Author: பவள சங்கரி

வீரச்சிறுவன்!

பவள சங்கரி

வீரர்கள் உருவாக்கப்படுவதில்லை. அவர்கள் வீரர்களாகவே அவதரிக்கிறார்கள். விவேகமும், வீரமும் இணை பிரியாதது!

போக்குவரத்து நெரிசல் மிகுந்த கொல்கத்தா சாலையொன்றில் வெகு காலம் முன்பு நடந்த உண்மைச் சம்பவம் இது. குதிரை வண்டிகளே முக்கியமான போக்குவரத்து சாதனமாக இருந்த காலம் அது. ஒரு தாயும், குழந்தையும் குதிரை வண்டியில் பயணம் செய்துகொண்டிருக்கிறார்கள். என்ன காரணமோ தெரியவில்லை. அந்தக் குதிரைக்கு திடீரென்று மதம் பிடித்துவிட, சாலையில் கண்மண் தெரியாமல் தாறுமாறாக வண்டியை இழுத்துக்கொண்டு ஓடுகிறது. கட்டுப்படுத்த இயலாத வண்டிக்காரரும் கீழே தள்ளப்பட்டார். வேடிக்கை பார்த்துக்கொண்டிருந்த மக்கள் செய்வதறியாது திகைத்து ஓடுகின்றனர். என்ன அதிசயம்! ஒரு சிறுவன் மட்டும் அந்த வேகத்தைக் கிழித்துக்கொண்டு அதனூடே புகுந்து அந்தக் குதிரையை கட்டுப்படுத்தி அந்தத் தாயையும், குழந்தையையும் காப்பாற்றிவிடுகிறார். யாரந்த பிறவி வீரர்? பிற்காலத்தில் சுவாமி விவேகானந்தர் என உலக மக்களால் கொண்டாடப்பட்ட சிறுவன் நரேந்திரன்தான் அந்த வீரச்சிறுவன்!

June 9, 2016
மாணவர்களுக்கு ஓர் நற்செய்தி!

பவள சங்கரி

“அனைவருக்கும் கல்வி” என்ற திட்டத்தின் கீழ் தாழ்த்தப்பட்ட மக்கள், மலைவாழ் மக்கள் மற்றும் வருவாய் குறைந்த பிரிவினருக்காக அனைத்துப் பள்ளிகளிலும், 20 சதவிகிதம் இடஒதுக்கீடு செய்யப்பட்டுள்ளதாக அரசாணை தெரிவிக்கிறது. எத்துணைப்பெரிய பள்ளிகளாக இருப்பினும் இப்பிரிவினருக்கு நன்கொடை இன்றி பள்ளிகளில் சேர அனுமதி வழங்குவது சட்டப்பூர்வமாக்கப்பட்டுள்ளது. அந்தந்த பகுதிகளிலுள்ள கல்வி அலுவலர் அலுவலகங்களில் இதற்கான விண்ணப்பப்படிவங்களைப் பெற்றுக்கொள்ளலாம். சேர்க்க மறுக்கும் பள்ளிகளின் மீது சட்டப்படி நடவடிக்கை எடுக்கவும் வழிவகுக்கப்பட்டுள்ளது. நல்லதொரு வாய்ப்பினை தேவையானவர்கள் பயன்படுத்திக்கொள்ளுங்கள்.

June 6, 2016
உலக சுற்றுச்சூழல் தினம்!

இன்று உலக சுற்றுச்சூழல் தினம்.. சுற்றுச்சூழல் மாசுபடாமல் காப்பதற்கு என்ன செய்யலாம்? கோவையில் ஒரு பிரதான சாலையில் வாரத்தில் ஒரு நாள் ஞாயிற்றுக்கிழமையன்று எந்த வாகனங்களும் செல்லாமல் குழந்தைகள் மகிழ்ச்சியாக விளையாடவும், சுற்றுச்சூழல் மாசின்றி இருக்கவும் வழிவகுக்கும் வகையில் இந்து நாளிதழ், ரோட்டரி சங்கம், மற்றும் சில தன்னார்வத் தொண்டு நிறுவனங்களும், மக்களும் இணைந்து சாதனை படைத்துக்கொண்டிருக்கிறார்கள். அவர்களை மனதார வாழ்த்துவோம்! நல்ல ஆக்கப்பூர்வமான விழிப்புணர்வு செயல்! தொடர வாழ்த்துகள்.

June 5, 2016
பொதுநலம்!

பவள சங்கரி

பௌதீக உலகின் முடிசூடா மன்னன் சர்.சி.வி.இராமன் தமது அரிய ஆய்வுகளுக்காக நோபல் பரிசு பெற்று உலக அரங்கில் நம் பாரதத்தின் பெருமையை உயரச்செய்தவர். முதலில் வங்காள மாநிலத்தின் உதவி கணக்காய்வுத் தலைவராக [Accontant General] ஆங்கிலேயர் ஆட்சிக்காலத்தில் மாநிலத்தின் உயர் பதவியில் இருந்தவர். பகல் நேரங்களில் அலுவலகப் பணியை கவனித்துவிட்டு ஓய்வு நேரத்தில், பௌதிகத்தின் மீது தான் கொண்ட அதிக ஈடுபாடு காரணமாக, கல்கத்தா பல்கலைக் கழகத்தின் விஞ்ஞான ஆராய்ச்சிக் கூடத்துக்குத் தினமும் அதிகாலையிலும், மாலையிலும் சென்று தமது பௌதிக ஆய்வுப் பணிகளை மேற்கொண்டிருந்தார். இவருடைய நேர்மையான பணித்திறத்தினால் அலுவலகத்தில் இவருக்கு மேலும் பதவி உயர்வு பெறுவதற்கான வாய்ப்பும் அதிகமாக இருந்தது.

இந்த நேரத்தில்தான் கல்கத்தா பல்கலைக்கழக துணை வேந்தர் சர்.சி.வி. இராமனிடம் தம் அலுவலக, கணக்காய்வுத் தலைவர் பதவியை விட்டுவிட்டு முழு நேர பௌதிக ஆராய்ச்சியில் ஈடுபட்டால் நாட்டிற்கும், மக்களுக்கும் பெரும் சேவையாக இருக்குமே என்ற தம் கருத்தை எடுத்துரைத்தார். அக்கருத்தை மிக மகிழ்வுடன் ஏற்றுக்கொண்ட இராமன் மிகப்பெரும் வருமானமும், கௌரவமும் கொடுத்த அப்பெரும் பதவியைவிட்டு விலகி அதைவிட மிகவும் குறைந்த வருமானமே தரக்கூடிய பௌதிக ஆராய்ச்சிப் பணியை மிக மகிழ்வுடன் தம் முழுநேரப் பணியாக ஏற்றுக்கொண்டார். அதன்பின் மீப்பெரும் சாதனைகள் பல செய்து நோபல் பரிசும் வென்றார்.

இன்றைய மேதைகளின் நிலையை நினைத்தால் வேதனைதான் மிஞ்சுகிறது.. 🙁

May 28, 2016
களப்பலி வீரர் சிற்பம்!

பவள சங்கரி

மூதுபுகழ் கொண்ட கொங்கு நாட்டில் வீரப்பெண்மணிகளின் வரலாறு எண்ணற்றவை. தங்கள் நாட்டு மன்னன் போரில் பகைவர்களை அழித்து வெற்றி பெற வேண்டும் என்பதற்காகத் தங்கள் தலையை வெட்டி வெற்றித் தெய்வமாகிய காளி அன்னை அல்லது கொற்றவைக்கு காணிக்கையாக்கும் வழமை இருந்துள்ளது. நவ கண்டம் என்பர் இதை. கி.பி. 1265 – 1285 காலத்திய ராஜகேசரி வர்மன் என்கிற வீரபாண்டித் தேவரின் கல்வெட்டுகள் இதற்கு ஆதாரமாக உள்ளன. அவ்வழக்கத்தின்படி பெண் வீரர்களும் தங்களையே களப்பலி கொடுத்துள்ளனர் என்பதற்கு ஆதாரமாக அந்தியூர் சிறீபத்திரகாளியம்மன் திருக்கோவிலில் தமது தலையைத் தாமே வெட்டிக்கொண்டு பலி கொடுக்கும் வீரப்பெண்மணிகளின் சிலைகள் கேட்பாரற்று குப்பைமேட்டில் மண்ணில் புதைந்து கிடக்கும் அவலத்தைப் பார்க்க வருத்தமாகத்தான் இருந்தது.. ஆலயங்கள் புதுப்பிக்கப்படும்போது இதுபோன்று வரலாற்று ஆவணங்களின் அருமை தெரியாமல் அழிக்கப்பட்டுவிடுகின்றன.

May 17, 2016
விஞ்சுமெழில் வண்ணக் காட்சி!

பவள சங்கரி

எண்ணமதில் தோன்றுதொரு காட்சி – வண்ணக்
கோலங்களில் நல்லோரின் ஆட்சி!
வீடுதோறும் மங்கல முழக்கம்
வீதிதோறும் நவீனமயமான பள்ளி
கேடுதீரும் பெற்றோரும் துள்ளி
நாடு முற்றிலும் நல்லுழைப்பாளிகள்
விஞ்சுமெழில் நலமுடன் வந்துதித்தே
கொஞ்சுமொழி சிறாருடன் கூடிக்களித்தே
கேடின்றி வாழ வழியமைப்போர் நாடியே
கேண்மை கொண்டே ஏற்பீர் அவராட்சியே!
மேன்மை கொண்டே ஒளிருமேயவர் மாட்சியே!
தங்குமின்பம் என்றும் தகைமையின் நீட்சியே!
தரணிபோற்றும் பாரதத் தாயவள் காட்சியே!

