கருப்பு வெள்ளை
பாஸ்கர்
அந்த ஓரத்தில் நிற்பது மிலிட்டரி மாமா,
கருப்பு உதடு அவருக்கு, சதா சிகரெட்
வலப்பக்கத்தில் சங்கரன், மிருதங்கத்தில் பேசுவான்
இடப்பக்கம் அரைப்பாவடையில் பக்கத்து வீட்டு சூசன்-
நடுவில் நிற்பது ரங்கநாதம். பெரிய பாஷ்யகார்
பக்கத்தில் வெட்கத்துடன் பூமா மாமி, -வெகுளி
இந்த ஓரம் சீமான், என்னா உசரம். கபடியில் கெட்டி
கீழே அமர்ந்திருப்பது ஜானு-.மோர்ஸ் கோட் மன்னன்
அவனின் இடப்பக்கம் மைதிலி .-அடிவாங்கியே செத்துப் போனாள்
வலப்பக்கம் ரங்கன்.—ஜோபியில் எப்போதும் மூக்குப்பொடி டப்பா
தள்ளியே நிற்பது சாரதி, குடிப்பான், பரம சாது
அரை நிஜாரைப் பிடித்துக்கொண்டு நிற்பது நான்.
கருப்பு வெள்ளைப் படம் இருந்தால் மோந்து பாரும்
காலத்தைத் தள்ளிக் காற்றோடு கலந்து பின்செல்வீர்.
