home-litஇலக்கியம்கவிதைகள்

நத்தார் வாழ்த்துக்கள்

சக்தி சக்திதாசன் 

தேவபாலகன் பிறந்தநாள்
தேவன் யேசுவின் பெருநாள்
அன்பு வழியின் திருநாள்
அகிலம் மகிழும் நன்னாள்

முள்ளில் கீரீடம் அணிந்தே
முழுமுதற் பொருளை உணர்த்தியவன்
சிலுவையில் ஆணியைத் தாங்கியே
சிந்தையில் நல்வழி புகுத்தியவன்

மூன்று முதுபெரும் அறிஞர்
முழுதாய் அவன் பிறப்பறிந்தனர்
மாட்டுத் தொழுவமதில் யேசுபிரான்
மாதா மடியில் தவழ்ந்தவன்

கருணையின் பிறப்பிடம் அறிந்தே
கவியரசர் யேசுகாவியம் படைத்திட்டார்
இனித்திடும் வகையில் வாழ்க்கையை
இயக்கிட இயேசு அருளினன்

எதையும் தாங்கிடும் இதயம் இருந்தால்
என்றும் உண்மையாய் வாழ்ந்திடலாம்
இதையும் சொன்னவர் கர்த்தரே
இதயம் தன்னில் இருத்திடுவோம்

கர்த்தர் காட்டிய வழியினில் என்றும்
காண்பது அன்பின் ஆளுமையே
அன்பைக் கொடுத்து அன்பை வாங்கி
அடைவது ஒன்றே அழியா இலாபம்

மனிதராய் அனைவரும் பிறந்திடலாம்
மனிதராய் வாழ்வது சுலபமா?
மண்ணில் மனிதத்துவம்  உணர்த்திய
மாபெரும் ஞானி இயேசுபிரானே !

அடுத்தவர் வாழ்வைச் சிறப்பிக்க
அன்புடன் துன்பத்தை ஏற்றிட்டு
மறு கன்னத்தை காட்டிடும் போது
மலர்ந்திடும் அன்பு என்றுரைத்தான்

தேவன் இயேசுவின் பிறந்தநாளில்
தோன்றட்டும் அன்பு வழிமுறைகள்
அனைவரும் சிறப்புடன் வாழ்ந்திட
அன்பான நத்தார் வாழ்த்துக்கள்.

படத்திற்கு நன்றி: http://www.shutterstock.com/pic-7876015/stock-photo-jesus-christ-virgin-mary-and-joseph-in-a-crib-scene.html

Print Friendly, PDF & Email
Share

உங்கள் கருத்துகளைத் தெரிவிக்க