May 12, 2016
இராகவேந்திரரின் இறுதி உபதேசங்கள்!

அருள்மிகு இராகவேந்திர சுவாமிகளின் இறுதி உபதேசங்கள்! அத்தனையும் சத்திய வாக்குகள்!

1671 ஆம் ஆண்டு சுவாமிகள் சமாதி நிலை அடையும்பொருட்டு பிருந்தாவனம் செல்ல ஆயத்தம் செய்யும் இறுதி வேளையில் தம் பக்தர்களுக்கு இறுதியாக அளித்த முத்தான உபதேசங்கள்!

வாழ்க்கையில் சரியான நடத்தை இல்லையெனில் சரியான சிந்தனையும் இராது.

நல்லார் மற்றும் தகுதியுடையாருக்குச் செய்யும் உதவியோ, தர்மமோ கடவுளின் உளமார்ந்த பூசைக்கு நிகராகும்.

சாத்திரத்தை முழுமையாகப் பின்பற்றாமல் தங்களைக் கடவுள் என்று சொல்லிக்கொண்டு அதிசயங்கள் செய்வோரை விட்டுவிலகியிருங்கள்.

நானும், சிரீமத் ஆசாரியாரும் நிகழ்த்தியுள்ள அதிசயங்கள் அனைத்தும் இறையருளினாலும், அவர்தம் மகிமையை உலகோருக்கு உணர்த்தவும், இறை சக்தியால் எப்பேர்ப்பட்ட பெரும் சக்திகளையும் அடைய முடியும் என்பதை பறைசாற்றவும் நிகழ்த்தப்பட்டதேயன்றி அதில் எந்த பொய்யும், பித்தலாட்டமும் இல்லை.

சரியான ஞானத்தை மிஞ்சிய அற்புதங்களோ, அதிசயங்களோ எங்கும் இல்லை. அத்தகைய ஞானம் இல்லாதோரின் செயலும், அதிசயங்களும், சூனிய வித்தைகள் மட்டுமே. அதைச் செய்பவருக்கும், நம்புபவருக்கும் எப்பயனும் விளைவிக்காது.

கடவுள் மேல் வைக்கும் குருட்டு பக்தியால் எப்பயனும் இல்லை. இறைவனின் மேலாண்மையை முழுமையாக உணர்ந்து செலுத்தும் உண்மையான பக்தியே முழுமையான பயனளிக்கக்கூடியது.

கடவுளிடம் உள்ள பற்றைக் கடந்து மற்ற இதர தேவதைகளிடமும் அவரவர்கள் தகுதிக்கேற்ப பக்தி செலுத்துதல் நலம்.

இவ்வாறு உபதேசங்கள் செய்து முடித்தவர், பிரணவ மந்திரத்தை ஓத ஆரம்பித்து ஆழ்நிலை தியானத்தில் ஆழ்ந்துவிட, ஒரு தருணத்தில் கையில் இருந்த அவருடைய சபமாலை ஓய்ந்து நின்றுவிட, அவர்தம் சீடர்கள் அவருடைய முக்தி நிலையை புரிந்துகொண்டு அவரைச் சுற்றி பிருந்தாவனச் சுவர் எழுப்ப ஆரம்பித்துவிட்டனர்!

May 10, 2016
மக்கள் கேள்வி மேடை!
பவள சங்கரி

தமிழ்நாடு சட்டப் பேரவையின் 15-ஆவது பொதுத் தேர்தல் நெருங்கிவிட்டது. மிகப் பிரம்மாண்டமாக, 5.50 கோடி வாக்காளர்கள், 234 சட்டப் பேரவை உறுப்பினர்களைத் தேர்ந்தெடுக்கப் போகிறார்கள். அதில் பெரும்பான்மை கொண்ட கட்சித் தலைவரையோ அல்லது கூட்டணித் தலைவரையோ ஆளுநர் ஆட்சியமைக்க உரிமை வழங்குவார். அவர்தான் மாநில முதல்வராக அறிவிக்கப்படுவார்.

அரசியலுக்கு வருவது என்பது மக்களுக்கு சேவை செய்வது, தன்னலம் கருதாத முழுமையான மக்கள் தொண்டு என்ற எண்ணமே துளியுமின்றி, அரசியல்வாதியாவது என்பது சிரமமின்றி பணம் சம்பாதிக்கவும், அதிகாரம் செலுத்தவும் வழிவகுப்பது என்ற எண்ணமே அரசியல்வாதிகளுக்கு மேலோங்கியிருப்பது வருந்தத்தக்கது. அதிகாரமும் பண வசதியும் தேவைப்படுகிறது என்பதற்காகவே பலரும் அரசியலுக்கு வருகிறார்கள்.

வாக்காளர்களிடம் இருக்கும் வாக்கு அதிகமான சக்தி பெற்றது. அதிகாரம் கொடுக்கக் கூடியது போன்றவற்றைப் பல வாக்காளர்கள் அறியவில்லை என்பதே சிறு இலவசங்கள் மூலம் மக்களை எளிதாக விலைக்கு வாங்க வழியமைத்துவிடுகிறது. அப்பட்டிப்பட்ட அற்பமான பொருட்களுக்கு விலைபோய் வாக்களித்து விடுவதால் அது ஐந்தாண்டு காலத்திற்கான பாதிப்பு மட்டுமல்ல; பல ஆண்டுகளுக்கான பாதிப்பாகிவிடுகிறது என்ற விழிப்புணர்வே சிறிதும் இல்லாமல் செயல்படும் மக்களாலேயே இதுபோன்ற பாதிப்புகள் நேர்ந்துவிடுகின்றன. தேர்தல் என்பது மகிழ்ச்சியாகக் கொண்டாடும் திருவிழா அல்ல. அங்கு கேளிக்கைகளுக்கோ கொண்டாட்டங்களுக்கோ இடம் இல்லை என்பதை முதலில் அனைவரும் உணரவேண்டும். தன்னலத்துடன் சமூக நலமும் சார்ந்து சிந்தித்து செயல்படவேண்டிய விசயம். மக்களாட்சி என்பது மக்களால், மக்களுக்காக, மக்களே செய்வது என்பதையும் புரிந்துகொள்ள வேண்டும். அந்த மக்களாட்சியை நலமிக்க நல்லாட்சியாக நிலைபெறச் செய்வதும் குடிமக்களாகிய நம் கையில்தான் உள்ளது.

சனநாயகத்தில் தேர்தல் என்பதுதான் உச்ச நிலை. அரசியல் அதிகாரம் என்பது தேர்தல் வழியாக மட்டுமே வருகிறது. அதனால் பொதுமக்களின் பொறுப்பான பங்களிப்பு இதில் அவசியம் இருக்க வேண்டும். நூறு சதவிகிதம் வாக்களிப்பு மட்டுமே மக்களின் பொறுப்புணர்வை வெளிப்படுத்துவதோடு அதுவே சனநாயகத்தின் வெற்றி என்பதுமாகும். வாக்களிப்பது அரசியல் கடமை அல்ல, அரசு மக்களுக்கு வழங்கும் உரிமை என்பதை உணராதவர்களுக்கு உணரச்செய்ய வேண்டியதும் தொண்டு நிறுவனங்கள் மற்றும் சமூக சேவை ஊழியர்களின் அத்தியாவசியக் கடமை. உண்மையான அரசியல் கட்சிகள், நேர்மையான வேட்பாளர்கள் என்று நம்பிக்கை ஏற்பட்டால் மட்டும் வாக்களிக்கவேண்டும். தேர்தலுக்குத் தேர்தல் மட்டுமே தொகுதியில் தலை காட்டும் வேட்பாளர்களையும், சுயநலத்திற்காக மட்டும் அரசியலுக்கு வரும் வேட்பாளர்களை இனம்கண்டு ஒதுக்கும் வல்லமையும் பெறவேண்டும். பேரணிகள், மாநாடுகள் வெற்று அறிக்கைகள் கொண்டு மக்கள் மனம் கவர்ந்துவிட முடியாது என்பதையே தேர்தல் சொல்லிக் கொண்டிருக்கிறது.பேரணிகள், மாநாடுகள் நம்பகமற்ற அறிக்கைகள் போன்றவைகள் மட்டும் மக்கள் மனம் கவர்ந்துவிட முடியாது என்பதையும் வேட்பாளர்களும் உணரவேண்டும். அதற்கான விழிப்புணர்வு ஏற்படுத்தும் வகையிலேயே புதியதொரு முயற்சியாக வேட்பாளர்களும், வாக்களர்களும் நேரிடையாகச் சந்திக்கும், ‘மக்கள் கேள்வி மேடை!’ என்ற நிகழ்ச்சி தமிழ்நாடு முழுவதும் நடத்த ஏற்பாடு செய்யப்பட்டுள்ளது. சென்னையில் வழக்கறிஞர், கவிமாமணி திரு கே.இரவி அவர்களின் இடைவிடா முயற்சியின் பயனாக இத்திட்டம் உருவாகியுள்ளது. அதன் தொடர்ச்சியாக ஈரோட்டில் நடந்த இந்த அரிய நிகழ்ச்சியின் தொகுப்பைக் காண்போம்….

