கல்லாடம் – கல்லாடை – துவராடை

நூ. த. லோகசுந்தரம்

கல்லாடையும் துவராடையும் ஒரே பொருளைத் தரும் இரு சொற்களாகும். கல்/துவர் எனும் இரு சொற்களும் சிவந்த நிறத்தைக் காட்டும்.

தமிழகத்தும், (ஏனைய இடத்தும்) குன்றுகளில் மலைகளில் காற்று, மழை, பனி, வெப்பம் எனும் இயற்கையால் உருண்டு திரண்ட கற்கள், பெரும்பாலும், உடைபடாது. வெளிப்புறமாக உள்ள பரப்பினில், சற்றே பழுத்த சிவந்த சந்தன நிறமுடைய, அடுக்கல்களாகவும், பாறைகளாகவும் அறைகளாகவும் காணப்படுதலால் ‘கல்‘ எனும் சொல் பண்பாகு பெயராக அவ்விதச் செந்நிறத்தையும் காட்ட நின்றது.

“கோத்த கல்லாடையும் கோவணமும்” (2.103.2)
“கல்லாடை மேற்கொண்ட காபாலி காண்”(6.8.6)
“கல்லாடை புனைந்த காபாலி காண்” (6.92.2)
எனக் கல்லாடை எனும் சிவந்த நிற ஆடை புனைந்தவராகச் சிவபெருமான் தேவாரத்தில் போற்றப்படுகிறார்.

இந்து சமயம் எனும் போர்வைக்குள் அடங்கும் பற்பல நெறிகளைச் சார்ந்த துறவிகளும் பௌத்த மதத்தில் தோய்ந்து துறந்தோரும் சுற்றும் ஆடை அல்லது உடுத்தும் குப்பாயம் தனித்ததொரு செந்நிறம் உடையதாய் இருப்பதை நாம் அறிவோம். ‘கல்’ எனும் சொல் சிவந்த நிறத்தினுக்கு ஆளப்படுவதைக் ‘கல்லால மரம்’ எனும் சொல்லிலும் காணலாம். ஆலமரம் தன் பழம் வழி, (இவ்வாடைகளை விட சற்றே மாறுபட்ட சிவந்த நிறம் இருந்தாலும்) ‘சிவந்த நிற பழம் காய்க்கும்’ என இருமடி ஆகுபெயராக விளி பெற்றது.

“கல்லாலின் கீழிருந்த காபாலி காண்”%(6.8.8)%
“கல்லாலின் நீழலில் கலந்து தோன்றும்”(6.18.3)
“கல்லாலின் நீழற்கீழ் அறங்கண் டானை” (6.20.8)

என வரும் தோவாரப் பாடல் வரிகள் சிவபெருமான் ஞானகுருவாக ஆலமரத்தின் கீழ் இருந்து முனிகளுக்கு அறம் சொன்னதாகப் புராணங்கள் விவரிக்கும். ‘கல்லால்’ என்பதில் சிவந்த பழங்கள் ஈனும் ஆலமரம் என விதந்த விளியாகின்றது.

[[ஆல் எனும் சொல் நீரினைக் குறிக்கும். ஆலங்கட்டிமழை, ஆலவட்டம் (காற்றில் உள்ள நீர்த் திவலைகளால் ஞாயிற்றை, திங்களை சுற்றிச் சில நேரங்களில் தோன்றும் ஒளி வட்டம்) எனவும் நீர் நிலைகளை அணித்து அமைந்த ஊர்கள், ஆலப்பாக்கம், ஆலந்துறை, ஆலந்தூர் எனவும் நீர்வழிப் பெயர் பெறுவதைக் காணலாம். ஓர் பழங்கட்டுரையில் அறிஞர் மயிலை சீனிவேங்கடசாமி என்பார் தென் சென்னையில் இப்போது தியாகராய நகர் எனும் பெயர் தாங்கி மிளிரும் இடம் 1920-30 களில் ‘மயிலாப்பூர் ஏரி’ எனப் பெரிய ஏரியாக இருந்தது. அதன் உயர்ந்த கரையில் ஓர் அம்மன் கோயில் எழுந்ததற்கு ‘ஆல் அமர்ந்தாள்’ எனப் பெயர் அமைந்தமையைக் காட்டினார். அக்கோயில் ஆலமரத்தின் கீழ் அமையாமல் ஏரிக்கரையின்(நீர்) மேல் அமைந்தது. இன்றும் அக்கோயில் பழைய துண்டான கரை மேலேயே உள்ளது.

