மார்கழி மணாளன் 18 திருநின்றவூர் – பக்தவத்சலப் பெருமாள்
க. பாலசுப்பிரமணியன்
வான்வீதி வலம் வந்த வருணன் மகளும்
விண்வெளி போலொரு மண்வெளி கண்டாள் !
கண்விழியில் விண்வெளியைக் கொண்டவளே
மண்வெளியில் கண்விழியால் கோயில் படைத்தாள் !
திருநின்ற ஊரிலே வான் வந்த திருநின்றது
திருமகளின் மனம் நிறைந்த எழில் வந்தது !
திருமகளின் வழியே திருமாலின் மனம் வந்தது
திருமாலின் மனத்தோடு திருவருளும் வந்தது !
பார்த்தனுக்கே கீதை சொன்ன பக்தவத்சலன்
பாவம் அழிக்க பத்து வண்ணம் கண்டவன்
வில்லான் வராகன் வேதியன் யாதவன்
நாரணன் நரசிம்மன் நாமங்கள் ஆயிரம் !
நின்றவன் நிறையவன் நீலன் நிகரில்லான்
நிலமகள் அலைமகள் துணை கண்டான் !
வல்லான் நல்லான் வறுமையை அறுப்பான்
விடுகதை வாழ்விற்கு விடைகள் தருவான் !
அவலின் அன்பிற்குப் பொன்னைத் தந்தவன்
அனுமன் அன்பிற்குத் தன்னைத் தந்தவன்
அரக்கன் தம்பிக்கு அரியணை தந்தவன்
அடியவர் பக்திக்கு எதையும் தருபவன் !
குறைவின்றிப் பொருளெல்லாம் குவலயத்தில் வைத்தான்
குறைதேடும் மனம் மட்டும் கூட்டினில் வைத்தான்
கணநேரம் நினைப்போரிடமும் கருணை வைத்தான்
காதலித்த நெஞ்சங்களில் தன்னை வைத்தான் !