We The People Of India

——————————————————————–

No.1.A Stone Link Avenue, Off Canal bank Road, R.A.Puram, Chennai 600028

‘We The People of India’ is a Non political, Non Profit Organisation, functioning all over Tamilnadu. The main aim is to create National Spirit. During Elections we have been organizing events to promote Voters’ Awareness with the broad network that we have all over Tamil Nadu. We have created an Audio and Video program exclusively for this election. Tamilnadu State Election Commission has approved the program and it has gone viral in YouTube.

வணக்கம். வாக்காளர்களும், வேட்பாளர்களும் ஆவலுடன் எதிர்நோக்கியிருக்கும் தமிழக சட்டசபை தேர்தலையொட்டி, வாக்காளர்களும், வேட்பாளர்களும், சந்திக்கக்கூடிய மக்கள் கேள்வி மேடை எனும் இனிய நிகழ்ச்சி சென்ற சனிக்கிழமை 7.5.2016 அன்று ஈரோடு யாளி ரெசிடெண்சி எனும் விடுதியில் நடைபெற்றது. அது சமயம் வேட்பாளர்கள் மற்றும் வாக்காளர்கள் திரளாக கலந்துகொண்டு இந்த நிகழ்ச்சியை சிறப்பித்தார்கள். பல பொது தொண்டு நிறுவனங்களும் இதில் கலந்துகொண்டு சிறப்பித்தனர்.

We The People Of India

நுகர்வோர் பாதுகாப்பு மையம்

தேசிய நல விழிப்புணர்வு இயக்கம்

வரி செலுத்துவோர் சங்கம், ஈரோடு

ரோட்டரி சங்கங்கள், ஈரோடு

ரவுண்ட் டேபிள், ஈரோடு

அனைத்து வணிகர் சங்கங்களின் கூட்டமைப்பு

ஒளிரும் ஈரோடு

அக்கறை, ஈரோடு

சித்தார்த்தா பள்ளி, ஈரோடு.

ஈரோடு கேட்கிறது!

வாக்காளர்கள் கேட்கிறோம்!

வேட்பாளர்களே பதிலளியுங்கள்!
1. எங்கள் தொகுதியின் முன்னேற்றத்திற்கும், நலனுக்கும் உங்கள் திட்டம், வாக்குறுதி என்ன?
1. பதவிக்கு வந்த பின்னும் மாதம் ஒருமுறை மக்களைச் சந்திப்பீர்களா?
1. உங்கள் கட்சியைவிட இந்தத் தொகுதி முன்னேற்றம்தான் உங்களுக்கு முக்கியம். இந்தத் தொகுதி மக்கள்தான் உங்கள் முதல் தலைவர்கள் என்று அறிவிப்பீர்களா?
1. அனைத்து மருத்துவச் சேவைப் பிரிவுகள்கொண்ட 1000 படுக்கை வசதி உள்ள மருத்துவக் கல்லூரி இணைந்த மருத்துவமனை தக்க சிறப்புத்திறன் மருத்துவர்களுடன் ஈரோட்டில் நிறுவப்பட வேண்டும் என்ற கோரிக்கையை அரசிடம் வலியுறுத்தி நிறைவேற்றித் தருவீர்களா?
1. ஊராட்சிக் கோட்டையிலிருந்து ஈரோடு நகருக்குக் குடிநீர் கொண்டுவரும் திட்டம் விரைவில் நடைபெற நடவடிக்கை எடுப்பீர்களா?
1. தொழிற்சாலைக் கழிவுகளாலும், நகராட்சி, ஊராட்சிக் கழிவுகளாலும் நகரின் நீரோட்டம் மாசுபடும் கவலை ஒருபுறம் தொழிற்சாலைகளைக் கட்டுப்படுத்தும் நடவடிக்கைகளால் நகரின் தொழில் ஆதாரமே பாதிக்கப்படுமோ என்ற கவலை மறுபுறம் அச்சுறுத்தும் சூழலில் அக்கவலைகளைப்போக்க நடவடிக்கை எடுப்பீர்களா?
1. ஈரோட்டு சாலைப்போக்குவரத்து நெரிசலைக் குறைக்க சாலை சீரமைத்தல், மேம்பாலம் கட்டுதல், ஆக்கிரமிப்பு அகற்றுதல் போன்ற செயல்களுக்கு என்ன நடவடிக்கை எடுப்பீர்கள்?
1. திடக்கழிவுகளிலிருந்து மின்சாரம், உரம் போன்ற பயனுள்ள மாற்று சக்திகள் உற்பத்தி செய்யும் திட்டத்திற்கு என்ன நடவடிக்கை எடுப்பீர்கள்?
May 9, 2016
மக்கள் கேள்வி மேடை அழைப்பிதழ்

பவள சங்கரி

வீடுதோறும் வாக்குகள் சேகரித்தீர்
வீதிதோறும் வேட்பாளர் அணிவகுத்தீர்
நகரெங்கும் வாக்குறுதிகள் வீசிச்சென்றீர்
நாடு முற்றிலும் சுற்றியுரைத்தீர்
தேடுதல் வேண்டியிங்கும் வாக்காளர்
வாடுதல் காண்பீர் நன்னெஞ்சே
கேடுதீர்க்கும் சொல்லின் சுடரேற்றி
வாடுமனத்தின் வயிற்றுத்தீத் தணியத்
தாமுணர்ந்து இரங்கி யிருப்போரை
நாமுணர்ந்து வரவேற்கும் தருணமிது!

ஈரோடு மாநகரில் வாக்காளர் – வேட்பாளர் சந்திப்பு! மூன்று கேள்விகள் உங்களுக்காக உயர்ந்து நிற்கிறது. வாருங்கள் தோழர்களே வாக்களிக்குமுன் வாக்குறுதி பெறுவோம்!

வாக்காளர்களும், வேட்பாளர்களும் ஆவலுடன் எதிர்நோக்கியிருக்கும் தமிழக சட்டசபை தேர்தலையொட்டி வாக்காளர்களும், வேட்பாளர்களும், சந்திக்கக்கூடிய மக்கள் கேள்வி மேடை எனும் இனிய நிகழ்ச்சி வரும் சனிக்கிழமை 7.5 2016 அன்று யாளி ரெசிடெண்சியில் நடைபெற உள்ளது. அது சமயம் தாங்கள் கலந்துகொண்டு இந்த நிகழ்ச்சியின் மூலம் மக்களின் எண்ண பிரதிபலிப்புகளை தங்களுடைய பத்திரிக்கைகளின் வாயிலாக பொது மக்களைச் சென்றடையும் வண்ணம் பத்திரிக்கைத்துறை நண்பர்கள் கலந்துகொண்டு சிறப்பிக்கும்படி பணிவன்புடன் கேட்டுக்கொள்கிறோம். நன்றி.

May 6, 2016
‘கைத்தறிக் காவலர்’ மு.ப. நாச்சிமுத்து!

பவள சங்கரி

எண்ணிய எண்ணியாங்கு எய்துப எண்ணியார்
திண்ணிய ராகப் பெறின்.

‘கைத்தறிக்காவலர்’ என்று அன்போடு அழைக்கப்பெறும், பத்மஸ்ரீ. மு.ப. நாச்சிமுத்து அவர்களின் 103 வது பிறந்தநாள் விழா மற்றும் எம்.பி.என். நினைவு தபால்தலை வெளியீட்டு விழா ஏப்ரல் மாதம் 27 ஆம் தேதி (2016) சென்டெக்சு, சென்னிமலை நெசவாளர் கூட்டுறவுச் சங்க வளாகத்தில், எம்.பி.என். பொறியியற் கல்லூரியின் தலைவர் உயர்திரு தங்க.விசுவநாதன் அவர்கள் தலைமையில், ஏனைய அறிஞர் பெருமக்களின் முன்னிலையில் சிறப்பாக நடந்தேறியது. சென்னிமலை என்றால் கொடிகாத்த குமரன் பெயர் நினைவுக்கு வருவதுபோல கைத்தறியும், எம்.பி.என். என்ற பெயரும் உடன் நினைவிற்கு வருவது இயற்கை. ஆம் கைத்தறி உலகில் தனக்கென்றொரு தனியிடத்தை சென்னிமலை பெறுவதற்கு முழுமுதல் காரணமாக இருந்தவர் “எம்.பி.என்.’ என, அனைவராலும் அன்பாக அழைக்கப்படும் மு.ப. நாச்சிமுத்து அவர்கள்தான். 28.04.1913 அன்று சென்னிமலையில் மு. பழனியப்பன் – சடையம்மாள் தம்பதியருக்கு அன்பு மகனாகப் பிறந்தவர் இவர். சட்டம் பயின்று 4 ஆண்டுகள் வழிக்கறிஞராகப் பணியாற்றினாலும், கைத்தறித் தொழிலில் நலிவுற்றிருந்த நெசவாளர்களின் துயர் கண்டு மனம் வருந்தி அவர்களை கூட்டுறவு அமைப்பில் கொண்டுவர அரும்பாடுபட்டதன் விளைவாக 1941ஆம் ஆண்டு ஏப்ரல் மாதம் 4ஆம் தேதி சென்னிமலை நெசவாளர் சங்கம் பதிவு செய்யப்பட்டு அதே மாதம் 14ஆம் நாள் முதல் வெற்றிகரமாக இயங்கவும் ஆரம்பித்துள்ளது. இச்சங்கத்தின் தலைவராகப் பொறுப்பேற்ற மு.ப. நாச்சிமுத்து அவர்கள் 46 ஆண்டுகள் நெசவுத் தொழில் மேன்மையுறவும், நெசவாளர்கள் நல்வாழ்வு பெறவும் பெரும்பணியாற்றினார். கைத்தறித் துறைக்கு இவர் ஆற்றிய தன்னலமற்ற அரிய சேவையைப் பாராட்டி 1983 ஆம் ஆண்டு பத்மஸ்ரீ விருது வழங்கப்பட்டது. 1952 முதல் 1969 வரையிலான 17 ஆண்டுகள் கோ-ஆப்டெக்சு தலைவராகவும், 1953 முதல் 1985 வரை 32 ஆண்டுகள் அகில இந்திய கைத்தறி வாரியத்தின் உறுப்பினராகவும் தொண்டாற்றியதோடு, வெளிநாடுகளுக்குச் சென்ற கைத்தறிக் குழுக்களிலும் இடம் பெற்றார் என்பதும் குறிப்பிடத்தக்கது. வறுமைக்கோட்டுக்கு கீழ் அல்லலுற்று, தனியாரிடம் தறித்தொழிலில் சிக்கிக்கிடந்த நெசவாளர்களை, கூட்டுறவு அமைப்பின் கீழே கொண்டு வருவதில் பெரும்பணியாற்றியவர் இவர் என்பது மறுக்கமுடியாத உண்மை. தன்னலமற்ற இவருடைய சேவையைப் பாராட்டி, 1982 இல், “தமிழகத்தின் தலைசிறந்த கூட்டுறவுத் தலைவர்’ என்ற விருதை தமிழக அரசு வழங்கியதும் குறிப்பிடத்தக்கது.

