நவராத்திரி நாயகியர் (5) காஞ்சி காமாட்சி
க. பாலசுப்பிரமணியன்
கண்ணுக்கு இனியவளே
கருத்துக்குக் கனிந்தவளே
கலையனைத்தும் சிலையாகக்
காஞ்சியில் அமர்ந்தவளே !
காஞ்சிப் பட்டழகு ,
கண்ணிரண்டும் உனக்கழகு !
கையருகில் கரும்பழகு ,
காமாட்சி உன் அருளழகு !
பிறையுண்டு தலைதன்னில்
பரிவுண்டு கண்ணிரண்டில்
பயம் நீக்கும் அபயம் முன்னில்
பார்த்தாலே விலகும் பாவம் மண்ணில் !
வேதத்தை வித்தாக்கி
வேட்கையை முடிவாக்கி
முக்தியை முதலாக்கி
பக்தியைத் தந்தவளே! !
பத்மாசனத்தில் உனைக்கண்டால்
பாழ்வினைகள் ஓடிவிடும் !
பார்வதியே, பகவதியே
பாசாங்குசம் தரித்தவளே !
சொத்தெல்லாம் எனக்கெதற்கு?
சொந்தமாய் நீயிருக்க !
சுமையில்லா வாழ்விற்குச்
சுவையான அருட்சுனையே !
சக்திபீடம் உனதன்றோ !
சாந்தத்தின் உருவமே நீயன்றோ !
நவரசத்தில் கருணையின் வடிவன்றோ !
நவராத்திரி நாயகி நீயன்றோ !!
