நவராத்திரி நாயகியர் (3)
திருவானைக்கோவில் – அகிலாண்டேஸ்வரி
நீரினில் சிலையெடுத்து
நீலகண்டன் அருள்பெற்று
சிவஞானம் கேட்டறிந்த
சிவகாம சுந்தரியே !
தாடங்கம் காதணிந்து
தந்தமுகனை முன்கண்டு
தாயன்பைத் தரணிக்குத்
தந்தருளும் தயாநிதியே !
தாம்பூலம் வாயில் தந்து
தமிழினிலே சொல் தந்து
காளமேகம் கவி சொல்லக்
காவியம் படைத்தவளே !
திருநீறுச் சித்தனவன்
திண்ணமுடன் மதில்கட்ட
திருக்கோயில் கொண்டவளே
திருவரங்கன் சகோதரியே !
பாலுண்ணும் குழந்தைகூடப்
பாட்டெடுக்கும் உனைக்கண்டால் !
பள்ளியறை செல்லாத உன் காதல்
பாடிடவே நாள்முழுதும் நவராத்திரி!
காவிரி நதியினில் நீராடிக்
கரையினில் வாழ்ந்திடுமுனைப் பாடிக்
கலங்கிடும் நெஞ்சங்கள் பல கோடி,
காத்தருள், தாயே! நீ வாழி !