இவை மட்டுமன்றி இந்தியன் வங்கி இயக்குநர், ரிசர்வு வங்கி ஆலோசகர், பல்வேறு பள்ளிகள், கல்லூரிகள் நிர்வாகத்தில் பங்கேற்பு என பல பதவிகளை செவ்வனே வகித்தவர் இவர். அனைத்து நெசவாளர் சகோதரர்களின் உள்ளத்திலும் நீங்கா இடம் பெற்றவர் மேன்மைமிகு மு.ப. நாச்சிமுத்து என்றால் அது மிகையாகாது! கைத்தறிக்காவலர், பண்பாளர், ஆன்மீகச் சிந்தனையாளர், தேசியவாதி, சமுதாயச் சிற்பி, தீர்க்கதரிசி, தன்னேரில்லாத் தலைவர் என்று நெசவாளர்களும், கவிஞர்களும் இன்றும் அவரை பலவாறு போற்றி மகிழ்கின்றனர்.

நெசவு நம் தேசத்தின் பழமையான தொழில். ஆடைகளின் அவசியத்தையும், அதன் நேர்த்தியையும் உலகிற்கு எடுத்துச் சொன்னவர்கள் நம் மூதாதையர்கள் என்றால் அது மிகையாகாது! நெசவுத்தொழில் என்பது நமது தேசியத்தின் உயிர்நாடி எனலாம். தமிழகத்தைப் பொறுத்தவரை விவசாயத்திற்கு அடுத்தபடியாக கைத்தறி நெசவுத் தொழில்தான் முக்கியப் பங்கு வகிக்கிறது. ஆனால் தற்போது அத்தொழில் பல இன்னல்களுக்கிடையேத் திணறும் தொழிலாகிவிட்டது. தமிழகத்தின் பல மாவட்டங்களில் மக்களின் வாழ்வாதாரமாக இருப்பது கைத்தறி நெசவுத் தொழில்தான். சேலம், ஈரோடு, கரூர் போன்ற நகரங்கள் கைத்தறி நெசவுக்கும் அதைச்சார்ந்த வாணிபத்திற்கும் புகழ் பெற்றவை. ஆண்டிப்பட்டி, எட்டயபுரம், பரமக்குடி அருகே உள்ள எமனேசுவரம், திருவில்லிப்புத்தூர், நெகமம், சிறுமுகை, ஆலாங்கொம்பு, புஞ்சை புளியம்பட்டி, தொட்டம்பாளையம் ஆகிய ஊர்களும் கைத்தறி நெசவுக்கு புகழ் பெற்றவையாகும். இவ்வூர்களிலிருந்து பல விதமான ஆடைகள் வட மாநிலங்களுக்கும், தென் மாநிலங்களுக்கும் மட்டுமன்றி உலகம் முழுவதும் ஏற்றுமதி செய்யப்படுகின்றன. பெண்கள் பெருமளவில் இத்தொழிலில் ஈடுபட்டிருப்பதும் குறிப்பிடத்தக்கது. ஈரோடு நகரிலிருந்து பெரும்பாலும் துண்டுகள், படுக்கை விரிப்புகள், கைலிகள் போன்றவை உலகம் முழுவதும் ஏற்றுமதி செய்யப்படுகின்றன. நெசவாளர்கள் நூல் கொள்முதல், கடன் வசதி, உற்பத்தியைச் சந்தைப்படுத்துதல் என பல்வேறு நிலைகளில் இன்னல்களை எதிர்கொள்ளும்போதிலும் கைத்தறித்துறை குறிப்பிட்ட அளவு வளர்ச்சியைப் பெற்றுள்ளது என்றே பெருமைப்பட முடிகிறது. கடந்த சில ஆண்டுகளில் கைத்தறி ஆடைகளின் தேவை குறிப்பிடத்தக்க அளவு அதிகரித்துள்ளதும் நிதர்சனம்.

தனக்கென வாழா தவநெறியர், நெசவாளர் சமூகத்தையே தம் குடும்பமாக எண்ணி அவர்தம் நலனுக்காக அல்லும், பகலும் அரும்பாடுபட்டவர் அவர்தம் உள்ளங்களில் நித்தியமாய் வாழும் வள்ளல் அமரர் எம்.பி.என். அவர்களின் பிறந்த நாளில் சென்னிமலை எம்.பி.என்.நகர் சமய இலக்கியப் பேரவை ‘கவிபாடும் தறி நாடா’ என்ற அருமையானதொரு வாழ்த்துப்பா நூலை வெளியிட்டு சிறப்பித்துள்ளார்கள். பல்வேறு கவிஞர்களின் அழகிய பாக்கள் நூலுக்கு வளம் சேர்க்கின்றன.

அரசியல் கட்சிகள் பாகுபாடின்றி அனைத்துக் கட்சியினரும் எம்.பி.என். அவர்களின் சொல்லுக்கு மதிப்பளித்ததோடு அவருடைய செயல்பாடுகளுக்கு பலவகையில் ஒத்துழைப்பும் அளித்துள்ளனர் என்பதும் குறிப்பிடத்தக்கது. ஒரு முறை கைத்தறித் துணிகளுக்கு சலுகை அளிப்பது குறித்த பேச்சு எழுந்தபோது, ஐ.ஏ.எசு. உயரதிகாரி ஒருவர் இந்த கைத்தறி துணிகளுக்கு எவ்வளவு காலத்திற்குத்தான் சலுகை கொடுப்பது என்று சலித்துக்கொண்டு கோபமாகக் கேட்டாராம். அப்போது எம்.பி.என். அவர்கள் “ஒரு மனிதன் எத்தனை நாட்களுக்குத்தான் சாப்பிடுவான்” என்று கேட்டாராம். இந்த வினாவின் ஆழ்ந்த நுட்பமான பொருளறிந்து அந்த அதிகாரி பதில் ஏதும் பேச முடியாமல் அமைதியாக இருந்துவிட்டாராம். அதாவது ஒருவர் உயிருள்ள வரை வயிற்றுக்கு உணவு தேவைப்படுவதுபோல கைத்தறி ஆடைகள் நெய்யும் வரை சலுகை கொடுக்க வேண்டும் என்ற பொருளில் அவர் பேச்சு இருந்திருக்கிறது.

கைத்தறி நெசவாளர்களின் அவல நிலையை விளக்கும் ஒரு கவிதை….
அ.சீனிவாசன், பொது மேலாளர் (ஓய்வு), சென்னிமலை நகர கூட்டுறவு வங்கி, சென்னிமலை.

முகாரி பாடிய கூட்டுறவை
ஆனந்த பைரவியாக்கிய அற்புதர்;
கூட்டுறவுக்கே அகராதியானவர்!

பாவடிகள் அன்று …..
பாவடியில் தோய்த்தெடுக்கக்
கஞ்சித் தொட்டிகள்
சலசலக்கும் முகாரியாய்!
தறியோசையே சுப்ரபாதம்
நாடாவின் ஓட்டமே
நாடிநரம்புகளின் அதிர்வாகும்!
பழைய சோறே பஞ்சாமிர்தம்
நீராகாரமே நித்தியவாசம்
பாவோடும் நூலோடும்
நித்தமும் வறுமைவாசம்
இறைவனே இருக்கின்றாயா நீ என
ஏங்கித் தவித்தன
அகிலத்தோர் மானங்காக்கும்
நெசவாளர் நெஞ்சங்கள்.

சோகத்தோடும் விழிநீரோடும்
சென்னிமலையின் தவமோ
மேதினியின் யாகங்களோ
கைத்தறிக்கு வாழ்வுதர
நெசவாளர்களுக்கு விடியலாக
சுழன்றோடும் இராட்டையாக
அகிலத்தில் அவதாரமானார்
நல்முத்து நாச்சிமுத்து.
மலர்ந்தார், வாழ்ந்தார்,
வாழ்ந்து கொண்டே
சிரகிரியின் சுவாசமாய்
சென்னிமலையின் கவசமாய்
உலகின் புருவமெல்லாம்
வியந்து நோக்கிடும்
புதுமைதனைச் செய்திட்ட
கூட்டுறவுத் தந்தை
ஒரு தீர்க்கதரிசி.

