நத்தார் வாழ்த்துகள்

சக்தி சக்திதாசன்

அன்பினை அகரமாக்கி

அருளினை அகலமாக்கி

அகிலத்தின் அடிப்படை

அமைதி என்றுரைத்தார்

மானிடர் வாழ்வு தனில்

மாண்பு மிகு பண்பு

மாட்சிமை தனை நல்கும்

மனமிகு அன்பு என்றார்

ஏற்றம் காண வேண்டி

மாற்றம் தனைத் தேடி

சீற்றம் தனை அகற்ற

தோற்றம் கொண்டவர் இயேசு

நோக்கம் ஏதுமற்றோர் உலகில்

தேக்கம் கொண்டு வாழ்வதை

நீக்கம் செய்யவே பூமியில்

தாக்கம் கொண்டவர் கர்த்தர்

மண்ணில் நாம் இயற்றும் பாவங்களை

விண்ணின் தலைவன் மைந்தன்

தன்னில் ஏந்திக் கொண்டான்

முன்னில் நிகழ்ந்த வேதங்கள்

கள்ளில் போதையுற்று மயங்கும்

சொல்லில் கயமையுற்ற மாந்தருக்காய்

முள்ளில் கீரிடமணிந்து தேவமைந்தன்

சிலுவையில் தனை மாய்த்தனன்

மேரியின் அன்பு மைந்தன் தன்னின்

மேண்மைமிகு பிறந்தநாளில்

மேதினியில் மனிதராய் நாம் பிறந்து

மேன்மைகள் என்ன செய்தோம் ?

நத்தார் திருநாளில் தன்னில்

நற்திரு வாழ்த்துக்களுடன்

சிறியவன் இவனின் உள்ளம்

சிந்துது பல்லாயிர வாழ்த்துக்கள்

படத்திற்கு நன்றி: http://biblecliparts-jesuspictures.blogspot.com/2010/08/jesus-christ-wallpapers-and-christian.html

பதிவாசிரியரைப் பற்றி