மண்ணுமே பொறுக்குமா!

எம்.ஜெயராமசர்மா

காந்திய தேசத்தில் கணக்கிலா அரக்கர்கள்
கண்ணியம் எல்லாமே காற்றிலே பறக்குது
நீதியை வேண்டியே போவது யாரிடம்
நிம்மதி இன்றியே நிற்குது தாய்க்குலம்

பாரத பூமியை அன்னையாய் பார்த்தவர்
ஊரெலாம் பெண்ணினை தெய்வமாய் கண்டவர்
தோலினை உரித்துமே பெண்மையை குலைப்பதா
யாருளார் பெண்ணினை தாங்கியே காத்திட

கட்டிடம் பெருகுது கல்வியும் வளருது
துட்டரும் வருகிறார் துயரமும் பெருகுது
சட்டமோ இருட்டினில் தானுமே நிற்குது
நட்டமே நாளுமே பெண்களின் வாழ்விலே

வாய்மையின் வடிவமாய் வள்ளுவன் வந்தனன்
தாய்மையின் உருவமாய் சாரதா வாழ்ந்தனள்
ஏழ்மையில் இறைவனை கண்டநம் இந்தியா
எப்படி தொலைத்தது இரக்கத்தைப் பெண்ணிடம்

காணுகின்ற இடமெங்கும் காமுகரின் கூட்டம்
கற்பு பறிபோயிடுமோ பெண்கள் பெருஏக்கம்
ஏனிந்த நிலையென்று ஏக்கமொரு பக்கம்
இவை தடுக்க யாருள்ளார் என்பதேயேக்கம்

பெண்ணினை வதைப்பது பேதமை அல்லவா
கண்ணென பெண்ணினை காத்திடல் வேண்டுமே
எண்ணியே பார்க்காது இருந்துமே விட்டிடில்
மண்ணிலே வாழ்வதில் என்னதான் இருக்குது!

http://www.gender-focus.com/2010/05/22/women-behind-bars/