புலவர் ஆ.தண்டபாணி

வானவில்லின் வடிவத்தைக் கையால் வரையாமல்
காலால் வரைந்திட்ட கலைஞன் நெசவாளி
கானகத்துப் பறவைகளின் கனிவான இசையமுதை
காலடி ஓசையிலே காணுபவன் நெசவாளி
வானத்துத் தேவர்களும் வந்துவந்து காணுகிற
வகையான நூற்கலையை வடிப்பவன் நெசவாளி
ஊணமுது இல்லாமல் உறங்குகிற வேளையிலும்
உலகத்தார் நலம்காக்க உதவுபவன் நெசவாளி
நெசவாளி வாழ்க்கையிலே நிலைத்துவிட்ட
நிரந்தர வறுமை தனைஓட வைத்தார்
வசையில்லா வாழ்க்கையிலே வகையாய் வாழ
வழக்கறிஞர் தொழில்விடுத்து வந்தார் இங்கே
அசைபொடும் விலங்காக வாழ்ந்த மக்கள்
ஆனந்த வாழ்வு பெறவழி அமைத்தார்
இசையோடும் நாடாவை இழையோடு ஓடவைத்த
இவர்தானே நம்வாழ்வின் கலங்கரை விளக்கு.

தன்னுடைய 21 ஆம் அகவையிலிருந்து எம்.பி.என். அவர்களின் இறுதிக்காலம் வரை அவருடைய தொடர்பில் இருந்த திரு ஜெகதீசன் அவர்களின் வாழ்த்துப்பா…

சென்னிமலை
தன் சிகரத்தின் மகுடத்தில்
பதித்துக்கொண்ட
நல்முத்து
எம்.பி.என்.நாச்சிமுத்து!

இவருக்கு
கண்கள் இரண்டும்
கைத்தறியும்
கூட்டுறவும்!

கையில் பிடித்த
கைத்தடியோ
நெசவாளியின்
வாழ்வை உயர்த்த
சபதமேற்ற ஊன்றுகோல்!

அவர்
எடுத்துவைத்த
ஒவ்வொரு அடியும்
கைத்தறியின் எதிர்காலத்தை
எண்ணி வைத்த அடிகள்!

பதவி ஒரு மேல்துண்டு
இவர் வகித்த பதவிகளால்
பதவிகளே பெருமையடைந்தன!

வினாக்குறியாய் வளைந்த
நெசவாளியின் வாழ்வு
கொடிமரமாய் நிமிரும்
நாள் வாராதா?
என வாதாடிய வழக்கறிஞரே!

தறிநாடா ஓசை
நீங்கள் விரும்பிய இசை!
நெசவாளியின் கைகால் அசைவே
நீங்கள் ரசித்த நடனம்!

சென்னிமலையை
கூட்டுறவாளர்களின்
வேடந்தாங்களாக்கிய
கைத்தறியின்
கற்பக விருட்சமே!

உங்கள் பாதம்படாத
நெசவாளர் வாழும் ஊர்
தமிழகத்தில் இல்லை!
நீங்கள் அறியாத
நெசவாளர் பிரச்சனை
இந்தியாவில் இருந்ததில்லை!

இந்திய வரைபடக் கோடுகளில்
சென்னிமலைக்கு சிவப்புக்கம்பளம்
விரித்துக் கொடுத்த
கைத்தறியின் தந்தையே!
நெசவாளர் துயர் துடைக்க
இன்னும் ஒரு முறை
இம்மண்ணில் பிறந்து வாரீரோ!

நெசவாளர்க்கு பயன் தரும்
மருந்து மரமாய்
நிமிர்ந்து நிற்கும்
சென்டெக்ஸ் நிறுவனமே!
எம்.பி.என். புகழை என்றும்
இன்றுபோல் பேச
சிரகிரி முருகன் போல்
இளமையாய் வாழ்க! வளர்க!

இவ்வாறு நெசவாளர் வாழ்வில் ஒளிவிளக்காகத் திகழ்ந்த மு.ப.நாச்சிமுத்து அவர்கள் 27.06.1987 இல் அமரர் ஆனாலும், இன்றும் நெசவாளர்களின் மனதில் நீங்கா இடம் பெற்றிருக்கிறார் என்பதற்கு இவ்விழாவே சாட்சி!

April 30, 2016
உலக புத்தக தினம்!

பவள சங்கரி

எழுத்தாளர்களின் தலைவிதி பெரும்பாலும் பல்வேறு நிராகரிப்புகளின் இடையேதான் நிர்ணயிக்கப்படுகிறது. இது இன்று நேற்று அல்ல.. பல காலமாக தொடர்வதுதான். உலகின் மிகச் சிறந்த படைப்பாளர்களின் ஒருவரான பிரித்தானிய எழுத்தாளரான ஜே. கே. ரௌலிங் என்பவரால் எழுதப்பட்ட ஏழு கனவுருப் புனைவுப் புதினங்களின் தொகுப்புதான் ஹாரி பாட்டர் என்ற நூல். இந்த நூல் பிற்காலங்களில் எவ்வளவு பிரபலமடைந்திருக்கிறது என்பது நாம் அறிந்ததே. ஆனால் ரௌலிங் இந்த புதினத்தை எழுத ஆரம்பித்தபோது உணவு, உறைவிடம், உடை என அடிப்படைத் தேவைகளுக்குக்கூட அல்லாடிய நிலைதான் என்பதை எத்தனைபேர் அறிந்திருப்போம்? அவர் பெரும் மன வேதனையில் இருந்த காலம் அது. தெருவோரங்களிலும், காப்பி கடைகளிலும் அமர்ந்து ஒரு பழைய தட்டச்சு இயந்திரம் மூலமாக தட்டச்சிய புதினத்தை பல பதிப்பாளர்களிடம் கொண்டு சென்று தவம் கிடந்தும் அவர்கள் பதிப்பிட மறுத்தனர். இறுதியாக ஒரு மிகச் சிறிய பதிப்பு நிறுவனமான ப்ளும்ஸ்பரி என்ற நிறுவனம் 1,000 பிரதிகளுக்கு 2,250 பவுண்டு தருவதாக ஒப்புக்கொண்டு வெளியிட அத்துணையும் மிக விரைவிலேயே விற்றுத் தீர்ந்து வசூலிலும் சாதனை படைத்து சரித்திரம் படைக்க ஆரம்பித்துவிட்டது!

April 23, 2016
வைராக்கியம்

பவள சங்கரி

‘இளமையில் கல்’ என்றார்கள். கற்க ஆவல் கொண்ட மாணவர்கள் அனைவரும் தங்கள் விருப்பம்போல கற்க முடிகிறதா என்றால் இல்லை என்பதே வருந்தத்தக்க விசயம். அறிவும், ஆற்றலும் இருப்பவருக்கு பள்ளிக்கட்டணம் கட்டவோ, நோட்டுப் புத்தகம் வாங்கவோ வசதியில்லாமல் ஏழ்மை வாட்டி வதைக்கலாம். எல்லா வசதியும் இருக்கும் இளைஞனுக்கு படிப்பில் நாட்டம் இல்லாமல் போகலாம். பெற்றோரின் கட்டாயத்திற்காக மட்டுமே படித்துக்கொண்டு வருவான். இன்னும் சில குழந்தைகளுக்கோ பிறவிக் குறைபாடு போன்ற பிரச்சனைகளால் கல்விக்கூடம் செல்வது என்பதே பெற்றோரின் பகற் கனவாகிவிடுகிறது. இப்படி ஒரு சிலரின் வாழ்க்கையில் அடிப்படையான கல்வி என்பது ஒரு சரித்திரமாகவே மாறிவிடுகிறது. ஆனால் எப்படியும் கல்வி கற்றே தீரவேண்டும் என்ற வைராக்கியத்துடன் இருப்பவர்களுக்கு, அந்த எண்ணமே அவர்களுக்கு அதை ஏதேனும் ஒரு வழியில் அதை செயல்படுத்திவிடுகிறது.

மரம் ஏறத்துணியும் ஒருவருக்கு பின்னால் தாங்கிப்பிடிக்க கை கொடுக்கலாம். சற்றே மேலெழும்போது நம் கையை இயன்ற அளவிற்கு நீட்டி அவருக்கு உதவலாம். இன்னும் சற்று மேலெழும்பும்போது நம் குதிங்காலை சற்றே உயர்த்தி அவரைத் தூக்கிவிடலாம். இறுதியாக நம் தோளின்மீது தம் பாதம் பதித்து ஏறவும் பொறுக்கலாம். அதைத்தாண்டி அவர்தான் அந்த மரத்தின் உச்சத்தை அடைய முயலவேண்டும் எவருடைய உந்துதலும் இன்றி. அப்படி ஏறும்போது சுற்றி இருக்கும் கிளைகளின் வலிமையறிந்து அதன் உதவியுடன் மெல்ல மெல்ல உச்சியைத் தொடவேண்டும். நிறை, குறைகளைக்கடந்து தமது உச்சத்தை நெருங்கும் வைராக்கியமும், விடாமுயற்சியும் எவரிடம் இருக்கிறதோ அவர்கள் மட்டுமே வாழ்க்கையின் வெற்றிப்படியை நெருங்கவியலும்.

