தொழிலில் இருக்கும் பிரச்னைகளின் தீவிரம் குறையும். இந்த வாரம் பொருளாதாரச் சிரமங்கள் குறைவதால், சுய தொழில் புரிபவர்கள் உற்சாகத்துடன் திகழ்வார்கள். முக்கிய பொறுப்புக்களை ஏற்றுள்ளவர்கள் பதவிக்குரிய அதிகாரம் வரம்பு மீறாமல் பார்த்துக் கொள்வது அவசியம். முதியவர்கள் சிறு உடல் உபாதைகளால், அவதிப்பட நேரிடும். சில நேரங்களில் உடன் பணி புரிபவர் ஏட்டிக்குப் போட்டியாகச் செயல் படுவர்.
தனுசு: வியாபாரிகள் பொருளாதாரத்தில் அகலக் கால் வைக்காமல், கட்டுக் கோப்பாய் செயல்பட்டால், லாபத்தின் வரவில் குறைவிராது. சுய தொழில் புரிபவர்கள் பிறரிடம் கைமாற்றாகப் பணம் பெற்று செலவழித்தால், வீண் தொல்லைக்கு ஆளாக வேண்டியிருக்கும். கணக்கு வழக்கு துறைகளில் உள்ளவர்கள், சில சங்கடங்களைச் சமாளிக்க, சந்திக்க நேர்ந்தாலும், தன் திறமையால் அனைத்தையும் சமாளித்து விடுவார்கள். சுய தொழில் புரிபவர்கள் எவரையும் எடுத்தெறிந்து பேசாமலிருந்தால், மன அமைதி கெடாமலிருக்கும். பொது வாழ்வில் இருப்பவர்கள் புதிய முயற்சிகளைச் சற்று ஆறப் போடுங்கள். வீண் சிரமம் குறையும்.
மகரம்: இந்த வாரம் மாணவர்கள் கல்லூரி விழா, போட்டிகள் ஆகியவற்றில் உற்சாகத்துடன் கலந்து கொள்வார்கள். நிர்ப்பந்தத்தின் பேரில் சலுகைகளை வலுக்கட்டாயமாய் பெற முயற்சிப்பவர்களோடு சுய தொழில் புரிபவர்கள் கூட்டு முயற்சியில் இறங்க வேண்டாம். பங்குச் சந்தை வியாபாரத்தில் இருக்கும் ஏற்றமும், இறக்கத்திற்கேற்ப வியாபாரிகள் செயல்படுவது அவசியம். வேலையில் இருப்போர்கள், பணச் செலவில் கட்டுப்பாடாய் இருந்தால், கடன்களைk கட்டுக்குள் வைத்துவிடலாம். பெண்கள் பல சமயம் நேரம் காலம் பாராமல் உழைக்க வேண்டியிருக்கும். பொது வாழ்வில் இருப்பவர்கள் வேலைப்பளு ஆரோக்கியத்தோடு மோதாமல் பார்த்துக் கொள்ளவும்.
கும்பம்: மாணவர்கள் பேச்சில் கவனம் செலுத்துவதைக் காட்டிலும், பணியில் கவனம் செலுத்தினால், பாராட்டு பல வந்து சேரும் என்பதை நினைவில் வைத்துக் கொள்வது நல்லது. சிலர் சொந்த வீடு வாங்குவதற்காக எடுக்கும் முயற்சிக்கு நல்ல பலனிருக்கும். சுய தொழிலில் இருப்பவர்கள் கவனமாக இருந்தால் பொருளாதார இழப்புக்களைத் தவிர்த்து விடலாம். சோம்பலின்றி சுறுசுறுப்பாகப் பாடுபடும் கலைஞர்களை புகழ், அந்தஸ்து பதவி அனைத்தும் தேடி வரும். வியாபாரிகள் எதிர்பார்த்த இடங்களிலிருந்து பணவரவு தாராளமாக இருக்கும். சில சமயம் கொடுத்த வாக்கைக் காப்பாற்ற பெண்கள் கடுமையாக உழைக்க நேரிடும்.
மீனம்: பெண்கள் முன்கோபம், பதற்றம் ஆகியவற்றிற்கு இடம் தராமல், நிதானமாகச் செயலாற்றி வந்தால், உறவுகள் உங்கள் அருகிலேயே இருக்கும். இந்த வாரம் வியாபாரிகளுக்கு முன்பிருந்த சுணக்கமான நிலை என்பது மறைந்து இணக்கமான சூழல் நிலவும். மாணவர்கள், கல்வித் தொடர்பாக மேற்கொள்ளும் பயணங்கள் வெற்றிகரமாய் அமையும். சுய தொழிலில் இருப்பவர்களுக்குப் பொருளாதாரம் சார்ந்த விஷயங்களில் சில குழப்பங்கள் உருவாகும் சூழல் இருப்பதால், தகுந்த ஆலோசனையுடன் செயல்பட்டு வாருங்கள். பொது வாழ்வில் இருப்பவர்கள் உடல் ஆரோக்கியத்தில் தகுந்த கவனம் செலுத்தி வாருங்கள், உங்களின் அன்றாட அலுவல்கள் சீராக நடைபெறும்.
