படக்கவிதைப் போட்டி – 192

Comments

3 responses to “படக்கவிதைப் போட்டி – 192”

1. December 21, 2018

   ஆ. செந்தில் குமார்

   பச்சிளங் குழந்தையின் பால் மனது…
   ●●●●●●●●●●●●●●●●●●●●●●●●●●●●●●●
   -ஆ. செந்தில் குமார்.

   எள்ளளவும் அச்சமில்லை.. எனக்கு
   எதிரியென்று எவருமில்லை..
   அள்ள அள்ளக் குறையாத..
   அளவற்ற செல்வமில்லை..
   உள்ளத்தில் சூது வாது..
   உள்ளநிலை எனக்கில்லை..
   நல்லது நடக்க வேண்டும்.. என்றெப்போதும்
   நான் ஏங்கவில்லை..
   அடுத்தவர் வாழ்வு போன்று..
   வாழுமெண்ணம் எனக்கில்லை..
   அடுத்தவேளை உணவைப்பற்றி..
   ஒருபோதும் நான் நினைத்ததில்லை..
   கடுகடுத்த முகம் இல்லை..
   சிடுசிடுத்த மொழி இல்லை..
   எனக்கே வேண்டு மென்று..
   எதையும்நான் கொள்வதில்லை..
   முதன்மையாய் இருக்க வேண்டும்..
   என்ற எண்ணம் எனக்கில்லை..
   வெள்ளந்தி மனதைத் தவிர..
   வேறொன்றும் என்னிட மில்லை..
   ஆதலால் நிம்மதியாய் உறங்குகின்றேன்..
   எதைப்பற்றியும் எனக்கு கவலையில்லை..
2. December 21, 2018

   ராஜ்மோகன் கிருஷ்ணராஜ்

   உறங்கிடு என் செல்லமே

   உறங்கிடு என் செல்லமே
   கனவு காணுங்கள் என கலாம் அவர்கள் சொன்னதை கேட்டு
   கண்கள் மூடி கனவுகள் காண உறங்கிடு என் செல்லமே
   கல்வி என்னும் பெயரில் கழுதைகளாய் புத்தக மூட்டை சுமந்து
   வளைந்த முதுகுகளோடு வளம் வரும் பிள்ளைகள் இங்கே
   விழித்திடாதே இன்னும் கொஞ்சம் உறங்கிடு என் செல்லமே
   காலுன்றும் காலம் வரும் முன்னே நெஞ்சில் காதல் வேரூன்ற
   கிடைக்காத காதலுக்கு இவர் உயிரை இழந்து விடும் விடலை பூக்கள் இங்கே
   விழித்திடாதே இன்னும் கொஞ்சம் உறங்கிடு என் செல்லமே
   வேலை கிடைக்காமல் பசி போக்கும் பாதி வயிறு கஞ்சிக்காக
   அன்னாடம் காட்சிகளாய் பெருகிவரும் பட்டதாரி கூட்டம் இங்கே
   விழித்திடாதே இன்னும் கொஞ்சம் உறங்கிடு என் செல்லமே
   விட்டுக்கொடுக்க மனம் பிடிக்காமல்
   விவாகரத்து வாங்கி திசை மாறி செல்லும் உறவுகள் இங்கே
   விழித்திடாதே இன்னும் கொஞ்சம் உறங்கிடு என் செல்லமே
   வழி நடத்த தெரியாத தலைவர்களை தவறாய் தேர்ந்தெடுக்க
   விழி பிதுங்க அவதிப்படும் மாந்தர்கள் இங்கே
   விழித்திடாதே இன்னும் கொஞ்சம் உறங்கிடு என் செல்லமே
   அன்பாய் ஆதரவை இருந்த பெற்றோர்கள் ஆசிரமங்களில் அடைக்கலம் தேட
   பெற்றோரை விட்டு செல்லும் பிள்ளைகள் நிறைய இங்கே
   விழித்திடாதே இன்னும் கொஞ்சம் உறங்கிடு என் செல்லமே
   இந்தியாவின் வரும்கால தூண் நீ அத்தனையும் மாற்றி எழுத்தும் காலம் வரும்
   அப்போது விழித்திடு வீறுகொண்டு எழுந்திடு அதுவரை
   விழித்திடாதே இன்னும் கொஞ்சம் உறங்கிடு என் செல்லமே
3. December 22, 2018

   Shenbaga Jagatheesan

   கண்ணுறங்கு…

   கண்ணுறங்கு கண்ணுறங்கு கண்ணுநீ யுறங்கு
   காணவேண்டாம் காசினியோர் செயலை யெல்லாம்,
   உண்மைதனை மறைத்துவைத்தே மண்ணில் மாந்தர்
   உருப்படாத தவறையெல்லாம் செய்கின் றாரே,
   பண்பதனை மறந்தேதான் பற்பல குற்றம்
   பயமிலாமல் செய்தேதான் அழிகின் றாரே,
   கண்ணதிலே நீயுமதைக் காண வேண்டாம்
   கண்ணுறங்கு கண்ணுறங்கு பிள்ளைநீ யுறங்கு…!

   செண்பக ஜெகதீசன்…