சிரீகாந்த் போலா என்பவர் ஐதராபாத் நகரைச் சார்ந்த பார்வையற்ற 24 வயது இளைஞர். இந்த வயதில் தொழிற்துறை வட்டத்தில் பெரிய கதாநாயகனாக வலம்வருபவர். ஆனால் அவருடைய கடந்த காலம் பற்றி நாம் அறிய வேண்டும். இவர் பிறந்தபோது இவருடைய பெற்றோர் ஆண்டொன்றிற்கு ரூ.20,000 மட்டுமே சம்பாதிக்கக்கூடியவர்கள். இப்படி குறையுடன் பிறந்த மகன் தேவையா என்ற சுற்றத்தின் அமில வீச்சுகளின் இடையில் தெய்வாதீனமாக உயிர் பிழைத்து சிரமத்துடன் வளர்க்கப்பட்டவர். தமது பள்ளிப்பருவத்தில் படிப்பை ஒரு தவமாக மேற்கொண்டவர். பத்தாம் வகுப்பு வரை 90, 100 என்று மதிப்பெண்களை குவித்துக்கொண்டிருந்தவருக்கு, பள்ளியிறுதி வகுப்பில் (+1) தாம் பார்வையிழந்தவர் என்ற காரணத்தினால் அறிவியல் பாடத்தை விருப்பப்பாடமாக எடுக்க அனுமதி மறுக்கப்பட்டது. ஆனால் இவர் சட்டப்படி நடவடிக்கை எடுத்துப் போராடி ஆறு மாதத்திற்குப் பிறகு அதே அறிவியல் படிப்பில் சேர்ந்ததோடு நில்லாமல் 12ம் வகுப்பில் 98 சதவிகிதம் மதிப்பெண்கள் எடுத்துக்காட்டினார். ஆனாலும் அதற்குப் பிறகும் ஓயவில்லை அவருடைய போராட்டம். ஐ.ஐ.டி, என்.ஐ.டி. என எங்கும் போட்டித் தேர்வுகளுக்கு அனுமதி கிடைக்கவில்லை. நம் நாட்டில் எந்த கல்வித்துறையும் அவருக்கு உதவ முன்வரவில்லை. அந்த இளைஞர் ஓயாமல் வெளிநாடுகளில் உள்ள கல்லூரிகளுக்கு தமது நிலையைத் தெரிவித்து விண்ணப்பித்தார். இறைவன் பார்வையும் அவர் முயற்சிக்கு ஒளியூட்டியது. உலகிலேயே தலை சிறைந்த நான்கு கல்லூரிகளான எம்.ஐ.டி., இசுடேன்ஃபோர்டு, பெர்க்கிலி, மற்றும் கார்னீகு மெல்லான் ஆகிய கல்லூரிகளிலிருந்து ஒருசேர அழைப்பு வந்தது. அமெரிக்க நாட்டில், எம்.ஐ.டி இன் உதவித்தொகை பெற்ற முதல் சர்வதேச பார்வையிழந்த மாணவர் என்பதும் குறிப்பிடத்தக்கது. 2012 இல் அமெரிக்காவிலிருந்து திரும்பி வந்தவுடன் அவர் போலாந்து (Bollant) தொழிற்சாலைகளை உருவாக்கி அதன் 60% தொழிலாளர்களாக மாற்றுத் திறனாளிகளையே நியமித்தார். 450 பணியாளர்களைக் கொண்ட இந்த நிறுவனம் இன்று 50 கோடி மதிப்புள்ளது என்பதோடு ரத்தன் டாட்டா அவர்களே இதில் முதலீடு செய்துள்ளார் என்பதும் குறிப்பிடத்தக்கது.

இன்னொருவரையும் இதுபோன்று குறிப்பிட முடியும். 2001 ஆம் ஆண்டு ஜூன் மாதம் கட்டப்பட்ட பிரபலமான கோவை ஜெம் மருத்துவமனையின் இயக்குநர் மருத்துவர் சி. பழனிவேல் என்ற உலகப்புகழ் பெற்ற அறுவைச்சிகிச்சை நிபுணர், ஆய்வாளர், கோவையில் இயங்கும் இரைப்பை குடல் மருத்துவ மருத்துவமனை, ஆராய்ச்சி மையத் தலைவர் பொறுப்பில் இருப்பவர். லேப்புராசுக்கோப்பி என்ற மருத்துவச் சிகிச்சை முறையில் பல நவீன தொழில்நுட்பங்களைக் கண்டுபிடித்து சாதனை படைத்துள்ளவர் இவர். பல ஆண்டுகளாக மருத்துவத் துறையின் ஒரு குறிப்பிட்ட அறுவை சிகிச்சை பயிற்சிக்காக பல்வேறு நாடுகளுக்குச் சென்று வந்துள்ளவர். லேப்புராசுக்கோப்பியில் நவீன தொழில்நுட்பங்களை மேற்கொண்டதோடு, ஏழை, எளிய மக்களுக்கும் அறுவை சிகிச்சைகளும், வாழ்க்கையை மாற்றியமைக்கும் மருத்துவங்களும் கிடைக்கும்படி செய்தவர். ஆம், மருத்துவர் பழனிவேல் அவர்களின் ஜெம் ( GEM) அறக்கட்டளை தொண்டு நிறுவனம் மூலமாக வறுமைக்கோட்டில் வாழும் மக்களுக்கு இலவச மருத்துவச் சிகிச்சையை வழங்குகிறது. இந்த அறக்கட்டளை அமைப்பு இரைப்பை குடலியல் மருத்துவமனையில் 20 படுக்கைகள் கொண்ட இலவச மருத்துவப் பிரிவை பராமரித்து வருகிறது. கோயம்புத்தூர் நகரைச்சுற்றி அடிக்கடி மருத்துவ முகாம்கள் நடத்தப்பட்டுவருகிறது. இவருக்கு வெளிநாடுகளிலிருந்தும் அடிக்கடி பயிற்சி வகுப்புகள் கருத்தரங்கம் என்று அழைப்புகள் வந்தவண்ணம் உள்ளன என்பதும் குறிப்பிடத்தக்கது. கடந்த 22 ஆண்டுகளுக்கும் மேலாக இந்த சிகிச்சை முறை பயன்பாட்டில் உள்ளது. சிசேரியன் அறுவைச் சிகிச்சை தவிர வயிறு சம்பந்தப்பட்ட அனைத்து அறுவை சிகிச்சைகளுக்கும் இந்த நவீன முறை அறுவை சிகிச்சை சிறப்பாக செயல்பட்டு வருகிறது. அறுவை சிகிச்சை முடிந்த ஓரிரு நாட்களில் நோயாளிகள் இயல்பு நிலைக்குத் திரும்புவதும், மருத்துவமனையில் அதிக நாட்கள் தங்க வேண்டிய தேவையும் இல்லை என்பதை இதன் சிறப்பாகக் கூறமுடியும்.

மருத்துவர்களுக்கு இந்த நவீன அறுவைச் சிகிச்சை குறித்த பயிற்சியை வழங்கும் இவர் அதனை எளிமையாக விளக்கும் விதமே அலாதியானது. முன் காலத்தில் கிரிக்கெட் விளையாட்டை ஒரு புறம் நின்று வேடிக்கைப் பார்த்து பந்து வரும் திசையை உன்னிப்பாகக் கணிக்கவேண்டும். ஆனால் இப்போதைய நவீன தொழில்நுட்ப முன்னேற்றத்தில் பந்து புறப்பட்ட இடத்திலிருந்து அது சேரும் இடம்வரை அதன் பயணிக்கும் பாதையை மிகத்துல்லியமாக காணமுடிவது போன்றதுதான் லேப்புராசுக்கோப்பி சிகிச்சை முறை என்று எளிமையாக விளக்கம் அளிப்பாராம்..

2003 ஆம் ஆண்டில் டாக்டர் பழனிவேல் எடின்பர்க் ராயல் கல்லூரியின் அறுவை சிகிச்சை மருத்துவர்கள் மூலம் பெல்லோசிப், 2006 இல் டாக்டர் பி சி ராய் தேசிய விருது, அமெரிக்காவில் ‘சர்வதேச ஒலிம்பிக் அறுவை சிகிச்சை ஒலிம்பிக் வெள்ளிப் பதக்கம்’ வென்றது போன்ற பல பெருமைகளைப் பெற்றவர்.

இதுமட்டுமன்றி, லேப்புராசுக்கோப்பி சிகிச்சை முறை சம்பந்தமாக மூன்று புத்தகங்களை எழுதி வெளியிட்டுள்ளார்: லேப்புராசுகோப்பி அறுவை சிகிச்சை கலை; “Text Book of Surgical Laparoscopy” “CIGES Atlas of Laparoscopic Surgery.”

