திருக்காட்சித் திருவிழா

ரகுதேவன்

இயற்கையில் அங்கங்கொண்ட நானும்
எம்புறச் சேரிகளும் –
வன்முறையால் சூறையாடப்பட்டுக் கிடக்கிறோம் – இதோ
என் உடலிலும் இதயத்திலுமுள்ள
காயங்களைப் பாருங்கள் – இவையெல்லாம்
உன்னால் ஏற்பட்டவை
காயங்கள் சில ஆறி வடுவாகியிருக்கின்றன
புண்கள் சில ஆறாமல் கொந்தி சீல்பிடித்து
நெரியேறி ரணமாகியிருக்கிறது – இந்த
உணர்வுப் படையலேந்தி எல்லாக் காலத்திலும்
ஆகக் கடைசியிலிருக்கும் எம்மை உம் முன்கொணர
நீதியின் நல்நிமித்தம் பார்த்துக்கொண்டிருக்கிறேன்
நம்பிக்கை எம்மில் ஆழப் பதிந்து
ஆத்தும நங்கூரமாய் இருக்கிறது – எம்
ஆவேசப் பெருவெறுப்பைத் தணித்து – உம்
வாதை எமை இனி நெருங்காதிருக்க
வாழ்வளிக்கும் வார்த்தையைக் கண்ணால் கண்டோம்
தொட்டுணர்ந்தோம் சுவாசிக்கப் போகிறோம்
பகல் மறுத்த சமூகமானதால் – இப்பொழுதும்
இருளோடு இருளாய் மறைந்து வாழ்கிறோம்
காடோடிக் குடிகளென – அதோ
நீல வான்வெளியில் விண்மீன் எழுந்து திசைகாட்டி வழிநடத்த
தேடிக் கண்டடைந்தோம்
விடுதலை என்னும் மறைபொருளை
இந்நற்செய்தி அறிவிப்பை
திருக்காட்சித் திருவிழாவெனக் கொண்டாடப் போகிறோம்
வாருங்கள் திருவிருந்து உண்ண
உன்னில் கீழானவனென்று இனியும் எனை ஒதுக்காமல்
என் இல்லத்திற்கு அன்புள்ளத்தோடு