சிவபிரதோஷம்

“சுடலையாண்டி”

(மீ.விசுவநாதன்)

ஊருக்கு வெளியிலே சுடலை – அங்கு
உயிரோடு வாழ்கிறா(ன்) ஒருவன்
நீராலே ஆனதாம் உடலை – விழி
நெருப்பிட்டுப் பொசுக்குறா(ன்) ஒருவன் !

வீபூதிச் சாம்பலால் அழகை – ஒளி
விளக்காகச் செய்கிறா(ன்) ஒருவன்
மேதாவி பாமரன் வரவை – சிவ
விருந்தாக அழைக்கிறா(ன்) ஒருவன் !

பேசாமல் பேசியே உயிரை – தன்
பிடிக்குள்ளே வைக்கிறா(ன்) ஒருவன்
தூசான உலகென உணர – திரு
ஓடுதனைக் காட்டுறா(ன்) ஒருவன் !

தானெனும் அகந்தையே அழிய – சிவத்
தண்மையுடன் அணைக்கிறா(ன்) ஒருவன்
தூயதோர் இறைமையே வழிய – எங்கும்
துடிப்போடு இயங்குறா(ன்) ஒருவன் !

நானவனை உணர்கிற வழியை – சிவ
நாமத்தா(ல்) ஓதினா(ன்) ஒருவன்
ஆனதனால் அடங்கினே(ன்)அகத்தில் – சிவ
அமுதாகக் கிடக்கிறா(ன்) ஒருவன் !

(பிரதோஷ தினம் : 02.06.2016)

பதிவாசிரியரைப் பற்றி

மீ. விசுவநாதன்

பணி : காட்பரி நிறுவனம் (ஓய்வு) தற்சமயத் தொழில் : கவிதை, சிறுகதை, குறுநாவல், கட்டுரைகள் எழுதுவது. இலக்கியம், ஆன்மீகச் சொற்பொழிவு. பள்ளி மாணவ, மாணவியர்களுக்குக் கதைகள் சொல்வது. சுபமங்களா, கணையாழி, தினமணிகதிர், தாமரை, அமுதசுரபி, கலைமகள், புதியபார்வை ஆகிய இதழ்களில் சிறுகதைகள் வெளியாகி இருக்கிறது.

நூல்கள்: “இரவில் நனவில்” என்ற சிறுகதைத் தொகுதி, மனிதநேயம், “காலடி சங்கரரின் கவின்மிகு காவியம்” கவிதைத் தொகுதிகள்.
இரவில் நனவில் சிறுகதைக்கு கோயம்புத்தூர் “லில்லி தேவசிகாமணி” இலக்கிய விருது இரண்டாம் பரிசு கிடைத்தது.(வருடம் 1998):
பாரதி கலைக்கழகம் 2003ம் ஆண்டு “கவிமாமணி” விருதளித்துக் கௌரவம் செய்தது.

See author's posts