இத்துனை சாதனை புரிந்த இவருடைய ஆரம்பக்கால வாழ்க்கை அந்த அளவிற்கு எளிமையானதாக இல்லை. ஒரு சாதாரண விவசாயக்கூலித் தொழிலாளியின் மகனாகப் பிறந்தவர் இவர். மிகப்பெரும் சவால்களைச் சந்தித்த பிறகே இந்த நிலைமைக்கு வந்திருக்கிறார் என்பதே உண்மை. ஆம், நாமக்கல் மாவட்டம், திருச்செங்கோடு அருகில் உள்ள ஒரு கிராமத்தில் பிறந்தவர் இவர். 1953 ஆம் ஆண்டில் இவர் குடும்பம் மலேசியாவிற்கு குடிபெயர்ந்தது. குடும்பத்தின் ஏழ்மை காரணமாக தமது கல்வியை ஆறாம் வகுப்பிலேயே நிறுத்திவிட்டு ஒரு சாராயக் கடையில் பத்து மலேசிய டாலர்களுக்கு வேலைக்குச் செல்ல வேண்டிய சூழல் ஏற்பட்டது. 18 வயது வரை வேலை பார்த்தவர் அதற்குமேல் கல்வி கற்கவேண்டும் என்ற பேரார்வம் உந்தித்தள்ள, 1967 இல் அங்கிருந்து கிளம்பி இந்தியா வந்து சேர்ந்தார். நல்லாசிகளின் விளைவாக பள்ளியில் சேரும் வாய்ப்பும் அமைந்து, தம்முடைய 21 ஆம் வயதில் எஸ்.எஸ்.எல்.சி வகுப்பு படித்து முடித்தார். கற்கள் ஏற்றும்போது ஏற்பட்ட காயம் காரணமாக சிதைக்கப்பட்ட ஒரு விரல் மற்றும் நிமோனியா காய்ச்சல் காரணமாக தனலட்சுமி என்ற ஆறு வயது அன்புச் சகோதரி உயிரிழந்தது போன்ற காரணங்களால் அவர் மருத்துவம் பயில விரும்பினார். பல சிரமங்களுக்கிடையில் மருத்துவப் படிப்பும் பயின்றவர், இசுடான்லி மருத்துவக் கல்லூரியில் தங்கப் பதக்கத்துடன் வெற்றிவாகையும் சூடி வந்தார். தாம் வந்த பாதையை மறக்காதவராக வசதியில்லாத பல நோயாளிகளுக்கு இலவச மருத்துவமும், குறைந்த கட்டண வசூலிப்பும் செய்து வருகிறார் என்பதும் குறிப்பிடத்தக்கது!

மேற்கண்ட இரண்டு சாதனையாளர்களும் தங்கள் வைராக்கியம் மூலமாகவே தடைகளை முறியடித்து வெற்றிவாகை சூடியுள்ளார்கள் என்பதே நிதர்சனம்!

April 22, 2016
படக்கவிதைப் போட்டி…(60)

பவள சங்கரி

அன்பிற்கினிய நண்பர்களே!

வணக்கம். கண்ணையும், கருத்தையும் கவரும் படமொன்றைக் கண்டவுடன் உங்கள் உள்ளத்தில் கவிதை ஊற்றெடுக்கும் திறமை கொண்டவரா நீங்கள்?

திரு. வாசகன் பாலசூரியன் எடுத்த இந்தப் படத்திற்கு ஒரு கவிதை எழுதுங்கள். இதனை நம் வல்லமை ஃப்ளிக்கர் குழுமத்தின் பொறுப்பாசிரியர் திருமதி. சாந்தி மாரியப்பன் தேர்ந்தெடுத்து அளித்துள்ளார்.

இந்த ஒளிப்படத்திற்கு ஏற்ற கவிதையை நல்ல தலைப்புடன் பின்னூட்டமாக இடலாம். ஒருவரே எத்தனை கவிதைகள் வேண்டுமானாலும் எழுதலாம். வரும் சனிக்கிழமை (23.04.2016) வரை உங்கள் கவிதைகளை உள்ளிடலாம். அவற்றில் சிறந்த கவிதையை நம் வல்லமை இதழின் ஆசிரியர்குழு உறுப்பினரும், தமிழிலக்கிய ஆராய்ச்சியாளருமான திருமதி மேகலா இராமமூர்த்தி தேர்வு செய்வார். ஒவ்வொரு வாரமும் சிறந்த கவிஞர் ஒருவர் தேர்ந்தெடுக்கப்படுவார். ஒருவரே பலமுறை பங்கு பெறலாம். இவ்வாய்ப்பு சிறந்த கவிஞராகத் தேர்ந்தெடுக்கப்படும் கவிஞர்களுக்கும் உண்டு. 12 மாதமும் தேர்வுபெறும் ஒளிப்படக் கலைஞர் / கவிஞர்களிலிருந்து ஆண்டின் சிறந்த கலைஞரும், கவிஞரும் தேர்வு பெறுவார்கள். ஒளிப்படத்திலிருந்து தாக்கமும் தூண்டுதலும் பெற்று எழும் அசல் படைப்புகளை ஊக்குவிப்பதே இதன் நோக்கம். கவிஞர்களையும் கலைஞர்களையும் கண்டறிந்து ஊக்குவிப்பதற்கான அடையாளப் போட்டி இது; வெற்றி பெறுபவர்களுக்குப் பரிசளிப்பு இருக்காது; பாராட்டு மட்டுமே உண்டு. ஆர்வமுள்ளவர்களைப் பங்குபெற அழைக்கிறோம்.

போட்டியின் நடுவரான திருமதி. மேகலா இராமமூர்த்தி புதுச்சேரி மாநிலத்தின் காரைக்காலில் பிறந்தவர். கணிப்பொறி (MCA) மற்றும் தமிழில் (MA) முதுகலைப் பட்டம் பெற்ற இவர், அமெரிக்க தமிழ்ச்சங்கப் பேரவையின் (FeTNA) 2008, 2009, 2014-ஆம் ஆண்டுகளின் (ஆர்லாண்டோ, அட்லாண்டா & மிசௌரி) கவியரங்கம், இலக்கிய வினாடிவினா நிகழ்ச்சிகளில் பங்கேற்றுப் பாராட்டுக்களும், பரிசுகளும் பெற்றுள்ளவர். சங்கப் பாடல்களில் அதிக ஆர்வமும், இலக்கியக் கூட்டங்களிலும், பட்டிமன்றங்களிலும் சுவைபடப் பேசுவதில் வல்லமையும் பெற்றவர். இவருடைய வலைப்பூ – மணிமிடைபவளம்.

April 18, 2016
முடங்கிப்போகும் கண்டுபிடிப்புகள்!

பவள சங்கரி

தலையங்கம்

இந்திய இளைய சமுதாயத்தினரிடையே இன்று அறிவியல் திறன் பெருமளவில் வளர்ந்துகொண்டிருக்கிறது. சமூக நலன் கருதிய பலவிதமான கண்டுபிடிப்புகள் இன்று பலர் முனைந்து செய்தாலும் பெரும்பாலும் அவைகள் வெளியே வராமலேயே முளையிலேயே கருகிவிடுகின்றன அல்லது குடத்திலிட்ட விளக்காக முடங்கிப்போய்விடுகின்றன. சமீபத்தில் தமிழ்நாட்டின் கொங்குச் சரகத்தில் ஒரு விவசாயக் குடும்பத்தைச் சார்ந்த இளம் பெண் ஒருவரின் கண்டுபிடிப்பு நம் நாட்டிற்கு மிக முக்கியமானது. தண்ணீர் பற்றாக்குறை நிறைந்த இக்காலகட்டத்தில் குறைந்த அளவு நீரை பயன்படுத்தி, சல்லி வேருக்கு நேரடியாக நீர் பாய்ச்சும் முறை மூலம் அதிக மகசூல் தரக்கூடிய ஒரு விவசாயத்துறை சார்ந்த கண்டுபிடிப்புதான் அது. அந்தப் பெண் பல்வேறு இடர்பாடுகளுக்கிடையே தமது ஆசிரியரின் துணையுடன் கோவை மாவட்டத்தில் நடைபெற்ற அறிவியல் கண்காட்சியில் நிரூபித்துக்காட்டினார். ஆனால் நாம் அறிந்த வகையில் அவருக்கு உரிய அங்கீகாரமோ அல்லது அவருடைய ஆய்வுகளுக்குத் துணை நிற்கும்வகையில் மாநில அரசோ, மத்திய அரசோ எந்தவிதமான நடவடிக்கைகளும் மேற்கொள்ளவில்லை. இது போன்று பல இளம் மாணவ விஞ்ஞானிகள் நம் நாட்டிலிருந்தும் அவர்கள் கண்டுகொள்ளப்படாமலே இருக்கிறார்கள் என்பது வருத்தத்திற்குரிய விசயம். அமெரிக்காவில் இளம் விஞ்ஞானிகளுக்கு மிகுந்த வரவேற்பும், ஊக்கமும், உற்சாகமும் வழங்கப்படுவதைக் காணமுடிகிறது. அந்நாட்டின் குடியரசுத் தலைவர் பராக் ஒபாமா அவர்கள் 100 இளம் விஞ்ஞானிகளை அழைத்து அவர்களுக்கு வெள்ளை மாளிகையில் விருந்து வைத்து அவர்களோடு அளவளாவி அவர்களின் கண்டுபிடிப்புகள் பற்றிய விவரம் அறிந்து அவர்களை பெரிதும் உற்சாகப்படுத்தியுள்ளார். இந்த 100 பேரில் 13 மாணவர்கள் இந்திய வம்சாவளியைச் சார்ந்தவர்கள் என்பது பெருமையுடன் குறிப்பிடத்தக்கது. அதில் நீல் தவே என்ற 20 வயது மாணவர் ‘திரவ திசு ஆய்வு’ மூலமாக புற்றுநோயை ஆரம்பக்கட்டத்திலேயே அறியக்கூடிய முக்கியமானதொரு கண்டுபிடிப்பை வழங்கியுள்ளார். இந்த கண்டுபிடிப்பின் மூலமாக புற்று நோய் மட்டுமன்றி காச நோய் போன்ற கொடிய நோய்களையும் ஆரம்பத்திலேயே கண்டுபிடிக்க முடியும் என்று நிரூபித்துள்ளார். இதையறிந்த, நாற்பத்தி ஆறு வயதான தன்னுடைய மகன் பியூ என்பவரை புற்று நோயால் இழந்த அமெரிக்கத் துணை குடியரசுத் தலைவர், ஜோ பிடன், அந்த மாணவர் படிக்கும் கல்லூரிக்கு நேரில் சென்று 30 நிமிடங்கள் இருந்து அந்த ஆய்வு பற்றிய தகவல்களைக் கோரிப் பெற்றதோடு அந்த மாணவர்களுக்குத் தேவையான ஆய்வுக் கூடம், மற்றும் அதற்குத் தேவையான அனைத்து வசதிகளையும் உடனடியாக செய்து தருவதாகவும் வாக்களித்துள்ளார். இதையறிந்த ஒபாமா அவர்கள் இந்திய வம்சாவளியைச் சேர்ந்த அந்த மாணவரை வரவழைத்து இதைப்பற்றிய அனைத்துச் செய்திகளையும் அறிந்துகொண்டதோடு குறிப்பிட்ட அந்த ஆய்வை மேலெடுத்துச்செல்ல அனைத்து உதவிகளையும் செய்வதாக வாக்களித்துள்ளார் என்பதும் குறிப்பிடத்தக்கது.

