அழவிட்டுப் போனதேனோ !

எம் . ஜெயராமசர்மா …. மெல்பேண் … அவுஸ்திரேலியா

பாடியகுயில்   பறந்தோடிவிட்டது
பாட்டுக்கேட்ட  யாவருமே
பரிதவித்தே நிற்கின்றார்
பலமொழிகள் குயில்காணாப்
பார்த்தேங்கி அழுகிறது
பாரதத்தாய் இசைமகளைப்
பறிகொடுத்து ஏங்குகிறாள்  !

இசைஞானி வசமாகி
இசைத்தபாடல் எத்தனையே
எம்ரகுமான் இசைக்கோப்பில்
இனித்தபாடல் இதயமெலாம்
இசைமகளை இனங்கண்ட
இசையாளர் பலருமிப்போ
இசைமகளின் முகங்காணா
ஏக்கமுற்று இரங்குகின்றார் !

சிங்கார  வேலனைத்
தந்துவிட்ட இசைக்குயிலைச்
சிந்தித்து சிந்தித்து
இசையுலகு அழுகிறது
திரையுலகை இக்குரலே
திகைப்பூட்ட வைத்ததனால்
திரையுலகு  இப்போது
தேம்பிநின்று அழுகிறது !

பத்தாயிரம்   பாடல்கள்
பன்மொழியில் பாடியதால்
பலருமே   இசைக்குயிலை
பார்த்துமே வியந்தார்கள்
பரிசுபல  குவிந்தன
பாராட்டும் பெருகியது
பாடிநின்ற   பூங்குயிலோ
பாரைவிட்டுப் பறந்ததுவே !

யாருமே மறக்கார்கள்
ஜானகி அம்மாவைக்
கானக்   குயிலாக
கலக்கினார் இசையுலகை
அவர்குரலில் இனியுலகில்
ஆரிசைக்க வருவார்கள்
அக்குரலை கேட்காமால்
அழவிட்டுப் போனதேனோ!

Share

About the Author

ஜெயராமசர்மா

has written 316 stories on this site.

பேராதனை பல்கலைகழக தமிழ் சிறப்புப் பட்டதாரி.அத்தோடு, கல்வியியல் துறையில் டிப்ளோமா, சமூகவியல் துறையில் டிப்ளோமா,கற்பித்தல் நுணுக்கத்தில் முதுகலை தத்துவமானி பட்டங்களையும் பெற்றவர்.கல்வித்திணைக்களத்தில் உதவிக் கல்விப் பணிப்பாளராகவும்,வட இலங்கை புனித பிரான்சிஸ் சேவியர் செமினறியில் பகுதி நேர‌ தமிழ், இந்துகலாசார விரிவுரையாளராகவும், யாழ்/ பேராதனை பல்கலைக்கழகங்களின் வெளிவாரி பட்டப்படிப்புப்பிரிவில் தமிழ் விரிவுரையாளராகவும்,இலங்கை ஒலிபரப்புக்கூட்டுத்தாபனத்தில் அறிவிப்பாளராகவும், நாடகத்தயாரிப்பாளராகவும் கடமையாற்றியுள்ளார். மாற்றம்,உதயன்,ஈழ நாடு, சிந்தாமணி, உதயசூரியன் இந்துசாதனம், மெல்லினம், உதயம்,பத்திரிகைகளில்.. கவிதை, கட்டுரை,சிறுகதை,விமர்சனம், ஆகியவற்றை எழுதியுள்ளார்.10க்கு மேற்பட்ட நூல்களையும்,100 ஓரங்க நாடகங்களையும்,10க்கு மேற்பட்ட வில்லுப்பாட்டுக்களையும்,20க்கு மேற்பட்ட நாட்டிய நாடகங்களையும், எழுதியுள்ளதோடு.. "முதற்படி" என்னும் குறுந்திரைப்படத்துக்கு கதை வசனம் எழுதி நடித்து 2007ல் அவுஸ்த்திரேலியாவில் மெல்பேண் நகரில் வெளியீடும் செய்யப்பட்டது.ஈழத்தில் பல ஸ்தலங்க‌ளுக்கு ஊஞ்ஞல் பாடியுள்ளதோடு.. அண்மையில் மேற்கு அவுஸ்த்திரேலியா பேர்த் மாநகரில் கோவில்கொண்டிருக்கும் பாலமுருகப்பெருமான் மீதும் ஊஞ்ஞல் பாடியுள்ளார்.2008ல் மதுரைமாநகரில் நடைபெற்ற அகில உலக சைவ‌ சித்தாந்த மாநாட்டில் புராணப்பகுதிக்கு தலைவராகவும், ஆய்வுக் கட்டுரையாள‌ராகவும் விளங்கியுள்ளார்.அண்மையில் ஐரோப்பிய நாடுகளுக்கு சுற்றுப்பயணம் சென்று அங்கெல்லாம்.. தமிழ்,கலாசாரம், இந்துசமயம்,சம்பந்தமாக விரிவுரைகள் ஆற்றியுள்ளார்.லண்டனில் ஜி.ரி.வி. நிலையத்தார் சமயம்,தமிழர்பண்பாடுசம்பந்தமாக இரண்டு தினங்கள் பேட்டி கண்டு நேரடியாக ஒளிபரப்புச்செய்தனர். தற்போது மெல்பேண் தமிழ்ச்சங்கத்தின் ஆலோசகராகவும்,விக்டோரியா இந்து கல்விமையத்தின் ஆலோசகராகவும், தமிழ் அவுஸ்த்திரேலியன் சஞ்சிகையின் இணை ஆசிரியராகவும் விளங்குகிறார். பூர்வீகம் தமிழ்நாடு தாராபுரம். வளர்ந்தது, படித்தது, வேலை பார்த்தது, யாவுமே இலங்கையில்..தற்போது குடியுரிமை பெற்றிருப்பது அவுஸ்த்திரேலியாவில்.

Write a Comment [மறுமொழி இடவும்]

Security Question: (* Solve this math to continue) *


Copyright © 2015 Vallamai Media Services . All rights reserved.
வல்லமை மின்னிதழில் வெளியாகும் ஆக்கங்கள், ஆக்கியவரின் தனிப்பட்ட கருத்துகளே; வல்லமையின் கருத்துகளாகக் கொள்ள வேண்டாம்.