ஜகத்குரு ஸ்ரீ விதுசேகர பாரதீ ஸ்ரீ சன்னிதானம்

-மீ.விசுவநாதன்

கொஞ்சும் அழகிய சோலை – குயில்
கூவுதோர் ஞானியின் பேரை!
நெஞ்சங் குவித்தே நின்றேன் – “விது
சேகர பாரதீ” கண்டேன்!         (கொஞ்சும் அழகிய சோலை) 

உன்னை ஆட்கொண்ட ஆசான் – ஓர்
உத்தம குருவம்ச யோகி!
தென்னை மரக்கிளை மீதில் – இளந்
தென்றல் சொன்னதிச் சேதி!   (கொஞ்சும் அழகிய சோலை)

இச்சை என்பதே இல்லா – இந்த
எளிய குருவைப் பாரீர்!
பச்சைக் கிளிகளின் கூட்டம் – வானில்
பாடிச் சென்றதைக் கேளீர்!      (கொஞ்சும் அழகிய சோலை)

அரிய தத்துவ வாக்கை – குரு
அறிந்து கற்றவர் என்றே
விரிந்த ஞானம் பெற்றோர் – தாள்
வியந்து வணங்கினர் இன்றே!   (கொஞ்சும் அழகிய சோலை)

பாமர மக்கள் நெஞ்சில் – இவர்
பட்டொளி விரிவதைக் காண்போம்!
சாமரம் வீசுது கல்வி – இவர்
சாரதை என்றே பணிவோம்!       (கொஞ்சும் அழகிய சோலை)

(இன்று 19.08.2015 புதன் கிழமை சிருங்கேரி
ஜகத்குரு அனந்தஸ்ரீ விபூஷித ஸ்ரீ விதுசேகர பாரதீ
ஸ்ரீ சந்நிதானம் அவர்களின் 23வது (வர்த்தந்தி) பிறந்த தினம்)

பதிவாசிரியரைப் பற்றி