இதையெல்லாம் பார்க்கும்போது நம் மாணவர்களுக்கும் இப்படி உயரிய அங்கீகாரம் கிடைத்தால் இன்னும் பல அரிய கண்டுபிடிப்புகளைப் பெற முடியும் என்ற ஏக்கம் கொள்ளாமல் இருக்க முடியவில்லை. மத்திய அரசின் மனித வள மேம்பாட்டுத்துறை இதைக் கவனத்தில் கொள்ள வேண்டியது அவசியம். சமீபத்தில் அமெரிக்காவில் படிக்கும் ஒரு 16 வயது மாணவன், பெங்களூருவில் உள்ள தன் தாத்தா பாட்டியின் சிரமங்களைக் கண்ணுற்று அதைப்போக்க வேண்டும் என்ற உயரிய நோக்கில் ஒரு அரிய கண்டுபிடிப்பை வழங்கியுள்ளான். ஆம், முகுந்த் வெங்கடகிருட்டிணன் என்ற இந்திய வம்சாவளியைச் சேர்ந்த மாணவன் மிகக் குறைந்த விலையில் (60 அமெரிக்க டாலர்) காது கேளாதோருக்கான கருவியை கண்டுபிடித்திருக்கிறார். இக்கருவி 1500 முதல் 1,900 டாலர் வரை அனாவசிய விலை விற்பதை அவர் சுட்டிக்காட்டி தன் கண்டுபிடிப்பு மூலம் ஏழை எளியவர்களும் பயன்பெறும் வகையில் தொண்டு நிறுவனங்கள் மூலமாக இக்கருவிகளை வழங்கப்போவதாகக் குறிப்பிடுகிறார். இந்தியாவில் நடுத்தர குடும்பங்களில் ஒருவரின் வருமானம் ஆண்டொன்றிற்கு 616 அமெரிக்க டாலர் மட்டுமே என்ற வகையில் ஒருவர் வருடம் முழுவதும் உழைத்து அதை ஒரு பைசா செலவு செய்யாமல் சேர்த்து வைத்தாலும் காது கேட்கும் கருவியை வாங்க இயலாது.. வளர்ந்து வரும் நாடுகளில் பலருக்கு இது ஒரு ஆடம்பரச் செலவாகவே இருப்பதும் வருந்தத்தக்க விசயம் என்கிறார் இவர்.

April 15, 2016
பூரண மதுவிலக்கு!

பவள சங்கரி

தலையஙகம்

பீகாரில் 6.4.2016 முதல் பூரண மதுவிலக்கு நடைமுறைக்கு வந்துள்ளது. இதுநாள் வரை பெருந்துயருற்றிருந்த பெண்களும், பெண்கள் அமைப்புகளும் நேற்று மகிழ்ச்சியில் பாட்னா நகரெங்கும் ஆடியும் பாடியும் இச்சட்டத்திற்கு வரவேற்பு அளித்துள்ளனர். ஆனால் பெரும் குடிமக்கள் சிலரும் இதற்கு எதிர்ப்பும் தெரிவித்துள்ளனர். ஒரு பெரிய மனிதர் ஆண்டிற்கு 3000 கோடி வருமானத்தை நிதீசு இழந்துவிட்டார் என்று வசை பாடியுள்ளார். இன்னொரு தலைவர் நிதீசு இச்சட்டத்தைக் கொண்டுவந்தது சமூக நலத்திற்காக அல்ல, மாறாகத் தங்கள் அரசியல் ஆதாயத்திற்காகவே இந்த மதுவிலக்கைக் கொண்டுவந்துள்ளார். இதன் மூலம் 50, 60 விழுக்காடு வாக்குகளை தன்னகத்தே வைத்துக்கொள்ளுவார் என்று கூறியிருக்கிறார். எது எப்படியோ, காரணம் எதுவாக இருப்பினும், சமுதாயத்தை கரையான் புற்றாக அரித்துக்கொண்டிருந்த மதுவை ஒழித்த பெருமை நிதீசு குமார் அரசிற்கு உண்டு. இந்த 3000 கோடி உரூபாயை வசூல் செய்ய வேறு வழி இல்லாமல் இல்லை. மக்கள் அவதியுறாத வண்ணம் இந்தத் தொகையினை பீகார் மாநில அரசு எளிதாகப் பெற்றுவிட முடியும். இந்த மது விலக்கை எதிர்த்து உச்சநீதி மன்றம், உயர்நீதி மன்றங்களில் பல்வேறு வழக்குகள் தொடரப்பட்டுள்ளன. கேரளாவில், “பூரண மதுவிலக்கு எங்கள் கொள்கை அதைப் படிப்படியாக நிறைவேற்றுவோம்” என்று சில கட்டுப்பாடுகளை அம்மாநில அரசு முன்னெடுத்துள்ளது. இதையெதிர்த்தும் வழக்குகள் தொடரப்பட்டுள்ளன. மக்கள் நலனில் அக்கறை உள்ள நீதிமன்றங்களால் அவை தள்ளுபடி செய்யப்பட்டன. அதுபோலவே பாட்னா உயர்நீதி மன்றத்தில் தொடரப்பட்டுள்ள வழக்குகளும் தள்ளுபடியாக வேண்டும் என்று எதிர்பார்க்கலாம். இதேபோல நம் தமிழ்நாட்டிலும் மதுவிலக்கு வேண்டி மகாநாடு நடத்தத் திட்டமிட்டனர். ஆனால் அம்மகாநாடு தேசத்துரோக சட்டத்தின்கீழ் தடை செய்யப்பட்டது. தேசத் துரோகம் என்று சொல்வதற்கான காரணம் என்ன என்று தெரியவில்லை. மதுவிலக்கைக் கோரி உயிர் துறந்த காந்தியவாதி பிறந்த மண்ணில் மக்கள் நல்வாழ்வு வேண்டி நடத்தப்படும் இதுபோன்ற மகாநாடுகள் தேசத்துரோகமா?

சப்பானிய நாட்டில் பிறப்பு விகிதம் குறைந்துகொண்டே வருவதால் 60 வயதிற்கு மேற்பட்ட முதியோர்கள் எண்ணிக்கை 50 சதவிகிதத்தைத் தாண்டியுள்ளது. எல்லா நாடுகளிலும் வேலை இல்லாத நிலை இருக்கும்போது இங்கு மட்டும் வேலை செய்யக்கூடிய இளைய சமுதாயம் குறைந்துள்ளது என்று அந்நாட்டின் அரசு வருத்தப்பட்டு இளைய சமுதாயத்தின் வளர்ச்சி விகிதத்தை அதிகப்படுத்துவதற்கான முயற்சியில் ஈடுபட்டுள்ளது. சீனாவிலும், இதேபோல இளைய சமுதாயத்தினரின் எண்ணிக்கை குறைந்து வருவதால் ஒரு குழந்தைதான் பெற்றுக்கொள்ள வேண்டும் என்ற தங்களுடைய கொள்கையை மாற்றி ஒரு தம்பதியினர் இரண்டு குழந்தைகள் பெற்றுக்கொள்ளலாம் என்று அறிவித்துள்ளனர். உலக அளவில் 40 சதவிகிதத்திற்கும் அதிகமாக இளைய சமுதாயத்தினர் உள்ள ஒரே நாடு இந்தியாதான். ஒவ்வொரு நாடும் தங்கள் நாட்டின் இளைய சமுதாயத்தினரை தங்கள் நாட்டின் செல்வமாகக் கருதிப் பார்க்கின்ற இக்காலகட்டத்தில் நம் நாட்டில், குறிப்பாக தமிழகத்தில் இளைய சமுதாயத்தை பாதாளத்தில் தள்ளக்கூடிய மது விற்பனையை அரசே ஏற்று நடத்தி அதன் மூலமாக ஆண்டிற்கு 20,000 கோடி, 30,000 கோடி என்று வருமானத்தைப் பெருக்கத் துணிவது வேதனைக்குரிய செயலாகிறது. நமது நாட்டின் இளைஞர் சமுதாயத்தை அழிக்கத் துணிகிறோம் என்பதே நிதர்சனம் .

April 8, 2016