ஆலமரமோ அரசமர அத்திமர வகையினது ஆயினும் அரசமரம் போல் கற்களையோ வேறு மரம் போன்று பற்றுக்கோல்களைக் சார்ந்து வளராது. நீர் எப்போதும் தேங்கி நின்று சதுப்பு நிலமாக இளகிய மண்வாகு காணும் இடங்களிலும் வளரக்கூடியது. உயரும் சமயம் பரிணாம வளர்ச்சியால் காற்றில் விழாமலிருக்க, பிடிப்பிற்குப் போதிய திண்மை இருக்காது என்பதால் அங்கங்கே விழுதுகளைத் தாழ்த்தி, கிடையாக வளர்ந்து மண்ணைப்பற்றி வளரும். எப்போதும் ‘ஆல்’ இடையேயே சூழ்ந்து வளரக்கூடிய மரம் அச்சொல்லாலேயே ஆகுபெயராக’ ஆல்’ எனப் பெயர் பெற்றது. இதே வகையைச் சார்ந்த (சிதம்பரம் அடுத்த) காயல்களில் உள்ள ‘தில்லை’ மரங்களுக்கும் தாழை இனத்தில் உள்ளது போல் பரிணாம வளர்ச்சியில் பெருத்த அடிப்பாகத்தின் மேற்பகுதியிலிருந்தே பற்பல வேர் போன்ற சிறுத்த தண்டுகள் முட்டுக் கொடுத்துத் தாங்கி நிற்க வளர்ந்துள்ளமை காணலாம்]]

மேலும், ‘துவர்‘ எனும் சொல்லும் ‘சிவந்த‘ எனும் பொருளில் வருவதை நாம் நன்கு அறிவோம். மகளிரின் இதழ் ‘துவர்’ நிறமாகக் காட்டுவது இலக்கியங்களின் மரபு.

“நடம் தாங்கிய நடையார் நல்பவளத் துவர்வாய் மேல்
விடம்தாங்கிய கண்ணார் பயில்”(1.9.3) /மகளிர் இதழ்=பவழம்போன்ற செந்நிறம்/
“உடுக்கை பல துவர்க்கூறைகள் உடம்பிட்டு உழல் வாரும்”
(1.17.10)/பௌத்த துறவிகளின் ஆடை/
“படம் தாங்(கு) அரவல்குல் பவளத் துவர்வாய் மேல்
(1.82.9)/மகளிர் இதழ்=பவழம்போன்ற செந்நிறம்/
“துவர்தரு வல்ஆடையினாரும்” (3.43.9)/பௌத்த துறவிகளின் ஆடை/

துவரை- ‘துவரம்’ பருப்பில்’ காணும் ‘அரக்கு‘ போன்ற சிவந்த நிறம் சிறிதே கருத்ததாகக் காணும். எவ்வாறாயினும் ‘துவர்’ ‘கல்’ எனும் சொற்கள் ஏறக்குறையச் செம்மண் நிலம் போல் பரந்து பொதுவாகப் பல்வித சிவந்த நிறத்தைக் குறிக்க எழுந்ததை அறியலாம்.

அதான்று, ‘செவ்வாய்‘ எனும் கோளின் செந்நிறமும் ‘செம்மண் சேரி‘ எனும் இடப்பெயரில் வரும் செவ்வண்ணமும் ‘செக்கர்வான்’ என்பதிலுள்ள சிவப்பும் ‘சே’வல் (புள்-கோழி) ‘செந்நாயி’ லுள்ள செம்மையும் “கொவ்வைச் செவ்வாயில்”(கோவைக்காய்) ‘செந்தாமரை’யில் ‘செவ்வான் மதி‘யில் ‘தொண்டைச் செவ்வாய்‘(தொண்டை-ஓர்பயிரினம்), தத்தையின் செவ்வாய் குமுதச் செவ்வாய் முதலியவற்றில் உள்ள செம்மையும் (நிறம்) தம்தம் இடை சிறிது சிறிது வேறுபாடு மட்டும் உடையதே அன்றி மாறுபாடு உடையவை அல்ல.

%% = (…) எனப் பிறை அடைப்புக் குறிகளுள் வருவன சைவத்திருமுறை-பதிக-பாடல்எண்கள்.

படத்திற்கு நன்றி:http://www.hinduvedhas.com/hello-world/

பதிவாசிரியரைப் பற்றி